رواية حكم الأيآم

الجزء الحادي عشر
=============
طبعا وصل وقت السفر... الي هو بعد اسبوع من ملجه خالد... مسكين خالد عايش حزن... لو الود وده ما يسافر بس منجبر حليله لازم يزور ابوه..
خالد: يعني ماشي مجال لازم انا ايي..
ريم: استح على ويهك .. هذا ابوك صاير لك شهور ما شفته
خالد: ترا انا بين نارين.. نار اني ابا اشوف ابوي.. ونار اني مابا ابتعد عنها؟..
ريم: ههههه.. حاسب عن تحترق.. بس ابوك اولى منها .. هي لاحق عليها.. ولا هو شهر
خالد: كم خذ وقت وانتي اتقولين شهر.. ثواني.. لكن لو تحسبينها وااااااايد
راشد: يلا عاد بلا كلام زايد.. والله ان روميو لو مكانك جان سار عند ابوه.. انزين انا ساير ارقد ان شاء الله الفير بنروح المطار لأن السفر الساعه 6 الصبح.. اوكي.. اباكم جاهزين الساعه 3.30 عشان نتوكل على مطار دبي.. خلاص
عبدالله: خلاص صار.. يلا عبود سير بيتكم.. وقولهم عشان ما ينسون الساعه 3.30 بنمر عليكم..
خالد: جني انطردت؟؟
ريم: هيه.. يلا نبي نرقد امسوي لنا ازعاج..
عبود: ادل الباب ولا ادليك اياه؟؟
خالد: خيبه خيبه طرده قويه الصراحه... لا ادل لا اتعب عمرك سير ارقد لا اتضيع الوقت..
ريم: يحليلك يا خالد.. الله يحفظك.. عبود ودني فوق خل ارقد انا بعد
وراحوا كلهم عشان يرقدون وراح خالد وخبر اهله عن الموعد والكل رقد على اساس انهم يقومون من وقت عسب يجهزون.. كانت الساعه 1.30 والكل رقود رن تليفون يوسف.. ويوم شاف الرقم شاف انه احمد الي متصل.. استغرب بس رد على طول..
يوسف: الو..
احمد: هلا والله.. اشحالك.. ؟؟
يوسف: بخير طاب حالك.. انت اشحالك؟؟
احمد : بخير.. انزين بغيت اخبرك.. منو الي بيوديكم المطار..
يوسف: مادري والله راشد قال بيدبر..
احمد: خلاص قول له اني انا الي بوديكم.. اوكي.. انا وعادل بنيكم ..
يوسف وهو معصب: ليش يعني تبا اتوصلنا؟؟
احمد: هدي بلاك يا ريال طحت فيني.. ما احيدك عصبي..
يوسف: انت ليش تبا اتوصلنا ومصر؟؟ جاوبني؟
احمد: لا اله الا الله... ودي اشوف ريم.. مادري ليش خاطري اشوفها قبل لا اتسافر.. لا تزعل ولا تنفعل من كلامي ارجوك.. ريم ما بيني وبينها شي.. بس ودي. ارجوووك؟
يوسف: صدق انك ما تستحي.. لا وبعد قوه عين اتقولها لي.؟؟
احمد: يوسف هدي دخيلك.. انا ما طلبت شي اعجاز.. بشوفها بس من بعيد والله.. وحتى ما بسلم ولا شي.. الله يخليك.. وافق
يوسف: انت مب صاحي..؟؟
احمد: انا احيدك متفهم.. عشان جيه ما ترددت اني اخبرك.. لو كنت انا نذل جان ما اتصلت فيك وطلبت منك جان بخلي عادل يرمس اخوك..
يوسف: بشرط يا ويلك لو شفتك جريب منها.. والله العظيم لا اجتلك..
احمد: على هالخشم.. بس انت اتصل فيه..
يوسف: بسألك اول.؟؟ ليش تبا اتشوفها؟
احمد: يوسف والله حاس عمري مخنوق.. مادري ليش حاس عمري لازم اشوفها ولو نظره وحده.. لا تزعل مني ادريبك ما ترضى انك تسمع هالكلام.. بس اعتبرني اخوها.. والله مابا شي
يوسف: خير ان شاء الله..
سكر التليفون عن احمد واتصل على راشد يتخبر منو بيوصلهم عشان يقول حق احمد..
يوسف: هلا راشد..
راشد: اهلين.. اقول كلكم واعين.. لا تتأخرون اوكي..
يوسف: هي اظن كلهم واعين.. انزين اتخبرك منو بيودينا المطار؟؟
راشد: سعيد اخو نوره بسيارته ومحمد بسيارته
يوسف: هييييه.. خلاص على خير ان شاء الله
راشد: انزين لا تتأخرون .. باي
سكر عن راشد واتصل يبلغ احمد..: هلا احمد.. اخبرك
احمد: ها شو ؟؟
يوسف: راشد يقول ان محمد وسعيد نسايبنا بيودونا..
احمد: لا تقوووول؟؟
يوسف: هي والله.. وانا ماروم اقول شي الصراحه.. فاسمحلي
احمد: بس انا ودي.. حاول مني مناك
يوسف: ماشي مجال انا اسف ما كان ودي ارفض ..
احمد: انزين انا بيي المطار هناك بترياكم وبس بشوفها دقيقه وبطلع من المطار..
يوسف: برايك المهم مثل ما وصيتك.. ما اتجرب منها..
احمد: خلاص صار..
يتبـــــــــــــــــــــــع

في بيت راشد
راشد: يلا عاد الساعه 3.15 بنتأخر..
نوف: خلاص انا زاهبه وهاي الشنطه خل الخدامه اتنزلها.. وبسير عند ريم
راشد: خلاص عيل لا تتأخرون لأن لازم انسير بيت عمي بعد يتريونا..
نوف: ان شاء الله
سارت نوف عند ريم.. لقتها اتصيح استغربت
نوف: ريم شو فيج حبيبتي؟؟
ريم: يوسف؟؟ اشتقت له؟؟
نوف: هههههه.. انتي انسانه غريبه.. صاحيه انتي امي..
ريم: احبه... نوف افهميني..
نوف: كلنا نعرف انج اتحبينه وانج تبينه.. بس انتي الي راسج يابس ما تسمعين الكلام
ريم: اتهقين بيسامحني..
نوف: اصلا هو يتريا يوم انج اتردين له.
ريم: شوو.. لا لا مابا يتعذب وياي..
نوف: بسم الله الرحمن الرحيم؟.؟انتش شو صاحيه ولا شو..
ريم: اقول لا اتقولين حق حد عن الي قلته امساعه.. مابا خلاص
نوف: افا انتي متى اتحيديني قلتي شي لي وانا قلته لغيرج.. بس عندي طلب.. ؟
ريم: شو.. ؟
نوف: اذا حاول يكلمج ولا يتجرب منج لا تمنعينه الله يخليج..
ربم: ان شاء الله .. صار,.. يى خل ننزل راشد فاعد يزاعج
نوف: هي والله انا نسيت صياحج نساني.. يلا تعالي.. نزلت شنطتج ويا الخدامه
ريم: اوكي..
نزلت ريم ويا نوف وركبوا سياره محمد اخو نوال وساروا صوب بيت عمهم الي كان هناك سعيد يترياهم.. وهناك اتجمعوا كلهم وركبوا السياره وساروا صوب المطار.. كانت الشوارع فاضيه لأن الوقت متأخر.. وصلوا بسرعه المطار ونزلوا.. هناك كان احمد يترياهم وكانت عزّة ويا نواف من الصوب الثاني يتريون ريم عشان يسلمون عليها.. وأول ما شافت عزّة ريم ركضت صوبها..
عزّة: الله الله .. شو هالحلاة ريم..
ريم: اووووه.. عزوووز حبيبتي انتي اهني؟.,.
عزّة: لا هناك.. اشحالج..
ريم: بخير يالي ما تسألين..
عزّة: ريم انتي ادرى بالظروف.. شغل البيت والحمل.. ما احصل وقت.. هذا نواف بغى يسلم عليج.
نواف: هلا والله ريم.. اشلونج؟؟
ريم: بخير ربي يعافيك انت اشحالك..
نواف: بخير.. اقول عزّة جني اشوف احمد هناك بسير عنده.. يلا ريم ان شاء لله تروحين واتردين بالسلامه..
ريم: الله يسلمك..( ريم في داخلها تتسائل عن سبب وجود احمد .. شو الي يابه هني.. ليش .. شو يبا يلحقني يعني.. )
عزّة: حووووح وين سرحتي..
ريم: ها.. لا ماشي.. اقول عزووز
عزّة: هلا..
