بسمه من شفاتك تموتني وتحييني

الحلقه الرابعه عشر ..


حسيت بـ رعشه في جسدي كلّه لأأأأأأأأ يا رب لأأأأأأأأأأ ..
ما بغيت أصد وراي ولو صديت يا رب لأأأأ ... يارب أنا مب هو ...............

صديت ........... لا اراديا دموعي هلت حسيتها قاعده تحرق خدودي من حرارتها ...
رحت بأسرع ما أقدر صوب الشارع ...............

قلت : لأأأأأأأأأأأأأ عااااااااااااااااااااااادل لأأأأأأأأأأ ...
ورميت روحي عليه وتميت أصيح بحراره مدري ما أحس بـ روحي أحس الدم توقف بعروقي واحساسي انعدم ...

ما حسيت باللي حولي الا وهم يسحبوني من عليه ... وأنا كلّي دم ...
قلت وأنا اضرب اللي ماسكني : ودروني ما أباكم أبا عادل ... عااااااااااااااادل ..

حسيت بايد اللي ماسكني ترص علي أكثر عسب ما أفلت منها ,.
عليت صوتي وأنا أقول : عااادل لا تروح .. يا ريتني أنا مت يا ريت هالسياره دعمتني أنا ,,
عاااااااااادل تم ...

شفت الدم .. هذا أكثر منظر أخاااف منّه وأتروع منّه ...
ولحظات ما حسيت باللي حولي ... ما حسيت بأحد ... حسيت روحي فارقت هالدنيا ...

.....................

عادل دخيلك لا تتركني .. أمي وأبوي وأنت .. من بقالي ,,,, وباجر عمور ... من بقالي غيركم .. دخيلكم انت وعمور مابقالي أحد في هالدنيا غيركم ... آآآآه يارب متى تنتهي أحزاني متى ,,, الى متى بعيش بـ عذاب ... الا عادل يارب لأأأأ .. يارب مايستوي به شي ..

..............................

قمت وأنا حاسه بضلوعي متكسره .. ومب قادره أتذكر شي ... حسيت روحي مصدعه وراسي بينفجر من العوار ...

تذكرت لــ لحظه .. الموقف لحظه بـ لحظه ,,, تذكرت الدم كيف يسبّح عادل ... تذكرت صوت السياره كيف كان عالي وصوت الفرامل وكيف كانت الجوهره تصرخ بأعلى صوتها .. تذكرت وهم يسحبوني عن عااااادل ..... حسيت روحي بموت خلاااص ما قمت أستحمل ..

مره ... قلنا هي .. مرتين .. كنت بموت معاك يابوي .. بس الله سهّل علي وقدرت أعديها .. لكن هالمره خلاص بتخبل خلاااااااااااااص .. يارب عادل ما استوا به شي ..

رفعت راسي وفتحت عيوني .... وتميت أقول : وين عااادل .. عااادل وينه ... ؟؟؟
ما حسيت الا وايد تمسح على راسي .. : الحمدلله ع السلامه نوره ..

قلت وأنا أصيح : وين عادل ..؟
عمي : عادل بخير حبيبتي .. انتي ارتاحي الحين ,,

قلت : لأأأأ انتو تجذبون عادل وين .. استوابه شي ...
عمي : لأأأأ بخير ما استوا به شي الحمدلله .. بس انتي ارتاحي ..
قلت : والله لو مستوي به شي بمّوت روحي ..

عمي : نواري حبيبتي اهدي ما استوا به شي انتي ارتاحي ,,,
حاولت أنزل من ع السرير .. وقلت : أبااا أروح أشوفه .. ما أصدقكم أنا ,,,
حاولت أتقدم من الباب حسيت بـ دوخه ...

حسيت عمي مسكني وتم يردني للسرير ..
بس أنا سحبت ايده من علي ... وابعدته عني بقوه ...
قلت وأنا أصيييح : مابا أبا عادل ابا أسير عند عادل ...

عمي : انزين عقب شوي بوديج ..
قلت وأنا أصارخ : مابا مابا ... أبا أسير اشوف عااادل محد يقدر يودني ..
عمي يحاول يهديني ..: اوكي الحين بوديج .
.
بس أنا هيهات أسكت ... وين أسكت ... قلت : ماباااا أباااااااااااااا عااااااااااادل وين عادل ..؟
ما حسيت الا بأيادي تشدني وتقبضني وتردني لـ مكاني ...

قلت وأنا ارافس بكل قواي : قومو عني ما أحبكم أنا قووووووومووووووو ...؟
بس ما حسيت الا ونمال تمشي بـ الوريد ... حسيت كل شي حولي قاعد يبيض ...

ورقدت وأنا مرتاااااااااااااحه ....
جسدي ارتاح لكن وين بالي بيرتاح ما أعتقد بالي بيرتاح ومستحيل انه يرتاح ... الا يوم أشوف عادل ... دخيلك لا تعذبني ياخوي ... دخيلك من بعدك أنا ليلي هم وغم وكروب ..

قلت بودع الهموم بس ويييييييين شكلي كل ما أقول هـ الجمله النحس بيلزمني وين ما اروح ...قلتها وكل ما أقولها تزداد همومي بدال ما أودعها ..

..............................

حسيت بصوت صوب أذني ...

...........: نواري نواري حبيبي ...
فتحت عيوني بكسل ... شفت يميني ما شفت شي .. لفيت يساري ... اهني الطامه الكبرى تفاجئت ....... هذا انت ما أصدق ...

قلت : عدووووووووووول حبيبي ..
حاولت أقوم من مكاني ونرلت وقفت ... حسيت بدوخه .. خلاااااص بطيح ..
بس ايد مسكتني وردتني ع السرير ...

طالعت عادل .. وقلت : حبيبي هذا انت ...
قعد يدامي ع السرير .. تقدمت منه وتميت حاضنتنه بأقوى ما عندي وأقول في خاطري يا رب ما نفترق يارب ..

عادل يبعدني عنّه : نوار خنقتيني ..
طالعته يودت ويهه وابتسمت : عدول .. انت بخييييييرررر ..؟؟؟
عادل : هي أنا زين خلاص .. عمي يقول صرت ريال ..

طالعته وبسته وقلت : فديت الرياييل أنا .. والله انك ريال ..
عادل : نواري انتي ليش نمتي في المستشفى ..؟؟

طالعته وحضنته مرة ثانيه .. بأقوى ما عندي ..
عادل : نوّار عورتي ريلي ..
طالعت ريله مجبسه وقلت : فديتك أنا .. تعورك ..؟
عادل : هي شويه ..

