عيون تحـمل الغرق... الكاتبه ::: ريم الحجر

هيفاء رجعت لجدتها تبي تسولف معها قبل العشاء وشافتها لابسه السلسال اللي شراه فهد
هيفاء : الله يمه وش زينها عليك وتقولين مو لايق لك انتي لا يعلى عليك ترفه وكل شي تلبسينه له شكل
ام طلال : هذاك اول يا بنتي خلاص الحين معد يجوز لي شي
هيفاء : وش هالكلام افااا بالعكس حلوووو مررره عليك
ام طلال : اكيد بتقولين حلووو دامه من فهد
ضحكت هيفاء بصوت عالي وردت على جدتها اللي القلق ماكل قلبها من ناحيتها : اكيد يحق لي فهد مو اي واااحد والا لا يا جدتي
وجدتها اللي تثني على كلامها بكل تاكيد ما شافت فهد اللي كان واقف وراء هيفاء ويضحك على سوالفهم
قال بصوت عالي : اشوفكم تمدحون فيني وش عندكم
هيفاء انحرجت مرررره وما قدرت تقول حرف واحد وام طلال ردت عليه : اذا ما مدحناك من بنمدح فيه يا ولدي
: فهد : انا جووعان حدي متى بتتعشون ؟؟
هيفاء الحين بنجهز العشاء ,,طلعت هيفاء تشوف خديجه وش رتبت للعشاء وحصلتها مجهزه كل شي
ام طلال اعتذرت انها تقوم معهم للطاوله وحست انها تعيبنه وقالت لخديجه تجيب لها شي بسيط في الغرفة
وهنا توهقت هيفاء وش تسوي ,,, حست ان جدتها متعمده تتركهم بالحالهم يمكن حست بشي ,,
فهد خلاص بتعشى وبرجع لك وش رايك
ام طلال : ابد تبي تجي تعال والا خذ زوجتك ورح ارتاح شوي
هيفاء حست بالوان الأحراج كلها صدق وهقه يا جدتي ,,,
فهد حاول يتحاشى يشوف هيفاء لانه عارف ميه في الميه انها منحرجه منه بس يالله خلاص هو صار في الموقف وما يقدر يتراجع
هيفاء بعد حست فيه انه توهق معها بس قالت بكيفه
اول مره تقعد معه بالحالهم من وقت طويل وهو اصلا ما كلمها من يوم وصل واذا تكلم تكلم بشكل عام بالله وش تسوي فيه وش تقول له كيف تقدر تفتح موضوع ,, وليه هو اللي ما يبدأ معي
جلس فهد على الطاولة وهو يحاول انه يلتفت لها كل شوي وهي كالعاده بادرت انها تحط الاكل مثل ما تسوي مع جدتها
حطت لفهد من كل الانواع الموجوده وقعدت في مكانها بغت تاكل شي خفيف ومحرجه منه خصوصا انه ساكت صحيح يقهر
مثبتها نظرها في الصحن والا قدامها شوي في الصحون وما حاولت تلتفت له اذا هو بيظل ساكت احسن بعد وفر علي الكلام
فهد شاف توترها وهي تحط الاكل ,,
فهد : اكيد انبسطتي انك افتكيتي مني ,,
هيفاء فتحت عيونها بأتساع وهزت راسها: ما قلت لك تسافر اذا انت عشاني ,,
فهد : ما احتاج منك اذن اني اسافر بس اكيد ارتحتي مني ,,
هنا بالفعل توترت هيفاء يعني ماقال شي من الصبح ويوم حكى قال شي يسد النفس والله شي ,,
هيفاء وصلت معها : تقدر تقول كذا اجل ,, اكيد بأخذ راحتي وقامت وتركته على العشاء وطلعت مستعجله فوق ,,,
دخلت غرفتها وهي وااااصله مرتفع ضغطها منه ,, يعني يبي يطفشني والا وش فاكر نفسه يعني ,, هذا اللي يبيه
صارت تسكر الأبواب بقووه وشوي حست نفسها فاقده السيطره دخلت وغسلت وجهها بموية بارده عشان تهدي من اعصابها شوي
والا فيه الخير الأخ فهد مسوي فيها انه كلش مسافر عشاني والله شي ,, (( طيب انتي ليه تنقهرين منه كان رديت عليه رد عكسي مثلا بالعكس البيت ماله حلاه بدونك )) لا والله عشان ايش اقوله كذا يأخذ في نفسه مقلب ,,
فهد شاف ردة فعلها وقعد يضحك صدق انك بزر يا هيفاء ,,
قام لجدته ودخل عليها وهي تتجهز تبي تنوم وجاء عند راسها وسلم عليها وسالها اذا تبي شي
ام طلال : اذا تسألني وانت بتنفذ اللي اقوله قلت لك ,, واذا هو بس كلام خلني ساكته ابرك ,,
فهد ::: افاااا يام طلال معقوله انا اسفهه اللي تقولين انتي تأمرين لو في آخر الدنيا بجيبه بجيبه ,,
ام طلال : لا بالله هو مو آخر الدنيا هو شي سهل وفي يدك ومقدورك ,,
فهد : سمي يا طويلة العمر وانا اقول تم ,,
ام طلال : مريم كلمتني وتبيك تجيب هيفاء تغير جووو عندها ,, لا سافرت زي الناس وتركتها وسافرت تقول معيوفه وهي والله انها تسوى بنات الديره كلهم وتحطهم في مخباها بعد بس انت الله يهديك مدري وش فيك عليها ,,,
فهد اللي سرح بعيد وبعيد جدا : يمه هي اشتكت لك مني والا شي ,,
ام طلال : شفت هالجدار كانه نطق تراها نطقت لكن هي بنت يتميه وفيها عزة نفس لو تحتاج ما راح تقول لحد ابي ,,, وما يحتاج تقول لي عيونها تحكي يا ولدي والفترة هاذي قربتها مني لدرجه انها اذا صكت الباب وراحت اني ابكي كيف اني مو مصدقه بهم ورافضة ان جدك يجيبهم ,,

فهد : مالك الا الرضا اذا طلع فيصل ان شالله وصار طيب خذيتها بس لا تقولين لها الحين خليني بقولها في وقته ,,,
ام طلال : الله يطول بعمرك ياولدي وترى هيفاء ما منها حط هالشي في بالك ,,,
طلع فهد من جناح جدته وهو يفكر في كلام جدته اللي حملته اكثر من طاقته ,, هو صحيح زوجها بس ما حس بتوافق معها وشاف فيها عند يكسر الدنيا وما عليها صحيح انه بأدب بس لازم يوقفها عند حدها ,,,
طلع من القصر وراح لفيلتهم وترك هيفاء في حيره منه ومن تصرفاته ,,,
هيفاء ماتدري هل فهد بيجي هنا او مثل اول بيروح لفيلتهم بس شافت انه ما جاب شنطته فأكيد بيروح هناك مع ذلك ما منعت نفسها انها ترتب المكان بالكامل مع غرفته وتغير الشراشف وتحط كل شي جديد في حال يبي يستخدمها ,,

لمياء ماجاها نوم تفكر في فيصل وش يسوي هالحين سعود يمسك مناوبة بعد العشاء عشان ربعه يجون عنده ويسهرون معه علشان ما يتملل من قعدة المستشفى وما كانت تأخذ راحتها في الكلام معه بالليل تكلمه قبل تنام ويرد عليها رسمي عشان الشباب ,,
ارسلت له مسج اذا طلعوا الشباب وتقدر تكلمني ابي اسمع صوتك
ارسل لها فيصل (( من عيوني ))
بعد ساعه كذا اتصل عليها فيصل بعد ما صرف سعود شوي ,,
فيصل : هلا يا قلبي فيك شي ,,
لمياء : لا بس ما جاني نوم قلت اكلمك اتونس بك ,,
فيصل : يا عمري انتي تبين تجيني اصرف سعود الحين يروح البيت وتقعدين عندي وشرايك ,,,
لمياء : لا ياعمري الوقت متأخر ما يصلح اطلع الحين ,,,
فيصل : طيب اخبارك ,,تعشيتي زين والا لا ,,لمياء وهي تضحك قالت له ايه وهي ما كلت شي
فيصل : تدرين ضحكتك تدوخ ما ابي اسمعك تضحكين عند احد فاهمه يا عمري ,,
ولمياء وهي تضحك بأقوى : من جدك اجل وش اسوي اسكر فمي ,,
وهي شارقة بضحكتها وفيصل يسولف عليها ماحسوا بالوقت الا صوت سعود داخل عليه ويقول كملوا سواليفكم بكره انا بنااااام
سكرت لمياء وضميرها يأنبها من سعود اللي نطرته برى الغرفة ,,,
دخلت هيفاء في فراشها وهي تفكر في فهد ليش يعاملها كذا ,, يعني انا وش قلت له ,, خلاص خذ حقه ومشيت له وش يبي بعد ابي افهم
اااخ منك يافهد لو ادخل في مخك واعرف وش تفكر فيه ,,,
فهد من ناحيه ثانيه قعد يفكر في كلام جدته وهيفاء وطريقتهاا معه على العشاء وش توقعت تأخذك بالاحضان والا تطيح عند رجلك تسامحها ,,حس وضعه مو طبيعي مره ولو تكتشف امه او ابوه انه يجي هنا وينام يمكن تصير سالفه كبيره ,, بس يالله بتركها للايام,,,

من الصباح بدري كلمت العنود ريما تبيها تروح معها تشتري اغراض حق زميله لهم بتتزوج وتبي رايها وقالت لها العنود خلاص مريني والا امرك فقررت انها تأخذ سيارتها وتروح للعنود
خذت الشغاله وطلعت بسيارتها البي ام والبست لبس كاجول جدا عملي وخذت لها عبايه ناعمه ولبست نظارتها وطلعت ,,
اول ما وصلت بيت عمتها دقت على العنود تطلع لها
العنود : ما فيك دم انتي انزلي سلمي على عمتك يالدبه ,,
ريما : شوي شوي لا تاكليني ليه عمتي فيه والله ما توقعتها هنا ,, اوكي جايه
نزلت وفتحت لها العنود الباب ونزلت طرحتها على كتفها شعرها القصير كان مدرج بشكل كثيف ومع اضاءة المدخل ولون الصبغه معطية خصلات مثل اسلاك الذهب الصافيه
نزلت نظارتها وهي تكلم عنوده : وين عمتي يالدبه
نواف اللي يبي يطلع وكأنه مستني متى تجي ويطلع لها وقف شوي وهو يتأملها وهي انحرجت منه على الآخر صحيح شبه مخطوبين بس هي مو من النوع اللي تبي تعطي خطيبها فرصه انه يكلمها او يسولف معها عااادي ,,
انحرجت منه مرره وحست ان وجهها الخالي من اي لون من المكياج صاار احمر وفارت خدودها حراره
نواف : كيفك يار يما عاش من شافك ,,
ريما وهي تحاول ما تخربط في الكلام : الله يسلمك ,, الحمدلله على سلامتك ,,
نواف : الله يسلمك ,, نواف واقف في وسط المدخل ومن طوله شكله مهيب هو اطول من فهد حبه بس له عضلات ومن النوع اللي يمارس الرياضه بهوس ومحلق شعره على الزيرو مو زيرو مره وحده يعني واحد ومع ذلك شكله يهبل ,,
عيونه فاتحه نفس امه هدى ,, جت بتلف من وجهه وتدخل لف في وجهها يبي يسوي لها حركه ,,جت تلف الجهه الثانية ويلف وجهه لحد ما ضحكت بقوووه :: اسم الله شفيك ,,
نواف اول ما شاف ضحكتها سكر من الضحك : الحمدلله يعني تضحكين وانا كل مره اشوفك اقول يمكنها ما تعرف الضحك ,,
دفته بيده تبي تروح لعمتها وهي حاطه يدها على فمها ما تبي تضحك اكثر
التفت لها وهي داخله وقال :: اااه يا ريما متى بيزفونك لي ,, وزفر بحراره وطلع
اللي ماقلت لكم عنه ان نواف حب ريما من يومها صغيره بريئه وبزر تلعب بالعرايس وكان يقول وهو مراهق انا بتزوجها هاذي بتصير عروستي اذا كبرت ,, ودايم يصرح لأهله بهالشي ودايما اذا جتهم ريما بعد ما كبرت تستحي منها لأنها شافت في نظرته شي خوفها منه وما قدرت تقعد معه عادي زي اول تقعد مع اخوه مشعل بس هو لا تهرب لغرفة مشاعل والعنود وهو حاس بهالشي ,,,

العنود كانت سكرااانه ضحك على ريما اللي خذت علبة مناديل وقعدت تهوي وجهها ,
ريما : وش اقول ادعي عليك ,, هذه اخرتها تسوين في مقلب ,, اااخ منك حتى ما قلتي تكشخي على الاقل يشوف شكل عدل
العنود : الحمدلله ,, انتي مو عدله أجل من العدل ,,, انتي بكبرك تهبلين ,,
وكملوا ضحك وسلمت على عمتها وطلعوا للسوق,,
بس ريما قاعده تفكر في الموقف طول اليوم وحست بحياء كل مره تتذكر حركته معها ,,,

من الصباح بدري حست هيفاء بضيقة غير طبيعه ما تدري وش سببها بس سألت الله سبحانه انه يعدي اليوم ذا على خير

لبست لها تنورة جينز مع بلوزه بكم طويل بلون التفاح وربطت شعرها على فوق ونزلت
كان لسى ما قامت جدتها ,,

راحت للمطبخ اللي تحت حبت تسوي شي على الأقل انها سوت شي مفيد ,, دخلت المطبخ الا يجيها صوت الممرضة من ورى
مدام تعالي بسرعه شوي,,
راحت تجري معها لغرفة جدها وشافته يتنفس بسرعه كأن فيه ضيقة نفس ماعرفت وش تسوي وعلى طول طلعت وخذت جوالها وهي تنزل على تحت بسرعه وتدق على فهد
فهد يسمع صوت الهزاز ومد يده للجوال اول ما فتح عيونه وشاف اسمها فتح الخط على طول
فهد : شفيك صاير شي
هيفاء : فهد الحق جدي تعباان وسكر منها بسرعه ولبس ثوبه على طول وطلع ركض للقصر
ويدخل بسرعه لجناح جده ويشوف هيفاء عند راسه وتقرأ عليه ومرتبكه بالمره والممرضه تقول له ان بابا بعد الفجر صار يتنفس بسرعه اكثر
كلم الاسعاف وطلع يكلم ابوه ويأخذ مفتاح سيارته
تم كل شي بسرعه الاسعاف وصل وخدوا ابوهم فيه وطلع معه ولده طلال وفهد وراهم في سيارته ويدق على نواف يجيهم لأنه حس جده تعباان حيل ,,,

اول ما وصلوا للمستشفى ودخلوه غرفة الطوارئ قام الدكتور باللازم بس ما في يده اكثر من كذا ولفظ ابو طلال انفاسه الاخيرة بعد معاناة مع المرض

لاحول ولا قوة الا بالله تم طلال يكررها على طول لحد ما طلع له الدكتور وبلغه بوفاة والده,,, فهد اللي حامل هم جدته وكيف يبلغها الخبر
تحامل على نفسه وصبر والده وطلع من المستشفى
ووصل للقصر بعد فتره وجيزه نزل ومشى وهو مرره حاس بثقل في رجله من الهم وهيفاء تشوفه من المجلس المطل كانت اعصابها على نار ما بغت تكلم فهد تسأله بس هي حاسه جدها تعباان مره ,,
دخل فهد والتفت للمجلس وشاف هيفاء اللي جت يمه وسألته : بشر وش صار على جدي
فهد وبصوت حززززين : جدي مات مات يا هيفاء ,
هيفاء صرخت بصرخه روووع : لالااااا وهي تحط يدها وتغطي وجهها
وقفت في مكانها تصيح مومصدقه ان جدها راح وهي متفائله في يوم يقوم من مرضه ويحكي لهم عن ابوهم وعن جيتهم وكيف قرر يأخذهم ,,اسئله في بالها كثيره وما قدرت تسأل حد وحطت املها في جدها بيصحى يوم وبيقول لها ,,
فهد حزن منها وقرب لها وخذها في حضنه ولمها لصدره وهو يقول : اذكري الله كل نفس ذائقة الموت ,, قعدت تصيح على صدره وهو يمسح على شعرها وحس انه ابوها هنا يواسيها اكثر من انه زوج

طلع فهد معها يبلغ جدته :دخل عليها وشافها تصلي في مصلاها وانتظر عند مجلسها لحد ما تخلص اول ماسلمت وشافته مع هيفاء هالوقت عرفت ان زوجها اللي عانى كثير انتقل الى رحمة الله ,,,,,

بعد اسبوع كامل من العزاء ولبست جدتهم ثياب الحداد قرر طلال وسلطانه يروحون العمره ,,فقررت ريما تروح معهم ,,,

ريما : هيفاء وشرايك تجون معنا انتي وفهد ,,
هيفاء : ما اقدر اترك جدتي بالسرعه هاذي انا معها في البيت ما يصير يا ريما ,,
ريما : من يومك تعرفين للسنع ,,, خلاص اجل اذا رجعنا انا بقعد معها وانتي وفهد تروحون ,, وش رايك ,, يصير خير يا قلبي
هيفاء ما شافت فهد كثير اول ثلاثة ايام العزاء القصر مليان حريم وهو مشغول مع الرجال ثم حست انه ما يبي يجيهم مدري متأثر من جدته
والا ما يبي يشوفها بس من قلبها كانت تشوف انه معذور ,,,

بعد سفر طلال واهله صارت الفيلا فاضيه الا من تواجد فهد فيها في المساء ,,, قعد يشوف التلفزيون وفتح على قناة رياضيه وتابع برنامج فيها

حس بملل رهيب وفكر هو لمتى بيظل كذا يهرب من هيفاء ,, هو خايف انه يحبها والا خايف ان شخصيتها تطغى عليه ولا خايف انها تكون مثل اغلب الحريم همها زوج يدفع وبس ,, فكر وش يبي منها ,, وجلس يفكر وما قدر يتخذ قرار فيها بس ما يدري ليه حس بحزن تجاهها الليله ,, لا يكون فيها شي مريضه وانا مدري ,, سكر التلفزيون وطلع من الغرفة وكلمها
فهد : نمتي ؟؟
هيفاء : لا وش صاير ؟
فهد افتحي الباب ابيك شوي ,,,,,
(( الجزء السادس عشر ))

فتحت هيفاء الباب وهي مو عارفه فهد وش فيه بس حست من نبرة صوته ان فيه شي غريب ,,, رجعت داخل غرفتها وبدلت قميصها
ولبست جلابية حرير بألوان هادئه جدا ,, رفعت شعرها على فوق وما تدري ليه حاولت ان شكلها يكون حلووو ,, وهي في اللمسات الأخيرة دق فهد الباب ودخل بدون ما يأخذ الاذن منها وتحس بهيبته انه صاحب المكان ,,,شافها تنظر له بحيره
فهد : انا عارف انه مو وقته هالكلام بس بس شفت انه مافي داعي تأجيله ,,,
هيفاء : خير صاير شي ,,
فهد : انا ما اقدر اظلمك معي وانتي لك الخيار اذا تبين تكملين معي او تأخذين حريتك ,,
هيفاء مو فاهمه وش يقول فهد هو قصده يبي ينهي زواجهم او حاس بتأنيب الضمير من اللي قاعد يسويه معها ,,
هيفاء : انت تعني بهذا الكلام تبي تطلقني ؟
فهد : شوفي انا كذا وهذه شخصيتي وطباعي راضية تكملين معي ولا انتي حرة ,,
تأثرت هيفاء منه وهي تحسب انه بيقول لها انا ما اقدر اتركك كذا :: اكيد هو يبي يترك القرار لها عشان تتركه وتفكه من الألتزام لجدته وابوه ,, ليش لا هو لو يبيها كان تمسك فيها على الأقل وحاول يتقرب منها ويكسر الحاجز اللي بينهم وواللي كل واحد منهم حط فيه طوبة صغيره
هيفاء : اوكي خلاص عطني فرصة بفكر وارد عليك ,,
طلع فهد وهو مو عارف اللي سواه صح او غلط بس عطاها القرار وهي بكيفها ,
هيفاء بعد ما طلع فهد قعدت على اقرب كرسي وشافت الدنيا كلها بكبرها تافهه ,,خذت نفس ما تبي تصيح على فهد اللي تعلقت فيه من غير ارادة منها ,, قامت تشوف شكلها في المراية ومسكت شعرها وحطت يدها تمررها على ملابسها وتركز في مرايتها
معقول ما عجبك فيني شي يا فهد ,, تنهدت هيفاء بقوه وقعدت على ارضية الغرفة وهي حاسها ايامها في القصر اصبحت محدوده ,,,
لمياء قامت من بدري كالعاده تجهز فطور فيصل وتاخذه معها المستشفى,,
لبست ملابسها بتأنق وحاولت تغير من شكلها كل يوم عشان فيصل يشوف شي جديد ,,
كملت اغراض القهوة والفطور عطتها الشغاله توديها للسياره وطلعت وهي كلها شوق لفيصل ,,,
اول ما وصلت المستشفى ودخلت للغرفه شافت سعود يستناها عشان يطلع للبيت فيصل اللي مستغرق في نومه ما يحس بها يوميا الا لما تصحيه نومه ثقيل شويه ,,
رتبت الغرفه بعد جلسة الشباب البارح وهوتها وعطرتها وجهزت اغراض الفطور على الطاولة وبعدين جهزت ملابس فيصل عشان يأخذ شاور ,,
جت جنبه ومسحت على شعره شوي وهمست في اذنه بكلمات لين شافته يفتح عيونه بثقل
فيصل : صباح الخير يا اغلى من مر بعيوني
لمياء : صباح النور يا عيوني ,,,
احلى يوم عندي وانا اشوفك تصحيني يا قلبي
لمياء وهي تضحك ضحكتها المميزة
فيصل : انا ما قلت لك لاتضحكين ثاني هالضحكة
ولمياء تكمل ضحكتها : قلبي هاذي ضحكتي وشسوي وراح فكر لمياء للبنات في المدرسه وهم يقولون ان احلى شي ضحكتها كنها فيلم ماودهم يخلص ,,
فيصل : كلمي الدكتور يجي يطلعني خلاص انا ما ابي اقعد هنا ثانية وحده
لمياء : قلبي ما بقى لك شي استحمل عاااد
فيصل : مافيني انا مشتاااق لك يا عمري ::::,,,,

قامت هيفاء من فراشها وهي ما ذاقت النوم ابدا بس يالله فهد حطها في موقف ولازم تكون قده ما راح تستحمل اكثر من طاقتها ,, هذا حظها ولازم تستحمله عاااد ,,, دخلت تبدل ملابسها وتستعد ليوم جديد ,,,
لبست بنطلون جينز عادي بقصة مريحه مع فستان قطن قصير رمادي اللون فيه تدرجات باللون الوردي والمشمشي على قصة الكتف مع الصدر ,,
, تعطرت وحطت مكياج ناعم مثل كل يوم وطلعت لجدتها تسلم عليها ,, من بعد العزاء ودخول جدتها فترة العدة حست من واجبها انها
ا تقعد عندها طول اليوم وما تطلع لغرفتها الا بالليل فكان اغلب وقتها في جناح الجده ,,,
مرت ولقت خديجه تكلم المطبخ تطلب منهم تجهيز الفطور ,, كملت طريقها للغرفه ولقت جدتها قد كملت سنتها ولبست ملابسها وتجهزت
نزلوا تحت للمجلس المطل وشافوا فهد جاي يسلم عليهم ,,
فهد: هلا وغلا يأم طلال وشلونك اليوم ,,
ام طلال : الحمدلله بخير يا ولدي ,,
فهد: وانتي يا هيفاء وشلونك,,
هيفاء : طيبه ابشرك ,,,
قامت هيفاء تحط لهم فطور في صحونهم وتسوي لهم شاي بطريقتها المميزة في التقديم وفي اثناء ذلك قالت له ام طلال :
ام طلال : ودي استشيركم في موضوع ::
فهد كله اذان صاغيه وحس ان عندها شي
ام طلال : انا ابي اقعد في المزرعه ابي امشي واطلع اشم الهواء واحس اني هنا مكتومه ,, ابي هيفاء تجي معي وانتم اخر الاسبوع تجون ,, يهمني اشغالكم ما تعطلونها بعد ,,,

فهد : انتي تأمرين أمر :: ابشري ابد متى ما بغيتي نمشي مشينا,,
ام طلال : وشرايك يا هيفاء انتي بعد لازم اعرف رأيك ,,
هيفاء : وين ما وديتي رجلك بتحصليني عندها وانا عندي اغلى منك ,,
قامت ام طلال وهي تأشر لخديجه تجيب القهوة في المجلس ,,وقالت لهيفاء: كملي فطورك مع فهد يا حبيبتي
هيفاء احترام لجدتها توقف معها لكنها اصرت عليها تكمل فطورها ,,,
قعدت في الكرسي وفهد في الكرسي المواجه لها
فهد :: هااا فكرتي ولا لسى ما اتخذتي قرار ,,
هيفاء اللي حست انها تتعامل مع واحد ما يهمها : الا فكرت واتخذت قراري
فهد : وشو ,,
هيفاء : انا بنتظر جدتي تخلص عدتها بعدين ابي اروح لأمي ,,
فهد : يعني تبين حريتك
هيفاء : تقدر تقول كذا ,,,
فهد , اتفقنا ,,, وقام وهو يحط الملعقة بقوه في الصحن ,,,
هيفاء وهي تقول في نفسها عسى ما شر المفروض انك انبسطت انك افتكيت مني اللي يسمعه اني انا اللي ما ابي كنه هو اللي ما يبي ,,,
وراح لجدته في المجلس وهو واقف عند الباب : يمه انا ماشي متى ما عزمتي دقي علي وطلع بسرعه ,,,

طلع فهد رايح للشغل وهو يفكر في كلام هيفاء ,, هي ما تبيني والا كان صارت مثل الحريم اللي يسون المستحيل حق ازواجهم ,,
بكيفها خلها تروح اصلا من يوم خذيتها ما شفت منها يوم زين عناد وراس يابس وبس خله ينفعها,,
كلم نواف عن الشغل وخذ منه موعد للغداء,,

قامت هيفاء لجدتها في المجلس عشان تسولف معها وتقضي عليها الوقت بس بالها مو عنده هنا بالها راح مع فهد ,,,
بعد الظهر جتهم هدى ومشاعل والعنود اللي كثفت زيارتها لأمها شبه يومي عشان تونسها ,, وكانت ايام تجيب بناتها وايام تتركهم على حسب فضاوتهم ,,
هدى : يمه ما قالت لك مريم متى بتوصل ,,
ام طلال : هيفاء متى حجزت عمتك مريم ,,
هيفاء : بعد بكره ان شالله ,,,
مشاعل : مشتاقه لعمتي موووت وعيالها بعد يا بعد عمري ,,,
هيفاء وهي تشوف مشاعل وشلون تتكلم تقول هاذي كلها عاطفه ما تدري انها كلها خبث وكيد ,,
مر عليهم فهد وهما جالسين قامت مشاعل ولبست طرحتها والعنود طلعت على فوق ,,
هدى : معقول فهد يتحصل كله مشغول انت ما تعرف ان لك عمه تجيها ,,
فهد : مشغول حيييل يا عمتي ,, بس ان شالله اعوضك في المستقبل ,,,
هدى : اي اكيد هي كم كلمة تلعب علي وخلاص ,, زين ما قلت لي جبت لعبير الجهاز اللي طلبته منك ,,,
فهد وحس انه توهق قدام هيفاء ,,: اي جبته ارسلته لها ,, مشاعل تتدخل في الحديث
مشاعل : يا عمري ياعبير حاست المحلات كلها تبي تحصل منه نسخه قالوا ما يجي الا بعد ستة شهور ززين طرى عليها تكلمك ,,,
فهد : احنا في الخدمه ,,,
هيفاء وهي تاكل في قلبها من جوووه : يعني تكلمهم وتسلم عليهم ماقلنا شي بعد توصيات وهدايا ,,, اييييييييه يا فهد تهنى بعبير تلوق لك مررره ,,,,
هيفاء اللي سرحت بعيد ما انتبهت ان فهد ركز نظرته عليها ,,
هدى : ما قلتي لي ياهيفاء ,, وش جاب لك فهد في سفرته ذي زي امي والا غير ,,,,
هيفاء اللي ما عندها شي تقوله :: ما يقصر الله يطول عمره ,, حطت لهم اجاابه مبهمة وقامت تشوف خديجه وينها فيه ,,,
وصتها على العشاء وطلعت قسم عمتها مريم تبي تشوف جناحها وش بتقدر تسوي فيه ,, لمياء كانت البارح تنقل اغراضها لفيلتها لأن فيصل بيطلع اليوم,,,
دخلت الجناح وشافت انه يحتاج بعض التغيرات في بعض الاماكن فكلمت الشغالات يجون ومعاهم عدة التنظيف وابتدت معهم ترتيب الغرف ,, مريم عادة اذا جت مع زوجها يقعد معهم في القصر كم يوم ثم يروح لاهله في جده ويقعد معهم كم يوم ثم يسافر او يرجع يأخذها هذا كلام ام طلال لها ,, فحبت انها تهيأ المكان لعمتها وزوجها عشان تأخذ راحتها ,,,
شافت ان لبسها مو مريح للشغل فتركت الشغالات يبتدون ودخلت غرفتها لبست لها بنطلون برمودا ابيض ,, ومعاه توب نص كم ازرق فاتح يريح الاعصاب تبي تهدي اعصابها من فهد ,, ولبست باندانا على شعرها وغيرت جزمتها ولبست صندل خفيف للبيت ,,,
رجعت لقسم عمتها وغيرت كل الشراشف وتركت سرير عمتها بدون غيار وعزمت تطلع الصباح بكره تشتري لها شي جديد وورت الشغالات كيف يغيرون طريقة الجلسه ,, وابتدوا يرتبون القسم وهم يد وحده وتشرف عليهم هيفاء بطريقتها االمميزة ,,,

فهد كمل جلسته مع هدى وام طلال بس باله مع هيفاء اكيد انجرحت من كلام هدى ,, وين راحت يا ترى ,, وش تسوي ,, كله مني ,, المفروض اني جبت لها هدية ,, لكن انا ما نويت اشتري لعبير اي شي هي اللي كلمتني ووصت ,, اقولها لا ,, يبي يدور لنفسه مخرج ما قدر ,, حس ان الغلط راكبه مررره ,,,

قام منهم بعد نصف ساعه يبي يشوفها حس انها غبت عنهم ,,, خذته رجله لفوق وراح لجناحهم فتح الباب يبي يشووف وش تسوي
مالقاها ,,
طلع من الجناح ويشوف جناح عمته مريم فيه صوت وحركه ,, قرب الا الشغاله طالعه من القسم ومعها فازات للورد تبي تنزلها تحت ,,
سألها وين هيفاء ردت عليه ,, مدام هيفاء جوووه ,,

دخل الجناح ويشوف هيفاء وهي مركزه على الشغل وبنشاط تاام وصوت الهوفر في المكان ,,
فهد ويناديها بصوت عالي : هيفاااء
هيفاء شافته وأشرت على الشغاله توقف شغلها ,,
هيفاء : تبي شي ,,
فهد : تبون مساعده اجيب لكم شي قاصركم شي
هيفاء اللي تشوف ماله معنى في عرض مساعدته ,, ليكون يحس بتأنيب الضمير وجاي بيكفر عن غلطه بالمساعده ,,
هيفاء وهي ترتب اللي في يدها: مشكور ما قصرت ,,
فهد : اوكي وطلع من الجناح بينزل تحت ,, شكلها زعلاااااانه ,, ما عطتني فرصة حتى ,,

جتها العنود على الصوت وقعدت تساعدها شوي وبعدين زهقت حست ان الشغل يطفش وما تعودت عليه اصلا ,,
خلصت هيفاء شغلها وطلعت وسكرت الغرفه وهي راضيه عنه تماما وما بقى الا الورد بتجيبه نفس اليوم وتروح بكره السوق تجيب شراشف جديده,,,
طلعت لغرفتها تبي تأخذ شاور على السريع حست انها تركت جدتها اليوم بس مافي يدها شي هدى اليوم موجوده مع بناتها ,,
لبست لها جلابيه ناعمة وحررت شعرها وثبتت غرتها على جبهتها بالمجفف ,, وتبخرت وطلعت حست مافي وقت تحط لمسات من المكياج ,,,
نزلت تحت وقالت لها ام طلال ان لمياء وفيصل وصلوا من شوي وسألوا عنها وراحوا لفيلتهم ,,
هيفاء : زين الحمدلله على سلامة فيصل ما بغى يطلع من المستشفى ,,
ام طلال : اي والله بس يمشي على عكاز يبي له شوي عليه
هيفاء : ما يخالف يمه الوقت بيمشي بسرعه وما راح يحس ,,
ام طلال : صدقتي ,,,

لمياء وهي تساعد فيصل يدخلون الفيلا راحت من طريق المصعد ,, وساعدته انه يدخل الغرفه ويرتاح شوي على الكنبه ,,
فيصل : اخيرا ,, ما بغيت افتك من قعدة المستشفى ,,
لمياء : نورت يا قلبي ,,
مسك فيصل يدها وقعدها جنبه يبي يشبع من شوفة عيونها اللي تعبر عن حبها له,,,
فيصل : عيونك فيها شي ,,
ولمياء وهي تضحك بطريقة حلوووه : وش فيها عيوني
فيصل : كنها بحر وانا غطاس واخاف ان امواج البحر تزيد ولا اقدر اغوص فيه زين ,,
لمياء : وبعد
فيصل وصوته له بحه بحزن : اخاف اغرق ومحد ينقذني ,,
لمياء ابتدت الدموع تتجمع في عينها وتمتلي
فيصل وهو يحب خدها : توعديني ما تزعلين علي ثاني انا بغيت اخسر حياتي عشانك ,, ماهان علي حزنك وزعلك علي ,,
وافكر وش اللي بيرضيك علي ,, لمياء انا مثل الشباب مو معصوم من الخطأ ,, نعم عرفت بنات وشفت بنات ,, بس لما دخلتي حياتي علقتيني بنظره من عيونك ,, حسيت انك اللي بتغيرين حياتي ,, ماصار يجذبوني ابد وعزمت اتركهم ,, بس هي هاذي أخر وحده عرفتها وما عرفت وشلون انهي علاقتي معها ,,
انا بعدك ذيك الليله انهيت كل شي وقطعت معا كل صلة ,,
انتي دنيتي وروحي وقلبي اللي من دخلتيه ما صار ينبض الا بك
ومسك يدها يوم شاف دموعها تنزل اكثر ,, طيب حطي يدك شوفي كيف يدق قلبي وانتي معه ضحكت لمياء على حركته
ومسح دموعها بيده
فيصل : احبك ومستحيل اتركك ,, لمياء اوعديني انك تغفرين لي غلطتي ونبدأ صفحة جديده ,,
لمياء ضمته لها وقعدت تصيح على صدره بهدوء جميل ,,,,

طلعت هدى من القصر هي وبناتها بعد ما غيروا جووو ,, ودخلت هيفاء مع جدتها للجناح تجهز لجدتها فراشها
بعدت ما دخلت ام طلال لفراشها ,, طلعت هيفاء بتروح لغرفتها لقت فهد في المدخل ينتظرها ,,
فهد : وش رايك تروحين معي ,,
هيفاء : وين ,,
فهد نطلع من القصر شوي ناخذ لفه ونشرب عصير مثلا ,, ضايق شوي ونواف ما يقدر يطلع قلت يمكن تبين تطلعين ,,
هيفاء مستغربه منه حيييل اول مره يعرض عليها شي ماحست ان اللي قاله صحيح بس يمكن يبي يسوي لها شي
هيفاء : اوكي مافي مانع , البس عبايتي واجيك ,,
دخلت هيفاء غرفتها وهي تفكر في فهد وطريقته معها مره شد ومره جذب ,,وحست بقلبها يدق بقوه عشان بتروح معه ,, توك وانتي واقفه ما صار لك شي وشفيك الحين ,, مدري والله مدري ,,,
لبست عبايتها وخذت شنطتها معها قبل ما تطلع تعطرت بعطرها المميز ,, وطفت النور وطلعت ,,
لقت فهد ينتظرها في المجلس اللي تحت ,, وطلع معها للسياره ,,
ركبت السياره وهي حاسه نفسها في المكان الغلط والزمن الغلط ,, مو هي قالت لفهد خلاص تبي تروح لأمها عقب كم شهر ,, اجل ليه تعطيه فرصه انه يقرب منها وهي عارفه انهم مو متوافقين ,,
سمعت فهد يسكر باب السياره ويتحرك يطلع من القصر ,,,
مشى شوي ومحد منهم تكلم ,, بعد شوي
فهد : ليه ما اشتغلتي لما خلصتي دراستك ,,
هيفاء : امي كانت رافضة الشغل ما تبي نطلع منطقة بالحالنا والطريق الطويل ,, خايفه علينا ,,
فهد : ما قصرت والله ,,
فهد : احمم طيب وش كنتي تسوين كل يوم ما تزهقين ,,
هيفاء حست انه يجر سالفه يكسر الحاجز اللي بينهم ,,: اكيد بيكون فيه ملل بس حاولت اقضي وقتي في شي مفيد ,,
احلى يوم عندي اذا خذتنا امي المكتبة , يوم رائع ويعيشك جوو حلووو لكم يوم قدام ,,, اشتري لي كتب في التاريخ ,, وكم رواية مترجمة
وكتاب باللغة الانجليزية عشان ما تضعف لغتي الانجليزية
فهد : حلوووو وهو مندهش منها ,,,
وقف عند كافي يجيه دايم وطلب لهم عصير طازج طلبت هيفاء اناناس وهو خذ له ليمون مع النعناع ,,
قعدوا ينتظرون وهيفاء حست انها محرجه منه احساس غريب فعلا معاها ولاهو معاها ,,
شافها سكتت ,, شغل السي دي لابوعبده وتركه يتكلم عنهم ,,,

(( ابا اعترف ,,, للدنيا ولكل العيون ابا اعترف ,,, اني قبل ما احبها ,,, ما اعرف ولا ادري من انا ,,, ومنهو اكون ,,, ابا اعترف,,
اني لقيت بحبها شي مختلف ,, ابا اعترف اني اموت في حبها ,,,,ابا اعترف اني بدون عيونها اضيع في شرق الحياة وغربها,,
,, احسها اقرب لي من حبل الوريد ,,, مهما اكون بعيد والا قربها ,,,,,,,,,,

هيفاء وهي ماسكه العصير بين يديها وحست ببرودته من كثر ما تاثرت بكلمات الاغنية وحست بأحراجها من فهد اللي ما تكلم نهائي وهم راجعين في الطريق شافت انها ما تقدر حتى تشكره ,, محرجه منه ,, بس لازم تمسك نفسها وتبعد الخجل منها ,,
فهد اللي ترك عصيره في السياره ما شرب منه شي ,, اول ما وصلوا للقصر
هيفاء : ما شربت عصيرك ,,
فهد : وانتي بعد ما شربتي عصيرك
هيفاء : ودي اشكرك من قلبي احس اني فعلا غيرت جووو ,,
فهد : خلاص اذا تمللتي قولي لي وانا باخذك :: ,,
هيفاء نزلت من السياره سكرت الباب بغت تمشي بعدين وقفت ,, تصبح على خير ولفت تدخل وهي تسمعه وانتي من هل الخير
دخلت هيفاء من المدخل اللي انواره طافيه ولفت تبي تشوفه للحين واقف والا مشى بس شافته يمشي تجاه فيلتهم ,,
طلعت على الدرج ودموعها تنزل على خدها بهدوء شديد ,,,,

(( الجزء السابع عشر ))

من الصباح الباكر قامت هيفاء وهي متصالحه مع نفسها نوعا ما ,,, وشافت انها لازم تقوم بواجبها تجاه عايلتها باللي تشوف انه في مقدرتها ,,,
اما فهد فأمره محسوم ,, راح تعامله بنفس طريقته ,, هذا اللي عندها حاليا ,,
قامت وشافت نفسها في المرايه وما حبته ابد مع انه ما فيه الا العافيه بس قررت شي ,,لبست تنوره بلون الكاكي وبلوزه افتح بدرجه ,,,
وماحطت مكياج ابدا ,, رفعت شعرها بس ,, وخذت عبايتها ونزلت تحت بعد ما قالت لخديجه انها تقول لجدتها انها بتطلع عندها شغل وما راح تتأخر ,,,
كلمت لمياء وسألتها اذا تقدر تروح معها ,,,لمياء اللي ما قدرت تقوم من سريرها ,, طلبت منها انها تأجل الطلعه للعصر بس هيفاء قالت لها بفكر كملي نومك يالدبه ,,,
نزلت هيفاء وخذت مع شغاله وطلعت للسوق ,,, دورت مفرش فخم لعمتها وحصلت شي يعجبها جدا وخذته بدون تدد ,,,طلعت لمحل العطور وخذت لها هي وريما ولمياء كم عطر ,,, تحب انها تشتري لهم اذا طلعت لو شي رمزي بس تذكرهم بشي ,,,
بعدين كلمت الكوافيره وقالت لها انها بالطريق ,,,
دخلت المشغل وهي شوي متفائله انها راح تغير في شكلها شوي ,,,
ما حبت تقص شعرها بس حاولت المزينه انها تدرج لها خفيف وتتركه لطوله لنص الظهر وبسبب كثافته عطاها التدريج شكل جناااان ,,,
قصت الغره اكثر مدرجه بس بشكل روووعه ,,, سوت لها كم شغلة عناية عندهم وحست انها فريش تمام ,,,
طلعت من الكوافير على القصر ,,وهي في الطريق ,, طرى عليها تروح المكتبة من زماااان عنها ,,,
غيرت طريقها وقالت للسواق يتوجه للمكتبة المفضلة لها ,,,
ولما دخلت شافت الأشياء المفضلة لها وقعدت تدور بينها ما تحس انه ملائم لها ,,,
شافت ضالتها في كذا كتاب وعجبها كتاب جديد عن ادارة الأعمال مترجم للغة العربيه وحاصل على اكثر الكتب مبيعا ,,, فخذته لفهد ,,,
ترددت اول الأمر بس تالي قررت تعطيه اياه ,,,
اول ما رجعت للقصر خذت الشغاله الأغراض لغرفتها وهي طلعت لجدتها اللي قاعده تشوف التلفزيون ,,,
ام طلال : حيا الله غزالتنا وين رحتي ,,
هيفاء : ابد حبيت استغل الوقت فطلعت للسوق اخذ بعض المشتريات ,,, لا يكون تأخرت عليك
ام طلال : ابد سلامتك ماعلي خلاف ,, وش رايك عندي لك اقتراح,,
هيفاء : انتي تأمرين وش عندك ::
ام طلال : تكلمين امك لطيفه تجي عندنا وتطلع معنا المزرعه ,,, هناك مابه غثاء ولا زحمة عالم وبيزين لها الجوو ,,ودي توسع صدرها عندنا ونتونس بها ,,
هيفاء : الله فكررره يمه خلاص بدق عليها بس انتي متى تبين تروحين ,,
ام طلال : اللي يريحكم اذا بتروح معنا ,, خلاص من تجي نروح على طول ,,,
هيفاء : خلاص بدق عليها وبشوف ... طلعت هيفاء من عند امها لغرفتها تبي تريح وتصلي وتكلم امها ,,,
اول ما دخلت الغرفة حست ان فيه حد دخلها عقبها ,, بس ما لفت انتباهها شي اول ما وقفت عند التسريحه ,, شافت ظرف ,,
تفاجأت منه بس توكلت على الله وفتحته ,,,
حصلت بطاقة بنك وجواز سفر ومبلغ مسحوب مو بسيط ,, ومعاها ورقه ::
(( هاذي بطاقتك حقت البنك ورقمها ****وجواز سفر ومبلغ للاستعمال الشخصي ,, واسف على التأخير ,,,
تذكرت ان فهد اول ما وصلوا بلغهم انه يبي صور لها هي ولمياء عشان اوراق لهم بس نست الأمر تماما ,,,
فتحت كيس الكتب ,,ومادرت وش تسوي بكتاب فهد هل تعطيه اياه ,, والا تحطه بمكان في غرفته وقعدت فتره تفكر وبعدين خذت لها قلم وفتحت اول صفحه ,,وكتبت
فهد (( كتاب نال استحساني واحببت ان اهديك طبعة منه ,,))
هيفاء
تاريخ 28,, 11, .....

