على قد الغدر اعذريني

يا جماعه صايره عندي مشكله بالتسجيل اتمنى اذا استبطيتوني تراسلوني ع الايميل المسجل لديكم اعني بكلامي الاداره حتى يتم حل الموضوع ع خير

البارت الثامن
:
-
انت للعين نظرها يا سيّد المزايين❤️
:
-
نرجع للشاليه اللي كانوا واقفين يناظرون من الدريشه بعد ما شافوا الموقف اللي بينهم وحركة مياري وهي تمسك عمر اللي كان بيبعد عنها ابتسم بو عبدالله وهو ينطق: بداية الغيث قطره ياخويه .
ابتسم براحه وهز راسه بالايجاب بصمت وهو مازال يبتسم واللتفتوا لحارب اللي قال: طالع عيون ولدك يا عمي كيف منصدم من مسّكته ميّور من ايده.
ضحك عمه اللي انبّسط من حركتها وابتعد عن الدريشه متجهه للكراسي وهو يزفر براحه ونطق بـ: لا تلومه يا حارب قلبه وروحه متعلّقين بأختگ .
هز راسه ونطق: عسى الله يهنيهم ويسعدهم يارب.
ابتسم عمه وهو يأمن على دعوة حارب .
والبقيّه اللي هم ( عبدالله وحارب وابوه + البنات الليي هن سلامه وسلمى ومريم ) مستمرين واقفين عند الدريشه يشوفون اللقاء الاولى وكيف بينتهي هاللقاء بينهم؛ منهم اللي فرحان لهم ، ومنهم اللي غابطنها على عمر ، ومنهم اللي تمنى يكون مكانها بـ هاللحظه ؛ شهقت سلمى بصرخه وهي تقول لسلامه: طالعييييييي ردة فعله الله رومانسي يحظهاااا بعمر والله ... وابترت جملّتها من قرصتها سلامه تنبهها بوجودهم وشهقت بخوف من نظرة حارب اللي طالعها بطرف عينه وهو يحدّ نظرته عليها بوّعييّد وعبدالله اللي طالعها بعصبيه من فوق لين تحت ورجع يطالعهم وهو متغصص بلع ريقه بضيقه هو الوحيد اللي يشوف شيء مايشوفونه يشوف خوفها ورهبتها من عمر وقربه منها ولكن هم مفسرينه انه خجل ودلع لكنهم يجهلون الحقيقه وهو يدري زين مازين انّها بتموت من كثر ماهي ترجف من بين ايديه وكأنه يشوفها بذاك الموقف المشؤوم وزفر أنفاسه بضيق وتوسعت عيونه على الاخر من شافه حوّط مياري من كتوفها وقرّبها لحضنه شد على اعصابه من منظرهم وهو يشوفهم متوجهين لسيارة عمر وكوّر ايديه من شدة غضبه وقهره لدرجة عروق يده برزت من غيضه ومن غير لايحس ضرب بيده على اليدار خايف لا يبان المستور وتنفضح بنت عمه في ليلة عرسها انتبه على ضحكة حارب اللي قال: عمي ولدك مضيّع ذهنه شل اختيه بسيارته وطلع من الشاليه حتى ما قال عندها اهل استاذن منهم بانهم يسمحون لي اشل بنتهم ويايه ماصدق مياري الخوافه تروح معاه بروحهم.
ضحك عمه وهو يقول: من زمان ولد عمك عقله ضايع مب من اليوم وازفر براحه وهو يكمل كلامه خلهم يا حارب تحت الله شو تبا تراقب حركاتهم خلهم عسى نفوسهم تزين وتهدأ.
ضحك عبدالله بسخريه على كلامهم وهو يقول في نفسه اقص ايدي اذا مياري ما خافت اضعاف خوفها الحالي ليلة العرس.
ابعدوا من الدريشه وكل واحد راح وقعد على كرسيه وبدوا يتقهويون ويسولفون والبنات بينهم متوسطين القعده ومريم اللي فرحت من فرحة عمر وحطت شيلة زايد بن سابر وهي تقول: سمعوا سمعوا حال عمر مجسدّنه زايد بن سابر في هالشيله وشبكت البلوتوث على سماعات السبيكر اللي في الميّلس وبدت تشغلها بكل فرحه مستوطنه قلبها جاهله عن عيون الشخص اللي من كثر حبه وشوقه لها وده يحطها بين ضلوع صدره من يوم حبها وعرف انهاا ملكت قلبه وشالعتنه من قصاه ولاقدر ينساها ابدا حتى بعد زواجه من غيرها ما ينسى يوم عبدالله خرب خطبته منها ومن حس انّ ابوه وعمه ممكن تتأثر علاقتهم ببعض انهوها بود وبرضى الطرفين ولكن في الوقت الحالي مايملك غير انه يسكت ويلتزم الصمت واحترامه لنفسه ولمرته ولها ولعمها مستحيل انه يسبب لها احراج مع اهلها واخوانها رغم حبها اللي يكبر بقلبه وانتبه على الشيله اللي اشتغلت { ياحبيبن ما يجي وينه ••عني قاطع في مواصيله••ليه ما يرحم محبينه••والغلا مافيه ابد حيله••ارجع ارجع والفرح حينه••يوم تاتي لي مراسيله••زين طاري الحب يازينه••يا يجيني يا انا اجيله••لبى قلبه لبى عينه••لبى قده وكل ميله••وكل يوم اقول وينه••هوه وينه بس وينه••ادعي الله كل ليله••دايم ابقى دوم قربه••وتهتني عيني بعينه••ياخفيف الدم و الطينه••طيفك اللي امس شحليله••زارني والشوق في عينه••عقب ذا مانمت لي ليله••شين حمس البعد ياشينه••وزين كيف القرب مع هيله••ياعنب وتوت يا تينه••سيد كل الحسن في جيله••لبى قلبه لبى عينه••كل يوم يزيد حبه••وكل يوم اقول وينه••هوه وينه بس وينه••ادعي الله كل ليله••دايم ابقى دوم قربه••وتهتني عيني بعينه••احب صعبه في رجا لينه••احب صمته واهتوي قيله••اكرمه يا لله و لا تهينه••يابعد عمري وكلي له••بيني انا وبين مابينه••حب غير وصعب تأويله••كيمياء الذوق في جينه••ويل قلبي منه ياويله••لبى قلبه لبى عينه••لبى قده وكل ميله••كل يوم يزيد حبه••وكل يوم اقول وينه••هوه وينه بس وينه••ادعي الله كل ليله••دايم ابقى دوم قربه••وتهتني عيني بعينه}.
هذي الشيله خذت اغلب الحاضرين اللي في الميلس لبعيد منهم سلمى اللي تفكر بعبدالله وحبهاا الواضح له من عيونها وحركاتها وخفة عقلها وفرحتها بنظرته يوم عصب عليها من قالت بـاللحظه اللي عمر تلّهف للمسة يد ميّاري فـسرة نظرته على انه غار عليها من عمر ، اما نظرته هو كانت عكس تفكيرها مايدرون عن الشيء اللي داخل قلب مياري واللي تعانيه.
