لحظات غريبة بين اثنين ...خلقت الحب في قلبين "

مرت الايام بطيئه على الدانه .. مرت مليانه تعب نفسي ومعنوي وجسدي ..
الغرور ـ عصير ليمون ؟؟ بدون سكر ؟؟ لييش ناويه تنتحرين ؟؟
دانه ـ لا ..
الغرور ـ دانه ويهج متغير .. موب طبيعي بالمره ..
دانه ـ من هموم الدراسه ..
الغرور ـ زين بعزمج على الغدا ..
دانه ـ لا .. ما اشتهي .. برووح الين .. مافيني شده على المحاضرات اللي باقي ..
الغرور ـ أنتي موب طبيعه اليوم ..
دانه ـ أدري .
كان صج اللي زاعج دانه انها في الاسبوعين الاخيرين ما شافت سلمان ولا حسن..
شافت حمد وتهربت منه . وشافت خالد لكنها ماكلمته ..
في السيارة ..
رن تلفونها ..
ـ ألو ..
عبير ـ هلا .. وغلا ..
دانه ـ هلا بالعروس..
عبير ـ لا عاد جي استحي ... مر علي اسبوع . وخلصت من سالفة العرس ...انتي وينج هالحين ؟؟
دانه ـ على طريق الجامعه .. لييش ؟
عبير ـ مري امي .. ما كلمتها اليوم وأنا شايله همها .. .. ما أدري موب مرتاحه ..
دانه ـ أمرج وآخذج معاي ؟؟
عبير ـ لا أنا بعيده . أنتي أقرب .. مريها ..
دانه ـ تآمرين أمر ما طلبتي شي ..
عبير ـ ما يامر عليج عدو تسلمين لي ..


