على قد الغدر اعذريني

المشاركة الأصلية كتبت بواسطة ضامية الشوق

اهلا بعسل دجي الليل
منوره بعد غياب يا روحي
أقول لك فتره ما دخلتي والله فقدتك يا عمري لا عاد تغبين عنا

العسل والله وجودج يا حبيبة العين
النور نورج ونور من رباج في ذمتيه تسلمين على هالطلة البهيه والله والله يسلم روحج من كل شر وضر
والله ياختيه عليكم بتشجيع وان شاء الله الغياب ما عاد يتكرر بوجود الشغف وازدياده
وابشري والله شغاله ع البارتين وهالله هالله بتفاعل ولازم احبك المواقف واحاول اني اضبط الدور وردات الافعال

البارت السادس والثلاثون
:
-
:
أذنبت فيني عسى الله يغفر ذنوبك
‏وجرحتني جرح .. لا بعده ولا قبله
:
حالياً نرجع للواقع كملت دربها شعاع لغرفتها وهي تفكر معقوله اللي صار كأنه حلم او شيء اشبهه بالخيال يعني سالم اللي اشوفه اخويه وطول وقتي متكيّه عنده اخر شيء يطلع ولد خالتيه يا الله معقوله ان لهذا الحد وصل فيهم الموضوع يتساهلون بخلق الله والاهم من هذا كله الموضوع فيه حل وحرم يعني المفروض اقل شيء يعطونا خبر عشان نعرف نتصرف في وجوده وناخذ حذرنا من تصرفاتنا معاه ونحط حدود يا الله على الجهل اللي عايشينه اهالينا وعلى الاوضاع اللي متساهلين فيها تنهدت بضيق وهي مالها خاطر حتى تفكر في خطبتها انهيار امها وسالم وهزاع امس قدامهم زعزع كيانها واثر عليها فعليّاً كيف ابوها قدر يسوي هالشيء ويخفي عن امهم موضوع ولد اختها اللي صار لها سنين وهي تدور عليه هو واخته وتصيحهم هي وخالتيه ولا كلف على نفسه يقول لامايه ان هذا ولد اختج على الاقل يبرد يوفها مايخليها في عذابها والنار تاكل قلبها اكل لا هي اللي عايشه مع المسلمين ومرتاحه ولا هي اللي ميته ومصلي عليها مخليها بين البيينين يا قساوة قلبك يا ابويه كنت اشوفك قدوه واليوم انته ابعد عن المثاليه والاقتداء بعد السما عن الارض يارب تكون في عونها وعون سالم وترد له اخته سالمه معافيه من كل مكروه زفرت بضيق وتنهدت بعدم ارتياح طلعت للبلكونه وتفكيرها منحصر ما بين امها وسالم والصدمه اللي تلّقوها على مرّ هالسنين سمعت رنين تلفونها خلخلت شعرها بأطراف اصابعها وزفرت بضيق مالها بال تكلم حد اللقت نظرها على شاشة التلفون اللي يضيء بأسم المها ولكنها ماردت تركته يرن حتى انتهت المكالمة بعدم الرد طلعت من غرفتها ولكنها تفاجأت بأمها اللي يايه صوبها وعقدت حواجبها باستغراب وهي تسمع امها تقول: جهزي نفسج لـِ باجر عشان تروحون اول الصبح المحكمه وتعقدون قرانكم.
طالعتها بصدمه ومن ثم قالت: انتوا تشوفون ان الاوضاع مناسبه عشان تحددون عكيفكم.
