 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
#1
05-01-2019
|
||||||||||||||||||||||||||||||||
|
||||||||||||||||||||||||||||||||
رواية/ وأني عن بحر هواكِ نازح/البارت السابع
7
مدخل "فثوبكِ مثل شعركِ مثل حظي سوادٌ في سوادٍ في سواد " -دعبل """"""""" ناظر بعماد واشر له يدخل خلاص رفع يده للسماعة الصغيرة الي مثبتة بإذنه وضغط عليها سمع صوت حسان :عمر ..تسمعني عمر بهمس :اسمعك ..راح ادخل الان حسان :الله معك طلعوا من الممر الي كانو فيه ومشوا ناحية الشقة الي واقف قدامها اثنين بودي قارد وأول ماشافو عماد وخروا له دخل عماد ووراه عمر الي يناظر الي حوله بابتسامة خفيفة صوت الميوزك كان يرج المكان رج غير ان لمبات الديسكو المجنونة الي منتشرة بالمكان وبكل الشقة مليانين الكبلز لفت نظر عمر واحد جالس بلحاله وعيونه على جواله بدون اهتمام همس لعماد :من هذا ؟ عماد التفت له ورجع ناظر بعمر :واحد من اخويا محمد ..ماهو معهم لكنه ممول لحفلاتهم هز راسه :اها مشى ناحية الصالة الي مكونة من جلسة كبيرة قدامها تيفي وسماعات وباليمين فيه المطبخ الي كان عبارة عن بار وحوله كراسي ووراه رفوف رف مخصوص للمشروبات ورف للكؤوس وقف عماد قدام شلة من اربع شباب جالسين ومعهم خوياتهم ووقف بجمبه عمر عماد سلم على الشباب وقرب من اوسطهم وهمس بإذنه :الي كلمتك عنه ناظر بعمر من فوق لتحت ومد يده ناظر عمر بيده ثم بوجهه وتوقعه يكون هو محمد ..طلع يده من جيبه وسلم عليه محمد :قروبك نبيه يشعلل البارتي الجاي هز راسه وغمز له :ماعليك محمد :مع من كنت قبل ؟ عمر ناظر بعماد ثم التفت لمحمد :كنت منظم لراشد تضايق محمد :الله يرحمه عماد :بتحضر بارتي الويكند الجاي ؟ محمد:اذا لولتي كانت فاضية جينا ..لكن لا تخاف سالم بيحضر مثل كل مرة وبيتأكد انه مو ناقصكم شي التفت عمر لعماد باستفهام عن سالم واشر له عماد بحواجبه على الي قاعد لحاله على جواله محمد :اوكي عمر .. ضروري اقابلك بعد كم يوم ..اتعرف عليك ونتفاهم عمر هز راسه :ماعليك محمد ابتسم واشرله على البار الي وراه :عازمك على كاس على حسابي توتر عماد :بس عمر ابتسم :ماعندي مانع التفت محمد لأخوياه :شبااب عن اذنكم محمد ناظر بعماد :تقدر تروح ..اتركني مع عمر شوي اشرله عمر بعيونه انه امشي ومشى مع محمد للبار راح عماد لأخوياه وهو قلبه مع عمر وكل شوي يطل عليه من بعيد لبعيد وعمر ومحمد جلسوا على طرف البار محمد اشر للي واقف :مثل دايم وهالمرة جرعتين التفت لعمر :دامك كنت مع حفلات راشد ..اكيد مجرب تركيبته هز راسه عمر :مجرب وترقدت بسببها بالمستشفى ماتحملت تفاجئ وناظره :انت عمر الي كنت تحضرله دايم ؟ عمر والي ما اختار انه يبقى بإسمه الا هالشي هز راسه : ايه محمد التتفت مرة ثانية :خلها جرعة وحدة وكاس ثاني خفيف للحلو ابتسم له عمر :وش الجدول هاليومين محمد ابتسم :لولتي هالسمستر بتكمل جامعة ..عشان كذا هالاسبوع جدولنا مكثف لكن راح نخفف من الأسبوع الي جاي ونقتصر على الصباحية ولا الي بالويكند عمر هز راسه :حلو ..