 |
|
|
|
|
|
#1
11-07-2016
|
||||||||||||||||||||||||||||||||
|
||||||||||||||||||||||||||||||||
تركي : السلام عليكم هلا سعوووود
سعود : عليكم السلاااااااام هلا بتركي وغلا شلونك تركي : بخير الحمدلله .. أخبارك انت شمسوي ؟ سعود :ماشي حالنا الحمدلله .. أجل بتاخذ اختي وتطير فيها ! تركي : شفت شلون ياخي عجزت أتهنى فيها بين الناس قلت اخذها انفرد فيها هناك بدون محد ينغض علينا سعود : ههههههههه ماشاء الله عليك عاد شوي شوي عليها ترا ماتتحمل خدش تركي : آآآه لا تقولي ياسعود .. وانا شمعذبني غير هالنعومة .. استحت عبير وضربته على رجله عن لايحرجها مع أخوها مد تركي ايدي وأشرلها تستنى كنه يتوعدها وقال : زين حبيبي توصي على شي ..؟ سعود : سلامي للجميع .. تركي : يوصل ان شاء الله .. يالله نشوفك على خير سعود : الله يحفظكم .. مع السلامة تركي : مع السلامة .. سكر تركي الجوال وحطه جمبه وعبير فزت من مكانها وابتعدت خافت تركي يسويلها شي .. كتم تركي ضحكته وقال : الحين احكي سعود شكثر متولع فيك تروحين تضربيني ؟؟ عبير : ايه ليه تحرجني عنده ! تركي : وين الاحراج بالله .. واحد يحب زوجته ويموت فيها ويبي الناس كلها تدري بهالشي ليه الاحراج ! عبير ولع وجهها وقالت : يكفي انا أدري .. تركي : لا انا من كثر الي فيني ودي كل ماكلم أحد أطلع الي فيني لا أنفجر .. عبير بنعومة : ههههههههههههههههههههههههه ياعمري .. تركي : وتضحكين بعد هذا بدل ماتراضيني تراني زعلان .. مشت عبير وقعدت جمبه واهي تضحك .. تركي طالعها ينتظرها تسوي شي مالقى عندها غير الضحك ! تركي : هذا الي عندك ؟؟ عبير : ههههههههههههههههههههه راضيتك وقعدت جمبك شتبي أكثر ! تركي : ماأستاهل شي ثاني ! عبير : تستاهل عيوني وروحي انت (( وقربت منه وباسته وهمست : لاتقول ولا شي لأنهم ينتظرونا برا من اول .. تركي اتخدر : خفي على عبورة آه قلبي مايتحمل .. وقفت عبير واهي ماسكة ايده وقالت : توك تقول لسعود بفرنسا محد منغض عليك خلاص الحين قوم لاتفشلنا وقف تركي واهو يقول بتنهيدة : الوعد بفرنسا .. ضحكت عبير بحيا ومشوا للباب وقبل مايطلعون لمها تركي بحركة خاطفة وباسها .. وتركها وجا يبي يطلع .. عبير : لحظة تركي .. التفت تركي باستفهام .. عبير بضحكة : مسح فمك يافضيحة .. (( وعطته مناديل أخذ تركي المناديل ومسح فمه وشاف آثار الروج عليه ..! ضحك ومسحه زين ومسك ايدها وطلعوا .. أول ماقربوا من الصالة سمعوا خناق .. وائل : شفتي لو تطيرين تبوسين السماء وترجعين مانتي ماخذتها .. نهى : باخذها غصب عنك وعن طوايفك وورني شلون بتمنعني وائل : والله لاأبكسك وأنتفك ولا أبقي فيك عرق ينبض نهى : مسكييييين فالح بالكلام انت بس ماتقدر تلمسني قرب وائل منها ودفها وعلى طول ركض خايف واهو يقول : عشان لا تتحديني.. نهى : ياحماااااااار يااااااااااااااااادوووووووووب .. (( وركضت وراه طلع عليهم تركي واهو عاقد حواجبه و وائل الي مانتبهله صدم فيه !! مسكه تركي من بلوزته وشده بقوة ووقفه واهو يقول بعصبية : فتح عيونك مره ثانية .. رجع وائل على ورا وكل عنفوانه الي قبل شوي اتلااااااشى .. تركي بعصبية : وش هالتصاريخ انت وياها والألفاظ الخايسة الي مثل وجيهكم ! .. محد رد .. وعبير راحت المطبخ عشان ماتحرجهم .. تركي : ماتردين انتي يالكبيرة العاقلة .. نهى : والله هو الي طول لسانه علي ومد إيده بعد .. وائل : هي الي رفعت ضغطي وعاندتني تركي : وعلى ايش ابي افهم ؟؟ وش الي تاخذينها وماتاخذينها .. نهى بحرج : غرفتك ! تركي باستغراب : غرفتي ؟؟؟؟ نهى: ايه .. انت من طلعت وأنا أبيها عاجبني مكانها جمب الدرج .. ووائل من سمعني اتكلم عنها نط زي الملقوف الا والا يبيها .. وائل : ياتركي هذه غرفة الأولاد .. انت رحت خلاص أنا الي بعدك آخذها تركي عقد ذراعينه على صدره وقال : وانتوا على كيفكم تقررون وتتناقرون .. وانا صاحب الغرفة ماتسألوني وتستأذنوني .. ماكن باقي من أغراضي وملابسي فيها ولو بغيتها تقعد لي بخليها بعد .. طالع بنهى وقال : وانتي بزر ماتكبرين تتهاوشين معه عشان الغرفة كن الراي رايه مو رايي انا ولا ابوي ! وطالع بوائل بنظرة حرقته واهو يقول : وانت يقالك ولي العهد من بعدي .. هذا وانا بسافر اليوم واقول خواتي بظل اخوهم الثاني يخاف عليهم ويداريهم وصلت فيك تمد ايدك على اختك! نزل وائل عيونه بالأرض من الاحراااج .. وتركي اتعمد يقوله هالكلام يبي ينفخه .. مشى تركي عنده وقرب منه وقال بصوت