خطاي اني وفيت وما عرفت العب على الحبلين... الكاتبه ::: غموض الورد

قامت فاتن تحب راس امها: هلا بالغالية
ام تركي: ارتاحي يمه لاتتعبين عمرك
فاتن: مرتاحة يمه الحمدلله الحين الحمل ثابت وماعلي خوف
بإذن الله
ام تركي: سعود بيجي يتغدى معانا؟
فاتن: لا مو جآيني الا بكرة
اريج: يمه ابي آكل جوعـآنة
ام تركي: اصبري يجي ابوك ونحط غدانا
اريج: طيب الله يعينني
ابو تركي: يعني ما اشتقتي لابوك تبين الاكل بس
اريج تضحك وهي قايمة تسلم على ابوها : هلا والله بنور
هالبيت
ابو تركي: منور فيكم والله ... الله لايخليني من دخلتكم علي
وجمعتكم حولي
تركي: الله يطول بعمرك يالغالي ولا يحرمنا منك
اريج: يلاااا بتقعدون تسلمون وتنسون الغدى تراي بموت من
الجوع
ام تركي: قومي لايطق فيك عرق
وقامو كلهم يتغدون ...واستمرت السوالف والوناسة






**************************





تجهزو ماشين لمكة ..فهد وام فهد وعبير وخالد وشهد وام تركي
طبعا قررو يروحون بسيارة ابو تركي ( الجمس ) ...
قدام اللي يسوق فهد وخالد بجنبه ... وبالسيت اللي وراه ام فهد
وام تركي وسنتيا.. اما السيت الخلفي كان فيه عبير وشهد
ومعاهم الحلويات والبساكيت والتشيبسات والعصيرات ....
طول الطريق تقريبا ام فهد وام تركي ساحبينها نومة ,,,,
خالد وفهد سوالف طول الطريق,,وعبير وشهد سوالف وضحك
عبير: فهد تبغى عصير؟
فهد: اي هآتي
عبير: ايش تبغى معاه؟ تويكس ولا جلكسي ولا سنيكرس
فهد: هاتي تويكس
عبير خذت العصير والتويكس ومدتهم لسنتيا تعطيهم فهد..
ورجعت عطت سنتيا بعد: خلود ايش تبغى انت؟
خالد: وانا من اول ساكت ابيها تجي من شهد بس ماحولي احد
فهد: هههههههههههههههه ياخي لا تظلمها اكيد تستحي مني
عبير: والله جد تستحي.. قول ايش تبغى يلا
خالد : خلي شهد تختار لي على ذوقها
شهد: خالد تبي تشيبس؟
خالد: اي شي منك حلو
فهد: فاهم الغزل غلط
عبير: هههههههههههه ملاحظ انت
وقعدو يضحكون وسنتيا تضحك معاهم <<قاطة الاخت
ام تركي: لعنبو ابليسكم ماتخلون الواحد ينام
خالد: يمه طول الطريق مانسمع الا شخيرك وتقول ماتخلون
الواحد ينام
ام تركي: ههههههههههه يالنصاب هذا شخير امي
عبير: كم باقي لنا ونوصل؟
خالد: الطايف بقى له 320 كيلو
عبير: ياااربي لسى بعيد
ام تركي: نامو ضيعو من الطريق شوي
فهد: لا خليهم يونسونا
خالد: خلنا ننزل نريح ونتقهوى وعقب انا بسوق بدالك
فهد: مادري شرايكم انتم؟
ام تركي : اي احسن خلنا نريح ونصلي المغرب والعشا
خالد: اجل وقفنا قدام...
وقفو على جنب وفرشو فرشتهم .... وقعدو يتقهوون .. وبعدها
صلو المغرب والعشا .. وكملو طريقهم وهالمرة اللي يسوق
خالد..
وصلو الطايف وحجزو لهم بالفندق غرفة فهد وعبير والغرفة
الثانية شهد وخالد والغرفة الثالثة ام فهد وام تركي وسنتيا ...
بيمشون بعد صلاة الفجر لمكة يعتمرون ..
نامو من تعب الطريق بدون اصلا مايحسون ...وصحو لصلاة
الفجر ومشو بعدها ...وصلو لأطهر بقعة في المعمورة اعتمرو
وقعدو بالحرم لصلاة الظهر وبعدها راحو للفندق اللي حاجزينه
حاجزين هالمرة جناح للحريم بغرفتين وصالة ..وغرفة للشباب
الاجواء روحانية ومن احلى مايكون... اغلب وقتهم بالحرم
ومن يكون قريب من الحرم ويبي يفارقه << يارب تكتب لي
عمرة في رمضان يارب
عبير: شهودة يلا ننزل قبل ما يأذن المغرب
شهد: صبر بتوضا
عبير: طيب لاتتأخري عارفة وقت الاذان زحمة
شهد: زين
فتحت الباب شافت فهد توه جاي بيطق عليهم الباب ابتسمت
له: هلا والله
فهد: هلا قلبي
عبير: نازل الحرم؟
فهد: ايه يالله معاي
عبير: استنى شهد .. ماباقي الا انا وهي
فهد: ليش وين راحو؟
عبير: من بعدما نزلنا صلاة العصر قعدو في الحرم
فهد: اقول تعالي خليها تنزل مع خالد
عبير: لا حرام عليك
فهد: والله خالد جاي وراي
عبير تضحك وتنادي بأعلى صوتها: شهودة بنزل مع فهد
كلمي خالد يمرك
شهد تتوعد فيها بس متحملة وناوية تهزأها لا شافتها
عبير: ههههههههههه احسها عصبت عليه
فهد: ماعليك فيها خليها تقرب منك بس
وركبو اللفت نازلين للحرم عبير تناظر ساعتها: كم باقي
على الآذان؟
فهد: يمكن ربع ساعة
عبير: امممم مايمدينا
فهد: وش عليه؟
عبير: قلت كذا نطلع كوفي صار لنا 3 ايام ماجلسنا مع
بعض
فهد: خلاص ولا يهمك بعد صلاة المغرب على طول تعالي
نروح كوفي
عبير ابتسمت: طيب
دخلت الحرم وراحت لوين ماكل يوم يقعدون... لقت ام فهد
وام تركي وسنتيا قاعدين سلمت عليهم وصلت تحية المسجد
خذت لها مصحف وقعدت تقرأ قرآن... اقيمت الصلآة صلو
وطلعت بعد الصلآة على طول اتصلت في فهد وشافته قاعد
ينتظرها..
مشت هي وياه لاقرب كوفي في احد المراكز القريبة من الحرم
طلبو لهم كوفي وتشيز كيك وقعدو يسولفون
فهد: والله يا ان الواحد هنا يحس براحة مو طبيعية
عبير:اي والله الحمدلله على نعمة الاسلام
فهد: مرتاحة ياقلبي؟
عبير: اكيد الحمدلله
فهد: ذوقيني من التشيز كيك
عبير توكله بالشوكة : احسك رايق اليوم
فهد: مستانس والله
عبير: يارب على طول
فهد: وياك ياقلبي .. عبورة
عبير: هلا
فهد: متى ملكة بنت خالك؟
عبير ابتسمت : يوم الربوع
فهد: خلاص بعد صلاة العصر نمشي الطايف زين؟
عبير : ياعمري انت .. خلاص اوكي
فهد: وانا عشان الفرحة هذي اسوي لك اللي تبين
عبير: الله لايحرمني منك يارب
فهد: آمين ولا يخليني منك
عبير: بنقعد كذا نتغزل في بعض وبتفوتنا الصلاة
فهد يناظر ساعته: تونا بدري
عبير: باقي اقل من ثلث ساعة
فهد: تبين نروح؟
عبير: ابغى اروح الفندق اغسل واتوضى
فهد: اوكي يالله مشينا ..
وطلعو من الكوفي بعد ماحاسب فهد ... راحو للفندق
غسلو وتوضو ورجعو نازلين للحرم.. صلو العشا وقعدو بعد
الصلاة حول الساعة ورجعو بعدها الكل للفندق..تعشو عشى
خفيف وقعدو البنات شوي وبعدها نامو ...
ومثل هاليوم استمرت ايامهم بمكة المكرمة..ايام كلها روحانية
وخشوع وراحة وطمأنينة....






*******************************






بقى لها حول الشهرين وتخلص كورس اللغة وبعده مقررة ترجع
للسعودية ولاهلها وتترك ياسر ...رغم انه في الفترة الاخيرة صار
اغلب وقته عندها اكله وقعداته معاها.. ومايروح عنها الا وقت
النوم او وقت الكلية ... وجمانة اللي حرمها من دوامها اسبوع ...
خلاها ترجع بعد ماهددها لو تأخرت بس دقيقة انه راح يكون له
تفاهم معاها .. طبعا هو سامحها بعد ماحلفت له انها كانت طالعة
تتعشى مع صديقاتها .. وانها ماقالت له لانها تدري انه بيرفض..
الجوهرة تتمشى هي وبشاير بنفس الحديقة اللي تقابلو فيها اول مرة..
بشاير: يعني الحين قرارج نهائي؟
الجوهرة: والله يابيشو تعبت من هالحياة احبه بس الغيرة تذبحني
بشاير: خيريه
الجوهرة: شلون اخيره ... وانا حتى ما ادري اذا هو يبيني او لا
بشاير: مو انتي تقولين انه قال لج يبيج
الجوهرة: اي قالها مرة وكان وقتها متضايق وماعاد سمعتها منه
وكان متهاوش مع جمانة يومها ... يعني شعوره بلحظة حس انه
بيفقدها ..
بشاير: ممكن وممكن انه فعلا يبيج
الجوهرة: اذا يبيني يتركها .. ويكون لي انا بس
بشاير: جوجو لاتعقدينها
الجوهرة: والله ما اعقدها بس زواجه منها غلطة واذا يبيني
يصحح غلطته ... وش اقول لك بس تعبت من همي والله...
اصعب شي اذا حبيتي شخص وتعلقتي فيه وهو قدامك بس
ماتقدرين توصلين له...
بشاير: تدرين عاد؟
الجوهرة: وشو؟
بشاير: محد من الهم خالي
الجوهرة تفاجأت ماتوقعت انه بشاير عندها مشاكل او هموم
مبين عليها انها سعيدة: تعالي نقعد وعلميني...
قعدو على اقرب كراسي لهم وتكلمت بشاير عن اللي بخاطرها
كله: من وانا ياهل كان دايم ولد عمي قبالي ..حبيته وقالو
لي انه هم بعد يحبني ... وزاد تعلقي فيه مع الايام..ومن صار
عمري 15 سنة انتقلنا لبريطانيا لظروف عمل ابوي وصدقيني
ياجوجو كثر ماكنت زعلانة اني بفقد هلي وديرتي ورفيجاتي
الا اني كنت بموت مجرد احساس اني راح ابتعد عن جاسم
بوقتها ماكنت اعتبره حب كنت اعتبره لعب يهال ...بس ييت
هني وماقدرت انساه ..وكل وقتي افكر فيه..ولارجعنا الكويت
كنت ادوره بين كل اللي يستقبلونا .. كنت احس بعيونه فرحة
غير بشوفتي .. كبرت وكبر معاي حبي له .. دخلت الجامعة
وبثاني سنة رحنا بالصيف كالعادة للكويت ..وماشفته استغربت
غيابه وبالعادة يكون ببيت عمي العود يستقبلنا ...واللي صدمني
انه دخل علينا بعد فترة من ييتنا وماسك بايده ايد مرته...
الجوهرة: تزوج؟؟؟
بشاير: بوقتها كان مملج .. وزواجه بعد شهر... ودمعت عينها
وهي تسترجع ذكرياتها المؤلمة: آآآهـ ياجوجو حب 7 سنوات
كله صار وهم وجذب.. ماعرفت شنو اللي صار فيني وقتها
سكت وتحملت وانا بداخلي مجروحة ..
الجوهرة: طيب يمكن ماكان يحبك يعني شعور ولد عمك عادي
بس انتي لانك حبيتيه توهمتي حبه
بشاير: اهو لمح لي .. وكل اللي حولي كانو يقولونه .. كل البنات
يقولون انه يحبني ... وقتها تمنيت اصرخ باعلى صوتي بس
ابي اعرف ليه.. والحين صار له من تزوج 4 سنوات وعنده بنت
بس مو قادرة انساه ..والله مو قادرة...
الجوهرة: ههههههههههههههه صدق لا قالو شر البلية مايضحك
بشاير: ليش تضحكين؟
الجوهرة: وحدة فينا تحب واحد وتبيه وهو مايبيها والثانية تحبه
ويبيها بس هي ماتبيه
بشاير ابتسمت :اللي يبينا عيت النفس تبغيه واللي نبي عيا البخت
لايجيبه
الجوهرة: لاتتحسفين ياقلبي على شي فات وانتهى ... بالدنيا محد
بياخذ الا نصيبه ... وانتي بنت حلوة ومتعلمة واي واحد يتمناك
بشاير: ان شاء الله ... قومي اوصلج الوقت تأخر..
الجوهرة: زين يلاااا
ومشو رايحين للسيارة وصلتها بشاير وراحت لبيتها ...
دخلت الجوهرة شقتها لقت ياسر قاعد ينتظرها : السلام عليكم
ياسر: وعليكم السلام... وينك تأخرتي؟
الجوهرة: كنت قاعدة انا وبشاير بالحديقة
ياسر: تدرين وش اللي يشفع لك؟
الجوهرة: وشو؟
ياسر: انك بحياتك ما كذبتي ..
الجوهرة: وش اللي يخليك متأكد
ياسر: اللي يكذب يبان عليه ارتباكه ... بس انتي تجاوبيني
وانتي واثقة من نفسك .. ممكن لو قلتي بطلع معاها رفضت
بس لانك ماتلفين وتدورين هالشي يخليني واثق فيك واعرف
لو رحتي لاي مكان مستحيل تخونين ثقتي فيك..
الجوهرة: انا ما ارح اخون نفسي قبل لا اخون ثقتك.. تبي
تتعشى معاي؟
ياسر: اي ياليت
الجوهرة: ابشر
ياسر: جعلك تبشرين بالجنة يارب
الجوهرة: وياك يارب.. تبي شي معين ولا اطبخ لك على
مزاجي؟
ياسر: عادي اللي يجي منك حياه
الجوهرة: زين... ودخلت بدلت ملابسها ولبست لها قميص
قطني قصير ... ولمت شعرها الطويل بشباصة ودخلت
المطبخ..كانت منغمسة في شغلها .. تطبخ وهي مستانسة
كثير ...تحس انه ياسر ماراح يستغني عنها بس لازم يثبت
لها هالشي..
خلصت كل شي وراحت تتسبح من ريحة الطبخ : دقايق
بس واحط العشى
ياسر: لاتتأخرين بموت جوع
الجوهرة: زين .. تسبحت وبدلت وراحت حطت العشى
وقعدو يتعشون..هالمرة كان اغلب وقته ساكت واستغربت سكوته
تحس ان ورى سكوته شي ..
ياسر: تسلم يدك
الجوهرة: توك ماكليت شي
ياسر: وانا قلت بقوم
الجوهرة:ههههههههههه مادري
ياسر: لا بجد بهالغربة مافي احلى من طبخ يدك احس اني قاعد
آكل شي نظيف ..
الجوهرة: ياجعله بالعافية يارب
ياسر: الله يعافيك
الجوهرة: اي نسيت اقول لك
ياسر: وشو؟
الجوهرة: خواتي انخطبو لاخوان
ياسر: هههههههههههه جد؟
الجوهرة: اي والله
ياسر: من هم؟ نعرفهم
الجوهرة: لا من معارف ابوي واحد من اخوياه .. هم جايين
يخطبون مشاعل لولدهم وشافو اماني ورجعو كلمو اهلي بعد
يبونها لولدهم الثاني
ياسر: ووافقو خواتك؟
الجوهرة: تقريبا ايه.. للحين ماردو لهم.. بس اكيد بهاليومين
ياسر: الله يوفقهم يارب
الجوهرة: آمين ...
كملو عشاهم .. وقامو غسلو ..سوت بعدها الجوهرة شاهي
وقعد عندها ياسر الين جت جمانة من دوامها وراح لها ..
ياسر: هلا قلبي
جمانة: ليش اجيت ؟ ليش ماكملت السهرة عندا
ياسر: وانتي جاية تبين هواش بس؟
جمانة: لأ بس شايفة روحاتك وجياتك لعندا كتراني.. ومو لاني
سكتت معناتها بكون راضية
ياسر: وانا يعني بنتظر الإذن منك؟
جمانة: شو عاملة لك هيي؟
ياسر: ولا شي.. ليش؟
جمانة: كتييير تغيرت عليي..من وقت اللي تزوجتها وماعاد
انتا ياسر اللي بعرفه
ياسر: انا هو انا ماتغيرت ابد.. بس في اشياء كنت اجهلها عرفتها
للاسف متأخر
جمانة: شو قصدك؟
ياسر: ولا شي... تصبحين على خير
جمانة بصراخ: ياسر ماتتركني هيك .. قلي شو اللي عرفته
طنشها ومارد ..راح لغرفته .. رمى نفسه على سريره ونام ..
تارك جمانة في حيرتها وتفكيرها وقلقها ...






******************************






قاعدة مع بندر وخالتها ببيت ابو بندر الوحم ذابحها وبندر
ميت ضحك عليها
اريج: اي انتو يالرجاجيل مو فالحين الا بالتعليقات ولو
يوم قلت لك تعبانة قلت مافيك الا العافية
بندر: عاد جد انتو ياكثر تشكيكم الوحدة تحط بعمرها امراض
الدنيا كلها ... ماتجلس مع حريم الا تسمع آه يارجلي وراسي
وبطني وكل شوي مطلعة علة جديدة
ام بندر: وهي الصادقة بنيتي .. انتم ماتقدرون يكفينا تعب الحمل
والولادة عن الف تعب
اريج: اي والله خالتي وهم الواحد فيهم لو جاته انفلونزا بس قوم
الدنيا وقعدها
بندر : تصدقون انا الغبي اللي قاعد اناقشكم ..خسران مافيها كلام
لا اجتمعو امي واريج
ام بندر: ههههههههههههه انا اقول الحق
بندر: ان شاء الله خير
اريج: خالتي الحين لاخلص الشهر الرابع ما احس بشي ؟
ام بندر: ان شاء الله
اريج: والله كرهت كل شي حتى ريحة بندر
بندر: والله انك تموتين على الاكل..كل ماشفتها داخلة تاكل وطالعة
تاكل
اريج: ترى نص هالاكل لولدك
بندر: كل يوم تقول هالعذر
ام بندر: لعنبو ابليسك استح .. حاسد البنت وتمن عليها؟
اريج: اي خالتي شوفيه .. كل ماشافني آكل قال فقرتيني
بندر: ههههههههههه وربي انها نصابة
اريج: لا والله جد بندر عطرك الاخير ريحته خياس
بندر: خياس؟
اريج: اي والله
بندر: لاتحلفين .. يمه شرايك فيه؟
ام بندر: ماعليك منها في حريم يكرهون حتى رجاجيلهم
اريج: الحمدلله اللي جت على ريحته.. خالتي متى عشاكم؟
ام بندر: والله مدري عن الشغالة.. بقوم اشوفها
اريج تقعدها: والله ماتقومين انا بروح اشوف
ام بندر: الله يعطيك العافية يابنيتي
اريج: يعافيك ربي
وراحت تكلم الشغالة تستعجل عشاهم ... وماهي الا دقايق
والعشا حاطينه على السفرة
اريج: اشتقت لاهلي والله
ام بندر : الله يرجعهم بالسلامة يارب
اريج: اللهم آمين ,,, كل يوم يكلموني من الحرم والله ياني
مشتاقة اروح له
بندر: اولدي انتي بالسلامة وان شاء الله بنروح له كلنا
اريج: يارب ان شاء الله
كملو عشاهم ..وبعدها استأذنوهم بندر واريج رايحين لبيتهم
في الطريق للبيت كملو سوالفهم
اريج: بندر
بندر: عيونه
اريج: احس ندى فيها شي بس ماتعلمني
بندر: شي مثل وشو؟
اريج: احس في مشاكل بحياتها ولا سألتها تنكر
بندر: يمكن تتوهمين
اريج: والله احساسي عمره ماكذب علي احس حزن بعيونها
احس بداخلها اشياء ودها تقولها بس ماتتكلم
بندر: طيب حاولي تعرفين منها
اريج: قلت لك لا سألتها تنكر ...
بندر: حلفيها بالله
اريج: لا مابي اضغط عليها .. هذي خصوصيات اذا هي
تبي تتكلم انا بسمعها
بندر: ان شاء الله مافي شي وهذا كله اوهام
اريج: يارب
قعدو يسولفون الين ماوصلو البيت نزلو ... ودخلو البيت
بدلو ونامو..






*************************





يوم الاربعاء وصلو الطايف حجزو لهم فندق ونزلو
الا عبير اللي راحت لبيت خالها تبي تستعد معاهم
للملكة .. اول ماوصلت بيت خالها طارو فيها من الوناسة
من زمان عن بعض..
عبير: فين نونو؟
مرام: في المشغل .. يلا بنروح الحين عشان نطلع بدري
( طبعا المناسبات في الغربية تبدا متأخرة يعني مايكتملون
المعازيم الا على حدود الساعة 12 والعروس تنزف على
الساعة 2 ونص او حتى 3 )
راحو البنات للمشغل خلصو مكياج على اذان المغرب ..
ورجعو البيت صلو ولبسو فساتينهم واكسسواراتهم
رنا: امي راحت؟
مرام: ايوا راحو من قبل المغرب ...
عبير: من بيودينا القاعة؟
مرام: اكيد السواق
عبير: لا اخاف فهد مايرضى
رنا: طيب كلميه
عبير : اوكي..واتصلت بفهد اللي رفض تروح مع السواق
وقال انه بيجي يمرها يوديها
مرام: هاه ايش قال؟
عبير: بيجي يمرني الحين
مرام : طيب استنيه واحنا بنروح
عبير: لا بطلع شقتنا استناه هناك
رنا: اوكي
عبير: خلاص اشوفكم هناك
وراحت لشقتهم قعدت فيها تنتظر فهد يجيها ... بس
تأخر عليها
اتصلت فيه تستعجله: حبيبي فينك؟
فهد: والله خالص من ساعة بس مرة اخوك هذي يومها
بسنة
عبير: ياربي فهودي البنات كلهم راحو وانا جالسة لوحدي
فهد: طيب بروح استعجلهم
بعد نص ساعة اتصل فيها فهد وهي معصبة: الو
فهد: مع اي باب؟
عبير: الخلفي انا نازلة وصلتو؟
فهد: لا اصبري بشوفك قبل

عبير: فهد مو وقتك والله تأخرت ..
فهد: ماعلي بشوفك ولا ماتروحين
عبير: طيب انا نازلة الحوش
نزلت عبير بسرعة وفتحت له الباب ..: كذا اخرتوني
البنات يتصلون عليه وماما حرقت الجوال اتصالات
فهد: طيب الحلو ليش معصب؟
عبير: حبيبي كيف شكلي ؟
فهد: والله قمر بس ابي اشوف الفستان بعد
عبير بدلع: حبيبي
فهد: مو شغلي يالله ابي اشوف
فصخت عباتها ودارت على نفسها : هاه شفتني خلاص
فهد: متى تخلص ملكتكم؟
عبير: على الفجر
فهد: استغفر الله بس .. اي وقت يجي ببالي بمرك
عبير وهي ترجع تلبس عباتها وتتغطى: فهد انت ناويها
عناد يعني؟
فهد:لا والله امزح بس انتي اعوذ بالله على طول تعصبين
عبير: طيب يلا شوف ماما تتصل .. وردت على امها
على طول: ايوا ماما
ام عبير: فينك؟
عبير: خلاص جاية عشر دقايق ان شاء الله وانا عندكم
ركبت السيارة ورى مع شهد وقبصتها بيدها: متأخرة
ليش؟
شهد: آآآي والله غصب عني بعدين ترى انا مالي بالملكة
بس جاية معاك وموديتني قبل كل المعازيم
عبير: خلود اسرع كمان.. ماعليه كلهم اهلك..وترد على
جوالها للمرة الالف هاليوم: هلا نونو
نوف : فينك انتي في القاعة؟
عبير: لا لسى في الطريق وصلتي؟
نوف: لا باقي لي التسريحة بس .. الله يسعدك اتصلي
في البنات يشوفون المصورة دوبها اتصلت تقول وصلت
القاعة
عبير: اوكي ولا يهمك .. باي
سكرت منها واتصلت بمرام ماردت رجعت اتصلت في
هديل اللي بعد خامس رنة ردت عليها : هدولة
هديل: هلا
عبير: بسرعة روحي شوفي المصورة وصلت وديها
لغرفة العروسة
هديل: يلااا اوكي باي
فهد: الحمدلله والشكر مسوين حالة استنفار
عبير:خالد يمين بعد الاشارة..وصارت توصف له الطريق
الين وصلو للقاعة ... نزلت هي وشهد ..
على طول دخلو وراحت عبير تركض هنا وهناك يجهزون
كل شي
ام عبير: فين خالتك ام تركي؟
عبير: اعتذرت تقول بتجلس مع خالتي ام فهد
ام عبير: طيب لاتخلي شهد لوحدها
عبير: لا بجلس معاها بس رحت شفت البنات اذا يحتاجون
مساعدة..
مرام وهي معدية من عندهم : لا مانحتاج حاجة ارتاحي لو
نبغى منك شي كلمتك
عبير: طيب انا بجلس في اول طاولة...
بدو المعازيم يتوافدون .. والقاعة امتلت اقاربهم ومعارفهم
والكل مستانس بهالليلة ... انزفت العروس مع عريسها ..
وقعدو بالكوشة ..راحت مرام وقربت الدبل لاخوها ..لبسها
الدبلة وطقم الشبكة ..والكل صار يبارك لهم ..طلعت عبير
تبارك لهم بعد..: الف مبروووك نونو
حاتم التفت لمصدر الصوت وانتبه لعبير حاضنة نوف
وتبارك لها
نوف: الله يبارك فيك ياقلبي
التفتت بعدها على حاتم: مبروك حتوم
حاتم برسمية: الله يبارك فيك
انتبهت عبير لنظرات نوف عليهم وانسحبت خوفا من
انها تسبب اي مشاكل وهم ببداية هالعلاقة..
انتهت الملكة وكلهم توجهو لبيوتهم بقلوب تملاها الفرحة
ودعوات للعريسين ربي يتمم لهم على خير ويجمعهم في
اقرب وقت ...
وصلت الفندق ونامت على طول من التعب ومن ثاني
يوم بعد صلاة العصر مشو راجعين للرياض..





**********************





مرت الاشهر سريعة ... وتمت ملكة وزواج ماجد على
لمى وسافرو بعدها لدبي 10 ايام بس ..عشان دوام لمى
بمدرستها...
باول ليلة لهم مع بعض ... طلبت لمى من ماجد يصلي
فيها ركعتين الزواج .. وهالسنة يمكن كثير ينسونها بس
اول ماذكرته فيها حس انها كبرت في عينه ..هو يمكن
ماعرفها قبل ... وبداخله ماكان متقبلها بس هو معاهد ربه
مايظلمها معاه ولا يقصر بأي حق من حقوقها ..
ارتاح لها كثير ... وابهره جمالها .. بنت حلوة وملتزمة ,,
لكن ربي ماوفقها مع زوجها الاول .. وان شاء الله يكون
هو العوض لها عنه ... وتعوضه هي فقد زوجته ...
هالايام العشرة تقربو لبعض فيها ... ومع الايام ان شاء الله
ربي بيوفقهم ...
باحد الايام وهم بالفندق قاعدين يسولفون: اسمعيني لمى
يمكن كل واحد فينا عاش تجربة قبل .. انتهت كيف ماربي
قدرها ... بس ابي انا وانتي نطوي صفحة الماضي بكل
مافيها مو عشان شي... بس لاني مابي اظلمك ..واللي راح
من عمري راح وعمره مابيرجع .. وانا معاك ابتديت من
يوم زواجنا ... بيتك ابيك تحفظينه ولا يهمك القيل والقال
اي شي تسمعينه عن حياتي قبل لاتهتمين فيه ...
لمى: ان شاء الله
ماجد: وتوقعي في ناس ممكن يجون يتكلمون او يقولون
لك اشياء صارت قبل .. بس تصرفك راجع لك ... انتي
تقدرين تحافظين على بيتك ... وتسكرين اي فتحة ممكن
يدخل منها اي شي يخرب علينا حياتنا
لمى: ماجد انا مو صغيرة ولا جاهلة .. صدقني حياتي
معاك شي خاص فينا وماراح اسمح لاي احد يتدخل فيها
ماجد: حلو ... وبنتي مثل ماعرفتي قبل.. تراها روحي
اللي تمشي على هالارض .. ابيك تراعينها وتهتمين فيها
واذا ربي كتب لنا عيال عامليها مثل ماتعاملينهم ..
لمى: ان شاء الله... ربي يقدرني واسعدك ..
ماجد: ويقدرني اعيشك مثل ماتبين واحسن بعد...





*********************************





بالمستشفى .. مجتمعين العايلة صار لهم حول الساعتين
ينتظرون اي خبر عن فاتن ... خواتها وامها وسعود وامه
( سعود طبعا جاله ولد ثاني من زوجته غلا وسماه احمد)
من سمعو خبر ان فاتن جاها الطلق وراحت المستشفى وكلهم
راحو لها ... طبعا هذا الموعد منتظر من اول ماحملت فاتن..
وماخلتهم يطولون انتظار توها بأول الشهر التاسع يعني ماخذت
فيه الا 4 ايام وراحت تولد...
بعد طول انتظار جاهم الدكتور يبشرهم بولادة فاتن بتوأم ولد
وبنت .. وقال لهم ينتظرون شوي وبعدها يدخلون يشوفونها
ام تركي: الف مبرووك ياوليدي
سعود وهو طاير من الفرحة: الله يبارك بعمرك ياخالة عقبال
عيالك كلهم
ام راشد: الف مبروك ياسعود
سعود: الله يبارك فيك يمه
اريج: يمه بروح اشوفهم
ندى: انتظري اكيد يغسلونهم بالاول وبعدها يودونهم الحضانة
اريج: الحمدلله يارب صرت خالة
ندى تطقها من كتفها : وفروس مو مالي عينك لا سمح الله؟
اريج: يوووه وربي نسيته يمكن عشان فاتن الكبيرة
ام تركي: بس اركدو لاتسوون ازعاج
ندى: ابشري يمه ..
قعدو ينتظرون وبعدها سمحو لهم يدخلون على فاتن اللي
كان مبين تعب الولادة عليها ... باركو لها وهنوها ...
وهي مستانسة حيييييل بحلمها اللي حققها لها رب العالمين
بعد طول صبر ودعوات وسهر وصلوات ...
وشوي الا جابو التوأم لامهم تشوفهم
قربوهم لها وشالت الولد: سعود ساعدني المهم اثنينهم
شال سعود بنته وقربها من فاتن لمتهم على صدرها وهي
تصيح: يمه مو مصدقة ان هذول عيالي
ام تركي: احمد ربك يمه هذي نعمة من رب العالمين
فاتن: الحمدلله يارب... سعود ابي اسميهم وليد وربى مثل
ماكنت ابي من زمان
سعود: ابشري يا ام الوليد سميتي وما اقول غير ماقلتي
ام تركي: يمه اهم شي رضعيهم من صدرك مافي احسن
من الرضاعة الطبيعية
فاتن: ان شاء الله يمه بس الحين تعبانة ابي انام
ام تركي: يالله يمك الحمدلله على سلامتك وبإذن الله بكرة
نجي لك ..يالله يابنات قومو عن اختكم خلوها ترتاح..
فاتن: الله يسلمك يالغالية
البنات شالو التوأم بوسوهم وبعدها استأذنو رايحين يبون
يخلون فاتن تنام وترتاح الا عبير اللي قعدت مرافقة معاها...
سعود : تامريني بشي فتون؟
فاتن: سلامتك
سعود: اجيب لك شي معاي الصباح؟
فاتن: والله ما اعرف شي مر على امي قبل تجي وهي تعلمك
سعود: ابشري ان شاء الله ... يالله اهم شي انتي ارتاحي..
والتفت لعبير يكلمها: عبير الله يسعدك انتبهي لها
عبير: ان شاء الله فاتن في عيوني
سعود: ماتقصرين والله .. يالله يمه مشينا ..
ام راشد: الحمدلله على سلامتك يافاتن
فاتن: الله يسلمك خالتي..
سعود: يالله فمان الله
فاتن: الله يحفظك...
طلعو من عندها وبقت عبير بس: فتون تبغين حاجة؟
فاتن: لابس غطي رجليني احس ببرد
عبير غطت رجلينها : خلاص نامي انتي وانا بحاول
انام اذا احتجتي اي حاجة صحيني
فاتن: الله يخليك يارب..
ونامت فاتن ونامت بعدها عبير بصعوبة ... ومر يومين
على فاتن بالمستشفى ... والحمدلله طلعت بعدها بالسلامة
وراحت بيت اهلها... والكل طاير وفرحان بالتوأم وبقومة
فاتن بالسلامة..