الحلقة الواحد والعشرين .... والأخيره ..
وهو بين أوراقه في عز انشغاله .. رن التلفون .. قام بتكاسل وهو يتأفف ,,
ـ يس .
ـ ألو ,,, خالد . ألو ..
خالد ـ ألو .. انا خالد من معاي ؟؟
ـ أنا سعود ولد عمتك ..
خالد ـ هلا سعود هلا .. شخبارك يا ريال ؟؟
سعود ـ خالد .. .. يا أخي خل ايمانك بالله قوي ..
خالد ـ شفيك سعود ؟؟ شصاير ..
سعود ـ أمك يا خالد .. عطتك عمرها ..
*************
غرقت عيونه بالدموع .. طالع هالاوراق اللي جدامه . .. قطعها كلها .. كلها .. . ويلس في زاوية الغرفة ..
شريط حياته مر جدامه .شاف خمس سنوات من الجفا .. شاف أمه وهي تبجي يوم رجع من السفر .. يوم تبجي لما سافر .. للمرة الثانية .. شاف جهنم جدامه .. شاف جهنم .. وهو يعرف أمه توفت وهي موب راضيه عليه ..
قطع كل الاوراق كل الكتب .. كل شي .. وهو في نوبه استنكار ..
ماتت أمه .. ماتت الغاليه .. ماتت وهي شايله عليه .. ماتت وهي زعلانه منه .. ماتت ..
***************
اقتنعت دانه أنها ويهه نحس .. ويهه نحس .. تحاشت نظرات هناء .. وتمت بقرب عبير .. اللي انهارت بالصياح .. ونفس الشي خواتها العنود وصالحه .. وبشاير ...كان خالها متماسك .. متماسك بطريقة ما اعتادتها منه .
قمر وبدور ومنيرة ومريم وليلى تقريبا كل العايله مجتمعه .
هذا يوم العزا الثالث .. وخالد مابين.. رغم أن سعود أكد أنه اتصل فيه .. الكل انتقد خالد اللي غاب في عزا امه ..
بوخالد ـ بشاير .. يبه ولدج نام قومي شيليه .. حطيه في غرفتج ..
قامت بشاير وهي شايله ولدها اللي ماتعدى الشهرين ..
دانه ـ خالي .. روح أنت ريح .. .
بو خالد ـ لا .. أنا ماعلي شر ..
هناء ـ أي يا بوخالد .. قوم وارتاح ..
قام بوخالد .. في نفس اللحظة اللي دخل فيها خالد البيت . كان خالد غير .. شكله ممبهدل ولحيته الظاهر ماحلقها .. لانها كانت مبهدله ..
ـ السلام عليكم ..
ـ وعليكم السلام ..
طنشه بو خالد ودخل لغرفته ..
سلمت عليه العنود واحضنته عبير بقوة وهي ميته صياح .. ونفس الشي صالحه ..
الكل عزا خالد وسلم عليه باليد .. حتى بدور .. ولما يا دور الدانه ..
ـ عظم الله أجرك ...
ـ أحسن الله سعيك ..
بس كانت ببساطه .. ونزلت يدها بسرعه واستأذنت ..
طلعت من البيت ورجعت البيت ..
*********
دخل خالد لبوه .. ونزل وحب يده وهو يبجي .. سحب أبو خالد يده ..
ـ خواتك يوا من السعوده في نفس اليوم اللي سمعوا فيه الخبر .. لكنك أربعة أيام ما ييت ..
سكت خالد .. ..
بو خالد ـ ماتنطق .. شأخرك ؟
خالد ـ كنت ... كنت .. ..
بو خالد ـ اطلع برا ..
خالد ـ بس يبه ..
ـ أمك ماتت .. واللي موتها هو انت بقسوتك وعقوقك .. اطلع برا بيتي .. لانه يتعذرك ..
خالد ـ يبه .. يبه أنا آسف .. أنا كنت أدرس .. كنت أبي أخليكم فخورين فيني ..
بو خالد ـ ليتك عامل نظافه وواصل رحمك أحسن من دكتور قاطع وصله .. أمك يا خالد .. أمك .. ماتت من قهرها منك.. اطلع .. ما أبي أشوف ويهك .. بعد اليوم .
