اشتقت لك يابلسم جروحي

على الساعه 3 العصر .. دخلت ام فيصل غرفه بنتها صبا بعد مازهقت كثر ماتدق عليها الباب ولاتسمعها .. دخلت وشافتها الى الان بساابع نومه وماتحس باللي حولها ..
قربت منها وسحبت الغطا اللي عليها وسكرت المكيف ... وبدت صبا تنزعج وتتقلب علامه انها حست باللي سوته امها ..
ام فيصل : يالله ياصبا قومي .. يلا مافي وقت بنروح المزرعه الحين ... يلا قومي .. يوووه انتي وهالنوم .. يلا صبا ماخبرت نومك ثقييل كذا .. يلا قووومي
صبا بتأفف وملل : يمممممممه خليني انام .. تونا .. !!
ام فيصل : وش تونا انتي الثانيه ؟؟؟ يلا قومي مافي وقت الساعه 3 .. واخوك اشتب .. وانتي للحين ماقمتي يلا .. ترى بنمشي ونتركك ..
قامت صبا بتكاسل ومالها خلق شي .. قعدت على سريرها وقالت لامها : خلاص يمه قمت .. انتي انزلي .. وعطوني نص ساعه واجهز ..
ام فيصل : نص ساااعه !!! حرام عليك كثير .. هذا وفيصل يبينا الحين نمشي .. يلا الله يهديك بس .. عجلي بسرعه ولاتنسين تاخذين ملابسك واغراضك ..
قامت من السرير بكسل وتوجهت للحمام ( وانتم بكرامه ) وهي تمتم : ان شاء الله ، ان شاء الله ..
طلعت امها من غرفتها .. وهي دخلت الحمام ( وانتم بكرامه ) اخذت لها شور سريع تصحصح فيه .. وطلعت من الحمام والفوطه عليها .. واتجهت لدولابها تطلع لها لبس بسرعه .. بظرف دقااايق .. خلصت لبس وبدت تكد شعرها المبلول اللي يوصل لنص ظهرها .. رفعت شعرها بسرعه بعد ما كدته .. واخذت شنطتها اللي مجهزتها من قبل .. وقبل لاتنسى اخذت جوالها اللي على التسريحه .. انتبهت للمكالمات اللي جتها 6 لم يرد عليها احد .. استغربت من اللي داق عليها .. فتحت سجل المكالمات .. طلع لها .. 2 لمياء .. و 4 مازن ..
حطت يدها على كتفها وقال : يوووووووووه نسيت مازن هو قالي انه يوديني .. يووه اكيد تضايق اني مارديت عليه ..لازم ادق عليه ..
دقت عليه وحطت الجوال عند اذنها .. انتظرت شوي الا جاها رده ..
مازن : آلو ..
صبا : هلا مازن ..
مازن : هلا قلبي .. ها جهزتي .. اجيك الحين ؟؟
صبا : ايه خلاص انا جاهزه تعال .. وانا اسفه اني مارديت عليك كنت نايمه ولا انتبهت ..
مازن : لا عادي صبا مافي مشكله ، بس يالله حبيبتي ، انا الحين بالطريق جايك طيب
صبا : انا انتظرك ..
سكرت منه .. وصفطت لمياء لانها بتشوفها هناك بالمزرعه مايحتاج تكلمها الحين .. طلعت من غرفتها بسرعه ومعاها شنطتها وعبايتها .. ونزلت الدرج .. لقت آخر الدرج فيصل واقف وجاهز ومشتط بالمره .. وهو ينادي امه ..
فيصل : يلا يمه تأخرنا .. كلهم راحوا هناك الا حنا .. ترى مايحتاج هالترمس ذا اللي انتي بلشتي فيه .. خلينا نمشي يلا ...
ضحكت على شكل اخوها وواضح عليه انه يبيهم يمشون بسرعه ومشتط ... وقفت جنبه وقالت : هلا فيصل ..
فيصل التفت عليها وقال : كملت .. وانا اللي اقوول اكيد صبا لابسه عبايتها وجاهزه .. طلعتي انتي الثانيه للحين ماخلصتي ..
صبا : ياخي شفيك انت روق ولاتشتط واجد ، وبعدين مانيب رايحه معاكم عشان ترتاح ..
فيصل : وليه مانتيب رايحه .. وهاللي بيدك ليش جايبته اجل ؟؟
صبا : افهم يا اخي انا قلت مانيب رايحه معكم .. موب ماني رايحه للمزرعه .. لاني بروح مع مازن بيمرني الحين ..
فيصل ناظرها بخبث وابتسم وهو يقول : آها .. اجل زوجك المصون جاي لهنا عشان ياخذك ها ..
صبا وهي تلبس عبايتها : ايه .. عندك مانع .. !!
فيصل : ابدا ..ماعندي مانع .. بالعكس توفرين علينا مكان بالسياره وماتزعجينا وتغثينا ..
طالعته بحده وقالت : انا ما ادري ليه واقفه اتكلم معاك يالغثه اروح اشوف امي احسن لي ..
ومشت لامها تاركه فيصل وراها يضحك بصووت عالي عشان يغيظها .. دخلت المطبخ وشافت امها محيوسه وتامر وتنهي الخدامات بطلباتها عشان يخلصون بسرعه ويمشون ..
قربت من امها وقالت : هاذي اللي جايتني فوق وتقول يلا ويلا .. وهذاك يمه انتي بنفسك ماخلصتي شغلك .. وانتي مهددتني اذا ما استعجلت تروحون ..
ام فيصل بنرفزه قالت لبنتها وهي ميب فاضيه لها : اقووول يابنت امشي من وجهي .. عندي شغل لفووق راسي وانتي جايه تقرقرين عليّ .. اسكتي وتعالي ساعديني ابرك لك .. ولا انثبري بالصاله لما اخلص ونمشي ..
صبا : خلاص خلاص بروح بس لاتعصبين .. ( والتفتت تبي تطلع بس تذكرت شي ورجعت تلف لامها ) ايه يمه نسيت اقول لك تراني ماني رايحه معكم بروح مع مازن ..
ام فيصل وهي تعبي السله بالاغراض : طيب طيب خلاص .. روحي بس واتركيني مع شغلي .. وقبل لا انسى روحي شوفي محمد جهز ولا لا .. ؟؟
صبا : إن شاء الله ..
مشت صبا عن امها .. وطلعت من المطبخ متجهه للدرج .. وقبل لا ترقى شافت محمد نازل باتجاها ومعاه شنطته ..
