ديوان الشاعر/مسفرالدوسري

إجرحيني ..
بس عشان ..
ماتجرحيني
صدقيني ..
لوغفرتي ؟
تجرحيني ، مرتين
إجرحيني ..
إخذي ثارك ،
خلّي ضلوعي حطب
تحترق في وسط نارك
إهجريني ..
عذبيني
ومهما سوّيتي بعد ..
أنا راضي في قرارك
أعترف :
كلّي ندم ..
أنا بادي بالأسيّه ..
أنا أهديتك ، ألم ..
شمس سودا ..
جرح حق قلبك هديه
أنا أهديتك بعد ..
كل عنادي
كل رمادي ..،
كل سوادي ..
كل زهوري اليابسه..،
وإنتي طريه
أنا بادي بالأسيه
رحمتك ؟ - لا ترحميني
مهما يترجى القلم ..
ما آتحمّل جرح عفوك ..
فوق تجريح الندم
إجرحيني..
لوغفرتي ،
تجرحيني مرتين ..

البارحه يوم إتصلتي ..
قلت لك : أنا أحبك
أو نسيت ..
مثل ما إنتي نسيتي؟
أو تركت البارحه صوتي ينام ،
وينطفي برمل السواحل ؟
لو صحيح قلت : أنا أحبك ..،
ليش أحس إن صوتي ذابل
ليش أصابع فرحتي
مالوّنت وجه النهار ؟
وخلت عيونه كواحل ؟
ليش ما إنشقّت ضلوعي ..،
وطار من بين الحنايا ..
برق وردي
وأمطرت هتان
وغرّق الصبح الأنامل؟
ليش ما إنولدت نجوم بليل قلبي ؟
وليش ماسال الورق..
عشب وجداول ؟
وليش ماذابت رسايل؟
ليش ماصار الغرام ..
ينبت بكل القلوب
عشب برّي
ومات عاذل؟
لو صحيح قلت : أنا أحبك ..،
ليش ماصارت ثيابي ياسمين؟
وصاروا ربعي طيبين ..
وصرت أنا أشبه مناديل الوداع..
وصاروا احبابي .. منازل؟
بذمتك ..
قلت : أنا أحبك ؟
البارحه يوم إتصلتي ..
قلت لك : أنا أحبك ؟
شي غريب ..
شاللي حاصل ؟
أنا لما اقول أحبك
ف العاده ..،
يملاني السحاب
ويسكن بصوتي نسيم
ونجمة سهيل .. وبلابل
يحتفل فيني الندى
ويغسلني
تصير كلماتي .. مشاعل
أنا لما أقول أحبك ..،
تصير حارتنا خزامى
وتزهر أحلام البنات
والأغاني تصير رومانس
والرغبه قارورة عطر
تحت الجدايل
أنا لما اقول أحبك ..،
أدري إني بخير وطيب
وروحي تشبه للسنابل
البارحه ماظنّتي ..
قلت لك : أنا أحبك
إتصلي الليله ياعمري ..،
إتصلي الليله ..
بحاول ..