هيفاء ما شافت لمياء من امس واستغربت منها كل هالوقت انها في فيلتها ,,
دقت عليها
هيفاء : مساء الخير ,, وش عندك ما تجينا
لمياء : مساء الخير يا قلبي ,, وصوتها للحين نايمه ,,معليش هيفاء اذا صحصحت بدق ثاني مافيني احكي الحين حسبت شي مهم
هيفاء : كل هذا نوووم :: ما تستحين انتي ماخذتها رقده ,, قومي عاااد وش خرب برنامجك ,,,
لمياء : وهي تضحك لها بقولك بعدين يالله وسكرت الجوال وما عطت هيفاء فرصه ,,,

مر الوقت بسرعه ,,,حبت تعطي نفسها اهتمام اكثر ,, فخذت حالها وسوت لها شاور يليق بها قعدت فيه ساعه ,,, طلعت وهي مجهزه ملابسها ,,, حطت لها بنطلزن جينز ,, مع قميص للخصر حرير من عند الخصر فيه استيك صغير ,,, معطي جسمها شكل روووعه
وحركت شعرها بالمجفف ,, وخذت غرتها وسوت لها رولات شوي تبي تعطيها شكل حلووو ثم فكتها ,,, وأثرت انها ما تحط مكياج الحين لحد ما يمر على جدها شويه ,,
خلصت ثم خذت الكتاب وراحت جناح جدتها ,,, حطته على الطاوله اكيد فهد بيجي وبيشوفه وبيأخذه مافي طريقه الأكذا ,,,
دخلت على جدتها في الغرفه ,, سلمت عليها وسالتها كلمتي لطيفه ,,
هيفاء : اي ابشرك وبتجي هاليومين ,,
ام طلال : عسى والله الله يحيها ,,,
ام طلال : وين لمياء ما شفناها من امس ,,كلميها تجي تتعشا معنا ,,
وهما في كلامهم دخلت عليهم لمياء وهي لابسه شرشف على راسها ,,
لمياء : السلام عليكم,,
ام طلال : وعليكم السلام ما بغيتي سافرتي مكان واحنا مادرينا ,,
لمياء وهي تضحك : يا حبي لك يمه يا ليت اسافر ودي كان تسمحين لنا ,,
ام طلال : هو هو هذا الناقص ,, اعقلي يا بنت لا تهبلين بالرجل ,,
هيفاء : يمه صدقتيها مزوح كلها تبي تشوفك وش تقولين ,,,
ام طلال : اشوى ..
لمياء تأخذ بيد جدتها ,, يمه تعالي فيصل فيه يبي يسلم عليك ,,
ام طلال ,, يالله حيه ,,وينه ,,
وطلعت ام طلال للجناح ولمياء قعدت مع هيفاء ,,
هيفاء : انتي ما تستحين يومين ما شفناك ,,
لمياء وهي تضحك : اعذروني ياناااس زوجي طالع من المستشفى وش اسوي ,,,
هيفاء : لا تاكلني طيب ,, قومي روحي جيبي القهوة لزوجك ,, الزواج مو بس غرفة نوم ,, تسنعي وصيري لهلوبة ,,
قامت لمياء وحبتها في خدها وطلعت تجيب القهوة لفيصل ,,,

ام طلال وهي ماسكه يد فيصل في يدها وتسولف معه بحنان رائع ,,
ام طلال :هاذي اخباري كلها ,,
فيصل : اجل عزمتي تروين المزرعة ,,
ام طلال : ان شالله ,,,
فيصل : خلاص بجي معك انا ولمياء ,,,
ام طلال : اللي تشوفونه ,, بس ودي تنتظر ابوك لين يجي من العمرة ,,,
حطت لمياء القهوة قدامهم وصارت تصب عليهم القهوة ,,وفيصل يسوي لها حركات بعيونه اذا التفتت جدته ,, وهي فطست ضحك ,,
مشكلتها ما تقدر تمسك ضحكتها
ام طلال : اسم الله عليك وش صاير ,,
ولمياء مهي قادره ترد على جدتها قامت ,, تشوف لمياء وتهرب من فيصل اللي سكرمن طريقتها
ام طلال وهي تلتفت له حب خشمها وقال لها تسمح له عنده شباب في المجلس ,,,

نادت على البنات بعد ما طلع فيصل وجتها هيفاء اول ,, قالت لها ام طلال : جيبي نوتة التليفون ابي تدقين لي على ام وليد كلمت الصبح خديجه وانا للحين ما قمت ونسيت منها ,,,
هيفاء وهي تدور نوتة التليفونات ومشغوله تطلعها جاهم فهد وسلم على جدته
وجت يمهم هيفاء: مساء الخير
فهد منبهر بشكلها : مساء النور ,,
فهد وهو سرحان فيها ,, بنت متجدده على طول وحيويه بكل معنى الكلمة ,,,
عطته القهوة وجاء بيمد يده يأخذ التمر شاف الكتاب على الطاولة ,,, خذه وقلبه على غلافه الأخير يبي يشوف سيرة الكاتب ,, استغرب انه ما شرى هالكتاب ,, طيب وش جابه هنا ,, هل يمكن ان احد ارسله ,,
هيفاء واقفه متأمله الموقف جاز لها الوضع وحست انها بتفاجئه ,,,
فتح على اول صفحه يبي يقرأ فيها شي ,,
وحصل الأهداء ,, !!!!!!!
رفع عينه عليها ::,, مشكوره ما قصرتي ,, وخذه معه واستئذن منهم عشان لمياء تأخذ راحتها ,,
لمياء انشغلت منهم تكلم ريما وتعطيهم الأخبار وانهم بيجون بعد يومين ,,,خذت علوم العمرة كلها وحست ان عندها شي بتسولف على جدتها ,,,,

طلعوا للعشاء المجهز عشانهم ,,,
لمياء : لو على كيفي ابي اروح انا وفيصل نتعشى برى ,,,
هيفاء : لمياء اسم الله عليك وش فيك استخبلتي مره وحده ,,, ما تشوفينا قدامك انا وامي وتبين تتركينا ,,,
ام طلال : يمك اتركيها بعض البنات اذا تزوجوا يجيهم هبال ,,
لمياء : الله يسامحك يمه كذا تقولين عني وانا اظن انك تشوفيني غير ,,
ام طلال وهي تضحك : والله انتي غير لين البارح وكاد فيصل ما اسقاك شي ,, يمكن حط لك في موية شي يبيك تتولعين فيه ,,,
لمياء :اي يمه حط لي (( السحر الحلال )) حبه يمه حبه ,,
ام طلال : الله لا يفرقكم يا بنتي ويرزقكم كلكم الذرية الصالحة انتي واخيتتس,,,,
هيفاء حست بهدوء في بالها ,, وحبت انها ما يبين عليها اي ملامح غريبه تنبئ عن مشاعرها ,,
مشاعرها اصبحت واضحة لها جدا بس آثرت كتمانها ودفنها في اعماقها ,,,,

طلع منهم فهد وراح لغرفته ,,, وقلب الكتاب بين ايديه ما اهتم له ككتاب ,, كثر ما اهتم انها فكرت وشرت وجابت وكتبت كله عشانه فقط ,,,وشكثر انتي ذووق يا هيفاء ,, بس ليه تهديني وانتي عزمتي تتركيني ,, احتار منها بقوووه بس تركها للظروف وراح يعرف ,,,,

من بدري القصر فيه استعدادت عشان وصول مريم ,, حركة دؤوب ونشاط مميز كله من مدام هيفاء مثل ما ينادونها ,, خديجه وهي تكلم ام طلال : ما شالله عليها هيفاء الله يحرسها من العين :: الشغالات يقولون : هاذي بنت صغيره بس عقلها كبير ,,,
ام طلال : كفانا الله شرهم ,,,وكل شي مدققين فيه

جهزت هيفاء قسم عمتها وعطرته بأجمل الروائح العطرية شرقية وغربية ,, وزينته بالورد ,, اكيد عمتها بتجي نفسها حزينه على والدها بس لازم يكون فيه شي يساعدها على الاسترخاء والفرح ولو بسيط ,,,,

لبست هيفاء فستان ناعم وجت عنده لمياء تساعدها في الترتيبات الاخيره وهي لابسه فستان قطن مع بنطلون جينز ,,, وطلعوا لجدتهم ينتظرون مريم ,,,

وصلت للقصر مع اذان الظهر هي وزوجها وعيالها والحزن ماليها عشان ابوها حتى لو كبير ما تقدر تمنع نفسها يوم شافت مكانه ومجلسه انها تبكي من كل قلبها ,,,
بعد العشاء وهم جالسين عند جدتهم مريم قالت لهم انها تبي تطلع مع زوجها جده بكره تسلم على اهله وتأخذ عمرها لأبوها وترجع ,,,
هيفاء : ما شالله يا عمتي حلوووه الفكره هذا اقل شي الواحد يسويه لوالدينه,,,
مريم : بس انا بغيت اترك العيال معك هنا وش رايك ,,,
هيفاء : عمتي انتي تأمرين امررر ,,,
مريم : تسلمين ياالغاليه ,,,

مر اليوم سريع لأن ساعات الفرح تمضي بدون ما نحس بها واذا مرت قلنا الوقت مر بسرعه ,
في صباح اليوم الثاني من وصول مريم ,, وهما عند جدتهم في المجلس المطل على الحديقه هيفاء كانت مشغوله في ترتيب اغراضهم للمزرعه ,, امها لطيفه كلمتها وقالت لها بتوصلهم بكره ,, وهما بعد وصولها بيمشون على طول عمتها مريم بتطلع بالليل مع زوجها لجده ,,
نزلت لهم هيفاء عشان تشاركهم الجلسه ,,, وووصلت بعدها هدى ومشاعل بس جايبين معهم عبير ,, انصدمت هيفاء من شوفتها معهم ,, اكيد هالحيه ما ارح تتركني لحالي ,,,

صافحتهم هيفاء كالعاده وسلمت على عمتها بس ,, وعبير مهي تشوف حد بشي كنها الآمرة الناهية ,,,\
اول ما جلسوا وحطوا لهم الشاي ,,,
مشاعل : وش اخبارك ياعمتي اشتقنا لك كثييير ولعيالك مرررره ,,
عبير : اي والله مشتااقين مرره حتى فهد يقول لي ودي بالعيال اشتقت لحركاتهم في البيت ,,
هدى : يا عمري يا فهد الله يرزقه بالعيال !!!
ام طلال : وكاد الكلام ذا كله منكم والا فهد ما يعطي خبره للحريم ,,,
هيفاء وهي متفرج عليهم صدق نذاااله عجيبه فيهم ويا قواة عينهم بعد ,,,,
لمياء كانت تطبخ على نااار ,, يعني هما ما تركوا سوالفهم الشينه بعد بيتدخلون بين الرجال وحرمته واللي يسمع مشاعل وهي معهم يقولون اخته ,,
لمياء قامت وهي تكلم جدتها : يمه وش عليكم منهم هما عارفين ان فهد بيمووووت في هيفاء وقاهرهم هالشي ,,,
صار توتر بين افراد الجلسه كلهم وهيفاء اللي ما تبي تسكت لهم عشان ما يحسون انها ضعيفه ,,,
هيفاء : اتمنى انكم مره ثانية اذا جيتوا للقصر تحترمون حالكم وخصوصياتنا مالكم شغل فيها ,,, ترى حكيكم ساااامج مررره ماله طعم كله غيره ,,,

تفاجأت هدى من رد هيفاء ..,, شكلها بعد من ضمن اللي وجه لهم تهديد ,,,
وطلعت هيفاء لغرفتها تبي تفتك منهم ,,, جت بترفع السماعه على فهد تهزئه شوي وتوريه قدر الخبلان هذول بس لا هووو ما يستاهل اللي يكلمه
ام طلال طلعت لغرفتها ومعها لمياء : جيبي لي الجوال وهي تأشر على لمياء,,,
كلمت فهد : انت ما يجي منك الا المغثه تغثني بعبير وطقتها ويحكون في هيفاء والله لوما تأدبهم ما يحصل خير
فهد : يمه هم وش قايلين ,,
ام طلال : يقولون انك تبي العيال ومتشفق عليهم ,,
فهد : طيب وش فيه هذا يزعل ::
ام طلال : انت قايل لهم شي
فهد لا بس سوالف ,,,

فهد عرف انه صاير شي مع هيفاء راح للباب الجانبي بسرعه يبي يطلع محد درى فيه ,,,ودق عليها الباب وهي قاعده تصيح بصوت مخنووق حزنت على حالها ,,, حتى العيال حكوا فيهم ,,,
دخل واول ما شافته تحول حزنها غضب ,,,
هيفاء : اقولك شي انت ما تستاهل حد يقعد معاك ...
فهد : ومن جابرك تقعدين براحتك قاعده محد غصبك ,,,,
هيفاء : محد جبرني اقعد بكيفي وبروح بكيفي ,,, بس ترى العلل اللي تحت يناسبون شخصيتك مرررره,,,
فهد : والله عاااد مو شغلك اخذ منهم والا من غيرهم اطلعي منها احسن ,,,
فهد وما توقع انه يكلمها بالطريقه هاذي بس هي اللي حدته تكلمه كنها تكلم بزر ,,,

فهد؛: انا كان في بالي اشياء الحين تروح كلها عشان كلمه منها ,,,

مر ذاك اليوم على هيفاء كئيب وخصوصا ان مريم غادرت مع زوجها وتركت عيالها عندها ,,,,,
حست هيفاء بالمسئوليه تكبر بعد مغادرة مريم بس هي قدها وقدود ,,,,
((( الجزء الثامن عشر ))


وصلوا المزرعة قبل الظهر ,, خذهم فهد بعد وصول امهم لطيفة بفتره بسيطه ,, اما فيصل ولمياء ظلوا في البيت لحد ما يوصل طلال وسلطانه ...
وطلعوا عيال مريم معهم في نفس السيارة ,,,
وسيارة ثانية فيها اغراضهم حق المزرعة ,, هيفاء ما تركت شي ما خذته,,,ملابس كثيره عشان ما يستدعي انها توصي حد يجيب لهم وبعض المفارش ,,, وبعض اغراض الاكل مثل البهارات وغيرها ,,, مو جنب سوق فما بغت كل مره يطلبون من المحطات القريبه شي,,,,
دخلوا الفيلا وجلسوا الحريم في المجلس ودخلوا الشغالات المطبخ يحضرون القهوة وشي خفيف للعصر ,,,
وطلعت هيفاء مع العيال فوق غرفة فهد عطت الشغالات شنطته هالمره صغيره شكله ما يبي يقعد عندهم ,,,(( احسن يفكني منه )))
هيفاءهالمره شايله في قلبها,, ماحست انها تبي تشوفه او تقعد معه,, مالها خلق له بالمره ,,,,
ثم حطت مروان في غرفة ,, وأخر شي دخلوا شنطها هي والبنات مع بعض ,,,
تكلمت مع البنات انهم بينامون معاها لين تجي امهم ضي ورهف طايرين من الفرح انهم بيكونون معها على طول ,,,
دخلت الغرفه ورتبت ملابسهم اول في الدولاب وعطتهم فوط عشان كل وحده تأخذ شاور بعدين تنتظرها لحد ما تشوف وش بيسوون ,,,
خلصت ترتيابتها بعد ساعه ,,, وجهزت ملابسها لبست قميص فضفاض لحد نص الفخذ وبعدين لبست تحته بنطلون سكيني ومعاه صندل باليرينا مريح ,,, رتبت شعرها وربطت عليه باندانا وطلعت بس غرتها ,,,
نزلت هي والبنات تحت عند الحريم وهي تتمنى ما تشوف فهد بالمره ,, دايم اذا تجهزت تحسب حساب انه بيشوفها وحبت تترك عنده اثر في شوفتها ,,, بس هالمره مو مستغربه من شعورها ابد تجاهه لأنها تشوف انه ما انصفها ابد ,,,
كانوا الحريم يسولفون عن بعض السوالف القديمه اللي مرت بهم وش كانوا يسوون ,,, وانظمت لهم لعلها تستفيد من خبرتهم ,,,
رهف وضي طلعوا يشوفون الخيول كان فهد عندها قالوا لهيفاء تجي معهم بس هي رفضت
هيفاء : انا بقعد هنا عند جدتي وأمي يمكن يحتاجون شي ,, تبي تصرفهم ,,,
ام طلال : والله اني مبسوطه بخوتك يا لطيفه ,,, لازم تقعدين معنا دوووم وش تبين في ذاك بالحالك ,,
لطيفه : وانا بعد يا قلبي ودي اشوفكم بس ديرتي ومكاني تعودت عليه,,,
هيفاء وهي ساكته ما تبي امها ترضخ لجدتها لأنها عطت فهد رأيها انها اذا خلصت الجده العده بتروح لأمها في الديرة ,, وما تبي تغير رأيها ,,,

فهد حاول انه ما يدخل البيت اول حاجه يبي امهم تأخذ راحتها ,,,
وثاني شي عارف وحاس بهيفاء انها تتحاشاه ,,, خلاص فليش يقعد عندهم ,,, كذا زين ,,
جاته رهف وضي وانبسط عليهم اللي سالوه اسئله ما تخطر على باله ,,, كأسئلة الأطفال عاده ,,
وش اسم الفرس ذي ,, هيفاء عندها فرس والا لا ,, وش تاكل الخيل ,,, متى اول مره شفت خيل ,,, وقعد معهم ساعه وهو يدور بهم في الاصطبل ويوريهم كل شي ويعطيهم نبذه عنها ,,,


لمياء وفيصل كملوا يومهم في القصر ومو حابين يطلعون مكان ,, طول اليوم في البيت وبعد الساعه 9 يجون الشباب عند فيصل في المجلس وسهر لمنتصف الليل ,,, كانت لمياء تقضيها في القراءة والا تشوف برنامج زين علىالتلفزيون ,,,
تحس بملل بس اهم شي سعادة فيصل ,, كلما وسوس لها الشيطان تتذكر هاذيك الليلة ,, تحس بغصها في قلبها ,, بس هي وعدت فيصل انها ما تزعل عليه ,, لمياء تفكر في نفسها انها تحب فيصل فعلا وهذا الشي اللي شفع له انها تغفر له والحادث اللي صار له كلها اسباب خلتها تغفر له اللي صار :: لكن اذا تذكرت انه كان في حياته احد تحس بمعاناه في قلبها ,, لكنها تحاول تغلب عقلها على قلبها :::

قاعده وهي لابسه لها فستان شيفون مع حرير طويل ومسرحه شعرها على طوله ومنزله غرتها على جنب حبت تغير من شكلها ,,, وترتبت وشافت ما عندها شي فدقت على ريما تبي تشوف اخبارها ,,,
لمياء : هلا ريووم وينكم مالكم حس
ريما : اكليني بقشوري ,,, خير وسيلة للدفاع الهجوم ,, وينك انتي يالدبه غاطسه في بيتك وش دعوا ما كلمتيني امس ؟
لمياء : والله مشغوله مع فيصل كلش يبي ارتبه له وش اسوي اعذريني
ريما : قبلنا عذرك .. وش اخباركم ..
عطتها لمياء الموجز وقالت لها التفاصيل بكره اذا جيتوا نسولف اكثر :: ما كانت تبي تقول لها عن موقف هيفاء مع البنات ما تبي تغثها وهم في العمرة

سكرت من ريما وقعدت طفشانه تفر التلفزيون لحد ما جاء فيصل متأخر ,,
لمياء : ما بغيت تجي والله ملل ,,
فيصل : يا بعد عمري انتي عارفه الشباب جلستهم تتأخر ,,
لمياء : هو لو جدتي وهيفاء والا ريما هنا كان اهون ,, بس احسهم تركوني بالحالي ,,,
فيصل : افاااااا وانا وين رحت ,,,
وجلس جنبها ,,, تبين نروح لهم بكره خلينا السواق يودينا وش رايك ,,
لمياء ما تبي تطلع من البيت لين خالتها سلطانه : لا يا قلبي اذا جت خالتي طلعنا انا واياك ,,,
خذ لها فتره وهو يشوف عيونها ,,, وحس لها بحنين قوي ,, مسك يدها وحبها ،،، انا ما اقدر اعيش بدونك,,,,
لمياء مستسلمة لعيونه ,, ولمشاعره الفياضة,,,


في المزرعة والجميع دخلوا غرفهم الا فهد اللي من جووا للمزرعة وهو في المجلس او الخيمة ما دخل داخل ,, كله منه هو اللي جابه لنفسه ,,,
في آخر الليل وبعد ما طفش من التلفزيون في الخيمة راح داخل في الفيلا ,, وطلع لغرفته وحصلها مظلمه استغرب جدا لاتكون مهي غرفته ,, فتح النور وحصل شنطته في وسط الغرفة ,,, ومسكره محد رتب ملابسه ,,
استغرب وين هيفاء وين االعيال محد له صوت ,,, طلع من الغرفة ,,, وشاف الغرف المجاورة وفتح وحده وحصل مروان نايم بالحاله ,,,
وما شاف البنات فعرف انهم مع هيفاء اكيد,,,

رجع لغرفته وهو يجر خطواته بثقل ,,,

من الصباح بدري جدا وغلى غير عادتها بس من الهواء النقي في المزرعة قامت هيفاء وتسحبت من السرير وهي ما تبي البنات يحسون فيها ,,,
لبست ملابس رياضه وطلعت تبي تشم هواء شوي في حديقة الفيلا المحيطه ,, طلعت برى وما شافت اي احد اكيد انهم نايمين فكملت مشيها ,, مرت على الأصطبل فدخلت فيه تبي تشوف الخيول وتبي تدقق في المكان اكثر ,,قربت من وحده من الخيول وقعدت تمسح على راسها وعنقها ومستغرقة في جمالها ومركزه فيها وبس ما سمعت حركة غير طبيعية في المكان ,,,
فهد : صباح الخير ,,
هيفاء وهي تفز وتصرخ بسم الله ,,
فهد جاء جنبها ما توقعت حركته نهائي
فهد وهو يمسك يدها ,, ما قصدت ارووعك انا اسف خضيتك ,,
هيفاء : اوكي خلاص مافي مشكله وهي تصد بوجهها الجهة الثانية ,,,ومعصبه بقوه
فهد عارف انها زعلانه ,, هيفاء وش رايك بالخيول
هيفاء :: لا باس خصوصا وانا قليلة خبرة فيها,,
فهد : طيب تقبلين مني الحصان هذا اللي انتي عنده ,,
هيفاء وهي ماعرفت تحكي كملت صدها ::
فهد شاف صدها فطلع من الأصطبل ,,,,
حس ان حركة هيفاء متعمده انها ما تشوف ناحيته ,,,

طلع فهد وهيفاء بعد الموقف قلبها يرقع بقوووه ,,يا ترى وش جايه ,,,,
اول ما طلع وحست انه مو في الحديقه طلعت على طول للفيلا ,,,
بسرعه دخلت وهي تفكر في اللي صار ,,,,,جلست تعنف حالها ,,,,, اصلا هو متعمد لها الشي ,,,,
راحت مجلس الحريم وتنتظرهم لحد ما يصحون ,,,,, اول الحضور ام طلال ,,هيفاء غارقة بفكرها
معاهم في الجسم والا الروح تسبح في فضاء قريب لها ,,,
دخل عليهم فهد وهما قاعدين يتقهون الصباح,,, وام طلال ترحب فيه من كل قلبها
فهد يمه انا راجع تبون شي والا محتاجين اي شي
ام طلال : سلامتك يا ولدي مابه شي ,,,
طالع هيفاء : تعالي وصلني يا هيفاء
انحرجت هيفاء منه مررره ومن حركته الحين هي مليان قلبها عتب عليه وقهر منه ,,, يسوي قدام امها انه مافي مثله ليش ,,,
طلعت معه عند المدخل ,,,
فهد : انا عارف انك ما تبين تشوفين وجهي مو غبي ,,
هيفاء ما ردت عليه ,,,
فهد يكمل : ابيك تهتمين في جدتي زين وانا عارف انك مو مقصره ,,, وابي اذا احتجتوا اي شي تكلميني ,,,لا تتردين ,,
فيصل كلم البارح بالليل ويقول انه بيوصل بكره ,,,
فهد: اممممم انا عارف انك متضايقه من اللي صار::,,, صحيح انك موقفتهم عند حدهم حسب ما سمعت ,,, لكن ابيك تعرفين شي واحد
انا ماحكيت مع اي وحده نهائي ,, انا قلت لأمي اني سولفت بس ابي اشوف هما وش قالوا ,,,
هيفاء ساكته ما ردت عليه ,,
فهد : براحتك ,,, فمان الله ,, وطلع لسيارته بدون ما يلتفت لها ,,, وحست انه يبي يقول اشياء كثيره بس هي ما عطته اي فرصه انه يعبر مما في خااطره ,,,,
تحركت سيارة فهد برى المزرعة ومسك الخط السريع وهو في باله هيفاء ,,, جامده ,,, جيتها وتأسفت منها وبعد خاطرها مو مبسوط,,,
اللي عليك سويته عشان تفهم الموقف صح وبكيفها ,,,,

رجعت هيفاء داخل وطلعت فوق ما مرت على الحريم ودخلت غرفة فهد ما بغت البنات يشوفونها ,,, وقعدت تفكر في نفسها ,,, ليه ما رديتي عليه ,, ليه تركتيه يروح وانتي في خاطرك كلام كثير ,,,
وش فيه فهد ,, الصبح يهديك فرس والحين يتاسف على اللي صار ,, بس انا في قلبي شي كاااايد ,, مدري كيف بيروح ,,,,

حست بكآبة الدنيا ,, حست بأعتذاره وبعدم قبولها له وان فهد اكيد بيكون فكره عنها انها هي السبب في كل اللي يحصل بينهم من عنادها
طيب وش المهم خله يفكر باللي يبي انا كم شهر وبروح مع امي هذا اذا ما رحت قبل كذا ,,,,
هو ترك لي حرية القرار وانا اخترت حريتي وما تمسك فيني ,,, اوش يبي اطيح عند رجله عشان كم كلمة اعتذار ونسى اللي راح كله ,,
لا يا فهد ,,,

نامت ليله كئيبة جدا ما حست بالنوم عيونها مغمضة وفكرها شغال في فهد اللي مستحوذعليه كله ,,, اكيد فكر اني ما عندي اي مشاعر ,,,

قامت على اصوات البنات في الغرفه وهي مصدعة وتحس راسها بينفجر من التفكير ,,
رهف : يالله هيفاء قومي نروح نفطر ,,,
هيفاء شافت الوقت قرب الظهر وقامت مستعجله بدون ما تحس ,,, ما تتذكر الا انها قعدت في الغرفة قريب اليوم من امس وهي فيها وتركت جدتها وامها اللي حسوا انها تعبانه من الايام اللي راحت وترتيب الأشياء فبغوا يتركونها على راحتها ,,,
الظاهر ان فهد اشغلها بقوووه لدرجة انها ما حست بالوقت نهائي ,,,,

قامت لبست جلابيه خفيفه ونزلت بسرعه مع البنات تحت ,,, حصلت ام طلال وامها قاعدين في المجلس ويسولفون مع بعض ولا هما حاسين بها اصلا انها تأخرت ,,,
ارتاحت من هالشي وادخلت هي والبنات المطبخ ياكلون لهم شي ,,,
حطت لهم الشغاله اشياء خفيفه على حسب طلبهم ,,, وخذت الشاي تشربه ويدها تقلب في الجوال ,, يمكن فهد ارسل شي ,,,
ما حصلت مبتغاها ,,, وقعدت تفكر في الموقف اللمرة الالف ,,,
يووووووه يا هيفاء انتي وش تبين ,,, تحبينه ؟؟ طيب ليه تبين تتركينه عشان بنت ما تسوى وانتي عارفه لو يبيها كان خذها من زمان ,,,
ما تحبينه ,,, هذا هو عطاك حريتك ,, حددي موقفك ,, ومشاعرك ,, لا تكونين سلبيه ,,
بس انا ما ابي ارجع في قراري ,, خلاص انا قلت له ,, وش بيفكر اني متقلبه كل يوم راي ,,,
مو مهم طيب ,,, انتي وش تحسين به تجاهه ,,, اووووووف وقامت من فطورها لأنها حست انها دخلت داومة فكر مرة ثانية ,,,

كلمت لمياء تبي تشوف وش اخبارهم ,, وقالت لها لمياء على المساء بيكونون عندهم ,,, ويمكن ريما تجي معهم ,,, فرحت هيفاء وحست انهم اذا جووا راح يشغلون تفكيرها بسوالفهم واشياء ثانية ,,,,

(( الجزء التاسع عشر ))

راح فهد وترك هيفاء في حيره من نفسها ,,ماحست براحه انه رجع للقصر مثل ماتمنت هالشي اول ما وصلت ,,,بالعكس حست انها في مركب وممكن تغرق بالحالها ,,ودها انه موجود الحين يمكن يرجع يكلمها وتقوله كل شي حتى هي ما عندها شي تكسبه اصلا زواجها بينتهي بينتهي فأحسن لي اقوله عن كل مواقفه معي ,, ثم يرجع صدى في نفسها ,, وش استفدتي انك صارحتيه بيتصلح شي بترضون على بعض ولا انتي في طريق وهو في طريق
ما تحمل هيفاء الحين الا هم لمياء اذا عرفت هي وش ناوية عليه ,,,اكيد بنتصدم منها وبتعطيها محاضرات مو محاضرة ,, بس ياليت يا لمياء تفهمين اني خذيت الأنسان الخطأ لاهو يناسبني ولا انا اناسبه ,,,,
ام طلال : هيفاء ,,, هيفاء ,,,
هيفاء : هاااه,,,, لبيه يمه سامحيني ما اتبهت انك تنادين ,,,
ام طلال ,,, اسم الله عليك هذا كله عشان فهد راح بكلمه الحين وبقوله انك من رحت من عندنا ترى خذيت قلب هيفاء معك ,, حبيبتي انتي معنا ومو معنااا ,,,
هيفاء قامت تصنع ضحكه : يمه لالا تكفين بعدين فهد يشوف نفسه علي ,,,لا بس انا شاغلني موضوع دورة ابي ادرسها في معهد تزيد في رصيدي من اللغة الانجليزية وافكر اسجل او لا,,,
ما اقتنعت ام طلال بكلام هيفاء وعرفت انها تمشيها هي شاغلها شي بس عسى مو كايد ,,,,
اول ما صلوا العصر جاهم
طلال وسلطانه وريما يسلمون عليهم ,, ولمياء وفيصل بسياره ثانيه,,لمياء عطت هيفاء خبر من الصبح فأرسلت الشغالات يرتبون ملحق الضيوف لفيصل ولمياء ,,, وجهزت غرفة لعمها عشان يتريح فيها وودها انهم يجون بسرعه ,, على الأقل يشغلونها من اللي هي فيه ,,,
راح فهد من امس ولا مسج ولا تليفون ,, وهي عارفه انه ما راح يكلم بس حست ان فيه حنيه وهي ما بادرته بنفس الشي ,,, رجع لها تفكيرها ثاني ,,, اوووووه زهقت ,, استغفر الله انا وش فيني كل عقلي التفكير به ,,, اكيد يهمك يا هيفاء ,,, ما بغت تستسلم لأفكارها فطلعت من الغرفة ,,, تشوف وين البنات ,,, جاها اتصال من عمتها مريم تطمن عليهم كعادتها اليوميه وقالت لها انها على نهاية الاسبوع عندهم ,, ارتاحت انها بتجي مو عشان العيال ابدا بس عشان يشغلونها بجووو جديد ,,
طلال : وشلونكم يمه وشخباركم عسى ما تعبتوا ولا جاكم شي ,,
ام طلال : ابشرك مابه خلاف ,, بس ودي اقعد هنا لين اقضي وقت شوي القصر ضيقه ولا اطلع ما ودي اخالف الشرع في شي ,, العمال كثير ومالهم وقت شغالين في كل مكان ,,,
طلال : لا بالله هنا ازين لك وبتغيرين جووو كفايه جو الصبح يرد الروح ,,,
ام طلال : صدقت يا ولدي ,,
طلال : اناقلت بسلم عليك وبرجع بكره الاشغال كثثير وبرجع لك نهاية الاسبوع ,,
ام طلال : خذ راحتك انا ما جيت هنا الا ابي راحتي وقلت لفهد لاتعطلون اشغالكم عشاني بناتي معي وماعلي خلاف ,,,
البنات كانوا متجمعين مع بعض ويسولفون عن اخر اخبارهم وظلت ريما تقولهم عن اخبارها في العمره وش صار من اول ما طلعوا من الرياض لحد ما رجعوا لها ,,,
لمياء : يقول فيصل ان نواف عطى فهد خبر انه اذا خلصت جدتي العده يبي زواج عائلي ,,,
ريما : لالاوشو هو وشلون نفرح وجدي ما صار له يالله سنه وبعدين يصير خير ,,
هيفاء : والله اذا انتي تبينه وهو يبيك زواج عائلي ابرك لكم وشوله تنطرينه ما يسوى عليه ,,,
ريما : مدري انا ما ابي افكر الحين في هالشي ,,, الا على فكره سعود كلمني وقال لي انه بيجي مع عمتي مريم ,, بيطلع لجده بيأخذها وبيجون هنا على طول ,,
هيفاء: اي قالت لي عمتي مريم ,, تعتقدين عمتي هدى بتجينا هنا ,,,
ريما : اكيد ميه في الميه ,, ليه صاير شي ,,
فكملت لها لمياء السالفة وش صار مع مشاعل وعبير اخر مره ,,,,
ريما :بصراحه ما عندهم دم ابد ,, ولاتكون هيفاء صدقت الكلام ذا وهي تلتفت بعيونها لهيفاء :::
هيفاء : اذا صدقت من عذري والا نسيتي وش صار هنا في المزرعة اخر مره ويسمع لهم كأن كلامهم هو اللي صح :: نسيتي يا ريما ,,
ريما جت بتحكي ,, وقالت لها هيفاء
هيفاء : لا تقولين اي شي يا ريما :: انا ماصدقت اللي قالوه اصلا بس فهد معطيهم وجه بزيااااده ,,
فعشان كذا ماخذين راحتهم مررررره ,,,
قامت هيفاء لانها حست ان الوضع وترها والكلام عن فهد خصوصا ,,, طلعت تشوف رهف وضي وين فيه وش يسوون ,,,
ومرت على المطبخ ::لقت لها شاندويتشات وخذتها في صحن مع كاس شاي وحطتها في صينية وقالت للشغاله تشوف مروان وتعطيه ايااه ,,,
حصلت البنات في الحديقة يلعبون في المراجيح وجت عندهم ,,
ضي : هيفاء تجين تلعبين معنا ,,,
هيفاء , اكيد وش تبين العب معك
رهف : لا نبي تحكين لنا ايام كنتي في المدرسه وش تسوين ,, قعدت معهم هيفاء في المراجيح وسولفت لهم عن ايامها مع صديقاتها ومقالبهم مع المدرسات ورهف كل شوي تقطع السالفة بالضحك ,, داخله جووو
لمياء ظلت مع ريما يحللون الوضع ,,
ريما : انا حاسه ان فيه سالفة بين فهد وهيفاء
لمياء : الايام اللي راحت كنت مشغوله جدا بفيصل وما كنت اشوفها بس ما قد شكت من شي ,,,
ريما : اجل انا حاسه بشي الله يستر من عبير من يوم وعيت وهي تتلزق في فهد وهو ما يبيها وكم مره تنخطب وترفض بحجة ان لو هي بتتزوج ما راح تحصل مثل فهد مع انه ما بين لها انه يبيها
بس مثل سوالف الحريم الكبار امها وامي وين بتحصل مثل عبير والثانية تقول ان شالله انك من نصيب عبير ,, يعني كله كلام في كلام مابه شي جدي ,,
لمياء : تبين الصدق عااد المفروض فهد عطاها كاش في وجهها مو كل ساعه والثانية تجي تغث هيفاء بكلمة وين قاعدين ,, هي صح بنت خالته بس الى هنا وبس ,, هو صار متزوج مو ولد خالتها المراهق ,, كل شوي فهد وفهد ,, سخافه والله ان هيفاء صبوره لو انا في مكانها كان طقت كبدي منها ويمكن اسوي فيها جريمه حتى ,,, ولمياء تتكلم بحماس عصب بها زياده
جتهم امهم لطيفة واضطرواانهم يسكرون على الموضوع ,,,
طلعت ريما تبي تشوف وين هيفاء على الاقل تزين خاطرها بكم كلمه ,,, ولقتها برى عن البنات ,,
ريما : يالله وش كثر انتي متفانيه يا هيفاء ,, الله لا يخسر تعبك ,, بغت تطلع لهم الا يجيها اتصال من فهد
فهد : هلا ريموو شخبارك يا عمري
ريما : طيبه ,,اذا امورك انت وهيفاء طيبه,,, اول مره تكشف له شي في حياتهم ,بس حبت تنبه اخوها لاشياء يمكن هو غافل عنها ::
فهد : ليه وامورنا مهي طيبه
ريما وهي تتكلم عن شي ثاني : هيفاء قالت لي ,,
فتوقع ان هيفاء قالت لريما قرارها ,,,
فهد : هذه قرارها وهي حره فيه عطيتها حرية القرار وانها تختار وش تبي وابد تحدد لي ,,,
ريما : اي قرار اللي انت تتكلم عنه,,
فهد مستغرب ,, انتي شتتكلمين عنه .. رد بسرعه ...,,
ريما : شكلي فهمتك او فهمت الموضوع خطأ
فهد : ما علينا اخباركم انتوا مبسوطين,,,
ريما : تعال نهاية الاسبوع ترى هيفاء مو طيبه ,,,
فهد : نشوف ,, فمان الله ,,
سكر فهد منها وهو مشغول ,, بس مابغى يأخذ مع ريما ويعطي ,, شكلها ما عندها خلفية عن كل شي ,,,
طلعت لمياء للملحق تبي ترتب اغراضها وتبدل ملابسها ولقت فيصل متمدد فما بغت تزعجه ,, رجعت تبي تطلع بس سمعت صوته
فيصل : لمياء تعالي يا عيوني ,,
دخلت لمياء بدلال : وانا فكرت انك نايم ,,
فيصل : نايم بس فيه شي يصحيني اذا دخلتي عليك عطر مميز احسه وانتي تتحركين في المكان كنك فراشه ,,,
انتي ,, من وين تجيبنه ,, ابي اشتري لك منه عشره ,,,
لمياء وهي تضحك ضحكتها المجلجله : وش دعوا عشره ,, لا ماعليك انا اي شي احطه يجي غيييييير ,,,
فيصل : يا ثقه تعجبيني يا قلبي ,,
نواف وفهد متفقين يتعشون سواء في مطعم يحبون يجونه ,,,مر فهد على نواف وهو عند مدخل بيتهم ,, شاف سيارة عبير جايه للمدخل تقدم شوي بسيارته ,, وهي نزلت وتقدمت لفهد عند النافذه نزل زجاج السياره وما يمديه يقول شي الا عبير متكلمه,,
عبير : هلا فهد وينك ما تسال من غيرك علينا ,,
فهد : هلا عبير كيف خالتي طيبه ,,
عبير: ماعليها ,, ليش ما ترد علي كم مره اكلمك ,,,
فهد : مشاغل عااااد شسوي ,,
عبير : والا كبروا راسك علينا :: يسوونها ,,,
فهد : بغيتي شي عن اذنك بمشي وهو يبي يصرفها
عبير : معليش يا فهد كذا تتنكر لي عشان وحده ما تربت لا وتبي تطردنا من بيت خالتي ,,
فهد : لو سمحتي عبير احترمي نفسك وهيفاء متربية قبل تشوفكم ,,, ويالله ما تشوفين شر
لفت منه عبير وهي تغلي معقوله هذا فهد ,,, غيرته الحيه علي ,,, معليه يا فهد انا بوريك شغلك ,,,
ودخلت على مشاعل وهي تأفف من فهد وكلامه ,, هذا اللي باقي ما يبي يسمعني وانا احكي لا واحترمي نفسك قال
هين يا فهد دواك عندي ,,,
تكلمت وهي تغلي : مشاعل تصدقين شكلها مسويه له سحر ,, ما يبي يسمع عنها شي .,, بموووت قولي لي وشسوي ,,,
مشاعل : يا حبيبتي من جدك انتي تسوي له سحر ,, هاذي اصلا شايفه حالها وما تحب الا نفسها وما تتكلم الامن طرف خشمها ,, وتقولين تسوي له سحر ,, لكن انا بقولك وش راح يجيب راسه عشان يصدق كل كلمه نقولها ,,,
عبير : تكفين علميني وش اقدر اسوي بسوي اللي تبين ,,اهم شي فهد يطلقها ,,,
مشاعل وهي تضحك ضحكه خبيثه : ولا يهمك يا قلبي وصوت ضحكهم مجلجل المكان ,,,
طلع نواف مع فهد ,,وهم في الطريق ,
نواف : شفيك صاير شي :,,
فهد: عبير جت عندي وانا انتظرك وتخربط في الكلام ::,,
نواف : والله الشرهه مو على عبير .. عليك اذا انت بتسمعها انت عارف عبير زين ,,,
فهد : المشكله اني عارفها ,,
اتركنا من عبير هالحين ,, احسك مو على بعضك صار لك فتره ,, متغير شي فيك
فهد : وشو يعني ,,
نواف : انت مو حاس في نفسك ,, فهد انت فيه شي شاغل بالك وتفكر فيه على طول انت تبي مساعده شي ترى انا في خدمتك ,,,
فهد : ايييييييه يا نواف ,, ما ينفع الكلام الحين ,, بس ربك يحلها ,,,
نواف : انت وش تكلم عليه فهمني ,,,
فهد : ماعليه مو الحين في وقته بعلمك بكل شي ,,,

تجمعوا العايلة على العشاء الا طلال اللي حب لطيفه تأخذ راحتها ,
هيفاء وهي تخدمهم من قلبها وهي تحط لهم الاكل ,, حست بغصة عميقة في قلبها لدرجة ان عينها دمعت وحاولت تتحاشى انها تشوف اي احد في عينه عشان ما يكشفونها ,,,حست انها بتخسرهم ومعد راح تشوفهم ثاني وهي متعلقه بهم من قلبها وخصوصا جدتها ,, وشلون بتفارقهم وتترك الجوالعائلي اللي افتقدته طول عمرها ,, الله يسامحك يا فهد كله منك,, ليه كذا بس ,,,
قامت انها تبي تأخذ شي من المطبخ التحضيري وهي قصدها تمسح دموعها قبل تنكشف ,,,
كلش ولا تشوفها لمياء بتسوي مناحه اذا عرفت هيفاء وش بتسوي ,, يا ربي ساعدني طلبتك خفف علي ,, وقعدت تقول بعض الأذكار عشان تهدأ نفسها شويه ,,,,
مرت يومين وهم نفس الروتين ما تغير ,, طلال وسلطانه رجعوا للقصر ,, ولمياء اغلب وقتها عند فيصل او تتمشى معه لأنه حب يمرن نفسه على المشي الخفيف ,, واهتمام هيفاء الملحوظ بعيال مريم ,, الجميع ملاحظ الشي ذا لدرجة انهم يقولون لها لو مريم هنا ما اهتمت بعيالها نفسك ,,,
عينهم على نهاية الاسبوع ووصول مريم وسعود معها وماخذين الايام هاذي راااحة نفسيه من كل الضغوط المحيطة بهم ,,,,

هيفاء حبت تتمشى في المزرعة هي والبنات الصغار فلبستهم ملابس تدفيهم وطلعت معهم يتمشون وخذت لها شرشف صغير تحطه على شعرها وكتوفها في حال جاء احد وهي مستبعده هالشي ,,
تأخرت هي والبنات عند قسم للطيور اول مره ينتبهون له خصوصا ان المزرعة كبيره واشجارها كثيفة واللي ما يعرف الاماكن فيها لازم بيضيع شوي ,,,
بعد ساعه كذا جاها اتصال من ريما
ريما : وين يالدبه وين مختفيه قعدت ادور عليك ما حصلتك ,,,
هيفاء : رحت اتمشى مع البنات ليه فيك شي
ريما : اي فيني تصدقين يا ماما ضرسي يعورني ,,,
هيفاء : الحمدلله والشكر ليه بيبي انتي ,,,
ريما : اسألي نفسك ما تنشافين كله مع البزران عديني وحده منهم ,,,
هيفاء : ريموه صدق انك متفرغه :: عندك شي ولا اسكر ,,
ريما : شفيك زعلتي ,, ترى امزح ,, بعدين تعالي عندي مفاجأه حلوووووه ,,,
هيفاء : تحسبيني مقصه اصدق كل شي ادري تمزحين ,, وش المفاجأه بالله ,,
ريما : لا لا يا قمر وليش سموها مفاجأه اذا جيتي بوريك اياها فأتركي شغل البزران وتعالي اوكي وتسكر ما عطتها اي مجال ,,
هيفاء : ما تخلين حركاتك يا ريما وراح فكرها للمفاجأه وش عندها يمكن طابخه شي هي تجرب فيهم هالايام وكل يوم يصير شكل مره زين ومره خربان ,, والا وش عندها صحيح ,,,,
خذت هيفاء البنات ورجعت للفيلا ,,,
حصلت ريما في المجلس تنتظرها ,, وام طلال وامها لطيفه شكلهم داخل مالهم حس ,,
هيفاء : هذا انا جيت وش عندك ,,
ريما : تصدقين شكلك ما تحبين المفاجأت ماعندك حماس مررره ,,
هيفاء : ابد تصدقين ثلجه ,,,,
قالت لها ريما تعالي معي لاني وديتها فوق خفت احد يشوفها قبلك ,,
هيفاء : مين بيرسل عليك هديه هنا ,,
ريما وهي تضحك ,, تعالي بس ,,,وهما طالعين الدرج هيفاء مو مستوعبه وش عندها ريما ,, غريبه اول مره تسوي لها الحركه ذي ,,,
جت عند غرفة فهد وقالت ريما : تعالي انا حطيتها هنا عشان محد يشوفها ,,,
هيفاء وهي تجي وراها ,,دخلت الغرفة عقبها وتلتفت للسرير ما شافت عليه شي وترجع تلفت ثاني للجهة اللي فيها الكنبة وتحصل فهد قاعد يطالعهم ,, مو عارف وش عندهم داخلين عليه كذا ,,,,
ريما بصوت عالي : سبراااااايز ,,
هيفاء في قلبها : يؤيؤيؤ يا ريما صدق وهقه شغلك عندي ,,
ريما وهي تشوفهم مبلمين كل واحد يشوف الثاني كنه اول مره يشوفه ,,
ريما : وش رايكم اصلح اسوي مفاجأت ,, وقفت اول ما شافتهم ما علقوا ,,
ريما : الحق علي ابي اونسكم ,, سووووري على اللقافة ,,, يالله سي يو بعدين ,, وطلعت ما تركت لهيفاء اي فرصه للكلام ,,
فهد : لهدرجه ما تبين تشوفيني ,,
هيفاء وهي متلعثمه : لا وش دعوا من قال ,, بس صحيح مفاجأه انك جيت لأني ما توقعتها ,,الحمدلله على السلامة,,
فهد : الله يسلمك ,, ماعندي شي قلت اجيكم ,,
هيفاء وهي تحاول تشغل يدها بأي شي موجود يمكن يخفف انفعالها : الله يحيك ,, تبي قهوة ,,
فهد وهو مسمر عينه في عينها وحاس بأحراجها ,, ليه لا اوكي ابي قهوة ,, وطلعت بسرعه من الغرفه على غرفة ريما تبي تهزئها شوي ,,
هيفاء وهي تدخل : يا شينك من قالك اني ابي المفاجأت تسوين حركه سخيفة زي ذي ,,
ريما وهي تضحك : واااو شكلكم رايح فيها انتي وفهد ,,, ترى وااااضح عندكم مشكله ,, احمدي ربك وفرت عليك قلق المواجهة ,, هذا انتي شفتيه وافتكيتي عشان ما تحاتين,,,
هيفاء :الله يسامحك كان ودي تقولين لي مو كذا بعدين ما بينا شي لاتتخيلين شي من عندك ,,,
ريما : اوكي خلاص الحين روحي تجهزي لزوجك جاي من طريق طويل اكيد يبي يقعد معك شوي,,
وبعدين انا بنام عند عيال عمتي مريم روحي لزوجك يا قلبي ,,
هيفاء : لا لا مستحيل انا ما راح اتركهم لين تجي امهم ,, وبعدين فهد مو طاير ,, وطلعت منها وراحت لغرفتها
جلست على طرف السرير وهي تفكر في فهد ,, عيونه فيها شي غرررريب ,, ليه جاء طيب ,, معقولة اشتاق لنا ,, لا لا اكيد زهق بالحاله وجاء ,,,

تجمعوا على العشاء والعيال كانوا في الخيمة وشبة الضو معطيه المكان دفئ عجيب مع ريحة الحطب اللي تخلي المشاعر دافئة ,,
ام طلال ولطيفة قعدوا يشوفون التلفزيون ,, وريما تسولف مع لمياء عن موديل شافته في مجله ودها تسال عن مصممته ,, وهيفاء في فلكها معاهم بالجسم فقط بس عقلها بعيد عن اللي يحكون ,, ريما حاسه فيها ,, بس لمياء مو جاي في بالها ابد ان هيفاء فيها شي وخصوصا انشغالها مع فيصل خلى الامور بالنسبه لها متساوية ما تدقق في شي ,,,

استئذنتهم هيفاء تشوف البنات ,, فقالت لها ريما : مو تتأخرين ترى انا اتملل بالحالي ارجعي ,,
هيفاء : خلاص
طلعت هيفاء وشافت البنات يشوفون قناة اطفال يتابعون رسوم ,, وقد بدلوا ملابسهم وخلصوا ,, حست بأنجاز معهم يسمعون كلامها ويتبعون اللي تقوله بحذافيره ,ارتاحت عشانها تبي تريح عمتها وتطمن بالها على عيالها
تركتهم ونزلت تحت وحصلت ريما بالحالها ,,
هيفاء : وين لمياء عنك ,,
ريما : كلمها فيصل وراحت للملحق ,, تكفين هيفاء ,, ابي اطلب منك طلب
هيفاء : آمري وش تبين ,,
ريما : امشي نروح للخيمه عند فهد واللي يسلمك
هيفاء : يمكن عنده احد من جدك
ريما : لا لا مافي احد كلمته وقلت له بنجيك انا وهيفاء
هيفاء وهي تضحك عليها ك اجل وليه تطلبين مني وانتي رايحه رايحه
ريما : لا تفشليني عاد اسوي قدامك برستيج ,,
هيفاء: اوكي مافي مانع لبست شرشف صغير على شعرها وريما تقولها مافي داعي محد موجود لكن هيفاء قالت لها احتياطا ,, وطلعوا من الفيلا وراحوا يمشون للخيمة اللي تبعد عنهم شويه قعدوا يسولفون بالطريق عن بعض اهتمامات الأنسان وحبه للجمال في كل وقت ,, ريما تحب تقعد مع بنات عمها فيصل كثثييير ومن يوم دخلوا حياتها خفت زيارتها ان لم تكن انقطعت لبيت خالتها ام نايف وعمتها هدى والمقصد العنود تطلع معها من فتره لفتره ,, حست وهي مع لمياء وهيفاء خصوصا ان كلامهم له معنى وفيه شي مفيد ويحكون عن شي كأنه واقع بالاضافه الى تجربتهم في مجالات معينه تناسب اهتمامتها ,,
وصلوا للخيمة ومافيها الا فهد وهويشوف التلفزيون شكله في المكان مع شماغه وثوبه الغامق معطيه جاذبيه غير طبيعيه
دخلت ريما قبل ووراها هيفاء : مساء الورد ياخوي
فهد : مساكم بالنور ,,
فهد حاول ما يلتفت لهيفاء وقعدت ريما من جهة وهيفاء في الجهة اللي جنبه عشان ما تترك له فرصه انه يدقق فيها عيونه كانت تطالع المباراه
ريما : الله احب االاجواء اللي كذا تخليك ما تنسى ذكرياتك في المكان ,,
هيفاء شافت ان مال وجودهم داعي وخصوصا ان فهد يتابع المباراة ,,
بعد عشر دقايق من الصمت المخيم على الجميع تكلمت هيفاء انا بروح للبنات تجين يا ريما
لمحت فهد وهو يركز فيها ,, فردت عليها ريما ما قعدنا اصبري شوي
هيفاء : يمكن يحتاجون شي ::ووقفت تبي ريما تقوم ,
ريما امرنا لله ,, فهد وشرايك تودينا نسوق بكره ,,
فهد : اوكي ليش لا ,,وطلعوا من الخيمة وهم راجعين في الطريق ,,,
ريما : ممكن اسئلك سؤال فيه لقافه شوي
هيفاء : اسئلي
ريما : انتي طول الوقت ساكته مع فهد ما تحكون
هيفاء : على حسب ,,وهي تحاول ما تعطي ريما اجابات تخليها تشك ,,
ريما : بصراحه انتوا ما تهينون علي ولا ابيكم متكدرين بس احس لو تطلعون شوي بالحالكم يكون احسن
هيفاء : ممكن ليه لا بنجرب وهي تضحك
ريما كان ودها ان هيفاء تقول اللي في خاطرها كله عشان تنقله لفهد لكن هيفاء متحفظه في الردود وماتبي اي شي تقوله ,, هو بينهم مشكله عاديه واالا شي كبير ,, الله يجيب الخير ان شالله ,, وصلوا للفيلا وكل وحده راحت لغرفتها ,,, وفي عالمها الخاص ,,
فهد بعد ما طلعوا من الخيمة ,, انقهر من هيفاء ,, ما ودها تقعد وتتحاشاني ,, اكيد عزمت على قرارها ,,
فهد وهو يفكر ,, انا ابي اللي يريحها حتى لو كان طلاق ,, شكلها ما عندها استعداد تفهمني وتتنازل عن القوة اللي هي مغطيه حالها بها
جاء يوم جديد محمل بنسائم المحبة والخير وينتظر قلوب تفتح لها ابوابها لتلقي بها هذا النسيم الرائع بعبير جميل محمل بالراحه والسعاده والايمان ,
وصلت مريم على الظهر وهي مرتاحة نفسيا من اداء العمرة عن والدها وقضت يومين عند اهل زوجها ,, ورجعت وهي تحس بأستقرار جميل ,, شافت ان بناتها متغيرين عن اخر مره شافتهم يووو اكيد ان هيفاء تأكلهم مضبوط
ام طلال : انا ما صدقت انك تجين ,, تدرين اني ما عاد اشوفها ابدا هي وعيالك ,,, كل ما سألت عنها قالوا مع البنات ,,
زين رجعتي عشان بنتي ترجع لي ,,,

مريم " ياعمري ياهيفاء اكيد ما راح تقصر الله يعطيها العافيه ..,,
شوي وهما قاعدين يأخذون اخبار مريم جاهم فهد وكمل معاهم سواليفهم ويسمع مدح جدته في هيفاء واهتمامها بكل شي من صغير وكبير ,,
جتهم ريما وهي تسأل : فهد متى بتأخذنا نطلع شوي بالسياره
فهد : اذا انتوا مستعدين يالله ,,,
ريما وهي تنادي على هيفاء : هيفاااااء
جتهم هيفاء معاها صينية حلووو كل حد حط يده فيها يبي يتذووق ,, الا فهد تابع المنظر يبي يشوف ,, وهي شافته ما مد يده فقربت منه الصينية
هيفاء : تفضل ,,
فهد : تسلمين ,,
ريما : يالله امشي بنروح مع فهد ,, عجلي عاد لا تتأخرين ,,
هيفاء قالت عشر دقايق بس ,, وطلعت فوق بسرعه وبدلت ملابسها ولبست شي يناسب الطلعه وخذت عبايتها معاها ونزلت اول ما شافتها ريما قالت لها
ريما : وين لابسه عبايه حنا هنا في البران ما بين مزارع ورمال وش تبين بالعبايه اصرت هيفاء انها تلبسها وطلعوا للسياره
على طول ركبت ريما ورى ,,
وهيفاء جت بتفتح الباب اللي جنبها قال لها فهد : لا انتوا تبون تسوقون تعالي انتي قدام بعدين دور ريما ,,, وجت وركبت جنب فهد وطلعت السياره من عند بوابة المزرعة ,,
اول ما وصلوا للباب ريما افتعلت حركة ,, حت جهازها على صوت رنين ,,
وكلمت وهي تقول : هلا يمه ,,, احنا بنطلع ,, الا اجيك ثواني بس ,, ريما وهي تقول لفهد : لحظه انا بنزل جدتي تبيني في شغل لها انتوا كملوا ,,, واروح معكم ثاني ونزلت مع الباب وفهد مو متأكد انه يكمل يمكن هيفاء ما تبي
جت هيفاء تفتح الباب تبي تنزل عشان ما تشغل فهد الا ريما تسكر بابها ثاني ,, لا تفوتين الفرصة يا خبله السواقه تجنن ,, يالله استمتعوا ,,,
فهد حرك السيارة وشاف انها فرصة يكون مع هيفاء لحالهم ,,,,,,
((الجزء العشرين ))

