ديوان الشاعر / مبارك رشيد .. كتابي

● ● ● ●






شاعر قدم الكثير وما زال يملك الكثير ليقدمه لقلوب عشاقه

شاعر بدأ كما بدأ الجميع ولكنه اختلف عنهم بسرعة احتلال القلوب
يتميز شعره بالمفرده العصريه والحديثه والتي تصل الى جميع المستويات في المجتمع
كما يتميز شعره أيضآ بالصوره والفكره والابداع الذي نادرآ مانرى شاعرآ يهتم بقصيدته مثله
هو الشاعر .. / .. مبارك رشيد


اترككم مع قصائدة .

خل السوالف


خل السوالف وش نبي بالسوالف
دامي الامس خدك الصمت يكفي
تدري قبل شوفك على ويش حالف
اني لأضمك بالصدر لين تدفي
ياصاحبي من بعدك الحال تالف
عيت جروحي من عنا البعد تشفي
الشوق خلا صاحبك في تخالف
خايف يبين قلبه اللي مخفي
تدري حياتي مع حياتك توالف
وماغيرك اللي مع حياتي يوفي
شفت العواذل لو تسوي تحالف
لو شافت حصوني تهج وتقفي
غيرك اقول بروحته وين ذالف
ولا مهف مقيط يومه يهفي
الا ذهابك عنده اوقف ولا لف
شمعة حياتي مع ذهابك تطفي
خل السوالف وش نبي بالسوالف
ترا اللقا دايم عن الصوت يعفي



مبارك رشيد

ياحبني لك

كل مااسمع للمهندس ودني لك
حرك اشواقي على ذيك الليالي
صرت اردد صاحبي ياحبنيلك
من كثر مااقولها صرتي خيالي
اتذكر يوم اشغلها واجيلك
كل مافيني من الضيقات زالي
لو تكلم موتري يوم يعنيلك
قال ادل الدرب يامبارك لحالي
كنت اوقف للعصاير واشتريلك
واتضايق لو اجيك بيوم خالي
يكفي غيابك عن عيوني دخيلك
صارت احزاني من بعادك طوالي
الله اكبر شوفني وانا خليلك
صرت اهذري بك احسبنك اقبالي
مستعد ابدي حياتي وانتهيلك
العمر في غيبتك ماهو حلالي
وين الاقي لو خذاك الله بديلك
صار قلبي للعذارى مايبالي
ياتجيني طالبك او جيبنيلك
وش يصبرني عن غيابك تعالي




مبارك رشيد

تبي الصراحه

تبي الصراحه ما على القلب راحه
ياكيف انا برتاح لا صرت غايب
شوفك يكحل ناظري من صباحه
لين المسا يمسي وانا فيك ذايب
وان قلت بمشي جيتلك في شفاحه
لا تلومني هذي سوات الحبايب
معك السهر كنه بروما سياحه
عند النهر والجو مابه شوايب
ولا الهجر كنه بصحراً قراحه
عجاجها يرسل علينا هبايب
بعدك صعيب وما تعالج جراحه
لو تجتمع كل الاهل والقرايب
صدري بقربك زايد باانشراحه
حتى ولو زادت عليه المصايب
لو كثرت احمولك تزيد المساحه
حملك اشيله لو تضيق الركايب
ياصاحبي كانك بغيت الصراحه
في غيبتك تكثر علي النوايب




مبارك رشيد

نظرت عيونك


ياهيه اسمع واحد كان يغليك
ارخص حياته كلها من غلاتك
تدري وش اللي لا تماديت يعفيك
نظرت عيونك لا طرت بالتفاتك
شكرا على ماقلت والله يعافيك
بس استمع لي وانتبه في حياتك
لاتحسبني لا تخليت ببكيك
يمكن تحول دمعتي في مماتك
اليوم انا ماعاد لي حاجتن فيك
النفس طابت والبلا من سواتك
طافك قطار الود ماعاد يمديك
وقت الرضا يامشغل الناس فاتك
غرك جمالك يوم ربي محليك
حتى جمالك مرثع في خواتك
سبحان رب كامل الزين معطيك
زين العذارى جامعه في حلاتك
باكر تشوف الشيب كثره مغطيك
مايستره ياكود لبست عباتك
تذكر زمان كنت انا بين اياديك
ماتنفعك حسره وعضة شفاتك
واخر كلامي ياريش العين ماابيك
ماابيك حتى لو تغير صفاتك


مبارك رشيد

تمـــــــــــــــــــــــــــــــــت