ديوان الشاعر / متعب التركي

هب الهوآ

هب الهوى غرب واجتاح الضلوع وشعرت


................. إن الليالـي الجميلـة هــب نسناسـهـا




مـدري كبـر حلمنـا ولابعينـي كبـرت


................ والاهـي اوهـام ودي يصـدق إحساسهـا




تنسانـي أيـام وتجينـي متـى ماذكـرت


................ اليامتى وانـت روحـي حابـس انفاسهـا




كنت أجمل احلام عمري بس ليه انكسرت


............... يـازيـن الاحــلام لوماينكسربـاسـهـا




بيديك مديت لي كـاس المحبـه وصـرت


............... أنا اول اللـي يـذوق المـر مـن كاسهـا




من يومها وانت قدام عينـي ولوماظهـرت


............... دايـم وعينـي تشوفـك بيـن جلاسـهـا




قدرت ولا علـى نفسـي معـك ماقـدرت


............... لازاد عنـهـا غيـابـك زاد وسواسـهـا




لوشفت حال الورق والشعرعقبك عـذرت


............... اللي حرق صفحـة الماضـي وكراسهـا

















توديع الاحباب

توديع الاحباب مثل الموت له سكره

..............ادمي جروحي وشق الصدر منيّـا

والقلب طيرن ضلوع الادمي وكره

............... لاشاقـه الطلـع لاسلـم ولا حيّـا

مصير الاحزان تنسانـي وتفتكـره

............... ماكل الايام بيض وسمحـت محيّـا

قل غيرها منت لامجبر ولا مكـره

................لاصار ماهو غلا مابيلـك احميّـا

لوفي يدي شي ماقلت الوعد بكـره

.................حزمت حدب الضلوع وقلتلك هيّـا

لوكل غالي تجي دايم علي ذكـره

...............ماصرت اشوفك هناك وحبك هنيّـا

ياليتني لابغيت اكره قـدرت اكـره

............... ماكان قلبي اللياجيت اكرهك عيّـا

مادامك معيف رح لكن علي فكـره

............... ماقلتلى ليـه دمعـك سـال منيّـا

دليل المحبه

دليل المحبه شوف عيني عليـك تغـار

...................... ولاودي الحاسـد عيونـك يطالعـهـا

مع إنك رحلت بعيد لكن بقى التذكـار

..................... لياشافتـه عينـي تسابـق مدامعـهـا

دفنت الغرام بخافقي والقلوب أسـرار

.................... مشاعرهقيـت إن الليالـي تضيعـهـا

فرحت برجوعك ماطلبت لخطاك اعذار

.................... ونفسي نست ماجرى مـن تواضعهـا

تهادت مشاعرخاطري لك بـلا معيـار

.................... تجاهلتهـا لوكنـت خابـر دوافعـهـا

يقولون جنّب درب مالك معـه معبـار

.................... يلومون نفسٍ بعـد لاحبـاب موجعهـا

يقولونها قبلـي يخـون البحـر بحّـار

.................... والآمواج لاهاجت خذت ماتبي معهـا

تكاثرت منك الصد وأثرالعلـوم كبـار

.................... لقيتك علـى نفسـي تقلّـب مواجعهـا

اقوله وأنا اللي شفت ذاك الغلا ينهـار

.................... يشوف الندم رجّـال نفسـه يطاوعهـا

مثل ماضرب جّوٍ خلا غـاي محتـار

.................... يدّوج ورجله مـادرى ويـن موقعهـا

تعرض سموم القيض والدار مامن دار

..................... هليك وشعربالموت روحـه ينازعهـا

جحدت الغلا لين امتلا بالخفوق وثـار

..................... قصايد عساها اليوم تطـرق مسامعهـا

غرامك مثل نارٍ حطبها الغـلا النـار

..................... تموت وغـلاك اللـي بقلبـي يولعهـا

غلاك بضميري واضحٍ ماعليـه غبـار

..................... تشيل الغلا نفسي وأنا عاجـز امنعهـا

يقولون ماودعّك:قلت الفـراق وصـار

..................... والإنسان روحه تنسلـب مايودعهـا !

هذيك الليالـي ويـن أثرالزمـن دوار

..................... خذاهـا ولاظنـي زمانـي يرجّعـهـا

طوتها السنين ولابقالي سوى التذكـار

..................... لياشافتـه عينـي تسابـق مدامعـهـا

لاتنشغل

لاتنشغـل فينـي أنابحالـي ادرى


..................قلبٍ تعلّق فيك ينسى مـع الوقـت


اكثرمن اللي صارلي ويش يجـرى


...................بين الرجاوالياس فكـري تعلّقـت


مثلي ولوشفته عن همومـه ازرى


...................ماقال ليتك في جروحـه ترافقـت


هاك القصايد لاتضايقـت واقـرى


.....................شف وشكثرفيها لبسماتـك اشتقـت


أثرالوفـا ينبـاع عنـدك ويشـرى


.....................ماكنت اصدق فيك واليوم صدّقـت


يامشتهي فرقا المواليـف حـذرى


.....................تبعد وأنا من سكرة الحب مافقـت


لاطافت الفرصه تحريت الاخـرى


.....................وتـروح ماكنـي عليهـا تشوقـت


ساري لو إن الليل مافيـه قمـرى


.....................اشيل من حمل الهوى فوق ماطقت


لاصارحـظ أقشروالايـام قشـرى


......................مافيه احد عاقل يلومك إلياضقـت


صحيح بعض الناس فرقاه بشـرى


......................وبعض البشرلاغاب ليله تضايقـت


ليتك خذيت بليل الاحباب مسـرى


......................غربت من كثر الطواري وشرّقـت


السيل يبقاله على القـاع مجـرى


........................ويبقالـك التذكارلوكنـت فارقـت


اشوف لك من وين مارحت ذكرى


........................ولاشفتها صديـت عنهـا ودنقـت


ماكل جـرحٍ لاخـذا أيـام يبـرى


.......................بعض الجروح يزيد شره مع الوقت

مرفوض

مرفوض ياللى بعت غيره عشانـه

...................أزريت عن رد الجزا أو تهاونـت




مابي لك أكثر سد بـاب الميانـه



.................بانت مع الوقت الخفايـا وبينـت




مادام مالى وسـط قلبـك مكانـه



.................أنا بعد مثلك عن الحـب هونـت




أنا مثـل خيـال خانـه حصانـه



....................عذره يقول من الرسن ماتمكنـت




غرّه مع المركاض وارخى عنانه



...................مخطى وانا غلطان يوم انى امنت




لو كنت وافى ماتخـون الامانـه



..................ياللى تقول تشيب روحك ولا خنت




ذاك الهوى لو ماشعـرت بحنانـه



..................ماكنت فى حلو القصايـد تفنّنـت




شاعر تزلزل من فراقـك كيانـه



,...................لك يعترف مايسكن القلب غير انت



اليوم كلـن يحتفـظ فـي مكانـه
...........................لا كان يوم به عرفتـك ولا كنـت

لو كان قلبك صافى الـود خانـه

....................فى ذمّتى ماهان حبّـك ولا هنـت




أحدٍ يخون وواحد الوقـت خانـه



....................أنا ترى الثانى وألاوّل تراه أنـت

ضايق البال

ضايق البال مايستانـس الحالـه


........................وانت لاغبت عني كني الحالـي


جتك الاشواق رجليـه وخيالـه


........................غير الاول تحمل شوقي التالـي


ليت من قال متعب خابت امالـه


.........................شاف بعيونك الخدرات منزالـي


واحدأ فيك ماهو منشغـل بالـه


.........................اشهد انه بها الدنيا هـو السالـي


راوي العود يزهالـك وتزهالـه


..........................عاد من يقدر ايلومه إليـا مالـي


صاحبي والقصايد فيك مختالـه


..........................وأنت لك حق فيهن يوم تختالـي


دام نفسك لحب الشعـر ميالـه


..........................ليه ماصير شاعر وانت في بالي


من تمناك لاتنشد عـن احوالـه


............................كيف عقب العسل يستطعم الحالي


عقبك النفس مذعـوره ومهتال


..........................هسود الايام هزت برجي العالـي


لكن القلب من يمك على حالـه


..........................في تناسيك ليه اكذب على حالي


قلت لك نعمة النسيـان زوالـه


.........................ذكرياتك بعضهـا قـام يبرالـي


كل مامرني طيفك علـى فالـه


.........................قلت يامرحبا في ريحة الغالـي


شلت همك وهمي ماحدأ شالـه


..........................كن قلبك غدى ياصاحبي خالـي!