قام خالد والدنيا مسوده في ويهه ..
بوخالد ـ شي أخيير .. أمك ما ماتت غاضبه عليك ..
كأنه ناقص احساس بالذنب علشان يزيد عليه أبوه بآلالامه ..
طلع خالد .
تنهد بو خالد .. خالد من يومه .. من يومه انسان قاسي .. اول شي عمته اللي طاحت بسببه .. واليوم امه .. طبعا ما ينسى أنه السبب في تشتت الدانه وطلاقها .. وكافي فشله جدام نايف ولد أخته .. يوم طلق بنته وزواجهم ما كمل شهرين .. هذا غير سواد الويهه اللي من وراه .. البنت اللقيطه ..ووواوات وايد .. صج أنه طلع دكتور .. بس للاسف ماينرفع فيه الراس .. خصوصا هله واللي يعرفون مصايبه ..
******************
*******************
مرت الايام .. ودانه كانت متعلقه وايد في مايا .. اللي كانت تناديها ماما .. طبعا دانه ماكانت تبي هالشي .. لكن الخدامات ينادونها ماما ومايا تقلدهم
مر شهر كامل .. ودانه ما قدرت تدخل بيت ناصر .... كان حمد يمرها بين فتره وثانيه . وخالد وليلى .. لكنهم ما كانوا يتطرقون لموضوع حسن وسلمان ..
خذت مايا معاها بيت خالها تشوفه ..خصوصا أن بيت ضاحي قريب منه شوي ..
دخلت البيت وطلبت من الصبي انه يناديه .. تفاجأت لما شافت خالد موجود ..
ـ دانه ..
ـ ......................
خالد ـ دانه ..أنا آسـ....
دانه ـ ماله داعي .. كل شي قسمه ونصيب ..
خالد ـ بس .. أعتقد أني كنت السبب .
دانه ـ .........................
خالد ـ أنا آسف . ..
سكتت الدانه ..
خالد ـ متغيره ..
دانه ـ ها؟؟
خالد ـ متغيره .. ويهج مافيه دم .. شفايفج بيض .. والهالات حول عيونج .. ما راجعتي طبيب ؟؟
دانه ـ مافيني شي ..
خالد ـ أنا طبيب ..
دانه ـ صج مافيني شي ..
خالد . ....... .. دانه .. بدون مقدمات .. تتزوجيني ؟؟
*************
خالد من شاف دانه رف قلبه .. كانت متغيره متغيره .. الحين مافي شي يمنعه من زواجه منها.. هو مطلق وهي مطلقه .. هو أمه كانت تبيه يتزوجها .. وهي أمها كانت تبيها تتزوجه .. وأكيد أبوه بيرضى عليه ..وقبل كل شي .. هذي دانه .. اللي ضيعها من يده مرة بغباءه .. وحبه للتحرر من قيودأهله .. طبعا عرضه للزواج منها كان المناسب في نظره .. هو يحبها .. هالشي تاكد منه .. تأكد منه ..
****************
لكن دانه .. كتمت شهقة عميقه . من اسمعت عرضه
((طبعا .. يبي يأكد شكوك الكل من حولي .. يبي يسبب لي مصيبه يديده .. بس .. أمي كانت تبي تزوجني اياه.. وأمه كانت تبيني له .. يمكن يكون خلاصي من هالحياة اللي أنا فيها .. يمكن .. بس لحظة . لحظة يالدانه .. نسيتي ؟؟ هاللي عافج .. هذا اللي بكل كره واشمئزاز قال انه مايتخيلج زوجه له .. هذا الانسان اللي حطم حياتج ؟؟ شتقول الناس لما تتزوجينه ؟ شيقول ضاحي ؟؟ضاحي ؟؟ ’آآآآآآآآآآآآآآآآآآآآآآآآآآآآآ آآآآآآآآآآآآآآه’ضاحي .. بتتأكد كل شكوكه حولي لحظه .. أنا ما أبي خالد .. وين كرامتي ؟؟؟؟ وينها ؟؟ ليكون نسيتها اليوم في البيت ؟ وينج يا الكرامه وينج . وينك يالكبرياء . وينك ؟؟ وينك ؟؟ ((
