قلوب من ورق

قلوب من ورق
للكاتبة: بنت الذيب


مقدمة القصة :
هذه القصة حقيقية بنسبة88% بس تم تغير بعض الأسماء وكذلك حذف بعض الشخصيات والمشاهد الغير رئيسية وتم تبديل طفيف في اماكن بعض الشخصيات للسرية
^
^
^
هاذي اول قصة لي مثل ماقلت احداثها من الواقع يعني القصة حقيقية... انا شفت قصة مشابهة لها ..بس هالاحداث انا شفتها بعيني ..اوسمعت عنها بحياتي ... واكيد في مقاطع من نسج الخيال.. لكن للأمانة أنا غيرت الأسامي كلها وبدلت في الأشخاص يعني شخصية الأخو الأكبر صارت شخصية الأوسط وهذا كله من باب التظليل
ولازم تكون اضافات في الأحداث
قلوووب من ورق ...أبطال هذه الحكاية من ارض الواقع ..متواجدون معنا .. كتبت بقلبهم .. ومزجت احساسهم ..ونثرت مشاعرهم على هذه السطور..هدية مني لكم ... ففيها قد تجدون اشخاص قد قابلتوهم في هذه الحياة .... ..صمدوا ..وتحدوا..بكوا ..وانهاروا .. ضحكوا .. وفرحوا..نعم قد تكون انت أو..هي.. فمركب الحياة الغير مستقر يدفع هذه الهواجس والمغامرات والأفكار ..ان تقذف بموجها إلينا فنضل نتقلب .. حتى نثبت خطنا في هذه الحياة ... وهؤلا هم ابطال حكياتي ..ظلت دوامة الأيام تقذفهم يمنه ويسره فيبكون تارة ويمسحون دمووع غيرهم تارات ... قلووب من ورق..كم هي القلوب من ذاك النوع .. بل ان اغلب قلووب البشر تنطوي تحت هذا النوع .. قلوب ليس بها أحساس ومشاعر ...قلووب قاسية جامده لاتتحرك ..لاينبض بها شي... ... جافه هي كالورق ..وقلوب رقيقة ..حساسه .. تتأثر بسرعه .. كالورق ..اي شدة قد تمزقها .. وتقطعها ...وقلوب صافيه شفافه .. تراى من خلالها ..كالورق ...وقلوب تحفظ بها اسرار وحوادث .. وتحتوي على آلاف من الوقائع والحكايات . كالورق هي ايضا ..وهناك قلوب وقلوب معظمها أن لم يكن أغلبها ا تندرج تحت الورق .. هذي هي حكايتي ... بل حكايتكم انتم ..فأنتم من نسجتموها وانتم من سكنتوها ..وانتم من حليتموها بالحوادث والمواقف ..فلكم مني..اومنكم الي ...هذه القصة

نبدأ القصة:


الشخصيات :

خالد وحمد ومحمد وعبدالله اخوان واهم الي يشكلون العيلة الي راح نتكلم عنها بأختصار :
خالد ( بو فهد ) هو اكبر الأخوان وهو الي ماسك الحلال والشركه كله وعنده من العيال :
فهد : طيب وحبوب وهو الي شايل أخوانه .... لكن عنده مرض القلب وهذا الي مخلي أخوانه في خووف عليه 24

علي: سكير وراعي سوالف شينه 23

العنود: أختهم الوحيدة طيوبة وكلها دلال وفوق دلالها لها جمال ساحر21

فيصل : هذا أنسان مغرور ومايهمه الا نفسه والي يساعده في غروره شكله الحلو.2

--------------
--------------

وحمد ( أبو يوسف ) الأخو الثاني ( متوفي ):
يوسف: هو الأخ الثاني طالب في هندسة الزراعية يدرس بكندا 25

ريم: ريومه هي أكبر الأخوان بنت تقدر تنسي الواحد همه محبوبة من الكل والقعده ماتحلى من دونها وفوق هذا جمال غير طبيعي ورغم الضحكة الي ماتفارقها ولكن هي حامله في قلبها هموم كثيرة..وأكبرها
هم أخوها المشلول (سعود) الي ابوها وصاها عليه قبل لايتوفى وهي شخصية هادئة ورومانسية لأقصى درجة 21


هند: حياتها عادية مثل أي بنت في سنها .. تعيش قصة حب مع ولد عمها أخو العنود (فيصل) وفوق هذا هند رقيقة القلب وطيبة أكثر من الطيبة نفسها18

سعود:أخوهم الصغير مغرم بالنت والكومبيوتر ونتيجة للشل النصفي الي صابه كان الكمبيوتر هو الوسيله الوحيدة الي يبعد بها الملل 17 مغرم بروان

--------------
--------------

ومحمد(ابوناصر)هذا الاخو الثالث سكران علي طول ومطلق مرته ومتزوج مغربيه

ناصر :هو الابو لاخوانه في غياب ابوه الدايم 24

مشعل: شخص هادئ ورزين بس اخلاقه بدت تتغير من بدي يمشي مع على ولد عمه وشلته22

شوق:البنت الاولى حياتها تعاسه فى تعاسه من وعت على الدنيا شافت جدامها ابو سكير وام مطلقه مايهمها في الدنيا الى زياراتها وطلعاتها كانت تتنقل بينهم من يوم عمرها خمس سنوات لما صارت الحين على ابواب الزواج وحياتها مو مستقره21

فواز:خلوق حباب والي في قلبه على لسانه 19

روان: أختهمم الثانيه مينونه ومفرفشه وهي بنت حلوه وفيها شوية غرور 17

--------------
--------------

عبد الله: أصغر العمام ومو متزوج ويقارب عيال أخوانه في العمر لذا يكون يالس مع أعيال أخوانه نفسهم 26


هالأسماء مو لازم تحفضونها لأنكم راح تعرفون عليها من خلال أحداث القصة أهي مجرد معلومات طفيفة

ملحوظه:جميع الأشعار والمسجات التي لاتحمل اشارة* منقوله اما البقيه التي تحمل اشارة * فهي من تأليفي





الجـــــــــزء الأول
(1)


((أولى الخطوات))

