وللايام قرار اخر ...

عد المغرب ... ولا وحده نزلت من البناتت اللي كانت كل وحده فيهن في حجرتها .. عوشه عشرين مرة شلت التيلفون بتتصل تطمن على سعيد .. وتشوف وينه لانه اخوها وما يهون عليها يطلع زعلان او معصب .. بس تتراجع يوم تذكر المواجع اللي ياهن والكلام اللي قاله حق روضه ... في الاخير اتصلت فيه وقالت خله يهزئني المهم قلبي يرتاح .. بعد ما رن رنتين رد عليها

عوشه: الو
سعيد: الو .. هلا عوشه
عوشه: اهلين .. شحالك .. ووين انت
سعيد: انا بخير وسهاله موجود .. انتن شحالكن .. شحال بنت عمج
عوشه: نحن بخير ... وبنت عمي بخير ... اقول سعيد انا اسفة يا خوي لا تزعل وحقك علي .. خلاص اخر مرة اكلم نورة بهالاسلوب .. والله انا ما اقصد وانت تعرفني .. بس هي اللي استفزتني .. وانت تدري انا ما ارضى على روضه
سعيد: (وهو يبتسم) لا خلاص يا عوشه وانا اللي استسمح منكن لازم اتخبركن شو السالفة ... الا روضه وينها وشو سوت بعد ما رحت
عوشه: فتحت مناحه لين العصر ما رمنا نسكتها وطلعنا عنها ... سعيد ليش تقولها راس الحية شو هالكلام .. وبعدين اني احترم بنت عمي واحترم شعورها .. هذا شي ما يعني انها امشتني على كيفها
سعيد: عوشه خلاص انا اسف
عوشه: لا خلني اقولك ... انا احب روضه جيه ... وبطبعها هذا .. اذا كان في حد ما يقدر يتقبلها فهاي مشكلته
سعيد: خلاص يا عوشه .. انا اللي استسمح منكن
عوشه: ويكون في علمك انا ما انقهرت ولا عصبت الا يوم قالت نورة لروضه انها مجابلتنك اربع وعشرين ساعه وودرتها وخطبتها هيه ... كلامها قهرني .. روضه هب عانس ولا طايحه في جبد ابوي وانت تدري انها تنخطب وابوي اللي مب طايع ايوزها ولا هي تبا بعد
سعيد: (وهو منصدم) قالت حق روضه هالكلمه
عوشه: هيه واذا هالكلمه حرقتني مرة اكيد حرقت روضه الف مرة
سعيد: خلاص يا عوشه برايج الحين مع السلامه
عوشه: ما بترد البيت
سعيد: بشوف (وهنيه دخلت ابشكاره حجرة عوشه تقولها ان امها تباها تحت)
عوشه: الحق اخاف نورة اشتكت عند امي بعد ... يا ويلي شو تباني الحين
سعيد: روحي شوفيها وردي كلميني .. اذا صار شي برد البيت
عوشه: اوكي ياللا برايك
سعيد: باي

وبندت عوشه عن سعيد ونزلت تشوف امها شو فيها ... امها كان ويها محمر وشكلها سامعه خبر منغص عليها ... وهنيه عوشه زاغت لا يرتفع ضغط امها

عوشه: هلا امايا خير فيج شي .. شكلج تعبانه
ام خالد: خالتج كلمتني الحين
عوشه: هاه خالتي .. ليش
ام خالد: نورة بنتها ما تبى سعيد .. ومعزرة اذا يوزناها اياه تنتحر
عوشه: احسن فكه
ام خالد: انتي شو تقولين ... الحين انا شو اقول لاخوج .. شو اقول للناس
عوشه: يولون الناس .. المهم اخوي اتصلي فيه وقوليله
ام خالد: ما اروم يا عوشه .. اتصلي فيه خليه ايي العين
عوشه: (كانت يايه اتقول لامها انه في العين بس سكتت) ان شاء الله

شلت عوشه سماعة التيلفون عشان تتصل في سعيد
عوشه: الو
سعيد: هاه عوشه شو عندج
عوشه: شحالك اخوي ان شاء الله بخير
سعيد: امي عدالج
عوشه: هيه
سعيد: زين شو تبغي
عوشه: تقولك امي تعال العين الحين ..
سعيد: اهااااا ... عقب ساعه وربع برد البيت
عوشه: انزين .. الله يحفظك اخوي
سعيد: (وهو يبتسم) سلمي عليها .. اقول روحي فوق اتصلي فيني
عوشه: ان شاء الله

راحت عوشه فوق بس اول دخلت على روضه اللي حصلتها راقدة من التعب ولعت الليتات عشان اتخبرها الخبر
عوشه: روضه روضه قومي بقولج شي
روضه: هاه شو قولي
عوشه: هاي نورة خلاص بنفتك من لسانها
روضه: كيف .. ماتت ولا انخرست
عوشه: هاهاهاها فال الله ولا فالج
روضه: هاه
عوشه: خلاص بيفجون الخطبه
روضه: قولي والله
عوشه: والله خالتي اتصلت في امي وقالت ان نورة معزرة يا يفجون الخطبة يا تنتحر
روضه: ول والعثرة ... (شهقت روضه وبطلت عيونها) سعيد ... يا ويلنا منه اكيد بيقول ان نحن السبب ..
عوشه: اووه ذكرتيني .. بروح اتصل به اخبره
روضه: مالج خص لا يواجعج
عوشه: لا هو اللي قال اتصل به من تيلفوني ... لاني كلمته عشان امي تباه الليلة
روضه: اوكي بيي وياج