قلت له : حبيبي انته يار ريته فيني ولا فيك ,,
عادل : شو يعني ..؟
قلت له : هب لازم تعرف ...

طالعت صوب يوسف ... ابتسمت له ...
يوسف : هااا وأخيرا .. خلاص تطمنتي ..
هزيت راسي بمعنى هي .. : وين عمي ..؟

يوسف : فلعتيه ضرب أمسااات ..
طالعته وأنا مستحيه : غصب عني .. يعني عدول داعمتنه سياره وما أسوي جذا ..
يوسف : صار خير .. أبويه ألحين بيي ..

قلت له : اليوم شووو ..؟؟
يوسف : الأربعا ..
طالعت صوب عادل متخرعه ... : أنا من قبل أمس راقده ..

يوسف : هي .. عدول كان في العنايه .. وانتي ماشالله كلما تنشين تفلعين فاللي يمبج ..
،’, استحيت .. بالفعل انا يوم ما أكون في وعيي أضرب كل اللي يمبي .. وأفلعهم ضرب .. احساسي ينعدم في هاللحظات ,,,

يوسف شال عادل .. لأنه ريله متعوره ..
قلت له : مستوي به شي أكثر ..

يوسف : لا الحمدلله بخير .. بس ريله تكسرت ..
يوسف : يلا نحن بنروح ..
طالعت عادل ويودته : لأأأ خلّه عندي ...

يوسف : الريال توه مسوي حادث ,, ومرقد اهني فالمستشفى في قسم الأطفال ..
طالعت عادل : يعني مرقد اهني في المستشفى .. خلاااص يارب ما أطلع الا يوم يطلعونه ..

يوسف طالع صوب الدريشه وما رد علي جنه ما عيبه دعائي وقال ..
يوسف : يلا عاااد نحن بنروح حجرة عادل ..

طلع يوسف وهو شايل معاااه عادل ... حسيت روحي مستانسه مدري ليييش ..؟؟
وأخيرا الحمدلله عادل ما استوا به شي .. بعده ما تركني ,,,

بس شو دراني اذا ما يكذبون علي .. متعودين يخبون علي أشيا كأني ياهل أو أحد غريب ..
حسيت بروحي منهد حيلي خلااص ... غمضت عيوني ورجعت راسي على ورا ...
رجعت بالذاكره لــ ورا ورااااا ...

تذكرت مره من قبل ثلاث سنين ...
أبوي كان راد من الدوام تعباااان وايد .. يوسف كان معاااه ..
اثنينهم يو بيتنا ..

دخلت مكتب باباتيه بالغلط ,,,, بدون ما أدق الباب ,,
شفته هو ويوسف مع بعض ,,

كان مبين على أبوي يشكي لـ يوسف عن شي .. مدري شو هو ...
اللي أعرفه أبوي الله يرحمه مو من النوع اللي يشتكي للناس ,,, بس يوسف عنده غييير ..
وأكيد الواحد يوم تتراكم عليه الهموم يدور على أحد يشكي له ..

بس فيه جمله وقفتني بـ مكاني وقتها ,,,
يوم يوسف قال : عمي الله يهداك أنا قلت لك خل عنك هالسوالف واشتر الجهاز عسب تقدر تقيسه .. يوم يرتفع عندك ...

أبويه : وين أنا هب متفيج ... يالله يالله أحصل فرصه أرد البيت ..
يوسف : بس انت أهم عن كل هـ الأشغال ..

أبويه : يصير خير .. ها سرت عند بو سلطان
يوسف : هي .. مصرين الا يعرفون منوو ..؟؟
أبويه : وانت قلت لهم منووو ...؟؟

يوسف : قلت لهم محد فينا يعرف .. وينها الحين .. ؟؟؟
أبويه : زين سويت ...

واهني ياه عدول وسحبته وردينا الحجره مره ثانيه ...

.. يوسف كان يقصد بـ كلامه .. يوم قال (عمي الله يهداك أنا قلت لك خل عنك هالسوالف واشتر الجهاز عسب تقدر تقيسه .. يوم يرتفع عندك ... ) السكر عند أبوي .. يعني كان يعرف عن مرض أبوي .. قبل ثلاث سنوات .. جايز أكثر بعد .. جذبو علي كلهم كانو يدرون .. مو بعيده أنا يكون فيني شي .. وما بيقولون لي .. ..

بس متى دريت عن مرضك يابوي متى .. ؟؟ بعد مافات الوقت ...
بس يوم قال بوسلطان توني فهمت منووه بو سلطان ,, هذا خالي .. يعني أبوي كان يزور خوالي وكانو متواصلين .. بس شو سالفة هاذي اللي باسمها ورثنا .. .. وشو يخصها فينا ..

حلوه هاااي الواحد يعرف بـ معني الكلام اللي ينقال قبل ثلاث سنوات عقب فتره طويـــــــــــله .. بس شو فايدة معرفته عقب فوات الآوان .. بس هذي قسوة الحياه وهذا طبع الزمن ,, دومه قاسي ,,, أبد ما يراعي مشاعرنا نحن البشر ,,,

يمكن العكس هو الصح يمكن نحن البشر ,,, ما قدّرنا أفضاله معانا وشفنا وحسبنا مساؤوه لنا قبل ما نحسب حسناته ..
جايز كل شي بـ هالزمن ,,جايز .. لي متى بنتم نذوق المراره لي متى ..؟؟

مافي أحد في هـ الدنيا عاادل ويقدرنا .. حتى التراب اللي ندوسه .. بنندفن تحته ..
قطع علي خيالي وذكراي اللي رجعتني لورا .. صوت باب الحجره ,,,

..............: هلا والله هلا
ابتسمت : أهلين ..
الجوهره : الحمدلله ع السلامه ..
قلت لها : الله يسلمج ..

الجوهره : ها اشحالج الحينه انشالله أحسن ..
قلت لها : الحمدلله على كل حال ,, وين البنات وعمو ..؟

الجوهره : صوب عدول ..
قلت : شكلي بديت أغار عن عدول تدرين ..

الجوهره : ههههه
قلت لها : جوجو تعالي اقعدي عندي,,
الجوهره تقدمت مني .. ويت قعدت على طرف السرير .. : حرمة أخوي تامر أمر ..

قلت لها : هههه مالت عليج جوجو ..
الجوهره : أفا أفا .. خلاص بروح عند عدول وايد أحسن لي ..

