قلوب تنزف عشق / روايه كآمله

في المزرعه=بعد المغرب/

طلعت جوري من الغرفه بعد ما لبست..كانوا البنات يتجهزون معها..لكنهم سبقوها من نص ساعه..لأنها للحين ما خلصت..هاذي الحجه اللي قالتها لهم..لكنها في الحقيقه..كانت خايفه تطلع للناس..أبو فارس عزم اثنين من أصدقائه مع أهلهم..صح ما كانوا كثار..بس ولو..هاذي أول مره تقابل ناس ما تعرفهم..شافت نفسها بالمرايا..تنورتها البيج اللي كان فيها شك ناعم بالوردي..مع بلوزه وردي ناعمه و راقيه..مكياجها كان مثل ما تحبه بسيط..و شعرها رفعته بتسريحه ناعمه سوتها لها أسيل..الكل انهبل عليها..بس هي ما كان عندها الثقه بنفسها..خاصه قدام ناس من مستوى راقي..خافت يكونون مثل أم راكان و بناتها..اللي كانوا كل ما يطالعونها تحس إن نظرتهم تبين إن مكانها بينهم غلط..ما كانت تعرف تتعامل مع هالنوعيه من الناس..و لا ترد عليهم مثل ما تسوي أسيل و حلا..

وقفت عند الدرج بتنزل لكن خطواتها وقفت..و هي تسمع أصوات كثيره..شافت حلا طالعه لها..
ح زين ما بغيتي تخلصين..و الله على بالي نمتي
جوري: هذاي خلصت..بس مستحيه
حلا تضحك: من إيش! مادري يوم زواجك وش بتسوين؟
جوري: شكلهم كثيرين
حلا تسحبها: جوري لا تطلعين فيني شيب بهالعيد

نزلت معها و سلمت على الموجودين..و جلست..كانت قليل ما تتكلم..تقريبا ترد على اللي يسألها بس..ما كان السبب منهم بالعكس الجلسه كانت حلوه..بس هي ما تأخذ على الناس بسرعه..الوحيده اللي ارتاحت لها مها..مع إن جوري أول ما شافتها قالت أكيد مغروره..كان جمالها ملفت للنظر..زياده على كذا أناقتها و ثقافتها..و ثقتها بنفسها..مع كل هذا كانت طيبه و مرحه..
مها: جوري ما سمعنا صوتك
جوري استحت: أناا...بصراحه استحي من التجمعات الكثيره
مها تبتسم بتفهم: خلاص خلينا نطلع نتمشى نفسي اتفرج على المزرعه

طلعت معها جوري يتمشون..
مها: في أي سنه يا جوري؟
جوري: أولى
مها: أي قسم؟
جوري: حاسب آلي..و أنتي؟
مها: أنا آخر سنه فنون جميله

جوري..(ماشاء الله عليها كل هالجمال و الشخصيه و بعد فنانه..سبحان الله احس مو ناقصها شي..غريب للحين ما تزوجت بس طبعا مو أي واحد يسوى تاخذه)
مها: وين سرحتي؟
جوري: معليش ما نتبهت وش كنتي تقولين؟

مها: كنت اسأل عن ياسمين مو مخطوبه؟
جوري: لا..و أنتي؟
مها: لا للحين ما تقدم أحد يناسبني

كملوا سوالفهم و هم يتمشون..مروا من عند الباب اللي يودي لقسم الرجال..
جوري: وصلنا لقسم الرجال خلينا نرجع
مها: يله

لكنهم ما مشوا خطوتين إلا و الباب ينفتح..
وقف فارس مصدوم قدامهم..ما كان بينهم إلا مسافه قصيره..لكنه بسرعه انتبه لنفسه و رجع و سكر الباب..جوري كانت للحين مو مستوعبه إنها شافته..وهو شافها..و أكيد شاف اللي معها..اللي معها..أول ما فكرت بهالشي لفت تشوفها..كانت منحرجه مثلها..و الخجل زادها جمال..و فكرت مصدومه..(أكيد فارس شافها..يمكن قارنها فيني..أو يمكن ما انتبهي لي من الأساس..كيف يشوف وحده مثل مها و يلتفت على اللي جنبها)
حست بقهر..و كرهت نفسها إنها قامت من محلها..
مها: يا الله على الإحراج! خلينا نروح بسرعه

مشوا و جوري ما نطقت و لا كلمه..من بعيد شافوا أسماء رايحه عند الباب..شكله كان ينتظرها..
مها: جوري وش فيك؟
جوري: لا و لا شي بس آسفه أنا الغلطانه قربنا من قسم الرجال
مها: و لا يهمك إنسي اللي صار

جوري..(ليته هو ينسى اللي صار..بس مين اللي بيشوفك و ينساك يا مها)
مها: تعرفين مين اللي شافنا؟
جوري بقهر: لا

كذبت عليها ما تدري ليه..بس ما كانت تبيها تعرفه..(وش الفايده دامه شافنا..و أسماء بعد شافتنا....معقوله يقول لها اللي صار؟ لااا إن قال لها بتعرفنا و أكيد بتقول له مين اللي شافها.....ما مداني اسأل نفسي مين اللي يستاهل يأخذك يا مها..و ليتني ما عرفت)
انتبهت لمها اللي كانت تكلمها..
مها: هذا مو فارس؟
جوري انصدمت: وش عرفك بفارس؟
مها: مره و أنا راجعه للبيت شفته من بعيد طالع من بيتنا مع أخوي رائد
جوري: مادري
مها: شكله هو..معقول ما عمرك شفتيه
جوري: لا ما قد شفته(و ليتني ما شفته كان ارتحت من القهر اللي احس فيه)

رجعوا للبنات..و جوري تركت مها عندهم و راحت للمطبخ..تبي تشرب ماء..يمكن يبرد قهرها..(اليوم ما كأنه عيد..فرحتي فيه ناقصه..أوله فقدت أمي و تأثرت بحزن ناصر..و اللحين أشوف اللي ياما خفت منه يصير..معقول فارس يروح مني..وهو يعني معقول يكون لي بعد ما أنا بنفسي تركته..تعبت من دينك يا فارس اللي علقته فيني)
أسيل: جوري وش فيك؟
جوري تفز: أسيل! ما فيني شي
أسيل: و هالدموع اللي على خدك ليه؟

جوري مسحت دموعها اللي ما حست بنزولهن..
جوري: احس إني فاقده أمي فاقدتها بالحيل
أسيل بحنان: الله يرحمها
جوري تتذكر: أسيل ممكن اسألك و تجاوبيني بصراحه
أسيل: اسألي
جوري: خالك ناصر تغير من يوم جيت عندكم
أسيل: وش تقصدين؟
جوري: احس إنه كل ما يكلمني يتأثر و يحزن..صرت أتمنى لو إنه ما شافني....
أسيل تقاطعها: جوري وش هالكلام بالعكس خالي ناصر و كل أهلي فرحوا بالحيل يوم شافوك حسوا إنه باقي لهم من أمك شي يتذكرونها فيه
جوري: أتمنى هالشي
أسيل: صدقيني هاذي الحقيقه و لا تضايقين نفسك و لا ترى كلنا تضايقنا...جوري تعالي معي
جوري: وين؟
أسيل: بأوريك مصيبة غيرك يمكن تهون عليك مصيبتك

راحت معها جوري و هي مستغربه وش هالمصيبه..جلست أسيل بمكان بعيد عنهم..
جوري: وش بتسوين؟
أسيل تتنهد: بأدق على رغد للمره الألف اشوف أخبارهم عساها تقولي الصدق
جوري: و ليه بتكذب عليك؟
أسيل: ما تبيني أزعل
جوري: يمكن صدق ما صار شي
أسيل: سهى هناك في بيت واحد مع فيصل و لا تسوي شي ما أصدق...أووف كل ما أفكر بهالشي احس إني بأنفجر

كلمت أسيل رغد و بدت تحقيقها..بصراخ و قهر..و جوري تطالعها..(مصيبتي مثل مصيبتك أو أكبر)

جاء العشاء لكن جوري ما قدرت تأكل..كانت تحس بغصه..و ضيق..
قامت و راحت تلعب مع شوق..عشان ما تضطر تجلس مع مها..كانت شوفتها تقهرها..و أكثر من كذا إعجاب الكل فيها..
ارتاحت يوم شافت الكل راح و ما بقى غيرهم في المزرعه..راحوا البنات يبدلون ملابسهم بشي خفيف..و جلسوا كلهم يتمشون عند النخل و يسولفون..
ياسمين: و الله بايعين عمرنا نتمشى بهالظلام هنا أخاف يطلع لنا شي
ح عادي يصير اكشن
أسيل: مانبي أكشن نبي رومانسيات
حلا تتريق: يعني تبينا نطلعلك فيصل من بين هالنخل
أسيل تتنهد: ياليت
ياسمين: ما صدقنا تنسى السالفه ذكرتيها
أسيل: ايه ما تنلامون ما جربتوا الحب

ابتسمت لينا بحزن..طرى على بالها يوسف..حبها القديم..اللي لايمكن تنساه..لاحظت أسيل ان لينا سرحانه..و حست انها اخطت باللي قالته..طالعت بحلا..و أشرت لها على لينا..تبيها تصرف الموضوع..
ح يا سلام نفسي بآيسكريم
ياسمين: و أنا بعد
لينا: كلموا أحد من العيال يجيب لكم
أسيل: أنا بأكلم سيف عشان ياخذنا معه
لينا: نروح معه!
ح ايه والله وناسه نعيد ذكريات أيام الطفوله يوم كان جدي أبوناصر ياخذنا كل عيد للبقاله

كانوا يسولفون عن ذكرياتهم و يضحكون..لكن جوري ما كانت يمهم..كانت تحس بتعب و صداع..انتبهت إنها ما تغدت اليوم زين و لا قدرت تتعشى..حست بخمول و كسل..انتبهت لأسيل اللي كانت تكلم بجوالها..و راجعه لهم فرحانه..
أسيل: وافق سيف يله نروح
جوري: أنا ما أقدر اروح

ح مو على كيفك كلنا بنروح
جوري: والله راسي مصدع و مو قادره اركب السياره
لينا: صح وجهك شاحب..خلاص أنا بأجلس معك
جوري: لا كلكم روحوا أنا بآخذ حبه و ارتاح لحد ما ترجعون

راحوا البنات و بقت جوري..كانت بتريح لين يرجعون..لكن شوق زعلت و انقهرت يوم عرفت إنهم راحوا و لا أخذوها..عشان كذا جلست تلعب معها..حتى ما تزعل..


دخل فارس قسم الحريم..كان يمشي و فكره شارد..فجأه..ضرب فيه أحد بقوه..بعدت عنه بسرعه خلت خطوتها تتعثر..كانت بتطيح..لكنه مسكها..رفعت عيونها بنظرات خايفه..و مرتبكه..ارتجفت أول ما شافته..و عرفت إنه فارس..جت في بالها..مها..و طالعته بقهر حبسته في داخلها طول اليوم..و سحبت يدينها منه بقوه..و راحت تركض لداخل الفيلا..
فارس كان واقف يطالعها..مصدوم من موقفها..و نظرتها..ما فاتته نظرة القهر اللي شافته فيها..ما كانت أبدا تشبه نظرات الخجل اللي تعود عليها..(وش فيها؟ ليه هالنظره؟ بعدين مو سيف يقول أخذ كل البنات هي ليش ما راحت)
دق على أسيل..
أسيل: هلا
فارس: أهلين أسيل..كنت باسألك كل البنات راحوا؟
أسيل: ليه؟
فارس: كنت بأروح عند خالاتي و قلت اتأكد إن ما فيه أحد من البنات
أسيل: لا لا تدخل قبل تعطيهم خبر ترى جوري فيه ما راحت معنا..يله مع السلامه فارس وصلنا السوبرماركت

سكرت قبل يسألها ليه جوري ما راحت معهم..كان بيرجع لكنه غير رأيه يوم شاف شوق..
فارس يناديها: شوق
شوق جت عنده: نعم
فارس: بأدخل فيه أحد؟
شوق: لا الحريم جالسين في البلكونه روح عندهم و أنا بأقول لجوري ما تطلع
فارس: و جوري ليه ما راحت مع البنات؟
شوق: مادري وش فيها تقول راسها يوجعها..بس أنا شفتها يوم راحوا البنات تصيح..أول مره تكون جوري كذا طفشانه و مالها خلق
فارس بقلق: لهالدرجه تعبانه!