راحن حجرة عوشه عشان تتصل في اخوها وبعد ما رن رنه وحده رد عليها .. وخبرته باللي قالته امها .. بس ما بان عليه انه تفاجأ وبند عنهن وقالن انه بيرد بعد ساعة

عوشه: تعالي ننزل عند امي بروحها تحت انا خايفه عليها لا تتعب
روضه: اوكي نزلي انتي وبسوم .. انا بغسل ويهي وبيي .. والله يخليج سويلي كوب نسكافيه راسي بينفجر
عوشه: (تبتسم) اوكي

بعد ساعة دخل سعيد البيت سلم وراح حب امه وقعد عدالها ... بس هيه قالت له يدخل وياها الحجرة .. في الحجرة

ام خالد: سعيد يا ولدي ترى خالتك اتصلت في تقول بنتها ما تباك .. انت سويت بها شي
سعيد: لا ... وبعدين اذا ما تباني برايها الله يحفظها ويرزقها غيري
ام خالد: شو اتقول يا سعيد .. هذي خطبه وعرس هب لعب .. كل حد فيكم يخطب مرة ويفج
سعيد: امايا يعني بتيوزنها بالغصب .. وبعدين اذا هي ما تباني مرة ما اباها الف ... وتبين الصدق انا ما وافقت الا عشان خاطرج انتي ..
ام خالد: يا ولدي هالشي هب سهل لا عليها ولا علينا
سعيد: امايا انا ريال ما علي شر .. وانا بعد ما ابغيها خلاص انتهينا
ام خالد: انت ما تبغيها عشان هيه قالت ما تباك
سعيد: لا ما ابغيها من قبل
ام خالد: وليش ما قلت
سعيد: ما حبيت احرجج ويا خالتي
ام خالد: يعني خلاص
سعيد: هيه خلاص .. الله يسعدها
ام خالد: انت مب زعلان
سعيد: لا ليش ازعل ... اذا ما خذتها بتم بنت خالتي ... وسالفة ما فيها زعل هذا عرس وحياة ما بنغصب البنت على شي ما تباه .. واذا بنتهم ما بغت هم مالهم ذنب
ام خالد: الله يكملك بعقلك يا ولدي

وطلع سعيد من عند امه ... ومر من جامهن بس ما سوالهن سالفة وطلع من البيت دون حتى ما يطالع صوبهن

بسوم: بلاه هذا
عوشه: ما ادري من شوي مكلمتنه ما فيه شي

سكتت روضه ما قالت شي بس من داخلها كانت مغيضة وتحترق من الاسلوب اللي عاملهن فيه سعيد .. كل هذا عشان نورة ما بغته ...
**
الساعة عشر في الليل بعد ما رد بو خالد من بيت اخوه سلطان ... قعدن وياه البنات شوي يسولفن ويصدمنه بخبر نورة وسعيد ... اول شي تضيج عشان سعيد .. بس يوم عرف ان سعيد عادي عنده وما همه الموضوع هو بروحه قال احسن ... لان بوخالد كانت عنده مخططات ثانيه قبل كان باننها حق عبود والحين رد حولها لسعيد ... بوخالد مستحيل يخلي روضه تطلع من بيته .. صار ما يصبر عنها صدق ... ويتمنى انه حد من اولاده هو مب اولاد سلطان ياخذها ... وهم يسولفون دخل خالد ويا حمده .. كانت اول مرة ايي فيها خالد ويا حمده من اسبوع او اكثر الحين ... حبت حمده عمها وقعد خالد عداله

خالد: عيل وين امي
عوشه: داخل الحجرة
بوخالد: (يكلم حمده) شحالج اليوم يا بنتي ..
حمده: عمي انا بخير مافيني شي
بوخالد: شو مافيج شي ويهج مصفر وتعبانه .. خالد بوي ودها المستشفى لا تخليها جيه
خالد: ان شاء الله ابوي
روضه: نحن قلنالها بنوديج ما طاعت
خالد: بوديها انا باجر .. ابوي بغيناك في سالفة انت وامي .. تعال ندخل الحجرة عندكم
بوخالد: ان شاء الله (نش بوخالد .. وقاموا وراه خالد وحمده ودخلوا الحجرة)
عوشه: شعندهم ويا ابوي
روضه: ما ادري ..شكله موضوع جايد ولا ما دخلوا داخل
عوشه: لا يكون يبون يسافرون الحين
روضه: لا والله ما يحلالهم السفر الا ونحن نداوم
بسوم: بلاكن انتن جيه موضوع كبار .. ليش انتن ملقوفات
روضه: اقول بسوم شرايج تروحين تدرسين احسن
بسوم: هيه والله احسن ... ياللا مع السلامه
روضه: باي

أما في حجرة بو خالد فقعد بو خالد على كرسيه وام خالد كانت قاعده على السرير .. حمده قعدت عدال عمتها وخالد عدال ابوه