إبتعدنا وكلـن راح فـي حالـه


.........................بين هالناس لكن كنـي الحالـي

ماقلت لي شي..!

ماقلت لـي شـي وش خليـت ماقلتـه


....................... اسكت وخل الكـلام لجرحـي الدامـى


لوغيـرك اللـي يسولـف ماتحمّلـتـه


....................... لكن على شـان عينـك هانـت ألامـى


للحـب مفهـوم عـمـرك ماتخيلـتـه


....................... ماأظـن يستوعبـه تفكيـرك السامـى


هذا الفـراق الطويـل وهـذي أسئلتـه


....................... هـذا حصـاد السنيـن وهـذي أيامـى


يامـا ويامـا عليـك البـال طولـتـه


....................... والعمرعدى وأنا عايش علـى أوهامـي


حتى طريـق الفـراق اللـي تساهلتـه


....................... لقيته أصعب على نفسي مـن أقدامـى


اصبرلـي شـوي لـودمـي تثاقلـتـه


....................... بحاول أستوعب اللـي صـار قدامـي


الحب ضحكـة بعينـك بـس ماطلتـه


....................... عمرك بهالكون شفت أبسط من احلامي!


القلـب لوماخفـق لـك كـان ماشلتـه


....................... ولوماأنت ملهم قصيدي جفـت أقلامـي


هـذا قصيـدي بعينـك لـو تجاهلتـه


....................... ينزف على شأن يروي قلبك الضامـى


العـام طــاري غيـابـك ماتقبلـتـه


....................... واليوم حرماني أصبح مصدر إلهامـى


لاتعتذرلـي وابنسـى كــل ماقلـتـه


.......................وش ينفع العذر لامن ضاعت أيامـى ؟

نسيتني

نسيتني علمني وشلون ابنساك
...............................في هالزمن نسيان الأحباب عادي

شلون لأمرت علي البال ذكراك
..............................وطيفك سرق مني لذيذ الرقادي

وشلون لاقالوا لي الناس وش جاك
..............................من كنت في لذة منامك تنادي

شلون أعيش اللي بقالي بلياك
..............................لامن غدينا كل واحد بوادي

لو قلت أداوى جرحي اللي تباطاك
..............................ماكل جرح يفيد فيه الضمادي

أعلنت حبك لين كلٍ تمناك
.............................غلطه وغيري من خطاي استفادي

لولي مثل قلبك تمنيت فرقاك
.............................واكيد قبلك بالجفا صرت بادي

حلوه عذاريبك وحلوه مزاياك
.............................حتى بيوم فرا قنا كنت هادي

كن الليالي ودها تكسب رضاك
.............................وآنا يطول مع الليالي جهادي

في ذمتي ماهي غريبة خطاياك
.............................مبطي وقلبك لو تنبهت غادي

سهله علي من كان مثلك وشرواك
.............................مثل الثياب يغيرون المبادي

علمني اكره ذكرياتك وطرياك
............................وانسى من الليلة صدوق الودادي

ولاني بقايل عقبها وين ابلقاك
...........................راضي ولو إن جروح قلبي جدادي

وإلا القصايد جعلها من فداياك
...........................لبستها مبطي ثياب الحدادي

باكر علي المخطي يدورون الأفلاك
..........................ونشوف من يصعب عليه البعادي

















شلفآ تريحيب

ياسعود لا تنشدني ترى ماني مجيب
خل الذي خافي له شهور خافي

ان شفتني مغتاظ لي حق ومصيب
ياسعود مزعلني جديد اكتشافي

الغالي اللي كان من قلبي قريب
بيني وبينه صار مثل التجافي

ان قلت زله مثلنا زلته عيب
من قال لك شمس الضحى ما تشافي

ان قلت هفوه يمكن تصيب وتخيب
كم لي سنه ماشفت فيه اختلافي

وان صار في نفسه بعض شكه وريب
حتى البحر ماهو على طول صافي

صرنا من الصده سوات المصاويب
كلن نقل جرحه وقال امتعافي

اصعب فراق فراق عكف الاشانيب
ماهو مفارق لابسات الغدافي

والذيب لامنه عوى جاوبه ذيب
والعلم حامض بس وين الاشافي

دامه لقى غير قلبي معازيب
الله يسمح درب هاك السنافي

يروح لا يرجي رسول ومكاتيب
هو خابر اني متلفت خلافي

واللي تعلى روس المراقيب
اكيد ماتسفي عليه السوافي

رح بشر الي شال شلفا تريحيب
قله تراها كلوبها عوافي

اليوم نفسي طابت وباكر يطيب
جرحي لو انه من يدين المشافي

خلصت والدنيا دروس وتجاريب
سجل يبو عبدالعزيز اعترافي

مقتطفات من روائعـــه

لك بقلبي غلا واعجاب ماهو بزايل ( ) لو عن الارض زال طويق والا سنام

كن دمع العيون اللي على الخد سايل ( ) صافي الما وهو يسقى ورود الخزام

راوي العود لاقاصر ولاهو بطايل ( ) ينعرف زولها لو هي بوسط الزحام

.

.

.

.

ضحيت بالواقع على شان الاحلام ( ) وضحيت بالغالي على شان غالي

حتى الغرام اللي كسر قلبي العام ( ) ماني بحاله كان ماهو بحالي

ماينحسب عمر البنادم بالاعوام ( ) بعض السنين نعيش فيها ليالي

.

.

.

.

متى ذكرتيني على شان تنسين ( ) خليك مره صادقه وانصفيني

في وقت واحد تكرهين وتحبين ( ) انا تعبت استحملك واعذريني

حبٍ سرق من عمري ايام وسنين ( ) مثل الهوا مايمسكنه يديني

.

.

.

.

احلى سنين العمر راحت هدايا ( ) لك يامجازي بالردى راعي الطيب

لي في حياتك ذكريات وخفايا ( ) تبقى ولو باكر غزا راسك الشيب

ولا الوفا ماله بقلبك بقايا ( ) عند الذي مثلك اظن الوفا عيب

.

.

.

.

ياليت مجروح الهوى جرحه يشاف ( ) لقول قرب من جروحك وشفها

.

.

.

.

اليا نشدوك العرب وش بينك وبيني ( ) قولي حياتي قصيده ..كان شاعرها

.

.

.

.

علمتني وشلون اصير انعزالي ( ) واخذت مني راحة النفس والبال

.

.

.

اتعب وغيري يجي ياخذ على الراحه ( ) من حظ غيري وانا اللي زارع وساقي

.

.

.

.

البسي لك ثوب غير اللي عليك ( ) من لبس ثوب الغرور اكبر غبي

تحسبين الناس خاتم في يديك ( ) من متى والعاطفه توخذ سبي

فز لك قلبي وانا قمت احتريك ( ) والكريم يصير لضيوفه صبي

.. ترجل الفارس ..

