ديوان صاحب السمو الملكي الامير خالد الفيصل حفظه الله

(من بــــلاه الله)




من بـلاه الله تصبـر واحتسـب
عادة المسلم على الشـدة صبـور
اتلمـس للخـوي عـذر وسبـب
لي لحقني من بعض ربعي قصور
واتحمـل زلـة كحيـل العـرب
واتحاشا عضة الكلـب العقـور
اعشق الغالي ولاهـوب الذهـب
وانزل العالي و لاهيب القصـور
في هجير العمر خاويت التعـب
فوق رمل البيد او موج البحـور
كل حي فـي حياتـه لـه طلـب
ذا تهيالـه وهـذا فـي دبــور
لا تعجب ما على الدنيـا عجـب
حكمة الرحمـن خلاهـا تـدور

(ماعـــاد لـــي)





ماعاد لي بمطارد الصيد حاجـه
إلاغزالن صادني قبـل اصيـده
ريمن لبس في عالم الزين تاجـه
عزاه داري عـن ديـاره بعيـده
خشفن طعن قلبي وعنده علاجـه
ماله سلاحن غير عينـه وجيـده
إلى اظلمت دنياي ولع سراجـه
يمشي على دربه فـوادن يريـده
ياعاذلين القلـب هـذي سذاجـه
خلوني آحبـه واحبـه وازيـده
القلب قلبي والمخالـج خلاجـه
وكثر الحكي يااهل الحكي مايفيده

(احلى عذاب)





احلى عذاب اللي رضّى لي حبيبي
يجوز لي لا صار لعيون الاحبـاب
تستاهـل عيـونٍ سهمهـا عطيـب
لا سلهمت بالرمش و الرمش جذّاب
من شافها يشـوف شـيٍ غريـب
فيها حنان و ظلم و دموع و حراب
وفيها كلام و سر و امـرٍ عجيـب
لا جيت اعاتبها تراجعـت بعتـاب
لا شفتهـا دنيـاي عنـي تغـيـب
يلفني موج الهوى بيـن الاهـداب
إن كان ذبحي من عيونك نصيبـي
اموت لعيونك ولا أحسب حسـاب

(ياللي تعرفون الهوى)



ياللي تعرفون الهوى لا تلومون
يلومني من لا درى ويش حالـي
الحب يودع عاقل الناس مجنون
يودع كبير السن مثـل العيـال
واهل الكرم والجود لاجله يذلون
يشحذ عزيز النفس فيه الوصال
ان ساعد العشاق حظِ يسجّـون
اسعد ليالي العمر هاك الليالـي
وان عاكست سود الليالي يموتون
الحب غربال مـن اول وتالـي

(زانــــت بحــــبك)



زانت بحبّـك يـا حياتـي حياتـي
من عقبكم صفـوي تكـدّر عليّـه
يا دعوتي بـاوّل و تالي صلاتـي
و يا نيّتـي مـا دام للحـب نيّـه
يا حلم صحواتي و غفـوة مباتـي
و يا رغبتي من بين كـل البريّـه
احاول اجمع في غيابـك شتاتـي
بعضي معك عيّـا يفـارق خويّـه
أرواحنـا بـالحـب متعانـقـاتِ
و قلوبنا بـالشّوق و الوجـد حيّـه
وش لون تقوَى سيف زينك عصاتي
يـا بـو عيـون ٍ كلّهـا جاذبيّـه
خذ من حبيبك كل عمري و هـاتِ
بلسم جروحي يـا حبيبـي عطيّـه

(لك حـــق تزعـــل)





لك حق تزعل ثم لك حق نرضيـك
ما اقوى زعل حبيب قلبي وعينـي
ما دام قلبي يا اريش العين مغليـك
اطلب ولك روحي وما في يدينـي
لا تنشغل مالـك وزيـنٍ يضاهيـك
ابيك أنا لـو كـان غيـرك يبينـي
يوم الله احسن صورتك خصني فيك
فيك الجمال وصادق الـود فينـي
شعري يزين بوصف زينك وطاريك
والأرض من ممشاك فيها تزينـي
اول غناتي صوت الأشواق يدعيك
واخر غناتي شق صـدري حنينـي

(تســـتاهل الحــب نجــديه)





تستاهل الحب نجديّـه
رفيعة الشأن عجّابـه
العين يا عين بحريّـه
لقلوب الاحباب نهّايـه
والجيد يا جيد ريميّـه
تجفل من الزّول لعّابه
والرّيح يا ريح وسميّه
نبت الخزامي تثنَّى به
صفيت مع صافي النية
يوم الذي صابني صابه
معاد لي روحة أوجيه
وقف هوانا على بابـه

(ليــتك مـــعي)





ليتك معي ساهر(ن) ليـل الهـوى كلّـه
مانوم انا وانت لجـل الحـب سهرانـي
ترى السهر مع حبيبـك يبـري العلّـه
لا صرت شفق(ن) وهو عليك شفقانـي
كلش طراته الـى وافـق علـى حلّـه
والا ترى كـل شـئ يالغضـي فانـي
لا عاش خل(ن) تنكر في الهـوى خلّـه
يوم(ن) حبيب(ن) ويوم(ن) يصير قوماني
وش فيك دايـم تعسـر القلـب واتّلّـه
اخاف يوم(ن) يجـي مـا عـاد تلقانـي

(حـــول سحــابي)





حوّل سحابي واحسب أنّي وصلْتَـه
وهبْـت هبايبهـا وشالـت سحابـي
حلمٍ علَـى غفـوة زمانـي حلمْتَـه
ليت الزّمان الّلي غفا ما صحى بـي
في غمضةٍ من ليل.... عمري سرقْتَه
لاشك حظّي من عذابي وشَـى بـي
الّليل يوم أنّه صَحى بي... جرحْتَـه
والعمْر في مجروح ليلي سرَى بـي
من وقتيَ المجروح لجـروح وقْتَـه
يمشي وحظّي بالعَثايـر مشَـى بـي
لوْ أنّ قيـدي فـي يدينـي كسرتَـه
ميرْ البلى قيد الغـرام ألتـوَى بـي
الله من صوتٍ علَى الشّـوق جبتَـه
والله من كلمـة غلـى فـي كتابـي
أطوّح المسحـوب مـعْ كـل نْهتَـه
واسمع علَى همس الّليالـي جوابـي
يا معشر العشّـاق قلبـي عصرْتَـه
قطـرات خفّـاقٍ مـن الوجـد ذابِ
علَـى عشيـرٍ بالوفـا قـد وعدْتَـه
لو شبت ( أحبّه )... مثل فتنةْ شبابي

(يا ولد عوّد )





يا ولد عوّد لا هاليك ما تقـوّى
لوعة الفرقا سطت فيك مسطاها
لا تهقوى ما بالابعـاد سلـوى
المحبه ما سلم من شرب ماهـا
من بلي مثلك فلا يبري البلوى
كود شوفة من بالأوطان خلاها
الذي بك يا ولد بالـذي تهـوى
ياولد عوّد ترى شفاك بشفاهـا