بوخالد: خير يا خالد شعندكم دخلتونا داخل (خالد مب عارف كيف يفتح الموضوع وياه يتريا حمده اتكلم .. بس حمده كانت ساكته خله شوي يتحمل نتيجة قراراته ... ليش تساعده في انه يجتل قلبها ويحرها )
خالد: ابوي انا معزم اخذ حرمة ثانيه (ام خالد من سمعت جملة خالد .. حست ان راسها بينفجر كل هالبلاوي في يوم واحد ... حد داعي عليهم او عين يتهم .. اما بو خالد عقد حياته وكان وده ينش يضرب خالد)
بوخالد: شووو
خالد: ابوي انت
حمده: عمي ... انا هنيه .. وانا اللي قلت له يعرس لين متى بيصبر اذا انا ما فيني عيال
بوخالد: (بعد ما نصدم من رد حمده وهدى شوي) شو هالكلام يا بنتي .. انتوا توكم معرسين
حمده: عمي خالد من حقه انه يعرس ثنتين وثلاث ... واذا انا بنتكم هو ولدكم .. وانا ادري دامني عندك ما بيقصر علي شي
ام خالد: حمده الدكتوره قالت ما فيكم شي ... الصبر زين انا ما يبت خالد الا بعد ما خذت بوخالد بسنتين ونص
حمده: عموه يمكن ما احمل قبل ثلاث او اربع او حتى عشر سنوات ... انا مرخصتنه يا عمتي
ام خالد: حمده ماشي حرمة ترخص ريلها يحرق قلبها .. الضرة مضره ولو في القبر
خالد: امي شو هالكلام ... بعدين حمده بنت عمي .. واغلى من عيوني وانت تدرين هالشي ... انا عمري ما فكرت اني اغلط في حقها
بوخالد: الله يكملج بعقلج يا حمده ويبارك فيج ... انتي اللي عنده حرمة مثلج يشكر ربه لاخر عمره .. ماشي شراتج في الحريم
حمده: (وهي تبتسم لعمها) فديت روحك يا عمي هذا لاني بنت اخوك اتشوفني جيه
ام خالد: اطلع برا يا خالد
خالد: شووو
ام خالد: اريد اقعد ويا حمده شوي ... اطلع برا (هنيه خالد خاف ان حمده تفضح كل شي ان قعدت بروحها ويا امه وابوه ... هو يدري انهم مب اغبيا ولا يهال ويمكن يفهمون انها مب راضيه ولا عايبنها ... بس بعد ما كان يتوقع انها تتكلم جيه يوم اتوهق ما عرف شو يقول)
خالد: ان شاء الله

طلع خالد من حجرة امه وابوه ... ولقى روضه وعوشه يترين برا وعرف انهن يموتن ويدرن شو يقولون داخل ... فشل عمره وطلع راح بيته ... اما ام خالد فكانت تحاول تعرف السالفة الصدق ... لانها حرمة وتدري ان ماشي حرمة بتوافق ريلها يحط عليها وحده ثانية وهي ما كملت سنتين من عرست .. وحمده كانت تدري ان عمتها تريد تيريرها في الرمسه عشان تعرف السالفة الصدق .. وليش هيه جيه موافقة

