 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
|
|
#1
04-12-2011
|
||||||||||||||||||||||||||||||||
|
||||||||||||||||||||||||||||||||
&&&&&&&&&&&&&&& تـــــــــــابـــــــــــع عند باب الفله عبدالمجيد واقف وتارك حمد وطلال في المجلس ويتصل على سحر اللي ما كانت ترد عبدالمجيد:ياربي هذي وش فيها ما ترد .......وشوي يلمح سياره تدخل من عند الباب نزلت سحر وعبير اللي كانت منزله راسها عبدالمجيد راح لهم:السلام عليكم سحر وهي تطالع عبدالمجيد وترجع تطالع عبير المنحرجه والواقفه وراها:وعليكم السلام ها جبت الشيخ عبدالمجيد:في الطريق بس سحر: قبل ما يوصل بدقايق إذا جاء رن لي رنه وحده بس عبدالمجيد:شلون يعني.. سحر تقاطعه:انت رن لي رنه وحده وبعدها راح تملكون وتلتفت لعبير وتمسكها من يدها:يله ومشوا وعبدالمجيد مو فاهم شي دخلوا على الحريم سحر وعبير:السلام عليكم الكل وقف:وعليكم السلام عبير لما شافتهم حست عمرها اللي تسويه غلط ورجعت لفت ومشت سحر انتبهت ولحقتها ومسكتها من يدها:عبير وين عبير وهي تبكي:لا مو كذا يا سحر أحس إني رخيصه سحر:لا تقولين كذا أنتي غاليه ولو انك مو غاليه كان انا ما سويت كل هذا علشانك عبير:بس غلط أحس ان في شي مو مضبوط وكأني أرخصت بنفسي وجايه لهم ولحد باب بيتهم وش بيقولون عني ردت عليها أم عبدالمجيد:بنقول انك بنتنا اللي بنحطها بعيون وبنقول انك الغاليه مرت الغالي واللي بقول غير كذا انا بنفسي بقص له لسانه عبير ويزيد صياحها وتأخذها أم عبدالمجيد بحضنها:بس يا بنتي والله أني ما اعتبرك إلا بنت لي وأكثر وعادتك حالك من حال الجوهره عبير وهي تحب رأس أم عبدالمجيد:وآنا ما اعتبرك إلا أمي اللي عمرها ما عطتني حنان ولا درت عني سحر دمعت عيونها ومسحتها أم دلول تجي:ألف الصلاة والسلام يا حبيب الله محمد الجوهره وسحر ودلول:كلللللللوووووووش أم عبدالمجيد:من قال أنتي مو عروس إلا أحلى عروس والله وإحنا اهلك وناس وسندك وأنتي طلعتي من بيتكم ودخلتي بيتكم الثاني أم دلول :وهذي أغنيه لأحلى عروس أم دلول تغني وترقص وهم يدخلون الصاله: هلا باللي لفاني يا هلا به عدد دقات قلبي في غيابه هلا باللي بعد والشوق جابه عليم الله قلبي ما سخى به عليم الله قلبي ما سخى به ضوى خللي علي بالليل ساري ينير بجاي لي منه سرى به رجع لي من بعد غيبه حبيبي وقلبي كم تحمل في غيابه وقلبي كم تحمل في غيابه هلا بنور الصبح لي من تبسم لقاني مقبل يمشي هبابه وهلا بريح الصبا لي من تبسم يا حلوك ربي يحفظ لك شبابك يا حلوك ربي يحفظ لك شبابك تعال عيني ولهت وانت كحلها لو اقدر والله خليتك محلها عزيز للروح وانت مثلها احلفك بالله ما تقطع وصلها احلفك بالله ما تقطع وصلها هلا باللي ربى في وسط جوفي يواعدني وكل ما وعد يوفي ايه احبك بس من حبه يا خوفي يخليني وهو عمري وشوفي يخليني وهو عمري وشوفي هلا باللي لفاني يا هلا به عدد دقات قلبي في غيابه هلا باللي بعد والشوق جابه عليم الله قلبي ما سخى به عليم الله قلبي ما سخى بهالجوهره وسحر ودلول يصفقون وعبير صارت تضحك من بين دموعها وام عبدالمجيد حاضنتها أم دلول:كللللللللللللووووووووش &&&&&&&&&&&&& عند الرجال الشيخ على وصول شال جواله ورن لها رنه مثل ما اتفقوا رفعت جوالها وقامت اتصلت وقالت كلمتين:يله تعال دورك يا اخوي وصكرت وهي متضايقه بسبب الطريقه اللي اتبعتها مع اهلها بس ما كان في خيارات ثانيه عندها أهم شي تسعد أختها &&&&&&&&&&&&& في مجلس الرجال الشيخ :اين المعرس عبدالمجيد:انا الشيخ : وأين والي العروس الكل سكت وما ردوا الشيخ صار يطالعهم:اين والي العروس وصلهم صوت خلاهم يوقفون:انا والي العروس الكل:خالد خالد دخل وفي وجهه كره وضيق ومعصب الشيخ خذا البطايق وصار يكتب وبعدها طلب توقيع العروس خذت أم عبدالمجيد الدفتر من ماجد وعطته لعبير اللي مسكت القلم وصارت تطالع سحر:سحر وهي تمسك يد أختها :يله حبيبتي ابدي حياه جديده مع اللي تحبين عبير ابتسمت ووقعت سحر حضنتها :ألف مبروك الكل صار يباركون أم عبدالمجيد تبوس رأس عبير:مبروك يا بنيتي عبيروهي تبوس رأس أم عبدالمجيد:يبارك فيك يا خاله أم عبدالمجيد:انا ما ابغى اسمع غير يمه عبير وهي تبتسم :من عيوني يا يمه التفتوا للصوت وهم متفاجأين أم خالد:كلللللللللللووووووش عبير وهي متفاجاه:يمه أم خالد وهي تقرب وتسلم على عبير:ألف مبروك يا بنيتي عبير وهي لحد الحين مو مصدقه:يمه أنتي جيتي أم خالد:وآنا اقدر ما أجي لعرس بنتي وراحت لام عبدالمجيد وسلمت عليها وعلى الموجودين:ألف مبروك الكل :الله يبارك فيك عبير صارت تطالع سحر اللي تعمد ما تطالع فيها أم خالد:انا ودي اقعد بس لازم أروح انا جيت اسلم عليك وأروح يا بنيتي عبير بطيبه:يمه اقعدي شوي الله يخليك أم خالد:لا يا بنتي جيت اتطمن عليك وتطمنت عبير وهي تبوس رأس أمها:الله يخليك لي يالغاليه أم خالد:تسلمين يا عمري .......