شنهو آخر هالمشاعر ؟
فـ النهايه ..،
كل واحد فينا بيروح بطريق
ويبدا ليل وماله آخر
بينكسر فيك النهار
وينذبح في قلبي ..،
شاعر
فـ النهايه ..
بفتح عيوني في يوم ..
وما القا بعيوني .. عيونك
لا حنينك ..
لادفا ايدينك ..
ولا ..
وجهك
ولا حتى بيبقى فيني شي ..
منك
إلا ذكرى ..
تشعل الثلج وتكابر
مافيه شي بيبقى فينا من هوانا ..
لا زعلنا
لا عتبنا
لا سهرنا
لا فرحنا ..
لا.. ولا ورد الجروح ..،
كله ياعمري بيروح
كنه ماكان عمره حاضر
شنهو آخر هالمشاعر ؟
شنهو آخر فرحتي ..
شنهو آخر دمعتك ..
شنهو آخر شوقي لك ..
شنهو آخر لهفتك ..
شنهو آخر هالقصيد ..
اللي في صدر الدفاتر ؟
آنا أدري ..
إنك أجمل من فتنّي ..
وإنك أغلى ..حب سكنّي ،
إنتي خليتي غصوني الصفرا ..
تشرب ..
من حلى ماك .. وتغنّي ..
و آنا أدري ..
إنك إنتي .. شي مني ..
شي يسوى الروح ..،
طااااهر
بس قولي ..
شنهو آخر هالمشاعر ؟
لا أمل عايش معانا ..
لا رجاوي ..
لاصبر ..
والياس صابر
آنا وانتي نجمتين ،
مهما تجمعنا سما..
وليل ساهر
لكن الصبح بيجي ..
وبيفرقنا أكيد ،
ويمحي اللي كان ظاهر
آنا وإنتي وردتين ..
لو تسامينا ..،
عطر ..
لكن المجد للخناجر
آنا وإنتي موجتين ..،
ضد تيار القبيله
ضد أبو جهل وقريش
ضد دمعه ف المحاجر
آنا وإنتي ..
شراع سفينه
والرياح..
تنهى وتامر
آنا وإنتي ..
نؤمن إن الحب صلاه
في زمن بالحب .. كافر
آنا وإنتي ..
ندري لازم نفترق ..
كان مهو اليوم ..؟ - باكر
حنا ندري ..
بتنجرح فينا الخواطر
وف النهايه..
بينكسر فيك النهار..
وينذبح في قلبي..
شاعر !

إضحكي..
ويطيح من خيل الحزن..
حَرْبَه..
وفارس.
أضحكي..
البحر لك يلبس
الثياب الزرق
وتزغرد نوارس
والشجر يرجعله لونه
حتى لوكان الغصن ذابل..
ويابس
إضحكي..
تطلع أقمار ونجوم..
ويبتسم وجه النهار..
بليل دامس.
أضحكي..
تصبح الأيام أجمل..
والصباح يصير أطول..
والأمل يزهر في يائس.
إضحكي..
خلّي قلبي..
فيك يلامس..
صبح قلبك..
والندى..
وعطر الملابس.
إضحكي خلّي الربيع
يحتفل..
يملى كفوفي..ورد..
وامطار ..
ومحابس
إضحكي خلّي الحياه..
تصبح أروع
والفضا بالحب ..أوسع..
واللغه تصبح نديّه..
والكلام يصير حمام..
والسلام .. يصير حارس
إضحكي..
الطيور..تلقى سكن
والغريب.. يلقى وطن
والفرح يملا الشوارع
يجني اللي في شفافك
كان غارس.
إضحكي..
تنولد فينا البراءه
نرجع أطفال من جديد
وكل يوم بضحكتك..
يبتسم بقلوبنا
ويصير عيد.
ونلبس ثيابنا الجديده
وينشرح ف البال هاجس.
إضحكي..
إنتي أحلى من ضحك
وانتي أجمل
من يخلّي بضحكته
حَرّ الرياض
يصير نسيم ..
وظل هامس ..