قلت لها : لأأأأ أميه تمي عندي لا تسيرين ..
الجوهره : هههه أتمصخر انزين ,,
قلت لها : جوجو خبريني شو صار هاااك اليوم دوم يوم ترقدوني ما أعرف شاللي يصير ,,

الجوهره : هههه أوكي .. الله يسلمج يوسف قال بعرس منج وطحتي ويبناج
قلت : جوجو عن التفاهه ارمسي ,,

الجوهره :ههه أوكي خلاص .. الله يسلمج يوم عدول راح صوب الكره أنا سنترت وعقب انتي سنترت وثواني الا وركضتني صوبه وتعلقتي به سحبوج وسحبوج وانتي لاصقه ما تبين تقومين ..

قلت لها : منووه اللي كان يسحبني ..
الجوهره : حمد ,,
قلت لها : هااااه حمد ,,..؟؟
الجوهره : هي ترا يوم الواحد ينفلع لازم أحد يعرف يوده لا سمح الله متكسر به شي .. انتي بتزيدين عليه ,,
قلت لها : هي صح ..

الجوهره : عقب يوم بدا الدم ينزل من خشم وحلج عدول .. انتي طحتي ,,
قلت لها : هي أحيد لين اهني وبس ما أذكر شي ثاني ..

الجوهره : عقب يابوج تميتي مرقده وعدول في العنايه المركزه ,,
قلت لها : فديته ما يستاهل ,,

الجوهره : انزييين وعقب بابا قال هاليوم الفير نشيتي وتميتي ترافسين وكسرتي الدنيا هههه عقب عطوج مخدر ورقدوج .. وما نشيتي الا اليووم الصبح ...
طالعتها : خيبه يوم كامل كنت راقده ,,

الجوهره : تراج يوم بتنشين وما تشوفين عدول أخاف تذبحين لج حد هههه
طالعتها : هههه حرام عليج عاد مولـ هالدرجه
الجوهره : يلا الحمدلله يت على جي ..

قطع علينا حديثنا صوت .. جواهر وميثاني من آخر الممر يتضاربن ويستهبلن هههه
يو عندي وسلمو علي ..

الجوهره : بلاكن تباغمن .. صوتكن من آخر الممر واصل
ميثا : شي خاااص وايــــــــد
الجوهره : شي خاص ويباغمن .. عاد لو شي عاام شو بيسوون هههه

ضحكنا على سوالف ميثاني وجوجو ..
جواهر : نورو لو أدري طيحات المستشفى تخلي الواحد ينخطب جان أطيح يوميا هههه
قلت لها : هههه بعيد الشر عنج ... مالت عليج ويا تفكيرج هذا ...

ميثاني : لا صدق يوم بنطيح يمكن يسور وفهود بيخطبونا صح جوجو ..
جواهر راحت صوب الحمام وقالت : أنا رايحه أشرب كلووور ...
الجوهره راحت سحبت جواهر : شوووه خبله انتي ..

الجوهره : هههه أتمصخر انزين عاد مو لهالدرجه غبيه هههه

ضحكت على سوالف ميثاني وجواهر ... بس هم قالو يوم اطيح في المستشفى عسب جذا انخطبت .. يعني يوسف خطبني لأني مريضه .. لأني أتعب وايد يعني شفقه .. أو انه سمع كلام عمي ,,,

يوسف لا تحطم أمالي بك دخيلك لا تحطمني أنا عايشه على أمل ارتباطي بك لولا هالأمل جان من زمان أنا ضايعه وتايهه بهـ العالم ..
حسيت الوقت بسرعه راح والبنات معاي ويمبي ...

......................................
>>>>>>>>>>>>>>>>>>>>>>>

قمت الصبح .. تسبحت ونزلت أتريق ,,, شفت مرت عمي وعمي ..
قلت : السلام عليكم ..
مرت عمي وعمي : وعليكم السلام

عمي : تعالي بنتي تريقي ..
رحت صوبهم .. وقعدت أتريق ,,

قلت : عمي .. عدول كمل أسبوع اليوم موعده عسب يغيرون الجبس ..
عمي : هي متذكر بنتي بوديه الساعه 11 الضحى ,,
قلت له : بييي وياك ..

عمي : ما يحتاي بنتي تمي انتي ترا عرس عليا والجوهره عقب أسبوعين ريحي ترا وراكن طلعات ,, وتتزهبن عسب العرس
قلت له : ما بحضر عمي ,,

عمي : شو ما تحضرين بعد .. ما يصير بيزعلن بنات عمتج وعمج ,,
قلت له : عمي أبوي من فتره متوفي وأخوي متعور شقايل تباني أروح ,,

عمي : نوره خلي ايمانج بربج قوي .. أبوج بيكمل بعد كم يوم ست شهور وبيدش السبع ,, وأخوج خلااص مافيه الا العافيه كم من أسبوع بيرد شرات أول وأحسن ..
طالعته : بس عمي ,,,,
قاطعني عمي : ماشي .. نوره أنا كلمتي وحده ,,
طالعته : انزين خلااص

عمي ابتسم : هي أباها جذا بنت أخوي تسمع الرمسه من أول كلمه ,,
طالعته ابتسمت ,,

شفت يوسف لابس وياي عسب يتريق شكله بيروح الدوام ..
جان أنش وأقول : بسير بغير حق عدول ..
عمي : اسرعي بنيتي عسب أوديه قبل الزحمه ,,
قلت : انشالله ,,,

رحت فوق صوب الجوهره .. قاعده تقرا مجله أما جواهر قاعده عاللاب .. رحت صوب عدول ساعدته يوم يغير ...

قلت : عدولي لا تطفر بـ عمي زين ,,
عادل : هي أنا ريال ما بطفر به ,,
قلت له : شاااطر فديتك أنااا ,,,

لبسته .. طالعته سوا لي باي .. ابتسمت له وياسر ياه وشلّه نزله تحت صوب عمي ,,
طلعت من الحجره للصاله اللي فوق .. بعدهن جواهر والجوهره على نفس الحال ..

رحت صوب اللاب وحدرت أنا بعد .. جواهر والجوهره هب أحسن عني خخخخ ..
قعدت أطالع الجامعات وشو فيها .. ويوم بدش أي تخصص شو بيستوي ,, وكيف بتعلم ,,

حسيت الوقت راااح بسرعه ... حسيت روحي مرتاحه باليا ونفسيا وكل شي فيني مرتاح ..
طالعت صوب الجوهره وقلت : هااا جوجو نقول مبروك مقدما ..

الجوهره ابتسمت مستحيه : هههه قولي ,,
طالعتها وقلت : بس مو جنج صغيره 18 وايد صغيره ,,

الجوهره : هاي سنة الحياه
طالعتها وقلت : هذا رايج .. بس أنا لأأأأ
الجوهره : بنشوف انتي شو تسوين ..

