ديوان الشاعرسالم بن جلعان

يا ليتنا من حجنا سالمينا



الليـل وعيونـك وأنـا والثريـا
يا ما تسامرنا ويـا مـا حكينـا
أحكي لهم بغيابك اشصـار فيـا
ويبكون ويقولـون بـس اكتفينـا
وكلما ذكرتك وانت تنطق بحيـا
قالت ضلوعي راعـي الله فينـا
رحنا ورحتوا وانطوى العمر طيا
والشوق نفس الشوق عيـا يلينـا
شبنا ولا خذنا مـن الحـب شيـا
( يا ليتنا من حجنـا سالمينـا )
او ليت وان بعض الظروف اتهيا
والقاك مـره والعـرب غافلينـا
لقيا لو ان وجه الزمن بـه حميـا
ما كـان خلانـا عليهـا بكينـا
لقيا تخيلها / لـو الوقـت عيـا
تخيل انا / لـو خيـال / التقينـا
وآجي لك اجري وانت تجري اليا
وكنا نطير من الفرح لا جرينـا
يديك مفتوحه وانـا افتـح يديـا
يلين فوق صدور بعض ارتمينـا
ودموع فرحتنـا تساقـط جنيـا
لا اهتزت جذوع الوله في دمينـا
ونعصر من الاشواق كأسا ً هنيا
واروى وتروى من بعد ما ضمينا
في وقتها لا مـا عليـك وعليـا
لو قامت الدنيـا حبيبـي علينـا
لحظات من شمس الفراق انتفيـا
بظلال حلم ٍ مـا تنوشـه يدينـا
حلم ٍ / وفرقانـا تلـوّح ابـهيـا
ويا ليتنا من حلمنا مـا صحينـا
يا ليتنـا نبقـى حبيبـي سويـا
حتى نرجع فرحنا اللـي نسينـا
تبعد واشيلك وسـط تيـا وتيـا
يا مركب ٍ عيني بحر له ومينـا
تبعد وتبقـى يـا حبيبـي هنيـا
دايم معي حتى ولو ما ( التقينـا )

ثقال النفوس

.

يالله جارك من هل نفوس ٍ ثقال
نبني لها بالطيب عرش ٍ وتهدم
ثقل النفوس اثقل علي من الجبال
آنا واهلها في صراع ٍ محتدم
ياللي بخل بريال لا يجري اتصال
بعدك غنيمه واشهد ان قربك ندم
ابذهن صافي ما يشوشه انفعال
قدرك نزل من/ نجم / ليبطن القدم
ما نفخر بقرب الرجاجيل الهزال
نفخر بمن ليكبرت الحجه قدم
والشعر يا ذيبان ما عز الحثال
الشعر قول ٍ ينظمه حتى الخدم
وحنا فحول افعال جزلين المقال
اعزاز نفس / اجواد نعطي من عدم
نحرص على كسب القروم من الرجال
وكنت احسب انك قرم يامال السدم
اكبر خساره يوم احسبك راس مال
سلامتك يا راس مال اسلم ودم
هقيت باني ناصي ٍ روس الطوال
اثرك مغير شوي رمل ٍ وانردم
والله ما يوجع كريمين الخصال
الا ان بعضهم في مثيلك ينصدم