************************





اليوم مسوين عشا عائلي ومجتمعين ...
ندى وهي تصب القهوة للبنات اللي مجتمعين حول فاتن: مابقى
الا شهد وعبير يفرحونا
عبير: ليه هي بالدور يعني؟
اريج: اي لازم مامليتو خلاص؟ انا احس الزواج سنة وخلاص
لازم اطفال وتجديد في الحياة
عبير: والله زوجي مايبغى الحين خلينا نتمتع قبل الاطفال وتعبهم
فاتن: تقولينه انتي بس لاذقتي الحرمان اللي ذقته تتمنين لو انك
من اول شهر حملتي
عبير: انا عارفة والله بس نفسي اكمل سنة احسن
فاتن: اهم شي لاتستخدمين موانع لانها ممكن تضرك خصوصا
انك توك ماحملتي ..
عبير: لا مرة ما استخدم حاجة
فاتن: وانتي بعد ياشهد
شهد: لاتوصين حريص من هذي الناحية انا مرررة خوافة
اريج: فتون تصدقين من امس البيبي ماتحرك .. احس بشي
غريب..
فاتن: جد ؟
اريج: اي والله
فاتن: وليش ساكتة ليش مارحتي للمستشفى
اريج: والله مادري قلت يمكن شي طبيعي
ندى: لا ياقلبي اذا يومين ماتحرك نهائي مو طبيعي
اريج: يمه لاتخوفوني تكفون..
عبير: لا ان شاء الله مو صاير حاجة
ومن وسوستها قامت لامها وخالاتها تسألهم تعرفون الكبار
اعرف بهالامور لتجاربهم الكثيرة ماشاء الله...
فاتن: بسم الله عليه لو يصير فيه شي الظاهر تستخف
شهد: اي ياقلبي عليها متشريه للبيبي من الحين
عبير: ياربي انتو ليه كبرتوها وتفاولتو على البنت
ان شاء الله كل شي تمام
ندى: ان شاء الله يارب.. عبورة قومي صبي عني والله
تكسرت يديني.. مايشبعون قهوة
عبير قامت تصب القهوة ... وشهد قامت معاها توزع
الحلى ...
ندى: ميشو مبرووك الخطبة.. وين امونة ابي ابارك لها؟
مشاعل: الله يبارك فيك ياقلبي.. مادري والله امونة وينها
كانت قاعدة مع غادة
فاتن: الحين بتملكون بيوم واحد؟
مشاعل: اي وعرسنا بعد بيوم واحد
فاتن: ماشاء الله مبرووووك
ندى: تدرون اني اشتقت لجوجو وربي انها كانت ملح قعداتنا
مشاعل: اي وربي بالذات لاجتمعت هي واريج يونسون من
قلب
اريج: وش فيها اريج؟
ندى: مافيها الا العافية
اريج: زين وش كنتو تقولون عني؟
مشاعل: ذكرنا جوجو وجيتي انتي ببالنا معاها
اريج: يالبى قليبها جوجو وحشتني الخايسة ...ابي اشوفها
مشاعل: هانت ان شاء الله كلها شهر وهي عندنا
اماني: هـآآآي
ندى:وجع وش هاي هذي ..سلمي مثل المسلمين
اماني: استغفر الله انا مسوية بريستيج بس
اريج: امحق بريستيج
مشاعل: يقال لها بتصير ذوق قبل العرس
اريج: ايييييييييه صدق مبرووووك الخطبة
مشاعل+ اماني: الله يبارك فيك
عبير: امونة هاتي فنجانك
اماني تمد لها الفنجان : لا خلاص تسلمين
عبير: وانتي ميشو؟
مشاعل تمد لها : صبي
ندى: لا خلاص قومو بنحط العشى
مشاعل :بخلص فنجاني واقوم
راحو البنات يجهزون عشى الحريم ويساعدون الشباب
يحطون عشى الرجال ...
تعشو الكل وكملو سهرتهم وبعدها استأذنو كلن رايح لبيته..






***************************





وصلت لجناحها ... بدلت لفارس ونومته ... وراحت تسبحت
وبدلت ملابسها تبي تنام..
ناصر: حبيبتي
ندى: هلا
ناصر: تبين تنامين؟
ندى: شرايك انت
ناصر: مافيني نوم تعالي اقعدي معاي شوي
ندى: وانا فيني نوم
ناصر: ندى ترى زهقت .. مليت .. الى متى تظنين اني
راح استحمل؟
ندى: وش تبي تسوي يعني؟ تتزوج علي؟ صدقني مايهمني
ناصر: انا عارف انه مو من قلبك هالكلام
ندى: وانت تدري عن اللي بقلبي اصلا
ناصر: انتي اللي مو معطيتني مجال اني اعرفه صادتني
ومبعدتني عن حياتك ... حتى ابسط التفاصيل حارمتني
اشاركك فيها...
ندى: كانت حياتي كلها لك ياناصر وما اهتميت ... كنت
ابديك على نفسي .. كل شي يصير بحياتي اعلمك واشاورك
بس اكتشفت انه مايهمك .. ليش اشقي نفسي واحط لها اهمية
عند شخص انا آخر اهتماماته..
ناصر: لهالدرجة انا سيء ؟
ندى: لا ... انت مو سيء بس انت ماتعرف بأوقات تحدد
اولوياتك .. حياتك عايشها بفوضوية .. مو عارف ترتب
امورك وتتحمل مسئولية بيت وزوجة وولد
ناصر: وانا مستعد اصلح غلطاتي .. بس ساعديني
ندى: ناصر لا تكذب علي كل ما اختلفنا وشفتني زعلت عليك
قلت لي هالكلام ... تتعدل معاي يوم يومين وعشان ما اظلمك
يمكن اسبوع وبعدها ترجع حليمة لعادتها القديمة..
ناصر: هالمرة غير ورب البيت غير
ندى: وش اللي يضمن لي انها فعلا غير
ناصر: انا اضمن لك .. احلف لك بربي
ندى: لا لا ما ابيك تحلف .. لاني عارفة ومتأكدة انك ماراح
توفي بوعدك لي ...
ناصر: ندى ليش تسكرين كل الابواب بوجهي
ندى: والله ماسكرت شي ...انا انحرق قلبي على ولدي وكل
اللي شفته منك برود .. مابيك تهتم فيني او تراعيني بس
ولدك .. هذا من لحمك ودمك شلون يهون عليك؟
ناصر: والله ماعمره هان ... ولا عمرك هنتي علي..
ندى: ناصر واللي يسلمك لا تقول لي هالكلام ... انت وش
تبي مني بالضبط؟
ناصر: ابي نرجع مثل اول؟
ندى: نرجع لوشو؟ لناصر المستهتر اللي كل همه وناسته
وانا الزوجة المغلوب على امرها اللي المفروض الوقت كله
تنتظره ولا عاتبته يقول لها كلامك كله هم ..ولا اذا احتاجته
اتصلت في ابوها ولا اخوها ولا اي احد يلبي لها حاجتها
ناصر حز بخاطره كلام ندى هي فعلا تحملته كثير وبكل
مرة تسامحه ... بس للاسف عمره ما تعلم من غلطاته..
ندى: تبي شي قبل انام؟
ناصر: ندى والله احبك
ندى: ناصر انا اللي وربي اعشقك بس تعبت من برودك
تعبت من جفاك تعبت من اهمالك ..
ناصر: ندى سامحيني هالمرة عشان خاطري
ندى سكتت وماعلقت ..
ناصر: اذا مو عشاني عشان فارس...شوفي صار لنا كم
شهر وكل علاقتنا رسمية
ندى: هالمرة بسامحك عشان الغلا اللي لك بقلبي ولانك
ماتهون علي..ولاني والله العظيم اشتقت لك
ضمها ناصر على صدره ... وتركت المجال لدموعها اللي
حبستها من بدو نقاشهم انها تنزل ...
وتصافت القلوب بعد ما اختلفت لاشهر..ومهما قست هالقلوب
يبقى الحب الكامن فيها .. هو دوا كل الجروح ...





**************************





من الصباح بدري راحت للمستشفى طول ليلها ماعرفت
تنام ذبحها التفكير وكل خوفها يصير للطفل شي ...
انتظرت دورها ودخلت لغرفة الكشف ...وبعد كشف استمر
وقت مو قصير .. نادتها الدكتورة تجيها عند المكتب
اريج: هلا دكتورة
الدكتورة: انتي مؤمنة بالله اكيد؟
اريج: لا اله الا الله . وش صاير يادكتورة؟
الدكتورة بعد تردد: الجنين متوفي اكيد من يومين ولازم
نعمل لك ولادة سريعة اي تأخير ممكن يضرك..
اريج ماتذكر انها سمعت شي غير متوفي ... حست كل
آمالها تهاوت .. واحلامها الصغيرة تحطمت ...
طاحت من طولها بدون شعور..وشالوها ودوها للطواريء
سوو لها عملية طلعو الجنين وبعدها سوو لها تنظيف للرحم
ونقلوها لغرفة ترتاح فيها ...
كانت وقتها كله تصيح ...بندر اللي كان ينتظرها من عرف
انصدم بس صدمته اقل منها ... او بالاصح يبي يكون اقوى
منها عشان يقويها ... اتصل في امها تجيها...
ام تركي جاية مع غادة وتركي: بندر اريج وينها فيه؟
بندر: تعالو من هنا..
توجهو كلهم لغرفة اريج ...اللي من شافتهم زاد صياحها
وصارت تهذري بكلام ماتدري وش تقول: يمه ولدي
راح ... بندر ولدنا راح
بندر مسك يدها : اذكري الله يا اريج الله بيعوضنا ان شاء
الله
اريج: بس انا ابيه.. ابيه هو ليش راح علي
ام تركي: اريج استغفري ربك لاتقولين كلام مايجوز يمه
اللي رزقك فيه بيعوضك ان شاء الله ويرزقك بواحد واثنين
وثلاث الين يملون عليكم البيت ... بس انتي اذكري الله
اريج ومازالت تصيح وتردد نفس الكلام والكل متأثر لحالها
اللي ماتعودو يشوفونها فيه خصوصا اريج اللي دايم تملى
حياتهم فرح وسعادة بضحكتها اللي تشرح الخاطر...
تركي قرب منها : اريج تعوذي من ابليس.. انتي بعدك
صغيرة والعمر قدامك ان شاء الله لا تيأسين من رحمة رب
العالمين...
اريج وكأنها بدت تصحى من صدمتها:اعوذ بالله من الشيطان
الرجيم ورجعت تصيح كل ماتذكرت..
بندر: اريج احمدي ربك ربي توفاه في هالعمر قبل لايكبر
ونتعلق فيه وننحرم منه ...وانتي شفتي قالو لنا انه كان مشوه
وحتى لو ولدتيه ماراح يعيش كثير
ام تركي: اي والله يمك الحمدلله وتراه يشفع لك يوم القيامة
بإذن الله ..
تركي: وتأكدي ان الله يحبك ... لان الله اذا احب عبد ابتلاه
يا اما يشكر او يكفر.. وانتي احمدي الله على ما ابتلاك ...
غيرك يموتون عيالهم قدام عيونهم وهم اللي تعبو عليهم وربوهم
وغيرك بعد يطلعون عياله معاقين .. انتي الله ريحك من همه قبل يولد
وتشوفينه معاق ..
اريج: الحمدلله يارب
استمرو يريحونها ويذكرونها بفضل الصبر وانها اذا صبرت
واحتسبت بإذن الله راح يعوضها ربي اجر صبرها خير ...
ويرزقها ان شاء الله بالذرية الصالحة...
الخبر انتشر بسرعة البرق ومابقى احد الا جاها ... اخوانها
وخواتها واهل بندر...
مع جمعتهم والسوالف حست انها ارتاحت شوي ولو انه
مازال للجرح بقية بداخلها ... بس الايام كفيلة انها تنسيها ..
والحمدلله على ما اعطى ... والحمدلله على ما اخذ...
والحمدلله في كل الاحوال ....
بندر اللي من طلع من عندها وهو غارق بهمه ... حاول كثر مايقدر
يكون طبيعي قدام اريج ومايبين حزنه لانه مايبيها تنهار
اكثر ... واليوم فقد طفله اللي قعدو 7 اشهر ينتظرون يوم
ولادته بفارغ الصبر ... ياما قعدو يسولفون عنه ويخططون
شلون يعيشونه وشلون يربونه ... وكل التفاصيل ..بس
في لحظة كل شي راح وانتهى ...والله اللي كتبه بالاول
اخذ روحه قبل مايولد ...نزلت دمعة من عينه على فقد ولده
اللي ماشافه الا وهو ميت...


ما أراني فاعلاً في الليل إن أرخـى سدولـه؟
ما أراني فاعلاً والصبح قـد حـان احتضـاره

طفلي اللي مات في اول يوم مـا ذاق الطفولـه
عاجله سهم القدر واختـاره الله فـي جـواره

طفلي اللي مات في غمضة طرف ما حال حوله
يوم عمر الآدمي مـا كـان يومـاً باختيـاره

يا وجودي يوم لفّوا شاحـب الأكفـان حولـه
مـا تقـول إلا شظيّـة لؤلـؤٍ داخـل محـاره

يا وجودي يوم أطالع فيه,في عرضـه وطولـه
تنتحر في العين منـي دمعـةٍ كنْهـا شـراره

نفس عين آبوي عينه بل ونفس الـزول زولـه
وبالأماره, فيه من عمه(........) كـم أمـاره

جابه الله مثل هتّـان المطـر ساعـة هطولـه
ديمٍ احيـا بهجـة امـه تـارةٍ وآبـوه تـاره

ويوم شاف الشرّ من صوب آهلهْ يشعب ذلولـه
حطّ دون صدورهم صدره من الرحمه ستـاره

ومات توّي مـا بعـد بإيـديّ لبّستـه نعولـه
مات توّي ما بعد ساويـت فـي ثوبـه زراره

كنّ عينه يوم مات تقول:بابا, ويش هـو لـه؟
يوم تبكي وانت تدري مين انا ذلحيـن جـاره!

كلنا راحل وخيـر النـاس مـن زوّد رحولـه
باغتنام الصالحات وكـلّ كسـرٍ لـه جبـاره

طفلي اللي صوّبت كبده قبـل ساعـة وصولـه
بندقٍ من عين حاسد واودعت قلبـي طشـاره

يا وجودي ما لقيت أنسـب لمولـودي مقولـه
من مقولة: يا وجه صبحٍ تحرّر مـن خمـاره

أو ثغـر بـرقٍ تهامـيٍّ تبسّـم فـي ثعـولـه
ضوح مصباحه عليه يـورّد النجـدي بكـاره

يوم اشيله ما تقول اشيـل شـيٍّ مـن نحولـه
آتشمّم ريحته -من فجعـة القلـب- بحـراره

يوم جيت العب معاه وغاب قلبي مـن ذهولـه
يوم ما شفته تبسّم لي وانـا فـي اول زيـاره

قمت أحدث عنه نفسي- والعرب حولي وحوله
ليت ما هو ميْتٍ؟إلا ميت! ما تبغـى استشـاره

اتْخنقنـي عبرتـي يـوم آتذكّـر مـا تقولـه
عنه أمّه يـوم أنـا فـي ديـرةٍ ماهيـب داره

[آتذكّر يوم هو فـي بطنهـا يحـرّك رجولـه
وانتعيرّ:ليت ما هـو أقشـرٍ؟ لبّـى القشـاره

كم سهرنا معه ليله كاملـه مـن كبـر هولـه
لين صرنا نعَرْف موعد قومته داخـل قـراره

وان تأخّر ما صحى في موعده قمنـا نصولـه
ننغزه يا من يميـن البطـن وإلا مـن يسـاره

ما نبي شيْ بسْ نبي نضحك على ردّة فعولـه
ننغزه ويفز خايـف مـا درى ويـش العبـاره

من يدي غيمة على أيـدي الملائكـة محمولـه
غيمةٍ من نور مـا تشبـه نضارتهـا نضـاره

يا إلاهٍ كل ما في الأرض طـراً سبّحـوا لـه
شفّعـه فينـا غـداً واجعلـه لابوانـه بشـاره

فـي نهـارٍ فيـه أعنـاق الشياطيـن مغلولـه
يتلقّفنـا مثـل مـا يلقـف الحـاوي صـراره




*
*
*
*
*
*


الجزء الواحد والعشرين




*
*
*
*
*
*



كحلم طال انتظاره كنت انت...!

كشعاع شمس خذل الظلام..

كضحكة طفل بريئة في زمن الخداع...

كنت املاً ,,

لا بل كنت عمراً...

كنت نبضاً لقلب اضناه الحنين

جملت عالمي بك..

ورسمت حياتي لك..

ونثرت اعذب حروفي من اجل عينيك...

وفي زخم انتصاراتي

سرقك مني زماني

واهداني الرحيل ذات مساء....

فسلب النور من وطني

وسرق الامان من عالمي..

وزخرف حياتي بنقوش الانكسار

فكانت ليلة وداعي لك

ليلة ضاع مني وصفها

أهي وداع حلم..؟

ام فراق عمر...؟

باختصار مسائي كان رسم نهاية

واي نهاية...؟

نهاية كانت صورة لاختزالات الرحيل

فكان الوداع

وكان الضياع....


ركبو الطيارة راجعين للسعودية .. والشي اللي مو عارفه ياسر ان
الجوهرة قررت قرار نهائي تتركه وتعيش حياتها .. وتخليه يعيش
حياته مع الانسانة اللي اختارها ...رغم انه هو كان ناوي هالمرة
يعترف لها بالشي اللي اخفاه عنها طول الشهرين اللي فاتت...واللي
حس نفسه ماعاد يقدر يدفنه بداخله اكثر... كانت حزينة وحزنها
اكبر من انها تتحمله لندن اللي عاشت فيها اشهر من الكآبة شهدت
فصول حبها اللي وأد قبل ان يولد ... ماتنكر انها عاشت لحظات
سعادة وهي تشوف ياسر كل يوم معاها بس عاشت عذاب الحرمان
انه يكون قريب منها وقلبه متعلق في غيرها ... حزنها على فراق
ياسر فاق اي حزن ثاني ...حست بشعور ودها تصرخ بحبه ...
ودها تضمه للمرة الاخيرة وتودعه ..بهالمدينة ودعت بشاير اللي
كانت لها ونعم الاخت .. هي واهلها عمرها ماراح تنسى وقفتهم
معاها نصايحهم لها .. ويكفي انها حست ان لها اهل بوقت اللي
بعدت عن اهلها.. دموعها مارضت توقف وكل ماسألها ياسر عن
سبب هالدموع تقول له انها زعلانة على فراق بشاير ومو مصدقة
انها بتشوف اهلها بعد هالاشهر...ساعات مرت عليها مثل الدهر
ماصدقت وقت اعلن كابتن الطيارة عن الوصول لارض مطار الملك
خالد الدولي بالرياض .. وياحلوها لحظات العودة لأرض الوطن
كان ناصر في استقبالهم .. اول ماشافت ناصر رجع لها الحنين
لاهلها طارت من مكانها ودها تحضنه ... ركبت السيارة وهي
ودها هالوقت يعدي بلحظة وتشوف اهلها اللي اشتاقت لهم ...
الجوهرة: ياسر بروح لاهلي
ياسر: خلينا نريح ونسلم على اهلي ونروح لهم بكرة الصباح
الجوهرة: مافيني صبر والله ابي اشوفهم
ناصر:ياخي انت متعود تبعد عنهم هي اول مرة تغيب عن اهلي
خلها تشوفهم اول
ياسر: خلاص على شوركم ولو انه الوقت متأخر
الجوهرة: احنا بالسعودية يعني 11 مو متأخر مرة...
ياسر: بتروحين لاهلك لاتخافين...
الجوهرة سكتت لان ماعندها شي تقوله ... هي تخاف من اللي
صاير بحياتها .. شخصيتها متذبذبة مو ثابتة على قرار معين ..
تخاف وش اللي يصير لو عرفو اهلها بقرارها..تفكر وش ممكن
يصير اذا درت خالتها .. وش راح تكون ردة فعل ياسر.. واكثر
ماكان يؤرقها المجتمع اللي مايرحم ونظرته لها وهي ترجع بعد
كم شهر من زواجها مطلقة ...قربو من حيهم وحست روحها
رجعت لها من مشو على هالطريق ... واول ماشافت بيتهم من
بعيد فاض فيها الشوق ودها تطير قبل يوصلون ودها تسابق
الوقت وتشوفهم.. وصلو ونزلت بسرعة دخلت البيت وشافت
امها وابوها وخواتها وندى بالصالة ..ركضت لامها وارتمت
بحضنها تصيح..
ام ناصر: هلا والله هلا ببنيتي .. وقعدت تصيح معاها
الجوهرة: يمه اشتقت لكم والله
ابو ناصر: واحنا ماتبين تسلمين علينا؟
راحت لابوها وحبت راسه ولمها عليه : تو ما انور البيت
يالغالية ...
مشاعل: يبه بسرعة تراه واحشتنا بعد
ابو ناصر: للحين ماشبعت منها هذي الحنونة ..
ابتسمت الجوهرة وبعدها راحت لخواتها .. وكلهم صارو
يصيحون حتى ندى وام ناصر..
ابو ناصر: بسكم عاد فاكينها مناحة .. تراها جايتكم متولهة
عليكم يعني افرحو فيها
مشاعل: يبه هذي دموع الفرح..جوجو وحشييييييييني وربي
الجوهرة: وانتو اكثر والله .. يازين السعودية وربي انها راحة
بال ..
ناصر: مطولين تسلمون والرجال ينتظر برا
ام ناصر: وراكم مادخلتوه ؟
الجوهرة: يمه روحي له شوي انا بقعد مع خواتي..
ام ناصر: زين .. وقامت تروح له بالمجلس هي وابو ناصر
ومعاهم ناصر...
وقعدت هي مع خواتها وندى... دقايق وجتها امها تقول لها
ياسر يبيها...
راحت له وهي بداخلها تبي تودعه هالليلة اللي راح تكون آخر
مرة تشوفه فيها ...دخلت وشافته جالس مع ابوها اللي سلم
على بنته وبعدها استأذنها يبي يروح ينام..
الجوهرة: سم بغيت شي؟
ياسر: ماتحسين انك طولتي؟
الجوهرة:روح انت انا ابي اقعد عند اهلي
ياسر:وليش توك تقولين؟ ليش ماقلتي لي من اول كان رحت
وما انتظرتك..
الجوهرة: هذاك الحين عرفت
ياسر: ومتى تبيني امرك؟
الجوهرة: انا بدق عليك
ياسر: ابي اتكلم معاك بموضوعنا
الجوهرة: وش هو موضوعنا؟
ياسر: بكرة امرك وراح اتفاهم معاك على كل شي
الجوهرة توقعت انه راح يقول لها انه ماعاد يبيها بحياته
وانهم لازم يفترقون ...حاولت تستجمع اللي باقي من كبريائها
تبيها تجي منها هي ... على الأقل تكون هي اللي عافته مو هو
بدون ادنى تردد قالت اللي تفكر فيه: انا ابيك تطلقني
ياسر: طلاق قلت لك مانيب مطلق..
الجوهرة: ياسر وش تبي مني؟ راح تطلقني غصب عليك وماعاد
بقى لك عذر تخليني معاك اكثر
ياسر: قلت لك ابيك
الجوهرة: لا تكذب علي ولا تقول شي مو بقلبك انت من اول يوم
قايل لي اني بحياتك غلطة ... وهالغلطة لازم تنهيها
ياسر: هذاك اول والحين كل شي تغير
الجوهرة: وش اللي تغير؟ وانت نفس اللي عرفته من اول يوم
ياسر: الـ... الحين صرت احبك
هالكلمة فتحت جروح بقلب الجوهرة ماتدري هي تفرح ولا تحزن
هي كانت تبيه يحبها ... ليش يوم اختارت تبعد عنه الحين قال
انه يحبها ...داست على قلبها .. وطلعت كلماتها وكأنها خناجر
تجرح بقلبها : ياسر انا ماكنت لك من الاول وعمري ماراح اكون
لك.. انت اللي اخترتني وسيلة توصل فيها لاهدافك واتوقع الحين
سهلتها عليك ... بس للأسف انت كرهتني فيك .. وانسحبت طالعة
من المجلس .. تبي تهرب منه ومن حبه ..
ياسر: جوجو
الجوهرة: فمان الله
وتركته وراها مصدوم بعد اللي قالته توقعها بترضى انه حبها..
ظن انها بتفرح بهالحب..
دقايق او اقل قعدهم ياسر يناظر بالمكان اللي طلعت منه وهو للحين
مو مستوعب اللي صار كله ... مشى وهو كله امل من بكرة
تغير رايها ...
اما هي استأذنت اهلها واعتذرت منهم انها تعبآنة وتبي تنام.. وعلى
طول اتصلت على بشاير الوحيدة اللي تدري بهمها وقصتها كلها
الجوهرة من اتصلت وهي تصيح وماعرفت شلون حتى تتكلم
بشاير: جوجو؟
الجوهرة: يحبني والله يحبني
بشاير: شنو ؟ منو اللي يحبج
الجوهرة: ياسر قال انه يحبني
بشاير بفرحة: والله؟ انا قايلة لج من اول يحبج بس انتي مو راضية
تصدقيني
الجوهرة: بس انا ما ابيه
بشاير: شلون ماتبينه ؟ مو هذا اللي كنتي تقولين انج تموتين عليه
الجوهرة: يوم انا قررت اتركه قال يحبني
بشاير: انتي ليش تييبين الهم لروحج .. اللي تبينه وصار
الجوهرة: لانها بحياته انا مابيه .. حتى لو كان يحبني بوجودها
انا ملغية .. مالي اي وجود
بشاير: اوكي خيريه
الجوهرة: اخاف يختارها وانصدم
بشاير: والحين شلون يعني؟
الجوهرة: بيشو رصيدي بيخلص اكلمك بعدين
بشاير: انزين سكري انا ادق عليج
الجوهرة: لا خليها بعدين الحين ابي ارتاح
بشاير: اوكي براحتج بس طمنيني عليج.. ابيج مثل ماوعدتيني
الجوهرة: اوكي .. باي
سكرت من بشاير ... وبداخلها الف هم وهم... ليش نحلم ونظل نحلم
احلام بريئة وردية عذبة كعذوبة الاطفال وفي لحظة وحدة بس احلامنا
تتحطم على مراكب هالزمن القاسي ... ولو صار ويأسنا وقررنا
بلحظة الرحيل..نشوف الحلم ينادينا يلوح لنا نرجع ..بعد ما كرهنا
هالحلم وطاريه...وبوسط هالهموم نـآمت يمكن بنومها تكون الاحلام
اجمل ...