كمل فهد طريقه بالسياره وهيفاء ملتزمة الصمت ,, وهقتها ريما وتركتها تواجه فهد بالحالها ,,, انا عارفه حركاتك يا ريما ,, الله يهديك بس,,, فهد حس بهدوؤ هيفاء ,, اكيد محرجه منه ,, بس لازم يحسسها انه الأمر عادي ,,,
فهد : قد سقتي قبل كذا ,,,
هيفاء :: لا لا ولا مره ابد مالنا احد نروح ونجي معه زي هنا ,,,
فهد : امممم متحمسه تسوقين والا خايفه,,
هيفاء ابتسمت تلقائي ,,: مدري بس تجربه جديد اكيد ,, لكن الخوف موجود اكيد ,,,
فهد : تخافين وانا معك !!
هيفاء صار وجهها احمر ما تعودت على اسلوبه هذا ابدا,,: لا مو مسأله بس شي ما تعودت عليه ,,
فهد متعمد يحرجها اصلا,,, وقف السياره وقال لهيفاء : يالله تعالي مكاني ,, نزلت وشعورها غريب كنها تعرف فهد من زمااان بس للحظات حست انها في حلم ,,,
جت مكانها وقال لها : يالله الحين امسكي البريك ,, حطي رجلك خفيف وشغلي السياره وهي بتتحرك ,,
هيفاء وهي ماسكه نفسها لانها اذا ضحكت بتتفشل منه ,,,
سوت الخطوات اللي قالها ,, وبدت السياره تمشي بس شافت انها تدعس بقوووه وفهد يقول لها : خففي خففي شوي ,,
شعور جديد انك تقدر تسوق سياره بالحالك وان المسأله مو ذيك الصعوبة وفيها استمتاع ,,,في قلبها شكرررت ريما حيييل ,, يا حبي لك ,,,
المكان المتواجد فيها المزرعة مساحه كبيره ومجاورهم مزارع على بعد كيلو مترات ,,, فكانت ماخذه راحتها ,,, شغل فهد سي دي لخالد عبالرحمن وقعد يصدح بكلماته وصوته الشجي ,,,
حظ عيني لو تشوفك كل يوم
حظها و أنت لناظرهـا الضيا ,,,,نام فيها نام و إنعس لا تقـوم,,,, بالسعـادة يـا تباشيــر الحياء,,,ودي ?بشوفك و بعطيك العلـوم,,,, وعن عيونـي لا يبعدك النيـا,,,,ء?صدق أنا مشتـاق لكنّـي كتـوم
أجبر عزومي و يمنعني الحياء
هل معقوله فهد متعمد يسمعني الأغنية هاذي والا جت كذا ,,,
جت تبي تلف السياره وحست بصعوبه وهي تدورها فحط فهد يده على يدها عشان تدور السكان بسرعه ارتبكت منه وهو شاف هالشي في طريقتها ,, قال لها تشوف طريق المزرعة وتتجه له,, حركت تجاه الخط ومشت بشكل مستقيم بدون لفات وهما ساكتين ,,,
فهد : ان شالله استانستي ,,,
هيفاء : اكيد تجربه حلوووه ,,, ما قصرت ,, ورجعوا ساكتين لحد مادخلت من بوابة المزرعة ونزلوا من السياره حست ان ظهرها مشدود من كثر ماهي مستمته في السياره ...
نزل فهد وهو يحرك يدينه ويرفعها لشعره يبي يرتبه ,,, شافته هيفاء وجت لجهته ,,,: مشكور استانست صراحه شي جديد ,,
فهد وهو مبتسم لها : يسعدني يا قلبي ,, رفعت عينها له ونزلتها على طول ,,ورجعت للفيلا وهي تمشي بالحالها ,, فهد متغير والأهو كذا وانا ما كنت اعرفه ,, وواحد ثاني ,, معقوله يعني اللي يسويه ,, طلعت لغرفتها ما بغت اي احد يخرب عليها اللي تحسه شافت نفسها خفيفه وسعيده جدا كنها في حلم حلوووو ما ودها انه يخلص ,, ماتبي تنصدم بواقعها انها وفهد متفقين على كل شي مسبقا وهي عطته قرارها ,, تذكرت الماضي وعلى طول شالته من راسها هي تبي تعيش اللحظه ذي,,,
دخلت ,, شافت البنات نايمين في الغرفة ومريم قاعده متمدده على الكنبه ,,,
هيفاء : شفيك ما نمتي على السرير
مريم : ما تعرفيني احب اخذ راحتي في السرير ,,,بصراحه مدري شلون اشكرك على كل شي بذلتيه لعيالي ,,, احس كل شي منظم اشوفه من طريقتهم ,,
هيفاء : مافي داعي ابد تشكريني يا قلبي انا اذا ما خدمتك مين راح اخدم ,, بالعكس تغير برنامجي معهم وحسيت اني اسوي انجاز ,,,,
مريم : ما قصرتي يا عمري ,, بس الحين جاء فهد اكيد لازم تهتمين فيه بعد وما تخلين مسؤليتك تجاه اي احد تاثر على علاقتك بفهد ,,
هيفاء : لا عمتي لا تفكرين انا احاول اسعد الجميع ,,قامت مريم من الكنبة ,, وجت وقفت عندها ,,
مريم : فهد مو اي احد يا هيفاء ,,, فحاولي انك تكسبينه ولا تبعدين منه ترى فهد فيه صفه يمكن ما تعرفين عنها شي ,, فيها حياء رجال مو اي شي يحب يحكي فيه,, ويمكن ما تدرين باللي في خاطره اذا ما سئلتيه ,,
هيفاء : اان شالله اسوي اللي ربي يقدرني عليه ,,
مريم : انا بقعد هنا مع البنات تقدرين تنامين في غرفتك اذا انتي تعبانه ,, طلعت منها هيفاء وهي متكدره وقلبت فرحتها ,, الله يسامحك يا عمتي ما تركتيني اكمل فرحتي ,, وش تبين اسوي انا اجري فهد ,, مهو هو الرجال ,,, انا وش في يدي بس ,,,
نزلت تحت تبي تشوف وين ريما ,, ولقتها في المطبخ تلف لها فطاير الكرواسان ,,
هيفاء : ما شالله انتي كل ما اختفيتي بحصلك هنااا وش عندك على الطبخ ,,
ريما تغمز لهيفاء بعيونها : سر بعدين اقولك ,,
هيفاء : بتقولين هالحين يا بنت استعدلي يالله ,, لا وبعد تاركتني بالحالي ونزلتي ,,
ريما : بس ما استانستي اني فكيتكم من خشتي يمكن عندكم شي والا شي كلمه رايح كلمه جاي ,, وانا ذوووق ما احب اثقل على احد ,,,
هيفاء : مررره ذوووق ,, زين وش عندك تتفنينين ,,
ريما : وتطالع في المكان عشان ما تبي احد يسمعها ,, العنود قالت ان نواف بيسهر هنا الليله عند اخواني حبيت اسوي شي جديد
هيفاء : الله الله حركات يا ريوووم ,,
ريما : شفتي اعجبك انتي تحبين السنعين لازم اصير زيهم وهي تضحك ,,,

كلمت لمياء تسال عنهم وينهم فيه تبي تجيهم بعد ما طلع فيصل للخيمه ,,, ولقتهم ماخذين بريك من كل شي وقاعدين بالحالهم ,, وريما تسولف لهيفاء عن نواف منذ الصغر ,, وذكرياتها واصبحت لها كتاب مفتوح ,,, وهيفاء مستمتعه بحركات ريما واستهبالها عليها وهي تقص بعض المواقف ,,
هيفاء : تراك شيبتي بالرجال ,,,
ريما :: لا والله مو احسن منك هذا انتي شيبتي بأخوي ,,
هيفاء ارتفع حاجبها شوي ما تدري وش تقول لريما ,, هل فهد شاكي لها ,, او هي تخمن شي ,, احتارت نظرتها في دقيقه
فكملت ريما : هيوفه يا قلبي نرى انا مو غبيه ,, ادري بفهد انه ينام في غرفته ذيك الايام ,, وادري بك تتحاشينه ,, بس انا متأكده انك تقدرين تكسبين فهد بسرعه بطريقتك فما تدخلت ,,, لكن اللي اشوفه ان الأمر كبر بينكم ,,,
ترى انا مدري بشي ,, بس فهد كم مره يكلمني يسال عنك وحريص يعرف اخبارك,,
ما ابي اقولك فهد غير عن الرجال لكن والله يسوى قبايل ,,,
حست هيفاء بتأنيب الضمير وكأن ريما تحملها الذنب ,,
وما حبت تكتم كل شي ,, فقالت لها : ريما انتي تعزين علي كثير وما احب اني اقولك شي ,, واناعارفه انه مو صحيح بس عشان امشي عليك ,,
انا وفهد ما بدينا صح ومو هاذي المشكله ,,لو هي الاساس كان حليناها ,,
بس احنا مو متوافقين وما فهمنا بعض ,, بالأضافه انه تارك لعبير الحبل على الغارب ,, وعلى مزاجها تتدخل في حياته كأنها زوجه مو حيالله ,,,
دخلت لمياء لأنها ما قدرت توقف اكثر من كذا عند الباب ,,ومنصدمه من هيفاء اللي يطلع منها ذا الكلام ,,
لمياء : هيفاء انتي شتخربطين ,, الحين هذا كلام وحده عاقله ,, وين اللي تنصحني وزوجك وزوجك لاتتركينه لوحده ما تسوى,,
هالحين انتي اللي تقولين هالكلام ,, ما اصدق اختي انجنت ,,,
هيفاء تبي تسكر الموضوع لانه مو الوقت ولا اليوم المناسب للكام في هالموضوع ,, هي كانت تنتظر ان جدتها تخلص العدة وتفاتحهم لكن ريما الله يهديها نقضت جروحها بدري ,,,,

هيفاء : الحين مو صاير اي شي عايشين حياتنا زي الناس خلاص وش المشكله ..,, عن اذنكم شوي ,,
وطلعت لغرفتها ,, اكيد فهد بينام هنا رتبت له المكان بالكامل ,, وشافت شنطته على مكانها امس مفتوحه ومظهر نص اغراضه,,
كملت ترتيب الباقي وحطت كل شي في مكانه ,,,حست بفرحتها نص النهار تبخرت مع آخره ,,
فتحت دولابها كانت مرتبه اغراض لها في المرة اللي جات فيها المزرعة ,,,استحت تدخل على عمتها مريم تـأخذ اغراضها ,,

ضاقت من كل شي تشوف انها صايره ممله وكئيبه ,, اوووووف عسى ماشر هيفاء وشفيك كذا ,,
دخلت تاخذ شاور وتحس انها فرريش شوي ,, جهزت مبخرة وبخرت شعرها ,, احلى شي في الدنيا عندها البخور والعطور ,,
لبست لها جلابيه شيفون حرير مبطن ,, وقصته واسعه وفيه حجر في الصدر بشكل راقي ,, ما حبت تحط مكياج كأنه اوفر حبت تكون طبيعيه ,,, رتبت شعرها وخذت لها شرشف لشعرها ونزلت ,,
لقت ام طلال وامها لطيفه يسولفون عن حرمه قد عاشت في الرياض وانتقلت لديرتهم وتفاجأت ام طلال انهم يعرفونها ,, وسولفت لها عنها شوي وهيفاء مستمعه لهم ,,, دخل فهد وهم منسجمين وطاحت عينه على هيفاء ,, جذبته بتألقها اللي ما يليق الا لها ,,,
كمل طريقه داخل وسلم على ام طلال ولطيفه وقعدت بينهم وهو يحاول ان يجرهم في سوالف تونسهم وتغير الجوو على جدته ,,,
وكل شوي يلتفت من غير شعور لهيفاء :,, شكلها وهي مستمعه لهم وبقعدتها وطريقتها في الجلسه كنها لوحه فنيه ,,, ,,,
ام طلال : وين القهوة يا هيفاء ,,,
اووووو وين راح من بالها هالشي مو عوايدها ,,,
هيفاء : شويه بس ,,, وقامت وعين فهد عليها لحد ما طلعت ,, وام طلال ولطيفه يدعون لها وفهد بالسعاده ,,,
جتهم مريم وريما وكملوا معهم سوالف لحد ما جات هيفاء ,,
حطت القهوة على الطاوله ومدت لفهد فنجال,, وبينهم نظرات تحمل كلام كثيير ,, ومحد تابعها الا ريما اللي انبسطت على الاخر ,,,
قام فهد بيطلع للخيمه عند الشباب ,, وهو رايح التفت لام طلال : تآمريني شي يمه ,,,
ام طلال : سلامتك يا عمري
طلع فهد بس ترك شي عند هيفاء ما عرفت وشو ,, هل هو حب او تقدير , او احترام ,, بالضبط ماعرفته بس نظرته فيها تعبير عميق ,,
استمرت السهره لوقت متأخر جدا على غير العاده ,,, بس سوالف ريما تجذبهم بشكل غير طبيعي ,,وخصوصا اذ جت تقلد حركاتهم وبالذات مشية هيفاء تضبطها حييييل والا ضحكة لمياء ,, يوووو شي ثاني ,,, وام طلال حست فعلا بنعمة انهم رجعوا لها ,,, وكيف انها فاقدتهم سنين طويله ,,,
قامت لطيفه تروح غرفتها ووصلتها لمياء ,, تحب انها تجهز فراشها وهيفاء تكمل مع جدتها لحد ما تخلص برنامجها االليلي وتدخل فراشها
طلعت هيفاء غرفتها حبت انها تبدل وتنام على الكنبة قبل يجي فهد ,, عقب غيرت رايها ,, وكملت قعدتها عند التلفزيون ,,, شافت لها كم قناة,, واستقرت على برنامج حوار باللغة الانجليزية تحب تتابعه ,,,
ماحست الا بجفونها ثقلت وحاولت تقاوم لكن مافيه امل ,,, نعست ونامت في مكانها ,,, ماحست بفهد اول مادخل الغرفه وشافها ,, جاء يمها كانت حاضنه مخدة الكنبة بين ايديها سحبها بشويش ,,, وشال هيفاء بين ايديه كنه يشيل ريشه خفيفه ,,, ونومها على السرير ولحفها بدون ما تحس بشي ,,,
دخل وخذ له شاور وبدل ملابسه ,, في هالاثناء ,, صحت هيفاء وفتحت عيونها شوي وعرفت انها في السرير ,, متى وكيف مادرت بشي ,, اكيد فهد هو اللي جابها هنا ,,,سمعته يفتح الباب بيدخل عندها ,, غمضت عينها بسسسسرعه وكملت انها نايمه ,,, فهد خذ جواله ووتركه على الطاولة ,, ودخل في الفراش ,, ودقايق الا هو مسترخي ونايم ,,, هيفاء اللي مرخيه سمعها بالكامل اول ما حست فيه انه ناااام قامت وغيرت ملابسها وخذت لحافها ورجعت للكنبه ونامت بعمق لأنها حست انه يوم طويل جدا ,,,,,
لمياء وفيصل ابتدأ ليلهم من رجعة فيصل من الخيمة ,,,
يحبون يستمتعون بكل دقيقه مع بعض ,, لمياء عنده برستيج لفيصل يحس بدخلته للغرفه انه يدخل عالم ثاني وجميل جدا ما وده يطلع منه ,,,
لها حركات حلوووه تحب تجهز قهوة وشاي وكابتشينو مع سويت مشكل على جنب ,, وتجهز جرايد الصباح ومجلات اسبوعيه على جهة
وتحب تشتري دوووم ورد وتزين به مكانها غير مفارشها اللي توحي لك انها شي مو طبيعي كل هذا مجهزته لمياء معاها ونقلته للمزرعه لأنها تحب فيصل يستمتع بوقته ولا يتغير عليه شي ,,,
كانت مجهزه كل شي قبل تطلع لريما وهيفاء بس بعد ما سمعت كلام هيفاء تنكدت وحست بهم هيفاء ,,, ما بغت تقول لفيصل اي شي
لكن مع السوالف وكل ما سولف فيصل في سالفه حس انها مو حبيبته اللي كل ليله تستمتع بحديثه
فيصل : لمووو يا قلبي يوجعك شي ,,
لمياء : لبيه .., لا يا عمري مافيني شي ,,
فيصل : على فيصل هالكلام ,, حطي عينك في عيني اشوف ,,,
لمياء رفعت عيونها له وهي مليانه دموووع ,,, خايفه على هيفاء ومستقبلها ,,,
هيفاء : انا مدري ان هيفاء عندها مشكله مع فهد ,, ارجوك يا فيصل كلم فهد ,, هيفاء حساسه على انها تبين لك قوتها ,,
ارجوووك يا عمري ما يصير ,,
فيصل : هدي هدي وش صاير علميني ,,,
كالعاده امتد ليلهم لين الفجر وصلوا ثم ناموا على وعد فيصل لها انه كلها سوالف تصير عاده بين المتزوجين ولا تاخذ في بالها وهو عون لها ولهيفاء ,,,,

قامت هيفاء من بدري وشافت فهد للحين نايم قامت لفت ملحفها ورتبت مكانها ودخلت تبدل ملابسها
قعدت في غرفة الملابس فتره وهي تجهز حالها ما بغت تزعج فهد ,,, لبست لها بنطلون جينز وفوقه توب ناعم معه شال لفته على الرقبه بشكل حلووو ورفعت شعرها لفوق ,,, ولبست صندل نعوووم يناسب اناقتها وطلعت ,,,
وقفت عند تسريحتها وخذت عطرها الصباحي وحطت منه على شعرها وملا بسها ,, وسمعت فهد يكلمها
فهد وهو متسند على المخده وشكله يراقبها من دخلت عند التسريحه وهي ما انتبهت ,,,
فهد : صباح الخير ,,
هيفاء وهي تلتفت له بهدوء : صباح النور ,, ازعجتك ,,
فهد : لا وين بتروحين ,,,
هيفاء : موب رايحه .,, بنزل تحت عند جدتي وامي ,,
فهد : بذا الشكل

هيفاء : هيفاء وهي تشوف شكلها ,,, وش فيه ,,
قامت هيفاء من بدري وشافت فهد للحين نايم قامت لفت ملحفها ورتبت مكانها ودخلت تبدل ملابسها
قعدت في غرفة الملابس فتره وهي تجهز حالها ما بغت تزعج فهد ,,, لبست لها بنطلون جينز وفوقه توب ناعم معه شال لفته على الرقبه بشكل حلووو ورفعت شعرها لفوق ,,, ولبست صندل نعوووم يناسب اناقتها وطلعت ,,,
وقفت عند تسريحتها وخذت عطرها الصباحي وحطت منه على شعرها وملا بسها ,, وسمعت فهد يكلمها
فهد وهو متسند على المخده وشكله يراقبها من دخلت عند التسريحه وهي ما انتبهت ,,,
فهد : صباح الخير ,,
هيفاء وهي تلتفت له بهدوء : صباح النور ,, ازعجتك ,,
فهد : لا وين بتروحين ,,,
هيفاء : موب رايحه .,, بنزل تحت عند جدتي وامي ,,
فهد : بذا الشكل
هيفاء : هيفاء وهي تشوف شكلها ,,, وش فيه ,,,
فهد : اذا صرتي في المزرعة ما ابي ذا اللبس بعدين فيصل موجود ,, افرضي طلع في وجهك ,,
هيفاء : فيصل ما يدخل الا لما تجي لمياء وهم ما يجون قبل العصر
وبعدين مو اول مره البس كذا في المزرعه,, ولا اطلع لاي احد مو محارم ,,,
فهد : انا قلت لا يعني هي كلمه واسمعيها ولو سمحتي ادخلي بدلي ,,
هيفاء وهي ترفع حاجبها : يعني تقول لي هذه غيره ,,,
فهد : وش ماودك تسمينها سميها ,,,
مرت هيفاء من عنده ودخلت غرفة الملابس ما بغت تتهاوش معااه من متى هو حريص على شكلها ولبسها ,, هي احرص على نفسها منه ,, بس هو شكله جاي المزرعه يبي يتأمرر ,,,
فتحت الدولاب ما لقت الا فستان بعد لو لبسته بيبن شكلها مغري اكثر ,, اكثر اغراضها في الغرفة الثانية حقت البنات ,,,
وهي تافف من وضعها ما انتبهت ان فهد واقف على طول وراها ,,
فهد هااا حصلتي شي ,,, صرخت خفيف ما انتبهت له
هيفاء بأسم الله وش جابك هنا
فهد وهو يضحك :: لا مريت ابي اغسل شفتك شوي وبتضربين دولابك ,, قلت اساعدك
هيفاء : الحين وش يضحك ,,
فهد وهويرفع يده لخدها ويمسح على حاجبها المرتفع ,,,: شكلك وانتي زعلانه يضحك ما يليق لك الزعل
هيفاء تحاول تمسك نفسها بقوووه لان فهد شكله غير خطته تجاها فيماهو يترك لها القرار ويعطيها حريتها ,,, الا هو يتقرب لها بطريق غير مباشر ,,,
هيفاء : مو زعلانه بس طريقتك واوامرك اني اغير لبسي ما شفت لها داعي وفيصل ما اطلع له ابد
فهد وبهدوء شديد : ما يحق لي اغير عليك ,, وخذها بين يديه وضمها بهدوء اشد ,, وكمل جملته : اخاف يحسدوني عليك ,,,,,
ما شافت هيفاء بنفسها الا وهي تقوله اسمح لي بروح اخذ ملابسي من غرفة عمتي مريم ,,, وطلعت وهي تسمع دف قلبها بقووووه وبيصم اذاانها ,,,,
دقت غرفة عمتها بيد ترتجف وفتحت لها رهف وقالت لها ان امها نامت في الغرفة الثانيه ,,, دخلت وهي مو مستوعبه وش تشوف وش تأخذ بالها عند فهد وحركته اللي سواااها ,,, مادرت حست ان الوقت مر وهي على الحال ذا ,, فقررت تطلع جلابيه حرير ثقيله شوي بس الوانها على البنفسجي وتدرجاته ,, البستها في غرفة البنات وغيرت شكلها وطريقة شعرها ,, ونزلت لجدتها
فهد رجع لسريره وحس براحه انه تكلم مع هيفاء شوي غمض عينه راح فكره بعيد ,,,,,
اول مانزلت هيفاء وحصلتهم على طاولة الطعام يفطرون جدتها وامها ,,, رحبوا فيها وقالوا لها تشاركهم ,,
وهم في سواليفهم ,, قالت لها ام طلال : عمتك هدى وبناتها بيجون اليوم وبينومن هنا االاجازة ,,, شوفي الشغالات يرتبون لهم غرفة ,,’
هيفاء وهي مغتمة من داخل : ان شالله يمه ,, كملت فطورها وقامت تشوف الشغالات تعطيهم خبر عن الترتيبات الجديده ,,, ولما شافت نفسها حره شوي وومافيه اي شي تسويه ,, خذت شرشف الصلاه والبسته وطلعت تبي تشوف الخيول ,,,
قعدت عندها فتره مو بسيطه تحاول تركز على اشكالها والوانها تبي تفرق بين كل واحد والثاني ,, سمعت فهد يقول لها : اللي يشوفك وانتي تشوفينها يقول انهم بيعطونك فيها اختبار ,,,
هيفاء ضحكت على تعليقه : مو قصدي كذا بس الخيول حلووه ومتشابهه في الالوان واكيد بينها فرق وهذا اللي اركز عليه ,,,
مسك يدها قال طيب تعالي ,,,وريني اي واحد اللي عطيتك اياه ,,,
ضحكت من دون قصد : لا لا توهقني اصير كني غبيه ,,
فهد ::: لا لا تعالي وشوفي يمكن تتذكرينه ,, انتي كنتي واقفه تشوفينه ذاك اليوم اكيد عجبك اكثر منهم كلهم ,,,
ما زال يمسك يدها وما حب يتركها ,,, وهيفاء تحاول تطلع الحصان من المجموعة الموجوده ,,,
هيفاء : اممم ,, لحظه ,, بشوف وهي تاشر بيدها على واحد ,, لا لا اي ,,, اي هذا هذا واشرت على واحد لونه جدا مميز افتح بشويه من الجميع وفيهلون ابيض في جبهته طريقتها غير شوي بالاضافه ان عينه كانت فاتحه وغريبه

فهد : صح :: ما شالله عليك ,, هو ..هذا اسمه (( جراح ))
هيفاء : هو لحد معين والا لك والا لعمي ,,
فهد : هذا اغلى واحد في المزرعة ومو مسموح لاي احد يركبه ,,
هيفاء وهي تفتح عيونها كعادتها اذا استغربت شوي : لمين ,,,
فهد : لي ,,
تأثرت هيفاء من طريقته معها : فهد ترى انا عادي وما اعرف لها انا ما ودي تعطيني اياه ,,,
فهد : بتعرفين وانا اللي بعلمك عليها ,, كل يوم بطلعك عليه وش رايك
انحرجت هيفاء وحست بالفعل انها محرجه منه حيييل : ودي اي وقت انت فاضي ما عندي مشكلة
رجعوا للفيلا عند جدتهم وظلوا معها طول الظهر فيصل ولمياء مالهم حس ,,, وريما نايمه ومريم مشغوله مع عيالها ,, وما بقى الا الحريم الكبار وفهد وهيفاء ,,,
فهد : وشرايك نطلع نسوق بالسياره وهو يكلم هيفاء ,,,
هيفاء : ما عندي مانع وشافت انها بدت ترد عليه براحه وما تحس نفسها مستحيه منه ,,,,
قام فهد ومسك يدها وقامت له وام طلال تشوف ومبسوطه على الاخر وتدعي لهم ان الله يسعدهم ,,,
طلع فهد وهيفاء بجنبه لحد ما وصلوا مكان يبعد عن مزرعتهم بكم كيلو ,, ومنظره رووووعه رمل وفيه زهور بريه واعشاب يفتح النفس ,, مكان يرد الروح ,,, ما قاومت هيفاء نفسها
هيفاء : فهد ممكن ننزل هنا شوي ,,,
فهد : من عيوني ,,, ووقف سيارته ونزل منها وجاء يم هيفاء اللي نزلت وخذت نفس عميق ,,,
حست ببرودة الهواء تدخل في اعماقها مع ريحة الزهور المميزة ,, ما راح تنسى اللحظه هاذي ابد
نزلت وقعدت على الرمل وفصخت صندلها تبي تحس ببرودته في قدمها وفهد يطالعها متأمل شكلها
جلس جنبها وشاف بعييد بعييد ,, وحس اللحظه ذي حلوه بكل مافيها جمال المنظر وروعة الزهور وكمله شكل هيفاء وهي بجنبه وشرشفها على كتفها وشعرها على خدها منظرها حلللو مثل برائتها الطبيعية ,,,
خذ فهد يدها في يده وجابها جنبه شوي ومسح على شعرها برفق شديد ..,,, مرر يده على حواجبها وعيونها وخشمها وشفايفها
فهد : سبحان اللي خلقك ,, ما شالله عيونك فيها لمحة حزن مستحيل تخفينها وتظهرين قوتك في تصرفاتك
ما حبت انهاتسمع كلامه لانه يكشفها بسهوله
هيفاء : حلووو المكان
فهد : شفت بنات ولفيت العالم بس ما شفت مثل برائتك ,,, لها طابع خاص احسه لك بس ,,,
هيفاء : فهد ممكن نرجع يمكن جدتي تبي شي
فهد : هيفاء ممكن تعطيني فرصة اعوضك عن اللي صار كله ,,,
هيفاء امتلت الدموع في عيونها ونزلت على خدها وفهد يمسحها بيده ثم خذ كمه وكمل به فما كان من هيفاء الا ضمته لها بقوووووه لانها ابلغ من اي كلام آخر
((الجزء الواحد والعشرين ))


وقت السعادة بسرعة يمضي وما نحس فيه وهذا حال هيفاء وفهد اللي ظلوا في مكانهم ساعتين كأنها دقيقتين من حلاتها ,,
هيفاء شعرت بصفاء قلبي رائع مع فهد ,,, وفهد برضاء هيفاء شاف انه ملك اروع قلب في حياته ,,,
فهد مغمض وتارك راسه يسترخي على رجل هيفاء ,, ويلعب بشعرها بأصبعه ويلفه هيفاء خجله منه بس ما تبي تكون جامده فمسحت عيونه بيدينها وهو مغمض ,,,
فهد : تدرين وش في بالي الحين ,,,
هيفاء : وشو يا عمري
فهد : ودي اخذك على جراح واطير بك مكان ما يقدرون البشر ياصلونه ,,, واشبع من كلامك وسوالفك ومن جمال وجهك الحلووو
هيفاء تضحك بهدوء لها حركة ضحكتها كنها ضحكة بزر صغيره ما ودك تشيل عينك منها : وجدتي لا لا فديتك وهي بالوضع ذا ما اقدر اتركها
فهد : انا قلت في بالي ,, ورغبتي ,, وامنيتي ,,
هيفاء وهي تحاول ترضيه : اذا طلعت جدتي من عدتها خذني اي مكاان بروح معك ,,,
قعد فهد ولف عليها : مدري اقدر اصبر لذاك اليوم والا لا بشوف ,,, ووقف ومد يده لها وقامت وباس جبهتها وساعدها تنفض الرمل من ملابسها وركبوا السياره ومو حاسين انهم تاركين المزرعة من فتره ,,,
بعد وصولهم وقف فهد السياره ,, ونزلت هيفاء : والتفتت له ماودي ان حنا رجعنا بس اكيد جدتي بالها انشغل علينا ,, لكن الحقيقه ما حسيت بالوقت رووووعه ,,,
فهد : ممكن طلب ,,
هيفاء : اكيد انت تآمر ,,,
فهد : ابي قهوة لي في غرفتي ,,,
هيفاء : بس كذا من عيوني وغمز لها بعينه ولف تجاه الخيمة بيشوف من فيها ,,,

دخلت هيفاء مستعجله للفيلا شافت ان الوقت راااح عليه كثيير كنها طالع اليوم كله مو كم ساعه ,,,,
اول ما دخلت شافت عمتها هدى جالسه ,, جنب ام طلال ومريم ,, ومالقت امها,,
سلمت عليهم هيفاء وسألتها مريم
مريم : من طول الغيبات جاب الغنايم ,,,
هيفاء وهي تبتسم بأتسامه حلوووه: مو عاااد غنايم شي بسيط شوية رمل على زهور بريه ,,,
ام طلال : اهم شي فهد انبسط معك وهي تتعمد ان هدى تسمعها ,,,
هيفاء : عمتي هدى شلونك ؟؟؟
هدى : نحمد الله ,, عايشين على ماقال,,
هيفاء : ونعم بالله ,, عن اذنكم بشوف امي ,,,
طلعت هيفاء وهي تدور لأمها ,, لقتها في غرفتها متمدده ,,
هيفاء : هلا يمه وش فيك قاعده لحالك,,
لطيفه : ولا شي يا بنتي ,, بس انا اذا شفت عمتكم ذي تضربني ضيقه ,, ما ارتحت لها ابد ,,
هيفاء وهي ما تبي امها تشك بشي :: كلها يومين وتروح ,, ماعليك منها وخذي راحتك ,,
لطيفه : وين رحتي مع فهد ,,
هيفاء : رحنا نسوق شوي وحصلنا مكان يهبل يمه كله عشب وزهور ,, يرد الروح وقعدنا فيه,,,يمه انا بروح اجهز لفهد قهوة تبين شي ,,
لطيفه : سلامتك ,,
طلعت هيفاء من امها ودقت على لمياء اللي قرب المغرب وهي ماجت :
لمياء : الووو
هيفاء : صح النوم : انتي تعرفين حق الصلاة والا لا قد صليتي الظهر والا العصر,,,
لمياء : الحين بصلي تبين شي ,,
هيفاء : هاذي مو طريقه يا لمياء انتي لازم تغيرين هالبرنامج وش دعوا انقلبت حياتكم فوق تحت ,,
لمياء : احاول والله بحاول ان شالله اصلي الفرض في وقته ,,


سكرت منها هيفاء وهي معصبه على اختها اللي حست انه من حبها لفيصل وتفانيها له تغيرت حياتها والمفروض يكون للاحسن مو للاسوأ
دخلت المطبخ التحضيري وسوت قهوة لا يعلى عليها من خاطرها ,, وقالت للشغاله تطلعها فوق ورتبتها في صينية حلوووه ,,,
طلعت لغرفتها ودخلت تأخذ شاور على المغرب ,, وخلصت ولبست لها فستان لبسته قبل كذا بس يعجبها من كثر ما تشوف نفسها فيه ,,,
رتبت حالها وشعرها المموج ولفت غرتها على جوه برولات ثم فكتها ورفعتها بشكل ملخبط لحد ما وصلت للشكل النهائي اللي تبيه ,, تعطرت بشكل حلو وكثيف ولبست سلسال جدتها اللي اهدته لها في زواجها ,,,ومع رائحة البخور اللي معطره الجو قعدت تنتظر فهد ,,,
ما تاخر كثيير شوي الا هو عندها ,,
اذهله منظرها ولاول مره من تزوجها مسكها وقعد يتمعن فيها دقق في كل شي لابسته ومسك شعرها ووقربه من خشمه وخذ نفس عميق
فهد : الله وش هالزين ,, انتي فتنه واخاف حد يشوفك ,, ما ابي اي احد يشوفك الا انا ,,
هيفاء مبتسمه ومستسلمه لكلمات الغزل اللي اطربت مسمعها ,,,
هيفاء : انا حلوه صح بس لاتكبر راسي ,,,
فهد : حلوووه قليله في حقك ,, انتي مذهله ,, انتي حاجه ما تتكرر انتي احلى ما خلق ربي
وهيفاء مستمتعه بفهد وحنانه ,, الا صوت جوالها ,,,
ريما يتصل بك ,,
هيفاء : هاذي ريما برد عليها وفهد عارف ان ريما بتنشب لهم ,,
خذ جوال هيفاء وفتح الخط
فهد : الووو
ريما : هلا فهد هيفاء عندك ,,
فهد : مشغوله شوي عندك شي ,,
ريما : البنات كلهم متجمعين ما ناقص الا هي ,,
فهد : ما تقدر تجيكم وصيتها على شغل لازم تجهزه لي ,, يالله فمان الله ,,,
وهيفاء تضحك ,, من جدك ,, لازم اطلع لهم الحين والا بعدين اصير حديثهم
فهد : وانا ابيك تصيرين حديثهم وطلعة مافي طلعة وهيفاء ضحكتها الحلوة ماليه المكان ,,,,,,

مشاعل قاهرها كلام ريما عن هيفاء وفهد وانها ما تقدر تجيهم ,,, اكيد مسويه له شي هذا ماكان يبيها وش صار غيره ,,, اكيد فيه ان ,,,
وعبير ترسلها طول الوقت مسجات ,,
شفتي فهد ,, الحية وشلون شكلها ,,, شكلهم مستانسين والا مطاقين ,, عطني شي يفرحني انه ما يبيها
ومشاعل اللي ماعندها اي اجابه صارت تالف قصص وترسلها لعبير عشان يتخيلون فيلمهم مع بعض وان فهد لازم يبعد عن هيفاء
فكانت ترسل لها (( تلوع الكبد نظرتها كلها غرور ... فهد من جينا وهو في الخيمة وعرفت من الخدم انه ينام في غرفه وهي في غرفه ,,,
وسعي صدرك ما راح يصير الا اللي نبي ,,,,

مر الوقت عليهم في سوالف وتقضية وقت بين تلفزيون وضحك وتغيير جو على جدتهم لحد ما جاء وقت العشاء ,,,
ما نزلت هيفاء والجميع يتسائل : غريبه مو عوايد هيفاء وش فيها ,,
ارسلت لها ريما مسج (( العشاء جاهز وينك ))
فردت عليها هيفاء (( لا تنتظروني ,,, مشغوله شوي ))
ريما فهمت رسالة هيفاء ولما سالتها ام طلال عن هيفاء : قالت مصدعه وتبي تريح شوي ,,, وحاولت انها تصرفهم ,,,


قامت هيفاء ,, تشوف وين فهد لقته يشوف التلفزيون واول ما سمع حركتها انها قامت وطى عليه ,,
هيفاء : كم الساعه ؟؟
فهد ثلاث يا عمري ,,
هيفاء : يوووو كثييير ,,,
فهد : تبين شي ,,
هيفاء : لا بس مادريت عن جدتي ولا امي ,,
فهد : لا تحاتينهم ريما وهيفاء موجودين ,,,
هيفاء وهي تحط يدها على شعرها : : اسوي لك شي تأكله ,,
فهد : انا مو جوعان بس اذا بغيتي شي بنزل معك ,,
هيفاء : انا مو جوعانه بعد ,,,
قعد يتأملها : انتي غذاء روحي ,, معك لا آبي اكل ولا اشرب ولا شي ,,,
هيفاء وهي تغطي وجهها بالحافها : لا تحرجني عاااد ,,,


مع بداية صباااح حلووو للجميع ,,
قام فهد وهيفاء بدري على الساعة 7 ونزلوا والناس كلهم نايمين جهزت هيفاء لهم كاس شاي ووتوست وفطروا على السريع وطلعوا بسرعه للخيول ,,,

خذ فهد جراح وحط عليه السرج وقال لهيفاء تلبس البوت حق الخيل وتلبس الخوذه ,, وجهزها بالشكل المناسب وساعدها تركب الحصان

وخذه يسير به لحد ما طلعه من الاصطبل ,, وابتدأ مع هيفاء اول درس كيف تسوي ومتى تضرب رجلها ومتى تمسك الرسن بقوة ومتى ترخيه ,,
وعلمها كيف تفاهم مع الحصان بلغتها هي عشان يتعود عليها ويحبها
هيفاء : اخاف ما يحبني وهي تضحك
فهد : ما يقدر دام راعيه ملكتي قلبه فلاتفكرين اكيد بتقدرين عليه

هيفاء سرحت في فهد كيف انه خلال يومين بس قدر يوصل لها مشاعر اختزنها في نفسه فتره وما قدر يعبر لها ,,كله منك يا هيفاء انتي بعد عليك راس يابس المفروض سمعتي كلام جدتك من اول وما تركتيه للحريم ,,,

لفوا في طرف المزرعة بالاخير عشان هيفاء تاخذ راحتها ,,, ولما رجعوا بعد كم ساعه ما شافوا اللي يراقبهم من بعيييد ,,
مشاعل اللي الغيره ماكله قلبها من هيفاء ,,,تمنت يوم شافتهم وهما جايين مع بعض انها هي تكون مكان هيفاء لاعبير ولا غيرها معه ,,
مشاعل حبت فهد فتره في عمرها بس عبير ما تركت لها فرصة وقدرت انها تقرب من فهد اكثر بأسلوبها ,,,
حست بالغيره تنهش قلبها وعزمت انها تملك فهد بأي طريقه لكن الحين لازم تساير عبير في خطتهم لحاجة في نفس يعقوب قضاها ,,,,

اول ما وصلوا للاصطبل مد فهد يده لهيفاء ينزلها واول ما نزلت مسكها من خصرها وقرب لها اكثر
هيفاء : فهد انت مو صاحي لا يشوفك احد يقولون استخبلوا
فهد وهو يضحك : خليهم يقولون ما عندي مانع ,, تحررت منه هيفاء لكن بعد فتره بسيطه وخذت اغراضها اللي تركتها ولبست صندلها
وجت بتطلع ,,
فهد مسك يدها وقرب لها وهمس في اذنها بكلام ضحكت له من اعماقها وطلعت بسرعه لانها عارفه فهد يمكن يتهور ,,,,
على طول طلعت لغرفتها تبي تأخذ شاور من ريحة الاصطبل والخيل ,,,

لبست كعادتها لبس متالق يزيدها فتنه وتعطرت ونزلت للحريم ,, كانه دهر مو يوم تاركتهم ,,,,
اول ما دخلت وعمتها هدى تتفحصها كنها تشوفها اول مره ,,
ام طلال : هلا يا قلبي تعالي يمي ومشت هيفاء لها ,,,
اول ما قعدت جنب جدتها تكلمت هدى : يمه انتي متى بترجعين ,,,
ام طلال : وش عندك ,,
هدى : افكر اروح عمره ويمكن اترك البنات عندكم واطلع مع العيال ,,,
ام طلال : اتركيهم هنا ,,,
هدى : ما يحبون المزرعه يبون كل شي قريب عليهم وفي القصر سعة اكثر ,, خلاص اذا رجعتي القصر بتركهم عندك ,,,,
ام طلال وحست بالالتزام لهدى : يصير خير ,,,
هيفاء تضايقت بقوه من عمتها بس مافي يدها شي تسويه ,,,
دخلت مشاعل بعد فتره وهي متجهزة على الاخر اول ما شافتها هيفاء ضاقت منها ومن طريقتها في اللبس ,, لا وفهد يقول لا تلبسين ولا تلبسين وتجي ست مشاعل وتستعرض قدامهم,,,
مشاعل وهي ناوية تغم هيفاء : كيفك يا هيفاء ,, ماشفناك امس مختفيه ,,,
هيفاء: موجوده بس ماشفتكم اول ماجيت من برى,,
مشاعل : ريما يا قلبي عبير تسال عنك تقول انها بتقعد عند خالتي سلطانه امها بتحضر زواج قرايبهم في جده وما تبي تروح ,,,
وبتقعد عندكم اليومين ذي ,,
ريما : ما قالت لي امي شي ,,, بعدين مدري اقدر اروح ولا لا المزرعة تفتح النفس ,,
مشاعل : ماعليك اذا بتقعدين هنا انا بروح بوسع صدرها وبعدين خالتي سلطانه مهي مقصره ,,,ومشاعل عينها على هيفاء تبي تشوف ردة فعلها ,,,
هيفاء كانت تغلي من جووووه ,, دام عبير ومشاعل في الوجود ما راح تستانس بحياتها ,, هذولا ما يجيهم شي يفكني منهم ,,, حست بنكد طول الوقت بس ماحبت انها تبين لهم وحاولت قدر الامكان انها تخفي هالشي عن عيونهم ,,,

لمياء تتابع كل شي في صمت مطبق ولا كانها هناااا ,,, هين يا مشاعل ما تركتي حركاتك انتي وعبير ,,, لازم اساعد هيفاء باي شي اقدر عليه ,,,,

قامت هيفاء من العشاء اللي ماذاقت منه شي حركت الملعقة في الصحن كذا تحصيل حاصل وراحت لغرفة جدتها ماهان عليها انها تحترق اعصابها اكثر من كذا ,,, دخلت وسكرت الباب ودقت جوال على فهد ,,
هيفاء : قلبي انت وينك الحين ,,
فهد : اتابع المباراه يا عمري تبيني اجيك الحين ,,,
هيفاء : لا لا ماودي تجي لين اقولك يا عمري الحريم كلهم هنا وبعدين انا كلمتك اسئلك انت عندك شغل والا بتقعد هنا في المزرعة
فهد حس فيها شي : اللي تبينه بسويه اروح اقعد ماعندك اي مشكله كم هيفاء عندي ,, طلباتك اوامر يادنيتي ,,,,
هيفاء تنهدت بقووووه وحس فهد بها : اسم الله على قلبك فيك شي ,,,
هيفاء : خايفه عليك منهم ,, ودموعها تنزل بصمت ,,,
فهد وكأنه فهم وش تقصد : لاتخافين ياقلبي انا عيوني لهيفاء وبس ,,,,

ارتاحت هيفاء من كلام فهد ,, اكيد اذا جاء بيسألها وش السالفه ,, بعدهي ما تبي تقوله كل شي بالصريح وانها خايفه من عبير ومشاعل وتبي تحسسه انها عندها ثقه فيه وفي نفسها ,, الله يقدرني اتعامل مع كل شي بالوجه الصحيح ,,,,


دخلت عليها ام طلال اللي صار لها كم يوم بعيده هنا شافت اليومين اللي قضتها مع فهد انها بعدتها عن جدتها وامها بس غصب عنها ,,,
ام طلال : تعالي ياحبيبتي ,,, ليه ما تعشيتي ,,,
هيفاء : مالي نفس يمه ,, بس مافيه شي لاتخافين ,,,
ام طلال : شوفي ياعمري انا بقولك كم كلمه بس حطيها في بالك زين ,,,
اذا صار الرجال ينشرى والناس حاطين عينهم عليه ,,, ترى كلن يبيه لو هو متزوج ,,, واذا صارت زوجته رضيه وحبيبه وجميله مثلك ترى ما يلتفت لهم يا عيوني ,,,
فهد يبيك انتي فلا تتكدرين من عبير ومشاعل هذول يمك يبون فهد من اول بس هو ما يبيهم ,,,,
ارتاحت من كلام جدتها ,,, كل مره جدتها تكلمها تحس انها تكلم روحها وتدخل في اعماقها ,, ياحبي لك يمه ,,,,
طالت السهره شوي وهدى متعمده انها تطولها وتكلم فهد تبيه يجي يسولف معاهم وبناتها قاعدين ,, هي عارفه ان العنود بتروح اذا جاء فهد لكن مشاعل ما راح تقوم من مكانها ,,
فهد قال لهم انه جاهم جارهم في المزرعة وبيتأخر شوي وهو ما يبي يجي لين تكلمه هيفاء,,,,
بعد منتصف الليل يأست هدى وبنتها وراحواغرفتهم وطلعت العنود مع ريما قبلهم وخلصت جلستهم والجميع توجهوا لغرفهم
دخلت هيفاء غرفتها وارسلت مسج لفهد ((تعال يا قلبي ))
مشاعل اللي عارفه ان فهد بيطلع فوق بعد ما تنقضي سهرتهم ,,, نزلت تحت تعلل بالمطبخ انها تبي عصير وهي تنتظر بس متى فهد يدخل عشان تشوفه ,,, قعدت تشوف شكلها في المرايه وتحاول ترتب شكلها اكثر وتوب اللي ماسك على جسمها ,,,
وهي جالسه تحوس في المطبخ سمعت صوت الباب فخذت كاس العصير وهي مجهزته في يدها ,, اول ما سمعت خطوات فهد داخل ,,,
طلعت في وجهه ,,
مشاعل :اووووو هلا فهد ,, وينك ما تنشاف ,,
فهد وهو يكمل طريقه ,, هلا بك مشاعل ,,, ابد موجود وهو يطلع للدرج وهي وراه ماحب انه يجر معها سالفة في آخر الليل
اول ما جاء اخر درجه قالت بصوت عالي فهد امسك العصير احس قطوه في المكان وتمسك فهد كاسها ,,,
وترفع صوتها فهد فهد وتحاول انها ترمي نفسها عليه وينكب العصير من يده على ملابسه
اول ما فتحت هيفاء الباب على الصوت شافتها مشاعل
مشاعل بدلع : حرام عليك يافهد ,, مو كذا عاد هنا ,,, وفهد مو مستوعب اللي تقوله ,,, وعينه على هيفاء اللي سكرت الباب بقووووه في وجهه,,,,,

(( الجزء الثاني والعشرين ))

صوت دفة الباب بقوة اثرت في فهد ,,, تحرك شوي ورمى الكاس من يده والتفت لمشاعل: يا حقيره ,,,,,,
ودخل غرفته وسكر الباب وراه ما شاف هيفاء ,,فتح باب غرفة الملابس ما انفتح ,,, دقه شوي بهدوء ,,
فهد : هيفاء : افتحي الباب ,,
وهدوء من قبل هيفاء ولا صوت ,,,
فهد : انتي افتحي الباب نتفاهم ,,,
صوت شهقة هيفاء وهي تحاول تكتمها ولا ردت عليه ,,,
فهد وهو ماسك نفسه حده وما يبي يطلع صوت اكثر عشان الناس اللي نايمين : اقولك افتحي والا والله ما راح يحصل خير ,,,
هيفاء سمعت نبرة التهديد وقامت للباب وافتحته وهي تصد منه ما تبي شوفه
فهد : انتي الحين مصدقه هالحقيره وفعايلها ,,,
هيفاء ما ردت عليها تشوف انها مصدومة وما تبي تحكي الحين ,,,
فهد : انتي وش شايفه عمرك ما تردين ,, اكلمك انا مو اكلم جدار ,,, تكلمي ,,انتي الحين مصدقه ,, ترى كله حركه من مشاعل تبي تغيظك ,,, انا اعرف حركاتها ,,, مو اول مره تبي تلفت انتباهي ,,,
هيفاء وماضي الجراح القديمه كلها انفتح مجددا: وليه ما تكرر موقفها مره واثنين وعشر بلاها ما حصلت من يوقفها عند حدها,,
واظن آخر مره جيت المزرعة هنا صدقتهم وخسرتني ,,, مشيتها لك لكن لحد هنا وخلااص انا لا اقدر استحملك ولا اقدر استحملهم
فهد كان ماسك شماغه في يده وطاح منه على كلمة هيفاء : هيفاء انتي وشتقولين ,, الحين هذا ردك ,, انتي في عقلك والا لا ,,, وش هالكلام ,, انتي هيفاء اليوم ,, انتي هيفاء اللي في البر ,, والا هيفاء اليوم عند الخيول
هيفاء : انا هيفاء ما تغيرت لكن اللي مسوي فيها انه شخصية ومعجبات يبي شي في يده ويبي كلن يهتم فيه ,,,لا يا قلبي ,,, اشبع بهم عارف هالشي والا لا وتمر من جنبه تبي تطلع ويمسك بيدها بقوه
فهد : انتي تعنين الكلام اللي قلتيه ,,,,
هيفاء : اي اعنيه بكل حرف طالع من قلبي فاهم هالشي ,,
فهد : وامس ما يعني لك اي شي ,,,
هيفاء وهي تشيل يدها بقوه منه : واحد بمثل تصرفاتك ما يعني لي شي ,,, اسمح لي ,,,, وطلعت من الغرفة ونزلت بسرعه تحت ,, ما درت وين تروح حست الدنيا مسكره في وجهها وكل شي ظلام تتخبط فيه ,,, يوووووووه وش اسوي يا ربي ,,, شافت نفسها كنها تسبح ضد الموج وروحها تختنق حتى من النفس ,,, طلعت م الباب الخلفي وراحت اصطبل الخيول ,, مستحيل تنكد على احد الحين ,, هي ما تبي امها تعرف ولا جدتها ,, وحتى ريما ,,,, اااااه يا ربي ,,, طلعت وهي تجري وفتحت باب الاصطبل ودخلت وقفلت الباب من داخل وقربت من كرسي خشبي وقعدت عليه ,,, شافت نفسها ضعيفه ومسكينه ومالها احد ,, كم مره تجرحني يا فهد ,, ليه وش سويت ,,, ليه تقرب مني ثم ترفعني في السماء وما تخليني اتهنى بفرحتي الا انت مطيحني في القاع ,, ليه يا فهد ,,, اااااااه وقعدت تبكي مثل البزر اليتيم ,,, ااااااه يا ليت لي اخ كان حسيت ان لي حد يبيني ,, ااااه الله يرحمك يبه ,,
قعدت تبكي لين كرهت نفسها ,, انا اسوي في نفسي كذا عشان رجال وليه ,, وقعدت تأنب نفسها ,, انتي لو حرمه سنعه كان ما جريتي من غرفتك كنك خبل ,, وليه هو اللي ما يطلع ويفارقك ,, كله من مثاليتك اللي ودتك في دواهي
اااه لييتني زيهم كان اصير نجسه مثلهم واوريهم اني اقدر ابيلهم في شي واحرق الاخضر واليابس عليهم
وفجأه حست كن حد معطيها كف بقوووووه ,,, وتشوف خيال امها لطيفه ,هي تكلمها ,,, اصحي يا هيفاء اصحي ,,
انا ربيتك على كل العلوم الطيبه تجين تسودين وجهي عشان مشاعل وعبير ,, تبين تصيرين زيهم صيري لكن لا انتي بنتي ولا اعرفك ,,,
هيفاء حست امها عندها وتعطيها كف تصحيها من وساوس الشيطان اللي ما يدخل على الانسان الا في حالة ضعفه ,,,
ااااه يا ربي ساعدني قعدت على ارض الاصطبل وتوسدت التراب وحطت راسها ونامت بعد ما مر عليها وقت طويل قبل يأذن الفجر ...,,,,