الى روح مي


فمان الله يا اطهر وجه لامـس راحـة يدينـي
فمان الله يا اطهر روح سالت مثل قطـرة مـي
فمان اللي رجيتـه فـي وداعـك مـا يخلينـي
فمان اللي السما والارض مطويـه بكفـه طـي
مراويـح المفـارق قلـت لا يمكـن تعنيـنـي
يلين فراقنا لاحت بروقـه يـا زجاجـة ضـي
بكى قلبي ودمعه سـال حـزن ٍ فـي شرايينـ
يرثاك بكل نبضه والالم في جـود حاتـم طـي
بكى من فاضت انفاسك قبـل لا انهـا تدفينـي
بكى واذبل عروق ٍ لك فرشها مـن ورود وفـي
رحلتي ما تركتي غيـر حلـم ٍ عطـر سنينـي
سماه من الامل وارضه يسير بها الغلا في غـي
وعطر ٍ في كفوفـي كـل مـا اشمـه يسلينـي
يا ليتك بس شفتيني وانا اشمـه شـوي شـوي
وكيف احبس دموعي خايف ٍ لا امسـح بكفينـي
دموعي ويغسل دمعي بقايا عطرك مـن ايـدي
دفنتك في الثرى لكـن وربـي شالتـك عينـي
ما بين جفونها تبقيـن حيـه دام ( بابـا ) حـي
( يا بابا ) لو حبسها الموت / صداها حي يحييني
ويلج بخافقي رجع الصدى لبيييه لبـا ( مـي )
الا لبيه لك يا اللي جرت مجـرى دمـي فينـي
يا لبا من موادعهـا وسـم بيـن الحنايـا كـي
يا لبـا اللـي براءتهـا كأنهـا قالـت ارثينـي
( يا بابـا ) لا تخلينـي وانـا والله مالـي زي
غشاها السندس ومالت بكـاس الوجـد تسقينـي
الا وجدي عليها وجد يلوي جـوف قلبـي لـي
فمـان الله يـا مـن خلـت الفرقـا تبكيـنـي
وخلت كل هذا الكون بعيوني مـا يسـوى

صلي لحالش وانا بصلي لحالي


يا بنت ليجيت اصلي ما لـش ومالـي
لا اجيب لي عيـد لا بعـده ولا قبلـه
صلي لحالـش وانـا باصلـي لحالـي
اخاف قلبي هدب عينـش يوجِّـب لـه
واضيِّع اللـي نويتـه بـاول وتالـي
وتصير عيني الامام وعينـش القبلـه
وش عاد تنفع صلاتي وانتـي قبالـي
لا قلت بدل الله اكبـر حـي ذا القبلـه
واعيد فرضي عشر مرات لـو جالـي
وفي كل مره هدب عينش يعرقـب لـه
اللي لقتـل الشجـاع يسيـر مختالـي
وان قيل له كم بتاخذ ؟ قال وش هبله !!
ما انلام لو قيل جـن وصابـه هبالـي
وانتي جميع الخلايـق فيـش منهبلـه
تدرين وانتي بعيـده / كنـش ظلالـي
طيفش يدورج وعيني بس ترقـب لـه
ان قلت بنساش واعقد دونـش حبالـي
أقبل وقطـع حبالـي ثـم عقـد حبلـه
كنه حلف ويـن مـا الـد يتهيـا لـي
ولا حلف قال طرفك والله لانشب لـه
اجلس مع النـاس لكـن دالـه ٍ سالـي
ولي عين كنها علـى السلهـام منجبلـه
وجيه تملا المكـان وناظـري خالـي
وان سولفوا تحلف ان اذني بـلا طبلـه
الا لما جابوا اسمـش لحـت بعقالـي
وفزيت فـز بـدوي ْ لسارقيـن إبلـه
وليشفت نظراتهم تبحث خفـى احوالـي
وكنها مـن الشـك والتنغيـز معتبلـه
سويت كنـي ازبـط وضـع دسمالـي
وان قالوا اشفيك قمت الـف واستبلـه
ادراش عـن ناقليـن القيـل والقالـي
ما ابغاه يدري بش اللي ما يحطب لـه
وابعد عن الناس خوف عيـون عذالـي
العـاذل اللـي سببـه الكبـد مندبلـه
في خايع ٍ فيه كـن ذكـراش همالـي
وما غير طيفش معي من ربلـه لربلـه
كنـه ايتمايـل مـع دنـدان مـوالـي
ويرد ما قلت وانـا ارد واطـرب لـه
وقلبي من الشوق لا ميل معـه مالـي
وليتثنـى يفـز القلـب يلعـب لــه
من بن شوقـي مبهـر لاجلـه دلالـي
والشعر مثل القدوع اللـي يقـرّب لـه
اجمع غرامش من عروقـي بفنجالـي
واسقيه فنجال دون الخلق يسكـب لـه
يلعب على رمش عينـي ويتثنـى لـي
وليتعب يفترش جفنـي واطبطـب لـه
وليسرى شب ضو الشوق فـي بالـي
يدفى على جمر حر ٍ مـا هـو بعبلـه
من كبر حبش غدى كنه اصغر عيالـي
ما اغير اداريه واراعيه واحسـب لـه
كتبت لش في غيابش مـا بـرا حالـي
يا كيف لو شفت زولش ويش بكتب له
كيف الشعر لا انتثـر يشبـه لشلالـي
روح بقلب ٍ شجاع ٍ كـم تزهـب لـه
ولا الجمر كيف يحمي المبسم الحالـي
اللي هماجه رحيق النحـل ينسـب لـه
ويا كيف برق الثنايا يشعـل اشعالـي
هو بس يقدح وشعـري ينهمـر وبلـه
وكيف الزهر من عبيره ينتشي الخـال ِ
اللي يحرس الزهر لا احد ٍ ( يهوب له )
ويا كيف عود ٍ مـع النسنـاس ميالـي
من قال بان لش شبيه يقول يا خُبلـه !!
يا كوثر الحب يا ياقـوت يـا غالـي
يا كيف انا في يمينش ما احسد الدبلـه
ويا كيف اوفي الصلاه وترفع اعمالـي
وانتي قبالي وجفنـش مرخـي ٍ نبلـه
صلي لحالـش وانـا باصلـي لحالـي
يا بنت شوفتش لعبـت فينـي السبلـه