وقبل ما تروح :أم عبدالمجيد أم عبدالمجيد:سمي أم خالد: وصاتي لك بنتي أم عبدالمجيد :بنتك مثل بنتي وفي عيوني أم خالد:ما تقصرين التفتت لعبير:يله مع السلامه الكل:مع السلامه مشت وهم جلسوا في الصاله أم دلول بهمس:والله لحد الحين مو مصدقه وأحس السالفه فيها شي أم عبدالمجيد:يمكن الحرمه تغيرت أم دلول وهي تاشر على يدها:أقص يدي من هنا لو تغيرت دلول بهمس:الجوهره الجوهره:نعم دلول:من ملك بهم الجوهره:خالد دلول متفاجاه:نعم الجوهره:والله حتى انا مثلك ما صدقت دلول:شلون غريبه مو خالد ما يطيق عبدالمجيد شلون يرضى يملك لهم الجوهره:والله ماعاد اعرف شي أحس كل شي ملخبط دلول:أي والله معاك حق &&&&&&&&&&&&&& عند الرجال بعد ما ملك لأخته طالعهم بكره وطلع من المجلس الكل استغرب وما فهموا بس الفرحه نستهم استغرابهم الكل يسلمون على عبدالمجيد:مبروك ألف مبروك عبدالمجيد بفرحه:يبارك فيكم ماجد وهو يضم أخوه وعينه تدمع:مبروك يالغالي شكلك غرت وقل تسوي مثلي عبدالمجيد وهو يضم أخوه:ههههههه وخر عنه ماجد:ادخل لهم شوف حب حياتك عبدالمجيد هز رأسه ودخل داخلو اتصل على أخته الجوهره طالعت جوالها وابتسمت وردت وبعدها قامت لخالتها أم عبدالمجيد تهمس في إذنها أم عبدالمجيد قامت راحت لعبير:يله يمه عبير وهي تطالع سحر:وين أم عبدالمجيد:ما تبغين تشوفين وليدي عبير تطالع سحر:بس سحر تجي معي أم عبدالمجيد هزت راسها بتفهم قامت عبير ومعاها سحر و راحوا جهة الغرفه حقت الضيوف دخلت سحر وعبير وعبدالمجيد كان قاعد وقام وقف لهم سحر :السلام عليكم عبدالمجيد وعيونه على عبير:وعليكم السلام سحر وهي تمسك عبير وتجر يدها ويقربون لعبدالمجيد سحر وهي تحط يد أختها في يد عبدالمجيد:انا لهنا توقف مهمتي الباقي عليكم وتلتفت لعبدالمجيد:ابغاك تحطها في عيونك ترى هي كل اللي لي في هالدنيا ..وتسوي روحها تهدد:ولا اسمع في يوم مزعلها عبدالمجيد وهو يمسح على يد عبير:في احد يقدر يزعل روحه وقلبه عبير انقلب وجهها احمر انحرجت كثير سحر ابتسمت:الله يوفقكم ...ولفت بتطلع عبير بهمس :وين بتروحين سحر وعيونها دموع:بروح البيت أنتي هنا وانا تطمنت عليك الحين وارتحت عبير وهي تفك يد عبدالمجيد وتحضن أختها سحر وهي تمسك نفسها:الحين ليه الدموع عبير تبكي و تشاهق:الله يخليك لي سحر وهي تحضنها:و أنتي بعد أشرت سحر لعبدالمجيد يجي يوخر عبير عنها لأنها ما تقدر تتحمل عبدالمجيد جاء ومسك عبير:عبير خلاص حبيبتي عبيروهي توخر:راح تتصلين فيني كل يوم سحر:أكيد بس الخوف لو اتصلت فيك وأنتي ما تردين ..وتطالعها بنظرة خلت عبير تطالع عبدالمجيد ووجها احمر وقالت بهمس:مالت عليك يالخايسه سحر:ههههههههه يله مع السلامه والله يوفقكم وطلعت عبير وهي تمسح دموعها عبدالمجيد يلفها جهته:افا وش هالدموع لا هالعيون الحلوه المفروض ما تشوف غير السعاده عبير سكتت وهي منزله راسها عبدالمجيد وهو يطلع خاتم من جيبه ودخل الخاتم في إصبعها وباس راسها:والله كان ودي أسوي لك عرس الكل يتكلم عنه ويعرفون وش كثر عبدالمجيد يموت على عبير عبر رفعت راسها تشوف عيونه ولقت فيها الكثير وتعبر عن الكثير وبعد فتره من التقاء العيون عبير:أهم شي إني معك عبدالمجيد قرب وحط رأسه على رأسها وهو يبتسم:أوعدك واللي خلقني ما اخلي هالعيون الحلوه ابد تعرف الدموع ولا هالوجه اللي اعشقه يعرف غير الضحكه عبير وهي منزله عيونها وساكته عبدالمجيد:عبورتي ما ابغاكي تنزلين عيونك ابغى أظل أطالعها واشبع منها عبير عيونها دمعت عبدالمجيد :ليه حياتي الحين البكي عبير وهي تحضنه بقوه:خايفه من أبوي يسوي شي عبدالمجيد وهو يحضنها ويشد عليها:لا تخافين حياتي ما في احد يقدر يلمس شعره من راسك وآنا حي وأتنفس عبدالمجيد وهو يوخرها ويمسح دموعها بأصابعه:والله لو ما ورانا رحله والمفروض نروح نغير ملابسنا ولا كان سويت العمايل عبير بعدت عنه وهي وجها احمر وتطالع بعيونها أي مكان غيره عبدالمجيد:ههههههه &&&&&&&&&&&&&& طلع من المحكمه متضايق لأنه خسر الجلسه كان وده يكسبها بس الخصم كان عنده أدله اقوي من أدلته ركب سيارته وهو متضايق ومشى على الطريق متوجه للحاره البسيطه وصل عند البيت ونزل وطق الباب فتحت له حنان:هلا فيصل وهو معصب:الوالده موجوده حنان:ايه تفضل فيصل وهو يدخل للغرفه اللي حفظها عن ظهر قلب شوي وتدخل أم حنين:السلام عليكم فيصل وهو يقوم ويبوس راسها:وعليكم السلام كيفك يا خاله أم حنين:بخير جعلك بخير فيصل وهو يجلس:خالتي انا جاي اقولك ان قضيتكم تحدد موعدها بعد أسبوع ان شاء الله أم حنين:الله يسهل ويوفقك يا وليدي تعبناك فيصل بابتسامه:لا تعب ولا هم يحزنون وش دعوه ما بينا هالكلام يا خالتي أم حنين:تسلم يا وليدي تسلم فيصل:خالتي انا كلمت الوالده بخصوص خطبتي لبنتك حنين وهي قالت نخلص من القضيه وتجي بنفسها لكم أم حنين بابتسامه:تشرف وتنور وتنادي بصوتها العالي:يا بنات وين العصير دخلت حنين اللي مبين عليها متضايقه:السلام عليكم الكل:وعليكم السلام حطت العصير فيصل وقف:ماله داعي يا خاله أم حنين: بس اشرب العصير يا وليدي فيصل:خيركم سابق وباس راسها وطلع أم حنين:حنين يا بنيتي وصليه للباب حنين:ان شاء الله مشت معاه لحد ما وصوا للباب فيصل التفت لها:أخبارك حنين وهي مالها نفس:بخير فيصل:عساف جاكم حنين:لا من ذاك اليوم ما شفناه فيصل لاحظ الضيق:فيك شي حنين بعصبيه:وأنت ليه تسال فيصل بعصبيه أكثر:وأنتي ليه معصبه وتردين بدون نفس حنين:لان موضوع الخطبه هذا كله مو عاجبني فيصل استغرب:شلون يعني حنين سكتت وما ردت فيصل :أنتي مو موافقه حنين طالعته:ليه في خيار إذا ما وافقت الناس راح يظنون بي ظن سوء فيصل:وعشان كذا وافقتي حنين:ايه فيصل:ما يهم حنين طالعته باستغراب:شلون ما يهم يعني عادي عندك فيصل وهو ماسك نفسه:اليوم تكرهيني بكره تحبيني ومشى وتركها وراه وهو مقهور منها حنين في نفسها :بأحلامك وصكرت الباب بقوه &&&&&&&&&&&&&& قاعد في المجلس لحاله ودخل عليه ماجد:هلا والله بنسيبنا