تذكر ملامحها قبل دقايق..كانت عيونها ذابله..ذكرته بملامحها أول مره شافها في بيت عمها..
راح عند أمه و خالاته..
فارس بضيق: مساء الخير
الكل: مساء النور
فارس: شفت البنات راحوا قلت ادخل اسولف معكم شوي

في المطبخ_كانت جوري جالسه و مغمضه عيونها..تتذكر الموقف اللي صار لها قبل شوي..(كنت راضيه بالقليل معك يا فارس..أشوفك من وقت للثاني..اسمع أخبار عنك..ما طلبت أكثر من كذا..ليه حتى هالقليل بانحرم منه..معقول توافق تخطبها؟ يارب تكون مشغول و ما تفكر في الزواج اللحين)
شوق: جوري
جوري تفز: نعم
شوق: وش أخبارك اللحين؟ احسن؟
جوري تبتسم: ايه حبيبتي احسن
شوق: أنا بأروح عند عمر بألعب معه كوره..بس أنتي لا تطلعين ترى فارس جالس عند الحريم

تركز كل انتباها على آخر جمله..و أول ما راحت شوق..طلعت من المطبخ..و راحت وقفت عند باب المدخل..تسمعهم..
أم العنود: و أنت بس أول ما نجيب لك سالفة الزواج تحججت بهالشغل اللي ما يخلص..يا ولدي أنت كبرت و اللي مثلك معهم عيال
أم فارس: بعدين وش هالشغل اللي تتحجج فيه..شركتك الخاصه هذاك الحمدلله بديت فيها و بعدين البنت و منصب أبوها بيساعدونك
فارس: أنتم تتكلمون عن بنت أبو رائد؟
أم عمر: إيه البنت ما شاءالله عليها كامله و الكامل وجه الله يا فارس حرام عليك ريح قلب أمك

فارس حس إنه تورط..دخل يبي يتطمن عليها..لكنهم فتحوا له سالفه ما توقعها..كان يدور له عذر يقوله لهم..لكنه سمع صرخة أسماء..
أم فارس تقوم بسرعه: بسم الله وش فيها؟

قاموا كلهم معها..و دخلوا الفيلا..لكن فارس شافهم اجتمعوا كلهم عند الباب..و سمع اسم جوري يتكرر ..عصب عليهم وهو مايدري وش السالفه..قرب عند الباب..
فارس بعصبيه: وش فيكم؟
أسماء تطلع له: جوري لقيتها طايحه على الأرض مغمى عليها
فارس بخوف: وش فيها؟
أسماء: مادري يمكن داخت
فارس بقهر: خلينا نوديها المستشفى بسرعه
أسماء: ما رضت تقول ما فيها شي
فارس بعصبيه: و أنتي تشاورينها..بأروح أقرب السياره لمدخل الحريم ألقاكم هناك

راح فارس بسرعه..بعد ما أعطى أوامره..و أسماء دخلت و شافتهم شالوها للصاله..و هي راسها على حضن أم العنود اللي جالسه تقرأ عليها..و هي تصيح..
أسماء: فارس راح يجيب السياره بنوديها المستشفى
جوري بتعب: لا مابي ما فيني شي
أسماء تجلس عندها: حبيبتي جوري أنت تعبانه لا تخوفين أمي حصه عليك..بعدين فارس أمر و راح مين يقدر يقول له لا..والله بغى يأكلني

اضطرت جوري توافق بعد ما أصروا عليها كلهم..و كان وجهها الشاحب ما يساعدها تنكر تعبها..لكن هي تعبها الكبير كان في قلبها..خافت و هي تسمع إنه بيروح منها..و ما تخيلت كيف اللحين بتروح معه..حست لو تشوفه بتترجاه ما يتركها..
أخذتها أسماء و سندتها لحد ما وصلوا لسيارة فارس..و أول ما شافته جوري..بدت ترتجف..
أسماء بإستغراب: جوري بسم الله عليك وش فيك؟
جاء لهم فارس: وش فيها؟
أسماء: مادري من طلعنا بدت ترتجف
فارس يطالعها بحنان و إهتمام: ركبيها السياره بسرعه يمكن الهواء بارد

ركبت جوري و عيونها على فارس..لكنها فزت يوم التفت لهم..
فارس: اركبي معها ورى
جوري بصوت رايح: لا ماله داعي

فارس رد يطالعها بحنان..وهو لأول مره يسمع صوتها التعبان..ركبت أسماء جنبه..وهو للحين ملتفت على جوري..اللي كانت تحس إنها بتموت من الحياء..وهو يطالع فيها..
أسماء: يله فارس

فارس انتبه لنفسه..و انحرج من أسماء..و تعدل بجلسته..لكن إحساسه كان كله معها..
فارس: وش فيها تعبانه؟
أسماء: يمكن داخت لأنها مو آكله شي
فارس بعصبيه: و ليه ما أكلت؟ كانت تعبانه؟
أسماء: والله مادري وش فيها من وصلوا الناس و هي مكتئبه...يا خوفي أحد ناضلها عاد هي اليوم طالعه قمر

حست جوري بالإحراج من كلام أسماء..و قدام مين..قدام فارس..كانوا يتكلمون عنها و كأنها مو موجوده..كانت مركزه عيونها على فارس..تفكر كيف صارت متعلقه بهالإنسان لهالدرجه..و ما حست في نفسها..إلا وهي نايمه..

صحت جوري على صوت أسماء..اللي كانت فاتحه لها الباب و واقفه جنبها..لمحت وراها فارس..و نظرة الاهتمام للحين بعيونه..تمنت تستمر هالنظره لها طول العمر..نزلت جوري و هي تحس إن الأرض تدور فيها..لكنها كانت متمسكه في أسماء..

بعد ساعه-كانت تحس تقريبا في نفسها..لكنها ما بدت تستوعب الا اللحين..شافت نفسها نايمه على السرير..و المغذي بيدها..التفتت لأسماء اللي كانت جالسه جنبها..
جوري: أسماء
أسماء: حمدلله على السلامه أخيرا صحيتي
جوري بإستغراب: أنا نمت؟!
أسماء: لك ساعه و نص
جوري تشهق: ما حسيت بنفسي
أسماء: أهم شي انك ارتحتي اللحين
جوري: الحمدلله..أسماء خلاص أبي اطلع
أسماء: انتظري المغذي بقى له نص ساعه
جوري: لا أنا اللحين صرت احسن
أسماء: انتظري اقول لفارس أخاف ما يرضى

طلعت أسماء..و جوري اتفاجأت..(فارس برا..كل هالوقت جالس ينتظرني! مهتم فيني يا فارس..و الا أحد بعد موصيك علي؟..يارب ما يوافق عليها..يارب يكون مشغول و مو فاضي للزواج..ليته ما يعرف انها اللي شافها معي)
دخلت أسماء: ما رضى مالك الا تكملين هالمغذي..جوري أنتي وش فيك اليوم مو على طبيعتك؟
جوري: يمكن عشان صحيت بدري و أنا أمس ما نمت زين

بعد نص ساعه-طلعت جوري و شافت فارس..اللي طالعها و ابتسم..حست انها بتطيح من طولها..و هي تشوفه يبتسم لها..
فارس: حمدالله على السلامه
جوري بإحراج: الله يسلمك

مشت معهم..و هي حاطه يدها على قلبها..اللي كان بيطلع من صدرها من قوة دقه..كان صوت فارس بس يقلبها فوق تحت..كيف اللحين تمشي جنبه..ما بينه و بينها غير أسماء..
ركبوا السياره..و جوري تحس بإحساس غريب..كانت مقهوره على خطبته..و بتموت من الخوف انه يوافق..بنفس الوقت فرحانه و هي تشوفه قدامها كل هالوقت و تسمع صوته..
دق جوال فارس..
فارس: مرحبا
ياسمين: هلا فارس أنا ياسمين
فارس: أهلين ياسمين..بغيتي شي؟
ياسمين: ايه أبي اكلم جوري ندق على أسماء طلع جوالها هنا
فارس: لحظه
فارس مد الجوال لجوري..
فارس: ياسمين تبي تكلمك

جوري كانت تتمنى تقول بعدين..أو تطلب من أسماء ترد عنها..لدرجة فكرت تسوي نفسها نايمه..كانت منحرجه تكلم قدام فارس..لكنها ما قدرت..و بيدين مرتجفه أخذت جواله..
جوري: هلا
ياسمين: اهلين جوري..وش أخبارك؟ خوفتينا عليك!
جوري: الحمدلله بخير
ياسمين: أمي حصه قلقانه عليك
جوري: لا طمنيها ما فيني شي
ياسمين: أكيد ما قالوا فيك شي

جوري تذكرت انها ما تدري وش فيها..و لا اهتمت تسأل..كان كل اللي يهمها بهالروحه..انها شافت فارس..
جوري: لا تطمني
ياسمين: زين أجل اروح اطمنهم..ما تشوفين شر
جوري: الشر ما يجيك

سكرت و مدت الجوال له..و أخذه منها..فجأه تذكرت مها..و ضاقت بها الدنيا..التفتت على الشباك..تطالع الطريق بحزن..(معقول اخسرك؟ و يكون نصيبي من الفرح..و الحب..مثل نصيب أمي الله يرحمها؟ كنت لي..كنت لي..و أنا فرطت فيك بغباء..أول قرار اتخذته بحياتي..و بأندم عليه باقي حياتي..لا توافق يا فارس الله يخليك لا توافق..ماراح اتحمل)
و انتهى يوم عيدها بحزن..مثل ما بدأ..

-،،النـزف الرابــع عشــر،،-






*بعد أسبوع::يوم الخميس*

في بيت أبوفارس=في غرفة أسيل/

كانت جالسه تقرأ روايه قد أخذتها من رغد في الكليه من قبل الاجازه..بعد ماشافتها تصيح وهي تقراها..كانت بتشوف وش اللي يصيح فيها..وبعد ماخلصت الروايه اللي من الظهر تقرى فيها وعلى المغرب ياله انتهت..رمتها على السرير بقهر..(لااااا ليه البطل ماراح مع البطله آخر شي،،بعد كل اللي مروا فيه يتركها! مالت عليك يارغد أنت وروايتك نكدتي علي)
دخلت عليها أمها وشافتها سرحانه و مبرطمه..
أم فارس: أسيل وش فيك؟
أسيل تفز: بسم الله! يمه من وين طلعتي؟
أم فارس: اللي آخذ عقلك
أسيل: والله قمة القهر يمه من الظهر وأنا أقرأ بهالروايه وآخرتها يتركون بعض!
أم فارس: أعدتك رغد بهالروايات
أسيل: لااا هاذي آخر مره أقرأ روايه والله ارتفع ضغطي وجاني السكر
أم فارس: اتركي عنك الخبال و روحي سلمي على عمك يبيك في المجلس
أسيل بفرح: عمي هنا؟
أم فارس: إيه

راحت أمها و أسيل بدلت ملابسها ونزلت بسرعه..كانت تحب عمها بالحيل وتحب تجلس معه..كيف إذا صار بعد أبوفيصل..دخلت المجلس وسلمت عليه وبعد ما سولفوا شوي..
أبونادر: اسمعي يابنتي أنت تعرفين وش كثر أحبك والله يشهد إنك بغلاة رغد و رنا عندي
أسيل: الله يخليك لنا يا عمي
أبونادر: عشان كذا أنا بأخذ رأيك في موضوع وأبيك تقولين رأيك بصراحه وتتأكدين إنك لو وافقت أو رفضت معزتك ماراح تتغير أبدا وأنا اصريت إني أكلمك بنفسي عشان ما أحد يضغط عليك

أسيل حست إن قلبها بدأ يدق بكل قوته..و وجهها صار أحمر..ما هي مصدقه.. معقوله عمها يتكلم عن خطبتها..أو عن شي ثاني و هي تتوهم..(آه ياعمي جاي تشاورني بفيصل!ما تدري إني طول عمري اتمنى هاللحظه)
أسيل بصوت مرتعش: آمر يا عمي
أبونادر: ما يأمر عليك عدو..أنت بنتي ياأسيل وأنا بنفسي اليوم جاي اخطبك لولدي من أبوك ماأبيك لأحد ثاني
أبوفارس: مثل ماقلت ياخوي كلهم عيالك واللي تبيه يصير
أبونادر: بس أنا أبي اسمع رأي أسيل بعد
أسيل بإحراج: مالي رأي بعد رأيك أنت وأبوي
أبونادر: رأيك المهم عندي
أسيل: ....
أبوفارس: خلاص ياأبونادر لاتحرج البنت أنا عارف إنها موافقه..هي من سنين وهي مخطوبه لولد عمها
أسيل تقوم: عن إذنكم

طلعت عنهم تركض وهي مو مصدقه نفسها حست إنها بحلم حلو ماتبي تصحى منه..شافت أمها اللي ضمتها بقوه..
أم فارس: مبروك يابنتي
أسيل بفرحه: الله يبارك فيك يمه
أم فارس: يعني وافقتي خلاص؟ كان طلبتي مهله تفكرين
أسيل: وش أفكر فيه يمه؟ كلكم مثلي عارفين من زمان إنه بيخطبني وعارفين بعد إني موافقه فليش التفكير!
أم فارس تضحك عليها: الله يوفقك
أسيل تبوس أمها بقوه: و يخليك لي يا أحلى أم بالدنيا

وراحت لغرفتها وهي طايره من فرحتها..و فتحت درجها السري وطلعت العلبه السماويه اللي فيها كل شي يخص فيصل من صور أو ذكريات..طلعت صورته وسرحت فيه..(و أخيرا يا فيصل بيكتمل هالحب اللي كل يوم يكبر في قلبي...بس غريبه ليه رغد ما قالت لي؟ معقوله ماتعرف؟ أو يمكن خلتها مفاجأه لي! أعرف حركاتها مو بعيد تكون متفقه مع حلا علي..لازم أدق عليها و أسألها عن التفاصيل..كيف خطبوني كذا فجأه!!)
سكرت علبتها وشالتها معها وجلست على سريرها..اليوم بتسهر مع ذكرياتها و ترتبها..دائما كانت تشتاق للحظه اللي بتفرج فيصل عليهم..و تتخيل ملامحه المتفاجأه وهو يشوفهن..لأنها كانت تجمع هالذكريات من سنين طويله..و فيه أشياء ماراح يتخيل انها للحين محتفضه فيهن..ودقت على رغد والإبتسامه ماليه وجهها...