فهد ما صدق ان هيفاء تقول هالكلام ,, كيف كل شي سهل في يدها وتترك كل شي بسهوله ,,,يعني معقوله تصدق مشاعل وحركتها الوسخه ,,, اكيد هي تبي تصدق فيني اي شي المهم ترتاح مني ,,, كم صار لي وانا اللي اتقرب واتودد وهي تتفرج علي كنها تبي تاخذ حق لها عندي ,,, معقوله يا هيفاء انتي كذا ,,,
وطلع على طول وخذ مفتاح سيارته ورجع للقصر ,,,,,,,


قامت هيفاء وجنبها يوجعها من الارض والرمل في وجها مسك على دموعها وهي تنزل ,,,, قامت شوي ونفضت اللي في وجهها وجسمها ,,, ما تدري الساعه كم ,,, ولا معها جوال بس حست انه بعد شروق الشمس بشوي
طلعت من الاصطبل بشويش وما تبي احد يشوفها بالشكل ذا ,, ودخلت من الباب الجانبي وعلى طول راحت فوق ,, وتدخل غرفتها وتمنت ان فهد يكون نايم ,,, هي تبي تغير وتنزل عند امها وتقولها على كل شي الى متى وهي كاتمه في نفسها ,,,
اول ما دخلت الغرفة ما حصلت فهد ولا له اثر ,,, فتحت النافذه تبي تشوف سيارته ,,, بس ما لقتها ,,, على طول جت عند جوالها ,,, تبي تشوف كم الساعه او فيه شي من فهد وانصدمت انه خالي تماما من اي شي ,,, يالله
دخلت على طول وخذت شاور طويل جدا تبي تغسل قلبها من كل الهموم ,,, تبي تصير قويه زي اول ,,, تبي تصير هيفاء قبل تعرف فهد ,,, تبي تكون هيفاء ,, اللي كلن يلجأ له تفزع له ,, هي اللي تبي حد يوقف جنبها الحين وجتها نوبة بكاء ,,, يالله هذا كله انتي راحمه حالك والا خايفه تخسرين فهد ,,,
وحاولت تتماسك قد ما فيها ,,, ولبست ملابسها العادية ولا حاولت تبذل جهدها في اي شي ,,, وبعدين اول ما خلصت وشافت نفسها في المرايه ما رضت على حالها ,, اكيد مشاعل اذا شافتني بتنبسط ,, ورجعت ثاني وضغطت على حالها وكشخت حدها الا المكياج مالها نفس له اول جدتها وثمن حالتها لكن حاولت انها تعطي نفسها ثقه عشان تنعكس على شكلها ,,,

نزلت هيفاء تحت ,, وما صادفها اي احد الظاهر انهم نايمين ,,, دخلت المطبخ التحضيري ,,
شافت جوالها يمكن فهد بيرسل اي شي ,,لكن للاسف فاضي ,,, خذت لها كوب وصبت فيه مويه حاره حضرت لها كوفي بدون حليب وبدون سكر ,,, وقعدت على الطاوله ودخلت في داومة فهد للمرة الالف ,,, شافت البخار المتصاعد من الكوب ,, وتمنت انها تتبخر مثلها وتختفي من هالمكان في لحظه ولا تشوف اي أحد ولا تبرر لأي احد ولا تعتذر لأي احد ,,, تمنت عندها اخ تكلمه وتقول تعال خذني انا تعبت ,,, لكن حظك مو زين يا هيفاء ,,,
ظلت نص ساعه وهي قاعده ولا فيه حد جاء وسمعت صوت الرساله وعلى طول فتحتها :
(( بصراحه صدمني موقفك وبين لي انتي شلون ضعيفه وتختبين وراء قناع مزيف ,, قناع جمالك وقوتك ,,,
انا تركت المزرعة وبرجع لشغلي ,, ما عندي اي شي اقوله الا اللي تشوفينه مناسب لك اتخذيه ))
طاحت دمعتها على شاشة الجوال ,, دمعة ثقيله حيييل ,,, وقامت على طول ما تبي اي احد يشوفها ودخلت غرفتها ,, شافت سريرها وقعدت تبكي اكثر من البارح ,,,

ريما قامت مع الظهر ,, وخذت لها بنطلون جينز وفستان واسع ابيض وخذت لها ايشارب كحلي في دوائر صفراء ,, وربطته على رقبتها وتركت شعرها على راحته وطلعت تشوف العالم ,,, العنود قالت لها انهم اذا يمكن يرجعون مشاعل تقول عنده شغل ,,, ريما وهي تحكي نفسها : اي واشغل انتي وجهك يا مشاعل بالله وش بيطلع منك ,,,,
نزلت لغرفة جدتها لقت عماتها وجدتها يسولفون ,, ولطيفه مهي فيه ,,,
مشاعل والعنود متجهزين بيمشون مع امهم بعد الغداء ,, بس غريبه وين هيفاء مالها حس
ريما : يمه وين هيفاء
ام طلال : يمك ما شفتها وكلمت فهد مع الأذان قال انه رجع للرياض كلموه عنده شغل ضروري
مشاعل وهي ترقص بعينها من الخبث وحست ان خطتها ماشيه في الخط السليم ,,,
مشاعل : يمه لازم ننتظر الغداء انا وراي اشغال لازم اخلصها ,,,
هدى : ما يخالف اشرب قهوتي ونمشي كلمي السواق يجيب السياره ,,,
ريما في نفسها : فكه منكم ,,,,
طلعت ريما فوق تبي تشوف هيفاء ما ارتاحت ابد على الوضع الحاصل ,,, هيفاء مو فيه وفهد رجع فجأه ,,,
دقت باب هيفاء مره مرتين محد فتحه لها ولا سمعت صوت هيفاء ,,,, تالي فتحت الباب ودخلت ,,,,
لقت هيفاء نايمه في السرير ,,, ومتلحفه بالكامل ,,, استغربت منها وش فيها ,,, قربت يمها وقعدت عند حرف السرير ,,, ورفعت اللحاف عن وجه هيفاء وشافت الدموع الحاره ماليه خدودها ,,,
ريما بصوت عالي شوي : هيفاء وش فيك ,, تكلمي ,,,
هيفاء قعدت تصيح بهستيريا ,,, مافيني شي ابي ارجع ديرتي !!!!
ريما : هيفاء ياعمري كلميني وش صاير ,, فهد قالك شي زعلك ,, تكلمي عاااد ,,,
هيفاء : ماقال لي شي ولا زعلني بس انا ابي ارجع مع امي خلاص ,,, انا ما اقدر اكمل معه وبس,,,
ريما : شكلك زعلانه اذا هديتي يا قلبي كلميني وطلعت منها وسكرت الباب ,,, ضاقت ريما من الوضع ,,,
لمتى وهي تقرب بين فهد وهيفاء وهم يبعدون ,,, وش ذنبي انا اعصابي كلها تتلف عشان امزجتهم ,,, ليه مو راضين يقربون من بعض ويضغطون على انفسهم ويتجاوزون اللي هم فيه ,,,,
وهي على حالها اتصلت عليها امها سلطانه
ريما : هلا يمه وشلونكم ,,,
سلطانه : طيبين نحمد الله ,,, متى بتجين يا ريما ,,, عبير تبي تقعد عندي لين تجي امها من جده
وش رايك ترجعين توسعين صدرها انا يمك مشغوله مع ابوك ما ابي اتركها بالحالها ,,,

ريما : والله مدري يمه بحاول :: ,,, وهي ما تبي ترجع بس حزنت من امها انها كلمتها وتطلبها تجي ,,,,
سكرت وهي زهقانه اكثر من اول ودقت على لمياء ,,
ريما : وشخباركم ,,
لمياء : الحمدلله , شكلك مو مبسوطه خير ,,
ريما وهي تعلم لمياء بعبير وانها بتجيهم ,,,
لمياء : الا بنرجع انا واياك وفيصل ما راح نترك عبير كذا سايبه على حل شعرها ,,, ما تدرين وش ناويه عليه ,,,,
انا مستحيل اتركها تخرب على هيفاء واسكت ,,, وريما مو ناويه تقول لها عن هيفاء
ريما : لو تدرين اجل فهد رجع للرياض وشكله هو وياهيفاء صاير شي بينهم ,,,
لمياء : لالا اكيد سالفة كايده يالله يالله بجيكم ,,,

ام طلال ما استانست ابد وحست ان قلبها مقبوض مادرت وش فيها بس غياب هيفاء له دخل ,,, بعد ما غادرت هدى وبناتهم اللي اول ماعرفوا ان فهد رجع للرياض وهما ما ودهم يقعدون ثانيه وحده عقبه ,,,طلبت ام طلال من مريم تطلع تشوف هيفاء ,,
ام طلال :: انا قلبي يقول انها فيها شي ,,
مريم : ما يكون الا خير اطلع لها الحين واقولك ,,,
طلعت مريم لغرفة هيفاء ودقت عليها الباب واول ما انفتح شافت لمياء حاضنه اختها وريما قاعده جنبها
اسرعت خطوتها شوي ,,,وجت يم السرير ,, وهي منصدمه من شكل هيفاء : خير وش صاير ,, وشفيكم ,,,
ريما : هيفاء تبي ترجع الديرة
مريم : وشو ,, انتي تحلمين والا عقلك فيك ,,,
هيفاء ما ردت عليها ابد تركتها بحيرتها ,,,
مريم : ممكن اعرف وش السالفه ,,,
هيفاء : مافيه سالفه انا وفهد اتفقنا ان كل واحد يروح لطريق ,,,, وهذه حياتنا محد له دخل ,,,
مريم قامت زعلانه منها ومن اسلوبها في الكلام : يمكن احسن لكم ,, لانك ما تستاهلين فهد ,,,,
وطلعت وهي تصفق الباب بقوة وصفقت قلب هيفاء بقوة اكثر بعد الكلمة هاذي ,,’’’
قعدت هيفاء تصيح على نفسها وريما تهديها وتقول : اذا عمتي مريم قالت كذا اجل جدتي وش بتقول
ريما : وش رايك نرجع القصر ولا نغث جدتي ومنها ترتاحين شوي ويمكن اذا صرنا قريب من فهد وقفنا بجنبه بعد
لاتفكرين انه مستانس الحين والا مبسوط
مستحيل :: الي اعرفه ان فهد ما وده اي شي يزعلك حتى لو منه ,,,,
هيفاء ما ودها ان ريما تشوف المسج بس بغت تقولها ان الرجال اذا ارخص الحرمه خلاص نسى منها

نزلت مريم عند امها وجت بتقولها شافتها مبسوطه قالت بخليه واقت ثاني

فهد دخل القصر وشاف خديجه ترتب مثل كل مره فسلم عليها وسألها عن احوال القصر فقالت له ان كل شي تمام
طلع لجناحه مع هيفاء وتذكر اخر مره كانوا هنااا ,,,
شافها ما ارسلت شي ترك الجوال على الطاله ودخل يغير ملابسه ويشوف وش تاليتها معها
ارسلت له ريما من جوالها ((فهد هيفاء ميته صياح وش صاير فيكم انتم وش صار معكم هي رافضه تتكلم
ارسل لها فهد :هي حره))
ما توقعت ابد ان هذا ردفعل لفهد ,,, يا ربي سترك ,,,
,,, تقطعت هيفاء مية مره وهي تفكر ان فهد يمكن يجي ويراضيها وكان ودها انه جاء يعد ما راح الزعل لكن هو شكله يبي الفكة منها ,,,,

عزمت ام طلال بعد ما شارت عليها مريم انهم يرجعون للقصر يمكن احوال الجميع بتتحسن ,,,وقالت ريما الخبر للبنات يمكن يقولون شي
لكن هيفاءقررت شي ولازم تسويه :: انا برجع للديرة مع امي ,,, قولي لأمي الكلام ذا يا لمياء ,,,,,
((الجزء الثالث والعشرين ))


ام طلال بصوت عالي جدا ,, قولي لها ان ما تركت خبالها,, شافت شغلها ,, ترى انا وصلت حدي معها ,,, اما عااد بتروح للديره ,, قولي لها ,, جدتك زعلانه وما راح يرضيها عليك الا تشوفك حاطه عقلك في راسك ,, هذا اللي ناقص تترك زوجها عشان حد ما يسواها ,, كنها تبي تضحي في فهد فأناللحين عقلي فيني وما راح اخسر ولدي عشان زعلها ,,, يالله اطلعي لها وقولي لها روحة ما في روحة ,,, وغير هالكلام مافيه ,,, هذا اللي ناقص ,, هيفاء تبي تطلعني من طوري
مريم وهي مستمعة لأمها ولمياء واقفه عند جدتها وتحاول تهديها ,
لمياء : يمه هي تبي تروح ترتاح شوي ,,, عطيها فرصه تقعد تفكر هي الحين حالتها زفت وما تقدر تطلع من اللي هي فيه وهي هنا ,, اتركيها تروح شوي يمكن تحس بقيمة اللي عندها وتحافظ عليه ,,,,
ام طلال : ولا كلمة انتي الثانية ,,, قد مرينا بأكثر من كذا ولا رحنا لأهلنا ,,, قعدنا في بيوتنا وصبرنا وهذا احنا نلنا وطلنا ومافينا الا العافيه ,,, هذا اسميه خبال ,, دلع ,, اللي تسويه الحمدلله والشكر على عقلها ,, وام طلال تحس جوفها فيه نار شابه ,,, لاحول ولا قوة الا بالله ,,
لمياء : ما قدرت تقنع جدتها بأي شي ولطيفه اللي حضرت الحديث كله قامت بهدوء منهم وطلعت فوق لغرفة هيفاء ,,,
دخلت عليها وهي بوضعها ومتلحفه ودموعها ما وقفت ,,,
لطيفه وترفع شعر هيفاء من جبهتها وتمسح عليه ,,,
لطيفه : انتي تبين فهد والا لا ,,,,,
ما ردت هيفاء بأي كلمه ,,,,
لطيفه : انا ما عندي الا هالكلمه ,, اذا تبين فهد لا اسمعك يوم ثاني تقولين بروح ويتركني وما ابيه
واذا ما تبينه يالله قومي امشي هالحين معي ,,, بس شوفي يا هيفاء ,, انا دلع ما عندي ,,, ولا حل وسط عندي يا تصبرين على اللي فيه يا تتركينه وننهي كل شي ,,,
بعدين ممكن اعرف فهد وش سوى لك يخليك تزعلين كذا وش صاير ,, وش الشي اللي خلاص ما تقدرين تستحملين عيشتك معه ,,,,انتي خيبتي ظني فيك ,, وين العقل وين الرزانه ,, وين الثقل ,, ما خلتك تفكرين في حياتك وتكسبين زوجك ,, وش تبين بها اجل تتمنظرين عليها والا تستعرضين بها قدام الناس ,,, لا ياعمري لاتكونين بزر ,, ما اشوف ان فهد جاهل بشي الا ما شالله قليل مثله ,, لا تفرطين فيه يا هيفاء ,, وهيفاء ساكته ودموعها تنزل بأستمرار ,,,
دخلت عليهم لمياء : وهي تسمع كلام امها : يمه انا بدخلها تغير ملابسها وتجيكم عند جدتي ,, يمه تكفين وسعي صدر جدتي ,,, ضايقه بالحيييل ,,,,
وقامت لطيفه وهي ما عندها الا ذكر الله سبحانه انه يوفقهم ويفرج عليهم غمتهم ,,,
مسكت لمياء يد هيفاء وقعدتها على السرير ,, ما تدري وش صار لها ما كلت لكن مبين انها خفيفه مررره نزلتها من السرير وتحس انها مهي متوازنه ,,, دخلتها للشاور وساعدتها تشيل ملابسها وتركتها تغير ,, ,,
طلعت لغرفة الملابس ,, وجهزت لبس لهيفاء خذت لها جلابيه فيها زهور حلوة بلون المشمش وخذت لها صندل خفيف ,, وقفت لها عند الباب
لمياء : هااا خلصتي ,,,
هيفاء : اييييه ,,,
دخلت عليها لمياء وساعدتها بسرعه انها تلبس ملابسها وسرحت لها شعرها بالمجفف ,, ورفعته بربطه ,,, واخر شي لبستها ملابسها ,,, ومسكت يدها وقعدتها على الكنبة ,, جابت لها عطر وبخور تبي تغير جوووها شوي
هيفاء اول مره تحس انها ضاااايعه وما تقدر تتخذ قرار ,, هي تحب فهد وعارفه هالشي من قبل ,,, بس فهد خذلني كم مره ودي اشوفه يوقفهم عند حدهم وينتصف لي قدامهم ولو مره ,,, ,,, ليه يا فهد كذا ليه ,,اذا تحبني ليه تبي تتركني اروح ولوغلطانه,, ليه ما تتمسك فيني وتثبت لي اهميتي عندك وما تقدر تستغني عني ,,,

لمياء وهي تراقب هيفاء وعارفه انها تفكر ومومعها,,,,
لمياء : هيوفه يا قلبي ,, وش صاير ,,
هيفاء : ابي اروح مع امي ,, ما اقدر اعيش هنا ,,
لمياء : انتي عشان عبير ,,
هيفاء ما قالت لهم عن الموقف اللي صار وشكلهم بعد ما يدرون عن شي,,,
((مشاعل ما حكت هي تبي تسوي لها حركة ومو معقول تقولهم اني كذا وكذا وبيطلعها فهد كذابه قدامهم ,, هدفها تخرب بين فهد وهيفاء وهاذي هي حصلت على اللي تبي)) ,,,,
لمياء : الله واكبر يا هيفاء وين اللي عطتني محاضره عشان فيصل ,,,انتي مو تنصحين الناس بشي وتخالفينه على نفسك ,, ترى ما اسمع كلامك ثاني ,,,
هيفاء : لا يا حبيبتي فرق بينهم ولا تسوين مقارنه ,, انتي تتكلمين عن ماضي لفيصل ووعدك انه ما يكلمها ثاني
لكن انا وش رايك اللي يكلمونه واقاربه ومعطيهم وجه ويشتري لهم هدايا ويسون مقالب لزوجته ومع ذلك ما حاول يوم يوقفهم عشاني وعشان راحتي ,,, انا طفشت ,, اذا لهم حق عنده بصبر عليهم ,, لكن قولي لي وش حقهم يسوون اللي يبونه وهو كل مره يتفرج عليهم ,,,
اصلا ليش يعطيهم مجال يكلمونه حتى ,,, مو محارمه ولا له حق يكلمهم ,,, اقارب ,, طيب ليه ما يكون في حدود الدين والستر ,, ولا لا ,, ردي علي ,,
لمياء : طيب مو كذا عاد تتركين كل شي عشانهم ترى بيفرحون عليك يا هيفاء ,,,
هيفاء : انا ما انزل نفسي لهم ولا لغيرهم يبيهم ويبونه بالطقاق فيهم ,, كبدي حامت من سواياهم ,,, وين قاعدين بالله عليك فهميني ,,, اللي يشوفهم يقولون حريم عند رجل ,,, انا ما ابي الحياة ذي ,, براحته خلاص مو مهم نكمل مع بعض ,,, الله يسعده معهم ,,,
لمياء وهي ما تدري وشلون تنقل لها كلام جدتها ,,, وهيفاء معصبة مرررره,,,
شوي جتهم ريما والحزن يعصرها على حالهم من هنا اخوها وتشوف انه ما سوى شي وهيفاء تبي تتركه ,,, ومن هنااا هيفاء مو هاين عليها صياحها وحزنها كأن فيه مشكلة كبيره صايره ,,,,
ريما : شلونك الحين يا قلبي
هيفاء بحزن : الحمدلله ,,,
ريما : مدري شقولك ,,, بس انتي ما شالله اعقل منا كلنا وواضح هالشي واتمنى منك انك تعيدين ترتيب امورك ثاني ,,
جدتي بترجع للقصر بكره وكلنا بنرجع معها ,,,
هيفاء : انا بطلع مع امي من هنا للديره ,, انا كنت ناويه اكمل معها عدتها ,, لكن مافيني صبر اقابل مشاعل وطقتها ,,,
انا زهقت ,,, زواج مو مثل الناس ,, عشان وشو ,,, انا مافيني استحمل اكثر من كذا ,,,
ريما : على العموم جدتي تبيك تحت ,,,,وقامت منهم ,,,
فيصل يدق على لمياء الجوال ,, ولا ردت عليه عشان ريما تكمل حديثها مع هيفاء ,, اول ما خلصوا ووقفت ريما وطلعت وخذت لمياء اختها هيفاء وقالت لها يالله كو نروح لأمي وجدتي يحترونك ,,,
نزلت لهم هيفاء ودخلت عليهم ولمياء كملت طريقها للملحق اكيد فيصل مشغول عليها من راحت منه ما كلمته ولا ارسلت مسج ,,,اول ما دخلت لقت فيصل متمد ويشوف التلفزيون ,, تحسن كثير بعد ما جاء وخذ نقاهة في الجو الحلو ,,,
اول ما شاف لمياء : هلا وغلا بعمري ,,,
لمياء وهي تسلم عليه ,, هلا بك يا عيوني ,, معليه اسمحي لي ما قدرت اقعد معاك :: بس الوضع داخل قابل للانفجار
فيصل كان متمدد وقعد يقابلها ,,,
فيصل :عسى ما شر,,,
لمياء :هيفاء ,, هيفاء تبي ترجع للديره مع امي
فيصل : وش فيها ,,
وقالت له لمياء انها من قامت الصبح وهي تصيح وتبي ترجع وماقالت اكثر من كذا ,,, فيصل متأكد من فهد من يومه ما يحب العلاقات واذا سالوه الشباب عن الحب رده كان واحد اللي تستاهل قلبي ,, عند اهلها يربونها لي ,,,وعلى طول اجاباته مبهمه ,, فما يظن فيصل ان في قلبه احد غير زوجته ,, واذا هيفاء نفس لمياء فيحمد ربه لانه ما راح يحصل مثلها ,,, انتبه فيصل من تفكيره وشاف لمياء عنده ومسك وجهها بين ايديه وقبل راسها وخدها ,,
فيصل : الله لا يحرمني منك يا عيوني ,, انتي عيوني اللي اشوف بها ,, انتي روووحي ,,
اوعديني وعاهديني انك تساعديني على نفسي ,, وتعرفين انه في قلب ينبض بحبك ولا لك شريك ,,
لمياء تتأثر بسرعه من كلمات فيصل الحنونه خصوصا انها متيقنه انها نابعه من قلبه ومو كلام يقوله ,, وما يثبت هالشي الا افعاله معها ,, قد ما يقدر يدخل الفرحه في قلبها ,,,
لمياء : انا احبك واعاهدك ما يفرقني عنك شي ,,,

فهد في مكان ثاني وجو ثاني ,, جالس في جناحه في القصر وطلب من خديجه تسوي له قهوة وشاي وشي خفيف ياكله ,,, تنهد بقووه وهو يشوف مكان هيفاء ,,, خذ سيجارته وقعد يدخن بطريقه شرهه ومو عادته بس فيه غضب داخلي ما قدر يطلعه ,,,
طفى سيجارته وقام وفتح درج هيفاء عند راسها وده يحصل شي يحسسه انها معاه وقريب ,,, شاف مصحفها ودفتر اذكار ,, ولقى مفكره فتحها ,,,
اول صفحه كانت مخطوطه باسم هيفاء وتحتها يوم ميلادها وتحتها اسم ديرتهم
فتح الصفحه الثانية ,,كانت معنونه بتاريخ وهيفاء عمرها 13 سنه ,, ذاكره في احداث في فصلها مع معلمتها ,,,
فتح الصفحه اللي عقبها لقى لها حادثه مع لمياء وهما في مكتبة يشترون كتب وكيف تحكي خيارتهم وايش خذوا
فتح الصفحه اللي عقبها وكمل احداثها ,, فأستشف من المفكرة انها احداث عالقه في قلب هيفاء وعنونتها بأسم وذكرت الحادثه وتاريخها لانها تعني لها شي ,,,,
كان قاعد على حرف السرير فما شاف نفسه الا هو جالس على الارض ومتسند على السريد ومد رجليه واستغرق في القرايه ,, الفتت انتباهه هيفاء بسردها للحوادث وشرحها لها وتعبيرها الراقي واختيارها للكلمات اللي تدل على شخصيتها وعزة نفسها وكبريائها وفخرها انها بنت فيصل ال ::: بالرغم انها ما شافته ولا عاشت معه ,,,
فما حس فهد بنفسه الا يتعدى صفحات كثيره ويفتح أخر صفحه ,,اول ما شاف عنوانها دق قلبه بقووه وارتبك منه وتسارعت عيونه على السطور يقراها ,,,,,,

(( فهد ))
فهد ولد عمي طلال ,, شاب تجد فيه معاني الرجولة من شكله الجذاب وطوله الملفت واسلوبه في الحديث ونبرة صوته المميزة وهو يحدثك ,,,
بالرغم ان حديثي معه لا يتجاوز بضع كلمات ولكن اسرق السمع وهو يحدث جدتي ,,
تناهى لسمعي انه اجبر على الزواج بي ,, فكرهته مسبقا بالرغم اني اعرف انه في نفس وضعي ,,, لم احاول التقرب له كباقي الفتيات مثل عبير ومشاعل ,, اول موقف لي معه كان مثل البركان لطمة حارة على خدي بسبب كلمة اثارته في الصميم ,, الم اكن صادقه ,, فالرجل لا يجبر على الزواج ,,,واااااها من كلمة مزقت قلبي ,,, فكان رده لي عنيفا لم اتوقعه البته ,,,,
زفوني له وهم سعداء وزفوني وانا كسيرة لا اعلم ما نتيجة زواج قام تحت التهديد لكل الطرفين ,,,
اما هو فكان كالوحش الكاسر اذا انقض على فريسته ولم يمهلها فرصة النجاة ,,
فما كان منها الا ان تمزقت قطعا صغيرة وتهشمت تحت مخالبه ,,,
تركني وانا اسيرة الحزن ونفاني من عالم لم ادخله ولا اعرف شكله ,,, نفاني مع سبق الأصرار والترصد لي ,,, فأنا لا اليق به ,,,,,,
نزلت دمعه يتيمه من عين فهد وهو يقرأ سطور هيفاء ,,,, وكره نفسه جدا بالرغم انه عارف ان هيفاء تقبلته بعد كذا وعاشت مع لحظات ما راح ينساها ,, بس في حينه وشعورها هذا اكيد اني سببت لها جرح اليم جدا في قلبها ,,, سكر الدفتر ورجعه مكانه ,,,,
ودخل غرفة الملابس وفتح دولا بها ,, وطلع فستانها اللي لبسته مره وكان فيه احجار في النصف
وخذه وحطه بين ايديه وشم ريحتها المميزة فيه وحضنه بين ايديه
فهد : ليه يا هيفاء ليه ما تصدقيني ,,,,
رجع فستانها مكانه وسكر دولابها وطلع من الغرفة ,, وراح للجناح ,, قعد فيه وظل يدخن اكثر واكثر لحد ما خلص نص الباكيت ,, وعقله وقلبه مع هيفاء

ام طلال اول ما شافت هيفاء صدت عنها وما حبت تكلمها ابدا
وقالت لمريم وهم يسمعون بكره يجهزون اغراضهم بيرجعون للقصر ,,,,
هيفاء ظلت ساكته وآثرت السكوت حاليا ,, وشافت انه غير مناسب الحديث ,, جدتها تصد عنها وهي زعلانه ,, واكيد مو راضيه عليها مررره ,, قامت من عندهم وراحت لغرفتها وسكرت الباب بالمفتاح ودخلت في فراشها ونامت ,,,,
جت ريما تبي تطلع لها فرفضت ام طلال : لحد يكلمها اتركوها هي بتهدى بالحالها ,,,
ريما : طيب يمه هي ما كلت شي خليني اودي لها شي تأكله ,,,,
ام طلال : الحين لا تجونها ,,, قبل ما تنامين ودي لها شي ,, خلها تدري انه مافي دلع في السوالف ذي ,, اجل متى الحرمة بيطلع لها عقل اذا ما طلع لها الحين ,,,,,
في الصباح الباكر والكل متجهز بيطلعون من المزرعة ,, احساس الجميع بأنه كان فيه اعصار وخف ,, وان شالله ما يرجع ,,, ماصارت بينهم سالفة عدله ,, ولا ضحكه ,, الله يهديك يا فهد انت وهيفاء نكدتوا علينا بسبب دلع زوجي كلن يمر به ,,,
هيفاء ركبت مع عمتها مريم وعيالها في سيارتهم جدتها مو طايقتها وما تكلمها خير شر ,, كأنها تعاقبها عقاب منزل ,, وهي لا حيل لها ولا قوة ,,, شي بينها وبين فهد مو لازم يعرفونه وخلاص ,,,,
بعد مرور ساعه و ونص وصلوا للقصر ,,, ونزلت ام طلال والجميع ينتظرها تتحرك للبوابه ويمشون وراها ,,,
خديجه كانت واقفه عند الباب وجاء فهد من جوووه كان لابس ثوبه الابيض وشعره المموج على ما سرحه فمعطيه شكل جذاب حيل ,,, وطالع دقنه ديرتي لانه صار له كم يوم ما حلق ,,, ومبين انه مهموم ,,,,
تقدم فهد لجدته في ساحة القصر وباس راسها ويدها وما التفت للي معها وحاول انه يماشيها للمدخل ,,, هيفاء في السيارة الثانية اول ما نزلت وشافت فهد طالع من القصر حست بغصه عجيبه ودها تروح له وترمي نفسها عليه وتقول له يساعدها في اللي هي فيه ويشيلها من الموج اللي تصارع فيه بالحالها ,, بس كل هذا في نفسها وما تقدر تقول له اذا هو ما حس فيني ,, بكيفه ,,,,
تقدموا الجميع وفيصل جنب فهد مع جدته ,, دخلت هيفاء وشافتهم دخلوا المجلس المطل فطلعت فوق على الدرج تبي تروح لجناحها ,,,
فهد شاف هيفاء ترقى الدرج وماسكه شنطة يدها وهي ثقيله تجر نفسها ,, فحسب انها مو فرحانه برجعتها للقصر وتبي تكون بالحالها ,,,
ام طلال : فيصل وش رايك تشوف امك وتسلم عليها
فيصل : يمه شدعوى تصرفيني , عادي يا قلبي قولي يا ولد يا فيصل اطلع بقول لاخوك كلمة راس وهو يضحك
ام طلال وهي تضحك له : هذا انت قلتها ,, ابيه شوي يا قلبي
قام فيصل وباس راسها وطلع يشوف امه ويسلم عليها ,,,
ام طلال : وش صاير بينك انت وهيفاء,,
فهد : ما سألتيها ؟؟؟
ام طلال : تبي تروح للديره مع امها ,,,
فهد وهو يفتح عيونه : بكيفها خلها تروح
ام طلال : رح انت الثاني ,, الظاهر انك يبي لكم قرايه ,, اجيب لكم مطزع يقرأ عليكم كود فيكم عين ,,,
فهد : انا ما فيني الا العافيه ,,, وهي اذا تبي تروح لامها ومهي قابله تعيش عندنا نغصبها ,, اكرام النفس هواها يمه ,,,
ام طلال فعلا ما قدرت ترد عليه ,, وجت بتكلمه اكثر بس شافت انه ضايق من الكلام ,,,
ام طلال : اطلع لغرفتك يمه ارتاح واحنا بعد نبي نرتاح ,,,

دخل فيصل على امه ولقى عبير عندها وحاطه رجل على رجل ولا طرحه ولا شي ,,
وقف عند الباب ,, يمه مساء الخير تعالي شوي
سلطانه اللي وجود عبير ما شافت له اي اهميه : تعال سلم على عبير محد غريب
فيصل سفه الكلام ذا كله وكمل تعالي يمه شوي
جته سلطانه عند الباب وطلعت للمدخل وسلم عليها ,,, وسال عن ابوه ,, عبير ارتفع ضغطها من فيصل ,,
ما باقي الا انت يا فصول تسوي فيها انك ملتزم وما تسلم من زينك عاااد ...,,,,
ريما اول ما دخلت وشافت امها وعبير جالسين سلمت عليهم ,,, وطلعت فوق متحججه انها تبي ترتاح عقب الطريق ,,,

طلع فهد فوق للجناح واول ما دخل ما لقى هيفاء ,,, اكيد في غرفتها ,, ظل في المجلس يدخن ويشوف التلفزيون وما حاول انه يجيها ,,, هيفاء كانت تسمع صوت التلفزيون اول ما اشتغل فعرفت ان فهد جاء قامت سكرت الباب بالمفتاح خافت يدخل عليها وهي بذا الشكل ,,, ما همها ان شكلها زين كثر ماهمها انه يكون عندها ثقه في نفسها ,,,
دخلت تبدل وتأخذ لها شاور منعش ,,, لبست لها بنطلون جينز وفستان اوف وايت من الحرير قصير كان مشغول بالكروشيه بشكل ورد على الصدر واليد ,,,
حطت لها كريم منعش لوجهها وحطت بس جلوس وردي فاتح وشوية ماسكارا ,, تعطرت وتوكلت على الله ,,, تبي تفاتحه في وضعهم ,, ومستحيل انها تتخبى منه طول الوقت ,,,
طلعت ما لقت فهد و التلفزيون شغال ,,, بس هو مو موجود واستغربت من كثر السجاير في الطفايه ,,,,
دقت باب الغرفة ,, ما رد عليها فما درت هو نزل والا باقي ,,, فتحت الباب شوي ,,, سمعت صوت الموية ,, اكيد يأخذ له شاور ,,,
الغرفة محيوسه ومافيها اي تهوية ,, صار لها كم يوم ما مسكها احد ولا نفض شراشفها ,,,,
تبي ترتبها بس ما بغت فهد يطلع ويشوفها انها تنفض وترتب عادي كن ما فيها شي ,,, فقالت خل فهد يطلع من المكان بجهزها ثاني ,,, اول ما تحركت بتطلع الا فهد يطلع لها واول ما شافته نزلت عيونها وقالت له انتظرك في المجلس ,,, فسخ روبه ولبس ملابسه ,, رتب نفسه واحسن شي سواه ان حلق ,,, حس بنشاط ونظافه ,,, لبس شماغه وترتب ,,, وطلع لهيفاء لقاها في المجلس ,,, ما قدر يفكر وش الخطوة الجايه معها بس يمكن اذا حكوا يتبين له شي
اول ما شافها وهي قاعده على الكنبة وشكل قعدتها المميز وهي رافعه ظهرها يخليك غصب تنشد لها ,, قامت له ومدت يدها له تصافحه ,,لكنه قربها له وحب خدها ,, ابتعدت عنه وقعدت على الكرسي
ما تكلمت ودها انه هو يبدي بشي ,,,هو ذكي وعارف انها ماراح تقول شي ,,, ظل ساكت ويتأملها ,, يملى عينه منها وهي منزله عيونها في الارض وحاطه يديها في حضنها وماغير تشبكهم وتفكهم ,,, وهو يتابع تأمله ويشكرها من قلبه انها تركت فرصة بينهم انه يتأملها شوي ,,,,

رفعت عينها واول ما حطت عينها في عينه ارتبكت وتكلمت على طول :
هيفاء :مدري وش اقولك بس ودي اروح مع امي ارتاح شوي من الحاله اللي انا فيها ,,
فهد : بس انا اشوف ما فيك الا العافيه وهو متعمد يقولها كذا ,,,
هيفاءوقفت تبي تطلع لغرفتها بعد كلمته هاذي ,, تشوف انه رجع لطريقته الاولى ,,,
هيفاء : عن اذنك ,,,
فهد : تعالي ,, وين بتروحين ,,,
هيفاء : ماعندي شي ,,,
فهد : مستغرب منك تبين تروحين مع امك ,,
هيفاء : اذا ما عندك مانع ,,,
فهد : لا ما عندي مانع ,, بس اذا كان السبب الحركة الوسخة حقت مشاعل فماعندك اي سالفه ,, قلت لك انها صاحبة حركات قديمه ,, ولو ابيها كان خذيتها ,,,
واذا عندك سبب ثاني تبين عشانه تروحين فأنتي من الحين حره وقام وطلع من الغرفة وضرب الباب وراه ,,,
هيفاء وهي واقفه تشوف الباب ,,,ماشافت نفسها الا طايحه من طولها على الارض ,,,,,,,
بعد فتره ما تدري بها هيفاء شكثر شافت نفسها في سريرها ,, ولمياء ماسكه يدها وتقرأ عليها ,, وريما واقفه ,, وخديجه ,,,
هيفاء : شفيكم ,,,
لمياء : انتي اللي شفيك ,, خديجه جت تناديك عشان جدتي حصلت طايحه وش صار لك انخفاض في السكر والا وشو ,, هيفاء انتي تدرين كم صار لك ما كلتي ,, من طلع فهد من المزرعة بالله هاذي مو حاله عليك ,,,
هيفاء تطعم شي مر ,, : ابي عصير احس اني عطشانه ,,
جابت لها العصير وهي تشربها دق فهد الباب قامت لمياء تلبس شرشفها وطلعت له ريما ,,|
فهد : وش صار خديجه كلمتني وقالت لي ,, متى صار ذا ,,
ريما : لا تخاف هي صار لها كم يوم ماكلت شي ابدا بس قهوة ,,, واكيد بتتاثرمن الشي ذا شكلها قامت وجتها دوخه ,,
فهد : بس انا كنت معها من شوي ما فيها شي ,,,
ريما : الله يشفيها تتدلع عليك وهي تغمز له
فهد يبي يقول لها انها فااااضيه بس مايبي يخربها ,,,,
طلعت له لمياء وهي متغطيه وسلمت عليه وراحت تحت وخذت ريما معها ,,, وخديجه كملت لفهد وهم واقفين عند المدخل انها طلعت تبي تناديها وحصلتها مغمى عليها في مكانها ,,, استئذن منها فهد ودخل على هيفاء ,,,
جاء عند حافة السرير وقعد ,,خذ يدها بين ايديه ومسح على شعرها وهي فتحت عيونها اول ما شافته وركزت عليه ودها يشوف وش في عيونها يمكن توصل له شي من اللي في قلبها ,, يمكن تقدر تتكلم بدالها وتطلب منه اشياء كثثيره هي محتاجتها ,,,
فهد يتأمل برائتها وشكلها التعبان ,,, ويمسح على خدها بيده ,,
فهد : وش رايك نسافر اوربا ,, محتاجين نقعد بالحالنا ,,,
هيفاء ما تدري وش ترد عليه ,,,
فهد : قولي لي وش في قلبك انا اسمعك ,,,
هيفاء : انا في قلبي شي واحد
فهد : قولي انا اسمعك ,,,
هيفاء : عبير ومشاعل ما تكلمهم ولا تسلم عليهم ولا تقعد معاهم ولا تعطيهم مجال ابدا يتجرون عليك ,,,
اذا عاهدتني انك تقطعهم انا مستعده اروح معك لأخر الدنيا ,,,...
فهد : انتي تثقين فيني ,,
هيفاء : مو هذا الطلب ,,
فهد : وانا اسئلك انتي تثقين فيني والا لا ,,
هيفاء : انا اثق فيك بس ما اثق فيهم ,,,
فهد : اذا انتي تثقين في فما ابي اسمع شروط ,, حطي ثقتك بي وتطمني ,,,
فكرت هيفاء وش تقول له ,, وطرى عليها ان عبير بتجيهم تقعد عندهم هذا اذا ما جاتهم ,, فبغت تعطي فهد فرصه وتشوف ,, هو يقدر يوقفهم والا لا ,,,
هيفاء : طيب ماعندي خلاف لكن اذا صار عكس كلامك فتوقع مني اي شي ,,
فهد : تهديد هو!!!!
هيفاء : لو سمحت احس اني تعبانه وودي انام ,,, قام فهد وطلع من الغرفة وهو يحس ان هيفاء كنها في تحدي معه ومع نفسها وداخله معركه ,,,,

طلع فهد في سيارته وقعد يدور من مكان للثاني وفكر انه من اول يوم شاف هيفاء وحياته متلخبطه كلش ,,,,,

(( الجزء الرابع والعشرين ))

في مقهى معروف في وسط الرياض التقى فهد مع نواف في منتصف النهار ,, فهد والكآبه مخيمه عليه وطفشان حده ,,,
كمل شرب قهوته المره وكمل قراية الجريده ,,, ونواف يفطر برووواق وحاس بفهد ,,,
نواف : وش صار معك هالحين ,,,
فهد : ابرك لك لا تتزوج ,, ترى الحريم كلهم نكد ,,,
نواف : افاااااا ما هقيتها منك انك تقول ذا الكلام ,, انت بشخصيتك تقدر تسيطر على اصعب وضع ,,,
فهد ,, الله يفرجها بس ,,,,

نزلت هيفاء من الصباح بدري تبي تشوف جدتها وامها وتقعد معاهم شوي عمتها مريم بتسافر بعد العصر مع زوجها اللي بيوصل من جده وبيأخذها على طول اوربا ,,,,,
بعد محادثة بسيطه مع الحريم الكبار ,, وخصوصا ان جدتها ما تبي تكلمها ذاك الزود ,, ومسويه فيها انها زعلانه عليها ,,,, طلعت منهم فوق لعمتها مريم ,, اول ما شافتها قالت لها جابك الله ,, تعالي يا قلبي جهزي معي ,,
هيفاء قربت من عمتها وسلمت عليها ومسكت يدها
هيفاء : عمتي :: انا ما ابيك تزعلين علي والا تشوفيني جاحده ,, انا ,,,
مريم : تضمها بقوه وتقول لها : حبيبتي كل الازواج يمرون بمشاكل هذا شي طبيعي ,, بس مو على كل زعل الوحده تبي تروح لأهلها ,, فكري فيها يا عمري ,, مو زين حتى عشان وضعك مع فهد يتأزم اكثر اذا شافك مستهينه بزواجكم وممكن تضحين به لأي سبب,,
ضمتها هيفاء اكثر وقامت معها ترتب الشنط بشكل يحسدونها البنات عليه ,,, تصفيفها ملفت ويحسسك انك مهمل وما تعرف الترتيب مقارنة بها ,,,,

عبير ماخذها راحتها في بيت خالتها سلطانه ,,, لبست رياضة من المخمل الناعم وربطت شعرها على شكل نافوره وحطت لها مكياج خفيف ,,, ونزلت تتمشى في الفيلا ,, ما حصلت خالتها وطلبت لها فطور وفطرت ,, دقت على مشاعل ,,,
عبير : شعوله يا عمري متى بتجون ,,,
مشاعل : بنطلع بعد شوي ,, بنروح نأخذ اغراض امي تبيها وبعدين بنجي للقصر ,,,
عبير ,, مشتاااقه لسوالفك ولخطتك الجهنمية على قولتك عسى تضبط هالمره ,,,,
مشاعل : انتي رووووقي بس وبدون استعجال والا نروح فيها ,,,
عبير وهي تضحك ضحكة شيطانية ,,,

بعد فتره بسيطه من الترتيب والتجهيز لكل ما تحتاجه مريم ,, حبوا انهم ينزلون عند ام طلال يتقهون شوي لحد ما يأذن الظهر ,,,,
وهما نازلين على الدرج قابلتهم ريما طالعه ,,
ريما هلا عمتي وشلونك
مريم : الله يسلمك يا عمري ,,
ريما : هااا ان شالله بتمشين اليوم ,,
مريم اي والله العصر ان شالله ,,,
ريما : ما تبين لك مربية سنعة تأخذينها معك وهي تستهبل على عمتها ,,
مريم : وااااضح انك مربية سنعة ,,, يالله انزلي معنا لأمي ,,,
ريما : عن اذنك بس ياعمتي ابي هيفاء تعطيني كتاب عنده وهي تصرف عمتها ,,
نزلت مريم وهي تقولهم براحتكم ,,
مسكت هيفاء من يدها وطلعت معها فوق في الجناح ,,,وهناك .....
ريما : هيوفه تكفين طلبتك لا ترديني ,,,
هيفاء : ما تخلين حركاتك آمري وش تبين ,,,
ريما : ابيك تعزمين فهد على عشاء برى في مطعم
هيفاء : لا والله ضحكتيني ,, وش طرى عليك بالله ,,,
ريما : هيوفه انتي ليه مو زي الحريم ,,,,
هيفاء : الحمدلله والشكر لاتكونين شايفتني ولد وانا مدري ,,,
ريما : مو كذا بس انتي حقيقه ماعندك حركات نفسهم ,, يعني ما قد شفتك تقولين يالله يافهد طلعني ابي اتعشى برى ,,,
والا تجهزين عشاء رومانسي بالحالكم وتخلينه مثل ليلة فرح بشموع وورد وموسيقى هاديه ,,,
والا مثل .. مثل .. اي تقولين احجز لنا بفندق ليلة نغيير جوونا يعني من هالحركات اللي بالي بالك ,,,
هيفاء وهي تضحك مرررره : عز الله ان نواف امه داعية له ما شالله لا اله الا الله ,,,,
ريما وهي تضحك : ياختي هذا امه داعيتن له بليلة القدر ,,,خلينا من نواف هالحين ,, تكفين هيوفه لا ترديني ,,
هيفاء : اللي يسمعك يقول انا الغلطانه ولازم اصلح غلطي ,,,
ريما : شوفي اذا انتوا عندكم مشاكل فحنا عيال اليوم ,, والله يا فهد انه ضايق حيييل اعرف اخووووي ,,,,عاد يالله قولي تم
هيفاء : اممممم زين خليني افكر واقولك ,,,
ريما : اقول تعالي يالله ارسلي مسج هالحين ,,, بسرعه اشوف ,, يالله تحركي وهي تضغط عليها ,,,
هيفاء : اوكي طيب ,,, وافتحت رساله جديده ,, وكتبت فيها (( ااذا انت فاضي ممكن نتعشى برى الليلة ))
وخذت ريما الجوال تبي تشوف وش كتبت ,,,
ريما : في ذمتك الحين هذا مسج من حرمة سنعه لزوجها ,, والله كنك ضابط يعطي اوامر ,, وتقلد بصوتها المسج
شوفي اكتب كذا وتسوي مسح وتفتح صفحه جديده (( حبيبي اذا ما فيها ثقل ممكن آخذ من وقتك شوي ونتعشى برى يا قلبي ))
وارسلتها على طول وما عطت هيفاء فرصة ,,,
هيفاء وهي تمسك الجوال ثاني وتقرا الرساله : يووووو وتفتح عيونها بكبرها وتصرخ فيها : صاحية انتي ,, وش بيقول هالحين ماعندها عقل يوم تصايح ويوم طاخه ,,,
ريما : قلت لك انسي كل شي وفكري في اليوم ,,, انتي بتشوفين ردة فعل فهد اخووووي واعرفه وهي تغمز لها وتطلع منها تبي تشوف وين لمياء ,,,

قعدت هيفاء تشوف الجوال لاكثر من ربع ساعه وهي مبحلقة فيه ,,وتحسقت مية مره انها تركت ريما تتصرف على كيفها ,, اكيد توهق فيني ,,, يووووه فشيله والله ,,,

فهد في الشركة مع موظفينه وما انتبه ابد لنغمة الجوال وبعد فتره حب انه يكلف سعود في شغله فمسك الجوال ,, وشاف المسج فتحه واول ما شاف اسم هيفاء
دقق في سطور المسج ,, ضحك وسأل نفسه معقول هاذي هيفاء غريبه ,, وما تردد وعلى طول ارسل الرد

هيفاء وقلبها يرجف بقوه من ردة فعل فهد على احراجها منه ,,سمعت نغمة الجوال وعلى طول فتحت المسج وهي تحس بغمام في عيونها من السرعة ,,,
(( من عيوني يا حبيبتي انا ووقتي كلي لك يا عمري ))
كانت واقفه وقعدت ,, وحست بالاحراج الحين وانها لازم تكون عند كلمتها وما تصير دلوعه ,,,

بعد فتره نزلت ,, تشوف العالم وشقاعدين يسوون ,,
وتنصدم بمشاعل وعمتها مريم والعنود جايين عندهم ,,
هدى : هلا هيفاء ,, منت جايه تسلمين ,, وهيفاء تتقدم لها : هلا عمتي كيفكم ,, وصافحت بناتها وصدت عنهم ,,,
مريم : متى بتطلعين هدى للمطار ,,,
هدى بعد شوي بنطلع ما اوصيك يمه على البنات ,, خليهم على راحتهم وهي تطالع هيفاء ,, خليهم يحسون انهم في بيتهم ,, يعني اسمعي ياهيفاء ,,,