ريم: وديني عند احمد..
عزّة: لحظه خل اشوف حرارتج.. لا حرارتج مب مرتفعه.. بلاج .؟؟
ريم: الله يخليج.. مادري ليش خاطري اسلم عليه.. دخيلج..
عزّة: انا ادري تبين تقهرين يوسف..
ريم: لا والله .. ازقري يوسف بعد؟؟
عزّة: لا بالله انتي مب صاحيه اليوم..
نوف: ليش اتقولين عن ريم مب صاحيه؟؟
عزّة: من طلباتها العجيبه..
نوف: ليش شو طلبت؟
ريم: ابا اسلم علىاحمد..
نوف: صدقتي يا عزوز البنت راحت فيها..
ريم: مو وقت المصخره احين.. ازقروا يوسف..
نوف: يوسف تعال ريم تباك.. (يوسف يوم سمع هالكلام ما عرف كيف يفر الجنط الي في ايده ويركض صوبها الكل ضحك عليه وهو ولا معبر)
يوسف: هلا.. خير ريم؟؟
ريم: يو.. يو..
يوسف: بلاج متردده خبريني.
ريم: يوسف ودني صوب احمد بسلم عليه
يوسف: شوووووو.. انتي تبين تجتليني .. عذابي يريحج..
ريم: يوسف.. والله مب عسب شي.. بس مادري ليش في شي في قلبي جابرني اني اسلم عليه
يوسف: شو هالإحساس الغريب الي اول مره اييكم اليوم..
ريم: ليش منو بعد ياه احساس غريب..
يوسف: تعالي وياي بخبرج(راحت ريم ويا يوسف وتم يرمسها).. بسألج اتجاوبيني بصراحه.. ما بزعل والله صدقيني..
ريم: متى اتحيدني مب صريحه.. قول؟
يوسف: انتي شي بينج وبين احمد اتصالات ولا شي.. ؟
ريم: انت هب صاحي.. شو هالرمسه.. لا..
يوسف: عيل ليش كل واحد فيكم مصر يشوف الثاني..
ريم: ليش هو بعد طلب هالشي..
يوسف: عيل شو الي يابه هني.. يقول في احساس يجبره انه يشوفج.
ريم: دخيلك ودني له ..
يوسف: والله الي يشوفني يقول مرسال غرام
ريم: يوسف شو هالرمسه.. انا ما احب غيرك
يوسف وقف مكانه يوم سمع هالكلام: شو .. عيدي..
ريم: ههههه.. بلاك.. احبك
يوسف: عيل شو اتسمين الي اتسوينه فيني..
ريم: من حبي لك اخاف لك العذاب..
يوسف: اي عذاب.. انا مافي شي معذبني غير حبج.. يعني غيرتي رايج
ريم: احبك شي ورايي... شي.. ما غيرت شي.
يوسف تم ساكت ومشى صوب احمد.. الي كان احمد مستغرب شو الي يايبنهم صوبه..
يوسف: هذا احمد جدامج
احمد: شو.. بلاك يوسف.
ريم: انا الي طلبت من يوسف اييبني صوبك.. بغيت اسلم عليك..
احمد: علي انا.؟؟ ليش؟؟
ريم: احين انا ماده ايدي ما بتسلم..
يوسف مغيض في داخله وده يزغد احمد ويكسر ايد ريم.. بس كان متمالك اعصابه احتراما لطلب ريم. .. اما احمد كان متردد انه يمد ايده خوفا من يوسف.. بس يوسغ اشر له اوكي..
ومد ايده وسلم عليها..
ريم: مشكور على الييه.. مادري ليش كنت محتاجه هالشي..
احمد: العفو.. انا استأذن بروح.
يوسف: هي حتى نحن لازم ندخل.. ياسين يزقرونا نتوجه للبوابه.
ريم: مع السلامه
احمد: في امان الله.. الله وياج
وسار يوسف الي كانت الشراره في عيونه.. ويا ريم.. والكل سلم على بعض واتجهوا صوب البوابه وخلصوا اجرائات تدقيق الجوازات واتجهوا صوب الطياره...
اما عزّة ونواف فسلموا على احمد وراحواصوب الباركينات..
احمد كان في عالم ثاني.. عالم ريم.. مب قادر يشل تفكيره عنها.. كان ماسك مقبض ايده بقو .. يحس ان لمسه ايد ريم بعده عليها... وتم يبوس ايده ويصيح.. حاس انه بيودع ريم.. مب قادر يسوي شي يخليها تسعد في حياتها... ركب السياره وسار صوب بيتهم.. كانت الشوارع فاضيه وهو سرحان يسوق ومب عارف وين يالس يسوق.. فجأة فقد سيطرته للسياره لأنه طلعت جدامه شاحنه ما قدر يسيطر على السياره ودعمها.. وبعد نص ساعه وصلت سياره الإسعاف وخذته الي كان ينزف بشده.. وهو في سياره الإسعاف.. كان كله ينطق اسم نواف يطلبه..
السستر: حاضر .. حنجيبه.. بس انت ما تتكلمش .. لازم عشان صحتك
احمد بصوته المتقطع: ابا نواف..
السستر: حاضر.. بس نجيبه ازاي..
احمد: اتصلو فيه..
السستر: هو رقمه في موبايلك.. لأن الموبايل مع الظابط..
احمد هز راسه يأكد على كلام السستر.. ولما وصلوا المستشفى ونزلوه طلبت السستر من الدكتور وقالت له عن طلب احمد.. والدكتور ما قصر كلم الظابط واتصلوا في نواف..
نوف: الو..
الضابط: الأخ نواف..
نواف: هي نعم.. منو وياي
الضابط: وياك الضابط المناوب في مستشفى البراحه,, بغيت اخبرك ان ربيعك احمد مسوي حادث وهو طالبنك اتيي عنده..
نواف: شوووووو احمد.. خلاص ياي ياي..
سكر الخط عن الضابط وما عرف كيف يوصل نفسه للسياره واتجه صوب المستشفى وهو مسرع 220 وعزّة من خوفها كل شوي تتصل فيه وهو مب منتبه للتليفون وما يرد عليها . واول ما وصل المستشفى نزل من السياره وهو ناسي يسكرها وراح صوب الحوادث يشوف احمد.. الدكتور دخل نواف حجره احمد.. الي كانوا موصلين له دم واكسجين وحالته جدا صعبه...
نواف: احمد.. خير اشبلاك(الدموع كانت في عيونه من المنظر الي جدامه)
احمد وهو يلفظ انفاسه بصعوبه: نواف.. سوسن.. قولها اني احبها.. خل تسمع كلام امي وابوي وتنسى طيش المراهقه الي فيها
نواف وهو يصيح: احمد.. لا تقول جيه.. انت روحك بتطلع وبتقول لها..
احمد: نواف.. قول حق امي وابوي يسامحوني على غلطاتي. ..
دخل الدكتور الي كان بنفسه يصيح لحالت احمد شاب قوي وهيبه يكون في هالحاله وهو مب قادر يسوي شي... تم واقف يطالع احمد وكأنه حاس إن هالإنسان بيموت..
نواف: احمد.. اسكت دخيلك ..
احمد: نواف. ريم.. ريم لا تنساها.. سلم عليها.. اشكرها انها سلمت علي.. وبعد موتي اباها تشوف الدنيا.. بعيوني..
نواف: احمد.. لا تقول هالكلام انت مافيك شي...
احمد: انا ادرى بالي فيني... واطلب من يوسف يسامحني على طلبي.. واظنه احين بيفهم احساسي لأني بغيت اشوف ريم..
نواف: احمد.. اسكت.. (ولا اراده منه.. ما لقى عمره غير يصفع احمد من الكلام الي سمعه. ... بس ما لقى اي رد من احمد.. تم يصفعه .. لكن احمد كان مسلم روحه لباريها.. وعرف الدكتور هالشي ومسك نواف.. وسحبه على جنب.. الي كان يقاوم بدوره عشان ما يبتعد عن احمد)
نواف: لا... خلني.. نساني ... نسى ان مالي غيره,... الخاين.. غدر بوعده لي.. تركني.. (كان نواف منها ويصيح مب عارف الي يقوله)
--------------------------------------------------------------------------------
يتـــــــــبع

الدكتور: هد عمرك.. هذا انسان عمره انتهى.. وهذا المكتوب..
نواف: لا احمد مارااااااااااح.. احمد يقص علي.. صج احمد .. رد علي.. احمد..
الدكتور: اذكر الله.. وادعي له بالمغفره هو احين محتاج لدعائك.. واذكر الله.. هذا فعل ربك
نواف: والنعم بالله.. بس صعب.. صعب اني استوعب ان احمد راااااح
الدكتور: هدي بالك.. انت احين لازم اتبلغ اهله..