في بيت أبونادر/

في غرفة رغد-شافت رقم أسيل وعيونها مليانه دموع...
نادر يطالعها: أسيل صح؟
رغد: ايه
نادر: ردي عليها
رغد: ما أقدر،،ما أقدر أكلمها و هي بهالموقف،،ما أدري وش أقول لها؟

نادر عصب منها وأخذ جوالها..اللي مارضى يسكت..و قبل تستوعب رغد اللي سواه..رد..
نادر: مرحبا

أسيل استغربت..كانت متوقعه تسمع صوت رغد..وعرفت إن اللي رد نادر لأنها تتذكر صوته من ذيك المره..كان فيه نبره مميزه لايمكن تنساها..لكن وش خلاه يرد على جوال رغد..
أسيل: آآ نادر؟
نادر: ايه
أسيل: أهلين وش أخبارك؟

نادر استغرب إنها عرفته..واستغرب أكثر من هدؤها..معقوله للحين ماتدري..بس أبوه من ساعتين راح لهم و قال إنه بيكلمها..
نادر: هلا أسيل
أسيل: وين رغد؟

نادر يطالع رغد اللي تصيح وتأشر له إنها ماتبي تكلم..ومادرى وش يقول لها..لأنه باين إن ماعندها فكره عن اللي صار..يمكن أبوه للحين ماكلمها..
نادر: رغد طالعه و ناسيه جوالها،،أسيل أبوي ما جاء لكم؟
أسيل تضحك: إلا عندنا و دامك تعرف ليه ما قلت لي مبروك!

نادر مستغرب منها: على ايش؟!

أسيل استحت وما عرفت كيف جتها الجرأه تكلم نادر اللي عمرها ماكلمته..وكيف بتقوله عن خطبتها..لكنها من الفرحه ماكانت تعرف وش تسوي..كانت تبي كل الدنيا تفرح معها..
أسيل بخجل: فيصل خطبني
نادر انصدم: وشووو!!!
أسيل استغربت: فيصل خطبني اليوم
نادر: فيصل جاء مع أبوي؟
أسيل: لا..بس عمي اللي جاء وخطبني
نادر ماقدر يستوعب: أبوي قال انه بيخطبك لفيصل؟!


رغد كانت تسمع نادر وهي منصدمه مثله..و مو عارفه وش يصير..
أسيل: أكيد لفيصل أنت ماتعرف إننا لبعض من زمان!

نادر عصب على أبوه اللي شكله ما وضح لأسيل شي..و عصب عليها أكثر..من متى هم يتكلمون مع بعض عشان اللحين تكلمه عن خطبتها..ليه هو بالذات يصير بهالموقف..ليه هو اللي يقول لها..
نادر: أنتي اللي مو عارفه شي يا أسيل،،أبوي خطبك لي أنا مو لفيصل

أسيل حست إن قلبها بيوقف..ماستوعبت..أو ارفضت انها تستوعب..هزت رأسها بقوه تبي تمحي اللي سمعته..أو اللي تتخيل إنها سمعته..لأن هالشي مستحيل يصير ولا في كوابيسها..
أسيل بصوت مرتجف: أنت وش تقول؟! الكل يعرف إني مخطوبه لــ...

قطعت كلامها وهي تتذكر إن عمها ما ذكر اسم فيصل أبدا..كان يقول ولدي ولا حدد أي ولد فيهم..هي اللي تخيلت إنه فيصل..كانت متأكده إنه فيصل..بدت تستوعب اللي هي فيه وتحس بمصيبتها..
نادر كمل كلامها: الكل يعرف إنك مخطوبه لولد عمك بس أهلنا ما حددوا مين؟

حست أسيل إنها بدت تفقد أعصابها اللي كانت مشلوله من هالخبر..لكن كل عرق فيها ثار..خاصه يوم تخيلت وش بيكون حال فيصل اللحين وأبوه خطب حبيبته لأخوه..
أسيل تصارخ: وأنت كيف تخطبني؟ أنت أكيد تعرف إني أنا و فيصل نحب بعض! كيف يهون عليك اخوك تسوي فيه كذا؟! أنا ما أبيك تفهم ماااااأبيك
نادر عصب: ولا أنا أبيك بس هالحبيب اللي مو هاين عليك أنتي هنت عليه وخطب غيرك! وعشان كلمة أبوي من سنين لعمي انجبرت اخطبك! ولو رفضتي هالخطبه بتقدمين لي معروف

سكر نادر ورمى الجوال على رغد..اللي كانت مذهوله من اللي سمعته..بس ماقدرت تسوي شي..و قبل يطلع نادر..
رغد تلحقه: نادر أسيل ما كانت تعرف؟
نادر: لا
رغد: حرام عليك وليه تقولها لها بهالطريقه!
نادر يعصب: حرام هي!! وأنا مو حرام؟ أنا وش ذنبي بكل هذا! فيصل يغير رأيه و يتركها وعشان كلمة أبوي هذا أنا خاطب وحده قلبها وتفكيرها مع أخوي،،ما أحد قالها تبني أحلامها مع واحد مايستاهل

وطلع عنها..ورغد انكسر قلبها عليه و على أسيل اللي ما تقدر تتخيل حالتها اللحين..(كله منك يا فيصل،،كيف نسيت حبك لأسيل؟ كيف ما همتك؟ كيف ترخص كلمة أبوي؟ كل هذا عشان سهى ! من متى كنت تحبها؟ طول عمرك ما تشوف غير أسيل وش غيرك؟)
و تذكرت يوم أمس..الصدمه اللي بانت على الكل لحظة ماأعلن فيصل إنه يبي يخطب سهى ..أبوها عصب عليه وقال له إنه لازم يأخذ بنت عمه..بس هو كان مصر على سهى ..واللي ساعده إن أمه وقفت معه..لأن المهم عندها سعادة ولدها مع أيا كان..كيف إذا كان يبي بنت أختها..صح هي تحب أسيل بس أكيد تحب سهى أكثر..و دام فيصل يبيها ما خلت أحد يمنعه.. وهي اللي جابت هالإقتراح إن نادر يخطب أسيل لأنه الكبير..ولأن أبوه ماحدد أحد من عياله..وبكذا فيصل يأخذ اللي يبيها..وأبوه مايخلف وعده مع أخوه.. ماتدري رغد من وين جابت أمها هالإقتراح..ولا تدري ليه نادر وافق..بس من متى نادر يرفض طلب لأبوه أو يزعله..كان يحبه و يحترمه كثير..بس هي كانت خايفه من ردة فعل أسيل إذا عرفت..تمنت تسأل فيصل وش غيره..بس ماكانت تبي تكلمه خافت تفقد أعصابها لأنها ما تتحمل أحد يسوي كذا في أسيل..و الظاهر إنه مو مهتم فيها أبدا..صح فيصل كان مغرور و يحب نفسه..لكنها ما قد تخيلت إن أنانيته توصل لهالدرجه..

أما أسيل فكانت جالسه في مكانها من سكر من عندها نادر..جامده في مكانها..ولا دمعه نزلت من عينها..كانت تعيد كلام نادر..وتعيده..وتعيده..يمكن تحس إنه صدق..يمكن تحس إنه صار..جت عينها على الروايه اللي رمتها على السرير..قبل ساعه كانت زعلانه عليها..كانت تصيح على فراقهم..ليه اللحين مو قادره تصيح..ليه للحين ما ماتت..(لااااا أنا ليه اصدقهم؟ وكأني ماأعرف فيصل! هذا فيصل اللي مستحيل يزعلني كيف بيجرحني كذا؟ كيف بيخونني؟ أكيد فيه سبب،،أكيد فيه غلط)

ومسكت جوالها ودقت على رغد..اللي ماقدرت إلا أنها ترد..ماتقدر تتخلى عن أسيل في هاللحظه..لكنها خافت من مواجهة أسيل وهي منهاره..
رغد: أهلين أسيل
أسيل بترجي: رغد قولي إن اللي قاله نادر كذب،،قولي إن فيصل مجبور على هالشي،، أمك غصبته صح،،أكيد هذا السبب،،أنا اعرف فيصل يحبني مستحيل ينسى كل اللي بيننا،،وش اللي صار؟ ردي علي يارغد و ريحيني،،أنا حاسه إني بأنجن
رغد: آآ أسيل وش رأيك أجي عندك و نتكلم أحسن من التليفون
أسيل تصارخ: لااا أبي اعرف اللحين قولي كل شي
رغد: فيصل بيخطب سهى برضاه و هو بنفسه اللي طلب هالشي و..و..أبوي عصب عليه....

لكن رغد كانت تكلم نفسها لأن أسيل سكرت..بعد ماتأكدت من اللي تبي..مايهمها اللي صار..وكيف صار..أهم شي عرفت إن فيصل نساها..فيصل خان حبها وظلمها..فيصل فضل سهى عليها..فيصل اللي من عرفت الحب حبته..بدت ترتجف و نزلت دموعها..التفتت على العلبه اللي جمعت فيها كذبتها..كذبه عيشها فيها فيصل سنين طويله..(كله كذب! كل اللي عشته كذب! فيصل ماحبني ماحبني مثل ماحبيته،، فيصل كان يتسلى فيني،،ليه تسوي فيني كذا حرام عليك)
فتحت العلبه وهي ترمي كل اللي فيها بقهر،،وصياحها يزيد أكثر..وأكثر..



في بيت أم عمر/

كانت لينا في غرفتها..مطفيه الأنوار..و جالسه تقرأ في كتاب شعر..عندها من أغراض يوسف..قرته للمره الألف..لدرجة تحس انها حفظته..و حفظت كل تعليق..أو خط..كتبه يوسف فيه بيده..كانت نعسانه..و فكرت تروح تنام..دخلت كتابها..في درجها الخاص و قفلته..و راحت لشباكها تسكره..لكنها وقفت هناك متجمده..و هي تشوف في الحوش..مين اللي واقف..كان عمر..و معه طلال..اللي كان يتكلم و يضحك..و كأنه ما عنده أي هم في الدنيا..حقدت عليه..و التفتت تشوف المكان اللي كان فيه ملحق يوسف..و اللي اللحين تساوى بالأرض..صار مجرد مساحه عاديه..ما أحد يتذكرها..لكن هي عمرها ما نستها..و ما بتنساها..كيف و قهرها يشتعل في كل لحظه تشوفهم يمشون عليها..يوطون بأقدامهم المكان اللي كان يوسف ينام فيه..و هي عمرها ما قدرت تخطي برجلها فوق هالأرض..رجعت تطالع طلال بقهر..تشوف يمكن يلتفت على المكان اللي ياما جلس هو و يوسف فيه..لكنه كان يضحك و لا هو مهتم..كرهته أكثر في هاللحظه..كرهت ملامحه..و ضحكته..مو بس تلومه على حزنها..لا.. تلومه بعد على فرحته..ما درت ان ورى هالضحكه فيه قلب من سنين ينزف..و جروحه أكبر من انها تتصورها..رفع راسه لشباكها كعادته كل ما جاء..و هي بعدت بسرعه..و راحت تدفن نفسها في سريرها..مو قادره تتخيل كيف بتقدر يجمعها معه مكان واحد..
طلال حس انه لمح طيفها..لكنه كذب نفسه..التفت على المكان اللي كان ساكنه يوسف..يطالعه بحزن..تخيل احساسها و هي تشوفه كل يوم..(آه يا يوسف الله يرحمك..ليتني كنت مكانك كان كلنا ارتحنا..سامحني لو كنت قصرت في لينا..بس أنا بأحاول احميها لآخر عمري)

في بيت أم فارس/

في الصاله-دخل أبوفارس الصاله و شاف أم فارس..
أبوفارس: وينها العروس؟
أم فارس: في غرفتها
أبوفارس بفرح: الله يوفقهم..ماراح تلقى أحسن من نادر
أم فارس تشهق: نادر!!
أبوفارس: بسم الله وش فيك؟
أم فارس: هو مو فيصل اللي خطبها؟
أبوفارس: لا..عمها خطبها لنادر مين جاب طاري فيصل!

سكتت أم فارس منصدمه..و هي خايفه على أسيل..ما درت هي تعرف إن نادر اللي خطبها أو لا..بس هم دائما يتكلمون عن فيصل..و من فرحت أسيل قبل شوي شكت أمها إنها تعرف إن نادر اللي خطبها..

أبوفارس: أم فارس وين رحتي؟
أم فارس: سرحت شوي
أبوفارس: أنا بأدخل المكتب عندي كم ورقه لازم أراجعهن لين وقت العشاء
أم فارس: زين و أنا رايحه أشوف أسيل

طلعت أم فارس و هي يدها على قلبها..تخاف إنها صدق تحسب إن فيصل هو اللي خطبها..و ما عرفت كيف بتقول لها الحقيقه..
طقت باب غرفتها..و ما سمعت أي صوت..فتحت الباب و شافت الغرفه ظلام..ما عدا نور خفيف جاي من الأباجوره اللي جنب السرير..دخلت أمها و وقفت قريب منها..و شافتها نايمه..
أم فارس بقلق: أسيل نايمه يمه
أسيل تطلع راسها من غطاها: إيه يمه
أم فارس: ما تبين عشاء؟
أسيل: لا يمه فيني نوم عشان ما نمت العصر



أم فارس رحمتها..ماتبي تقول لها اللحين..بس خافت أسيل تكلم رغد أو حلا و تقول إن فيصل اللي خطبها..
أم فارس بحنان: باسألك يمه شي

أسيل حست بخوف أمها اللي بان في صوتها..و عرفت عن أيش جايه تسأل..جلست على سريرها..و هي مرتاحه إن النور الخافت ماراح يخلي أمها..تلاحظ عيونها الحمراء..
أسيل: نعم يمه
أم فارس بتردد: أنت تعرفين عمك لمين خطبك؟
أسيل تتصنع البرود: إيه يمه لنادر أبوي ما قال لك؟
أم فارس تتنهد بإرتياح: لا بس أنا توقعته فيصل
أسيل تعض شفايفها بقوه: كلهم عيال عمي
أم فارس: يعني أنت موافقه على نادر
أسيل تضحك: أكيد يمه مو توك مباركه لي
أم فارس: الله يوفقك و يسعدك يا بنتي..يله كملي نومتك

طلعت أم فارس و هي مرتاحه بعد ما صدقت كذبة بنتها..و أول ما طلعت و سكرت الباب..دفنت أسيل وجهها في وسادتها و بدت تصيح..و تصيح..و ما فيه بخيالها غير سؤال واحد..يتردد بدون إجابه..ليه فيصل يسوي فيها كذا..حست بالقهر و الإهانه..و هي تشوف نظرات أمها الشفقانه على حالها..كيف بكره بتتحمل نظرات الباقين..و أول ما خطروا في بالها مرام و سهى ..حست إنها تتمنى تموت قبل تشوف الشماته في عيونهم..