قلت : نشوف ..
جواهر : ترا باجر بنروح عسب الفساتين ..
قلت لها : ميثاني وعلايه بييون ويانا ولا ..

جواهر : هي ترا علايه بتودينا ,,
الجوهره : بس انا بستأذن من حمد بشوف ..

قلت : هااااي أمس مالجه وكل شوي حمد وحمد االله يعينا هههه ذالتنا الأخت
الجوهره : لازم هاي الحياه
جواهر : بلاها هاي كل شوي حياه وحياه .. تراج قرفتينا من الحياه ههههه

الجوهره : يلا عاد لازم نتجهز بسرعه هب باقي شي ,,
قلت لها : صدقج ,, الحين بشوف في النت أي أتيليه بنفصل ,,

جواهر : بس ما بيوحالنا نفصل ,,
قلت : صدقج ,, اسبوعين شويه ,,
جواهر : اعرف دار حق الأزياء عندهم سوالف حلوه ,,

قلت : أوكي عاد نمر ونشوف شاللي يناسبنا ,,
الجوهره : أوكي خلاااص بشوف حمد شو يقول ونطلع باجر الصبح ,,

قلت : وزهبتج لازم يوميا تروحين وتاخذين شوي شوي ع الأقل هـالسبوع ..
الجوهره : هي لازم ,, يلا يصير خير باجر ,,
قلت : جوجو وايد بفتقدج تدرين ..

الجوهره : وأنا بعد ..
الجوهره يت صوبي وحضنتني ودمعت : نورو أحبج والله
قلت لها : وأنا أكثر .. والله مدري شو بيستوي بي من بعدج

الجوهره طالعت جواهر : وانتي جواهر ما بتشتاقين لي ..
جواهر أشرت بيدها هب مهتمه ...: عادي عادي أصلا أنا أبا الفكه منج هههه
ضحكنا أنا والجوهره على جواهر طول عمرها هالبنيه بتم جذا عمرها ما بتعقل

قمت ورحت قعدت في الحجره روحي ,, واللاب معاي لأني ما أحب أحد يعرف عن اللي أسويه أحب كل شي يكون لي أنا روحي ,,,
مابي أحد يدري عن حياتي الحين .. حتى أقرب الناس لي .. هه لو تم فيه أحد قريب لـ قلبي ..

ما بي أحد يدري أباهم يتفجئون يوم بيدرون ... أباها تكون أكبر مفاجأة ,, أنا نوره هب أي كلام ,,, خل كلهم يعرفون منو نوره وشو تقدر تسوي ,,

،،،

مرت الساعات والأيام و هالأسبوعين مرّو من بعد تعب وعنا ودوارة الأسواق وتجهيزات الصالون ,,, و و و و و هذي الأعراس ... متعبه وشاقه للجميع ,,

حسيت روحي مستانسه من خاااطر للجوهره .. تمنيت لها الخير .. وبتم اتمناه لها طول عمري .. هذي تؤام روحي هب أي أحد ..
ياه يوم العرس ..

قمت الصبح على صوت منبه الجوهره ع الساعه تسع ...
شفت الشمس توها جنها طالعه .. رحت صوب الحمام تسبحت طلعت لبست جلابيه حرير خفيفه ,,
والجوهره بعد لبست ,, حطينا أغراضنا في أجياس ,, وجنط ,,
رحت صوب حجرة جواهر ,, قومتها من الرقاد ,,

نشّت .. وعقب نزلنا نتريق ,, عقب الريوق .. عليا مرتنا ورحنا القاعه من الصبح ,,
نزلنا القاعه ,, دشينا أول شي صديت صوب .. طريقة التصميم والكوشه روعه خباااال ..
طالع شكل القاعه عجيب وحلو .. يستاهلن جوهره وعلايه ..

طالعت صوب الجوهره وعليا .. بس الظاهر اليوم هم هب معانا .. هم في عالم ثاني ,, أكيد يفكرون في الحياه اليديده و كيف بيعيشونها بيودعون حياتهم الجديمه وأحلى أيامهم بس انشالله الحياه اليايه تكون أحلى وأحلى ,, أكيد التأقلم مع الحياه اليديده صعب .. صعب وايــــــــــد معني ما جربته مثل طريقتهم .. جربته بشكل عنيف وايد .. هه أنا شرات البدو الرحاله كل فتره حياه مدري متى بستقر .. أو بالأحرى بيوقف عذابي ...!!!

اليوم عرس ولازم أنسى الأحزان شوي .. وأفرح اليوم يوم واحد وما بينعاد .. جوجو وعلايه مره وحده بيفرحون هالفرحه لازم أكون طبيعيه ..

أول شي بدينا بالاستشوار وعقب الميكب ... لما شفت روحي بس بـ كريم الأساس تخرعت هههه بس عقب تمت الحرمه تحط الباجي ,,, عقب سوينا التسريحه ..

صح عددنا ماكان وايد .. بس أنا وجواهر وميثاني ,, أما علايه والجوهره بتحط لهم وحده بس تحط ميكب عرايس .. ولكن تأخرنا وااااااايــــــــد جهزنا ع الساعه ست المغرب ,,
خلصت الكوافيره مني ,,

رحت طالعت شكلي في المرايه .,,
لأأأأأأ هـــــــــــــذي مو أنا ,, هذي وحده ثانيه ,,,
رحت صوب الكوافيره مره ثانيه وقلت : شـــــــو هذا ..؟ وايد دفش م ابا جذا خففي لي اياه .. مال كبار هالميكب ,,

الحرمه : طيب انتي كبيره ,, لك بيعأد مو صح صبايا ,,؟
جواهر رفعت راسها من ع الكرسي اللي تحط عليه الميكب ,, : الله نوروووو طالع خبااااال عليج والله روعه ,.,

ميثاني داشه وماسكه فستانها وتقول : حد يبند لي هالسحاب وع ع ع شكلي متنت هع ,,
طالعتها عسب اروح صوبها واسكر لها السحاب ,,

ميثا تأشر بيدها ومستغربه : بعيد بعيد ,,, تعاااااااااالي غربلاتج شو هالحلا .. وين مخبتنه ..
قلت لها : صدق متفيجه ,,,
رحت صوبها عسب اسكر زرارها ,, : هب عايبني مكبرني وايد ,,

جواهر تفتح عين : أحلى انزين ..
الكوافيره : يا بنتي لك اعدي مكان واحد .. هيك بدو يخترب مكياجك ,,
جواهر : فهموها انزين انه حلو ..