بيت بوفهد

الساعة عشر الصبح وعايلة بو فهد ملتمة على الفطور الا العنوود الي كانت متأخرة بالنوم و طبعا علي الي لما أحين مارجع من سهرته.... هذي كانت عادت علي يطلع من الساعة وحده بالليل ومايرجع إلا مع أذان الظهر باليوم الثاني ولما حد منهم يسأله وين راح ومن وين يه كان جوابه الوحيد انه كان ساهر مع ربعه ولاحس بالوقت .... أمه وابوه تعبوا وملو وهم ينصحون فيه بلا فايدة يعني بأختصار انهم تعودوا على اغيابه
أم فهد حست يغيبة العنوود بنتها الوحيده: فيصل يمه قوم صحي أختك خل اتفطر معانا .... اشفيها لهالوقت ماقامت
فيصل بملل: أووووووووووف ماعندكم إلا أنا ...فيصل روح وفيصل تعال .. سوري ماقدر..... خل فهود يقوم
بوفهد:يله انجلع روح صحيها بدون كلام زايد .... وبعدين جم مره انا اقول لك لا تتكلم مع امك بهالطريقة
قام وهو يتلحطم :أف مخليني مطراش لهم بس لأني اصغر واحد مقضين اليوم فيصل روح وفيصل تعال وهالفهد المدلل ذي مايتأمرون عليه ولا بشي بسيط .... وقال بصوت مسموع (( أي ماعندهم إلا هالبرنسس عنودوا لكن بنشوف من بيصيحي اميرتكم النائمة ))
بوفهد بعد ماسمع تحلطم فيصل : هالولد مو عاجبتني تصرفاته
أم فهد : والله خوفي ان يتبع أخوه ويصير علي الثاني
بوفهد خاف من هالفكرة : أن شاء الله الله يعقله كافينا علي واحد بالعايلة ( يلتفت على فهد ) :فهد اليوم العصر أنتظرني بالمكتب لا تطلع بامر عليك ابغيك بموضوع مهم
فهد مستغرب من كلام ابوه ..العاده لما ابوه يكون عنده موضوع مهم بخصوص الشركة يطلب من فهد يمر عليه في مكتبه وهذا شي طبيعي لأن الموكلين والموظفين مايجتمعون الا عند الوالد .... بس هالمره غير. أبوه هو الي بيمر عليه بالمكتب
فهد مستغرب من طلب ابوه: خير
بوفهد : أن شاءالله خير ..... لين يت بفهمك الموضوع
فهد: أنشاء الله... صار يبه
فهد عمره مارفع لسانه أو قال كلمه غلط تجرح امه وابوه دايما أنشاالله هي الكلمة الوحيدهذ الي يرد بها عليهم .... بعكس اخوه علي الي مايحشم ا حد ودايما يرفع صوته عليهم وحتى أخته واخوانه ماسلموا من السانه....وهذا الي مخلي فيصل يتجراء وياخذ هالأمر عادي .....يعني عادي يصرخ بهم والا يتأفف منهم لين طلبوا منه شي مثل ماصار اليوم.... أما فهد هو الوحيد من بين أخوانه الشباب الي مريح امه وابوه ومبرد قلوبهم

أبوفهد طالع ساعته كان الوقت متأخر و العنوود لما الحين مانزلت على شان يوصلها الجامعة صج ان العنوود تسوق وعندها سياره خاصة بها بس ابوها ما يحب يخليها تروح الطريج كله بروحها للجامعة وخصوصا ان شغله مايبعد عن الجامعة
بوفهد:روح يا فهد شوف أختك وعها ترى تأخرت .( وتابع بنبرة حمق). وشوف هالهيس فيصلوا وين راح

راح فهد بناءا على أوامر ابوه فوق وقبل لايوصول لغرفة أخته شاف فيصل بالممر يتكلم في التلفون.... هذا هو فيصل كل همه ينحصر في النت والطلعات والتلفونات ثم التلفونات ثم التلفونات

فهد: سبحان الله ياخي .... أن الله في خلقه شؤن أنت ماتمل أربع وعشرين ساعة وانت تهذر بهالتلفون .... حتى الصبح

فيصل يكلم الي معه بالتلفون: لحظة ..(والتفت لفهد ونظره غضب في عينه): فهود وخر عني الي فيني كافيني ترى انا واصل حدي اليوم
فهد أبتعد عنه ماله خلق مشاكل من الصبح
دق باب غرفة العنود مره ..مرتين بس العنود مافتحته
فهد: العنود .. عنود و .. وينج قومي ..الساعة عشر
العنود كانت واعية بس مو قادرة تقووم.....لما الحين اثر النوم فيها..... بس من سمعت صوت اخوها فزت وقامت هذا فهد الغالي العزيز على قلبها ...... صج تحب أخوانها بس فهد معزته غير هو الوحيد الي تحسه قريب منها وفاهمها من بينهم وكثر ماتعز فهد تخاف عليه من هالمرض الي محاصره
فهد:عنودو يالله.... رقاد أهل الكهف
العنود الي كانت تغسل ويها في هالوقت: لحظـــــــــــــــــــــــــة
فهد: عاد ماصارت هالحظة ..يالا ابوي وراه دوام
العنود ملت من حنته : اوه دقايق قلت لك لحظه ..
فهد: انا بنزل لين كملتي من تعدلج والمطالع بالمنظره تعالي تحت ابوي وامي يبغونج
العنود طلعت بعد ما لبست بجامتها الوردية المفضلة الي كان فيها رسمة دباديب صغار
عنود: صباح الورد يا أحلى أخو في الوجود
فهد: صباح النور .... أنا من زمان حلو توج مكتشفة
عنود:هههه..... صج بايخ
فهد: انزين يالله امي وابوي صار لهم ساعه ينتظرونج
وقبل لاينزلون شااف فهد أخوه فيصل ليحنه ماسك التلفون: أقوول فيصل شوي شوي لا تاكل التلفون
فيصل ماعطاه أي اهتمام وظل يتكلم
----------------

