ديوان صاحب السمو الملكي الامير خالد الفيصل حفظه الله

(تعـــال أسهر)



تعال أسهر معك يا اسمر عشيّه
تعال أسلي خاطرك يا عيونـي
تهن وخل عينـي بـك هنيّـه
أنـا ويـاك والدنيـا تـهـون
تـرى الدنيـا لياليهـا شقيّـه
حذاري تستبـد بـك الظنـون
نويت وكـل قلـب فيـه نيـه
على اني لك وفي روحي تمون
هواك بخاطري سـوا سويـه
تركني بيـن أياديـك معنـون

( لـــــــوعـــــة العـــاشـــــــق )




قالوا لي العب قلت مـا نيـب لاعـوب
إلا مـزوحٍ عنـد صـافـي الجبيـنـي
الاعبه و افرح إلـى صـرت مغلـوب
و اشوف و جهـه لـى غلبنـي يزينـي
و اطرب على ضحكه و هو حيل طروب
و انادمـه فـي لحظـة أحلـى سنينـي
حبيبي اللـي كـل مـا فيـه محبـوب
ترخص لـه الدنيـا و مـا كـان فينـي
اللي يجينـي كـل مـا غـاب لاهـوب
أونـس حـرارة لاهبـه فـي كنيـنـي
و كني على غيره من النـاس مغصـوب
و كـن العمـر ياقـف بليـا ظنيـنـي
و اصير بيـن يديـن الأيـام مقضـوب
و الليـل يجلـد بالسهـر مـوق عينـي
يضحك بي الشامت إذا قلت مـا أتـوب
و يحزن صديـق العمـر ممـا يجينـي
ليتـه يغطـي لوعـة العاشـق الثـوب
و إلا عيونـي مــا تبـيّـن حنيـنـي
و إن كـان تعذيـب المحبيـن مكتـوب
علـى عـذاب الحـب ربـي يعيـنـي

(وش لــــــــونك)





..إن قلت وش لونك؟ فلانيب بالحيـل
همـي كبيـر وداخـل القلـب علّـه
..عيّا يرد الصّبـح مسترسـل الليـل
وعيّا يقـوم الحـظ مـن طيحـةٍ لـه
..رجلي..وغيري راكبٍ صهوة الخيل
أشقى ..وغيـري ياخـذ الكـار كلّـه
..يابندر امـزج فايـح البـنّ والهيـل
وبهّـر بهـا يـا بـوك للكيـف دلّـه
..أبا اطرد هموم تلاطم كمـا السّيـل
كـل مـا بغـى يدلـه فـوادي تتلّـه
..عجزت متوني وارتدم فوقي الشّيـل
والرّجل جاها من حصا الـدرب خلّـه
..تمشي جروح الوقت في خافقي غيل
وتلمع سيوف الضّيم في الوجـه سلّـه
..إن قمت.. طقّ الغار راسي من الميل
وإن جيت أبا اقعد... فوق جمرٍ وملّـه

( يا من سلامه )





يا من سلامه لي هلا يا حبيبي
و الله هلا بك يا محبّة عيوني
هلا هلا يا لون شمس المغيبِ
يا نسمة الليل العطوف الحنونِ
يا بدر لا هلّيت لا عاد تغيـبِ
ترى سواد الليل كحّل جفوني
انا دخيل الرّمش خلّك قريـب
يا اللي بقربه كل شي يهـونِ

(اجاذبك الهوى)



اجاذبك الهوى واطرب واغني
وابادلك الغـرام بكـل فنّـي
واشاهد صنعة الله في جمالك
وحكمه الذي فيـك امتحنّـي
واشوف الودّ في عيونك ولكن
يردّ الودّ خوفٍ فيـك منّـي
ولا ادري وش يخيفك ياحبيبي
وانا بك مغرمٍ جـاك متعنّـي
ولو انك تلاحظ شفت عينـي
وهي تروي حديث الحب عنّي
تنعّم دام تـوك فـي شبابـك
ليال العمـر ماقـط امهلنّـي
تعال اسقيك من جدول غرامي
شراب فيـه للعاشـق تهنّـي
واهيم بك بسمـاوات المحبـه
الين انّك بعـد مثلـي تغنّـي

(قالوا علامك )




قالوا علامك قلت ما بـي خـلافِ
ما بي بلا يا كود فرقـىٰ المحبيـن
الحب لـو يجحـد عليلـه يشـافِ
يدري به الّلي عارف(ن) لوعة البين
شي(ن) يشافي وشيْ بالجوف خافِ
عشر(ن) تبين وخافي(ن) منه تسعين

( يا روحي أحيا بك)




يا روحي أحيا بك و حنّا غريبيـن
ما نيب أشوفك و انت يا روح ذاتي
في داخلي و أشكي معك لوعة البين
بعيد عنـي وانـت نبضـة حياتـي
يا لحظتي لو الزمـن بيننـا سنيـن
و يا منوتي لو ما حصـل مناتـي
صوتي تقطّع فـي فـلاة المحبيـن
و شوفي تبدّد مـع سـراب الفـلاةِ
لا واهنيّ من هم على الما مقيميـن
و أنا يبَس صوت الرّجا في لهاتـي
أهيم في صحـرا عديمـة عنـاوي
متاهة(ن) خلو الشجـر والحصـاةِ
الليل يوحش و الضحى يجرح العين
و الحزن يكتب من عذابي غناتـي
أمنّي عيوني مـن الحيـن للحيـن
عسى الفرج مع طلعة الصبح ياتـي
ياطاغي الفتنه مـن الـراس للقيـن
ياليتي أستر لوعتـي فـي عباتـي

(ياسامرين الليل)





ياسامرين الليل في بحـر الأشـواق
يـا ليتنـي معكـم يلـوح شراعـي
بين القمر والمـوج لمعـه وبـرّاق
والنسمـه العذبـه للغاليـن داعـي
القـرب يالغاليـن للـروح تـريـاق
والبعـد ذَبّـاح القلـوب الوجاعـي
لا واعنا اللي باطرف الليل مشتـاق
خلّوه ربعـه مـع سـلام الوداعـي
يسهر مع الذكرى على صفر الأوراق
في صفحة(ن) تشرب دموع اليراعي
بين الرجا والياس وقّف علـى سـاق
والدرب بقلـوب المواليـف ساعـي

(عيـــــــــون الهـــــــنوفه)




اخلفتنـي نظـرة عيـون الهنوفـه
خلفة الصقار لا شـاف الحبـاري
واقت النظره على قلبـي تشوفـه
واشعل بقلبي كما البـرّاق سـاري
صد عني طاغي النظـره مروفـه
ظالم(ن) قلبي وهـو بالظلـم داري
ياحبيبي صدتـك عنـي حسوفـه
ارسل سهـوم الذوابـح لاتـداري
ارسل رماح الهوا وارسل سيوفـه
يشتهيك القلب في كـل الطـواري
عيني لحسن الذي غيـرك عيوفـه
في عيوني غيرك من الحسن عاري

(نــــفسي عــــيوف)




نفسي عيوف يا اريش العين تجزع
ما تقبل الحقران لو مـن عشيـري
إلى متـى فـي طلبتـك باتخضـع
وأسأل متى يوم الوصل بي يصيري
لو كان قلبي فـي هـواك يتقطـع
خلـه لعلـه بالقسـى يستخيـري
أنا جزمت أنساك يا زيـن وانـزع
اللي بقى من حبكم فـي ضميـري
مثلي عزيز النفـس عنـك يترفـع
دور هبيـل فـواد مثلـك غريـرِ