ديوان الشاعرة / ينابيع السبيعي

أشجان الفؤاد

أخفيت حبك في الفؤاد وتدعي
أني اجتنبتك .. رغم كل ودادي

أو تدعي أن الجفاء هوايتي؟
كلا وربك.. أيها المتمادي

إني غفرت لك الجفا وإن اكتوى
مني الفؤاد فأنت كل مرادي

رحماك قد زادت همومي، وارتدت
شمس الضحى جلباب هم حدادي

فارجع ليسقي الورد بعد ذبوله
طل الهوى ويثوب غصن رشادي

وارجع لنرقص كالعصافير التي
بسمت ملاحنها لثغر الشادي

وارجع نناجي الحب في غسق الدجى
نورا يشع كبدر نخل بلادي

ونعيد أحلام الفؤاد شجية
ونحقق الأمال زهو مرادي

فيعود للقلب الجريح دواؤه
وتعود فينا روعة الإنشاد

أحساء النخيل

أحساء يا عبقا هتان أورقة
بين الحنايا عبير بات عنوانا

أحساء يا ماضيا عشناه حاضرنا
ثبنا نؤرخه للدهر ألحانا

أنت العلوم ومنك الفن منبعه
وكنت من قبل للآداب ميدانا

فيك الثقافة يا أحساء ساطعة
نور الثريا ضياء الروح أهدانا

أحساء عطر إذا هبت نسائمه
تمايل النخل بالأزهار نشوانا

فيك البساتين ريح المسك فائحة
مثل البخور إذا ما فاح أزكانا

احساء أنت لداء النفس بلسمه
أنت الدواء وماء الورد أغرانا

فيك العيون ينابيع وأودية
تسقي القريب ومن في البعد عطشانا

تنساق أقلامنا باللحن منشدة
تنساب أصواتنا بالشعر ألحانا

فيك القصائد ما غنت بلابلها
إلا إليك جمالا صيغ أوزانا

فيك الدعاة لدين الله قد جعلوا
فيك العقيدة لا تختل ميزانا

أحساء يا بلدا للنخل معذرة
فالقلب يحيي ودادا فيك أزمانا

"يا خاين العشره"

ياخاين العشره عسى الله يجازيك
على فعايلك الغريبه ومبداك

غدرت في قلب يحبك ويغليك
خنت العهد والنور ضاع بزواياك

لا تدعي بالصدق ماعاد يمديك
يوم انكشف معدنك والوقت عراك

إحساسك اقبح من سذاجة مباديك
والزيف بسلوبك كشف لي نواياك

مايذكرك قلبي ولا جاب طاريك
أصدق وفاي أحرقت كرته بيمناك

نفسي عزيزه عنك مافكرت فيك
خلاص أنا ماعاد يعنيني أرضاك

حطمت منهو بالليالي يداريك
وارخصت قلبن بالمحبه تمناك

قلبن عشق نبضك وهاجس طواريك
يكتبك بحروف القوافي ويقراك

أيام فاتت بالأماني يناجيك
يسقيك من فايض حنانه ويضماك

مافاد صوت بالقصايد يناديك
ولا فاد حلم يقتفي ليل مسراك

الشعر حرفه مايجسد معانيك
والفرق شاسع لا تهجيت معناك

مبطي يقولون العرب نوب مغليك
يصبح مع الايام من جملة أعداك

واللي يخون بعشرته لو يصافيك
لابد مايطعن خفوقك ويجفاك

عهد قطعته ماتناسى تجافيك
واقسمت باللي يعلم الغيب لانساك

مادام قلبك يحتفي في معاديك
واللي يحبك صار أول ضحاياك

خلك على فالك برجوى أمانيك
تسهر ليالي في متاهات ذكراك

وياخاين العشره ترى القلب ناسيك
والله مايستاهل الحب شرواك

"مواثيق الغلا"

كتبتك داخل أوراقي .. حفظتك صفحة بكتاب
لقيتك هاجس افكاري .. مسافاتك عناويني

أبيك لرحلتي ميناء .. أبيك لدمعي الأهداب
أبيك اول مسافه للخيال وغربة سنيني

أبيك الحلم لايامي .. أبيك الشوق والإعجاب
أبيك النبض باعماقي .. أبيك الشوف في عيني