*********************************







طلعت من المستشفى وراحت لبيت اهلها ,,, تمنت وهي طالعة
تكون حاملة ولدها بايدها لكن قدر الله وماشاء فعل واللهم لا
اعتراض على حكمك ... الكل كان يبي يريحها وينسيها حزن
خسارتها ... كان مبين بعيونها الحزن ... هالعيون اللي عمرها
ماغابت فرحتها صارت كلها حزن ... وصوتها اللي كان يملا
البيت ضحك ووناسة ومقالب صار مبحوح من كثر الصياح ..
اليوم هي غير اريج اللي قبل .. صارت شبحها..
فاتن: الحمدلله على السلامة ياقلبي
اريج: الله يسلمك
ام تركي : تعالي ارتاحي يمه
اريج: مرتاحة والله تمددت على السرير بهدوء: خلوني لحالي
ابي انام
ام تركي: يمه لاتكدرين خاطرك بكرة الله بيعوضك ..
اريج: يمه والله ابي ارتاح بس
فاتن: اوكي ارتاحي شوي وبصحيك بنات عمي جايين اليوم
وجاية جوجو بعد
اريج توها تتذكر رجعة الجوهرة للرياض: جوجو جت؟
فاتن: اي وصلت البارح واليوم بيجونا
اريج: زين ابي انام شوي ولا جو قوميني
طلعو من عندها طفت فاتن الانوار وسكرت الباب ...
ام تركي: الله يصبرها ويعوضها خير
فاتن: يمه اريج قوية وراح ترجع مثل اول بس انتو بعد
مو كل ماتشوفونها تذكرونها بحزنها .. خلونا نونسها نطلعها
من هالجو اللي تعيشه وانا متأكدة انها بترجع اقوى من اول
ام تركي: الله يسمع منك يارب
طلعت فاتن للصالة ...واتصلت على ندى تستعجلها تجي لهم
ندى: الو
فاتن: هلا ندو .. متى جاية؟
ندى: ربع ساعة ونمشي .. بس بنتأخر شوي
فاتن: ليش؟
ندى: نبي نمر محل حلويات نجيب لنا تشكيلة معتبرة
فاتن: ياويلك لو تجيبون احلى من اللي جبتوها لي
ندى: هههههههههه مو شغلي كلمي جوجو هي اللي بتشتريها
انا مسوية نوعين حلى وفطاير وجايبتهم..
فاتن: مالت عليك انتي وياها ..ضفو وجيهكم ثنتينكم ولا
اشوفكم
ندى: فتون من قلب هالكلام عيديه ماسمعته زين
فاتن: حاطته على السبيكر يالخايسة
ندى: هههههههههههههه باي بروح اشوف فروس والبسه
فاتن: اي صرفيني بس تعالي انتي وتشوفين وش اسوي
وماسمعت اي رد لان ندى سكرت وهي تضحك...
ام تركي: جت ندى؟
فاتن: لا توهم مطولين شوي...يمه
ام تركي: سمي
فاتن: سم الله عدوك..مو ملاحظة ان ماجد وزوجته من رجعو
محد عزمهم ولا سوينا لهم مناسبة.... عاد هم حتى عرس
ماسوو عرس مثل الاوادم ..
ام تركي: شلون نسوي مناسبة وانتي شايفة الاوضاع شلون ..
ولادتك انتي .. وعقبها اريج يعني متى فضينا اصلا
فاتن: يعني مو ناسين؟
ام تركي: شلون انسى فرحتي في ماجد ...
فاتن: مادري يمه خفت ياخذها بخاطره ولا شي
ام تركي: لا انا مكلمته وقايلة له انا مأجلينها شوي الين ماتزين
امورنا..
فاتن: الله ييسرها يارب... انا سامعة صوت وليد وفزت من
مكانها طايرة تبي تشوفه ...
شالته تبي تسكته وصاحت ربى بعد ... احتارت تسكت مين
ولا مين : ايمااااا
ايما جاية ركض من المطبخ : نأم << يعني نعم *_*
فاتن: شيلي ربى معاي للصالة .. شالتهم وطلعت قعدت في
الصالة عند امها وهي تتذمر: والله مايريحون الواحد بقعدته
ام تركي: لا تقعدين تتشكين علي احمدي ربي على النعمة
اللي موتي عمرك عشانها..
فاتن: الحمدلله ماقلت شي .. بس مايعرفون النوم كل خمس
دقايق صاحين علي ..والبلا اثنينهم يعني اقابل هذا ولا هذي
ام تركي: انا شايفة الدلع كله رايح لوليد
فاتن: لا والله يمه كلهم احبهم نفس الشي .. وصارت تسكت
وليد بس حبيبي بس...
وقربته من صدرها ترضعه ....وعينها على ربى تناظرها
وودها تقربها هي بعد وتضمها على صدرها ...وناظرت
بامها :يمه خوذيها من ايما يمكن تسكت معاك...
شالتها ام تركي تسكتها : هاااه حبيبتي انتي بس ياقلبي
فاتن: هالبنت صياحة
ام تركي: مثل امها ماكانت تخليني انام الليل..
فاتن: جد والله؟
ام تركي: انتي وخالد محد اتعبني كثركم في حملكم وولادتكم
وتربيتكم تعبتوني
فاتن: لك الاجر ان شاء الله يالغالية
تركي: وانا يمه عسى بس ماتعبتك؟
التفتت ام تركي على ولدها اللي لابس ونازل ومبين انه اكيد
طالع وراه مشوار: انت اول ولادة لي وماكنت اعرف واجد
واكيد بحس بتعب بس مو مثل فاتن وخالد..
فاتن: وماجد؟
ام تركي: ماجد اللي ما اتعبني بشي مع اني ماكنت ابيه ..يوم
دريت اني حملت فيه زعلت وتضايقت ...وكنت اناقز بالبيت
ابيه يطيح
تركي: افا يمه ماهقيتك تسوينها
ام تركي: كنت صغيرة وقتها وجاهلة بس ابوك حذرني اسوي
شي يغضب ربي وسبحان اللي ثبته ببطني..
فاتن: ههههههههههه يمه ربى نامت على سوالفك
ام تركي: يارب تحفظها وتخليها لكم
تركي+ فاتن: آمين
تركي: يالله انا استاذنكم بروح الشركة اخلص اشغالي قبل
اخذ اجازة
ام تركي: تبي تاخذ اجازة قريب؟
تركي: اي والله يمه ودي اسافر انا وغادة احس اني انشغلت
عنها بالفترة الاخيرة وودي اعوضها..
ام تركي: اي والله ياوليدي .. وهي ربي يسعدها ساكتة
ماعمرها اشتكت ..
تركي: ان شاء الله بعوضها على صبرها.. يالله فمان الله
ام تركي: الله يحفظك يارب.. وييسر لك امرك
فاتن: يمه هاتيها بوديها جوا الحين بيجون البنات ومابيهم
يصحون علي..وشالت ربى تبي تنومها عند اخوها ..

وبعدها راحت للمطبخ تكلم الشغالات: جهزتو القهوة؟
ميري: يس
فاتن: زين جهزو كاسات العصير لاجو البنات نصبهم
ميري: اوكي
وطلعت بتشوف امها .. لقت البنات توهم واصلين: هلا والله
يالله حيهم ... وجاتها ندى تبي تسلم عليها قعدت فاتن تمازحها
تبي تقهرها: هالترحيب كله للجوهرة
ندى: مالت عليك بس والله ما اسلم عليك
فاتن تروح لها وتبوسها من خدها: ههههههههههههه ياشيخة
امزح
الجوهرة: فتوووون ياحبي لك وربي وحشتيني وتروح لها تضمها
فاتن: والله انتي اللي وحشتينا .. ماشاء للحين عروس
الجوهرة: ههههههههههه يقولونه
مشاعل: ماشاء الله فتون النفسية تغيرت بعد ولادتك
فاتن تطالعها مستغربة: شلون يعني؟
مشاعل: مادري اول كنت احسك مزاجية يوم مستانسة ويوم لا
بس الحين صايرة تنكتين وتضحكين
ندى: ياختي خليها تنبسط الله لايغير عليها ..
مشاعل: خوذي عباتي بس يقال لك الحين بحسدها انا اقول اللي
لاحظته عليها ... وجعلها دوم هالوناسة
الجوهرة: الحين ياللي ماتستحون على وجيهكم من زمان عني
وتتهاوشون قدامي
ندى: كنتي متوقعة يعني انك بتجين تلاقينا نستحي منك؟
الجوهرة: مادري.. قلت يمكن
مشاعل: اروج وينها؟
فاتن: نامت شوي وقالت لاجو قوميني
الجوهرة: انا بروح افاجأها
ندى: تراها دارية انك بتجين يعني لاتفرحين بعمرك
الجوهرة: مو شغلك زين؟... وراحت تصحي اريج
دخلت الغرفة ولعت الانوار وشافت اريج قاعدة على سريرها
تصيح وراحت لها ركض حضنتها : اروووج اذكري الله مو
حلو عليك الحزن
ابتسمت لها اريج وهي تمسح دموعها: يالله حيها الانجليزية
الجوهرة: هههههههههههه ايه لغات ماتدرين انتي
اريج: ياحبي لك والله..
ودخلو عليهم البنات ..وعرفت فاتن ان اريج كانت تصرفهم
ومانامت..سلمو عليها وحدة ورى الثانية وجت تبي تقوم تقعد
معاهم. بس فاتن قعدتها بسريرها:صاحية انتي؟ ارتاحي مكانك
اريج: زهقت ابي اقعد معاكم..
فاتن: هذاك قاعدة معانا لاترهقين نفسك ممكن اي حركة زايدة
تضرك وتسبب لك نزيف
اريج: زين لاتعصبين
فاتن: مو معصبة والله بس ابي راحتك ياقلبي
تمددت اريج على السرير وقعدت مع البنات يسولفون: عبير
وشهد وينهم؟
ندى: شهد مادري اتصلت فيها وماردت علي .. وعبير اتوقع
على وصول خلاص
فاتن: ندى روحي صوتي لغادة
ندى: اوكي ... وقامت تنادي غادة ..
عبير: السلاااام عليكم...وراحت ركض لاريج :ياعمري اروجه
كيفك اليوم؟
اريج: الحمدلله احسن من اول
عبير: ان شاء الله ربي يعوضك وتجيبين درزن عيال اذا جيتي
تنادين عليهم تلخبطين في اسماءهم
الجوهرة: وش هالدعوة الغريبة
عبير التفتت وشافت الجوهرة وراها: جوجو ياااعمري
الجوهرة: اشوا اللي شفتيني ..
عبير: والله اشتقت لك مرررررة
الجوهرة: وربي انا اللي اشتقت لكم
عبير: توقعت شهد جات ادق عليها ماترد
فاتن: حتى ندى تتصل فيها وماترد
عبير: جد؟ لاتخوفوني عليها دقيقة بتصل على خالد.: كمان مايرد
اريج: اكيد نامين
ندى: احد ينام الحين؟
غادة : السلام عليكم
الكل : وعليكم السلام
غادة: الحمدلله على السلامة اريج
اريج: الله يسلمك يارب
عبير تكلم شهد: نايمة؟ واحنا من اول نتصل
شهد بصوت كله نوم: اجتمعتو؟
عبير: ايوا من اول ... خوفتيني عليك
شهد: طيب دقايق واجيكم.. باي
فاتن: الحمدلله انهم بخير والله اني وسوست بس خليتها بنفسي
قلت مابي اكبرها
اريج: وينها فيه؟
عبير: تقول دقايق وجاية
ندى: شهد؟ اقص ايدي لو ماجتكم بعد ساعة .. هذي من متى
تطلع اصلا
ام تركي وهي داخلة عليهم : ياهلا والله ومسهلا يالله حيهم
قامو البنات يسلمون عليها: يالله حي الجوهرة تو مانور البيت
الجوهرة: الله يحييك خالتي شلونك؟
ام تركي: بخير الحمدلله وين امك؟
الجوهرة: مسيرة على بيت خالتي شوي بتجي
ام تركي: الله يحييها ان شاء الله .. شلونك انتي؟
الجوهرة: والله بخير دامني اشوفكم
ام تركي: شلونكم يابنات؟
اماني: بخير خالتي
ام تركي: غادة وين امك ماجت؟
غادة: الا جاية بالطريق هي وخالتي
اجتمعو الكل عند اريج اللي مع هاللمة الحلوة بدت ترجع لها
روحها الحلوة ولو انه يبين عليها الحزن لحظات والسؤال
اللي الكل يردده على مسامع الجوهرة هل في اخبار عن طفل
بالطريق وهي ترد عليهم بطريقة ماتبين فيها شي خصوصا انها
ماصرحت بقرارها لاهلها الى الحين ...






*******************






انكسارات اسى ... وبرود يعصف بالوجدان ...

قلوب متحجرة ..ومشاعر مبعثرة.. وخطوات تائهة

هي اسطر قصة من حرمان ...

لحظات صفاء ... وسنوات عجاف.. والواقع مر

رغم تزييف واقعنا.. وتوهمنا حلاوته المصطنعة..

قد نحب وقد نعشق بجنون ... ويصادف عشقنا العذري

طوفان من الجليد ... رغم محاولات الإذابة حد الاشتعال

فتتكسر كل الأماني امام هذا الطوفان...

وتتبعثر كل الاحلام امام صدمة الواقع .. ويبقى للحلم

خطوة ... وللأمل رجوى .. حتى لا تتبدد كل الاحلام

وتنتهي قصة الحب نهاية مأساوية... فهل ياترى ستنجح

محولات الانعاش الأخيرة ...؟! ام سيلفظ هذا الحب

آخر انفاسه ...؟


برود يسكن مشاعرهم ... حياتهم رتيبة ومملة ... هي متأكدة انها
تحبه وتعشقه .. بس الحب مايكفي اذا احتفظو فيه بقلوبهم .....
ماتحس بالسعادة اللي هي تحلم فيها ... ليش رغم الحب ماذاقت
طعم السعادة ...؟
هم يعيشون مثل كثير من المتزوجين.. حياة روتينية مافيها اي
تجديد يذكر كل يوم نفس الموال ...
نوم ,, دوام ,, طلعات.. بس,, والمشاعر ماتظهر الا على الفراش
فقط ...!!!
واللي يؤرقها انها تعيش بهالصقيع لحالها ..عمرها ما اشتكت لاحد
ماودها تدخل احد بمشاكلها الزوجية وتاركة هالشي كآخر الحلول..
اتعبها التفكير وأرقها وتأكدت انه فشل هالزواج او نجاحه متوقف
على اثنينهم بس لاصار الزوج بارد... ممكن هي تجدد بحياتها يمكن
تحس انها تعيش بسعادة..حاولت كثير والمشاعر للاسف نفس البرود
لكن ماراح تيأس ولا تفقد الامل ...
طول الاسبوع وهي تخطط لهالويك إند وعساه يتقبل الفكرة ومايرفض
عزيمتها ...
اول ماجا من بعد صلاة المغرب ارتاحت انه ماراح مكان ورجع للبيت
رتبت امورها براسها وجهزت الكلام وبدون اي تردد نطقت: حبيبي
ناصر: هلا
ندى: مـ...مـشغول اليوم؟
ناصر: لا مثل كل يوم ليش؟
ندى: يعني بتروح الاستراحة
ناصر: اليوم اربعاء صح
ندى: ايه
ناصر: يعني اكيد بروح
ندى: زين لو طلبتك تقعد معاي
ناصر: وين اقعد؟ انتي وخواتي بتروحون لاهلك
ندى وهي متوترة وخايفة من رفضه لها : لا انا ابي اقعد معاك
ناصر: وش نقعد نسوي ؟<<يقهر
ندى بعد تردد طلعت الكلمات آلية : عازمتك يومين بالفورسيزونز
ناصر تفاجأ من كلامها: من متى؟
ندى: من زمان ابي اعزمك واليوم اللي قدرت اقول لك .. ابي
نبتعد عن العالم .. انا وانت
ابتسم لها وحست انه متقبل الفكرة وهالشي خلاها تكمل وتقول
كل اللي بخاطرها له:مابي شي يشغلك عني وانا بعد بكون لك
بس ودي يكون لنا عالمنا الخاص نجدد فيه حياتنا..
قرب منها ناصر وحبها على جبينها :الله لايحرمني منك يارب
غصب عنها نزلت دمعتها : افاااا ليش الدموع الحين ... اللي
تامرين فيه انا حاضر..
ندى وهي تمسح دمعة طاحت على خدها : يعني موافق
ناصر وهو مازال مبتسم: نرجع لشهر العسل؟
ابتسمت له بعذوبة: لك كل اللي تبي
ناصر: زين متى تبينا نروح؟
ندى: بعد صلاة العشا ...ابي اجهز اغراضي واغراضك قبل
ناصر: يعني اضف وجهي واخليك تاخذين راحتك؟
ندى : ههههههههه ابيك تطلع بالصالة شوي
ناصر: ابشري على هالخشم... وطلع رايح للصالة بعدها
رجع لها..مرة ثانية: ندو
ندى: لبيه
ناصر: فروس بيروح معانا؟
ندى: لا بخليه عند عماته
ناصر: احسن بعد
ندى:زين روووح خل اخلص اشغالي
ناصر: اوكي طلعت ...
خذت لها ملابس ( دلع ) اشياء خاصة شموع وورود..
وجهزت له هو بعد اغراضه ... ودخلت تتسبح ..طلعت
لبست جلالها .. وفرشت سجادتها وصلت العشا ... وبعدها
صلت ركعتين لربها تدعيه يوفقها وييسر امورها ويسخر لها
زوجها ...






******************************






قاعدة ببيت عمها ... كل ماشافت اتصالاته تقطع قلبها مليون
مرة مشتاقة له ... وشوقها تجاوز حدود صبرها ... ماتدري
هي لمتى راح تصبر..اهم شي انها اتخذت قرارها بكرة راح
تبلغ اهلها عن رغبتها في الانفصال ..وياخوفها من ردة فعلهم
اللي من رجعت وهي شايلة همها ...وبوسط هالتفكير سمعت
ضحكاتهم اللي قطعت تفكيرها... وضحكت معاهم
مشاعل:حسافة كان ودي آخذ مشعل عاد وناسة مشاعل ومشعل
عبير: لا بالعكس بيصير مرة بايخ
اماني: اقول لاتقعدين تتمنين رجلي .. عندك فيصل استانسي
فيه
اريج: رجلك؟ توكم ماملكتو وحطيتيه رجلك
مشاعل: لاتلومينها عانس ومو مصدقة انها بتعرس
اماني: وجع ان شاء الله وش عانس هذي؟ بأي عصر انتي
ترى توني ببداية الـ 26 يعني سني مناسب للزواج...
غادة: وهي صادقة ... الزمن تغير وكل زمن له مقاييسه والبنات
الحين صارو يشترطون مايتزوجون الا بعد مايكملون دراستهم
والبنت تتخرج بعمر الـ 22 او 23 ...
فاتن: والله خاطري بعد الملكة نروح المزرعة من زمان مارحنا
ومنها نغير جو
اريج: لا وش هالنذالة تروحون وتخلوني
فاتن: ومن قال بنخليك ؟
اريج: انا توني مالي الا عشر ايام وانتي تبينا نروح بعد اسبوعين
غادة: لا خلوها بعد 3 اسابيع احسن عشان نرجع من المزرعة
ونسافر على طول..
اريج تناظر شهد: وش عندها الاخت مبتسمة؟
شهد: تبيني اكشر يعني؟ كذا من الله مونسني الحمدلله
اريج: لا حاسة انه في شي
عبير تناظر شهد وتحرك حواجبها : اعلم؟
شهد: عادي قولي
اريج: وشو عاد
عبير: الاخت حامل
الكل: مبروووووك
شهد: الله يبارك فيكم
غادة: ماشاء الله من متى؟
شهد: توني اليوم حللت
اريج: ياااارب احمل بسرعة
فاتن: صاحية انتي الحين مو الدكتورة مانعتك على الاقل 6 اشهر
ماتحملين .. ممكن يكون ضرر عليك
اريج: مو كل شي يقولونه هالدكاترة صح
عبير: اهم حاجة انتي انتبهي لنفسك ..واهتمي في تغذيتك وان
شاء الله ترجعين اقوى من اول..
اريج: طالع من يتكلم بس..علمي نفسك شوفي شلون صاير جسمك
عبير: هذي رشاقة
اريج: امحق رشاقة.. وربي ضعفتي كثير
عبير: عارفة والله حتى فهد كل يوم يهزأني ..
فاتن: اكيد الرجال مايحب زوجته تكون ضعيفة
غادة: جوجو وين مسرحة فيه؟
الجوهرة: معاكم والله
غادة: لا والله مو معانا من اول عينك على جوالك ورايحة في عالم
ثاني..
اماني: اصلا من جتنا وهي اغلب وقتها مسرحة ومو معانا
الجوهرة: عن النصب عاد
مشاعل: وهي الصادقة وانا حاسة ان فيك شي بس ماتبين تقولين
الجوهرة صارت تلعب ربى وماتبي تلتفت لكلامهم تخاف عيونها
تفضحها..
فاتن: اي صدق وينه خلود هنا؟
شهد: ايه قاعد مع خالتي
فاتن: بروح ابارك له
وطلعت للصالة وشافته قاعد مع امها : الحين قاعد بالصالة والبيت
مليان بنات؟
خالد: ليت اللي وراك هي اللي تغار علي بس
التفتت فاتن وشافت شهد جاية وراها : الف مبروك الله يتمم لكم
على خير
خالد: الله يبارك فيك .. اسكتي بس تراي حاقد عليك
فاتن: افاااا ليش؟
خالد: سارقة اسم ولدي
فاتن: نصاب ماعمرك قلت بتسمي ولدك وليد
خالد: والله من يوم اني صغير وماينادوني الا ابو الوليد
فاتن: عادي سم وليد وش يصير؟
شهد: لا يصير كل ماصوتو على ام الوليد نرد عليهم انا وانتي
خالد: هههههههههههههه طالعو التفكير بس
فاتن: اي صح
خالد: لا انا ولدي ان شاء الله بسميه على ابوي
عبير: يمكن تكون بنت؟
خالد : هلا عبورة
عبير: الف مبروك
خالد: الله يبارك بعمرك .. وعقبالكم يارب
الكل: يارب
فاتن: يلااا قوم مع العيال بالملحق البنات يبون ياخذون راحتهم
خالد: بقوم اصلا بس جيت اسلم على امي... شهد تعالي ابيك
بكلمة راس
شهد ابتسمت وراحت له.. : هلا
فاتن: ياليت اريج شايفتكم وربي لتلزق فيكم
شهد: ههههههههههه اسكتي بس لاتطلع علينا الحين...
خالد مسكها من يدها : قلبي
شهد: لبيه
خالد: انتبهي لنفسك
شهد: ان شاء الله لا توصي حريص
خالد:واول ما اتصل فيك البسي عباتك واطلعي
شهد: اوكي
ورجعت قعدت مع البنات تعشو وكملو سهرتهم وبعدها كل وحدة
رجعت لبيتها ...





****************************






ازعل عليك احيان
وأزعل على نفسي قبل ماأزعل عليك

وأرضى عليك احيان
وأرضى على الدنيا وانا راضي عليك

وأنت عمرك
مازعلت .. وماعتبت ... ومارضيت

أزعل علي لو كذب...!
أعتب علي لو كذب...!

هذي التفاصيل الصغيرة
اللي تخلينا نحب..

ماأحب انا ازعل عليك
ازعل انا لأني احب

***

ياأدفي من حروف الشعر
ياأرق من حلم السنين

إذا تركتك تنتظر
حسسني إن انتا حزين

مابي تقول مسامحك
قل : ماأبيك

وإذا رجعت اصافحك
أبعد يديك

أنا انجرح قبل اجرحك
وأبكي عليك

لكن أبي مرة تحس
وشلون أنا أمووت فيك...!

هي التفاصيل الصغيرة
اللي تخلينا نحب...

ماأحب أنا أقسى عليك
أقسى أنا لأني أحب

***

أدري فيك تموت فيني
وأنا ميتة من برودك

لي متى وانتا تبيني
وماتحسسني بوجودك

ايه ... حسسني بوجودك

لمّ صوتي
بعثر حكاية سكوتي

لاتخلي الحب يفقد همسك العذب ويمووت
قل احبك ..
قل احبك بأعلى صوت

انا مليت السكوت


***

ياإبتسامة قلبي ولهفة حنينه
ياشقاه وياحنانه

يابعد كل المسافات الحزينه
معك امانة

الدروب اللي مشينا .. لاتضيع وتغترب

بالتفاصيل الصغيرة
نقدر نعيش ونحب...!




لأول مرة من فترة طويلة تفضفض له كل اللي بقلبها وتشتكي له
من بروده ومن جفاه... ليلتهم كانت ليلة مصارحة بالدرجة الاولى
ارتاحت كثير... هي كانت محتاجة تقول كل اللي بخاطرها وترتاح
حتى لو ماتغير شي بس تكون سوت كل الحلول اللي بيدها...
كانت ليلة ارضت فيها مشاعرها وانوثتها . عشاء على ضوء الشموع
وورود منثورة في الارجاء ..وكلمات حب وعشق تتردد على المسامع
واليوم صباحها غير ... صباح نوره شع على هالكون كله ...
قامت من السرير.. تسبحت وتكشخت وتعطرت.. وطلبت لهم فطور
وراحت له وهو نايم...: حبيبي
ماتحرك فيه اي ساكن رغم انه حس فيها من صحت بس كان يبي
يمثل عليها ...قربت منه اكثر: قلبي يلااا قوووم
ذاب من سمع صوتها ودلعها ... ابتسم في خاطره بس بعد هالمرة
مارد عليها .. شوي وتنرفزت : ناصر يلاااا عاد قوم
فطس عليها ضحك: هههههههههههههههههههه
انقهرت منه لانها عرفت انه يمثل عليها: ليش تضحك
ناصر: على طول تشبين ماعندك وقت
ندى ابتسمت: وانت مستانس علي؟
ناصر: انا مستانس معاك
ندى: زين قوم تسبح وتعال نفطر.. قام ناصر بعد ماعطاها بوسة
على خدها ... تسبح ولبس .. وطلع لها في الصالة .. قرب منها
وقعد جنبها: تدرين وش ودي؟
ندى: وشو؟
ناصر: تصير حياتنا على طول كذا ..والله احس اني عايش بجنة
ندى: وانت فعلا تقدر تعيش كذا ... بس ليش تنتظر هالشي مني
ليش اذا حسيت انت بملل ماتحاول تجدد بحياتنا؟
ناصر: ماعمري فكرت بهالشي
ندى: زين ليش ماتبي تغير في نفسك .. مو عشاني عشانك انت
وعشان حياتنا.....
ناصر: ومن قال اني مابي اغير نفسي؟
ندى: لانك من تزوجنا وانت نفسك .. نفس العيوب ونفس الاخطاء
لاتزعل من كلامي انت وعدتني هاليومين لي اقول واسوي كل اللي
ابي..
ناصر: انا ما اعترضت .. بس بعد مافي انسان كامل
ندى: وهذي حيلة العاجز ... اذا مايبي يغير نفسه قال انا مو كامل ..
اي محد كامل .. وانا ماطلبتك تغير من اشياء اساسية فيك .. بس
تجرد من برودك .. حسسني بغلاتي.. عبر عن حبك لي ..عاتبني
صارخ علي اذا غلطت قول اي شي بس خليني احس بقيمتي عندك
ناصر: تدرين عاد؟ من يوم اني صغير واهلي زرعو فيني القسوة
انا الولد الوحيد بين اربع بنات ... دايم يقولون لي انت الكبير ...
وانت الرجال لاتبكي ... تعودت اكبت كل مشاعري ... ما اصرح

بشي لا حزن ولا فرح.. كنت اذا احد طقني ولا متهاوش مع عيال
بالمدرسة وجيت اشتكي لابوي... يقول لاتصيح عيب الرجال
مايصيح ..
ندى:وهذا اللي خلاك تعاملني بهالبرود.. بس انت تقدر تتغير حاول
ماراح تخسر شي..
ناصر: ندى والله اوقات ابي اعبر لك عن اللي بخاطري بس ما اعرف
شلون... ولا رتبت الكلمات وجيت اقولها احس اني مصطنع ..
ندى: كلامك اللي تبي تقوله وتترد طالع من قلبك؟
ناصر: اكيد
ندى: زين قوله .. مايهم شلون تقوله المهم اني اسمعه .. واحسه..
فيض من مشاعر.. وكلمات عتاب ولوم..وحب مدفون يبحث عن وطن له
قلوب يجمعها عشق ... ومحاولات لاذابة برود يغلف مشاعرهم ...
يومين جمعتهم.. بعيد عن هالكون كله .. عالم بس لهم اثنينهم
والحياة مهما استمرت لابد من التجديد ..







*********************************






قاعدة تعدل شعرها وهي ماسكة مرايتها الصغيرة بيدها: اوووف
اختبار اليوم مرة صعب والله مادري انا وش هببت فيه
شهد: بالعكس الاسئلة كلها معروفة بس يمكن محتاجة تفكير
عبير:مادري احس اني ماحليت
شهد: عادي هذا مو اختبار نهائي يعني عندك فرصة تعوضين
عبير حطت المراية بالشنطة والتفتت لشهد : شهودة
شهد: هلا
عبير: كيف خالد معاكِ؟
شهد: شلون يعني؟
عبير: مذاكرتك؟ يتضايق يعني
شهد: شوفي الجد عشان ما اظلمه اذا شافني اذاكر يناديني اكون
عنده .. يقعد هو يخلص اشغاله على النت بس اهم شي اكون
جنبه ... اوقات يحارشني واقوم عنه واوقات بصراحة يخليني
على راحتي
عبير: يعني مايقول لك انك مقصرة معاه؟
شهد: لا ابد هو عارف انها هالسنتين وبعدها كل شي يرجع
طبيعي.. ليش فهد قايل لك شي؟
عبير: كثير والله ... لدرجة اني صرت ما اذاكر وهو موجود
حتى النوم ماعاد اعرفه .. لازم اشوفه واشوف طلباته وما اقول
له لا او مرهقة .. ولا اتهمني بالتقصير
شهد: عبورة لاتصيرين سلبية ..مثل ما انتي تراعينه المفروض
هو بعد يراعيك..
عبير:البارح زعل عليه ..انتي شايفة المنهج كيف طويل وصعب
ولما تأخرت عليه وماجيت له زعل مني...
شهد: بصراحة مو من حقه ابد
عبير: والله اني تركت اللي في يدي ورحت راضيته .... وقعدت
معاه لحد مانام .. وقمت اذاكر بعدها
شهد: عشان كذا ماحليتي؟
عبير: امممم تقريبا ... مادري احس انه مايبغاني انشغل عنه بأي
حاجة
شهد: ولا انشغل عنك هو شلون؟
عبير: عادي والله عمري ماقلت له حاجة ..كل انسان وله ظروفه
ومشاغله
شهد: وليش ماتفهمينه هالشي
عبير: ماراح يرضى يفهم
شهد:ياحلوة هو متزوجك وهو عارف الوضع كله ...ليش الحين
اللي صار عنده اعتراض ..انتبهي لدراستك ولا تضيعينها ...
تعب السنوات اللي فاتت لاتخلينه يروح هدر.. كلها سنة ونتخرج
ونحقق الحلم اللي من واحنا صغار نحلم فيه...
سكتت عبير وماعلقت وكلام شهد يدور براسها...حبها لفهد مخليها
تتنازل كثير.. بس لازم تنتبه لدراستها هالشي اللي مستحيل تتنازل
عنه..