هذا الخبر صدمه وحزن وعلامه ( ) على محبّة كل الامه لـخطاب

هذا الخبر والهم هذى خيامه ( ) شرّع للأحزان النوافذ والابواب


ألحقت من جاب الخبر لى ملامه ( ) صعبه على الانسان توديع الاحباب


البارحه غابت عن العين قامه ( ) قامة رجل زلزل قناعات واحزاب


ترجّل الفارس وذب العمامه ( ) واستقبل الموت بحفاوه وترحاب


ترجّل بصمت ووقار وصرامه ( ) حتى وفاته شى يدعو للأعجاب


من يعتبر فقدان كفه وسامه ( ) أكيد ماهو لحظة الموت مرتاب


وجه واهو مسجى بدر فى تمامه ( ) ميت ولكنه واهو ميّت مهاب


أومت له كفوفٍ تمنّت سلامه ( ) بكته الامه قبل تبكيه الاقراب


خطاب ماهو بس رمز الشهامه ( ) خطاب نجمٍ فى سما الامه وغاب


حر شهر والطلع دار الكرامه ( ) والحر مايعنيه تحليق الاسراب


فعله فرض على الجميع إحترامه ( ) واسمه ملا الدنيا بطوله واهو شاب


ماكانت الدنيا مثار اهتمامه ( ) بالعكس كان لنصرة الدين وثاب


لو كان يبحث عن نفوذ وزعامه ( ) كان امتلا صدره نياشين والقاب


الاخره كانت على طول امامه ( ) فى هالزمن خطاب واشباهه اغراب


اختار بديار الجهاد الاقامه ( ) ومن كان هذى رغبته لازم يثاب


واختار بالاسلام ذروة سنامه ( ) الصبح ساحة حرب والليل محراب


يكفيه فخر ان الشهاده ختامه ( ) ماحسّب لدنياه ولعمره احساب


يارب تغفر له وترفع مقامه ( ) وتعظّم أجر إمة محمد بخطاب





رحم الله الشهيد \ خطاب

قصيده في الملك عبدالله بن عبدالعزيز

السيف

.

هذاك عبدالله ليا طوّح السيف () وقام يتلامع بين اصابع سموّه

برقٍ من عالية نجد للسيف () كلٍ يخيله ويتباشر بنوّه

ولى عهد المملكه سمح ومخيف () سمحٍ على شعبه مخيف لعدوّه

يشوف من عاداه له شى ماشيف () ونشوف به حنّا حنان الابوّه

مثل الجبل ماشال هم العواصيف () مثل البحر حتى هدوءه يتوّه

نسل الزعيم اللى نصل سيفه رهيف () اللى قبس من مشعل الشرع ضوّه

عبدالعزيز اللى على امته ريف () مامات لين احيا شعور الاخوّه

لولاه ماصرنا ربوع ومواليف () ولولاه حاضر هالجزيره مشوّه

من غير عبدالله يغيث الملاهيف ؟() يلقون فيه ضعوف الاسلام قوّه

أدناه فى عرف النشامى مشاريف () ويطاول نجوم الثريا بجوّه

نايف على روس الشواهيق ومشيف () عنده لشعبه والعروبه حموّه

ياسيدى تسلم لنا ظل ومريف () بينك وبين الشعب عهدٍ وخوه

اى والله أعشق سيدى مابها زيف () ومن لايحبه مابقلبه مروّه

((( والله لو إن الله خلق روح للسيف () مايركد الا بين اصابع سموّه )))

ماهى اول غلا

هذى اللى غلاها مايبى قول قايل ( ) هذى اسباب غيضى والرضا والهيام


هذى رسومها بين الضلوع النحايل ( ) هذى اللى على صدر القصيده وسام


الاصايل يجنّك مثل أهلهن أصايل ( ) والوكاد إنّها منهن بليّا كلام


يوم فلّت على الخصر النحيل الجدايل ( ) وإستدارت خجل مدرى تصنّع غرام


عودها مال لو هى ماتبيه يتمايل ( ) ماهو بكيفها من لين ذاك القوام


واقف وكن رجلى فوق جرف متهايل ( ) للجمال بعيون العاشقين إحترام


قلت فى خاطرى مانى عليها بعايل ( ) لكن القلب سابقنى برد السلام


مانى اللى حذف عند الزناد الفتايل ( ) يومها ولّعت ناره تغطّى ونام


واجد الزين عند الحاضره والقبايل ( ) شفت واجد ومرّنى مرور الكرام


بس هذى وصايفها علوم وهوايل ( ) كنّها قطعةٍ من نور بدر التمام


ياكثر ملحها والا الحلا له دلايل ( ) حورٍ عيونها والخشم سلّة حسام


كن ذيك الخدود بروق ماتنتخايل ( ) لا كساهن شعرها شفت برق وظلام


تعسف الخيل ونفوس البشر تنتحايل ( ) مير خيل القصايد مايطيق اللجام


إنتحيت ولقيت القلب مامن صمايل ( ) كل ماذعذع الغربى من الشوق هام


ياكثر مانى من الشوق والحب شايل ( ) من عشق مثلها وشلون بالله يلام


هذى اللى حلاها مايبى قول قايل ( ) ماهى أول غلا لاشك مسك الختام


.


.

لمثلها والا بلاش

زى لون الطيف وألوان الفراش ( ) الهنوف اللى شغلنى صدّها


إن بكت جا دمعها مثل الرشاش ( ) وإن تبسّم ثغرها من قدّها


وإن حكت كن بشفايفها رعاش ( ) الخجل عن سالفتها لدّها


والطيور اللى جفت حضن العشاش ( ) ليتها خلّت بقايا ودّها


عقبها كل الغصون أمست نشاش ( ) خاليه عقب الوناسه خدّها


كل قلبٍ فى ذراه الحب عاش ( ) فيه طيبه زايده عن حدّها


والقلوب إن فارقت صارت هشاش ( ) موحشه والذكريات تشدّها


رفرف البرق وزِمَت بيض الدشاش ( ) وامتلا من صافى الما عِدّها


مابنيت بيوت شعرى من قشاش ( ) ليه أخاف إن الرياح تهدّها


والهجوس اللى من الفرقا عطاش ( ) ترقب نجوم السما وتعدّها


يوم شق النور من ليل القماش ( ) شفت حبّة خالها فى خدّها


القصيد لمثلها ولأّ بلاش ( ) لو تبى عمرى حشى ماردّها


.

وسيع البال







ياوسيع البال ضيّقت الصدور ( ) رحت ماعلّمتنى وين أنت ساري


فى غيابك مال خلق الله حضور ( ) وفى حضورك مالهم بالبال طاري


ليه ماتختال يابدر البدور ( ) والقصايد لك وصيفات وجواري


لك بنات الفكر ربات الخدور ( ) يكشفن لثامهن والجرح عاري


جعل قلبٍ ماملاه الصدق نور ( ) عند وجه الريح مايلقى مزاري


التغاضى عجز لاطال القصور ( ) ليه أدارى وأنت عني منت داري


الزمااااان قصير والدنيا تدور ( ) كل يوم يضيق فى عينى مداري


صاحبى محتاج لك شعر وشعور ( ) وإحتياجى شى ماكان إختياري


من متى والغصن يختار الطيور ( ) من متى والبال يختار الطواري


لاتسمى صمتى البارح غرور ( ) انكسارى خلف هالصّمت متواري


فى غياب الشمس وش ذنب الزهور ( ) والمطر لاشح وش ذنب الصحاري


اللقا لحظات والغيبه شهور ( ) تقصر الخطوات ويطول إنتظاري


لو قريت المنكتب وسط السطور ( ) ماكتبت لغلطة العمر إعتذاري


صمت هالمينا مثل صمت القبور ( ) مارسى مركب ولا لاحت صواري


.