سكين اجودي



شيب عيني يوم شفتش رايحـه
وكحلتش من فوق خدش سايحه

وكن دموعش حربة ٍ في مهجتي
من وجعها جر قلبـي صايحـه

والله ان فرقاش سكين اجـودي
العـروق وخافقـي ذبايـحـه

ناجف ٍ روحي وناحر خاطـري
وما سمع صوت الحنايا النايحه

فارتكى جفني بمعكـاز الصبـر
خايف ٍ لا تنهمـر فضايحـه

رحتي وعينش تناظـر ماقفـي
وكن نسم صدري دلال ٍ فايحـه

تحسبين ان روحتش بي ما اثرت
لا ورب البيـت لا يـا نايحـه

بري حالي يومها كيف اصبحت
حالتي وانتـي بوجهش شايحـه

وكيف لحظتهـا تملكنـي العنـا
وكن شرايينـي غـدت منايحـه

صدق انا وقفت حابس عبرتـي
بس روحي تو عينـش طايحـه

حبـال الصـد


مطايا المحبه ضامها السير في رمضـاك
طريقك طويل وصدك يزيد مـن طولـه
يعنّي سماريهـا المشـي ودهـا تلقـاك
على درب عذر ٍ منك ما قـدرت تنولـه
تحرتك تمطر وصـل وتعلـك وتـرواك
ونوّختها فـي واهـج القيـض معقولـه
قطع كبدها حادي الضما يا الشحيح بمـاك
ولفـح الجفـا طالـت لياليـه وفصولـه
بغت تعتذر لك منك عن صدك وجفـواك
تحمل الخطا عنك ولا هـي بمسئولـه!!
وصديتها والصد في عيـن مـن يهـواك
فرى جوفه بخنجر من الغبـن مصقولـه
بعد جريها لك يا المقفـي بوقـع خطـاك
علي انكفت من لطمـة الصـد مذهولـه
وشكت لي وبكّت ساجعات ٍ بغصن الراك
بكت يوم طاحت بَكْـرَة الحـب مقتولـه
بعد كل ذا تجزاني الصـد يـا مااقـواك
بعـد كـل ذا نيتـك للحيـن مجهـولـه
انا لو بغيت اجزي بفعلك فانـا بجـزاك
بصـد ٍ ومـدات ٍ شحيحـه ومغلـولـه
ولا ني بناشد ليه صديت ولا اش جـاك
كفانـي حبـال الصـد بايديـك مفتولـه
تعبت ازعِل الدنيا وانا ما كسبت رضـاك
تعبت اغفـر ذنوبـك بكلمـات معسولـه
مدام انك تبذر صد فاللـي نبـت فرقـاك
الا شين بذر الصـد لا بـان محصولـه
تبا تجني الفرقا فـراس الوصـل يفـداك
وشـي استحـي منـه لعينـاك باقولـه
اذا ما انت تبغاني فانا اقول لك ما ابغـاك
ومواثيق حبـك عنـدي اليـوم محلولـه
وكانك على عهدي فحيـاك عـد خطـاك
تعال اشرح الهجران والصد وش هو له ؟
وانا لك علي أجفاك يا صاحبي وأنسـاك
إلا إذا أعــذارك سميـنـه ومقبـولـه

ميداااااالية .... مفاااتيحهاااا




قـد لا تجـدي الوعـــود ... المقطوعه ...
ولا العهــود المرفوعــه ...
ولا الاشـواق الممنوعــه ...
لنهي القلوب المخدوعه .....