انا توي متزوج ..ماخذها كـ كفر للموضوع لأني واجهت مشاكل كثير بأيام شغلي مع راشد محمد هز راسه لأن راشد يعرفه من قريب وقد حكاله عن عمر :حلو .. حسان :موضوع زين كان المفروض سر ..وش صار مارد عمر وناظر بالكوؤوس الي انحطت قدامهم ..كاس صغير انحط قدامه وكاس اكبر منه ومشروبه أثقل لمحمد اخذ محمد كاسه ورفعه لعمر وبسرعة اخذ عمر كاسه وصقعه بكاس محمد وشربوها الاثنين رشفة وحدة وبسرعة محمد حط كاسه على طاولة وناظر الويتر :مرة ثانية اما عمر ماتحمل الطعم حس بالقرف حاول يتماسك وحط كاسه بقوة على الطاولة ضحك محمد :اخذت نقاهة ورجعت من الصفر ضحك بخفة :ماعليه بنرجع اقوى محمد بتحدي :اجل خذ جرعتين الليلة وخلنا نخربها عمر ضحك :هاه تراي ابي ارجع بيتنا مو المستشفى مرة ثانية محمد اشر بيده للويتر انه يسوي كاسين :ماعليك عندي حسان :انتتببه ..هالكاس وتعذربأي شي ..لا تتمادى ويطير مخك عمر :كاس واحد واعتقني تكفى ..محد بياكلها غيري ضحك محمد :ماعليك قلت لك ..اساسًا ابي اعرفك على وحدة ابيك بعقلك يعني انحطت الكوؤوس قدامهم واخذ محمد كاسه وشربه وعمر سحب نفس ولحقه وشربه رشفة وحدة سحب نفس يقاوم رغبته بالاستفراغ من الي بجوفه وهز راسه بقوة وهو يحاول يركز وقف محمد بعد ماجاه واحد وهمس بإذنه فز :لولتي جت ..انتظرني هنا ابتسم له بمجاملة لين شافه يخرج من الصالة بعدها فز على طول يدور حمام اول مادخل الحمام سكر الباب وطاح عند كرسي الحمام يبي يستفرغ الي شربه دخل اصبعه بفمه غصب وما ارتاح الا بعد مارجع كل شي جلس على الأرض وهو حاس بدوخة ونشوة غريبة حسان بقرف :عمر؟؟ معي !! عمر :تتوقع ممكن افصل بالسرعة ذي؟ حسان :عمر انت معي ؟؟ ولد اثر فيك بهالسرعة ؟ عمر ضحك :مادري حسان :قم ارجع انت من قبل لا تشرب جبت العيد شلون بعد ماشربت وقف وراح للمغسلة يغسل وجهه :الله يـ#### ابن الـ#### ولد الـ##### ..هو وتركيبته المتخلفة ..اقسم بالله الطعم بالنخاع كنك تشرب #### ضحك حسان :خلاص الله يقرفك وش هالوصف ..قم اطلع الحين سمعته يبي يعرفك على وحدة عمر :ماعرف ليش مستانس انت وانا اتعذب هنا حسان :على المهمات الي كنا فيها سوا ..اول مرة تضطر تشرب عمر :اص نسيت يوم تعاطيت انفقع ضحك :اهه ذاك اليوم لا ينسى ..بعدين تعال المفروض انك تتحمل الـ قاطعه :يابني ماسمعته يقول تركيبة ..تركيبته بها بلا حسان :لا تنسى اجل عمر :بجيب لك عينة اهجد بس طلع من الحمام وسحب مناديل يمسح فمه ووجهه مشى ناحية الصالة بيرجع يجلس بمكانه ..وانتبه لمحمد ومعه ثنتين جالسين بجمبه اشرله وجا لمه محمد كان مجلس وحدة على رجله والثانية جالسة بجمبها على الكرسي محمد :هذي لولتي ..وهذي صديقتها الي ابي اعرفك عليها ..سحر ناظر عمر بابتسامة لسحر ومد يده :اهلًا لكنها قامت ومدت يدها وقربت باست خده """"""""""" ودق :واقولك ..تهاوشنا هوشة بنت كلب نقدت على نفسي بعدها زين ماتت ضحك :زين نقدتي على نفسك ودق :والله ماتوقعت ابد ..يعني تعرفين هالحركات القرعة حقت البنات زين :ايه خابرتها ..