ومها تفكر بحامد حبيبها وريلها كيف صدق تعلّقت فيه وبشده من اول ايام زواجهم ولين اليوم رغم ان زواجهم كان عادي جداً واهلي ما كان من اختيارهم، عبدالله اللي كان ضايق خاطره فعلاً على مياري مايعرفون بأنه باجر بيتغيّر حال مياري وحال عمر بسبب تهوره واندفاعه وحقده اللي اعمى قلبه وبصيرته وتجاهل كل صراخها ودموعها وتوسلاتها له بانها تبعده عنها ويرحم ضعفها يحس انه لين الحين يسمع بكاها وترجيها لين الحين يسمع انييين آلمها وعذابها لين الحين يشوف خوفها من كل رجل تشوفه ما يضمن ردة فعل عمر اخوه بعد مايعرف بأنها ماهي عذراء ولابكر وهو اللي حارب الزواج كل هالسنين لين توصل السن القانوني ويخطبها وبالفعل من يوم كملت ١٨ سنه من بعد تخرجها من الثانوويه العامه وهو تقدم رسمي يخطبها وهي ترفض بحجة انها تبا تدخل الجامعه وفعلاً دخلت الجامعة وفي كل سنه يخطبها وترفض بحجة الدراسه وكانت تقولهم الله يوفقه مع غيري لكن ما كان يسمع لها ابداً وانتظرها لين خلصت الجامعه وتدربت وخذت الشهاده ومن ثم كثروا خطابها فوقف في وييهم وحطوها امام الامر الواقع رجع على واقعه من هزه هادي ونهيان اللي دخلوا وماحس فيهم سلّم على هادي ونهيان وحاول يتناسى افكاره.
:
هادي اصغر عم لهم عمره ٣٦ سنه مطلق ومن بعدها ما تزوج مقضيّ حياته سفر وحواطه مع الشباب ولكنه عاقل ورزين .
:
نهيان عمهم من الاب امه غير ام هادي واحمد وخالد عمره ٢٩ سنه عايش عند اهل امه (خواله) بس ايي وقت المناسبات عندهم ووده لو يقعد عندهم على طول لان جوهم يعيّبه ويحب قربهم من بعض وخوفهم على عيالهم من الفراق او ان يصير زعل بينهم.
:
-
هادي يضحك على عبدالله وسرحانه اللي مستمر فيه ونطق بصيغه غزليّه : هيييههاااء الفكر سارح بظبيّ تل معاليق القلب تل قاعدٍ وسط الحضور جسد ولا الروح فيك هيّمانه .وسوالم.
الجميع:صح منطوقك
هادي ببتسامه من شاف مريم مقبّله عليهم: صح بدنكم! ووقف بحب لها وهو يفتح ايديه لها من بعد ما سلمت على عمها نهيان وراحت لهادي اللي وسدّها حضنه وهو يلمها بكل شوق ويحوّطها بكلتا يديه ويشد عليها ارخى راسه عل كتفها ونطق بضيق: فديت زول ويهج من تقبلين عليّه والله اني افرح واستانس لو اني بعز ضيقتيه تتلاشى من شوفج.
اابتسمت باحراج واضح وبان هالشيء للقاعدين جميعهم وطوقت عمها بيديها بحب ونطقت و وهي تمسح بيدها على ظهره: جعل الضيم بقلبي مايدل درب قلبك.
شد بحضنه زود عليها وهو ينطق : عوذ بالله من الشر ومن فال منطوقج لا عاد تقولين هالكلام اموت لو يصير فيج شيء كل هذا وهم مب حاسين بـ اللي قلبه يحترق من نار الغيره وتكويه بليعات الشوق مطلبه القرب ولكنها بعيده عنه بعد السهيل عن الجدي وحاسد هادي على قربها والتمتع بحضنها.
ابتعدت عنه وسحبها من يدها وقعّدها قربه عالكرسي انتبه على رنة تلفون عبدالله اللي فز واقف عشان يرد على المتصل ونطق بو عبدالله::ايييه يا هادي لو انته معرس جان الحين عيالك بين حضنك يلّوس.
زفر بضيق وهو يمدد ايده محاوط كتف مريوم: ماعليه ان شاء الله يستوي خير ياخوي.
بو عبدالله بتطنيز: لو انته مب عمها جان يوزتك مريوم .
ابتسم هادي بقلب محبب: لو شرّعاً يجوز جان ماخليتها بوسط بيتك ياخوي جان من زمان خاطفنها منك وضحك من شاف حياها وخجلها الواضح واحمرار وجنتيّها صد على البنات اللي دخلن سلامه وسلمى اللي سلمن على عمهن نهيان ومن بعده هادي اللي نطق: غزالكن وين !؟
ضحكت سلامه وهي تنطق: عند عمر .
هز راسه ورجع قعد واللّتفت لنهيان ونطق: شيء فيك!
هز راسه بالرفض وهو يتنهد بضيق.
:
عند عبدالله اللي كان يكلم راشد وهو قاعد في سيارته والضيق متملّكنه من كل النواحي ونطق بغيض: شو اسوي راشد عندك حل فيدني.
راشد بقهر منه: ياخي تصرف ترا باجر عمر اخوك ما راح يستر عليها واعتقد انته تعرفه يوم يعصب شفت الحب اللي بعيونه لها راح يتحول لنار وبراكين وكرهه والموضوع بيصير فيه تحدي وانتقام على هالسنين اللي عاش فيها وهو يترياها تكون حليلته.
سكت بقهر وهوو يدق بيده على السكان بكل قوته وقهره وقهر الدنيا فيه عض على شفاته بقهر من شاف سيارة عمر داخله داخل سور الشاليه ووقف سيارته بقرب من ملحق البنات ونزلوا من السياره ودخلوا للميلس نطق بعد مده من الصمت: يعني استوي طرف ثالث في السالفه واصارحه واخرب بينهم ولا شو بالضبط مخي ترا متشتت مب عارف شو اسوي بالضبط عشان اوقف هالزواج.
راشد بقهر : حرام عليك يا عبدالله والله حرام في مليون طريقهه تخليك تتصرف اقلها المواجه شوف لك طريقه وتواجه معاها قولها شو بتقولين لعمر بعد العرس لين متى
بتمين تتهربين منه مرده يقربج وعقب شو بتقولين له
تنهد بضيقه ونطق: يا ريال هاي من تشوفني انتفضت ورجف جسمها رجف وين بروم اواجها!
راشد بدا يعصب منه ولكنه مسك نفسه: تصرف ياخوي والحين استاذنك وصلت عند الاهل وسكر وهو متضايق من عبدالله واللامبالاه اللي فيه بروده غريب جدا .
:

