ديوان الشاعر/مسفرالدوسري

شلون خليتيني اثنين ؟
شلون خليتيني اثنين ؟
واحد في الماضي حبّك ..
أو واحد يكرهك الحين
ياللي حبك الدهشة
والغربة
ومزروعة وسط قلبي
مثل سكين
شلون خليتيني اثنين ؟؟
واحد كان ياما كان
ينسج من ظما التحنان
بحور
وأنهار
تروي في هواك اغصان
ويزرع في صحارى الشوق
بساتين الأمل ريحان
ويحبك
ويحبك
ويحلم في سما عيونك
تمطر بالفرح ألوان
ويحلم فيك
ويحبك
يلي حبك الحرمان
يلي خليتيني اثنين
واحد في الماضي حبك
أو واحد يكرهك الحين
واحاول أهجرك وانسى
حزن يمشي بشراييني
يلي كانت عيونك
محطاتي وعناويني
أحاول أمسك النسيان
وأمسح فيه حروف إسمك
على كل طوفة للذكرى
وكل دمعة وسط عيني
وبيديني
أخلي صفحة النسيان
عباية تلملم اللي كان
ياللي حبك الحرمان
ياللي خليتيني اثنين
واحد في الماضي حبك
أو واحد يكرهك الحين

وشلون أقول إن أنتِ غير؟
وشلون أقول..
إن انتِ تغرين النوارس بالغرق
ف الازرق الفاتح
وشلون تغرين الرصاص..
يحب ويصافح.
وشلون تغرين الشتا..
يدفّي ريشة طير.
وشلون بعيونك مساي..
دايم مسا خير
شلون أقول إن انتِ غير ؟
شلون أقول إن انتِ غير
غير البنات
وشلون أخلّى للحكى عنّك
طعم سكَّر نبات
شلون أقول إسمك ولا..
يصير لساني ..نعناع
وتصير..
حروفى غزلان
ويصير ..
قمر صوتي صلاة
شلون أغنِّيك وماتصحى عصافير الفجر
ولا يطول عشب البحر
أو تزهر بدربي حصاة
وشلون أقول إن انتِ غير كل البنات
وشلون أقول إن انتى غير..؟
غير البشر
ياللى إذا تبسّمتى ..
يفزّ
من سدرة الليل.. ( النهار ) ..
وتقرب سما
ويكبر قمر
وإن قلتى للدنيا [ مساء الخير ] إنولد..
من شفّتك :
مليون نجمه
وإنتشى فيك السهر..
وشلون أقول إن انتى غير..؟
غير البشر

أنا مسفر ..ذكرتيني ؟
أنا مسفر
أنا الي بغيت أنسى
ونساني في الهوى النسيان
أنا اللي..
كنت أسهر على أهدابك
وذاك اليوم ..
تركت ايامي ..
واحلامي..
واقلامي..على / بابك
تركت النوم ..وجفوني
ولا فكرت ان السهد..
يسكن / بعدك عيوني
أنا مسفر ..ذكرتيني ؟
أنا اللي ..بغيت أمشي ..
على درب الزعل .. وأنسى ..
لقيت الدرب ..
مهما خطوتي تقسى..
لك انتي يوديني ..
وتصبح دنيتك منفاي
وعينك تصبح المرسى
أنا اللي..
إنتي ظلمته وشمسه..
ذكرتيني ؟
انا اللي..
قلت في يوم راح انساك
وكن هاليوم ..
بيني وبينه.. ( كل عمري ) ..
وجيت الحين ..
ضايع بالندم عذري
جيت اسأل ..
اذا انتي عرفتيني
واقول : يا فلانه .. شوفيني ..
أنا مسفر ذكرتيني