نواف: لا مستحيل.. كيف ابلغ اهله ماروم.. انتوا بلغوهم ..
الدكتور: خلاص حاضر بس انت هد بالك..
نواف: وصيته... هي وصيته.. دكتور.. وصا بعيونه لريم..
الدكتور: انا اكثر مهتم بهالوصيه وشاهد عليها.. بس منو ريم.. زوجته
نواف: لا يا دكتور.. هاي انسانه حبها من كل قلبه انعمت...
الدكتور: لازم انفذ وصيه الميت ودام انها خير
نواف وهو معصب: لا .. احمد ما مااااااات.. احمد هني.. هني.. (انهار وفر عمره على الأرض وتم يصيح.. والدكتور كان يهديه وخذا رقم اهل احمد واتصل فيهم على اساس ان احمد مسوي حادث وهو راقد احين.. وطبعا اهله كلهم اسرعوا ووصلوا.. دخلوا شافوا نواف على الأرض ولاوي راسه على ريوله ويصيح.. حسوا ان في شي. ابو احمد سار صوب نواف يتخبره عن احمد)
ابو احمد: نواف... وين احمد؟؟
نواف وهو مرتبك.. عمي.. احمد.. (بدا يصيح) احمد رااااااح.. ودرني الخاين (لوى على حضن ابو احمد وبدا يصيح...)
ام احمد يوم سمعت كلام نواف اغمى عليها وطاحت وشلوها الممرضات ودخلوها على الغرفه.. اما سوسن تمت مثل المينونه اتصرخ وتضحك.. اتصيح وتضحك.. صابها حاله من الهيستيريا حاول ابوها يهديها بس ما قدر.. نواف حس عمره ضعيف جدام هالموقف مب قادر يتصرف.. كان منها من داخله.. تذكر عزّة اتحاتيه.. ركض صوب سيارته الي كانت شغاله وخذ التليفون واتصل فيها وطمنها على نفسه وخبرها الخبر الغير سار عن احمد الي تمت اتصيح.. ماكانت مصدقه ان احمد الي توه كان وياهم.. راح.. بند التليفون عن عزّة ةراح صوب ابو احمد.. يخبره عن وصيه ولده...)
نواف: عمي.. احمد قالي كلام بغاني ابلغه لكم..
سوسن كانت واقف حذال ابوها تبا تسمع
ابو احمد: خبرني..
نواف: يقول يباكم اتسامحونه على اي غلط بدر منه..
ابو احمد: لا حشى عليه ما غلط علينا.. كان مبيض الويه ويانا دوم..
نواف: وقال حق سوسن انها تنسى مراهقتها وتتذكر امها وابوها.. وعمي هو وصى بشي..
ابو احمد: خير ..
نواف: يبا يتبرع بعيونه لوحده كان يحبها هي عميه..
ابواحمد: منو هاي.؟؟
نواف: اسمحلي عمي احين ما اقدر اقولك.. انت شو رايك
ابو احمد: والله هذي وصيته ونحن ما نقدر نخالفه..
نواف: اتعرف راشد المزروعي الرسّام..
ابو احمد: ولد علي المزروعي المرحوم..
نواف: هيه...
سوسن يوم سمعت هالإسم فزت من مكانها.. تذكرت عبدالله.. نست صياحها وحزنها من الصدمه..
ابو احمد: يا نواف يا ولدي.. احمد راح وخلاص.. الي عايش اولى منه.. وهذا الشي بيكسب اجبر فيه ليش ما انوافق..
نواف: هذا ظني فيك عمي. ..
وتم يصيح ابو احمد ويا نواف.. وسوسن بعدها مصدومه.. بس ردت بها الدوامه على كلام اخوها ووصيته لها.. وتذكرت انها فقدت اخوها... وانهارت من الصياح.. راح نواف لبيته وقرر يتصل في يوسف وراشد يبلغهم اليوم الثاني واما سوسن وابو احمد راحوا عند ام احمد الي كانت في الحجره تعبانه.. وبلغوها بكلام ولدها.. وطبعا ما ترددت لحظه انها ترفض..
في الطياره
======
ريم كانت قاعده حذال يوسف.. وفجأة فزت من مكانها وتمت اتنادي على اسم احمد.
يوسف: انتي شو بلاج اليوم..؟؟
ريم: يوسف.. احمد.. حاسه ان في شي..
يوسف: صدق انج ما تستحين وتذكرين اسمه جدامي.. تبين اتموتيني صح.
ريم: مب وقته.. بس قلبي يقولي ان في شي صاير..
يوسف: اقول اسكتي احسن.. يوم بنوصل بتصل في نواف بيقول لي اذا في شي ولا لا..
ريم: يوسف لا تزعل من كلامي.. بس انا مب مرتاحه مادري ليش
يوسف: لا حبيبتي.. غثي فيني اكثر بترتاحين.. ويوم اموت والسبه انتي سوي حفله راحه
ريم: انت مب فاهم احساسي.. بس مصيرك بتفهم ..
يوسف: اقول خليني ارقد احسن.. مادري انا ليش احب وحده ما تهتم غير بنفسها..
ريم: يوسف.. شو هالكلام..
يوسف: هذي انتي من اول ما عرفتج.. برقد .. افهمي برقد
ريم سكتت ومرت الساعات ووصلوا المانيا.. الجو طبعا بارد.. كان مستقبلنهم خالهم هناك.. عشان يوديهم عند ابو يوسف.. واول ما وصلوا الفندق كانوا تعبانين وايد .. سلموا على عمهم وراحوا حجرهم بعد ما قعدوا وياه شوي ورقدوا.... انا ريم ما كان فيها رقاد.. طلبت من عبدالله انه يتصل في نواف.. يتخبره عن عزّة.. استحت اتقول لأخوها السبب الرئيسي.. وطبعا عبدالله ما رفض طلبها واتصل في نواف.. الي كان الوقت عندهم فليل ..
عبدالله: السلام عليك نواف..
نواف وبنبره حزن: وعليكم السلام... عبدالله.. الحمد لله على السلامه.
عبدالله: الله يسلمك.. شو بلاه صوتك نواف..
يوم سمعت ريم كلام عبدالله تأكدت ان اكيد صاير شي..
نواف: شو اقولك عبدالله... احمد راح ودرني روحي... احمد ماااااااات يا عبدالله مات
عبدالله: لا اله الا الله.. انا لله وان اليه راجعون.. لا تكدر روحك..
نواف: اخبرك.. مابا ريم اتعرف.. لأن هو قبل لا يموت وصى بعيونه لريم.. واذا عرفت ريم بترفض.. ونحن ما نبا نرفض وصيته.. لأن كان دوم يبا سعاده ريم..
عبدالله: كيف؟؟
نواف: خبرها ان في واحد مسوي حادث والدكتور تذكر ريم ويطلبها عشان العمليه..
عبدالله وبصوت واطي: هي حذالي.. اقولها منو مات؟؟
نواف: قول حد من اهلي في كويت ولا شي.. المهم لا تخليها تعرف..
عبدالله: خلاص صار.. انا بكلم يوسف وراشد وبشوف..
نواف: دخيلك بأسرع وقت
عبدالله: خلاص لا تحاتي مشكور..
وبند الخط واستلمته ريم بالأسئله..
عبدالله: يا بنت الناس.. يا اختي.. مافي شي.. واحد من اهله متوفين وعزيته.. واما عزّة ما فيها شي..
ريم: اكيييد.. اخاف اتقص علي
عبدالله: هذا ظنج في عبود.. تربيتج انا
ريم: هههههه.. انزين شو السالفه الي بتكلم راشد ويوسف فيها..
عبدالله: ماشي .. لقوا لج شبكيه .. من شخص مسوي حادث ومتوفي كلموا اهله واهله ما عندهم مانع..
ريم: شوووووو.. (الضحكه شاقه ويه ريم) صدق.. يعني بقدر اشوووف
عبدالله حس ان الدنيا مب شالتنه من ضحكه ريم.. كان مستانس لوناسه ريم.. لأنه هاي اول مره يشوف ريم بهالفرحه..
عبدالله: هي يا ريم.. يعني بترجعين ليوسف.. انتي موافقه يعني؟؟
ريم: اكييييييد.. الله هاي احلى هديه من ربي.. يوسف.. وينه ناده بكلمه..
عبدالله: خلاص احين.. دقايق..
ريم: لا دقايق وايد.. ابا ثانيه ويكون عندي..
عبدالله: ان شااااااء الله..