انتهى الباىت الثامن

ضامية الشوق ,مديونه ,نظرة الحب معجبون بهذا

راح اقرأ من الخامس الى الثامن
وراح ارجع لك

مديونه ,دجى الليل معجبون بهذا

يا مرحبا بج يا نظرة الحب تنورين

مديونه معجب بهذا

يالله دجى اغرقتيني في الروايه
ممتعه لين ذلحين

دجى الليل معجب بهذا

البارت التاسع
:
-
دخـيـل الله ومن بعد الله دخـيـلـگ ..
:
-

نرجع لشاليه بعد مرور وقت زمني بسيط ووقت العصيّر جميعهم فرشوا فراشهم قرب البحر وحطوا فوالتهم وعمر وحامد وحارب ونهيان يتسبحون في البحر ، اما بو عبدالله وبو حامد قاعدين عند الحريم ويتقهويون ويسولفون في امور كثيره ومنها أمور الشركة صادراتها ووارداتها، اما ام حامد وام عبدالله فهنّ قاعدات يغرفن من الفواله( اللي هي الضيّافة) للرياييل ومن بين زحمة سوالفهم وضحكهم نطقت ام حامد لمياري اللي كانت تسولف مع مريم وهي تضحك: مياري امي قومي سيري شاليه الشباب وهاتي ثياب لاخوانج عن يمرضون الجو بارد وهم ناسيين عمارهم.
وسعت عيونها من الربكه ومن فكرة تواجدها في شاليهم الخاص هزت راسها بالرفض ونطقت بضيق: امي مب صغار هم كل واحد منهم ما شاء الله اطول عن الثاني وكبار وعارفين مصلحتهم واحد معرس والثاني بيلحقه باذن الله مايعرفون ان السبوح في هالوقت وبـ هالجو بالذات مب زين وانـ..... قاطعتها امها بعدم اعجاب من كلامها وحدّتها بالنظر وهي تنطق بقسوه: قومي فزي من مكانج يوم أأمر عليج لا تيلسين ترادديني وتناقشيني.
قامت مياري بضيق وهي تنطق بـ: ان شاء الله وتوجهت لشاليه الشباب وهي متضايقه من امها وكلامها هي مب قصدها ترادد امها ولا قصدها تناقش امها أصلًا في اللي أمرتها فيه ولكن كل خوفها من تواجدها بمكان خاص للذكور خوف من انها تصادف حد فيهم لانه مكانهم وخاص فيهم خذتها ريولها لأبعد مكان في الشاليه تنهدت بضيق من افكارها اللي ضاعت فيها وخلتها تضيّع الباب الرئيسي للمدخل اللّتفتت راجعه ودخلت من باب المطبخ وهي تتأفف بتضجر وتتحرطم: يعني حامد معرّس المفروض حرمته تيب له ثياب ركبت الدرج وهي ترجف من فكرة وجود حد هنيه لكن حروّب الشكوى لله لين الحين اعزّب مادري متى على الله يعرس وحرمته تخدمه وتقوم بمهامها وصلت نص الصاله واللّتفتت بضحك وهي تقول بغباء: يعني بالله الحين كيف اعرف غرفهم عن غرف باقي الشباب تنهدت بضيقه وهي تقول: خير الامورِ اوسطها توكلت على الله وتقدّمت بخطاويها للغرفه ومن فتحة مقبض الباب وفتح وياها وتنهدت براحه من حست بهدوء الغرفه والهوى اللي يحرك الستاره ومنظر البحر اللي اسرّها فعلاً من خلال سطوع اشعة الشمس بخيوطها الذهبيه على سطح البحر اللي زاد جمال البحر جمالاً فوق جماله تنهدت بعمق وهي تقول: سبحان ربي اللي خلق هالجمال وهالطبيعه يالله ما اعظمگ ..
من ادركت الوقت لفت بسرعه وهي تفتح الكبت وطلعت كندورتين ووزارين وفانيلتين ومنشفتين وطلعت من الغرفه بسرعه وهي نازله بنص الدريّ شافت مريوم وسلمى يايات وضحكهن واصل لين عندها وقالت بعصبيه: لا والله الشيخات يايات تتسّحبن(يعني تمشن بهدوء ورويّه) وتضحكن .
مريوم وهي تقرب منها وتشل عنها الملابس قالت بشوق: استبطيناج وقلنا بنسير نشوفج اشتقنالج مارمنا على بعادج.
عطتها مياري الثياب وهي تقول: هيه امبيّن الشوق يا بنت عمي جان ما خليتيني بروحي وييتي معايه من اول ما عطتني امي الامر مبـ..
وقاطعت كلامها سلمى وهي تقول بتضجر من حرّطمت مياري: مياري امي تقولج سوي قهوه وجاهي وقطعي السويتات في الصحون وانا ومريامي بنودي الثياب وبنرد نساعدج ونشل عنج الفواله.
تاففت مياري بقهر من تحكم امها فيها وانها تسوي القهوه هنيه ردت بضيق: ليش انا اللي اسوي ليش مب انتن ! مب عساس اني ساايره اييب ثياب لأخوانج وأرد عندهم وتين الحين تقولين لي انّ تحوّل الموضوع من ثياب للمطبخ وعبالته.
ضحكت سلمى وهي تقول: عاد حظج امج ناويه عليج بالكراف قبل لاتعرسين وتطلعين من البيت. ولفت عنها وهي تسحب مريوم وقالت بصوت عالي تقهر مياري: الله يعين اخوج على مياري وحلطمتها اللي في الساعه مادري كم كلمه بتعق.
ضربتها مريم على كتفها بقوه شوي وهي تقول: ترا ما ارضى عليها حرمة خيّو هاي الغاليه وقبلها بنت عمي لذلك حافظي على لسانج المتمرد وخففي من نظراتج العاشقة ووسعت خطواتها وهي تتعداها بضيق كله ولا مياري حد يدوس لها على طرف وقتها مريم تتحول لشخص اخر غير معهود لكن اللي متعبنها بعد ميّاري عنها وتهربها من القعده في بيتهم من بعد ما صار اللي صار لمياري قللت روحتها لبيت عمها وقامت تدرس وتسوي مشاريعها في بيتهم فما كانت مريم تعرف أسباب بعدها ولا أسباب سكوتها وعدم التحاور معاها تحسها كانت شمعه وانطفت ،اما سلمى فاستغربت من زعل مريم على مزاحها مع ميّور.
اما ميّور من بعد ما راحن عنها البنات وشلن الثياب عنها دخلت المطبخ وهي تتنهد بضيق من طاري العرس ومن اسلوب امها وابوها اللي تغيّر من يوم قالت لعمر انّها مجبوره وزعل عمها عليها ومحاتاة ابوها لأخوه وزعله وزعل ولد اخوه ومحد ضايع بالطوشه الا هي تنهدت بضجر في سبيل انها تنسى زعلهم وطلّعت غلّايتين للشاي والقهوة وحطتهن على الغاز وبدات تسوي قهوتها وشاهيها وهي تحط المكونات وتوجهت للكبت تطلع الدلال وبعدها فتحت الثلاجه وهي تطلّع صيّـاني السويت عشان ترتبهم لين ايون سلمى ومريوم ويشلون عنها صياني السويت..
:
-
في جهه ثانيه من الشاليه وفي احدى الغرف اللي فوق كان توه قايم من النوم وحس بثقل في راسه وصداع فضيع وقوي وكأنه الالم بينخر جمجمة راسه نخار من قوة الالم وشدته اللي يشعر بها وحرارة جسمه اللي ارتفعت فجأة وقام واقف من مكانه بيروح لغرفته بياخذ ملابسه وبيتسبح وبيّنزل عندهم ،وطلّع من غرفة اخوه رايح لغرفته وهو يحس بثقل العالم كله على جسمه مايعرف اصلاً كيف نام في غرفة حمد توه ينتبه انه نام في غرفة اخوه وصل غرفته ولفحه الهوى من البلكونه اللي فتحها اول ماوصل لغرفته ونساها تجاهل البلكونه وهو يدخل الحمام يتسبح بمحاولة انه يصحصح وطلع بسرعه فتح كبته وعقد حواجبه بغضب من مالقى ثيابه مسك منشفته ونشف جسمه وفتح الدرج وخذ فولترين بودر وحطه مع الماي ومن ثم شربه دفعه وحده تحنحن وطلع متجهه لغرفة حمد خذ من عنده وزار وفانيله وكندوره ولبسها ومسك جاكيته وحطه على ظهره وخذ الشال وتلثم فيه عن البرد وخلى بس عيونه اللي ظاهرات ونزل بعد ما حس انّه شوّي احسن عن قبل وعقد حواجبه باستغراب من وصلته ريحة القهوه والشاي دخل المطبخ بفضول منه يبا يعرف من اللي متكرم منهم وقايم يسوي لهم قهوه وشاي وقفت خطاويه بصدمه من عرف اللي في المطبخ من تكون كيف مايعرفها وهي شاغله تفكيره ليل ونهار وصوت ضميره اللي مأنبنه على اللي سواه فيها ماهو قادر يتجاهل حقيقة انها مب عذراء وبتكون لعمر اخوه وهي ضحيّة طيشه الشبابي صحى من غفلّته على صوت صراخها تقدم منها بخطوات متسارعه وحط يده على شفاتها وهو ينطق بهمس: اصصصصصصصصصصص هذا انا عبدالله وفتح لثمة الشال عن ويهه وسعت عيونها بصدمه من وجوده ما اسعفتها ريولها وخانتها بثبات في وقفتها وطاحت من طولها على ركبتها وضمت ركبتيها لها وهي تبكي ارتبك عبدالله وماعرف شو يسوي ضعفها يقتله مليون مره في الثانيه نطق بهدوء مع ضيقه: مياري انا اسسف
وانتهى البارت التاسع