مشاعل وهي طفشانه من الجووو : انا بطلع لعبير عند بيت خالي طلال يمه ,, وطلعت وهي حتى ما خذت اذن ,,,
طلعت تتمشى لحد ما وصلت الفيلا ولقت عبير قاعده في الصالة وحاطه رجل على رجل وماخذه راحتها ,,
اول ما شافتها عبير طارت من الفرحه ,, : وينك يالدبة تأخرتي
مشاعل وهي تتكلم بدلع : هذا كله شوق لي والا لخطتي ,,,
عبير : يوه يامشاعل وفيها شك بعد تعالي علميني وش بتسوين ترى كلي شوق لك ,,,,
ظلوا مشاعل وعبير يتكلمون في خطتهم لأكثر من ساعه ,,,
ماجاء فهد على الغداء واستغربت هيفاء منه ,, وش صار له والا وين راح ,, لكن فهد اللي ظل في مكتبه للعصر كان وده ينجز اعماله المتعطلة ,, عشان ما تتراكم عليه ,,,,
في وداع عائلي طلعت مريم وعيالها من القصر متجهه للمطار وينتظرها زوجها ,, ماقدرت تمسك دموعها وهي تقارق امها والبنات ,, ولاول مره ودها ان زوجها يجيه تقاعد وتفتك من السفر وتستقر بديرتها ,, اول ما سلمت على هيفاء قعدت هيفاء تصيح من قلب على عمتها الحنونه ,, ووصتها مريم في ام طلال حييييل وأكدت لها انك دامك جنب امي فأنا برتاح نفسيا ,,,
هيفاء بدورها قالت لها لاتحاتين ياعمتي جدتي في عيوني ,,,,
عم الهدوء القصر بعد مغادرة مريم ,, ام طلال دخلت غرفتها ,, ولطيفه كذلك ,, ولمياء وفيصل رجعوا لفيلتهم اما ريما اللي تحاول تهرب من عبير ومشاعل شافت انه ما من مفر للرجوع للفيلا ومواجهتم ,, وتمنت من كل قلبها ان الايام تمشي بسرعه ويرجعون لبيوتهم وتفتك منهم ,,, ريما مستغربة من شعورها فعلا ,, وكيف انها كانت تشوفهم كل شي لين ظهروا هيفاء ولمياء في حياتهم ,, وعقبها حست انهم مجرد بنات تافيهين جدا وما عمرها استفادت من قعدتهم شي ,,,
هيفاء طلعت لجناحها وفكرها مع فهد متى بيجي وكيف بتقابله وشلون ,, حست بأحراجها يزيد كل ما حست انه ممكن يدخل في اي لحظه ,,
اخر مره شافته يوم طاحت امس وعقبها لا حس ولا خبر ,, اكيد زعلان عليها انها ما صدقته بس بعد هو لازم يوقفهم عند حدهم ,,, وش فاكرين نفسهم هي الدنية سايبه والا وشو ,,,,

دخلت تبي تنام شوي ,, شافت انه ماعندها شي تسويه والهدوء مسيطر على المكان ,,, اول ما حطت راسها على المخده حبت انها تقرأ شوي في دفترها ,,, فتحت الدرج وحست انه ماكان في مكانه أخر مره تحت المصحف ,, كان بشكل جاني كن حد فاتحه ,,, خذته قلبته ما شافت شي غريب ثم رجعته مكانه ثاني تحت المصحف ,,, ترتيبها دقيق ومستحيل انها تتركه كذا ,,
تذكرت شي وقامت قعدت مره ثانيه ,, هي صحيح عزمت فهد بس لاتدري وين ولا كيف ولا متى كله منك يا ريما ,,, وعلى طول دقت الجوال عليها
هيفاء : ريممموووه تعالي بغيت انسى انتي وين حجزتي ,,,
ريما وهي فاطسه ضحك مررررره ,,, : نسيت يا قلبي اقولك ,,, حجزت لكم غرفة بأسم فهد في المملكة ,, يعني تجهزي يا قلبي زين تراك بتفصخين عبايتك ,,,
هيفاء : وشو ,, متى ذا وفهد عرف ؟؟
ريما : اي انا كلمت فهد استئذنه اني احجز نيابة عنك ,, وقال يسعده جدا انك فكرتي بالفكره الحلوة ذي ,,
هيفاء : من مطعم لغرفة ,, صاحية انتي ,, لا بالله ابشر يالمعرس هنا افكار الله يعينك على صاحبتها ,,,
ريما وهي تضحك من قلبها : هيوفه اجيك ياعمري ابرد عليك ,, ترى انتي مع زوجك محد ماكلك ,,,
هيفاء : اقول صدق عليك حركات تجيب العصبي ,, متى اكون جاهزة ,,وهي زعلانه حيييل ,,,
ريما : انا قلت لفهد يأخذك بعد المغرب ,,, حلووو كذا يمديك تخلصين ,,,
هيفاء : وش اقول بس يالله خليني اجهز ,,,
ريما : اذا ما دعيتي لي ما راح اكون ريما ,,,,

قامت والنوم طار من راسها ,, وقعدت تفكر في ريما وفكرتها ,, انا عارفه انها كله عشاني بس والله مو حلووو عاد كذا يبين اني مطفوقه عليه ,, واكيد الست ريما قالت له انها فكرتي ,,,,

قامت وفتحت دولابها ,, شافت ملابسها احتارت وش تختار واخيرا استقرت على فستان اوف وايت من قماش التافتاه الفرنسي ,,
ضيق كامل ويجي تحت الصدر قطيفه باللون البرونزي على شكل شريطه وتلتقي عند الصدر على شكل زهرة مطعمة بستراس برونز ,,,
طلعت لها صندل كعب عالي يعطي الفستان شكل وهي لابسته ,, خذت لها شاور ولفت شعرها رولات كبيره ,,,
ما بغت تطلع مع فهد بدون مكياج وفكرت في جدتها ,, وترددت بس قالت اكيد جدتي بتعذرني ودها اني اكون زينه بعد ,,,
حطت لها مكياج كامل وكثفت الكحل والماسكارا ,,, وما بقى لها الا الروج اللي اختارته احمر صريح جدا ,, لبست فستانها وفكت بعدها الرولات وطلعت تسريحتها ويفي روووعه ,, تجهزت ولبست سلسال جدتها اللي عطاها مظهر خيالي ,,, ما بغت تتعطر وهي بتطلع برى ,, لكن حطت في شنطتها عطورها تحطها عقب ,,,,
وهي قاعده تشوف وش ناقصها سمعت دق الباب ,,
هيفاء : ادخل ,, وطلت عليها ريما من ورى الباب : انا يا قلبي وهي تضحك ,, اكيد فكرتي اني فهد
ريما اول ما دخلت صفرررت بقوه : وااااااااااو
تكفين هيوفه خليني أخذ لك صورة ,,,
هيفاء : لا والله الا هاذي عااااد ,,
ريما : روووووعه قليله عليك ,, وش هالزين وش هالجمال ,, حركات ,, الله يعين اخوي بس ,,,
هيفاء : ريوووم قولي الصدق ,,
ريما : ما شالله قمة الجمال ,, وش اقول اي كلمة اقولها قليله ,,, روووووعه يا عمري الله يهنيكم ,,,

وهما قاعدين يسولفون دخلت عليهم ليماء اللي مادرت عن شي,, جوووها مع فيصل مبعدها عن العالم ,,,
لمياء : ما شالله وش هالحلاة يا قلبي كنك معزومه ,,,
ريما : قصدك عازمة ,, هيفاء عازمة فهد على عشاء برى ,,,
لمياء : حركات ,, زين يا قلبي تغيرين جو انتي وفهد ,,,,
هيفاء وهي تتنهد من قلبها ,, تتمنى ان فرحتها مع فهد ما تخلص ولا يعكر صفوها شي ,,,
شوي ارسل لها فهد مسج بعد ربع ساعة انزلي عند المدخل بنطلع على طول ,,,
قامت من البنات وطلعت لها عباية رسمية ,,, لبست طرحتها ,, وخذت شنطنة يدها وطلعت ,, التفت لهم عند الباب ,, بنات ادعوا لي تكفوون ,,,
وما سمعت وهي ماشيه الا صوت ريما ولمياء : الله يوفقكم ويسعدكم ,,
لمياء قعدت على الكنبة وقعدت تصيح بهدوء كعادته اذا تأثرت ,, وريما اللي تعودت على المنظر هذا تحاول تضحكها شوي
ريما : انتي تشوفينها مبسوطه المفروض ما تبكين ,,,,
لمياء : انا ابكي فرحانه لها ,, هيفاء ما استانست من تزوجت ,, ودي انها تكون خاتمة المشاكل ,,,,
ريما : ان شالله يا عمري ,, الله يسعدهم يا ربي ,,,

دخلت على امها وام طلال كانوا قاعدين ,, في جناح ام طلال ,, ما بغت تطلع ما عطتهم خبر وودها اهم يفرحون بعد الزعل اللي صار ,,
ام طلال وهي مركزه عينها على هيفاء : الله يحرسك من العين ,, ما شالله ,,
هيفاء : انا بطلع مع فهد تبون شي ,, وهي محرجه منهم
ام طلال : الله يحفظكم ويكفيكم الشر ,, استانسي يا عمري ولا تخلين الشيطان يخرب عليك ,,,,
لطيفه وهي تدعوا لهيفاء من قلبها وتقرأ عليها ان الله يحفظهم ويسعدهم ويهدي بالهم ,,,

طلعت هيفاء لفهد في السياره وهي لافه الطرحه على وجهها ,, فتحت باب السيارة وسمت ودخلت ,, فهد بشكله المهيب يحسسك انك في اختبار على كل كلمة بتقولها ,,
هيفاء مساء الخير
فهد : مساء الغلا والنور ,,ما بغيتي تعزميني ,, وهو يضحك يبي توترها يخف شوي ,,
هيفاء : عزيمة بمناسبة الصلح وهي تبتسم شوي ,, فخذ فهد يدها وباسها : اي خليك قويه مثل هيفاء اول ما شفتها ,, مو يهزك خبال بنات ما وصلوا للي وصلتيه ويبون يطفشونك وياخذونه منك ,,,
هيفاء : فهد لو سمحت انا ما ابي اتكلم عنهم ,,,
فهد انتي تآمرين ,,, وتوجه لفندق المملكة وهم مستمتعين بوجودهم مع بعض اكثر من الكلام ,,,,

ام طلال : والله هيفاء عاقله وما يجي منها الا كل زين ,, بس شوي حساسه وتفكر ان عزة نفسها بتصلح احوالها ,,
الحرمة مع زوجها لازم تضحي ,, وتتنازل ,, هاا عشان المركب ما يطبع من أولها ,,
لطيفه : صدقتي ,, ما اقول الله يبعد عنهم عيال الحرام وبنات الحرام ,,
ام طلال : ااامين ,,,,

اول ما وصلت سيارتهم للفندق ,, فهد سلم المفتاح للسكيورتي وقال لهم انه فيه اغراض في السياره يودونها لغرفة *******
استغربت هيفاء وش بيكون معه من اغراض ,, بس يالله بتعرف عقب ,, فهد وهو يدخل من بوابة الفندق ماسك يد هيفاء ويمشيها معه وهي بالكعب صايره طويله اكثر وقريبه لمستوى طوله ,,,
طلعوا في المصعد فوق ,, ودخلوا في جناح كبير مرره مجلس على غرفة نوووم ,, خيالي شكله حييييل ,, وكانت الطاولة مرتبة بالشموع والورد الابيض ,, ومعطي الطاولة فخامة اكثر وقفت هيفاء في الوسط ونزلت طرحتها على كتفها ,, ودها تشوف شكلها بس استحت من فهد ,,,
فهد يمسكها من يدها ويقربها تشوف المكان : تعالي يا قلبي ,, نزلي عبايتك عشان تأخذين راحتك اكثر ,,,
نزلت هيفاء عبايتها هو مغامره انها تلبس الفستان هذا بالذات بس شافت انها عزومه تستحق تجيب فيها كل اللي عندها ,,,
فهد وهو يلاحقها بنظراته من مكان للثاني ,,, انحرجت منه وانعكس ذا الشي عليها ,,, سمعوا صوت الباب ,,, وقال لها فهد تصبر اكيد الخدمة ,,,
شوي ويسكر فهد الباب ,,, ومعاه كيس مغلف كأن فيه هديه ,, قربت يمه تبي تشوف وش عنده ,,
فهد : هذا الكيس عطتني اياه ريما اول ما وصلت القصر وقالت لي ما اقولك عقبها ترجتني انها تطلع تشوفك عقبها ننزل ,,,
هيفاء : اااه غريبه ما قالت لي وش فيه ,,
فهد وهو مبتسم : مدري ,,
قربت هيفاء للكيس وفتحت تشوف اللي فيه وفهد واقف يراقبها واول ما فتحت المغلف وطاحت عينها عليه سكرت المغلف بسرعه ما ودها ان فهد واااقف ,,,
وهي في قلبها : ااااه يا ريما مدري ادعي لك والا ادعي عليك فشلتيني مرررره ما باقي الا هذا تحطينه لي ,,,,
فهد وهو يضحك عليها : يا الحياوين يعجبني حياااكم ,,, فيها الخير ريما ,, والله اختي الحبوبة وهو يغمز لها ,,,
هيفاء : ليه حنا بنام هناا ,,
فهد : انا حجزته عشان عشاء بس شكلي بغير رأيي ,,,
فهد : حلاتك خياليه ,, وقفي شوي ,,,ويبعد منها ويطلع جواله وياخذ لها صورة
هيفاء : لا فهد فرضا ضاع الجوال ما يسوى علي ,,
فهد ويطلع الذاكرة من الجوال ويحطها في بوكه ,, اول ما اوصل البيت بحطها عند راسي ,,, صورة شوي فيها كلمة فتنه ,,,
خذها فهد من يدها : تعالي ابي اشبع من سوالفك شوي ,,,,,

فهد ما قدر ينزل عيونه منها وهي تتحرك في المكان وتضيفه من التقديم الموجود ,,,وهيفاء كل ما لمحته يركز عليها تخجل منه زياده وكنها تشوفه لأول مره ,,,,
فهد وهو يرفع وجه هيفاء له : وش هالحياء يا قلبي ,, ما ابيك تستحين معي ابي تطلبين اللي تبينه وتقولين اللي تبينه انا كلي لك ,,,,

ريما مبسوطه بالمرررره من اللي صار ,, واااو يا هيوفه اكيد اسم الله عليها بتجيها صاعقه من اللي سويته اذا شافت القميص والعطور اللي حطيتها بس اكيد حبيبتي هيوفه بتدعي لي ,,,,
نامت وهي مرتاحه جدا من الفكرة اللي طرت عليها ,,, واللي انبسط عليها فهد بالمررره وقال لها ما اراح يجون قبل بكره بالليل ,,,,

هيفاء قد مر عليها وقت حلوو مع فهد بس بهالشكل ما قدر مر عليها ,, فهد كان ذوووق معها وفتح لها قلبه واستعد انه يرضيها باللي تبيه ,, اهم شي محد يكدر عليها ويحاول انه ينكد عليها حياتها معه

هيفاء ما تدري بالوقت كم اهم شي انها مع فهد ,, وفهد اللي ما يدري شكثر مضى من الليل انتبه ان هيفاء مركزه عيونها في عيونه ,,
فهد وهو يقرب منها اكثر : انا احببببببببك يا عمري ,,,,,,

ام طلال اللي اصبح عليهم يوم كله مطر وسحاب ويبشر بالخير ,, رفعت الجوال ودقت على فهد تبي تشوف وينهم ,,,
فهد وهو يسمع جواله يرن ما قدر يرد بس اول ما شاف الاسم على طول فتح الخط ,,,
ام طلال : هلا يمه وشلونك ياعمري
فهد : هلا بك يمه شخباركم اليوم ,,,
ام طلال : ننشد عنكم وينكم فيه ,,
فهد : احنا بالمملكة بنرجع بالليل ان شالله ,, تبين شي ,,
ام طلال : ابي سعادتكم ,,, وسكرت ام طلال وهي تدعوا الله سبحانه وتعالى انه يسعدهم ,,,


فهد وهو يمسح على شعر هيفاء : قلبي وش رايك نسافر لعمتي مريم ,, ابي ابعد عن الاجواء ذي ,,, ابي ابعد عن الضغوطات والشغل
هيفاء وهي تاشر بيدها لعيونها : من عيوني ,,,
تمنى فهد ان الوقت معها ما يخلص وتمنى اكثر انه يعوضها بالكامل عن اللي قد صار معها يمكن اذا عوضها عن اشياء كثيره مرت في حياتها ,, يمكن يكسب قلبها بسهولة,,,,

(( الجزء الخامس والعشرين ))

بعد مرور ساعات جميلة تحمل بين ثناياها الشهد والحب وعشق وليد ,, خذ فهد هيفاء وحملها بين ايديه ودار بها في الجناح يبي يدخل الضحكة في قلبها ولا تنسى ابد هاليوم الحلو,,,,
هيفاء وهي تضحك : فهد نزلني ترى والله بصيح ,, تكفى يا فهد نزلني
فهد : زوجتي وانا حر فيك اشيلك ,, ادور بك على كيفي انتي ملكي ,,,
وينزلها بشويش ووقفت بأتجاهه ::مدري كيف اعبر لك عن سعادتي اني معك ,, اي كلمة اقولها ما اظن توصف فرحتي ,, احس اني انولدت من جديد ,, وكأني اعرفك لأول مره ,,,
فهد : احبك
هيفاء خجله من فهد مرره: يا قلبي يا فهد
فهد: احببببك
هيفاء : وهي تهمس لفهد برقة : احبك مووووت ,, ويشيلها فهد ثاني بين ايدينه ويسوي لها حركات يبي يضحكها اكثر ,,,

مشاعل انجلطت يوم درت ان فهد وهيفاء في المملكة ,, ريما ما قالت لهم وحريصه اكثر انهم ما يعرفون ,, بس العنود بسذاجتها قالت لمشاعل ,, اللي قعدت تطبخ وهي في مكانها ,, واللي يشوفها يقول فهد رجلها ورايح مع ضرتها,,,
وتطلع لغرفة عبير ,,, وتدخل عندها وهي كانت نايمه من الضيقة اللي شافتها من دخلت هالبيت ,, لا ريما تقعد معها وخالتها مو فاضية ,, ولا تبي تروح للقصر عارفه محد يبيها ,, ومشاعل اللي تركتها من البارح وما شافتها ,, الظاهر ان مشاعل مثلها يومهم كله نوم ويسهرون لحد بكره ,,,,
مشاعل بصوت عالي ,, قومي انتي وجهك ,, الناس عايشين في العسل وانا واياك ناكل فصفص ,,
عبير وهي منفجعه من مشاعل والحقد بيظهر من عيونها :وش فيك شعولة كن صاير فيك مصيبة
مشاعل : واالله يمكن المصايب اهون من خشة هيفاء ,, تدرين انها مع فهد البارح في المملكة ,,
وانهم للحين ما شرفوا ,, هاذي بتغسل عقله ,, هذا اذا ما قضت عليه معد راح يصدق فيها ابد
احنا تأخرنا ,, كله مني ,, توقعت انها تقعد بغرورها ذا وتشوف حالها عليه وعلينا ,, لكن شكلها ترسم مضبوط على فهد
ولا تستبعدين تحطه خاتم في يدها ,,
عبير : تخسي الا هي ما تقدر ,, فهد مو مستواها ولازم تعرف هالشي ,, هاذي حتة بنت مغرورة ولازم تعرف قدرها ,,,
مشاعل : مو وقته هالكلام ,, انا لازم انفذ اللي ابيه اليومين ذي قبل تجي امي ,,

في فيلا فيصل ,, لمياء ما تحس بنفسها ,, دايخه ومو في موده الطبيعي ,, غريبه انا ما كلت شي ,, وش صاير فيني ,,,
فيصل وهو يمسكها وينزلها على الكنبة ,,: وش تحسين به ياعمري
لمياء : احس اني مو طبيعه نفس كل يوم ,,,
فيصل : قومي يالله امشي بوديك العياده الخاصة يفحصون عليك ,, اقصاه سحبة دم ,, قومي يالله ,,
لمياء ,, لا يا قلبي مو لهدرجه مافيني الا العافيه ,, بس شي غريب علي مره ,,,
فيصل : وين عبايتك اجيبها لك ياعمري ,,قامت لمياء وسط الحاح فيصل انه يأخذها ,,,وقامت تلبس وتاخذ شنطتها تطلع معه
خذها فيصل بسيارته وحست بدوخه اكثر من السياره ,, وفيصل ما ارتاح من وضعها مرره ,, واسرع بسيارته ووصل للعياده بعد ربع ساعه ,,,
اول ما وصلوا كان في استقبالهم طاقم التمريض في العياده اللي يعرفون فيصل تمام واسرعوا له يحاولون يكملون اوراق لمياء وتدخل على الطبيب ,,,
تمت فحوصات لمياء ,, وجلست مع فيصل في غرفة الطبيب اللي تركهم على راحتهم وبيرجع لهم بعد شوي ,,
فيصل ماسك يد لمياء بين ايديه : لا تخافين ياعمري تلاقينه ضعف دم من اكلك البايخ ,, تبين تحافظين على رشاقتك مقابل صحتك
لمياء : لا والله بس هذا حدي في الأكل وش اسوي ,,
فيصل : لا عقب اليوم لازم تغيرين طريقتك ,,, وهما في حديثهم ,, دخل عليهم الدكتور وهو فرحان بالخبر الحلووو
دكتور محمد : مبررررروك يا فيصل ,, بنت فيصل حامل ,,, وقام فيصل من كرسيه فرحان : صحيح والله ,, تستاهل البشاره يا دكتور
لمياء نزلت راسها منحرجه من الدكتور ,, واول ما بلغهم الدكتور طلع من الغرفة يجهز ملف لمياء تدوام عندهم في العياده باستمرار
مسكها فيصل بين يديه : اسم الله عليك يا قلبي ,, الف مبروووك لنا ,,, بصراحه ما جاء في بالي انه حمل ابد ,,,
لمياء وهي منحرجه منه : الله يبارك فيك يا قلبي .. شعور غريب اني حامل ,,,
فيصل وهو يحب راسها : يا احلى ام انتي ياحلوووه ,, تعالي بس خليني ابشر,جدتي و ابوي وامي ,,
لمياء وهي تضحك ضحكتها المميزة له ,, طلعت معه وهي فرحانه وخايفه بنفس الوقت من وضعها الجديد ,,

فهد وهيفاءراجعين بالسياره للقصر والفرحة ترفرف على قلوبهم بطريقة رائعه ,, فهد شابك يده في يد هيفاء وكأنه بذا التشابك مو ده انهم يفترقون من بعض ابد
فهد : قلبي وش رايك نسافر اخر الاسبوع وودي اطلع معك بعيييييد عن هناا ..
هيفاء : انا معك وين ما تروح خذني لعيونك وحطني بين ضلوعك تلاقيني اقرب لك من رمش عينك ,
فهد : الله يا قلبي ,,, كل هذا لي وما قلتي لي من اول ,, وش له الاحراج والحياء ,, انا ملكك انتي بس ,, طلعي كل اللي في قلبك
استمروا يتناجون فيما بينهم لين وصلوا القصر وتمنوا لاول مره ان الطريق يطول ويستمتعون بخلوتهم الرائعة ,,,

فيصل وهو داخل للقصر قبل فهد بدقايق ويصيح بأعلى صوته : يمه ,, يمممممه ,,
وهو يجر لمياء معه وما تحس الا بضحكتها تطلع,,
ام طلال ولطيفه قاعدين ,, وفيصل يرفع يده كنه مو مصدق
فيصل : لمياء حامل يمه ,,,
ام طلال : مبروووك يا عيالي ولمياء تجي يمها وتحب راسها وتسلم على امها ,,,
لطيفه : الله يبارك لكم ياعيالي ,, ادعوا الله انه يرزقكم الذرية الصالحة ويبارك لكم فيها ,,

فهد وهيفاء داخلين للقصر ويسمعون اصوات ضحك من المجلس ,, اول ما دخل فهد تغطت لمياء ,, وهيفاء كذلك
وفيصل يسلم على اخوه : بتصير عم يا فهد ,,
فهد: مبرررروك يا فيصل ,, الف مبرووو ل يا لمياء ,, من زمان ما سمعنا خبر حلوووو
هيفاء ولمياء وهم يضمون بعض من الفرحه ,,
الا ريما داخله عليهم وتشوف الفرحه ماليه المكان
اشوفكم متجمعين ,, لا يكون عندكم شي ,,
فيصل وهو يبشرها ,, لمياء حامل ,,,
ريما وهي تصرخ بقوووه :مبروووووك يالدبببه ليه وانا اخر من يعلم وليه ما قلتوا لي وهي تضم لمياء بقوووه
لمياء : الحين دخلنا من شوي بس ما امداني اكلمك ,,,
قعد فهد شوي معهم وطلع للجناح يبي يغير ملابسه ,, معزوم مع نواف عند واحد من ربعهم وما يبي يتأخر عليهم ,,,فهد وهو طالع قال حق هيفاء تجي ترتب اغراضه
لم طلال وهي تراقبهم ارتاحت من المنظر اللي شافته وتمنت لو هالمنظر كان من زمان ,,, طلعت هيفاء مع فهد وهي توعد البنات انها تجيهم على طول عقب طلعة فهد وتسولف لهم عن عزومتها ,,,
فهد اول ما دخل الجناح قفله على طول : لازم اقولك تعالي قدامهم ,, ودي اول م ا تشوفيني بطلع هنا تجين على طول ,,
هيفاء وهي تأشر له من عيوني ,,,
فهد : زين منتي مجهزة لي لبس ,,
هيفاء : الا انتي تآمرني دقايق بس ,, ومشت قدامه وهو يطالعها بحب وشوووق حقيقي انه يقعد معها شوي ,,

عبير ومشاعل منعزلين عن العالم وودهم انهم ينفذون كل شي بدقه عشان ما يجيهم اي شي في حال خربت خطتهم ,,,
وقعدوا يرسمون باقي الخطة اللي ابتدت فيها مشاعل من ايام المزرعة وعزمت انها تنفذها تبي تقهر هيفاء وتفتك منها ,,,,
عبير : زين متى بنفذها ,,,
مشاعل : اصبري خليني اتحقق من كل شي وعقبها نبتدي فيها ,,

بعد ما طلع فهد لربعه خذت هيفاء شاور ولبست لها بنطلون جينز مع فستان فضفاض اوف وايت مع زهور بلون البنفسج ,, ولفت عليها وشاح ونزلت للبنات اللي اكيد بيزعلون انها تأخرت عليهم

ريما اول ما شافتها : وين قاعدين هذا كله تجهزين ملابس فهد
هيفاء : بنشوف انتي وش كثر بتقعدين بعد لك ,,,
ريما وهي تضحك : يصير خير ,, يالله علمينا وش شعورك من اول ما ركبتي السياره ,,,
ظلت هيفاء تسرد عليهم شعورها وبعض المواقف اللي ما حست ان فيها احراج لها ثم تكلمت عن هدية ريما وشدت شعرها شوي
هيفاء : اما انتي احرجتيني ,, بغيت اموووت ,,, مره احراج
ريما : بذمتك ما دعيتي لي ,,,
هيفاء : الله لا يحرمني منك يا عمري ,,,
ولمياء مستمعه لهم لانها بالفعل تعبانه ,,,
ام طلال وهي تنادي على هيفاء : تعالي يا هيفاء شوي ,,,
جتها هيفاء وهي تمشي بطريقتها المميزة ودك ما تشيل عينك منها ,, وقعدت جنبها ,, جدتها وهي مطمنه من وضعها مع فهد ,, اسئلتها بعض الأسئلة الخفيفه اللي تستشف منها مدى سعادتها مع فهد ,,
هيفاء طمنت جدتها بكل شي قدرت عليه انها تقوله ,, وان فهد مستعد انه يريحها ويسعدها وقالت لها عن السفر في جولة لأوربا ويمرون عمتها مريم ,,,,
طالت السهره وانضمت لهم مها بنت هدى الصغيرة والعنود ,, اما مشاعل فما زالت في بيت طلال مع حبيبة عمرها عبير ,,,
بعد منتصف الليل قاموا الحريم لغرفهم ولمياء اللي حست بالتعب طلعت قبلهم ,,,
ارسلت هيفاء مسج لفهد (( متى بتجي ياعيوني ))
ودها تسولف مع ريما وتقضي معها اكثر وقت ممكن ,, انتظرت شوي وجاها رد فهد (( انا في الطريق يا قلبي شويه واكون عندك ))
بعد ما وصل فهد اسئذنت هيفاء من البنات اللي طلعوا ينامون في جناح امهم وجت معهم ريما تبي تغير جوها اليوم عن بيتهم ,,
دخلت هيفاء بعد فهد بدقايق ,, وشافت شكله المهيب اللي يجذبها من اول وهله ,,
فهد وهو يمد يده لها تجي جنبه ,, مسكها وقعدها عنده وسالها وش سوت عقبه
هيفاء : عقبك نزلت عند جدتي كانت فرحااانه مره بوضعنا انه تغير ,, وقعدت تدعي لنا ,,, اممممم ايه وقعدنا نسولف انا وريما عن طلعتنا ,,,
فهد : اي ريما عندها فضول ما راح تتركك الا لما تقولين لها بالتفصيل وش صار
هيفاء : لا يا قلبي هي اهم شي انك مبسوط
فهد : ادري الله يحفظها ان شالله ,,,
هيفاء وهي مستمتعه بقربها من فهد وتركز في عيونه حست انها ودها ما تتكلم حرف وتترك لعيونهم حرية الكلام ووناستهم بالوقت اللي ب يمظونه,,,, ظلوا على هالحال فتره طويله والمتكلم فقط هي عيونهم اللي عبرت عن خواطرهم بشكل صحيح,,,

في صباح اخر جميلا انطلقت مع ضوءه سعاده جميله بين عروسين لاول مره يعرفون طعم السعاده الحب
ظلت هيفاء في جناجها لوقت متأخر وتمن انها ما تكون مثل لمياء منعزله عن العالم
قامت هيفاء على مكالمها لجدتها تبيها تنزل ترتب امور عندها شوي
وفهد كمل رقدته بدون ما يحس بالوقت ,,,,
طلعت هيفاء لجدتها وقعدت معها شوي :: وفي هالاثناء دخلت مشاعل ,,, اول ما شافت هيفاء عصبت اكثر على انها تشوف انها الكل في الكل ,,,
استغلت مشاعل انشغال جدتها عنها وحاولت انها تبدل الجوالات مع بعض ,, جوال هيفاء محطوط علىالطاوله ,, خذتته وحطت ببداله وواحد توأمه ,,,,
بعد لحظات جاها اتصال ,, ماعرفت من رقمه بس سوت قبول ,,,رفعت الخط وسمعت صوت بنت كانها شووام,,,
اذا عندك غيره على زوجك روحي شوفي وش صاير في بيت عمك طلال ,, ولا يمكن تتخيلين ان فهد بسوييييه لكن الحمدلله ,,,,,
المشكله انها تركت فهد نايم وش معقوله بيصير الحين ,,,
جاها فضول تجاه هالشي وطلعت لفيلاعمها طلال ,,لكنها انصدمت بوجود مها في الساحه وهي جايه يمها ,,
هيفاء : من وجايه يا مها
مها " من بيت خالي طلال ,, ليه وشفيك ,,,,
هيفاء : من هناك ,, تبي تشوف عسى مو صاير شي كايد
مها : ما شفت حد مهم,,, كملت هيفاء طريقها ,,,, تبي تشوف من هذا اللي عندها جرأه وتكلمها في الجوال وتعطيها معلومات عن قصرهم واهلهم ,,,اول ما دخلت فيلا طلال شافت عبير في المدخل ,,
عبير : اهلا هيفاء وهي تحاول تعطلها شوي ,,,وش اخبارك يعني ما تسألين عنا عسى ما شر لاتخلين قلبك اسود عاااد ,,
هيفاء اغاظها كلام عبير ومو في حالهها ,, لانها ما شافت شي مو طبيعي في البيت ,, وما انتبهت ان عبير تلعب في جوالها ,,,
هيفاء وهي تبي تفتك من عبير ,, وين خالتي سلطانه ,, عبير وهي ترفع كتوفها بأنها ما تدري عنها بس يمكن تكون في المجلس ,,,,
مشاعل في اللحظه هاذي كانت واقفه تراقب مدخل جناح فهد ,, شافت مسج عبير ,, وعلى طول نفذت الخطوة الثانية
,, فهد اللي مستريح في سريره ومو عارف وش بيجيه ,, انتبه لأتصال ما عرف رقمه ,, بغى ما يرد عليه لكن لسوء الحظ جاه فضول تجاهه ,,
فهد : نعم
*** : الو ,, انت فهد
فهد : من معي
***: اتركك مني وروح شوف مدامك تواعد رجال من وراك ,,, على العموم المكان مو بعيد ,, في فيلا طلال وسكرت السماعه بسرعه ,,,
دقيقه مو اكثر وفهد ظاهر من الجناح بسرعه ,, شافته مشاعل وضحكت ضحكة انتصار ان كل شي بينتهي على اللي تبي ,,,
اول ما طلع فهد ,,, دخلت جناحهم وحاولت تشوف مكان تسريحة هيفاء وحطت عليها الجوال الاصلي لهيفاء ,, وطلعت مستعجله ,,,,
هيفاء وهي تحاول تشوف وين خالتها دخلت تشوفها في المجلس ,, الا تشوف قدامها رجال غريب اول مره تشوفه في حياتها ,, ما كان عليها الا شرشف صغير طلعت به من القصر جت بتحطه على شعرها من الصدمه الا هو يقرب منها
مشعل : هلا يا قلبي اخير شفتك ,, تروعت هيفاء منه وجت تطلع برى اكيد ذا مو صاحي والا فيه شي وش فيه يطالعها كذا ,,,
وهو يمسكها : تعالي لا تخافين ,,, انا معك والفيلا مافيها احد الحين ,, تعالي ,,,
ما التفت له تبي تطلع الا فهد في وجهها والشر طالع من عيونه ,,
هيفاء : انا مدري ان فيه احد هنا ,,
فهد وبصوت عالي : مشعل انت وش جابك هناااا ,,
هيفاء اللي صايره مثل البزر الضايعه ,,
مشعل اللي توهق ومادرى كيف ينقذ نفسه : هيفاء اتصلت علي وجيت ,,, ومر سريع من عند فهد يبي يطلع لكن فهد خذ بثوب مشعل ونزله في القاع ,, ورفسه على خده بقوووووه ,,, شغلك عندي ,, اذلف يالله ,,,
وهيفاء منصدمه من كل شي ,, ما شافت الا فهد يأخذ جوالها من يدها ويشوف اخر مكالمة ويشوف فيها رقم مشعل ,,,
فهد : وش تسمين هذا يا مدام ,, لا تحسبيني مغفل ,,, لكن صحيح خساره فيك كل شي انتي انسانه حقيره فاهمه وش يعني
حقيره ,,,,
هيفاء : فهد انت شتقول وهي تبكي ,, والله مدري عنه ,, فيه وحده كلمتني وقالت لي اجي
فهد : بس ولا كلمه ,, انتي طالق ,, يالله قبل لا اذبحك بيدي ذي انقلعي من وجهي قبل ارتكب فيك جريمه
هيفاء سمعت كلمة طالق انهارت وما صدقت ان كل شي صار في دقايق وينتهي حلمها مع فهد كذا ,,,
ريما دخلت مع الباب ,,,وهي تسمع صراخ فهد وعبير معاها وهي تضحك جوووه قلبها ان فهد طلقها ,,
ريما : فهد عسى ما شر ,, وش فيك يا اخوي :: وش صاير ,,
فهد وهو يدف ريما بيده ويطلع من الفيلا بكبرها ,, اسئلي بنت عمك ,,,,,
هيفاء ما تدري وش صار ,, اخر حاجه شافتها ظهر فهد وهو طالع ,,,,,

ريما تصب على وجهها مويه ,,, وتحط عطر وعبير يعني قال بتساعدها تنقذ نفس ,,,
هيفاء فتحت عيونها واول ما شافت ريما وعبير حزنت من نفسها ,, وقامت بمساعدة ريما ,, وديني غرفتي ,,,
خذتها ريما ومشت معها للقصر وهي مسندتها ,,, اول ما دخلت مع المدخل ,, الا تشوف ام طلال واقفه ,,,
ام طلال : هذه اخرتها يا هيفاء تبين لنا الفضيحه ,,
هيفاء وهي تهز راسها لا لا انتوا ما تبون تسمعوني ,,, كذب والله كذب ,,
ام طلال : بيكذب عليك مشعل ,, لا حول ولا قوة الا بالله ,,, ولطيفه اللي منهارة على الكرسي بعد ماجاهم فهد وقالهم ان بنتهم طالق ,,,,
هيفاء شافت امها وعرفت ان حياتها انتهت ,, وان فهد مستحيل يسمعها ويعرف منها الحقيقه ,,,,
هذا كله خططهم ,, اااااه هذا اللي انا خايفه منه صار ,, خساره يا فهد خساره ,,,
طلعت فوق وهي تحس روحها بتطلع منها ,, اول ما دخلت الجناح وشافت مكانها هي وفهد اللي ماله حس انفجرت تصيح على حالها وين كان وكيف صار ,,,,,,,



هيفاء وهي مسنده راسها على امها ودموعها ما وقفت وماسكه يدها ولطيفه تقرا عليها وتصبرها ,,, قعدت لطيفه تمسح على راسها
وتهديها ,, ارقدي شوي يا بنتي باقي على الديرة مسافه ,,,
هيفاء وهي ما ذاقت النوم من يومين ما تدري متى بتفتك من هالحزن اللي على صدرها دعت ربها انه ينتقم لها ,, وانه يحقق لها شي واحد بس
ان فهد يعرف انها بريئة ,,,,,,,

(( الجزء السادس والعشرين))

في المزرعة وبالتحديد في الخيمة فهد عزل نفسه عن الجميع وبلغ فيصل انه بيغيب عنهم كم يوم يرتاح فيها شوي وخصوصا بعد الخلاف الكبير اللي صار بينه وبين ابوه اول ماعرف بالسالفه ,, طلال عصب على فهد وما ترك كلمه ما قالها فيه يوم درى انه طلق هيفاء ,,,
وغصبه انه يرجعها لأنه بالعقل مستحيل هيفاء تسوي كذا ,,, لكن فهد اللي ما قدر يكذب عينه رفض رفضا قاطعا انها ترجع له ,, وان اصلا من خذها امورهم بين مد وجزر لكن ما توقع بعدالايام الحلوة اللي راحت ان هيفاء يكون لها وجه ثاني قدرت انها تخفيه عنه ,,,,
على اثر خلافه مع والده فضل انه يترك القصر فتره لحد ما تهدأ النفوس ,, ويرجع وضعه مع والده مثل قبل ,,, فهد ما يهون عليه ابوه ولا يرد له اي طلب ,,, لكن في ذا ما اسطتاعت نفسه ان يقبل ,, ويعذر هيفاء في غلطها لو وشو ,,, فهو مثل اي رجل ,, ما يقدر يغفر غلطة متعمده من زوجته ومو اي غلط ,,,,
فهد في الخيمة والتلفزيون على المباراه اللي قربت تنتهي ,,, لكن ما شاف منها فهد اي دقيقه ما يشوف ين عيونه الا موقف مشعل وهيفاء
قعد يمسك شعره وكأنه يجره من الضيقه ,, يا ليتني ذبحتكم وافتكيت منكم ,,, صار له يومين ما يعرف الليل من النهار ولا يرد على اتصالات نواف اللي ماعرف وش فيه فهد ,,,
مشاعل وعبير تكتموا على الخبر لأنهم اذا حكوا فيه بيتركون لفهد اول خيط انه يكشفهم فما كان منهم الا انهم يحرصون ما يسالون اي حد وش صار ,, اهم شي يفتكون من هيفاء ,,,
مشاعل : عبير انتي عارفه اذا حد عرف وش يعني ,,,
عبير : اكيد عارفه ,,
مشاعل : عبير اياني واياك حد يدري ترى اروح فيها قبلك فاهمه الكلام ذا ,,,
عبير : لاتوصيني عمري ,,, اهم شي خلصنا منها ,, ما تصدقين يوم شفتها وهي طالعه من القصر ,, روحه بلا رده ان شالله مت من الفرحه ,,, بس عاد تأكدي من صديقتك سهام ماترجع تكلم مشعل ,,
مشاعل : يا ويلها اصلا انا عطيتها مبلغ عشان هذا كله ,,,

فهد وهو ما يدري وش يسوي ,, ومادرى عقبه وش صار ,, لكن فيه حقد على هيفاء انها سوت فيه كذا ,,, اااه يا هيفاء ,, اشوفك ما قربتي مني اثاريك ناويه على شي ثاني ,,, ليه طيب وش سويت لك ,, وهو في سرحانه حس بحد يكلمه ,, وش تبي فيك ,, وش شافت منك اصلا انت اللي ضربتها وقهرتها وسفهتها ,, وش شافت منك نفيتها من عالمك يوم انت بغيت وقربتها من عالمك يوم انت بغيت ,, هيفاء ماعمرها طلبت والا بغت منك شي ,,, واذا كان على اخر مره انت عارف انه كله من ريما ولو هيفاء طلبت ,, وش العجيب يعني يا فهد ان هيفاء تبي واحد ثاني ما تبيك ,,,
كل ما سمع الكلام ذا يدور في باله يزفر بقوووه ويتمنى ان اللي صار كان حلم مفزع ويقوم منه ,,,
كان وده يشوف هيفاء تغسل قلبه وتقوله ان هذا كله حلم في حلم ,,, ااااه يا هيفاء ليه كذا بس ليه !!!!

في صالة بيتهم الصغير المتطرف في الديرة ام عبدالله ولطيفه يسولفون عن هيفاء ,,,
ام عبدالله : يعني ما قالت لكم وش فيها ما تبي ولد عمها كذا بس ,, وانتي كيف تتركينها على كيفها ,, وين راح حزمك معاهم السنين ذي راح كذا عشان خاطر هيفاء ,,
لطيفه وهي تتنهد بقوه ماودها تقول لرفيقة دربها عن سر هيفاء : ما قدرت على دمعتها يا وخيتي ,,, تعرفين الرجال هالايام مو نفس قبل ,,,
ام عبدالله : مهما صار البنت مالها الا بيت رجلها ,, وش هالدلع عاد بكره يصكها بوحده ثانيه
ولطيفه اللي عارفه ان هيفاء ما راح ترجع لفهد ثاني : الله يوفقه ويسعده ماعندي الا انه يوفقهم كلهم ويعوضهم خير ,,,

هيفاء قاعده في حوش البيت الخلفي ,, هاذي قعدتها مع لمياء في وقت الشتاء ,, يفرشون بساط تحت السدره ويقعدون يقرون ولا يسولفون مع بعض ,, واذا جاء المساء وفتحوا اضاءة الحوش شبوا لهم ضو وتجمعوا مع امهم عليها ,,,
قاعده بجلابيتها القطن ومعكفه شعرها وصايرة بنت في الثانوي ,,, ضمت رجلها لبطنها ومسكتهم بيدها ونزلت راسها على جنب تشوف الزرع اللي على جنب السور ,, من يومها صغيره وهي تحط فيه نبته هي ولمياء ويزرعون مثل ماعلمتهم الابله وما يفرحهم الا اهتمام امهم بسقايتها مع النخلة اللي تتعزها هلطيفه كثييير ,,,
عيونها تورمت من الصياح ,, ولا لها حول ولا قوة ,, وراح فكرها ابعد من الزرع لهذاك اليوم اللي طاحت فيه واول مادخلت وشافت امها تصيح ,,عرفت ان فهد قال لهم على كل شي ,, ليه يا فهد ما صبرت تشوف بنفسك ان مالي ذنب ,, ليه ما تتأكد اول ذا كيف جاء ومن دخله هنا ,, كلما تذكرت عبير وطريقتها معها عرفت انه فخ نصبوه لها وهي بغبائها راحت لهم برجولها ,, لانه تصدق بسهولة وما تعرف ان البشر هذولا ممكن يكيدون لها وهي ما تدري ,,, طرى عليها يوم دخلت غرفتها وهي تصيح ما تدري وش تسوي ,, تشيل اغراضها والا تتركها ,,اللي تعرفه ان فهد معد يبيها وما تقدر تدافع عن نفسها لانه مو مصدق ولا يبي يسمعها ,,,
فتحت شنطتها اللي جابتها من الديرة وحطت فيها ملابسها الاساسيه وما خذت من مجواهراتها الا سلسال جدتها وساعتها اللي شراها عمها طلال ,, تركت المجوهرات والسلاسل ,, وملابس السهرة والصنادل ,, شافت انها بتشيل شي بيذكرها بكل يوم هنا ,, مسكت فستانها التافتاه اللي لبسته في المملكة ,,, ما قدرت تتركه كل الذكريات الحلوة مع فهد يمثلها ,, لمته في كيس ودخلته الشنطه ودموعها تنزل بقوه ,, اول ما فتحت درجها وخذت المصحف والدفتر ,, تذكرت الطيب اللي عطتها اياه جدتها من فهد ,, جت بتاخذه وعقب هونت في اخر لحظه ,, شافت الجوال على الطاوله ,, استغربت هل فهد جاء هنا وتركه لها بس هو خذه يوم طلع اخر مره شافته ,, فتحت الجوال تبي تتأكد متى كانت المكالمة اللي يقول عنها ذاك الرجال اللي اسمه مشعل ومتى كلمت وهي وين كانت ومن خذ جوالها مشاعل والا عبير ,
فتحته ما شافت اي شي غريب جوالها العادي ولا فيه اتصال ,,, فعرفت انها حرب ضدها ومكيده كبيره بس كيف تحلها ,,,
هي متأكده من نفسها وماعرفت حد في حياتها الا فهد ,,طيب ليه ماعطاني فرصه ,, اخر شي تركت جوالها على الطاوله ,, يمكن يجي فهد ويشوفه ,, والا يفكر من قلبه ان هيفاء مو صاحبة هالسوالف ,,,,

جمعت اغراضها الباقيه وطلعت لامها اللي تنتظرها تحت ,, ماودها تطلع من القصر وتسوي مناحه مع البنات وجدتها ,, فقالت لأمها يظهرون في وقت محد منتبه لهم ,,,,
انتبهت من فكرها اللي خذها بعيييد للرياض ,, وتذكرت ياترى وينك يافهد ,, وش ظنك في الحين ,, ما اقول الا الله يوريك يوم تشوف فيه اني بريئه ,,,,
سمعت صوت امها يجي من الصالة تناديها ,,, هيفاء ,,,
قامت يا هيفاء ومسحت دموعها ,, ودخلت لامها اللي تسولف مع ام عبدالله ,,,
هيفاء : لبيه يمه ,,
ام عبدالله : انا اللي ابيك يمك ,,, وش رايك تروحين لبناتي شوي توسعين صدرك ,,,
هيفاء : معليه يمه اسمحي لي تعبانه شوي ,, حاولت ام عبدالله تثنيها لكن مافيه امل ,, هيفاء مصره على رايها ودخلت غرفتها ,,,
من كم شهر كانت هنا وطول الوقت هي ولمياء في غرفتهم البسيطه يحاولون يضفون عليها اي شي بسيط يزيد من جمالها
على بساطة بيتهم وصغره لكن من تدخله تنسى هموم الدنيا كله وتحس انك في واحه صغيرة من الهدوء والجمال والنظافة المشعة من كل مكان ,,
مجلسهم الصغير يحتوي على سجاده كبيره مع جلستها العربية ,, وصالة البيت اللي تحاول لطيفه انها تزينها بأحواض نبات على جنب يضفي لبساطتها لون جميل ,, جات الشغاله تنادي هيفاء للعشاء مع امها وجارتهم ,, لكن كالعاده هيفاء رافضه هالاكل من يوم جت هنا ,, وعايشه على القهوة والتمر ,,, وفي اقصى نوبات الجوع ,, تاكل خبزه ناشفه تسد جوعها ,,, مالها رغبه ابد في الاكل وتشوف ان الأكل هو اخر لذه تبيها ,,,

لطيفه بعد ما طلعت ام عبدالله ,, دخلت عند هيفاء : يمك هاذي مهي حاله ,, الى متى وانتي ما تاكلين ,, كذا مو زين لصحتك
هيفاء : مالي نفس يمه وهي تصد منها كانت متمده على السرير ,,,
زين ليه ما قمتي تبدلين وتتلحفين لا يجيك البرد ,,,
هيفاء وهي تحاول تصرف امها ,, حاضر يمه بقوم بعد شوي ,, اول ما سكرت لطيفه الباب داهمتها نوبة بكاء شديده وقعدت تنشج مثل البزر اللي فقد امه وما يدري وين راحت منه لين حست ان ضلوع صدرها ببتتقطع او ان روحها بتطلع منها ,,,

ريما ولمياء متقابلين بوجوم وصمت من راحت هيفاء ولمياء فاقده القدره على الكلام حتى ,, حاول فيصل انه يهديها لكن اللي صار لاختها صدمها ,, مو هيفاء اللي يصير لها كذا ,, هم نصابين بنات حرام ,, وفيصل يهدي من روعها وحزنها ,,,

ريما وهي مو عارفه وشلون حياتهم عقب هيفاء كيف بتصير ,, من راحت خذت معها الفرحة والضحكة والسعادة اللي حسوا بها من جتهم ,,ريما على حزنها على هيفاء وما ودها انها تسافر للديرة بدون ما تعطيهم خبر ,, يعني وشفيها اذا قعدت عدتها في البيت ,, يمكن تتصلح الاحوال بينها وبين فهد ,, مع ذلك كان حزنها من فهد اكبر وهي حاسه فيها ,, مو عادة فهد انه يضعف كذا ,, هذا هو اختار انه يكون بروحه وما وده اي احد يعزيه والا يصبره ويكلمه في مشكلته ,,,
ام طلال مثل لمياء جتها صدمه من اللي صار ماهان عليها فهد تجيه ضربه في الصميم ,, ومع ذلك صدمتها في هيفاء اكبر ,, معقوله هيفاء تكون كذا ,, مستحيل هاذي من يوم جتني ما طلعت من البيت الا كم مره ولا لها في الطلعات والتمشيات داعي ,, هاذي حدها حد البيت ,, اجل وش اللي شافه فهد ,, يصدقها ويكذب عينه ,, لكن كله من الشيطان لاحول ولا قوة الا بالله ,,,,
الصدمة مخيمة على الجميع والحزن مسيطر على القصر ,, طلال حزين على وضع عايلتهم ومو مصدق انهم يصير لهم بالذات هالشي ,,,