دانه ـ لاء يا خالد .. لاء ..
خالد ـ لييش ؟؟ هذا موب رغبه أمج ؟؟
دانه ـ أدري .. ورغبه أمك الله يرحمها ..
خالد ـ زين ؟؟
دانه ـ آسفه يا خالد .. زواجك مني ما بيغير شي ..
خالد ـ شتقصدين ؟؟
دانه ـ اللي أقصده .. أنه بتم حقيقة أن أمي وأمك .. ماتوا وهم علينا موب راضيين .. تعالي مايا ..
مسكت دانه مايا .. وخذتها لي السيارة .. خذتها .. وهي هالمرة اللي رفضت خالد .. هي اللي قالت له لاء .
**********************
مر الشهر الثاني .. مرت الايام بروتينها المعتاد .. الجامعه الامتحانات .. مايا . الشي الوحيد اللي صج دانه كانت موب مرتاحه له هو قمر وحمد .. كانت قمر ما تعوت على حمد .. وحمد مايكلمها الا للضرورة القصوى ..
ـ والله يغث ..
دانه ـ اصبري عليه ..
قمر ـ شصبر الله يخليج .. اتصل فيني يقول لي ما أبي فستان عرسج عاري وصك في ويههي ...
دانه ـ ههه .. والله انكم نكته الموسم ..
قمر ـ تضحكين ؟؟ والله ولد أخوج يرفع ضغطي ..
دانه ـ زين .. لاتلبسين عاري ..
قمر ـ بس هذي ليله عرسي ماله حق ..
دانه ـ شكنتي ناوية تلبسين ؟؟
قمر ـ عجبني فستان كوكتيل مع ظهر مفتوح ..
دانه ـ شنو ؟؟؟؟؟؟؟؟؟؟؟؟؟؟؟؟؟؟؟؟؟؟
قمر ـ شفيج ؟؟
دانه ـ ظهر مفتوح لي وين؟؟
قمر ـ لي هنا ..
وأشرت لآخر ظهرها ..
دانه ـ يا بنتي جي أنتي متفصخه .. استحي حمد ريال محافظ مايحب هالاشياء .. شيلي على الاقل فتحة الظهر ..
قمر ـ أشيلها ؟؟
دانه ـ او البسي تحته شيرت ههههههههههههههههه ...
قمر ـ شيرت ؟؟؟ تطمنزين؟؟ .. زين . تاريخ عرسي 14\4..متى ألحق أدور في الكاتالوجات عن فستان؟؟
دانه ـ جدامج شهرين ..
قمر ـ أقل من شهرين لاتنسين الجامعه .. بعدين تاريخ عرسي يصادف فترة امتحانات .. أظن ..
دانه ـ والحل ؟؟
قمر ـ ما أدري .. .. فستان عرس ومحتشم ؟؟ وين ألاقيه ؟؟ يمكن في أفغانستان ..
دانه ـ طرحتهم روعه في أفغانستان شفافه بس العيون . تبين حتى ضبابيه .. هههههههههه .. أعتقد بترضي حمد هالمتشدد..
قمر ـ فكيني من ابن اخوج .. أقنعيه بلييييييييز ..
دانه ـ بحاول ..
*************
حمد ـ لاتخليني أروح الحين وأفركش كل شي وأنضم لجماعه الجهاد والتوحيد ..
دانه ـ الله يهداك حمد .. شفيك .. البنت موب كل يوم تعرس .. وشمعنى اللي قلته .. ؟؟
حمد ـ جماعه الجهاد في الاسلام .. الي يطلعون في التلفزيون في الاخبار اللي يمسكون خلق الله ويذبحونهم مثل الــ..
دانه ـ بس بس عرفتهم هالمجرمين .. اذا ذبح الابرياء عندكم جهاد لا والله ماشميتوا ريحة الجنه .. خلنا من هالتشدد.. خف على البنت .. وبعدين يا أخي .. كلمها باحترام شوي شنو هي ترفع السماعه وتصكها في ويهها بدون كلمه سنعه؟؟ خدامتكم ؟؟