طلال:هلا فيك ماجد بجديه:طلال بقولك شي قبل لا يجي احد طلال وهو مركز :سم قول ماجد:شوف يا طلال الجوهره عمرها ما فرحت لنفسها كانت دائما تفرح لنا انا عارف وما فاتني انها شوف شديده معاك بس هي ترى قلبها طيب وأطيب قلب في الدنيا بس هي إذا حبتك تخليك عندها بالدنيا كلها وأنت لو مو رجال وواثق فيك وتستأهل الجوهره كان انا ما وافقت عليك ولا قاعد اقولك الكلام هذا طلال ابتسم:وآنا ان شاء الله قد هالثقه والجوهره في عيوني بس بغيت مساعدتكم بخصوص الجوهره ماجد:أمر طلال:اسمع &&&&&&&&&&&&&&& الجوهره وهي في المطبخ بعد ما غيرت ملابسها ولبست بنطلون جينز اسود وتيشرت اصفر مخطط بأسود وربطت شعرها بشباصه وتركت الباقي أم عبدالمجيد وهي تدخل المطبخ:ها يمه خلصتي كل الأغراض الجوهره:ايه خالتي خلصت دخل ماجد:ها خلصتوا أم عبدالمجيد:ايه خلصنا ماجد وهو بيطلع:أي صح جوجو ترى طلال في المجلس يبغاك الجوهره بضيق:وش يبغى ماجد:وآنا وش دراني هو زوجك ولا زوجي ...وطلع أم عبدالمجيد:اطلعي له يا يمه الجوهره:ان شاء الله طلعت وهي طالعه مقابله ميري اللي كانت تبتسم الجوهره:فيك شي ميري:لا ما في شي الجوهره:ليش تضحكين ميري:بس انا في اتزكر شغله بعدين أزهك الجوهره طالعتها بنص عين وراحت جهة الباب وخذت نفس وطلعته وفتحت الباب دخلت شافت طلال قاعد ومجلس نايف على رجل ونوف على رجل ثانيه ويضحك معاهم وريان جالس جنبه ظلت تناظرهم مده طويله لحد ما التفت لها طلال اللي انتبه لها نزلت عيونها وجلست قاموا لها نايف ونواف وهم يضحكون نايف:ماما شوفي عمي طلال ايش جايب لي الجوهره بابتسامه:أشوف كان جايب له ميداليه مكتوب فيها اسمه بطريقه حلوه ومزخرفه نوف:حتى انا ماما شوفي الجوهره وهي تطالع السلسال اللي جابه لنوف كان مكتوب اسمها وحولها نجمات صغار الجوهره ابتسمت لهم:الله حلو ياسلام قلتوا له شكرا نايف ونوف:ايه ريان وهو يجيها:شوفي وآنا بعد جاب لي هديه كان جايب لريان قلم مكتوب عليه اسمه ومسبح لوه اسود وذهبي الجوهره:يا سلام وش هالزين والحلاه يهبل ريان :يله نروح نوريه ميري وطلعوا وهي رجعت تناظر يديها اللي في حظنها وسكتت طلال قام وجلس جنبها طلال:وش أخبارك الجوهره وهي تلف عنه:الحمد لله طلال:مبروك زواج عبدالمجيد الجوهره:الله يبارك فيك طلال مسكها من دقتها بأصابعه ولف وجهها لجهته:لها الدرجه كارهتني الجوهره طالعته ولفت وجهها وما ردت عليه طلال شاف إصبعها ما فيها الخاتم:يعني شلتيه الجوهره ابتسمت بسخريه:قلت لك راح يكون بأقرب زباله طلال دخل يده في جيبه وطلع علبه وفتحها الجوهره طالعت الخاتم اللي فيها كان نفس الخاتم اللي هي فسختها ورفع يدها ودخله في إصبعها:قلت لك راح يظل في إصبعك الجوهره وهي تطالعه:انت عندك من نسخه من هالخاتم طلال بابتسامه:كثير وكلما شلتي واحد بحط مكانه واحد الجوهره ظلت تناظره وما ردت طلال كان يحس كأنه قبطان بيحر في عيونها وبهمس:اشتقت لعيونك الجوهره لفت وجهها وقامت طلال:وين الجوهره:في أغراض وشغل لازم أخلصه طلال بابتسامة تسليه وتحدي:شغل ولا خوف الجوهره التفتت له وطالعته:نعم خوف من ايش بالله طلال وهو مستمع:مني طبعا الجوهره وهي تبتسم:والله مأخذ مقلب بقوه في نفسك طلال وهو يقرب:يعني تقدرين تطالعين عيوني بدون ما تنزلين عيونك هرب من عيوني الجوهره:مو انا اللي اهرب من احد وظلت تطالعه وهو يطالع عيونها وقرب وصارت تخاف بس مستحيل تبين خوفها ولا تنزل عيونها طلال اللي صار قريب ويهمس في إذنها: تدرين إني شامخ وقدامك أصير طفل صغير الجوهره رجفت طلال رفع يده وحطها على خدها وصار يمسح عليه بإبهامه الجوهر لحد الحين عيونها معلقه بعيونه ومو قادره تبلع ريقها طلال:تدرين إني احلم بعيون وبصوتك وبكل شي فيك أنام واصحى على اليوم اللي تكونين فيه عندي الجوهره اللي خذت نفس بصعوبه:اللي يسمعك يقول عاشق ولهان طلال يرفع يدها لقلبه اللي يدق بسرعه:إذا ما كان هذا قلب عاشق ولهان هذا قلب مين ووش تسمين دقاته الجوهره ظلت تطالع عيونه وهي تحس بدقات قلبه وقرب لحد ما حست بانفاسه تلفح وجهها بعدت عنه بسرعه بعد ما لتفتوا للي داخل كانت نوف نوف:ماما ما اعرف كيف البس السلسال الجوهره وهي تحمد ربها ان نوف دخلت:تعال حبيبتي ألبسك إياه نزلت لمستواها وهي تلبسها حست شي حول رقبتها رفعت راسها شافت طلال يلبسها سلسال وقفت بعد ما خلص ومسكت السلسال:وش هذا طلال وهو يبتسم:عربون حب الجوهره وهي تطالع السلسال كان مره حلو وذوق طلال وهو يمسح على شعرها ويمسك خصله من شعرها:تلبسينه بالعافيه واوعدك باللي أحسن منه لان هذا مو من مقامك رجعت على وراء على صوت ماجد والتفتت له ماجد:جوجو روحي لميري ترى هي طفشتنا مع إخوانك اللي جننوها الجوهره:طيب .....