طلع عبدالله وسار صوب غرفه يوسف ودق الباب وسحب يوسف من غير ما يقوله ولا كلمه.. ويوسف مستغرب
يوسف: حوووح.. شو بلاك جنك تسحب عنز... شو السالفه..
عبدالله: تعال وانت ساكت..
يوسف: يالله عاد خبرني شو ؟؟
عبدالله: قبل لا اتغير رايها ريم تعال بسرعه..
يوسف: ريم.. لا لا احين بتهزئني وبنغث..
عبدالله: اووووووه.. مب ويه نعمه.. ياخي ريم تبا ترجع لك..
يوسف: شو شو .. واااااااااااااااو لحظه خل ارقص اشوي.. شو الي غير حالها..
عبدالله: سالفه طويله.. تعال..
يوسف دخل ويا عبدالله الحجره وهو خايف وكل اشوي يقرص في عبدالله
عبدالله: ذبحتني تراك.. ريم.. هذا العنز جدامج..
يوسف: محد غيرك الي عنز..
ريم بدت اتغني له:
لو بغيت الروح.. ما تغلى عليك..
كل عمري لك .. ولو تامر علي
لو بغيت القلب.. في مدة ايديك..
كيف ابعطيك قلب انت فيه
مالكني بالغلا ما ملك شريك.
كنه ما غيرك بشر انظر عليه
لو بغيت الروح ما تغلى عليك
يوسف: انا اقول حق عبود ابا ارقص.. احين برقص..
ريم: لا .. يوم بشوف ارقص
يوسف: كيف؟؟ ما فهمت...
عبدالله: لقينا شبكيه متبرعينها لريم.
يوسف: يلا عاشوا.. ابا ام علايه. ابا استانس
ريم: الله يهداك ام علايه في المانيا... وين تبا
يوسف: ابا قلبج..
ريم استحت من كلامه وقاطعهم عبدالله: اقول خلوا الرومانسيه عقب.. تعال وياي يوسف ابا اكلم راشد عن الموضوع عشان نرجع البلاد بأسرع وقت..
يوسف: احين نرجع..
ريم: وين تبا احين.. على الأقل اليوم
يوسف: انا مستعيل خوف انج اتغيرين رايج..
طلع يوسف ويا عبدالله وراحوا صوب غرفه راشد ودخلوا عنده.
عبدالله: راشد.. عندي لك خبر
راشد: خير ان شاء الله..
يوسف: انا بقوله ؟؟
عبدالله: لا انت مب عارف السالفه الأصليه خلني انا برمس...
يوسف: ليش في شي انا ما عرفه..
عبدالله: اسكت لا اخلي ريم اتغير رايها..
يوسف: اخ زخني من الإيد الي اتعورني..
عبدالله: سلمك الله.. اتحيد احمد...
يوسف: يالله لا اتييب هالإسم احس بإشمئزاز
راشد: يوسف ويعدين وياك خل عبدالله يكمل ..
عبدالله: اذكر الله ... الريال متوفي..
يوسف +راشد: شوووووو .. متى
عبدالله: البارحه مسوي حادث..
راشد: لا حول ولا قوة الا بالله .. الله يرحمه..
يوسف: البارحه ريم.. حست ان في شي صاير له.. الله يرحمه المسكين.. منو خبرك
عبدالله: نواف.. ريم طلبت مني اتصل فيه.. المهم .ز هو قبل لا يموت وصى لريم بعيونه
يوسف: شووووو..
راشد: ليش يعني.
عبدالله: راشد.. يمكن انت ما تعرف الموضوع.. هو كان يحب ريم.. بس ريم كانت اتصده وبهد الي صار لريم وابتعدت عن يوسف.. وعرف ان ريم ما بترد الا يوم اتشوف.. وقبل لا يموت وصى بهالشي.. المهم ان نواف قالي لا اتقلون لريم قبل العمليه منو المتبرع يمكن ترفض
يوسف: الله يرحمك يا احمد.. والله انك سويت احلى شي.. الله يجزيك كل خير..
انتهى الجزء الحادي عشر

الجزء الثاني عشر والاخـــيـــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــر
============
راشد: انزين ... وشو قلت انت حق ريم.. ؟
عبدالله: ماشي قلت لها ان واحد مسوي حادث والدكاتره كلموا اهله عن حالتها والأهل ما عندهم مانع..
راشد: انزين .. يعني لازم احين نرجع من السفر..
يوسف: وبأسرع وقت.. دخيلكم قبل لا تغير اختكم رايها عني..
راشد: رايها في شو؟
عبدالله: ريم اول ما سمعت هالخبر قررت انها ترجع ليوسف..
دخلت نوف وهي تسمع اخر كلمه ترجع ليوسف: والله.. صدق.. الحمد لله ربي هداها..
يوسف: الله يخليج لا تخلينها اتغير رايها..
نوف: افا .. اصلا انا اتريا اللحظه الي ترجع فيه على عقلها وتفكر صح
راشد: اقول نوف.. نحن بنرجع البلاد.. بسير مكتب السفريات بغير التذاكر وبجدمهم..
نوف: ليش... في شي صاير..
عبدالله: لقينا متبرع حق ريم.. عسب جيه مستعيلين نحن..
نوف: والله,.. الله يبشرك في الخير.. منو؟؟
عبدالله: احمد .. الله يرحمه.. قبل لا يموت وصى لنواف عن ريم..
نوف: يحليله.. الله يرحمه.. متى مات؟
عبدالله: البارحه مسوي حادث..
يوسف: اقول راشد.. قم خل انسير .. مكتب السفريات
راشد: وين انسير.. شوف الساعه قبل.. وبعدين لازم انرمس عمي وعمتي انخبرهم..
يوسف: انزين امي لا ترد ويانا عشان اتم عند ابوي ونحن بنرد..
عبدالله: هي صدق..
نوف: عيل يلا نسير لهم انكلمهم قبل لا يرقدون..
راشد: يلا..
قام الكل وطلعوا من غرفه راشد وراحوا صوب غرفه عمهم عشان يكلمونه عن الموضوع كان خالد قاعد هناك عند امه وابوه.. دخل عليهم راشد ويوسف ونوف وعبدالله.. السلام عليكم
الكل: وعليكم السلام...
ام يوسف: الا وين ريم..
نوف: بسير بييبها احين.
راشد: عمتي نحن لازم نرد البلاد.
ام يوسف: ليش؟
يوسف: عشان ريم.
بو يوسف: ليش شو فيها؟
عبدالله: مافيها شي... بس لقينا لها متبرع بالشبكيه .. فلازم اترد واتسوي العمليه بأسرع وقت.
ام يوسف: صدق.. الله يبشرك بالخير..
ابو يوسف: وما عرفتوا من المتبرع؟
راشد: شاب متوفي بحادث.. كلموا اهله عن الموضوع وما عندهم مانع..
ابويوسف: الله يجزيهم خير.. خير ما يسوون والله.. ريم تستاهل اتعيش سعيده..
يوسف: وابشركم ريم قررت ترجع لي..
ودخلت ريم وهي تسمع من يوسف هالكلام حست بالإحراج..
ام يوسف: هلا والله ببنيتي.. هلا بالقمر..ريم: هههههه.. خل الي يغارون يسمعون.. اباهم ينقهرون ويقدرون الجمال الي انا فيه..
يوسف: انا مقدر من زماااان الحمد لله.. عسب جيه انا مب قادر استغني عنج.
ريم: منو رمس عنك احين؟؟
يوسف: افاااااااا.. عيل عن منو
ريم: عن هالمربيه الأجنبيه الي يابتني عندكم.. آنسه منشن
نوف: افاااااا.. انا استويت آنسه منشن.. عيل يلا جدامي بردج الحجره
ريم: هه.. ما ترومين.. اصلا القعده من غيري ما تسوى..
راشد: في ها صدقتي.. انتي شمعه المكان
ريم: فديتك اخوي.. جان زين لو هالكلام يطلع من بعض الناس
يوسف: لا عاد هالمره تقصديني انا متأكد.. انا مابا اتغزل فيج جدامهم عقب يصرقون العذال الفاظي وينسبونها لأعمارهم.. ويقصون فيه على حريمهم
ريم: هيييييييييه.. دام جيه.. خلاص سامحناك
عبدالله: حوووووح. خالد وين وصلت؟
الكل: نوووووووره.. ههههههههه
خالد: كل واحد فيكم اسخف عن الثاني.. متى بتردون برد وياكم
ريم: لا لا .. اخاف اذا ييت ويانا من نحاستك تفشل العمليه
خالد: اصلا لولاي الطيار ما بيحرك الطياره
يوسف: هي معلوووووم.. ترا الأمير جارلز اللي ويانا..