وتقولين.. نسيتيها..
كانت ذكرى عاديّه
نسيتيها؟
نسيتي شلون ..يوم جيتي..
قبل ماتجين..بشويه؟
جيتي حلم
سألنا شيخ
قال:هالحلم تفسيره..
لي واضح
باكر راح..تجيكم بنت
فرحت وقلت:
عساها فالنا الطيّب
ولحظتنا النداويه
... سكتّي شوي وقلتيلي:
تصدق عاد..
..نفس الحلم..أنا شفته
قبل لا نلتقي بسْنين
وقالوا:.... هذي ماريّه
قلت شلون؟
قالوا بكره بتعرفين.
لما الشمس..
تاخذ وجهها بنيّه
حتى أذكرك قلتي .. هذاك اليوم..
إذا حنا تزوّجنا..
وجتنا بنت
نسمّي البنت... ماريّه .
ضحكنا حيل ليلتها..
وليلتها..
كانت واقفه الساعه
على ثنتين ونص.. شمعه..
في ذيك الزاويه البيضا..
مابين النيّه ..والنيّه
نسيتي الحلم
ونسيتي بنتنا اللي ما.. بعد شفناها:
ماريّه
نسيتي حلمنا اللي من قبل لانلتقي..
شفناه..
وسمّيناه..
ولبّسناه.. بيدينا..
ملامح وجهه..
ثوب العيد..
وحطينا بمخابي الثوب..
قصيد.. وصبح..
وعيديه
نسيتي شلون... ماريّه ؟
قعدنا حنا طول الليل
نرسم لون شفايفها
طريقة لفظها لل.... سين
ومشْيتها..
ولا جينا نصحّيها..
تروح للمدرسه..
وحتى..
أنا ويّاك ..تخيّلنا..
شلون بيكون: مريول الثانويّه
نسيتي شلون.. ماريّه ؟
نسيتي شلون ..إن إنتي ..
كنتي الحلم
واللي من قبل لاتجين
حلمنا فيه
وفسرناه
وعزّ الصيف.. كان بيديْنا..
وسميّه
شلون ماريه صارت بين..
لحظه..ولحظه..
منسيّه؟
وذكرى تافهه بالحيل..
وعاديّه؟

أنا عندي.. سر صغير
لو سمحتيلي..بقوله
أنا من فتره أحس
شي غامض يملى صدري
ينثر النعناع فيه
والقناديل ب حقوله
شي يخليني أسولف
فيك..
ويورق النهار
من بعَد موسم ذبوله
شي يخلّيني أصابع .. من حبر
ويملى أوراقي شعِر
والفرح يصير حبيب
والقمر يصير قريب ..حيل..
وايديني تطوله
شي غامض..
يحتويني
يشعل شموع بحنيني
يرسم اشجار ونوارس
فوق سواحل..في جبيني
تنطرك مع كل موجه
ولك أبد
تشتاق وتوله
كل يوم أفتح بريدي
وأتخيل لون عيدي
أحلم بغيمه تجيني
ولاّ كلمه ..خضرا
عذرا..
من بريدك
وأَنكِسِِر لو هو تأخر
يوم بريدك
في وصوله
ولما أشوف رساله منك
يفرح القلب ويهلّي
بالهوى.. وطلة رسوله
كل رساله ..
من بريدك
تنثر السكّر في كفي
وتحيي في عمري الطفوله
ترسم أبواب ودرايش
في فضا الليل ..وتخلّي..
الصباح دايم ينوّخ
في مدى روحي ذلوله
أنا عندي سرّ صغير
من عرفتك
مدري شنهو
وماني عارف ..
كيف أقوله

تسمي غيبتك غيبه ،وأسميها ذهابالروح

تسمّي هالجفا هذا دلع واثْرالدلع قتّال

مهو كل البطا يزهر على طولالمدى: مسموح!

ولا كل الأماني لو تصبّرناوسيعة بال

ولا كل الشقا هيّن،ولا كل الخطامدموح

ولا كل شَرّ به خِيْره،ولا كلجرْح طيّب فال

تظن المسألة ،وقفة خواطر بينناوتروح

واظن اللي حصل ما بيننا هذايسمّى: هْبال!

جَرَحنا فالسما نجمه يا دوبكتبتدي بالبوح

قتلنا صوت فرحتنا وهو توّه بعدما قال

قبل ما نعْرف نغَني،تعلّمناشجون النوح

وغنّينا الحزن ياما ،وردّدناالألم موّال

قبل ما نغري اطيور الفضا،ونغريحمام الدوح

حَرَقنا اشجارنا وطحنا علىالرمضا بليّا ظلال

تغشّانا الظلام وما لقينا فيرجانا ضوح

ظمينا ما شربنا إلا زلالٍ منسراب اللال!

تفارقنا قبل ندري من الجارح؟! من المجروح؟!

سرى ضيف الغلا حتى قبل لا يشربالفنجال !

أنا ادري ما لنا غير ما كتب ربيلنا باللوح

وأنا في قسمته راضي،له الدبرهعلى كل حال