ماعاد تستاهل

كل حاجه طعمها مر فى هذا الزمان ( ) هم هالدنيا وحنا نعيش لهمّها


المكان اللى عرفناه ماعاد المكان ( ) والقلوب أحداث الايام زادت غمّها


صاحبى حتى أنت ماعاد تستاهل حنان ( ) أنت بعثرت المشاوير وانت تلمّها


البكا فى مثل هالحال نوع من الهوان ( ) والمهونه كل رجال حر يذمّها


صاحبى لو كان للناس والدنيا أمان ( ) ماتموت ورود الاحلام قبل نشمّها


خل عنك علوم الاحباب واللى كان كان ( ) انتهيت وسيرة الشوق مانى يمّها


كلما تظما لياليك قمت أكتب عشان ( ) تنزف جروحى والايام تشرب دمّها


الكلام الموحش يخاف نور الشمعدان ( ) تحترق أسمى معانيه قبل يضمّها


من زمان أكتب علشان نقرا من زمان ( ) بس ماشفت المكاتيب جابت همّها













قلوب الرجال

مدرى البارحه ويش إفتكرت وسرحت ( ) هى طوارى والا ان هموم قلبى ثقال



هى طرتلى قديم الذكريات ولمحت ( ) زول والا الحكايه كلبوها خيال


هجّن ركاب فكرى بالمشاعر وصحت ( ) منهو اللى تغافلنى وفك العقال


ضقت والبال عمس ومنقلب فوق تحت ( ) هى من شوى يوم تفوح صفر الدلال


ودى افرح ومن مبطى انا مافرحت ( ) ودى القا عن شموس الحبايب ظلال


كم سنه عقب مركوز النهد مافتحت ( ) قلبى ولا عيونى للغلا والجمال


لو بغيت انتهز فرصات واجد ربحت ( ) كانت اجمل فرص عمرى تنادى تعال


ماهو بعيب لازلّيت والا جنحت ( ) منهو اللى بلغ فينا حدود الكمال


وانت ياللى عن حدود المحبه نزحت ( ) كل ماشد لك حيلى تشد الرحال


ماشكيتك لو انى من جفاك انذبحت ( ) وانت شف حكمة الخالق ذبحك الدلال


لا تقول انك بذاك التصرف مزحت ( ) يوم سويت فى هاك النهار احتفال


ماهجيتك ولا كنى ابد مامدحت ( ) كلبوهن عقب هالعشره اكبر محال


صاحبى دام انا منك وعليك انجرحت ( ) لاتجينى على درب الخطا والخمال


تدرى انى تحمّلت الكثير وسمحت ( ) خابر ان التسامح من كريم الخصال


ليه تفهم غلط وشفيك لبعيد رحت ( ) ماطلبتك تشيل الهم يابن الحلال


ماشغل بالى الا يوم افكر بنحت ( ) القصايد واحفّظها قلوب الرجال


قالوا انى بترويض القوافى نجحت ( ) قلت اجل كيف لو بزعل وامس الحبال


لو تخوّفت من درب الخطر مافلحت ( ) مايهاب الصعاب الا ردى العيال


عكس تيارهم شفنى جزمت وسبحت ( ) ماحرصت انى اترك للتراجع مجال


لو طموحى قريّب من زمااان استرحت ( ) مير خابر محلى فوق روس الجبال















ربع تعريفه





لا يا علي الوضع هذا ما يناسبني


............................قله يفارق ترى لي بان تزييفه


يروح يبعد..وثم يرجع يقربني


............................يبيني اتبع هواه واخضع لكيفه


يخطي..ويزعل ويرجع لي يؤنبني


............................اسكت وانا اسمع تفاهاته وتخريفه


ماني بتمثال وقت الضيق ينصبني


............................عنه اتلقى خطا غيره وتهديفه


عذروبي اللي يعرفه ما يعيبني


............................كتاب مكشوف واضح فيه تحريفه


الموقف اللي حصل بالحيل متعبني


............................ولا يحاول بثوب الكذب تلحيفه


قله فراقه ترى ما عاد يرعبني


............................ما عاد يسوى بعيني(ربع تعريفه)


انغام عزفه ترى ما عاد تطربني


............................عندي تساوى برود شتاه مع صيفه


ماني معاتب وقله لا يعاتبني


............................جوي تعكر ولا اطلب منه تلطيفه


نهر العطا جف قله لا يحاسبني


...........................القلب مما علق به صعب تنظيفه















ماهو خطآ

ماهو خطاعشان ادور معـــــــــاذير

....................ولاهوغلط عشـــان ادور صوابه


اليوم توه عود لوكره الطيـــــــــــــر


.....................واصبح يشوف العالم اكثر رحابه


مستغربين انه ملى قلبي الــــــــخير


....................ليه الغرابة! وين وجه الغـرابة؟


تعبت ادور للخطاوي مشــــــــــاوير


................... لين التعب زاد الليالي رتـــــــابـة


يبكي فرح من شاف بعض التبــاشير


.................... معذور لو دمعه يبلل ثيـــــــــــابة


من كنت بأول خامسة طفل صـــغير


.....................كنت امتلي حزن وغموض وكأبه


كنت أشعر اني غير والمدرسه غـير


....................هيمان في جو النبي والصحـــــابة


كنت المح بوجه الليالي تعـــــابـــــير


.....................وأقراء همومي قبل أعرف الكتابة


والشعر غاااب وله محبة وتقديـــــــر


.....................اول غيابه شلت هم لـــــــــــغيابه


بالنفس كان لبعض هالأمر تـــــــأثير


..................... والليلة اهون من جناح الـــــذبابه

(خيل القصيد)

حسي بلوعات الليالي والاحزان

...............بعدين حسي بالهوى لا بغيتي


وش به يهمك لو يقولون زعلان


................لو فيك ذره من الغلا ماجفيتي


يالي تقولين الخطأ زلت لسان


................في زحمة الايام ليه اختفيتي


خطاي وان جه مدري الذنب وش كان


................ليه انتهى ذاك الغلا وانتهيتي


وقفت في وجه الزمن قدر الامكان


.................وانتي جنح فيك الخيال وغفيتي


غلطان انا في كل الاحوال غلطان


................اسرجتلك خيل القصيد وسريتي


جيتي وقلت الجرح يوم اقبلت هان


................وانتي على الجرح القديم ارتكيتي


قلتي لي الحب ان لابد ينصان


................واليوم ماكنك دقايق هويتي


شافوك حساد الهوى شوف الاعيان


................يومك على رجم القصايد رقيتي


ما بان لك شي ولا بقا شي ما بان


................بس انتي اللي غافله ما دريتي


العام لك طاري بقلبي ولك شان


................واليوم احس بغلطتي لا طريتي


وان قدر المولى وعشتي بحرمان


................ومن حر لوعات التجافي بكيتي


تذكري قلب(ن) له سنين شفقان


.................شوفي بحقه ياكثر ما خطيتي


كل القصيد اللي اقوله على شان


.................تهزك الذكرى عقب ما نسيتي

قصيدة متعب التركي وهي رد على الشاعر \ شبيب غزاي المطيري

هلا هلا يامرحبا فيك ياصاح

.....................حي الذي حلو البيوت ابتكرها

يامرحبا حشمه وتقدير وانصاح

.....................والا المعزه يا شبيب تخبرها

الصاحب اللي من عذب الهوى ناح

.....................حتى لذيذ النوم عينه هجرها

شبيب يشكي واقعن ليته امزاح

......................اوليت رجله عن دروبه قصرها

شطيت للبحر الحمر وانت سباح

.....................ياللي ضرب سبع البحور وعبرها

يشكي من اللي رمشها سهم ذباح

.....................خرس العيون اللي يسره نظرها

ابعد من حدود الحديثه عن ارماح

.....................واقرب لعينه من دموع(ن)نثرها

غابت وطول غيابه صار فضاح

.....................وابوفهد رغم البطا يفتكرها

هاذي علامات الغلا وانت لماح

......................مافيه داعي بالغلا تختبرها

لو تسبق الغيمه معاصير ورياح

......................يطيح كله لا تناثر مطرها

مادام ضوح بروقها بالسما لاح

......................شد الرحايل يمها واختصرها

هيضتني وانا بعد كلي اجراح

......................خليتني لاجلك غديت انتظرها

وشلون انا يرتاح بالي وينساح

.........................نفسي وش اللي يا شبيب ايعذرها

ماني من اللي ينطح الموج برماح

..........................وان شاف زلت صاحبه ما سترها

لك حق اخلي كايد الهم ينزاح

.........................كان الليالي ما عطتني ظهرها

نهار الوداع

اخر اللي سمعته في نهار الوداع

دقت القلب مدري صوت عجل الخطاوي



نايف الطول وش سوابي الانقطاع


صار بين الضلوع القلب كنه فداوي



بيني وبين ضحكات السعاده نزاع


كني اللي قضى عمره طريدن جلاوي



لا تلوم الذي سوى لك المستطاع


خف من الله وخل جروحنا بالتساوي



عن هذيك النواعس ليه شلت القناع


الحيا وين يلي طول عمرك حياوي



كن خدك الطاهر بروقوشعاع


اثرها رحمة(ن) للناس بعض الغشاوي



وش يفيدك عذابي ياغريب الطباع


ليه دايم على الملتاع سيلك نحاوي



امتلي غيض وازعل يوم وارجع بساع


راعي الجرح يستحمل عذاب المداوي



غالطوني وقالوا ليش هالاندفاع


ادوخوني عليك مكثرين الحكاوي



عذربوك بوجودي بالجفا والخداع


فيك حلو الوصايف صوروها مساوي



التزمت السكوت ورأيهم فيك ضياع


لين قالوا متعب على البعد ناوي



ميت القلب عرضت الغلا للضياع


والله اني على قطع الرجا بك مراوي



ماتغيرت لين انك لويت الذراع


تحسب اني على الهجران ماني بقاوي



لوتقول انت ماعقب الفراق اجتماع


عندي اليوم كل اللي تقول متساوي



او يقولون صار يخاف قلب الشجاع


من هك الليله وبيت القصيد امتهاوي



بين شقر الجدايل والعيون الوساع


اذكر اني فقدت القلب في هالحراوي










((جزاي وجزاك))