حمد ـ أنت شفتيها شلون ترد على التلفون ؟؟
حط حمد التلفون على الاسبيكر ودق رقمها ..
ردت قمر بنفس خايسه ـ آلو ..
كان صوتها حاد شوي ..
صك حمد في ويهها التلفون ..
ضحكت دانه .. ـ زين داق على البنت .. ماعرفت تسلم على الاقل تصك في ويهها التلفون ؟؟ شتسوي تعطيها رنه يعني ؟؟
ضحك حمد ..
ـ تستاهل ..
دانه ـ ارجوك حمد .. خف على البنت .. وبتلبس شي معتدل ..
حمد ـ زين . بس موب عاري ؟؟ سمعتي ؟؟
دانه ـ انشاء لله ..
ـ وتراني بس أهدد بالكلام اللي قلته عن جماعه الجهاد .. أنا أصلا أستنكر فعلهم .. لاتنسين أني رجل أمن . وهالشي يعني العدل قبل كل شي .
دانه ـ أدري .. ..
حمد ـ شفيج هاليومين ؟؟ أحس أنج زدتي ؟؟ خصوصا بطنج ..
دانه ـ أفرغ في الأكل بس ..
حمد ـ حسن في غرفته .. وسلمان بعد .. دامج تشجعتي وييتي بيتنا (مع أن أمي موب هنا .. يلا .. روحي لهم .(
دانه ـ بروح لسلمان .. لاني حطيته في موقف سخيف ..
حمد ـ وحسن ؟؟
دانه ـ ................ انشاء الله ..
حمد ـ زين .. قبل لايأذن العشا .. علشان نروح كلنا للمسيد .
دانه ـ أشكره تقول لي خلصي بسرعه .
حمد ـ أشكره أقولج اشردي بذيلج قبل لاتيي امي ..
دانه ـ c u
طلعت دانه لغرفة سلمان .. طقت الباب ..
ـ ادخل ..
ادخلت ..
ـ السلام عليكم ..
ـ وعليكم السلام ..
بعكس ماتوقعت .. ابتسم لها .. راحت له واحضنته ..
ـ سلوووم .. حبيبي .. آسفه .. لانك بسببي صار لك اللي صار .
سلمان ـ أنتي مالج دعوه .. .. وأنا ماشايل عليج ..
دانه ـ عيل ليش زعلان مني وماتمرني؟ شهرين يالظالم ولاكلمة منك؟؟
سلمان ـ نسيتي أن امتحانات؟؟ وأنا مصري ؟؟
دانه ـ ههههههه .. بس ما يعني انك ماتمر ..
سلمان ـ استحيت ازورج بعد ماقال لي حمد اللي سوته امي فيج ..
دانه ـ عادي . موب أول مره .. بس ماقالت شي غلط .. أنا كنت السبب .
سلمان ـ لاء .. ماكنتي أنت.. حسن هو اللي كان السبب .. أنا ما أرضى عليج مهما يكون ..
دانه ـ تسلم لي .. الله يحفظك ويوفقك يا سلمان ولد ناصر ..
سلمان ـ ما أحلاها من دعوه ..
دانه ـ من بيحج السنه انشاء الله؟؟
سلمان ـ سمعت من أبوي أنه خالي ..
دانه ـ بروحه؟؟
سلمان ـ لاء . معاه حمد ..
دانه ـ الله يوفقهم .. ماقال لي حمد ..
سلمان ـ يمكن نسى ..
دانه ـ تعال معاي ..
سلمان ـ وين؟؟
دانه ـ تعال بس ..
مسكت يده لين وقف جدام غرفة حسن ..
سلمان ـ مستحيل ..
دانه ـ تدري .. ما انقبلت أعمالكم من اليوم اللي تهاوشتوا فيه .. شلون تبي الله يبارك لك في دراستك وأنت مخاصم أخوك ومتزاعل معاه؟؟
سلمان ـ يعني بتسامحينه ؟؟
دانه ـ ...أنا سامحته .. الباقي عليك ..
دخلت الدانه الغرفة بدون ماتطق الباب .. كان حسن يطالع التلفزيون ومن شافها وقف .. صج أنها أصغر منه بوايد .. لكن .. دانه تحس أنهم عيالها .. ..وماتقدر تزعل منه . كل هالمده وايد عليها ..
ـ دانه ـ يينا نستسمح منك . أنا وسلمان .. أنت الكبير وحنا غلطنا عليك ..
سلمان ماتكلم ..
لكن حسن باس راس عمته ..
ـ أنا آسف .... يالدانه .. كلامي كان .. جارح .. وأنا ماكنت أقصده ..
باس راسها مرة ثانية ..
دانه ـ أصلا أنا كنت أمزح معاك .. ونفس الشي سلمان .. ما أخذنا أي شي على طابع شخصي . .. السموحه منك..
حسن ـ لحظة .. صج أني دخلت الجامعه أربع سنوات بس كل الي فهمته مايي أربع محاضرات .. فالكلام الي تقولينه وايد كبير .. ما أفهمه .. شنو طابع وشنو شخصي ؟؟
ضحكت دانه ـ هههه .. كأنك ماتعرف .. يلا .. سلمان ..
مد سلمان يده وتصافحوا . كان واضح أنهم يكابرون ..
مستحين من بعض ..
حسن ـ آسف .
سلمان ـ لا .. أنا آسف أنا غلطت عليك .. ,, السموحه منك يا أخوي ..
***************************