نطقت امها بضيق: يا بنتي توكلي على الله وروحيي ويا ابوج واخوانج وبتعقدون وبتردون لا حفله ولا عشا ولا شوفه ولاشيء، وبنسوي اللي يرضيج اللي هو عقد والسلام لين تهدأ الامور والاوضاع ووبعدها نقرر متى نقدر نحتفل فيكم.
نطقت بضيقه: سووا اللي تبونه كيفكم بسير اشوف هزاع انا.
طلعت شعاع مني وتنهدت امها من الطرف الثاني وهي تنتظر بفارغ الصبر يخلصون عقد قران عيالهم عشان تمسك اختها وتعلمها باللي عرفته واللي صار ماتبا الحين تخبرها وتنكد عليها مثل ماهي فرحتها مسلوبه من شفايفها من يوم عرفت باللي صار وشافت انهيار سالم وطلوعه من البيت من صباح ربي لين الحين ما يا ولا بان له شيفه وما تبا تخوف اختها ولا تبا تسوي اي شيء لين ما يتم العقد بسلامه وعقبها بينثرون جروحهم وبيشوفون الوضع كيف.
:
-
في جانب اخر من البيت شعاع يالسه عند هزاع وهي تنطق بضيقه: طلع متى!
هزاع بحزن وضيقه كاتمه على قلبه: من اليوم الفيّر ولين الحين مارد ولا اعرف عنه شي تلفوناته كلها مغلقه.
شعاع بتنهيده: مادري شو اقول والله ، الله يسامح ابوي ولا الله ينتقم من عمتي العنود وريلها! مادري والله شو بالضبط اقول.
تنهد هزاع بصمت وأزفر انفاسه بضيقه ونطق: سالم بالنسبه لي توأم روحي واخوي وسندي وعضيدي وين الحين يوم عرفت بأنه ولد خالتيه اللي كنا ندور عليه واللي نصيحه وندعي ليل ونهار نلتقي فيه يطلع هو موجود بينا والمضحك في الموضوع ان ابوج يمارس دور المهتم وهو اللي ينقال عنه قاتل القتيل ويمشي في جنازته.
تنهدت بضيق وهي تقول: مادري كيف نفسه طاوعته 20 سنه ينام ويحط راسه عالمخده مرتاح وخليّ البال من دون ما يأنبه ضميره على فعلته ومشاركة اخته بهالجريمة الوغده من ددون مايعطون حق لهم بالعيش الصحيح مع اهاليهم ومع من يبون منهم ولكن اخته كلت فيي ععقله حلاوه وسكتته ولقمته بالولد ورباه ابويه وهم حارقين قلوب امي وخالتيه على عيال اختهم والله الواحد مايعرف شو يقول غير الشكوى لله والله المستعان.
تنهد هزاع بضيق ومدد ريوله ونطق: ياخوفي يكون سار يدور اخته ونحن ماندري.
تنهدت بضيق شعاع والتزمت الصمت عيون هزاع واحمراها اكدت لها ان سالم مب رخيص في قلبه وغالي عنده وادركت انه ما ذاق النوم من يوم صارت السالفة تنهدت بضيق وهي ودها تمسح الضيق من على قلب اخوها اما هو طلع من الغرفه ومن البيت بكبره يحس كل هالكون ضاق عليه من عقب سالم وينك يا سالم وينك ياخوي ضاقت فيني الوسيعة اتصل بربع سالم اللي يعرفهم كلهم وكلهم قالوا ماشفناه من فتره ولايداوم ماخذ من رصيد اجازاته السنوية ولا يعرفون عنه شيء تنهد بصمت وهو يبعثر شعره ويسند راسه على السيت وماهو عارف وين يسير ولا وين يروح حرك السيارة وهو مخلي ريوله تاخذه لأي مكان تتوجه له .