دخل سيف البيت و ابتسم أول ما شاف أمه نازله من فوق..
سيف: مساء الخير يا أم فارس
أم فارس: مساء النور..غريب اليوم راجع بدري تتعشى معنا؟

سيف: لا ببأبدل و اطلع..وش أخباركم؟
أم فارس: عمك جاء اليوم و خطب أسيل
سيف يشهق: النذل فيصل و لا قال لي! أشوفه من أمس وهو مختفي و لا.......
أم فارس تقاطعه: مو فيصل اللي خطبها
سيف يطالع أمه بإستفهام: وشو؟!
أم فارس: عمك خطبها لنادر
سيف انصدم: كيف نادر؟ و فيصل اللي يبيها!!
أم فارس: أسيل تقول عادي كلهم عيال عمها
سيف بذهول: أسيل عرفت و تقول عادي!!

طلع لها سيف بسرعه..و أمها بدت تشك بموقف أسيل الهادي من هالخطبه..(حتى سيف متأكد إنه فيصل يعني اللي كنت احسه صح..أسيل تبي فيصل..بس ليه وافقت على نادر؟ عشان أبوها و عمها؟ و فيصل ليه ما قال إنه يبيها؟ الله يستر و يكتب لك اللي فيه الخير يا بنتي)

عند باب غرفة أسيل وقف سيف يتنهد..ما ستوعب اللي سمعه..و لا صدق إن أسيل اللحين مو غارقه فدموعها..و قبل يدخل قرر يدق على فيصل يسأله..(لازم أعرف أول وش صار؟ معقول عمي خطب من كيفه لنادر عشانه الكبير!)
دق على فيصل أكثر من مره لكنه ما رد..خلاه بعدين و دخل يتطمن على أسيل..أول ما دخل و شغل الأنوار..سمع صوتها المتضايق..
أسيل: يمه طفي النور راسي يوجعني

طفى سيف النور و دخل..
سيف: مو ضروري نور عشان أعرف إنك تصيحين

فزت أول ماسمعت صوته..و جلست على السرير..وهو بعد جلس مقابلها على السرير..
سيف: أسيل أكيد فيه سؤ تفاهم أنا مادري ليه فيصل ما قال لهم إنه يبيك! معقول للحين ما يدري؟ المشكله أدق عليه مايرد..يمكن زعلان؟

أسيل كانت تحاول تهدي نفسها ما تثور..لكن كلام سيف و عدم تصديقه باللي صار..ذكرها بغبائها..
أسيل تصيح: فيصل يدري يا سيف...فيصل خطب بنت خالته....و نادر انجبر يخطبني عشان كلمة عمي لأبوي من سنين
سيف ماستوعب: مستحيل!
أسيل: رغد اللي قالت لي إن...إن فيصل...ما يبيني

رجعت تصيح..و سيف انكسر قلبه عليها..و عجز يتصور ليه فيصل يسوي فيها كذا..ضمها يهديها..لكن دموعها زادت..
سيف: لازم أكلمه..ليه سوى كذا؟ من متى طلعت بنت خالته هاذي!
أسيل بقهر: لا يا سيف..لا ترخصني مثل ما سوى هو..وش بتقول له؟ ليه ما أخذت أختي؟ بتقول ليه ما تبيها؟

سكت سيف..وهو يفكر إن معها حق باللي تقوله..
سيف: أسيل ليه وافقت على نادر؟ عشان أبوي و عمي؟
أسيل: إيه
سيف: تبيني أكلم أبوي أقول له إنك ما تبين.....
أسيل بحزن: تبي أبوي يرد عمي بعد اتفاقهم كل هالسنين!
سيف يتنهد: أجل وش تبيني أسوي و أنا اشوفك بهالحال؟
أسيل: مادري يا سيف مو قادره أفكر اللحين
سيف بحنان: خلاص حبيبتي ارتاحي اللحين..و بكره يصير خير

طلع سيف..و أسيل لأول مره في هاليوم تستوعب هالحقيقه..إنها اللحين مخطوبه لنادر..تذكرت كيف قال لها إنه مجبور على هالخطبه..و إنه ينتظر يفتك منها..(احس راسي بينفجر..كيف تنقلب حياتي كذا فجأه..حرام عليك يا فيصل)
و نامت و الأفكار تدور في راسها..و الدموع ساكنه في عيونها..



في بيت أم عمر/

كانت حلا في الصاله تشوف التلفزيون..و دق جوالها..
رغد: حلا
ح بسم الله وش فيه صوتك؟
رغد: مصيبه يا حلا
ح وش فيه؟ خوفتيني؟
رغد: فيصل بيخطب سهى و نادر خطب أسيل
ح هاهاها قويه جربي وحده أخف يمكن أصدق

رغد بعصبيه: حلا أنا اتكلم جد
حلا بخوف: من صدقك أنت؟
رغد: إيه أسيل وافقت على بالها أبوي يتكلم عن فيصل..و يوم عرفت قفلت بوجهي..و بعدها أدق عليها مقفله جوالها
ح و فيصل ليه يخطب سهى؟
رغد: مادري فجأه أمس قال لنا الخبر و أصر عليها و لا اهتم حتى لزعل أبوي و أبوي عشان كلمته لعمي طلب من نادر يخطبها
ح أكيد صار بينهم شي و أنتم عند خوالك
رغد تتذكر: تصدقين صح أيامها كانت سهى طايره من الفرحه
ح و اللحين وش بنسوي مع أسيل أكيد حالتها صعبه
رغد: أنا بكره بأروح لها..تجين؟
ح أكيد



*من بكره*

في بيت أم عمر=الساعه ثمانيه صباحا/

طلع عمر من البيت..لكنه وقف عند الباب..وهو يشوف مساهير رجعت..شافها تنزل الشنط و الأغراض من السياره..كانت فيه سياره فيها شباب تمشي بشويش..و كأنهم ناوين يوقفون عندها..طلع عمر..و أول ما شافوه مشوا بسرعه..رفعت مساهير راسها..و شافت عمر جاي لها..و بدأ قلبها يدق بقوه..
عمر: ليه واقفه بالشارع تنزلين هالشنط؟ وين راشد؟
مساهير: و أنت وش دخلك؟
عمر: يعني عاجبتك وقفتك هنا قدام اللي رايح و اللي جاي؟
مساهير: لا مو عاجبتني و أنت الصادق وقفتك هنا عندي..ممكن تروح؟
عمر عصب: وين راشد؟ ليه ما ينزل الأغراض هو؟
مساهير انقهرت من صراخه: عمر بعد عني روح للمكان اللي تبي تروح له وش دخلك أنا وش اسوي!

عمر سكر شنطة السياره و سحب المفاتيح..
عمر: اذا بغيت يكون لي دخل بيكون لي دخل
مساهير تصارخ: عمر عطني المفاتيح

أم راشد كانت واقفه في الحوش تنتظر مساهير تدخل الشنط..لكنها تأخرت..و سمعتها تصارخ و خافت عليها..تغطت و طلعت..
أم راشد: عمر!

عمر انتبه لها و أبعد عن مساهير وهو منحرج..
عمر: هلا خالتي وش أخبارك؟
أم راشد: الحمدلله يمه..وش فيكم؟
عمر: الله يهديك يا خالتي كيف مخليتها واقفه في الشارع كذا تنزل الأغراض؟ وينه راشد؟
أم راشد: والله يمه أدري بس راشد تعب علينا في الطريق و ياله قدر يوصلنا و دخل يرتاح..و أنا كنت أبي علاجي في الشنطه
عمر بقلق: وش فيه راشد؟
أم راشد: و الله مادري وش فيه يقول تعبان و دايخ..يمكن تلبك معوي..مادري وش آكل هالولد
عمر بشرهه: زين ليه ما دقيتوا علي أجيبكم
أم راشد: قال انه يقدر يوصل للبيت
عمر: خليه يطلع بأوديه المستشفى عشان نتطمن عليه...و أنتي ادخلي أنا أنزل الأغراض و ادخلهن في الحوش

مساهير طالعته بقهر..كيف يأمرها كذا..و كأن له دخل فيها..طالعت أمها تبيها تقول شي..لكن أمها قهرتها أكثر..
أم راشد: ادخلي يا مساهير صحي راشد و يمكن تلقينه ما نام بعد

طالعت عمر بقهر..وهو طالعها بإنتصار..و راحت بسرعه لداخل..وهو بدأ ينزل الأغراض..وهو يتذكر صوتها..و ترجع ملامحها تنرسم قدامه..يبي ينساها بس ما يقدر..آخر شنطه نزلها عرف انها شنطتها من لونها التفاحي..و من قهره عليها رمى الشنطه بقوه..و كأنه بهالشي ينتقم منها..لكنه انصدم وهو يشوف الشنطه اللي شكلها ما كانت متسكره زين..تنفتح..و تنتثر أغرضها و ملابسها على الأرض..حس بالإحراج لو أحد طلع و شافها كذا منتشره على الأرض..طالع الباب و ارتاح انهم للحين ما طلعوا..و راح يلم ثيابها بسرعه..و يشيل الأغراض اللي طاحت في الأرض..و يسكر شنطتها بسرعه..و يطلع من البيت..وهو يحاول يرجع نفسه اللي راح..شم بيدينه ريحة عطرها اللي انتشرت من ملابسها..وهو يتنهد..(أبي اكرهك يا مساهير..أبي ارجع اكرهك مثل ما صرت من بعد فراقك..ليه هالكره كل يوم يخف من قلبي أكثر..ما أعرف ما أحملك شعور في قلبي..ما أعرف اعاملك كأي وحده..و ان ما كرهتك...أخاف اني...)
هز راسه وهو يرفض الفكره اللي جت في باله..أو من اسبوع و هي في باله..طلع له راشد..و أخذه و راح للمستشفى..
و مساهير وقفت في الحوش تطالع الأغراض اللي دخلها..و تتذكر كيف كانت واقفه تتهاوش معه قبل شوي..و مع انها قهرها..الا انها ابتسمت لا نها تذكرت هوشاتهم و عنادهم يوم كانوا صغار..



في بيت أم فارس/

صحت أسيل الصبح..بعد نوم متقطع..و أحلام مزعجه..قامت من سريرها تسحب رجلينها سحب..جلست على كرسي تسريحتها..تشوف نفسها بنظرات شارده..تطالع وجهها الشاحب..و عيونها الحمراء..(مرتاح اللحين يا فيصل؟ كنت حاسه إن سهى تخطط لشي بس ما توقعت هالخطط تنجح لدرجة تآخذك مني..حاسه إني أحلم..و اتمنى أصحى من هالحلم بسرعه)
فكرت في سهى و مرام..كيف بتتحمل تشوفهم مره ثانيه..كيف بتتحمل نظرات الشماته و الإنتصار..و نظرات التساؤل..و الرحمه..بعيون أهلها..(ما راح استحمل هالشي..لازم ألقى حل)
فكرت و فكرت..و هي تحاول تمنع دموعها تنزل من جديد..لازم من اليوم تتعلم كيف تحبسهن..و لا تخلي الناس تشفق عليها زياده..
نزلت أسيل بكل برود..بتحاول إنها ما تفكر..ما تحس..تتناسى هالنار اللي قايده داخلها..رسمت على وجهها إبتسامه..و هي تشوف أبوها و أمها و فارس و سيف..
أسيل: صباح الخير
الكل: صباح النور

أمها و سيف كانوا يطالعونها بشك..و إستغراب من هالهدؤ ..كانت تسولف مع أبوها و فارس و تضحك..عكس حالتها أمس..أمها ارتاحت إنها بخير..لكن سيف كان متأكد إن ورى هالقناع فيه قلب مجروح و يكابر..كان يحس بقهر على فيصل و ما يبي يشوفه..مو متصور لو شافه وش بيقول له..وش بيسوي فيه..استغرب كيف كان قريب منه كل هالسنين و آخرتها يسوي كذا بدون لا يهتم فيهم..