شليت كلينكس ورحت صوب المرايه بديت اخفف
ما حسيت الا بميثوه تمطني وتقول : يالغبيه خلي يسوف يجوفج جذا يمكن يستعيل فالعرس ..
قلت لها بعدم اهتمام : برايه ما يهمني ,,

جواهر : أقول ميثوه وديها الحجره اللي قاعدين فيها جوهره وعلايه ونشوف شو يقولون ..
ميثا مسكت ايدي : يلا تعالي

سرنا صوب الحجره .. المسافه مو بعيده بس ممر صغير فرة حصا على قولتهم ,,
دشينا شفت الجوهره وعلايه قاعدات والحريم يشتغلن اللي ميكب واللي تسريحه ,,

علايه : نوااااااااري ميثووووووه غربلاتكن شو هااا ..؟
ميثا : صدق حلو ,,
علايه : وااااااااااايد .. ميثوه دوم تحطين بس مال نورو طالع غييير

قلت لها : هي انتو اخرطو علي ,,,
الجوهره رفعت راسها تطالع : نورو والله حلو ..
أوني اقتنعت : أوكي خلاااص ,,

قلت : ميثاني تعالي ساعديني البس الفستان عن التسريحه تخترب ,,

رحت الحجره ولبست الفستان ,, عقب رحت صوب الحمام ,, خذيت معاي كلينكس ,,
مسحت من القلوز شوي ..وتوني أحاول أخفف الشادو ..

ميثا : أيـــــــــــــه انتي ما تتوبين ,,
طالعتها بتأفف .. : والله هب عايبني ,,

ميثا : والله العظيم حلو ،، بشو أحلف لج يا ماما عسب تتأكدين ,,
قلت لها : أوكي خلاااااص مشينا ,,
ميثا : جدامي يلا جدامي ,,

قلت لها : جيييه موصينج عليه عسب تتأمرين
ميثا : هي يوسف قال لازم تديرين بالج ع نورو ولا بذبحج
قلت لها : اعوذ بالله امحق خرط سمعته في الدنيا ,,

رحنا صوب جواهر .. شفناها تستعرض يدام المرايه العوده ,,
ميثا : تخبلت البنيه ,,,
جواهر : اذا فهدوني شافني بيتخبل وبيخطبني اليوم

ميثا : بسوي لج واسطه بس بشرط ...
جواهر : أسوي لج واسطه صح ههههههه
قلت : الحمدلله والشكر ,,

جواهر تطالع ساعتها ,,: يلا ننزل الساعه سبع ,,
ميثا : قوم ماما وأمج ما يو بعدهم ,,

جواهر : امبلى قالو بنيي الساعه سبع بس بيدشون من الباب الرئيسي ما بيدشون ما باب أهل العرس ..
ميثا : انزين تعالو شكلهن خوات خالد يو ..

قلت : أكيييد أهل المعرس لازم ييون من وقت ..
دخلنا من الباب اللي بتدش منه العروس .. ورحنا صوب القاعه ,,

الحين أحلى عن الصبح .. الاضاءه صح انها قويه بس تبين خافته وحلوه وايــــــــد غير الكريستالات ,,
رحنا صوب أول طاوله يمب الكوشه ,,

وشفنا خوات خالد سلمنا عليهن .. ماشالله كاشخات عدل ,, لازم عرس أخوهن .. يارب متى يصير عرس عموري والله برقص رقص هههه فديته ,,

وقعدنا مع بعض شوي وكل شوي ميثاني وجواهر وخوات خالد يعلقن على علايه فديتها هههه أما الجوهره محد متذكرنها غيري .. علني فداها ..
مرت نص ساعه صارت الساعه سبع ونص بدو المعازيم يزيدون ويزيدون ...

والدي جي شغلو الأغاني .. وبدا الفسق ..
والدق عالي حسيت راسي بينفجر من علو الصوت ..
جواهر تصارخ : ميثوه قمنا نرقص ,,

ميثا وقفت وسوت حركه بمعني أوكيه .. وبدت تتمخطر وتسوي حركات بصراحه عجيبه وتسكّت الين وصلت للاستيج ,, والناس كلهم يطالعون صوبها وصعدت وتمت ترقص ,, وجواهر وخوات خالد دخلن ,,
تميت قاعده روحي ,,, ثواني الا وبعد الأغنيه الأولى ,,

يت جواهر صوبي : تعالي يلا نرقص بلاج قاعده
قلت لها : لا لا لا بعيد عني .. ما اعرف
جواهر : علينا هاااا يلا تعالي ,,

قلت لها : مابي جواهر أستحي في حياتي ما رقصت يدام هالكم الهائل من الناس ..
جواهر سحبتني وتمت تحرك ايدينها معاي الين وصلنا صوب الاستيج ,,

ورقصت معاي اكتفيت باني أتحرك بهدووو أوني أرقص .. استحيت كل الناس يطالعون صوبنا الين خلصت الأغنيه ونزلت طيراااان صوب الطاوله اللي قاعدين عليها ..

رحت تميت أطالع صوب البنات .. وجواهر وميثاني .. ميثاني الصراحه رقصها يسكت غير حركاتها ..
كنت لابسه الكيمره بالشريطه العوده ,, يودت تلفوني تميت اشوف الصور اللي فالتلفون ,,
ثواني ما حسيت الا بمسج يوصلني ,,

( نواري انتي لابسه بنفسجي ومسويه تسريحة السبعينيات وميكبج صارخ .. ولافه الكام .. حبي لج .. ودي )

ودي .,. ها لقب ودادووووه .. شقايل عرفت ..
وقفت تميت أطالع يمين ويسار .. ما شفت وداد .. حاولت أشوف أختها بعد ما شفتها تميت أركز ,, بعد ما حصلتها ,,

جان أتصل ..
قلت : السلام عليكم
وداد : وعليكم السلام ..

قلت : تريي ودي شوي ..
حسيت روحي ما اسمعها من صوت الأغاني رحت صوب الحمامات دشيت ..

وقفت يدام المرايه .. الاضاءه اهني بيضا غير عن برا ,, تميت اطالع شكلي في المرايه
وقلت : ودي انتي فالعرس ..
وداد : هي حياتي .. شفتج

قلت لها : وينج عسب أيي صوبج
وداد : لفي وراج بتشوفيني ..

لفيت وراي فتحت حلجي متفاجأه نفس الدقيقه حطيت ايدي عويهي وضحكت ..
قلت : ههههه وداد ... حياتي شخبارج ..
وداد : تمام الحمدلله انتي اش حالج ..؟

قلت لها : تمام دام شفناج والله فرحتيني ..
وداد : ههه فديتج ، هااا أشوفج كاشخه ..!!
قلت لها : هي ترا عرس علايه والجوهره ..