انتهى

كتف ثالثه ,ضامية الشوق معجبون بهذا

سيتم التعديل ومن ثم التنزيل مره اخرى

البارت السابع والثلاثون
:
-
يا لمّاح تلحقك المشاريه يا لمّاح
‏مادام إنك تميّز متى مزحي وجدّي
‏إذا شفتني عيّيت كثّر من الإلحاح
‏تراني أقول إني ماودّي وأنا ودّي .
:
-
مرت الأسبوعين على الجميع بشكل مختلف حارب وشعاع عقدوا قرآنهم بالمحكمه ومن بعدها ام هزاع قالت لأختها عن مرضوع سالم واخته مما أدى إلى انهيارها وبكاها وترقيدها بالمستشفى بسبب رفع ضغطها وعدم تحملها للصدمة ؛ وبالنسبة لعبدالله وسلمى بدت تهدأ الاوضاع بينهم وترجع الامور طبيعيه وعبدالله سافر معاها اسبوع بس وغضباً عنه مسافر وياها وماصدق يخلص الاسبوع ورد للبلاد بأقصى سرعه ماهو طايق البعد ولا هو طايق حقيقة ان عرس عمر باقي عنه اسبوع وتكون محبوبة قلبه بينهم وفي بيتهم طلع من غرفته نازل تحت في الصالة شاف امه وابوه وعمر يرمسون عن ترتيبات العرس وسلامه ومنصور يالسين وياهم نطق عمر : احم روضه بتنزف اول وعقب المير .
انصدم عبدالله ونطق: انته مقتنع بأنك تجمع بينهن في يوم واحد .
هز راسه عمر بضيق بالرفض ونطق: لا والله اذكر اني حرمت عليها جنس ادم كلهم ما عداي، واذكر اني حرمت على نفسي بنات حواء كلهن ما عاداها ، كيف اليوم غلطت هالغلطه واجتمعت بغيرها مادري شو اسمي هذا الفعل هو جنون هو نقص عقل ياخويه والله مادري احترت بأفعالي اللي تناقض اقوالي وتناقضني كلي.
تنهد عبدالله بضيق وسكت قطع جوهم رنين تلفون عمر اللي فز قلبه بإتصالها لاول مره من عقب اخر لقاء بينهم رد على اتصالها وهو يقوم طالع من عندهم لبرى سكر الباب وراه ووقف عند الدري اللي مقابل الحوش ونطق:يا مرحبا باللي اتصاله يشفي الاعواق.
ردت بخجل مغري وهي تحس بأنه صاير رومانسي من عقب اخر لقاء بينهم وتتمنى يدوم الله عليهم هالمحبة والهدوء: المرحب لا هان ولا هان قدرك يا ولد العم شحالك.
تنهد وغمض عيونه بضيق ونطق: بخير يا عافية قلبي امريني.
تنهدت بضيق ولكنها تكلمت باللي في خاطرها: تسمح لي اخذ من وقتك ثواني .
عمر بتنهيدة عجز انه يكتمها: اكيد يا غناتي وقتي كله لج يا نبضه .
استحت مياري صدق من كلامه اللي لامس قلبها بس خوفها منه لازال موجود نطقت بهدوء: عمر انا مابا انزف في القاعة ان بغيت ان روضه تنزف فيها برايك لكن انا ما انزف في القاعة واختي ماسوت عرس ولا لبست فستان عرسها ولافرحت مثل المسلمين اتمنى تقدر طلبيه لاني اول مره اطلب منك طلب واتمنى انك ما تردني.
نطق بهدوء وكأنها شلت حمل ثقيل عن قلبه ونطق: ابشري باللي تبينه.
تنهدت بإرتياح ونطقت بفرحه: شكرا عمر يزاك الله خير وسكرت دون ماتسمع رده غمض عيونه طلباتها بسيطه جدا مب نفس روضه اللي اصرت انها هي اللي تختار الكوشه والمصوره والبوفيه والمضيفات وغيرها كان خايف ان المير تزعل ان ترتيب العرس والقاعه كله من ذوق روضه لكنها في النهاية قالت ماتبا زفه ولا فستان تبا يصير حالها مثل حال سلمى اختها لف على ورى وشاف عبدالله ومنصور ظاهرين ابتسم لهم ودخل داخل وسمع امه تقول للبنات عن رغبة المير في العرس وانها ماتبا تنزف قي القاعة ولفت باتجاهه من شافته مقبل صوبهم ونطقت بحنيّة وهي تقول له عن موضوع المير وانها ماتبا زفه بتطلع من بيت ابوها لبيتهم بلا زفه ولا فستان وهو هز راسه مأكد لها الموضوع ونطق بهمس: عندي خبرها توها داقه تشاورني.
اليازي ابتسمت بفرحه: والله ان هالبنت جنه يا حظك يا عمر فيها .
ابتسم بهدوء وهو يقول: قولوا ما شاء الله ترا بروحها النفسية مضروبة .
ابتسمت امه ونطقت: حفوز العرس عادي يا حبيبي تصير عند كل واحد.
نطق بضيقه: الله كريم.
نطقت سلمى اللي كانت ساكته من الأول: يعني هي كنسلت موضوع زفتها عشاني.
هز راسه عمر وقام واقف وراح باتجاه الجناح الخاص له اللي بيكون لها فتح الباب وسكره وتساند عليه رفع تلفونه واتصل بها يعرف ان هالوقت هي حله الوحيد ياها صوته المتناغم على قلبه يـ لبيه.
رد عليها بنفس الوتيرة: يلبيج قلبي دوم شو تسوين!؟
ابتسمت بإحراج ونطقت:ارتب اغراضي في الشنط.
قعد عالسرير وانسدح: متى تنورين البيت.
جاوبت بخجل: البيت منور بأهله يا ولد العم.
تنهد بضيقه: مياري عادي باجر تكونين هنيه.
مياري اللي جاوبت بعفوية:اكيد فديتك عادي انته تآمر ما تطلب.
هو اختبص من كلمة فديتك اللي نطقتها لأول مره وحركت فيه شعور صعب ينشرح مسح ويهه بيده ونطق بتوضيح: اقصد اني باجر اييبج البيت واقضي معاج الوقت لين العرس.
استوعبت كلامه ونطقت بإحراج: لا سمح لي باجر بيشلون الاغراض لبيتكم بيرتبونها وعقب يومين العرس يمديك تصبر.
عمر بضيقه:ماودي اخذكن كلكن في ليلة وحده وماعرف اكون ويا منو بالضبط خليج انتي قبلها بيوم وهي خليها ليوم العرس.
حست بصوته وضيقته ونطقت: انته صدمتني بموضوع الروحه وياك وانا لين الحين ما استوعبت ان باقي يومين على العرس .
عمر تنهد بضيقه ونطق: مياري باجر المغرب بيي اشلج وبنسوي عشاء وبنعشّي العرب وانتي بتروحين عندي.
مياري ارتجفن صبوعها وشافت المها اللي تهز راسها بالايجاب ونطقت بربكة: اللي تشوفه يا عمر .
يتبع

