ديوان الشاعر/ثامرشبيب

اببعد و الطريق اللي يودي يا عساه يجيب
بدالي واحد ٍ تلقى معاه اللي تمنيته

مدامك شايف الفرقا امل خيره وراي مصيب
انا حاضر على امرك و امرك ماتعديته

انا الغلطان و استاهل جفاك و منك التجنيب
على فكره ترى ماهمني بعدك و تشتيته

كثر ماهمني شخص ٍ بداية بعده التعذيب
قسم بالله ما مثله من الاجواد خاويته

حسافه يالحبيب اللي من يديني زمان قريب
ترك دنياه من شاني و لجل دنياك صديته

هذاك اللي خلق ربي حياته كلها من طيب
تضيق بعيني الدنيا و اشوف الخير لاجيته

تخيّل من تعرفنا و لا مره لحقته عيب
ذكرني و المصيبه يا كثر ما انا تناسيته

كبير الفرق ما بينك و بينه و السؤال مجيب
اذا ردت على فعلك و صيته و فعله و صيته

علي لا ضاقت الدنيا و جيتك عن عيوني تغيب
وهذاك ان ضاقت الدنيا وجيته فاتح ٍ بيته

كلامه .. فلة حجاجه .. سلامه لابدا الترحيب
كبير بكل حالاته .. انا وشلون خليته .. !

عطاني كل ما اطلب بلا منه بلا ترتيب
على اقصاه يمكن الف مره بس حديته

تركته ايه ما انكر و عذري دايم التجريب
غريبه قصتي وياه و الاغرب كيف جافيته .. !