انتهينا وصار اكبـر خطـاي الوفـا

..............انتهينا وعنـد الله جـزاي وجـزاك


ادري ان الزعل حجه عشـان الجفـا


...............ادري وقلـت ابسمعهـا مـن شفـاك


تختفي وانت خابـر جرحنـا ماخفـا


...............كلهم شايفين الجـرح وانـت بعمـاك


قلبي اللي صفالـك ماللغيـرك صفـا


...............جاك من طيبه وعاف الهوى من رداك


القدم من طويل الـدرب مـل وحفـا


.............والنظر طاح من دونك وسرب وراك

العيون السود

رجع بي طاري الذكر على ذيك العيون السود


...............وأنا اللي قلت ماعاد الهوى يطري على بالي


تناسيتك وشفت الشوق في قلبي عليك يـزود


...............اثرني مانسيتك بـس مـن همـي يورالـي


غديت وطاري الذكرى سواة الملح والبـارود


...............ليامنه قرب لي ثار شوقـي وانقلـب حالـي


تجي وتروح لكن في ضميري باقي موجـود


...............على حد السراب اللي زما طيفـك تروالـي


تمر الثانيه في حسبه الساعه على الموعـود


...............اجل ربي يعينك لاغدى راع الوعـد غالـي


سهيت ولا وعيت الاوقلبي للغلـى مشـدود


...............تنبهـت وبغيـت الحـق عليـه ولا تهيالـي


وانا اللي خابر كل العلوم ونقصهـا والـزود


...............أضيع في موازين الحكـي لا شفتـك قبالـي


اسامح وادري اني بالجفا مبطي وانا المقصود


...............وانا اللي لو من اولها جفيتك يمكن اشوالـي


على هونك توقا ماهي بكيفـك نعيـم العـود


...............تحاسبني وانا اللي راحت ايامي على الخالي


حرام تضيع من عمري ليالي مالهـا مـردود


...............تعابيـر الشماتـه شفتهـا بوجيـه عـذالـي


انا ماني بعاجز لو بجازيك الصدود صـدود


...............يضيق المنزل بغيـري ولا غيـرت منزالـي


كريم النفس حتى بالمشاعر لاعطـاك يجـود


...............على كثر العطايـا مانشدتـك ويـش يبقالـي


تمهل واعرف اللي راح لا يمكن عليك يعـود


................خذاه الوقت لاتستنقض المبطي مـع التالـي


ابقطعها حبالك لو بها حبـل الرجـا معقـود


................وابلقا عن مقيلك بالسعه لـي فـي وظلالـي

ويش استفيد

هاك ذكراك من ذكراك ويش أستفيـد


كافـي أن المشاعـر هايمـه كلـهـا




ودي انساك والنسيـان ماهـو اكيـد


كيف ابنسى عيون(ن) رمشهـا ظلهـا




من هك اليوم وانت اللي بعيني وحيـد


ماخبرت العيـون تمـل مـن خلهـا




مير نفسي عزيزه وانت رايـك عنيـد


والنفـوس العزيـزه ماتبـي ذلـهـا




ليه تعطيني الدافـع واقـول القصيـد


ليه صفحـه غرامـي ترجـع تفلهـا




ليه ترجع على الماضي تزيـد وتعيـد


وانت من عـام الاول عاجـز تحلهـا




مابرى الجرح الاول كيف يبرى الجديد


شوف حالي نزيف جروحهـا سلهـا




كل ماشفت لك ذكرى وربـي شهيـد


كـن نـزاع روحـي بالحفـا تلهـا




اندفعـت لغرامـك يالغـزال الفريـد


والغـلا لـه دروب خاطـري دلهـا




فرحتـي بالقـا رغـم انهـا ماتفيـد


فرحـه القـاع لامـن المطـر بلهـا




وش بقى يالسراب اللي قريب(ن) بعيد


المحبـه وراحـت وانتهـى حلـهـا




لو كـل بكيفـه ياخـذ اللـي يريـد


كان ماشفت ناس تمـوت فـي غلهـا




هاك فرقاك خذها خـل قلبـك شديـد


خلهـا ماشيـه بحمولـهـا خلـهـا




كـل مـازاد تعذيبـك ذنوبـك تزيـد


الله اعلـم صلاتـك باطلـه كلـهـا

الجدايل

ليل هاك الجدايل طـال مسـراه


..............بين تفسير حلـم وبيـن امانـي



يوم حد الغلا قلبي على أقصـاه


..............شرع القلـب بيبـان المحانـي



مارماني ولكـن قلبـي أدمـاه


..............عـاد وشلـون لامنـه رمانـي



لانقض ليـل مجدولـه وخـلاه


..............قلت وش هالظلام اللي غشانـي



لو يمر البحر شاطـي شفايـاه


...............صار بحر الخليج فرات ثانـي



وين ابلقاه مدري ويـن ابلقـاه


...............دامـه بكـل ذره فـي كيانـي



ادري انه نسى الموعد ولاجـاه


...............بـس ليتـه نسـاه ولانسانـي



لو عيونه بحرهن ماركـد مـاه


................شط الاهداب صار اجمل مواني



يكفي انه حفظ شعـري وغنـاه


.................وابتسملي وقـال ادري عشانـي



كل ماترتسم بسمه علـى شفـاه


................اشعر انـه يجاملنـي زمانـي



ليه احبه واحب اسمه وطريـاه


.................يوم اخذ دم قلبي وش عطانـي



غاب وان شفت نفسي قادر انساه


.................قلت ربي كتب لي عمـر ثانـي

عليل وتداوى

ماني اعمى بصير بس وش عاد اسوي


مايطيب الجريـح ان كـان ماينتـداوى



كن حبه على حدب الضلوع امتطـوي


كيف ابقوى وانا بيباني قلبـي تهـاوى



شوف قلبي من جروح البعاد متكـوي


عقب ماقلت جرح الاعم طاب وتشاوى



يوم ساقوا ركايبهـم وشبيـت ضـوي


ماتخوفت وسباع الخـلا لـي تعـاوى



اشهد انه تعكر عقب مـاراح جـوي


مانسيتـه وزولـه للعيـون يـتـراوى



زل وقت الوعد ماعاد فيهـا تـروى


بس انا وانت ياحرف القصيد انتخـاوى



قلهـم ياقصيـد لايروحـون تــوي


ماني الي حضوره مع غيابـه تسـاوى



رد عنـي علومـن ماتونـي عـدوي


قلهم متعـب التركـي عليـل وتـداوى

(تـحــصــيــل حـــاصــــل)

مليت امشي كلامـك ويـن مقصـودك


...................باوقفك ابسألـك وتقـول لـي واصـل


واصلت دربك ولكن ضاعـت حـدودك


....................واللي حصل لي ما اظن لحضرتك حاصل


تعطيني وعـود لكـن تبخـل بجـودك


.....................بنيـت دون الحقيقـه حاجـز وفاصـل


مابي ملامك عتب وارفض عتب سـودك


.....................انته من العيـن مهمـا تفعلـه ناصـل


كمل بروحـك لنفسـك نقصـك وزودك


.....................تاصل طريق تبي او عـل مـا تاصـل


ولا يروح عقلك بعيد وتوفـي وعـودك


......................اللـي بقـا بيننـا تحصيـل حـاصـل


.

وهاذي قصيده لشاعرنا


.

.