صبا : ايه محمد زين نزلت .. توني كنت بجيك .. ها حبيبي خلصت خلاص ..
محمد : ايه خلصت تروشت زي ما قالت لي ماما .. وبعدين طلعت واخذت الشنطه اللي جهزتها لي جيني ( الشغاله ) ...
صبا : طيب حبيبي البس جزمتك وانتظر .. شوي وتروحون ..
محمد : ليه صبا انتي ماراح تجين معانا .. ؟؟؟
صبا : لاتخاف بتشوفوني هناك موجوده .. المهم يلا زي ماقلت لك لاتنسى تلبس جزمتك السوداء .. تعرفها ؟؟
محمد : ايه اعرفها .. بروح البسها ..
ومشى متجه للصندوق اللي عند الباب واللي يحطون فيه جزمهم اليوميه واللي دايم يستعملونها ..
راحت للصاله بعد ما تأكدت من محمد ومشت تنتظر مازن يجي .. لقت فيصل قاعد على الكنبه ويناظر تلفزيون يسلي نفسه لما امه تخلص ...
قعدت قباله وبعد ثواني سألته : اقوول فيصل ..
فيصل وهو مركز بالتلفزيون : هممم ..
صبا : عندك خبر مين راح للمزرعه الحين .. ؟؟
فيصل : .................. ( لارد لانه اصلا ماسمعها عينه طايره باللي يشوفه )
صبا : فيصل .. انتبه لي شوي .. تراني اتكلم معاك ..
فيصل لف عليها وقال بعصبيه : وش تبين يا بقره ماتشوفيني قاعد اناظر ومتحمس تجين تخربين علي .. خيير وش تبين ؟؟
صبا : اعصابك ياولد .. مايسوى تعصب .. بس بغيت اسأل مين موجود هناك بالمزرعه .. ؟؟
فيصل ورجع عيونه على التلفزيون : كل خالاتي هناك مابقى الا خالي عبد الله بيجي بعد شوي .. وطبعا حنا .. اللي للحين امي ماتكرمت وخلصت من شغلها وعفشها هاللي ماينتهي ..
صبا ضحكت على كلام فيصل .. وقبل لاتتكلم .. سمعت صوت جوالها يدق .. على طول طلعته من شنطتها وشافت الاسم مازن ردت عليه بسرعه ..
صبا : الو .. هلا مازن
مازن : هلا صبا .. يلا حبيبتي انا برى .. اطلعي لي ..
صبا : ان شاء الله هذاني طالعه ..
سكرت منه .. وعلى طوول تحجبت وتنقبت .. وجاها سؤال فيصل : جا مازن ؟؟
صبا : ايه جا .. لاتنسى عط امي خبر اني طلعت وانتظركم هناك ... مع السلامه
طلعت بسرعه لمازن .. وشافت سيارته واقفه عند الباب .. فتحت الباب ودخلت وبعد ماسكرت الباب .. مشى هو بالسياره وهي قالت : السلام عليكم ..
التفت عليها مازن وعطاها ابتسامه ومن ثم ، قال : وعليكم السلام .. هلا وغلا .. وحشتيني ياقلبي ..
صبا : ياكذاب .. تونا مالنا ساعتين مع بعض امداك تشتاق ..
مازن : طبعا راح اشتاق .. اصلا لو دقيقه غبتي عني باشتاق شلون لو ساعتين .
ما ردت عليه صبا .. لان الحيا تملكها ..
اما مازن سكت شوي بعدين قال : صبـا ..
صبا : سم ..
مازن : سم الله عدوك ، وش تحبين اكثر راشد الماجد ولا عبد المجيد .. ؟؟
صبا : طبعا راشد الماجد ... بس ليه ؟؟
مازن : اصبري الحين بتعرفين ..
شغل مازن مسجل السياره واللي كان داخله شريط .. وابتدت اغنيه رائعه من روائع راشد الماجد .. اللي هي .. ( غلاها ) ..
وبدى يغني مع الأغنيه وهو ماسك يد صبا ..
غلاها ياكبر عندي غلاها .. عشقها القلب ولخاطر هواها
تولعت بهواها دون مدري .. وباع الناس قلبي واشتراها
تلاشى البدر من طلعت ضياها .. جمال الكون كله في سناها
بديت اغار من نفسي عليها .. واغار من العيون اللي تراها
إلاه العرش بالحسن انتقاها .. يحق لها بطلعتها تتباها
عليها من الدلع نظرات تأسر .. اشوف القلب ما يصبر بلاها
معاها بهجة ايامي معاها .. رضاها غاية النفس ومناها
عساها ترحم بحبٍ متيم .. شفا المجروح كله في لقاها
طبعا لا تسألون عن حاله صبا .. الحيا خلى لسانها ماينطق بحرف واحد .. حتى لما خلصت الاغنيه .. ووقف مازن المسجل شوي .. كانت ساكته ولا هي قادره تقول شي ..
مازن سوى نفسه زعلان وقال وهو يناظر الطريق قدامه : شكلها الاغنيه ماعجبتك .. ؟؟
صبا اخيرا تكلمت : لأ .. بالعكس بالمره حلوه ..
مازن والى الان متصنع الزعل : لو كانت حلوه مثل ماتقولين كان قلتي لي كلمه وحده حلوه من لسانك .. وانا المسكين اللي قاعد اغني معاه وامدح فيك ... وآخر شي ما ألقى منك الا الصمت .. ليش ؟؟؟
صبا : لا مازن انا ما كان قصدي كذا .. أناا بس .. أســ ..
سكتت ولا قدرت تكلم وتقوله اني استحي وبس ..!!
مازن فهم عليها وضحك ورجع مسك يدها وهو يقول : خلاص فهمت .. ما يحتاج تتكلمين .. افهم عليك بدون أي كلمه .. تدرين .. ؟؟
صبا : إيش ؟؟
مازن وهو يأشر باصبعها على عرق بذراعه : شوفي غلاتك شلون أنانيه !! قاعده تقول لدمي : غصب عنك هذا مكآني .. ~ !!!
صبا ضحكت منه وقالت : مازن يكفي كذا خلاص ..
مازن ضحك وقال : طيب شسوي اذا طالع هالكلام من قلبي ؟؟
مضوا الوقت وهم بقمه سعادتهم وفرحتهم .. مابين اغاني راشد وعبد المجيد .. اللي يشغلها مازن ويغني معهم .. ولمين ..؟؟ لصبا .. وما بين يسولف لها شوي وهي تسولف له ..