طلعوا العيال مع أبوهم..لأنهم كانوا معزومين على الغداء..و أسيل و أمها جلسوا في الصاله..و تفاجأوا يوم دخلوا عليهم رغد و حلا..سلمت عليهم أسيل و هي عارفه سبب هالزياره..جايات يواسونها..(وش اللي يواسيني بخيانة ست سنين حب)
كانت جالسه تسولف كعادتها ما تغير فيها شي..و رغد و حلا يطالعون بعض بإستغراب..بس ما قدروا يكلمونها بوجود أم فارس..
بعد ربع ساعه قامت عنهم أم فارس..و أول ما طلعت من الصاله..قامت رغد و حلا و جلسوا جنب أسيل..لكنها للحين بهدؤها مع إنهم توقعوا إنها كذا بس قدام أمها..
رغد: أسيل ليش ساكته؟
أسيل: مابي اتكلم
ح بس كذا ماراح ترتاحين
أسيل: و إذا تكلمت بأرتاح! إذا صحت بأرتاح! إذا قلت إن فيصل بعد هالسنين باعني بلحظه بأرتاح! إذا قلت وش كثر أكره اللحظه اللي بأشوف فيها سهى و مرام و نظرات الشماته بعيونهم بأرتاح! إذا قلت إني اللحين مخطوبه لواحد ما يبيني و ينتظر أفكه مني و أنا مو قادره بأرتاح! عن أي راحه تتكلمون؟ اسمعوني زين مابي أحد يكلمني فهالموضوع(تصارخ) ولا تطالعوني بهالنظرات الشفقانه..لا تخلوني أكره نفسي أكثر ما أنا كارهتها
رغد: خلاص هدي نفسك يا أسيل ولو كنتي ماتبين تتكلمين على راحتك بس اعرفي إننا دائما جنبك

جلسوا عندها البنات و تغدوا..و هي ما افتحت السالفه مره ثانيه أبدا..و لا سألت عن أي شي..و بعد ساعتين طلعوا رغد و حلا..اللي كانوا جايين في سواق أم عمر..
في السياره-
حانصدمت من حالة أسيل
رغد: و أنا بعد توقعت تصارخ..تسأل..تناقش و تعترض لكنها كانت هاديه و هدؤها ما ريحني
ح مو كذا أريح لها
رغد: مو زين انها تكتم في نفسها..ليه ما نتكلم يمكن ترتاح
ح مثل ما قالت..يعني لو تكلمت بترتاح؟ كلامنا بس بيزيد قهرها و حنا ماراح نغير أي شي من اللي صار..خليها كذا تحاول تنسى احسن
رغد تتنهد: كيف تنسى؟ و اللي صار ماله حل..حتى لو حاولت تنسى فيصل أنتي ناسيه انها اللحين مخطوبه لنادر..اللي تدري انه مغصوب يخطبها..وهو اخو اللي تحبه..و كانت بنفسها تخطط عشان تزوجه..كل هذا كيف بتنساه و هي فيه
ح و الله مادري الله يعينها..يعني ما فيه أمل على الأقل يفسخون هالخطبه؟
رغد: نادر ما ظن يسويها و إلا كان ماوافق من الأساس..و كيف تبين أسيل ترفض من بعد ما وافقت
حلا بقهر: احس اللحين لو اشوف هالسهى فجرت فيها
رغد: و أنا مو قادره اشوف فيصل بعد اللي سواه..للحين مو مستوعبه..كيف أجل أسيل و نادر
ح يعني خلاص ما فيه حل؟!
رغد: مادري

وصلتها حلا لبيتها..و راحت..دخلت رغد للبيت..و هي بتدخل غرفتها..شافت نادر يطلع من غرفته..
نادر بتجهم: صباح الخير
رغد: صباح النور
نادر: من وين جايه هالوقت؟
رغد: كنت عند أسيل

مشى عنها خطوتين..لكن شي خلاه يوقف و يسأل..
نادر: ليه كنتي عندها هالوقت؟
رغد ارتبكت: أمس ما كلمتها قلت أروح أشوفها اليوم
نادر بقهر: قصدك تواسينها على بلوتها فيني
رغد: نادر وش هالكلام! هي بعد انفرضت عليك و أنت بنفسك قلت لها هالشي..يعني كلكم مظلومين
نادر: ماراح تفسخ الخطبه؟
أسيل: ما تقدر تقولهم لا..و هم يعرفون إنها راضيه كل هالسنين
نادر: أجل تتحمل أنا ماراح أكسر كلام أبوي قدام عمي

تركها و راح..وهو يحاول قد ما يقدر يكبت القهر اللي داخله..(الكل يعرف كبير و صغير بحبهم لبعض..بعد كل هالسنين آخذها أنا..كيف انقلبت حياتي بلحظه و انهدمت كل أحلامي! ما فيه أمل إلا إن فيصل يرجع لها و لا يخطب بنت خالته..هذا الحل الوحيد)



في بيت أم العنود=المغرب/

كانت جوري في غرفتها تفكر..مر أسبوع على العيد..و هي ما سمعت شي عن خطبة فارس..ما تدري إن كان رضا أو رفض..خافت تسأل..و مو طايقه تنتظر..طول هالأسبوع و هي غصب تآكل..غصب تتكلم..غصب تضحك..ما كان لها خلق تسوي أي شي..بس خافت أحد يلاحظ تغيرها..و يسألها عن السبب..ملت و هي جالسه لحالها..و نزلت لأم العنود..و هي بتدخل الصاله..سمعت صوت أم العنود..و كلامها خلى قلبها يوقف..وقفت تتسمع بخوف..
أم العنود: مبروك يا أم فارس

نزلت دموعها بسرعه..كانت بتروح لغرفتها..لكنها وقفت و هي تسمع أم العنود تكمل كلامها..
أم العنود: الله يوفقها و عقبال اخوانها

مسحت جوري دموعها..و وقفت تسمع..
أم العنود: و فارس وش صار عليه؟ اقنعتيه؟

هنا كل أعصاب جوري انشدت..و هي تنتظر اللي بتسمعه..
أم العنود: الله يهديه وش اللي مو وقته! ينتظر لين ما يصير بالأربعين

كملت أم العنود كلامها..لكن جوري ما اهتمت للباقي..حست انها من أسبوع توها تتنفس بشكل طبيعي..بعد ماراح الثقل اللي كان بقلبها كل هالأيام..فرحت و دخلت عند أم العنود..تبي تتأكد من اللي سمعته..(شكل فيصل خطب أسيل..ياعمري تلقينها اللحين طايره من الفرح..بأتأكد من أمي حصه عشان ادق أبارك لها)
دخلت عندها..
جوري: مساء الخير يمه
أم العنود: مساء النور يمه..وينها ياسمين؟
جوري: تكلم عبير
أم العنود: دقي يمه باركي لأسيل خطبها ولد عمها
جوري بفرح بعد ما تأكدت: والله!!
أم العنود: ايه مع انه كبير نادر عليها..بس ما عليه نادر رجل ما يعيبه شي
جوري انصدمت: نادر!!
أم العنود: ايه ولد عمها نادر..ما تعرفينه؟!
جوري: لا يمه فيصل اللي بيخطبها
أم العنود: ايه أنا فكرت بعد انه فيصل..بس شكل عمها يبيها للكبير
جوري للحين ما ستوعبت: و أسيل وافقت؟؟
أم العنود: ايه
جوري: عن اذنك يمه اروح اكلمها

راحت جوري لغرفتها تركض..ما تخيلت اللي سمعته..كيف يخطبونها لنادر..و هي ليه وافقت..كانت بتدق عليها..بس ما عرفت وش تقول..لكنها لازم تدق و تتطمن عليها..هي من أيام حست انها بتفترق عن فارس و كانت بتموت من القهر..و هي ما بينها و بينه أي شي..كيف أسيل تفترق عن فيصل فجأه..بعد كل هالحب..دقت عليها..
أسيل: مرحبا جوري
جوري: أهلين أسيل

أسيل: هلا فيك..وش أخبارك؟
جوري:.......
أسيل: جوري وش فيك ما تردين؟
جوري: مو عارفه وش أقول؟!
أسيل تتنهد: عرفتي بسالفة خطبتي أكيد
جوري: ايه..ليه صار كذا

قالت لها أسيل السالفه..و هي تعود نفسها تقولها..بدون تنزل دموعها..و تخلي الجرح في قلبها ما يطلع..
جوري تدمع عيونها: مادري وش اقولك يا أسيل عارفه ان كل الكلام لا يمكن يواسيك..ما فيه شي بيخفف اللي أنتي تحسين فيه..ما أحد بيقدر شعورك غيرك
أسيل: تدرين يا جوري أنت أول وحده تقول اللي أنا حاسه فيه..و للحين خايفه افكر بعدين وش بيصير فيني
جوري: حتى لو ما انتهى من قلبك بس فيصل خلاص ماراح يفيد التفكير فيه و في اللي سواه..أنتي المفروض تفكرين بالوضع اللي انحطيتي فيه مع نادر
أسيل: المشكله ما بيدي شي اسويه..أنا وافقت قدام عمي..و وافقت من سنين كيف اللحين اقولهم لا؟
جوري: بس مو أنتي قلتي ان نادر يبي يخطب من بنات خالته..ليه ما يقول لأبوه هالشي..يمكن...
أسيل تقاطعها: نادر ماراح يعارض عمي بشي..ما سواها من سنين و ماراح يسويها اللحين
جوري: اتمنى تنحل هالمشكله كيف مادري..بس تأكدي قلبي معك يا أسيل..عارفه ان ما بيدي شي بس لو احتجتي أي شي دقي علي لو بس عشان تتكلمين
أسيل: مشكوره يا جوري
جوري: مع السلامه
أسيل: مع السلامه

سكرت أسيل و هي تحس ان الدنيا كل شوي تسود في عينها أكثر..(مين أصدق بعدك يا فيصل؟ أبي اسألك بس ليه سويت كذا؟ ما كنت تحبني؟ أو من بعدي حبيت سهى...و من متى تحبها..و أنا مثل الغبيه مو حاسه في أي شي.....و نادر هم ثاني مو عارفه وش راح نسوي بحالتنا..نادر بالذات صعب اتخيله زوج لي...لاااا معقول نوصل لين الزواج..مستحيل هالشي يصير..لازم يكون فيه حل)

في إستراحة الشباب/

كانوا الشباب مجتمعين كالعاده و معهم بعض أصدقائهم..لكن المره هاذي تأخر الوقت..و لا جاء غير فارس و عمر و طلال اللي كان يعرف سبب تغيب إخوانه..
عمر: وينهم الشباب شكلهم مو ناوين يجون؟
فارس: دقيت عليهم؟

عمر: كسرت جوالاتهم و لا واحد فيهم رد شكلهم مسوين إضراب
فارس: هذا سيف جاء
عمر: بدري! وينك؟
سيف مكشر: هذا أنا قدامك
عمر: بسم الله لا تأكلنا
فارس: وينه فيصل؟
سيف بقهر: مادري

رد سيف من غير نفس..وهو يفكر بفيصل..اللي كان أقرب واحد له..الكل يشوفهم دائما مع بعض..و أخبار كل واحد عند الثاني..لكن فيصل خذله..خانه قبل يخون أسيل..هو الوحيد اللي إأتمنه عليها..عطاه الحق يبين لها حبه..يعلقها فيه..كل هذا لأنه واثق بفيصل..لكن بالأخير فيصل رمى كل هذا وراه..
عمر: بدري أخ فيصل

فيصل استغرب وجود سيف ما توقع يكون موجود لأنه أكيد ما يبي يشوفه..أما سيف فكان منزل راسه في الأرض وهو يحس بالقهر..فيصل كان يسلم على الشباب و وصل عند سيف..رفع سيف راسه يطالعه بقهر..كيف يجي بهالبرود و يوقف قدامه و لا كأنه سوى شي..تذكر أسيل وحالتها..تذكر دموعها..و حزنها..وقف قباله و عطاه بوكس على وجهه بكل قوته خلاه يطيح على الأرض..تركهم و راح و الكل مصدوم من اللي سواه..تجمعوا على فيصل اللي قام عن الأرض وهو يمسح الدم اللي سال من فمه..سألوه وش فيهم..لكنه ما رد و تركهم هو بعد و راح..
عمر انصدم: وش فيهم؟ انجنوا!
فارس بإستغراب: طلال ليه ساكت تعرف شي؟
طلال: لا..بس يمكن متهاوشين



في سيارة فيصل/

كان جالس في سيارته بعد ما طلع من الإستراحه وهو معصب..ما تخيل في يوم يصير هالموقف بينه و بين سيف..كان عاذره على قهره..و متوقع منه أكثر..بس بعد حز في خاطره هوشتهم..(أنا غلطان كان لازم أكلم سيف أول..مو يتفاجأ باللي صار..بس لأني عرفت إنه مستحيل يفهمني أو يعذرني)
تذكر الأيام اللي راحن في بيت خواله..خلته يسمع عن سهى أكثر..يكلمها أكثر..شافها صدفه بالعيد..و صارت له مواقف معها..خلته يعرفها أكثر..و يحبها..عكس أسيل اللي بحياته ما شافها..أو وضحت له حبها..حس إنها متقبلته كأمر تعودت عليه..(اللي يحب يبين عليه..مثل سهى باين حتى من سلامها..من كلامها معي..لكن أسيل تتهرب من أي فرصه تجمعني فيها..و بحياتها ما هتمت فيني)
تذكر عند خواله كيف كانت تهتم فيه..كل شي يطلبه..أو بس يحتاجه بدون يطلبه..يلقاها جابته له..هذا دليل على إهتمامها..على إنها تفكر فيه كل وقت..
شغل سيارته و مالقى مكان يروح له إلا البيت..لأنه كان طفشان و ماله خلق يشوف أحد..
دخل البيت و شاف رنا اللي أول ما شافته كشرت في وجهه..و رجعت تكمل كلامها بالتليفون..طنشها و طلع لغرفته..و قبل يدخل شاف رغد بتطلع من غرفتها..و أول ما شافته وقفت لحظه قبل تصد عنه و تدخل غرفتها..عصب أكثر و دخل غرفته و ضرب الباب بقوه..كان يدور في غرفته بقهر..لكنه ما استحمل..و راح لغرفتها..فتح الباب بقوه خلاها تفز..
فيصل: و بعدين يعني! ماراح تكلموني أبدا؟
رغد اتفاجأت: أكيد لا..أنت اخوي يا فيصل مهما سويت
فيصل: يعني زعلانه مني؟
رغد بقهر: أكيد زعلانه و مقهوره بعد.. فيصل أنت متوقع إن اللي سويته سهل!
فيصل: ما قلت إنه سهل بس....كنت أبيك تقدرين شعوري أنا بعد
رغد: شعورك! هذا اللي قهرني أكثر..من متى عندك شعور اتجاه سهى ؟ و مشاعرك اللي من سنين لأسيل وين راحت؟
فيصل: اللي صار صار يا رغد ما يفيد اللحين اتكلم عن الماضي مع أسيل..لا تنسين انها اللحين خطيبة نادر..يعني لازم تنسى و أنا انسى اللي كان بيننا..وهو أصلا ما فيه شي كثير نتذكره
رغد انصدمت: ماضي!! لحق يكون ماضي..و كل هالسنين نسيتها..كل هالسنين تشوفها ما تسوى تتذكرها!! مو قادره افهمك يا فيصل؟ وش غيرك؟ من متى حبيت سهى ؟

فيصل: هالوقت القصير مع سهى و صلني منها أكثر من اللي وصلني من أسيل كل هالسنين
رغد بسخريه: هذا الحب بنظرك يا فيصل؟ شي لازم تشوفه..و كيف وصلت لك حبها ؟
فيصل: رغد..هاذي بنت خالتك و بتكون خطيبتي ماراح اسمحلك تتكلمين عنها كذا
رغد: خلاص يا فيصل أصلا ما فيه شي نتكلم عنه..و تبي الصراحه أسيل كانت خساره فيك دامك تغيرت بهالسرعه
فيصل: صدقيني بتنسى لانها تعودت علي لا أكثر مو كل هذا حب
رغد: هذا اللي اقنعت فيه نفسك عشان تبرر اللي سويته
فيصل: افهميه مثل ما تبين

تركها و طلع لغرفته..و نادر اللي كان طالع من غرفته و سمع كلامهم..أول ماسمعه طالع رجع لغرفته..وهو يفكر..(ماراح يرجع لها..بعد كلامه أكيد انه يبي بنت خالته..مادري وين الحب اللي اسمع عنه من جيت..شكلها هي اللي كانت تحبه..وهو لا..لو كان يحبها ما نساها بهالسرعه)
احتار ما يدري وش يسوي اللحين..حس انها كاسره خاطره بعد اللي سواه فيها فيصل..لكن ما بيده حل يساعدها فيه..يدري انها ما تبيه..أكيد هو بالذات..لأنه أخو فيصل..بس كيف يقول لأبوه و عمه لا..