وهي رد على شاعرنا شبيب غـزاي
.
.
يا مرحبا ياللي جروحـه عطايـب
.........حيه وحي بيوتـه اللـي دعتنـي
راع العلـوم النـادرات الغرايـب
..........اللي مساء البارح بيوتـه لفتنـي
جتني وهي تنساق سوق الركايـب
...........وانا فرحت بشوفهـا واعجبتنـي
يشكي بها اللي رمشها سهم صايب
............عنها يقـول ان الليالـي حدتنـي
ودي لو انك عن غلا ذيـك تايـب
.............ام العيون السود والرمـش فتنـي
ما كل جرح تفيـد فيـه الطبايـب
...............ياللي جروحك ماهـي بخافيتنـي
يابوفهـد والحـب كلـه نشايـب
..............لو قلت باغيهـا وهـي باغيتنـي
قلته وانا قبلـك لقيـت النوايـب
...............في حب مـن فارقتهـا واخلفتنـي
لا زال جرح عيونها السود عايـب
...............يابوفهـد ذيـك بغلاهـا بلتـنـي
يوم اللقا فيها غدى شبـه خايـب
...............وشفت السوالف بعضها عومستني
ماقلت اخلي سايب الوضع سايـب
..............طويت صفحات الغـرام وطوتنـي
مع ذلك ابشر لو لقيت الصعايـب
................ياللي بيوتـك جتنـي وهيضتنـي
ما دام لك بالحب شـف ورغايـب
.................اعرف ترى الفزعه عليك إلزمتنـي
إما تصير انتـه واهلهـا نسايـب
..............وتعيش قرب اللي تقول إذبحتنـي
وإلا تعود وانت خاطـرك طايـب
...............وتقول فزعـة صاحبـي كافيتنـي
لو توخذ الدنيا طـلاب وغصايـب
................ماهابها لو شفت موتـي وحتنـي
دام العمر تاليـه قبـر ونصايـب
.................سود الليالـي ماهـي بمرعبتنـي
بمشي لو إن الدرب شوك ونهايب
................ان عارضت وإلا على الكيف جتني
خل الهمـوم جمـوع والا كتايـب

.................انـا لهـا دونـك لـو دمرتـنـي












((ضـحـيـت بـالـواقــع))

.

.
.
مرت سنه وشهور وشوية ايـام ,,على غياب اللي حلاها شمالـي
كم قلت في نفسي قبل عيني تنام ,, يارب جبها عند ما أصحى قبالي
تعبت ادور بيـن حزنـي والالام ,, عن صبري اللي بقى منه تالـي
يابنت خليت السوالـف للاقـلام ,, يكفيك لا عـز الكـلام انفعالـي
من صارت الدنيا حسابات وارقام ,, وانا عجزت استوعب اللي جرالي
ضحيت بالواقع على شان الاحلام ,, وضحيت بالغالي على شان غالي
حتى الغرام اللى كسر قلبي العام ,, ماني بحاله كان ماهـو بحالـي
ما بنحسب عمر البنادم بالاعوام ,, بعض السنين نعيش فيها ليالـي
وجه التشابه بين وجهك والايام ,, القلب خالـي والليالـي خوالـي

((عطرها صلف))

.
.
.
ذكراك لاهبت يجـي عطرهـا صلـف ,, واستنشقه بالصـدر مثـل الخزامـى
إي والله إن غيابهامكـلـف كـلــف ,, إي والله ان عـروق قلبـي تـوامـى
رمش النواعس والحجاجين والزلـف ,, ياماخـذن قبلـي قلـوب النشـامـى
أمضى من المصقول واسبق من الشلف ,, سهم الهـوى لوكنـت عنـه اتعامـى
لا يخدعك صبري على الجرح ماخلـف ,, هالشعر غيـر جـروح قلبـي تدامـى
لي خاطر بينه وبيـن الشقـا حلـف ,, ياماعثـت فيـه المقـاديـر يـامـا
من عاش هالدنيا بلا صاحـب وولـف ,, عزالله إنـه عـاش عيشـت يتامـى
خل السوالـف والمشاريـه والحلـف ,, مبطي وأنا علـى الجـروح اتسامـى
قلب(ن)يضيق بذكريات الهوى جلـف ,, وقلبـي مثـل جـرد القفـار يترامـى
.

(( مريت الاطراف؟ ))

جابتني الذكرى على الماضي كتاف

سجيـت كنـي تونـي مكتشفهـا

سرى بي الهاجس ومريت الاطراف

دوجت حـول الساعتيـن بطرفهـا

نعم تذكرت الزمـان الـذي طـاف

غديت مثل اللـي عيونـه طرفهـا

لي في غرام(ن) فات كلمه ومقياف

لولا خفوقي هام بـك مـا وقفهـا

اول غيابـك قلـت مابـي خـلاف

واليوم شف حالي غيابـك تلفهـا

تجهل جروحي ياللي جروحك خفاف

معذور لو قلبك جهل مـا عرفهـا

ياليت مجروح الهوى جرحه يشاف

لقول قرب من جروحـك وشفهـا

شفها بعينك كانك مـن الله تخـاف

حاول تصلـح غلطتـن مقترفهـا

العمر لامنـه خـلا منـك ينعـاف

في حال والا حـال غيـر تعرفهـا

قدام عينك لـو تطلعـت وخـلاف

تلقى الخفايا خاطري لـك كشفهـا

خايف ومن مثلي معه حق لو خاف

تبعـد ونفسـي ماتحقـق هدفهـا

ماللهوى عندك مواثيق وانصـاف

ماكـنـه الا لعبـتـن محترفـهـا

اليوم لو ذكراك ترجع بـي خـلاف

محبتـك سيـل التهايـم جرفهـا

( مداعبة..نسيم....الليل )

يطول الجفا وتشاغل الخاطر المكسور
...............ويبقى مـع الايـام طاريـك بلسانـي
اشوفك بعيني مع غياب وطلوع النور
...............ذكرني خيالك يـوم قلبـك تناسانـي
تذكرت يوم اني معك راضين مسـرور
..............وسجيت مدري هاجسي ويـن ودانـي
تخيلتك وفزيت طولي بـدون شعـور
..............اثاريه طيفك صار له وقـت ماجانـي
طرتلي ليالـي لـو تذكرتهـا معـذور
..............لو الوقت يرجع كان انا جيتها عانـي
يداعب نسيم الليل مجدولـك المنثـور
...............تغطيه عني والهـوى يكشفـه ثانـي
تفوح الجدايل مسك مدري عطر وزهور
.............تعنيك في طولهـا والشـوق عنانـي
اثر من تولع لو سمع مايطيع الشـور
..............هو اللي يشوف وباقي الناس عمياني
نسيت الليالي ذيك وشلـون يامغـرور
..............انا كنت اغالط من يقولـون تنسانـي
هذيك اليالي وين اثر الزمـان يـدور
..............رجح في عيونك ذيك الايـام ميزانـي
انا كيف ابنسى خابرن قلبي المجبـور
................لو اني نسيتك ماني بناسـي احزانـي
زمان مضى له دور واليوم غيـره دور
...............انا اليوم مالـد النظـر لـو تعدانـي
كفى ماجرى ما فيه داعي تجي مشكور
..............غرام الليالي ذيك خلـه علـى شانـي

((من عام ......الاول........))

لو قلت مرتـاح مانفسـي بمرتاحـه ,, غير التعب في غيابه مانـي بلاقـي
من عام الاول وقلبي تنزف اجراحـه ,, ضاقت على الوسيعه والفضا ضاقـي
لا بال مرتـاح لا فرحـه ولا راحـه ,, كم لي سنه وانتظر غيبـات سراقـي
ارجيه عقب البطا لو طال مرواحـه ,, كانه على هقوتـي ماخـان ميثاقـي
قلبن يذوق الهوى من يكبح اجماحـه ,, خلوه يرتاح دامـه بالهـوى شاقـي
اضحك وقلبي مع اللي عجة ارياحـه ,, لا قلت ياقلب طالت قـال وش باقـي
اللي عيونه وسـاع سـود ذباحـه ,, ازريت اداري غلاه بخافـي اوراقـي
ساكت وعيني ولو ماقلـت فضاحـه ,, حتى القصايد تخون وتفضح اشواقي
لو ما بغيت الهوى صابتني ارماحـهماجاه دون اللحم ساتـر ولا واقـي
مثل البحر كم غرق به ناس سباحـه ,, تضيع مع قوَ موجه هقـوة الهاقـي
خبري بقلبه صدوق الشوق يجتاحـه ,, عندي خبر فيه مايقوى على فراقـي
اتعب وغيري يجي وياخذ على الراحه ,, من حظ غيري وانا اللي زارع وساقي
.