وطلعت وخلت وراها ماجد وطلال اللي قعدوا وبدوا في السوالف &&&&&&&&&&&& خلونا نروح شوي لسحر اللي طلعت من بيت أم عبدالمجيد وهي في السياره وحاسه انها مرتاحه رن جوالها رفعت وابتسمت وردت:الو تركي:سلام عليكم سحر:وعليكم السلام تركي:محتاج مساعدتك في إنقاذ سحر عقدت حواجبها:خير تركي:ممكن تنقذين عبد مسكين وتقبلين دعوته على الغداء لان هذا العبد ما يحب يتغدى بروحه سحر:خوفتني تركي:بسم الله عليك سحر: احم.. ايه اوكي وين تركي:في مطعم (....) سحر: اوكي دقايق وأكون هناك تركي:اوكي سلام سحر:سلام سكرت الجوال وهي تبتسم وقالت للسايق يروح المطعم المتفق عليه &&&&&&&&&&&&&& نروح لبيت أم عبدالمجيد الي بدوا بتحميل الاغراض ماجد وهو عند سيارته واقف وأول ما طلعت دلول اشر لها جاته:سلام ماجد وهو يطلع ورده حمراء:هلا وغلا دلول خذتها:مشكور ماجد:وش دعوه بس هذا اللي قدرتي عليه دلول:أمر وش تبغى اطلب انت بس ماجد وهو شاق الحلق ويأشر على خده دلول طلعت عيونها وقلبت الموجه:نععععععععم لا احنا بدينا نخورها ونخربها قلنا غزل وكلام حلو ما شي بس بوس لا والله هذا اللي ماراح يصير ماجد تفاجأ من القلبه اللي قلبتها دلول وفي ثواني:اشششش فضحتينا خلاص والله ما اقصد شي وبعدين انا زوجك دلول:ادري بس بعد العرس ما صار وآنا إذا كنت اضحك اسولف وأرضى بكلام الغزل مو معناته إني ارضى باي شي سمعوا صوت من وراهم :هههههههههههه التفتوا لميري اللي جايه تركب :والله هاله صدق من قال هزا بقر يناسب هزا تور ماجد:أنتي هيه من البقره يالعنز دلول:ومن الثور يا أم عيون ميري:والله انتم ما في كاتمه من ثنين دقيقه أنتوا مشكل احين سوي فزاه دلول:وأنتي وش دخلك اتهاوش وياه أموت عليه ياشين اللقافه بس ماجد:أقول ميريو ترى كل لقافه قرافه والتفت لدلول:حياتي اركبي جعلني فداء لها الخطوه دلول وبخجل:تسلم وركبت وراء ميري:والله اعزيم هزا ثنين نفر مجنون وآنا ابصم على اشره الكل ركب وركبت عبير مع عبدالمجيد في سيارته الجوهره اللي كانت طالعه أخر الناس جات لعبد المجيد وتبغى تركب عبدالمجيد:وين الجوهره:بركب عبدالمجيد:أسفه الصراحه ابغى اخذ راحتي مع عبوره وأتغزل فيها الجوهره:لا والله وآنا وين أروح بالله عبدالمجيد وهو يركب:شوفي ماجد انا سيارتي ما في مجال الجوهره:اوووف وتروح لسيارة ماجد طالع الجوهره وهي تمشي ناحية سيارة ماجد وهو يبتسم الجوهره:ماجد ابغى اركب معاكم ماجد:وين تركبين ما تشوفين الشعب معاي الجوهره:يعني وين أروح ماجد:وحي اركبي في سيارة طلال الجوهره:لا ما ابغى بركب معاكم ماجد وهو منقهر لا الكل معاه :ما تشوفين اللي معاي والله قهر ناس ماخذين راحتهم وناس متعذبين ..وصك الدريشه الجوهره:انا اوريكم يالخايسين ...وطالعت طلال اللي جاها:ها وش فيك الجوهره وهي تلف وجهها :ما في حد راضي يركبني معاه طلال:تعالي عندي معاي ميري ونايف ونواف الجوهره استغربت:هم معاك طلال:ايه يله الجوهره مشت معاه ولما بغت تركب وراء وفتحت الباب ميري طالعته:وين انتا روه هزام مافي مكان روه أنتي قدام الجوهره وهي تتخصر:لا والله يا شيخه أنتي روحي قدام وآنا أجي مكانك ميري وهي ترجع على وراء وتغطي عيونها:في اهلام أنتي انا ابغى نوم روهي أنتي عند زوج هزا زوج هق أنتي مو انا الجوهره تتحلف في نفسها للجوهره وراحت وفتحت الباب اللي قدام وركبت وهي معصبه منهم كلهم طلال طالع ميري اللي رفعت الغطا عن عيونها وابتسم لها وميري غمزت له حركت السيارات وطلعت من البيت في سيارة ماجد أم دلول:وييييييييه نسيت أم عبدالمجيد:وش نسيتي ا دلول:نسيت المايوه حقي الكل:هههههههههههه أم عبدالمجيد:استغفر الله بتتفسخين قدام الناس على أخر العمر أم دلول:لا بس قلت يمكن القى هناك شايب حليوه يطيح في غرامي الكل:هههههههههههه أم عبدالمجيد:والله شكلك يا وخيتي انحرفتي على كبر أم دلول:شوفي علشاني احبك إذا لقيت فارس أحلامي أبو شعر ابيض راح أدور يمكن له اخو ونعرس جميع الكل:ههههههههههههههه 
|
|
04-12-2011
|
#2 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
&&&&&&&&&&&&&& شامخة وبنت رجال وجاء من يغلبني &&&&&&&&&&&&&&& البارت السابع عشر (أسفه على التأخير بس النت عندي انقطع وأول ما شبك على طول نزلت البارت) قراءه ممتعه &&&&&&&&&&&&&&&&& وصلت المطعم ودخلت شافته قاعد على الطاوله جنب النافذه اللي تسمح للي داخل المطعم يشوفك بس اللي برا المطعم ما يشوف اللي داخل يعني مظلله سحر وهي توقف قدام تركي:السلام عليكم تركي:وعليكم السلام .....ويأشر بيده على الكرسي:تفضلي سحر سحبت الكرسي وجلست تركي بابتسامه:مبروك سحر ترد له الابتسامه:الله يبارك فيك نزلت عيونها على الطاوله وتركي مستند على الطاوله وعاقد يدينه عليها وميل رأسه:وش فيك المفروض تفرحين اليوم أختك تزوجت سحر رجعت ناظرته:ومن قالك مو فرحانه بالعكس مبسوطه لاني قدرت أسعدها تركي:بس في شي محيرني سحر باستغراب:وشو تركي:أول نطلب شي نأكله لاني ميت من الجوع سحر وهي تبتسم:ايه والله حتى انا طلبوا الأكل وبعدها تركي وهو يطالعها سألها:أنتي من متى مو نايمه سحر:مبين علي تركي:عيونك تعبانه سحر: من أمس الظهر تركي رفع حواجبه:من أمس ما نمتى كذا راح تتعبين سحر:أحس إني هلكانه تركي ابتسم وسحر ترد له الابتسامه وتذكرت:ايه صح ما قلت لي وشو الشي اللي محيرك وبتسالني عنه تركي:اللي عرفته من طلال ان خالد هو اللي ملك لأختك... سحر تقاطعه وتكمل:وأنت تبغى تعرف هو كيف رضى انه يملك على أختي وعبدالمجيد وهو أصلا ما يطيقهم صح تركي:صح سحر :انا اقولك نزلت رأسها وعيونها على يدينها اللي على الطاوله:اتصلت على خالد ورحت له ........... ورجعت بذاكرتها للوراء وصلت لشقته ورنت الجرس وفتح خالد لها الباب والضيق واضح على وجهه :ادخلي ..