في بيت أم راكان/

دقت سهى على مرام و الدنيا مو سايعتها من الفرحه..
سهى: باركي لي يا مرام و أخيرا..مو قادره أصدق!
مرام: وش صاير؟
سهى: خطتنا نجحت مو عارفه كيف اشكرك يا مرام
مرام فرحت: أي خطه؟
سهى: خالتي كلمت أمي و قريبا جدا بيجي فيصل يخطبني
مرام تشهق: والله! فيصل ترك أسيل
سهى: إيه بعد كل اللي صار عند خوالي دخلت قلبه يا مرام و ما بقى مكان لها
مرام: قلت لك خليك أقرب له منها خليه يشوفك و يعرفك..شفتي صارت أسيل مجرد ماضي كان متعلق فيه..ألف مبروك
سهى: الله يبارك فيك

سكرت مرام و هي تضحك..تحس بلذة الإنتصار..و تتمنى تشوف حالة أسيل اللحين..طلعت من غرفتها و شافت ريهام شكلها كانت جايه لها..
مرام: وش عندك؟ كأنك جايه بتقولين شي
ريهام: سمعتي الأخبار الغريبه؟
مرام بغرور: قصدك خطبة فيصل؟
ريهام: لا مو فيصل..اللي خطبها نادر
مرام ماستوعبت: أنت عن إيش تتكلمين؟
ريهام: كلنا نعرف إن أسيل مخطوبه لواحد من عيال خالي بس توقعته فيصل باين من كلامهم لكن اللي خطبها نادر
مرام بصدمه شلت تفكيرها: نادر..خطب أسيل..(تصرخ)كيف عرفتي؟
ريهام: أمي كلمت أم فارس و قالت لها و.....

لكن مرام ما سمعتها..دخلت الغرفه و سكرت الباب بكل قوه..و قهر..قفلته عشان ما تدخل وراها ريهام..سمعتها تطق و تتكلم لكنها ما هتمت..كانت مصدومه من اللي سمعته و لا تبي تصدق..(لااااا مستحيل هالشي يصير..أسيل تآخذ نادر مني!!و الله أموتها قبل يجي هاليوم)
راحت تتأكد من الخبر..من أمها بنفسها..و رجعت لغرفتها..بعد ما تأكدت من أمها..إن خبر هالخطبه صحيح..حست انها بتنجن..ما صدقت انها بعد مارتاحت من أسيل..تأخذ منها نادر مره وحده..(لو تموتين يا أسيل..ما تاخذينه)
دقت على سهى..
سهى: هلا بأحلى مرام
مرام بقهر: سهى بأموت من القهر
سهى خافت: مرام خوفتيني وش فيك؟
مرام: نادر خطب أسيل
سهى تشهق: وشو؟؟!!
مرام بحقد: اللي سمعتيه..الظاهر يوم فيصل رفضها خالي خطبها لنادر
سهى انصدمت: لاااا و أسيل كيف وافقت عليه؟! وهو كيف رضى فيها؟ يعني ما يدري انها تحب فيصل!
مرام: مادري يمكن غصبوها
سهى: وش بنسوي؟
مرام: طبعا ما راح اتركها تاخذه
سهى: وش بتسوين؟
مرام: لازم ألقى حل

سكرت سهى من مرام..و الفرحه اللي كانت طايره فيها..تبددت..خافت يتم زواج نادر و أسيل..حست ان مرام يمكن تحاول تخرب بينها و بين فيصل عشان يرجع يأخذ أسيل..(لا مرام هي اللي ساعدتني في هالشي..و ما قالت انها لو كانت مع فيصل احسن..هي ما تبيها قريبه منها أبدا...يارب تلقى حل..و تتفركش هالخطبه و تتزوج نادر عشان ارتاح)




*يوم السبت*

في كلية اللغة الانجليزيه/

قبل تبدأ المحاضره الأولى..وصلت رغد و سلمت على بسمه و طيف..و التفتت على حلا..اللي كانت هي بعد توها واصله..
رغد: ما جت أسيل؟
ح ما أظن انها بتجي
بسمه استغربت من تكشيرهم: ليه لا يكون تعبانه؟
رغد: فيصل خطب بنت خالتي
طيف و بسمه: و أسيل؟!!
رغد: خطبها اخوي نادر
طيف: ليه صار كل هذا؟ مو هم يحبون بعض؟

قالت لهم رغد اللي صار..و قالت لحلا اللي قاله فيصل..
طيف: يا عمري يا أسيل
رغد: بس يا بنات لاتفتحون معها السالفه لأنه باين انها مو حابه تتكلم فيها..و ما تبي أحد يشفق عليها أخاف تتضايق زياده
بسمه: الله يعينها..أجل كيف بتتحمل لو قابلت سهى
رغد: والله مو عارفه وش اسوي لا معها و لا مع نادر اللي ساكت و ما تكلم بأي شي

في المستشفى=المغرب/

كانت ياسمين طالعه من غرفة الملفات..و شافت ماجد واقف يكلم حنان..تأففت من خاطرها..كانت تظن انه خلاص ماراح يرجع مره ثانيه..و اللي قهرها زياده ابتسامته الواثقه..و كأنه يحس انها المفروض تفرح بشوفته..قررت تسفهه و لا كأنه موجود..و راحت للمراجع اللي شافته جاي عندهم..و كان نفس المراجع اللي يشبه أبوها..حاولت انها ما تطالع فيه كثير..بعد ما تأكدت ان ماله أي صله فيهم..لكنها ما قدرت الا انها تسرق نظرات له بين لحظه و الثانيه..و نست وجود ماجد..اللي كان يراقبها بقهر..و تفاجأت يوم سحب منها الملف و رماه على المراجع..طالعته بقهر..و طالعه المراجع بإستغراب..
المراجع: خير أخوي! فيه شي؟
ماجد: ايه..خذ ملفك و لا أشوفك بهالمستشفى مره ثانيه
المراجع بقهر: و بأي صفه تطلب هالطلب؟
ياسمين بقهر: ممكن تروح للي أنت جاي لها و تتركني اشوف شغلي
ماجد و لا كأنه سمعها: ان كنت ماتبي تتورط بمشاكل أنت مو قدها اطلع اللحين أحسن
المراجع عصب: وين المدير؟
ماجد: حنان..اطلبي خالي أبوفايز و قولي ان فيه مراجع متحرش بموظفه هنا
ياسمين عصبت: أنت وش جالس تقول؟! هو ما سوى شي
ماجد بعناد: حنان تحرش أو لا؟
حنان تجاريه: ايه تحرش و مو أول مره بعد دائما كل ما جاء يضايقنا
ماجد: تشهدين يا فاتن؟

ياسمين كانت تحس ان الدم بدأ يغلي بعروقها..و طالعت فاتن..اللي بنظرات خايفه و معتذره..نزلت راسها..
فاتن: ايه اشهد
ماجد يلتفت للمراجع: هاه للحين تبي المدير..و الا تروح و بلا فضايح؟

أخذ المراجع ملفه بقهر و تركهم..و التفت ماجد لياسمين يطالعها بنظرة انتصار..
ماجد: معليش حلوتي اعرف انه معجبك بس بهالمستشفى يا أنا يا ما فيه أي جو غيري
ياسمين تصارخ عليه: أنت واحد حقير..حقير و تافه و الأفكار القذره اللي تفكر فيها تحسب الكل يفكر مثلها لكن لا إن كنت راضي على نفسك تكون واطي فيه ناس للحين عندها أخلاق و محترمه نفسها

وقف ماجد يطالعها بنظرات عجزت تحدد معناها..لكنها طالعته بإستحقار يأكد له كل كلمه سمعها منها..تركها و راح..فاتن كانت ترتجف من الخوف..ما تخيلت من أول ما شتغلت ان فيه وحده تقدر تقول لماجد هالكلام و بوجهه..أما حنان فراحت ورى ماجد..لكنها رجعت بعد لحظات..
حنان تطالعها بفرح: راح لمكتب المدير

كانت ياسمين للحين واقفه وهي تتنفس بقوه مقهوره منه كانت تتمنى تخنقه بيدينها..قطعت أفكارها فاتن وهي تمسك يدها اللي كانت ترتجف من كثر غيضها..
فاتن: ياسمين ليه سويتي كذا؟ أنت ماتدرين إنه يقرب للمدير أكيد راح يطردك من شغلك!
ياسمين بعصبيه: مايهمني

لكنها تذكرت إنها ماشتغلت هنا إلا عشان تتعود تعتمد على نفسها..كيف تتنازل عن هالشغل بهالسهوله..مو كل يوم بتلقى أحد يجيب لها شغل..(هذا اللي كنت أبي أثبته لنفسي وللناس! هذي هي قوتي واعتمادي على نفسي! أضعف من أول مشكله تواجهني! واحد مايسوى يهد كل اللي أبيه! لاااا لازم أتعود اتحمل وأمسك أعصابي إذا كنت أبي اثبت إني قادره على تحمل مسئوليتي و لا بيكون خوفهم علي بمحله وصادقين إني لازم أكون تحت رعاية أحد أو أضيع؟ وهذا اللي ماأبيه..أنا أقدر اهتم في نفسي بعيد عن الكل وهالشي اللي المفروض أتعود عليه من اليوم)
مشت عن البنات و وصلها صوت فاتن..
فاتن: ياسمين وين رايحه؟ لا تكبرين المشكله!
ياسمين تلتفت عليها: لاتخافين بأحاول أحلها
فاتن: الله يوفقك
راحت ياسمين وفاتن التفتت على حنان بقلق..
فاتن: تتوقعين يطردها؟
حنان: يسويها..ماجد مو متعود أحد يعارضه كيف لما وحده مثل هاذي تهزأه! زين إن اكتفى بطردها بس..أنت ماتعرفين ماجد إذا كره أحد وش يسوي فيه
فاتن بخوف: مسكينه ياسمين
حنان: و أنت ليه مهتمه فيها؟ من متى عرفتيها؟ خليها تتأدب من يوم جت وهي شايفه نفسها ماأدري على ايش وتتصرف كأنها بنت عز يكفي إنها ماكلمتنا عن نفسها أو أهلها! مسويتلي فيها الفتاة الغامضه
فاتن: حرام عليك والله ياسمين محترمه وطيبه
حنان: وهالمحترمه حنا بنظرها مو محترمات وما نستاهل تتكلم معنا ماتشوفينها كيف تطالعنا بإستحقار وكأننا ما نسوى؟
فاتن: معها حق كيف تبينها تحترمنا وهي شايفتنا وش نسوي؟
حنان بقهر: لا والله مو عاجبك اللي نسويه! خليني أذكرك إن هاللي نسويه هو اللي جايبلك هالجوال اللي معك وهو اللي يصرف عليك ولا كان جلستي على راتب هالوظيفه اللي ياله يكفي حاجة أهلك

فاتن تتنهد وتغير الموضوع اللي كل يوم يضايقها أكثر..
فاتن بترجي: حنان أنت تعرفين ماجد دقي عليه قولي له يسامحها
حنان: وأنت على بالك بيسمع مني! ماجد مايسمع غير نفسه وإذا عصب مثله قبل شوي اللي يحب نفسه مايجي يمه يعني من اللحين ترحمي عليها