ضامية الشوق معجب بهذا

لي عوده إن شاء الله

دجى الليل معجب بهذا

رواية جميله
سلمتي

دجى الليل معجب بهذا

المشاركة الأصلية كتبت بواسطة دجى الليل

البارت الثاني
:
-يا عزتي يوم كلٍ له عزوه .. وانا عزوتي بينهم تفرح حجاجه وقلبي ينعيّ الفرح ويبكيّه
:
-
تنهدت بتعب وبعدها كملت كلامها اليوم هي بتكون رسميّاً حرم عمر ما تقولون لي يوم يبا الشيخ يسالها وياخذ موافقتها شو بتقولون له ولها الله يستر من ردة فعلها قدام الشيخ.
نطقت المها بضيق: يا جماعه استهدوا بالله وعمي بيّحل الموضوع دخل حارب وحامد ونطق حامد بضيق: وينها نور البيت وضيء اخوها .
اشرت له المها بانه فوق راحوا لها حامد وحارب ودقوا الباب من فتحت لهم الباب خافت منهم ونطقت بسرعه: شو مستوي ابويه وين بخير !!
هزوا روسهم وهم يدخلون داخل وحامد قرب منها يحضنها: ضيء اخوها وامانه ومأمنه انتي يا عيونه.
خافت من كلامه وابتعدت عن حضنه وهي تنشف راسها بالفوطه ونطقت بضيق: شفيكم كلامكم يخوّف !
حارب مايعرف يبدا بالمواضيع نطق: ليش خايفه شو فيج! اخوان ويايين عند اختهم!
حامد تنهد بضيق ولف عليه وهو يقول: حارب خلني معاها شوي وانته غطي علينا الله يخليگ..
هز راسه وطلع وسكر الباب وراه مسح حامد على ويهه بضيق وهو محتار مب عارف حتى كيف يبدا وياها بالموضوع
دامت لحظة صمت من بينهم وهو يفكر كيف يبدا بالموضوع وهي تشوف الحيره في عيونه وتتأمل حركاته وتوتره نطقت هي عشان تسهل عليه: في شيء صاير وانا ماعرف عنه ياخويه مضايقنك شيء.
سحب نفس عميق وهو ينطق: سمعي مياري الكلام اللي بقوله لازم تفهمينه بعقلانية ( هزت راسها بصمت وهي حاسه بالخوف) استرسل كلامه بعد موضوع خطبة اهل مروان لج عمر ولد عمي درى واحتشر و..
قاطعته وهي تحس النفس عندها بيوقف بـ: اختصر حامد دخيلك احس راسي بدا يعورني.
بصعوبه نطق: ابويه عطاج لعمر والليله ملجتج والشيخ على وصول.
نطقت بخوف وهي تفز واقفه: لااااااا لاااااااااااااحامد والله العظيم ان ...
قاطعها وهو يحضنها: اووووووش سكتي خليني اكمل تكفين ماعندي وقت انتي تحبين حد خاطرج يبا حد عشان جي ترفضين المعاريس.
هزت راسها بالنفي وبانهيار نطقت: لا والله العظيم لااالااا مافي قلبي حد لكني ماريد اعرس يا حامد مب ...
ماقدرت تنطق من نوبة البكاء اللي باغتتها وانهارت بهاللحظه بحضنه وحضنته.
عض على شفته بقهر ونطق بضيق: ليتني اعرف اسبابج اللي تخليج تزفضين الخطاطيب عشان اقدر اوقف في ويههم كلهم لكن يا عيوني الحين ما ينفع الكلام ولا ينفع شيء ابداً.
نطقت بانهيار: ليششششش يا حامد تسون فيني جي ليششششش !!
انفتح الباب ودخل ابوها وبحنيّه نطق:مياري وبعدين معاج يرضيج اني اكسر كلمتي قدامهم وارفضهم ويطلعون مفتشلين وانا انفضّح عندالعرب .
هزت راسها بلا ونطق هو: يلا عيل استعيّلي ونزلي تحت وابا اسمع كلمة موافقه عند الباب وطلع عنها وحامد اللتفت لها بضيق باس راسها وطلع.
تحس نفسها تايهه وعايشه في صدمه ودوااامه كبيره مالها نهايه ولا مخرج قعدت تبكي بإنهيار شلون توافق وتفضح نفسها واهلها عند ولد عمها لا هو يعرف ظروفها ولا هو يعرف باللي صار لها .
ماعرفت شلون تتصرف او كيف ماخطر على بالها حل ابداً كييف توافق وبعدين اذا عرف ما بيصدقها مستحيل ولا بيرضى بها كزوجه ولا هي قادره تكون ام لعياله قامت للحمام تتغسل وهي مب عارفه كيف تتصرف.
:
-
عند الريّاييل في الميلس الكل كان فرحان بأن اليوم هو عقد قران عمر اللي فرحته محد يضاهيها طلع حامد برى وشاف عمر اللي قاعد في سيارته وقف يبتسم وهو يتأمل ربشة عمر وفرحته وكيف يتعطر ونزل وبطل الباب اللي ورى طلع غترته وعقاله ورجع لمرتبته يضبط الغتره والعقال ومن ثم نزل ووازن نسفة غترته وضبطها وسكر الباب واتجهه لحامد وابتسامته ما فارقته ابداً وصل عند حامد ونطق وهو يقول: كيف ولد عمك!
ابتسم حامد وقال بفرحه مماثله لفرحته: ما يحتاي يا ولد العم ماتخررب ربي يتمم فرحتك يا الغالي.
ابتسم عمر بحب وهو يأمن على جملته ودخلوا وشافوا الشيخ اللي واصل له فتره بس يعبي البيانات ويشوف الاوراق تيّبس الدم بعروقه ووقفت كل خليّه تـنبض فيه من قال الشيخ: اوراق الفحوصات وين!
تلعثم وهو يطالع عمه اللي نطق: والله بعدهم مافحصوا يا شيخ المووضوع صار بسرعه بسرعه.