مر اسبوع كامل ولمياء عيت تخرج عن صمتها ..,, وكل ما كلمها فيصل ,, تطلب منه يعطيها فرصه تعدي الصدمة اللي صارت ومانفع معها اي شي ,, في الاخير تركها فيصل تاخذ راحتها لحد ما تتغلب على شعورها الحزين ,,,
في مغيب يوم الخميس ,, وفهد يشوف خيول المزرعة ويتفقدها ,, ما سمع صوت السياره الجايه ,,, كمل شغله مع الخيول,, وما انتبه لنواف اللي يراقبه من السور ,,, اول ما التفت وشاف زوله ,,
فهد : من متى وانت هنا ؟؟؟
نواف منصدم من شكل فهد طالع له دقن وعيونه تنبئ عن شي عظيم ,,,
نواف : وش فيك يا فهد ,,, ما توقعت على صلتنا وصداقتنا انك تهرب مني وما تبي تكلمني ,,,
فهد : انا ما اهرب منك ,, خلاف بيني وبين ابوي وبينحل ان شالله هذا هي المشكلة ,,,,
نواف : ليه ما ترد على الجوال ؟؟
فهد : بغيت اكون لوحدي فيه مشكله ؟؟
نواف سكت ماوده يزيد على فهد بعد ما شافه بذا الشكل ,,,,,
طلع له فهد مشى معه للفيلا يغير يقعدون في المجلس شوي ,,,
بعد مابدل فهد جاء عند نواف اللي يقلب في التلفزيون ,,,
فهد : شخبار الشغل ,,
نواف : لاتحاتي الشغل كل شي على ما يرام ,, نواف سمع من امه ان فهد طلق هيفاء ,,, وماكان وده ان يفتح الموضوع مع فهد
بعد ما شاف فهد انه تعبان عزم انه يفاتحه يمكن يفضفض اللي في قلبه ,,
نواف : فهد ادري خصوصيات ,, لكن ليش استعجلت بالطلاق ,, كل مشكله ولها حل ,,
فهد مو عارف وش مدى معلومات نواف : لو فيه حل للمشكله ماكان طلقتها لكن خلاص هذا موضوع وانتهى ,,,وماودي احكي فيه
نواف : انا ما ابي افرض عليك شي بس ودي ترتاح من الهم اللي انت فيه ,,
فهد : مافيه هم ولا شي وبرجع معك للرياض ,, كملوا عشاهم ومشوا راجعين وفهد وده يطلع من الرياض بكبرها ,,,

بعد ما صلت العشاء قعدت ام طلال على سجادتها وهي تفكر في هيفاء ,,, ونزلت دمعه على خدها يوم تذكرتها ,, لوهي الحين هنا كان سوت فراشي وبخرتني ,, وونستني ,, ليه ياهيفاء فهد وش ناقصه تسوين له كذا ,,, كلمتها خديجه عشان تتعشى ,, لكن مالها نفس تاكل اي شي دخلت في فراشها وقرت اذكارها ونامت ,,,

سلطانه تعاملت مع الوضع بسهوله ,, هي ماودها فهد يتنجبر على هيفاء ويم صار تأقلمت عشان طلال وامه لكن الحين بعد ما صار الطلاق ,, ارتاحت ان فهد اتخذ اللي يشوفه مناسب مع انها ما تحمل اي عدواه مع هيفاء ,,

هيفاء وهي تجري في صحراء شاسعه وتلحقها حية كبيرة وتحاول تعضها ,, كانت تصرخ بقوه تبي حد ينقذها لكن كل اهلها يطالعونها وهما واقفين ,, فهد وعمها وجدتها الوحيده اللي تبي تساعدها لمياء ,, كانت تحرك يدها في الهواء بس ماقدرت تنقذها
وتعضها الحية في ساقها وتطيح تئن وترتفع ثاني وتجري تبي حد يساعدها وهي تصيح باعلى صوتها فهد .... فهد ,, فهد ,,,
قامت ام طلال مفزوعة من الحلم اللي شافته ,, وقعدت تقرأ الدعاء وتنفث على جانبها الايسر وتتعوذ من الشيطان الرجيم ,,,
قعدت ام طلال في مكانها وهي ترجف من الحلم ورجعت تفكر في هيفاء من ثاني ,,,,

دخل فهد لجناحه ,, وهو مجروح في قلبه وروحه ,, وماعنده من يدواي جروحه ,, شاف مكانه هو هيفاء اخر مره يوم جاوا من الفندق
وطرد الذكرى الحلوة من باله ,, ما يبي يتذكرها حس انها طعنته بقوووه في ظهره ,, دخل غرفته وهد جسمه على السرير يبي يرتاح من طول الطريق ... طلع بوكه ومفتاحه والجوال ,, وتذكر جوال هيفاء اللي خذه ذاك اليوم تذكر انه رماه في الدرج .. جاه فضول يشوف وش داخله يمكن يكون فيه اتصالات غير واشخاص غير مشعل ,,,
قام بسرعه وطلع الجوال من الدرج ,,,وفتح على الأتصال وشاف ان الجوال مافيه الا رقم مشعل لا صادر ولا وارد واستغرب هالشي
فتح المسجات واستفزته المسجات المكتوبة واللي كان يتبادلونها ,, لكنه استغرب ان مافيه مسج منه مع انه ارسل لها كذا مره وين راحت
قلب في الجوال ودق منه على جواله وظهر عنده رقم غير رقم هيفاء ,, معقوله عنده شريحتين ,, وليه لا راح تكون ذكيه وتبعد الشبهة عنها ,, بس متى قدرت تطلع شريحه ,,
طلع لغرفتها وده يبحث ويحصل شي ثاني يدينها عشان يقتل اي ذكرى حلوة لها ,,,
وفتح درجها ومالقى كتابها قعد يفتح ادراج التسريحه وحصل اغراضها في نفس المكان ,, كأنها بترجع لها بعد كم يوم ,,, والله تحلمين ياهيفاء ,,,,,
وهو رافع عينه شاف الجوال على التسريحه ,, فتحه وشاف رقمه فيه ومسجاته مع هيفاء ,, بس استغرب انها تجط جوالين نفس النوع ,, اكيد عشان تشيل اللي تبي محد يشك فيها ,,, بس انتابه الفضول تجاه شي معين وعزم من الصباح بدري انه يتحقق منه عشان يقطع الشك باليقين ,,,,

هيفاء نايمه في فراشها وهي ضامه رجلها لبطنها وهي على جنبها ,, وتفز كل شوي ,, كل ما غمضت عينها يداهمها كابوس واصوات حيوانات ,,, من صارت المشكله وهي كل يوم كابوس ,, وفي الأخر تقوم تواصل لحد ما يطلع النهار وترجع تنام شوي ,,,تعبت من حالتها ,, قامت مره ثانية وهي ترجف ,, ودخلت وتوضت وقعدت تصلي وتدعي ربها انه يفرج عليها كربها ,,, صار لها اسبوع يمكن اكثر ما سمعت صوت لمياء ,, مشتاااقه لها ولريما ,, بس ما تقدر تكلمهم وهي بذا الحالة لأنها راح تصيح اول ما تسمع اصواتهم ,,,,
اخر مره كانت لمياء تبي تكلمها رفضت وقالت لجدتها تقول لها انها نايمه ,,, ما طلعت جوال وما تبي ابدا ,, اهم شي عندها انها تتجاوز الحاله اللي هي فيها ,,,
من الصباح بدري خذ فهد شريحة الجوال وراح لواحد من ربعه الخاصيين وعطاه الشريحه وقال له يتحقق منها ,,
طلب من يومين ويرد عليه ,, بس فهد ضغط عليه وقال لازم تطلعه الحين ,,,, بعد ساعه كلمة وعطاه اسم هندي ,,بعده كلم سعود وعطاه اسم الهندي وقال له يجيب اسم كفيله ضروري ,,,,
فهد يومه كله وهو يدور من مكان الى مكان ما حس انه يقدر يقعد الا يعرف الهندي ذا وين يشتغل وكيف طلع لهيفاء شريحه ,,,,
بعد منتصف النهار ابلغه سعود بأسم الكفيل ,,, واستغرب انه ما يعرفه ومن يطلع ,,,, وكيف قدرت هيفاء توصل له ,,,,
هل لها صديقه في البيت هذا ,,,, وآثر ان يسئل ريما ,,,,
طلع للقصر على طول ,,, وكلم ريما تجيه في الجناح ,, واول ما جاء صادف جدته اللي ,, شافته متوتر وبغت تقوله عن حلمها ,, حست انها اذا قالت له يمكن يكون له معنى ,,,
دخل جناحه وشاف ريما جالسه ,,, وعلى طول ما تردد في طرح السؤال ,,,
فهد : ابي اسئلك عن اسم وقولي لي وش تعرفين عنه ,,,
ريما : وشو ,, اسمعك
فهد : تعرفين هالاسم (( ,,,,,,,,,))
ريما : وهي ترفع حاجبها تبي تتذكر هل مر عليها ,, بس حست مخها مسكر ,,
فهد : هل هيفاء لها صديقه في هالبيت تذكري ,,,
ريما : فهد من جدك ,, هيفاء مالها معارف في الرياض ابد ,,,
فهد : هااااا ,, ريما تذكري يمكن تعرفين ,,, من يطلع ذا يمكن في الجامعه والا صديقه لكم ,,
ريما : وهي تردد الاسم ,, هاااا ,, هاااااااااااااااااااااا
لحظه ,, هاذي سهام بنت ,,,,,,,, هي اكيد هذا اسم عايلتهم ,,
فهد : من سهام ذي ,,,
ريما : هاذي صديقه مشاعل ,,,
فهد كان واقف وقعد ,,, اااااااااااااااخ ,, تنهد فهد بقوه وكن الامور بدت تتضح قدامه بس لازم يوصل لكل شي ,,,
فهد : تقدرين تجيبين رقمها ,,,
ريما : ما اعرفها ومالي صله بس احاول ,,,
فهد : بتحصلينه في جوال مشاعل ,, ريما انا مقدر انام لين اعرف الحقيقه ,,,
ريما : اصبر يا فهد ,,, راح اجيبه لك بس تأكد مستحيل هيفاء من هالنوع وانت استعجلت على الحكم عليها الله يهديك ,,,,

بدون تضييع وقت كلمت ريما العنود وقالت لها انها تبي تتعشلى عندهم ,,, طارت العنود من الفرحه وهي مستغربة ان ريما تجيهم ,, اخر مره دخلت بيتهم يوم طلعوا للسوق مع بعض ,, انبسطت ريما وقامت تتجهز عشان جية ريما ,,,
اما ريما فكانت تبي تشوف وش احسن طريقه تشوف فيها جوال مشاعل بدون ما تحس ,,,,

بعد ما صلت هيفاء صلاة المغرب ,, حست شوي ان الله ربط على قلبها من كثرة قراءة القرآن طلعت في الحوش وخذت معها الراديو وحطته على اذاعة القران الكريم ,, وقعدت في سكون تسمع للبرامج الدينيه ,, لانه حست بسلوة قلبها فيها ,,, ضعفت خلال اسبوع واحد 3 كيلو وهي اصلا ضعيفه ,, بس ما شافت ان لها شهية للأكل مرررره ,,,

ريما وهي خارجه لبيت عمتها هدى ,, اتفقت مع فهد انها اذا حصلت الرقم ترسله مسج ,,,
وفي نفس الوقت اللي طلعت ريما فيه طلع فهد لمجلس نواف وكان حريص انه يحصل مشعل اخو نواف اللي اصغر منه ,,,
اول ما وصل مالقى اي احد ,, قعد يشوف التلفزيون ,,واتصل على نواف ,,
فهد : وينك فيه ,,
نواف : بغيت شغله حق جهازي وبجيك ما توقعت تجي بدري ,,,
فهد : خذ راحتك انا اشوف التلفزيون ,,,
وعلى طول كلم مشعل ,, اللي اول ما شاف رقم فهد جته نفضة وهو في مكانه ,,,
فهد : وينك يا مشعل
مشعل وهو مرتبك : انا داخل البيت وبطلع لربعي بغيت شي ,,
فهد : اي تعال للمجلس الحين انا برى ,,,
خاف مشعل من فهد انه يضربه والا يسوي فيه شي ,,,
دقايق وهو يقدم رجل ويوخر رجل ,, ويدخل عند فهد ,,وعلى طول : انا في وجهك يا فهد والا هي اللي قالت تعال ابي اشوفك ,,,
فهد يمسكه ويقول له انثبر ولا كلمة وحده اقعد اشوووف
قعد مشعل وهو يتنافض ,,
فهد : قلي من الاول وش صار ,,,
مشعل : من فتره بسيطه جاني اتصال من بنت ,, وقعدت تتقرب مني وانها ودها تتعرف علي وشافتني في مكان وسألت علي وقالوا لها اني مشعل بن ,,,
وقالت هدفها تبي تتعرف بس لا زواج ولا غيره علاقه يعني ,, انا ما صدقت خبر بنت تكلمني وتبي تتعرف علي خصوصا صوتها جذاب ,, وكل ما قلت لها انتي من قالت بقولك بعدين ,, وصارت تتصل علي كل وقت وترسل مسجات شوقتني اني اقابلها ,,, ما عرفت الا اسمها هيفاء ,,,
ومرت الايام وهي ترسل وكلام شوق واصريت عليها اقابلها ,, فقالت لي انا بحدد لك الوقت المناسب ,,, وانا اضغط عليها وهي ماعطتني وجه ,, بس تكلم وتعطيني من هالكلام ,,, قبل هذاك اليوم بليله ,, قالت لي تبي تشوفني ,, واكدت لها اني مشتاااق مره ,,
فقالت خلاص تعال في فيلا خالك طلال بشوفك هناك ,, قلت انتي وش دخلك في بيت خالي ,, ضحكت بقوه قالت انا صديقة ريما واجي عنده على طول وبس راح اشوفك من بعيد ,, عشان تتأكد انه انا ,,, صدقتها
وقلت اكيف اجي بيت خالي ,,
ضحكت وقالت مو خالك تعال انك تسلم وبتشوفني ,, قلت كيف اشوفك ,, قالت بجيك في المجلس ,,
تعرف الحماس خذ مني كل مأخذ ,, ورحت ابي اشوفها وصار اللي صار ,,
والله ثم والله يا فهد اني ما اعرف انها زوجتك ,, وان كل اللي اعرفه عنها اللي قلته لك ,,,,
فهد والصورة تتضح اكثر واكثر وقدر يحل كل شي بس بعد يبي حط النقاط على الحروف ,,,
في الا ثناء هاذي جاه مسج من ريما بالرقم ,,
فهد : شف يا مشعل الحين الحين ابيك تكلمها وتقول لها ليش تقطعين رقمك وتحطين رقم ثاني ,, واذا قالت لك مين عطاك
قل مشاعل فاااااهم
مشعل : وش دخلها مشاعل انت صاحي ,,,,
فهد : انت نفذ اللي اقولك وبس واذا طولت معك قل مشاعل قالت لي عن خطتكم وبس ,,,

فتح فهد المسجل في الجوال وحطه على الاستعداد :
وقال لمشعل يكلم الحين وشوي
مشعل : هلا يا هيفاء نستيني ,,
سهام وهي مرتبكه : مشعل ,, هاا من عطاك رقمي ,,,
مشعل وهو يزيد : معقول ما احصلك انا مشعل ياعمري والا نسيتي ,, نسيتي شوقك لي وحبك ,,,
سهام : مين عطاك الرقم ؟؟؟
مشعل : يعني مين مشاعل هي اللي عطتني ,,
سهام اللي تعلقت بمشعل بس ما تقدر تعصى مشاعل والا قضت عليها ,: قلبي مشاعل هي اللي رفضت اني اكلمك ,, وخصوصا ان اللي تبيه صار وفهد طلق هيفاء ,,
مشعل : ليه انتي مو هيفاء
سهااام وهي حست انها غلطت بسبب مشاعرها لمشعل : هااا لا هذا مقلب من مشاعل لان هيفاء وحده مغروره وحقيره
وقطع فهد الخط وقام وهو يحس بأنفراج في مصيبته ,,, نواف اللي كان يراقب الوضع كامل ,,, اختي مشاعل تسوي كذا
ويدخل في البيت ما يشوف من الزعل وهو ما يدري ان ريما عندهم
ويصيح بأعلى صوته : مشاعل ,, مشاعل ,,
ويفتح باب غرفتهم بقوه وما انتبه لريما والشرر يتطاير من عيونه مشاعل
وهي واقفه ما تدري وش فيه نواف ,,, مشاعل : خير شفيك تصارخ ,,,
وما شافت الا العقال على ظهرها وهي تصيح ,,, ونواف يضربها من كل قلبه ,, ياالحقيرة يا الواطيه ,, ياللي ما تربيتي ,, هاذي اخرته تبلين بنت خالك البريئة ومع مين مع اخوك ,,,
وين ما تحركت تبي تهرب ونواف ما سكها من شعرها وضرب في حياتها ما خذته ,,, يا حيوانه يا قليلة االادب ,, يا عديمة الضمير ,,
انتي ما تستاهلين الا نجس مثلك لكن هين يا مشاعل والله لعطيك اول حد يجيني ,, عشان تعرفين ان الله ما يظلم ,,,
وهدى اللي جت على الصراخ ,,
نواف ,, شيل يدك منها ,, اتركها ,, هاذي بنتي اشرف من البنات ,,
ونواف يصرخ في وجه امه ,,, يمه بنتك خاينه ,, خانت التربية والاخلاق اللي علمتيها اياها ,, بنتك خربت بيوت , الحقد ملى قلبها واعترفت صديقتها الحقيرة عليها ,,,
طاحت مشاعل على الارض بعد ما سمعت كلام نواف وعرفت انها انتهت من ذي اللحظه ,,,,,,


هيفاء وهي في قعدتها على بساطها وومستمعه للبرنامج الديني ,,, وقفت عندها حمامه بيضاء ,, وقعدت هيفاء تشوفها ولاول مره تتنمنى انها مثل هالحمامه تطير ولا لها اي هم ,,,,,,

بعد فتره رجع نواف لفهد وهو معصب لاخر درجه ,, فهد عرف نواف وش سوى حاله كان يتكلم ,,, مسكه وضمه له وطلعت من نواف دمعة قهر من اللي سوته اخته ,,,
فهد : خذت جزاها ,, وربك ما يظلم احد يا نواف ,,,
ريما كانت تنتظر عند سيارة فهد وهي تصيح ,, تصيح من شوفة نواف انه مقهور وتصيح على حال هيفاء المظلومة ومن اللي لها الحين ,,,
جاها فهد وهو بالرغم ان الله اثبت براءة هيفاء بالادلة كلها وصحيح انه هو اللي سعى في كل شي عشان يقطع كل شك يدينها او يثبت التهمة عليها ,, مع ذلك حس انه تافه عند هيفاء وانها مستحيل ترضى عليه بعد اللي صار ,, والطلاق اللي رماه عليها بسرعه بدون ما يتثبت ,,,,

دخلت ريما وفهد على طلال وامه يبون يعلمونهم بكل شي ,,, واول ما شافتهم ام طلال حست بكل شي ,,
ام طلال : فيه شي عن هيفاء : تكفون ,, انا شفت لها حلم وعرفت انها مظلومه ,, تكفى يا فهد ,, رح لهيفاء ,, هيفاء مظلومة ,,
فهد وهو يقعد عند رجلها ويبكي عليها ,, يمه هيفاء مظلومة وانا ما نصرتها ,, ااااه يمه وش اسوي ,,,
شرحت لهم ريما كل شي وسجد فهد سجدة الشكر لله سبحانه وتعالى اللي اظهر براءة هيفاء لهم ,,,
قامت ريما تكلم لمياء : لمووو تعالي الحين عند جدتي فيه خبر يفررررح عن هيفاء ,,,
قامت لمياء هي وفيصل وهم مو عارفين وش الشي اللي بيفرح عن هيفاء في هذا الوضع ,,,,,,,

(( الجزء السابع والعشرين ))

لمياء ما قدرت تمسك نفسها من الصياح وهي تسمع جدتها تحكي لهم وش سوى فهد من الصباح وما تبغي في اللحظه هاذي الا جناحين وتطير بها لهيفاء
ودها تضمها وتريح قلبها من همها اللي شالت معها ,,, فيصل ماسك يد فهد ويشد عليه ان الحمدلله شدة وزالت وما كان مترقب ومحتار وحس ان فرحته ما اكتملت الا فهد ,,,
كنه حاس ان هيفاء ما راح ترضى ترجع لانها عارفه انها بريئة من الاساس ومحد سمعها ,,,
يوووو شكثر صبرتي ياهيفاء على اللي شفتيه مني ,, والله لأعوضك عن اللي راح كله ,,,,
ام طلال : لمياء تعالي دقي لي رقم امك لطيفه ابي ابشرها ,,,,
فهد يقوم من مكانه مستعجل :: لا يمه لازم نروح لها ما ينفع التليفون ,,,
انا بكره بروح لها
لمياء : فيصل تكفى خل نروح مع فهد ما اقدر اصبر لين تدري هيفاء ,, ارجوووك
وريما تنط عليهم تكفى فهد واللي يسلمك خذنا كلنا نروح لهيفاء , خلها تحس بنا وان حنا من راحت ما ذقنا للفرح طعم ,, حتى الضحكة ماعرفناها ,,,,
فهد : ماعندي مشكله بكره بدري بعد صلاة الفجر بنمشي ,,
فيصل : وهو كذلك ,, وانتي يام طلال كلها يوم وتشوفين بنتك عندك وتستانسين بها
ام طلال تمسح دموعها : اذا تبون الصدق فقدتها مرره انا مدري شلون زعلت عليها ,, ماودي انها اجرحت فهد ,, اثاريها مسكينه طاحت ومحد سمى عليها
لكن الحلم اللي شفته اكد لي انها بريئة من قبل مدري وش سالفتها منكم
وقعدت تعلمهم وش شافت وسط ذهول فهد ,, ما اسعفتها يا فهد بالحلم وهذا دليل ردة فعلك في العلم وتركت هيفاء تروح من بين ايديك ,,,
خسارة يا فهد ما راح تعرف قيمتها الا اذا فقدتها من حياتك ,,,,

رجعت ريما لغرفتها تبي تجهز نفسها حق مشوار بكره ,, وهي في الطريق حصلت ابوها يعطي امها اخبار هيفاء وش صار من الى ,, وامها منصدمة من فعايل مشاعل ,,
ريما : على فكره يمه مشاعل مو بالحالها حتى عبير معها ,,
سلطانه : من قالك ابوك ماجاب الا سيرة مشاعل ,,,
ريما : لا ابشرك هم يخططون مع بعض وبكره تقولين ريما قالت ,,,,

طلعت لغرفتها وهي معزمة تكلم العنود ,, تبي تشوف وش صار مع مشاعل ,, والا يمكن عندها فكره عن نواف,,,
ريما : هلا عنوده وشلونك ,,,
العنود : تعبانه ياريما بيتنا كئيب ,, مشاعل طايحه في غرفتها ومسكره على نفسها ,, وامي منصدمه من اللي صار ,, محد كاسر خاطري الا نواف ,, منقهر يا ريما ,, سودت وجهه مشاعل مع فهد صديقه ورفيق دربه ,, الله يسامحها ما فكرت الا في نفسها ,,
مدري شلون مشاعل قلبها اسود ,, ما فكرت في هيفاء وعقوبتها من الله وش يجيها ,, لكن سبحان الله ,, بسرعه انكشفت ,,
ريما : الحمدلله اللي عرفنا قبل يصير شي ثاني ,,زين عنود انا بتركك لأني بنام شوي ,, بكره بعد الفجر بنطلع للديرة بنروح لهيفاء ,,
العنود : سلمي عليها وقولي لها العنود قلبها معاااك ,,,
ريما : من عيوني ,,,,

فتحت جوالها ودها ترسل لنواف مسج تصبره على اللي صار ,, خصوصا انه يرسل لها في المناسبات مسجات تهنئة ,,
وحست انه من واجبها ما تتركه حتى لو هو لسى خطبه بس انها تحسسه انها معاه شي ريحها ,, لكن في الاخير عدلت عن قرارها ,, هي ما قدر ارسلت له مسج ,, خله يصير رسمي وعقبه بترسل كل وقت ,,, نامت ونواف شاغل فكرها مرره ,,,

(( هيفاء ))
انكسار قلب
ما اقساها الحياة حين تبحث فيها عن قلب يحتويك فلا تجده ,,
وتظل في بوتقة احزانك ,, تتجرعها بمراره وتتاقلم على علقمها ,,
ولا يخفف عن وطأتها مخفف ,, الوجوه تبحلق فيك وهي تتلذذ بأنكسارك امامهم
وجناحك يهوي على صخرة الالم ولا تجد من يجبره لك فتعيد التحليق بجناحك كي لا
يكتب عليك خارج المنافسه ,, مسكين ,, ما اسعفه حظه ,,, وتنصدم بسخافة عقولهم
وما جرت عليه اههوائهم ,,, اذا كان لك أراده ,, فأنهض فالكسر ينجبر ولو بعد حين ,,
هل تبقى لك طموح ,, اذا فأنهض فلديك القدرة على الوصول ,,, هل لديك الامل ,, اذا فأنهض
فمازال في الحياة متسع كي تعيش لذتها بتحقيق امالك فيها ,,,
(( هيفاء ,, انتصري على ذاتك الضعيفة ,, ودعي أرادتك القوية تسعفك وثقي بأن الله مع العبد وان اجتمعت الامة على ان تضره ,,,))
ختمت هيفاء خاطرتها بالتاريخ والوقت ,, واغلقت دفترها ,,
قامت من مكتبها الخشبي الصغير ,, ووضعت الدفتر في داخله ,, حست لاول مره من بداية المشكله ,, انها لازم تكون اقوى من كذا ,, هي واثقه من نفسها ,, خلاص مو مهم يعرفون الحقيقه ,, مسيرهم يجي ويوم ويعرفون كل شي ,,

فقدت الاحساس بالبكاء على غير عادتها ,, وشافت انها لازم تقوي نفسها بأي طريقه ,, المشكلة اللي تهرب منها مو بس انهم ابتلوها بشي مو فيها ,هي عارفه بعد سنه والا اثنين ربي بيوريهم الحق
هي يحزنها فهد وان الامور خلاص انقطعت بينهم .. خلاص ما راح اشوفه ولا اسمعه ,, خلاص معد فيه فهد خلاص
قعدت على طرف السرير وصاحت يوم طرى عليها فهد ,, قامت بعد فتره وغسلت عيونها ,, هي عاهدت نفسها انها ما تبكي ,,
خذت قميصها القطن الاصفر الهادي واللي تحب تلبسه اكثر الليالي ,, وغيرت ملابسها ,, وطلعت تشوف امها وش تسوي ,, لقتها قد نامت واطفت النور ..,,, خذت لها بسكويت ناشف وكاس شاي وقعدت تشوف التلفزيون ,, مافيه شي مثير للأهتمام واستقرت اخيرا على مسرحيه قد شافتها وحبت انها تعيدها ,,
بعد فتره مو بسيطه راحت لفراشها وهي تشعر بألأطمئنان نوعا ما ,, اللي اكدت انه من تغييرها وعزمها انها لازم تكون اقوى من كذا

ماجاء فهد نوم ولا قدر يسكر عينه على التعب اللي فيه ,, وده ان الساعات تمشي بسرعه ويشوف هيفاء ,, وده انه يعتذر لها وانها تسامحه بس كل ما طرى عليه ذا الشي ينقبض قلبه كنه مو متأكد هيفاء وش بترد عليه ,,,
اذا تحبك بترجع معك وبترضى ,, طيب حتى لو تحبني هي انصدمت فيني وانا خذلتها ,,,خلاص شاف راسه بينفجر من كثر ما فكر في الموضوع وقرر انه يستسلم للنوم يمكن يكون حل اريح ,,,

بعد صلاة الفجر وبالتحديد في مجلس ام طلال ,, رفعت يديها تدعي من قلبها لهيفاء وفهد ,, والحت على ربها بالدعاء , وان اشا الله ما يخيب رجاها ,,,
جتها ريما وهي في وضعها ذا ,, وقعدت جنبها وحبت راسها ,, ريما متحمسه على الاخر ودها تشوف هيفاء ,, ودها تكون جنبها وهي تعرف انها بريئة ,,,
جاهم فيصل ولمياء ,, وهم كلهم نشاط للسفر ,, طلب منهم فيصل يأخذون معهم قهوة للطريق ,, فما كان من خديجة اللي جهزت كل شي ,, اكدت له ان كل شي حاضر ,,, ما بقى الا فهد ,, قعدوا ينتظرونه شوي وهم يتبادلون الحديث ,, وكل واحد منهم يتوقع وش ردة فعل هيفاء ,, ما طول فهد كثيير ,, نزل لهم وسلم على جدته ,,
ام طلال : ما ابي اوصيك على هيفاء ,, باللي تقدر عليه لازم ترضى ,, هي تأذت وانجرحت ,, فما ابيكم ترجعون الا هي معكم ,,
فهد : ان شالله يمه ,, قام فهد وقالهم يالله خل نمشي وتوكلوا على الله ,,,

هيفاء كعادتها بعد صلاة الفجر ,, تطلع مع امها لطيفة تسقي زرعهم الصغير ,, وتجلس تتقهوى مع امها ثم ترجع تنام ,, بعد ما جلست مع امها لطيفه قالت لها : مدري يا هيفاء من قمت الصبح وان نفسي منشرحه يالله عسى خير
هيفاء: ان شالله خير يمه ,,
ثم بعد صمت شوي تكلمت هيفاء : يمه وش قالت لك لمياء عن جدتي ,,
لطيفه : والله لمياء بروحها ما تحكي زين ,, بس سألتها عن ام طلال قالت تعبااانه حيييل بعد ما رحنا ,, لا تلوميينها ياهيفاء حنا طلعنا بعد ما قلنا لها ,,,
هيفاء : وش نقولها تسمحين نروح ,, وال عندك مانع ,, انتي ما شفتي وش قالت لي ,, صدقت في هالكلام ,,
لطيفه : هيفاء حنا ما اتفقنا ان حنا ما نرجع للموضوع ذا ,, صفحة وطويناها ياهيفاء ,,,
تنهدت هيفاء بقووووه واستئذنت من امها انها تروح لغرفتها ,,,
دخلت في فراشها ونامت ,, تبي تنسى شوي سالفتها ,, اللي ما قدرت تهرب منها الا بالنوم ,,,

على الطريق السريع ,, وفهد يسوق سيارته بسرعه جنونية ,, عزم عليه فيصل انه يخفف شوي ,,
فيصل : ياخوك بنوصل ان شالله ,,, وش له السرعه
فهد وهو متوتر مرره : مدري ما قدرت اسيطر على السياره ,, بس عشان لمياء وريما بحخفف ,,,
ما قدروا يستمتعون بجووو الطريق لانه هذا مو في بالهم ,,, في بالهم كيف يعلمون هيفاء وش ردة فعلها,,,
حاول فهد تخفيف سرعة السيارة شوي اول ما اقبلوا على ديرة هيفاء ,,,
فهد اول مره يوصل المنطقة ذي وهي بالعاده مو على الطريق وهذا اللي ميزها
قعدت لميأء تأشر لهم وين الطريق ,, لانهم مستحيل يدلون ,, الا مع احد ,,,,
واخر شي وقفت السياره عند بيت من الطين الابيض ,,واشرت لهم لمياء انهم يوقفون ,,,
دقت لمياء الجرس وهي مترقبه ,
جت الشغاله تفتح الباب واول ما شافت لمياء صاحت بقوووة وهي مو مصدقه مررره ,,,
جتها لطيفه واول ما شافتها خذتها بين يديها وسلمت عليها وصوت ريما وهيفاء واصل لداخل ,,
هيفاء وهي في فراشها متمدده وكسلانه ,,, معقوله هذا صوتهم ولا خيال ,,, قامت شافت من فتحة الباب ’’’ وشافتهم عند مدخل البيت ,,
نطت هيفاء من مكانها ,, واستغربت معقوله وش عندهم قعدت وراء الباب وهي تسمع فهد يقول لأمها ,,
فهد : ابشري يمه ان هيفاء بريئة من الكلام اللي ابتلوها فيه ,, وان الله اظهر برائتها بسرعه عشان يريحها من المشاكل ,,,
لطيفه وهي تحمد الله ,, الحمدلله رب العالمين ,,,الحمدلله ربالعالمين ,,,,
هيفاء مترقبه وهي تسمع كل شي ,, وهي عارفه ببرائتها من قبل بس الحمدلله انها اتضحت للجميع

دخل فهد وفيصل ’’’’قالت لهم لطيفه :: انهم ياأخذون راحتهم لحد ما تخبر هيفاء ,,,
,,,, ,,,
بس لمياء وريما كانوا اسرع من لطيفه ,,,,
دخلوا عليها وهي واقفه عند الباب ,,
ريما وهي تضم هيفاء بقوه من قلبها : هيفاء انتي بريئه يا قلبي ,, فهد ما ترك خيط الا تبعه عشان يمسك عليهم ولو دليل واحد ,,, والحمدلله اللي ربي كشفهم لنا
هيفاء تطالعها بصمت مهيب واول ما شافتها سكتت قالت لمياء : وش فيك ساكته حنا ننتظر ذي اللحظه يالغلا ,,,
لمياء : الحمدلله يا عمري هم وانزاح ,, اهم شي انك ترتاحين كم يوم هنا تهدين اعصابك فيها ,,,,وهيفاء ما زال الوضع معها مثل الصدمة والحلم ,,
جتهم لطيفه وهم على نفس الوضع : : هيفاء فهد يبي يكلمك ,,,
هيفاء : ونا ما اقدر اكلمه ,,,
ريما : شفيك انجنيتي ,,, فهد يبي يراضيك يا عمري على اللي صار كله ,,,
هيفاء :ما اقدر اكمل معه سامحيني ,,,
ريما : انتي تدرين فهد من رحتي واحد ثاني ,,,والله ما يسولف ولا يضحك شاغلته انتي بقوووه
هيفاء : هذاك اول واحنا عيال ليوم

ريما منصدمه من ردة فعل هيفاء ومو متوقعه في اسؤا الظروف هالنتيجه ,,,,,,

كمل فهد مع فيصل ينتظرون رد لطيفه ,,وده يشوف هيفاء بأي طريقه ,,, قام من المجلس وتحرك يبي يشوف وين الحريم وينهم فيه
ويسمع صوت هيفاء : حرام عليكم ما ابيه ,, لاتجبروني عليه ,,,,
انصدم فهد من كلام هيفاء ,, وكل شي ممكن يتوقعه ان هيفاء تزعل وتصيح مو ترفضه ,,,
فهد وده يتقدم يبي يلمحها ومشتاق لشوفتها ,,, ومع ذلك ما وده انه يدخل عليها وهي رافضه تشوفه وش بيكون موقفه ,,,
لمياء تصيح فيها : انتي بدل ما تفرحين ان ربي وراهم الحقيقه كلها عشانك تقعدين تتخبين وراء هالبيبان خايفه تشوفين فهد ,,,,
اذا تحبينه قومي هو في المجلس ينتظرك ,,,
هيفاء : لا ما احبه ,,, هااا طاح الحب اللي في راسك يالمياء ,,,,وقف فهد عند هنا وتراجع شوي للخلف ,,,
ما وده يسمع اكثر وتجريح اكثر ,,, صحيح هي تأذت منهم وحكوا في عرضها وما وده انه يصير اللي صار ,,,
مع ذلك ما وده ان يجبر هيفاء على اي شي
(( الجزء الثامن والعشرين ))

قعدت هيفاء على بساطها المعتاد وهي تقلب مجلة في يدها حصلتها بقايا في المطبخ ,,, ما شافت منها شي آخرتها نزلتها من يديها ورمتها ,,,جاتها امها وقعدت معها وهي تشيل صينية القهوة ,, قامت لها هيفاء تساعدها ,, خذت الصينية ونزلتها
هيفاء : كم مره اقولك يمه لا تشيلين انا بجيبها ,,,
لطيفه : منتي معي ناديتك كم مره قلت اجيك ,,
هيفاء وهي تنتبه : ماحسيت والله سامحيني ,,,
لطيفه : مو جديده يا بنتي كم مره تصير معك ,, انا عاذرتك يا قلبي ,, وان اشا الله ربي بعوضك عن فهد خير ,,
تضايقت هيفاء من دعوة امها ,, صحيح هي رفضت ترجع مع فهد ومعد تبي تكمل معاه بس ما ودها تتزوج احد ثاني ,,,
هي جربت حظها وما نفع ,, وش لها بالزواج ومشاكله , كلما تذكرت فهد تجدد الجرح والحزن ,, فرحت ان الله وراهم برائتها ,, بس حزنها على فهد قضى عليها ,, حبها المخلص وشفافيته وطهارته ما شفع لها عنده ,,, هي تحبه بس تتمنى ان الله يسعده ,, كفايه اللي جاء منه ,,
اخر مره كلمت لمياء من اسبوع ,,, بعد ما طلعوا منهم هذاك اليوم ورفضها انها تقابل فهد,, ما كلمتها ,, وما تبي لمياء تسولف لها بعفويتها وش صار معهم ,, ما تدري وش قالت جدتها ,, اكيد زعلانه عليها ,, اشتاقت لعمتها مريم ,,ودها تكلمها ,, لكن عمتها ما تدري بالسالفه وش تقولها ,, والا يمكن درت ماشي يتخبأ الحين ,,,
طرى عليها مشاعل الحقيرة وعبير العلة ,, اكيد فرحانين اني ما رجعت ,,,
هيفاء وهي تأكد لنفسها,,, انسي ياهيفاء وافتحي صفحة جديده ,,,ما رجعتي لفهد بأرادتك فلا تحطمين حياتك بأرادتك بعد ,,,,,

جتهم جارتهم ام عبدالله واول ما قالت لها الشغالة انهم قاعدين من ناحية الزرع في الحوش راحت عندهم وهي مستانسه بالجو الحلوو ,,
ام عبدالله : السلام عليكم,,,
لطيفه وهيفاء مع بعض : وعليكم السلام ورحمة الله ..
ام عبدالله : وشلونكم ,,هيفاء عندي لك شي بشوف رايك فيه
هيفاء : آمري يا خالتي ,,
ام عبدالله : جيران بنتي ساره عندهم عيال صغر في الابتدائي ,, ولد وبنت ضعاف في المدرسه وامهم تبي حد يدرسهم
قلت اقولك تدرسينهم خاص ,, يمكن تقضين الوقت في شي نافعك ,,,
هيفاء ما تقبلت الفكره , وضاقت منها ,,
لطيفه : والله فكرة زينه وشعااد يمك تقضينها في تدريسهم اقلها ما تمللين انتي لا تطلعين ولا تروحين ,,
هيفاء : بفكر وبقولكم بس اذا درستهم مو فلوس ,, انا بساعدهم بس ,,,, لكن عطيني فرصة وارد عليك
ام عبدالله : ما يخالف فكري وان شالله ربي يسر لك ,,,,

في مجلس ام طلال ,, قاعده هي وفهد يشوفون التلفزيون بملل ,, صارت جلستهم صمت مطبق ,, روتين انه يسلم عليها وبس ما عندهم شي يحكون به ,, هيفاء وصدمتهم ما تبي ترجع لفهد ,,, وغيره مافيه لا سوالف ولا ضحك , ,, كأنها ميته (( اسم الله عليها )) مو بخير وطيبه ,,, بس وش الفايده وهي مو مقابلتهم ,,, ام طلال حاسه بفهد ومع ذلك ما تقدر تقول له شي ,, لا عزاء لا تشجيع ,, لا اي حرف ممكن يغير وضعه ,,, ممكن الشي الوحيد اللي راح يسليه عنها يروح يكمل دراسات عليا ,, كانت رافضة ام طلال هالفكره ,, من اول ,,, بعد ما تخرج ,,, ما تبيه يفارقها ,, لكن الحين ما تقدر تخلي فهد يضيع بين ايديها وهي متفرجة ,,,
ام طلال : فهد وش رايك تروح تكمل دراستك يا عمري برى ,, منها تغير جو ,, ومنها انك تستفيد شوي وترتقي بدراستك الى اعلى
فهد وهو طفشان مررره : بفكر ,, ممكن ليه لا ,,يمه بسئلك كلمتي اليوم خالتي لطيفه ,,,
ام طلال تعودت ان فهد يسأله السؤال ذا كم مره في اليوم ,, يبي يتطمن على هيفاء حتى لو ما تبيه ,,,
ام طلال : اي يمك كلمتها ,,, تقول طيبه ,, من جتها ما طلعت ولا شافت الشارع ,, عجزت فيها تبيها تطلع والا تشوف الناس بس هيفاء رافضه ,,,
فهد : يمه ممكن تكلمينها ابي اسمع صوتها ,,
ام طلال : كم مره يمك تقول لي هالكلام ,, انا ما اقدر اكلمها ,, ابي اشوفها ,, انا عندي امل اني اذا جيتها بعد ما اطلع من العدة انها بتلين ,, يمك خلها ترتاح وتهدى نفسها ,, هالحين مصدومة يكفيها اللي فيها ,,,
فهد : يمه عاجبك انها بالحالها ,, ما اقدر اخليها كذا ,, اني ودي اكون معها ولو هي زعلانه ,,, هي حتى ما بغت تشوفني بس انا عاذرها والله عاذرها ,, ودي برضاها يمه بس كيف
ام طلال ودمعتها على خدها : خلها على ربك يا قلبي وهو بيفرجها ,,
قام فهد وحب راس جدته وطلع لجناحه ,, ااااه منك ياهيفاء شلون حياتي تغيرت كلها من يوم دخلتيها ,,
دخل غرفتها ,, من يوم طلعت من القصر وهو ينام في غرفتها يبي يحس انها موجوده ولو يشوف اغراضها بس على الاقل تسليه
دخل في فراشها وطلع جوالها الاصلي من الدرج وفتح على الاستوديو وشاف صورتها بفستانها الاوف وايت ,, بعد ما حط الذاكره في جوالها ,, ماله من السلوى ليلا الا يشوفها ويمتع عيونه بصورتها ,, يعقد على الحال ذا لين تغفي عينه ,,, وترتخي يده ويطيح من الجوال ,,,


في فيلا فيصل ,, لمياء ترتب غرفتها قبل يدخل فيصل ,, تعود على سهرة المجلس ,, وما قدرت تغير طبعه ذا وحمدت ربها على هالشي ,, لان كثيير يسهرون برى والا في كافيهات ,, واستراحات ,, على الاقل هو في نفس ساحة القصر وقريب منها وذا طمنها زيادة ,,, بعد ما طلعت منها ريما قعدت ترتب في غرفتها وتضيف بعض الاكسسوارت ,,وتغير اماكن بعض الكوشن ,, يمكن تغير الروتين ,, اهتمامها في فيصل ما خف حتى بعد الحمل ,, ما تبغي اي شي يتغير على فيصل ومن شافهم فكرهم انهم متزوجين في شهر العسل ,,, وكان ذا الشي يعجب خالتها سلطانه ,, الوقت البسيط اللي لمياء تجي فيه بعد المغرب عند جدتها وخالتها سلطانه متواجده وهو وقت تجمع العايله عندها ,,, فكانت خالتها تثني عليها ,, وتركز عليها ,,

بعد فتره جاها فيصل ,, واول ما شافته قامت له تسلم عليه ,,, وتأخذ شماغه منه وتعلقه ,, وتأخذ اغراضه اللي معاه ,, مرات يجيب لها ايس كريم يجبونها الشباب معهم يبيها تذوقه ,, او شوكليت ,, او عصير كوكتيل ,, على حسب وش فيه ,,, كانت تضحك على تعليقات الشباب ,, على كثر السويت اللي ياكلون ما يسمنون ,,
فيصل : وين يسمنون وهم في صالة الرياضة يوميا ,, لا لاتخافين عليهم ,,,
لمياء : وهي تضحك ,, لا مو خايفه بس مستغربه ,,,
فيصل : شخبارك يا قلبي اشتقتي لي ,,
لمياء : وشرايك ,, وتاخذ يده وتحطها على قلبها ,, اسمع نبضي يمكن يقولك ,,,
فيصل : تدرين يا لمياء انك اكبر هديه لي ,,, عمري ما حسيت بأحساسي ذا مع احد غيرك ,, اقولها لك بالفم المليان
واحنا شباب اصغر من كذا تعرفنا وصار لنا صداقات ,,, انتي قدرتي تأسريني بعيونك وبطقلبك وبطريقتك ,,,مهما غبت عن عيونك ادري اني فيها وما فارقتك
لمياء تشوفه وهي مستمته بغزله اللي على طول فيصل يدلعها به ويهمس لها بحبه ,,,,
لمياء : فيصل ممكن اطلب منك طلب ,,,
فيصل : تبين عيوني ,,,
لمياء : يا قلبي ودي تكلم فهد في هيفاء ,,, هيفاء عندها عزة نفس ما تتخيل وش كثر ,, ادري هي معصبه على فهد هذاك اليوم واكيد ردة فعلها عشان عرفت انها بريئة ,, بس يمكن اذا هدت تحن ,, ما اقدر استغنى عنها يا فيصل ,, ارجوك كلمه ,,,,
فيصل : ابشري ولا يهمك ,,,

قامت هيفاء من الصبح وخذت لها شاور ,, ولبست لها تنورة جينز وقميص ابيض مخصر ,,, وعكفت شعرها نفس ايام دراستها ,,, وخذت عبايتها وطلعت لأمها اللي تنتظرها ,,
اتقفت مع امها انهم يروحون السوق عشان تبي المكتبة شي اساسي ,,وامها تبي لها غرض ,, وودها بالسوبر ماركت الكبير ,,
مرت عليهم ام عبدالله وطلعت معهم ,, تجيهم سيارة مواصلات تاخذهم متى ما احتاجوا ,, كانت متحمسه شوي ,, تحاول تغير جووها ,, وعزمت بدون ما تقول لأمها انها تدرس الاطفال عيال جارتهم بس مو الحين يمكن يوم والا يومين ,,,
وقفوا بعد فتره بسيطه عند مكتبة الحي ,, مكتبة صغيرة بس يحاول صاحبها انه يجيب كل شي يصدر جديد في العاصمة ,,
دخلت هيفاء ودارت فيها ووقفت عند الكتب ,, وخذت لها نظره على الجديد ,,, شافت كم كتاب مترجم ,, خذت واحد ,, ومرت على القرطاسية وخذت دفاتر واقلام تلوين ,,,وطلعت ما تبي تتأخر على امهاتها ,,, وراحوا لداخل السوق , ولفت معهم يبون قماش وعبايات ,, مشت وراهم تشيل اغراضهم ,, تدور معهم وفكرها مو معهم بس جسمها ,, وفي الأخير مروا على السوبر ماركت خذت لها بعض الأغراض الضرورية ,, وطلعوا ,,, رجعت للبيت وهي تعبانه من المشوار حست صدق ما فيها طاقه ,, كله من الكسل اللي عايشه فيه لا طلعه ولا زياره ولا صديقات ,, بس هي ما تبي اي احد ,,, هي للحين روحها عند فهد ,, واذا اطلق سراحها يمكن تندمج مع مجتمعها ثاني ,,,لكن ما يخليها جرحه انها نغفر له ,,,
اول ما قربت السيارة على لفة بيتهم شافت عند بوابة البيت شي صدمها ,, فهد واقف ومستند على سيارته ,, متى جاء يا فشيله حست بقلبها يدف بقوه ,,,
لطيفه : هذا فهد يمك الا لا ,, وقربت سيارتهم من البيت ,,,
هيفاء ما ودها تشوفه ابدا ,, ما تعرف وش تقوله ,, ليه يحرجها ويرجع ,, خلاص هي قالت لهم ما تبي ,, يوووو وش اسوي الحين
بدون ما تحس مسكت عباية امها بقوة ما تبيها تتركها ,, فهد لابس نظارته الشمسيه ويدقق في سيارة المواصلات اللي جايبتهم ,,,ويحاول يركز في مكانها في السيارة ,,, شافها من رزتها وهي جنب امها لكن معهم ثالثه ,, اكيد جارتهم ,,, كان واقف معه ولد ام عبدالله الصغير وهو اللي قالهم انهم رايحين السوق ,,, اشوى ان الجو مو حار ولا كان اشتوى برى بس للحين الوقت بارد ,,
نزلت لطيفه وعقبها هيفاء وهي منزله راسها وتمشي ورى امها ,,,
لطيفه : حي الله من جانا ,, يا مرحبا والله بفهد
وفهد عينه على هيفاء : هلا بك يمه وشلونك ,, ,, ان شالله طيبه ,,
لطيفه : حياك يمك تعال ادخل ,, عسى مو من زمان وانت هنا ,,
فهد من ساعه يمكن ,, مشيت بدري والله وما توقعت اني ما احصلكم ,, فتحت لطيفة باب الحوش ودخلت هيفاء بسرعه من جنبها وراحت داخل بسرعه وفهد يراقبها ,,,
دخلوا للمجلس وقعد فهد ينتظر لطيفه اللي قلطته وقالت له يستريح لين تجي ,,, اول مره جاء ما انتبه لاي شي عينه بس على هيفاء وشوفتها وانها ترضى عليه,,

هالمره وهو ينتظر دقق في المكان ,, ليه يحس فيه براحه غريبه ,, يمكن لأنه بعيد من المدينه الكبيرة على اطرافها ,, على صغره تحس فيه انك في مكان فسيح جدا ,,, فيه شي ما قدر يفسره حس به واخر الأمر شاف ان انسب شي ممكن يقوله انه تجيه سكينه فيه اكيد لطيفة من هل الخير ,,
دخلت عليه لطيفه وهو ما انتبه لها ,,,وهي تشيل صينية القهوة ,, جت عنده ,,
لطيفه : وش هالنهار الزين اللي جابك يمنا ,, وراك يمك ما قلت لي بتجي كان اذبح لك وازين لك غداء على كيفك ,,
فهد : انا عشان كذا ما كلمتك ما ابيك تتكلفين ,
هيفاء في غرفتها مو ترتجف الا يمكن تجيها الصيحه من احراجها ,,, وش جايبه بالله ,, ياما قعدت والا وقفت ,, مشت ,, ثم وقفت ,, طالعت نفسها شافت شي ما توقعته ,,, وجهها محمر بزياااده ,, وعيونها اصلا الله بالخير ذابله من الصياح ,, الحين بيقول كله عشانه ,, يالله بكيفه ما ابي اشوفه يعني ما ابي اشوفه ,,,