خالد: لا الشيخ خالد بن سلطان المزروعي
راشد: عن الخقه الزايده.. اصلا انت ومرت عمي تنثبرون مكانكم ماشي رده..
خالد: لا والله.. وهاليوسف ليش يرد؟
يوسف: اولا مب اصغر عيالك انت.. وثانيا انا برافق خطيبتي.. لازم اوقف وياها..
خالد: شو خطيبتك.؟؟ انا احيد اتغيرت الأمور..
عبدالله: لا انت موضتك جديمه.. ياخي الأول تحول وردت المياه الى مجاريها..
خالد: اوووووه .. اخيرا عقلت ريم.. مبروووووك
ريم: ايه لا تخليني بسبتك اغير رايي.. انا من يومي عاقله
يوسف زخ المخده وفرها على خالد: انت انجب..
راشد: هههههه.. يحليله ما صدق ريم اتغير رايها .. ونت تبا اتخرب كي شي...
يوسف: لا لا ما يقدر.. اصلا انا بملج بريم قبل لا تغير رايها.. مافيني بعد
ريم: لا حبيبي.. ماشي ملجه غير يوم افتح عيوني والقاك جدامي..
راشد: اوه ماشاء الله.. محدده بعد
ريم: انا اضبط اموري كلها..
ابو يوسف: الله اشتقت لهاللمه الحلوه... الله لا يخليني منها..
الكل: آمين.
ابو يوسف.. اقول ما حسيتوا ان صوتي اتحسن
راشد: بلا عمي.. احس بك متحسن وايد عن قبل..
ابو يوسف: الحمد لله.. انا بعد حاس جيه.. والله لولا خالكم الله يجزيه الف خير .. جان انا بعدني على حالي..
ام يوسف: هي والله اخوي ما قصر رايته بيضه..
ريم: انا سمعت بيضه.. انا بعد ابا .. يوعانه الصراحه
الكل ضحك..
ريم: شو بلاكم.. ؟؟؟
عبدالله: اقول كملي رقادج.. نحن نرمس عن شي وانتي في شي ثاني..
ريم: لا والله... ما علينا المهم انا يوعانه..
راشد: حتى انا الصراحه شو رايكم انسير المطعم الي جريب من اهني ... سمعت من واحد سعودي كا هني في الفندق.. قال لي ان هالمطعم عربي..
نوف: هي والله.. انا هم يوعانه..
راشد: عيل يلا قوموا اجهزوا...
ريم: اقول نوف هيا بنا.. جهزيني..
يوسف: يحلييييلج بيبي يجهزونج؟؟
ريم: ما عليه اطنز.. يوم بشووووووف ذاك الوقت براويك..
يوسف: اخاف تلبس لنا قميص اصفر وتنوره خضرا وجوتي احمر..
نوف: اقول هي انت... شت اب
خالد:اوووووووب طلعت تعرف انجليزي,,,
نوف: خلني ساكته لا ا سكتك احين..
عبدالله: انتوا ايه.. لو تميتوا جيه ترانا ما بنسير الظاهر..
ريم: انا سكت..
نوف: حتى انا .. يلا اشوفكم تحت
وظهر كل واحد وسار حجرته عسب يجهز ويتلبس.. الكل كان مستانس ومرتبش.. وبعد ما الكل جهز اتيمعوا تحت في الصاله وراحوا المطعم.. هناك الكل تم يسولف ويضحك ومستانس جلبوا المطعم على راسهم.. راعي المطعم لو الود وده يطردهم.. بس مب رايم..
وبعد ما خلصوا عشاهم ردوا الفندق وكل واحد دخل غرفته عسب يرقد.. وقرر راشد انه يقوم الصبح ويا يوسف عشب يروحون لمكتب السفريات..
يوسف كان متحمس وقايم من وقت.. تم يتصل على غرفه راشد عسب يقوم..
راشد: الو..
يوسف: يلا قوم بلا كسل..
راشد: اعوذ بالله .. انت شو من بشر
يوسف: اوووه ايه اسمعني اباك خمس دقايق واتكون تحت .. ولا تنسى الجوازات
راشد: اف منك.. انزين خلاص صار
يوسف: يا ويلك لو تأخرت بجلب الفندق عليك
راشد: ادريبك.. انت مينون وبتسويها وبتفضحنا
يوسف: عيل بلا رمسه زايده يلا اجهز..
راشد: صدق انك حشره .. انزين قلنا لك
صك التليفون وسار يجهز.. ونوف قامت ولبست سارووه وطلعت وراحت غرفه ريم تقعد وياها..
وراشد ظهر ويا يوسف على شان يروحون مكتب السفريات ويغيرون تاريخ الحجز..
راشد: اقول اذا حصلنا حق متى ناخذ؟؟
يوسف: اليوم قبل باجر..
راشد: اليوم عاد,,
يوسف: هي اليوم.. انت مب حاس فيني.. اختك هاي مزاجيه عادي اتخون واتقولي مابا
راشد: يحلييييلك... احس بك متعقد؟؟
يوسف: هي والله..
في غرفه ريم.. كانت ريم قاعده ويا عبدالله ونوف في الصاله..
ريم: اقول من متى ساروا.؟
نوف: صاير لهم احين نص ساعه..
عبدالله: شو بلاج ريم.. شكلج مستعيله وايد؟
ريم: والله هي وايد.. ما تتصورون فرحتي يوم افكر اني برد اشوف مره ثانيه..
نوف: مب بس انتي الي فرحانه كل واحد فينا مستانس اكثر من الثاني..
عبدالله: اقول بتصل حق نوال احين عندهم المغرب..
ريم: هي والله خل انرمسهم.. مشتاقه لهم
نوف: بس لحظه عندي اقتراح؟
عبدالله +ريم: شو؟
نوف: لا تقولون لهم ان ريم بتسوي عمليه وبترد اتشوف.. خلوها مفاجئه للكل..
ريم: هي والله .. ما يه على بالي..
عبدالله: خلاص صار.. اتصل احين
ريم: هي شو تتريا ما اتصلت بعدك؟
نوف: يحليله ما وحاله؟
عبدالله: هذوه يرن....... الووو
نوال: هلا والله بهالصوت.. هلا بالغايب الغالي
عبدالله: اهليييين.. اشحالج يا عمري ..
نوال: اتعب أنا في دنيتي من دون طاريك وتتعب عيوني كل ما غبت عني
عبدالله: العين تشكي ودها تشوف زولك أما تجي أو تأخذ العين وياك
نوال: فديتك حبي.. اشحالك؟؟ واشحال الأهل.. ؟؟ وعمي؟؟ وريم
عبدالله: اشوي اشوي.. كم سؤال في الدقيقه
نوال: مشتاااااقه
عبدالله: كلهم بخير ويسلمون عليج.. ومشتاقين لج.. هذي ريم ونوف ياسين عندي
نوال: والله عطني ريم حبيبتي ارمسها
عبدالله: ريم تبا اتكلمج؟
نوف: لا والله انا شو.. هات هات... الووو
نوال: هههه .. والله مو قصدي؟؟
نوف: يلا جب.. عطيني نوره الحلوه
نوال : افااااا وانا .. مب حلوه
نوف: انتي الحلا كله ونحن انروم انقول مب حلوه.. اشحالكم
نوال: بخير الحمد لله.. اشحال راشد وساروونه؟
نوف: بخير يسلمون عليج.. هاج ريم
نوال: اوكي..
ريم: هلا والله.. اشحال القمر؟؟الثاني من بعدي طبعا؟
نوال: السما مالها غير قمر واحد.. وانتي قمرها.. اشحالج ؟
ريم: الله الله.. شو بلاه لسانج قام يقطر زبيب..
نوال: زبيب عاد.. لو عسل بنقول
ريم: لا لازم اتكون مقولاتي مختلفه مثل ما انا مختلفه عن الكل ولا شو رايج؟؟
نوال: اكييييد.. اتسلم عليج امي..
ريم: عطيني ارمسها
نوال: هي طالعه توها مستعيله ويا نوره..
ريم: افااا ودروج روحج..
عبدالله: خلاص انا بييها احين؟
نوال: قوليله تم مكانك احسن.
ريم: فديته اخوي طول الليل وهو راقد يطري اسمج.. شو مسويه في اخوي؟
نوال: ما سويت شي؟
ريم: يلا اعترفي..
عبدالله: شاله عقلي وروحي وقلبي وحياتي .. و
ريم: حوووووح.. بس بس.. وين تبا نحن هنا.. انزين المهم سلمي على الكل.. وهاج احين كلمي الحبيب .. اتغزلوا بعيد
نوال: ههههههه.. سلمي على الكل..