*************************






جالسة مع امها وكلها خوف وتوتر ومو عارفة شلون تصيغ
كلامها وتخفف الصدمة عليها ..رتبت كلامها : يمه اول شي
ابيك تعرفين ان كل شي صاير غصب عني... وانا جربت
كل الحلول ومابقى قدامي الا هالحل الوحيد
ام ناصر وكأنها حست باللي راح تقوله بنتها ... هي شافتها
من اول يوم جاتهم فيه وهو مبين عليها الحزن.... مبين انه
مشغول بالها .. وبداخلها دعت ربها يكون احساسها كذب..
ومايطلع اللي توقعته صح: قولي انا راح اسمعك للآخر..
الجوهرة: يمه انا ابي اتطلق
شهقت ام ناصر من هول الكلمة : وشو؟
الجوهرة: يمه انا طلبتك تفهميني .. انا وياسر مانصلح لبعض
ام ناصر: وش اللي صاير يعني؟ مشاكل ؟ كل البيوت فيها
مشاكل ومافي بيت خالي منها ...
الجوهرة: يمه اللي صاير اكبر من اللي تتوقعونه ...
ام ناصر : زين قولي وش اللي صاير ... يمكن اقدر اساعدك
انا وخالتك ماراح نسكت عن هالوضع كله...
الجوهرة: اللي صاير هو اللي يقوله اذا يبي ... انا ماراح اتكلم
الحين..
ام ناصر : انا اتصل فيه الحين يجي واتفاهم معاكم
الجوهرة: لا يمه اقعدي معاه بلحالك انا مانيب قاعدة معكم
ام ناصر:هذا لاصار بكيفك الدعوة فيها طلاق وبتقعدين تتشرطين
الجوهرة: يمه انا ماتشرطت ,,, وسكتت يوم شافت امها تكلم
ياسر..
ام ناصر: هذا هو جاي بالطريق
الجوهرة: امداه بهالسرعة؟
ام ناصر: اي قال لي انه قريب..بروح اكلم ابوك
الجوهرة تمسك يد امها: يمه لا تكفين ابوي لا
ام ناصر: شلون لا؟ تبين تتطلقين وماتبين ابوك يعرف
الجوهرة حست نفسها غبية وسكتت..ماتدري ليش تحس قلبها
عورها... دقايق عدت عليها ماتدري وش كثر كانت ...
سمعت اصوات برا ..طلت من الشباك وشافته يسلم على امها
وابوها ... وعقبها دخل ...خافت هالمرة جد .. هي صح تبي
الطلاق بس ليش يوم حست الدعوة صارت جد بدت تخاف
وتتردد ..
جتها اماني تقول لها امها ابوها يبونها تحت ارتبكت والحرارة
سرت بكل جسمها ...ذكرت ربها ودعته يهونها عليها ...
ونزلت بخطوات ثقيلة.. دخلت عليهم المجلس سلمت وقعدت
بدون حتى ماتناظر في ياسر ..اللي مانزل عينه عنها من دخلت
نقاش كبير صار بينهم ... ملايين الاسئلة ترددت واكتفت هي
باجابات مختصرة وتاركته هو يجاوب على اهم الاسئلة لانها
تشوف انه هو المسئول عن هاللي يصير اليوم ...
ابو ناصر: الحين احنا جامعينكم عشان كل واحد يرمي السؤال
على غيره.. وش اللي يخليكم تبون تنفصلون؟
الجوهرة: انا عاهدته اني ما اقول السبب لاحد هو اللي لازم
يجاوب ..
ياسر بعد تردد كبير فجر المفاجأة: انا متزوج
ام ناصر: ندري انك متزوج اجل وشو؟
ياسر: متزوج وحدة من 4 سنوات
ابو ناصر بحكمة الرجل الكبير: اهلك يعرفون؟
ياسر: لا للحين ماقلت لهم
ابو ناصر: ومتى ناوي تقول لهم
ياسر: ان شاء الله اليوم او بهاليومين
ابو ناصر بحكمة بالغة: ياسر انا زوجتك بنتي لاني كنت اشوف
انك رجال والنعم فيك ..بس انك تشتغل مثل الحريم وتدسدس
هالسوالف من ورانا ... بقول لك روح والله يستر عليك مالك احد
عندنا..
ياسر: بس يا ابو ناصر انا ابيها ..
ابو ناصر: انت بديت معانا بالكذب ... شلون تبيني آمن بنتي مع
واحد خان اهله وناسه
ياسر يناظر الجوهرة يبيها تتكلم بس هي ماعلقت ..
ام ناصر: تبي بنتي ترجع لك طلق زوجتك
ياسر: الجوهرة ما اعترضت بالاول
الجوهرة: وانا ماعندي كلام بعد كلام اهلي...
ياسر انصدم من هالكلام هو جاي ومتوقع ان ازمته بتنحل ..اول
ماقعد معاهم وعدوه انهم يصلحون بينهم ... بس من عرفو بسالفة
زواجه هم بعد رفضوه ... حتى خالته ماوقفت معاه .. او على
الاقل تفهمت موقفه ..







*******************************






قاعدين بالصالة يسولفون ... وهي تصب قهوة لخالتها ..
ام فهد: هالحين ملكة بنات عمك متى؟
عبير : بعد بكرة ان شاء الله
ام فهد: الله يوفقهم .. والله ماظنتي اروح
عبير: ليه ياخالة تعبانة؟
ام فهد: والله ماعاد اتحمل الطقطة والازعاج ومثلتس عارفة
اني عقب ما اصلي العشا انوم..
عبير: طيب اللي يريحك ...بس ياخالة كلميهم واعتذري لانهم
وصوني اعزمك
ام فهد: ولا يهمتس وانا امتس .. هالعلوم مانيب مقصرة فيها
باتسر ان الله عطانا عمر بكلم ام ناصر واستسمح منها..
عبير: الله يطول في عمرك يارب
ام فهد: الله يطول عمري على طاعته .. واشوف عيالكم قبل ما
اموت
عبير:ان شاء الله يارب..شوفيه أذن العشا من اول بروح افرش
سجادتك بعدين اجي اوديك تتوضين
ام فهد: الله يوفقتس وينور دربتس وين ماتروحين
راحت عبير وهي تأمن على هالدعوة اللي تملاها فرح..فرشت
السجادة لام فهد .. ورجعت لخالتها مسكتها من يدها وقومتها ..
وصارت ساندتها توديها توضى للصلاة...: تبغين حاجة قبل
ما اروح؟
ام فهد: سلامتس يمه ...فهد وينه ماجا؟
عبير: لا لسى ... مادري ليه تأخر
ام فهد: بيجي ان شاء الله..
وطلعت عبير هي بعد تصلي...جلست تلخص مناهجها قبل
مايجي فهد ... انهمكت في دروسها وماحست بالوقت ولا اي
شي حولها .. فجأة ناظرت ساعتها وشافتها تعدت الـ11 وفهد
للحين ماجا ... خافت عليه واتصلت تشوف وينه...اول مرة
مارد...رجعت اتصلت مرة ثانية ورد بعد كذا رنة: حبيبي
فينك؟
فهد: تو تفقديني؟
عبير: ماحسيت والله بالوقت
فهد: تذاكرين صح؟
عبير: ايوا ومادري كيف عدى الوقت..وش الاصوات هذي
اللي عندك؟
فهد: لاجيت اعلمك
عبير: متى جاي طيب؟
فهد: متى مامليت رجعت
عبير: بس فهد
فهد: ولا بس ولا شي بدون ازعاج رجاءً.. يالله مع السلامة
عبير تطالع جوالها مستغربة من تغير مزاج فهد اليوم طلع
من عندها عادي ... مافي شي معكره مزاجه ... تعوذت من
الشيطان وسكرت اللي قدامها ...لمت اوراقها وكتبها وودتهم
لمكتبها ... تسبحت وبدلت ... صلت ركعتين ودعت ربها
ييسر امورها ...
دقايق انتظار مرت عليها مملة .. على الساعة 1 الا ربع جا
فهد بكل برود دخل بدون حتى مايسلم.. : ماشاء الله سهرانة
عبير: استناك
فهد: وانا قلت لك انتظريني؟
عبير: حبيبي شفيك اليوم؟
فهد: مافيني شي والله
عبير: لا تحلف ... انت فيك شي من يوم ماكلمتك وانا حاسة
انه فيك حاجة
فهد: حلو .. تحسين فيني يعني
قربت عبير منه : احد مزعلك؟
فهد: انا ما ازعل الا من اللي يهمني
عبير: مين يعني؟
فهد: في احد بالدنيا يهمني كثرك
عبير: وانا بايش زعلتك؟ والله العظيم اني اقدمك حتى على
نفسي.. حتى كليتي كرهتها .. من كثر مشاكلنا عشانها ..
فهد: اسألي نفسك
عبير بصوت اعلى من العادي: وانا سألتك انت
فهد: لا ترفعين صوتك علي لاقص لسانك
عبير بدت دموعها تنزل: حبيبي والله مارفعت صوتي عليك
بس انت صاير تشتكي من كل حاجة ... تبغاني طول الوقت
اقابلك ولو بعدت بس دقيقة قلب مزاجك عليه واعتبرتني
مقصرة في حقوقك
فهد: وانتي شايفة انك مو مقصرة
عبير:والله عمري ما قصدت اني اقصر معاك .. ممكن اوقات
اقصر بس بدون ما احس
فهد: محد يغلط وهو قاصد ولا كان كل مشاكل هالعالم انحلت
عبير: يعني كيف؟
فهد: يعني خليني انام وبكرة يحلها الف حلال
عبير: حبيبي... انت تعرف اني ما احبك تنام وانت زعلان
مني
فهد: مانيب زعلان اصلا ... هي ضيقة وتروح لاتشيلين
هم انتي
عبير: والله؟
ابتسم لها على مضض: والله ... بس بديني على العالم وبكون
اسعد انسان بالدنيا ..
عبير: ان شاء الله... وانت كمان قدر وضعي شوية اختباراتي
بعد شهر.. ومحتاجة اركز شوي
فهد: والله اني احبك ... بس تقهريني اوقات وتنرفزيني ..
عبير: طيب فين كنت؟
فهد: طالع مع العيال كوفي..
عبير: كأنه كان في صوت اطفال
فهد: اي طلعت اكلمك برا الكوفي ... وقربها له ومسح دموعها
اللي نزلت : لاعاد تصيحين مرة ثانية مو حلوة الدموع عليك
عبير: انت لاتقسى عليه وانا ماراح ابكي
قربها اكثر وحبها بخدودها ... و بكل مكان بوجهها ..وتصافت
القلوب بعد ان كاد الشيطان يكبر الخلاف بينهم ... بس الحب
اللي بقلوبهم اكبر من اي شي ثاني ... والحمدلله عدت هالليلة
على خير...






*************************

*********************







هــــــــذا انا من جديد ... اسمعني للآخر
الشوق كل لحظة يزيد ... و الله مو قـادر
لــــولاه ما جيتك ذليل...مشيت لك دربي الطويل
اكذب على نفسي بأمل ... رغم اني ادري مستحيل

ادري اتفقــــنا نفترق ... ادري وصــــلنا للنهاية
صدقني قلبي ينحرق ... اعذرني اشقيتك معايه
بس مالي في الدنيا سواك...انت اللي احلامي معاك
وانت اللي ضيعني هواك....و اللي بيننا ما هو قليل

خــــلاص ناوي تبتعد ... يا حيلة الله وش بيديني
خلاص وش باقي بعد ... يا كـود لو ترحم حنيني
احتاجك الليلة معـــــــاي...عطني يدك ثبت خطــاي
لملمني و اوصف لي دواي...و من بعدها ابدا الرحيل


بكرة ملكة خواتها وهي قاعدة بغرفتها ضايق خلقها ونفسيتها
تعبانة ... من عرفو اهل ياسر كبرت المشاكل ..واللي عرفته
انه صار خلاف كبير بين ياسر وابوه ... وطلع ياسر من البيت
ومايدرون وين راح له ...
خايفة عليه وودها تتصل تتطمن بس ... ولكن بآخر لحظة
تتردد ... ليش تتصل وهي قايلة انها ماتبيه ...
سمعت صوت دقات خفيفة على الباب : مين؟
مشاعل فتحت الباب وطلت عليها براسها: الحلو نايم؟
الجوهرة: لا والله ماجاني نوم
مشاعل: تعالي اقعدي معانا
الجوهرة: والله مالي خلق ميشو
مشاعل: نهون عليك يعني.. بليلة فرحتنا وماتشاركينا؟
الجوهرة كسرت خاطرها مشاعل هي ماعمرها كانت بهالاناينة
دايم تهتم بغيرها اكثر من نفسها ..ابتسمت لها من قلب: لا والله
ماتهونون علي...يلا نزلنا تحت..
ونزلو قعدت مع خواتها وندى...وضحكهم ملى الصالة ..يخططون
بكرة شلون يعيشون لحظاتهم الحلوة..وقامت الجوهرة رايحة
للمطبخ...:بروح اجيب تشيبسات وبسوي معاهم صوص
اماني راحت ركض:وانا بجيب البيبسي
ضبطو لهم صوص مع التشيبس وحطوه بالصحون وراحو للبنات
بالصالة..
ندى: بالاول اماني ومشعل وعقب مشاعل وفيصل
الجوهرة: ياحظكم بتعيشون هالشعور الحلو ... حسرة علي انا اللي
ماحسيت لا بفرحة ملكة ولا فرحة عرس
مشاعل: لاتتحسفين على شي فات تراه مايستاهلك والله ولا يستاهل
دمعة تنزل من عينك عشانه..
الجوهرة: لاتظلمونه محد عاش معاه غيري .. من تزوجنا ماغلط
علي الا مرة وحدة .. حتى يوم زعلت حلف مايلمسني الا برضاي
انا ما الومه هو ماحبني ... يمكن طريقة زواجنا كانت انانية منه
بس الصدق ماقصر معاي ابد
اماني: جوجو لاتقعدين تبررين له...
الجوهرة: انا مابررت له انا اقول الحق
ندى: الحق انك تحبينه ...ولانك تحبينه ماتشوفين عيوبه
الجوهرة: لا ما احبه بس تعودت عليه
ندى: على مين تنصبين؟ واللي يصير هذا كله وشو؟
الجوهرة: خايفة من المجتمع لاصرت مطلقة
اماني: المجتمع والمجتمع ... ليش المجتمع يظلم البنت .. ولا
الرجال يطلق ويتزوج ويقولون مايعيبه شي..
ندى: انا قلت لك انتي تحبينه ليش تنكرين هالشي... وهو بعد
يحبك
الجوهرة: مايحبني .. والله يحبها هي
ندى:وانتي اخترتي الطلاق لانك ماتبين تخيرينه ويختارها صح؟
الجوهرة: ايه... وناظرت جوالها وماصدقت عيونها وهي تشوف
الرقم.. انسحبت من الصالة ورقت لغرفتها .. وانتظرته يرجع
يتصل مرة ثانية ..
بهالوقت البنات بالصالة ... قعدو يعلقون عليها ..
ندى: وتقول ما احبه .. ومن يوم اتصل حتى ما استأذنت منا
اماني: يارب تصلح قلوبهم .. وتهدي ياسر ويطلق هالغبية اللي
متزوجها
الكل: آمين
اما هي انتظرت .. وانتظرت بعد.. قررت تنتظر 5 دقايق لو
ما اتصل راح تتصل هي عليه ..شوي الا هو راجع يتصل
ردت بكل هدوء: الو
ياسر: هلا والله
الجوهرة: هلا بك
ياسر: شلونك؟
الجوهرة: بخير.. انت شلونك؟
ياسر: بخير من سمعت صوتك .. تصدقين ماتوقعت تردين
الجوهرة : انا رديت بشوف وش عندك
ياسر: اللي عندي ابيك
الجوهرة: ياسر انت ليش مصعبها ... انا ماراح اطلع عن شور
ابوي وامي
ياسر: وعادي تطلعين عن شور زوجك؟
الجوهرة: وانت عمرك حسستني اني متزوجة .. من اول
ماتزوجنا وانت قايلها لي ... لك حياتك ولي حياتي
ياسر: بس حبيتك .. وهذا شي مو بيدي
الجوهرة: مانجتمع بقلبك انا وجمانة
ياسر: جوجو لاتصعبينها علي... والله العظيم صعب اللي
تطلبونه مني
الجوهرة:صدقني مو صعبة بس انت اللي مصعبها على عمرك
ياسر: وانا تعبت والله..انا مسافر بعد بكرة.. طلبتك لاتتركيني
الجوهرة: وش هالتناقض اللي تعيشه..ليش تحسسني انك متمسك
فيني لهالدرجة.. وبنفس الوقت احس انك مستعد تستغني عني
عشانها
ياسر: ومن قال اني راح استغني عنك؟
الجوهرة: لا طلبتك تطلقني ماراح تطاوعها؟
ياسر: مستحيل .. انا حر بقراراتي ومستحيل احد يفرض علي
شي .. ووجودك بحياتي اهم من اني اخلي اي شخص يتدخل
فيه..
الجوهرة: لاتكذب علي اكثر.. تقول لي شي واشوف شي ثاني
وانا مليت من هالحياة
ياسر: والله كنت مستعد اعيش معاك مثل اي اثنين متزوجين
بس انتي ماتبين وانا وعدتك وبقيت على وعدي ... لا تظنين
اني مالي رغبة فيك ... وربي اوقات كنت احس اني ما اقدر
اقاوم رغبتي فيك واطلع من عندك لاني مابي اخون وعدي لك
الجوهرة: ياسر ارجوك
ياسر: انا اللي ارجوك تسمعيني... انا محتاجك والله محتاجك
الجوهرة: احتجت لك قبل ومالقيتك
ياسر: لا تصيرين قاسية .. مو هذا طبعك
الجوهرة: الزمن علمني اقسى .. ياسر ماعندي كلام غير اللي
قلته لاتقول ولا تعيد ولاتزود فوق همي هم ..
ياسر: هذا آخر كلام عندك؟
الجوهرة: آخر كلام اني ابي ورقتي
ياسر: خوذي وقتك وفكري يمكن مع الايام يتغير كلامك..
مع السلامة
الجوهرة: فمان الله
سكرت منه ,,, وطاحت على سريرها منهارة.. كل القوة اللي
تسلحت فيها نزعتها ,,, وبكت بكل ضعف انثوي ,, بكت
مثل الطفل اللي خذو منه شي يغليه ... هم بعد خذو منها ياسر
ولو حاولت ترجع له...ابوها ماراح يخليها ..ليه الزمن مارحمها
تمسي على هم وتصبح على هم غيره ...مسحت دموعها وتعوذت
من الشيطان ونامت ...وعساها تتبدل الاحوال من بكرة







*************************************






ببيت ابو ناصر اليوم الفرح غير... اليوم ملكة ثنتين من بناته
وان شاء الله ربي يوفقهم ويسعدون امهم وابوهم اللي ماشافو
الفرح بزواجات بناتهم ملاك والجوهرة... ملاك اللي توفت بعز
شبابها والجوهرة اللي ماكملت سنة مع زوجها والحين عندهم
بالبيت طالبة الطلاق ..
تجمعو الاهل من بدري والعرايس باحلى كشخة ..كل وحدة تقول
الزين عندي...تمت الملكة وبدت مراسم الفرح ...
اماني اللي كانت لابسة فستان ذهبي ناعم انزفت بالاول ...كان
مكياجها صيفي حلو الوانه تتدرج بين الترابي والبني والذهبي
طالع شكلها حلو ..مشت بخطوات خجولة لحد ماوصلت الكوشة
اللي مسوينها للعرايس .. قعدت وهي مبتسمة والبنات حولها ومو
مخلينها تحس بأي احراج وخوات فيصل ومشعل فرح ونهى
وام مشعل يباركون للعروس ... وام ناصر تسمي وتقرا على
بناتها .. اليوم فرحتها فرحتين ...الجوهرة اليوم تناست حزنها نوعا
ما وعاشت اجواء الفرح مع خواتها ...يمكن لانها اكبرهم حست
بأنها مسئولة عنهم وتبيهم يطلعون بأحلى صورة ..:امونة ابتسمي
ورزي عمرك لاتحنين ظهرك
اماني: زين
الجوهرة: بروح البس عباتي قبل يدخل مشعل .. لاترتبكين ولا
تضيعين فرحتك بخوفك ..
اماني: الحين بيدخل؟
الجوهرة: اي تو فرح تقول لي ... وارفعي راسك اذا ماتقدرين
تناظرين فيه ناظري فيني ...
فرح: الجوهرة يلا مشعل بيدخل
الجوهرة: زين يلا ..
لبست عباتها وتغطت .. وقعدت باول طاولة قدام .. والعريس زفوه
خواته وامه ودخلوه على اماني ..اول ماشافها سلم عليها وبارك لها
طبعا هذي اول مرة يشوفها .. لا هو ولا فيصل طلبو نظرة شرعية
عجبته نعومتها اول ماشافها قعد جنبها ... ومسك يدها وهي صارت
ترتجف من خجلها بس تحاول تبتسم ..دقايق معدودة مرت عليهم
فرح وتبريكات وتهاني بهالليلة السعيدة ..لبسها الدبلة وطقم الشبكة
قعدو شوي ,,, بعدها قام هو وياها رايحين لمجلس الحريم اللي
مخلينه فاضي لهم ...
شوي نزلت مشاعل ..اللي كانت لابسة فستان عنابي ملكي .. وحاطه
ميك اب درجات الوردي الفاتح ..وجلست بنفس الكرسي اللي كانت
قاعدة فيه اماني ... ونفس المراسم اللي بالاول صارت بعد هالحين
مع اختلاف الاشخاص ..وقامت هي ووياه لمجلس الرجال الداخلي
عند البنات كملو رقص ووناسة ... الين رجعو العرايس جلسو معاهم
وبعدها بدو يروحون المعازيم ومابقى الا بيت عمهم عبدالعزيز وبيت

خالتهم ام ياسر..
مشاعل : طقمي انا احلى صح؟
اماني التفتت لها : الحمدلله والشكر وانتي هذا همك؟
مشاعل: لا بس انتي كأنه كبير شوي
الجوهرة: شلون يعني بتتهاوشون؟
فاتن: مملكين بليلة وحدة يعني لازم المقارنات .. يلا مبروك يابنات
عقبال ليلة عرسكم ان شاء الله
اماني: رايحة؟
فاتن: اي والله عيالي لازم اشوفهم اول مرة اغيب عنهم هالمدة كلها
الجوهرة: آخر من جا انتي
فاتن: والله ماهان علي اخليهم من بدري
اماني: خلاص ياقلبي روحي وانتي معذورة
فاتن: الله يسعدكم يارب
ندى: جوجو روحي جيبي لنا صحن حلى من الثلاجة فيه صحون
محد فتحهم..
الجوهرة: فيه قهوة؟
ندى: اي فيه .. خلونا نجلس ونسولف من اول محتاسين بهالملكة
عبير: مو ناقصنا الا اريج والله
ندى: اي ياقلبي عليها خليها ترتاح ,,,والتفتت على مشاعل واماني
يلا بسرعة كل وحدة تسولف وش انطباعها ؟ وش صار؟ كل شي
اماني: والله مادري حسيت اني مرتاحة .. وهو ماسولف كثير احسه
هو بعد خجول يعني حسيته مستحي ومرتبك من الموقف
عبير: طيب هذي اول مرة يشوفك ويجلس معاكِ فيها
اماني: اي عادي انا ماقلت شي اقول انطباعي عنه
ندى: يعني تحسين انك حبيتيه؟
اماني: حب من اول يوم ؟ لا توني.. اهم شي اني مرتاحة
عبير: استني لاتكملين بروح اجيب القهوة مع جوجو
وراحت ركض للمطبخ...جابت الحلى والجوهرة لحقتها بالقهوة
وطلعو للبنات ...
الجوهرة: بنات تعالو نقعد على الارض احسن
مشاعل: صاحية انتي شلون اقعد بفستاني؟
الجوهرة: عادي فستانك مو واسع مرة...والله احلى تكون الجلسة
اقرب
تجمعو البنات وقعدو على الارض وقعدو يسولفون
الجوهرة: هااه ميشو عجبك العريس؟
مشاعل: اي الحمدلله
شهد: ليش كنتي معترضة قبل؟
مشاعل: لا كنت ابي اشوفه بس ابوي رفض.. يقول مادام
هو ماطلب مو لازم تشوفينه بالملكة..
الجوهرة: وهو صادق بعدين صدقيني اهم شي يكون شكله مقبول
ويكون هو شاريك ..
مشاعل: لا الحمدلله ارتحت كثير يوم شفته ...
عبير: يلا يابنات انا طالعة ... فهد ينادي
الجوهرة:وجع كل شوي وحدة رايحة ترى تونا ماجلسنا مع بعض
عبير: هههههههههههه طيب لاتعصبين عليه
شهد: اجل كيف لو اقول لك اني انا بعد رايحة
الجوهرة: بقلعتكم تبون اترجاكم
شهد: هههههههههههه والله من جد معصبة ... سلمو عليهم البنات
وطلعو ... والعرايس راحو لغرفهم يبدلون .. وندى راحت تشوف
ولدها وزوجها .. والجوهرة ... فصخت ثوب السعادة اللي لبسته
مؤقتا ورجعت لهمها وحزنها اللي سكنها من تزوجت ياسر...






*************************






بعد اسبوعين من الملكة ... يوم الاربعاء رايحين للمزرعة بيقعدون
فيها الى يوم الجمعة...طلعو اغلب العوايل من الصباح اللي استأذنو
من دوامتهم.. واللي غابو عن مدارسهم... ماعدا عبير وشهد اللي
ماقدرو يتركون الكلية هاليوم بيختمون المناهج قبل الاختبارات اللي
راح تبدا بعد اسبوعين ...اول ماوصلو المزرعة صارت حالة استنفار
الشغالات ينظفون المجالس والمطبخ والصالات .. والبنات ينظفون
الغرف .. يعني تنظيف بسيط عشان اذا فيه غبار او شي ...
غادة: ريمو .. بزر انتي اقعدي خليني ارتب اغراضكم
ريم: ماما جوعانة ابي افطر
غادة: انا حاطة لك الفطور قبل نمشي وتقولين ما اشتهي
ريم: كنت توني صاحية
غادة: زين شوي وانزل اسوي لك شي تاكلينه
ريمو : ارتب معاك؟
غادة: لا ياعمري ارتاحي اعرفك بتحوسين لي الدنيا
اريج: محتاجين مساعدة؟
غادة: من قلب؟
اريج: اللي تامرين فيه انتي
غادة: ريمو جوعانة ... شوفي لها شي تاكله
اريج: زين ... تعالي ريمو
ونزلو اريج وريم للمطبخ تشوف وش تسوي لها : ريمو تبين
ادهن لك التوست بجبن؟
ريم: اي عادي وحطي معاه خيار
اريج: والله حركات تفهم البنت
ريم: اي ماما دايم تسوي لي
اريج: تدرين عاد تعالي ساعديني بسوي كثير واللي يبي ياكل
معانا حياه
ريم: طيب .. بس وش اسوي؟
اريج: اول شي روحي غسلي يدك ... بعدين تعالي ادهني الخبز
بجبن بس لاتكثرينه .. وانا بقطع الخيار شرايح واحطهم
ركضت ريم للمغسلة تغسل يدينها .. ونشفتهم ورجعت .. قعدت
على الكرسي وصارت تدهن الخبز: كذا عمتو؟
اريج: اي ياقلب عمتو
سوو مجموعة كبيرة من الساندويتشات .. حطتهم اريج بصحن
وصبت لها ولريم عصير برتقال وطلعت للصالة..: يلاااا اللي
يبي يفطر يجي
الجوهرة: ياااعمري وش هالزين .. مسوية فطور صحي ماشاء
الله
اريج: اي وش عرفكم انتم بس
ندى: ليش ماجبتي لنا عصير ؟
اريج: اقول ماتنعطون وجه انتم روحي جيبي لنفسك كثر الله
خيري اللي مسوية كل هذا
ريم: ههههههههه كان سوينا لي انا وانتي بس
اريج تبوس ريم من خدها: حتى الصغار يقدرون وانتو ماقدرتو ..
اماني : خلاص انا بروح اجيب العصير
غادة وهي نازلة من فوق : ماشاء الله مجتمعين وماتنادوني
اريج: تعالي الخير واجد
غادة: ههههههههههههه مسويته نفس اللي تحبه ريمو
اريج: اي هي علمتني
غادة: بروح انادي محمد بعد يحبه
ندى: فشيلة لمى بعد نادوها
اريج: روحي انتي انا استحي منها .. للحين ماتعودت عليها
ندى: خلي اذا جات غادة تناديها
الجوهرة: لا والله روحو انتو احسن حسسوها انها منكم
اريج: قولتك؟
الجوهرة: اي والله
اريج: زين .. وقامت تناديها ..
راحت شافت الحريم جالسين يسولفون : ماشاء الله على طول طفح
ماعندكم وقت؟
ام تركي : هههههههههههههه الله يقطع سوالفك شاهي الضحى لابد
منه
اريج: لمو
لمى: سمي
اريج: تعالي افطري معانا
ام تركي: من اللي يطفح الحين
اريج: ههههههههههههه
لمى: تسلمين والله افطرت من اول
اريج راحت وسحبتها بدفاشتها المعهودة يقال لها بتقط الميانة مرة
وحدة: تعالي بس مسوية تتغلين.. اقعدي معنا وش تبين بالعجز
ام تركي: عجز ياقليلة الخاتمة
اريج: امزح يمه هههههههههههه والله امزح
وطلعت هي ولمى رايحين للبنات ...قعدو معاهم يفطرون ويسولفون
ندى: نسينا فتون .. وربي لتذبحنا
غادة: لا ماعليك فتون مع بلابلها ماتشوف احد اصلا
ندى: الله يخليهم لها
اريج: طالعو الحبيبة هذي من وصلنا وجوالها باذنها
مشاعل تلفت عليهم وتأشر على نفسها يعني تقصديني
اريج: لا اللي وراك ايه انتي قفلي ياختي خلي الرجال يداوم واقعدي
معانا...
مشاعل قامت بعدت عنهم شوي وبعد ماسكرت رجعت لهم: وجع
فشلتيني
اريج: احسن
اماني: تطاقو الحين من يفكهم
الجوهرة: اول محد يقدر على اروج الا انا .. الحين صارت ميشو
خليفتي
اريج: اي انتي ماش من خذيتي ياسر وانتي ماعادك الاوله
الجوهرة من سمعت اسمه تغيرت تعابير وجهها .. وتحولت لعبوس
مفاجيء
غادة: لازم تذكرينها يعني؟
الجوهرة: وانا نسيت اصلا عشان اذكر ,,, بس الله يصبرني
اريج: ياشيخة عيشي حياتك محد بيموت قبل يومه .. اذا يحبك هو
بيسوي لك اللي تبينه .. واذا باعك واختارها والله انه مايستاهلك ولا
يستاهل دمعة وحدة تنزل من عينك ..
مشاعل : والله اني دايم اقول لها هالكلام
ندى: الحين وش بيسوون غدا؟
اماني: ههههههههههههه هذي ماهمها الا بطنها تفطر وتسأل عن الغدا
ندى: هههههههههههه لا وجع اقصد بيطبخون الذبايح على الغدا ولا
بيخلونها عشا
غادة: الظاهر انه عشا ..امي مضاوي وفهد وخالد توهم ماجو ..واهلي
بعد وخالتي هيا مو جايين الا بالليل ...
اريج: لمو
لمى: هلا
اريج: خلاك ماجد تغيبين اليوم
لمى: لا اصلا انا ادرس صفوف مبكرة ومخلصين الدروس وماعندنا
شي ومن يوم قال لي قلت اغيب احسن
غادة: شلون جنو معاك؟
لمى: البنت عسل والله بس احسها ماتحب تختلط باحد وتحب تلعب
لحالها يعني اوقات اجي الاعبها ... احسها ماتنسجم في اللعب معاي
اريج: هي كذا بالاول .. هي تعودت .. ماتحب تلعب مع احد لانها
اول قعدت ببيت اهل امها وماعندهم اطفال بالبيت ..
لمى: لا ان شاء الله بطلعها من عزلتها .. ماشاء الله خواتي اطفالهم
كثير وبعودها تلعب معاهم ..الطفل تتكون شخصيته بسنواته الاولى
ولازم ننتبه لها من الاول قبل ماتكبر وتصير مشكلة اكبر من اننا
نقدر نحلها..
ابتسامة رضى علت وجوه الجميع .. كل خوفهم كان على جنى ..
ومن كلام لمى اليوم مبين انها خايفة عليها .. ومادامها تخاف الله
وتعرفه زين ... اكيد ماراح تظلم بنت زوجها معاها ..