صبا اللي كانت ذيك اللحظات من احلى لحظات حياتها ، يكفيها بس وجوده جنبها .. شعورها انها بسعاده وهي جنبه مغنيها عن أي شي ثاني ويكفيها ..
بعد لحظات .. من سماع بعض الاغاني .. تكلمت صبا : ايه صح مازن ... امس امي بالليل تقول انك مارضيت يكون الزواج بعد 3 شهور .. ليه ؟؟
مازن : وتسألين ليه بعد ..!! صبا الحين انا احن على امي امس يكون الزواج بعد شهر وانتي تجين تقولين بعد 3 شهور .. لا حبيبتي مستحيل أرضى ..
صبا : ليش مازن ؟؟ خله بعد 3 شهور .. عشان يمديني اجهز روحي وكمل اغراضي .. مايمدي بشهر واحد ابد ..

مازن : عادي شفيك اشتري هالفتره للعرس بس .. وبعد الزواج كملي اغراضك معاي ..
صبا : بس ..
مازن يقاطعها : لابس ولاشي .. ما ودي اتأخر بالزواج كثير ( وبحنان كمل ) ابي نتزوج بسرعه ..
استحت صبا وسكتت شوي بس بعدين قالت : طيب على الأقل خله يكون بعد شهرين استعد فيهم شوي ... يكفي الملكه اللي كنت مستعجل فيها .. خل الزواج بعد شهرين طلبتك مازن الله يعافيك ..
مازن ويسوي نفسه يفكر : امممممم ، والله الود ودي كان خليته بعد شهر وكثير بعد .. بس يالله عشانك بخليه بعد شهرين بس ها ان تأجل يوم واحد عن الشهرين يا ويلك ترى ..
صبا : ان شاء الله لاتخاف .. شهرين بالضبط ..
مرت ساعه ونص وصارت الساعه ( 4:30 ) وهم بالطريق .. بعدها دخل مازن طريق ترابي على جانب الشارع .. ومشى مسافه .. لين ما وصل لمزرعه كبيــره بالمره .. محفوفه بالأشجار من كل جهه والخضره ماليه المكان .. والزهور والورود وغيرها من النباتات تعم المزرعه وتحليها .. والجو بعيد كل البعد عن الرطوبه والحر اللي تعيشه منطقه الشرقيه .. هنا الجو رايق وحلو ولطيف .. لا هو بارد ولا هو حار .. متوسط بينهم .. لان الشمس قاربت على المغيب فأصبح الجو بالمره حلو ..
عدت سياره مازن البانوراما المساحات الخضراء اللي حولهم ... لين ما جا امامهم باب كبير وفخم كان مفتوح لهم عشان تدخل السيارات .. ومنها دخلت السياره ولف يمين حيث المواقف للسيارت .. لبق سيارته يمين سياره نواف ويسار سياره خاله راشد ( ابو ريان ) ..
بعدها تكلم مازن : شكلنا جينا متأخرين .. هاذي سياره نواف وهاذي سياره خالي راشد والباقي شوفيهم هناك .. ( وأشر لها قدامهم شوي ... وين ماكانت سيارات الباقين من العايله )
صبا : معليه ماتأخرنا كثير ، الا هم اللي استعجلوا متحمسين بزياده للمزرعه ..
مازن : وهم الصادقين .. المزرعه بالمره حلوه .. وتخلي الواحد يتحمس يقعد فيها .. يلا اجل خلينا ننزل ..
نزلوا مازن وصبا .. ومشت صبا تبي تتجه لقسم النساء .. بس ناداها مازن ..
التفتت له وقالت : بغيتني .. ؟؟
مسك مازن قلبه وقال : تدرين صبا الله يعين قلبي .. بيتألم كثيييير ويتعب ...
صبا بلهفه وخوف عليه : سلامتك من التعب ، ليه وش فيك ؟؟
مازن : بتبعدين عني هاليومين ولا بشايفك ولاتبين قلبي يتعب .. ما اقول الا الله يعينه بس ..
ضحكت صبا واستحت من كلامه وقالت : عاد مازن لاتبالغ ، اللي يشوفك يقول 24 ساعه انا عندك .. كنت بيت اهلك وانا ببيت اهلي ..
مازن : بس ولو .. هاذي تفرق .. انتي بتكونين معاي بنفس المكان .. بس مايسمح اشوفك كل شوي ..
التفتت صبا عنه وقالت : امشي بس احسن لي .. الكلام معاك مايخلص ...
مازن بتهديد وهو يضحك : طيب طيب ياصبا ... الوعد قريب ..
ابتعدت عنه وهي تضحك وتمتم بصوت واطي : مجنوووون ..
دخلت قسم النساء .. واللي كان فله كبيره .. تتوسطها صاله كبيره فخمه .. ومن يمينها المطبخ الكبير وغرفه الطعام والحمامات ( الله يكرمكم ) .. ويسارها المجالس الفخمه والراقيه .. أما الدور الثاني كان ملياان غرف عشان ينامون فيها ..
لقت الكل مجتمع بالصاله من خالاتها وحريم خوالها وكل البنات وهم يضحكون ويسولفون مستمتعين بالجو حلوهم .. اول مادخلت .. الكل انتبه لها .. وعلى طوول نقزت لمياء من مكانها وجت عندها تضمها باقوى ماعندها .. حتى بغت تخنقها .. وهي تقووول : صبا يا دووبا وحشتيني .. ادق على جوالك ماتردين علي خوفتيني من بعد مارحتي مع مازن الظهر وانا قلبي طبوول وانتي لاحس ولاخبر ..
صبا وبالمووت يطلع صوتها : طيب انقلعي شوي عن وجهي وخليني اتكلم زين .. خنقتيني يا بنت .. وخري ..
بعدت عنها لمياء وهي تتصنع الزعل وقالت : الحين هذا جزاي اللي خايفه عليك ومشتاقه لك ..
صبا : اقوول بس طسي شوي بروح اسلم على خالاتي والبنات .. بعدين ارجع لك ..
لمياء : طيب انا والبنات بنروح فوق .. ننتظرك اوكي ..
صبا : اوكي ..
مشت لمياء مع البنات لفوق وقعدوا بوحده من الغرف ينتظرون صبا تجي لهم .