وداد : الجوهره بنت عمج وعلايه شو تصير لج ..؟؟
قلت لها : بنت عمتي .. وانتي بعد أشوفج كاشخه ..
وداد : هي ترا خالد ولد عمي ,,
طالعتها : صــــــــــدق نقرب لـ،بعض ولا ندري ههههه
وداد : خلااااص تناسبنا الحين ههههه

قلت لها : زين سوو علايه وخالد عسب نتم ويا بعض ..
وداد : تعالي تعالي نروح نرقص ,,.

قلت لها : لا لا أمي أنا توني راقصه .. ما أحب تبين سيري روحج ,,
وداد : أوكي عاد عقب بروح ههههه

شفت الكيمره وقلت : اهني الاضاءه أوكي تعالي نتصور ..
وداد : أوكي ..

تصورنا .. حسيت روحي مستانسه مع وداد .. عقب وداد راحت ترقص .. رحت صوب عموتي ومرت عمي .. شفتهن مستانسات وقاعدات مع أم خالد ومعاهن حريم ..
استحيت بس واجب اسلم .. تجدمت منهن ,,

قلت : السلام عليكم ,,
ردو عليه : وعليكم السلام ..

أم خالد : مبروووك نوره ...
قلت لها : الله يبارك في حياتج خالو ..
أم خالد ترمس أم يوسف : زين سويتي خذيتي نواري ماشي شراتها ..

في حرمه قالت : هاي نوره بنت المرحوم خليفه ,,
يتني الغبنه .. العبره بتخنقني لازم تذكرون لازم ما ترتاحون جذا ..

عمتي : هي هاي نواري ,, والحين هي خطيبة يوسف ولد مزنه ,,
الحرمه : ماشالله الله يحفظها ,,

ابتسمت : عن اذنكم ..
ورحت صوب الطاوله ومجموعة بنات يو وقعدو ويانا .. تمينا نعلق ونسولف ,,

وتعشينا ,, بس ما كليت عدل هع ,. ميكبي بيخترب جذا ,,, ههههه
عقب العشا تمو البنات يرقصون حشا ما تعبو هههه

بس اللي عيبني يوم أخت خالد الصغيره توقف ع الطاوله وترقص مصري الحركه بـ صراحه طررررر بمعنى الكلمه .. عقب الرقص والضحك والسوالف ..

علايه انزفت .. وكانت زفتها روعه ,,, وعقب ما سلمو عليها الحريم .. رحنا لبسنا عبينا ,, ودخل خالد .. ومعاه أبوه وريل عمتي اللي هو أبو علايه ,,,

بس خالد ماشالله عليه مسكت ملك جماااااااال .. روعه
الله يسعد علايه معااه ،، من صغرها تموت عالتراب اللي يمشي عليه ,, والحين ربنا راد وجمعهم ,, يعل حياتهم تدوم بـ سعاده ..

وعقب الرسميات الكيكه والعصير بـ كم من دقيقه تقريبا جريب الساعه .. نشو علايه وخالد ... وراحو الحجره مال العروس .. اللي كانت تتجهز بها ,,

وطلعو الجوهره .... حسيت دموعي هاللحظه بتنزل ,,
الجوهره أكثر من أخت لي .. كيف الحين أقدر أفارقها .. شكلها طفولي برئ ,., حلوه ملكة جمال شوي عليها .. الله يحفظها من كل شر ..

الجوهره تمت تبتسم لنا ويوم طالعت ابتسمت لي .. دموعي بغت تنزل ,, أحبها هالانسانه أموت عليها الله لا يفرقنا ,,

وعقب دقايق وبعد السلام والتصوير .. ردينا لبسنا عبينا .. الجوهره لبسوها هالشال الأبيض مدري ليش عليا ما لبسوها بس يمكن فهد أخو حمد بيدش ..

قعدت في صوب على طاولتنا ومعاي البنات .. عسب أراقب حمد يوم يدش .. أكيد يوسف بيدش وياه ..
تمينا نطالع .. دش حمد ومعاه عمي وريل عمتي ومعاهم يوسف وياسر وفهد ..وعموري فديته وعدول وعلاوي ..

شفت صوب عموري سويت له باي أنا وجواهر بس ما رد لنا لأنهم قاعدين يصورون هع طلع ذكي بو الشباب ....
وصلو صوب الكوشه ..
وحمد باس راس الجوهره .. ووقف يمبها ..

حسيت هاللحظه حمد بيكون انسان متفتح مع الجوهره ,, حتى ولو الواحد يكون عصبي وشديد بس مع زوجته غيييييييييير عكس بمليون درجه ,,
هالحزه عمي أشر لنا نروح صوبه ..

قلت : الله واحد مابسير ..
جواهر : أنا بسير عسب أحر فهود واراويه كشختي
قلت : أنا متمكيجه بتغشى

ميثا سحبتني : عادي لاااه لابسه عباه وشيله كله مستور بس ويهج باين ..
تقدمنا وركبنا ورحنا صوب الكوشه تميت ميوده ايد ميثاني عن اطيح ,,

سلمنا على عمي وريل عمتي ,,
عمي : هااا بنات محلوات اليوم
جواهر : بابا أنا كل يوم حلوه

سمعنا صوت من يمبها : قاصه ع روحج بـ هالميكب
جواهر : يسور صخ عن الحركات هاااي

ياسر ضحك وقف يمب جواهر وصورتهم المصوره الصوره مبين بتطلع حلوووه واااااايد
عقب بدت أغنيه آه منك منقهر .. حلوه الأغنيه بس مو وقتها هااا عرس معرس وعروس يمب بعض شوو بعد آه منك منقهر ,,

جاااان جواهر ترص على ايدي وتطالع صوب فهد وتقول لي بصوت واطي : صدق والله آه منك منقهر طالعي شقايل ولا جني موجوده ..

ضحكت عليها جان أسمع عمي يقول : نواري تعالي يمبي نتصور ..
رحت يمبه .. والمصوره تمت تصور وأنا مبتسمه ,,

عقب عمي تم يرمس ميثاني .. عرفت ليش ميثاني مسويه روحها شي ورزه عسب تجذب نظر
يسور ..