*******************************






في محاضرتهم الساعة 4 جالسين وزهقو من هالدكتورة اللي صار لها
ساعة تهذر ونفس الكلام تعيده ...
شهد: ماتحسين انها متعمدة تأخرنا؟
عبير ابتسمت وبصوت ضعيف:اسكتي بس لاتسمعك والله فهد جنني
اتصالات
شهد: هههههه وخالد بعد
البنات صارو يتأففون..وكل وحدة تناظر ساعتها...والدكتورة فتحت
لهم محاضرة ثانية عن احترام اللي قدامهم وانه عيب يناظرون الساعة
واللي قدامهم يتكلم ..
وماصدقو بس متى قالت لهم اشوفكم على الاختبارات وبالتوفيق ومن
هالكلام اللي دايم يعيدونه ويكررونه..طلعو البنات وعبير وشهد ركض
يلبسون عباياتهم ويطلعون للي ينتظرونهم برا ...
طلعو وشافو سيارة خالد جنب سيارة فهد .. وكل وحدة راحت لسيارة
رجلها ...
شهد اول ماركبت السيارة: السلام عليكم
خالد: وعليكم السلام
شهد: آسفة والله حبيبي الدكتورة لطعتنا وعيا يخلص كلامها
خالد: لا عادي ياقلبي.. تبين نمر البيت ولا نمشي لهم << احلى مافيه
بروده في مواقف زي كذا
شهد: لا خلنا نروح البيت بتسبح ونمشي عقبها .. انت خالص؟
خالد: اي ماعندي الا انتظرك
شهد: يعني الاغراض معاك؟
خالد: اي اللي مجهزتهم خذتهم كلهم قلت يمكن تبين نمشي على طول
شهد: تدري عاد حبيبي والله ما اخليك تطق مشاوير وتتعب مشينا
على المزرعة اتسبح هناك .. يعني من فيه كلهم اهلي
خالد: متأكدة؟ ماراح تتراجعين عن قرارك
شهد: اكيد ولا يهمك
من جهة ثانية وبسيارة فهد من ركبت عبير حست فيه معصب بس
تعوذت من الشيطان وسلمت..
فهد: بدري كان ماطلعتي
عبير: حبيبي والله الدكتورة اخرتنا
فهد: لاتزيدين ولا كلمة تراي واصل حدي مابي اغلط عليك
عبير سكتت وماقالت ولا كلمة..كل يوم عن يوم تكتشف شي ماكانت
تعرفه بفهد ... مزاجيته وعصبيته اللي تصير من اتفه الاسباب حتى
بدون مايكون لها ذنب في اللي يصير ...
طول الطريق وهم ساكتين .. كانت متوقعة انهم بيروحون البيت
بس شافت الطريق غير: حبيبي روح البيت
فهد طنشها ومارد عليها ...
عبير بطولة بال: فهد
فهد: نعم
عبير: روح البيت باخذ اغراضي
فهد: مو لازم
عبير: كيف مو لازم يعني اروح بدون ملابس ؟
رجع فهد لبيتهم .. وارتاحت نسبيا انه ماعاندها هالمرة ... مع انه
جدا عنيد واللي براسه يسويه ...
خذت الشنطة الصغيرة اللي حاطة فيها اغراضها واغراض فهد...
راحت غسلت وبدلت .. وطلعت له ..
فهد: كان قعدتي اكثر
عبير: خالتي اخذت اغراضها
فهد: ايه
عبير: ركبت السيارة بهدوء وهي ماتبي تتنرفز منه او تعصب
وماتبي يصير مشادة مع فهد وتبكي قدام احد...
فهد: تغديتي؟
عبير: لا مالي نفس
فهد: شلون مالك نفس لازم تاكلين من الصبح على فطورك؟
عبير: خلاص اذا وصلنا اكل مع البنات
فهد: اكيد ماراح تلقين غدى .. بس حلى وخرابيط ماراح تنفعك
عبير: طيب انت تغديت؟
فهد: ايه تغدينا انا وخالد << وانقلب مزاجه وصار يسولف عادي
عبير: طيب جيب لي اي حاجة مو مشكلة
فهد: تبين من ماكدونالدز؟
عبير: فين آكل؟
فهد: ننزل تتغدين فيه
عبير: بنتأخر عليهم
فهد: لا عادي مو مشكلة
عبير: اوكي اللي يريحك ..
ونزلو لاقرب فرع لماك ... طلبت لها وجبة ماك تشيكن .. وهو
طلب له ايس كريم ... وقعدو يسولفون ...
بعد ماخلصت غدا قامو رايحين للمزرعة ...
وصلو ونزلت عبير لقسم الحريم ..:السلام عليكم
الكل: وعليكم السلام
شهد: وش هذا تأخرتو شكلكم ماخذين غفوة قبل تجون
عبير: لا والله تغدينا وبعدها مشينا ...
جلست معاهم..بعض البنات نامو عقب الغدا...وبعضهم قاعدين
مع الحريم
والشباب الاغلبية نامو لهم شوي عشان يسهرون بالليل ...




**********************


*******************************










بالليل بعد العشى فرشو لهم برا وقعدو يسولفون ... ومعاهم
القهوة والشاهي والحلى وكل ماتحتاجه مثل هالجلسة ...استمرو
بالسوالف والضحك ... شوي شوي وانسحبو الحريم ومابقى الا
البنات ...بوسط هالسوالف وصل مسج للجوهرة من قرت هالمسج
اعتفس وجهها وبانت الضيقة بملامحها ... وقامت بكل هدوء تقرا
المسج بتركيز ..



تذكرتك وانا الطير الجريح مفارق الخلان
ونار البعد وفراقك تعل اقصى شراييني..
انا ادري بك سراب ماتطفي لهفة الضميان
تذكرتك عذاب ولو نسيتك منت ناسيني..
ابي اعرف في غيابك ليه شوفي يمتلي دخان
واحس اني لحالي واقرب اصحابي حواليني...
حبيبي رحت عني وانت لاراضي ولازعلان
ياليتك قلت لي قبل الفراق انك مخليني...
رحت وغابت الفرحة ورى ليل من الحرمان
ورجعت لصوتك اللي كان يملا الكون يدعيني...
اثر نار الجفا صلفة دخيلك ياعظيم الشان
انا ماعاد لي شوف على الفرقى يقديني...
بعد فرقاك عشت الجرح عمر العاشق الشفقان
على باب العمر لامر لك طاري يبكيني...
تعرف انك بقلبي وادري انك لشوفتي ولهان
حبيبي ليه تقتل حبنا مادمت تغليني...
تخفي لوعتك عني تصد وتبدي النسيان
وتفضح نظرتك خافي حنينك لو تراعيني...
حبيبي تعبت عيوني السهر من عاشق سهران
تعبت وطال بعدك والعمر ماعاد يمديني...
غرب ضي الامل قبل الشروق وسادت الاحزان
دروب العمر تسرق فرحتي والحزن يطويني...
انا مثل الغريق وطاري الذكرى كما الطوفان
تزيد الجرح في قلبي وتبعدني وتدنيني..
تعبت ومركبي مل السفر وضاقت به الشطآن
ولالي غير حبك ساحل يمكن يرسيني...
حصدت الدمع محصول الفراق ولوعة الهجران
الا مني ذكرتك غرق كفوفي مطر عيني...
سحابك يامشاش الملح مايفرح به العطشان
اموت من الظما والا شربتك منت مجديني...
ينابيعك تفجر من عيوني كنها بركان
توطي عزتي تختال من جفني لكفيني...
بعد ماغرق عمري فالحزن ضاقت بي البلدان
وشفت الموت في كل الدروب وقلت انا ويني...
انا مليت ..مليت العذاب وقلبي المليان
بهم صاب من هجر الحبايب مقتل سنيني...
يأست من الفرح في موسم فيه الامل كسلان
رفعت الراية البيضا لحزني وارتمى فيني...
وعرفت اني بعد فوت الاوان العاشق الخسران
ودريت ان اصدق وعود الهوا ماعاد ترويني...
رجعت بحسرتي كلي جروح مكسر الجنحان
وسال الجرح دم وشفت وجهك في شراييني....


قرت المسج اللي ماصارت قادرة تشوف حروفه من دموعها اللي
ملت عيونها ( آآآهـ ياياسر .. ليش الحين توك تقول اللي بقلبك
ليه يوم كنت عندك تركتني ويوم رحت عنك تبيني ؟حرام والله
حرام اللي يصير فيني.. تعبت من هالعذاب اللي كل يوم تعيشني
فيه ... لا في قربك ارتحت .. ولا في بعدك عرفت طعم الراحة)
افكار وهواجس لعبت براسها ... وبوسط معمعة هالتفكير نامت
ومازالت دموعها راسمة لوحة على خدها ...
عند البنات اللي من قامت الجوهرة عرفو سر اعتفاس مزاجها
كانت مشاعل بتقوم وراها بس اماني جلستها : ماراح تغيرين
شي اختي واعرفها ماراح ترتاح الين تطلع كل اللي بقلبها انا
شايفتها من اليوم وحاسة انها كابتة همها بصدرها
مشاعل : الى متى يعني؟
اماني : الين الله يفرجها .. خلاص مابي احد ينتبه
سكتو وصارو يسولفون مع البنات ... وبقلبهم ملامح حزن على
اختهم الكبيرة...
لمى: شلونك مع التدريس اريج؟
اريج: لاتذكريني والله اني اعاني
لمى: ليش احد يضايقك؟
اريج: والله محد يحترمني.. البنات يحسسونك انك تشتغلين عندهم
يطلعون ويدخلون الفصل بكيفهم بدون استئذان واذا وحدة طقت
الباب تستأذن يقعدون يضحكون عليها ويقولون حكومية <<هالموقف
صار مع صديقة اختي *_*
لمى: تبين الجد حتى بالمدارس الحكومية ,,, البنات ماعاد صارو
يحترمون المدرسات.. شايفين ان اغلب الدرجات بيديهم وماعاد صار
يهمهم ..
اريج: انا ودي ادرس ابتدائي على الاقل بزران اصارخ فيهم يركدون
هذول الوحدة طولي ,, وربي اخاف اقول لها شي تطقني
مشاعل: ههههههههههههه اما اروج تخاف
اريج: وربي ماشفتي شي قويات والله
لمى: طيب اطلبي تدرسين مرحلة ابتدائية احسن لك
غادة: بالعكس انا اشوف ان تدريس الاطفال متعب
اريج: انا ادرس انجليزي يعني راح يعطوني من الصف الرابع
للسادس .. وبعدين والله اهلكوني 20 ساعة بالاسبوع .. ومافي
راحة ومناوبات وقلق والغياب مخصوم من الراتب عاد ياحسرة
لو خصمو وش يبقى هو كله 2000 ريال..
ندى: انا مدري وش اللي جابرك على هالعنا منتي محتاجة والله
اريج: والله هالألفين يساعدوني اخذ اغراض لنفسي رجلي راتبه
زين بس مابي اضغط عليه بمصاريف كثيرة ... ومنها اخذ خبرة
وهالشي يفيدني في التعيين ..
غادة: ان شاء الله ربي يعوضك بوظيفة حكومية احسن
اريج: آمين يارب
فاتن: لمى بكرة اهلك كلهم جايين؟
لمى: اي ماجد يقول ان خالي عازمهم كلهم ..
اريج: حلو بنغير ونشوف وجيه جديدة ..
ندى: اي والله وناسة...
فاتن: يلا انا بروح انام تأخر الوقت والله
اريج: اقعدو الين صلاة الفجر وعقب ننام
فاتن: صاحية انتي باقي ساعتين ونص يمديني اشبع نوم واقوم
اصلي واكمل نومي بكرة الحريم مو مخلينكم تكملون نوم ..هذا
اذا ماصحوني الوليد وربى قبلهم ..تصبحون على خير
الكل: وانتي من اهله .. وانسحبو اغلب البنات بعد تفكيرهم في
كلام فاتن ... واريج قامت معاهم يوم شافت محد بيقعد معاها..






***********************************






اليوم الخميس كلن صاحي من بدري ... فطرو وقعدو يجهزون
للغدى ,,,
ام فهد: اريجوه وصمخ ماتسمعين انتي
اريج: هلا يمه آمري
ام فهد: اذن الظهر ولا توه
اريج: اي من عشر دقايق داخل وقت الصلاة...
ام فهد: اجل قوميني وانتي قاعدة تلاعبين بهالبزران
اريج: اونس عمري يمه بدل جلسة هالبنات اللي تزهق ... هاتي
يدك يمه.. قومت ام فهد وودتها تروح تصلي ..
ريم: عمتو تعالي شوفي هاللعبة وناسة
اريج: والله مامعلمكم العنف الا هالبلاي ستيشن هاتي هاتي بس
ريم: هههههههههههه
اريج: ليش تضحكين تراي فايزة عليك
ريم: لا شكلك يضحك وانتي تتحركين كأنا قاعدين نتضارب جد
اريج: هههههههههههههه العبي بس هذا حماس وش يدريك انتي
محمد: عمتي انا ابي العب
اريج: انتظر دورك بعدنا
فاتن: ياااارب متى اشوف وليد وربى يتطاقون على اللعب
اريج تحب يدها وجه وقفى: الحمدلله والشكر .. من الحين تتمنين
الحروب انتي
فاتن: اهم شي اشوفهم قدامي يلعبون ويستانسون ...
تغدو ... وراحو البنات والحريم يقيلون قبل صلاة العصر وعقبها
بيقومون يتجهزون لاستقبال ضيوفهم ...
قبل المغرب كل البنات والحريم والاطفال لابسين وكاشخين
ام تركي: لمى متى جايين اهلك؟
لمى: هذاهم بالطريق الحين
ام تركي: يابنات هاتو البخور بسرعة ..

بخرو المجالس والصالات ... وجوهم الضيوف سلمو عليهم
واستقبلوهم احسن استقبال .. جو خوات لمى وفاء وحنين ..
وامها وزوجة اخوها محمد اشواق..
دخلو الضيوف للمجلس ,, وجو البنات بالقهوة وصحون الحلى
وبعد العشا بحول الساعة حطو عشاهم ..تعشو وقامو بعدها ...
فرشو برا مثل العادة وقعدو ... والبنات فرشو لهم لحالهم شوي
بعيد عنهم وقعدو هم بعد...
غادة: ريمو تعالي يمه.. روحي عند مدخل الحريم تلقين ابوك
ينتظرك خوذي منه علاج محمد اخوك ووديه للغرفة فوق
ريم:زين بيان تعالي معاي ( بيان بنت وفاء اخت لمى وتصير
صديقة ريم ومعاها بنفس المدرسة )
طلعت ريم تاخذ الاغراض من ابوها ... وشافت فهد واقف
اللي اشر لها وهو يضحك ..
بيان: تعرفين فهد؟
ريم: اي خالي
بيان: اخو امك؟
ريم: لاااا خال امي وابوي يصير اخو امي نورة وامي شيخة
بيان: وين مرته؟
ريم: تعرفينهم؟
بيان: اي بالشقة اللي جنبنا
ريم: نصابة منتم جيران عمتي عبير
عبير قابلتهم وهي نازلة من فوق : وش فيها عمتك عبير؟
ريم: بيان تقول انكم جيرانهم
عبير ناظرت في بيان مستغربة: لا ماشفتها الا هذي المرة ويوم
زواج ماجد
بيان: لا مو انتي اللي شفتها
عبير استغربت بس بعدها مو مستوعبة اللي قاعد ينقال قدامها ولا
فهمت شي اصلا: تعالي حبيبتي اجلسي انا حاسة انه وراكِ سالفة
بيان: والله ماقلت شي
عبير: ياعمري انتي اصلا من قال انك قلتي انا ابغى اعرف وابغى
اسألك بس... شفتي مين ياقلبي؟
بيان: فهد يصير جارنا
عبير بدت الصدمة تعلو وجهها: جاركم فين؟
بيان: هو كان دايم يجي بالشقة اللي جنبنا هو وزوجته
عبير بدت تحس بالرجفة تسري بكل جسمها : ياقلبي انتي متأكدة
انه فهد؟
بيان: اي والله العظيم ما اكذب
عبير: ياحبيبتي محد قال انك تكذبين ..بس قلت يمكن غلطانة
بيان: لا والله هو دايم لاسافر جارنا نايف يجي هو وزوجته للشقة
ويقعدون فيها حتى مرة كان هو بس جالس وانا توني جاية من
المدرسة وناداني ورحت قعدت معاه الين جت هي ورجعت بيتنا
عبير ودموعها تجمعت بعيونها : متى آخر مرة شفتيه؟
بيان : من زمان والله ماعاد يجي
عبير: طيب ايش عرفك ان اسمه فهد؟
بيان : انا دايم اسمعها تناديه
عبير: طيب هي تعرفين اسمها؟
بيان قعدت تفكر: لا ما اذكر
عبير: طيب من زمان يعني كم ؟ سنة مثلا ولا اقل
بيان: مادري والله كم بس يمكن سنة
عبير ماصارت تسمع شي بعد اول كلمة انقالت ..الكلام صار مثل
الخناجر اللي تطعن بصدرها ... عمرها ماتصورت فهد بماضي
كانت تتخيل ماضيه نظيف وطاهر ومادنسته اي بنت قبلها ...
لكن الكلام اللي سمعته اليوم كان قمة الصدمة..هذا ماضي ماتنكر
بس وش يضمن لها انه للحين ماترك هالماضي ... طلعت ركض
لاول غرفة صادفتها ... قفلت على نفسها الباب تبي تنفرد بنفسها
تبي تستوعب صدمتها وجرحها النازف الاطفال عمرهم مايكذبون
والبنت قاعدة تقول كل شي بثقة وهي متذكرة التفاصيل بالضبط
يعني صح .. وفهد كان يعرف بنات غيرها ...
هم جديد وصفحة مؤلمة تبدا فيها تفاصيل جديدة من حياتهم ...
اوجاع وآلام ماكانت تتخيل انها ممكن تصادفها ... تخيلت انهم
يختلفون .. يتهاوشون اي شي بس بعدها تتصافى قلوبهم ... الحين
شلون تتصرف؟ شلون تتعامل معاه ... وش المفروض تسوي؟
آه ياهالجرح وش كثر انت قاسي وماترحم ... الحب اللي تصورت
انه كان لها بس سبقها له قبلها يمكن كثير.. والقلب اللي تصورت
انه مانبض اللي عشانها للاسف نبض لغيرها ... والكلام اللي
تخيلت انه ماسمعه غيرها..يمكن الف بنت وبنت سمعوه من حبيب
قلبها فهد ...
وجسدها الطاهر.. دنسه ببقايا لمساته لاجساد عشيقاته السابقات ...
وعلاقة الحب اللي كانت تتصور انها اسطورة ... صارت كذبة
مثل باقي الحكايات ... ماعرفت تنام ولا تفكر دموعها مو راضية
توقف ووجعها بقلبها مدمي ..والالم صار فوق احتمالها ودها الحين
ترجع البيت .. وتواجهه بكل شي .. تبي تسمع له يمكن يقول شي
يمكن يطلع كله كذب .. تبي ينكر ... يقول هذا كله كذب اطفال
وش يصبرها هالليل كله .. ولبكرة بعد..
مستحيل تنتظر لبكرة لازم تواجهه لازم تقول له كل اللي سمعته
وتسمع رده ... بتعطيه مجال يدافع عن نفسه ... يقول اي شي
بس يطفي هالنار اللي تغلي بقلبها ... ماتدري شلون طلعت رقمه
ودقته ... شافت اسمه بجوالها ( غلا قلبي ) تحسرت بداخلها وهي
مو قادرة تتخيل ان اللي سمعته صح ..: فهد
فهد: عبير وش فيك تصيحين؟
عبير: ابغى اشوفك ضروري
فهد: عسى ماشر وش صاير؟
عبير: بطلع لك وبنروح لمكان بعيد نتكلم
فهد: اوكي تعالي انتظرك ..وسكر منها وقلبه ناغزه اول مرة
يسمع صوت عبير كذا يحس انه في شي كايد بس الله يستر
وش مخبية الايام معها .....




*
*
*
*
*
*
*








الجزء الثاني والعشرون





*
*
*
*
*
*




لهيب يصرخ باعماقي .. ووجع تجاوز كل حدودي
آلام تصرخ بالوجدان .. كفى ..
كفى ايها الساكن في قلبي ... والجاثم باعماقي..
كفاك غرورآ ... كفاك كذبآ وخداعآ..
فما عدت بعيني مثل الملاك..
فقد شوه الماضي الأليم بقايا صورك الطاهرة ...
وتشتت بداخلي عناوين الفرح..
وامسى حزني يطرق الابواب..
يناديني لاهاجر الى وطنٍ .. لست من قاطنيه ..
وبلادٍ لست من اهلها ..
لأغادر مواسم الحب والفرح ..
وابدأ حكاياتي نحو المجهول ..
سراب يترائى لي من بعيد .. وسحب دخان تحاول
ابقائي على مدارات الغضب ...
وفصول حياتي معك تبدلت .. وماعادت هي تلك الحكاية ...
بكل صورها البريئة ...



بوسط جنونها اللي سكنها من سمعت اللي سمعته ... طلعت للغرفة اللي
تنام فيها بالعادة .. لبست عباتها وخذت شنطة يدها ونزلت له ... اول
مانزلت وطلعت مع باب مدخل الحريم عورها قلبها يوم شافته..مو قادرة
تصدق انه هالشخص اللي قدامها يخبي وراه شخص آخر بلا اخلاق ..
راحت له وهي ماتدري شلون كانت تمشي.. حست الارض من تحتها
نار ... لهيبها يحرق حتى داخلها ...
فهد: حبيبتي وش اللي صاير؟
عبير: ابغى اطلع من هنا
فهد خاف عليها اول ماسمع صوتها اللي كله صياح: احد ضايقك؟ احد
قايل لك شي
عبير : فهد لا تكثر اسئلة خليني اطلع اول بعدين نتفاهم
نتفاهم ؟؟ هالكلمة قلبها براسه معناها هو طرف بالموضوع .. بس هو
مقتنع انه ماعمره سوا معاها شي يستاهل هالدموع كلها..: زين روحي
من ورا الفيلا انا موقف سيارتي هناك وانا بروح اجيب مفتاح السيارة..
راحت للسيارة .. وانتظرته .. كل شي حولها اسود وظلام دامس رغم
كل الاضاءات والانوار حولها .. ماتشوف الا الظلام .. الحزن مو مخليها
تشوف الوان غير اللون الاسود...
فزت يوم سمعت صوت السيارة .. يفتحها فهد بالريموت .. ركبت وهي
ساكتة .. ماتدري هي تفاتحه بالموضوع بالسيارة او تروح البيت ..
حرك سيارته وطلعو من المزرعة : لو الموضوع مايستاهل انك تطلعيني
بنص الليل باذبحك..
عبير: يمكن ماتلاقيني اصلا عشان تذبحني
فهد: وش اللي صاير؟
عبير بهدوء قاتل: ممكن نروح البيت
فهد: البيت؟ صاحية انتي؟ وهالعالم اللي ورانا واغراضنا
عبير بدون مقدمات : كم وحدة يافهد؟
فهد مافهم وش قاعدة تقول: وشو
عبير: كم وحدة عرفتها قبلي
" صدددددمــة " الجمته عن الكلام ... سكت بدون مايقول شي .. توقع
انها مجرد شكوك وما حب انه يقول شي ويثبت كلامها ..
عبير: ليه ساكت ؟ تكلم
فهد: انتي اللي علميني وش السالفة
عبير: شفت انه الموضوع يستاهل نروح البيت عشانه
فهد بصراخ: مابي اروح ولا مكان وش السالفة تكلمي
بصراخه صحاها من هدوئها اللي تسلحت فيه من دقائق .. وظهرت عبير
غير اللي يعرفها فهد.. تكلمت وشفايفها ترتجف الم ..: انا مايهمني اذا كان
ماضي وانتهى .. انا اللي ابغى اعرفه حاجة وحدة بس.. لسى تعرفهم ولا
لما تزوجتني انتهى كل شي؟
فهد : الحين مشتغلة معاي تحقيق؟ ابي اعرف وش اللي يخليك تقولين
هالكلام
عبير: عاهدني بالله تقول لي الصراحة مهما كانت
فهد: اسئلي اللي عندك
عبير: يعني ممكن تكذب
فهد: عبير وش فيك انتي؟ قاعدة تقطين كلام وكلام ومو فاهم شي عشان
اجاوبك .. تعالي واجهيني بأي شي واقعي وانا اعرف شلون ارد..
التركيز في الاثنين كان على اللي يدور بينهم ... واللي رحمهم انه الوقت
متأخر .. لانه لا هو مركز بالطريق ولا هي دارية باللي حولها اصلا ..
عبير: صاحبة ريم ... عرفتك لما شافتك.. كنت دايما تروح لشقة صاحبك
اذا سافر صح؟
فهد ارتبك .. الكلام واصلها بالتفصيل ... والحين مايفيده الانكار .. لازم
يعترف لازم يقول يمكن باعترافه تتفهم اللي بيقوله ..
ثواني وتلتها دقايق .. والاثنين ساكتين .. بداخله هو يصيغ الكلام يبي
يخفف وقع كلامه واعترافه على مسامعها ... اما هي الحين تأكدت من
شكوكها .. كانت مابين وبين .. ممكن تكون مشبهة عليه .. او اي شي بس
سكوت فهد معناها هو .. اكيد هو : ماجاوبتني؟
فهد: اذا وصلنا البيت نتفاهم
عبير بصراخ: فهد انا ماراح استنا كمان ..انا قلت لك خلينا نتكلم
في البيت وانت اللي خليتني افتح الموضوع والحين ابغى جواب وارتاح..
فهد: ايه انا .. ارتحتي الحين ..
شهقة من اعماق مجروحة ..دموعها نزلت بغزارة..والكلمة اللي قالها فتحت
لجروحها الف باب وباب.. كسرت خاطره من قلب وهو يسمعها تصيح ..
وتتنهد مثل الاطفال .. وده يضمها على صدره يبي يفهمها انه الحين لها هي
بس..لام نفسه على طيشه وجنونه ..اللي ممكن يخسره اغلى انسانة سكنت
قلبه... الطريق مر طويل رغم ان المزرعة مو بعيد كثير عن الرياض .. كان
عين عليها وعين على الطريق ومر اغلب الوقت صمت مايقطعه الا صوت
شهقاتها ..: انزلي
رفعت راسها وشافت بيتهم..نزلت ومشت بكل هدوء وكأنها تحسب خطواتها
دخل ودخلت وراه .. مسكها من يدها ومشت معاه باستسلام .. وبلحظة تذكرت
كل الكلام وسحبت يدها بتقزز ..
فهد تنرفز منها:وشو بعد؟شي وانتهى من حياتي على اي اساس جاية تحاسبيني
عليه
عبير: انتهى؟
فهد: اي والله انتهى طيش بوقته ومن تزوجنا خلاص تركت كل شي
عبير: وش اللي كان يصير بينكم
فهد: لاتسئلو عن أشياء إن تبدو لكم تسؤكم
عبير: يعني تصير اشياء
فهد: سوالف بس
عبير: سوالف؟ يعني تبغى تقنعني انك تقابل وحدة في شقة ولوحدكم عشان
سوالف ( قالت هالكلام وهي تحسه طعنات بصدرها )
فهد بدا يتوتر بس لازم يتكلم ممكن غموضه يشكك عبير فيه وهو مكشوف
خلاص وماعنده شي يخبيه : اي سوالف بس بالشقة استر من الاماكن العامة ...
عبير: عشان الهيئة ماتشوفكم؟
فهد: ايه
عبير: وماخفت من اللي يشوفك ومايخفى عليه شي
فهد: اووووووووف عبير ترى هذا شي انتهى من حياتي ..
عبير قربت منه ومسكت ايدينه وصارت تصيح وتتكلم بجنون : فهد انا
ماني قادرة اصدق .. مصدومة .. قول لي انه كل هذا وهم كذب وانه انا
اول حب في حياتك
فهد: عبير واللي خلقني انك اول حب في حياتي وعمري ماحبيت وحدة
قبلك... يمكن عشت طيش شباب مثلي مثل كثير بسني بس والله قلبي
مانبض لغيرك..
عبير: انا ابغى اعرف حاجة وحدة بس
فهد: وشو؟
عبير: كم وحدة
فهد: مو كثير
عبير: مو كم وحدة كلمتها لا ... كم وحدة لمستها؟
فهد: والله مالمست غيرك
عبير: فهد
حط اصبعه على فمها يسكتها: عبير حلفت لك والله مالمست غيرك
عبير سكتت وبعد فترة: مين كان يعرف
فهد: شلون؟ مافهمت
عبير: مين كان يعرف عنك.. اخواني يعني؟ اخواتي
فهد: عبير ليش تسألين هالاسئلة كلها وش اللي تستفيدينه
عبير: لحاجة في نفسي
فهد: خواتك لا .. اخوانك ايه بس مايعرف كل شي عني الا خالد
عبيربذهول : الله .. خالد؟؟؟ ايش باقي صدمات كمان وماعرفتها
فهد: لا تظنين فيه الشينة ولا تظلمينه هو هددني قبل ما اجي اخطبك اني
لو ما انهيت كل شي هو اللي راح يوقف في طريق زواجنا...
عقلها مو قادر يستوعب شي .. وتفكيرها مشوش .. واي شي راح تسمعه
الحين راح تفسره تفسير سيء اكيد ..
حطت عينها بعين فهد..وتكلمت بكل قوة :انا صدقتك لانك حلفت لي بالله
ولانه طيش وانتهى .. وماراح احاسبك على ماضيك لانه راح والكلام في
الماضي نقصان في العقل ... بس صدقني والله والله اللي عمري ماحلفت
فيه كذب لو عرفت في يوم انك لعبت من ورايه يافهد.. والله يوم واحد ماراح
اجلسه معاك وراح تنتهي من حياتي ولا راح تلقى شي واحد بس مني حتى
طرف اصبعي ماتحلم في يوم انك تشوفه ..
فهد: ماراح يصير شي من وراك صدقيني.. اهم شي مافي قلبك علي شي
عبير:مو بسهولة انسى يافهد..انا محتاجة وقت افوق من صدمتي واستوعبها
وبعدها لكل حادث حديث ..
فهد: عبير لا تكبرينها .. الله وهو خالقنا عبده لا تاب غفر له..
عبير: بس انا بشر وما اقدر انسى جرحي بسهولة..
فهد: وش اللي بيدي وانا اسويه لك ... بس اشوفك راضية علي
عبير: مايحتاج خليني انا وجرحي للأيام .. مع الأيام بنسى وبنعيش يافهد
صدقني بنعيش..مشت بعيدة عنه .. طالعة لغرفتها تبي تختلي بنفسها تبي
تدور بداخلها صور حلوة لعلاقتهم يمكن تكون كفيلة انها تنسيها صور
ماضيه المؤلم ...وبأعلى الدرج التفتت عليه وشافته يناظرها : كنت اتمنى
انها جاتني منك .. يمكن كنت راح اسامحك لان اللي يعترف بالذنب يكون
فعلا ندمان ..بس ياخسارة اكتشفت اني كنت مخدوعة فيك ..
وتلاشت صورتها من قدامه تدريجيا .. تنهد بصوت مسموع وهو مو قادر
يصدق اللي صار اليوم كله ...تمنى من قلبه تكون مجرد سحابة صيف
وماتعكر صفو حياتهم ابد ...