اما صبا راحت تسلم على كل خالاتها وحريم خوالها وسألتها خالتها عبير عن امها وجاوبتها صبا انهم الحين بالطريق وبيجون بعد شوي ، ولما وصلت لزوجة خالها راشد ( أمل ) سألتها : هاه خالتي .. جت معكم رهف ولا لا ؟؟
ام ريان : يابعد قلبي هالبنت قلت لها لاتجين اخاف عليك .. عاندت وقالت لا الا اجي .. وهذا هي مع ريان بيجون بعد شوي .. اكيد انهم بالطريق الحين .. اما شهد تلاقينها فوق مع جنا قاعدين..
ضحكت صبا بعدها قالت : كالعاده شهد وجنا مع بعض .. وريان ورهف مع بعض ، اما ذولا طول عمرهم يمشون ويجون ويروحون مع بعض ولا مره شفتهم يتهاوشون عكسنا انا وفيصل ههههههه
ام ريان : هههههههههه بسم الله عليهم الله يحفظهم بس .. وانتي وفيصل يبيلكم تعدلون الاخوه هاذي اللي بينكم .. ماينفع كذا بس هواش ومطاقق ..
صبا : امحق وهو يخلي احد يعدل شي ... طول عمره دفش وعله مايخلي الوحد يتكلم .. انا حـ
وقبل ماتكمل جملتها .. سمعت لمياء وهي تناديه .. التفتت لها لقتها واقفه بنص الدرج وتقول : صبا ووجع .. لنا ساعه وحنا ننتظرك وانتي قاعده ت***رين مع خالتي أمل ها .. يلا ياعله بسرعه قدامي ..
صبا : ابشري عمتي لمياء ... مايصير خاطرك الا طيب .. هذاني جايه ( التفتت لخالتها ) اعذريني خالتي بروح لها قبل ما اصير خروف عندها ..
ضحكت خالتها منهم وقالت : روحي ياقلبي روحي ..
اتجهت للدرج ووصلت للمياء اللي مسكت يدها بقوه وركضت فيها يكملون الدرج مع بعض .. لما وصلوا لفوق وقبل مايدخلون الغرفه اللي قاعدين فيها البنات .. تركت لمياء يد صبا اللي بالموت تتنفس وهي تقول : اعصابك يابنت ... خنقتيني .. ااف منك .. هه لازم يعني اركض ، شوي شوي وش يضرك ؟؟
لمياء : خايفه تهجين مني مره ثانيه .. لاني ابي اتكلم معاك بسرعه لحالنا قبل لايجون البنات ويطبون علينا ..
صبا : وش تبين اخلصي ؟؟
لمياء : أولا وش كنتي تقولين لخاله أمل تحت ؟؟
صبا : وانتي وش دخلك ان شاء الله .. اقول اللي ابي وش تبين ؟؟
لمياء : لاني سمعتك تقولين عله وما ادري وشو .. قلت اخاف هالبنت تتكلم عني وتحش فيني تحت عند خالاتي ..
صبا : لا ياحبيبتي .. ماكنت اتكلم عنك .. كنت اتكلم عن اخوي فيصلووه ..
لمياء وكأنها تذكرت شي : ايييييييه صح على طاريه .. بسألك صبا لاحظتي على فيصل شي غريب اليوم ؟؟
صبا وهي مستغربه من هالسؤال : لأ .. بس ليه ؟؟
لمياء : ما ادري حسيته اليوم غريب شوي .. هو وفراس اللي ودوني الظهر للبيت من الجامعه .. ولاحظت انه كان مهموم شوي ومتضايق .. قلت يمكن صار شي له وانتي اخته اكيد عارفه ..
صبا بعدم مبالاه : ماعليك منه ، مافيه الا العافيه .. يدلع بس .. توني اليوم العصر اسمعه يلعلع بصوته ويهاوش ويسب كالعاده .. يعني لاجديد هذا فيصل نفسه ماتغير .. امشي بس نروح للبنات ..
مشت صبا خطوتين وعلى طوول مسكتها لمياء من ذراعها وقالت : اصبري يابنت مستعجله على وشو .. باقي شي بسألك عنه ؟؟
صبا لفت عليها وقالت باستغراب : لاا .. انتي ليلك طووويل !! خلصيني وش تبين مدام لمياء ؟؟
لمياء : كنت بسألك .. وش صار عليك اليوم لما طلعتي الظهر مع مازن ؟؟
صبا هزت كتفها وقالت : ماصار شي .. رحنا تغدينا وسولفنا مع بعض .. بس هذا كل شي ..
لمياء وتناظرها بنص عين : يالنصابه .. بس هذا كل شي صار !!! لا وتغديتي معاه بعد .. !! بسرعه وعن الشلخ قولي الصدق وبالتفصيل .. ؟؟؟
صبا : افففف منك يالمياء نشبه بالحلق .. ماكذبت عليك قلت الصدق .. طلعنا انا وياه لمطعم وفسرت له كل اللي صار ورضا علي .. بعدها تغدينا وصرنا نسولف انا وياه لما رجعني البيت .. بس هذا كل اللي صار ..
لمياء : طيب والحين من جابك ؟؟؟ فيصل ومحمد وامك للحين ماجوو .. وانتي جيتي مع مين ؟؟
صبا : مع مازن ..
لمياء صفرت بصوت واطي وغمزت لها وقالت : لا لا وفيه تقدم .. حركاات صبا وش قلتم بالطريق ..
صبا : افففف يااليل معاك .. عادي سولفنا سوالف عاديه .. و.. اييه صح نسيت اقولك .. قررنا يكون الزواج بعد شهرين ..
لمياء فتحت عيونها على الأخير وقالت : شهرين !!! بس انتي قلت لي انك بتخلينه بعد 3 شهور .. وش صار ؟؟
صبا : هو يقول ان وده نستعجل بالزواج ومو قادر يصبر 3 شهور .. لا وبعد كان بيبه بعد شهر .. زين مني اقنعته يكون بعد شهرين ..
لمياء وهي تبتسم بخبث: بس ما تلاحظين مازن بالمره مستعجل عالزواج .. ليه ؟؟
صبا : يووه .. وانا وش دراني .. !!! روحي اسأليه .. وبعدين يله يابنت ترى تأخرنا على البنات بيذبحونا الحين ..
لمياء : يلا ..

دخلوا وحده من الغرف الكبيره للنوم .. فتحوا الباب .. ولقوا كل البنات
( نوره ، نهى ، ريما ، جنا ، شهد ، ساره ، ) مجتمعين على بعض على شكل حلقه بالارض ويسولفون ويضحكون ..