شو هالعايله والله حاله ياااااانااااااااااس نحن عالاستيج والناس تطالعنا وجواهر وميثاني بعدهن على حركاتهن ,,
كنت واقفه يمب الجوهره ,,

قلت : مبروووك حبيبتي
الجوهره : الله يبارك في حياتج ,, مت تحت هااذاا الشال
قلت لها : الحين بيطلعون الشباب

شفت صوب أخر الاستيج جواهر راصه على ايد ميثاني .. وهــ اللحظه راشد الماجد فالأغنيه يوم يقول آه منك منقهر ,, جواهر تحرك شفاتها شرات الكلمه ,,

ابتسمت ابتسامه عن خااااطر في خاطري أضحك بعد هههه على حركات جواهر ,,

سمعت صوت طول عمري حافظه أنغامه بعد : ماشالله التقويم بعد لون الفستان ,,,
صديت صوبه ابتسمت واستحيت .. رحت صوب جواهر وميثاني ونزلنا .. شو نسوو فوق بعد ,, وطلعو الشباب ,,

تميت أفكر في خاطري ,,, يوسف قال لي التقويم لون الفستان .. التقويم شافه لأني ابتسمت .. ومسويه لونه بنفسجي .. بس الفستان ... أويــــــــــــــه ليكون شافني بالفستان فضيحه وافضيحتاه ,,

سمعت صوت جواهر .. : بنات يلا نروح صوب الحمامات ,,
ميثا طلعت عباتها لأنه حمد أخوها ,, أما أنا وجواهر تمينا بالعبي ,,

دخلنا الحمامات ,, مشيت شوي ,,
وتجرفست .. زين ما طحت كنت بتكسر .........
قلت : عن ابو دارج شو ما تشوفين ..

جواهر : شو يخصني ها فستانج اللي ذيله واصل لأخر الدنيا ,,

طالعت وراي بالفعل الذيل وايييييييييد طويل .. ابتسمت ,, أكيد يوسف عرف لون فستاني من الذيل ... يعني كان مركز علي ,, عمي الله يسامحه فضحنا قال لنا نروح له ,, هههه

بس وايد حلو ذيل فستاني طويــــــــــل وايد ..
عقب الرسميات والسوالف .. خلّص العرس ,,

رحنا صوب الحجر عسب نييب أغراضنا أنا وجواهر .. ميثاني قالت بترد مع فهد ما بتيي صوبنا لأنه بنات عمهم في بيتهم ,,

شلينا أغراضنا ورحنا صوب السياره ركبنا ,, عموري وعدول وعموري ويانا في نفس السياره وياسر اللي يسوق ..

جواهر : يسور ماما راحت مع منو
ياسر : مع الوالد ,, هكوهم جدامنا لو تبين تروحون وياهم
جواهر : لا جييييه تباني باجر أوصل البيت ,, ههههه


ردينا البيت ورحنا أنا وجواهر كل وحده حجرتها ,,, دخلت ,, رحت طلعت الفستان وعلى طوووول صوب الحمام أتسبح وأفتك من الجل والاسبري غير الفاونديشن اللي أحسه طين ,,

تسبحت فماي ساااااااخن حلو ومنعش طلعت لبست لي بجامه مريحه ..
رحت صوب المرايه أمسح الجحال اللي تام تحت عيوني ,, عقب ما خلصت رحت صوب السرير ,, حطيت راسي ع المخده ..

طالعت يمبي ,, : وينج يا الجوهره ,, تركتيني روحي ,,
أكيد الحين جوجو مستانسه وأخيرا هي وحمد مع بعض الله يوفقها ..

دموعي هلّت .. حسيت بالوحده من بعدج جوجو .. والله مكانج خالي ,,
قمت .. طلعت من الحجره رحت صوب جواهر .. دشيت ,,

شفت جواهر حاطه البطانيه ع روحها وصوت أنين من تحت البطانيه ,,
تجدمت منها رفعت البطانيه شفتها بالفستان ,,, تخرعت ليش بعدها ما غيرت ولا مسحت الميكب ,,

قلت : جواهر حبيبتي فيج شي ,,
جواهر قعدت ,, قعدت يمبها ,, .. وارتمت في حضني ,, لويت عليها ,,
وقلت : جواهر حبيبتي ليش كل هااا ,.. حق شو مسويه بروحج جذا ...؟

جواهر : نواري أبا الجوهره ,, اشتقت لها ,,
قلت لها عسب أنسيها : منو اللي تقول أبا الفكه وأبا الفكه ,,

جواهر : مو شرط الحركات والرمسه تعبر عن اللي داخل الواحد ,,

صدقج يا جــــــواهر .. وايد كلام نحن نقوله ومب مقتنعين به .. باطن الانسان يختلف عن خارجه وايييييييد .,,,

مسحت على شعرها : حبيبتي هاي سنة الحياه ,, كل وحده تعرس وتروح بين ريلها ,, وانتي بعد ... انشالله باجر بييج ولد الحلال وبتروحين بيتج ..

جواهر ابتسمت لي وقالت : مابا أي ولد حلال أنا .. أنا أبا فهودي ..
ابتسمت لها : انزين بييج هالفهودي اللي ذالتنا وياه بس سيري تسبحي ,,

جواهر : اوكي هههه

نشّت جواهر راحت صوب المنظره .. عسب تشل البينات من على شعرها ..
رحت وقفت وراها وتميت أساعدها الين خلصنا ,, ودشت تسبحت وطلعت ..

قلت : نعيماً
جواهر : ينعم بحالج ,,, ارقدي اليوم عندي ..

قلت لها : هي تراني برقد عنج .. أخاف أتخبل روحي متعوده ع الجوهره هههه
جواهر : عنلاااته حمد الحين أكيد مستانس ,, سرق عني أختيه

قلت لها : ههههه حرام عليج الريال عرسه اليوم ادعي له بالخير أحسن لج
جواهر يت قعدت يمبي : نورو اليوم كنتي وايد حلوه ..

قلت لها : مشكوره وانتي بعد كنتي حلوه ,,
جواهر : شكرا هههه ،، يسوف ما قال لج شي اليوم .. جذا ولا جذا

رقدت وغطيت روحي باللحاف : اجلبي ويهج ,, برقد
جواهر : أونها حرمة أخويه تستحي ..

قلت : ترا بعدني هب حرمته ,,
جواهر : اللي يشوف اليوم بيقول يوسف باجر بيملج .. كان مقطعنج من كثر ما يطالعج

قلت لها : أقول جواهر بلا بهارات وبزار زياده ارقدي أحسن لج تراج بتحلمين في فهودي وانتي قاعده تغنين آه منك منقهر ,,

جواهر لحفت روحها : ههههه يارب أحلم فيه ,,
ابتسمت على خبال جواهر ... يا رب أنا بعد أحلم في يسوف فديته ,,,

...............................