مشى وترك الباب وراه مفتوح دخلت سحر وصكرت الباب وراها وصارت تناظر الشقه المعفوسه وجلست على الكنب مقابل خالد اللي طلع سيجارته يدخنها خالد وهو ينفخ السيجاره:اخلصي وش عندك ازعجتيني باتصالاتك سحر:أبوي يبغى يزوج عبير واحد من جماعة ميساء الخايسه خلد بملل:وبعدين سحر:وشو بعدين اقولك بيزوجها واحد من معارف ميساء خالد وهو لحد الحين على بروده:والمطلوب سحر وقفت:انت بتجنني انت لازم تشوف حل لهالمهزله وتوقف مع عبير خالد وهو يضحك بسخريه:أنتي تبغين مني أوقف في وجه أبوي وامنع هالزواج سحر:ايه خالد:ههههههه والله تعبتي نفسك يوم جيتي عندي سحر:وش قصدك خالد:قصدي مالي دخل ولا راح أوقف في وجه احد خصوصا أبوي سحر:علشان الورث خالد يطالعها وما رد عليهم سحر طالعته بحقد وكره:مادام كل واحد يشوف مصلحته احنا بعد راح نشوف مصلحتنا ومصلحة عبير انها تتزوج الإنسان اللي هي اخترته خالد عقد حواجبه:الإنسان اللي هي اختارته ومن يكون ان شاء الله سحر:عبدالمجيد خالد وقف والشياطين تتنطط في وجهه:نعم اذبحها قبل ما تفكر مجرد تفكير انها تأخذه سحر بابتسامه استهزاء وثقه: كيف تذبحها وأنت اللي بتزوجها له خالد:وش تخرفين أنتي انا أزوجها له سحر وهي تطالعه بتحدي :ايه خالد:هههاي بالأحلام سحر:بكره انت بتجي وتكون وليها علشان تملك بهم خالد باستهزاء:ووش اللي يخليني أزوجها لولد عمي المحترم سحر:الورث اللي خايف يطير منك خالد يطالعها وكأنه ينتظر تفسير أكثر سحر:بكره العصر تجي لبيت عمي وتملك لعبير وعبدالمجيد ولا انا راح أروح لأبوي وأقول له كل شي كان بينك وبين ميساء الكلبه وعن سوالفك وخرابيطك اللي ما في احد يعرفها خالد مسك سحر من يدها بقوه وبصراخ:أنتي تهدديني سحر سحبت يدها :لا يا اخوي انا أشوف مصلحتي انا وأختي وامشي وراها خالد صار يتنفس بضيق من العصبيه سحر وهي تناظره بتحدي:ها بتجي بكره ولا أقول لأبوي اللي أكيد راح يتبرأ منك ويحرمك من الفلوس كلها وتطلع من المولد بلا حمص خالد خذا نفس عميق وزفر:والله وطلعتي تعرفين تخططين وتهددين سحر:انت أصلا ما يفرق معاك احد أهم شي عندك الفلوس خالد وهو يجلس ويحط رجل على رجل:معاك حق سحر:قرارك خالد:تستطفلين أنتي وأختك بكرا راح أجي واسوي اللي تبغونه بس بعدها ما ابغى أشوفكم ولا اعرف عنكم شي سحر وهي تتوجه للباب وقبل ما تطلع:ما طلبت شي جديد أصلا احنا من زمان ما نعرف بعض وطلعت وركبت السياره وهي مبسوطه انها قدرت عليه رجعت للواقع وهي تطالع تركي اللي عاقد حواجبه ومستغرب من اللي سمعه وكأنه ما توقع منها هالتصرف سحر: اشوفك متفاجا تركي :تهددينه ما توقعت توصل معك لذي الدرجه مو كافي مزوجه أختك من وراء أبوك سحر: اعترف ان الطرق اللي استخدمتها غلط بغلط بس ما كان في حلول حسبتها بعقلي وعرفت ان طريقة الكلام والإقناع ما راح تفيد معاهم فجربت التهديد تركي وهو متضايق من تصرفها مع اهلها:مهما كان طريقتك غلط وما لك عذر سحر: يمكن يكون كل شي بحياتي غلط ماضيي غلط تفكيري غلط بس اللي اعرفه ان تزويجي عبير لعبد المجيد هو الصح وبعدين وش تتوقع من وحده مثلي وحده....وسكت تركي باهتمام:كملي ليه سكتي سحر:انا عشت طول عمري ما اعرف أبوي وأمي كل اللي ربتنا عليه الفلوس والعز والكره والخبث وكيف نوصل للأشياء باي طريقه ما كانت مثل باقي الأمهات ...وسكتت لحظات وكملت وهي تطالع النافذه:عمرها ما خذتني بحضنها ولا باستني من قبل عمرها ما سألتني في دراستي ورجعت تطالع تركي وعيونها بدت تغرق بالدموع :كنت لما أتفرج على المسلسلات وأشوف أم وبنتها كنت اتمنى لو كنت مكان البنت مع ان الموضوع مجرد تمثيل وحده مثلي وش تتوقع يكون الأسلوب اللي المفروض تستخدمه ظل يناظر عيونها وحس ان كل الضيقه والغضب من أسلوبها وتصرفاتها تبخر أول مره يشوفها بها الحزن وتمنى انه يقدر يمد يده ويمسح هالدموع اللي في عيونها ويمحي القهر والألم اللي بانت في ملامحها ويعوضها الحرمان بس كل اللي قدر يسويه انه يبتسم بلطف لها وهي ابتسمت بدورها له بحزن قطع عليهم رن جوال سحر طلعته من الشنطه وشافت المتصل ورجعت تناظر تركي:هذا أبوي تركي:أنتي حسبتي حساب كل شي ونسيتي أهم شي أبوك صح سحر والخوف مبين على وجهها :صح تركي:لا تردين أكيد عرف بالموضوع وان رديتي راح يعصب أكثر خليه لما يهدى أحسن سحر:أكيد عرف من الشغاله هي شافتنا لما طلعنا وأكيد عرف منها ..وش بسوي الحين تركي سكت يفكر وتوه بيتكلم إلا وصل الأكل تركي:بعد الغداء نتكلم سحر:في ايش تركي:في ميساء وأبو شملان وأبوك وعندي حل لمشكلتك سحر بلعت رقها:طيب حطت جوالها صامت وحطته على الطاوله تركي عرف انها بدت تخاف وبدت تحس انها تورطت فابتسم لها يطمنها وبدوا يأكلون &&&&&&&&&&&&&&& نرجع قبل ربع ساعه وراء &&&&&&&&&&&&& في البيت الكبير توه واصل البيت من الشغل وشاف ميساء بالصاله ابو خالد:السلام عليكم ميساء بابتسامه : وعليكم السلام ..أخبار الشغل ابو خالد :كل شي تمام أشوف البيت هادي البنات ما صحوا لحد الحين ميساء: انا ما ادري عنهم من صحيت ما شفت احد منهم ابو خالد ينادي الشغاله:سنيثيا سنيثيا:نام بابا ابو خالد: روحي صحي البنات بسهم نوم صرنا العصر وهم لحد الحين نايمين سنيثيا :هزا نفر كلو اطلع ابو خالد وقف وعقد حواجبه: شلون يعني طلعوا وبعصبيه يلتفت لميساء:انا ما قلت ما في احد يطلع وشلون طلعوا ميساء:وآنا وش دراني عن بناتك ابو خالد التفت على سنيثيا وبصراخ :متى طلعوا سنيثيا:هزا من زمان اطلع وفي اخذ شنطه ابو خالد :ايش قلتي وصعد الدرج بسرعه و ميساء وراه وراح غرفة عبير وفتح الأدراج شاف الملابس مو موجوده ابو خالد:الكلبه تبغى تفشلني وتوطي راسي بين الرجاجيل انا اعلمها ميساء من وراه وهي مقهوره وتزيد النار حطب:انا قلت لك بناتك يبغالهم تربيه من أول وجديد ما صدقتني ابو خالد يرفع جواله ويتصل على