عبدالله: هاتي خل اطلع مافي جوفي.. الوووووه
نوال: شو بلاك اثجل اشوي
عبدالله: شو اسوي يوم اسمع صوتج اتخبل.. اخبرج.. بسير البلكونه اخذ راحتي
ريم: احسن عشان انا اخذ راحتي في الحش
عبدالله: عوذ بالله منكن من حريم..
ريم: اقول نوف مب جنهم تأخرو..
نوف: مادري والله.. عساه خير
ريم: اففف؟.. مافيني صبر ابا اعرف..
نوف: لحظه اشوي.. اسمع صوت برع شكلهم يايين .. هي والله يو.. بزقرهم اني انا اهني.. يوسف.. تعالوا نحن هني.
يوسف: راشد تعال انسير غرفه ريم الكل جنه هناك..
دخلوا الحجره.. السلام عليكم
ريم+نوف:وعليكم السلام
يوسف: اففففف يوعان
ريم: انت ايه يالدب خلك من الأكل خبرني. ؟
يوسف: طاع الملقوفه شو تبين اخبرج..
نوف: هي والله صدق خبرونا شو صار..
راشد: ما احيدج ملقوفه اكيد انتي ريمووو الي وازتنها..
ريم: انا ما يخصني لا اطيحون فيني احين,, يلا خبروني ترا يوسف ان ما خبرتني تعرف انا شو بسوي..
يوسف: ايييييييي.. زختني من الإيد الي اتعورني.. لا بقول بقول والله خلاص.. السفر..
ريم +نوف الي مبطله عيونها شبر: انزييييييين
يوسف: راح .. يكوووووووووون ...
ريم: اففف يلا..
يوسف: الساعه 8 فلييييييل
ريم: اللللللللللللله.. واااااااااااو.. اقول ابا ارقص قوموا دقوا
راشد: ايه انتي.. اصطلبي لا اصلبج احين
ريم: لا اقصد عقب ما بعض الناس يظهرون..
يوسف: مب ظاهر غير لما اتييبون لي اكل..
ريم: ايه انتي نوف .. مسويه عمرج حرمه بيت.. يلا شوفي شغلج..
نوف: احين دقايق واحلى اكل بيكون عندكم.. اقول حد فيكم خل يخبر مرت عمي وعمي وخالد خل ايون اهني..
عبدالله: بسير ازقرهم..
راشد: انزين.. ريم.. ما سألتيني منو الي بيي ويانا
ريم: هي صدق..
راشد: ما حصلت حجز حق نوف.. بس حقي وحقج وليوسف وعبدالله البارحه قال لي ما بيي عسب بيتم عند عمي..
ريم: زين يسوي..
يوسف بصوت عالي: ابا جااااااااااااااااااااااااااااااااي
ريم: ايه انت وين تتحسب عمرك .. في الزريبه.. حوح
راشد: خليه .. ها جايسنه خرشه من اول ما قال مال السفريات ان السفر الساعه 8
يوسف: بس حسافه؟
ريم: شو؟
يوسف: بودع البنات الحلوات الي هني.. افف
ريم: لا والله .. احلف انت بس.. يالله خل ارد اشوف عسب القنه درس..
يوسف: لا لا .. الا دروسج ماروم عليها توبه والله توبه.. اصلا عندي قمر اطالع النجوم اشله
راشد: هيييييه خلط جيه ريال..
ريم: فديتني باخذ ريال جنتل..
ودخل عمهم ويا حرمته وخالد.. (السلام عليكم)
راشد +ريم+ يوسف:وعليكم السلام..
ابو يوسف: يلا بنتي تستاهلين.. الله يردج لنا بالسلامه.. ونفرح فيكم..
ريم: بل بل بل رويتر انت عبوود .. ما صدقت اتلقط خبر الا ونشرته اتريا لين ما نحن انقول
ام يوسف: يحليله مستانس لج..
خالد: حتى انا والله يا ريم .. مستانس لج ولأخوي المتعذب..
ريم: لا اخوكم خلو علي.. انا بخليه يستانس صح.. بس خل اشوف..
ام يوسف: ان شااااء الله.. انزين وبترجعون .؟؟
راشد: لا ما ظني بنترياكم..
ابو يوسف: انا المفترض علاجي بعد شهر يخلص.. انتوا شو رايكم اتردون كلكم .. وابا منكم طلب؟؟
الكل: خير؟
ابو يوسف: ودي ان العرس يكون عقب شهر..
ريم: شوووو.. لا عمي ما بيمدي لي اجهز..
خالد: ليش عاد..
راشد: هي والله ريم.. ليش لا.. فكره..
ريم: لا شهر اشوي..
يوسف: ريم .. حرام عليج.. شو شوي.. شو تبين اتسوين انتي؟
ريم: الفستان روحه يباله 3شهور اقل شي..
يوسف: ريم.. الا هو فستان شي محلات تأجير .. يأجرون لج فستان ينلبس اول مره.. ومب اي محلات بوديج .. الي في خاطرج.. وبعديم غير جيه اللبس وهالسوالف ما لتكم .. ما عليه تراج لاحقه بنعرس وعقب العرس كملي.. مب شرط.. جي بتحتاجينهم على طول..
ريم: مادري بس صعبه..
نوف: لا ريم والله .. ترا خير البر عاجله..
ريم: جيه رايكم..
الكل: هيه
ريم: خلاص الي اتشوفونه (مني تمت ام يوسف من فرحتها اتيبب هي ونوف.. وريم حست بخجل ونزلت راسها.. والكل كان مستانس.. حسوا ان اخيرا الفرحه انكتبت لهم... والحياة ابتسمت لهم .. وتغدوا وبدت ريم تتزهب هي ويوسف وراشد عسب يروحون المطار.. وعلى الساعه 4.30 طلعوا من الفندق واتجهوا صوب المطار.. وخلصوا كل الإجراءات اللازمه لهم.. وانطلقوا لدبي.. واما عبدالله فإتصل في نواف عسب يبلغه..
عبدالله: لا والله.. نواف ..
نواف: هلا .. اشحالك؟
عبدالله : بخير ربي يعافيك.. بغيت اخبرك
نواف: خير ان شاء الله..
يتبـــــــــــــــــــــــــــع

عبدالله: بغيتك اتخبر الدكتور المعالج عسب يرتبون لريم لأنها يايه البلاد .. ويحاولون بأسرع وقت
نواف: لا ما عليك.. بكلمه ان شاء الله.. وعلى حظكم في اخصائي عيون واصل من امريكا البارحه والدكتور الي كان مشرف خذا لريم موعد.. وما عليك انا برتب كل شي.. بس متى بيوصلون بسير استقبلهم
عبدالله: ما تقصر والله.. رايتك بيضا.. ان شاء الله بيوصلون الساعه 10 الصبح ان شاء الله.
نواف: خلاص عيل.. بكون في المطار اترياهم..
عبدالله: ما قصرت والله.. ان شاء الله بنردها لك.؟.
نواف: لا والله واجي ريم اختي.. وهاي وصيه احمد.. انا مهتم فيها
عبدالله: الله يجزيك الخير.. تامرني بشي
نواف: لا سلم على الأهل.. في امان الله
وبند الخط عن نواف وسار بشر اهله وقالهم ان كل شي جاهز بس ناطرين وصول ريم.
طبعا وصلت الطياره بالسلامه وكان نواف يترياهم في المطار واستقبلهم .. وقالهم عن كلام الدكتور.. ان قال ان ريم لازم اتروح المستشفى احين عسب يكملون الإجراءات بسرعه والفحوصاات اللازمه ..
وجرب موعد العمليه
======
ريم: الله.. ما اصدق.. والله هاي احلى هديه ربي عطاني اياها
يوسف: الحمد لله.. اهم شي انج رجعتي لي..
ريم: والله كنت عايشه بعذاب وانا بعيده عنك.. بس والله بعوضك كل شي صابك بسبتي.
يوسف: وجودج وياي يكفيني..
ريم: يوسف.. اترياني .. بظهر ان شاء الله.. ابا اول ما افتح عيني القاك انت اول واحد جدامي
يوسف: افا عليج... الله وياج.. ويطلعج بالسلامه لي..
السستر.. : يلا هبيبي.. انا في يعطي انتي انجيجمنت عسان يسوي اسليب.. بس لا سوي خوف من ابريشن..
ريم: انا ناسيه شي اسمه خوف.. كل تفكيري يوم بظهر كيف بكون..
راشد: بتكونين على احسن ما يكون يا اختي..
يوسف: نحن لازم نظهر احين انسير غرفه الإنتظار لأنهم بيدخلونج غرفه العمليات
ريم: مو تروحون اباكم اتكونون وياي..