أغنيه..
أمنيه..
فـى بطاقة عيد..
فـ العام الجديد..
إذكرينى فـ اللى ينكسر من ظل
فـ البسمه ليما تنتشى..
فـى عيون الكل
وليما تختال السما..
نور..
وياسمين..
وفـلّ..
ويجن السهر تغريد
إذكرى هاللحظه إنى
من بعد عينك شريد...
فـ العام الجديد..
العام جهّزنا سوى لراس السنه
وإخترنا الورود..
وكروت التهانى..
قعدنا كم يوم نكتب..
أسامى المعازيم,
الهدايا,
المحلات اللى بنمرّها..
والأغانى
وقعدنا كم يوم نحلم
ونزيّن الشوق
وننضّر عيون الأمانى
وقعدنا كم يوم نرسم
وشكثر باكر سعيد
فـ العام الجديد
هالسنه وإنتى بعيد
إذكرينى..
فـ الشموع اللى تشب وتنطفـى
فـ الليل ليما يحتفـى بالناس
وبراس السنه..
وفـ اللى ينفـتح من صفـحات بيضا
آخر الكراس
وليما يلتقى فـ الساعه ثنعش
إحساس دافـى فـى شغب أنفـاس..
إذكرى هاللحظه إنى..
حيل بردان ووحيد...
فـ العام الجديد..

لاتجرح عيون الثواني بـ الصَّبر
لا .. لا تواعدني تجيني ..
... وما تمر
وتخلي أيام العمر
وردة فرح من غير عطر
وأصير أنا بعدك سطر ..
هارب من أحضان الكتاب ..
وتنساني في بحر العذاب
موجة حزن ..
على السواحل تنتظر ..
لاتجرح عيون الثواني ب الصَّبر
لا .. لا تواعدني تجيني ..
... وما تمر
قلنا وعدنا بالثمان ..
صارت تسع
تسع وعشر ..
عشر وتسع ...
عشر و [ عمر ] ..
عشر وعذاب ..
عشر ..
وأماني تحتضر
حتى عقارب ساعتي ..
صارت تحاشى نظرتي
ملَّت تفر
لاتجرح عيون الثواني ب الصَّبر
لا .. لا تواعدني تجيني ..
... وما تمر

من كثر ماأحبك أنا
..أقسى عليك
أقسى عليك..
أسرّب نجومك..
من أبراج السما..
للشيح
وأهرّب يدينك..
من قلوب الحمام..
للمنطفى..
من شعر ومصابيح
أكسر مزهريتك
وأنثر
عطر ورودها
للريح
ليه أنا..أقسى عليك..؟
أوادعك وقت اللقا
ووقت الوداع
أشرّع أبواب المدى..
لدروب عيّت تستريح..
ليه بس أقسى عليك..
وأسكن عيونك ...دمعتين
وشمعتك..ليل
وضحكتك..تجريح؟
من كثر ماأحبك؟
عذرٍ تراوغه المزون
برق تراوغه العيون
أذكر إنى قلت لك:
من كثر ماأشتاقك أنا..
أنسى أجيك
ويومها
تركت بيدينك بقايا
كحلك السايل
وعذرٍ يشبه عيونى...ضريح
أنا ليه بس أقسى عليك؟
أدرى إنى حيل أحبك
وأدرى إنى بأنكسر لو رحت
وأذبل
مثل أغانى ماتخضّر
مثل دهشه ماتشجّر
مثل جمره
ترتجى فى شتاها المر نار
مثل عصفور يدوّر له فضا
ويشوف كل الكون بجناحينه
سوار
وأدرى إنك لو تصك الباب..
بأقعد وحدى هناك..
أعدّ حبات الرمل
وبيجفّ
فى صبحى النهار
وبتصير .. أحلامى قصار
كل هذا فيه أدرى
بس مدرى..
أنا ليه أقسى عليك؟
ليه أكذب بعذرى وأقول..
من كثر ماأشتاقك أنسى..
أنسى لحظتها أجيك
ومن كثر ماأحتاجك أعجز
أعترف إنى
أبيك ..