سحر مره ومرتين وثلاث وهي ما ترد ابو خالد:ما ترد ميساء:أكيد ماراح ترد مو هي اللي مساعده أختها ولا نسيت يوم تقولك بسوي اللي في راسي ابو خالد بصراخ:خلاص اسكتي ميساء سكتت وهي مبسوطه وودها تشوف سحر إذا رجعت وش بيسوي فيها ابو خالد رفع جواله واتصل على عريس الغفله وهو يأخذ نفس علشان يضبط صوته:الو – السلام عليكم – أخبارك – طيب يطيب حالك – والله ما ادري وش أقول لك بس أم البنت تعبت علينا و وديناها المستشفى ونوموها ف... – الله يسلمك الشر ما يجيك – فراح نأجل كل شي لحد ما تتعافى أم العروس – ههههههههه – ان شاء الله – فمان الله صك جواله وهو يضغط عليه بقوه ويفكر في اللي سووه بناته ويتوعد فيهم ان كل وحده بيدفنها عند باب غرفتها &&&&&&&&&&&&&&&& نروح للثلاث سيارات على الطريق في سيارة عبدالمجيد كان طاير بعبورته على قولته وكان يسمعها أغاني الحب والعشق وهي تكتفي بأنها تبتسم له وهو عنده وجودها يغنيه عن العالم كله ونظره من عيونها تغنيه عن ألف كلمه وقلبها الطيب يغنيه عن حنان وحب العالم كله كان ماسك يدها بيد ويسوق باليد الثانيه وهو مبسوط وعبير ما كانت اقل منه سعاده وهي تدعي في سرها ان الله يقدرها وتسعده وما تقصر معاه في شي &&&&&&&&&&&&&& في سيارة ماجد كان العكس تماما كان أنواع الضحك طبعا من أم دلول اللي ما تقصر وعلي ولقافته ماجد يغني وهو يطالع عيون دلول اللي عاكستها المرايه أغنيه لراشد الماجد علي:يا ابو الشباب اسكت واللي يعافيك لو يسمعك راشد الماجد بيعتزل ولا بينتحر ماجد:وش دخل أمك انت علي:يا شين الصوت يقولون أنكر الأصوات صوت الحمير ماجد اللي بدا يعصب:والله ما الحمار إلا انت ويا وجهك علي:المسبه تلف تلف وترجع لصاحبها ماجد:والله ان ما سكت لا أنزلك الحين علي:ليه على كيفك هو ماجد:ايه على كيفي وش عندك علي:ما عندي شي أقول شغل الراديو نسمع شي أحس من سماع صوتك اللي كله نشاز...ويمد يده ويشغل الراديو ماجد يطفيه:ان شفتك ماد يدك كسرتها أم عبدالمجيد اللي توها تنتبه لهم:ماجد وش فيك على الولد ماجد:ما فيني شي مقهور أم عبدالمجيد:وشو ماجد:ولا شي علي يلف على أم عبدالمجيد ويتمسكن قدامها:شفتي يا خالتي كله يهاوشوني ويغسلون شراعي وآنا لاني اصغر منهم اسكت لاني اخاف يطقوني أم عبدالمجيد:يطقونك اللي فيه خير يطقك وآنا أوريه شغله علي وهو يطالع ماجد ويرفه حواجبه وينزلها علشان يقهره:تسلمين لي يالغاليه أم عبدالمجيد:ماجد لا تزعل علي تراه حسبت واحد من عيالي علي:جعلني فدوه لك يا خالتي أم عبدالمجيد:هههه يا حليلك يا علي والله مافي مثلك علي:يا بعد عمري يا خالتي قولي لهم خليهم يحسون بالنعمه اللي بين يديهم أم دلول:أقول عن الصواريخ يا عليوي تراك خبز أيدي وأعرفك زين ما زين وحركاتك ذي ما تمر علي علي رجع يطالع قدام وهو ساكت لأنه خاف يتكلم وأمه تنشر فضايحه عند الكل لمح ماجد يكلم نفسه بهمس ماجد بهمس:آه يالقهر هو يرفع ضغطي وأمي تفزع له ضدي علي:تقول شي ماجد:اوووووووووف علي:ولا تقل لهما افا ولا تنهرهما عيب عليك تقول أف ماجد طالعه بغضب وسكت أما دلول فكانت ماسكه ضحكتها من شكل ماجد المقهور من علي وهي عارفه انه مقهور من قبل علشان الكل ركبوا معاه وهو مخطط انه يركب معاها لحالهم بس عبدالمجيد هو اللي ربح &&&&&&&&&&&&& في السياره الثالثه السياره هدوء إلا من نايف ونوف اللي يلعبون ريان:اووووف مليت متى نوصل طلال بابتسامه:قربنا نايف :ماما ابغى أجي عندك اقولك كلمة سر الجوهره تلتفت على نايف من جهة الفتحه اللي بينها وبين طلال وتتحاشى تطالعه:تعال حبيبي جاء نايف عند الجوهره وجلس في حضنها وبدء يهمس لها نايف بهمس:ماما قولي له ابغى أسوق الجوهره وهي تبتسم:لا عيب حبيبي إذا كبرت تسوق نايف:ماما الله يخليك قولي له الجوهره رفعت نظرها بسرعه لطلال ونزلتها:لا ما يصير نايف وصوته بدا يعلى:ماما قولي له طلال:وليش ما تجي انت وتقول لي وش تبغى نايف يطالع الجوهره اللي تطالعه وهي ساكته طلال وهو يمد يده لنايف وباليد الثانيه يسوق:تعال قلي بنفسك وش تبغى نايف راح له وهمس بإذنه:انا ابغى أسوق معك طلال بابتسامه:بس من عيوني وخذاه وحطه على رجوله وبدا يخليه يمسك الدركسون وكأنه هو اللي يسوق ونايف مستانس ريان:أقول طلال طلال:سم ريان:إذا رحنا هناك يصير اركب دبابات طلا:اسأل الجوهره إذا رضت يصير ليش لا وطردات مائيه بعد ريان :يا سلام جوجو يصير الجوهره بابتسامه:إذا وصلنا يصير خير ريان:يله جوجو يله والله نفسي العب الجوهره بابتسامه:خلاص حبيبي إذا وصلنا نخليك تركب ريان:هيه طلال يفكر في كلمة حبيبي وصار يتمنى لو انها تنقال له وابتسم على تخيله &&&&&&&&&&&&& وصلو محطه وقفت الثلاث سيارات عبدالمجيد:عبورتي وش أجيب لك عبير بهدوء:أي شي عبدالمجيد:زي ايش عبير:مو مشكله أي شي تجيبه عبدالمجيد بابتسامه:طيب وعند ماجد:خالتي وش توصيني عليه أم دلول:انا ابغى بايسن علشان أصير كلي حركات أم عبدالمجيد:ههههههههه يا مثبت العقل والدين ثبت العقول اللي عندنا أم دلول:ليه احد قالك خبله ولا مخرفه أم عبدالمجيد:ابد........