خورشيد ـ there is girl wait for you ..
استغرب خالد الساعه 3 الصبح من يبيه في هالحزه؟؟ طلع وكانت كاثرين واقف في البرد عند الباب .. طلب منها أنها تدخل لكنها ما رضت ..ـ marry me ,,,
كان طلب كاثرين أكبر من أن يفهمه خالد ..
-I am sorry …what??
- marry me .. I fall in love with you ..
- I cant .Iam sorry..
-because I am not a muslim??
- may be ..may be I am not in love with you ..
- but ..
- there is no but.. I cant marry you ..because you ..you..
-fool??
- no .you are my friend..not my girl friend..yet !!
-thanks a lot for your kindness… but I don’t think that I can wait for it ..
- for what??
- being your girl friend I don’t want that ..
- you who asking me to marry you ..
- forget it too…
كان واضح أن كاثرين سكرانه .. وضوح الشمس .. لانه كانت تتمايل يمين ويار .. استغرب خالد .. لانه ولامرة لمح لها أنه يحبها .. وحتى لما كانوا يرووحون وييون كانوا بس يدرسون ..
دخل لغرفته .. ومسك التلفون ..
ـ ألو ..
ـ ألو ..
خالد ـ شيماء ؟؟
شيماء ـ هه . خالد ؟؟؟
ـ شخبارج؟؟
شيماء ـ اتصالك في غير وقته ..
خالد ـ ؟؟؟ ليش؟؟؟؟
شيماء ـ أنا بترك هالشقة اليوم .. فهالرقم خلاص انساه .
خالد ـ ليش ؟؟
شيماء ـ لأني أنا وسامر كتبنا كتابنا .. ملجنا .لاني انتهيت منك يا خالد .. انتهيت من أنانيتك ..
انصدم خالد .. وصك التلفون في ويهه شيماء .. .. ليش الحظ معاه بدا يسوء؟؟ ليش ؟؟ ؟؟
*********************
مريم ـ شيلي مايا .. البنت ماتت من التعب ..
طالعت مريم مايا الي تعبت من اللعب .. كانت اتفقت مع مريم يطلعون مع بعض لجنغل زوون يلعبون الاطفال..
مريم ـ شيليها المسكينه انهد حيلها ..
دانه ـ البنت ثقيله .. مأأقدر لها .. الحين نوصل السيارة ..
مريم ـ ششالسالفه توج من فتره كنت تشيلينها .. متى اثقلــــــــ.....
شهقت مريم ..
طالعت دانه عيون مريم وحلجها اللي تحول من o إلى ابتسامه ..
دانه ـ مريم لاتقولين لحد الله يخليج ..
مريم ـ بس ..
ـ أرجوج ؟؟؟؟؟؟؟؟؟؟؟
مريم ـ أحاول ..
دخلت السيارة .. ونامت مايا في حضنها ..
شغل راجو الراديو ..
كان عبادي الجوهر .. (ليه العطر وأنتي أنفاسك دخون؟؟ (
ادمعت دانه .. تذكرت ضاحي .. ما قدرت تمسك دموعها أكثر ..
)ياللي كل أفراح قلبي الحزن في المسافة بين فرقاك ووصالك؟؟ .. ليه يالقلب الحنون تآخذك فيني الظنون؟؟؟ ضيعت عقلك .. هو فيه مثلك .؟؟ أنتي ماغيرك عيون .. وأنا أحبك .. أحبك .. أحبك وأنتي أنفاسك دخون .. (
ما قدرت دانه تمسك دموعها عند هالمقطع .. ..
طبعا مريم .. رويترز 2 ما التزمت بكلمتها .. وفجاة بدت الاتصالات على الدانه .. قمر وحمد وخالد وليلى وناصر .. حتى هناء .. كأن ماصار شي بينهم دقت تبارك لها .. ناصر نايف سعود ثامر .. حتى بدور ..
أخييرا دقت مريم ..
ـ هذا وأنا قلت لج لاتقولين لحد ؟؟
ضحكت مريم ـ من فرحتي والله .. من فرحتي .. عاد ماتصدقين الكل يقول دانه حامل التعبير على وجوهم يموت من الضحك .. صراحه كان خبر الموسم ..هذا الخبر اللي صدق يصدم .. محد توقع حمالج .. الكل شافوا تغييرج الفسيلوجي .. بس محد منهم توقع أنج كنت حامل .
دانه ما علقت ..
مريم ـ كم صار لج؟؟
دانه ـ تقريبا ثلاث أشهر وشي..
مريم ـ يعني من طلقج ضاحي كنتي ؟؟
دانه ـ كنت مشككه .. بس تحليل الدم أكد لي ..
مريم ـ وليش ماتكلمتي؟؟ ليش ما قلتي ..
اسكتت دانه وماقالت شي لمريم ..
مريم ـ على العموم .. ألف مبرووك .. ألف مبرووك ..
صكرت التلفون دانه ..