سرب من حمام ؟
قوله :
يا من يودّي له سلام ؟
ولّا وسايد السهر ..لاجيت أنام ؟
ولّا الكلام .....
اللي ذبل على طرف أصابعي
..من غبت
وازهر بي الخصام؟
أو قصيدة ممتليه ندم
ولّا ملام ؟
منهو يصالحني عليك ؟
مات النهار بناظري ..الا شعاع
فيني غرق كل البحر..الا شراع
رضيت أجامل حزني فيك..
رضيت أموت ما بين ايديك..
رضيت ..رضيت..
الا الوداع.
أرجوك بس..الا الوداع.
منهو يصالحني عليك ؟
من يسرقك ..
من بين زعلك والتقيك..
من يسرق الخوف اللي ساكنّي واجيك
من يقنع الماي اللي فيك..
اني عطش..
وغصون عمري تشتهيك..؟
من يقنع نعاس عينك والخدر
اني سهر
على النوافذ أحتريك ؟
منهو يقول لك يا الجمر..
اني أبيك.
منهو يصالحني عليك ..؟
ياللي خذاك مني الجفا
كل ليلة أشعل لك حنين
بدل حنين البارحه كل ما طفا
وكل ليلة أفرش لك جفن
عطر ودفا
صبر ووفا
وكل ليلة من قبل أنام
أوارب اطراف الهدب
علّ وعسى
يمرني طيفك عجل
لا من تعب فيّ الزعل
أو جفنه الصاحي غفا
وكل ليله أسأل هالسؤال :
منهو يصالحني عليك ؟
منهو يصالحني عليّ ؟

عاري الكلام
لبسيه اللي تبين من الهدوم
غضب ..
عتب ..
او حتى لوم ..
عاري الكلام اللى بقول ..
لاتتركينه .. لبسيه ..
اللي تبين
جمرات بوح ..
ولا جروح ..
ولا اصابه زاوجت
بين البياض بدفتري ..
وبين الهموم
سميه دفا ..
سميه جفا ..
تشكيل في لون النهايات ..
ورسوم
عاري الكلام .. اللي بقول
لبسيه اللي تبين .. من الهدوم
بنزف حكي .. اليوم ..
الى آخر ضوا في بحتي
وقيض .. وسموم
ابنزف الليله مسا ..
مسا كثير..
ليما اشوف عروقي برق
وبصوتي شمس
وكل الدرايش الخضرا اضمدها ..
واقوم ....
دام احنا عرينا الكلام ..
لك بعترف
اني بعد كل ها السفر ..
اللي مشيته بيننا
انا اعترف ..
اني مهزوم
عجزت اصير في صبحك المظلم .. قمر
ولا قدرتي تشعلين في سكة الخطوه نجوم
ظنونك السودا .. سما
ما طمنت فيني الحمام
عاشق سلام
انا كنت اصيح
عاشق سلام
وكانت سماك تمطر علي سود الظنون
في كل يوم
انا اعترف .. اني مهزوم
في داخلك ..
تمشي قبايل من عطش
وانا لقيت ..
في داخلي .. بير مهدوم
واليوم بس ..
اليوم عرفت .. اني مهزوم
عاري الكلام ..
ولبسيه اللي تبين من الهدوم