بوخالد: حمده جانج بتوافقين عشانا فانا اقولج يا بنتي غلطانه ... ترى هالبيت بيتج انتي وانتي المجدمة قبل خالد
حمده: عمي شو هالكلام ... انا ادري انه دام انه عندي عم مثلك .. فانا ما راح انظلم ولا راح انجبر على شي ما اباه
ام خالد: حمده يا بنتي لا تحرقين قلبج عشانا .. دون رضا ابوه ما بيروح ياخذ حرمة ثانيه .. قولي لا وبتشوفين شو بيسويبه ابوه بيره من اذنيه وبيرده بيته وبيعقله
حمده: عموه فديتج ... انا ادري اني ما اهون عليج ولا على عمي ... بعدين ليش ما تبونه يعرس .. ما تبين تشوفين في هالبيت ياهل ... فطوم يا عموه حامل وهي معرسه من شهر ونص
بوخالد: يا بنتي هذا الشي بيد الله ونحن مب مستعيلين عليج
حمده: لا عموه .. انا مرخصتنه
ام خالد: ما تحبين ريلج انتي .. ماشي حرمه ترخص ريلها يعرس عليها
حمده: (تبتسم) عموه انا احبه لدرجة اني ارخصه يسوي اللي يباه .. الحب يا عموه مب في اني احرمه من الشي اللي يباه .. خله يسوي اللي يباه ... ودامه يحبني بيرد لي
بوخالد: انا لله وانا اليه راجعون ... شو هالمشاكل اللي تصير في هالبيت .. اول شي ذاك الولد خطيبته ما تباه .. والحين هذا يريد يفشلنا جدام العرب
حمده: شو السالفة من اللي خطيبته ما تباه
ام خالد: سعيد يا بنتي .. اتصلت خالتج وقالت ان نورة ما تريد تاخذ سعيد
حمده: حليلك يا ولد عمي .. وشو حالته الحين
ام خالد: واعلي عليه .. جان قلبه يحترق ما بين جدامي شي .. سعيد من متى يبان عليه .. لكنه قال برايها خلوها على راحتها . (كانت ام خالد وهي تقول هالكلام عيونها تدمع .. من القهر اللي فيها .. ومن احساسها بفشل عيالها وفشلها في حماية حمده من ولدها)
حمده: عمتي ماعليج الله بيعوضه ان شاء الله .. سعيد ريال ينشرى والله
ام خالد: خلي سعيد عنج الحين .. نحن فيج انتي
بوخالد: انا ما بروح اخطب له .. يروح بروحه
حمده: شو هالكلام يا عمي .. انت ابوه وعايش ويروح يخطب بروحه هذا مب عيب في حق الناس عيب في حقك انت وانت اكبر من العيب
بوخالد: يابنتي انا مب مرتاح ولا موافق
ام خالد: منو يريد ياخذ (ترددت حمده تقول او ما تقول ويوم شافت ام خالد شكلها درت انها تعرف) ادريبج تعرفين قولي
حمده: اليازية بنت حميد بن بطي ... جيرانا ... اللي بيتهم صوب الدوار
بوخالد: ناس والنعم فيهم
ام خالد: وشدراه بيزوي هوه
حمده: يعرف قوم حميد بن بطي .. ويدري ان عندهم بنات وان اكبرهن يزوي عموه (لكن الصدق اللي ما قالته لهم انه يحبها وانهم على علاقة بالتيلفون كانت حمده اتكلم وكأنها تتكلم عن حد غير بس في داخلها كانت والعه ضو .. تريد تطلع من حجرة عمتها تريد تكون بروحها هاللحظة ... لو يدرون انها تسوي كل هالشي عشانهم هم .. لو يدرون كيف قلبها عورها يوم ردت السبب من العيال ... لو يدرون الجرح اللي جرحها اياه خالد في كرامتها وفي كبرياءها وانوثتها )
ام خالد: هذي بنت عويشه السويدي
حمده: هي هاي
بوخالد: لكن اذا خذها ... ما تدخل بيتي هذا .. يسويلها بيت برع ولا اريد اشوفهم هنيه
حمده: (ارتاحت يوم سمعت كلام عمها .. هذا اللي كانت تريده ) انت قوله هالكلام

طلعت حمده من حجرة عمها وعمتها ... واول ما شافنها روضه وعوشه سئلنها شو عندهم بس ما ردت عليهن وراحت بيتها هي ... الاكيد انهن انقهرن ... بس سكتن وعلى قولة عوشه الخبر اليوم بفلوس باجر ببلاش .. وهن يايات يطلعن فوق .. سمعن ابوهن يزعج داخل الحجرة .. ردن يشوفن شو السالفة .. لقن امهن طايحه مغمى عليها .. .وبوخالد يشلها مع انه كبير في السن بس ما اتريا حد ايي يشل ام خالد .. راحت روضه بتساعده بس ما خلاها .. وقالهن ايبن مفتاح سيارته بيوديها المستشفى ... عوشه شلت غترة ابوها ومفتاح السيارة والعصا .. وراحت روضه فوق بسرعة اتييب عبيهن بيروحن ويا عمهن .. عوشه ما قالت ولا كلمه من الصدمة لين ما طلعوا برا هيه وابوها

عوشه: شو ياها امي
بوخالد: الظاهر الضغط ارتفع عندها ...
عوشه: فديتج يا امايا اكيد نحن السبب
بوخالد: فجي باب السيارة بسرعه انتي الثانيه
عوشه: ان شاء الله (وهنيه طلعت روضه ولحقتهم لين السيارة )
روضه: دوج عباتج ..

وركبت عدال عمتها .. بو خالد ما انتبه عليهن ذيج الساعة كل اللي يهمه حرمته ... وقلبه يعوره عليها .. ام خالد اللي عمرها ما قصرت وياه في شي ولا بينت له في يوم ضعفها تنهار جدامه اليوم .. بسبة عياله .. في شو قصروا ويا هالعيال عشان ايسوون بامهم جيه ... وين الغلط لا هو ولا حرمته عذبوا اهلهم بالعكس كانوا طيعين ... وما يخالفون شورهم .. لانهم يدرون ان اللي يسونه في هلهم عيالهم بيسونه بهم ... ركبت روضه ورا عدال عمتها وحطت راس عمتها على ريولها ... كانت تريد تبان قويه وما تريد تصيح .. بس غصب عنها لقت عيونها تدمع ... حست بالخوف من انها تفقد عمتها .. ردت في بالها الذكريات المرة لفقد امها ... ما كانت تريد تحس هالاحساس مرة ثانيه ويا عمتها اللي كانت لها ام ... كانت دموعها تنزل بس بصمت ما تريد عمها يسمعها او حتى عوشه اللي تذكرت انهم ما قالوا حق خوانها

عوشه: روضه قلتي حق بسوم انا بنروح المستشفى
روضه: (وهي تحاول تبان طبيعيه) لا ما لحقت ادخل عندها
عوشه: يبتي تيلفوناتنا
روضه: لا