بعد ما الهجر خـلا القلـب قـاع ٍ محـال
....................... ونـوة الهـم جـادت فــي مراويحـهـا
مـرت الترفـه آيـه / تقتـرب للكـمـال
....................... ورج قلبـي مــن القـذلـه وتسريحـهـا
وارتجف ثم تشهـد ومـدري اش زاد قـال
....................... المـهـم ان عـروقـي لــج تسبيحـهـا
قلـت يـا قلـب عودنـا لطبـع الهـبـال
....................... بعـد مـا ذاب جوفـك مـن تباريحـهـا
وبعد ما قلت لاجل اللـي يخـون الوصـال
....................... وعـد لانسى الهـوى وآزيد تجريحـهـا
وسقت ذيك الحلـوف اللـي تهـد الجبـال
....................... ان تزيـح الغـلا اللـي كـان وتزيحـهـا
ويوم مرت ولينك باثر ( سـت الجمـال )
....................... رحت حافـي / وموجـع يـدك تلويحهـا
قلب !! عادت حليمه ؟ / قال .. وبلا جـدال
....................... قلت وجروحهـا اللـي .. ؟ قـال بابيحهـا
المجاريح ( شوف / ونبض عرق / وخيال )
....................... والعفـو طبعـي وشيـمـة مجاريحـهـا
قلت تدمح خطا اللي شاف ذبحـك حـلال؟
....................... قـال مسموحـه ومـن دون توضيحـهـا
قلت ما قـد نسينـا ؟ قـال هـذا المحـال
....................... ذيـك كـذبـه وانــا زودت تمليحـهـا
كيـف ابنسـى وانـا والله رب الـجـلال
....................... مثل يعقوب / لو غابـت ( اجـد ريحهـا )
ذايبه فـي اليميـن وذايبـه فـي الشمـال
....................... وكـل عـرق ٍ تمـره يغمـره شيحـهـا
في الحنايـا لهـا ضحكـات غنـج ودلال
....................... كنهـا طفـلـه اضلـوعـي مراجيحـهـا
قلت بقـول لـك حاجـه وطعنـي تعـال
....................... فيـه حاجـه وحــان الان توضيحـهـا
قـم نـدور بدلهـا يـا خفوقـي غــزال
....................... قـال .. مـا دمـت مـا تفهـم بتلميحهـا
من لقى الشمـس مـا دور لوجـه الهـلال
....................... وذي شرايينـي اسمـع جـاك تصريحهـا
رح ودور ( بدالي ) * قلـب يابـن الـحـلال
....................... ولا انـا صــرت ميدااالـيـة مفاتيحـهـا

