قصيدة أخيك

ينشدني اللي ما عرف وش خوافيه
سؤال واشغلني عن النوم لا انام
الاخ وشلون يتعامل مع اخيه
في محكم العادات وشروع الاسلام
وفكرت ويش ارد والرد يا هيه
قصيدة تبقى على طول الايام
اخيك لو يجفى تحذر تجافيه
تواصلوا ما فالجفا خير لا دام
بعيد عن كثر العتب والمشاريه
فلا يتعدى الهجر .. ثلاثة ايام
واخيك عند الناس لا مر طاريه
سكت لسان عذربه عند الاقوام
تراه حاكي بك مثل ما حكى فيه
وانت المحامي والمقابيل قدام
واخيك لو يحتاج حذرى تخليه
يمد كفه للعرب وانت بانعام
عطه ما ربي قاسمه واكرم يديه
ايه خشيرك في حياتك ولو شام
واخيك لو انه ردي لا تعاديه
سلم عليه ووجبه واجب اكرام
وارفع نباه ولا تخيب هقاويه
لعله يجمل بصيده الى حام
ولك اخ امك ما تجيبه وتبزيه
يعيف زاده لو لقى اخيه منضام
ساير مواقيفه .. وجرب مماشيه
والناس فالميقاف منقسمه اقسام
احد تحفظ اسمه كذا منت تبغيه
مجامله .. والوقت بايع وسوام
واحد مهو يحتاج تحفظ اساميه
اصابعك بلحالها تدق الارقام
لانه خوي ما تغير مباديه
ومحبته تزداد عام ورى عام
ذي تجربة خوه ولا تسج يا هيه
ترى البشر منظورها ناتج احكام
يستعظمون اللي ربوعه حواليه
ويستضعفون اللي لحاله الى قام
من لا يعز اخيه ويقدر اخيه
يندم الى بانت صواديف الايام
ما ينتعوض الاخ لو فيه ما فيه
حطه ذراع لك .. ولايام قدام
تلفي عليك وجيه وتغادر وجيه
واخيك طول العمر يبقى لك حزام