كتف ثالثه ,ضامية الشوق معجبون بهذا

تنهد بصمت وضيقه ونطق: يلا جهزي عمرج عشان باجر بيي وبشلج.
نطقت بهمس: ان شاء الله.
سكرت عنه وهو حاول انه ينام قلبه يعوره جدا على هالخطوة اللي سواها كيف ياخذ روضه على المير واللي يقهره اكثر يوم تنطق المير اسم روضه وكأنها تنطق اسم اختها او ربيعتها مب ضرتها ،اونه اذا تبا روضه تنّزف برايك وتقولها بكل هدوء ولا كأنه بياخذهن في ليلة وحدة وماحس بعمره يوم نام.
:
-
على ساعة 12:30 ليلاً في جناح عبدالله كانت واقفة امام المرآة تنزع اكسسوارتها وتتكلم مع مياري وهي حاطه سبيكر بما انها في الغرفة بروحها وعبدالله مب موجود ونطقت بضيقه: ميور والله كبرتي في عيني بعد اللي سمعته من عمتي اليوم وانا اعتذر عن كل شي بدر مني.
ابتسمت مياري وهي تقول: افا عليج ياختيه مسموحه ومابينا زعل حمدلله سوء فهم وعدى ولله الحمد واللي يصير لج ياختيه لازم يصير لي.
ابتسمت سلمى وهي تشوف انعكاس عبدالله اللي دخل للغرفة ونطقت: تسلمين والله يا المير ( بهاللحظه شافت اللتفاتت عبدالله عليها على طول ولهفته وحست بشيء في قلبها ينغزها ولكن طنشت وكملت كلامها مع اختها )وهي تقول انا والله ماعرفت قدرج و…
قاطعتها المير: سلموه مابينا هالسوالف ونحن خوات واكثر واللي يصير عليج بيصير عليّ يلا خليني اخلص شغلي وانتي استانسي بحياتج وافرحي ولا يضيق لج قلب ولا صدر .
ابتسمت سلمى وانهت المكالمة على طول ولفت لعبدالله وهي تسرد عليه اللي صار واللي سوته المير عشانها.
ونطق عبدالله بضيقه: يزاها الله خير ما قصرت.
حست بضيقته وقربت منه وهي تحط يدها على كتفه وهي تقول: شفيك يا عمري متضايق.
تنهد بضيقه وابعد يدها عنها ونطق وهو يوقف: ماشي ضغوطات شغل لاتنسين باجر موعدج عند الدكتوره وخذ فوطه ودخل الحمام يتسبح.
تنهدت بضيقة ماهي عارفه السبب اللي مخلي عبدالله يصد عنها تنهدت بضيق لايكون يحب وحده ثانية حتى من يوم يت بيتهم ماحسته مهتم فيها ويعاملها ببرود اكثر عن قبل سمعت صوته وهو يرمس في تلفون قامت وقربت منه ناظرها بانعكاس المرايه وحدّ نظراته عليها ووقفت بلا حراك وهو كمل كلامه: تمام تعال تتحت وبعطيك الملف اللي تباه.
سكر وهو يلف عليها: ماحب شغل الملاقيف اللي يتليقفون ويسّمْعون الكلام وانا بنزل تحت مابا ازعاج سمعتيني.
تضايقت وهي تقول: عبدالله شو فيك من عرسنا وانته البرود عنوانك.
رفع حاجبه بعدم اعجاب من كلامها ونطق بقهر: ما كان اختياري هالزواج بكبره كان اختيار ابوج و ابوية ومخططهم.
انصدمت من حقيقة زواجهم وانه عائلي بحت ومايكن لها اي شعور بقلبه.
:
-
اما تحت عند الكراجات حمد واقف متاكي على سيارة عبدالله يترياه ايي يعطيه ملف المشروع الانشائي واستكماله من لمح اخوه ياي صوبه وشكله تعبان همس بصوت واطي: الله يستر شكله المود ضارب عنده.
وصل عبدالله ونطق من دون لايشوفه: مارمت تتريا لين الصبح ما حلا لك طلبة الملف الا نصاص الليالي .
ضحك حمد وقال: لاصرت متزوج بسهر ويا زوجتي بس مادام اني عزابي بسهر ويا ملفاتي وقال بضحكه لايكون خربنا عليك الجو وضربة النفسية عندك.
طالعه عبدالله بطرف عينه وهو يسحب صندوقه الاسود اللي مجمع فيه الملفات والاشياء المهمه ونطق بنفسية شينه: بهفك بـ هالصندوق على راسك.
ضحك حمد اللي قال: لا النفسية اليوم في الحضيض لايكون زعلان عشان دريت بموضوع ان محبوبة قلبك باجر بتشرف بيتنا.
طاح الملف اللي بيد عبدالله لاشعورياً وهو ينطق بصدمه: شو تقول!؟
طاحت عين حمد عالملف اللي لفت انتباهه بغلافة وشكله الغريب ولونه الأغرب ونزل بياخذه ولكن يد عبدالله اسرع من يده شله بسرعه وهو يحاول ينظم انفاسه المتسارعه ودقات قلبه اللي كانت بتوقف من الخوف لو حمد شافه وابعد عن حمد بخطوتين وطلع له الملف اللي يخص المشروع وعطاه اياه وحط الملف اللي بيده بكل حرص في الصندق وهو يغمض عيونه براحة.
ونطق حمد بتعمد: لايكون هالملف يخص محبوبتك!؟
تنرفز عبدالله وطالعه بطرف عينه ونطق: حمد توكل من جدامي ما دام النفس طيّبه .
ابتعد حمد عنه بخطوتين ووده يعرف سر عبدالله ونطق: انزين ماتبا تعرف شي عنها
هز راسه بلا بقهر وغبنه وهو يتمنى انها ماتدخل بيتهم الا معاه ماهو قادر يستوعب حجم المصيبه اللي بيلقونها في حالة انكشاف الموضوع وهو يدري ان المير ما بترمس ولا بتقول شيء وبتتقبل كل التهم عليها وبترضى بعذابها من عمر تنهد بضيقة واللتفت لبيت عمه وتنهد بضيق ورجع لداخل البيت.
انتهى