اعرف بالجامعة وحدة تقول اشترت موية من الالة وجاتها وحدة قالت لها ممكن احس الموية !..المهم البنت بحسن نية عطتها تحس الموية وتجي البنت تسحبها وتنحاش فتحت عيونها :يممة خييير زين :شايفة شلون ..على ان الموقف يقهر ..بس يضحك صراحة ودق :لو اني مكانها والله اسحبها من شوشتها مويتي خير زين :والله الناس عجب ودق سكتت شوي بعدين ناظرتها :أقول تراي جعت وقفت زين :امشي معي اجل نشوف وش نسوي ودق :المفروض تقولين ارتاحي زين :لا راحة ولا هم يحزنون ..تراي ماعرف شي..يعني بتساعديني قامت ودق معها :وش عندكم زين :وش مشتهية انتي؟ ودق :ماعرف صراحة ..شرايك نسوي مكرونة بالقصدير ؟ زين :اشوفها بالانستا بس ماقد فكرت اسويها ودق:والله اجل فاتك نص عمرك ..امشي نسويها زين :يلا اجل ..وش مقاديرها اول جلست تقول المقادير وزين تفتش بالمطبخ تدورها : مكرونة أي نوع مو مهم بهارات مشكلة ماجي زيت ملح صلصة طماطم مايونيز كريمة طبخ وقصدير لفلفت بالمطبخ كله تدور الأغراض ماحصلتها:أقول ننثبر ونبلع اللوزين الي جابه عمر ودق :خلاص يختي ارح اجيبه من بيتنا واجي ..انتظري زين :وين بيتك ؟ ودق :بالعمارة الي جمبك استغربت :احسبك بالشقة الي قدامنا ؟؟ ليش جايتني دامك من العمارة الي بجمبنا ؟؟ كيف عرفتيني اصلًا ودق عقدت حواجبها:شلون ليش جايتك ؟ مافهمتك اطلع برا يعني ؟ ضحكت زين :لا شدعوة ..بس استغربت وصلتي لي ودق ابتسمت :ماعليك ..زوجك وخالي اخويا ويوم دريت انه تزوج ونقل عندنا تحمست اتعرف عليك زين :اطلق من يتعرف علي ي شيخة ..يلا روحي بسرعة جيبي الأغراض ودق راحت لم عبايتها :يلا يلا ..حدي ميتة جوع """""""""""" طلع من الشقة مع عمار وخلاه يسوق فيه لين الشارع العام ثم طلع وركب تاكسي يوصله لين نص طريقه وطلع منه وركب تاكسي ثاني وهكذا من تاكسي لتاكسي الى ان ضمن ان محد يلاحقه وان حصل ولاحقه احد فيكون ضاع ..خلا اخر تاكسي يوصله لحسان الي ينتظره بالسيارة طلع من التاكسي بعد مادفع :الله #### خسروني الكلاب ركب بجمب حسان :لي ساعتين وانا من تاكسي لتاكسي ..اخر مرة تواعدني يا كلب حسان ساكت ومارد عليه جا بيلتفت له و حس بتعشيقة سلاح وراه ومسدس يتثبت براسه من ورا ومسدس ثاني براس حسان انقطعت أنفاسه ليييييييييشش توه بدى بالقضية ..كان متأكد محد يلاحقه رفع يدينه بهدوء وهو يدور الفرصة الي يباغت فيها الي وراه لكن فوهة المسدس تثبتت براسه زيادة وصوت مكتوم :أي حركة وربي افجر راسك عرفه من صوته وبسرعة التفت ورا ومده بكف على وجه راكان :ياااا##### انفجرو حسان وراكان ضحك على شكله حسان : اههه ويرفع يدينه متوتر ..شفه شفه عررقق عمر بعصبية :هذا شي ينمزح فيه ؟؟ من متى نتقابل اول ماندخل للقضايا راكان :هد يابو الشباب اشتقنالك بس عمر :اشتقالك المرض ياكلب حسان تحمحم ومسح دموعه :لا صدق ..العميد مرسلني ابلغك بكم مستجد وبعد اخذ منك اللاسلكي استغرب وعدل جلسته :وش صار حسان :تذكر بعد ماعلمته عن عماد ووجه لك بالتنفيذ؟ هز راسه :ايه ؟ حسان بأسف:انا زليت وقلت له انك تزوجت اخته حط يده على وجهه وغمض عيونه :وشطب على اسمي ؟ حسان :للأسف ايه ..بس قال شي ناظره بقهر :وشو حسان :انك تتعاون معنا كمخبر وتكمل دامك بديت ..وكل فيها راكان واسمه نزل بالمهمة رسميًا لكن انت راح تشتغل فيها لكن مو بشكل رسمي سكت شوي ثم ناظرهم بحسرة :يعني مافي ترقية راكان :على حسب اجتهاداتك ومساعداتك راح يحط اسمك او لا انقهر من قلبه شال اللاسلكي من اذنه ورماه على حسان بقهر :حسبي الله حسان :عطاك فرصة..اثبت نفسك فيها يارجل ..وانت ماينخاف عليك مارد عليه حرك حسان السيارة يوصله لبيته راكان :ياولد انا بكلمه اني مابيها ..مو مستعد لقضية مثلها عمر ناظره بقهر :لا تسوي شي..انا بتصرف التفت لقدام وهو وده يأخذ العميد ويقتله حسان :تعال ..وراك قلت لمحمد انك متزوج حاول يشغل نفسه بالسالفة :لأن عمر الي انا منتحل شخصيته كان يبي يتزوج راكان :ووينه هالعمر عمر :ممسوك من فترة بقضية ومرمي بالانفرادي ..محد يدري كون الي حوله مايعرفون عالمه القذر مد يده راكان ونغزه :شلون طعم التركيبة عمر انقرف يوم تذكر الطعم :الله لا يوريك ..شي مقرف شلون يقاومونه لعيون النشوة الي بعدها مادري حسان :هذي الشيطان مزينه لهم .. الله لايبلانا راكان :والحين بتكمل تحضر احتفالاته ؟ عمر :ايه طبعًا ..المفروض يكون معي قروب ..بس دام القضية انسحبت مني ..بفكر شلون اصرف الموضوع راكان بسرعة :بستلم ملفك وبوفرلك القروب الي تبيه عمر بضيق:طيب حسان :تعال وش بتسوي مع سحر عمر تذكر جرائتها معه "" باست خده وهو ناظرها بجمود ويحاول يبتسم :عمر سحر بتفحص :يقول لي محمد انك من طرف المرحوم هز راسه :ايه سحر :وش التركيبة؟ محمد ضحك :ماهو قايل لك التركيبة ..تحلمين ضحك عمر :اصلًا ماعرفها محمد :شفتي ..والله محد يعرفها الا انا وراشد الله يرحمه بوزت بقهر :مصيري اعرف واسحب عليكم -ابتسمت والتفتت لعمر-تحضر معي البارت الجاي؟ ابتسم وهز راسه :لو مامعك احد اكيد ابتسمت وسحبت يده لنص الصالة الي يرقصون فيها """ راكان بقرف: الله يعجل بيومهم ..وش هالمستنقع الي عايشين فيه عمر تنهد :هذا دمار محد مستوعبه ..الله يقدرنا ونمسحهم من على وجه الأرض راكان :ماعرف شلون بتصبر تحضر باقي الحفلات عمر :حضرت الي اخس منهم ..ماني عايز عنهم حسان :الله يثبتك ..بعد الكاسين حقت اليوم الوضع مايطمن ضحك :كل سلح يا شيخ وصلوه بيته ونزل وهو دايخ طلع الشقة ودق الجرس شوي وفتحت له زين الباب دخل بدون مايناظرها ومشى يبي ينام على الكنبة الي بصالة ..انتبه للحوسه والفوضى غير وجهته ومشى لغرفتها دخل ورمى نفسه على السرير بتعب دخلت وتكتفت :هييه خير ..وكالة بدون بواب ؟ مارد عليها ونام عصبت وطلعت للصالة تضف الفوضى :غبي متخلف..وانا بعد غبية مسوية بطفشه وبيطلع نظفت الصالة وانسدحت على الكنبة وهي مبسوطة ..تعرفت على ودق وتغير روتينها ..اتفقت معها بكرا بدون مايحس عمر تطلع معها للنادي تشوفه وتشوف كيف الشغل فيه غمضت عيونها ونامت بعمق """""""""""" بعد اربع أيام وقف رائد سيارته قدام بيت ام معاذ نزلت ودق بسرعة وبيدها بوكيه ورد وكيس هدية ركبت ورا :السلام عليكم رائد بملل :وش هالتاخير ودق :والله سوري حرك متجه للجامعة التفتت لها خولة :وش جبتي لها ؟ رائد :يالله وش هاللقافة خولة :اسكت انت ودق :ورد مثل ماتشوفين وهدية جبت لها عطر من عود ميلانو رائد :ليش شارية عطر ؟ افرضي مايعجبها ودق : لا لاتخاف هذا ذوقها عود وورد ..شي رايق وثابت خولة:الله حلو ..قد شميت من عندهم ..شوفي انا وش جبت ؟ لوحة من فنان معروف خليته يكتب اسمها بلوحة وتعلقه بغرفتها ان شالله رائد وهو فاضي يستقعد لهم :افرضي ماعجبها خولة :مو لازم ..اهم شي عاجبني انا ودق :وانت شفيك ..ليكون مغصوب على التوصيلة ؟ ترا معي رخصة وسيارة معاذ موجودة رائد :اسكتي انتي ..هذا الناقص احط معك زوجتي واتركك تذبحينها سكتت خولة وماردت رائد :على فكرة ..بكرا بكلم عمي ودق :على ؟ رائد :سالفة اني عقيم ودق :يعني طلعت الأوراق ؟ رائد :ايه جهزت خلاص بنزلكم وبروح استلمها ان شالله خولة بمكابرة:عاد احّبكْ التمثيل لا تخبصها ونروح وطي رائد :ماعليك ..بتضبط ان شالله وصلهم الجامعة وتركهم ومشى دخلوا الجامعة وودق ملاحظة خولة فجأة تغيرت فصخوا عُبيهم وتعدلوا ودخلوا بعد ما ابرزوا هوياتهم ودعوات المناقشة ودق ناظرتها :خولة انتي تبين رائد ؟ ناظرتها باستغراب :مافهمت ودق برفعة حاجب :ترا واضح ؟؟ انتي تبينه بس هو لا ؟ صح؟ ماردت وكلمت تناظر قدامها لحقتها وحالفة تنشب لها :يعني سوري بس ماتوقعتك ممكن تتركين رائد يأثر فيك ؟ الي مايبيك عسى عمره لا يبيك سحبت نفس خولة وحاولت تطنشها وودق وراها مستمرة تعطي نصايحها :لا تتركينه يتحكم فيك بدون ماتحسين ..ولا توقفين حياتك عشان شخص وقفت بمكانها من اخر كلمة والتفت لودق وهي خلاص مو فارقة معها :لا توقفين حياتك عشان شخصصص؟؟ انا لما حاولت اتخطاه تركت قلبي معه لأني عجزت استرده مثل ماكان اول ..التجاوز كان صعب لأنه يأخذ منك قلبك وياخذ معه حياتك الملونة ..كل شي يصير باهت لأن القلب الي بيسار صدرك يصير نبضه تأدية واجب وبس ماينبض لأني احب ولا ينبض لأني ابي أعيش وعندي رغبة ..ضريبة حبي لرائد اني اترك قلبي معه وامشي ..شي طبيعي بعد ماطنشته وحاولت ادوس عليه.. اتركه عند رائد مجروح يحتضر كانت تتكلم بإنفعال وتشرح لها وهي تعبانة ..خلاص لين متى بتقعد تكابر ودق انصدمت وماعرفت تسوي شي غير انها تحضنها حضنتها وشدت عليها خولة من قلبها وطاح البوكيه على الارض:انا مابي أوقف حياتي عليه ..ابي اشيله من راسي بس ماقدرت ..كل ما اقفيت عنه الاقيه بوجهي كأن الطرق كلها ناحيته والاتجاهات ماتودي الا له بعدتها عنها وهي تحاول تمسحلها دموعها بدون مايخرب الميكب :اذا ماقدرتي تكرهينه حبيه من قلبك ..لا تقصري على نفسك وعلى حبك مسحت الدموع بمنديل وهي عيونها على ودق :كان يمديني اول ماجاني طالب اني انسى خلاص نستمر..بس كابرت وانا مو قد المكابرة ودق :فيه الوقت قدامك ..لا تفوتينه يا خولة وتعورين قلبك بكرا لا طلقك وتزوج وحدة ثانية ..محد بياكلها على وجهه الا انتي كأنها فوّقتها من تخيلت رائد يتزوج بعد مايطلقها نزلت واخذت بوكيه الورد الي طاح منها بعد ماحضنت ودق :امشي لا نتأخر ..