لطيفه : مدري وشقولك يا فهد ,, والله حالها مو معجبني ,, وحاولت فيها ما قدرت عليها رافضة انها ترجع ومنصدمة انك طلقتها ,,
فهد : يمه انا رجعتها على طول في اسبوعها ,, وانا ما ابي ادافع عن نفسي ومتأكد اني غلطان بس خلها تسامحني عاد ,, اذا تحبني بتسامحني ,, لكن اذا هي ما تبيني ما اقدر اجبرها بعد ,
لطيفه : انا اشوف انك تتركها شهر شهرين ويمكن الله يهديها ,,
فهد : زين ممكن اشوفها ,,
لطيفه : ما ظنيت انها ترضى ,,
فهد : ممكن انا اروح لها بنفسي ,, واشرت له لطيفه على غرفتها وقعدت في مجلسها ,,
فهد دق باب غرفتها وما سمع اي رد ,, ودخل ,, هيفاء كانت قاعده على حرف سريرها وشابكة يدها في بعض وتحركها كل شوي ,,
اول ما شافت فهد قامت ,, قرب لها فهد ومد يده لها بيسلم عليها رجعت تلقائيا يدها لجنبها ,,, نزل يده ,,
فهد : مساء الخير ::
هيفاء : مساء النور
فهد : ادري ما تبين تشوفيني ,, بس ودي اقعد معك شوي ,,
ما ردت هيفاء عليه وقعدت مره ثانية وشبكت يدها في بعض تحاول تتماسك لاي شي ممكن يقوله ,,
فهد : هذا مكانك ,, مريح والله وهو يحاول يكسر الحاجز اللي بينهم ,,
مر من عند مكتبها يبي يجلس على سرير لمياء ويقابلها ولفت انتباهه دفتر هيفاء بغى يمد يده يشوف وش اخر ما كتبت بس ما بغى يفضح نفسه كمل طريقه وقعد مقابلها ,,
ما قدر يتكلم ترك لعيونه تشبع منها شوي ,, وهي منزله عيونها وساكته ,, لمح يدها وعرف انها متوتره مرررره ,, مو اقل منه هو بعد متوتر ,, لكن حس معها ولو هي زعلانه براحه غريبه ,,,
فهد : اشتقت لك ,,
هيفاء : ممكن تقول اللي تبيه ,,
صدمه ردها ,, فهد : قلت لك وش احس به ,, هيفاء وش بيرضيك علي ,,
هيفاء : مو زعلانه عليك ,,
فهد : اذا مب زعلانه خلاص ترجعين معي الحين الرياض ,,
هيفاء وبقوة شموخ اكثر منها صوت : من قال برجع معك الرياض ,, انا مو زعلانه عليك لأنك ما تهمني ,, واعتقد ان اللي بننا انتهى ,, ما امثل لك اي شي عشان تحافظ علي ,, ما يحتاج اتكلم عن بدايتنا ,, لكن انا ولا شي في حياتك فلا تتوقع انك تكون شي في حياتي ,,,
فهد يطالع عيونها وصراعها ,, منذهل من كلامها ,,,وما تركت له فرصة انه يأخذ ويعطي معها ,, سكرتها في وجهه ,,,
فهد : ما اتوقع ان الكلام من قلبك ,, لاني ادري انك تغليني ,,
هيفاء نزلت عيونها على طول : من وجهة نظرك ,,
فهد : ما عندك شي تقولينه لي غير كذا ,,هزت راسها بلا ,, عن اذنك بشوف امي يمكن تبي شي ,, قامت ولفت تبي تطلع مسك يدها ووقفها ,,,
هيفاء انا ما راح اتركك فاهمة ,, تبيني ,, انا معك ,, ما تبيني لا تتحلمين حد يأخذك ,, لو اخليك معلقة ,, وانتي فكري فيها ,,
هيفاء : حضرتك تهددني مو غصب الحياة معك ,,,
فهد سفهه كلامها : براحتك ,, بس انا بسافر ادرس الماجستير ,, وبغيت اعطيك خبر قبل ما اروح ,, وقام من مكانه ,,
هيفاء تفاجأت من قراره ,, وفي الاخير هو بكيفه يسوي اللي يبي ,, كح شوي وحاول يكح اكثر ,,,
فهد : ممكن كاس موية لو سمحتي ,,, هيفاء خافت انه فيه شي ,,
طلعت على طول تجيب له من المطبخ , اول ما راحت وقف عند مكتبها وفتح اخر صفحه وقطعها وحطها في جيبه ووقف ينتظر هيفاء ,,
جابت له موية وحطتها على المكتب عشان ياخذها ,,
ما بغت توقف عنده رجعت للمطبخ تبي تنتظر فيه لين يروح ,,,,
حس براحه انه شافها ,, وما استغرب عنادها ,, لكن هو قبل تحدي معها راح ينتظرها لين تهدى حتى لو ما قالت له انها تبيه ,, بس هو شاف في عيونها شي خلته يغرق في حبها اكثر ,,,
طلع للطيفه في المجلس ,, وقال لها انه يبي يتوضأ ويصلي قبل يرجع للرياض ,,

دخلت لطيفه للمطبخ وهي تشوف هيفاء واقفه ,, ما عطتها فرصه ,,
لطيفه : حطي غداء لفهد بيرجع للرياض ,,, يالله بسرعه ,, استعجلي وانا امك اخاف يطلع وهو ما كل شي ,, على طلعته من الصباح ,,كان مقصد لطيفه الاول انها تحنن قلب هيفاء على زوجها ,, بس هي عارفه عنادها ,, مو بسهوله تتنازل عن شي تشوفه انه صح لها ,,
خذت هيفاء الصحن وتحطه ومن قو حطتها بغت تكسره ,,رتبت الصينية وقالت للشغاله توديها ,, انتظرت في المطبخ لحد ما راح فهد اول ما سمعت تسكيرة الباب ودرت انه راح بغت تروح لامها تشوف وش قالها
طلعت الشغاله وهي شايله الصينية وشكله ما تغدى ابد ,,
دخلت على امها ,, لقتها حزينه على وضعها
هيفاء : يمه شفيك ,, ما صارت عاد تبكين ,, من قال له يجي ,,
لطيفه : هيفاء انا ما ابي تخسرين فهد والله رجال ,, بعدين انتي ما تفكرين وش بيصير فيك اذا صار في شي ,,
هيفاء : يمه اسم الله عليك ماله داعي للكلام ذا يمه ,, انا تعبانه وما اقدر افكر زين ,, بس فهد جرحني وما اظن اقدر اعيش معه بعد كذا ,, وش سويت يطلقني ,, شك ,, طيب ليه ما يتأكد ,, ارجوك يمه قفلي على سيرته ,,,
لطيفه : فهد بيسافر ,, وعطاني ذا لك ,, شافت هيفاء كيس صغير جنب امها ,, فتحته لقت فيه جوال ,, وبطاقة البنك بأسم فهد ال؛؛؛؛؛
ومبلغ كاش ,,, وخاتم الماس على شكل قلبين صغار ,,,,,
هيفاء : ليه يعطيك اياها ,,, ليه ما قلتي لي ,,
لطيفه : اقولك فهد بيسافر يمكن يقعد سنه جاب لك جوال جديد يبي يتطمن عليك ,, وغيره ما سالته ليش جبت او ما جبت دامه زوجك خلاص يجيب ,, وقامت منها لطيفه ,,,,
قعدت هيفاء تشوف الخاتم ,,, طلعته من علبته وقربته تبي تشوف شكله ,, هو اختاره بنفسه وبالذات قلبين ,, اكيد يبيني احن ,,, جربته ,, شافت منظره حلووو في يدها وناعملكن رفضت فكرة انها تاخذ منه شي ,,,, شافت بطاقته وبأسمه ,, ليه يسوي لي هالحركة هو بنفسه طلع لي بطاقة بأسمي ,,,

عقب شوي جتها امها وهي في مكانها سرحانه ,,, نسيت اقولك ,, فهد يقول كم يوم وتجي اغراض لك ,,,
هيفاء : وشو يعني اغراض ,,
لطيفه :ما سألته بتجي وبنعرفها ,,,,

راحت هيفاء لغرفتها ,,, كان ودها يطلع فهد من البيت وتجع غرفتها تندب حظها شوي ,, لكن اللي سواه فهد خلاها تفكررر كم مره فيه وفي طريقته ,, معقوله بيسافر والا بس يهددني عشان ارجع له ,,,
تمددت على الفراش وهي تفكر فيه وما حست بالوقت الا انها قريب المغرب وهي لسى في سريرها ,,,,

قامت واتوضت وصلت المغرب ,, وعقبها قعدت تفكر في فهد شغل قلبها وعقلها من يوم شافته ,, وما تدري متى بتهدأ نفسها وتنساه ,,,
راحت خذت لها كاس شاي سوته بنفسها وخذت دفترها وطلعت للحوش تبي تسترخي شوي ,, تبي تكتب عن موقف اليوم ,,
فتحت دفترها واستغربت ان خاطرتها ((انكسار قلب )) مو موجوده ,, شافتها من طرف الورقة مقطوعه ,,,
استعدلت في قعدتها ,, مين هذا اللي بيفتح دفترها ,, اصلا محد يدخل غرفتها ,, مستحيل شغالتهم ,, ولا امها ,, معقوله فهد هو اللي خذها ,, احتارت من كثر ما تفكر ,, وفي الاخير سفهت الموضوع ,,,

فهد بعد ما رجع طلع مع نواف يبي يسهر معه ويعلمه وش بيسوي ,, حاول انه يكون طبيعي مع نواف ومو متأثر وهو شوفة هيفاء بس ردة روحه ولو هي زعلانه معليه اهم شي يشوفها ,,
فهد : انا بغيت اقولك عن بعض الترتيبات ,,
نواف : اللي تبيه بسويه ,, انت آمر بس
فهد : ما يأمر عليك ظالم ,, انا بسافر اكمل دراستي ,, ابيك تعاون فيصل وسعود وما تتركهم بالحالهم ,,, وجدتي ابيك تمر عليها من فتره للثانيه ,,, وانا ما ابي اخر زواجك انت وريما ,, اي وقت تبون تحددونه بعد ما تطلع جدتي من العده انا مستعد اجي واحضره ,,,
نواف : اللي يسمعك يقول بتهاجر كلها كم شهر وترجع لنا ,,,
طول مع نواف وسهروا سهرة من زمان ما قعدوا مع بعض ,,
بعد ما رجع لجناحه ,, طلع ورقة هيفاء وقراها يمكن للمرة العشرين ذاك اليوم ,,,
حس بمعاناة هيفاء وجرحها ,,, ولثاني مره تنزل منه دمعه يتيمه عشان روحه هيفاء ,,,,,

ريماا كثفت قعدتها عند جدتها تبي تغطي فقدانها لهيفاء ,, لكن هيهات ,, ام طلال مافي لسانها الا هيفاء ,,
الله يسامحك يا هيفاء مهو لو كنتي هنا ماكان هاذي حالة جدتي اللي صارت مثل الاشباح ,, جسم بس عقلها في مكان ثاني ,,,
ياليتك تعرفين قدرك عندها وعندنا انك تسامحين فهد على كل شي,,,,

بعد كم يوم لطيفة وهيفاء قاعدين في بيتهم يشوفون التلفزيون ,,, جاهم دق على الباب ,, طلعت له الشغاله ثم رجعت ,, وقالت للطيفه ان فيه رجال برى ,,,
لبست لطيفه عبايتها ,,, وظهرت له ,, ,, عرفته هذا ابو سلطان ,,,جاي من طرف فهد ,,
بعد ما سلم عليها قال مافيه الا الخير ,, هذا سواق وشغاله لكم ,, ارسلهم فهد وسيارة جمس سلفر حقكم توصلكم مشاويركم ,, والسواق برتب له مكان في طرف البيت لا تفكرين فيه ,, اهم شي تاخذون راحتكم ,,,
لطيفه : بس والله مو محتاجينها احنا مشاويرنا قليله ,, وعندنا شغاله ,,
ابو سلطان : هاذي اوامر فهد وما اقدر ارفضها ,,,,
هيفاء كانت شاهد على كل شي ,,, استغربت من فهد ليه يسوي كل هذا ,,, عشان ترضى عليه والا ترضى بسرعه ,,,,
بس انا الماده ما همتني ,,, ليه يسوي لي كذا ,,,

في ليل الخميس كان الوداع مر ,, ومحد يبيه لكن فهد عزم يسافر ويكمل دراسته ,, وام طلال اللي ودها ان فهد يغير المكان يمكن على الاقل ينسى اللي صار والا يتنشط شوي بدراسه والا سياحه ,,,
ريما تعلقت في فهد وصاحت لين الله شاف لها
ريما : فهد خل بالك من نفسك ,, تأكد اننا من الحين مشتااقين لك والله يعينا على غيابك ,,,,
طلع سعود وفيصل مع فهد للمطار يوصلونه ,,, وصلوا بعد فتره للمطار ,, وجهز سعود شنط فهد ونزلوا كلهم ’’’
بعد ما خلص اجراءت السفر ,, وتجاوز البوابة قعد على كرسي الانتظار ,,
وفتح جواله وارسل مسج جديد
(( انا الحين في المطار ,, دعواتك يا قلبي ))

(( الجزء التاسع والعشرين ))

في غرفتها ترتب دولابها البسيط ,,سمعت هيفاء نغمة الجوال ,,, جت يمه وشافت المسج ,, فتحته على طول ,, وشافت رقم فهد ورسالته اللي تدل انه سافر ,, حزنت شوي منه ,, ما ودها انه يروح عشان يتجاوز اللي بينهم ,, اكيد كله مني ,, بس هو بعد لازم يستحمل اللي يجيه ,,,
سكرت الجوال ودعت الله سبحانه وتعالى انه يوصل بالسلامة....,,,,
في الطائره فهد جالس في الوسط وكان بجنبه موظف اجنبي راج في اجازته ,,, ارتاح انه مو مثل لغته عشان ما يبتلش كل شوي سالفة ,,, لكن اللي ما توقعه فهد فعلا ,, ان هالراكب فعلا وده بالسوالف وقعد يجر فهد من سالفه الى سالفة باللغة الانجليزية لحد ما حطت الطايرة في مطار هيثرو ,,,,
كان زميل فهد ينتظره عند صالة القادمين ,, سلم عليه وقاموا بالاجراءت اللازمة وطلعوا على جو باااارد وممطر مررره ,,,
فهد : من زمان تمطر والا اليوم ,,
هيثم : هو لهم وقت معين ,,, سماهم هره تمطر ومره شمس ومره تغيم في ساعة واحده ,,,,
ضحك فهد على تعليق هيثم وتحركت السيارة اللي تقلهم لخارج مدينة لندن متجهين لمدينة اكسفورد ,,,

خيال هيفاء ما فارق فهد دقيقه ,, حب يرسل لها رسالة انه وصل ,,, بس تركها لحد ما يوصل االمدينة ويستقر فيها ,,,
خذوا مشوار تقريبا ساعتين مع الزحمة ,,, لكن انقضت كلها سوالف بينهم عن المدينة وش راح يحتاج فهد ,, من بنك وسوبر ماركت
,, الى مطاعم ,,,لكن هيثم وعد فهد انه راح يكون معه الايام الاولى ,, حتى يتعود على نظام المدينه,,
فهد : ماله داعي والله كفايه عليك رتبت حجوزاتي كلها ,, اذا احتجت شي بكلمك ,,,,
هيثم : خلاص متى ما احتجتني كلمني ,, انا راح انشغل الاسبوع الجاي مع الاختبارات لكن بعدها ,, فااضي تماما ,,,

صلوا لبيت فهد المحجوز له مسبقا ,, ونفس ما طلبه فهد بيت صغير تحيط به حديقه ممتدة من خلفة ,, وسيارة مرسيديس باب واحد ,,,
دخلوا البيت ,, وطلب لهم هيثم بيتزا ,, وتاسف انه ما رتب للأكل
فهد : لا تفكر في الاكل هذا اخر شي احاتيه اي شي وبس ,,,

دخل فهد غرفته يبي يبدل ,,وقعد على السرير حس بأكتئاب انه راح يبدأ حياة جديده بالحاله ,, كان وده ان هيفاء عنده الحين وتخيلها تمشي في الغرفة وترتب اغراضه ,, لكن الله يسامحك يا هيفاء راسك يابس ,,,
طلع جواله وفتح رسالة جديده ,,
((دخلت البيت من شوي باااارد وكئيب ,, وتخيلتك معي كيف راح يكون ,, هيفاء انا محتاج لك)) ,,,وارسل المسج
قامت هيفاء من الصباح وكلمت جارتهم ام عبدالله انها ترسل عيال جارتهم بعد صلاة العصر عشان تدرسهم ,,, رتبت سريرها وغيرت ملابسها ,, كانت تاركه الجوال في الدرج ,, وما فكرت انها تبي تشوفه ثاني ,,, جلست تفطر وجاها رنين على الجوال ,, خذته واول ما شافت رقم فهد خلته صامت ,, هو عارف اني ما راح اكلم يدق علي ليش ,,, بعد ما سكر فهد شافت رسالته ,, شافت انه يبيها تحن عليه ,,,

فهد بعد ما ارسل المسج ما جاه رد من هيفاء ,, توقع ترسل ولو حرف واحد ,, لو كلمه ,, الحمدلله على السلامة مثلا ,, لاتكونين قاسيه يا هيفاء كذا ,,,
بعد ساعه شافها ما ردت وطلع هيثم حب انه يدق عليها ,, هو عارف انها ما راح ترد بس حب انها تشوف اتصاله ,,,

حاولت هيفاء تتشجع اكثر ,,وتغير نمط حياتها ,, استعدت للعيال الصغار اللي بيجونها ,, ماتدري هي بتعرف تتعامل معهم وتوصل لهم المعلومة والا لا بس بتجرب على الاقل شي جديد ,,,,
بعد سفر فهد ,, دخلت ام طلال في عزلة جديده ,, ماصار لحياتها طعم ,, الا من زيارة صديقاتها ,, لا ونيس ولا جليس مثل فهد وهيفاء ,,,
وتمنت الايام تمر بسرعه ,, ودها بنفسها تروح لهيفاء ,, دقت على لطيفه تبي تنشد عنهم ,,
رفعت هيفاء سماعة التليفون ,,
هيفاء : الووو
ام طلال اول ما سمعت صوت هيفاء نزلت دمعتها واختنقت بعبرتها : هيفاء وشلونك يا قلبي ويالله الحروف تطلع
ما توقعت هيفاء انها جدتها بالمررره : هلا يمه وتأثرت من صوتها وقعدت تبكي ومدت السماعه لأمها ترد على جدتها ,,,
والله اللي تغيرت حياتك يا هيفاء ,, يا ليتك دريتي وش بيصير لك تتقبلينه على الاقل ,,,

لطيفه : هلا يام طلال وشلونك ياعمري
ام طلال : هلا لطيفه وشلونكم ,, اشتقت لصوتها خليها تكلمني ابي اسمعها ,,,
لطيفه : قامت عني والله بروحها ما قدرت تكلمك متأثره,,,
ام طلال : يا عمري ياهيفاء ,, قولي لها اني مريضه من فراقها وفراق فهد ,, ومالي عقب الله الا هم ,, تعالوا عندي يا لطيفه كلميها يا عمري ,,,
لطيفه : من عيوني لا تحاتين ,,, ابشري ان شالله بكلمها ,,,

قامت لطيفه لهيفاء وهي شايله في خاطرها عليها ,,,
لطيفه : ترى مو زين منك تعاملين جدتك كذا ,,,
هيفاء وهي حزينه من يوم سمعت صوت جدتها تبكي : ما قدرت اكلمها وفي نفس الوقت ما عندي شي اقوله ,,
لطيفه : هاذي جدتك ,, انتي لازم تحكمين عقلك حتى لو فهد غلط جدتك مالها دخل ,,,
هيفاء : انتي نسيتي انها قامت مع فهد ضدي ,,
لطيفه : هيفاء انتي عاقله ,, حتى لو قامت مع فهد مالك حق تقاطعينها كذا ,, انتي لازم تكلمينها كل يوم وتسألين عنها ,, ترى زعلك صار بايخ ,, اول اشوف معك حق ,, لكن الحين , لا ما قصر فهد والله ,, جاء يبي يرضيك ورفضتي ,, جاء ثاني ورفضتي ,, وش تبينه يسوي ,,
صحيح هيفاء فهميني انتي وش اللي بيرضيك على فهد
هيفاء وهي تصيح : مدري ,,, وغمضت عيونها ما تبي تكمل الحديث مع امها ,,,
اول مره تعنفها امها بذا الطريقة ,,, دايما تسكت منها تدور لخاطرها ,, لكن هالمره مو في صفها ابدا ,,,,


قامت بعد العصر وتوضت وصلت وجلست تنتظر الصغار اللي بيجونها ,,,
جتها حرمة متوسطه في العمر ,معها بنت في الصف الرابع وولد في الصف الثاني ,, خالد ,, ونجود ,,
عطت هيفاء تفاصيل بسيطه عنهم واتفقت معها انها تجيبهم ثلاث مرات في الاسبوع
ام خالد : لا تواخذيني انتي كم تاخذين على الحصه ..؟؟
هيفاء : انا بدرسهم عشان خاطر ام عبدالله ,, وودي اني اساعدك في تعليمهم في وقت فراغي ,, لكن انا ما ابي مقابل ابدا ...
قعدت الام فتره وهي تحن على هيفاء ,, لكن هيفاء ماعطتها فرصه مرره ,,,
تركتهم الام وابتدت معهم هيفاء اول حصه ,,
شافت انهم ما شالله فاهمين مره بس يمكن ما يتابعون حل الواجب عشان يرسخ في مخهم اكثر ,,,
راحت الحصة الاولى في التعريف عن نفسهم وش ياخذون من مواد وش يحبون ,, وش هوايتهم
نجود : ابله انا احب الرسم ,,
هيفاء ترسمين شجره والا بيت والا سياره ,,
نجود : احب ارسم سحاب وشمس وبحر ,,
هيفاء : الله حلووو وبعد ,,
نجود : ابي اعرف ارسم فراشه فيها الوان بس كل مره تخرب معي ,,
قامت هيفاء دقايق ورجعت لها
تتذكر مره انها كان عندها قماش ملون فيه فراشات ,, طلعته وجابته لنجود وقصت جزء من القماش يحتوي على فراشه وقالت لها تحتفظ فيه عشان تعرف طريقة الالوان ,, حست هيفاء بأنجاز ,, ما ابسط الاشياء اللي نسويها وهي ممكن ترسم الفرحة على وجوه الغير ,,
شافت هيفاء انها اهملت خالد
هيفاء : طيب خلود وش اصعب ماده عندك
خالد : رياضيات ,, ما احبها كلش
هيفاء : اتحداك واذا خليتك تحبها وش تعطيني ,,
خالد ,, بعطيك ورده وهو يضحك ,,

عزمت هيفاء انها تكمل معهم لحد ما يخلصون اختبارتهم على الاقل ,, وفرحت ان فيه شي ممكن تنتظره كل يوم ,,

بعد فترة كم شهر ,,, هيفاء وامها جالسين يتقهون ويسولفون عن زواج بنت جيرانهم ,, جاهم اتصال على تليفون البيت ,, رفعت السماعه لطيفه وتكلمت ,,
لطيفه : الوو
ام طلال : هلا ومرحبا ,, وشلونكم
لطيفه : مرحبا يأم طلال وهي ترفع صوتها شوي ,, وشلونك انتي ياعمري ,,,
ام طلال : بخير يا قلبي ,, شلون هيفاء
لطيفه : ابشرك يخير اللهم لك الحمد ,,,
ام طلال : عندكم احد ,, استغربت لطيفه من السؤال ,,
لطيفه : سلامتك ,,

سكرت لطيفه من ام طلال وهي تقول مدري ليه يا هيفاء حاسه ان جدتك فيها شي ,,,
هيفاء فزت من مكانها ,, وش فيها ,, لمياء كلمتني البارح ما قالت عنها شي ,, خذت جوالها تدق على لمياء ,,
رنت عليها ثلاث مرات وما حصلت اجابه وفي الأخير سكرت,,,
وهم على حالهم رن جرس البيت وطلعت الشغاله تفتح البوابه وسمعتها هيفاء وهي تصرخ فرحانه : لمياء جات ,,
طلعت هيفاء للحوش تبي تشوف لمياء صدق جت,, وشافتها وهي تسند لجدتها ام طلال بكبرها جايه ,,
خفق قلب هيفاء بشوووق لجدتها كانت كاتمته الشهور اللي راحت ,,
جرت هيفاء لجدتها وضمتها بقووووه وهم يبكون على بعض وعلى جروح فرقتهم وشدت يدها على شعرها وهي تقول
مالي خاطر عندك يا هيفاء ,,
هيفاء تمسك يد جدتها وتضمها لها : يمه والله اني اغليك ومن غلاتك ما بغيت اكلمك واقولك شي في نفسي وهو ممكن يزعلك على فهد
ادري انك تحبينه وولدك اللي ربيتيه ,, وش انتظر منك تسوين ,,
ام طلال : مو قته هالكلام دخلوني ابي ارتاح من الطريق ,,
لمياء : هيفاء ,, فيصل بيدخل ,,
هيفاء : اوكي ياعمري انا داخله ,,
دخل فيصل وسلم على خالته لطيفه ,, وقعد في المجلس يبي يتريح شوي من الطريق ,, فجأته جدته اللي طلعت من عدتها انها تبي العمرة ,, ثم غيرت رأيها وكلمته يوديها لهيفاء ,,,
ام طلال دخلت غرفة مقلط للحريم ما يستخدمونها عادة وحطت لها هيفاء فراش وثير ورتبت لها مكان ترتاح فيه شوي ,,
اول ما خلصت ترتيبها وام طلال تراقبها ,, قالت لها ام طلال : قواك قلبك يا هيفاء ما تسألين ,,
هيفاء ماعندها اي رد اكثر من اللي قالت ,,,
وهم في مكانهم رن جوال ام طلال ,,
ام طلال : ناوليني جوالي يا قلبي ,,
دخلت هيفاء يدها في الشنطه ,, اول ما شافت اسم فهد نور عيني ,, ارتبكت وعطت جدتها الجوال ,,
اسم فهد ما زال يخلي قلبها يرجف مثل اول ,, ولا حست انه مهما بعد انها نسته او فكرت انها تنساه ,, ما قدرت بس ما ودها تحكي ,,
ام طلال : هلا يا قلبي ونور عيني ,,
فهد : هلا بك يمه ,, وصلتي ,,
ام طلال : الحين تونا داخلين ,,
فهد : شفتي هيفاء :
ام طلال : هاذي هي عندي ,, ما شالله احلى من اول بعد ,,
هيفاء انحرجت من جدتها وطريقتها معا حسستها ان جدتها راح تسوي اللي تقدر عليه وانها ترجع لفهد,,,
ام طلال : لحظه ومدت الجوال لهيفاء ,, كلمي فهد يبيك ,, وعطتها الجوال ,,
هيفاء مثل ما يقولون اسقط في يديها ,,ما بغت ترد جدتها وفي نفس الوقت حست انها تسوي حركات بزران اذا ما كلمته وهو اللي يسئل عنها ,,,
خذت هيفاء الجوال ,,,
هيفاء|:الوو
فهد :عاش من سمع صوتك انا قلت اكيد نسيتينا
ما ردت هيفاء ظلت ساكته
فهد تقرين مسجاتي اللي ارسلها
هيفاء بدون تردد اي
انشرح صوت فهد وقال لهيفاء دامك تقرينها فودي والله ,,
قالها فهد انها تهتم في حالها ,, ولو ترد على المسجات ترى بتحسسه انها معاه على طول الوقت ,,
ام طلال : وش رايك تروحين معنا العمرة انتي وامك لطيفه ,,,

هيفاء تدفقت مشاعرها وهي تشوف جدتها تضمها وتدعي لها من قلبها ,,,, ام طلال وهي تضم هيفاء ,, وتقربها تبي تكلمها
ام طلال : هيفاء : متى بترضين على فهد ..,,,,
هيفاء ماعندها رد لجدتها وهي حستها فرحانه بس مو باللي يرضى عليها ,,,
هيفاء : الايام كفيله بكل شي يا يمه ,,,,


هيفاء ما توقعت ردة فعلها تكون كذا تجاه جدتها ,, وعرفت ان حب جدتها فطري ,, مو هي اللي تتحكم فيه ,,,, ما تدري الحين وشلون تعامل فهد ,,,

طلعت من جدتها وراحت تشوف لمياء مشتاقه لها حييييل ,, لقت لمياء قاعده عند امها وهي بطنها غريب شكله عليها ,, واخير بتصيرين يا لمياء ام ؟؟؟؟

هيفاء : ليه ما جت معكم ريما
لمياء : مسكينه والله ما قدرت تترك خالتي بالحالها ,,
هيفاء ,,فيها الخير والله ,,,,,,
ظلت ام طلال عند بيت لطيفه كم يوم ,,,وصارت حديث الديره ,, وام طلال برقيها المعتاد ,,استقبلت جيران لطيفه وسلمت عليهم ,,
وفي ليلة
وهما قاعدين يرتبون سمعوا صرخة ام طلال جايه من الغرفة وقامو ا كلهم في صوت واحد يمه,,
ما تدري وش كثر راح من الليل وهما قاعدين عند راس جدتها اللي جاها اغماء قوي,.
(( الجزء الثلاثين ))

طلع الدكتور الخاص وهو يطمنهم ان ام طلال تحتاج راحه بسيطه في الفراش وان شالله بتكون بخير ,,,
بعد ماطاحت عليهم جدتهم كلمت لمياء فيصل يرجع لهم ,, يمكن يحتاجون يرجعونها الرياض ,,,
ام طلال نايمه في فراشها وهيفاء عند راسها تقرأ عليها ,,, بالرغم ان ما فيها شي يقلق لكن هيفاء ما ارتاحت مره لوضعها ,,
جابت لمياء الغداء عشان جدتها تتغذى شوي ,, لكن ام طلال بدت دموعها تنزل وهي ساكته ,,
هيفاء : وشفيك يمه :: لا تخافين ما فيك الا العافية والدكتور طمنا ,,,
ام طلال : ابي اكلم فهد ,, يمكن اموت ما سمعت صوته ولا شفته ,,,
هيفاء ولمياء كلهم بصوت واحد , يمه اسم الله عليك وشفيك ,, لا تقولين كذا مو زين ,,
ام طلال : ابي اكلم فهد ودموعها تنزل ,,
دقت هيفاء على طول على فهد من جوالها ,, فهد وقف في كوفي يأخذ له كابتشينو ,, شاف اسم (( حبيبتي )) وعلى طول رفع الخط ,,
وقف وارخى سمعه كله ,,
هيفاء : الو
فهد : هلا
هيفاء : كيفك ان شالله بخير
فهد : ماشي الحال ,, هيفاء درت ان فهد شايل عليها بعد المده ذي ,, على كثر ما ارسل مسجات ودق اتصالات ولا ردت على شي منها ,, لحد ما طفش منها ,, بدى يباعد من مسجاته ,, لين وقفها بعد ما شاف مافيها نتيجه ,,,
هيفاء : جدتي معك ,, وناولت ام طلال الجوال
فهد عرف ان جدته راحت للديرة او حس كذا والا كيف تكون هي وهيفاء في مكان واحد ,,, اكيد كذا والا يمكن هيفاء رضت ورجعت لا لا ما اظن ,,,

ام طلال اول ما كلمت فهد قعدت تبكي ,, وهو على الجانب الثاني يهديها يبي يعرف وش السالفه ,, ما قدر يفهم
هيفاء خذت الجوال ,,
هيفاء : جدتي طيبه بس شكلها اشتاقت لك وتدلعت علينا ,, تبي تطمن فهد وفي نفس الوقت تبي تعطي جدتها ثقه شوي ,,,
فهد : هيفاء طمنيني جدتي صاير لها شي ,, مو عادتها تبكي وش صاير لا تخبين علي شي والا ارجع على اول طياره ,,
هيفاء : حلفت لك ما فيها شي ,, جتنا هنا ومبسوطه وكل شي بس يمكن ,, تأثرت بغيابك ,,
فهد : طيب هدت عطيني اكلمها,,
هيفاء : لا خله وقت ثاني برجع اكلمك ,,
فهد : انتظرك لا تتأخرين علي ,,,
هيفاء سكرت وعاتبت جدتها ,, يمه الحين من جدك ,, تصيحين بيقول فيك شي ,,
ام طلال : انا ما ارتحت من سافر,, وانتي زعلتي وجيتي هنا ,, انتوا ما تحسون في ولا لي خاطر عندكم ,, انتوا ما تحبون الا انفسكم ,, انا مالي الا انتوا بسلامة الباقيين ,,
هيفاء : يمه الله يسامحك مو لهالدرجه ,, احنا مو متعمدين نزعجك بس الظروف حكمتنا ,, انتي تعرفين غلاتك عندي
ام طلال : اعرفها يا هيفاء هذا وانتي ما كلفتي على نفسك ودقيتي على تشوفين اوضاعي وش صار معي ,,يا هيفاء لا ترخصين غلاك عندي بتصرفاتك ,, فهد اعتذر وجاء عندك كم مره وانتي رافضه ترجعين ,, وش تبين الواحد يسوي ابي افهم يذبح عمره عشان ترضين ,, ولفت نامت على جنبها ما تبي تكمل كلامها مع هيفاء ,,,
هيفاء تركت لمياء مع جدتها وطلعت لغرفتها ,, قعدت على مكتبها وفيها قهر على الوضع كله ,, جدتها زعلانه زعل كايد عليها ,, ومنقهرها على عمرها تشوف انها سوت الشي اللي يرضيها ,, لكن الظاهر انه موعاجب الجميع انها تختار الابتعاد عنهم ,,
ضاقت بقوووه وقعدت تفكر وش تسوي وكيف ترضي جدتها ,, الا يجيها اتصال من رقم فهد ,,
فهد : هيفاء ما دخلت المحاضرة للحين وش صار على جدتي ,, ما قدرت ادخل وانا بالي عندكم ,,
هيفاء : ما فيها شي قلت لك دلع بس وانا بوسع صدرها ,, ما حبت تعطيه اجابات واضحه عن الوضع
فهد : متى جاتكم جدتي ,, كان قصده بالسؤال ذا انه يعرف الوضع اللي صاير ,,
هيفاء : من كم يوم وما فيها شي والله ,, بس جاء في خاطرها تكلمك ,, هذا كل الموضوع
فهد : ممكن اطلب منك شي ,,
هيفاء وهي متردده ,, : تفضل ,,,
فهد :ممكن تراعين خاطر جدتي شوي وما تزعلينها بعنادك ,,
انصدمت هيفاء من كلمته,, الحين انا غلطانه ومعانده ,, ونسيت نفسك وش سويت ,,
هيفاء : فمان الله وسكرت الخط ما عطته فرصه يقول شي ,, وفهد عرف انها زعلت من طريقته معها ,, يووو يا هيفاء ترى بطفشيني عاد ,,,

عصبت هيفاء على فهد وش فاكر نفسه يعطي اوامر لا يقول عني عنيده ,, اكيد الفكره ذي في راسه عني ,, متى صرت عنيده ,, عشان ما ارضى بالغلط ,,والا لازم ارضى به واقول سامحوني ,, اي منطق ذا ,,,
قامت من غرفتها بتطلع جتها نغمة مسج ,,فتحتها شافت فهد مرسل لها (( اذا لي باقي قدر عندك ارجوك تهتمين بجدتي انا برتب اموري وبرجع اشوفها كم يوم ,,,ارتبكت هيفاء ومادرت شتسوي بعد رسالة فهد ,, شافت انها ملزمة وانها لازم تخفف عن جدتها وجدتها ما راح ترضى الا انها ترجع معها لفهد ,,,,,
احتارت وش تسوي فعلا هي ما تبي ترجع عشانهم ,, تبي هي مقتنعه فعلا بقرارها ,,
جت عند امها لطيفه ,, وقعدت جنبها وهي على سجادتها تصلي العصر ,,
لطيفه عارفه حيرة هيفاء ,, حطت هيفاء راسها في حضن امها وغمضت عيونها وقعدت تنزل دموعها ما بغت امها تشوفها وهي تصيح ,,
لطيفه مربيه هيفاء وعارفه كل مشاعرها واحساسيها ولو ما قالتها ,, مسحت دموع هيفاء بيدها وكلمتها وهي تمسح شعرها ,,
لطيفه : هيوفه ياعمري ,, انا عارفه وش تحسين به ,, انتي مو هاينه عليك جدتك بس ماودك يغصبونك على شي
هيفاء : يمه انا ما ارضى انها تتعب وتتضايق عشاني ,, بس هم جرحوني جرح ما يوديه شي ابي ارضى بس ما قدرت ,, يمه انتي تحسبين ما احبها ولا احب فهد ,, لكنهم صدقوا في اول شي سمعوه ,, هنت عليهم بسهوله وطلقني ,,, والحين يبون ارجع كذا بس ,,,
لطيفه : اذا انتي عاقله وتفكرين لبعدين ومستقبلك ,, ففهد مثل كل الرجاجيل اذا زعل ,, لا تاخذين على زعله ,,
والله مو عشانك ترجعين بس والله يا فهد ما ينتعوض ,, هيفاء عارفه ذا بس كله منك يا فهد انت اللي قسيتني ,,
لطيفه : هيفاء ارجعي مع جدتك والله بيساعدك وبيرضيك ,,,
هيفاء : انا مني براجعه الا وانتي معي ,, وانا برجع عشان جدتي ,, اما فهد فبدري الكلام عليه ,,, جاهم فيصل هذاك اليوم
واول ما دخل على جدته ما تطمن على حالها ابد ,, وعزم يرجعون للرياض يسون لها فحوصات ويتاكدون انها مافيها شي ,,
جاه اتصال من فهد يبي يتطمن على جدته ,,,كان فيصل قاعد مع لمياء في المجلس
فيصل : هلا بك يا فهد وش اخبارك ,,
فهد : الاخبار عندكم ,, وش فيها جدتي ,, هيفاء ما قالت عنها شي ,,
فيصل : وش اقولك يمكن تحتاج فحوصات جابوا لها دكتور هنا قال لازم ترتاح بس ,, لكن انا مو متطمن ,,
فهد : اوكي متى بترجع الرياض ,,
فيصل بكره ان اشالله ,,

هيفاء قعدت جنب جدتها ,,, خذت يديها وحبتها ومسكتها بقوووه في يدها ,,
هيفاء : يمه وش تحسين به الحين ,,
ام طلال : بخير ,, ودي ارجع للرياض وادخل المستشفى ,,
هيفاء : يمه انتي تحسين بشي ,,
ام طلال : تعبانه وفيني ضيقه ,,انا ما ابي اغصبك ترجعين معي ,, ودي تكونين مرتاحه في حياتك ,, لكن ما اقول الا الله يهديكم ,,
هيفاء : برجع معك يمه ,,,
ام طلال : صحيح ,, صحيح يا هيفاء ,,وخذتها لصدرها وضمتها وهي تحس براحه عجيبه من قرار هيفاء ,,,,

طلع فيصل ولمياء في السيارة معاهم ام طلال ولطيفه وهيفاء ,,
وتركوا شنطهم مع الشغالات في السياره الثانية ورجعوا للرياض في رحلة يملأها الأمل من كل الأطراف بمستقبل احسن للجميع ,,,

ريما قاعده تجهز كل شي عشان وصولهم من غرفة جدتها لغرفة هيفاء ,, للمجلس واستقبال الضيوف ,, الى كل شي يبي تجهيز ,, كانت تساعدها خديجه في تحضير الاساسيات وتشرف على كل صغيره وكبيره ممكن يحتاجونها

طلال وسلطانه مرت حياتهم بشكل روتيني ,, مكتفين ببرنامجهم وما حبوا يضيفون له اي تغيير ,, كلهم يحبون الهدوء والاستمتاع بوقتهم بعيد عن مسؤليات العمل والبيت ,,

فهد اتفق مع نواف على حجز بعد بكره انه يجي الرياض كم يوم ,, واستغل نواف هالفرصه اذا جاء فهد بيخطب ريما رسمي ويملك عليها ,, ويخليها تتجهز براحتها ,, رب ضاره نافعه ,, مرض جدته وتعبها بيترك له فرصه انه يكلم فهد اذا جاء ,,

وصل فيصل للقصر بعد مشوار كم ساعه ,, تعبت لمياء من الطريق عشان ظهرها فكان يسوق بشويش عشانها ,,, نزل وفتح الباب لجدته اللي كانت جالسه جنب هيفاء ومتسنده عليها ,, وخذ يدها ومشى معها للقصر ,, ومشوا البنات وراه ,,,
اول ما دخلوا ,, استراحت ام طلال على الكرسي ,, وحست بدوخه ,, فقالت يمكن انها من الطريق ,,,
ريما وهي واقفه وفاتحه يدينها بكبرها لهيفاء ,, كان عناقهم مؤثر لدرجه صيحت الباقين ,, من طلال وسلطانه ولمياء وحتى لطيفه ,,,
بكوا الثنتين بشكل يحزن وما عرفوا قيمة بعض وغلا بعض الا لما بعدوا عن بعض
ريما وهي تشد شعر هيفاء : يا ويلك اذا رحتي مره ثانيه ,, انا ارضى ان فهد يزعل بس انتي لا لا ,,,
هيفاء وهي تضمها مره ثانيه : الله لا يجيب الزعل يا عمري ,,,
دخلت ام طلال تستريح في غرفتها ,, واتفق معها فيصل بياخذها للمستشفى بكره بيسون لها فحوصات ,,
ريما خذت هيفاء بعد ما نامت جدتهم وطلعت معها لغرفتها ,,,
ريما : نورتي مكانك يا قلبي ,,, اشتقت لك والله
هيفاء : تدرين بغلاتك عندي يا ريما لكن اللي صار يخلي الواحد يفكر في نفسه ومكانته عند الاخريين
ريما : انتي ما تعرفين مكانتك عند فهد ,, انتي لو تشوفين بس كيف سوى تحريات ما قدر يصدق انك بتسوين هالشي صحيح الغضب اعماه في البدايه لكنه رفض يرضخ للموقف ووراهم لحد ما اكتشف كل شي ,,
هيفاء : قولي لي ,, ومسكتها ريما وقعدت تقص عليها كل السالفة ,,
ريما : ومن يومها مشاعل مادخلت بيتنا ونواف محرم عليها تطلع الا في اضيق الحدود ,, صارت تقول للعنود اول حد بيتقدم لي باخذه ان شالله وشو ولا هالعيشه ,, اما عبير ,, فدرت بمشاعل واللي صار لها ومن يومها حرمت بنفسها تجي خايفه حد يشرشحها ,, لان مشاعل قالت للعنود ان عبير متقفها معها ,, وعنود قالت لي ,,

راح نص الليل وهم يسولفون ,, وفي الاخير هيفاء قالت لريما انها بتروح تنام عند جدتها هاليومين لانها حاسه انها ممكن تبي شي في اي لحظه ,,,
في الصباح بدري ,, قامت ام طلال واستعدت تبي تروح للمستشفى فأصرت هيفاء انها تجي معهم هي وفيصل ,, ما تقدر تترك جدتها لحالها ,,
ام طلال : يمك انا بروح انا وفيصل بنكفي ,, واذا احتجتك بكلمك ,,
هيفاء : مستحيل يمه انا بروح معك ,,
طلعوا مع فيصل للمستشفى الخاص ,, واول ما وصلوه وقاموا بفحوص لأم طلال , اقترح عليهم الدكتور ان ام طلال تنام في المستشفى كم يوم ,, عشان يتمون كل الفحوصات على رواقه ,,
وافقت ام طلال ,, ورتب لها الدكتور اجراءت الدخول ,,, هيفاء على طول كلمت ريما تجهز لهم اغراض للمستشفى وتجيبها لهم ,, بعد فتره بسيطه طلعت ام طلال فوق لغرفتها في المستشفى ,,,,وهيفاء معاها في كل لحظه ما تغيب من عينها ,,,
تركهم فيصل في الغرفة عشان يرتاحون ,, وأكد لهم انه بيرجع لهم العصر بيشوف الطبيب وش اخر اخباره ,,,
قامت هيفاء كعادتها اذا جت المكان ورتبته اكثر مماهو مرتب ,, رتبت سرير جدتها وطلعتها عليه ,,, وكلمت لمياء وعطتها اخبارهم ووصتها على امهم تهتم فيها هاليومين اللي بيغيبون فيها ,,,

قبل الظهر جتهم ريما محملة بكل شي من مفرش لام طلال ,, الى غيار لهيفاء حق يومين ,, وشنطة ام طلال وملابسها ,,
وما نست انها تجيب لهم القهوة والشاي والمكسرات للمستشفى ,,,
ظلت هيفاء وريما يرتبون المكان ,, ووصت ريما السواق يجيب ورد عشان يضفي للغرفه شكل ,, اكيد صديقات ام طلال اول ما يعرفون انها في المستشفى بيزرونها ,,,

ام طلال حست بأسترخاء تام في المستشفى ,, وحست ان اعصابها مرتاحه من يوم رجعت معهم هيفاء ,, ما باقي الا فهد انه يلتم شمله معهم ,, تمنت ذيك اللحظه بفارغ الصبر ,,
بعد ما طلعوا منهم الزوار بعد المساء ,, خذت ام طلال هيفاء عنده ومسكت يدها ,, وقعدت توصيها في اغراضها ,, لان الدنيا ما تنضمن ,, ووممكن الانسان يفارقها في اي لحظه بدون مقدمات ,, حاولت هيفاء تخفف عن جدتها مشاعرها الطبيعية ,, اكيد ان جدتي خايفه لحد ما تطلع الفحوصات وتطمنها ,, بس ان شالله ما يكون فيها اي شي ,,,
ما سمعت من فهد اي شي وما رجع يكلمها وما ارسلت له شي بعد ,, فتوقعت ان فيصل يقول له عن كل شي ,, حاولت انها ترسم صورة عن لقاءها بفهد اذا فكر انه يجي فعلا ,, وش راح تقول له ,, كيف بتسلم عليه ,, فكرت مده طويله وفي الأخير توصلت الى حل ,,,

بعد ما نامت جدتها , بدلت ملابسها ولبست لها قميص قطن عادي ,, وحررت شعرها وقربت لها شرشف للصلاه صغير ,, في حال ان اي حد ممكن يدخل فجأه ,, وتعطرت بعطرها اللي تحبه حيييل ونامت على كرسي المرافق للمريض ,,

مع وصول الخطوط السعوديه فجر ذاك اليوم قادمه من لندن ,,, كانت مشاعرفهد مثل هدير محركات الطائره ,, تدور بسرعه ثم تقف عند نقطه معينه لتعيد الكره مره اخره ,,,
ما في باله الا شيئين صحة جدته اللي تطمن عليها قبل يركب الطايرة لما كلمه فيصل ,, وهيفاء هل رضت وبترجع حياتهم طبيعي والا لا ,,,

اول ما طلع من ارض المطار كان السواق في استقباله وطلع معاه على المستشفى على طول ,,,
وصل فهد لمركز الممرضات وسئل عن غرفة جدته ,, واكدت له الممرضه انها نايمه ,, وياليت يزورها بعدين ,, فهد ما التفت لها وكمل طريقه لغرفة جدته ,, دخلها وشاف جدته نايمه على السرير وهي شبه مغمضه ,, وفتحت عيونها اول ما شافته وحست به ,, وهيفاء اللي نايمه على الكرسي وما اشبهها بنفس ذاك اليوم واول مره يشوفها نايمه في سرير جدتها ,, قرب يم جدته ,, وباس راسها ,, والتفت لهيفاء اللي لحافها نزل منها ,, فخذه ولحفها ,,, ومسح على شعرها وما قدر يمسك نفسه وباس خدها وهي نايمه ,,
رجع لجدته يبي يسألها عن حالها ,, لكن هيفاء اللي فتحت عيونها بعد حركته ما شافت الا ظهره ,, حطت اللحاف على وجهها وسوت نفسها نايمه ,, وقلبها يدف بقوه ,, انحرجت منه يشوفها بذا الشكل وهي نايمه خصوصا انها من زماااان ما شافته ,,
قعد فهد يسولف مع جدته بهدوء عشان ما يصحون هيفاء اللي صاحيه وهما مو حاسين ,, ثم طلع منها وقال بيرجع على الظهر عشان يشوف فحوصاتها ,,,

اول ما طلع وسمعت هيفاء تسكيرة الباب ,, قامت مستعجله ودخلت الحمام تبي تغير ملابسها يمكن يجي في اي لحظه ,, لكنها سمعت ام طلال تناديها من ورى الباب ,, هيفاء تعالي كملي نوم ,, فهد مو جاي قبل الظهر ,,,,
هيفاء وهي تغسل وجهها : يا حبي لك يا جدتي ,, لا تحاتيني انا طالعه الحين ,,,
هيفاء تشوف ان اليوم غير طبيعي بحضور فهد ,,,
الله يعينها على الساعات القادمة وكيف بتحكي معه ,,,

جاهم الدكتور الصباح واخبرهم ان ام طلال مافيها اي شي الا ارهاق بسيط وقل غذاء ولازم تهتم في حالها ,, حتى لو يعطيها مقويات تحت اشرافه كطبيب ,,,

هيفاء متوترة من جية فهد ,, ما تبي تسوي نفسها عاادي ,, لازم يعرف انها راجعه عشان جدتها وبس ,, واذا هي تبي ترجع له بترجع باقتناع منها ,,,

غيرت لجدتها وعطتها بعض الفاكهة ,, وقعدت تسولف معها ,,
ام طلال تحب طريقة هيفاء معها ,, تشوفها غير متكرره مع اي احد قبل ,.. لها طريقه في مسك الاشياء وترتيبها ومشيتها ورزتها في قعدتها ,, لها دور كبييير ,,
وهم يسولفون وهيفاء تضحك جدتها تبيها تستانس ,, ما شافوا الا فهد يدخل عليهم ,,, وعينه على هيفاء ,,
فهد : مساء الخير ,,
هيفاء : مساء النور
فهد ما بغى يمد يديه لها بعد يمكن تفشله ,, فأكتفى بالسلام
ام طلال : وشلونك يمه ان شالله ارتحت ,, شكلك ما نمت ,,
فهد وهو ما رفع عينه من هيفاء ويحاول يتبعها بنظره ,, لانها حست به ان يركز عليها فحاولت تسوي بعض الترتيبات في الغرفة ,,
فهد : الا نمت يمه بما فيه الكفاية بس مشتاااق ...... هيفاء التفت عفوي له تبي تشوف تكملة كلمته ,,
بس مشتاااق اعرف الطبيب وش عنده
صدت منه هيفاء وهي تضحك ,, ما قدرت تمسك ضحكتها ,,علي هالحركات يا فهد
فهد شاف كتفها يهتز عرف انها ضحكت ,,
فهد :بعض الناس شكلهم فيه شي مونسهم يا ليت يشاركونا فيه ,,,,
هيفاء سفهته وكملت شغلها ورتبت الورد في الفازا

ام طلال :لا ابشرك الدكتور طمنا ,, الحمدلله ما فيني الا العافيه ,,

فهد : اي مريت عليه وقال لي علومه كلها ::: بس انا ما راح اعتمد على كلامه ,, عشان كذا بعد اسبوع بسافر انا وانتي وهيفاء لندن !!!
وعينه على هيفاء يبي يشوف ردة فعلها ,,
هيفاء : ما في داعي جدتي تسافر دامها طيبه بالعكس السفر راح يكون متعب عليها ,,,
فهد كان قاعد على الكرسي وقف وقرب لهيفاء وهي تتكلم : اذا طلبت رأيك يا قلبي علميني به ,, لكن هذا قراري ,, وما عليكم الا انكم تتجهزون ,,
وطلع من الغرفة وهو يضحك في قلبه على هيفاء ,,, ما صدقت يا هيفاء انك رجعتي في حماي تبين اخليك ,,,