نطق المملك: لابد من الفحوصات بدونها ماقدر اني اسوي شي لذلك غداً تجهزونهن ضروري وبكرا نعقد.
نطق بو عبدالله: اليوم يا شيخ والفحوصات تخلص ونعطيك اياها .
تحت ضغطهم وافق الشيخ وعقد القران بينهم ومن نطق بانه يبا يسال البنت راح حامد لها ويابها بالميلس الثاني وهي ماتبا توافق بهالطريقه اللي مب عاجبتنها همس حامد بحنيّه: دخيلج لا ترديني وتفشليني وتفشلين ابويه قدام الرياييل عمر ما اختارج عبث وبعدين صدقيني بتتقبلين الوضع و...بتر جملته من قاطعته وهي تهز راسها بصمت تمنعه من الكلام وطلعت منها شهقه لاشعورياً وهي ترجف وتنتفض ماهي قادرة تسيّطر على شعورها من نطق الشيخ من ورى الباب تحت صدمة حامد من رجفتها الغير طبيعيه الشيء اللي اكد له انه اخته تعاني من شيء لان فزتها اليوم الظهر ماعجبته ابداً والحين زادت شكوكه:مياري احمد الـ.... موافقه على الزواج من عمر بن خالد الـ...... ..
تحنحنت وهي بتنطق سبقتها شهقتها اللا اراديه ورجع الشيخ مره ثانيه يسالها وهزت راسه بالايجاب ونطقت بصعوبه بين شهقاتها المتتاليه بالموافقه غصباً عنها بربكه مع بحتها اللي اثرت في نفس عمر كثير وحس انها مهمومه ومهزوزه من الداخل رجعوا للميلس وضاق خاطره من تاخر حامد اتصل بحامد بس مارد عليه قام وشل عمره ودخل الميلس اللي كانوا فيه حامد ومياري ودخل وهو يسمع صوت حامد يقول: يا بنت الحلال صلي على النبي ترا والله العظيم ابويه وعمي وعمر هم اللي يبون اليوم الملجه وعمر يبا يضمن انج له مب لغيره.
انبح صوتها من كثر الصايح وشهقاتها المتتاليه اللي تقطع نفسها من كثر البكى نطق بضيق وهو يقول: مياري
مياري ببكاء يقطع القلب وشهقات متتاليه نطقت بغصه: شو يضمن يا حامد شو! يضمن اني له بموافقة ابويه مب بموافقتيه عايبنك انته اللي قاعد يصير اول مره ابويه يجبرني على شيء انا ماباه .
انصدم عمر من الكلام ودقات قلبه تسارعت دخل بدون صوت وهو يسمع حامد يقول: انزين اشرحي لي اسبابج والله بتلقيني اول من يوقف وياج.
شهقت بخوف من شافته ورى حامد ولصقت بحامد بخوف وهي تبكي صد على وراه وهو يشوف عمر اللي قرب وقعد عدالها وهي نشبت في حامد بخوف وتبكي بحرقه حاوطها بيديه وضمها لصدره وابعدها عن حامد بكل قوته وهو يقول: توكل حامد انا بتفاهم وياها!
طلع حامد بالفعل والشك بقلبه يزداد اخته صاير لها شيء ومحد يدري بها بينما هي تمت تبكي بخوف وجسدها ينتفض منه ومن قربه بشكل غير طبيعي حتى بانت الصدمه في ويهه بسبب رجفانها وخصوصاً ريلها اللي تمت تهتز بشكل غير طبيعي اثار جنونه بخوف عليها بأنه فيها شيء ابعد عنها بشوي ونطق بضيق: مياري اهدي فديتج خلاص تعبت والله تعبت لين ما نلت منايّه تكفين اسكتي عذبتيني وعذبتي قلبي بكلامج هذا اللي ماودي اسمعه من قال انها ماتهمني موافقتج وان عمي جبرج عليه وحتى ولو افترضنا انج مجبوره انا مستعد اخذ رايج الحين لكن لاتحرميني فرحه انتظرتها من اربعين سنه.
ماقدرت ترد عليه حنيته عليها زادت الوضع عندها سوء بسوء واكتفت بشهقاتها وعيونها اللي ماقدرت ترفعها من الارض ورجفة جسمها اللي ماقدرت تسيّطر عليها بعد عنها بضيق وهو يعتدل بيّلسته ويتامل انهيارها اللي مب عادي ابداً اول مره يحس بضعف وانه مب قادر يواسيها هو بروحه بعد ما كان الخبر عليه هيّن ابداً ماتوقع ان فرحته بتقلب مره وحده باللي سمعه وعرفه قام عنها وهو يقول: انا بسير الحين والصبح نلتقي باذن الله.
طلع عنها وهو ضايق صدره لقى حامد وحارب واقفين يتكلمون نطق حارب بضيق: شو صار بينكم!
رفع حواجبه عمر بعدم اعجاب ونطق: الحمدلله ما صار الا كل خير بس باجر ان شاء الله بنلتقي عشان الفحوصات.
هز راسه حامد وحارب نطق: انا بسير اشوفها ودخل ومالقاها ورقى للغرفه فوق ومن شافها تبكي على السرير دخل وحضنها وهو يقول: وافقتي غصباً عنج صح.!؟
ماردت عليه حضنها بحب وهو يقول: افا عليج ياختيه جان رفضتي !؟
ماردت عليه من غصتها شو تقول له وافقت وانا مجبورة من اللي حولي تنهد بضيق هو الاخر وطلع عنها وكملت بكاها بقهر على حالها قال فرحة انتظرتها من اربعين سنه اي فرحه يا عمر الا بتلقى الضيق والتعاسه يا عمر وش من مبرر بقوله لك في ذمتي ما تستاهل حد يكسر فرحتك لكن ماقول غير حسبي الله ونعم الوكيل على اللي كان السبب باللي انا فيه .
انتهى البارت الثانـي