*************************






كان قاعد بشقته .. يشرب كوفي .. واحساسه هاللحظة انه مشتاق لها
يبيها بس ماترد عليه .. يبي يسمع صوتها .. لو تعاتبه بس اهم شي يرتاح ..
اتصل عليهاا وماردت ....مرة مرتين.. ارسل لها مسج ( جوجو ردي ابيك
ضروري ) بعد دقايق رجع اتصل وبعد ماردت ناظر بساعته 11 ونص
.. يعني 2 ونص بالسعودية .. توقع انها نايمة .. مايدري انها تشوف
اتصالاته ومطنشته لانها كل ماسمعت صوته تعبت نفسيتها .. وماعاد
صارت تحب تكلمه ...
اما هي كانت قاعدة بغرفتها لحالها والنوم مجافيها شافت اتصالاته والمسج
استغربتهم .. لانه بالفترة الاخيرة انقطع عنها بعد ماكان كل شوي يتصل
بس يوم شافها ماترد على اتصالاته .. اكتفى بمسجات يرسلهم لها من
فترة لفترة .. هي كانت تاركة له هالفترة للاختيار.. نزلت دموعها غصب
عنها .. وهي قاعدة تقلب برسايله وتقراها <<احيانا الانسان يدور اللي
يشقيه .. يمكن لو حاول ينسى يقدر بس اوقات يدور اللي يذكره
..........: تصيحين ؟ وش عشانه.. عشان واحد باعك؟
الجوهرة رفعت راسها وشافت امها اللي مبين انها مقهورة عليها: يمه بس
هو ماباعني
ام ناصر: لو يبيك طلق مرته .. بس مايبيك
الجوهرة: اذا مايبيني ليش ماطلقني؟
ام ناصر تناظر بنتها اللي طول عمرها عاقلة وفاهمة ليش هالمرة مو
راضية تستوعب وضعها قعدت جنبها وناظرتها بحنان : تظنين اني
ما احبه؟ تراه ولد اختي وبحسبة عيالي .. بس انتي اغلى عندي منه
وما ارضى لك المذلة وانا امك ..انسيه وبكره الله يعوضك باللي احسن
منه ..
الجوهرة: يمه والله حاولت بس ماقدرت ..
وبكت اكثر ولمتها امها تهديها..وهي تدعي ربي لها ييسر امرها ويهدي
سرها ..



[.. ابي أنســاه يايمـــه ..]
يايمـــــه ارجــوك سمــعيني .. يايمـــه بـــس (( لاتقسيــــن ))
واذا شفـتــي دمــوع الحــب .. ضمينـــي
اليــن ماأموت .. ابي انساااااه وانســـى الصوت ..
ابي انســــاه يايمـــه .. نسينـــي !!
وعلـى حضنــــك ابي ابكــي .. على نفسـي وعلى سنينــي
تعالــي لايفوت الفــوت .. وريحينــي
يايمــه ارجووك طمنيني .. احس الفرقــــا تقتلنــــي (( وتنهينــــي))
يايمـــه تعبت وانا أكابــر وانا أكابــــر .. واقول للناس مايعنيني
وربــــــي (( أكســـر الخاطـــر)) .. عجزت انســـاه صدقينـــي
رحـــــل يمــه (( ولكنــــه )) .. باقي عايش بقلبي وشرايينــي
ابعـــرف ليييييييييش بس قلبـــي .. معنــد ومايبي ينســاه
يايمـــه القلــب مشقينــي
ابــي ارجع ولو لحظــه .. ابــي ارجع انــا له
واعيــــش الحــب بس ويـــاه ..
ونصيــر كل يوم نتلاقــى .. وصدق شوفــه يكفينــي
رجيتك عووووودي يالحظــه .. وفرحينــي
آآآه يمـــه .. من هذا الحلم امانــــه لاتصحينـــي
ابـــي احــــلم .. ابــــي احلـــم .. يمكن حلمــي يصبرنــي ويشفينــي
حتى الحلــــم يايمــه بعد فتره شمــت فينــي
حلمــت انه ينادينـــي ..
ويقول لــي ليــه خذلتينـــــي !!!!
ودمعي سال على خدي .. بكيت يمه على حبـــي
وكرهت الحلــــم يايمه .. لانه صار حلم اسود بعد ماكان حلم وردي
ويايمه دمعي لونه احمــر .. يايمــه هو يـــأس منكم وقلبـــه علي اتحجـــر
يايمـــه واللـــه ماأقــدر .. انـــا فبعــده عجزت اصبـــر
وبعــد هـــذا تلومينــــــي ؟؟ يايمــه حتــــى لاتعاتبيــــن
لانــــــي .. ضعت من بعــده وصـــرت مــــــدري انــــا وينـــــــي !!
يايمــــــه راااااح .. وبعديـــن !!
شوفــي كيف ضاعت كل احلامي وسنينـــي
ابيـــه يـــرد ويريح قلبــي المسكيـــن ..
يايمـــــــه راااااح ..
وابـــــي أي شــــي عن حبـــه (( يلهينــــــي ))
يايمه هو مو داري .. يحسب اني نسيت كـــل ايامه وايامي !!
وانـــا يمه اصيح بلهفة للماضي ..
يايمه هو مو داري (( اني ابيـــه ))
واني لين اليوم (( احبـــه حييييل )) واغليــــه .. ونفسي يرد واشوفه الحين ..
وياليــــت اسمع ولـــو صوته .. واظن صوته بيبكينــــــي
وبقولـــه كـــل شي يمــه .. بقوله ضعت من بعدك انت وينك تحمينـــي ؟؟
وبقولـــه ياحبـــي الاول امانــــــة ((( لاتخلينــــــي )))
وبقولــه والله مو ذنبـــي .. وش هالدنيا ياقلبي .. بدونك انت
انت الحب وكل الناس في عينـــي ..
يايمه مافي بالدنيا مثل قلبــه ..
احســــه الوحيد اللي بيفهمنـــي ويراعينـــــي
يايمـــه ارجوك سمعينـــي .. انا حاولت احــب غيره !!
بـــس انـــه كــل تفكيري ..
وبعــــد هذا تلومينــي ؟؟ يايمــه حتــــى لاتعاتبيـــــن !!
لانــي (((( ضعــت ))) من بعده وصرت مدري انـــا وينــــي
يايمــه راااح .. واحســـه يقول خذلتينــــي ..
يايمــــه والله مو ذنبــــي .. يايمــه يعني ماتدريــن !!
يايمـــه بــس قولي لــــه .. اهو ذنــب (( ميـــــن ))..







**********************************






مر اسبوعين من وقت اللي صار بالمزرعة ... عبير طلبت فهد
وقت لنفسها تبي تركز باختباراتها وتبي تبعد عنه شوي .. ماتبيه
يضغط عليها بشي .. تبي هي تسامحه من نفسها .. اليوم الجمعة
وبكرة تبدا اختباراتها النهائية ..مخلصة مذاكرتها من بدري وقاعدة
مع ام فهد بغرفتها .. عبير كانت اغلب وقتها سرحانة ومو مركزة
بشي ...
ام فهد: شفيتس يمه؟
عبير انتبهت من سرحانها: ولا حاجة
ام فهد: انا دارية انتس فيتس شي من رجعتو بنص الليل للبيت
بس ساكتة وماتكلمت .. وما الومتس لو ماتكلمتي ولا قلتي اللي
بخاطرتس .. بس يمه لا تكبتينها بنفستس تكلمي قولي لي اللي
صار ..
عبير ابتسمت لها بحنية : والله يا امي مافي شي .. بس مشاكل
وعدت
ام فهد: وهالحزن اللي اشوفه بعيونتس؟
عبير: بكرة بنسى وخلاص مافي شي يستاهل والله
ام فهد مسكتها من يدها وقربتها لها : اسمعيني وانا امتس.. والله
ان لتس معزة بقلبي مايعلمها الا الله..وهذاني اعلمتس اذا فهد كاسرن
بخاطرتس قولي لي والله مابياخذ حقتس منه الا انا.. حتى لو انه
ولدي بس والله مانيب ظالمتس..
عبير قامت وحبت راسها : ماتقصرين والله .. بس صدقيني خليني
كذا احسن .. خلي صورة فهد حلوة في عيونك ..
ام فهد: بقول لتس شي وحطيه براستس زين..مشاكلتس مع رجلتس
حلوها بينكم ولا تدخلين فيها احد لا قريب ولا صديق .. حتى امتس
وهي امتس لا تشتكين لها .. باتسر لا طيب خاطرتس ورضيتي
انتي بتنسين لا نتس تحبينه ومعاشرته.. بس امتس ما بتنسى ..
ويمكن تكره رجلتس ..
عبير: كلامك على راسي والله يا امي .. وان شاء الله ماراح يصير
بينا مشاكل ولا زعل .. بس انتي ادعي لي ربي يسخر لي فهد..
ام فهد رفعت يدينها ودعت لهم من قلب: الله يوفقتس ويسخر لتس
رجلتس ويرزقكم بالذرية الصالحة يارب..
..........: آآآمين يارب
التفتو ثنتينهم للي واقف عند الباب.. عبير ارتبكت من شافته هي والله
تشتاق له .. ودها يرجع كل شي مثل اول.. بس كل ماتشوفه تتذكر
انها مو اول وحدة بحياته .. والشي اللي مؤرقها انها مو قادرة تقتنع
ولا تصدق انه رغم كل مغامراته مالمس غيرها ..
ماتدري كم صار له واقف يسمعهم ..بس تمنت انه سمعهم من اول
تبيه يعرف انها للحين مجروحة .. وبعدها ماسامحته على هالماضي..
قامت تبي تروح لغرفتها : امي انا بروح انام شوية .. اذا احتجتي
اي حاجة خلي سنتيا تصحيني..
ام فهد فهمت ان عبير تتهرب من القعدة مع فهد وتأكدت ان اللي
بينهم شي كايد بس لا فهد تكلم ولا عبير رضت تقول وش اللي صاير
فهد: شلونك يمه؟
ام فهد: مانيب طيبة
فهد: علامك يمه ؟ تونسين شي
ام فهد: وش مسوي للضعيفة ؟ حتى اللقمة ماعاد تهناني وانا اشوفك
وياها وكنها عدوك
فهد:يمه والله مافي شي
ام فهد عصبت من كلامه: مانيب بزر عندكم كل واحد يقول مافي شي
وانا اشوف لكم اسبوعين ماحاتسيتو بعض ..انا ادري انه منك انت
فهد: ايه مني يمه... وانا والله ابي رضاها بس هي تتغلى علي وش
اسوي؟
ام فهد: هي متحملتك على غثاثتك مقن اول.. بس هالمرة احس انه شي
كايد اللي مزعلها
فهد تضايق من قلب هو متأكد ان عبير بتسامحه .. بس تعب من جفاها
واشتاق لها .. اشتاق لكلامها ولضحكها ودلعها عليه ..
اما هي من طلعت الغرفة انسدحت على سريرها وقعدت تفكر.. هي
تبي تنسى كل اللي فات .. ومن الظلم انها تحاسب فهد على شي صار
قبل يتزوجون بس تبيه يعرف ان زعلها صعب وانها ماترضى بسهولة
عشان مايفكر يوم انه يغلط عليها ابد..حست فيه يوم دخل .. وغمضت
عيونها .. هي متأكدة انه جاي يبي يشوفها .. يااااه وش كثر اشتاقت له
واشتاقت تلمه بحضنها وتنسى معاه همومها ... وغفت عينها وهي تنتظر
تحقيق هالحلم ..







************************************






الاختبارات وعدت على خير ...وعبير وشهد ارتاحو من هم الدراسة
وبقى لهم هالسنة التطبيقية ..وبعدها بيتخرجون ان شاء الله..
شهد: اوووووف مابغينا نخلص
عبير: الحمدلله احس اني ارتحت كثير
شهد: ماتبين نطلع نتغدى؟
عبير: فين؟
شهد: اي مكان تبين
عبير: لا فهد ماراح يرضى
شهد: كلميه ماراح يرفض
عبير: لا مالي مزاج اصلا
شهد: يااااثقل طينتك .. عبورة خلينا نروح نشوف لنا فساتين لعرس
البنات..
عبير: ماراح اشتري فستان جاهز .. انا شفت كذا موديل في النت
وراح اخذ افكار مختلفة وافصل فستان حلو
شهد: بس في السوق فساتين مميزة
عبير: عارفة بس انا راح البسه كمان في زواج نوف بنت خالي
وما ابغى الاقي احد شافه قبل
شهد: بتلبسينه نفسه؟
عبير: ايوا ليش لا؟ اصلا اذا حضرت الزواج هناك بيكون محد شافه
بعدين ليه الخساير عشان مظاهر كذابة
شهد : تفكيرك سليم.. بالآخر يعني اطلع اتغدى انا ورجلي احسن؟
عبير: اي والله روحي انتي وخلود لاي مطعم احسن لك مني..
شهد: اي والله بعد عمري اكيد احسن منك,,,
عبير: اكيد فهد جا .. بتطلعين
شهد: وجججججع ان شاء الله
عبير تطقها: لا تدعين عليه .. ايش قلت؟
شهد: بتروحين وتخليني؟
عبير: لا ياقلبي بلطع فهد في الشمس عشانك
شهد: ياااارب خالد مايتأخر علي
عبير: لا تخافين اصلا احسهم مثل الواحد وظله يعني تلاقيهم جو
الاثنين مع بعض
طلعو من كليتهم .. وراحت عبير لفهد ركبت السيارة وحرك رايح
البيت: السلام عليكم
فهد: وعليكم السلام
حطت شنطتها بحضنها وصارت تفتش فيها..يقال لها مسوية مشغولة
فهد: شلون اختبارك؟
عبير بدون ماتطالعه : تمام
فهد: عبير بطلب منك طلب وماترديني؟
عبير: ان شاء الله
فهد: خلينا نبعد شوي عن الناس..
عبير : اي ناس؟
فهد: اقصد نسافر
عبير: اجلها شوية احنا لسى في اول الاجازة
فهد:للحين زعلانة علي؟
عبير: لا
فهد: عبير
عبير: فهد والله ماني زعلانة خلاص بالنسبة لي حاجة وفاتت
فهد: بس احسك زعلانة
عبير: انا قلت لك محتاجة وقت انسى بس
فهد: طيب انزلي
عبير ناظرت حولها واستغربت انهم واقفين بهالمكان: فين انزل؟
فهد: انزلي عازمك على الغدى ولا ماتبين؟
عبير ابتسمت في خاطرها .. قبل دقايق وهي تسمع شهد تقول انها
بتطلع مع خالد... تمنت تطلع مع فهد مثلهم .. من زمان ماطلعو مع
بعض: اوكي
نزلت هي وياه .. وراحو وقعدو على احدى الطاولات ..
عيونه تناظرها .. وتتأملها ضعفت كثير .. والهالات السودا حول
عيونها زادت.. :تغيرتي كثير
عبير ناظرته تنتظر يكمل كلامه..
فهد وهو مازال يتأملها: حتى ملامحك تغيرت
عبير: فهد
فهد: عيونه
عبير: اللي فات فات وانا نسيته..بس ابغاك تعرف ان اللي في قلبي لك
اكبر من ماضي احاسبك عليه.. بس ياليت انت تخلي حبي يشفع لي
وماتقعد تدقق عليه على كل سالفة
فهد: والله اوقات اكون مجنون ابيك لي لحالي ومابي شي يشغلك عني
بعدها والله اتندم احس اني نذل
وصلهم الغدى .. وقعدو يـآكلون .. لاحظ عليها اكلها قليل .. او يمكن
ماكلت شي..: قلبي

عبير: همممم
فهد: ليش ماكليتي؟
عبير: خلاص شبعت
فهد: تعالي قربي
عبير: لا كذا مرتاحة
فهد: تعالي ولا بجي واشيلك
قربت منه وهي مبتسمة وهالشي خلاه يرتاح كثير مسك يدها: وش
ذا؟ ناظري يدك شلون صايرة .. وربي عظم على جلد
عبير: من جدك انت؟ انا اكلي عادي زي كل مرة..بس في الاختبارات
تنسد نفسي
فهد: يعني مانقص وزنك؟
عبير: مادري ماشفت كم صاير بس مااتوقع كثير بالعادة ايام الاختبارات
انقص كيلو او اثنين بس ومع الاجازة ارجع مثل اول ..
فهد: وهاللي حول عيونك؟
عبير: من السهر
فهد: وش اللي يسهرك ياقلبي
عبير: اشياء وانتهت ..
فهد قربها منه اكثر وصار يوكلها بيده ...
عبير: خلاص والله العظيم شبعت
فهد: بس شوي عشان خاطري
عبير: عشان خاطري انا بروح البيت ,, ابغى انام
فهد: مواصلة من امس؟
عبير: ايوا
فهد مسكها مع خشمها وهو مبتسم لها : زين على امرك..وحبها بين
عيونها..
وصلت البيت وهي ماتشوف قدامها من النوم ... طارت لغرفتها
بدلت ورمت نفسها على السرير بدون اي تردد..
قرب منها ولمها بحضنه ,,, بس النوم مو مخليها قادرة اصلا تفتح
عيونها : فهد ابغى اناااام
فهد: خليك معاي شوي
عبير بكلمات بالقوة تطلع: خليني انام .. وراح اسهر معاك في الليل
كسرت خاطره وحس فيها فعلا تبي تنام ..غطاها ونام هو بعد جنبها
<<لازق فيها مو مصدق انها عطته وجه ...







***********************************






على الساعة 5 بعد العصر .. صحى وهو يستغفر ربه شلون راحت
عليهم نومة وماصلو العصر .. قرب من اذنها وهمس لها : عبورة
<<مافي امل انها تصحى ابد .. حرك كتفها : عبورة قومي صلي لايدخل
وقت المغرب وانتي ماصليتي..
عبير: فهد بناااام
فهد: زين قومي صلي وبعدها كملي نومك
عبير: طيب
قام من عندها .. توضا وطلع يصلي وهي للحين غاطة في نومها
رحمها مبين التعب والارهاق عليها : عبورة الله يرضى عليك قومي
صلي
تقلبت ع الفراش بضجر : صحيني المغرب
فهد: وصلاتك؟
عبير: اليوم كم في الشهر؟
فهد: 23
عبير: يعني خليني اكمل نومي
فهد ابتسم على حظه الشين : بعد مافي نوم يقولون مو زين النوم
للمغرب
عبير قامت وهي طفشانة وخذت اللحاف معاها: اوووووف ماتعرف
تخلي احد ينام
نامت على اكبر كنبة بالصالة.. وتغطت ..صلى فهد وطلع شافها
نايمة .. خلاها تكمل نومها شوي اكيد ماراح تطول هي ماتحب تنام
للمغرب ..
دقايق بس وماعرفت تنام بالحر..قامت راحت غسلت وبدلت ونزلت
تحت ..شافته قاعد مع امه وخواته كلهم مجتمعين ويتقهوون..: السلام
عليكم
الكل: وعليكم السلام
ام فهد: وش هالنوم كله ياعبير؟
عبير ابتسمت وناظرت فهد تعاتبه .. عرفت انه هو اللي مفتن عليها
اكيد: البارح كله مانمت سهرانة اذاكر..قربت سلمت على الكل وقعدت
شيخة: شلونك عبير؟
عبير: الحمدلله تمام .. انتي كيفك؟
شيخة :والله بخير من فضله.. وينك ياحافظ قطعتي ماعاد نشوفك حتى
لاجينا هنا دايم بجناحك
فهد: الله يرحم حالك بس هذي لاجت اختباراتها حتى انا ما اشوفها
عبير ناظرت فهد شافته مبتسم بس نظرتها له شالت الابتسامة من وجهه
وفهمها.. توهم اليوم متفاهمين على هالسالفة وهو مايعرف يمسك لسانه
ام فهد: الحمدلله اليوم خلصت وارتاحت .. والله انها مشقية عمرها مع
هالكتب..
عبير: الحمدلله يارب .. والتفتت لام تركي : خالتي البنات بيجون؟
ام تركي ( للحين مو هاضمة عبير بس محترمتها عشان امها ): الا
بيجون ان شاء الله..بس يمكن بعد المغرب..
فهد: يعني انا اليوم مطرود من البيت ؟
ام تركي: ههههههههههههه لا كلم العيال يجون بعد
فهد: والله فكرة نجتمع اليوم ونشوي ونغير جو شرايكم؟
عبير: براحتكم .. اهم شي نجتمع
ام فهد لاحظت فهد وعبير اليوم غير .. مو بس بالسوالف حتى وجيههم
مبين فيها الفرح .. وعرفت بخبرة الام الكبيرة ان هالغيمة السودا اللي
غطت على علاقتهم هالشهر انقشعت .. وحتى لو ابقت شوي رواسب
مصير الحب يمحيها ..
قام فهد يكلم العيال يعزمهم .. ومن بعد المغرب بدو يجتمعون ببيت ام
فهد.. البنات بالصالة والحريم قعدو بالمجلس .. اما العيال بالحديقة
يبون يشوون ...
والشغالات كلهم تجمعو .. يسوون سلطات ومقبلات في المطبخ ....
راحت عبير لهم بالمطبخ : سنتيا فين القهوة؟
سنتيا راحت تركض تجيب القهوة لعبير خذتهم عبير ورتبتهم بالصحن
وحطت معاهم الفناجين: خلاص روحي انتي كملي شغلك انا اجهز كل
حاجة..
..............: تبين مساعدة؟
التفتت شافت اريج داخلة المطبخ : ايوااا الله يسعدك طلعي التشيز كيك
من الثلاجة وسخنيه شوي احلى..
فتحت اريج الثلاجة وشافت التشيز كيك: يااالبيه من سعد الدين ياشيخة
ياحبي لك بس..
عبير: هههههههههه جبتها عشانك بس
اريج: نصابة دارية انك ماطلعتي من البيت
عبير: ماطلعت بس وصيت فهد يجيبها
اريج: ايه ايه اقعدي مني علينا
عبير: روحي بس .. اسمعي بنتقهوى في المجلس مع الحريم
اريج: زين ..
عبير تفتش على صحون حلى ومو لاقيتها..
اريج: وش تدورين ؟
عبير: دقيقة .. سنتيا فين البقلاوة والمعمول؟
سنتيا وهي ودها تسطر عبير راحت للدرج اللي جنب الثلاجة : سوفي
اريج: ههههههههههههههههه يمه بطني
عبير عرفت اريج ليش تضحك بس طنشت: اروج خلاص خذي التشيز
كيك وانا لاحقتك بالقهوة..
حطتهم اريج بصحن وودتهم المجلس ..وثواني لحقتها بعدها عبير سمعت
اريج من اول مادخلت : والله ياهي عطتها نظرة حسيت انها ودها تكفخها
عبير: ههههههههههههههههه انتي لحقتي تقولي السالفة
اريج: وربي فقعت ضحك .. انتي ماشفتي وجهك شلون صار
عبير: مستقوية باللي عندها .. بس خليها اذا راحو تعرف كيف تشتغل
ام فهد: يمه خلو عنكم هالشغالات..ترى ماوراهم الا السحر وقلة الخاتمة
اريج: والله يمه عبير ماتأذي ذبابة تبينها تسوي شي للشغالة ..
تقهوو وبعدها صلو العشا ..ورجعو البنات قعدو بالصالة ..
اماني : والله العظيم شعري مو راضي يطول .. عطوني اي طريقة
تطوله لي
فاتن: مع الاهتمام بيطول
اماني: وربي ماخليت شي
فاتن: وانتي مهبولة تحطين اي شي .. اذا استخدمتي طريقة او زيت
استمري عليه فترة وراح يبين .. مو من اول مرة
اريج: بعدين كل اللي بقى شهرين مايمداه يطول..
غادة: لا عادي انا شعري يطول في شهرين
الجوهرة: لا بس نوعية شعر امون غير مايطول بسرعة ..
اماني: احس اني شايلة هم مادري شلون اسوي تسريحة
فاتن: شعرك مو مرة قصير..ترى عادي وبعدين اذا الكوافيرة شاطرة
راح تعرف تسوي اي تسريحة بأي طول
مشاعل : اي بس بعضهم تقول لك قصير .. ولازم توصله لك
غادة: لا انتبهي ترى مايجوز .. ( لعن الله الواصلة والمستوصلة )
اماني: لا والله مانيب مخليتها تحط لي اي شي ..
عبير: خليها تسوي لك شنيون مرفوع شويه وخصل نازلة .. مرررة
دارج وكمان حلو وناعم
شهد: في عرسكم بكون بالشهر الرابع شلون اشتري فستاني؟
ندى: عادي خوذيه واسع شوي عشان مايضايقك .. في موديلات
حلوة وتناسب وضعك
عبير: ايوااا ذكرتوني بروح اجيب اللاب توب واخذ رايكم في كذا
موديل انا مرة تعبت وماعرفت ايش اختار..
راحت جابت اللاب توب وقعدت توريهم الموديلات اختارو معاها
كذا فكرة واقتنعت فيها : بس جد ايش افصل لون؟
اريج: اي لون ماعمرك فصلتيه
عبير: مادري احس كل الالوان لبستهم قبل
الجوهرة: فصلي اخضر احسه بيطلع عليك يجنن ..
عبير: اخضر؟ فعلا ما اذكر اني فصلت اخضر.. يلا ان شاء الله
اذا جيت بروح اخذكم معايه
الجوهرة: عاد تخيلي كلنا رايحين نختار لك قماش
عبير: ههههههههههه انا ماقلت كلكم يعني ثنتين على الاقل
اريج: يااازين ريحة الشوي انا من اول اسمع صراخ بندر حاسة
ان فهيدان غاثه
عبير: هههههههههههه خليهم ينبسطو
اريج: الا نذل رجلك ذا
غادة: تراه خالك يعني لا تسبينه
اريج: الا رجلي ما ارضى عليه .. وراحت تبي تشوفهم مع باب
المطبخ وراحت معها عبير وهم يضحكون ..
شافو فهد يحوس بالثلاجة يطلع له اغراض .. طقت عبير اريج
من كتفها : شفتي انك دايم ظالمته
فهد: يالله حيها
اريج: الله يحييك
فهد: ماكلمتك ترى .. اهلى وارحب بمرتي
اريج: قلعتك انت وياها .. وش مسوي برجلي بس؟
فهد: ههههههههههههههههه مشتكي لك هو
اريج تطالع عبير: ظالمته هاااه؟ تراه سوسة
فهد: من هو السوسة لايكون انا بس؟
اريج: ايييييه وش مسوي لبندر
فهد: ياشيخة اصدقاء ونمزح مع بعض يعني لا تتدخلين
اريج: طيب عشاكم متى ترى متنا جوع
عبير ضحكت وفهد قام يعلق على اريج: لعنبو ابليسك توكم بالعين
حلى وقهوة وتبين عشى؟واحنا يالضعوف من اول نكرف ما اشتكينا
اريج: والله لو ما ناصر وسعود معكم كان جيت ساعدتكم بس الله
ماكتب..
طلع فهد من عندهم .. جهزو العشا وتعشو وسهرو .. وبعدها كلن
رجع لبيته ... عبير من راحو .. طلعت لغرفتها وتسبحت .. غيرت
ملابسها .. وعلى طول راحت لسريرها تبي تنام ..
فهد بعدها بدقايق دخل الغرفة لقاها ظلام .. ولع الانوار.. وانتبهت
له عبير.. كانت توها مابعد نامت : هالزعل خلاك تتعودين تنامين
من غيري,, وانتي اللي كنتي ماتغفى عينك الا بحضني..؟
عبير رفعت نفسها شوي : مافي حاجة بتخليني اتغير عليك
فهد: لا في اشياء كثير تغيرت
عبير: يمكن في لحظة اشياء فيني انكسرت بس احبك ..وانت بيدك
ترجع كل شي زي اول
فهد: يعني تلوميني بعد؟
عبير: لا والله ما الومك بس اذا كنت انا زعلانة منك وقلت لك خليني
ارضى من نفسي .. لا تنتظر لما انا اجي لك .. حاول تراضيني اكيد
فيوم راح ارضى ..
فهد: من كثر ما اخاف اني اخسرك .. اخاف اسوي اي شي يزعلك
عبير ابتسمت له: مطول وانت واقف؟
فهد: بروح اتسبح ريحتي كلها شوي
عبير: طيب لا تتأخر,, عشان ماتلومني اذا نمت قبلك
فهد: ههههههههههههههه ياويلك
ابتسمت له وهو راح يتسبح .. فتحت اللاب توب وقعدت تتصفح
بكذا موقع شوي ...الين طلع فهد ..: ماشاء الله تسمعين الكلام
عبير: اممممم شرايك انت بس؟
قرب منها ورفع اللحاف وانسدح جنبها : سكري اللي بيدك واعلمك
سكرته .. وقربت منه ولمها لحضنه .. والحمدلله اللي تصافت قلوبهم
بعد ماكاد الشيطان يفرق بينهم ...