ديـــرة التوحيـــد


الا يالله يـا رب السمـا يـا الـواحـد المعـبـود
طلبتـك يالكريـم اللـي جميـع النـاس يرجونـه
طلبتـك وانـت كفـك للخلايـق بالعطـا ممـدود
تغفر ذنـوب عبـد ٍ لا ذكـر ذنبـه عبـس لونـه
وترخي ليل نو ٍ فيـه شعـف وفيـه حـن رعـود
وبرقـه يذهـل السـاري وقدحـه يشعـل مزونـه
تسوقه من علـى ديـره لديـره مسرجـات النـود
ولا يتـرك محـل الا سقـاه وفـجـر عيـونـه
يسيل السهل منـه ويختلـط وبلـه بصفـق بـرود
ويخضر الشعيب البكـر منـه وتزهـر غصونـه
من حدود الشمال يسـوق وبلـه ويغشـى الاخـدود
ومن مكه رزيمه قصـف ليـن الشـرق يرعونـه
وتروى نجد منـه وتنقلـب صحـرا النفـوذ ورود
ويطرا بـدو فـي الصمـان والخرخيـر يردونـه
تعلـه ديـرة التوحيـد مربـاع الكـرم والـجـود
بلاد ٍ / كنهـا .. دره / بجـوف البحـر مصيونـه
منـار الكـون قبلـه للخلايـق والوفـود شـهـود
وتشهـد طيبـه وبيـت ٍ ضيـوف الله يحجـونـه
بـلاد ٍ رافـع الله شانهـا سبحـانـه المحـمـود
ومـن يرفعـه ربـي فالخلايـق مـا يوطـونـه
لو تحاول جمـوع ابليـس بيـن مهبـل ومقـرود
وكـل اللـي عليهـم لـف حبلـه وانثنـوا دونـه
فلا هزوك يا ماكـر حـرار ويـا عريـن فهـود
وانتـي حاميـة الاسـلام وانتـي امنـع حصونـه
متى هز الرواسي هـب نـود ٍ مـا تحـرك عـود
متـى الاسـلام كـان قنـاع للـي يهـدم ركونـه
على قرعة طبـول إبليـس صفـوا للهلاك حشـود
واخذ منهـم بليـس العهـد بانهـم مـا يخونونـه
عطاهم عهده ورضيوا !! متى الشيطان صان عهود
وعدهـم بالبقـا فنـيـوا !! فـنـاء ٍ يستحقـونـه
تجنوا .. فجروا .. ذِبْحوا .. ومن يسلم قضى مطرود
نهايـات ٍ شنيعـه .. يزرعـون المـر يجنـونـه
بري مقتـول بيديهـم .. وطفـل ٍ طايـح ممـدود
كتـب طهـره دمـه بثيـاب فزاعـه يشيلـونـه
وبيـت ٍ هدمـه فاجـر تحتـه شويبـة ٍ مفـقـود
بناتـه راعهـم علمـه وشقـوا الثـوب يرثـونـه
اذا هذا هو الاسـلام !! كيـف نكفـر النمـرود ؟؟
نسمي ذبحنـا اسـلام !!.. لابـو اللـي يلوكونـه
بري الاسلام مـن قـوم ٍ شريعتهـم مـن التلمـود
بـري يـا ديـرة ٍ مـا هزهـا فحـش ٍ يسوونـه
الا يا كيـف تنهزيـن وانتـي فـي يميـن العـود
فهدنـا اللـي ملـوك الإنـس والجِنـه يهابـونـه
وفي جنبه مثل سيف ٍ صقيـل ٍ مـا يكـوده كـود
ابو متعب لما انه صـك خصمـه مكـن طعونـه
وسلطان الحروب اللي مرسها مـن جـدود جـدود
يخططهـا ويقلبهـا علـى مـن يخلـف ظنـونـه
ونايف نايف ٍ لطمته مـا تخطـي الوجيـه السـودا
ثرهـا مـا يواريـه القنـاع الـلـي يحطـونـه
هل الفعل وهل العدل الملوك ومن سوى آل سعود ؟
كفـو / يـا اليعربيـه / رسنـك الغالـي يتلونـه
حزام ودرع في وقت الشدايد وان شكـا المضهـود
حموه وسيفهـم يقطـر مـن دمـا مـن يعادونـه
وحن يا ديرة التوحيـد مـن كـل الخبـوت جنـود
وكان الموت لترابك يا هـون المـوت يـا هونـه
لما ثـار الوغـى والعـج ثـار وخالـط البـارود
وكن تحـت السنابـك راس نيـم ٍ تكلـخ سنونـه
ومن وجف الحوافر مختلـط عـج الرمـك بحيـود
وعكفـان المخالـب حايمـات ٍ ترقـب المـونـه
وللرمـح الردينـي زرقـة ٍمـن مفتـلات زنـود
وكن للروس طحـن ٍ والسيـوف تقـول طاحونـه
نهار ٍ فيه جت رقـاب كـن فيـه الثيـاب لحـود
بننحـر كـل ملعـون ٍ ونسبـي كــل ملعـونـه
ونشبع فاردات الريـش منهـم مـن لحـم وكبـود
ونشبـع ضاريـات البيـد والجـوان مشحـونـه
ونرفـع رايتـك يـا ديـرة التوحـيـد زود وزود
بمـان الله .. والارهـاب نبتـر راس فرعـونـه

الموت سارق يقطف الارواح من دون انتباه


قصيده تنسجم مع قدسية الشهر الفضيل



.........
......
...