الله يعني مياري قطعت قلبي
دجى سرد مميز الرواية
الله يعطيج العافية

دجى الليل معجب بهذا

المشاركة الأصلية كتبت بواسطة دجى الليل

البارت الثالث
:
-
:
يَا كُثر مَا رَافَقِت خِلّان وأَحبَاب
وَيَا كُثُر مَا في شِدّتي هَمَلُوني
عَلى كُثُر مَا أعِدهم سِتِر وحِجَاب
وعَلى كُثُر مَا احتَجِتهم وتَرَكُونِي
مِن صَارَت الخوّة ثَمَن حِفْنة ترَاب
نَفْس الوَجِيه اللي تصُون
نِسُوني مِن غِير ذِكر فروق وعرُوق وأَنْساب
كَانُوا ثَلاثَة والثَلاثَة جَفُوني
عَلّمتهُم وِشْلون الأَهداف تِنْصَاب
ولَمّا سَواعِدهُم قَوَت صَوّبونِي
عَشَانِي أَصْغَرهم عُمُر صَارُوا أَحْزَاب
عَشَاني أَصْدَقهم قَصيد اظَلَمُوني
اللي نَجَح اسمِي زَرَع فِيهم أَنيَاب
حتّى النَصيحَة مَا بَغُوا ينْصَحُونِي
دَام العَطَايا عِنْدهم دين وأَتْعَاب
والله لَو أطْلُب ذَنْبهم مَا عَطُوني
طَالِب نَصِيحة كِنّي طَالِب أَرقَاب
وهِي نَصيحَة كيف لَو زَوّجونِي
:
-
اما في بيت بو عبدالله وتحديداً في غرفة الوالدين ضاق صدره من شاف ولده بـ هالحال ونطق لحرمته: شو اللي صار وضيّق صدر عمر !
تنهدت بضيق: والله مادري حتى هي مكسىوره وتبكي ولا ادري شو صار بينهم يمكن عشانها ماهي متقبله موضوع الزواج هذا بكبره.
نطق بحيره: وش ظنج يا ام عبدالله البنت قدها عروس وخواتها كلهن عرسن الا هي ظنج البنت
قاطعته بتسرع: لاحشى بسم الله على بنات احمد مافيهن ردى ودرب الردى مب دربهن وبعدين وين كلهن عرسن باقي سلمى بعد ولا نسيتها.
تنهد بضيق وهو يقول: ما نسيتها نصيبها موجود وخلّصنا موضوعها وسكت بضيق وهو محيّرنه وضع بنت اخوه اللي يشوفه غريب ، اما ام عبدالله فما حبت تخوض في جملته اللي نطقها( مانسيتها نصيبها موجود) ولكن من شافت الضيقة على ويهه فضلّت انها تخليه على راحته وان بغى يقولها من نفسه يا حياه ومرحبابه وادارت نفسها لتبدل ملابسها وتنام بجانبه بأريحيه وشوقٍ منتظر لمحب قلبها اللي بيي من سفرته..
:
-