قعدوا معاهم لمياء وصبا بعد ماسلمت عليهم صبا ،،
صبا : اقوول ساره وين سجى وسهى اشتقت لهم ابي اشوفهم ؟؟
ساره : وععع من زينهم ما ادري على وشو تحبينهم .. بزارين وغثا وازعاج مايجي منهم خير ..
صبا : ساره ووجع .. حدك عاد عليهم .. انتي اللي ليه ماتحبينهم بالعكس يهبلون ويزنوون .. اقوول بس انتي مايفيد معاك الكلام قولي لي وينهم بسررعه ؟؟
ساره : اظنهم مع شادن ومحمد تحت بالحديقه يلعبون .. بس خليك منهم بعدين روحي لهم اقعدي الحين معانا ..
نوره : ايه صبا توك جايه اقعدي معنا بعدين روحي لهم ..
صبا : طيب عشانكم بس بقعد شوي .. الا جنا وش تسوين وش ذا اللي بين يدينك ؟؟
جنا ونفسها بخشمها وحالتها حاله : زي ماتشوفين انسه صبا قاعده اذاكر .. السبت علي اختبار احياء وهذاني اذاكر ..
لمياء : ما اقدر انا عالدفره .. كان قعدتي بالبيت وذاكرتي زين ، هنا ماتقدرين تذاكرين زين مع الصجه واللجه ..
جنا : يعني شلوون ؟؟ تبيني انطق بالبيت لحالي مقابله اربع جدران وانتم رايحين تستانسون ونتبسطون .. لا ياعمري ابجي معاكم واذاكر بعد ..
صبا : الله يعينك عاد الاحياء ياثقل دمه .. وانتي شهد وش عندك السبت ؟؟
شهد : انا وناسه علي فقه ونحو .. سهل وحليل يمديني بسرعه اخلصه ...
نهى : ايه والله ياحظك انتي ادبي سهل كله حفظ بـ حفظ موب زي جنا ياقلبي عليها انا ما ادري ليه داخله علمي وبالشه روحك فيه .. صعب يابنت صعب ..
جنا : صح صعب بس اقسامه بالجامعه حلوه ولها مستقبل موب زي شهد اللي اخرتها بتنطق بالبيت ..
شهد : عاااااادي .. ماعندي مانع اقعد بالبيت .. افتك من الدراسه والكرف ..
صبا: اقووول انطموا انتي ويااه .. حنا جايين هنا نستانس ونوسع صدورنا موب تغثونا بالدراسه ...
لمياء : ايه والله حنا نهج من الكتب والدراسه وانتم تجيبون طاريها لنا ..
قامت جنا من مكانها وقالت : انا تاركه هالجلسه لكم بروح اذاكر شوي وراجعه لكم ..
صبا : روحي ياعمري والله يسهل عليك ويوفقك وتنجحين بالاختبار ..
جنا من قلب : من بؤك لباااااااب السما ..
الكل : هههههههههههههههههه
طلعت جنا من غرفتهم .. اما هم كملوا الجلسه ضحك وسوالف وبعد ربع ساعه .. قامت فجأه شهد من مكانه ونطت عند الدريشه اللي تطل على الحديقه ومواقف السيارات ..
استغربوا البنات تصرفها وسألت نهى : سلامات شهد ليه نطيتي للدريشه وش فيه ؟؟
شهد : رهف وريان جوا .. شوفوا سياره ريان .. حتى خالتي منيره جت ..
صبا : ياحبيلها هالرهف .. تدرون عاد احلى شي فيها هدوئها .. موب صجه وهبال مثل اختها ( وتناظر شهد بنص عين ) ..
شهد : ياعمري انتي .. كلكم مخدوعين برهف تحسبونها هاديه وماتتهيبل .. انتي ماشفتيها بالبيت بس تناقز وتستهبل مع ريان .. هي وياه كانهم بزارين بس لعب بـ لعب ..
ريما : اما عاد ودي اشوف رهف وهي تناقز ولا تستهبل طول عمرها هاديه ولاتعرف للدجه طريق ..
رهف من وراهم : ايوه ايوه .. مين هي اللي طول عمرها هاديه ولاتعرف للدجه طريق .. ؟؟؟
الكل لف على ورى وين ماكانت رهف واقفه عند الباب بعبايتها وحاطه يدينها على خصرها ..
صبا تقدمت لها وحظنتها وهي تقول : رهف بعد عمري اشتقت لك يا النذله وينك من زمان ماشفناك ؟؟
رهف : والله حتى انا اشتقت لك .. وش اخبارك ؟؟
بعدت عنها صبا وهي تقول بمرح : يوم شفتك صرت بخير ..
جت لمياء من وراها ودفت صبا من كتفها وقربت لرهف وهي تقول : وخري بس انتي الثانيه ، خليني اسلم على حبيبه قلبي رهوفه ..
رهف : لا لا جاكم شي اليوم ، من متى هالرضا علي ..
صبا : من زماان ياعمري من زماان بس انتي منتي داريه عن اللي حولك ..
شهد بسخريه : ايوه لاهيه برياان حبيب قلبها ..
الكل : هههههههههههه
رهف : حدك عااد على ريوني ترى ما ارضى عليه ..
نهى : ايووه بدى الدفاع يشتغل
نوره : اووص بس انتي ويااه ، اقوول ياعمري تعالي بس اقعدي واستانسي معنا ..
رهف : حبيبه قلبي انتي والله يانوره .. هاذي السنعه تقولي اقعدي موب انتم ماسكيني حش ولا تقولون تفضلي واجلسي .. مااااالت ..
صبا : ههههههههه ماعليك منهم رهف تعالي بس تعالي ..
فصخت رهف عبايتها وحطتها على واحد من الاسره .. وانضمت لهم تسولف وتضحك ..
مرت 3 ساعات وهم مابين الضحك والسوالف والحش ووغيره .. ماحسوا بالوقت ابد الا لما نادتهم خالتهم ابتسام ( ام محمد ) تبيهم يساعدونها على العشاء ..
ريما : يوووووه هاذي امي تنادي .. شوفوا الساعه كم ؟؟ الساعه 8 ماحسينا بالوقت ابد .. بنات يالله خلونا نقوم لاتجي امي عاد الحين وتضفنا من هنا بتهزيئه محترمه ..