*********************************







بسيارته راجع من الكلية الظهر..كل تفكيره كان فيها ,, هي اللي اشغلته
بالفترة الاخيرة .. كانت بالنسبة له مجرد غلطة وتنتهي ,,, بس الحين مو
قادر يتخيل حياته بدونها ..وصل لشقته .. وراحت عينه كالعادة لشقتها
ومايدري ليش راح لها يمكن يدور بقاياها.. ذكرياتها .. كل زاوية وكل مكان
له ذكرى .. عينه تناظر حواليه .. وبداخله يردد ( هنا ضحكت .. هنا
هالكلمة قالتها ..) راح لغرفتها من دخلها شم ريحتها اللي تميزها .. عطرها
اللي من يشمه .. ينتظر فيه حضورها ..لام نفسه وضحك على غبائه كل
هاللي يحسه ويبي يفكر .. هي وجودها مغطي على كل شي حوله حتى
بغيابها ..فعلا مثل ماقالت له هي ..ليش مصعبها على نفسه ,, اذا اختارها
هي راح يكسبها ويكسب اهله ويكسب راحته ..ويخسر جمانة .. بس لو اختار
جمانة راح يخسر اهله ويخسر الجوهرة ويخسر اشياء كثير .. يكفيه بوجودها
رجع لربه اللي نساه زواجه من جمانة ..حتى صلاته ماكان حريص عليها واجد
وهي تاركة لصلاتها والرسول
صلى الله عيله وسلم قال ( العهد الذي بيننا وبينهم الصلاة فمن تركها فقد
كفر) .. وهو كإنسان كبير وعاقل مايجهل هالامور ..ويدري انها اذا ماتابت
لربها الفراق هو الحل الوحيد..استغرب نفسه كيف يحس بهالشعور وهو
كان يحبها حب جنوني .. وتزوجها رغم انه متأكد انه اهله راح يرفضون
هالزواج شكلا ومضمونا ..قراره اتخذه وراح يقوله لثنتينهم .. وماعاد همه
الحين شي .. مادامه مقتنع باللي يسويه..
فكر يكلم الجوهرة بالاول قبل يفاتح جمانة بالموضوع ..ارسل لها قبل
يتصل لانه داري مهما اتصل ماراح ترد ( السلام عليكم ,,, ادري انك
زعلانة علي وماتبين تكلميني ..بس والله عندي كلام ولا زم اقوله لك
ابيك بس تسمعيني واوعدك اذا ماعجبك كلامي ماراح اتصل فيك ابد ..)
دقيقة او ثنتين وجاه مسج منها ( ياسر وش تبي مني حنا خلاص انتهينا)
انقهر منها ومن كلامها هالبنت عنيدة .. مع انه حاس انها بداخلها تحبه
بس عنيدة .. ارسل لها ( هالمرة بس اسمعيني )
وانتظر يجيه منها رد .. بس تأخر ردها .. توقع انها رضت باتصاله ..
اتصل فيها وهو متوتر ومو عارف شلون يبدا الكلام معاها : السلام عليكم
الجوهرة: وعليكم السلام
ياسر: شلونك؟
الجوهرة: الحمدلله .. آمرني
ياسر: لهالدرجة تبين الفكة مني؟
الجوهرة: لا بس مابي اطول عليك وانت متصل علي مكالمة دولية
ياسر: مايهم كل هذا .. انا اليوم ابي افهمك كل شي وابي منك قرار..
جوجو والله العظيم اقول كلامي هذا ولاتعتبرينه ضعف مني .. لا والله
هذا شي من الله .. وعمري ماتخيلت بيوم اني راح احبك او اتعلق فيك
انا قررت واخترت .. بس ابي قرارك انتي..
الجوهرة..وقلبها دقاته تسارعت من الخوف من هالقرار : وش قررت؟
ياسر: انتي .. ابيك انتي
الجوهرة: وجمانة
ياسر: اذا قلتي لي بهاللحظة انك تبيني والله لاترك العالم كله مو بس
جمانة عشانك ..
الجوهرة: ...............
ياسر: اذا مترددة راح اترك لك فترة تفكرين فيها .. بس تأكدي اني
اخترتك وانا مقتنع انك الانسانة الوحيدة اللي راح احس بسعادتي
معاها..
خنقتها عبرتها .. ودموعها نزلت على خدها ... ماعرفت تعبر ولا
تتكلم ..
ياسر: جوجو واللي يخليك ارحميني قولي اي شي .. تبين وقت
تفكرين؟
الجوهرة: لا
ياسر: زين وشو؟
الجوهرة طلعت كلماتها عفوية ...: اذا انت بتترك العالم عشاني
بشرط .. انا راح اترك الدنيا عشانك بدون شروط
تنهيدة طلعت من قلب مشتاق .. فرحته اليوم ماتضاهيها اي فرحة
واللي تمناه وتحقق .. واكيد ماراح يندم على قراره اللي اتخذه ..
لانه استخار ومتأكد ان الخيرة فيما اختاره الله :جوجو واللي خلقني
احبك ..بس ابيك تساعديني اصحح غلطتي .. وانا اوعدك اني راح
امسح كل صورة شينة رسمتيها عني..
الجوهرة: ان شاء الله
ياسر: وادعي لي ربي يهديني ويرضي والديني علي
الجوهرة: اللهم آمين...
ياسر: يعني خلاص راضية علي؟
الجوهرة: متى بتطلقها ؟
ياسر : اليوم
الجوهرة: متأكد من قرارك؟
ياسر: مليون في المية .. ولا في مجال للمقارنة اصلا .. احس اني
كنت غبي ..
الجوهرة: محشوم
ياسر: والله العظيم غبي.. ولا وش جاب بنت خالتي وبنت ديرتي
عند وحدة غريبة لا هي منا ولا فينا.. والغريب اني ما اشوفها الا
وقت النوم .. بس مادري ليش كنت راضي بحياتي معاها.. يمكن
لاني كنت اخاف من الحرام ..بس من عرفتك وحبيتك .. تمنيتك
لي .. وماحسيت بقيمتك الا يوم فقدتك..
الجوهرة انحرجت وسكتت بعد
ياسر: جوجو بجي لك هالاسبوع وترجعين معاي
الجوهرة: لا لا خلهم بعد شهرين
ياسر: اووووف شهرين يالظالمة؟ كل هذا عناد
الجوهرة: لا والله بس عرس خواتي وابي اكون معاهم بهالفترة
بعدين اعتبرهم فترة ملكة .. ماعشناها قبل خلنا نعيشها الحين
ياسر: بس كثير والله شهرين
الجوهرة: بتعدي وانت ماتحس.. اهم شي الشقة الكئيبة اللي كنت
فيها مابيها ..
ياسر: ابشري باللي يرضيك
الجوهرة: جعلك تبشر بالجنة
ياسر: وياااك يارب..هذا آخر كلام عندك؟
الجوهرة: ايه ...
ياسر: يعني اعتبر اني توني متملك عليك ؟
الجوهرة: هههههههههههه ايه
ياسر: جعلها دوم هالضحكة
الجوهرة: وياك
ياسر: زين الحين انا بسكر انتبهي لنفسك ولا تتغلين علي لا اتصلت
عليك ردي..وحنني قلب خالتي علي
الجوهرة: الله يحفظك ..
سكرت منه وهي مو مصدقة اللي سمعته ... ماتدري هي بحلم ولا
بعلم .. فرحانة وفرحها تجاوز كل حدود .. هي دعت ربها وصلت
له الليل .. يسخر لها قلب ياسر .. وربي ماخيب رجاها .. وهاللي
صار اليوم نساها حزن سنة كاملة ارقها واتعبها ...







*************************






صحى ع المغرب .. صلى وبدل ملابسه . . وطلع من شقته
متوجه للشركة اللي تشتغل فيها جمانة .. يبي يعلمها بقراره
رغم انه بالفترة الاخيرة وكل ماصار بينهم مشاكل هددها بالطلاق
وحاس انها ماراح تتأثر كثير بهالشي ,,, خصوصا انه ماصار
يحس انها تحبه مثل ماكان يحس اول ...
وصل للشركة وراح لها مكتبها .. وكالعادة مالقاها بالمكتب .. توجه
لاقرب زميل لها وسأله عنها .... قال له انها طلعت من نص ساعة
ممكن تكون راحت للمطعم القريب من الشركة اغلب الموظفين
يروحون يتعشون فيه ... بوقت بريك العشى ...
راح للمطعم .. يبي يشوفها هناك .. تلفت حوله ولمحتها عينه شافها
بأسوء صورة ممكن يشوف فيها الزوج زوجته .. جالسة هي وشاب
مبين عليه من جنسيتها .. كانت قريبة منه حييييل ومميلة نفسها عليه
وهو محاوط كتوفها بيده ...
كاسات الخمر كانت تعتلي طاولاتهم ... وحركاتهم .. كانت تثبت له
ان اللي بينهم مو مجرد زملاء عمل .. راح لها وهو في قمة غضبه
صحيح هو كان بايعها وماراح تهمه اصلا ..بس اللي قهره انها كانت
تخدعه وهو معمي ومايشوف خداعها ... اول ماشافته جاي لها
والشرر يتطاير من عيونه ارتاعت .. وتوترت وصارت ترتجف من
خوفها .. مسكها من يدها وضغط عليها بقوة وصرخت الم قال لها
وهو يرص على اسنانه: حرف واحد مابي اسمع ..قدامي يالله وعن
الفضايح .. لا اكون ذابحك اليوم..
مشت معاه بكل انصياع لانها تعرف ياسر اذا عصب مجنون ومايشوف
اللي قدامه ... وصلو للشقة ورماها ع الكنبة ..: هذي آخرتها يالحقيرة؟
لميتك من الشوارع ونظفتك ... بس للأسف تظلين طول عمرك زبالة
(تكرمون )
جمانة: انا شو عملت ؟ لاني قاعدة مع رفقاتي قلبتا عليي
ياسر: تسكرين .. وطايحة بحضن الحبيب وماسويتي شي؟ مسكها من
يدها مرة ثانية وهو يصارخ عليها : قولي لي وش فيك ساكتة؟ ولا
هالاشكال اللي تعجبك ...
جمانة: ياسر ماتزلمني مش هيك القصة ..
ياسر: اجل وشو يامحترمة ؟ فاهم الموضوع غلط ..معتبرته مثل
اخوك يعني؟ الصورة وواضحة ومايحتاج ترقعين ... تراني كرهتك من زمان
وكرهت طاريك .. وكرهت اي شي يربطني فيك .. صدقيني انتي مو كفوك
رجال .. انتي ما كفوك الا هالخمة ..
جمانة بتمرد: رجااال... وانت عامل حالك رجال.. ومرتك قاعدة
عندك شهور مالمستا..
ماحست بأي شي بعد كلمتها هذي ... الا بيده على خدها .. خلتها تفقد
توازنها وتطيح على الارض من قوة الكف اللي جاها ..: لانها عزيزة
ما ارخصت نفسها عشان فلوس ,, وهي دارية انها وسخ دنيا ..
بنت ناس ومتربية صح .. وماتبيني الا لا تركت اللي مايسوون ماطاها
قومي .. اطلعي من قدامي .. لا ابي اشوفك ولا اسمع لك طاري
االلي شفته اليوم كفاني .. والله اني كنت حاس من زمان وادعي ربي
انه يكشفك لي والحمدلله اللي شفتك قدام عيني ومحد علمني..
جمانة: ياسر مشان الله
ياسر: ضفي وجهك بس انتي تعرفين الله ؟ روحي يابنت الناس انتي
طالق ..
صرخت بأعلي صوتها : ياسر لأ
مسكها من ايدها قومها ..: براااا ولا ابي اشوف رقعة وجهك ابد ومثل
مالميتك من الشارع حافية منتفة.. ارجعي له باللي عليك وخلي حبيب القلب
ينفعك ..



[ خسيتي لعنبو جدك خسيتي والغلط ينعاب
خسيتي (واقلبي وجهك) ولا كلمة ولا اجابة ..
..

[ خسيتي (والزمي حدك) تراها ضاعت الآداب
انا لا طاشت جنوني يعرف الجاهل آدابه ..

..
[ وش المغزا من الكلمة بلا داعي بلا اسباب
وهرج (الكذب والتجريح) قوليلي وش اسبابه ..

..
[ انا الشرهة على اني فتحت لخافقي كم باب
ولكن مثل ماجيتي ترى (كبر الجمل بابه) ..


..
[ خذي نفسك معك برا ثم انقلعي بدون اياب
فمان الله ولا اقول فمان (ابليس واصحابه) ..

..
[ تحسبيني على الفرقا ابندم واغرق الاهداب ؟
انا مبسوط يوم اني (طردت الشوم) وغرابه ..

..
[ انا ما اعاشر (الخاين) ولا اسمع هرجة الكذاب
ومثلك قمته عندي ( تحت الزيرو ) حسابه ..

..
[هذاك اللي تحبينه (حقير وخكري ولعآب )
عاجبك ان قذلته شقرا ويميل بالشعر كابه ..

..
[صحيح انه حقير وزين وشكله (للنسا جذاب)
تشبه باخته فلانة ومنها الدم متشابه ..

..
[ وانا مانيب حرف الجر تجرينه على الاعراب
انا حرف(ن) جزم نفسه (ومثلي يصعب اعرابه) ..

..
[ تشوم النفس من زينك عقب ماطاح فيه ذباب
وانا حر(ن) ولد احرار تركت الزين وذبابه ..

..
[ انا شيخ ولد شيح بذكره تنعم الانساب
اليا قام العرب كلاً يراجع دفتر انسابه ..

..
[ ولد شيخــ(ن) وسط ربعه له بين الرجال حساب
الى ضاقت به الارياء (يهز الارض مشعابه) ..

..
[ محنكني على الطيبة من يومي صغير وشاب
اجل وش رايك بطفلــ(ن) (دلال القهوة العابه) ..

..
[ ترى بدري على مثلك تعيب وساسها معياب
ياليت اللي يعيبني يحاول (يستر ثيابه) ..

..
[ انا لا جتني الزلة من الجاهل وهو كذاب
تركت القافلة تمشي (وراها تنبح كلابه) ..

..
[ وانا اليا من كشفت ان الخوي اصبح لسانه داب
نزعت السم من عرقه وكسرت بمخلبي نابه ..

..
[ خلاص اليوم يافلانة (كرهتك) والقلوب اغراب
وترى كل طير(ن) بكبد السما يشبع بمخلابه ..

..
[ خسارة مثلك بقلبي تضمه غرفة الاحباب
وخسارة غلطة العاشق يحطك اول احبابه ..

..
[ بعد هذا تبين ارجع لجل عينك نصير اصحاب
خسيتي (واقلبي وجهك) ولا كلمة ولا اجابة ..


( تكرمون عن كل كلمة قوية جت بالقصيدة *_* )






**********************************






رايحين البنات اليوم للسوق ..اريج وعبير وندى يبون يتقضون لزواج
بنات عمهم ...
عبير: قولو اي درجة احلى الغامق والا الفاتح؟
اريج: شوفي كل الدرجات واختاري اللي تعجبك
عبير تأشر على قماش لونه اخضر: هذا حلو صح؟
ندى: لا تعالي شوفي هذا جنان
اريج: ايه هذا خامته حلوة
عبير: بس مو الشك اللي فيه اوفر؟
ندى: انتي مابتاخذين منه كثير مو تبين تسوين فيه موديل الصدر بس
عبير: اوكي
اريج: لا تاخذينه وانتي مو مقتنعة فيه بعدين تكرهينه
عبير: لا بالعكس مرة عاجبني .. بس آخذ رايكم
شرت عبير اللي اختارته هي وخواتها ..وطلعو من المحل ..
اريج: تعاااالو ناخذ لنا اكسسوارات
ندى: انتظري اروج وراك طايرة .. وين راحت عبير؟ يااااربي خلوني
بلحالي هالخبول.. وراحت تلحق اريج..: وجع ان شاء الله
اريج: وشو؟
ندى: طايرة وانا مطارد وراك امشي بركادة
اريج: ابي اخلص بسرعة قبل يجي بندر
ندى: يعني السوق بيخلص اليوم ... الزواج وبقى له وقت يعني يمدينا
ننزل اكثر من مرة
اريج: وانا ماشريت للحين الا الفستان.. عبير وينها؟
ندى: انا ادري عنكم قعدت اعد بالاكياس اللي بيدي ومالقيت احد بعدها
اريج: شرايك بهالحلق؟
ندى: حلو
اريج: حلو شوي ولا كثير
ندى تناظرها باستغراب : حلو يعني حلو وش هالاسئلة
اريج: احسك مو مقتنعة مرة .. دقي على عبير شوفي وينها
ندى تتصل على عبير : وينك؟
عبير: انتو اللي فينكم؟
ندى: في اكسسوريز
عبير: اهااا انا قريب .. خلاص جاية
اريج: زهقت والله احس مافي شي حلو
ندى: انتي اللي ذوقك صعب
عبير: هاااه اخذتو حاجة؟
اريج: لا ماعجبني شي
عبير: طيب تعالو نتعشى ونرجع يوم ثاني اليوم مرة تعبت
اريج: يلا احسن بعد
راحو للمطاعم وراحو خذو لهم عشا وقعدو بوحدة من الجلسات ..
ندى: عبورة بروح معاك وصلوني البيت
اريج: ليش ناصر وينه؟
ندى: طالع مع اخوياه
اريج: طيب انا اوصلك بيت عمي على طريقي
ندى: لا استحي من بندر والله .. على الاقل مع خالي عادي
عبير: لا خلاص تروح معانا .. بس خلصي بسرعة لانه فهد جاي
في الطريق خلاص...
ندى: طيب.. وقعدو يتعشون البنات بعدها بربع ساعة طلعت اريج
وقعدو ندى وعبير ينتظرون فهد ..
ندى: الحمدلله اللي خلصت عشاي قبل يجي
عبير: هههههههههههه هذا اللي همك؟
ندى: اي والله..
عبير: يلا شوفيه يتصل .. وردت عليه : هلا حبيبي
فهد: هذاني واصل اطلعو بسرعة
عبير: اوكي جايين .. يلا ندو
ركبو السيارة وسلمو ..
فهد: هاااه خلصتو مقاضيكم؟
عبير: ههههههههههههه عمرك شفتني اخلص كل حاجة من نزلة وحدة
للسوق؟
فهد: مادري قلت يمكن الله هداك
عبير: لا لسى دوبي شريت القماش بروح المشغل .. يفصلونه ليه ..
وبعدين اشتري باقي الاكسسوارات
فهد: الله يعين بس انتو قبل اي عرس تبدا عندكم حالة الطواريء.. وانتي
ندى نفسها؟
ندى: والله توني ماشريت شي الفستان وبالمشغل ..وماشفت شي عجبني
فهد: الله اكبر.. سوق بكبره ماعجبك شي؟
ندى: عاد انتو يالرجال تحسبونها سهلة حدكم ثوب وشماغ ويالله السلامة
في اشياء تعجبني بس ابي الوان تناسب فستاني ما القى .. واللي تناسب
اللون ماتعجبني
فهد: والله ياكثر تشرطاتكم يالحريم .. مايعجبكم العجب
ندى: طالع من يتكلم بس .. انتو اللي مايعجبكم شي... تشوفين عبير؟
عبير: شايفة وساكتة
فهد: افاااا قلبتي حرمتي علي .. انزلي بس ولا عاد اشوفك ابد
ندى: ياحبي لك والله يافهود.. تصبحون على خير
فهد+ عبير: وانتي من اهل الخير ..
ومشو راجعين لبيتهم ...دخلو البيت ومرت على ام فهد قبل مايدخل فهد
عبير: السلام عليكم؟ مانمتي لسى؟
ام فهد: والله ماذقت طعم النوم راسي بينفجر..
عبير: طيب قومي خلي فهد يوديك المستشفى
ام فهد: لا خليني برقد ولا قمت من باتسر بتزين اموري
عبير غطتها : طيب اجيب لك حاجة؟ يمكن الضغط مرتفع
ام فهد : لا الله يوفقتس مابي الا اني انوم
فهد سمع اصواتهم وشاف الساعة 11 ونص استغرب امه تكون صاحية
هالوقت: السلام عليكم
ام فهد: وعليكم السلام .. هلا بوليدي
فهد: وش فيك يالغالية عسى ماشر ورى مارقدتي؟
ام فهد: مافيني الا العافية ..
عبير: خلاص فهد خليها ترتاح .. راسها مصدع شوية
قرب فهد وحب راس امه : سلامتك يالغالية ماتشوفين شر...
ام فهد: الشر مايجيك وانا امك
فهد: يمه تكفين تونسين شي؟ تبيني اوديك المستشفى؟
ام فهد: والله مافيني شي
فهد: زين يمه ارتاحي الحين .. ومن صلاة الفجر بجي اشوفك ..
لو شفتك تعبانة باخذك للمستشفى
ام فهد: على خير ان شاء الله ..
طلعو من عندها .. ومايدري ليش فهد ماكان متطمن على امه حس
انه فيها شي بس ماتكلمت ولا قالت .. طلعو جناحهم وهو متضايق
عبير: شفيك؟
فهد: مادري مانيب متطمن احس امي فيها شي.. من وجهها مبين انها
تعبانة
عبير: الضغط مرتفع عليها شوية .. بس حتى مارضت اني اسوي لها
شي
قعدو بالصالة اللي بالدور العلوي ... قعدو يتفرجون على التلفزيون وحست
عبير ان فهد متضايق عشان امه .. وماتلومه اكيد مافي اغلى على الانسان
من امه ...( الله يخلي لي امي .. ويحفظ لكم امهاتكم يارب )
على الساعة 2 الا ثلث توجهو لسريرهم وفهد للحين شايل هم امه .. وعبير
ماحبت تضايقه او تقول شي وخلته على راحته ..
وكثر ماحاول فهد انه ينام بس ماغفت عينه طول الليل ...وعبير كانت
بين وقت ووقت تحس فيه يتقلب على الفراش .. وعرفت انه مو قادر
ينام: فهد
فهد: همممم
عبير: مانمت
لف فهد وجهه عليها: خايف ... اول مرة اشوف امي كذا
عبير: طيب قوم نوديها المستشفى وتتطمن
فهد: اخاف ماترضى .. شوفي الساعة كم توها 2 وربع
عبير: مو هي تصحى هذا الوقت تصلي صلاة الليل؟ يعني اكيد صاحية
اذا لسى تعبانة نوديها المستشفى
فهد: بس مانامت بدري
عبير: مو مشكلة نشوف ونتطمن عليها ..
نزل فهد قبل عبير... وهي لبست روبها ونزلت بعده ..
اول ماوصلت آخر الدرج سمعت صوت فهد وعرفت انه فيه شي صاير
دخلت الغرفة شافت ام فهد طايحة على سجادتها .. وفهد عندها مو عارف
يتصرف...راحت له ركض : فهد وخر عنها شوية دقيقة
فهد صار يتكلم ومايدري هو وش قاعد يقول : امي راحت ياعبير
عبير تحاول تهديه وبنفس الوقت تشوف نبضها : فهد استهدي بالله وشغل
سيارتك خلنا نوديها .. ان شاء الله بتقوم بالسلامة
كانت تكلمه وهي حاسة انه مو مستوعب هي وش قاعدة تقول طلعت ركض
للتليفون تبي تتصل على اي احد..اتصلت على خالد .. مايرد <<طبعا نومه
ثقيل..ماعرفت وش تسوي .. راحت لغرفة الشغالة : سنتيا قومي شوفي امي
بسرعة..
ورجعت تدق على تركي .. اللي رد عليها مفزوع : هلا
عبير: تركي تعال بسرعة امي مضاوي طايحة علينا وفهد منهار .. اخاف
يصير علينا شي قبل نوصل المستشفى.. قبل تكمل كلامها شافت فهد طالع
وهو شايل امه وسنتيا تساعده..
تركي : الحين جايكم
عبير: خلاص فهد بيوديها بس تعال هناك
تركي: وين بتروحون؟ اي مستشفى؟
عبير: مادري بروح الحقهم واتصل فيك
ركضت وخذت عباتها .. وطلعت معاهم .. شافته توه يركب امه بالسيت
الخلفي.. وسنتيا تصيح عندها <<عاد ياحب الشغالات للعجز ..
ركبت قدام وطار فهد وعبير تحاول تهديه ...
دقايق ووصلو المستشفى .. دخلوها الطواريء.. وانتظرو اي شي يطمنهم
عليها .. تذكرت ان جوالها بالبيت وهي قالت لتركي بتكلمه .. وفهد بعد
جواله مو معاه ...: سنتيا معاك جوالك؟
سنتيا: يس مدام
عبير: هاتيه بسرعة
سنتيا: بس مافي رسيد
عبير: هاتي انا اشحن لك بس ابغى اسوي مكالمة ضرورية .. مدت لها
الجوال .. وخذته عبير منها : في رقم تركي؟
سنتيا: يس
اتصلت على طول بتركي وقالت له اسم المستشفى .. دقايق وهو عندهم
تركي: هااا بشرو .. وش صار؟
عبير: مادري لسى محد قال لنا شي .. وفهد من اول ماجينا مايتكلم ..ماقلت
لاحد؟
تركي: لا مابي اشغل احد خلينا نتطمن عليها بالاول...







*********************************






الفجر أذن وللحين محد طلع لهم او قال لهم شي التوتر واضح
على وجيههم .. وغادة اللي من صحت وماشافت تركي نايم جنبها
حست انه صاير شي .. وبعد ما اتصلت قال لها انه امه مضاوي
بالمستشفى بس طمنها انها بتقوم بالسلامة ..طبعا غادة ماصدقت وحست
انه مايبيها تقلق وبعد ماحلفته .. قال لها الصدق ..
تركي: غادة امي لا تعلمينها
غادة: تركي لازم اجي اشوفها
تركي: يابنت الحلال وين تجين .. يعني بتغيرين شي اللي الله كاتبه بيصير
بعدين من بيجيبك هالوقت
غادة: تركي تكفى طلبتك ..وربي ماراح ارتاح وامي مضاوي بالمستشفى
تركي: زين تجهزي دقايق وانا عندك ... راح لعبير : عبير روحي لفهد
لاتخلينه لحاله
عبير: مو راضي يكلمني
تركي: اي بس خليك جنبه
عبير: طيب .. فين بتروح انت؟
تركي: بروح اجيب غادة .. اي شي يصير كلموني
عبير: اوكي
راحت لفهد ... قعدت جنبه .. حاولت تكلمه بس كان صامت .. وفهد من
النوع اللي اذا خاف او تضايق ما يحب يتكلم ... يقعد ياكل بنفسه ..
بس حست انه قاعد يدعي لامه .. وكان مغمض عيونه .. ومبين عليه
الخوف ..
دقايق وطلع لهم الدكتور ..وتعابير وجهه ماتبشر بخير : السلام عليكم
عبير: وعليكم السلام ... وفهد طبعا ينتظر الجواب بس
الدكتور: الوالدة تعرضت لجلطة في القلب بسبب ارتفاع ضغط الدم
وما اخفي عليكم حالتها خطيرة .. دعواتكم لها ..
فهد تكلم بعد صمت طوييييل: دكتور احلفك بالله في شي مخبيه عنا؟
الدكتور: لا ابد .. وانا من واجبي كطبيب احطكم في الصورة كلها ..
الوالدة راح نجري لها عملية مستعجلة .. محتاجة منكم الدعاء
وراح من عندهم .. واثنينهم كانو منهارين ويبكون .. حتى سنتيا
كانت تصيح معاهم .. ومن مايبكي على ام فهد .. الطيبة اللي طيبتها
غطت على الكل ..
دقايق وجا تركي مع ابوه وامه وغادة ... طبعا ابوه من شافه جاي من
برا وقت الصلاة حس انه في شي صاير .. وهو علمه الصدق
وامه بعد عرفت يوم شافتهم طالعين ...
قالت لهم عبير كل شي .. والوضع صار مأساوي بالمستشفى ...
ومازالو بلحظات بانتظار انتهاء العملية ... وماتأتيهم بعدها من اخبار
اما نجاح هالعملية او فشلها ... والله يقومها بالسلامة ..





*
*
*
*
*
*














الجزء الثالث والعشرين




*
*
*
*
*
*


من ياخذ الدمعة لعينه ويعطين ..
.. بسمة أمل واعطيه في الناس همي
من خط لي في داخل القلب حرفين ..
.. حرفين عز وذاك يفداه دمي
ماغيرها تاجي على حاجب العين ..
.. أمي ولا أحد في العرب غير أمي



بعد انتظار طال امده ... نجحت عملية ام فهد والحمدلله بس للحين
حالتها مو مستقرة..
ابو تركي: فهد خذ مرتك وروحو ارتاحو لكم شوي..
فهد التفت لا بو تركي والتعب مبين على وجهه :وين اروح وامي
طايحة بالمستشفى
ابو تركي: وقعدتك بالمستشفى مابتغير شي ارتاحو وتعالو بعد صلاة
العصر
فهد: انا مرتاح عند امي.. اذا عبير تبي تروح خل واحد من اخوانها
يوديها..
ابو تركي: اللي تبيه ..
فهد اسند راسه على الجدار وغمض عيونه ... وكل تفكيره بأمه الغالية
صحيح انها ولدته وهي بآواخر الاربعين وطول عمره بطفولته ومراهقته
كان يشوفها تكبر بالسن قدامه .. وكل مادعا لها بطولة العمر .. تقول له
انه مابقى من عمرها شي وتبيه بس يدعي لها بحسن الخاتمة.. بس محد
يرضى على امه .. محد يبي يفقدها ولو وصل عمرها للمية ,, يكفي
ريحتها .. ووجودها في البيت .. يكفي دعاها بالروحة والجية.. وحنانها
اللي عن الدنيا يكفي...
وبزخم هالمشاعر ... ماحس الا بلمسة يد على كتفه : قوم نشوفها بالعناية
فهد: شفتها انت؟
خالد: لا توني بروح لها ..
قام فهد بسرعة..رايح يبي يشوف امه..كانو سامحين لهم يدخلون يشوفونها
بس اثنين اثنين ولازم يلبسون لبس خاص لمثل هالزيارة ..
دخل لها لحاله .. ومن شافها والاجهزة حولها انفجر صياح.. دموعه نزلت
غصب ..من اول كان كاتمها بصدره .. بس لاجل اغلى الناس امه تهون
دموعه...ودعا لها من قلب صادق ربي يشفيها ويقومها بالسلامة ..
ماهان عليه يشوفها بهالمنظر اللي يكسر الخاطر ... قعد جنبها ومسك
يدها ... وقعد طول الوقت يناظرها ويدعي لها ربي يشفيها ويقومها بالسلامة



أنا يمه رهن طوعك ومن يسراك إلى يمناك
ولو ما طاوعت كفي أقص الكف لو تعصاك

أنا يمه إذا ضاقت بي الدنيا أجي وألقاك
أجي وأبكي على صدرك ولا أرتاح إلين ألقاك






**************************






ايام عدت وتحسنت حالة ام فهد .. ولو انهم مخلينها بالمستشفى هالفترة
للراحة لأن اي تعب ممكن يأثر عليها ..فهد مازال مهموم من اللي صار
لامه... واحساسه انه بلحظة كاد يفقدها .. راح لها هو وعبير المستشفى
وقت الزيارة العصر ..
دخلو عندها الغرفة وكانو توهم اول الواصلين..راح فهد لامه حب راسها
ويديها ... : سلامتك يالغالية.. شلونك اليوم؟
ام فهد بصوت منهك من المرض: الحمدلله على كل حال..خواتك وينهم؟
فهد: اكيد جايين بالطريق.. وش قال لك الدكتور اليوم
ام فهد: والله وانا امك يرطن فوق راسي مدري وش يقول
فهد: زين بروح اشوفه الحين .. واستأذنهم طالع
عبير قربت من ام فهد: ماشاء الله اليوم احسن..
ام فهد: الحمدلله يارب...
.............: السلام عليكم
ناظرت عبير جهة الباب شافت ام تركي جاية..هي وخواتها ..شوي وجو
البنات ومافضت الغرفة من كثر اللي يزورونها ... واكيد انسانة محبوبة
مثل ام فهد .. بيكونون كثير اللي بيجونها ...
فهد اللي راح للدكتور من وقت اللي طلع من عند امه .. انتظره بمكتبه
الين ماجاه:السلام عليكم
فهد: وعليكم السلام هلا دكتور
الدكتور: هلا بك ..شفت الوالدة اليوم؟
فهد: ايه توني جاي من عندها .. شلونها يادكتور
الدكتور: لا الحمدلله وين كنا والحين وين صرنا .. تحسنت حالتها كثير
فهد: اللهم لك الحمد .. يعني متى بتكتب لها خروج ؟
الدكتور: يومين ثلاث بالكثير ... بس اهم شي تهتم هي بتغذيتها لانها
محتاجة ترجع قوية مثل اول.. وابعدوها عن اي شي ممكن يعرضها
لارتفاع ضغط الدم ..
فهد: والله ماعمر احد زعلها .. حتى اكلها دايم ننتبه له .. بس مادري
وش منه
الدكتور: هذا مقدر من رب العالمين .. والحمدلله اللي قامت بالسلامة
وماتضررت من هالجلطة..
فهد: تسلم والله يادكتور .. وقام يبي يستأذنه : انا بروح لها الحين ...
واتمنى تكتب لها خروج هاليومين لانها تشتكي من قعدة المستشفى
الدكتور: ان شاء الله بعد مانجري لها الفحوص اللازمة .. راح تطلع
معاكم وتنور لكم البيت ان شاء الله
فهد: ماتقصر اخوي.. فمان الله
طلع من عند الدكتور رايح لامه ... لقى البنات عندها وبعد كم وحدة
من معارفهم وماحب يدخل ..
والحمدلله كلها يومين وطلعت ام فهد لبيتها بالسلامة .. مع نصايح من
الاطباء بتجنب الحركة الكثيرة .. والتغذية الصحية .. والابتعاد عن
الدهون .. والاكلات المملحة,, واي عوامل نفسية ممكن ترفع من ضغط
المريضة....