وقبل ذي كله في الصالة

أم فهد وأبو فهد بعد ماكملو الفطور انتقلوا للصالة الي كانت مفتوحة على غرفة الطعام
بوفهد قرب من ام فهد و كان باين من شكله انه مرتبك...... الصراحه هو كان عنده سؤال يقرقع بقلبه من جم يوم ومو لاقي الوقت المناسب ان يفاتح زوجته بالموضوع .... لأن الأعيال دايما يكونون معاهم وحواليهم و احين شاف انه الوقت المناسب دام العيال فوق وعلي موموجود بالبيت .... فحاول ان يسألها بألي في باله
بوفهد : يا أم فهد أش رايج بريم بنت حمد أخوي الله يرحمه
ام فهد الي كانت مستغربة من سؤال زوجها عن ريم بهالطريقه المفاجأة:ريم؟؟
بوفهد :ايه ريم بنت أخوي
ام فهد ولازالت علامات الأستغراب على ويها:والله ريم مثل ماتعرف طيبة وبنت حلال ومابها شي يناعب .... بس ليش
بوفهد: اهيي.... أدخلت ال21 صح
ام فهد: ليش هالأسئله حد خاطبها منك
أبوفهد:لا انا ناوي اخطبها حق...
وقبل لايكمل بوفهد كلامه قاطعته أم فهد:حق من
بو فهد:أش رايج فيها حق فهد ولدنا
ام فهد كانت حاطه عينها على ريم من زمان .... وخصوصا ان ريم من بعد ماتوفى أبوها وهي شايله البيت على راسها يعني مراه بمعنى الكلمة.... وفوق هذا هي طيبه لأقصى درجة بس هي ماتعتقد ان فهد ناوي عالزواج احين
لكن كل الي قالته ام فهد وقتها : والله مادري
أنت اتعرف اني ودي افرح بفهد واشوف عياله.... وريم ياحليلها حبابة ومعزتها من معزة العنود بنتي وكل من يتمنها بس فهد للحين ما كون نفسه ومو قد الزواج في هالوقت
بوفهد:الا قدهاوقدود.... فهد الله لايحرمني منه هو الي شايل كل شي على راسه ولاتنسين هذي وصية المرحوم اخوي ابو يوسف...قبل لايتوفى ..ان بناته يكونون من نصيب عيالي ..للحين يا ام فهد اتذكر مسكته لأيدي كنت ناوي اطلع من غرفته بالمستشفى ...لكنه مسك ايدي وسط دمووعه قال ماوصيك يا اخوي ... بناتي...بناتي ... لعيالك... ، ماقدر أكسر كلمته حتى عقب وفاته ..امس حلمت به ..لابس ثوب ابيض ..قالي.. نفس الكلام ..بعد ثلاث سنوات..شفته بالحلم و مسك ايدي ..وقال نفس الكلام بنفس الصوت وبنفس الأحساس بناتي ..بناتي..لعيالك.... وانا احس ان احين هو الوقت المناسب.....والصراحة فهد كبر وقادر يتزوج ...وانا بعد نفسي اشوف احفادي قبل.. ...
أم فهد قاطعته: لا تكمل....لا تقول هل الكلام... الله يطول بعمرك وتفرح فيه
بوفهد : أنا باشاوره اليوم وباخذ رايه وبعدين ذي بنت أخوي ويتيمه مالها بد منا .... وفهد ولد عمها منها وفيها والدم الي يسري فيه يسري فيها واحنا ولا بنخليه يقصر معاها بشي ..وبعدين اخاف اطير منا ..الخطيب الأول ولقينا له عذر..والله اخاف يسبقنا احد...ومانشوف له عذر
أم فهد:.... وبعدين وشلون بيسبقك أحد وانت الأمر والناهي بالموضوع.....
بوفهد: يعني لوتقدم واحد كل مابه زين ..وكفو..شلون راح نرفضه ...
ام فهد:أي والله كلامك صح ، وان حصل هالشي العنود بتموت من الفرحة
في هاللحظة العنود كانت نازلة معا فهد ولقطت الكلمات الأخيرة من امها : على شنو بفرح؟؟!!
الأم تتهرب من الجواب : صباح الخير
العنود: صباح النور ونزلت وباست امها وابوها على راسهم
بو فهد: ماكأنج تأخرتي يابنيتي بالنوم؟
العنود: لا انأ أصحا كل يوم مبجر بس اليوم لأن ماعندي محاضرات .... عشان جي خذيت راحتي بالنوم
فهد: من يصحى مبجر ما سمعت.... مادري من ويهه متنفخ من كثر النووم
العنوود : لا والي يعافيك اسكت .... يمه من الي تصبين عليه كوبين ماي كل يوم ولا يقعد
فهد: على الأقل انا لما اقعد مايتنفخ ويهي مثلج .... روحي شوفي ويهج بالمنظره كأنه تاير سيارة
العنود عفست بويها لفهد وقالت لأبوها: يبا سمعته
بو فهد ضحك عليهم وبنفس الوقت صرخ بفهد: فهد حد يقول جذي لأخته
وكمل كلامه للعنود :يعني اليوم ماعندج محاضرات..زين عيل بس يلا فهد إذا خلصت من فطورك تعال انتظرك بالسيارة

فهد: أي أنا ياي ..بس أشرب العصير
وقبل لا يشرب العصير رن موبايله رفعه وشاف الرقم وبان عليه انه أرتبك وتغيرت ملامح ويهه وطلع بسرعة من دون لا يقول مع السلامه
لما طلع كان الموبايل لازال يرن
فهد رد: أ لو
وياه صوت ناعم ورخيم من الطرف الثاني
مشاعل: هلا حبيبي
فهدبصوت واطي لكنه حاد: جم مره أقولج لاتتصلين بي... أنا وقت الي أبغيج باتصل لج
مشاعل تغيرت نبرة صوتها الحنونه: ليش ..شصاير؟
فهد: مشاعل انتي ماتفهمين انا ماقدر اكلمج اذا مع هلي
مشاعل بصوت دافي: بس أنا اشتقت لك.... صار لك يومين مادقيت علي وبعدين انا شدراني انك مع الأهل على بالي رحت الشغل
فهد: يا مشاعل يا حبيبتي مايصير كلما أشتقتي لي أتصلتي .... يعني لا زم أسكر التلفون على شان تعرفين اني مع الأهل
مشاعل خافت من اسلوبه في الكلام : انا ..آسفه
ولما ما شافت أي ردة فعل أو صوت من فهد ردت بسرعة : اوكي باي
فهد حس انه عصب عليها زيادة: معليش تحمليني أنا عصبي زيادة عن اللزوم
مشاعل: أي عاد مايصير كل دقيقة تصارخ علي ترى انا ماغلطت لهالدرجة
فهد :لا انا الغلطان هالمرة خلاص سامحني
وقبل لاترد مشاعل ياه صوت ابوه يناديه (فهد..يا فهد)
فهد: أوكي انا باتصل فيج مره ثانية أبوي يبغيني .. باي
مشاعل: أوكي باي...
سكر فهد الموبايل وراح لأبوه
وهو يفكر في مشاعل ..مشاعل هي الأنسانه الوحيده الي قدرت تسيطر على كيانه تعرف عليها في دراسته الأولى بالجامعة للحين يذكر اللحضة الأولى وبالتفصيل ..بحرم الجامعة كانت جالسة تقرا الكتاب ..وبهدوء... كان اهو يراقبها هالبنت اجذبته من اول ماشافها بس مو متجراء يكلمها أي كلمة ..وهو سرحان بالطريقة الي يبدي معاها شرقت مشاعل غصت بالسندويش الي كانت تاكله ... التفت لها وشافها محمره وهي داري شرقتها ...ركض لها وراح يجيب كوب ماي ....من هالأرض بدا حبهم ..ولما قررت تدرس برع ..بالبعثه الي ياتها لهولندا .. ماتردد ولا لحظه انه يقدم للدراسة لهولندا مع انه ماكان فالح بالدراسه .. وفي هولندا بدا حبهم يزيد وعلاقتهم مع بعض تزيد وتكبر ليما صار كل واحد منهم موقادر يترك الثاني..ردو ل للوطن الي بدافيه الحب .