راشد: لا اكيد ما بنروح.. بنتريا..
وطلع راشد ويا يوسف.. وراحوا في غرفه الإنتظار الي مجابله باب غرفه العمليات وكل واحد فيهم زاخ القرآن ويقرا منه.. عشان الله يسهل .. ومرت ساعتين وهم ما عندهم خبر وكل ما يمر الوقت يزداد قلقهم وخوفهم...
راشد: يالله؟... محد يطلع بعد عسب يخبرنا...
يوسف: لا اتحاتي عساه خير.. ياخي العمليه مب بسيطه
راشد: الله يعين.. لحظه هاي مكالمه من برع البلاد اكيد نوف.. الوو
عبدالله: هلا .. اشحالك؟؟ ها طمني..
راشد: والله بعدها من ساعتين داخل ما خبرونا شي..
عبدالله: عساه خير.. الكل يسلم عليكم واعصابهم على نار.. يتريون خبر
راشد: طمنهم مافي شي.. بس تدري عمليه العين دقيقه تاخذ وقت
عبدالله: عساه خير.. خلاص عيل بتصل فيك عقب
راشد: على خير ان شاء الله..
واول ما صك التليفون طلعت السستر وهي تركض من غرفه العمليات.. حاول يوسف يلحقها بس ما لحق..
يوسف: شو صاير.. ياخي الوضع مب مطمني..
راشد: اسكت عني انا اكثر عنك.. بسويها وبدخل الحجره عليهم..
يوسف: لحظه هذي السستر ردت.. . بسألها... سستر شو طمنينا.؟؟
السستر: والله هي فقدت كتير دم.. وطلبا يجيبون لها دم..
راشد: لحظه شو فصيلتها؟؟
السستر: Abموجب..
راشد: هاي نفس فصيلتي. ...
السستر : والله شي كويس.. بس لازم يفحصوا الدم..
راشد: ما عليه فحصوا سوا الي تبونه.. وملفي الصحي موجود هني.. لأني اتعالج عندكم ..
السستر..: خلاص راح اطلب منهم يجيبوا الملف انشوف حالتك وبعدين تعا معي مشان قولهم يعملوا لك فحص؟
يوسف: يلا روووح شو تتريا..
راشد: يلا..
سار راشد ويا السستر وتم يوسف قاعد محترق على اعصابه ويقرا شوي ويدعي شوي.. وما حس الا بدموعه تنزل.. وبعد ساعه تقريبا دخلوا راشد عشان يوصلون منه دم لريم لأنه طلع سليم وممكن يوصلون..
يوسف: ها شو..
راشد: خلاص انا الي بيوصلون من يدم.. لأن بنك الدم ما وصلوا بعدهم..
يوسف: الله وياكم
راشد: اطمن .. بس انت ادعي ربك.. واذا حد اتصل لا اتخبرهم.. عن يحاتون
يوسف: خلاص ما عليك..
دخل راشد ووصول الدم ما بينه واخته.. ويوسف كان متوتر... وصل نواف ويا عزّة .. وشافوا يوسف يتريا..
نواف: ها طمنا؟؟
يوسف: مادري شو اقول؟؟
عزّة: دخيلك يوسف لا تخرعني..
يوسف: لا ان شاء الله خير.. ماشي جنه فقدت وايد دم من العمليه فدخلوا راشد وصلو منه دم لريم..
نواف: والله.. يحليها.. عسا خير
عزّة: يحليج يا ريم.. ان شاء الله تظهرين بالسلامه
يوسف: عزّة.. انتي حامل تعبانه .. ليش ييتي..
نواف: قلت لها ما تسمع الكلام..
عزّة: ياخي ماروم اتحمل واصبر .. احاتي
يوسف: خلاص اطمنتي.. نواف ودها البيت مب زين عليها
نواف: خلاص .. يلا عزوز
عزّة: انا بخير اشلكم انتوا.. ما بتحرك لين ما اطمن
نواف: افف.. عنيده هاي ادريبها لازم الي في راسها هو الي يصير..
يوسف: والله عشان مصلحتج؟
عزّة: ادري .. بس لا تحاتون...
تم الكل يالس ساكت وكل واحد يدعي في قلبه.. مرت 5 ساعات على وقت العمليه ولا شي خبر
يوسف: اقول .. نواف شل حرمتك وتوكل على الله
نواف: هالمره ما بسمع كلامها .. يلا جدامي اشوف..
عزّة: لولا اني صدق تعبانه جان ما تحركت,
يوسف: يلا في امان الله
نواف: خبرني أول بأول
يوسف: خلاص صار..
قعد يوسف وتم يفكر في ريم.. ويحاتي.. وبعد مرور 8 ساعات من العمليه طلعت السستر .. قبضها يوسف بالأسئله..
يوسف: ها طمنيني.. شو صار؟؟ شخبار ريم؟؟ وشخبار راشد؟ وشو خلصنت العمليه
السستر: شو بك.. شوي شوي علي... لك ايه خلصت العمليه وناجحه ان شاء الله.. وراشد بخير بس هو نايم لأنه فقد كتير من الدم مشان هيك محتاج راحه.. وريم ان شاء الله كلها ساعه زمان وراح اتروح الغرفه تاعيتها...
يوسف: الله يبشرج بالخير.. عقبال ما اشوفج عروس.. وايي ازرف بعرسج..
السستر: ههههه.. الله يكملك بعقلك.. لك شو باك انت..
يوسف: روحي لا وايد عطيتج ويه.. خل اتصل في الأهل ابشرهم
اتصل يوسف في عبدلله وخبره بالخبر السار الي كانت لهم فاتحه خير واستانسوا جدا من هالخبر.. واتصل في نواف الي بدوره استانس ويا عزه على هالبشاره.. ومرت الساعه وطلعوا ريم وراشد وساروا الجناح..
يوسف: الحمد لله على السلامه راشد..
راشد بصوت واطي من التعب: الله يسلمك المهم ريم
يوسف: لا ريم بخير.. وهذا بفضلك
راشد: ها اقل شي اسويه لأختي
يوسف: الحمد لله يا رب..
يتبـــــــــــــــــــــــع

ومرت الأيام ووصل اليوم الي بيشلون فيه الضمادات عن ريم.. عشان يشوفون نتيجه العمليه... كان الكل منتظر هاللحظه بشووووق وفي داخله خوف من الموقف.. وريم بنفسها حاسه نفسها مشلوله مب رايمه.. ودخل الدكتور..
الدكتور: السلام عليكم.. ماشاء الله.. شو هاللمه الحلوه .. كل هذا عشان ريم
يوسف: هذي ريم مب اي حد تراها..
عزّة: يلا دكتور .. ترانا نتريا على نار..
الدكتور: لا اتحاتون.. انا متفائل صدقوني..
راشد: دكتووور
يوسف: يووه اشكثر بتريا .. انا بشله ترا
الدكتور : بس مريضتنا ما ترمس.. يمكن ما تبانا انشل احين
ريم: لا شو ما اتشله اتريا على نار تراني.
الدكتور: خلاص عيل .. يالله بسم الله..
وبدا الدكتور يفتح لفات الضمادات من على عيون ريم .. وكل ما يلفها لفه الكل يزداد خوف وقلق ويتريا.. لين ما وصل لآخر ضماده الي كان وراها ضمادتين ويريتين على العينين..
الدكتور: بسم الله.. خلي عيونج مسكره لين ما انا اقولج افتحي.. وتفتحينهم شوي شوي عشان الإضاءه
ريم: يلا دكتور بتييني سكته قلبيه من كثر ما اتريا..
الدكتور وهو واثق: شو اتحسين انتي..
ريم: انا منشله من الإحساس..
الدكتور: والله بضحك عليكم عقب شوي.. على كل هالتوتر.. شوفو اشكالكم في المنظره اتضحك والله
راشد: دكتوررر ترا بموت احين يالله عاد
الكتور: يلا بسم الله هاي اول ضماده.. وهاي الثانيه يلا افتحي شوي شوي عيونج
ريم بدت تحرك جفونها ببطء وهي ترتجف وتنتفض اتفكر في النتيجه.. بدت تفتح اشوي كانت اتحس بنور قوي على عيونها..
ريم: يوسف ... اباك اتكون جدام عيوني..
يوسف: انا ما نسيت وعدي لج.. انا جدامج من الصبح
ريم بدت تفتح عيونها اكثر حاسه ان الضوء قاعد يضغط على عيونها ويألمها..