مايسمعه غيره : ياوائل بكرا اذا نفروا منك خواتك بتعيش لحالك مالك أحد .. اذا كرهتهم فيك من صغرك ماعاد يبونك اذا كبرت .. رح يالله لاختك واعتذر منها ترا مهما صار اهي أكبر منك .. وتركه عشان مايحرجه وراح للمطبخ لقى عبير واقفة تسوي كوفي عبير اول مادخل تركي توترت لأنه معصب .. مشى تركي من جمبها يبي يروح للثلاجة وقرب منها وهمس عند اذنها : احبك .. (( وكمل طريقه للثلاجة واهي ماتت عليه وطالعته واهو يفتح الثلاجة ويطلع عصير وملامحه جدية خلتها تضحك من تناقضاته .. ابتسم لها تركي واهو يدري شالي يضحكها .. اهو اتعمد يسوي معها هالحركة عشان لايوترها بسبب الخناقات اللا منتهية بهالبيت .. ! قعد على الكرسي ومعاه العصير واهي اخذت كاس الكوفي وقعدت جمبه .. تركي : حاولي تسكرين الشنط الحين عشان ناخذها مره وحده معنا ونمر نسلم على أهلك ومن هناك على المطار عبير : امممم حلووو .. خلاص باخذ الكوفي معاي واخلص منهم الحين .. تركي : يالله وانا شوي وألحقك .. ابتسمت عبير وأخذت كاسها وطلعت .. وتركي أخذ كاس عصيره وطلع للصالة يبي يشوف وش صار على اخوانه لقى نهى ووائل قاعدين يتفرجون على فلم ويعلقون على الأبطال ويضحكون ولاكن شي صار بينهم .. ابتسم تركي والله هذا أحلى شي فيهم .. قال بهدوء : نهى وين ابوي ؟؟ التفتت نهى وقالت متناسية الي صار : راح اهو ومنال عند خوالي ! تركي : جد ؟ ياحليلهم .. ونوالوه وينهي ؟؟ نهى واهي تحوس فمها : نايمة .. تركي : زين انا وعبير بنطلع بعد شوي نمر على ابوي نسلم عليه بعدين بيت عمي وبعدها على المطار وائل : ياحظكووووووم .. نهى : اقول لا تحسدهم بس من دريت وانت حاط عينك على هالسفرة وائل : ليه شقالولك عيوني حارة مثل عيووونك ..! نهى : بسم الله على عيوني من عيونك .. وائل : والله ان أحر منها مافي كل مادخلتي غرفتي وعجبك شي تتطلعين من هنا ينكسر من هنا ! نهى : يانصاااااااااااب انا ولا انت الي ....... ورجعوا للخنااااق من جديد .. وتركي هز راسه وسحب نفسه من عندهم .. يدري اذا طلع يسلم عليهم بعد شوي يلقاهم يضحكون .. وبعد ساعة طلع اهو وعبير وسلم عليهم وودعهم .. ولقى نوال صحت سلم عليها ومافاته تكشيرها ونظرات الغيرة بعيونها .. بس طنشها واهو الي اتعود على هيأتها هذي .. طلعوا ومروا على خوالهم .. وسلم عليهم وعلى أبوه ومنال .. ومن هناك على بيت عمه سعد .. على طاولة العشا .. كانت أم سعود وأبو سعود وخالد وتركي وعبير يتعشون وسوالفهم مابين ضحك وتعليقات وكلهم مافاتهم مرح خالد الي فقدوه من فترة .. أسعدهم هالشي وماعلقوا وتركوه على طبيعته .. بعد العشا قعدت عبير مع أمها بغرفتها وتركي قعد مع خالد بالصالة تركي : خالد كيف أحوالك مع مرام ؟؟ خالد ابتسم من جا طاريها وقال : شالي خلاك تسأل ؟؟ تركي : ابد باتطمن عليك وملاحظ ان كن نفسيتك أحسن خالد : والله ياتركي مهو بالشكل الي تتصوره بس تقدر تقول احسن 50% تركي : حلووو .. شصار كلمتها ! خالد : لا .. رحتلها البيت على غفلة ! تركي : جد ؟؟ شلون ومتى ..؟ حكاه خالد كل شي صار بينهم .. وكيف كانت منهارة وكيف رضت بالآخر عليه وقال : بس لازلت أحس الحاجز بيننا مانزاح .. ودي ترجعلي مرام الي قبل ودي أمحي الي صار من بالها بأي طريقة تركي : قالتلك اهي اثبتلي العكس بتصرفاتك .. وانت أول شي تسويه غير رقمك وادري انها المره العاشرة بس عاد لازم تتحمل نتيجة غلطاتك .. خالد : ياشيخ أغيره وأغير اسمي ان بغت بعد بس أهم شي ترضى وترجعلي مثل قبل .. تركي : لاتخاف مرام تحبك وتموت فيك ولا ماكان رضت عليك بهالسهولة .. خالد : آخ ان كان اهي تحبني انا شقووول .. تركي : لاتقول .. اتصرف وحسن صورتك وماتخفى عليك انت ماشاء الله الأساليب خالد : هههههه وانا مادمرني غير هالاساليب .. تركي : هههههه الله يصلح احوالكم يارب عند عبير وأمها .. ام سعود : تصدقين فتون ماكلمتني ! عبير : غريبة عاد انا كلمتني بنفس اليوم الي وصلت .. ام سعود : عليها حركات هالبنت عجيييييبة عبير : امشي ندق عليها الحين انا بعد بسلم عليها قبل ماسافر ام سعود : يالله دقي دقت عبير على جوال فيصل .. لأن فتون ما اخذت جوالها على اساس تطلع شريحة من هناك .. شبك الخط وبعد كم رنة جاها الرد بصوت فتوون : عبييييييييير ؟؟؟؟ عبير : هلا فتوووووووون فتون : هلا وغلا عبير شلووونك ؟ عبير : بخير الحمدلله انتي شلوونك ؟ فتون : تمام والله انك ببالي واقول عسى ماسافرت الحين بدون ماكلمها عبير : هذاي بسافر بعد كم ساعه والحين انا عند أهلي اسلم عليهم فتون : عند اهلي اااااااه ياحظك .. عبير : اسكتي بس امي زعلانة تقول لاكلمتيها ولاشي فتون بحمق همست : ماعندي جوال ياعبير ولا ابي اطلب من فيصل شي وانتظرت اهو يعرض علي مره ثانية ماعرض شسوي بالله ! عبير ماعرفت ترد عليها قدام امها وقالت : انا اكلمك بعدين الحين خذي امي .. وعطت امها الجوال ام سعود : السلاااام عليكوووم .. فتون : عليكم السلام ماااااااااااااااامي حبيبتي ام سعود خانقتها العبرة : ياروح امك انتي شلووونك وش اخبارك ؟؟ فتون : بخير الحمدلله انتي شلونك يمه وشلون ابوي ؟؟ ام سعود : طيبين الحمدلله انتي كيف امورك استقريتوا ولا مابعد ؟ فتون : تونا بفندق وبعد يومين بنروح الشقة الله يعين بس .. ام سعود : انتبهي على نفسك حبيبتي .. فتون : ان شاء الله .. خلاص انا بطلع شريحة قريب واعطيك رقمها ام سعود : ان شاء الله .. يالله ياعمري سلميلي على فيصل فتون وماودها تسكر : يوصل .. مع السلامة ام سعود : مع السلامة حبيبتي سكرت فتون وضاق صدرها بعد ماسمعت صوت امها .. وقفت ومشت تبي ترجع الجوال الا طلع فيصل من الحمام .. فتون ومن قبل مايتكلم : اختي عبير اهي الي دقت وشفت رقمها ورديت .. فيصل يستهبل عليها : برضو ماتمسكين جوالي ولاتردين عليه .. فتون أخذتها جد وقالت : اوكي جيبلي شريحة وفكني من جوالك .. فيصل : بعدين.. الحين ماعندي فلوس .. فيصل كان يقصد ماعنده دولارات .. بس فتون فهمت انه مايملك اي فلوس من الاساس وقالت : ياسلام ماعندك فلوس وجايبني هنا ليش ؟؟ عشان تعيشني على الحديدة ؟؟ طالعها فيصل بصرامة ومارد فتون ومو مهتمة بنظراته : خلاص جبلي شريح من فلوسي فيصل بعصبية : فلوسك خليها لك ولاتجيبين سيرتها عندي فاهمة ولا لاء ! فتون : وش تبيني اسوي اذا انت ماعندك فلوس طيب ! فيصل بحمق : شغلي مخك وافهمي .. انا ماعندي دولارات .. خلال هاليومين بروح احول فلوسي .. ويصير عندي اجيبلك الي تبين فهمتي ولا افهمك زيادة؟؟ فتون واهي رافعة حاجب : انت خلي كلامك واضح من البداية فيصل واهو يمشي للباب : والله انتي الي مادري كيف فهمتيها .. ولا انا فيصل مايكون عندي فلوس شلون تركب هذه؟ فتون بسخرية : كل شي يركب عليك لا تخاف ! فيصل يبي ينهي الموضوع لايغلط عليها وقال : بانزل اطلب عشا شتبين؟ فتون : ماااابي منك ولا شي .. فيصل : أحسن وفرتي .. وطلع وخبط الباب وتنهد بضييييييق .. لسانك يبيله قص يافتون وشكله اللين مايفيد معك ! نزل وطلب ساندوتشات وحسب حسابها فيهم .. يمكن تشتهي وتاكل واهي الي من وصلوا ما أكلت ولا شي وحتى بالطيارة ما أكلت شي .. بعد نص ساعه رجع لقاها متمدده على الكنب .. لابسة بنطلون جينز ماسك وبلوزة عودي ماسكة بأزارير من قدام مبينة مفاتن جسمها بطريقة تجنن .. وشعرها الناعم منسدل على كتوفها ومرجعته ورا آذانها .. كانت ماسكة الريموت تقلب ولا التفتت لفيصل ولا عبرته .. وفيصل حاول يبعد النظر عنها لأنه مو متحمل .. وانقهر انها مو معبرته ولا تحسب حساب حركاتها الي تولد بقلبه الجنون بكل أنواعه ! مشى وعيونه على التلفزيون ويقول : ابعدي لو سمحتي شوي .. حط الأكل على الطاوله واهي قامت وتركت المكان كله وقعدت على الكنب الثانية .. اتضايق بخاطره من نفورها لدرجة ماتبي ولا تقعد جمبه بس مثل ماهي ماتهتم أظهر هو اللامبالاة بعد .. سم بالله وبدا ياكل وفتون عيونها على التلفزيون .. بدت ريحة الأكل تنشر عبيرها الفواح بالمكان وتخلي الشبعان يشتهي .. مو فتون الي من كم يوم ما أكلت شي يسد جوعها .. قرص الجوع بطنها واتمنت تلتهم كل الي مع فيصل واهي تكابد أصوات بطنها الي تقرقع من الجوع .. وكل الي سوته دخلت ايدها بجيبها وطلعت لبانه من النوع الي تحبه وفتحتها وصارت تعلكها وتطقطق فيها ماكن هامها شي .. فيصل كان مراقب حركاتها واتعجب من مقاومتها العجيبة للجوع .. بس يدري انها عنيدة وانه لو عرض عليها تاكل ماراح تاكل فليش يضايق نفسه بردودها .. خلص وحمد ربه ووقف وقال : فتون باقي الأكل أكبه ولا تبين منه شي بعدين ؟ فتون بخاطرها .. أبيه الحييييييين هاته تراني ميتة من الجوووع .. قالت : انا مابي تبي ترفعه لك انت براحتك.. انقهر فيصل منها وقال : أنا شبعت ومو ماكل منه مره ثانية .. تبينه انتي حطيته بالثلاجة ماتبينه بكبه ! صراع بين العناد والرضوخ .. جوعانة وتبي تاكل وبنفس الوقت ماتبي تحسسه بضعفها .. وياقوتها يوم انتصر عنادها وقالت : لاشكرا مابي.. ولع فيصل منها واهو يدري انها جوعانة وتبيه .. مشى واهو يقول : عنيدة ! ابتسمت فتون بسخرية .. وكملت علك واهي تتفرج .. دخل فيصل المطبخ وفتح الزبالة وجا يبي يكب الأكل .. بس آآخ قلبه ماطاوعه .. يمكن تشتهي بعد شوي وتاكل .. بنت اللذين لها كم يوم ما أكلت تبي تتعب عمرها هذي ! فتح الثلاجة وحط الأكل فيه وصكها وكانت حركاته واضحه حيث ان المطبخ مفتوح على الصالة .. مشى وقال : طيب متى ناوية تقومين ابي انام فتون : وش اقوم اسوي مافيني نوم ولاعندي شي اسويه ابتفرج ! فيصل : اجل انا بادخل انام بالغرفة ومتى ماخلصتي قوميني .. ومشى بدون ماينتظر ردها انقهرت فتون منه .. غرفتي ياحمار شتبي تنام فيها .. ! الحين وش اسوي بالله ! ادخل اقومه اقوله اطلع برا يالله بنام !! اووووووف شهالورطة !! والله شكلي انا بنام بالصالة اليوم ! طنشته وكملت متابعتها للبرنامج .. بصراحة اهي متونسة حيل على التلفزيون وقنواته ومسليها وممضي عليها وقتها .. بعد ساعه ماتحملت الجوع أكثر .. راحت المطبخ وجت تبي تفتح الثلاجة بعدها ترددت .. ماتبيه يقوم فجأة ويلقاها تاكل .. اتذكرت الشبسات الي قالها عنهم وراحت تدورهم بالدواليب لين لقت كيس كبيــر بطاطس خل بالملح .. أخذته ورجعت للتلفزيون .. وفتحته بسرعه وصارت تلتهم منه بشراهة .. كان الكيس كبيـــر واهي تاكل منه بلا شعور .. مر وقت واهي ماغير تاكل منه ولسانها وفمها احرقوها من الخل بس الجوع كافر ! بعد ساعه انفتح باب الغرفة وطلع فيصل متوجه للحمام .. لمح بإيدها الكيس وابتسم بسخرية ومشى عنها للحمام بدون ولا كلمة .. ضحكت على شكله .. هذا شمصحيه الحين ..؟؟ أشو اني ماكليت الي جابه عشان لاينتصر ويضحك علي .. كملت أكل من البطاطس لين طلع فيصل راجع للغرفة .. التفت التفاتة سريعة ناحيتها وانصدم !! فيصل : يابنت ارحمي نفسك من البطاطس طالعي شلون شفايفك بيض كنها مدهونة بطباشير ! فتون فركت شفايفها باصابعها وطالعت اصابعها مالقت لون ! طالعته باستغراب وقتلته نظرتها البريئة وضحك : ههههههههههههههههههههههههههههه الحين شفايفك الي بيض تتوقعين اذا مسحتيها بيروح البياض بايدك ؟؟ تفشلت فتون من حركتها وماقدرت تقاوم الضحك .. ضحكت بحرج واهي تميل راسها على اليمين وعيونها على التلفزيون .. فيصل بهدوء : يكفي فتون بجد .. اذا انتي جوعانة لاتكابرين .. طلعي الأكل من الثلاجة وسخنيه وكليه .. فتون : لاخلاص شبعت .. فيصل وهو يقعد مقابلها : يعني كنتي جوعانة ! فتون : تقدر تقول اني كنت ميتة من الجوع .. مو بس جوعانة فيصل : وممكن أفهم ليه تسوين بنفسك كذا ؟ فتون ماردت ومسكت شريحة بطاطس صارت تقرقط أطرافها .. << شبعانة وتلعب.. اتنهد فيصل وراح للمطبخ يبي يشرب موية .. فتون نزل عليها روقان مفاجئ وصارت تغني وتدندن .. سمعها فيصل بس ماميز كلمات الأغنية .. وابتسم واهو يرجع الصالة بكاس الموية ويقول : شهالروقان على آخر الليل ! فتون : هاه شتبيني اسوي أعصب وأزعق ! فيصل : لا تكفين رووقي .. فتون : هذاني رايقة بس لا تحارشني عشان لا اعصب ! فيصل يشرب الموية ببرود ويقول : لا مو محارشك بالعكس ابي استغل روقانك واسمعك تغنين ! فتون طالعته بصدمة : نعــــم ! فيصل : شفيك ؟؟ عادي غني زي تو وانا باسمع .. فتون : شتبيني اغني .. اهي اغنية طرت ببالي وغنيتها وبس .. فيصل : طيب انا الحين ابيك تغنينلي .. فتون : وانا مابي .. فيصل : شفتي انتي الي بتخربين روقانك مو انا .. اتأففت فتون .. وطرا على بالها أغنية تغنيله اياها وابتسمت بخبث وقالت : تبيني اغنيلك؟؟ فيصل : غنيلي .. فتون : طيب بس على شرط ماتقاطعني ..! فيصل استغرب طلبها بس قال بضحكة : مو مقاطعك لاتخافين فتون بحماس : طيب .. احم احم .. " ليــــتك تموووووت .......... " فيصل شخصت عيونه وعصب وقال : فتــــــــــــــون !!!! فتون بضحكة : شفييييييييك قلت لا تقاطعني ! فيصل : والله ان كان هذا أولها ينعاف تاليها .. فتون : لالا بتعجبك بس انت اسمع .. فيصل بتنهيدة : يالله .. فتون : ليتك تموت اليوووم وارتاح انا منك ! عصب فيصل ووقف واهو يقول : تـشب ! غلطتي أنا الي أجاريك وأسمعلك وأعطيك وجه من الأساس .. ومشى ناحية الغرفة واهو يقول.. صدق اذا أكرمت الكريم ملكته واذا أكرمت اللئيم تمردا .. ودخل الغرفة وخبط الباب بقوة .. وفتون انفجرت من الضحك : هههههههههههههههههههههههههههههه ههههههههههه وطاحت على ظهرها على الأرض وصارت تضضضضحك وتحاول تكتم ضحكتها لا يسمعها .. الا فجأة فتح فيصل الباب وطلع عليها .. !! 