كتف ثالثه ,ضامية الشوق معجبون بهذا

ما شاء الله عليك
من يومك مبدعه يا قلبي
وينك مختفيه مالك حس
عسى تكونين بخير يا جملتي
والله لك فقده

دجى الليل معجب بهذا

المشاركة الأصلية كتبت بواسطة ضامية الشوق

ما شاء الله عليك
من يومك مبدعه يا قلبي
وينك مختفيه مالك حس
عسى تكونين بخير يا جملتي
والله لك فقده

حبيبتي ضموي موجودة والله اصارع الشغف يرجع من جديد عشان اقدر اكتب كتبت انا بارتين بس تلفوني طاح امس واخترب ووديته المحل وبيخلص اليوم ان شاء الله وابشروا ببارتات ترضيكم وترضيني

ضامية الشوق معجب بهذا

المشاركة الأصلية كتبت بواسطة دجى الليل

حبيبتي ضموي موجودة والله اصارع الشغف يرجع من جديد عشان اقدر اكتب كتبت انا بارتين بس تلفوني طاح امس واخترب ووديته المحل وبيخلص اليوم ان شاء الله وابشروا ببارتات ترضيكم وترضيني

يا عمري والله عسى يرجع الشغف من جديد بإذن الله

دجى الليل معجب بهذا

ابشري والله من عويناتي اثنتين

ضامية الشوق معجب بهذا

المشاركة الأصلية كتبت بواسطة دجى الليل

ابشري والله من عويناتي اثنتين

تسلم عيونك يا قلبي
الله لا يحرمني منك يارب

دجى الليل معجب بهذا