صبا : ههههههه يلا بسرعه ..
نزلوا البنات من فوق .. وشافوا خالاتهم يحوسون بالمطبخ مع الشغالات لعشاء الرجال .. قربت صبا لامها وقالت : ها يما هذانا جينا تبون نساعدكم بشي .. ؟؟
ام فيصل : ايه والله حبيبتي ..ابيك تكلمين فيصل الحين وتخلينه يطلع لك برى عند باب الفله ..
صبا : طيب وش اقوله ؟؟
ام فيصل : عطيه هاذي الصحون و قولي له .. تقولك امي وين تبون العشاء بالصاله الكبيره ولا غرفه الأكل ..
صبا لفت وهي تقول : ان شاء الله بقوله ..
قبل ماتكمل خطوتين سمعت امها تقول : دقيقه دقيقه صبا ، قولي له بعد اذا كان مجلس الرجال زحمه وملياان .. خلهم يفتحون المجلس الثاني لهم .. طيب
صبا : طيب يما بقوله ..
رجعت تمشي لباب الفله وهي تتمتم باللي قالته عليها امها .. بعدها رفعت جوالها ودقت على رقم اخوها ... طلبت منه يجي لباب الفله وهي بتنتظره ..
انتظرته دقااايق .. بعدها جا وهو مكشر ويقول : خيير وش تبين ؟؟
صبا: طيب وراك كذا مكشر ومبوز .. ؟؟
فيصل : مالك شغل ، خلصيني بسرعه وش تبين ؟؟
مدت له صبا الصحون : شف امي تقول خذ هاذي الصحون لكم للعشاء وتقول وين تبون تحطون العشاء بالمجلس ولا بالصاله .. لا لا قصدي بغرفه الأكل ولا بالمجلس .. لا وش فيني نسيت اللي قالته لي ..
فيصل بحده ونظره تخوف : صبااا خلصيني وش قالت لك امي بالضبط ؟؟
صبا خافت منه وقالت بسرعه : أأأ تقول وين تبون تحطون العشاء بالمجلس الثاني ولا الصاله ... وتقول اذا المجلس الحين زحمه افتح غرفه الأكل وتوزعوا فيها .. ويلا مع السلامه ...
ما امداه يتكلم الا وهي ماشيه ومايشوف الاغبارها .... مافهم كلمه وحده من اللي قالته وواضح انها حايفه منه ولخبطت بالكلام ..
تأفف بصوت عالي وقال : اففففف يذا العله ماتقول شي ينفهم ، ادق على امي احسن لي ..
طلع جواله ودق على امه ..
..................................................

بعد ما دخلت صبا سكرت الباب بسرعه وهي تقول لنفسها : ياذا الفيصل يمووت خرع .. انا ما ادري وش قلت له .. هو كلامي صح ولا لا .. عاد كيفهم سويت اللي علي ..
مشت لما دخلت المطبخ وشافت امها تكلم بالتلفون وتأشر لها تجي عندها .. عرفت صبا ان امها تقصدها قربت منها ووقفت جنبها تنتظرها تخلص تلفون .. لفت يمينها لقت لمياء قاعده تسولف مع نهى على الطاوله الموجوده بالمطبخ وناسين اللي حولهم والعشاء .. كانت تسمع نهى وهي تقول للمياء : ياغبيه يااااا غبيه افهمي افهمي وش فيك اعيد السالفه عشرين مرره ؟؟ قلتها لك ثلاث مرات ولافهمتي شي .. صدق انك كمخه .. ماتفهمين شي .. دلخه دلللـــخه .. ضحكت عليهم ولا انتبهت لامها اللي تناديها بعد ما خلصت من مكالمتها .. ثواني وصرخت امها بوجهها : صـبـــــــــــــــــــــا ..
لفت صبا لأمها وقالت وهي حاطه يدها على قلبها : يمممممه .. بسم الله .. وش في يمه وراك تصرخين هذاني جنبك .. ؟؟
ام فيصل بعصبيه : وراي اصارخ هاا .. لي ساعه وانا اناديك وانتي ابد ميب معااي طايره بالبنات .. وبعدين وش هاللي قايلته لاخوك .. هااا ؟؟
صبا انهبلت وخافت وش سوت هي عشان تكون امها معصبه عليها كذا .. ووش دخل فيصل بالموضوع ؟؟
صبا : يمه وش صار ؟؟ ووش فيه فيصل وش قلت له ؟؟
ام فيصل : وراه ماقلتي لفيصل عن اللي قلت لك عنه ؟؟
صبا : قلت له يمه وشفيك !!!
ام فيصل : ووش قلتي له .. قوليلي بالضبط ؟؟
صبا : قلت له تقول امي خذ الصحون وتسألكم وين تبون العشاء بالصاله ولا ..... ( سكتت ولاعرفت وين المكان الثاني لانها اصلا ناسيه وش قالت لها امها )
ام فيصل : ولا .. ويين ؟؟ توه فيصل مكلمني يقول ان صبا لخبطت له الكلام ولافهم شي .. ومايدري ويين يودي الصحوون ؟؟ وشفيك صبا وراه ماقلتي له اللي قلته عليك ؟؟
صبا : والله يمه نسيت نسييييت .. يوم جيت بقولك ما ادري لخبطت بين الأماكن ولاعرفت وش اقوله .. قلت أي كلمتين وهجييت ..
ام فيصل : وشدعوه عااد وش قايله لك انا ... العشاء وين يبونه بالصاله او غرفه الأكل وان كان المجلس زحمه يتوزعون بالمجلس الثاني .. ما اظنها صعبه مايبيلها شي .. لاهي معادله ولا مسأله يابنيتي عشان تحوسين وتلفين فيها .. على العمووم ماصار شي وهذاني قلت لاخوك هالكلام.. واقعدي انتي بس .. لاتساعدينا ولاشي ..
صبا : يمه والله اسفه كنت مفهيه ولادريت وش اقوول اصلا ماسمعتك زيين ..
ام فيصل : قلت لك ماصار الشي السالفه بسيطه .. انتي خلاص روحي عند البنات ولاتزعجيني خلينا نخلص من عشاء الرجال ..
راحت صبا للمياء ونهى وقالت لهم وهي تأشر لوجهها : ما كأن قبل شوي طلعت بزر وشكلي سخييف وماله داعي صح ..
لمياء : هو بس ماله داعي ههههههههههههه .. اما انتي طالعه نكته وانتي تتأسفين لامك .. كنك بزر ابد ..