في ممر مكتب المدير_ وقفت ياسمين في آخر الممر وهي تشوفه جالس عند السكرتير وللحين ما دخل عند المدير..يعني الفرصه مافاتت ويمكن تقدر تصلح اللي سوته..حاولت من مكانها تشوف ملامحه وتعرف لو كان معصب للحين..لكنها ماشافت شي من ملامحه..كان جالس بهدؤ وشموخ ولا هو حاس بشي في الدنيا اللي حوله..كرهته أكثر وحقدت عليه..بعدت عن الممر وتسندت على الجدار مغمضه عيونها تحاول ترتب كلام تقوله بسرعه قبل يدخل للمدير..لكنها كانت تستخسر فيه أي كلمة اعتذار..لأنه آخر واحد يستاهل تتنازل و تكلمه كيف تعتذر منه..بس لازم ماتخسر شغلها..وتحديها لنفسها..تنهدت بقوه وعزمت تروح له والكلام يطلع في وقته..لكنها أول مافتحت عيونها شهقت مفزوعه..كان واقف قريب منها ويطالعها..كانت بتهزأه لكنها مسكت نفسها وتذكرت اللي هي جايه عشانه..بس مع كذا وقفت جامده تطالعه و مو قادره تتكلم..هي اللي ماعمرها ترددت في قراراتها راح منها كل الكلام..طالعها وانرسمت على شفايفه ابتسامة استهزاء..
ماجد بغرور: ليه جايه وراي؟
ياسمين: أناا...
ماجد: خايفه تنطردين صح؟

ياسمين هزت رأسها بمعنى إيه لأنها ماتبي تتكلم حست لو بتفتح فمها بكلمه بتقول كل اللي في خاطرها..وكل اللي يستاهله هالحقير..لكنها ماتبي تخسر تحديها..
ماجد: فعلا أنا ناوي اطردك،، يله سمعيني كيف بتخليني أغير رأيي،،مو هذا اللي تبينه؟

هزت ياسمين رأسها مره ثانيه..و هي ما تتخيل كيف تعتذر لهالإنسان وهو يستاهل كل اللي قالته له.. وهو بيقبل هالإعتذار أو لا..
ماجد تكتف و وقف بكل غرور وغطرسه وهو يطالعها من فوق لتحت..
ماجد: اعتذري
ياسمين بقهر وبدون ماتطالعه بصوت ياله سمعه: آسفه

حست إن قلبها يوجعها من القهر اللي كابتته..ما كانت تبي ترفع عيونها عشان ماتشوف ضحكته وإنتصاره عليها..كانت تخاف تنفجر في وجهه وتخرب كل اللي سوته..لكنها رفعت رأسها له لا إراديا..وانصدمت من نظرته..ماشافت نظرة الاستهزاء ولا الإبتسامه الساخره..كان يطالعها بإستحقار وخيبة أمل..ما صدقت اللي تشوفه..لكنها رجعت تشوف الإستهزاء في نظراته..كانت تحس إن الزمن واقف على هاللحظه اللي ذاقت الذل فيها..وقطعها الدكتور اللي مر من عندهم واللي كان عند المدير..حست بنفسها وبوقفتها اللي مالها داعي مع هالإنسان..كانت بتروح لكنها سمعت السكرتير اللي جاء يسأل ماجد..
السكرتير: المدير خلص إجتماعه ما راح تقابله؟
ماجد: لا بأقابله

راح ماجد مع السكرتير وياسمين واقفه مصدومه..(يعني بس كان يبي يذلني!!وهو ناوي يطردني!أنا الغبيه ليه اعتذرت له؟كيف توقعت إن واحد مثله بيحس في غيره أو يهتم حتى؟ بس أنا ماراح انتظرهم لين يطردوني أنا اللحين بأترك الشغل)
وراحت وهي تحس إن القهر بيذبحها..و بتندم على هالإعتذار العمر كله..حست انها صارت ما تعرف تفكر..و لا تعرف وش تسوي..وصلت عند البنات وأول ماشافتها فاتن ركضت لها..
فاتن: ياسمين طمنيني وش صار؟
مشت ياسمين لدرجها وأخذت شنطتها..
ياسمين: معليش يا فاتن مو قادره أتكلم اللحين

وتركتهم وراحت..
حنان بقهر: والله شايفه حالها هالبنت! تستاهل اللي جاها
فاتن: يعني انطردت؟!
حنان: أكيد ولا وين راحت والدوام للحين ما خلص

ياسمين كانت تطلع جوالها من الشنطه عشان تدق على السواق..لكنها غيرت رأيها..(لا ليه أروح وقهري فيني؟أنا مو خلاص انطردت لازم اسمعه رأيي فيه وأطلع كل اللي كنت كاتمته في نفسي)

وراحت تنتظره تحت عند مصعد المدير الخاص..أكيد بينزل فيه..وقفت بالممر الفخم لحالها تنتظره عشان تنهي أيام شغلها في هالمكان وهي مرتاحه..و بعد عشر دقايق طلع من المصعد..شافته لكنه ماشافها كان معطيها ظهره ويمشي..لكنها لحقته بسرعه..

ياسمين: اسمع

ماجد التفت وتفاجأ يوم شافها..
ياسمين: دامك إنسان ما تحس وما عندك دم و لاتهتم إذا دست على غيرك ليه طلبت مني اعتذر؟ دام هالشي ماراح يرضي غرورك وعقلك المريض! أكيد ارتحت اللحين يوم طردتني من شغلي بس خلني أقول لك إني تاركه الشغل من اللحين ومدام تركته أبي أقولك أنك إنسان تافه و سخيف صدقني أنت مسكين وكل هاللي تسويه من النقص اللي فيك
ماجد ببرود: خلصتي؟
ياسمين تتنفس بصوت مسموع كانت مقهوره منه..و من كل اللي صار لها بسببه..حتى يوم طلعت كل مافي قلبها..كرهت تصرفها..من متى كان أحد ما يسوى يخليها تفقد أعصابها..من متى وهي توقف تتكلم مع واحد ماتعرفه في مكان لحالهم..حست إنها مو عارفه وش تسوي..عشان كذا تركته ومشت بدون ما ترد عليه..لكنها فجأه شافته قدامها وسد عليها الطريق..رفعت رأسها تطالعه بقهر..و شافت قهر مثله في عيونه..
ماجد: اسمعيني مو ماجد اللي يقطع رزق أحد و لو كنت أبي أذلك مثل ماتقولين صدقيني كنت بتتمنين لو طردتك من شغلك ولا سويت اللي أقدر اسويه فيك..أنا مو مهتم بالخرابيط اللي قلتيها وما حركت فيني شعره عشان أرد عليك لأني رأيك فيني ما يهمني وعشان أريحك من هالقهر اللي مسوي فيك كذا أنا كنت أبي المدير في موضوع عائلي خاص ولا كنتي طاريه في بالي بس يوم شفتك جايه تعتذرين ما حبيت أرجعك خايبه لكن في المستقبل إن شفتك في هالمستشفى مره ثانيه ماأبي أسمع منك كلمه وحده تخصني لا من قريب ولا من بعيد،، فهمتي؟
تركها هالمره هو ومشى بكل غرور عنها..مشت ياسمين مو عارفه وين..ما تدري ترجع لشغلها أو تتركه..شافت كرسي وجلست في واحد من ممرات المستشفى تفكر..(أترك الشغل؟ بس كذا بأكون جبانه وكأني خايفه منه،،ولو ماتركته احتمال أشوفه مره ثانيه؟ كيف بأتصرف معه؟ وأنا ليه أكلمه من الأساس خلاص بأصير في حالي وهو عنده خويته حنان يطلب منها اللي يبي أنا مو مضطره أتعامل معه،،صح لأني من اليوم وعدت نفسي إني أتعود على كل شي أو اجلس في البيت أحسن)
اتصلت على السواق وقالت له يجي يأخذها..و بعده اتصلت على فاتن..
ياسمين: أهلين فاتن
فاتن: هلا ياسمين وش صار عليك؟
ياسمين: لاتخافين ماصار شي بكره بأداوم بس اليوم أبيك تأخذين لي إجازه
فاتن بفرحه: من عيوني
ياسمين: تسلمين يافاتن مع السلامه
فاتن: مع السلامه وأشوفك بكره
قالت جملتها وسكرت وهي تطالع حنان اللي باين إنها منصدمه..
حنان: ياسمين بتداوم؟!
فاتن: إيه
حنان: كيف يعني ماطردها! أجل ليش راحت؟
فاتن: ما أدري أهم شي إنها بتجي بكره

تركتها فاتن وراحت تكمل شغلها..وحنان مقهوره دقت على ماجد بتسأله لكنه ما رد عليها..وزاد حقدها على ياسمين اللي كانت تتوقع إنها ارتاحت منها..

في بيت أم فارس/

طلعت أسيل من غرفتها..اللي ما طلعت منها طول اليوم..كانت بتنزل..لكنها وقفت بأول الدرج..و هي تسمع كلام فارس و سيف..اللي كانوا في الصاله..
فارس: يعني تضربه كذا قدامنا كلنا بدون سبب!!
سيف: إكتشفت إنه ما يسوى
فارس بإستغراب: سيف وش صار لك! مهما كان هذا ولد عمك..هاذي مو من عوايدك!
سيف: و الطعنات ما تجي إلا من الناس القراب
فارس: عساه سبب يسوى اللي مختلفين عليه
سيف: أكيد يسوى لدرجة يمكن ما أكلمه بعد هاليوم
فارس انصدم: سيف!.....
سيف يقاطعه: أنا لازم اطلع اللحين مع السلامه

طلع سيف..و أسيل رجعت لغرفتها..سكرت بابها و تسندت عليه..(احس إن كل شي بحياتي تغير فجأه..و لا أدري ليه؟ وش اخطيت فيه؟ كيف أعيش بعد اليوم؟ و الإنسان اللي عطيته من سنين قلبي..و عقلي..و أيامي..يخوني فجأه و بدون أي عذر أو ذنب! وش بقى لي بعدك يا فيصل؟ كل شي اخذته)
فزت يوم حست بأحد يطق الباب..بعدت و فتحته..
أسيل: فارس!
فارس: وش رأيك؟
ابتسمت أسيل: تفضل
فارس يدخل: من أمس ما شفتك ليه ساكنه في غرفتك؟
أسيل: زهقانه و ما عندي شي اسويه
فارس: أسيل وش فيك؟ حتى صوتك متغير
أسيل: من قل ما ألقى أحد أكلمه في هالبيت..وش رأيك توافق على مها و تسكنون عندنا
فارس: مابي مها عندك وحده غيرها؟
أسيل تفكر: إيه صديقاتي بسمه أو طيف
فارس: أنا اقول تتزوجين و تروحين أنتي احسن

أسيل كشرت من هالطاري و رجعت لهمها اللي ما يبي تنساه..أما فارس فكان سرحان..ما يدري ليه خطر في باله إنها يمكن ترشح جوري..
فارس: أنا طالع تبين شي؟
أسيل: إيه أبي توديني معك أمي طالعه بالسواق
فارس: وين؟
أسيل: عند جوري
فارس بإستغراب: ليه؟
أسيل: من العيد ما شفتها و ذاك اليوم تعرف كيف كانت تعبانه
فارس: وش كان فيها ذاك اليوم؟
أسيل: أمي و خالتي يقولون يمكن أحد نضلها..بس أنا عارفه وش فيها؟
فارس بإهتمام: وش فيها؟
أسيل: كانت فاقده أمها بالحيل و تحس إنها تضايق خالي ناصر إذا كلمته لأنها تذكره بأمها لدرجة تتمنى لو ما شافها

سرح فارس يفكر..كان ناسيها كل هالأسبوع و لاهي بشغله..لدرجة شك إنه نساها..لكنه أول ما يسمع أي شي عنها..يبدأ يفكر و يهتم فيها..ما عرف هذا حب..أو هي شي يرتاح فيه من شغله..يمكن هذا اللي يجذبه لها..إنه يفكر بشي غير الشغل..و الصفقات..و الحسابات..
أسيل: فارس وين رحت؟
فارس: تذكرت شي في الشركه
أسيل بإحباط: لا تقول ماراح تآخذني معك
فارس رحمها: لا و لا يهمك بآخذك بس بسرعه اجهزي
أسيل: دقايق و الحقك



في سيارة سيف/

كان يدور في الشوارع بملل..كان أغلب وقته يقضيه مع فيصل..لكن اللحين مو طايق يشوف وجهه..حس و كأنهم بدلوه..مو فيصل اللي يعرفه من هالسنين..اللي كان لا يمكن يسوي فيهم كذا..خاف يروح لشلتهم و يشوفه هناك عندهم..كان يتمنى يسأله..كيف قدر يسوي كذا..بس فكر إن أسيل معها حق..السؤال هذا بيقلل من قيمتها..(بس اللحين فيه نادر اللي مادري وش ناوي يسوي بالوضع اللي انحط فيه؟ بس هذا نادر يعني مستحيل يعارض عمي بشي صغير..كيف اللحين بيصغره عند أبوي....يعني معقول هالخطبه تستمر و يتزوجون!)

عجز يتخيل هالشي..صعب يجمع أسيل و نادر مع بعض..طول عمره مايشوفها إلا لفيصل..كيف إحساسها هي..