المناقشة بتبدا مشت معها وهي شايلة همها ..على قد حماسها لهاليوم وحماسها للجامعة والناس الي فيها الا انها نست كل شي بسبب مشكلة خولة دخلوا للقاعة الي راح تتم فيها المناقشة وحطوا هداياهم على الطاولة الي فيها كيكة التخرج وباقي الهداية كانت عبارة كان ثلاث قواعد خشبية فوقهم طاولة بيضا مفروض عليه مفرش اسود بطريقة مايلة حتى تبان اطراف الطاولة البيضا ثم فوقها مفرض ذهبي اصغر وفوقه مفرش اسود اصغر يبين المفارش الي تحته كخطوط وعلى الجدار ورود مرتبة ومتجمعة على الزاوية ورقية لونها اسود وورقها ابيض ومرشوش عليه قلتر ذهبي ومسوينه كانه باقة بحيث انه مايل والورد مكبوب ومتناثر..هذا كل على الجدار وفوق الطاولة بشوي بالزاوية المقابلة للورد مكتوب لطيفة راحت خولة وسلمت علي عماتها هنادي وسعاد وجلست ودق بجمبها بدون ماتسلم عليهم ناظرت ودق في لطيف الي جالسة وقدامها دكتورتين مناقشات وبالشاشة الي بجمهم دكتور مناقش ومحكم بدأت المناقشة واستمرت ساعتين ونص الى ان خرجوا المحكمات حتى يتصلون بالدكتور ويتناقشون معه على النتيجة التفتت لطيفة لهم وابتسمت بتوتر اشرت لها ودق بإبهامها وجمبها خولة أرسلت لها بوسة تشجعها عشرة دقايق ودخلوا الدكاترة وجلسوا تكلم الدكتور :اليوم الخميس الموافق 23 جمادى الاول ..تمت مناقشة الطالبة لطيفة محمد الجالك من قسم الخدمة الاجتماعية في رسالة الماجستر بعنوان صعوبات التعلم وثغور العقل الباطن وقد حصلت على نسبة 95% وتقدير ممتاز سائلين الله لها التوفيق اول ما قال النسبة قاموا الحضور من أهلها ومن صديقاتها يصفقون ويصارخون بفرح لها وقفت بفرح وسلمت على المناقشات وطارت لأمها الي تبكيها من بعيد حبت يدها وراسها والتموا عليها البنات يسلمون عليها ويباركون لها ودق شوي وتصيح :يمة تأثرت خولة صاحت خلاص:حبيتي هييي راحولها وسلموا عليها ودق :حبيبيي لطفف الف الف مبروووك عقبال الدكتوراه يارب ابتسمت لها لطيفة :عيييوووني انتي خولة مانتظرت ودق تفكها حضنتهم الاثنين :يمممةة قللببيي والله صحت كاني انا الي ماخذة الماجستير مو انتي لطيفة :يممة حبيبي ماننحرمم منك يارب """"""""""""""" الأربعة الأيام الي مرت غير فيها طارق بعقيل كثير اول شي سواه حلق دقنه وشنبه ورتب شعره واخذه السوق وتقضاله ملابس وثياب تكفيه ورجعه البيت وصار يعلمه على العايلة شابك الجوال بتيفي وفاتح على صور جماعية للعيال كبر على صورة مطلق :الحين من هذا ؟ عقيل :مطلق ولد عبدالباري طارق :كفو ...الحين وين اخوه رائد ؟ عقيل :الي جمبه ولابس كاب طارق :وين يشتغل عقيل :بالسفارة طارق :كفو عليك بطل ..وين عبداللطيف ؟ ناظره عقيل :جمب عبدالباري ..لابس غترة طارق :بالضبط وين مؤيد؟ عقيل :مؤيد اخوك هناك جالس طارق سكر الجوال :كذا خلاص ماتحتاج شي..الحين ننتظر عزيمة الليل الي تكشف فيها نفسك عقيل احتار :بس؟ طارق :وشو بس عقيل ناظره :انت متأكد انهم اهلي ؟ طارق هز راسه :ايه ؟؟ انت لك توام اسمها ودق ..