نهى : هههههههههههه مساكين اللي يلقطون وجيههم .. ههههههههههه
صبا بسخريه : هاهاها .. مايضحك واصلا ماصار شي كل بني آدم يغلطون جت عليّ انا .. !!
جاهم صوت خالتهم عبير ( ام نواف ) : لمياااء تعالي ساعديني شوي ..
لمياء : ان شاء الله يمه جاايه ..
قبل ماتقوم مسكتها نهى من كتفها ورجعت ترجعها تقعد وقالت : لمياء انتي اقعدي ارتاحي انا بروح لخالتي .. اوريكم البنت السنعه وشلون تشتغل .. يمكن لاقدر الله انخطب اليوم لاخووك ..
ماتوا ضحك صبا ولمياء عليها وقالت لمياء وهي تتصنع الدهشه والمفاجأه: بسم الله على اخوي منك .. ليش ياعمري انا مت علشان تاخذون راحتكم .. مستحيل ياخذ وحده قبل ماتعجبني وتكون من مستواي ..
نهى : وليه !! انا موب من مستواك ؟؟؟
ناظرتها لمياء بتكبر وقالت بمزح : ماسمعتي باللي يقوول .. راسي يبيلك برج ايفل تطووله ..
نهى : لا والله ياعمري ماسمعته .. أنا ..
قاطعتها صبا : اقوول يالسنعه روحي لخالتي تلاقينها طبخت الحين تحتريك .. بسرعه روحي ..
نهى : ايه والله يلا ..
مشت نهى عنهم وراحت لخالتها عبير وقالت : ها خالتي تبين اساعدك ؟؟
ام نواف وهي ترش الليمون والملح على السلطه : ايه حبيبتي الله يعافيك انا الحين قاعده اسوي السلطه وانتي روحي حطي ورق العنب اللي بالقدر حطيه بالصحن ..
نهى : أي صحن ؟؟
ام نواف : تلاقين بهذاك الدولاب صحن قزاز كبير ... خوذيه وحطي فيه الورق عنب بترتيب ..
نهى : ان شاء الله خالتي ماطلبتي شي ..
مشت نهى للدولاب اللي تعنيه خالتها وفتحته ولقت الصحن .. اخذته بشويش لانه كبير وثقيل .. ومسكته بحرص عشان مايطيح منها .. ومشت للقدر اللي فيه ورق العنب وقبل ماتوصله سمعت لمياء تقولها : تحيا السنعه بنت خالتي تحيا ..
لفت عليها نهى براسها وهي تمشي وقالت : شفتي شلون اعجبـ ...
بغت تكمل جملتها الا صقعت بـ ماريا ( الشغاله ) واختل توازنها .. وطاااااااح منها الصحــــــن .. !!!!!!
طلعت منها شهقه وعلى طوول جثت على الأرض تشوف حاله الصحن اللي اصبح مكسووووور ... !!
جو خالاتها اللي كانوا قريبين منها وقالت ام مازن : حصل خير حبيبتي ماصار شي .. اهم شي انتي صار لك شي .. تأذيتي ؟؟
هزت نهى راسها علامه عالنفي وقالت : والله اسفه ماكنت اقصد بالغلط طاح مني صقعت بماريا وبدون ما ادري طاح مني وانكسر والله اسفه ..
ام ريان ( امل ) : ماعليه حبيبتي بدال الصحن ثاني اهم شي انتي ماتاذيتي ..
لمياء بسخريه : هه .. قال ايش قال سنعه .. هه ولاتعرفين السناعه ولاتقربين لها حتى .. ما اقوول الا ياشين السرج على البقر ...
صبا دزتها من كتفها وقالت بصوت واطي : اسكتي انتي الثانيه .. لاتزيدين السالفه ..
التفتت خالتهم الكبيره منى ( ام عبد الله ) وقالت بحده : اقوول بنات روحوا انتم برى واتركونا نشتغل لحالنا احسن .. انتم مانتفعون للشغل آبد .. يلاااا مابي وحده منكم تدخل الفله قبل مايخلص عشاء الرجال .. يلاااا ..
وعلى طوول ركضوا البنات وماشافوا خالاتهم الا غبارهم .. ضحكت عليهم ام ريان ( أمل ) وقالت : والله هالبنات ماينفع لهم الا انتي يأم عبد الله .. هالدلع ذا خربهم وشوفي وش صاروا .. ما اقول الا الله يهديهم ان شاء الله ويخفف من شيطانتهم وهبالهم ..
.................................................. ...............
برى عند الحديقه الكبيره اللي معطيه المزرعه شكل حلو وخياال .. كانوا البنات موجوديــن وقاعدين على كراسي بوسط الزرع والخضره ..
صبا : وياااااااااي بناات ليه ماتحسون زيي بالجو الحلو وهالجمال اللي حولكم ما أحس أحد فرحااان ولا ؟؟
نهى : نحس وليه مانحس ماحننا بشر؟. .. بس انتي لانك مطفوقه وهبله لازم تعبرين عن فرحتك ذيي بالشكل ذا .. اما حنا يماما رااقين موب ذيك كأنك ماشفتي خيـر ...
لمياء : احلفي مسيو نهى والله ان الود ودك تناقزين من الوناسه لكن مسويتلي فيها ثقل .. اقوول صبا استانسي وعبري عن فرحتك زي ماتبين ولا عليك منها ..
صبا : وانا بشاوركم اصلا .. اقوول وحده منكم تجي معي للنافوره ذيك حولها ورد جوري ابي اخذ لي منه ... يلا مين يجي ؟؟
رهف : انا بجي معاك .. امووت على ورد الجوري ..
صبا قامت من مكانه وقالت : يلا اجل ..
مشوا الثنتين لاتجاه النافوره المفتوحه وحولها الورد بكل انواعه ..
اول ماوصلوا قالت رهف : وااااااااو مرره فظيع المكااان .. شوفي شوفي هنا الجوري ..
دنت صبا منه واخذت لها ورده وحده بعدها التفتت لرهف ومدت لها الورده : رهف شوفي كيف تهبل ؟؟
رهف : ياااي مرره حلوه ... امممم شرايك صبا نجيب كثير ونزرعهم بشعور البنات والله فلــه ..
صبا ماتت ضحك على تفكير رهف وقالت : ياعمري عليك تعجبيني تدرين .. يلا خلينا ناخذ منه كثير ..
..................................................