(( الحب انته))

بيت بو يوسف

على أنغام أغنية الحب انتا كانت هند جالسة على السرير وغرقانه في أحلامها....... وفي فارس احلامها محد غيره فيصل ...... فيصل مسيطر على كيانها وقلبها وفكرها صج ان فيصل لعابي وراعي سوالف قشرة بس رغم كل هذا كان قلب هند متمسك به وتحس انه عنده مشاعر اتجاها بس ما يحب يصارحها فيها
وفجأة أنفتح الباب بقوة بوووووووم وطبعا كانت ريم
ريم: هندواا تعالي ساعديني
هند الي انقزت من فجت الباب: بسم الله الرحمن الرحيم أش فيج أنتي فتحي الباب شوي شوي طقي الباب على الأقل .... لي متى بتمين دفشة صيري رقيقة مثل العالم
ريم : أوه على اخر الزمن هند بتعلمني الرقة ....انتي علمي روحج اول .... يله قومي كنج ما تسوين جي انتي بحياتج كلها ماطقتي باب.... يلا عاد ساعديني أبغي أطبخ كيكة شوكلت حق الهنوف رفيجتي
هند ( بنظرة شك): الهنوف ولا أخو الهنوف ..احم اقصد الخطيب السابق
ريم: والله انا يوم طبختها فكرت بالهنووف وانتي عالبالج افكاري كلها شيطانيه مثلج ... وبعدين لاتقولين ساابق
هند: يووو ريموا اصحي لي متا انتي تحلمين
ريم ايلست بقرب اختها بحزن:لين عمي يرضى ...
هند: يرضى هههه...، اشلون فهميني شلون بيرضى
ريم قامت: مادري بس بيرضى لأني بارفض أي احد بيتقدم لي.. وبعدين يلاقومي ساعديني
هند: ماقدر .... أنا تعبانه وبعدين ايديني توني مسوية لها منكير
ريم: يلا هند عفية.....ترى أذا ساعدتيني راح أطرش كيكة ثانية لبيت عمي
هند نقزت من سريرها: أي عم
ريم بخبث: مادري؟
هند: عفية طرشيها حق بيت عمي خالد
ريم:واذا طرشت لهم راح تيين تساعديني
هند فزت مكانها:أي شور باساعدج
ريم: انزين وين راح المنكير والأصباغ
هند وهي تاخذ الآسيتون ( مزيل طلاء الأظافر) من على طاوله صغيره جنبها: خلاص أكا مشيتهم شوفي
ريم ضحكت على تصرف اختها: ههههه ..هاي كله حب عيل لوقلت لج فيصل بيينا شراح تسوين
هند مبطله عيونها:بيينا
ريم: شفيج تخرعتي ..أنا اقول لو..وبعدين انتي شفيج قاطة روحج عليه .... ركدي شوي .. بس أحين تعالي ساعديني واكيد راح اطرش لهم
هند من الفرحة راحت لمت اختها :أي انتي أختي حبيبتي لازم اساعدج
ريم: يمه منج عيارة... أنتي روحي جهزي المقادير وأنا با صحي سعود

-----------

راحت ريم لغرفة سعود وكان المنظر المعتاد سعود متسمر جدام شاشة الكمبيوتر
ريم: شهالظلام...غرفتك كئيبة
سعووود: أنا احبها جي
ريم قامت تفتح الستارة وهي تكح : سعود... مامليت أربع وعشرين ساعة على النت
سعود وعيونه على الشاشة: لا مامليت
ريم :انت لما الحين مانمت من امس بالليل
سعود:أي مافيني نوم
ريم: ماتعبت
سعود: ألا أنتي الي ماتتعبين من النصايح
ريم : انت اش عاجبك في هالنت ومخليك لاصق فيه... إلا أجوف على شنو تطلع
وقربت يم الشاشه
سعود سد الشاشه بيده :شهل اللقافة
ريم ابتعدت عنه أصلا ماكان هامها تعرف شيسوي على النت أصلا اهي واثقه باخوها أهو تربياتها ومستحيل يسوي شي غلط وراحت ترتب له السرير
ريم:أنت صليت الفجر
سعود: اففف أي .... بل أنتي بنك نصايح ....وأنتي أمممممممم( يدور لها نصيحة) مم عطيتي أمي الدوا
ريم وهي تضرب يدها بخدها : أوه نسيته .. الحمد الله انك ذكرتني
ونزلت بسرعه تشوف أمها
ريم: يمــــــــــــــــه ...يمه
وياها صوت ام يوسف من المطبخ: نعـــــــــــــــــــــــم
ريم دخلت المطبخ كانت هند مع امها هند لما توهقت وماعرفت مقادير الطبخة نادت أمها عشان ماتفشلها ريم
ريم : يمه خذيتي الحبوب
أم يوسف : أي خذيته من الصبح.. ليش!!؟؟
ريم ( بأرتياح): الحمدالله طمنتيني .. على بالي نسيتيه
أم يوسف: مانسيته .... بارك الله فيج يا بنيتي والله أنتي صرتي سندي بعد أخوج يوسف
يوسف اخو ريم وهند مسافر كندا يكمل دراسته الي بداها بمجاستير في هولندا .... واحين ناوي ياخذ الدكتوراه في الهندسة الزراعية في كندا
هند بعد ماشافت المدح كله لريم : أحححم....أحم.. نحن هنا
أم يوسف: وأنتي بعد يا حبيبتي ياعل عيني ماتبجيكم....(ونزلت دمعه من عين أم يوسف)
ريم: لا يمه... لاتغلبين اليوم بجي على الأطلال خلاص يسوف بقاله جم شهر ويعود سالما غانما ويعالج لج نباتات الناس
أم يوسف ( وهي تمسح دموعها): هاذي دموع الفرحة.. فرحتي أن عندي أعيال ينشد أبهم الظهر
قطع كلامهم صوت التلفون......وراحت هند طيران تشيله
هند: ألوووو...
يوسف : مساج الله بالخير.. ماي سستر
هند: هلا والله باخوي حبيبي..... شخبارك يسووف.. والله ولهنه عليك
يوسف: بخير دامج بخير
هند: وينك ماللك طاري .... ترى هاي أول مرة توحشني
يوسف: عن العيارة أنا كل يوم اتصل بس انتوا الي ماتتصلون
(أم يوسف وريم من أسمعوا أسم يوسف وهم يسحبون السماعة من أذن هند)
ريم تكلم هند: عطيني باكلمه... بس أمها أسحبته من أيد هند
ام يوسف : هلا بوليدي حبيبي وينك يمه لاتتصل ولاتسأل ..
يوسف: هلا بالغالية أم الغالي .....والله توني اقول حق هند أنا يوميا أتصل وأسأل بس انتي تكونين نايمه
ام يوسف : وأن كنت نايمه لازم تقول لهم يصحوني.. ترى أنا ولهانه على شوفتك
(وقامت تبجي)
ريم خذت السماعة منها: السلام ... يوسف شخبارك
يوسف: تمام ..أشبلاكم اتكلموني من واحد لي واحد
ريم: ها.. اليسفي متى راح ترجع الكل ولهان عليك
يوسف : الجمعه أن شاءالله
ريم: متى تكمل ترى وردتي تعاني من الكحة وبوصفار فما هو عالجها ايها الدكتور المخضرم
يوسف : هههههه.... ان علاجها سهل اسقيها كوب من الماء ايتها العلة..
ريم: أني اسقيها بالماء .... امحق دكتور ..الا تعال انتكملت الكورس الي عليك صح...
يوسف:أي خللصت وكلها كم يوم واخذ الشهادة واصير دكتور مثل ماتقولين
ريم: يا الدكتور شخبار الأمتحنات النهائية معاك
يوسف: الحمدالله
ريم: مو ناقصك شي
يوسف: لا والله بس ناقصتني شوفت هندوووو وامي وسعوود
ريم: واناااا ؟؟
يوسف: بس انتي مالج وحشة كل يوم داقة علي
ريم بصوت حزين: هذا جزاي أني اطمن عليك لكن شوووف من يدق لك
يوسف:لا خلاص ترى اضحك معاج لاتصيرين حساسه زيادة عن اللزوم
ريم : اقول يوسف لين بترجع لاتنسى هديتي
يوسف: أنتي تامرين أمر شنو تبين
ريم : أنا أبي أمممممم كل شي حلو
يوسف : حاضرين لج ..بس لاتزعلين على الي قلته
ريم : لا شدعوة ...ومشكور ماتقصر مقدما
يوسف: وين سعود أبي أكلمه
ريم : فوق على الكمبيوتر
يوسف : ليما الحين مدمن نت ...ماراح يعقده الاالنت ..شعاجبه فيه
ريم : شاسوي مليت وانا أكلمه
يوسف: أنا راح أتفاهم معاه حولي خطي له
ريم: يلله مع السلامه ... أستلمه
يوسف : بااي
توت وتوت توت توتوت
(حولت ريم المكالمة لسعود)
ريم بعد ماسكرت السماعة: يمه يوسف أيقول راح يوصل البحرين يوم الجمعه
أم يوسف : يوصل بالسلامه
هند: قلتيله أيب لنا صوغه.... هدايا........ أشياء
ريم: أي ..لاتوصين حريص
أم يوسف:يمه منكم بنات هالوقت كل شي تبونه لكم