هي الي شفتها بالمرزعة ..عبداللطيف اخوك هو قالي بنفسه ان ودق عندها اخو ومات ..كلهم بيفرحون اذا شافوك عقيل :ممكن تفتح الصورة مرة ثانية فتحها مرة ثانية :شوفهم تم يتأملهم واحد واحد ..يدور ملامح امه فيهم بس عجز ناظر طارق وهو متحسف على كذبته ..بس ضروري يثبت وجوده ثم حقيقته بتبان بعدين ناظر معه بصورة عبداللطيف وهو كارهه من قلبه ..ملاك وبداخله شيطان رن جواله باسم واحد من اخوياه فصله من الشاشة ورفع :هلا :السيارة جاهزة وينك ؟ تذكر هديته للطيفة :جايك الحين وقف :عقيل انا رايح وبرجع العصر تمام هز عقيل راسه ومارد عليه وطلع طارق من عنده متجهه للمكان الي يبي يروحه ناظر عقيل بالشاشة السودة الي بالتيفي وهو غارق بأفكاره ويحاول يسترجع كلام امه عن ان اهله الحقيقين هم سبب الي هو فيه ..ودايم تحذره بأن الأقارب عقارب مهما صار تذكر وجه عبداللطيف الي شده ..يقول طارق انه اخوه حس انه حبه من ملامحه السمحة لكن بنفس الوقت حس بالغموض وكل الي شافهم خايف منهم ..اذا هم اقاربه اكيد انهم عقاربه """""""""""""" قبل ستة أشهر دخلت المجلس وكلام لطيفة ببالها :اغرقيه بعادات حلوة ترسخ بباله ..وراح يفتقدها اذا تركك ..خليه يبدى يقارن بينكم بدون ماتجيبن له سيرة ..سوي تحقيقات عنه ثم ابهريه بشخصيتك الفريدة ناظرها بملل :تراك تاركتني هنا ربع ساعة ناظرته :والله سوري كنت اتابع مسلسلي باللاب وكان يحمس ..ماحبيت اقطع اللقطة خصوصاً وشوي تنزل الحلقة مترجمة رفع جواله :وشهو المسلسل اخذت دلة القهوة وراحت تقهويه :اسمه بليـ#### يحمس مرة رفع راسه وناظره بصدمة :تتابعينه ؟ هزت راسها ببراءة ومدت الفنجان :ايه ..لا تقول تشوفه اخذ الفنجان بحماس وحطه على الطاولة :اممموتت فييه ..جيمي اسطورة راحت جلست وهي تشوفه شلون متحمس ويشرح رايه عن المسلسل ..شافت من سناباته لقطة له وهو مصور الشاشة على المسلسل وراحت سوت تحريات لين طلعت من تويتره المسلسلات الي يتابعها وتابعت اغلبها لين تفقعت عيونها :اايييه عاااد ما احب منهم الا باترسون رهيييبة عدل جلسته :ذي فناااانة ..يعجبني تمثيلها أحيانا اكثر من جيمي بكبرها خولة :طيب رومن ؟ صراحة حتى هو رهيب كشر :ماحبيته طفولي مستفز ..بزر ماعرف ليش مربي لحية خولة :حررراااام يحزن ..والله كله بسبب جين ودي تنتحر وتفك العالم من شرها رائد :لااااااا الا جين ..سووو بيوتي سوو سمارت خولة :يلا عاد لا نختلف بالنقاش هنا رائد ابتسم :ماتوقعت احد يتابعه..والله انك رهيبة خولة ابتسمت على تكراره لكلمة رهيبة :قل قل وش تتابع غيرهم خلني اشوف ذوقك رائد :امممم كوانـ### و ذا#### فتحت عيونها بصدمة مصطنعة :و قيم #### وشار##### ضحك مو مصدق :لااا مو منجدك ؟؟؟ يشيخة انا مجنون مسلسلات ضحكت هي بعد :احلللففف رائد :والله شويتين ورن جوالها وجواله بنغمة رسايل فتحت جوالها ورفعته له على تنبيه من نتفلكس ان الحلقة نزلت وهو نفس الشي لف جواله لها على نفس التنبيه ضحك :امشي نشوف الحلقة سوا يلا وقفت بحماس :ثواني اجيب اللاب وشوي مفرحات من المطبخ واجي هز راسه وقعد ينتظرها وهو متحمس ومبسوط """""""""""""""""" دق جوال ودق برقم غريب استغربت ردت :الو ؟ بصوت مستعجل :ودق انتم عند البوابة رفعت عيونها للطيفة وامها وخالتها وخولة الي واقفين ولابسين عُبيهم :مين طارق :انا طارق ..اسمعي تراي جايب هدية للطيفة مستأجر سيارة لموزين تاخذها للمطعم ..ابيك بس تلفتين انتباهها له ..اوكي ؟؟..يلا بسرعة تحمست :خلاص تمام ماعليك مشت ناحية لطيفة :لطططف التفتت لها وهي تلبس نقابها :عيوني ؟ ودق :امشي معي انا وخولة ؟؟ شرايك ام طارق سمعتها :خير ان شالله وشوله ؟؟ ماردت عليها ودق وسحبتها بسرعة وشالت شنطتها واشرت لخولة الي طلعت وراها :هيه اصبري رائد مادق باقي شافتهم وقفوا مشت وقفت جمبهم باستغراب:وش فيه ناظرت قدامهما لقت سيارة ليموزين طويلة مكتوب عليها بالقلتر :الف مبروك الماجستير ..من طارق و مؤيد شهقت لطيفة بصدمة :حباايبيي طلع من السيارة وهو لابس نظارته الشمسة وثوب ابيض ووراه اخوه ومع طلعتهم طارت بالونات هيليوم من السيارة على فوق ودق الي من درت وهي تصور اول ماطلعوا مشت لطيفة ناحية طارق وحضنته وهي ماهمها احد من الي حولها وخولة رفعت جوالها تحمست وقعدت تصور هي وودق يوثقون الحدث قربت منهم وودق وهي تصور مؤيد وهو يحضن لطيفة ويسلم عليها طارق:خذي الحين البنات وبيوصلكم السواق للمطعم الي حاجز لكم فيه لطيفة :يا حبيبي انت ..كلفت على نفسك ابتسم :لا تكلفة ولاشي ..عيوني انتي وهذا يومك ناظر مؤيد بودق :شلونك ودق قرب طارق وسحب مؤيد :انا ماقلت لك ماتكلم هالاشكال؟ امشي معي بنروح لا نأخرهم ..خلنا ناخذ امي وخالتي ناظر مؤيد بصدمة بطارق وماعرف يرد لأنه لخمه بينما ودق انرفع ضغطها من حركته وتوعدته ناظرت لطيفة الي تأشرلها تركب التفتت لخولة ونادتها وركبت """""""""""""""""" الليل ببيت ام طارق بعد إصرار من لطيفة رضت ودق انها تحضر العزيمة بشرط انها تقعد بغرفتها وماتبي تختلط بأحد وقف لها معاذ السيارة قدام البيت وكان مليان سيارات نزلت بنفس اللحظة الي وقف فيها مطلق قدام سيارة معاذ فتح اللمبات بقوة على معاذ ينبهه بوجوده ودق ماعرفت منهو ودخلت داخل عادي خفض اللمبة ووضح وجهه لمعاذ فهمه معاذ ورجع بالسيارة ورا ومطلق يسوق قدامه ويتقدم لين لف معاذ بالسيارة ومشت السيارتين جمب بعد وهم يحكون بعض ..لمكان لقائهم اما بمجلس الرجال كان طارق جالس مع العيال وعيونه مركزه على خواله الي جالسين بصدر المجلس اخذ جواله ورن رنة وقفل وهو يناظر برائد الي يسولف مع سعد صوت هادي من عند الباب :السلام عليكم ؟ التفتوا كلهم للباب وهم مستغربين منهو هذا وقف عقيل بربكة :انا ولدكم عقيل الجالك """""""""""""" مخرج "فقلبك مثل روحك مثل ظني نقاءٌ في نقاءٍ في نقاء" 
 
|
|
05-01-2019
|
#2 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
ماشاء الله تبارك الرحمن
ذوق في اختيارك وعافيه عليك وعلى الطرح الراقي لاحرمك الله رضاه لك كل تقديري واحترامي مجنون قصآيد
|
|
 
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