اتصلت عوشه في سعيد من التيلفون الثابت في سيارة ابوها ... كانت الساعة 11 ونص حتى ان سعيد استغرب ان ابوه مب في البيت لين هالحزة ... هو كان توه راد بيت عمه ويا مبارك ... بس يوم رد سمع صوت عوشه مب ابوه

عوشه: سعيد الحق امي طاحت ونحن بنوديها المستشفى ويا ابوي
سعيد: شووو كيف طاحت
عوشه: امي مغمى عليها ... ونحن في السيارة
سعيد: أي مشتشفى رايحين
عوشه: توام الاقرب علينا

بند سعيد عن عوشه وهو يقول لمبارك يروح مستشفى توام لانهم بيودون امه تعبانه .. وطول الطريج كانت سعيد يلوم نفسه لو كان يدري ان موضوع نورة هذا بيخلي امه تتعب كان اتحمل هالسالفة وخذها ... امه اهم عنده من أي شي ثاني ومن أي حب في حياته ... اهم من روضه ونورة ومن نفسه .. كان طول الطريج يلوم في نفسه ومبارك يهدي فيه لين ما وصلوا .. بعد ما دخلوا حصلوا ثنتين متغشيات ويا بوخالد ... اللي لف الغترة على راسه حمدانيه وقاعد على كرسي والثنتين واقفات ... وصلوا صوبهم واتخبروهم عن ام خالد

بوخالد: ضغطها ارتفع ... وما اتحملت بس ما عليها شر عطوها ابر ويتريونها اتنش ..
عوشه: بيخلونها تحت الملاحظة
مبارك: تستاهل سلامتها عمي
سعيد: انا السبب ... بسبتي انا امي تعبت ليتني مكانها ولا هي يا ربي .. ليتك خذتني قبل لا زعلها
روضه: سعيد شو هالكلام اللي تقوله عمتي اقوى من هالاشياء
بوخالد: لا يا ولدي ... هب انت ... لو شي قهرها فهو موضوع خالد اللي بيغي ياخذ حرمة ثانيه

كانت مفاجأة للكل ... اللي تسمرت عيونهم على بو خالد بعد هالجملة اللي قالها .. خالد يعرس على حمده معقول ... روضه من سمعت الخبر ما قدرت اتم واقفة فيلست على الكرسي اللي وراها .. ولانها كانت مغشاية محد لاحظ لون ويها اللي صار اصفر وعيونها اللي اتجمعت الدموع فيها ... هذا الشي اللي كانت خايفة منه واللي خالهن حذرهن منه .. عمها وعمتها ويا منوه بيكونون ... عوشه كانت حاسة باللي في روضه فقعدت عدالها بس ما قالت ولا كلمة لان الوقت مب مناسب .. اما مبارك وسعيد قعدوا .. هم بعد ما يدرون شو يقولون في مثل هالوقت اللي ام خالد فيه طايحة واللي روضه فيه اكيد تحترق ... بعد ساعتين طلعوا من المستشفى بعد سلسلة من النصايح اللي سمعهم اياها الدكتور المناوب وراحوا البيت ... روضه ساكته ما قالت شي من سمعت عمها .. وعوشه ساكته احتراما لصمتها .. اما سعيد فبعد ما اتطمن على امه راح مرة ثانيه ويا مبارك ... ما كان في خاطره يجابل حد خاصة بعد اللي بيسويه خالد ... بعد ما راحوا البيت واطمنن على ام خالد راحن روضه وعوشه فوق دخلوا حجرة روضه ...
لقن حمده قاعده اترياهن ... حمده بعد ما راحت بيتها ما حصلت خالد لانه طلع .. راحت فوق اتدوره وبعدين ردت بيت عمها بس ما حصلت حد ... اتفاجأن بس بعد كل الكبت اللي انكبتته روضه ما همها غير انها تعرف الصدق من حمده ... صدق خالد بيعرس عليها .. صدق هالكلام ولا يتهيأ لها انها سمعته..