اشوف الدنيا صغيره بعيني اوكره التغريب
اضيع شهور عن دربه وارد ان كان دليته

اجيه استسمح ارضاته واطالب حقي التقريب
انادي اسمه الثاني عشان ارضاه ناديته

حكاية اسمه الثاني بسيطه ماتبي تحسيب
عطاني اسم غير الناس بلحالي وسميته

انا متأكد ان جيته ودمعي سايل ٍ للجيب
بتصغر كل هالدنيا مثل ماضقت و ابكيته

كبير بقلبه بحبه كبير ولا ملاه الشيب
يقرب كفه الطاهر لكفي كان مديته

اذا الله قدر ورده مثل اول وصار قريب
عسى الله كل محتاجه يخليني ان خليته

ياكثر شرهاتي عليك انت بالذات
والا على غيرك تراها قليله

تعبت اجي بسكات واروح بسكات
ساكت وانا متني حموله ثقيله

مرات احس اني لحالي ومرات
احس مسنود ٍ بجيش وقبيله

عشت بمتاهه غير كل المتاهات
كانت مفيده بس ماهي جميله

عرفت منها كيف طعم الخيانات
وشلون ترخصك النفوس الذليله

خسرت .. لاوالله فدتك الخسارات
ياغلا من الدانه بعينن بخيله

ماقلت لك قصة بعيد المسافات
اللي معه بشته وسيفه وخيله

ضحى بهم منشان سود ٍ وسيعات
الله يعين اللي مفارق خليله

جيتك اشيل من التعب كثر مافات
طرقي وهدت سود الايام حيله

خذني من ايدين الحزن للمسرات
ليله معك عن الف ليله وليله

صوتك لحاله غير عن كل الاصوات
وش غير ؟ حتى الغير ماهو مثيله

غير انت وصوتك غير والشوق مامات
وتلومني لاجيت قلبي اشيله

دايم ترى اهل القلوب الحزينات
تنشد عن الغالي وتجي تشتكي له

علاقتي وياك غير العلاقات
لو كان ماهي ياحبيبي طويله

اشره على الغالي عليك انت بالذات
والا الرخيص رخيص ماني بجي له

يا بنت وجه الخير بيّن و معروف
لو ما تكلم شافت الناس خيره

و الوجه الاقشر ماهو بحاجة اوصوف
يبان حتى للعيون الضريره

من عاش يتبع خطوة المال ملهوف
رزقٍ كتبه الله .. مافيه غيره

الخوف لو ينفع .. نفع صاحب الخوف
اللي على حقه يدينه قصيره

الضعف ماغيّر قدر ناسٍ ضعوف
عاشت صغيره ويوم ماتت صغيره

كلمة احبك بس من اربع حروف
وتحكي احاسيس ومشاعر كثيره

الحب اكبر من سهر ليل وطيوف
ماتفهمه حتى القلوب الكسيره

تدرين اصدق حب يطلع من الجوف
حب الفقير اللي عشق له فقيره

احلامهم تكبر من ملامس كفوف
وتكبر من اشواق العشير لعشيره

كنه معاها لو على ضلع مكشوف
داخل قصر يجمع امير واميره

احساسهم صادق بلا كذب وزيوف
كل ٍ يقول اللي يريّح ضميره

احساس طفله عندها العيد نفنوف
تظن من تلبسه صارت كبيره

وانا لحالي مجابه صفوف وصفوف
واليا خسرت اقول فدوه وخيره

اطيح و أوقف وابعد الشوف واطوف
اخذ قليل الزاد وارحل لديره

اترك كثير الزاد واكسب معروف
ترك الكثير يجملك في مصيره

يمكن يجيه انسان هالك من صدوف
يلقا من اللي تاركه مايجيره

شايف من الدنيا وعايف بشر عوف
اجناب والا من رجال العشيره

مرت علي اظروف واظروف واظروف
ماريحت حتى العيون السهيره

وللحين راسي راس وكتوفي كتوف
ماغيّرت مني ليالن عسيره

مدام فيني حيل وعيوني تشوف
والله معيّشني بحاله ستيره

والله لستقبل على بابي ضيوف
لو ما املك الا دلتين وحصيره

انا لاقلت لي شلونك وانا ضايق اقول بخير
مدامك سائلٍ عني اكيد ان ضيقتي راحت

انا من كثر ماحبك اشوفك في عيوني غير
تضيق النفس من غيرك ولامن شفتك ارتاحت

احبك كثر .. ماتطري فبالي وتشغل التفكير
كثر .. ماشيلك بعيني وناسٍ منها طاحت

احبك كثر .. ما ادمح خطاك ان خانك التعبير
كثر .. ماخانت الرفقه بكتم اسرارها وباحت

احبك كثر .. صقارٍ تولع في محبة طير
كثر .. مادلة الطيّب بريحة هيلها فاحت

احبك كثر .. ماحس بشعور اني عليك اغير
كثر .. مازيح هالغيره عن افكاري ولا انزاحت

احبك كثر .. مالك داخلي حب وغلا وتقدير
كثر .. ماغبت عن عيني ودموع امفارقك ساحت

تصدق !! من عرفتك صرت احبك .. واكره التغيير
وانا اللي كنت اعشق كل نجمه بالسما لاحت

تأكد كل ماتسئل عن حوالي اكون بخير
مدامك سائلٍ عني اكيد ان ضيقتي راحت

ماعلي خلاف اقول اللي ابيه
من فضل ربي علي اني قوي

الا حبك شي ما اقدر عليه
كن حبك ضيف والقلب بدوي

انت بس اللي ابيه ولا اجيه
عنك حظي لاوي ذراعي لوي

صرت لي مشوار لاجيت ابتديه
ان لقيت الدرب ضيعت الخوي

رد يامنهو حياتي في يديه
لا تخليني وانا لك مهتوي

ان خسرتك وين ابلقا لك شبيه
وانت من كل شي نادر تحتوي .؟

وين رايح جعل هالزول افتديه
وانت خابرني من البعد انكوي

انت حتى الجرح منك اشتهيه
من غلاك اضمى عذابك وارتوي

انت لا سولفت ماكني هنيه
التزمت الصمت كني منطوي

ليه اسولف لك وهي من غير ليه
تعرف انك تطوي احزاني طوي

انت حبك شي ما اقدر عليه
كن حبك ضيف و القلب بدوي

لاتلومني لاجيت كلي من اقصاي
مافيه غيرك لاتضايقت جيته

جيتك ولاغيرك ذكرته بمسراي
جيتك وكل انسان غيرك نسيته

جيتك وانا ماني بأنا تايه الراي
جيتك وانا مدري وش اللي بغيته

جيتك وقلبي دقته تسبق خطاي
جيتك اقول مفارقك ماقويته

ان مر يومٍ بالعمر منت وياي
اشتاق لك شوق المسافر لبيته

مثل الهوا تحتاجه الناس والماي
يحتاج لك قلبٍ هواك وهويته

دامك معي ماقصرت يوم دنياي
دامي خذيتك وش بقا ماخذيته

وانك ان تنشدني بعد ليه انا جاي
ابشر بردٍ يقنعك لاقريته

جيت اعترف بالفرق يا اخر مناي
بينك وبين اللي عشانك جفيته

اني ليا من جيت لك ( همك رضاي )
واني ليامن جيت له ( مالقيته )