(( الجزء الواحد والثلاثين ))


طلعت ام طلال للقصر وهي فرحانه بأنها طيبه وبخير وما فيها اي شي يقلق ,, وزادت فرحتها ان هيفاء وفهد راح تنحل مشكلتهم اذا مو اليوم فبكره ,, اهم شي في نظرها انهم يكونون مع بعض ,, بعد ما وصلوا للقصر ,, دخلت سلطانه تساعد ام طلال ,, وريما اللي جهزت سرير جدتها ,, كانت مرتبه ملابس جدتها عشان تبدل ,, هيفاء تعبانه من المستشفى وقعدته ,, فأستئذنت منهم تبي تطلع ترتاح شوي ,,
طلعت بسرعه قبل يجي فهد ,, وخذت لها ملابس وبعض اغراضها الشخصية ودخلت جناح عمتها مريم ,, ما ودها تحتك في فهد ابدا لحد , ما تحس انها راضية من داخل فلبها عليه ,, كل شي يهون في نظرها الا اخر سالفة وطلاقها اللي آلمها كثيييير,,,
ما يمديها تسكر الباب وتقعد على الكنبة الا تسمع صوت دق على الباب ,, ما توقعت انه يكون فهد ابدا فقالت ادخل ,,
دخل فهد عليها وهي حايسه اغراضها وللحين ما بدت ترتبها ,, قعد يتأمل الغرفة واغراضها المتناثره على السرير ,, وفتح عيونه شوي بأستغراب
فهد : ليش جايه هنا ؟؟
ما درت وش ترد به ,, وشافت انها تقول له الحقيقه ابرك ,,
هيفاء : ابي اقعد لحالي اذا ما عندك مانع ,,,
فهد : واذا تبين لحالك ليه رجعتي وهو يقولها بحده وسخرية شوي ,,,
هيفاء : ما رجعت عشانك ,, انا رجعت عشان جدتي اذا كان هذا يرضيك ,,
فهد كان وده انه هيفاء ترضى ويرجعون لحياتهم الطبيعية وخصوصا انه من جاها ذاك اليوم في الديره وهي شاغله كل جزءمن االساعه في وقته ,,
فهد : الا يرضيني ,, وكثر الله خيرك ,,طلع منها وصفق الباب بقوووه وراح لجناحه وهو يحس بقهر من هيفاء ,,,
هيفاء قعدت ترتجف في مكانها انها ردت على فهد باللي في خاطرها ,, كانت عارفه ان ردها ضيق عليه وكدر خاطره ,, بس بعد لازم يتقبل انها رجعت مو عشان تبي ترجع له ,, واذا مو عشان جدتها كان ما تحركت من الديرة الا لما يرجع عشانها مره ثانيه ,,,

اول ما دخل الجناح دغل غرفتها على ماكان متعود عليه قبل ,, فتح ازرار ثوبه وهو يحس انه مخنوق من تصرف هيفاء ,,
وقعد يدخن بطريقته المعتاده اذا قفلت معه ,,, طال السهر وهو يشوف التلفزيون ,, وفي الاخير تطلع لبكره وعزم انه يغير هيفاء ولو طال الوقت معها ,,,
هيفاء قامت الصباح بدري وتجهزت بنفس ,, مهما صار مع فهد لكن ودها في اي لحظه يشوفها انها في اجمل شكل لها ,, يمكن يرضي غرورها ذا الشي ,,
رجعت هيفاء لأناقتها ومزاجها مروووق انها تتأنق ,, فلبست لها تنوره بلون الاخضر القاتم مع بلوزه بتنقيط النمر ,,, لكن بدرجة اللون الزيتي ,,,,
ورفعت شعرها على فوق وردته ثاني بأكسسوار حلوو ,, حطت مكياج هادي جدا ,, حلاه الجلوس الوردي الباهت ,,,
لبست لها صندل مرتفع شوي ,, وخذت جوالها ونزلت ,, شافت خديجه في الممر تشيل البخور لأم طلال ,, فخذته منها وشكرتها عليه ,,
عطرته بكسر العود ودخلت لجناح جدتها ,, فاجأها فهد انه قاعد يتقهوى مع جدته ,, متى امداك قمت بسم الله ,,,
اول ما شافتها ام طلال قالت لها بخري فهد يمك ,,,
ناولته هيفاء البخور بس هو قدم وجهه ومد يده في الهواء يشمه وما حاول ياخذه منها ,,
هيفاء شلونكم اليوم
ام طلال : ابشرك بأحسن حال ,, لكن فهد ما رد عليها ابدا وحاول انه يتجاهلها حتى ,,
وكملت ام طلال : عندي لك خبر حلوووو
هيفاء : خير يمه ,,
ام طلال : نواف يبي يملك على ريما هاليومين ,,
هيفاء : والله ,, خير حلووو بصراحه ,, وريما وينها الدبه ما قالت لي ,,
ام طلال : ما عندها خبر للحين ,, نواف كلم فهد البارح وتوه يقول لي ,,,
هيفاء : عسى والله الله يبارك لهم يا ربي ,, بغت تقعد لكن كملت وقفتها وانشغلت انها ترتب شغله على طاولة جدتها ,, وعقبها جت بتطلع ,, قالت لها ام طلال : وين يا هيفاء ,,
هيفاء : هنا ما راح ابعد يمه ,,
طلعت متضايقه من فهد ,, ليه ما يعاملني عادي لحد ما احس نفسيا اني متقبله ارجع برضا نفس ,, ليه يبي يعاقبني على كل شي ,,
دخلت المطبخ التحضيري ,, وسوت لها قهوة مره وقعدت على الطاولة ,, كلمتها الشغاله اذا تبي فطور ,, لكنها رفضت مالها مزاج تاكل ,, عكس من ساعه اول ما قامت كانت في مووود مرره راائع ,,,
تنهدت بقوووه وحطت يدها الثنتين على جبهتها ونزلت عيونها في القهوة ,,,
دخل فهد وهي موحاسه بشي كانت مركزه تفكيرها في حياتها ,,,
فهد : وش هالشي اللي شاغل بالك مررره ؟؟؟
هيفاء : لبيه ونزلت عيونها في قهوتها , , وكملت ,, ما شي ,,
فهد : اللي يشوفك يقول عندك مأساه وتبين تحلينها ,,, ما بغت هيفاء تضعف امامه ,,
هيفاء : شي عادي مو مهم ,,, كان وده فهد انها تكمل بس هي عادتها كذا تقط كلمه وتخليك تبني عليها ,,,,
فهد : كنت ابي منك خدمه ,,
هيفاء مركزه عيونها في عيونه وهي تقول له : تفضل ,,
فهد : انا ما قلت لريما للحين وانا متأكد انها بتقول لسى وما تجهزت وما امداني وعطني فرصه ,,, انتي تعرفين ريما ,,
ابيك تخلصين معها امورها الا خطبه صغيره ومعها عشاء للعايله ,, بعد بكره ان شالله ,,
استانست هيفاء انه كلفها بشي حتى لو هو من واجبها تسويه بس انها رغبته هو شي اسعدها ,,
هيفاء : ان شالله ولا يهمك ,,
فهد : تسلمين ,,, وطلع برى المطبخ واتجه لريما ,, لأن، عنده اشغال كثيير يبي يخلصها ,,,,
اول ما وصل للفيلا لقى امه تفطر مع ابوه وسلم عليهم ,,, سولف معهم شوي وعقبها فتح موضوع نواف ,,,, سلطانه ابد ما مانعت بالعكس ودها تفرح في ريما ,, اما طلال فحزن ان ريما بتتزوج وتطلع من عندهم ,, لكن مع ذلك وده بفرحتها ,,, فهد طلع لغرفة ريما فوق ,,,
وحصلها تبي تنزل تحت ,, مسكها فهد من كتفها ,, وطالعها بنظره ابويه اكثر من انه اخ
فهد : ريما انتي تعرفين معزة نواف عندي صح والا لا,,
ريما توترت ما تدري وش يقصد فهد ,,
فهد : وتعرفين حتى لو ما كان ولد عمتي اني ودي انه يكون نسيبي قبل يكون صديق حتى لأن فيه معاني رجولة نفتقدها الحين ,,
ريما : طيب
فهد : وانتي عارفه من متى تقدم لك لكن الظروف حالت ,, والحمدلله جدتي طلعت من عدتها وهي طيبه وبخير وبتروح معي لندن كم شهر وبتغير جو,,,
ريما : انت تقصد نواف يبي الزواج الحين ,,
فهد : لا مو الحين ,, اذا رجعت انا يبي لي ستة اشهر ,, ويمكن اقدر قبلها بعد ,, بس هو يبي الخطبةمع الملكة رسمي وانا وافقت وان شالله بعد بكره ,,,
ريما كنه صب عليها مويه بارده : فهد من جدك ,, لا لا ما اقدر اذا رجعت من سفرك خله زواج بالمره ,, لكن ملكة الحين لا لا ,,
انا ما يمديني اسوي اي شي ,, لا لا
فهد : انا بقول لهيفاء تساعدك بسرعه ,, بعدين الا خطبه مو عرس اقصاها بيشوفك ويملك عليك ,, الحين ابيك تكلمين هيفاء تروح معك سوي الفحص وصيتهم عليك عشان يخلصونه ,,,
ثم وش تبين عندك اليوم وبكره ,, ضمها فهد ومسح على شعرها
فهد : انتي تدرين اني ما اقدر افرط فيك لأي احد لكن نواف رجال عن مية وما ودي أخره اكثر من كذا ,,,,
سكتت ريما مستحيه من اخوها ,, واول ما طلع وعلى طوووول دقت على هيفاء ,,, ما ردت عليها شافت عندها انتظار ,,, اكيد فهد يوصيها ,, مادرت ان فهد قد قال حق هيفاء وخلص ,,
فهد : اذا ممكن وما عندك شغل ابيك تفضين نفسك حق ريما اليوم عشان يمديها تخلص ,, انا عطيتها خبر وقلت لها انك بتساعدينها ,,,
بعد شوي هيفاء رجعت الاتصال حق ريما واول ما سمعت صوتها : مبرووووك يالدبه ,,,
ريما : الله يبارك فيك ,,الحقي ياهيفاء حاسه بروووع ,,
هيفاء : تعوذي من ابليس ويالله قومي خلينا نستغل الوقت ,,,
عطت هيفاء ام طلال وامها لطيفه خبر انهم بيطلعون ,, وخذت عبايتها وشنطتها وطلعت لريما اللي تنتظرها بالسياره ,,
اول ما وصلت السياره ودخلت وشافت ريما ,,, لقتها تصيح وهي متأثره ,,
هيفاء : وشفيك اسم الله عليك ,,
ريما متأثره ما قدر صوتها يطلع : ما في شي ,,,
هيفاء : قلبي انتي ما تبين نواف المفروض تفرحين والا لا,,
ريما : ما اتخيل نفسي برى هالمكان ويكون لي عالم ثاني صعبه يا هيفاء والله صعبه ,,
ضمتها هيفاء لها ومسكت خدها بشويش : يالله بلا دلع بنات ,, مصيرك تتزوجين احمدي ربك انه نواف ,, مو انتي اللي ذبحتي عمرك حقه تطبخين له وتسوين له حركات غير شكل ,,كانت تبي تضحكها عشان تطلع من الجووو والا هي عارفه ريما قلبها طيوب ويتأثر بسرعه ,,
دقت لمياء عليهم تبي تشوف وينهم ونسوا منها تماما ,,, زعلت اول مادرت ,, ليش ما فرحوها بالخبر ,, لكن هيفاء اكدت لها هذه عمايل فيصل ,, ما صرنا نشوفك الا اخر الليل وش تسوي عااد ,, سكرت منهم لمياء وهي فرحانه جدا لريما,,,

فهد طلع للمكتب , والتقى بنواف اللي عطاه الموافقه انهم يجون بعد بكره ويخلص اموره عشان الملكة ,, واتفقوا انهم يسهرون برى ,,بس نواف اصر على فهد انه يشوفه العصر في محل مجواهرات معروف يبي ياخذ رايه في شغله ,,
اتفقوا وكل واحد منهم راح في شغله ,,, فهد وهو في زحمة الاوراق يبي خلص شغله تخص عقارات له ,, جاه اتصال من عبير ,,, استغرب من وقاحتها انها متصله عقب عمايلها مع مشاعل ,, طول عمرهم كانوا سوستين ما ترحم ,,,
بغى يسفه اتصالها كنه فضل في النهاية انه يرد عليها ويشوف وش عندها
فهد وبدون نفس : نعم
عبير وهي تتمسكن : نعم ,, معقوله فهد يكلمني كذا
فهد : وش عندك ,,
عبير : فهد انت ليش تكلمني كذا
فهد : مزاج وش عندك ,, خير وش عندك متصله ,,
عبير : فهد انا ضايعه من يوم سافرت ,, انا تعبانه يا فهد وتحاول تتغنج بصوتها ,, انا محتاجه لك ,,
فهد : علم ياصلك ويتعداك ,, اذا رجعتي تتصلين علي ,, بقول لنايف عنك وعن سوالفك انتي ومشاعل ,, وعندي تسجيل بكل شي ,,
فاقصري الشر يا عبير ,, وسكر في وجهها ,, هو يبي يهددها لانه وصلت معه حركاتها وطريقتها السخيفه ولازم تعرف حدها معه ,,,
عبير بعد ما سكر الخط بغت تموت ,, فشلها فهد ولا بعد يهدد ,, كله من خططك يا مشاعل ودتنا في داهيه ,,,,

كملوا هيفاء الفحص وطلعوا للسوق ,, يختارون فستان لريما يليق بالمناسبه ,, طلعوا للبوتيكات المعروفه ,, واستقر رايهم على فستان رااااقي شيفون حرير بلون الزهر مع شريطه ساتان على الخصر ويدها تكسير صغير كت مربوط بشريطه صغيره مره ,, معطيها شكل راااااقي جدا ,,, استانست ريما انها لقت شي ,,,وشكرت هيفاء من قلبها على مساعدتها لها بأختيار شي مميز ,, مروا على المشغل واتفقوه معاهم يجونه بكره عشان بعض العنايه من صبغة شعر وتجميل وغيره ,, ورجعوا وهم منهدين مررره من المشوار ,,
هيفاء تعشت مع امها وجدتها وهي تحس انها تعبانه وودها تنام لأن وراهم بكره الصباح طلعه للمشغل ,,,
دخلت جناح عمتها مريم وهي ما تفكر الا بريما وكيف بيصير شكلها يوم الخطبه ,,,
قامت هيفاء كعادتها نشيطه وكلها تفاؤل ,, خذت شاور سريع ولبست لها جينز سكيني ومعاه فستان من القطن البنفسج الراقي ,,
عكفت شعرها عشان يريحها في المشوار ,,وصلوا هي وريما وصارت ريما في يدهم كنها عروسه من عرايس الف ليله والف ليله ,,,
اصرت ريما على هيفاء تغير في قصة شعرها ,, وبعد الحاح وضغط من ريما اكتفت هيفاء بتدريجه شوي ,,
ما بقى لهم الا يمرون لمحل الورد يحجزون عنده بعض الباقات الصغيرة تكون متناثره على طاولات المجلس ,,,
بعد ما خلصوا شغلهم رجعوا للقصر وابتدوا بترتيبات الضيافه لبكره من حجز للتصوير على اختيار الاكل للعشاء , على تفاصيل صغيره لكنها تاخذ وقت كبير من الانسان ,,,
لمياء كان اكثر اشرافها على الافكار وطريقة تنفيذها بمساعدة الشغالات , ,, فيصل معطيها تحذيرات قويه انها ما تشيل اي شي ابد ,,,,
فما كان منها الا الالتزام بكلامه ,, قامت بترتيب المفارش على الطاولات واختيار نوع يليق بالمناسبه وقاموا الشغالات بتنسيق منها واختيارها لنوعية الصحون بترتيب مائدة الطعام ,,, وتوزيع الورد المجفف والشموع فيها ,,
وبخرت المكان وسكرته وحست بالفعل انها سوت شي يذكر لريما ,,,,
ام طلال تشعر بالسعاده ترجع للقصر بعد فتره من الحزن والمشاكل وتمنت ان زواج ريما خاتمة الاحزان باذن الله ,,,,

دخلت هيفاء جناح عمتها صار لها يومين تقريبا ما شافت فهد ابد لانها ما قرت في القصر ,, على طول برى وحست انها سوت انجاز كبير جدا مع ريما هاليومين,, لانه اختصار لأسابيع ولكن بفضل الله واختيارهم للالوان والتشكيلات الحلوة اللي ساعدتهم في تحقيق مهمتم بسرعه ,,
لبست هيفاء قميص ناعم وحررت شعرها المرول برولات كبيره لما كانت بالمشغل وتموج على جبينها مثل الشرايط الحريرية العريضة
ودخلت في فراشها وهي مبسوطه انها سوت اللي عليها ,, لما حطت راسها على المخده فكرت في بكره ,, اكيد مشاعل بتجي مع عمتي هدى ,, كيف بقابلها وشلون بتكلم معها وهل لها وجه تدخل عندنا ,,,سرحت هيفاء في شكلها كيف بيكون وحطت يدها على جبينها وصرخت أأأأأأخ,,, ما درت هيفاء وش بتلبس حق بكره ولا حطت في بالها اي شي ,, تذكرت فساتينها واي واحد تلبس ,, لكنها بعد مشكلتها ضعفت وما تدري وش بيناسب على جسمها اكثر ,, خذت اللحاف منها وتسحبت لجناحها كانت الساعه 2 ,, اكيد فهد نايم ولا راح يحس فيني ,,, مشت بشويش وفتحت باب الجناح لفت النور طافي ,, فتحت غرفتها ولقت نورها بعد طافي ,, جت بتفتحه لكنها عدلت عن رايها ,, يمكن فهد يشوف اضاءه في المكان ويجي وهي ما صدقت انه نام ,, فتحت غرفة الملابس واضاءت النور وفتحت دولابها ,,, وقعدت تلف فساتينها من الى واستقرت على ثلاثه ,,, طلعتهم وعلقتهم على باب الدولاب ,, فصخت قميصها ورمته ولبست اول واحد ,,, قعدت تسكره وتثبتها على جسمها وتشوف نفسها في المرايه ,,وتدور مره فكت شعرها على جنب وصارت ترفعه بيديها الثنتين كيف بيكون شكلها ,, وبعد فتره فصخته ولبست الثاني ونفس الكلام مره تدور به بالصندل ومره ترفعه تشوف كيف بيكون على جنب ومره تجيب شعرها على قدام ,, استانست عليه بس بعد بقت تتأكد من الاخير فصخت هذا ولبست الاخير حلووو عليها لكن الثاني كان احلى بكثير ,, وهي ترفع شعرها من على جبهتها وتطالع المرايه ,, سمعت صوت فهد يقول لها : احلى واحد الثاني ,,,,وصرخت هيفاء بقوه وشافت الغرفة المظلمه ,, الا فهد نايم في السرير وقاعد يبحلق فيها ,,,
حطت هيفاء يدها على فمها من الاحراج ,, انت من متى هنا ’’
فهد : انا انام هنا انتي اللي اقتحمتي المكان ,,,
هيفاء : هاذي غرفتي مو غرفتك اظن لك مكان لك ,,
فهد : انتي تركتيها وانا لي الحق اقعد فيها عندك مانع والتفت على جنبه عشان ما تشوفه وقعد يضحك ما يبي هيفاء تدري
يا زينك يا هيفاء ,, بكل شكل لك انتي حلوه ,, واحلى شي فيك برائتك كنك بزر ,, يا عمري انتي ,, وغمض عيونه عسى يجيه النوم
هيفاء بعد مالف منها فهد ,, انحرجت من شكلها ووضعها وان فهد كان يراقب المشهد كامل ,,, يا فشيلتي فيه وش بيقول ذي خبله ,,,
بسرعه لبست قميصها وتركت كل شي على وضعه واطفت النور وطلعت من الغرفه بسرعه ,,,
رجعت لجناح عمتها مريم وهي خجلانه والحياء كاسيها مرررره كل ما تذكرت ان فهد قاعد يبحلق فيها ,,,,
من عصر يوم الخطبة والاستعدادت على قدم وساق في القصر ,,, جت المزينه وابتدت في لمياء بشي مررره خفيف ,, وهيفاء رفضت قالت هي ودها ترتب عمرها ,,, ثم ابتدت في ريما وصففت شعرها بنعومه فائقه وثبتت فيها ورد صغير ,, على جنب اضفى لها شكل طفله صغيره ,,,
دخلت تلبس فستانها وساعدتها هيفاء بكل شي ,,, هيفاء حطت مكياجها بالحالها وكان روووعه شغلها وزينت الكوافيره شعرها وتركته يطيح براحته على شكل تموجات كبيره ,,, ثم تجهزت بعد ولبست فستنانها ,,,
نزلت لمياء عشان تشوف الحريم كان المعزومين على الضيق ,, كانت عمتها هدى في المجلس ومعاها بناتها مشاعل والعنود ,, ومهاوي ,, مشاعل شكلها منكسره مررره ,, مو مشاعل الاوليه ,, بس ما شافت ام نايف ولا عبير غريبه يعني ما نادتهم خالتي سلطانه والا كيف ,,,
ام طلال ولطيفه كانوا يسولفون مع حريم كبار من جيرانهم وماخذتهم السوالف
سلطانه قاعده تشرف على التضييف ,,, ومبسوطه من كل قلبها عشان بنتها ان شالله ربي يوفقها ,,,,
اما مجلس الرجال ,, فماكان فيه الا شباب العايلة ونواف كااااشخ كشخة المعرس ,,, ومبسوط انه اخيرا بيلتم شمله على ريما ,,,
جاء الشيخ اللي بيملكهم فما كان من طلال وفهد الا دخلوا على المجلس المطل معهم الشيخ ونواف ,, وقعدوا ينتظرون الاجراءت ,, ابتدا الشيخ فيها ولما بقى بس موافقة ريماوتوقيعها ,, خذ فهد الدفتر وجابه لريما ,, اول ما دخل اذهلته هيفاء بشكلها ,, كانت منحرجه منه مررره لدرجة انها ما قدرت تشوفه عشان موقف امس ,,,
فهد بهت في هيفاء ونسى من ريما حتى وش يبي ,, ريما اللي تتراقبهم وهي تضحك : نحن هنااااا
انتبه فهد من نفسه وقرب الدفتر لريما وطلب توقيعها ,,, بعد ما وقعت ريما ,, قال لك ربع ساعه وتنزلين في مجلس جدتي فاهمه نواف يبي يشوفك ,,,
ارتاعت ريما منه ومن صوته ,, شفيك فهد بنزل ان شالله ليش مستعجل ,,,
فهد كان فيه قهر على هيفاء انها قريبه منه ومع ذلك تسوي ما تبيه,,,,بس معليه ياهيفاء انا بخليك تجيني برجولك ,,,,نزلت هيفاء مع ريما عشان يسلمون على الاهل ,,, وريما صايره خياااال وشكلها الملفت ,,,نزلوا ودخلت ريما المجلس وهيفاء وراها ,, قاموا اللي في المجلس يسلمون ,, واول ما وصلوا لمشاعل مسكت يد هيفاء بقوه : اتمنى انك تسامحيني ياهيفاء الشيطان اعماني ,,,,
هيفاء : ما يكون الا خير وتحركت من جنبها ,, هي مو واثقه من مشاعل والا هي جد تتاسف والا مكيده منها وما بغت تدخل معها في كلام وتسوي عمرها انها غلطت ومسكينه والخ ,,, قعدت ريما في صدر المجلس والمسجل يشتغل بموسيقى فرح ,,
وعقبها بشوي نادها فهد وطلعت معه وهي متماسكه جدا عشان ما يخترب شكلها ,, اول ما فتح فهد الباب قال لها تفضلي ودخلت مشت كم خطوه وعينها على الارض وفهد ماسك يدها ما تحركت لأن فهد ما تحرك فما بغت ترفع عينه تشوف وش فيه ,, بس هي لحظه وكان نواف مقابلها وخذ يدها وقبلها وباس جبهتها ,,,,فهد اخليكم تاخذون راحتكم ,,,,

نواف ظل واقف مع ريما يمتع عيونه بشوفتها وما كان يشوف الا شعرها لانها منزله عيونها في الارض ,
نواف : قلبي
ريما انحرجت منه اكثر ,, وما قدرت توقف ودها تقعد على اي كرسي يمكن تتماسك اكثر ,,,,
نواف : وش هالزين ذبحتيني ياعمري,,,
ريما اختبصت وما عرفت وش تقول وما تبي يفكر انها كنها صنم بعد
ريما : ممكن اقعد ,,,
نواف : من عيوني ,, تعالي يا قلبي ,,, مسكها نواف وقعدها على الكنبة الكبيرة يبي قعد جنبها عشان يحس فيها اكثر ويشبع من شوفها اكثر واكثر ,, حست ريما بحريق في وجهها من كثر الاحراج ,,فطلبت انها تستئذن ,, لكن نواف رفض وقعد يسولف عن نفسه شوي يمكن ياثر عليها بالسوالف شوي
دخلت ام طلال وضيوفها على العشاء وقامت هيفاء بدور المضيفه للجميع وهي تحلق من ضيفه الى اخرى مثل الفراشة الخفيفه ,,,
كانت سهرة ولا اروع وهم في منتصف العشاء دخلت عليهم ريما وهي مبسوطه وراح توترها اللي سحبه نواف بالكامل وخذها بالسوالف عشان تتجرى عليه ,,,
ابتدوا الضيوف يغادرون القصر وما بقى الا لمياء وهيفاء وريما في المجلس المطل على الحديقه ,,
اول ما صاروا بالحالهم قعدت ريما تقولهم موقفها مع نواف بالتفصيل ,,, وهم في حديثهم كلم فيصل لمياء تطلع له عند المدخل عشان يروحون لفيلتهم ,,

قعدت ريما وهيفاء يسولفون عن شكل ريما وكيف رأي البنات فيه وش قالوا عنه ,,, قامت ريما للمسجل ,, هيوفه تكفين قومي ارقصي شوي خلي احس اني عروسه
هيفاء تضحك في مكانها ,, بس كذا كم ريما عندي ,, قعدت ريما تدور اغنيه حلوه ترقص هيفاء عليها وفي الاخير اتقفوا هم الثنتين على اغنية رابح صقر فاهمني والا لا
ابتدت موسيقى الاغنية وهيفاء قاعده تتذكر الرقص من زماااان عنه ,, ما تذكر حتى ,,قعدت تحرك يديها شوي في الهواء ثم بدت تدخل في جو الاغنية ,, اندمجت جدا معها لدرجه ان ريما قعدت ترقص معها ,, وما دروا ان فهد قعد يشوفهم ,, اول مره يشوف هيفاء وهي ترقص ,,
ما استغرب ابدا من جمال هيفاء حتى وهي ترقص لانها في اي شكل لها تكون حلوووو ه ,,,
اول ما خلصت نغمة الأعنية دخل فهد ,,
وتوقف هيفاء بسرعه
فهد وهو يطالع هيفاء بشوووق : بصراحه اغنية حلوووه وكلماتها احلى والا حلى من ذا كله رقص هيفاء ,,,
ريما : اكيد بتمدح زوجتك ,, الله يعيني بس عليك انت واياها ,,
هيفاء صارت الدنيا بالنسبه لها ضباب ,,, وش هالاحراج امس واليوم يا فشيله احس والله اني طحت من عينه ,,, طلعت من المجلس تبي تروح للجناح ,,
ويمسك يدها فهد وهي طالعه ,,
فهد : ما كلت شي ودايخ مررره ممكن تسوين لي شي ,,, هيفاء حست مو وقته لكن مالها الا توافق ,,
هيفاء : دقايق بس ,,
ترك فهد يدها وراحت للمطبخ التحضيري وعينه تتبعها ,,, اااااه يا هيفاء قريبه وبعيده ,,, الله لا يحرمني منك يا قلبي ,,,
ريما كانت تشوف اخوها اللي ما حس بوجودها كلش ,,,,
ريما : هيفاء تبي وقت يا فهد تتخطى كل شي قبل وترى مو صعب بس عطها فرصه
فهد وهو يأشر لها من عيوني ,,,,
دخلت هيفاء وهي تشيل الصينية فيها اكل خفيف ,, من معجنات فرنسية واجبان مشكله ,, ما حبت تجيب لفهد شي ثقيل والوقت متأخر ,,,
ما حصلت ريما في المجلس ,, شكلها طلعت فوق ,, اتفقت معها انها تبات معها في جناح عمتهم مريم الليلة عشان يسولفون اكثر ,,
نزلت الصينية على الطاولة ,, وحاولت تكون طبيعية قدام فهد عشان ما يلاحظ انها مرتبكه منه,,, تكلمت عشان تكسر الصمت
هيفاء " وين ريما ,,,
فهد : تقول بتطلع تبدل ,,,
هيفاء شافت نفسها غلط مع فهد ودعت على ريما انها تتزوج بسرعه ,, انتي عارفة البير وغطاه تخليني وتروحين ليه ,,,
بعد ما رتبت الاكل قدام فهد ,, تكلمت بصوت خافت من الاحراج وما يفضحها ,,
هيفاء : عن اذنك ,,
فهد : بس ما اسمح لك تروحين ,, اقعدي معي شوي على الاقل لين اتعشى ,,
المشكلة ما عندها شي تحكي معه فيه ومنحرجه منه مرررره عقب مواقفها معه ,, بس هي مو مستغربه المواقف انها تصير مستغربه من نفسها انها تنحط فيها بذا الشكل كنها خبله ,, يووو اكيد في قلبه يضحك علي ,,,,
قعدت في الكنبة اللي على جنب شوي ما تبي تكون قدامه ,, وشبكت يديها في بعض ,, وقعدت قعدتها المميزة ,, وتحاول تشوف قدامها بس ولا تلتفت جهة فهد كثييير
فهد : حد قالك ان طريقة تصفيفك للاشياء حلوووة ,, كنك متدربة في معهد شي زي كذا ,,
هيفاء ضحكت على كلامة بغت تقوله اي تدربت في معهد ماما لطيفه ,, بس قالت له : يعني مو ذاك الزود ما ينتبهون يمكن ,,,
فهد : اجل ماعندهم عيون ,, او يغارون منك ,,, وفهد مستمتع بالاكل ,, حست نفسها صدق جوعانه ما كلت شي من الصبح ,,
وعزمت اذا خلص فهد وطلع بتسوي ساندويتشات لها ولريما وتوديهاالغرفة ,,
فهد كنه قرأ افكارها ,, : تعشيتي ,,
هيفاء : هااا ,, اييييه اكيد ,,,
فهد وهو يغير الموضوع : هيفاء :: ممكن تجهزين اغراضك للسفر ,, بعد ثلاثة ايام حجزنا ,,
ضاقت هيفاء من طاري السفر ياليته يغير رايه ,, ويقعدون هنا ,, جدتها ما فيها شي ,,,
هيفاء : اشوف ماله داعي السفر ,, جدتي صارت طيبه وما فيها شي ,,
فهد وهو يتأملها بأحساس عاشق : فيه ناس مو طيبين غير جدتك ,,, كان جوالها في يدها تقلبه تشبكه بين ايديها ,,,,
طاح من يدها وارتبكت من كلمته ,, ليه تحرجني يا فهد ,, قامت تبي تطلع ,, وقف فهد في طريقها ,,,
فهد : وين بتروحين ,,
هيفاء : لو سمحت ما في داعي نتكلم الحين ,, مو وقته نفتح مواضيع وتأزمنا ,,,
فهد وهو يتأمل عيونها اللي ترمش بقوه من توترها : عيونك تأزمني ,,, لفت من طريقه بسرعه وطلعت على الدرج اشبه بالركض تحس دقات ,,,, قلبها اسرع منها ,,,
دخلت على ريما وهي تأخذ نفس من الدرج ,, اول ما شافتها ريما ,, قالت شفيك كنك خايفه من شي ,,
هيفاء : لا ولا شي بس حسيت اني تأخرت عليك ,,,,وهيفاء في نفسها تحمد ربها انها قدرت تهرب من فهد اللي تشوف جاذبيته كل يوم تطغى عليها ,,,
ريما : ما قلت لك وش قال فهد لما رحتي تجيبن الاكل ,,
هيفاء سوت نفسها مو مهتمه وهي من جووووه بتموت تبي تعرف ,, وش بيقول يعني ,,,
ريما : يا ثقه ,,
هيفاء تضحك وهي تشيل الأكسسوارات وتحطها في العلبة ,,,
ريما : خلاص ما راح اقول ,,
هيفاء : كيفك وهي تضحك ودخلت غرفة الملابس تغير ,,,
ريما : يا برودتك يا هيفاء : انا لو مكانك كان سويت المستحيل عشان اعرف وش يقول نواف عني ,,,,
هيفاء تطل عليها من ورى الباب : زين اجل انا مو نفسك !!! وهيفاء تضحك من جوووه على ريما ,, لو تدرين يا ريما ان نظرة فهد من شوي تغنيني عن الف كلمة وكملت تغيير ملابسها ,, وعزمت انها ما تعطي فهد فرصه ابد لين تطمن انه ثقه بقلبها المجروح ,,,
((الجزء الثاني والثلاثين ))



في استعدادات غير طبيعيه كنها بتهاجر قامت هيفاء بتسكير اخر الشنط اللي بتاخذها معهم ,, ما تركت شي ما خذته من ملابس وعطور وبخور وعباياتها ,, الى الأواني اللي عارفه ما راح تحصلها بسهولة الى اغراض القهوة وما تحتاجه ,, الى بهارتهم المفضلة ,,
فهد لما شاف شنطهم ,, ضحك عليها من قلب ,,
فهد : ترى ما يحتاج هذا كله ترى بتشوفين بيقعد في الشنط ,,
هيفاء : اهم شي مانحتاج ونروح ندور !!!!
ام طلال ما قدرت تقنع فهد بالحالهم انه ياخذ هيفاء بروحهم ويسافرون
فهد : كنك ما تعرفينها يمه ما راح توافق ,, راااسها يابس ,, زين خليتك عذر ,,,
ام طلال : والله بروح عشانك والا السفر مالي فيه ,,,
لمياء وريما يحاولون يساعدون هيفاء باللمسات الاخيره ويتأكدون انها ما نست شي ,,, خذت لها كتاب يمكن تتملل في الطايره وتقراه
استعدت ام طلال ولبست ملابسها وعبايتها وعطت شنطتها اليد للشغاله اللي بتسافر معهم عشان تمسكها وطلعت للطيفه في المجلس ,,
ام طلال : ما اوصيك على لمياء يا لطيفه ,, ادري انها بنتك بس الحرص زين لا تخلينها تشيل شي ,,
لطيفه : ابشري ان شالله,,
ام طلال : ولو تمرين من وقت لوقت على ام وليد توسعين صدرك عندها ترى بتنبسطين ,,
لطيفه : لا تحاتيني ,, انا طيبه دامني قربكم مالي شر ,,
ريما كانت محبطه ,, ما تبي تفارق جدتها وهيفاء ,, تحس بوجودهم انه معطي حياتهم شكل حلووو ولمه عائليه ما تتكرر ,, الله يسامحك يا فهد يعني ما تقدر تصبر زي الشهور اللي راحت ,,,

سعود الجندي المجهول ,, يقوم بجميع ترتيبات السفر لابوه واخوانه بالعاده ويقوم بأشغالهم الخاصه اللي ودهم يعتمدون عليه هو بالذات ,,
رتب الحجوزات ,, وجهز كل شي وارسله للمطار وما بقى الا يطلع مع جدته وهيفاء وفهد
طلال وسلطانه قاعدين يلفهم الوقار في انتظار فهد ينزل ,,, وهيفاء باقي في غرفتها ترتب شنطة اليد وتحوس فيها خايفه انها نست شي
ليش السفر يخلي الانسان على اعصابه لحد ما يوصل ,,
لبست بنطلون جينز ومعاه توب سماوي بكروشيه في الصدر لحد الخصر ومشدود على الجسم ,,, خذت عبايتها وطرحتها ,, ولمت شعرها كله على ورى واحكمت ربطته عشان ما يزعجها بالطايره ,,,
نزلت تحت وشافت عمها وخالتها ينتظرونها ,, ولمياء وريما كن على رؤسهم الطير عشانها بتسافر ,,,
ضمت امها لطيفه بقوه ,همست لها بشي ,, ممكن انها توصيها على اغراضها الخاصه ,,
سلمت على عمها طلال وخالتها سلطانه اللي دعوا لها من قلب عشان اهتمامها بام طلال ,,
خديجه واقفه عند المدخل ودموعها تنزل عشانها بتفارق ام طلال فتره طويله ,, بالعاده اسبوع اسبوعين لكن من عرفتها ما قدر فارقتها شهور ,, الله يحفظك يأم طلال ويردك بالسلامه ,,,

بعد فتره بسيطه من تجمعهم نزل فهد وهو لابس بنطلون جينز ومعاه توب قطن ابيض برسومات كاكي ومعاه جاكيت جلد بني قاتم في يده
ريما وهي متحطمه من سفرهم ما قاومت انها تصفر له ,, نظر لها ابوها بنظره رجتها شوي عشان الحركه هاذي ,, بس والله ما اقصد طلعت طبيعي
سلم فهد على ابوه وامه وباس راس لطيفه وسألها اذا قاصر عليها شي ما عليها الا تقول لفيصل
ريما سوتها حفلة بكاء وقعدت تصيح اول ما ظهروا وطلعوا بالسياره ,,, وترجتهم انهم ما يتأخرون بقدر الامكان ,,,
هيفاء مو حاسه الا بغربه جديده صحيح فرحانه ان جدتها معها وراح تكون بينها وبين فهد طول الوقت ,, بس هاذي اول مره تسافر فيها

طلعوا للمطار وفهد ملتزم الصمت ,, اكثر الوقت ,, كأن، فيه شي شاغله ,, كان ودها هيفاء تدخل مخه في ذيك اللحظه وتعرف وش فيه صاااخ مرره وحده ,,
كانت لافه طرحتها على وجهها ,, وعزمت في نفسها انها اذا جت لندن ما تغير لبسها ابدا ,, وما عليها من فهد ,, هو ما قالها وش تلبس ,, بس من كلام ريما انهم اذا راحوا اوربا الدعوى فري وكلن يأخذ راحته ,,,
ام طلال تقرأ اذكارها ومستمعه لصوت الراديو واخر اخبار العالم ,,, بعد فتهر من الانتظار طلعوا للطايره ,,,
وكان فهد حاجز اربع كراسي اثنين اثنين ,, فطلب من الشغاله تجلس جنب ام طلال ,, وقال حق هيفاء تقعد جنبه عند النافذه ,,,
هيفاء اعترضت ,,
هيفاء : انا ابي اقعد جنب جدتي عشان اساعدها مو حلوو تقعد بروحها ,,,,
فهد : اقعدي في مكانك ,,, ولف وجهه منها ما يبي يكمل معها ,,,
اول ما استعدت الطايره للاقلاع ,,ومشت بسرعتها المعتاده مسكت هيفاء يديها في حضنها وقعدت تقرأ شوي ,, فهد يراقبها ,, وعارف مشاعرها وانها اول تجربه لها في السفر ,, فمسك على يديها وضغط عليها ,, هيفاء سحبت يدها منه وحطتها على الجنب ,, ضيق عليها في رده اول ما طلعوا الطياره ويسوي فيها حنين الحين ,,,
فهد صار يقرا افكار هيفاء
فهد : عادي عندك اقعد جنب الشغاله
هيفاء : بكيفك مو انت اللي حجزت تقدر ترتب ,,
فهد : افهم من كلامك ما تبين تقعدين جنبي ,,,
صدت هيفاء للنافذه وقعدت تشوف المناظر من فوق ,,,
فهد : انتي متعوده في اسلوبك مع الناس انك ما تردين عليهم ,,
هيفاء : مو كل الناس ,, ناس وناس ,,
فهد : افهم من كلامك اني مو مرغوب ,, وهو يستفزها يبي يحدها على اقصى ما عندها ,, هيفاء بدى ضغطها يرتفع من فهد

وشافت ان ما لها الا الألتزام بالصمت عشان تعدي الرحلة على خير ,,,,
كل ما جت المضيفه تبي تضيفهم ترفض هيفاء كل شي يتقدم لها ,, تحس ان عيون فهد تبحلق فيها ,,, فآثرت انها تتسلى بكتابها يمكن يقضي الوقت عليها ,,,,
عكس فهد اللي استمتع بكل الضيافه ويحاول انه يكون عادي قدامها ,,, حسدته هيفاء على الثقه المفرطه اللي يشوفها في نفسه ,, شكلي ما هميته ,, يمكن يبي اسولف معه عادي عشان كذا مسوي فيها فري ويأكل ,ويضحك ,, اكيد بيقول وش فيها ما تبي الاكل ,,
كل شوي عينها على جدتها يمكن تحتاج شي تناولها والا تسوي لها ,,,

فهد بعدكم ساعه حاول يجيب له سالفه معها يمكن تسولف والا تغير جووو عن سكوتها ,,,
فهد : كيف بتلبسين هناك اذا رحنا للمدينه
هيفاء : وش بلبس قصدك ,, ترى عبايتي ما راح ااتركها لو على جثتي ان شالله ارجع للرياض على اول طياره ,,
فهد وهو يضحك : لا وش يردك على اول طياره وانا ما صدقت انك تركبين اول طياره للندن هالاسبوع ,,, البسي اللي يريحك ,,,
بعد ما نزلت الطايرة في مطار هيثرو ,,, وطلعوا من ارض المطار كان فهد مستأجر سيارات تشيل عفشهم ,,, وغير سيارته الكوبيه بسياره للعايله بي ام فورويل ,,,
ركبت ام طلال معاه وهيفاء ورى مع الشغاله وابتدت السياره تقطع طرق خياليه ما قد شافت مثل جمالها الريفي ,,,,,
تعبت هيفاء من الطريق وقعدت تعد الدقايق عشان يوصلون وهي تستمع لفهد وهو يشرح لجدته الطريق ووين يودي والمناطق اللي يمرون بها ,,, ما كانت مستمتعه مررره بالسوالف ,, لان تعب الايام اللي راحت ظهر لها اليوم ,, بس الله يستر لا انام واتركهم لحالهم ,,,


فيصل وهو يحاول يضحك لمياء اللي حزنت فعلا بعد سفر هيفاء وجدتها ,,
فيصل : معقوله تحزنين وانا جنبك ,,
لمياء : كان ودي هيفاء تكون جنبي اذا ولدت كلها اربع شهور ,,
فيصل : لا تخافين ما راح تحتاجين لهيفاء او غيرها ,, انتي بس سمعيني ضحكتك اللي تدوخني خليني اغير جوووو ,,,
ما قدرت لمياء تطلع من حزنها الا بعد فتره وفيصل يسمعها كلام حلووو ويشجعها عشان تصير قويه قدام الظروف ,,

في مساء ذلك اليوم وريما قاعده في غرفتها تشوف التلفزيون ,, سمعت نغمة الجوال ,, اول ما شافت المسج ,,
انحرجت مررره منه نواف ارسل لها كلمه خجلت حتى انها تشوفها ثاني مسحتها على طول ,,,
ارسل لها ثاني :: ممكن اكلمك ,, ما ردت عليه ,, ثم ارسل لها ثالث : ترى عندي اذن من فهد ,, حزنها وهي مشتاقه اصلا تسمع صوته
فدقت عليه واول ما شاف رقمها
نواف : هلا وغلا بعيوني :: وهمس لها بأنه مشتااااق مره
ريما : تحاول تغير الموضوع : ما قال لي فهد انه مسموح اكلمك
نواف وهو يضحك : اجل غصب عن فهد بكلمك ترى انتي زوجتي ,,
ريما وهي تحاول تجاريه : صح بس اذا صار رسمي ,,
نواف : صار رسمي من ذاك اليوم ولو تبيني اجيك الحين ببجيك ,, صرخت ريما عفوي
ريما : من جدك نواف وشفيك عسى ما شر ,,,
نواف : لا مو صاير شي ,, يالله فمان الله ,,, سكر منها نواف وهو مقهور من دلع ريما وتمنعها ,, كان وده انها تبادله مشاعره واشواقه لما كلمها لكنها صدمته بطريقتها وانها يعني ما تبي تطيح عليه مره وحده ومسويه ثقل ,,,,
ريما حزنت من نواف بعد ما سكر ,, هي عارفه وش يبي والمفروض على الاقل انها سولفت معه شوي عن حالهم مو تدخل العايله في كل سالفه ,, لكنها من الاحراج بعد وش تسوي ,,,,

اول ما وصل فهد البيت ,,, نزل من السياره وفتح الباب لجدته ونزلت هيفاء وهي تحاول تتمغط شوي حست ظهرها بيتكسر من الطايره لحد هنا وهي في قعده وحده ,,,
دخلوا البيت وفهد يسمي ,, اول ما دخلت هيفاء وشافت بس مدخله انبسطت عليه رووووعه ,,
كان مدخل صغير يا دوووب فيه مرايه على اليمين وعندها شجر ظل روووعه طبيعي وتدخل على صاله حلوووه بالوانها البنية المتدرجه ,, واثاثها الرااقي ,,, كان فيه غرفة مكتب صغيره على اليمن ثم ممر طويل يودي على غرفه ماستر ,,, وعلى اليسار مدخل يودي على المطبخ وباب جانبي للحديقه وفيه درج يودي للطابق اللي فوق ,,
فهد خذ جدته على مكانها تحت في الماستر روووم وقال للشغاله تجهز المكان وتجيب شنط ام طلال ,, هيفاء كانت واقفه في وسط الصاله تتأمل الحديقه الجو ربيعي وخياااال مره ,,, والصالة تشعرك انك في مكان حميم جدا ,,, حست بقشعريره في جسمها اول ما جاء فهد جنبها ,, قال ما ودك تشوفين باقي البيت ,,
هيفاء : يالله ,,,
فهد يطلع للطابق اللي فوق كان فيه غرفتين مع ملاحقها ,, بس غرفه اكبر والثانيه اصغر منها ,,,
فهد فتح الغرفه ,,, وشافت اغراض فهد فصدت تبي تشوف الغرفه الثانيه
لقت غرفه اصغر في سرير وسط ,, وشافت ان فهد مستخدمها لشنطه واشياءه اللي ما يستخدمها وشافت الدرج يكمل لفوق
هيفاء : وين يودي الدرج ,
فهد : للغرفة العلويه صغيره مو ذاك الزود مع حمامها ,,
هيفاء : ممكن اشوفها :
فهد يرفع لها حاجبه : بكل تأكيد طلعت وراه ودخلت الغرفة اللي سقفها مايل وفيها سرير صغير على جنب ,,, مع مكتب صغير جدا عندد رجل السرير لكن اللي حلا الغرفه على صغرها الشديد نافذتها الكبيره اللي في وسطها وتاركه للضوء مساحه انه يدخل للمكان بكثافه ,,,
هيفاء : بقعد هنا ,,,
فهد : ليش الغرفه اللي تحت احسن لك اذا كان مقصدك تبين بالحالك ,, كبيره وبتشيل اغراضك ,,
هيفاء : لا بس هاذي عاجبتني اذا ما عندك مانع ,,
فهد : براحتك وطلع منها وما وده يقول لها شي اكثر من كذا ,, عرض عليها وهي رفضت ,, اجل تسوي اللي تبيه ,,,
هيفاء عااارفه انها رفعت ضغط فهد ,, بس هو قرر انها تجي معه هنا خلاص يستحملها ويستحمل نكدها ,,,
فهد نزل ودخل غرفته وسكر بابه عليه وارتاح على السرير شوي ,, وفكر في وضعه مع هيفاء ,, مرااات كثيره وده يعطيها فرصه انها تأخذ وقت معه ومع نفسها وترجع له برغبتها ,,, ومراااات اكثر وده يكسر عنادها ذا ويتحكم فيها مثل كل زوج يفرض نفسه على زوجته ,,, ما عرفت وشلون اتعامل معك يا هيفاء ,, ترى مصختيها بزيااااده ,, مو اول وحده تتطلق ,,, استغرب فهد من نفسه يمكن لأنه محتاج لها وهي ما عطته حنان خلاه يعصب زياااده على هيفاء ,,,
هيفاء على طول نزلت وقالت للشغاله تساعدها يرتبون اغراض المطبخ ويصففون كل شي في مكانه عشان يسوون لهم قهوة وشاي على الاقل تعدل مزاجهم ,,,,
ابتدت هيفاء الشغل بجد والشغاله تساعدها وفي غضون ساعتين كان المطبخ ينبئ ان فيه ست بيت ممتازه كانت فيه ,, حطت المبخره على الطاولة وشالت الشغاله صينية القهوة للصاله ,,, ام طلال نامت تريح شوي لحد وقت العشاء ,,
اما هيفاء فطلعت لغرفتها ترتب شنطها في الدولاب الصغير وتترك اللي ما تحتاجه في الشنطه خذ كل شي منها وقت مو بسيط بس حاولت تكون منظمه ,,, طلعت ملابسها وميكاجها على الطاولة ومجفف الشعر ,,
دخلت تاخذ شاور وتريح اعصابها وظهرها من الوقفه ,,, ثم طلعت وهي تحس بنشاط عجيب ,,,,
لبست بنطلون جينز روووعه تحب تلبسه ,, معاه قميص حرير للخصر بلون البرونز المورد ,,, ومربوط من الخصر بشريط حرير ,,,وتركت شعرها بعد تجفيفه بالهواء يكون طبيعي ,, بس رتبت غرتها اكثر وصففتها بدقه ,,, حبت تحط مكياج دخاني بتدرجات البني الفاتح وما تكثر منه بس عشان يعطي عيونها شكل مميز ,,,
اول ما خلصت طلعت صندلها الخشب ,, وتعطرت بكثره وعطرت غرفتها وحست النظافه في المكان كله ,,, نزلت وهي تمر من طابق فهد حاولت ما تلتفت للغرفه المفتوحه وتكمل مشيها تحت ,,,لكن الفضول دفعها انها تشوف وش تحتاج الغرفه من ترتيب بتحاول تقوم به بكره وفهد في الجامعه ,,, شكل فهد يمكن يأخذ شاور ,, وممكن ما يكون حتى جوووه
نزلت للدور الارضي وهي تمشي بهدوء ,,, دخلت للصالة وكان تليفون البيت يرن ,, شالته وهي مو عارفه ليش تشيله بس رنينه ازعجها ,,