يا الله لا ضاقت علـى الارض مـن كـل اتجـاه
--- وغطت ضلوعي يا إلهي ضيقـة ٍ مثـل الجبـال

من لي سوى وجهك لما صديت عن كل الجبـاه
---واقبلت زاهد عن عطايا الخلق يـا رب الكمـال

وأصبح حدود الكون في عيني مكانـي للصـلاه
--- ويممت وجهي صوب وجهك بالدعاء والابتهـال

وجفون عيني كل جفن ٍ فاض من خشيتـك مـاه
--- ورفعت لك كفي وانا في جوف غـدرات الليـال

ارجيك يالله وأنت رب ٍ مـا يخِّيـب مـن رجـاه
---والجا لبابك وأستجيرك مـن ذنوبـي والضـلال

يا رب أنا البارح سريت بليل يضني مـن سـراه
--- آعدّد ذنوبي وكان أهـون علـي عـد الرمـال

كلما تعدى ذنـب يقبـل ألـف ذنـب ٍ مـن وراه
--- وآعد وأغلط في العدد وأصفق يمينـي بالشمـال

لكن يهونها علـي انـك المجيـب لمـن دعـاه
--- اللي غفر للساحـر ذنوبـه ،، وسكنـه الظـلال

أذنب ولكني أخافـك خـوف مـا يِـدرَك مـداه
--- وادري بعلمك عن إساءاتـي الدقايـق والجـلال

يا رب أنا الغرقان في اللـذات وأيامـي وشـاه
--- والعمر مقفى والممات اقبل يبي شـرب الـدلال

الموت سارق يقطـف الأرواح مـن دون انتبـاه
--- والخلق يا عـزاه منشغليـن فـي قيـل ٍ وقـال

الموت حق وسنتك في الخلق ..( وآخرة الحيـاه
--- للي جهـل ) ،، لكنْـه للعاقـل بدايـة إرتحـال

طريا ارتحالي في عيوني اصبحـت مثـل القـذاه
--- ما هو بخوف الموت ، إلا خوف منكر والسـؤال

يا كيف أسوي يا إلهي وسـط قبـر ٍ فـي فـلاه
---- ما حولي إخوان ٍ ولا أعمام ٍ ولا حولـي خـوال

ما غيرانا والبز الابيض والعمل وابغـى النجـاه
-----وهيهات ثم هيهات الاقي دون عفوك لي مجـال

يا كيف أسوي والصحايف ضمت الذنب / وجـزاه
---- ( وآنا الضعيف ابن الضعيف ) يفوق حد الاحتمال

ولا قربوا الميزان لأعمالي يا ربـي شالسـواه ؟
--- والوزن بالقيـراط وذنوبـي ثقـال ٍ فـي ثقـال

والخلق يوم الحشر مفجوعين ،، والعالم عـراه
--- كلا ً يدور للنجاه .. وما حـد ٍ عـن حـد يسـال

والنار تلهث والحطب فيهـا الجبابـرة العصـاه
--- والكل يرقب وش طريقه! ويـن بيحـط الرحـال

في جنة الفردوس أو خاسي مع جمـع الطغـاه
---- في وسط نار ٍ كل ما فيهـا نكـال ٍ فـي نكـال

يا الله دخيلك يومها اغفر لمثلي ما جناه
---ولا تجعل الامال في رحمتك من ضرب المحال

واغفر لأبي يا رب وأمي وارحـم لمثلـي نـداه
--- ولا تضيعنـي دخيلـك يـوم تضييـع العـيـال

ويارب في ماضي زماني أغفـر لقلبـي خطـاه
--- والهمه مع مقبل زمانـي درب ذربيـن الفعـال

وأمنن بحسن الخاتمه يـا الله لا جـات الوفـاه
--- وذكر يغشاه الطيب والناموس ما بيـن الرجـال

وذكرني إن دنيـاي زيـف وإن بهارجهـا فنـاه
---وإن كل ما في الكون من زخرف زوال ٍ في زوال

أنـا بشـر نسّـاي يتبـع كلمـا يغفـل هـواه
--- ونفسي تراودني وشيطاني يصـوت لـي تعـال