ابتسمت .. طالعت بطنها .. طالعت له .. وهي تبتسم .. بتصير أم .. لي متى بتخبي عنهم ؟؟ .. بس لسبب تجهله.. كانت تبي سالفة الحمال سريه محد يدري عنها .. يمكن لانها ماكانت تبي حد يشفق عليها ؟؟
**********
ـ بيسافر ؟؟ الحج؟؟
دانه ـ اييه .. اتصلي فيه .. وادعي له بالسلامه ..
مسكت قمر التلفون .. واتصلت فيه ..
الزقت فيها دانه ..
قمر ـ السلام ..
حمد ـ وعليكم ..
قمر ـ ...................
حمد ـ قمر بغيتي شي ؟؟
قمر ـ تروح وترجع بالسلامه ..
حمد ـ بس فستان العرس بيظل محتشم وماتلبسين عاري ..
قمر عصبت ـ والله العظيم أنك .. سافاج ..
حمد ـ زين يالمتحضره .. لا تفلسفين على راسي .. أنتي السوقيه ..
قمر ـ الشره موب عليك الشره على الغبيه اللي داقه عليك تدعيلك بالسلامه ..
حمد ـ صج .. والله في هذي ما جذبتي .
قمر ـ شقصدك؟؟ أنا غبيه؟؟
حمد ـ أنا ماقلت شي .. أنتي اللي وصفت نفسج هالوصف الدقيق .. المهم .. فستان عرس .. يكون محتشم سمعتي ؟؟
قمر ـ واذا قلت لك مافي عرس ؟؟
حمد ـ توفرين علي المصاريف .. عادي أنتي زوجتي أخذج بثوبج اللي عليج ولافارقه معاي ..
عصبت قمر ـ اااااااااااااااااااااي .. لاء .. ماصدقت ماتبي تسوي عرس .. في عرس .. وفي فستان عرس ..
حمد ـ محتشم ؟؟
قمر ـ محتشم ..
عصبت حيل ..
دانه ـ هاتي ..
خذت التلفون منها وهي تضحك ..طلعت قمر برا الغرفه وهي معصبه ..
ـ ألو حمد . استح على ويهك شوي ..
حمد ـ على بالها غبي تمشي علي سواليفها ؟؟
دانه ـ والله من درت بسفرك ويهها تغير .. واتصلت عليك بسرعه بدون تردد .. البنت شكلها تحبك ..
حمد ـ لاتقولين..
دانه ـ والله .. أصلا هي من فتره بدت تسألني عن اللي تحبه واللي ماتحبه شكلها لانت .. لاترجع تقسيها ..
حمد ـ هههههههه .. خلاص أعطيني اياها ..
دانه ـ أنا بطلع عنكم .. بس ها .. عطها كم كلمة حلوين تذكرك فيها ..
حمد ـ أعطيني اياها ..
طلعت قمر وأعطت قمر التلفون . ودخلت تشوف مايا ..
طالعت مايا وهي تبتسم .. مسحت على راسها ..
دخلت قمر .. ويهها متورد لاول مرة والسبب مايكون المكياج ..
دانه ـ شفيج متشققه ..
قمر ـ ,,,,,,,,,,,,,,, حمد ..
دانه ـ شفيه ..
قمر ـ أحبه
ضحكت دانه ـ وناسه شسوى علشان غيرتي رايج ..
قمر ـ حط لي الأغنية الرومانسية الاولى في الخليج العربي ..
دانه ـ أي أغنية ؟؟
قمر ـ تدري أني موت أحبك ؟؟ وأن مالي غير حبك؟؟ واللي ينبض في ضلوعي .. ماهو قلبي هذا قلبك ..حطها لي .. حمد .. حط لي هالاغنية .. حمد ..حمد .. حمد .. حمد ... أأأأأأأأأأأأأأأأأأأأأأأأأأأأأ أأأأأأأأأأأأأأأأأأأأأأأه ..
دانه لاحظت أن قمر تغيرت من أيام الملجه .. لاحظتها .. وعرفت أنها حبت حمد غصب عنها .. وأن خالد كان مجرد .. حب مراهقه تافه .. ماله أي معنى ..
عرفت دانه أنها خلاص .. انتهت بينهم حركات اليهال .. خلاص .. ..
دانه ـ وفستان العرس ؟؟
قمر ـ بلبسه محتشم .. ولو طلب مني ألبس عباه بدل الفستان مابيكون عندي مانع ..
ابتسمت دانه .. كانت قمر خلاص ذايبه في هواه ..
**
والسبب أغنية ؟؟
******************
تجول في هالبلد .. هو الحين وحيد .. وحيد حتى اشعار آخر....
لانه في المستقبل بيرجع ويطلب بدور .. مستحيل بدور تنسى اللي بينهم من عشرة .. مستحيل . وان نست .. .. ما يبي يحط أي خيارات .. ان نست .. فلكل حادث حديث ..
******************
فتحت الباب.. التفت لها .. انصدمت بوجوده .. كان ناصر ونايف موجودين .. البست شيلتها .. ماتوقعت ضاحي يي؟؟ قالت لها قمر أربعه أشهر ..
ناصر ـ دانه .. ضاحي يبي يردج ..
اسكتت دانه ..