في بيت أم العنود/

كانت جوري جالسه في البيت لحالها..ياسمين في الدوام..و أم العنود عند جارتهم..ملت و هي لحالها..و دقت على ساره لكنها ما ردت على جوالها..فدقت على البيت..
مازن: مرحبا

جوري استحت أول مره يرد عليها..
جوري: السلام عليكم
مازن: و عليكم السلام..هلا و غلا وش أخبارك؟

جوري انصدمت و ما عرفت ترد..
مازن: وش فيك ما تردين؟

سكرت جوري و هي مصدومه..(معقوله هذا مازن! لا مازن محترم لايمكن يتكلم كذا..يمكن أحد عندهم)

مازن استغرب..ليه سكرت..شاف الكاشف بيعرف هي داقه من البيت أو الجوال..لكنه انصدم وهو يشوف رقم غريب..مو رقم خالته..تذكر صوتها كان يحس إنه متغير..(شكلها مو أمل! والله إحراج لا تكون من بنات جيراننا)
قام بسرعه لغرفة ساره..و دخل عندها..
مازن: سااااره
ساره تفز: بسم الله! وش فيك؟
مازن بإحراج: وحده دقت تسأل عنك صوتها يشبه صوت أمل كلمتها على بالي هي بس البنت سكرت في وجهي و يوم شفت الرقم ما طلع رقم بيت خالتي
ساره تضحك: زين ما تسوى السالفه كل هالخوف
مازن عصب: كيف ما تسوى! وش بتقول عني البنت؟
ساره: كم الرقم؟
مازن: آخره ٦٦٢
ساره: هذا رقم بيت جوري..حرام عليك عاد ما لقيت إلا جوري تسوي فيها هالمقلب تلقاها اللحين ترتجف
مازن: صوتها يشبه أمل
ساره تفكر: صح بس جوري أنعم شوي
مازن: زين دقي قولي لها
ساره: إن شاء الله

أخذت جوالها اللي كان على الصامت..و شافته مليان مكالمات منها..و دقت عليها..
ساره: مرحبا
جوري: هلا ساره وينك؟
ساره: كنت حاطته على الصامت من يوم صحيت..أنت دقيتي على البيت؟
جوري بإحراج: إيه كيف عرفتي؟
ساره تضحك: مازن اللي رد عليك على باله إنك بنت خالتي أمل
جوري: أنا انحرجت يوم بدأ يكلمني عادي و سكرت بوجهه توقعت أحد عندكم
ساره: ليه؟
جوري: مادري بس ما صدقت إن أخوك مازن يسوي كذا
ساره: صادقه هذا هو منحرج منك بالحيل
جوري: حصل خير

بدت تسولف معها..و مازن أشر لها إنه بيطلع..راح عنها وهو يفكر باللي صار..(ما شاء الله عليها سكرت على طول حتى ما قالت إني غلطان..شكل البنت أخلاقها عاليه)
بعد نص ساعه..سكرت جوري من ساره..و استغربت و هي تسمع الباب يتسكر..(غريبه أمي رجعت بسرعه!)
لكنها انصدمت و هي تشوف ياسمين..
جوري: ياسمين!
ياسمين تدخل: أمي مو هنا؟
جوري: لا عند الجيران..ليه رجعتي بدري؟ تعبانه؟
ياسمين: لا بس اعتذرت عن باقي اليوم
جوري: ليه؟
ياسمين: ما شبعت نوم و حسيت إني مكسله بأروح أبدل و أجي

راحت ياسمين و جوري قامت تسويلها قهوه تصحصحها..و راحت ياسمين لغرفتها و هي تحاول تنسى اللي صار لها اليوم..
نزلت ياسمين: الله يا ريحة القهوه
جوري: قلت خليها تصحيك

ياسمين..(لا تخافين يا جوري عندي اللي مطير النوم من عيوني..مادري وش بيصر بعد اليوم مع هالماجد؟)
سمعوا جرس الباب..و راحت الخدامه تفتح..بعدها دخلت عليهم أسيل..
أسيل: مساء الخير

اتفاجأوا بجيتها..و كل وحده تطالع الثانيه..و تحمد ربها إن ياسمين قررت اليوم تطلع بدري..سلموا عليها و جلسوا..
أسيل: مليت في البيت لحالي قلت أجي عندكم
ياسمين: حياك الله..أسيل آسفه على اللي صار معك كنت بأدق عليك بس ما أدري وش اقولك و حسيت إنك مليتي تسمعين عن السالفه
أسيل تتنهد: معك حق أنا مابي افكر فيها بعد..أبي ارتاح
ياسمين: بأقولك شي أنا متأكده إنه ماراح يقنعك بس مع كذا بأقوله
أسيل تبتسم: قولي
ياسمين: فيصل ما كان يحبك مثل ما تحبينه أنا ما أقول إنه كان يتسلى فيك بس يمكن كنتي مجرد حب طفوله تعود عليه و الدليل إنه ما فكر يخطبك لكن سهى شوفيه بسرعه نوى يخطبها و كأنه مل من الحب البعيد معك صار يبي شي رسمي و يمكن سهى بينت له قربها منه أكثر..أنا اتوقع حتى لو كنتم تزوجتوا ماراح تعيشين الحب اللي أنتي تخيلتيه كانت بعد فتره بتبين مشاعر فيصل الحقيقيه عشان كذا زين إنها بانت من اللحين


سكتت أسيل و هي تفكر في كلام ياسمين..معقول يكون صدق..و تكون كل هالسنين عايشه بوهم..تمنت تكون غلطانه..عندها أحسن لو كان فيصل حبها و خانها..و لا تكون كل عمرها اللي راح مثل اللي كاذب على نفسه و مصدق كذبته..
ياسمين: ضايقتك؟
أسيل: لا
ياسمين: أنا ما افهم بهالسوالف مادري ليه تكلمت...أقوم أكلم عبير احسن و اخليك مع جوري

تركتهم و راحت..
جوري: ما أعجبك تحليل ياسمين؟
أسيل: لا
جوري: ما تبين تكون سهى الحب الحقيقي و الوحيد في حياته
أسيل: ما أحد فاهمني غيرك يا جوري

جلست أسيل مع جوري يتكلمون..و يتناقشون..في هالسالفه..كانت أسيل مخنوقه و تبي تكلم أحد..ما قدرت تكلم رغد و تجلس تلوم أخوها قدامها..لأنها تعرف إنها بتتضايق و تتأثر من كلامها..و حلا ماراح تفهم اللي تحس فيه..لكن الكلام مع جوري كان و كأنه بينها و بين نفسها..
جوري: صار لك ساعه تتكلمين عن فيصل..زين و نادر؟
أسيل: تصدقين طول هالوقت ما طرى على بالي كل ما فكرت وش أسوي معه ارجع و أقول لو فيصل ما سوى كذا..يمكن لأني مو قادره استوعب إني مخطوبه له..كنا نخطط كيف نخليه يحب ياسمين فجأه اشوف نفسي أنا مخطوبه له....(سكتت لحظه) جوري أنتي يوم كنتي مخطوبه لفارس و أنت مو عارفه عنه شي وش كنتي تحسين فيه؟
جوري اتفاجأت بالسؤال: أنا غير وضعك يا أسيل..أنا شفت في فارس نجاتي من بيت عمي الله يرحمه و بعد ما كنت أحب أحد
أسيل: ياليتكم تزوجتوا كان اللحين أنتي معي في البيت

ابتسمت جوري و هي تقول في خاطرها..(ما تنفع ياليت يا أسيل)

في سيارة ماجد/

دخل ماجد في سيارته من البوابه الخارجيه..و وقف عند المدخل الرئيسي للفيلا..نزل ودخل للصاله الواسعه..وكالعاده الفيلا فاضيه..وكأن ما أحد يسكنها غير الخدم..أبوه دائما في الشركه أو مسافر..وأمه متوفيه من سنين..و له أخوين..واحد كل حياته شغل و سفر مثل أبوه..وللحين متزوج ثلاث ومطلقهن..و الثاني توفى هو وزوجته من سنتين..و تركوا له ورد..طفله صغيره بعمر ست سنين..يتيمة أب وأم..مثل ماكانت أمها..اللي تكون بنت عم ماجد..و تربت معهم في البيت مثل اختهم..والكل تفاجأ بزواجها من اخوه..لكن أخوه كان يحبها من أول ماسكنت عندهم بصمت..دارت عيونه في الصاله يتذكر ذيك الأيام..ذاك الوقت كان يحس إن هذا بيت..و إن اللي يسكنون فيه عائله..لكن من راحوا..وهو مايطيق يجلس فيه..خاصه يوم كانوا زوجات أخوه فيه..يكفي آخر وحده نظراتها له..و حركاتها..كانت تخليه بالأيام مايجلس في البيت..كان بيخسر اخوه الوحيد بسببها..لكن الحمدلله إن اخوه عرف حقيقتها و طلقها..من بعد بنت عمه سماح أم ورد..مافيه ولا بنت قدرت تخليه يحترمها..كلهم في عينه مثل بعض..بس كل وحده و لها طريقتها..(حتى هي..ياسمين..مثل الباقيات..مادري ليه في لحظه حسيت انها تفرق عنهم..بس مثل ما قالت حنان كل هذا تمثيل عشان تزيد من قيمة نفسها..و اللي صار اليوم أكبر دليل..كيف تجي و تعتذر و هي ما أخطت في شي بالعكس أنا اللي استفزيتها..لو كانت مثل ما تحب انها تبين انسانه محافظه على نفسها و كرامتها..كان وقفت على موقفها ولا غيرته...خلاص انتهيت منك يا ياسمين صرتي ماتسوين حتى وقتي الضايع)
طلع فوق للإنسانه الوحيده اللي تسوى حياته..و دخل غرفتها..شافها على كرسيها الرمادي..اللي مقيد خطواتها..و حارمها تعيش طفولتها مثل باقي الأطفال..راح فيها كل مكان في العالم..يبي يرجع الحياة لخطواتها..لكن هالشيء كان مستحيل..و من يومها و هو يحاول يعوضها عن عجزها..يحاول يجيب لها كل الدنيا اللي مو قادره تروح لها..
التفتت له المدرسه الخاصه اللي كانت تجي تعلمها..و اعتذرت و طلعت..أما ورد فمن يوم شافته و النور اشرق في ملامحها..كانت متعلقه فيه و تحبه حيل..لانها اصلا ماتشوف غيره يهتم فيها و يحبها..
ورد: بابا ماجد

ماجد يدخل و يشيلها من كرسيها..و يطلع فيها للبلكونه..
ماجد: يا روح بابا ماجد
ورد: اليوم تعلمت أشياء كثيره..ما رضيت المس تروح خليتها تعلمني زياده(كملت وهي تضحك) شكلي تعبتها ما صدقت شافتك راحت بسرعه
ماجد يضحك لضحكتها: و لا يهمك حبيبتي ادرسي الوقت اللي تحبينه و اذا مليتي من المس هاذي نجيب غيرها
ورد: لا أنا أحبها
ماجد: هاه راح تعلميني اللي تعلمتيه اليوم؟
ورد بفرح: ايه
ماجد: خلاص أول نطلع نآكل آيس كريم و نتمشى و بعدين نرجع ندرس
ورد تضمه بقوه: هيييه أنا احبك مره بابا ماجد



في بيت نجود/

كانت تحس بملل فضيع..بعد رمضان و أجواءه..كانت تشتغل كل يوم..لأنها رجعت تساعد جارتها في عمل المعجنات و بيعهن..صح ما كانت محتاجه فلوس..بس هي تشجعت للشغل أكثر..عناد في سيف اللي ما كان يبيها تشتغل..حست بالراحه و هي تخالف رأيه..حتى لو كان هو ما يعرف بهالشي..لكن اللحين خلص الشغل..و صارت فاضيه..طالعت بدبلتها اللي في أصبعها..ليه للحين لابستها..مسكت جوالها..تقرأ الثلاث مسجات الوحيده اللي فيه..و اللي كانت منه..عمرها ما فكرت تكلمه..لكن في هاللحظه حست بفضول تعرف ردة فعله على إتصالها..وش بيقول لها..لكنها بسرعه تراجعت عن هالفكره..(و الله مو عارفه وش نهايتي معك ياسيف؟ وش ناوي عليه؟)


راحت تدور لها شي تشغل نفسها فيه..لكنها سمعت جرس الباب يدق..شافت ساعتها عشر و نص..(مين اللي جاي هالوقت؟...يمكن أحد من الجيران محتاج شي)
طلعت برى..و فتحت باب الشارع..للحظات ما شافت أي أحد..كانت بتسكر لكنه دخل..ما صدقت و هي تشوف سيف قدامها..انصدمت لأنها ما حضرت لو تشوفه وش بتقول له..أو كيف بتتصرف..
سيف كان يطالعها..بجلابيتها القطن اللي بنص كم و مقلمه أبيض برمادي..و رافعه شعرها الطويل ذيل حصان..كانت بسيطه بالحيل..لكن الشعور اللي تحركه داخله مو بسيط بالمره..أول ما شافها حس براحه ما حسها من شهر..من يوم تركها..كان مشتاق لها..و خايف عليها لانه تركها لحالها..كان يبي يتأكد..يمكن يقدر ينساها..لكنه تأكد ميه بالميه انه يحبها..
سيف: ليه ساكته؟
نجود: و أنت ليه ما تتكلم؟
سيف: أنا آسف على اللي صار مني آخر مره
نجود: و أنا آسفه على اللي قلته لك
سيف بإهتمام: يعني ما كنتي تقصدينه؟
نجود بصراحه: سيف أنا مو عارفه معك أي شي..أعرف انك تكذب علي و المشكله احس اني أصدقك..أعرف ان كل اللي تسويه تمثيل علي لكنه يأثر فيني بعد

سيف مسك يدها و سحبها..و جلسوا عند الدرج..
سيف ما ترك يدها: نجود يمكن غلطتي من البدايه اني ما كلمتك بصراحه
نجود كملت: و ما قلت لي انك متزوج
سيف انصدم: متزوج! أنا؟
نجود: ايه و لا تنكر كانك تبي نتكلم بصراحه
سيف: مين اللي قال لك اني متزوج؟
نجود: ما أحد قال لي أنا عرفت
سيف يضحك: و كيف عرفتي؟
نجود: هي اللي دقت عليك يوم كنا في السطح و ما قدرت ترد عليها قدامي و ارسلت تطلبك و رحت لها...أنا دقيت عليك وقتها و لا رديت علي أكيد كنت معها
سيف يبتسم: حلو! كل هالقصه ألفتيها و صدقتيها..الظاهر مليتي من تأليف القصص على السيارت و اللي فيها قلتي تألفين علي هالمره
نجود: طبعا بتنكر
سيف: وش أنكر؟ كل اللي قلتيه مو صح..اللي دقت علي ذاك اليوم أسيل أختي..و ماقدرت ارد عليك لآني كنت اوصلها هي و أمي لخالتي..تبيني ادق عليها تتأكدين