الجـــــــــزء الأول
(2)


(( حرب الكلام ))
بيت بو ناصر
شوق كانت بالمطبخ تسوي لها نس كافيه وتدندن أغنية في الوقت الي دخل ناصر عليها وتم يتسحب بهدوء و بدون ماتحس فيه
ناصر بصوت قوي : بووووووووووووووو
شوق أنقزت من مكانها وطاح الكوب من ايدها: يممممممهههههه.... يعل امك ما تيب غيرك .. خرعتني
ناصر : ههههههههه ....محد قالج طالعي أفلام الرعب.. شتسوين
شوق: مثل ما تشوووف نس كافيه
ناصر: اوه عيل زين ..سوي لي معاج
شوووق :أوكي ..دقايق
ناصر : انزين وين روان؟؟
شوق: في غرفتها
ناصر: وفواز؟!!
شوق: تحقيق هو...طلع قال بيروح لسعود ولد عمي.......
أقول: ناصر خذ كوب مشعل قال يبي نس كافيه لين يرجع والكوب برد وهو وليما الحين مارجع
ناصر:وين ذلف بعد
شوق: والله ياناصر حال مشعل هاليومين مو عاجبني دايم يرجع البيت متأخر واحين كاهو مارجع من امس
ناصر ( وهو مستغرب) : من امس؟؟
شوق أرتبكت وتحاول تصحح زلة السانها : لااهو قال يم ....ك......
ناصر بما انه اكبر الأخوان هو حاس أنه المسؤول عن البيت بدل ابوه الي أربع وعشرين ساعه ماعطيها على الآخر.. سكران ولاهي بالشوارع ..ناصر اهو الأبو لهالبيت .. يعوض كسل ابوه بمشاريع عمه ... يساعد خواته ...يحمي اخوانه من ان ينحرفون كل شي على راسه ..امه تركتهم ..وابوهم تاركهم قبل امه ..والفضل يرجع له ولشوق لانهم حافظوا على هالعايله من الدمار...
وفي هالوقت سمعوا صوت بريك سيارة... وبعدها دخل مشعل و هويتمايل مع أنغام الموسيقى الي كان يسمعها من الهدفون ويرددها وراه
ناصر: مشعل وين كنت؟؟!!
مشعل مشى من جدامه من دون لايرد عليه ولايطالعه حتى
ناصر صرخ فيه: مشعل وقف انا اكلمك
مشعل التفت له بكل برود بعد مانزل السماعه من اذنه: خير ..شتبي
ناصر مع من كنت ساهر لي هالوقت
مشعل : مع علي
ناصر وكانه متعجب من الي قاله مشعل : علي ... علي؟؟؟
مشعل: أي علي ولد عمي...... ليش فيها شي ولا حضرتك عندك مانع
ناصر ( والحمق بان عليه من كلام مشعل): ومن متى أنت تماشي علي ...... أي اكيد عندي مانع...... واعتقد ان اتعرف علي وتصرفاته الشينه.. انت لين ماشيته راح تصير مثله
مشعل: والله أنا ماشوف عليه شي مو زين
ناصر : خير.. ماتشوف ..اكيد ماراح اتشوف دام انك رضيت انك تماشيه جوف شلون صرت .....وأسمع والله أن شفتك معاه مره ثانيه لاتلوم ألا نفسك
مشعل: ناصر أنا موياهل على شان تقولي أماشي من وأمشي مع من
ناصر: بس يكون في علمك أن أنت أخوي
مشعل:أي هذا انت قلتها بعضمة السانك أنت أخوي مو أبوي
(ناصر كان الغضب ماليه شلون اخوه الي تعب معاه وبتربيته .. وبذل كل جهده يحميه من اعاصير المراهقه قدر ينقلب لهالصوره خلال كم يوم غاب فيها عن البيت .....(ردد بصمت) ... هذا كله من علي )
ناصر: لاترد علي بهل الطريقة
مشعل مشى عنه ولا عطى كلامه أي اهميه
لكن ناصر وقف وقطع عليه طريجه: صدقني ماتطلع معا هل الحقير الي أسمه علي وراسي يشم الهوا
مشعل حس بخوف من نظراته : لاتخلينا نتهاوش أحين....... وبعدين لا تاخذ كلام افلام وتصفه لي على بالك باخاف
ناصر كان بيمد يده على اخوه بس تدارك الوضع وطلع من البيت والحمق ماليه قبل لاتستوي مذبحة
شوق الي كانت تسمع كلامهم من المطبخ راحت ورى ناصر تناديه : ناصر ... ناصر
بس مارد عليها
مشعل : خلج منه ذي يبي أيسوي روحه شخصية
شووق: مشعلوا والله حرام عليك ..ناصر يبي مصلحتك
مشعل : أو ..خل يولي زين أنا باروح داري انام ... مالي خلق عوار راس مع اخوج
شوق يلست على أقرب كرسي تبجي حظها الي خذ منها أمها وعطاها أبو سكير وأخوان يوميا بأصراخ ونجرة