لاتلومني لاجيت كلي من اقصاي
مافيه غيرك لاتضايقت جيته

كل البشر في صوب و هالبنت في صوب
الكامل الله كامله ما تعابي

ترفه و هي تمشي مسافات و دروب
في عز رحلات الشقى و العذابي

لا من مشت في يدها ترفع الثوب
كل ٍ يناديها و هي تقول ما بي

من الدلع سميتها شيخة العوب
حتى دلعها منحني له عجابي

مركوبها ما هوب أيات مركوب
من مر قدامي تلنه ركابي

لحقتها و الهرج زاهب و مكتوب
لأي موقف كنت عامل حسابي

قلت السلام وردت بأيش مطلوب
قلت الخفوق بخفت الدم ذابي

قالت وش اللي حدك لناري تذوب
قلت المشاعر ماعليها عتابي

قالت تمثل دور عاشق ومحبوب
قلت الحقيقه افتديك بشبابي

قالت اخير الحب ناهب ومنهوب
قلت انهبيني قبل لا نقل صوابي

قالت متى تكبر عن الحب وتتوب
قلت الخبل من شاف زينك و تابي

قالت صراحه ما توقعتك أسلوب
قلت افهم انك معجبه في جوابي

فجأه عرض لي واحد ٍ عرضة خروب
سلم علي و خاطر البنت طابي

جاني مطفي ضارب فياض و شطوب
و من قو عينه قال يا مرحبابي

و اخذ يسولف لي وانا فيه مغصوب
يسئل عن احوالي وسبة غيابي

مايدري انه بعرضته كسر قلوب
لا واعذابي منه لا واعذابي

رقد على كبدي وانا بوقت محسوب
البنت راحت و الرجى منه خابي

وقفت عاجز كني انسان مغلوب
من قرد حظي كل هذا جرابي

اتلا عهدها تلتفت لفت رعبوب
مالله كتبها قسمة ٍ في كتابي

اقفت تمشى في مسافات ودروب
قلبي يناديها وهي تقول مابي

آمنت ان الحي بيقابل الحي
من صدفةٍ للدرب هذا جرفتني

امشي بفالي صدفةٍ ما ابي شي
فجأه عرضت لي شفتها وطوفتني

مرت وعدت كنها ماهي بهي
ماكنها ياخوك يوم عرفتني

عطيتها حب وغلا وقصرت بي
اوفيتها بس للاسف ما وفتني

كانت اليا ضاقت تجي كلها لي
نست عطاي وطيبتي لالفتني

ماكن لي فيها غلا لو هو شوي
ولكنها بسود الليالي جفتني

وقفت اطالع منجرح منكوي كي
ساعه بمكاني منصدم وقفتني

بغيت اجيها وصدها كتّف ايدي
تبي الصراحه ياولد خوفتني

خايف اجيها تقول لي وشتبي في
وإلا تسوي نفسها ماعرفتني

لاتسئليني عن سبب ضيقة البال
مبطي وانا ماذقت طعم السعاده

ظروف خلت حالتي ماهي بحال
كافحت ليما مابقت بي إراده

بنيت لي في عالم الصبر تمثال
وباد الزمن تمثال صبري إباده

حاولت اوسع خاطري بلعب الاطفال
وكل ما سليت شوي ضاقت زياده

لو المشاكل حلها الدمع لا سال
استغفر الله .. صار دمعي عباده

لبكي بكا .. ضيقه ولوعه وغربال
مابكي بكا .. خوف ٍ وذل وشراده

يابنت .. وديار البدو عشب ورمال
ومسرى بليا شور كله جهاده

وانا سريت بوادي ٍ فوقه جبال
الحر ماشاف الشبك يوم صاده

فيني بدوي طبعه ورى الخير رحال
اكثر مقيمه فوق مركب شداده

يشد وينزل كل فتره بمنزال
قربه صعب جدا وسهل ابتعاده

ان قال فرقا .. ماتراجع اليا قال
ماتقدر الدنيا تكسر عناده

فينا الولد .. يسوا ثمانين رجال
فينا الكرم .. خلقه وسنه وعاده

وبالعشق اخذت اللي مواصيفها ثقال
في زينها ماهي بحاجة شهاده

حبيبتي .. مازينوها بسلسال
من زود ماتبرق تضيع القلاده

اسود شعرها .. للبست فوقه الشال
الشال الاسود .. ينصدم من سواده

ارجولها خلخال .. من دون خلخال
خلقتها لفت انظار .. ماهي عماده

لو نفترض مرت على شارع الجال
فاض البحر يشكي عليها وداده

الارض تهتز حدرها هز زلزال
زلزالها تعشق حدوثه بلاده

فيها الحلا .. عايل على كلها عال
ان سولفت بالليل انسى رقاده

بس المصيبه حظك الشين لا مال
اليا رقد يا بُعد والله قعاده

وانا مع حظي .. بعض ناس عذال
زادوا علي .. من النكاده نكاده

صحيح انا عايش .. ولو الحزن طال
الحمد لله والشكر والشهاده

الفضل لله .. عزني بكل الاحوال
ماذلني بحاجه تشمت إعباده

مير البلا ضيقات الوان واشكال
لاجني خلني طريح الوساده

هذ انا . ياناشدتني عن الحال
من كثر ضيقاتي نسيت السعاده

يتلني قلبي على هرجتك تل
واجي اسولف لك ولو ماسئلتي

كنتي اصغيره .. بس اغلا من الكل
كنت اتامل خير لا من كملتي

لكن خساره مانفع : ياعسى وعل
صرتي مثل ورده .. كبرتي وذبلتي

انتى وصلتي مرحله مالها حل
اتفه سبب لا من حصل لك زعلتي

ان كان قلبك من تعب عالمي مل
محد جبرك انتى بكيفك دخلتي

ابعتبر نفسي مثل غاديٍ دل
وانتى معايه .. مانجحتي فشلتي

مرضى عليك ولا على نفسي الذل
اعادلك بالروح مهما عملتي

انا اخر انسان .. في حقك يزل
اموت ‍‍‍.. وانتى بشيمتي مانخذلتي

انا عطيتك ما تعذرت بالقل
وانتى بقول الحق فيني بخلتي

انا رسمتك غيمةٍ للبشر ظل
اعلا مكانه في حياتي وصلتي

كنتى بمكان ٍ مرتفع تحتك الكل
لكن خساره من مكانك .. نزلتي