ريم: دكتووور مب رايمه .. يعورني
الدكتور: ما عليه .. اتحملي شوي.. لازم هالشي
ريم كملت وحست مثل الضباب على عيونها وكأنها اتشوف ظلال شخص جدامها.... ابتسمت والكل يوم شاف ابتسامتها اتفائل خير واستانس.. وكملت وتمت اتقاول الألم وتفتح عيونها وفعلا قدرت بعد عده ثواني تستوضح الرؤيه عندها..
ريم وهي مستانسه: اشوووف... اشوفك يا يوسف(تمت اتصد حوالينها) اشوفكم كلكم.. الله الحمد لله.. اشوووووووووووووووووف
راشد ما لقى نفسه غير من فرحته حضن ريم وهو يصيح.. والكل التم حوالينها وطلع الدكتور وهو مرتاح ومستانس.. حس نفسه قدم شي عظيم..
يوسف ودموعه تنزل.. : اشكرك يا احمد .. اشكرك..
ريم: احمد؟؟ شو يخصه..
نواف: ريم.. احمد اتوفى.. وقبل وفاته وصى بعيونه لج..
ريم ما لقت غير نفسها اتصيح: لالالالالالالالالا احمد ماااااات..
يوسف: ريم.. هدي نفسج.. اطلبي له الرحمه...
ريم: انا حسيت ان صايبنه شي... اتحيد يوسف.. اتحيد
يوسف: هي احيد؟.. اطلبي له الرحمه يا بنت الناس...
ريم: الله يرحمه... يعني انا رد لي النظر بعيون احمد.. اااااااه... بس لا يكون سار وهو شال بخاطره مني..؟؟
نواف: لا يا ريم.. راضي عنج كل الرضا؟؟ وشكرج على انج سمحتي له بشوفتج قبل لا يموت..
والكل تم يصيح ويقرا على روح احمد.. وراشد قاطعهم واتصل في الأهل وبشرهم الي من فرحتهم ما لقوا اعمارهم غير يتصلون بمكتب السفريات ويححجزون على اقرب طياره لأن راح يكون عرس ريم ويوسف قريب..
يتبـــــــــــــــــــــــــــــــــــــــــــــــ ــــــــــــــــــــــــــــع

ومرت الأيام ووصل يوم عرس ريم ويوسف.. العرس الي كان ينتظره الجميع.. كان بالنسبه لهم يوم تاريخي.. والكل مرتبش وحالته حاله..
ريم: نوف... متأكده الشادوا هذا حلو .. لايق علي؟؟
نوف: والله لايق وطالعه اتهبلين بلاج انتي..
ريم: مادري بس مرتبكه وايد.
نوف: لا اتحاتين.. ترا ما باقي غير ساعه وبنزلج الصاله..
عزّة: وين القمر وين... خل اروح اشوفه..
ريم: هلا والله.. هلا بالطش والرش.. وماي الورد بالغرش..
عزّة: شو هالجمال.. شو هالدلال.. اسميه يوسف بيتخبل حليله..
ريم: يلا عاد مب احلى منج يوم عرسج..
عزّة: لاو الله ما اقولها مجامله طالعه عروس ولا الف ليله وليله.. ولا شو رايج نوف.. ؟
نوف: هي والله.. عقبال ما اشوف سارووه شراتج جيه؟؟
ريم: ان شاء الله.. وقتها بيكون شعرج ابيض وعيوز..
نوف: ههه ... الله يبلغني واعرس عيالكم كلكم قولو امين
ريم: امين يدو..
الكل تم يضحك ودخلت عليهم مرت عمهم..
ام يوسف: ما شاء الله.. تعالي خل اقرا عليج.. نظر عيني والله
ريم: هلا عمو... شو رايج بصراحه..
ام يوسف: الصراحه لو الود ودي ما انزلج؟
ريم: افا هالكثر خسفه طالعه؟؟؟
ام يوسف: لا والله.. من جمالج قمت اخاف عليج.. والله يا بنتي طالعه احلى من القمر
ريم: تسلمين لي والله.. من يومي احلى من القمر..
دخلت نوال ويا ريم (الي راح يكون عرسهم الصيف الي بعده): السلام عليكم
نوال: اللللللللله شنو هذا.. اخت ريلي بهالجمال.. ما اصدق.؟؟ماشاء الله
نوره: فديتها بنت عم ريلي
ريم: يا حلات ريلي على لسانكم... يالله ان شاء الله اشوفكم في نفس هاليوم
نوال + نوره: ان شاااااااااااااااااء الله
ام يوسف: صدق بنات اخر زمن.. لا حبا ولا مستحا
نوف: خليهم عمو.. وناستهم في هاليوم..
ام يوسف: الله يسعدكم ان شاء الله
ريم: فديتكم والله.. ما قلتوا رايكم..
نوال: لا تعليق..
نوره: مدري شقول .. علمني قول .. ضاع الكلام.
ريم: مطربه الإخت..
نوره: ههههه.. اقول صدق من جمالج نسيتيني الي بغيت اقوله..
نوف: شو؟؟
--------------------------------------------------------------------------------
نوال: يلا لازم انزلج.. ترا المعازيم اتعشوا خلاص..
ريم: يا ويلي..
ام يوسف: خير شو صار..
ريم: اخاااااااااف
نوال: لا اتخافين نحن وياج ما بنهدج..
نوره: هي .. لا اتحاتين
ام يوسف: عيل بنزل هناك انا بخبر الحريم انج نازله
نوف: كللولولولولولولووووووش..
ريم: اقول وين الشنيل مالي..
نوره: هذوه.. يلا البسيه..
ريم لبست الشنل اي غطت فيه نفسها عشان تنزل براحتها.. ونزلت ووقفت في الممر قبل لا يفتحون الباب
ريم: ايه مب تبتعدون.. ترا والله مرتبكه بخبص..
نوف: ما عليج.. انا من بعيد بأشر لج شو اتسوين
نوره: وانا من الصوب الثاني بأشر؟؟
نوال: يلا بدت الموسيقى...
فتحوا الباب على البخار.. ومشت ريم كأنها اميره الف ليله وليله وخطت خطواتها الناعمه على انغام الموسيقى الكلاسيكيه.. ومشت بهدوء مع ابتسامتها الرقيقه المخلوطه بالخجل.. كان الكل ذكر الله على هالجمال.., كانت طالعه عروس ولا في الأحلاام.. لغايت ما وصلت للكوشه والكل بدا يرقص ومستانس.. وريم كل تفكيرها في يوسف .. الحلم الي تحقق..
وبعد ساعه قرروا يدخلون يوسف.. كان وياه راشد وعبدالله.. عمهم اما طاع يدخل قال انه تعبان وما يبا يدخل بالكرسي المتحرك بين الحريم..
دخل راشد وماسك ايد يوسف ... الي من شاف ريم ما صدق عيونه
يوسف: اقول جنه مغلطين في الصاله..
راشد: لا مغلطين ولا شي... بلاك انت
يوسف: ياخي .. مب مصدق ان حرمتي طلعه بهالجمال.. زخني عدل عن يغمى علي.
عبدالله: توك تدري ان ريم حلوه.. ريم اصلا ماشي احلى عنها
يوسف: ادري بس احين تأكدت..
وصل للكوشه وباس راس ريم.. الي كانت محمره من الحيا.. وتم راشد ويا راشد يزرفون جدامهم .... والكل مستانس.. وخصوصا ام يوسف .. وفجأه لمحوا حد يدخل من بعيد للصاله.. ما عرفوا منو في البدايه وعقب ما دققوا شافوا المفاجئه الكبرى الي كانوا يتريونها.. ما صدقوا عيونهم الكل كان يحس انه في حلم.. راشد وعبدالله ركضوا من على الكوشه واتجهوا صوبه... صوب عمهم سلطان ابو يوسف.. لأنه اتشافى وبدا يمشي.. وراح لريم ويوسف الي كانوا مدهوشين لهالمنظر مب مصدقين وسلم عليهم وباس راسهم.. وباركم لهم.. والعائله كلها اجتمعت على الكوشه وخذوا لهم لقطه عائليه كانت احلى صوره بالنسبه لهم يتخذونها.. الي كان ناقص في الصوره ابو ريم وامها..
واكتملت فرحه المزروعي... ويوسف خذا ريم واتجهوا صوب برج العرب يقضون اسبوع ومن بعدها يبدأون جولاتهم السياحيه ويبدأون مشوار حياتهم

(وكان الله غفورا رحيما)
*******النهـــــــــــــــــــــــــــــــــايه***
****

ياله عاااااااااااااد ابغي رايكم في القصة


شكر خاص لكل من تابع نقلي و طرحي للروايه

يسلمو قلبي عالطرح الراااائع

منووووووووووووووره

500