أبيك لفكرتي هاجس .. أبيك النافذه والباب
أبيك النور لحروفي .. أبيك أجمل مضاميني

أبيك السيف لانصافي .. أبيك الرمح والمحراب
أبيك اطهر شعور يحتوي طبعي وتكويني

أبيك الغيم والبارق .. أبيك الورد والأطياب
أبيك الريح لاهبت .. أبيك الديم يسقيني

أبيك لصبري الهقوه .. أبيك لعبرتي طلاب
أبيك لفرحتي بسمه .. أبي للضحك تغريني

أبيك برعشة أحساسي شعور الخافق المرتاب
مادام اصدق مواثيق الغلا مابينك وبيني

ألا يا اول مشاويري حضورك ماوراه غياب
غيابك لا تذكرته أحس الموت يدعيني

من اول يوم باقداري تمنيتك غلا وعتاب
ومات الحلم في قلبي ولابه من يعزيني

ترى لو صورتك غابت ملامح طيفها ماغاب
بقايا قصة الماضي على الفرقا تواسيني

دخيلك مابقى غير الوداع وشرهة الاحباب
دخيلك مابقى خطوه على دربك توديني

قبل مااقرا تفاصيل الغياب وخافي الأسباب
تأمل هالسطور اللي تجسد كل مافيني

"صبر أيوب"

وينك بفضفض لك بمكنون صدري
صدك بنى في خافقي مستحيله

حتى غدى عرق الحزن سيل حبري
ودموع مكنون الغلا في هميله

كل ما ابتعدت القاك باعماق جذري
حروف شعرك بالمفارق وسيله

موجات حبك بين مدي وجزري
وغيوم صدك عتمة فيك خيله

ابسألك .وش اللي رحل فيك بدري!؟
واللي بقى من ذكرياتك حصيله

وليه انبنى في خافقي ليه مدري؟!
وأنين بعدك بالضماير صهيله

وشحيلتي وانت على ما انت خبري
أعطيت من صدك عطايا جزيله

رزنامة ايامي مضت دون عذري
والحب يسري بالضلوع النحيله

وانت الذي بيديك حفرت قبري
وشيعت جثماني وغيرك يشيله

مصيبة يا كبرها وانت تدري
منك الجروح النازفه كل ليله

هذي حقيقه صاغها فيك فكري
أبيات شعر كالجواهر أصيله

صبرت صبر( ايوب)مافاد صبري
حملي ثقيل حيل ما فيه حيله

هذي النهايه ترجمت بوح شعري
تبقى على مر السنين الطويله

ذكرى غلا من زود قدرك وقدري
بين الأماني والليال الجميله

وآسف ولا لي غيرها منك أدري!
وانا على جمر الغضى و المليله

سلمت لله في سواياك أمري
وجمر اشتياقي في غيابك فتيله

"ولد صقر الجزيرة"
إهداء لسمو وزير الداخلية سمو الأمير
نايف بن عبد العزيز حفظه الله ورعاه

يا قصيدي لا عدمتك وصل المكتوب نايف
بلغه مني تحيه وسلمه المكتوب بيده

(بو سعود)اللي يخصه عندنا ما به كلايف
كل ابونا فدوة له..نتبعه وين ما يريده

صادقه بمدحي وقولي ماهو هرج وقول زايف
ما دخلنا قول زور وصادقه عندي عقيده

سيدي والله عزيز وشامخ بروس النوايف
صاحب اليد الكريمه..ارواحنا دونه شهيده

هو ولد صقر الجزيره ما يهزه قول هايف
السفيه اللي يسبه جعل يبلى في وريده

عزنا يا مملكتنا..ما تلوثها الهدايف
من يحاول زعزعتها دونها رجال شديده

كل خاين خان أرضه ما عليه والله حسايف
ومن حفر للكيد حفره طاح بشباك المكيده

مرخص دينه وعرضه..منعمي ما هوب شايف
كل من فكر وخلا هالخيانه هي رصيده

دمنا للأرض فدوه وكلنا لعيون نايف
والمعزه لمملكتنا ولحكومتنا الرشيده

"خوفي من الله"