:
-
اما فـي غرفة عمر عيياء النوم يزوره اليوم انقلبت فرحته لضيق وضاق صدره من اللي سمعه كيف رجفت جسمها كانت غريبه واهتزاز ريولها الموضوع ابداً مب موضوع الموافقة مثل ما قالت هو متاكد ان الموضوع اكبر من جي تنهد بضيق وهو يخلل شعره بيده وشعور الحرقه بقلبه بعده ما برد صدح صوت المؤذن بانحاء الحي جميعها غمض عيونه بضيق وهو يردد ورى المؤذن ومن بعدها قام توضى وراح للمسيّد مع ابوه واخوانه وتلاقوا مع عمه وعياله صلوا وطلعوا وكل واحد بدربه سالك الا عمر اللي سحب حامد وقال بضيق: حامد
لف عليه بضيق وبان هالشيء لعمر من ملامحه ونطق: هلاا
عمر بضيق وهم: مياري شوفيها ! ليش من قربت منها احضنها رجفت رجفه مو طبيعيه ماهي رجفة مستحى ولاخجل ابداً رجفت خوف وتوتر حتى ريلها تهتز اهتزاز مب طبيعي !
بلع ريقه بضيق وبخوف نطق: والله ياخويه مادري شو فيها لاحظت عليها الرجفه انا بعد بس ان كان سؤالك اذا فيها مرض او تشكي من شيء لا ابداً الحمدلله صحيّاً هي ماتشتكي من اي علّه ولله الحمد.
تمتم بالحمدلله والشكر والثناء عليه ولف على حامد اللي قال: عمر !
طالعه بعيونه المحمّره دليل غضبه وكمل حامد كلامه بـ: ان كنت متردد تكمل عقب اللي شفته اليوم تراكم بعدكم على بر الامان.
طالعه عمر ورفع حاجبه بعدم اعجاب من كلامه ونطق بضيق وهو يقول: اسكت وايد احسن يا حامد قلبي يباها لو فيها مليون عله ولو فيها علل الدنيا كلها بس اهم شي اكون بقربها باقي عمري وتكون هي بين ايديّه وطلعت منه تنهيده تعبر عن كميّة الالم والقهر والضيق اللي في الصدره.
هز حامد راسه بالايجاب بصمت وكملوا لين بيتهم وصلوا عند البوابه ارتفعت عينه لدريشة معشوقته وتنهد بضيق وقهر على حالهاا ومر الوقت بشكل سريع وراحوا يفحصون عمر ومياري فالعياده وبعد ساعتين طلعت النتيجه وشلها عمر وودداها للمأذون اللي عقد لهم البارحه وكل حد رد بيته يريح .
:
-
في اليوم المنتظر لوصول عبدالله من السفر بعد ماتخرج بشهادة ماستر في ادارة المشاريع والاعمال كان البيت كله في حالة انشغال اليوم بيوصل نور عيونهم وفي نظرهم شيخ الشباب ريحة العود منتشره في البيت كله وروايح العطر من كل شكل ولون مصفوفه على طاولة الكنسوله لمدخل الصاله وترتيب الورد اللي حول الطاوله واللي مالي البيت كله واخوانه في المطار يتريونه بفرحه واول ماشافوه خذوه بالاحضان لانهم من عشر سنيين ما شافوه حتى اجازاته كان يقضيها بأوروبا ما كان له وييه يشوف بنت عمه اللي دمرها بـ لحظة طيش منه على شيء مالها ذنب فيه .
خذتهم السوالف مع بعض لين عبدالله نطق بغصه وبضيق: اخبار عمي وعياله!
رد حمد عليه: بخير يسرك حالهم اليوم كلهم عندنا في البيت معزومين على شرفگ ابتسم من دون نفس خايف يشوفها يا ترا شو حالها قدرت تتخطى ولالا ! تنهد بضيق من سند راسه على السيت وغمض عيونه وراحت به ذاكرته لذاك الزمان البعيد .. فلاش باك{ من بعد ما قام من النوم واستوعب اللي سواه حقيقه ولا خيال ولا كان كابوس من كثر كرهه لحامد وغيرته منه تخيل انه سوى فيها شيء ذاكرته بالفعل خانته بذاك الوقت لانه اعصابه كانت تلفانه ومن نزل للصاله ويلس عندهم من بين سوالفهم سمع عمر ومريم يسولفون عن المدرسه وعن مشروعهم وهو ما كان يعرف شخصية مياري الا لما رسبت في مادة الفيزياء اللي كان عليها شرح فيه ويوم عمر سال مريم قالت له انها كانت مريضه ومحمومه وماقدرت تداوم وبيعيدون لها بعد الامتحانات النهائية يذكر انه شافها مره في العياده ما كان يدري شو تسوي من قرى على الباب دكتوره نسائيه ضاق صدره لكن انصدم من سمعها تقول لامها في التلفون عندي موعد اسنان وبتاخر شويه على البيت وما انتبهت لوجوده لانها ماتوقعت رجل في عياده نسائيه وهو اللي كان ياي عشان اخته اليازيه عندها موعد مع دكتورتها النسائيه اللي تتابع حملها وكانت بايته عندهم حمّد ربه وشكره ان اليازيه بتتاخر شوي كان يبا يعرف شو فيها اللوم ذابحنه لكنه مايتجرا يعتذر سمع النيرس تنادي مياري احمد الـ... قرب وهو قلبه يدق خايف لايكون ورط بنت عمه في شيء سمعها تقول: معليش يا بنتي انتي صغيره والحياه قدامج لاتزعلين من اقدار الله لج الفحوصات طلعت نتيجتها قاطعتها مياري بضيق: خلاص لا تكملين تكفين وصلتني الرساله مشكوره وطلعت وهي مب منتبهه لوجوده وقلبها عورها من الحقيقه اللي سمعتها ركبت السياره وراحت البيت.
اما هو فطلب من النيرس اوراق الفحوصاات بحجة انه اخوها وقالت له بانها ماتقدر على الانجاب بسبب التشوهات اللي صارت لها .
انصدم من كلام النيرس وحس كأنه حد عطاه كف على ويهه ومن ظهرت اخته اليازيه على طول راح معاها البيت وهو ملتزم الصمت ومستحقر نفسه اي انتقام انتقمته يا عبدالله وانا اذيتها بيدي واذيتها في نفسها ! وصل البيت وكان الكل ملاحظ تغيّره وكيف بنت في عمرها راحت عشان تشوف شوفيها من دون ماتنطق بحرف واحد لاهلها حس نفسه واطي وحقير انه دمرها بكل ماتعنيه الكلمه من معنى ومن بعد ماخلص الثانويه راح الامريكا يدرس عشان ينساها لكن ماقدر ينسى فعلته وينساها وهي تترجاه يبعد عنه .... وانتهى الفلاش باك} ورجع لواقعه من ربت حمد اخوه على كتفه وقال: وصلنا يابو الشباب..
فتح عيونه بضيق وهو يمسح على يبهته بيده ولف على يمينه واخذ غرشة الماي اللي عداله وشرب منها شوي ونزل من السياره وانصدم بوجود عمه وعياله في استقباله مع ابوه قرب منهم وهو مستثقل خطواته وزاد عليه عمه من نطق: رفعة راسنا يا ولد خالد يعله بالمبارك .
ابتعد عن حضن ابوه وابتسم في ويه عمه وهو يحضنه وباس راسه ونطق: الله يبارك فيك يا الغالي دوم راسك مرفوع يا عمي مب بس اليوم .