وتلتفت لماجد :انا يا وليدي ابغى عصير فراوله أم دلول:ايه علشان هالخدود يصيرون ورديين وتزيد الحلى حلاه أم عبدالمجيد:ههههههه الله يصلحك بس ماجد وهو يطالع دلول بهيام:وش تأمرين عليه دلول:انا ابغى انزل ماجد وهو يفتح لها الباب:افا عليك غالي والطلب رخيص دلول وهي تنزل:تسلم ويدخلون ويوقف ماجد في قسم العصاير:أمري يا عمري وش تبغين دلول بحياء:ابغى عصير برتقال ماجد:بس من عيوني أحلى برتقال لأحلى دلوله دلول تضحك على كلام ماجد ماجد :فديت هالضحكه ما تبغين توكس دلول:لا ماجد:ليه ما شفتي إعلانه دلول وهي تضحك:إلا وفجاه حسوا باللي صدم فيهم ودخل بينهم ماجد بعصبيه:انت علي: استحوا على وجيهكم الهندي راعي الحساب صار يطالعكم وشاك فيكم ماجد: يا أخي انت ما تضف وجهك وترجع للسياره يكون أحسن علي:لا لا ما اجتمع اثنان إلا كان ثالثهم الشيطان دلول:نعم وش قلت شيطان في عينك علي وهو يأخذ التوكس من يد ماجد:زين جبت معاك توكس عاد انا أموت عليه دلول اللي بدت تعصب وتطالعه بعصبيه:علي بتفارق ولا أدوس ببطنك وأعلمك الشغل علي بخوف:لا بروح وانتم بالطقاق بس ترى بحط الأغراض عند الهندي على الطاوله .......وغمز لماجد:وأنت حاسب ترى الأغراض مو كثير بس 2 برنجلز و7 علب عصير و 5باونتي و 2بطاطس ليز كبير ووو بس ماجد عيونه طالعه:نعم وهذا كله لمن علي بابتسامه:لي يله انا رايح السياره لا تنسى تجيبهم لي ...وراح ماجد:هذا اخوك بيجنني دلول:ههههههههه ما بعد شفت شي ماجد ابتسم على ضحكت دلول ولفوا يكملون شراء الأغراض &&&&&&&&&&&&& عند طلال نزل لحاله بدون ما يسال احد عن اللي يبغونه والجوهره ساكته لأنها حاطه في بالها انها أصلا ما راح تاكل لأنها تغدت وما تبغى شي منه ورجع بأكياس ركب وعطى ميري كيس لها وللبزران وهو والجوهره عندهم كيس طلع عصير فواكه مشكله وعطاها ايه وهي تطالعه مستغربه طلال:أنتي ما تحبين الفواكه المشكله وعصير الخوخ ولا انا غلطان الجوهره:انت كيف عرفت إني اشرب فواكه ما في احد يعرف إلا ..وسكتت الجوهره طالعته وبعدها لفت على ميري لان ما في احد يعرفها كثر ميري ميري لما شافت الجوهره تطالعه وكأنها بتنتفها صارت تصرف وتشرب العصير:الله هزا واجد هلو و كويس هق فيتامين ورشاقه وسوي مخ واجد زكاء وتطالع ريان:اشرب زي هزا عصير صير بطل الجوهره تتوعد فيها ورجعت تطالع قدام وطلال ضحك على منظر ميري &&&&&&&&&&& أما عبدالمجيد المسكين ما خلا شي ما جابه لأنه مو عارف عبير ايش تحب بالضبط وعبير صرت تضحك عليه وعلى الكيسه الكبيره اللي شايلها حركوا الثلاثه سياراتهم وبعد ربع ساعه وصلوا الشاليه اللي عجبهم كثير لأنه كان كبير وكان في شاليه اثنين واحد للحريم وواحد للشباب &&&&&&&&&&&&&&&&& وهي في السياره متوجهه لعند ساره ونوره وتنفيذا لطلب تركي انها ما ترجع البيت الحين وتروح تنام عند ساره ونوره لحد ما تنفذ الخطه اللي قالها لها تركي وخصوصا ان ساره ونوره عايشين في شقه لحالهم مع ولد صغير عمره 12 سنه في أول متوسط تذكرت فرحة ساره ونوره لما قالت لهم انها راح تجي عندهم كم يوم وكذبت وقالت أهلي مسافرين وآنا ما سافرت لان عندي أشغال أسويها وما ابغى اقعد بالبيت مع السواق والشغال لحالي فوافقوا قررت ترسل المسج الحين وتبدأ بتنفيذ الخطه وكل ما كان أسرع كان أحسن كتبت مسج وقالت فيه كل شي وأرسلته لأبوها سحر:لازم كل شي يمشي مثل ما قال تركي وصلت العماره ونزلت من السياره ودخلت وصعدت للدور اللي قالو لها عنه وراحت لرقم الشقه وطقت الباب شوي فتحت لها ساره:هلا وغلا ومرحبا والله سحر بابتسامه:هلا فيك ساره:حياس دخلت سحر كانت شقتهم حلوه ومرتبه دخلت سلمت على نوره وجلسوا ساره:يا سلام والله إني فرحانه لأنس بتنامين معانا كم يوم وناسه سحر تبتسم نوره:ما معاس أغراض سحر بحرج:لا والله ساره:ولا يهمس وآنا اختس انا اعطيس من بجايمي وملابسي سحر:والله متفشله منكم نوره:افا عليس احنا خوات وصديقات وإذا ما ساعدنا بعضنا هجل وش الفايده من ذا الصداقه و الأخوه ساره:والله انس صادقه يا نوير سحر:تسلمون نوره:ساره راوي سحر وين بتنام شكلها تعبانه وما نامت من زمان سحر:ايه والله ياليت ساره:من عيوني تعالي معاي راحوا لغرفه حلوه وبسيطه وأثاثها مرتب ساره:أنتي بتنامين هنا سحر:اخاف مضيقه عليكم ساره:لا عاد تعيدين ذا الكلام اتفقنا سحر بابتسامه:طيب ساره:اخليس ترتاحين وتنامين وهذا دولابي اخذي منه اللي تبغين ولا تستحين ابد سحر:مشكوره ساره:العفو طلعت وسحر على طول رمت نفسها حتى ما فيها حيل تغير ملابسها وراحت في سبات عمييييييييييق &&&&&&&&&&&&&&& بعد ما رتبوا أغراضهم ميري لبست بنطلون اخضر وبلوزه حمراء وطلعت تركض على البحر و وراها ريان ونوف ونايف وهم يضحكون أم عبدالمجيد وام دلول جلسوا على الطاولات اللي بالبلكونه ويتفرجون على جمال البحر بألوانه دلول راحت مع ماجد تتمشى على الشاطئ و تفاجاو بعلي اللي لحقهم وماجد يحس انه بيذبحه عبدالمجيد وعبير أحلى اثنين هادين وما لهم صوت وكلامهم بالهمس وهم قاعدين عند الشاطئ الجوهره واقفه عن مدخل الشاليه وتتفرج على إخوانها اللي بدوا يلعبون بالماء وهي مبسوطه علشانهم طلال من وراها:ليش ما سويتي مثلهم الجوهر شهقت ولفت عليه وهي خايفه وحطت يدها على قلبها:بس الله خوفتني طلال ابتسم لها:بسم الله على قلبك يا روحي الجوهره طالعته وسوت روحها ما سمعت وش قال ورجعت لفت تطالع إخوانها طلال وقف جنبها:حلو المنظر الجوهره:يجنن إلا يسحر سبحان الخالق طلال سحب نفس طويل وزفره نوف تنادي الجوهره من بعيد:ماما تعالي بسرعه الجوهره بابتسامه :جايه حبيبتي مشت لحد نوف ونزلت لمستواها وهي تطالع اللي في يدها نوف:ماما شوفي ايش لقيت قعقعه الجوهره :هههه يسمونها قوقعه......... خذتها وحطتها على أذن نوف:اسمعي نوف تسمع