جيتك مشاعر صادقه مابها زيف
جيتك حقيقه تحتوي صدق ذاتي

جيتك معاني شامخه بالتواصيف
جيتك بقايا حلم فيه أمنياتي

جيتك كما برد الشتاء باول الصيف
ماردني عنك الرياح العواتي

اللي جمعنا مثل كل المواليف
حلم عشقته في بداية حياتي

حلم الطفوله يازمان الصواديف
أجمل حكايه صورت ذكرياتي

سلم الاصاله فوق كل المواصيف
فيه الحقايق ماتزعزع ثباتي

أسلومنا تدرى المناقيد والحيف
عن هرجة العذال واهل الشماتي

طهر المبادي كنها شذرة السيف
والصدق دربه نور وفيه النجاتي

خوفي من الله مادخل فيه تسويف
مبداي واضح والشرف هو عباتي

مامشي على درب الردى والتحاسيف
قمة شموخي هيبته هي غناتي

ماهمني هرج القفا والملاقيف
حسبي عليهم دعوة في صلاتي

هذا أنا من دون زيف وتحريف
آبوي رباني وهاذي صفاتي

نبع المشاعر للمعاني تعاريف
وابعاد فكري هي عصارة دواتي

كتبتها وأنا على ساحل السيف
وسامرتها بدموعي الباكياتي

طافت بي الفكره كما لمعة الطيف
وعلى الفخر حرفي يجسد سماتي

الشعر معنى .. والمكارم مواقيف
وحروف شعري خيلها مسرجاتي

من صغر سني مالحقني سواليف
لي سيرة عبيرها مفرداتي

أسمي الحقيقي واضح دون تعريف
وآخر حروفي هي بقايا وصاتي

"من يقول ان اللقا لحظة قرار"

يوم زاحو دونها وجه الستار
وانتفض من عينها برق الرجوع

انتثر من طرفها اللاذع شرار
واعتلت بلحونها عرش الدموع

من يمين الكف والكف اليسار
أحترقت لنارها جمر وطبوع

وابتدت ايامها الحلوة تغار
من كثافة ليلها ضحك وشموع

في حنايا الليل واطراف النهار
ماوقف للصبح تغريد الضلوع

من يرد لفاقد الشيء .. اعتبار
كان صدره ضاق والموقف يروع

من يقول ان اللقا لحظة قرار
اعتقد ماهو مثل غيره قنوع

الحياة .. وعزة النفس .. انتصار
كيف أجامل واختفي بين الجموع

يوم زاحو دونها وجه الستار
وانتفض من عينها برق الرجوع

"بصمة ابهام"

واللي على خلقه فرض دين الاسلام
ما مرني طيف الفرح في زماني

أسيرة الأوهام عام ورى عام
ما عشت لحظات الهنا لو ثواني

شكواي لله ..عيشتي عيشة ايتام
واحلام عمري تحتظر في كياني

حالي من اللوعه غدى جلد وعظام
الليل موحش والمواجع مكاني

كني بقايا تنتظر عفو الاعدام
وسيف الزمن باقصى ضلوع المحاني

صرح الأماني حطمه زيف الاوهام
واللي حسبته لي ذرى منه اعاني

ياما لقيته هاجس ونبض والهام
طيف سكني بالغلا واحتواني

من اول ايامي معه لآخر احلام
ياما سقيته بالوفا ما سقاني!!

يوم استعيد الذاكره حفنة اعوام
هاجس خيالي بالأمل والأماني

واليوم نزفي يعتلي رووس الاقلام
واللي بكيته بالغلا.. ما بكاني!!

يوم انتحى بيديه زرع لي الغام
واحرق حروف الحب والشمعداني

قصة حياتي من تباريح وهيام
مضمونها نزف الألم بالمعاني

وجروح قلبي كلها بصمة ابهام
الحلم مرسى والمفارق مواني

بين المسافه والتراجع والاقدام
من صد عني ما عطيته حناني!!

لو القلم نزف تغذيه الآلآم
وطيف الفرح ما مرني في زماني

"يا ما حلا الغدران"

ماحلا الريضان وبيوت الشعر
ماحلا الغدران في وقت الربيع

ونسمة بالصبح عطرها الزهر
تلمس الاحساس بالمعنى الفظيع

والندى ياوي على أوراق الشجر
كنه اللؤلؤ مع الفجر البديع

والنفل ترويه رشات المطر
حوله الاعشاب يرعاها القطيع

ماحلا السهرات مع نور القمر
وشبة النيران وأحبابك جميع

السعادة حلم والحلم أندثر
ماتحقق غير معناه الرفيع

ليت نومي طال مع طول الدهر
دام حلمي لابدى صبحي يضيع