حمده: وين كنتن
روضه: صدق يا حمده صدق
حمده: شو
روضه: صدق خالد بيعرس عليج
حمده: .... (سكتت ما ردت وهي منزله راسها)
روضه: مب هذا اللي حذرج منه خالي .. مب هذا اللي قلتلج اياه .. مب قلتا لج لا تاخذينه عشان خاطري او عشان خاطر عمي وحرمته .... تبين تعرفين وين كنا؟ كنا في المستشفى عمتي تعبت بسبتج وبسبة ريلج ...
حمده: (وهي خايفه على عمتها) شياها عمتي ؟؟
عوشه: مافيها شي بخير .. ضغطها ارتفع شوي وما تحملت
روضه: ياللا قوليلي شو بنسوي الحين .. قولي وين نروح .. نقعد في الشارع ولا نروح دبي ونقول حق خالي اللي كنت خايف منه استوى هاه
حمده: (بعد ما قربت من روضه ومسكت ويها بيديها عشان تسكت وتحط عيونها في عيون ختها) لا يا روضه .. ما بنروح مكان هذا بيتنا ومكانا ... ما لنا مكان غيره تفهمين ولا ... واللي صار ممكن يصير في أي بيت ... لا تخافين انا لا بعصب ولا بصرخ ولا بزعل ... برايه
روضه: (بعد ما هدت) شو برايه
حمده: برايه يعرس ... نحن مكانا في هالبيت .. حتى لو خالد عرس ... اذا ما بغيت اقعد في بيته وهذا شي ما بيصير بيي اقعد هنيه في حجرتي .. اظن بعدها مقفوله
روضه: بتخلينه يعرس عليج
حمده: برايه
روضه: بس لو كانت امي عايشه ما كنتي خليتيه كنتي رديتي بيتنا
حمده: غلط منو قالج ... نسيتي ان اللي ما يباني مرة انا بعد ما باه
روضه: بس ما بتمين وياه
حمده:لا كنت بتم ... لاني بعد بكون احب عمي وعمتي وما قصروا وياي بشي .. انتي شفتي عمتي شياها يوم عرفت ... هم مالهم ذنب اخليهم يحسون بتأنيب الضمير انا اللي اخترت
روضه: بس
حمده:لا مب بس .. عمي دخلني وياه الحجرة وقالي اذا عشاني تاخذين خالد انا اقولج لا تاخذينه اذا ماتبينه .. انا ما انجبرت اتزوجه عشان انجبر اتم وياه ... وفي النهاية هو ولد عمي
روضه: يعني خلاص
حمده: ايوه خلاص برايه
روضه: بس انا الحين ما احبه
حمده: لا تحبينه لانه ريلي ... بس غصب عنج تحبينه لانه ولد عمج ... ولاني انا اذا ما حبيته كزوج .. بتم احبه كولد عم
عوشه: خلاص روضه .. هدي انتي الحين ... الله يخليج عن المشاكل .. امي ما تتحمل
روضه: خالد ما يستاهل اصلا اني اخلي عمتي تتعب عشانه ...
عوشه: بييه يوم وبيندم
روضه: اتمنى هالشي وبدعي انه يصير ليل ونهار
حمده: لا يا روضه ... انا ما اباج تشلين في قلبج على حد .. ترى الحقد مثل السرطان اذا بدا صغير في القلب ينتشر بسرعه
روضه: بعد تبيني اتمنى له السعاده
حمده: روضه ابغي هالشي عشانج ... بسألج سؤال كم كثر بنعيش في الدنيا ... مية سنة الف سنة ... ويمكن انموت باجر ... لا تموتين وانتي تكرهين حد او شاله في خاطرج على حد ... لا تكونين جيه امنا ما كانت جيه... ولازم نكون مثلها
روضه: (بعد لحظة صمت) زين بس الليلة باتي هنيه عندي
حمده: (تبتسم) اوكي
عوشه: عيل تصبحن على خير انا بروح ارقد باجر ورانا دوام من الصبح
حمده: وانا بروح اييب لي بجاما وبرد
روضه: لبسي من بجايمج الجدام في حجرتج
حمده: هاهاهاها اوكي ماعليه

راحت عوشه حجرتها ودخلت حمده حجرتها الجديمة عشان اتبدل واتطرش مسج حق خالد اتقوله انها بتبات الليلة في بيت ابوه عند اختها .... وردت حجرة روضه اللي كانت مغيرة ثيابها ومنخشه في الفراش
**
في الثلاث ايام اللي بعد ذيج الليلة كان الجو متوتر في البيت .. والكل مب مصدق ان خالد خلاص قرر يزوج وانه اتفق ويا ابوه يروح يخطب له بالخميس اللي بيي ... كانت روضه ما تخلي حمده تروح ترقد بيتها ... وحمده مخلتنها على راحتها لانها تدري ان روضه مقهورة من خالد ومن الوضع .. ولو كانت روضه مكانها ما كانت قعدت بيت عمها او أي مكان فيه خالد ... خالد كان مضيج من الوضع .. مب متعود على لبيت بدون حمده ... حتى يوم كانت زعلانه المهم انها كانت في بيته وفي حجرتها ... بس ما كان له ويه انه يجبرها ترد البيت ... يكفي انها احترمت رغبته وساعدته في اللي يباه ... في الاول انصدم من قرار ابوه انه ما يدخل حرمته اليديده بيته ... بس في الاخير رضخ لرغبة ابوه يدري انه اذا ما وافق ابوه ما بيروح يخطب له ... كان يتوله على حمده اللي كانت تعامله بكل برود هذا اذا كلمته .. بس اذا كان عمها وعمتها قاعدين كانت تتعامل معاه طبيعي بكل احترام ... مما زاد من احترامها عنده .. بسوم صدق انصدمت ... ما علقت كعادتها بس قالت حق عوشه انه تحس ان الله ما بيوفق خالد في هالعرس .. لانه بيظلم حمده ... اما فطوم فيوم خبروها ما تفاجئت لان حمده كانت مخبرتنها ... بس حلفت على ريلها ما يروح ويا اهلها يوم بيروحون بيت حميد بن بطي يخطبون ... ولان حميد ما يريد يزعل فطوم في اول شهور حملها قالها ان شاء الله ... ويوم رجع عبود بعد يومين من السالفة البيت وحس ان الجو فيه شي مسك عوشه عشان يتخبرها