وآصد والقى في بحور الشعـر سجـات وسـلاه
--- لا شافها ضاقت بعيني رف لـي جفنـه ومـال

وانا ادري ان الشعر جمه ذنب ،، وان راسه وطاه
--- الا بعضه اللي بعيـد مـن السفاسـف والهـزال

فيا الله أعني لا كتبتـه ينتفـع بـه مـن قـراه
---عنـي علـى رد الهزايل والتحـرى للجـزال

واعنّي على سجادتي مـا دامهـا عـز ٍ وجـاه
--- عندك ،،، ولا ابغى عند غيرك لا حرام ولا حلال

وارحم دعائي يا اله الملك يا للـي فـي سمـاه
---وبقبضة ( إيده ) كل ملكوت السماء يا ذا الجـلال

قلت انا داخـل عـلى الله ثم علـيك

....
..
.
كنت احلم ليـن طاولـت السحـاب
وكنت اروي الحلم من شوقي اليـك
رشفـه برشفـه يليـن القلـب ذاب
ذاب مـنـك وذاب وده يرتـويـك
ذاب وانت اخترت ما لـذّ وطـاب
مـن نبيـذه مـا يرطـب شفتـيـك
ترتشف كاسي وتعصرنـي عـذاب
ورغم ذلك كنت أحس انـي مليـك
ملك كسرى لا لمست ام الخضـاب
قمت احسه تحت رجلـي ينتخيـك
أملك الدنيـا وآمـر فـي الرقـاب
لكـن انـي عنـد رمشينـك هليـك
لا تنصتنـي الوسـاع ام الحـراب
قلت انا داخل علـى الله ثـم عليـك
خبني مـا بيـن صـدرك والثيـاب
أو ببستـان الزهـر فـي وجنتيـك
لا تخليـنـي فريـسـه للـذيـاب
والحميا ورث مـن جـدك لابيـك
كيف ما احسب للطعون(امية) حساب
وانت كن همـدان تحـرس مقلتيـك
كنت لا من طال في عيني الغيـاب
اتبع اثرك ليـن اشوفـك والتقيـك
ولو يضيع اثرك ويخفيـه التـراب
في بداية دربك اجلـس واحتريـك
كنت اجيك من الف سكه والف باب
لاطلبت اجيك تـدري انـي بجيـك
كنت اجيك بقلب ٍ اسود مـا يهـاب
من صناديـد ٍمثـل عمـك واخيـك
وكلما تنطق ( هلا بك ) قلت خاااب
ظن عذالي هـلا مليـوووون بيـك
كنت لازليت واخطيـت الصـواب
قلت قصده( ذِيْ ), ما يقصد هذيـك
آتعذر لـك لـو ان قلبـي مصـاب
ومن غلاك ان قلت هيك آقول هيـك
ولا أنا.. اقسم لـك بـرب الكتـاب
ما آعرف انطـق سـوا تيـا وتيـك
اذكـر إنْـك بيـوم زودت العتـاب
دون داعي واثـق انـي مشتريـك
ورحت عني وأصبح العالم ضبـاب
والمشاعـر كلهـا تصـرخ تبيـك
وغبت لك كم يوم كن النـور غـاب
عن عيوني والعمى أصبـح وشيـك
وصرت اسولف سالفه تلوي الرقاب
عن حكايه اسمها ( آمـوت فيـك )
وتاليتهـا جـاي تعلـن الانسحـاب
دون ذنـب إلا غـرور ٍ معتريـك
لاجل هذا شوف , راعي الذنب تاب
وحـرم يحبـك وحـرم يشتهـيـك
صد قلبـه عنـك والصـده جـواب
للغـرور اللـي بثوبـه مكتسـيـك
وان بغيت الجد , مـا فيهـا كـذاب
رح توكل صار بُعدك لـك شريـك
ولو أحبك بعدها يا( بـو الشبـاب )
لا تصدقني , وربـي مـا أهتويـك
كنت احلم ليـن طاولـت السحـاب
وكنت ابني الحلم من شوقـي اليـك
يا حسافه ما ارتويـت الا السـراب
انهدم حلمـي .... تخيـل وبيديـك