قمت اليوم الثاني الظهر وأنا كلّي كسل ,,, طالعت الساعه الحين هنتين أنش أصلي الظهر قبل ما تطوفني
تسبحت وتلبست كشخت شوي .. ونزلت عسب أتغدى .. شفت جواهر قاعده ,,

قلت لها : غريبه شاللي موعنج قبلي ..
جواهر وهي تاكل : ماشي بس ما ياني رقاد ،، اقربي ,,

قعدت يمبها وتميت آكل : والله البيت بدون الجوهره هب شي موووول ..
جواهر : تخيلي الصبح شفت منوووه ..؟

قلت لها : منووه ..؟
جواهر : ولد ييرانا ,,

قلت لها : ليكون هاااك اللي متخبله عليه ,,
جواهر : لا لا هب .... هذا ..واحد.. غاوي ..

قلت لها : هههه عينج زايغه ,, كل اللي تشوفينهم غاويين ... ها خبريني شقايل شفتيه ..؟
جواهر : يخبل هااا والله العظيم ,, شكله بيموتني بحلاته ..

قلت لها : أمييييه حرصج .. عن تضيعين فهود
جواهر : لا عــــــاد فهود غير ..القلب ما يهوى اثنين ..

قلت لها : صرتي شاعره ,,
جواهر : عنلااته هـا يومياً أشوفه ويذكرني بـ منصور زايد

قلت لها : انتي كل حبايبج يشبهون ها .. منصور زايد ههههه
جواهر : بس فهود أحلى وأحلى وأحلى

قلت لها : تدرين حنيت للشارجه وايد ..
جواهر بحركه تقهر : اندوك انته توّج تذكرتي انج مال الشارجه ,,

قلت لها : من يوم يومي شرجاويه وأفتخر فديتج
جواهر تقلد رمستيه : مال شارجه لاااه هي لاااه هكو لاااه ,,,

ضربتها : جب لاااه أصلا انتي توصلينا ..
جواهر : لا صدق بس في خاطريه نروح صوب صحارى ..

قلت لها : فديت باباتيه الله يرحمه دوم كان يطلعنا ,,
جواهر : فديته الله يرحمه ويغمد روحه الينه ,,

قلت لها : تعالي تعالي نروح نحدر نور الامارات
جواهر : أوكي يلا ..

..........................

رحنا حدرنا .. العصر ... سمعنا صوت باب الصاله
جان نربع أنا وجواهر صوب الصاله .. رحنا صوب الجوهره سلمنا عليها ..
بصراحه مبين عليها خلاااص وحدة عوده ومعرسه ..

سلمنا عليها ويلسنا ..
الجوهره : اشحالكن ,,.؟
قلت : والله البيت هب شي بدونج موووووول ..

الجوهره : هههه صدق الحين ولا رمسه وبس .. وانتي جوجو ..؟
جواهر : واييييييييد حلو .. خلاص اروم أصيع ع كيفي ههههه

طالعت جواهر بـ نظره فهمتني بس بينت روحها هب مهتمه لرمستيه ,,
قلت : وين عمو صح ..؟؟

الجوهره : في بيت عمتيه .. كانو مسويين عزيمه الظهر ,, والحين هي هناك تساعدها ..
جواهر : اويـــــــــه جيه ما خبرتنا كنا نسير وياها ..
الجوهره : تقول الساعه عشر صوتها بح وهي توعيكن ..

قلت : هههه عاد نحن أمسات مسوين مناحه لازم ما نحس
الجوهره : هههه فديتكن كل ها عشاني ..؟
جواهر : لا هب حقج حق حمد هع ..
قلت : شخباره حمد

الجوهره جنها استحت : عـــــسل والله عـــــســــــــل
جواهر : ماما نحن بنات عن تخربينا هع .. عقب بقول زوجوني قمت أغار من أختيه ..
ضحكنا على تعليقات جواهر اللي في حياتها ما بتخلص ..

الجوهره : يلا عاد فديتكن ,, أنا سايره ..
قلت : وين تمي بعدج ما تميتي عندنا
الجوهره : ههه حمد قاعد مع الشباب في الميلس .. طيارتنا عقب ثلاث ساعات ,,

جواهر : حظها الحرمه رايحه ايطاليا هب نحن معفنين فالحر ..
الجوهره : هههه بتم أسبوعين وبرد حشا .. كل ها غيره جوجو
جواهر : بسوي اضراب عن الطعام الين ما ييوزوني ..

قلت : عنلااتج جوجو شو هالرمسه ..
الجوهره باستنا : يلا في أمان الله
أنا وجواهر : في أمان الكريم
قلت : الجوهره ديري بالج ع روحج
الجوهره ابتسمت : انــــــــــشاااالله وانتن بعد ..

طلعت الجوهره .. طالعت صوب الباب ,, ما تمنيت في حياتي أفارقج يا الجوهره بس هذا طبع الزمن ,, دوم يفرقنا ..

جواهر قعدت تتنهد : أوووووف ملل الحين شو بنسوي ..
قلت لها : طلعات بنطلع اليوم باجر وعقب بيملون ما يتفيجون يطلعونا ..
جواهر : نسااااافر
قلت لها : نروح السعوديه ..
جواهر : في الصيف وايد زحمه مكه شهر ثلاثه أحلى ..

قلت لها : صدقج عاااد البحرين ,,
جواهر : شرات الامارات دول الخليج ,,

قلت لها : احلمي يودونا بلاد برا ,,
جواهر : جيييييييه انزين
قلت لها : لو رحنا بلاد برا ع الأقل نتم أسبوع أسبوعين والرياييل يالله يالله يتمون اربع خمسة ايام
جواهر : صدقج عاد وين ..

قلت لها : عمان قريبه عن الامارات ..
جواهر : حررر شرات الامارات ..
قلت لها : الحين شهر سبعه وصلاله حلوه هالفتره وجوها خباااال

جواهر : فكره شقايل راحت عن بالي ..
قلت لها : أوكي عاااد يلا نخطط عسب السفره ..
جواهر : يبالنا نرمس بابا لو برمس يسور ويسوف بيتفلون في ويهي ..

قلت لها : عاد مولـ هالدرجه .. ريلي هب جذا ..
جواهر بنص عين : بدينا من الحين ريلي وريلي الله المستعان
قلت لها : بلا هذر جوجو يلا فكري ..

جواهر : ماشي حل غير نرمّس باباتيه ,,
قلت لها : أوكي اليوم بليل نرمسه ,,
جواهر : أوكي اتفقنا ..

سمعنا صوت الباب ينفتح ,,
وعدول وعلاوي يركضون بسررررررررعه ويتنفسون بسرعه ..
تخرعت رحت ركض صوب عدول وعلاوي ..