اما عند الكراسي اللي قاعدين فيها البنات .. كانت شهد تسأل نوره : ها نوره متى بتكون الملكه .. مأكان تأخرتم فيها .. انا اخبر انها المفروض تكون قبل اسبوعين ولا ؟
نوره : ايه كان المفروض تكون قبل اسبوعين بس ما أمداني اجهز زين .. وأجلناها ..
لمياء : طيب متى بتكون ؟؟
نوره : اول خميس بعد الاختبارات إن شاء الله ..
نهى : وناااسه بنات صح .. كذا بعد المجهود النفسي من الاختبارات يكوون فيه رقص وطق وفلله ...
لمياء : من جد ونااسه .. الا وين صبا ورهف تأخروا ولا ؟؟
ريما : هذاهم جو شوفوهم ...
نهى : اخيرا جيتم ... وش ذا اللي بيدكم ؟؟
صبا : زي ماتشوفين .. ورد جوري .. يلا بنات كل وحد تفل شعرها بسررعه ..
ساره : وليه إن شاء الله وش تبين بشعورنا ؟؟
صبا : بزرع فيها ورده من ذولا ..
جنا : هههههههههه اما بزرع حلو هالمصطلح صبا من ويين طلعتيه ؟؟
صبا تأشر على رهف : من هالطرمه ...
رهف : مين الطرمه انسه هبله ؟؟
جنا : وهو فيه احد غيرك طرمه طبعا غير نوير ..
نوره : ايوه قلبتم علي بعد ..
رهف : نوره شرايك نسير انا وياك حزب عليهم ..
جنا : اح اح خليتوها حزب مره وحده .. واللي يرحم والديكم انثبروا بس بلا حزب بلا بطييخ ..
صبا : وش قلت لكم الحين .. فلوا شعوركم بسرعه .. لاتفوتكم ترى احس بيطلع واااو ..
نهى : يا هالوااو اللي مزعجتنا فيها .. مستحيل تتركينها ابد .. واو و واو .. ويلا عاد خلصينا هذا شعري الحرير فكيته بسرعه حطي الورده بس انتبهي لاتطيح اخاف من نعومه شعري ماتثبت الورده ..
الكل : هههههههههههههههه
صبا : امحق نعومه ... شعرك كيرلي وش جاب النعومه لك .. اققول بس اقربي خليني احطه لك ..
رهف : وانتي ريما تعالي احط لك بعد .. ايه لمياء خوذي مني الباقي حطيهم للبنات ..
لمياء : عطيني رهف .. يلا نوره بحط لك ..
نوره : لايماما شكرا مابي تخربون شعري عليّ ..
لمياء : اقوول يابنت تعالي ولا ترى هاا لا اصكك بالنعال الحين ..
نوره : هههههههه طيب طيب .. اذا السالفه فيها نعال خلاص بجي ...
لمياء : ايه بناات مايجوون الا بالعين الحمراء ...
جنا : هههههههه لمياء تذركريني بخالاتي ان خفنا منهم بس يقولون بنات مايجون الا بالعين الحمراء .. ههههههههه
لمياء : هههههه ايه صح من جد خالاتي كذا .. ها شوفوا بنات شلون طالع على نوره حلو ..
نهى : اخيرا طلع شي واحد بنوره زيين ..
نوره تتصنع الزعل : وش قصدك يعني من قبل كنت ايش .. عاديه .. ؟؟
نهى : عاديه يخب عليك بعد ... قبيحه وشينه وقررده ما أدري ليه نواف ماخذك .. على وشو ياحظي لا جمال يطير العقل ولا لسان يقطر عسل .. الا ماخذ وحده شينه لا وبعد طرمااء ... الله يعينه .. اخرتهآ بيتكلم مع الجدار هالمسكين ...
الكل : هههههههههههههههههههه
لمياء : لاعاد نهى حدك على زوجه اخوي لاتجرحين مشاعرها خلي الحقيقه مخفيه احسن .. هههههههههههههههه
صبا : حرااااام عليكم لعبتم بالبنت شوفوها الحين زعلت ..
جنا : لا لاعاد الا مرة الغالي ماتزعل .. بنادي نواف يراضيها ..
ساره : اجل بيمشي مليوون اذا السالفه فيها نوره ..
نوره : اقوول انا بمشي بس .. انتم ماتنعطوون وجه .. ما امداي اضحك وامزح معاكم الا على طوول قلبتم علي .. انقلعوا ..
الفتتت تبي تمشي الا مسكتها رهف : لا نوره لاتقومين اذا قمتي تراني بقوم معاك بعد ..
شهد : حتى انا ترى اذا مشيتي بمشي معك ..
نوره : والله ماحد يفهمني ويقدر شعوري غيركم يابنات راشد ..
صبا : اقوول بنات خلونا ندخل .. الجو بدى يبرد شوي وانا زهقت ..
ساره : بس اخاف تشوفنا امي وتذبحنا هي قالت لاحد منككم يدخل قبل مايخلصون من عشاء الرجال .. والرجال توهم ماتعشوا ..
صبا قامت من مكانها : اقول انا بمشي كيفكم اللي يبي يجي يجي ..
لمياء : وانا بعد بقوم ..
نهى : اجل خلاص كلنا ندخل شرايكم .. ؟؟
شهد : ايه والله ترى جايبه معاي ورق خلونا نلعب فيه فوق ..
صبا : يلا اجل خلونا نروح فوق بدون ماحد ينتبه لنا من خالاتي ..
قاموا البنات كلهم ودخلوا الفله بشويش وبدون صوت ، مالقوا احد بالصاله وعلى طوول تسحبوا على فووق بدون ما أحد يدري ...
دخلوا غرفتهم واول ماسكروا الباب قالت لمياء : وه .. اخيرا وصلنا من غير ماتجينا تهزيئه .. يلا شهد طلعي الورق خلينا نلعب ونستانس ..
ومضت الساعات وهم من لعب الى ضحك الى سوالف .. ولا تعبوا ولاحتى زهقوا لان الجمعه تنسي الواحد نفسه وتخليه يتحمس لكل شي ويقول كل سوالفه ..
وتمت السهره لبعد منتصف الليل وهم في فرحه كبيره .. لحد ماناموا من التعب والجهد اللي بذلوه ... وهم يتمنون يكون بكره احلى واحلى .. وإن شاء الله يكون كذا ...
.................................................. ...............

اتمنى انها تعجبكم

500