ابتسم عمه وربت على كتفه وبدا يسلم على عيال عمه حامد كان سلامه حار بعكس عبدالله اللي كان بارد جداً وحارب ضمه بشوق وعبدالله بادله الحضن باقوى وشد عليه بثقل ياكسرة ظهرهم لو دروا باللي سويته في اختهم يا عبدالله كان يغصب نفسه على الابتسامه ودخلوا الميلس جميعهم ونطق ابوه: سر سلم على امك وحرمة عمك وخواتك داخل.
هز راسه بضيق وهو يحس بالخيبه فرحة عمه وعياله فيه وبرجوعه حتى حامد اللي زعلان منه فرحته بشوفة ولد عمه نسته الزعل وسلّم عليه سلام حار بيّن لعبدالله مدى شوقه وفقده له رغم ان شعور عبدالله اتجاهه شعور يسوده البرود واللامبالاه من سلم على حامد ولكن هو كسرهم كسر عمره ما ينجبر دخل وملامح ويهه تعبر عن اللي بداخله تلاشت فرحته من يت على باله كيف عايشه الحين هي حضن امه بذهن شارد وتفكيره فيها سيّطر عليه بعّد عنها وباس راسها وهو يحاول يبتسم قرب من عمته (حرمة عمه) اللي كانت تبكي بشوق لشوفته وحضنته وهي تقول: عنبو يا عبدالله 10 سنين ماحرك الشوق قلبك ولا حنيت لنا.
شد بحضنه عليها وفي خاطره عتاب ولوم لنفسه شارد عنكم وعنها هي بالذات مالي ويه اشوفها باس راسها ومسح دمعتها بيده وهو وده يعض اصابعه ندم يشوف انه ما يستاهل دموعها تنزل على واحد مثله بعد عنها وبدا يسلم على خواته وحده وحده لين وصل عند غلاوي بنت منصور اخوه حضنها بحب وهو يبوس خدها وسلم على سلامه من بعيد وسلم على بنات عمه كان وده يعرف منو من بنات عمه موجود وشافهن يتحمدن له بالسلامه وحط في باله انها مب موجوده بينهم اكيد لانها ما بتسلم عليه مستحيل كان مرتبك كثير وحمرار وييه دل على ذلك واستغربوا انه حمر ويهه بس فسروه انه مستحي منهن نزّل غلاوي من حضنه على الارض وقام واقف وهو يحس من اول مادخل عليهم ان في عيون تراقبه طاحت عينه في عين بنت عمه اللي ابتسمت له وهو توتر من الوضع ماهو عارف هذي منو علاقته مب ذاك الزود مع بنات عمه من قبل لا يسوي اللي سواه وهو علاقته معاهم سطحيّه مايعرف حتى اساميهن غير سلامه حرمة اخوه منصور ومياري اللي عرف اسمها بصدفه من مريم وفي العياده شافها وكانت متحجبه وكاشفهه ويهها تنهد وهو يقول: عن اذنكم بتسبح وبسير عند الرياييل.
نطقت عمته( ام حامد): والعشا الليله عندي يا بو حميد والله ما تردني.
تيّبست ريوله في مكانه من كرمها وكيف مهتمه فيه وتحاتي غيبته وفرحة كثير بشوفته وتحبه وايد نطق بضيق: ماعاش اللي يردج يا امايه.
راح فوق ودخل غرفته وشاف شنّاطه محطوطات على طرف الغرفه فتح كبته وطلع له كندوره وغتره وعقال ووزار ووفانيله ومنشفه شل المنشفه ودخل الحمام واغراضه حطها على السرير .
:
-
اما عندهم تحت زانت قعدتهم بعد ماشافوه وردت لهم روحهم بشوفه نطقت ام عبدالله: ليش مياري ما يت!
تلعثمت ام حامد مب عارفه شو تقول ولكن نطقت سلامه : تعبانه وتبا ترقد امس مارقدت زين توني مكلمتنها.
تضايقت ام عبدالله خايفه انهم يكونون جبروا مياري على عمر وهزت راسها بصمت ورفعت عينها لمريم وهي تقول: قومي يا بنتي سوي دخون وشلي العود ودخني اخوج قبل لا يسير عند رياييّل .
هزت راسها بطاعه وهي تقوم بسرعه تسوي الفحم وانتبهت على دخول بنت عمها سلمى تتبوسم وييهها محمر نطقت مريم بضحك: فرحانه بشوفته!
سلمى بفرحه ووناسه: وايييد والله واااااايد يا مريم .
تبسمت مريم وهي تشل الفحم وتحطه في المدخن: عن اذنج شوي وبييج شلت العود وطلعت من المطبخ وراحت فوق دخلت غرفته بعد مادقت الباب وسمعته يقول تعال دخلت ولقته جدام المرايه ينسف غترته على عقاله تقدمت له وهي تبتسم: فديتك عساني اشوفك معرس يا عبدالله وازفك بيدي لعروسك وغمزتله.
تبسم بضيق من هالطاري وهو يحاول يطردها من راسه مسك المدخن بيده ودخن غترته وحط المدخن تحت كندورته ومريم انحنت وهي تمسك طرف كندورته ولاحظت شروده ونطقت بغلاسه: اللي ماخذه عقلك تتهنى فيه يا الغالي.
نزل عيونه لها ورفع حاجبه بعدم اعجاب من كلامها ونطق هو بعد ما شل المدخن وحطه على التسريحه: مريامي منو من بنات عمي تحت.!
غمزتله مريم بدعابه: ليشششش تدور حبيبة القلب من بينهن!
انتفض قلبه بخوف من انها تعرف شي وساكته ومسكها من زندها وقال بحدّه بانت بصوته: كيييييف شو تقولين انتي اي حبيبه.
خافت مريم من عصبيته ونطقت بتسرع: والله اسفه امزح والله امزح بس كنت استهبل.
فج ايدها وابتسم غصباً عنه وقال وهو يشوف نفسه بالمنظره ومسك واحد من عطوراته وتعطر به: ليش خفتي انزين.
مريم بلعت ريقها: خوفتني عبدالله.
باس راسها باعتذار ورجع لسؤاله: ما قلتي لي منو موجود منهن استثني سلامه لانها حرمة منصور اخويه ، الباقيات منو !؟
تنهدت بتعب وهي تقول: سلمى وعايشه وخلود وخوله.
تضايق من ما سمع اسمها من بينهن هز راسه بالايجاب وقال: تمام يلا بروح عند الرياييل وطلع قبلها ونزل من الدري وهو متضايق كان حاس انها ما بتكون موجوده اصلاً تنوجد على اي اساس يا عبدالله وانته سالبنها حقها وزود ، دخل الميلس وهو يحس بصداع في راسه ينضح من الالم وقعد عدال حارب وهو يقول: علومك حروب ماعرست ولا اخطبت.
هز راسه باسف وقال: لا انا وانته في يوم واحد شرايك.
ضحك عبدالله وهز راسه بالايجاب بضيق وسكت يشوف عمه وابوه وفرحتهم فيه سال نفسه مليون مره اليوم ،هل هو يستاهل فرحتهم اللي يشوفها في ويوهم يخربيت تأنيب الضمير اللي صحى من اول ما لامست ريلي البلاد.
:
- انتهى البارت الثالث لليوم اسعدوني بروياكم وشوف تعليقاتكك ومروركم الطيب❤😇

مياري مظلومة والله يعينها واهيه غلطانه
ما تكلمت من البداية عن الى صار فيها

وعمر مسكين
وعبدلله يبلة ضربة سكين ههه
الصراحة عبدلله شيطان

رواية قمة في الروعة والسرد اروع

دجى الليل معجب بهذا