((يقصر الشعر))

قلـت القصيـد وقـال لبيـك لبيـك ,, على مثل عبـدالله اتعـب اخيولـك
من قبل لا اشوفك واعرفك واحاكيـك ,, اسمع مـن افـواه النشامـا فعولـك
كل(ن) مدح فعلك عسى الله يعافيـك ,, والناس لولا فزعتـك مـا عنولـك
مافيه مجلس ينذكـر فيـه طاريـك ,, ألا ورواده بطـيـب اشـهـدولـك
جيتك وانا اسمع فيك من قبل ماجيك ,, ودخلت قلبي بس من شفـت زولـك
جيت ولقيت ان التواضع سمه فيـك ,, عرفت منهـا وش سبايـب قبولـك
واحترت مدري ويش اقول بمعاليـك ,, الشعر يقصـر طايلـه مـا يطولـك
المجد يتبع يابـو راشـد خطاويـك ,, كنه لكـل النـاس يعلـن وصولـك
الطيب مثل ظـلال زولـك يباريـك ,, وافق ميولـه يابـو راشـد ميولـك
لله در الشـايـب الـلـي مربـيـك ,, ولله در اللـي بعـد صوتـو لــك
مافيـه طيـب ماتمـنـا يخـاويـك ,, لوشفت فـي قلبـه مكانـك يهولـك
اسمك جمع نـاس وقبايـل حواليـك ,, ومـدوا يديهـم لكريـم ودعـولـك
والطيب يلقى عندك وفـي حراويـك ,, والا وش اللي يجمع النـاس حولـك
كـم واحـدن وده بطيبـه يجاريـك ,, حـاول ولكنـه تثـاقـل حمـولـك
ان كان بك عذروب عيبـك تماديـك ,, بالطيب وافعلك تجي ضعـف قولـك
هذا بعض شعري وصف بعض مافيك ,, الشعـر شعـري والفعايـل فعولـك

رغم التعب ...




رغم التعب والتناقض منزلك عالي ,, لو كنت في خطوتك تكثر تعـاريجك


عنيد لكن عنادك حيل ..يحــــلالي ,, لو كان للعند تاج اعلنت تتويجك


لكن ترفق وشوف وجيه..عذااالي ,, تفرح..تايد صدودك لي.. وتحجيجك


يكفي تشوف بعيونك ثوبي البالي ,, اللي تمزق تحت قـسوة كرابيجك


حزين رددت للاحزان موالي ,, وانت إتغنى فــرح واسمع اهازيجك


لا زلت احبك..ولكن وعد..يالغالي ,, لابد..اوقف دعـــاباتك وتهريجك


وإن كنت مهر ..ولا روضك خيالي ,,. جيت وعلى جثتي عــسفك وتسريجك

























(وضح النياق)

وين هالغيبه عسى ماهي إفـراق ,, ليه تبخل بالمجـي خلّـك كريـم

خابر ان الجرح لا صابه حـراق ,, مـا يفيـده طـبّ والله العظيـم

ينشدوني وين من رمشه دقـاق؟ ,, قلت مدري ذاك خبري بـه قديـم

الغلا راعيـه لـه قلبـن رقـاق ,, لو جفيته صارت ضلوعه هشيـم

لو زعل لو شال غيضه واستضاق ,, ما يخرّبهـا وجرحـه بالصميـم

ادمـح الـزلاّت زلاّت الرفـاق ,, خصّ لا من صار راعيها حشيـم

واكره الخـوّان كرهـي للعـراق ,, واعشق الوافين عشقـي للقصيـم

عند اهلها غاليه وضـح النيـاق ,, وانت عندي يمكن اغلا يا وسيـم

ان بغيت افراقنـا هـاك الفـراق ,, وش نبي بالحب دام الحب ضيـم

(النصايب)

يانفس هيـدي لاتزيديـن الاوجـاع ,,, كافي من الدنيا نشـوف العجايـب

ماني على من صد ضايق ومرتـاع ,,, لاهو مـن الغاليـن والا القرايـب

لاصارمابينـي ولابيـنـه نــزاع ,,, ولاجيتـه بزلـه ولا علـم خايـب

حق الرفيق انـي نهيتـه ولا طـاع ,,, والراي مابه فرض والا غصايـب

يومه غدى بينت له كـل الاوضـاع ,,, ماقلت اخلي سايب الوضـع سايـب

ناديت له لكـن تجاهلنـي وضـاع ,,, صد وعلى عمياه سـاق الركايـب

اقفاعلـى رايـه ولافيـه مرجـاع ,,, مثل السحاب اللـي قفتـه الهبايـب

للعلم بين الناس مدخـل ومطـلاع ,,, واللي يجّود حامض العلـم صايـب

من ينطح المويه ولاعنـده شـراع ,,, ان عاش يرجع من هك الموج هايب

والعاقل اللي لاخطا يرجـع بسـاع ,,, يسترجع ولاياخـذ الـراي عايـب

واللي يصير لرغبة النفس مطـواع ,,, لابـد مايلقـا العنـا والمصـايـب

والناس مختلفه لها اشكال واطبـاع ,,, بعض المعارف عرفهم لك نشايـب

بالناس من يلبس على وجهه قنـاع ,,, حسود لكـن فـي ثيـاب الحبايـب

هذاك مانـي فـي مخـاواه طمـاع ,,, من قبل اجيه وخاطري منه طايـب

والا الرجال اللي لهم بالوفـا بـاع ,,, وقفاتهم تبري الجـروح العطايـب

واللي لفاك بحـزة الضيـق فـزاع ,,, مادار وجهه عـن سمـوم ولهايـب

ماصد يوم انك من الوقـت ملتـاع ,,, ماغاب يوم ان اكثرالنـاس غايـب

هذاك تشرى خوتـه كيـف تنبـاع ,,, هذاك من شانـه تهـون الصعايـب

قلته وانا مالي ورى هرجي اطمـاع ,,, علـى افراقـه لاتصيـر السبايـب

اسمع مادام الصوت ياصل للاسماع ,,, ان تبت ولا ياعسـى منـت تايـب

مادامها صارت حـزازات واتبـاع ,,, مالـي ومـال مدوريـن الطلايـب

واعرف تراها لو شكت ثقلك القـاع ,,, مصيرها تركـز عليـك النصايـب

(ورده من بستان الابداع)

يا ابو محمد افطن وانتبـه للكـلام

.......كيف ميت منه,, واليوم جرحك كبير

ابيات يتيمه

بالهون عطني لو دقايق بوادعـك ,, خل الوداع برغبتـي واختيـاري

مبطي وانا شايف جفاك وتسرعـك ,, ياطول بالي يوم اشوف انتظـاري

اتبع هواك و روح ماني بمانعـك ,, دام انت عبد لكل نـزوة وطـاري

.

.

.

ماعاد لي قلب حتى ياخذه غيـرك ,, افنيت كل المشاعـر يـا معذبهـا

.

.

.

ماهو بقلبي كـان ماعـود معيـف ,, قطع الرجا في بعض الاحيان راحه

.

.

.

لو كانت الغيبه مثل ما تصـورت ,, ماشلت همه يـوم طـول غيابـه

.

.

.

العشره اللي تسبب فـي معاناتـي ,, ان جيت للحق لا والله مـا بيهـا

.

.

.