وتضحك:ماما اسمع هوووووووووششش الجوهره:ههههههه ايه حبيبتي هذا البحر نوف:الله حلو بروح اخلي نايف يسمع بعد....... وراحت تركض لنايف الجوهره حست هالمشهد وكأنه متكرر ورجعت بذاكرتها لما كان عمرها 6 سنوات الجوهره:ماما شوفي وش معاي شي حلو كثير ندى آم الجوهره:أشوف حبيبتي الله قوقعه وخذت وحطتها على أذنها وصارت تسمع الجوهره:ماما ابغى اسمع ندى وهي تحط القوقعه على أذن الجوهره :وش تسمعين الجوهره:صوت البحر ندى:حلو حبيبتي الجوهره وهي تضحك ببرائه:ايه ندى:ان شاء الله يجي يوم وتكبرين وتسمع بنتك مثل ما انا وأنتي سمعنا سوا الجوهره:لا انا بقعد معاك حتى لما اكبر لاني احبك كثير كثر البحر ندى وهي تضم بنتها:ان شاء الله ياروحي تكبرين وافرح فيك وترفعين راسك صح راح تخلين ماما فخوره فيك الجوهره: ايه ندى باست الجوهر ومسكت يدها وصارت تمشي معاها على الشاطئ غمضت عيونها وهي مليانه دموع ومسكت السلسال:اشتقت لك يالغاليه حست باللي يمسح دمعتها شافت طلال واقف جنبها كيف وهي ما حست فيه ولا تدري هو من متى واقف طلال:تبغين تقولين شي الجوهره وهي تلف وتعطيه ظهرها وتمسح دموعها:لا بعد صمت تكلم بصوت هادي وهو يطالع البحر يتأمله طلال: توفوا وآنا صغير وما اذكر عنهم الكثير الجوهره التفتت له وظلت تطالعه وهو كمل وهو يطالعها: اقصد أمي وأبوي ما اذكر عنهم الكثير بس أحبهم واشتقت لهم كثير رباني عمي بو صالح مع ولده تركي اللي انا اكبر منه بشهور وهو اخوي من الرضاعه وعمي ما قصر معي عاملني مثل ما كان يعامل تركي وعمره ما حسسني بالفرق أو النقص بس مع كذا كنت أحس بغيابهم وبفراغ في داخلي وما في شي يملى هالمكان ابد ابتسم بحزن ورجع يطالع البحر وعم الهدوء الجوهره أخيرا تكلمت:المرض خذاها مني أبوي تزوجها لأنه يحبها كان حب أبوي لامي معروف بالعائله كلها جدي ذياب ما تقبل ان ولده يطلع عن شوره فطرده وجلست تطالع الغروب وهي تكمل وجلس معاها طلال:وجدتي ما كانت تقدر تسوي شي الوحيد اللي وقف معاه عمي مبارك بو حمد رحمة الله عليه وبعد وفاة جدي ظلت العائله مقاطعه تزوج أبوي ريما وظن انها بترعاني وبدل ما ترعاني كانت تعذبني تجلس الشغاله وتخليني اشتغل بدل عنها ابتسمت بحزن وكملت:وميري لما شافت اللي قاعد يصير لي ما قدرت تسكت أكثر وقالت لأبوي وأبوي تهاوش معاها وكان راح يطلقها بس عرف انه حامل بريان وسكت ورحت عند خالتي أم عبدالمجيد تنهدت وانتبهت لصوت الجوال اللي قطع عليهم جوهم وكلامهم وعقدت الجوهره حواجبها وهي تطالع الرقم ورجعت تناظر طلال بكره وردت:نعم خير ريما:عطيني جوزك الجوهره خذت الجوال وهي قايمه ورمته على طلال وبكره:كلمها وشوفوا وش باقي من الخطط تفكرون تنفذونها علي وما نفذتوها ومشت وخلته مو فاهم شي طلال رد:الو ريما:مسيو طلال انا في ورطه دخيلك ساعدني طلا:هذي أنتي وش تبغين ريما:اتابض علي دخيلك طلعني من السجن طلال:اسمعي لا عاد تتصلين فينا ولا ترى والله لأدفنك في السجن فاهمه وصك السماعه وهو يتأفف :الله يأخذك يا ريما انا أحاول أتقرب خطوه وهالغبيه رجعتنا لعشر خطوات وراء الغبيه مفكره إني ممكن أساعدها وانا اللي مبلغ عنها ابتسم بسخريه:صدق غبيه &&&&&&&&&&&&&&&&& جالس بين أوراقه وملفات القضايا اللي موكله له وسمع طق على الباب فيصل:تفضل شوق دخلت:مشغول فيصل بابتسامه:حياك شوق وهي تجلس:بغيت أسالك عن شغله فيصل نزل نظارته:قولي حبيبتي أسمعك شوق:أنتي تعرفني صح وتعرف عرق اللقافه اللي فيني فيصل عرف أخته وش بتساله عنه طالع الباب وقام من مكانه واشر لشوق انها تسكت وهي صارت تطالع الباب من أول ما قام فيصل ومبين عليها الخوف فيصل توجه للباب وفتحه بسرعه وبقوه وطاحت شهد فيصل وهو يستند على الباب:كنت متأكد شهد قامت:اييييييييييييي فيصل نزل وشدها من إذنها ومشاها معاه لحد ما وصل للكرسي جلسها وراح يجلس وراء مكتبه:انا ابغى افهم ليه تتسمعين من وراء البيبان متى بتتركين هالحركه الخايبه عنك ليه ما تدخلين وتجلسين معانا وتسمعين وش نقول شهد وهي متفشله:خلاص أخر مره ما عاد أعيدها التفت فيصل لشوق:وأكيد أنتي متفقه معاها انك تسحبيني في الكلام وهي تتسمع تو شوق بتتكلم إلا فيصل يقاطعها:لا تفكرين تنكرين أعرفك عدل فيصل:الحين وش تبغون تعرفون شوق:حنين متى قضيتها فيصل:بعد 3 أيام ان شاء الله شهد بلقافه:هي حلوه فيصل طالعها وما رد عليها شهد تحط رجل على رجل وتسوي فيها أم العريف:ما دامك ما رديت معناتها قمر فيصل:ان شاء لله بعد ما تربح قضيتها راح أعرفكم عليها وعلى خواتها شهد:يا سلام والله متحمسه أشوف اللي خبلت باخوي فيصل ومسوي نفسه معصب:بنت شهد:ههههه ههههههههه اترك عنك هالحركات يا فصفوص فيصل:أقول وش رأيكم لو تقومون ويله برا وتخلوني أكمل شغلي شهد وشوق شهقوا شهد وهي تستهبل وتتكلم فصحى:كيف تجرا على طردي إلا تعلم من انا شوق تكمل تمثيل:ومن تكونين يا فتاه شهد:انا من قطع الجبال والبحار انا......... أي أي أي أي أي أي فيصل مسكهم من أذانيهم وطردهم برا وصك الباب وهو يضحك على خبال خواته ورجع لمكتبه وتذكر شي كان ناسيه فيصل:يووووووه وشلون نسيت انا لازم أعطي حنين خبر إني مسافر الرياض علشان تبلغ خالتي أم حنين رفع جواله وكتب مسج وأرسله ما يبغى يكلمها لان كل مره تكلمه تحاول تبين له انها متضايقه وهو ما يحب يضيقها تنهد ورجع لأوراقه يكمل شغله
|
|
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
.gif)
.gif)
العرض المتطور