ماتدرين
كنتى ماتدرين ..
إنى كنت لحظتها حزين
يوم جيتى
بكل بياض تحريتك
أنا
كنت فى قلب أحزانى سجين
ويوم جيتى بكل طاهر مزونك
أنا كنت لحظتها..أخونك..
مع جفافى..
وجرح فى صمتى دفين
وإنتى كنتى..
تسولفين..
وتسولفين..
كنتى مليانه بهى
وآنا فارغ..
إلا من أوراق صفرا
وجذع أثل ..مرمى
وحس ليل
وآهةٍ سكين
وإنتى ماتدرين..
كنتى ماتدرين..
كان عطرك يشعل الدنيا حرايق
يعيد تجمير الكلام
كان يغزل
من تفاصيل الرغبه..آهات وحمام
وكنت أنا بارد .. وشارد
مرّ عطرك
فى يدى برد وسلام
ماولّع ثيابى
ماعلّق أهدابى
وأحرمها منام
ماطيّر إيدينى فراش
وماصلبنى
بين حلاله.. والحرام
تتخيلين...؟
مرّ عطرك
فى يدى برد وسلام
كنت لحظتها هجين
من سراب... وطين
وأنتى ماتدرين..
كنتى ماتدرين..
ليلتها كانت ضحكتك..
مينا.. وشراع .. ونوارس
كانت أحلى من أغانى عرس
ومن نسيم يمر هامس
ضحكتك كانت مثل ..
وجه شمس بليل دامس
كان لها
فىّ.. وعصافير..
وعبير..
ومع هذا مااسحرتنى...
عيّت بقلبى تلامس...
أى إحساس وشعور
أو تدوزن فينى هاجس
كنت لما أبتسم وأجاملك
كان وجهى بداخلى..
قطعه من حنظل ..
ويابس
كان عابس
وآنا حابس..
فى كفوف الصبر حزنى
ماأبى تدرين إنى
كنت ذيك اللحظه محبط..
منكسر.. مسكين..
وإنتى ماتدرين..
ياعيونى أنا آسف
كنت ذيك الليله
جاحد..نعمة الوصل وحنانك
وماتيّسر من رضاك..
وماك..وسحر الياسمين
أنا آسف..
أعتذرلك..
أعتذر لإحساس شوقك..
صبح قلبك..
والعطر..والتين
آنا آسف..
كثر
مافاتنى ذاك المسا
من حنانك والحنين
كثر ماعمرى نقص ذاك المسا
نور وسنين
كثر ماأخطى عليك
وإنتى دايم تغفرين
كثر ماأبقى غروب بلحظتك
وإنتى دوم بلحظتى..
يالحبيبه تشرقين

طمِّني يا تيسير ..
وشلون أحوالك ؟
قللي عساك بخير ..
مدري إذا تسأل ..
عن حالي وإلا لا ..
لكنِّي .. انا .. بخير ..
الشمس مخنوقة ..
وباقي النجوم سودا ..
والعتمه تملي الروح ..
وآمالنا تمسي
تصبح تصير جروح
ولا بقى بالقلب ..
حالي ولا مملوح
واخطوه محتاره ..
ماتدري وين تروح
وأصواتنا خرسا ..
نموووووووووت
قبل مانبوح
ولو بحنا وش بيصير ؟
لكن أُخوك بخير
بعض الظنون آثام
وبعض الرجا أوهام ..
و تشابهت فينا
الفرحه والآلام
لكن أظن الجاي ..
من عمرنا مسروق
ومن نومنا مسروق :
الغفوه والأحلام
تحت الوسايد دم ..
فوق الوسايد هم
وطير الفجر لا هدّ ..
وإلاَّ ب سمانا حام ..
منتوف فيه الريش ..
شلون تبيه يطير ؟
لكن أُخوك بخير
تيسير في قلبي ..
يتعذب السؤال
خايف على الأطفال ..
ما أدر لو يلقون باكر
بقايا ماي ..
في قلب هالصحرا
ولا قدرهم بس ..
منَّا العطش واللال ؟
ما أدري يا تيسير ..
بيلقون لهم كرَّاس ؟
وشمس ودفا وظلال ؟
بيلقون لهم أحلام خضرا ..
وفضا ..
وموَّال ؟
يوم يكبرون باكر ..
بتتعدل الأحوال ؟
وبيتعدل اللي في ..
حاضرنا هذا مال ؟
خايف على الأطفال ..
أطفالي وأطفالك ..
من هالزمان الصعب ..
وفيه الليالي طوال ..
ما تبشر ب تغيرر
لكن أخوك بخير ..
أنا أمووت بخير !