يوم انا قلت شـق النـور معـذور ,, نور وجهك فضـح ليـل الجديلـه

ذات يوم أفتقد الشاعر/ فهد السياري زميله وأخيه الشاعر/ متعب التركي
بسبب التزامه وهجره للشعر والنشر فقام (فهد) بالأتصال على (متعب)
ليسأل عنه وعن أحواله مما جعل قريحة الشعر تتفجر لدى الشاعر:
متعب

( صوت ) متعب التركي

ما كنت متصوّر حضور الـذي غـاب
............... واثـر الطريـق المـر لازال سالـك

لين اتصل فيني (فهد) عرب الانسـاب
............... رجلٍ ليامن طـاب لـك طـاب فالـك

قالوا على الهاتف وليته علـى البـاب
............... بعـض العـرب ودّك تشوفـه قْبالـك

تجيـه وتـروح بْحفـاوه وترحـاب
............... لـو مـا تميـل لّمعرفتـه استمالـك

كم لي سنه مقفل على الشعر الابـواب
............... واليوم غصب اجتاحني مـن خلالـك

البارحـة صوتـك حزيـنٍ ومْرتـاب
............... وانا خشيت اقسـى عليـك بْسؤالـك

طروا عليك اللـي مـن ايـام غيّـاب
............... واشتقـت يمكنّـك لشوفـة عْيـالـك

وإلاّ ان ضنّك في بعض هالعرب خاب
............... وانهـد لـك حلـمٍ يعيـش بْخيالـك

واظن سالف ذكرياتـك هـي اسبـاب
............... شـرودك الدايـم وضيقـات بـالـك

لنا على الماضـي مشاريـه وعتـاب
............... حزيـن لكـن نعشقـه رغـم ذلــك

وبيت القصيد اللـي يقولـون جـذّاب
............... مبطي وانا اشوفـه حزيـن مْتهالـك

(يابو محمد) عارض السالفـه شـاب
............... حمّلت نفسـك شـي فـوق احتمالـك

لوّحـت للمركـب وناديـت الاحبـاب
............... وقلبك غدى مرسى لمن عـاف جالـك

جنّب ولو مالك عن الـدرب مجنـاب
............... تعـوّض اللـي راح باللـي بقـالـك

وإلاّ انت عندي (يا فهد) غير الاصحاب
............... شعري لحاله وانـت عنـدي لْحالـك

هـذي مشاعـر ود تقديـر وأعجـاب
............... خذها تـرى مـا عنـدي إلاّ حلالـك

لو ما انت غالي ما حضر هاجسٍ غاب
............... ولاشـرّع ابـواب القصيـد اتصالـك

قلته وانا قلبي عـن الـوّد قـد تـاب
............... في خاطـري كلمـة ولا قلتهـا لـك

توّجـه لْــربٍ غـفـورٍ ووهــاب
............... هو وحـده العالـم بْحالـي وحالـك


شعر / متعب بن فهد التركي


( صدى ) فهد السياري

وانا بعد ما كنت اقـول أنـك مْثـاب
............... والناس مـا قهويتهـم مـن دْلالـك

ابطوا على بابك ملاهيـف واغـراب
............... وعشيّتهـم والليـل والوقـت حالـك

يامن حسبني دون الادنى والاجنـاب
............... الله يمتّـع بـك ويحسـب جـلالـك

طوّقتني بالطيب واسمـك والاعجـاب
............... واحرجنـي الباقـي لعـل البقـالـك

وانا بطبعي للوفا ما البـس اسـلاب
............... لو دون حوض العز حوض المهالـك

لو مالي بْشـرواك بالظـن مطـلاب
............... لاشك اعرف المـاء تجيبـه حْبالـك

يا روضٍ اجدب حيل واطول بالاجداب
............... لو ما انت غالي قلت مالـي ومالـك

يوم الشعور اخضوضرت فيه الاعشاب
............... واحيا هشيم الجـرح زيـن الممالـك

لا تتركـه يكفيـه غيبـه وغـيّـاب
............... اطلـق سراحـه لا تكـون مْتمالـك

نادم به اللي مثل شرواي مـا طـاب
............... خذ اجره وشعـره وهـي كلهـا لـك

الشعـر كـان مْرافـقٍ لـك ونجّـاب
............... ياما قعدت مْـن الحنيـن وْعـدا لـك

والشعر كان مْقـربٍ منـك ومْهـاب
............... يا شيخ مـا يفتـى وبالـدار مالـك

يوم اذكرك تعرض من الغيد الاشبـاب
............... ايامـك اللـي قـد مضـن وْليالـك

تلعب بالالفاظ وتلاعـب بالاعصـاب
............... والمفـردات تْطاوعـك فـي مجالـك

أحس بالغربه عن الشعـر وانصـاب
............... واقول يا عذب الشعـر وش جرالـك؟

رضيت به حتى تهاوى وهـو شـاب
............... ونثر الشعر صار العوض في جْزالـك

حتى زمانك غارسٍ في الشعـر نـاب
............... وكلٍ يقول اركد وش اللـي غدالـك؟

واليوم انا راجيك يوم الشعـر هـاب
............... لا تخـذل الـلـي دوّرك والتجـالـك

لوما تعدّه مـن بنـي عـم واقـراب
............... عدّه على شاني من اقصى خوالـك!!

شعر / فهد بن محمد السياري

مشكور

مشكور يا بايع مشاعرك مشكور .. العام ذنب وهالسنه ذنب ثاني
وش عاد اقول ولا بقى شي مستور .. ما طعتني يوم ابتسم لي زماني
لا تعتذر لو خاطري منك مكسور .. لا تفتكرني دام قلبك نساني
لا لا تقول ان الليالي لها دور .. شف من هو اللي كان فينا أناني
مدري تصنعت الغلا زور في زور .. مدري انا اللي حيل كنت متفاني
مثل العما ما تنفعه طلعة النور .. النور بعيون العما ما يباني
عندي خبر لو جاك من يمي قصور .. لأقول انا مخطي وربي جزاني
لو شفتني قاسي عليك انت معذور .. شفني من أول جرح لا زلت أعاني
انا بشر مثلك لي احساس وشعور .. واغتاظ لا مس الكلام بكياني
حتى وانا في قمة الغيظ مقهور .. بعض الحكي عيا يقوله لساني
ابقولها لو قلت لي صابك غرور .. ما فيه احد ياخذ بقلبك مكاني
العام قلبي فيك هايم ومجبور .. العام لا مني جفيتك عصاني
واليوم حبك في حناياه مقبور .. لو ما دعيته للمفارق دعاني
ذاك الهوى ما عاد لك فيه مقدور .. ابعد من ايام الرشي والسواني
ما دمت راضي عن عذابي ومسرور .. ملعون ابو قلب ٍ عليك يحداني

الوطن

العلـم رفـرف علـى نجـد وجبـال السـراه ,, مثل مـا رفـرف علـى كـل ديـره بالوطـن

أن كتبنـا للوطـن صـارت الريـح الـرواه ,, وأن تحدثنـا حكايـات وأشجـان وشجـن

للوطـن تاريـخ يدريبـه الـلـي مــا قــراه ,, يوم جاب الله لـه اللـي حمـاه مـن الفتـن

الزعيـم اللـي وقـف فـيـه وأذن للـصـلاه ,, جمَع أطرافه على الديـن والشاهـد زمـن

جاه ابو تركي وصبحه مثل عتمة مساه ,, إنـتـهــاك وفــقــر وأحـــــزان ومــحـــن

وحـده فـي حــد سيـفـه وطــوع عـصـاه ,, مـن هنـا للبحـر الأحمـر إلـى حـد اليمـن

شع نور العـدل مـن سيفـه ونـور سمـاه ,, لين صارت أصغر قراه مثل أجمـل مـدن

أمنـه بالعـدل والعـدل هـو نــور الحـيـاه ,, ليـن قامـت مملكتنـا وصـارت دار امــن

الـوطـن هــذا نـحـبـه وعـشــاق لـثــراه ,, الوطـن هـذا سكينـه قبـل يصبـح سـكـن

فـي نـهـار السـلـم نبنـيـه ونعـلـي بـنـاه ,, وأن لمحنا خاطـره ضـاق قلنـا لـه تمـن

وش تبي ياموطن العزمن سمـر الجبـاه ,, وش تبي أكثر من الروح ورضاك الثمن

الوطـن هـذا لنـا حـق نفخـر فــي غــلاه ,, يكفي انه لشرف الخلـق واتباعـه وطـن