((كفايه صدمات))

في المكتب وقف فهد
مصدوم من كلام ابوه أش قاعد يقول أش قاعد يخربط عليه ..شنو الي قاعد يسمعه
يبغيه ياخذ ريم....ريم ياخذها .... لامستحيل أهو مايفكر الا في مشاعل ....مشاعل الوحيدة الي بياخذها ... لا.. ماراح يكسر حبه وياخذ ريم عشان أبوه......ماراح يدوس على قلبه على شان خاطره ..ماراح يخلف بوعده
الأبو: ها أش قلت ... ريم بنيتي وأعرفها عدل وماراح تحصل أحسن منك ياولدي
فهد بأرتباك : بس يايبه أنا لما الحين مافكرت في الزواج
الأبو: أنت اللحين ريال ولازم تفكر في هالموضوع واذا مافكرت فيه احين متى راح تفكر فيه لين صرت بالأربعين
فهد: حتى لوفكرت ماقدر آخذ البنت الي أنت تختارها المفروض انا أختارها
ابوه استحمق من كلامه : يافهد انت تعرف ريم هي ماشاالله عليها الي قايمه بالبيت وماعتقد انك راح تحصل أحسن من ريم زوجة لك
فهد تم ساكت مو مصدق الي يدور حواليه بالبدايه على باله أبوه يضحك معاه او أن الأمر مو جدي لهالدرجة
فهد:بس يا يبه حتى لو فكرت بالزواج ماعتقد ان ريم هي الي راح اختارها
أبوه واعصابه بدت تنشد ماكان متخيل ان فهد راح يرفض ريم : وأنت من متى تطلع عن شوري .. أنا قلت بتاخذ ريم يعني بتاخذها وإذا حبيت انك تعصيني وتبين انك تقدر ترد كلا مي وتطلع عن شوري بعد هالعمر بكيفك
فهد : لا ..بس يا..
أبوه ماعطاه فرصة يكمل كلامه وطلع بسرعة
فهد سند بجسمه على الطوفه: ليش يايبه ليش....ليش ناوي تعذبني ..ليش ناوي تموتني..والله حرام لوكان علي مكاني لماقدرت تجبره على هالشي حتى فيصلوا ماراح تقدر عليه يعني ليش ......... أناالوحيد الي اطيعك وماأرفض لك أمر تلزمني وتجبرني بها ..والله لو جبرتوني على هالزواج راح تدفنوني وانا حي وتدفنون قلبي معاي .. مشاعل مشاعل هي حبي الوحيد ومستحيل أخليه يضيع بهالسهولة
فهد كان يكلم نفسه ويحاول يطمن نفسه أن ابوه ما راح يجبره ..... وهو الا يدور مصلحته وبس ....... واكيد راح يفهم أن مصلحته مع مشاعل لو فهمه أهو بنفسه أن مشاعل أهي الأنسانة الوحيدة الي يتمناها ..لكن لو أبوه اصر شنو راح يكون قراره وشنو بيكون موقفه .(.اهو لازم يكلم مشاعل ويخليها تقرر تتزوجه بهالوقت .. والا ابوه ماراح يوافق لوقاله احبها ولين تحسنت ضروفنا باتزوجها ..اكيد بيرفض وبيقول بنت عمك احسن منها ..وبلا حب وخرابيط ...)
في هالحظة والأفكار تعصف في راسه دخل عليه ناصر ...... ناصر ولد عمه لكنه بمعزة أخوه واكثر هم مثل الروح الوحده الي بجسدين و يجمعهم قلب واحد وأفكارهم وحده وميولهم وحد......... ضحكهم مع بعض وحزنهم مع بعض بأختصار هم أخوان وربع وأزيد من جي.....
فهد أرتاح بشوفة ناصر ونوى يكلمه بموضوع الزواج..... وهو يدرى ان ناصر الوحيد الي يقدر يغير راي ابوه .... لأن ابوه معتمد على ناصر في كل صغيره وكبيره من امور الشركة.... وهو الوحيد الي ماسك أمورها بعد ابوه عشان جي هو محل الثقة عند أبوه
فهد بصوت مشوش: هلا ناصر
ناصر ما رد على فهد والغضب مبين عليه
فهد أستغرب منه وقبل لايسأله عن سبب حمقه
تكلم ناصر وشرر يتطاير من عينه: فهد .... انت اتعرف اني اعتبرك مثل أخوي وعزك واغليك .... لكن لازم اتعرف اني كثر ما غليك أكره اخوك .... فارجوك اذا تبي اتم محبتنا وصدا قتنا تبعد اخوك عنا
فهد وهو متعجب من كلام ناصر ومتفاجئ منه بنفس الوقت: أخووي؟؟؟
ناصر : أي اخوك اكوا حد غيره علي أخوك ساس البلى من مشى مع أخوي وهو حالته ماتسر العدو
فهد الي لما الحين مو مستوعب: اخوك فواز لو مشعل
ناصر : لا تصير غبي و عبيط .... مشعل قام مايرد من البيت الا ثلاث واربع الفير لا وبعد من جم يوم مايرد الا الظهر
فهد بعد ما وضحت له بعض الأمور: أنزين وانا وش ذنبي
ناصر : ذنبك انك اخوه
فهد حيرته هل الأتهامات والمصايب الموجهة له : وإذا كان أخوي انت تعرف علي عنيد وراسه يابس مايتقبل النصايح
ناصر ضرب بيده على الطاولة :شووف يا فهود ان مابعدت اخوك عن اخوي لا انت ولد عمي ولا أنا اعرفك
فهد شله هالكلام كافي صدمات هاليوم .... ماتوقع ان هالكلمات راح بتطلع من ولد عمه في يوم من الأيام .... لكنه قالها احين ومتى .... قالها بالوقت الي كان فيه فهد محتاج منه كلمه تواسيه وتشيل همومه .... لكنه زاد همه هم ..ليش يتحمل اخطاء غيره ليش
ناصر بعد ماشاف حالة فهد .... فكر بالكلام الي قاله: سامحني يافهد ياخوي .... انت تدري اخوك فقدني عقلي سامحني والله .... أنا ادري انك غير وهو غير .... بس مشعل اخوي ومايهون علي يضيع من يدي
فهد ظل ساكت يطالع ناصر بعيون محمره نزلت دمعة على خده حاول يمسكها لكنه ماقدر ولما نزلت من عينه مسحها بسرعة قبل لايلحظها ناصر لكن مستحيل تغيب هالدمعة عن عين ناصر
ناصر الي ماتوقع ان الدموع تنزل من عين فهد ....على هالكلام البسيط
ناصر: انت تبجي؟؟
فهد وهو يحاول يبتسم : لا
ناصر : افا الريايل مايبجون ياخوي .... ماهقيت ان كلامي يزعلك لهالدرجة
فهد:---------
ناصر :فهد.... كلمني شفيك
فهد : مشاعل ياناصر مشاعل
ناصر متشكك بالي اسمعه : مشاعل ؟؟ اشفيها
فهد: بتروح
ناصر مستغرب شنو الي ياب طاري مشاعل احين : وين بتروح وليش .... اشفيك يا فهد فهمني
فهد: ابوي يبيني اتزوج
ناصر فج عيونه على كبرها : تتزوج ؟! ومن تتزوج
فهد كان منزل راسه وهو يقول: ريم
ناصر زادة حدة أستغرابه : ريم ؟ أي ريم .... (شهق ) ريم بنت عمي حمد
فهد :أي هي
ناصر ابتسم : اوه ...زين بالبركة
فهد رفع راسه : أشفيك انت ينيت أي بركة الله يهداك انت تدري ان قلبي مافيه إلا مشاعل ومستحيل اسمح لحد غيرها يدخل قلبي
ناصر :اوه نسينا مشاعل .. عيل انت شقلت لأبوك
فهد: هو عطاني فرصة أتكلم
ناصر مستمر في استفساراته : شنو بتقول له
فهد: مادري ياناصر مادري احس ان راسي راح ينفجر من التفكير .... أنت عارف ان قلبي ماينبض الا لمشاعل .. مشاعل وبس
ناصر بمرح :والباقي خس هههههههه
فهد : والله انك واحد فرقان انا أحين اشكي لك همي وانت يالس تنكت
ناصر :انزين شوي شوي علي .... ترى كلنا عندنا مشاكل ولا نسيت سالفة مشعل وعلي
فهد: خلنا منهم احين .... المهم ابيك تساعدني .... وتعطيني رايك
ناصر ونظراته تحولت للجدية : متأكد انك تبغي شوري
فهد :شهالكلام يا ناصر انت تدري ان كلامي هو كلامك وراي هو رايك والا انت شاك بهالشي
ناصر بصوت ثابت : الا صح كلامك .... واذا بغيت كلامي انا اقولك اسمع كلام ابوك وخذ ريم ..واترك عنك لعب اليهال ... مشاعل راحت ولا يات مابتوافق على الزواج ...هي افكارها حب وخلاااص...
فهد ما كان متوقع ان هذا كلام ناصر كان يتوقع أنه بيوافقه الراي ويوقف معاه ضد ابوه
فهد من غير وعي سأل ناصر :ليش
ناصر : ليش هاذي عاد انت فكر فيها ....
وطالع ناصر الساعة لمعلقة على الجدار : انا تأخرت الحين لا زم اروح
.... وطلع وترك فهد جامد مذهول من الي صار كله