*********************





مجتمعين ببيت ام فهد ... اليوم من العصر والبيت مافضى ناس طالعين
وناس داخلين .. والزيارات وش كثر .. بعد ماراحو الناس بعد العشا
تقريبا ماكان فيه الا ام تركي وفاتن وام عبير وغادة.. ومن نامت ام فهد
طلعو بالصالة يسولفون ...وكالعادة بهالجلسات لازم يكون فيه نقاشات ..
احتد النقاش على ام فهد ومن يراعيها ومن هالسوالف...وطبعا ام تركي
ياحبها تصيد في الماء العكر ووجهت كلامها لعبير:والله من قل الاهتمام
ولا لو انك معتبرتها مثل امك ماصار اللي صار..
عبير اللي كانت دايم مسالمة .. وتسكت عن حقها .. ودايم تقدم احترامها
لاخوانها وابوها على حقها بس هالمرة تكلمت : تتهميني اني مقصرة؟
ياحبيبتي على الاقل انا طول الوقت مقابلتها .. وما اروح انام غير لما
اتطمن عليها .. واول ما اصحى لازم اروح اشوفها وما اقول لك هذا
الكلام عشان حاجة لانه اصلا مايبين في عينك .. انا سويت كل هذا لاني
احبها .. ولانها ام زوجي .. واعتبرتها مثل امي ..
ام تركي: ماشاء الله طال لسانك يابنت سارة وصرتي تردين
ام عبير: رجاء يانورة بنتي ماغلطت فلا تلبسينها الغلط
ام تركي بصراخ: ماغلطت ؟ كل هالكلام اللي قالته وماغلطت ماشاء الله
ونعم التربية
عبير: ايوا ماغلطت .. ولا لازم اسكت عن حقي عشان اكون متربية في
عينك ..
غادة: بس الله يهداكم قصرو اصواتكم ..تبون امي مضاوي تسمع حسكم
وتتعب علينا مرة ثانية..
ام تركي: تسكتيني ياغادة؟ وش عشانه .. ولا ماتبين تعترفين انها مقصرة
عبير: اذا انا مقصرة انتي فينك ماتجي تشوفي امك الا مرة في الاسبوع
وماتجين الا اذا تجمعتو انتي واخواتك ..وهي اللي دايم تشتكي وتقول
بناتي ما اشوفهم..
ام عبير: عبير خلاص ياقلبي ..
عبير: بس ياماما انتي سامعة
ام عبير: انا سامعة وانتي لا يهمك .. والتفتت لام تركي : وانتي يانورة بنتي
لاتتدخلين في حياتها .. انا مربيتها احسن تربية ومحنا محتاجين منك شهادة
لا زوجها ولا خالتي عمرهم اشتكو منها .. لا تجي انتي وتكبري المشاكل
ام تركي وهي مازالت تصارخ: والله قلبتوها علي انتي وبنتك ومسوين فيها
المساكين واللي ظلمناكم
..................: ماشاء الله تبارك الله صراخ وهواش وامي بالغرفة طايحة
وتعبانة
عبير انحرجت من الموقف اللي انحطت فيه قدام فهد الحين بيقول انها ما
احترمت اخته..
ام تركي: شايف مرتك المتربية رافعة صوتها علي ..
فهد: ماشفت شي اصلا .. ومرتي اللي يغلط عليها يغلط علي..
ام تركي: غسلت مخك .. صاير حتى ماتحترم اختك الكبيرة
فهد: مايحتاج احد يغسل مخي .. انا اللي عايش بهالبيت وشايف .. مانشوفكم
الا من الجمعة للجمعة .. تصبحون على خير
وطلع رايح لغرفته ...
ام عبير: عبير روحي شوفي زوجك.. انا رايحة الحين
عبير راحت سلمت على امها : الله لايحرمني منك يارب
ام عبير بصوت اقرب للهمس : ياقلبي انتي طنشي عشان زوجك ولا يهمك
كلامها ..
عبير: ان شاء الله

رجعت تبي تروح تشوف فهد: دقايق وجاية بشوف فهد
فاتن تكلمت بعد صمت طال بكل النقاش:لا عادي خوذي راحتك تركي جاي
الحين بالطريق وكلنا بنروح معاه
عبير: اوكي .. اشوفكم على خير.. طلعت تشوف فهد وهي مستغربة من
حاجتين.. اولا صمت فاتن طول النقاش .. مع انها كانت دايم تظلمها وواقفة
بصف امها حتى ولو كانت غلطانة ,, بس هالمرة سكتت .. واثبتت لها انها
فعلا تغيرت .. ومثل ماوعدتها بقت على هالوعد.. والشي الثاني ام تركي
بعد الكلمتين اللي قالهم فهد سكتت وماعلقت .. حتى يوم طلع مارجعت تتكلم
عليها ..







************************






راحت له الغرفة شافته منسدح على السرير.. قربت منه : كيفك حبيبي
اليوم؟
فهد: بخير.. وش سالفة نورة؟
عبير: ولا شي بس يمكن من زعلها على امها طلع الكلام غصب عنها
فهد: ياااطيبة قلبك ياعبير.. تبررين لها.. ادري انها ماتحبك يعني عشانها
اختي ماتبين تقولين عنها شي؟
عبير: مو كذا والله بس ما احب اتكلم في احد من وراه
فهد مسك وجهها بيدينه : وانا ما احب احد يغلط على زوجتي حتى لو انها
اختي .. وانا اللي شايفك مو مقصرة بشي...
عبير ابتسمت له بحنان
فهد: اليوم امي احسن؟
عبير: ايوا الحمدلله .. فهد لا تشيل هم ولا تقعد تزعل نفسك ..والله ما احب
اشوفك زعلان
فهد: الى الحين مو قادر اشيل من راسي دخلتي على امي وهي طايحة على
السجادة .. وربي حسيته وقف قلبي
عبير: لا تخلي الموقف يأثر فيك اكثر.. وانت شايفها اليوم تسولف معاك
وتضحك.. ومع الوقت بترجع مثل اول واحسن كمان
فهد: ان شاء الله يارب
ابتسمت له .. ومدت يدها تمسك يدينه .. بادلها الابتسامة وهمس لها: احبك
عبير: وانا كمان
فهد: انتي وشو؟
عبير: اموت فيك
رفع يدها لفمه وباسها : تدرين .. كنت مسوي لك مفاجأة
عبير استانست: ايش هي؟
فهد: شلون تصير مفاجأة لو قلتها لك
عبير: انت قلت انو كنت بتسوي يعني تفركشت
فهد: لا أجلتها بس ..تعرفين هالوقت الظروف ماتساعد
عبير: فهد بلا نذاااالة كذا تخليني افكر
فهد: ليش اللقافة .. بوقتها تعرفين
عبير: انا ملقوفة ولا انت؟
فهد: هههههههههههههه وانا وش دخلني
عبير: انت اللي قلت في مفاجأة وانا ما اقدر اتحمل انه في حاجة مخبيها
عني وما اعرفها ..
هالكلمة ضربت لها وتر حساس في قلب فهد : مصيرك تعرفين بوقتها
عبير: لااااا ابغى اعرف الحين
فهد: مافي
عبير بدلع: حبيبي
فهد: مستحيل
عبير: يااااربي ايش يصبرني لوقتها ؟
فهد: هههههههههههه ياحبكم يالحريم لهالسوالف
عبير: طيب يافهد وحدة بوحدة والبادي اظلم
فهد وهو رافع حاجبه: اشوف صار فيها تحدي وتهديد
عبير: انت اللي بديت
فهد: وانا متأكد اذا عرفتيها بتنسين هالتهديد كله
طقته عبير على كتفه : بتقهرني
فهد مسكها من كتوفها وثبتها على السرير وهي تصارخ : افااا تطقيني
عبير ماتت ضحك : والله ما اقصد
فهد مسوي معصب:قولي آسفة
عبير: لا
فهد: قولي آسفة ولا عذبتك.. وقعد يدغدغها وهي تضحك
عبير: ههههههههههههه لا فهد خلاص الله يخليك
فهد: اذا تأسفتي فكيتك
عبير: آسفة والله آسفة
فهد باسها على خدها: ناس ماتجي الا بالعين الحمرا
عبير: انت عارف نقطة ضعفي فلا تفرح بنفسك
فهد بتنهيدة طلعت من القلب: يااارب لاتحرمني منها
عبير: ولا منك يارب








***************************






اياااام عدت بكل هدوء .. تماثلث فيها ام فهد للشفاء والحمدلله ..والاوضاع
استقرت في اغلب العائلات ..
*شهد في شهور الحمل الاولى علاقتها مع خالد مازال فيها نوع من السيطرة
وحب التملك من خالد .. لكن اخف من اول واهتمامه الاول حاليا على ولي
العهد من بعده..
*فاتن حياتها شبه مستقرة مايؤرقها غير غيرتها الشديدة من غلا .. وهذا شعور
فطري وطبيعي ومحد يلومها عليه ... رغم انها مكرسة كل وقتها لوليد وربى
وناسية بوجودهم كل العالم ..وحبها لسعود وصل لمرحلة النضج ..والعشرة
اللي بينهم صارت اكبر من مجرد حب..
*اريج رغم ضحكها وخبالها .. الا انها لحظات تعيش بقمة حزنها على ولدها
اللي فقدته .. ورغم ان بندر كثير يحاول يحسسها ان هالشي مو نهاية العالم
وان اللي عطاهم اول مرة قادر انه يعطيهم ..غير هالشي حياتها مع بندر
مستقرة وعلى احسن مايكون..
*عبير تعدت مرحلة جرحها من ماضي فهد .. ولو ان هالماضي فتح لها باب
للشك ماكان موجود بالاول .. وصارت تخاف من كل تأخير يتأخره فهد او
اي اتصال او مسج يجي له ..وكل خوفها انه يجي يوم وتفقده .. رغم ان فهد
قال لها اكثر من مرة بأنه ماعاش الحب ولا يفكر يعيشه الا معاها..
*ندى حياة شبه مستقرة واوضاعها مع ناصر صارت احسن بكثير خصوصا
بعد ماعرفت شلون تنتشل ناصر من بروده .. وتخليه يفصح لها عن مكنونات
قلبه حتى ولو كان بالشهر مرة .. بس يكفيها شرف المحاولة ..
*الجوهرة تعيش اسعد واحلى ايام حياتها خصوصا وهي تشوف تعلق ياسر
فيها .. واحساسها انه فعلا يبيها وسوا المستحيل عشان رضاها ..وعلاقتها
مع بشاير مستمرة مثل ماتكون علاقات الصداقة الحقيقية .. وفرحة بشاير
برجعتها لياسر يمكن مثل فرحة ياسر نفسه لانها ماتعودت انها تغيب عنها
يوم ..
* اماني ومشاعل استعدادات لحفل زواجهم بعد كم يوم بس .. والفرحة
تغمر العائلة كلها خصوصا بعد حل مشكلة الجوهرة...
* نوف وحفل زواجها اللي راح يكون بعد اسبوعين .. على حاتم ..تعيش
حبها باجمل فصوله.. وكل يوم عن يوم حبها لحاتم يكبر .. ولهفتها وشوقها
لليوم اللي يجمعهم فيه بيت واحد يزداد ..
*غادة وبداية حمل في طفلها الثالث اتمت فيه سعادتها وسعادة زوجها
خصوصا بعد ماسافرت هي وتركي للبنان وقعدو فيها 10 ايام ابتعدو فيها
عن الناس وجددو فيها حياتهم وكسرو روتين الحياة الممل ..
*لمى حب كبير تحمله في قلبها لماجد قدرت تأسره لعالمها وتعلقه فيها ...
وتعيشه حب ماظن انه بيوم راح يعيشه بعد وفاة زوجته .. انسانة صادقة
طيبة حببت حتى اهل زوجها فيها ... حتى جنى تعلقت فيها .. ولمى تحاول
قد ماتقدر ترضي زوجها ... وتطمنه على بنته...
*خالد انسان هادي وبارد كعادته .. اكثر مايؤرقه شعوره ان شهد تروح مكان
وهو مو معاها ..ودايم يعاتبها انها اذا صارت مع البنات تنساه وماتسأل فيه
وانها ماعاد تهتم فيه مثل اول واذا يبي يرتاح قال لها خليك معاي وما احبك
تبعدين عني..
*سعود انسان عاقل يحاول يوزن حياته ويكيفها على معيشته بين زوجتين
كل وحدة فيهم غيرتها نار.. وكثر مايحاول يرضي ثنتينهم ومايظلم وحدة
فيهم الا انه يميل لفاتن بمشاعره وهالشي خارج عن سيطرته .. ومن رب
العالمين وماله فيه حيلة..
* بندر يحب اريج حب جنوني .. يعشق عفويتها وبرائتها .. يكره انها
تعزل نفسها اوقات بصومعة احزانها .. وكثر ماحس بالحزن بوقتها الا انه
اقوى منها وعاش حياته عادي لانه مؤمن ان الله راح يعوضهم ..
*فهد اكثر مايفكر فيه بهالفترة حاجتين.. امه وخوفه الكبير انه يفقدها خصوصا
بعد طيحتها الاخيرة .. والشي الثاني اسراره اللي مخبيها عن عبير.. ومو
عارف شلون يرتاح منها .. يخاف يصارح عبير فيها وتكبر المشكلة ..
وبنفس الوقت يخاف يخبيها .. وتنكشف قدامها واللي اظهر جزء منها بالاول قادر
بانه يظهرها كلها ...
* ناصر محاولات منه لارضاء زوجته المتطلبة احيانا .. كثر مايشوف انها
تحاول تخليه يظهر مشاعره ويعبر عن حبه لها ..ومايلومها لانه يعرف وش
كثر هي رومانسية وحالمة .. وتعيش حياتها في عالم وردي .. وهو نقيض
شخصيتها تماما .. بس من حبه لها يحاول يعيش معها بنفس جوها ولو كان
وقت قصير بس..
*ياسر يعيش بلحظات سعادة وعذاب بنفس الوقت .. سعادته برضى والدينه
عليه ورضى الجوهرة واهلها ,, وموافقتها انها ترجع له..وعذابه اللي يحسه
من بعد الجوهرة عنه بهالفترة على كثر شوقه لها.. ومن احساس انه عاش
مخدوع فترة طويلة في انسانة كان معمي بحبها...وتجرأ انه يغلط على اغلى
الناس عشانها بس للأسف طلعت ماتستاهل كل هذا ..
* حاتم .. وشعور غريب يحسه بهالفترة .. كثر مايحس انه فرحان بزواجه
وانه راح يكمل نص دينه .. الا انه يطلع له بأوقات هاجس لو كانت عبير
عروسته .. وبلحظات معاتبة للنفس يحس ان نوف مالها ذنب في اللي يحسه
خصوصا لا سمع منها وش كثر هي تحبه ..
* تركي انسان يعيش حياته بكل عقلانية .. ناضج بما فيه الكفاية انه يكون
سند لكل من يحتاجه .. اب حنون وزوج محب.. ومعطاء ,, واخ موجود
بوقت الحاجة .. وابن بار ,, ورجل قيادي وعملي ..متوازن في كل خطوة
يخطوها بحياته .. ماعمره فضل شي على شي ثاني .. لذلك هو محبوب
من الكل وعمره محد اشتكى بيوم عليه ..
*ماجد..رغبته الملحة في استمرار حياته خلته ينجح الى الآن بهالزواج ..
حبه للمى كل يوم يكبر ولو انه يفتقد جنونه ورومانسيته المفرطة اللي
كان يعيشها مع ملاك .. لكن بهالفترة حس انه ماغلط يوم اختار لمى
وهالاحساس مخليه يعيش قمة سعادته ...


** هذي نبذة مختصرة عن اهم الشخصيات ... تفاصيل عن حياتهم
مشاعرهم .. انطباعاتهم ... واهم الاحداث في حياتهم خلال هذي الفترة
ومازال للاحداث بقية ...






***********************************






اليوم الاحد وبكرة عرس اماني ومشاعل ...والبنات مجتمعين ببيت عمهم
ناوين اليوم كلهم ينامون عندهم ... الساعة 10 ونص بعد العشى ...
الجوهرة وهي ترتب اغراض مشاعل اللي بتاخذها الفندق :ميشو تعالي
شوفي وش ناقص
مشاعل وهي جاية تشوف شهقت : هيييييه صاحية انتي شيلي هذا والله
ما اخذه
الجوهرة: يابنت الناس عادي هذا رجلك
مشاعل: رجلي افصخ معاه الحيا من اول يوم؟ وربي قصير مررررة
الجوهرة: انا ماقلت بأول يوم .. عادي بأي يوم واصلا بتلبسين الروب
ولا هو شايف اصلا
مشاعل: اجل ليش البسه
اريج: حطيه ماعليك فيها .. انتي خوذيه والوقت اللي يناسبك البسيه
عبير اللي قاعدة ترتب بادوات مكياجهم وعطورهم هي وندى: مررررة
روعة الخمرية .. ريحتها جنان
اريج: تفداك عبورة ,,, حلفت عليك تاخذينها ماتغلى عليك والله
اماني تناظرهم : وشووووو؟ من حلالك هو تعطينها
عبير: ههههههههههههه ما ابغاه اصلا ..
اريج: اقول روحي نامي بس .. بكرة من الروعة ماتعرفين تنامين
اماني : والله انه ذابحني التفكير مدري شلون يطلع شكلي .. وافكر
شلون بيكون العرس.. وشلون الفستان .. وكل هالتفاصيل
عبير: بتعدي اصلا من غير ماتحسين
ندى: اي والله بتتمنين بعدها لو ينعاد العرس والزفة تبين تعيشين
نفس الشعور مرة ثانية ..
فاتن: جوجو ياسر متى جاي؟
الجوهرة: والله ما أكد لي للحين بس قال يمكن الاسبوع الجاي للحين
ماقدر يستأذن من كليته..
اريج: ياااقلبي على اللي يستحون .. لهالدرجة طاريه يخلي خدودك تورد
الجوهرة: ههههههههههههه والله احس اني توني عروس
فاتن: عادي عيشي جوك ... مادامك ماعشتيه بالاول
اريج: يلااا عاد ننزل تحت بالصالة
ندى: اي انزلو انتو انا بنوم فروس واجيكم
اريج: بتنومين فروس ولا ابو فروس
ندى: وجععععع ان شاء الله .. وش هالكلام
اريج: عادي كلنا متزوجات
ندى: لا ناصر يعرف ينام من حاله .... بروح انوم فروس وتعليقاتك
السخيفة احتفظي فيها لنفسك
اريج: ههههههههههههههههه ياحليلها استحت.. وماحست اريج الا بالمخدة
على وجهها
البنات ماتو ضحك عليهم ... وبعدها نزلو تحت كملو سهرتهم ..
الجوهرة: بنات ترى الساعة صارت 1 وربع .. خلونا نروح ننام
اريج: الصدق انه فيني نوم ..
الجوهرة: اروج معاي بغرفتي .. وفاتن مع اماني .. وعبير مع مشاعل
فاتن: ماشاء الله موزعتنا بكيفك؟ شايفة نفسك بكشافة
الجوهرة: عاد شوفو اللي تبون بكيفكم اهم شي اروج عندي
اريج نطت عندها وحبت راسها: ياعمري ياجوجو ياحبي لك
عبير: انا عادي عندي اصلا احس من اول ماراح احط راسي على
المخدة بنام
مشاعل: انا اللي والله ماعاد اشوف
اماني: والله الخاينة ندو .. هي اللي نايمة مع رجلها
ندى: اصلا انتو حسبتوني من الاول ؟ مطلعيني من القائمة..
عبير وهي ترقى الدرج:ماتقدر تستغني .. وانا قعدت ساعة اترجى فهد
يرضى وبالقوة رضي..
ندى: عاد انتي صاحية رجلي معاي بنفس الدور واجي انام عندكم
اريج: والله ودي اعلق بس اخاف ما اخلص الا هالتحفة بوجهي
ندى: هههههههههههههههههه اي احسن خليك ساكتة ماتقولين الا طامات
اريج: زين تصبحون على خير..وخلي اللزاقة عنك ترى الرجال يحب
يغير جو عشان يشتاق لمرته
ندى: ماشكالك هو عاجبه
اريج تكش على وجه ندى:قلعتك انتي وياه..ودخلت الغرفة هي والجوهرة
الجوهرة: والله مرهقة ابي ارتاح
اريج: بسرعة ابي بيجاما
الجوهرة: افتحي الدولاب وتنقي اللي تعجبك
اريج قعدت تفتش بالدولاب.. وشافت الجوهرة تطقطق بجوالها: بتنامين؟
الجوهرة: ابي اكلم ياسر بالاول... سلامات لا تخبصين لي الدنيا خوذي اول
وحدة توني اليوم مرتبته
اريج: زييييين لا تدفين ..لازم يعني تكلمينه؟
الجوهرة: هو دايم يكلمني قبل ماينام
اريج: اوف للحين مانام؟
الجوهرة: الحين توها 10 ونص يعني هذا وقت نومه
اريج: زين لاتناظرين ابي ابدل
الجوهرة: اقول انقلعي بدلي هناك
اريج راحت الحمام ( تكرمون ) تبدل: اوكي انا بنام لا تزعجيني
الجوهرة: لعنبو دارك بغرفتي وتتشرطين؟
اريج: اقول لا يكثر بس
الجوهرة جت تبي ترد عليها بس من شافت الرقم اللي يتصل عليها نست
اريج .. وكل كلام اريج: الو
ياسر: هلا وغلا حبي
الجوهرة: هلا بك
ياسر: وراك مقصرة صوتك ؟ في احد عندك
الجوهرة: ايه اريج بنت عمي نايمة عندي
ياسر: بغرفتك؟
الجوهرة: ايه
ياسر: وعلى سريرك؟
الجوهرة: ايه بس بعيد عني شوي
ياسر: ليش هالعذاب يعني؟ انا اللي ابيك وميت عليك وماحصل لي
قربك .. واللي مايبونك عندك
الجوهرة استحت من كلامه: بكون عندك عمري كله ان شاء الله
ياسر: وحشتيني وربي وحشتيني .. وماعاد فيني صبر اكثر
الجوهرة:.............
ياسر: وانت اكثر ياقلبي
الجوهرة: ههههههههههههه استخفيت انت؟
ياسر: والله من الحرة اللي فيني.. حني علي يابنت الناس شوي مو
عشان ملكتي القلب صرتي تتغلين ..
الجوهرة: والله ماتغليت عليك.. بس صعبة شوي
ياسر: عشان بنت عمك؟
الجوهرة: ايه
ياسر: زين مابي احرجك .. نامي انتي وبكرة على خير اكلمك
الجوهرة: ان شاء الله
ياسر: هاتي بوسة
الجوهرة: روووح بس
ياسر: تعالي عندي انتي وربي لاخذها غصب
الجوهرة والحرارة تحسها تطلع مع اذونها : باي
ياسر: ههههههههه فمان الله
سكرت وهي تناظر جوالها ومبتسمة .. وانتبهت على اللي قاعدة
تطالعها : قاطة معانا؟
اريج: هههههههههههههه والله وناسة انكم تعيدون فترة الخطبة
الجوهرة: تحسين بشي؟
اريج: لا بس حسيت كأنكم رجعتو عرسان من اول
الجوهرة : عادي اللي ماعشته بالاول اعيشه الحين
اريج: الله يوفقكم ويجمع مابينكم على خير
الجوهرة: اللهم آمين يارب,, يلااا خلينا ننام
اريج: تصبحين على خير
الجوهرة: وانتي من اهله
وماهي الا دقايق وغط كل البيت في سبات عميق .. حتى العروستين






********************************






البنات تجهزو من بدري ..وكشخو .. وهالحين يحطون اللمسات الاخيرة
على اشكالهم قبل يروحون القاعة اللي بيكون فيها الزواج ...
فاتن: اريج تعالي لبسي ربى
اريج جاتها ركض: الحين ماتحسين انه بيكون ازعاج عليهم
فاتن: لا ياشيخة بالغرفة محد يجيهم.. انا كل شوي بروح اتطمن عليهم وايما
بتكون معاهم
اريج وهي تلبس ربى: ياااعمري عليها هالقمر والله
فاتن: اريجوه بشويش لاتكسرين رقبتها
اريج: ياقلبي... فتون احط لها شباصة ؟
فاتن: لا شوفي هناك ربطة الشعر ..
اريج بعد ماكشختها: يمه عليها ودي آكلها
فاتن: بتروحين معاي ولا بندر بيجيك؟
اريج: لا قلت له لا يجي بس بروح مع فهد كان قعدتي معانا
فاتن: ياشيخة وين زحمة انا وعيالي والشغالة يبي لنا سيارة بلحالنا
الجوهرة: هاااه خلصتو؟
اريج: ايه متى رايحين؟
الجوهرة: امي من اول تتصل تبينا نجي .. وناصر مطول شوي
فاتن: تروحين معاي؟
الجوهرة: لاصاحية انتي ..اروح مع سعود
فاتن: عادي وش فيها
الجوهرة: لا عادي ننتظر بس اذا قدرتو روحو انتو وشوفو امي مابيها
لحالها هناك
اريج: ماهيب لحالها كلهم معاها ..
عبير: يلااا اروج ماشين
فاتن: وانا بعد هذا هو سعود وصل.. ايمااا تعالي شيلي وليد
الجوهرة وهي تشوف ندى تلبس عباتها: ندى رايحة معاهم؟
ندى: ايه
الجوهرة: وانا؟
ندى: نص ساعة ويجيكم ناصر
الجوهرة: وليش ماتقعدين معانا؟
ندى: وين ماتكفي السيارة انتي قدام والعرايس ورى
الجوهرة: زين
شوي وراحو كل البنات .. ومابقى الا الجوهرة وخواتها ..
بعد ربع ساعة اتصل فيها ناصر يبيها تنزل تاخذ اغراض توديها
لخواتها ..
نزلت وهي تركض مع الدرج ..وشافت ناصر واقف قدامها : وين
الاغراض ؟
شافته واقف وهو مبتسم ويناظر وراها التفتت تشوف..وانصدمت بمكانها
ماصدقت عينها وهي تشوفه واقف قدامها ..لحظة نست معاها حتى وجود
ناصر.. كان ودها تطير بحضنه .. لولا خجلها اللي خلاها تتراجع ...
بهاللحظات ناصر انسحب واثنينهم مو حاسين اصلا .. قرب منها وهي
تحس بتوتر فظيع ..:وحشتيني .. وحبها على جبينها
الجوهرة ضاع منها الكلام من شافته .. شلون الحين وهو بهالقرب منها
ياسر: وش هالجمال كله؟؟ بتذبحيني ترى
الجوهرة: ليش؟
ياسر: اخاف اتهور واخطفك حتى عرس خواتك ماتحضرينه
الجوهرة شهقت وهو ضحك عليها ...: تدرين عاد انك قليلة حيا حتى
الحمدلله على السلامة ماقلتيها
الجوهرة: الحمدلله على السلامة
ياسر: شلونك؟
الجوهرة: تمام.. ليش ماقلتي لي انك جاي اليوم؟
ياسر: واخرب على نفسي اشوف هالفرحة بعيونك
الجوهرة ابتسمت له وهو كمل : مابي اطول الحين ناصر مهددني ما اعطلكم
بعد العرس.. ابيك تروحين معاي
الجوهرة: شلون ما معاي شي؟
ياسر: وش تبين يعني؟
الجوهرة: ملابسي واغراضي
ياسر: ملابسك واغراضك انا جبتهم معاي
الجوهرة: لا والله مابيهم انا ماخليتهم هناك الا لاني مابي البسهم
ياسر: مو بكيفك .. بتلبسينهم غصب
الجوهرة: مو صاحي انت
ياسر: لازم يعني كل ماتشوفيني نتهاوش؟
الجوهرة: لا بس باخذ لي شوي اغراض
ياسر: يالله بنتظرك في السيارة
الجوهرة: بنروح مع ناصر
ياسر:ناصر بياخذ خواتك انا مرتي مابي احد يوديها غيري يالله اغراضك
اللي تبينهم جيبيهم بخليها بالسيارة..بروح اقعد فيها انتظرك..وخواتك قولي
لهم يطلعون لناصر..
راحت الجوهرة لغرف خواتها وهي فرحانة قالت لهم ينزلون .. وراحت
غرفتها ... خذت اهم اغراض تحتاجهم ... ونزلت ..
رغم انها عاشت معاه كم شهر.. الا انها تحس كأنها اول مرة تشوفه ...
او تجلس معاه ... بس بنفس الوقت مستانسة انها قاعدة تحس وكأنها
توها عروس ..
تغطت وطلعت له..ومن شافها نزل واخذ الاغراض منها وحطهم بالسيارة
وركب سيارته وناظرها : غطي وجهك زين ..
الجوهرة ابتسمت بداخلها على غيرته..من عرفته وهو كذا:هذاني تغطيت
مسك يدها .. ومشى فيها .. كان ماشي على مهله .. وكأنه يعيش معاها
لحظاته الاخيرة ومايبي يفقدها .. وهي كانت مستانسة على هالوضع
ونست اهلها اللي ينتظرونها بالقاعة ...
الجوهرة: ماتحس انك مضيع الطريق؟
ياسر: لا ... بس ابي اسولف معاك.. مستانس فيك
الجوهرة استحت من كلامه بس لازم تروح الزواج: تأخرت عليهم
ياسر: طيب بوديك لهم .. بس لا اتصلت فيك تطلعين لي على طول
الجوهرة: ان شاء الله
وداها للقاعة ... وهي ماودها تفارقه ... ونزلت رايحة لهم اول من
صادفها اريج : ماشاء الله كان قعدتي بعد .. ولا من لقى احبابه نسى
عرس خواته
شهد: هههههههههههههههه لاعبة في المثل
الجوهرة: وانتو ماشاء الله وصلتكم الاخبار بسرعة
اريج: واصلتنا الاخبار من اول ودارين عن حبيب القلب من وصل
الجوهرة: يالنذالة ورا ماعلمتوني؟
ندى: هو يبيها مفاجأة بس شرايك
الجوهرة: يااااحبي له وربي يوم شفته بغيت اروح له ركض.. واقسم
بالله يوم اروح له السيارة من نظراته بغيت اتكرفس واطيح
اريج: هههههههههههههههههه من الطفاقة .. تعالي فوق وانتي جاية مثل
المعازيم...
طلعو للعرايس شوي وبعدها نزلو تحت .. رقص ووناسة ...
وقبل زفة اماني بدقايق وصل للجوهرة مسج ... احساسها قال لها انه منه
وفعلا ماكذب احساسها ...


( اعرف انك ما تصدق بس والله فوق والله
والله انه راح مني نصف عمري في غيابك
واعرف اني شلت همي تارك حبي على الله
كني ابعد من نجوم الليل واقرب من ثيابك