   
|
|
11-07-2016
|
#2 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
الجزء العشرين
:: طلع فيصل وشاف فتون طايحة على الأرض تضحك وعيونها مدمعة من الضحك .. مشى لها واهو معصب واهي كتمت ضحكتها وفزت واقفة ورجعت على ورى وقعدت على الكنب .. فيصل بعصبية : ممكن أعرف ليش هالضحك ؟؟؟؟ فتون ببلاهة وعيونها تطالع بالسقف : مو شي مهم ! فيصل : ودامه مو شي مهم ليه الضحك بهالطريقة المهسترة ؟؟ انا عارف شالي ضحكك وعارف شالي يدور براسك وان كان مشيتها لك فأنا بمشيها بمزاجي .. (( وعلى صوته واهو يرفع اصباعه بوجهها ويقول : ولا ولله يافتون تصرفاتك هذه ان ماحديتي منها وبطلتيها والله لا استخدم معاك اسلوب ثاني وماراح تلومين الا نفسك ! عقدت فتون ذراعينها على صدرها وقالت : فيصل انت اتزوجتني وعارف طبعي وعارف حركاتي ابي اعرف شالي تغير ؟؟ فيصل : صبري .. ! الي ماراح يطول عليك وعلى حركاتك .. وهذاني حذرتك !! مو قايلك بطلي الحركات الفلانية والطبع الفلاني لا لأنك ادرى بالي قاعدة تسوينه وانا ادرى بعد بالافكار الي تدور براسك .. اذا انتي ذكية أنا أذكى فارضي بواقعك الي حطك بنصيبي عشان تعيشين مرتاحة .. لكن دامك بتعيشين بهالطريقة فماراح تلقين مني الا الي يغثك وينكد عليك واعرفي انك انتي السبب ! فتون بانفعال : يعني تدري ياذكي انك مصدر نكد وغثا لحياتي .. شلون ترضاها على نفسك بنت ماتبيك وتاخذها؟؟ ليه ماتركتني اعيش مثل ما ابي واخذ الي ابي !! ولع فيصل وتطاير الشرار من عيونه واهو يقول بصوت اقرب للصراخ : ومن قالك أخذتك بسماحة خاطر ؟ ولا قلبي للحين يحبك وميت عليك ! انا اخذتك لأسباب كثيرة أولها انك خراب ولازم تتزوجين عشان تتعدلين ولا بتطيحين بخراب اكبر ! والثاني لأن للأسف صار الكل ينتظرني اتقدم وآخذ البنت الي من صغرها واهم يتمنونها لي مادري شالي جاذبهم فيك ومنزلين مستواي انا لهالشكل ! والسبب الأهم عشان لا عاد تلعب فيك الأفكار وتفكرين انه ممكن تاخذين أحد غيري سواء هو يبيك ولا مايبيك .. جربتي حظك مره وشفتي النتيجة والحين شكله حتى بعد ماتزوجتي مانفضتي هالأفكار من بالك !! شكلك للحين تفكرين بماضيك وتتمنين ترجعيله .. كانت نبرة صوته مخيفة وعيونه تطالعها بنظرات قاتله وهالشي قرص قلبها وخلاها تنلجم عن الرد .. فيصل : ردي سمعيني شالي تفكرين فيه وناوية عليه .. اني أمل منك وأكرهك وأطلقك وتصير ذي فرصتك ترجعين للحبيب الغالي ! فتون وقلبها يخفق بقوة : لاتتقول علي شي ماقلته ولا تتوهم اشياء ماسويتها ! فيصل : يافتون انا وصلت للمرحلة الي افهمك بدون ماتقولين ولاتسوين .. (( وبسخرية : مادري أهني نفسي على هالشي ولا أندب حظي .. فتون حاست فمها واهي رافعة حاجب وعيونها ضايعة بالتلفزيون بدون تركيز .. مشى فيصل للتلفزيون وسكره وقال بلهجة أمر : ادخلي نامي خلي اليوم ينتهي على خير .. فتون :مابي انام .. فيصل بعصبية : المفروض تنطمين وتمشين وانتي ساكتة مو تقاوحين بعد ! فتون بانفعال : كل هذا عشاني ضحكت ؟؟ ولع فيصل لأنه يدري انها تستهبل وتسوي نفسها مو فاهمة .. ومشى لها واهو يقول : الظاهر انتي ودك استخدم القوة معاك .. ومسكها من ذراعها وسحبها بقوة واهي كشرت وحاولت تسحب ذراعها منه لكن ابو العضلات كانت قبضته أقوى ومشى للغرفة واهو يسحبها بقوة وراه فتون واهي تحاول تفك اصابعه وتقول : اقول تراني مو غنمة تسحبني وراااااك .. فك ايدي فــــــــــك ! فيصل دف باب الغرفة ودخل وسحبها ودفها بقوة على السرير وقال : انخمدي ! فتون بصراخ : انت شتحسب نفسك يعني عشانك رجال تفرد عضلاتك علي .. ؟؟ ترا اذا تستقوي بعضلاتك بتلقى تصرفاتي اقوى وأعند ولاني نايمة يعني مو نايمة !! فيصل : عسى عمرك مانمتي اقعدي اسهري لحالك بهالغرفة لين بكرا .. وطلع وقفل عليها الباب بالمفتاح ومشى واهو يتنهد تنهييييييدة طوييييييييلة ويهز راسه بحمق وضيق .. ما امداه يوصل الصالة جا يقعد الا سمع صوت باب الغرفة يحاول ينفتح .. اتفاجأت فتون يوم لقته مقفل من برا وولعت وصارت تخبط الباب بإيدينها ورجولها واهي تصرخ : افتح البااااااب يانذل ياسخييييييييييف والله لاتندم على حركاتك هذه افتتتتتتتتح ضحك بسخرية على تهديدها بدل ماتخاف من تهديده صارت اهي تهدده .. بعد ثواني وقف التخبيط واختفى صوتها .. ارهف سمعه يبي يسمع لها حس ماسمع ! معقولة تكون استسلمت ! لا مو فتون الي بتستلم بهالسهولة .. شكلها قاعدة تفكر شلون تنتقم مني! اتنهد واهو يرمي نفسه على الكنب بمحاولة للنوم استعداد لحرب جديدة بالغد! :: مرت الليلة تحمل أنواع الضجيج الداخلي عند فيصل وعند فتون ! فتون الي انصدمت وولعت يوم قفل عليها وكانت ردة فعلها تلقائية انها تخبط الباب وتعصب .. بس بعد شوي استوعبت انها لو تخبط لين بكرا ماراح يفتح ! فيصل اذا هدّد ..هدّد !! واهي نرفزته واستنزفت صبره وكان هذا اول بوادر الانقلاب ! كتمت غيضها وصارت تدور بالغرفة ذهاب وعودة وبين فترة والثانية توقف وتخبط الأرض برجلها بعصبية .. لين تعبت ورمت نفسها على السرير وصارت تسترجع كلامه .. ماتدري ليه استوقفتها كلماته يوم قالها " من قالك أخذتك بسماحة خاطر ؟ ولا قلبي للحين يحبك وميت عليك !" شعور قرص قلبها من داخل .. كنت اتوقع ممكن تتحملني عشانك تحبني وتموت فيني .. بس اعترافك هذا يدل على ان ماعندك أي طاقة صبر تصبرها علي ! معقولة كرهتني بهالبساطة .. ؟ شحبك الخيخة هذا الي يزول من أول صدمة ! ماتدري ليه انعكس تفكيرها على نفسها وصارت تفكر بحبها اهي .. وكيف انقلب فجأة يوم خذلها وسافر وخلاها ! اتنهدت ورمت راسها على المخدة وهمست : انا الي قلبت مشاعري بمزاجي .. وأقدر أرجعها بمزاجي .. أما هذا شكله كرهني من قلبه مو بمزاجه .. الله شهالحياة الحلوة الي تربط بين زوجين يكرهون بعض ! ابتسمت بسخرية على حالها .. وانقلبت على الجهة الثانية واهي تحاول ماتفكر .. حاولت بس ماقدرت .. حاولت تغلط نفسها بس عجزت .. تحس ان الي تسويه صح لأنه أخذها غصب عنها !! .. وليه ياخذني غصب واهو يكرهني .. ؟ وأسبابك سخيفة وغير منطقية .. صحيح غبي ومتخلف ! ممكن صدع راسها وغمضت عينها تبي تنام .. يمكن هدها التعب ونامت .. بس هالاحتمالات مستحيلة تصير عند الشخص الثاني الي بالصالة .. فيصل الي ماقدر يستمر على وضعية محدده اكثر من دقايق .. يتمدد شوي .. يتقلب شوي .. يقعد شوي .. يرجع يتمدد .. مو قادر يرتاح من بعد ماغلى دمه منها .. واهو يفكر بالمعارك القادمة الي بيدخلها مع فتون .. ولمتى طيب ؟؟ أي أسلوب ينفع معاها هذي .. ؟ غير عنادها وركبة راسها ودلعها واستهتارها .. غير ذا كله تولعني طولة لسانها ! البزران لاطولوا لسانهم حرقنا ألستهم بالفلفل !! اما هذه شسوي فيها ؟؟؟ ضحك على نفسه يوم اتذكر أحلامه انه يرجع السعودية يلقاها تنتظره بلهفتها .. مثل ماتركها بلهفتها ! مادرى ان هالانسانة ردود أفعالها سلبية وغير متوقعة ! سأل نفسه لو كان يدري ان هذا الي بيصير فيها .. هل كان أصر ولزّم على السفر ؟؟ مو فتون اهي حلم حياته ؟؟؟ مو طول عمره يحلم ويتمنى انها تحبه او تميل له ؟؟ ليه بعد مالمس منها هالمشاعر .. راح وتركها .. ؟؟ وليه اهي قتلت مشاعرها فجأة وانقلبت أسوأ من قبل ؟؟ حز بخاطره كلامها وكيف كانت تتمنى لو تركها تاخذ الي تبي !! اتألم حيل واتنهد .. مهما حاول يخدع نفسه ويخدعها انه ماعاد قلبه يهواها مثل أول الا ويجيه نداء من داخل .. " أحبهـــا وأمووووت فيها " بس صعب مع شخصية فتون الشرسة هذه .. انه يظهرلها أي مشاعره اهي من غيرها مستقوية شلون لا حست فيها .. وهل تقدر يافيصل تعاملها بدون ماتحسسها بشي من حبك ؟؟؟؟ مشكلة الحب .. انه اهو الي يحكمنا .. يضغط علينا .. .. يسيرنا .. نسهر الليل نفكر ونخطط كيف نقسى ومانسمحله يأثر علينا واذا صحينا .. .. نسينا .. وسوينا كل الي يمليه علينا .. مشكلة الحب .. }{}ابريطـانيــا {}{ فتحت وعد باب شقتها ودخلت وسكرت الباب بسرعة مشت واهي تطالع بساعتها وانتبهت ان موعد دوا أمها مر عليه ثلث ساعه وماتدري عن امها أخذته بموعده ولا لاء نادت واهي تمشي بالصالة : السلام عليكم ماماااا وير ار يو ؟ طلعت أمها من المطبخ وعلى وجهها ابتسامة حنونه وقالت :عليكم السلام أيام هير مشت وعد لأمها الحنونه وسلمت على راسها وسألتها : بليز ماما دونت تيلمي يو فورقيت ذا ميدسن !! ام وعد : نو الحمدلله ايام تيك ات ناو وعد : كان لازم ياماما بيفور 20 مينتس ام وعد واهي تمشي للصاله : اتز اوكي بيبي مشت وعد معها واهي تخلع حجابها ومررت ايدها بشعرها ام وعد واهي تقعد : أني نيو ياوعد؟ وعد بابتسامة : مافي جديد ياماما بس آي فيل انك مو مرتاحة للموضوع ! ام وعد بالانجليزي بس انا اترجمه لكم : وعد انا امك وابغى مصلحتك ولايرضيني تطيحي بالنار قدام عيوني .. انا عارفة ان سعود رجال طيب وشهم بس ظروفة وحياته ماتناسبنا .. هو حايرجع لأهله قريب ويواجههم بزواجه ويمكن يوافقوه ويمكن يعارضوه ! مافكرتي لو عارضوه اش حايسوي ؟؟ مستعدة يطلقك زي ما أبوك سوا ! وعد : يا ماما سعود مو نفس بابا !! ام وعد: اعرف يابنتي .. أبوك الله يسامحه كان .... (( وسكتت شوي بعدين اتنهدت وقالت : لاتخليني أتكلم عنه وأتذكر أشياء مضى عليها العمر .. ! وعد : ليه ياماما دايما اذا انفتحت سيرته ماتحبي تتكلمي عنه ؟؟ في شي أنا ماعرفه ؟ أم وعد : لايهمك ياوعد .. بس انا عارفة ان سعود يختلف عنه .. سعود انسان قلبه طيب وآي نو هي لوف يو ! آند يو لوف هيم ! بس ماندري اش الظروف الي تواجهه بعدين والي ممكن تكون عقبة بطريقكم وعد: طيب ليه نفرض الأسوأ ؟؟ ليه مانتوقع انها تكون ظروف كويسة ام وعد بتنهيدة : ماظن .. بس شوفي حبيبتي انا غلطتي اني اتزوجت على عماي .. ما بغاك تكرري هذه الغلطة .. وابغاك تدخلي على نور .. اتكلمي مع سعود وخليه يفهمك ظروفه ووضعه ويخليلك الصورة واضحة وعد: اكيد .. وانا كمان لازم أكلمه عن ظروفي وأفهمه .. أم وعد باستغراب : ظروفك ؟ اي ظروف .. ؟ وعد : لازم يعرف اسباب ترددي وضروري يفهم اني مستحيل استغنى عنك وانك حترافقيني مكان ماروح .. ام وعد : وعد بليز .. ماتدخليني انا بالموضوع .. وعد : كيف ياماما انتي ... قاطعتها امها : وعد انا مح اعيشلك طول العمر .. ! بليز ماتخليني عقبة بطريقك كذا تزعليني ماتفرحيني .. انا اسعد يوم بحياتي اذا شفتك مبسوطة مع شخص يحبك ويشيل عنك ويحققلك أحلامك .. مو بكل ليله أحط ايدي على قلبي كل ماخرجتي من البيت الين ترجعي ..! وعد بحزن : ماما حبيبتي انا مالي غيرك ولا اقدر اعيش بعيدة عنك .. ام وعد : سعود ماراح يبعدك عني .. بس مـا أبغاك تخيريه بين بقائك معايا ولا رفض الزواج .. بليز وعد ماتسوي كذا .. وعد بابتسامة : ان شاء الله .. وانا حاتكلم معاه قريب عن كل شي وافهم منه كل شي .. ام وعد : الله يكتبلك الخير يابنتي وعد آمين .. (( وقفت واهي تقول : بروح اخدلي شاور واجي اتغدا معاك ام وعد : اوكي تيك يور تايم .. راحت وعد لغرفتها وكلام امها أثـــر فيها حيل .. وبنفس الوقت أسعدتها مدايحها لسعود وشخصه دخلت الغرفة وسكرت الباب واهي ماتشوف غير صورة سعود قدامها .. بنظرته القاتله وابتسامته الحنون .. اتخيلت هالشخص يكون ملكها وحبيبها وحدها ماغيرها .. حست نفسها طايرة بأحلامها و بلا شعور منها ارتسمت احلى ابتسامة حالمة على وجهها .. بس ضاق صدرها يوم اتذكرت كلام امها عن أبوها !! حست ان فيه أشياء تخبيها عنها .. أبويا .. بابا .. هههههه معقولة يكون لسه عايش ؟؟ وممكن أشوفه بيوم من الأيام ! معقولة تكون الاقدار مرتبه اني آخذ سعود عشان أوصل لأبويا ؟؟ ياااااه أنا شطحت بأحلاااااامي بعيييييييييد .. ! فزت فجأه يوم سمعت رنين جوالها داخل الشنطة .. وماتدري ليه توترت واهي تشيل الشنطة وتدور على الجوال بإيدها لين لقته ورفعته وشافت الرقم الي خفقله قلبها !! ردت ورفعت السماعه لاذنها وقالت بهمس : اهلين .. سعود : هلاااابك وعد .. شلونك وعد ووجهها مولع: كويسه الحمدلله و .. انت؟ سعود بنبرة هادية: انا ايش؟ استحت وعد وقالت : انت كيفك حالك سعود : اهااا .. مازلت عايش الحمدلله ضحكت وعد بخفة وماعلقت .. سعود : وأخبارك ؟ وعد بخطارها .. أخباري انت الي قالبها وعارفها ومكيفها من دخلت حياتي لهاللحظة .. قالت : اخباري نفس اخبارك .. ابتسم سعود وذي اول مره تبادره بتلميح عن مشاعرهم وقال : عساها أحسن الأخبار يارب .. وعد بهس :آمين وياك .. سعود بتنهيدة: وعد ماني مطول عليك بس ودي اشوفك اليوم ضروري .. عندي كلام كثير لازم أتكلم فيه معاك .. خفق قلب وعد بقوة واهي ماستعدت ولا بأي حال لهاللقاء المفاجئ !! بس هذي فرصتها عشان تقوله كل الي بخاطرها ويحطون النقاط على الحروف .. استجمعت قواها وقالت : وانا كمان عندي كلام ودي اقولك عليه .. سعود : حلوو .. اوكي وين تحبين نتقابل ؟ وعد : افضل ب ((....... مول )) الي جمبكم .. سعود : برضو حلو .. اوكي 7 المغرب يناسبك؟ وعد بدون تردد: مناسب .. سكت سعود شوي كنه يبي يقولها كلام .. ووعد قطعت صمته وقالت : اوكي سعود .. ؟ سعود : اكيد اوكي .. ! وعد : يالله نشوفك على خير سعود : ان شاء الله .. وعد : فمان الله سعود : مع السلامة .. سكر سعود السماعه واهو يضحك على نفسه .. شالي صار فيني من سمعت صوتها عجزت أتكلم زين .. ! شلون بشوفها وباقعد معها وأكلمها .. يالله ياسعود انت الي مايهزك ريح هزتك بنت وزوبعت حياتك ! وقف واهو يضحك ويهز راسه ويدور بجواله على رقم فيصل .. واول مالقاه دق عليه ورفع الجوال لاذنه .. بعد كم رنة جا الرد سعود : السلااااام عليكم .. فيصل والنوم بعيونه : عليكم السلام هلا .. سعود : هلا فصفص شلونك .. << عيارة فيصل وهو صغير فيصل ماعرف المتصل الا من هالكلمة لأن سعود يمازحه فيها بين فترة وفترة قعد على حيله واهو يقول : هلا بسعووووود هلا اخوي بخير الحمدلله انت شلونك سعود واهو يطالع بالساعه : تمام الحمدلله عسى ماصحيتك تراني ماحسبت فرق التوقيت بيننا فيصل : لاماعليك الدنيا نهار و بقوم اصلي .. الا شخبارك شلون شغلك؟ سعود : ماشي الحال الحمدلله .. شلون دلوعتنا الي عندك فيصل بضحكة مغصوبة : اييي دلوعتكم انتوا انا ماعندي دلع بنات .. سعود : لا فتونه دلعها ماشي على الكل الصغير والكبير فيصل : وانا اشهــــــد .. سعود : هههههههههه عسى مهي ملعوزتك ..؟ فيصل باختصار : لاتشيل هم .. اخبار اهلك تدري عنهم ؟ سعود : والله من كم يوم مكلمهم ان شاء الله انهم بخير فيصل : الحمدلله .. سعود : الا وين فتون مالها حس شكلها نايمة فيصل : ايه ايه .. نايمة وشوي وتصحى واخليها تتصل عليك سعود بضحكة : خذوا راحتكم مو مستعجل ابتسم فيصل وماعلق .. ناخذ راحتنا بايش ؟ بالخناق والطقاق ؟ كلن على همه سرى ! سعود حسب ان سكوت فيصل احراج منه .. فما طول وقال : يالله حبيبي نشوفك على خير فيصل : على خير .. ((وسكر السماعة .. اتنهد واهو يطاله بالفراغ .. هذا سعود يبي فتون .. والله شكلي بطلع لها جوال اليوم عشان افتك .. كافي كل خلافاتنا هاليومين عشان هالجوال ! طالع الساعه لقاها 10 الصبح وفتون من امس الليل مالها حس ! معقولة كل ذا نايمة !! وقف وراح للحمام .. أخذله شاور .. وطلع وبدل ملابسه وصلى .. وبعدها .. طالع بباب غرفتها ! ياترى اذا فتح الباب وش بيلقاها تسوي !! وكيف بيكون وضعها ! مافكر كثير ومشى للباب وفتحه بخفه ودخل .. وقف لحظات عند الباب يتأمل المنظر الي قدامه .. كان السرير مرتب واللحاف زي ماهو ماتحرك .. وفتون نايمة على السرير بالعرض ومبين انها اهي مختارة الوضعية بكيفها .. كانت نايمة على بطنها بلا مخدة وبلا غطا .. وذراعينها ممدودة جمب راسها ووجهها مدفون بينهم وشعرها مبعثر حولين راسها .. مجسد ملائكي بس لأنثى قوية حتى براحتها .. عنيدة حتى بنومها .. احتار بأي اسلوب يصحيها .. كان لازال متضايق من الي سوته فيه البارح بس ماينكر ان شوفته لها هاللحظة محت اي ضيقة بداخله تجاهها .. قرب منها بخطوات خفيفة وهمس : فتووون .. شوي الا انقلبت فتون على جمبها وبان وجهها محمررررر من الجمب أثر نومها عليه .. فيصل كان صعب عليه يطول النظر فيها ومع ذلك عاند مشاعره وصار يتأملها من راسها لرجولها .. حس أنوثتها الرائعة .. وجسمها الضعيف .. وملامحها الناعمة .. مظهرها هذا ينافي تماما جوهرها الداخلي .. الي تلبسه بالقوة والقسوة ! انقهر على حالهم وهمس بتنهيدة : خسارة يافتون !
|
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض المتطور