(ضاحي يبي يردني ؟؟ زين؟؟ واللي صار ؟؟ أمحيه ؟؟ بس.. مستحيل .. كرامتي وكبريائي أكبر من ضاحي .. . بس اللي في بطني ؟؟ وحقيقة أني متشردة .. وأنا بروحي .. لكن لو صار لي هالياهل ؟؟ من بيتحملنا ؟ من ؟؟ وبعدين أنا أحب ضاحي.. أي كرامه وأي كبرياء ؟؟ وضاحي اعتذر ؟؟ ؟ظ أي كرامه وكبرياء بيظلون عندي اذا قلت لاء؟؟ أخواني وزوجاتهم مابيترددون في اذلالي .. مابيترددون في توجيه الكلام لي .. أنا بروحي ماكانوا يطيقون مسؤليتي ؟؟ ومع ياهل ؟؟ ضاحي أبو ممتاز.. والدليل علاقته ببنته مايا .. وأناأحبه .. بغلط في حق نفسي اذا رفضت الرجوع له .. في حق اللي في بطني .. أعتقد هالمده كانت كافيه لرد الاعتبار .. بس قبل كل شي .. شرط شرط .. ((
رفعت راسها ..
ناصر ـ ها دانه ؟؟
دانه ـ بس بشرط ..
ضاحي ـ أنا موافق على كل الشروط ..
ناصر ـ مابنسمع شرط الدانه أول قبل لاتوافق ؟؟ ششرطج يا دانه ..
دانه ـ يكتب هالبيت باسمي ..
انصدم ناصر ونايف ..
ـ لا يالدانه .. هذا شقى عمره ..
ضاحي ـ أنا موافق ....
انصدم ناصر ونايف .. وكان ضاحي واقف بثبات وقناعه ..
ناصر ـ بس ..
ضاحي ـ ماعندي مشكله .. أنا بكره انشاء الله بروح وأسجل البيت بسمج ..
اسكتت دانه , تمت طوال الليل وهي محتارة .. ضاحي راح لفندق وين حط أغراضه .. كانت خايفه يكرهها ضاحي.. يكرهها بسبب شرطها .. مانامت .. وهي تحوس في السرير .. وشايل هم .. اتصلت في ليلى .. وقالت لها كل شي صار ..
ليلى ـ ليش شرطتي هالشرط؟؟
دانه ـ لانه .. ما أدري يمكن يتكرر اللي صار .. ما أبي أتشتت . أبي ..
ليلى ـ لاتفاولين انشاء اله الامور بينكم تصطلح .. بس .. الرياييل مايحبون الحريم تتحكم فيهم ..
دانه ـ ليلى أنا أحاتي طول الليل .. طول الليل .. ماتصدقين شقد .. تعبت .. من الضيااع .. أبي أحس أن لي أرض لي بيت ..
ليلى ـ بس أنتي رجعتي لضاحي ..
ـ اللي افترقت عنه في المرة الاولى ..مهما صار ..كان لازم أأمن نفسي .. واللي في بطني ..
*****************
انفرد فيها أخييرا ..
نزلت دانه راسها ..
ضاحي رفع راسها .
ـ لا تنزلين راسج أبد ..
دانه ـ ضاحي اأنت سجلت البيت باسمي ؟؟
ضااحي ـ أاييه ..
دانه ـ انت تكرهني ؟؟
ضاحي ـ لوأكرهج أرجع لج ؟؟؟
دانه ـ بس ...
حست دانه أن كل همها انزاح لما حضنها ضاحي .. ما مسكت دموعها ..وتمت تبجي في حضنه بقوة ..
ضاحي ـ خلاص .. خلاص .. انتهت الدموع ..
دانه ـ ليش سجلت البيت بسمي؟؟
ضاحي ـ لاني ما بضيعج من يدي مهما كان بعد اللي صار .. ظلمتج مرتين .. وأوعدج مابظلمج بعد اليوم.. دانه.. كانوا شهرين من العذاب بالنسبة لي .. ما أدري شلون ابتعدت عنج .. دانه .. أنتي دانه .. مابضيعج من يدي أبد أبد .. واعذريني لغيرتي العميا .. اللي .. سببت لنا هالمشاكل .
دانه ـ ما تصورت حياتي بدونك..
ضاحي ـ ليش ما قلت لي أنج حامل ؟؟
دانه ـ أنت عرفت ؟؟
ضاحي ـ قالت لي قمر أمس ..
دانه ـ ....... كنت محتاجه وقت ..
ضاحي ـ دانه .. نسيت أجاوبج على سؤالج ..
دانه ـ أي سؤال ؟؟
ضاحي ـ بس بجاوبج .......... أحبج ..............................
ابتسمت دانه.. اضحكت بصووت عالي .. كانت لحظات غريبه .. غريبه .. هذا ضاحي اللي يعترف لها بحبه.. ماتقدر الا تحبه أكثر.. أكثر .. وأكثر . وأخييرا .. حست بأمان .. أخييرا ..

The End

انتهت .. اللحظات .. انتهت وهي غريبه وايد .. انتهت بحب ماله حدود .. بحب ماله نهايه .. ببداية حياة لدانه .. وضاحي ..

سلمتي قلبي

الله يعطيك العافيه على الطرح
اللي كله ابداااااااع


حضوري شكر وتقدير لك
ولاهتمامك في مواضيعك


اخوك
نجم الجدي

يسلمو ع المرور

ه يسلمو ع المرور

أستمتعت بهذه الصفحه
وسرني ماشااهدت هناا

ورااق لي جدا
وسلمت يمناااك مع الشكر

لا جديد سوى رائحة التميز
تثور من هنا ومن خلال هذا المتصفح
الجميل والمتميز ورقي الذائقه
في استقطاب ما هو جميل ومتميز
تقديري وودي