عبود: شو السالفة .... ليش جيه الجو متكهرب
عوشه: كيف متكهرب ما فيه شي
عبود: علي انا ما فيه شي .. انتوا فيكم شي
عوشه: اوهووو اذا ما دريت اليوم بتدري باجر خلني اقولك
عبود: قولي
عوشه: خالد بياخذ حرمه ثانيه
عبود: شووووو ...ياللا عاد
عوشه: والله ما اجذب عليك صدق
عبود: لعبي غيرها منو بيخليه يعرس على حمده
عوشه: أي ابوي وانت وسعيد بتروحون اتخطبون له بالخميس الياي
عبود: عوشه .. قولي شو السالفه
عوشه: هيه صح .. وسعيد ودر نورة .. او بالاصح هيه اللي فصخت الخطوبه
عبود: قولي والله
عوشه: والله
عبود: ليش
عوشه: تواجعنا وياها في الجامعه .. وراحت تشتكي عند سعيد جنها تباه الا يضربنا .. ويوم ما سوا شي قالت ما تباه
عبود: عيل طز فيها ... بنات العرب وايد في غيرها الف .. لكن ماشي غيركن الف
عوشه: فديتك والله ...
عبود: زين وسالفة خالد صدق
عوشه: هيه والله صدق
عبود: شو اخوج اتخبل ولا شو ... وابوي كيف ايوافقه يسوي جيه بحمده
عوشه: حمده مرخصتنه
عبود: حتى لو ... هي لو كان عمي الله يرحمه موجود ما رخصته وردت بيت ابوها
عوشه: انا بعد احس بهالشي .. بس هي ما بينت شي حق حد
عبود: والله انه ما يستاهلها ... ونه كبير وعاقل هذا .. امحق عقل
عوشه: هي امس وقبل امس تبات هنيه عند روضه
عبود: حليلها بنت عمي ... ياللا الله يعينها ... الا ما قلتي منو يبا ياخذ
عوشه: يبغي بنت حميد بن بطي
عبود: لا والله .. امحق أي وحده فيهن
عوشه: يزوي .. انت شدراك فيهن
عبود: الحين يودر بنت عمي القمر .. الحشيم عشان ياخذ يزوي صدق اخوج ما عنده سالفه ... وقدرت تقص عليه
عوشه: شدراك انت فيها ..
عبود: لا ماشي .. انا بطلع الحين
عوشه: لا تعال تعال .. طلعت الذيل طلع الراس ... شو السالفة قول
عبود: يا عمتي روحي مب متفيج الحين ... انا طالع الحين برد في الليل ... بس تعالي ما قلتيلي شو سوت روضه يوم درت بالسالفه
عوشه: اوهووووو لا تخبر ... اعتفست على حمده وقالت لها نروح دبي بيت خالي .. بس حمده ما طاعت
عبود: وسكتت
عوشه: هيه عندنا جامعه ... وحمده قدرت لها
عبود: زين ... اوكي ياللا انا طالع

سعيد ومبارك تفاجئوا من الخاطر من الحركة اللي بيسويها خالد في حمده .. يزوج على بنت عمه .. بنت عمهم يتيمة ... منو بيوزه اصلا ... ما خذوا الموضوع على محمل الجد .. شو يعرس ... شو ناقص عليه حمده ما قصرت وياه ... حتى انهم انشغلوا بسالفة خالد عن سالفة سعيد ونورة اللي ما عاد حد يطريها في البيت ... وهم رايحين المقهى في السيارة ...

مبارك: الحين صدق سالفة خالد يريد يعرس
سعيد: هيه
مبارك: شو ياه اخوك يعرس على بنت عمه ... قلنا يغازل برايه بعد يعرس مصخها
سعيد: لا والله ... هي ما تستاهل لا يعرس ولا يغازل عليها ... لكن شو بتقول بو طبيع ما يوز عن طبعه .. من ايام ليلوه الكويتيه تذكرها يوم كنا نروح لندن عنده
مبارك: هيه والله ... شو كانت حلوة
سعيد: انت متفيج الحين
مبارك: زين منو يبغي
سعيد: بنت حمدي بن بطي ... جيرانا اللي بيتهم مجابل الدوار
مبارك: هيه هيه عرفتهم .. بس شو عقه عليهم
سعيد: شرايك نتخبره
مبارك: متى بيخطبون له
سعيد: الاسبوع الياي ... بالخميس بتروح وياهم
مبارك: انت بتروح
سعيد: ما ادري ... ما اريد اجرح حمده ... وما اقدر ما اروح ويا اخوي يوم يباني وياه
مبارك: تفازعه يظلم بنت عمك بدل ما ترده
سعيد: خالد ريال ما ينرد عن اللي يباه
مبارك: يعني بتروح
سعيد: هيه بروح
مبارك: خلاص اذا انت بتروح انا بروح وياكم بعد
سعيد: تعال عمي درى
مبارك: لا بعده ... يمكن ابوك يقوله باجر او يوم الجمعه يوم يشوفه

وصلوا سعيد ومبارك المقهى ونزلوا عند باقي الشلة وبعد ما سلموا وخذوا العلوم قعدوا وياهم