(( وينك من زمان ))

ريم وهند في الغرفة والساعة كانت وقتها تسع الصبح
هند الي توها صاحية من النوم تكلم ريم اختها الي كانت تلبس عبايتها: ريوومه
ريم تعرف هذي النغمة نغمة هند ماتقولها الا وراها مصلحة : ها شتبين
هند: ابي اروح معاج الجامعة
هند متعلقة بأختها ريم لأخر درجة وشايفتها القدوة لها في حياتها .... وعشان جذي كانت تحب تطلع مع ريم أي مكان تروحه .... وخصوصا الجامعة .... هند تحب هالعالم تحس ان عالم جديد وكل شي فيه حلو ويهبل غير عن عالم المدرسة كله خنقه بين الصفوف .... تحب تدور في اروقة الجامعة وتكتشف كل شي فبها وبما ان اليوم مورايحة المدرسة حبت أن تروح مع أختها ومع ربعها الي لما يمشون مع بعض مايخلون حد مايتطنزون عليه .... يضحكون على ذيج البنت وذاك الولد يعني يومهم كله ضحك في ضحك
ريم:ينيتي انتي والمدرسة
هند:انا والبنات اتفقنا مانروح المدرسة لأن امس اجازه وباجر اجازه .... فليش نروح اليووم
ريم: والله .... على كيفكم بس .... الشره مو عليكم الشرهة على الوزارة الي خلتكم .... لا وتقلون لي امتحان الشهادة الثانوية
هند: واله اغلب الدول يعطونهم اجازة الا احنا..انتي احين بتوديني لو لا
ريم : اليوم ماقدر
هند بترجي :ليش؟؟
ريم :انتي لما الحين ماجهزتي بتأخر على المحاضرة
هند نقزت من السرير : احين باجهز دقايق
ريم طلعت من الغرفة: لا مرة ثانيه
هند كانت تعرف ان المرة الثانية ما راح اتيي الا بعد شهور
فتبعت ريم وقالت بزعل:ريووووم
ريم نزلت ولااحت بتطلع : سوري حبيبتي ماقدر تأخرت
هند راحت حجرتها وهي تتحلطم وردت بتنام
ريم بعد مادخلت السيارة حركت المفتاح وفرته بس ما اشتغلت السياره جربت مرة مرتين بس السيارة مو متحركة ...: اوهوا شهالوهقة يعني مارضت تتعطل الا اليوم وانا متأخرة
طلعت من السيارة ونادت أختها:هند هند
هند يوم سمعت صوت ريم قطت اللحاف من فوق ويها و طلت من غرفتها كانت متوقعه انها كسرت خاطر ريم وبتخليها اتيي معاها : نعم
ريم : عطيني مفتاح السيارة الثانية
هند : ليش وين سيارتج
ريم: عطلانه .... عطيني المفتاح
هند: أروح معاج
ريم: لا مالي خلق نجرة امي بعدين
هند: بس عيل ما راح أعطيج المفتاح .... شفتي كما تدين تدان ( وطلعت لريم السانها )
ريم : يلا بالا بياخة شسويت لج انا عشان تقولين لي كما تدين تدان .... عفيه هند والله تأخرت
هند : أصلا أنا وامي بنروح السوق اليوم نحتاج السيارة .... اتصلي بالهنووف
ريم ماألحت بطلبها على هند واتصلت بالهنوف وهي تدعي بقلبها انها ماتكون سبقتها وراحت الجامعة
أول مارفعت الهنووف التلفون
ريم كلمتها قبل لاتبتدي هي
ريم: الهنوووف وينج رحتي الجامعة
الهنوف :بسم الله الرحمن الرحيم .... شفيج داقه من صباح الله خير للحين الطيور ماطارت برزاقها
ريم : افا .. وهاي انتي صديقتي
الهنوف: ههههههه .. ريومه شفيج ليكون من صجج زعلتي
ريم : لا شدعوة .... انزين ماجاوبتيني رحتي الجامعة لولا
الهنوووف : لا .... ليش
ريم: ممكن اروح معاج
الهنوووف: اكيد .... الساعة المباركه وكلولولولوش ....اشفيج مستحية
ريم : لا بس لأن سيارتي عطلانه
الهنوووف: أي ماتشوووف شر
ريم : أي ماتشوووف شر يالخبله ههههه
الهنووف : وانا شد راني شيقلون
ريم انزين انتي وين احين
الهنووف : دقايق واكون عندج
ريم : اوكي انتظرج .... باي
الهنوف :باااي
الهنوووف رفيجة ريم الروح بالروح وفي نفس الوقت بنت جيرانهم يعني ربوا مع بعض في فريج واحد
ريم والهنوووف والعنووود وحتى شوووق ربع مايتفارقون ابد بس شوووق والعنود يدرسون آداب وهو تخصص مختلف عن تخصص ريم والهنووف الي كان خدمة اجتماعية
صوت هرن السيارة وعى ريم من ذكرياتها .... واول مارفعت عينها وشافت السيارة وقفت مصدوومة
كان عبدالعزيز اخو الهنوف هو الي يسوق السيارة..عبدالعزيز ..اخوها خطيبها السابق...اهي ليش تقول السابق .. توها ماترضى على هند انها تنطق الكلمة ... ريم بطبعها خجولة وتستحي لما تركب مع حد من عيال خالتها او عمامها فمابالكم تركب مع ولد جيرانهم وخطيبها السابق!!!!((رجعت نطقت السابق)).. اي خطيبها الي ماشافته من شهور ...ريم وعبدالعزيز كان لعبهم دايم مع بعض من ايام الطفوله..عبدالعزيز عشقها وتقدم لها ..ريم فرحت الا طارت من الفرح يوم خطبها..بس اراده اكبر منها رفضت هالزواج...ارادة عمها وامها ...عمها بصفة ولي امرها رفض هالزواج ...اهي تدري ان عمها يحبها ..بس هذا حكم عادتهم ..وعبدالعزيز مو من مواخذيهم ...وختمت امها الموضوع لما قالت (كل سمكة تسبح ببحرها)
يومها بجت ريم دم بدل دمووع..وعلى مر الشهور تعودت على القرار وبدا ظهور عبدالعزيز يخفت في حياتها .... ومحد عرف بموضوع الخطبه الا شخصين امها ..وعمها ..وطبعا رفيجة عمرها الهنوف..الهنوف ورغم ان ريم رفضت الزواج من اخوها...الا انها تفهمت الموضوع ....على ان عمها موراضي اهي تتزوج بهالسن ...طبعا ماخبروها ان عمها رفض الزواج نهائيا...اما بوفهد فهو كان له سبب ثاني برفض المتقدم لريم... وعبدالعزيز فظل الأنتضار وهو مايدري بالي يخبي له القدر
ريم لامت الهنووف ليش انها ماخبرتها انه مو هي الي بتسوق السيارة جان قالت لأحد يوصلها
الهنووف أشرت بأيدها لريم تناديها وهي تقول:ريم يالله تأخرنا
مشت ريم بخطوات مرتعشة وكأن قلبها بيطلع من صدرها :
ريم: اس ..السلام
الهنوف+عبد العزيز:وعليكم السلام
عبد العزيز التفت لريم : شخبارج ريم
ريم بخجل: ها..اي ..الحمدالله
الهنووف بهالوقت طولت على المسجل الي كانوا ذايعين اغنية اجنبية وتمت تغني معاهم .. وشوي شوي انسجمت مع الأغنية وشلون بعد وهي راب وتمت تصارخ مع الأغنية وهي في وسط الطرب عبد العزيز بند المسجل ورفع يده يحمد ربه : يارب انا لا أسألك رد القضاء انما العفو فيه
الهنووف:عزوز حرام عليك خلني اسمع
عبد العزيز مارد عليها ووجه سؤال لريم: انتي متأكدة ان رفيجتج صاحية
ريم ابتسمت بدون ماترد
عبد العزيز فر الإذاعة وداها على إذاعة مونتو كارلوا الفرنسية
الهنووف : والله متفيق انت حد يسمع اخبار من الصبح
عبدالعزيز: لا والله عيل الناس شنو يسمعون من الصبح أغاني
الهنوف: لا قرآن
عبدالعزيز : شنو يمه أكيد حرارتج مرتفعة.... ومد يده ليتأكد من حرارتها
الهنوف: اخير ا يارب أنعمت على اختي بنعمة العقل
الهنووف خذت الكتاب الي بيدها وضربته على خفيف
ريم الي كانت بالكرسي الوراني ماتت من الضحك عليهم
عبدالعزيز كان يشوفها من المنظرة ومنبهر منها...ا هو صج ماشاف ريم من زمان بس ماتوقع انها تتغير بهالسرعة باين انها حلوت وايد......
عيونها لما الحين ماتزال قتاله وبسمتها الطفولية بعد ماتغيرت والغمازات الي بانت عند ضحكها نفسها الغمزات الي كان تظهر لها لما يلعب معها وهو صغير....اه لوعمها وافق...شحلوها ...ليمتى ينتظر ..؟ والله حسافه ليش رفضوا الخطبه جان احين ريم ملكي
ريم لحظتها ارفعت عينها للمنظرة وتشابكت نظراتها مع عبدالعزيز فنزلت راسها بسرعة وبدت خدودها تحمر وتسارعت دقات قلبها
فجأة صرخت الهنوووف :وقـــــــــــــــــــــــــــــــــــــــــــــــ ــــــــــــــــــــــف

----------
----------

وقف ..صرخه اطلقتها الهنوف لأخوها ..بس شنو السبب وهل راح يوقف بالوقت المناسب؟
في الجزء القادم راح نشووف موقف فهد من هالزيجه الي ابتلش بها ؟
وبنفس الوقت رد فعل مشاعل الي ماتدري بالي يدورحواليها؟
وعلي ومشعل لي وين بيوصلهم طريج الخطأ؟
وشنو سر بجي العنود؟
ريم راح ترجع من الجامعه اكيد..بس مع نفس الأشخاص ...؟ ولا بتنتظر اختها وامها؟
سعود مقعد وحياته النت ..بس من من ابطال قصتنا بيخليه ايغير رايه ؟ويطلع من بعد شهوور حبس روحها ابها ؟
وشنو ردة فعل روان لما تشوف ولد عمها ببيتهم بعد هالغيبة ...؟