محمد : عيل وين ولد عمتكم
مبارك: خله يزول شتبغي فيه
سلطان: هيه والله خلنا قاعدين على راحتنا فينا على حشرته .. السموحه منكم يعني .. بس القعده وياه ممله وترفع الضغط
مبارك: عادي احساس مشترك
سعيد: عيب عليكم ونكم رياييل ترمسون شرات الحريم على الريال وهو محد
مبارك: عند منوه نرمس عليه .. ما اشوف غير حمود وسلطان وعلوه ... بيروحون يقولون حق حد
محمد: حشا ... مالي خص فيكم انت واهلك تتفاهمون
علي : اسمحولي انا ما بقول اني اعرفه حتى
سلطان: اما انا رايح بعد ما نطلع من هنيه ميلس بطي المهيري دومه عنده هوه وبقوله
مبارك: تشوف النيسان اللي واقف برع
سلطان : هيه
مبارك: قول كلمه عشان ادعمك به .. واخليهم ايلقطونك من الشارع بملقط
سلطان: عندك بيزات الديه
مبارك: هيه طال عمرك موجودات
سلطان: علي ابنوبهن مسيد عن روحي .. لا تنازلون عنهن وص الوالد الله يخبيك
مبارك: هاهاهاها ماعليه ببنيلك واحد غير عن اللي بيبنونه بفلوس الديه
***

في بيت بو خالد كانن البنات قاعدات فوق في حجرة فطوم اللي كانت يايه بيت ابوها ذاك اليوم ... وخبرنها عن سالفة نورة وشو صار في الجامعه يوم شافنها لين ما فصخوا الخطوبة وبعدها سالفة خالد

حمده: انتن شو تبن بنت الناس
عوشه: هي اللي يت صوبنا .. ما تحس على دمها شو نسويبها تدري انا ما نريد نوقف وياها
روضه: وربيعتها قليلة ادب ولسانها طويل ووقحه
فطوم: لو سكتن عنهن ورحتن
عوشه: نحن ردينا عن عمارنا بس .. هي اللي راحت اتشكى
روضه: واللي قاهرني ان سعيد ما يكلمني ولا يطالع في ويهي حتى .. جني انا السبب الحين ولا قلتلها لا تبينه
حمده: لا والله اذا مب انتي السبب منو بيكون
روضه: بس ما هقيتها منه صراحه .. يعاملني جيه عشان نوروه
حمده: البنيه كانت خطيبته
فطوم: فكه منها ... اذا من اولها جيه شو بيستوي بعدين
بسوم: حتى انتي يا فطوم
فطوم: اذا ما قدرت تتفاهم وياكم كيف بتعيشون بعدين وياها
روضه: قلنالكم من اول انا وعوشه ما نباها محد طاع شورنا
بسوم: وليش ما قلتن حق امايا
روضه: خلاص توبه اذا خطبوله وحده ما تعيبنا بنقول ما بنتريا لين ما تستوي هالمشاكل
عوشه: الا ما قلتيلنا فطوم اخبار البيبي
فطوم: هاهاهاها تو الناس
حمده: الله يتمم لج بخير
فطوم: امين
روضه: واخبار ريلج اخافه يطلع شرات ربيعه بعد سنة ونص يقولج بعرس
فطوم: لا يا روضه حميد بالمرة غير عن خالد
حمده: روضه ردينا على هالموضوع
روضه: نحن ما خلصنا منه عشان انرد له زين
فطوم: حميد باقتناع وبكيفه ماخذني ... هو اللي قال حق اهله يخطبوني له .. يعني يبغيني وبعدين هوه مب ياهل
روضه: يعني خالد اللي ياهل
عوشه: كيف هو اللي قال لاهله انه يبغيج
فطوم: تذكرن يوم كنا في لندن ايام ما كان يدرس هناك
عوشه: هيه
فطوم: هوه اللي خلص لنا جوازاتنا في المطار .. خاله يشتغل في السفارة هناك ... وبعدين كنا في المطار يوم كان ياي ايسلم على خالد وشافنا
عوشه: ياحافظ .. ومن ذاك اليوم وهو يباج
فطوم: هيه
روضه: شدراج
فطوم: هو اللي قالي
بسوم+ روضه+عوشه: اوووووووووووووووووووووووه
فطوم: شفتن
حمده: الله يسعدج يا فطوم ولا يكون حظج مثل حظي
فطوم: انتي اللي خليتيه جيه
حمده: لازم نمشي مع التيار .. لا نخرب كل شي
فطوم: ولين متى بتمين في بيتنا هنيه لين ما يلاحظ ابوي و امي اتلاحظ
حمده: هيه والله صدقج لالزم ارد بيتي
روضه: لا ما ترديله
حمده: شو انا بعدني حرمته شو ما ارد له
روضه: شو يعني قعدي هنيه
حمده: وبيتي اخليه له ولها اذا بغى ايبها هنيه
روضه: ما يقدر ايبها عمي ما بيخليه
حمده: وانا ما ارتاح الا في بيتي وحجرتي
روضه: (وهي عافسة ويها) كيفج
عوشه: خليها على راحتها ...
روضه: ماعليه زين على كيفها

يت الخدامه الحجرة تقول حق عوشه ان حمد تحت وان امها مطرشه عليهم ينزلن وراحت عنهن

روضه: اوهووو هذا كل يوم والثاني يا
عوشه: اووووف جني الحين متبرضه له
فطوم: نزلي نزلي عنده (وعوشه اتطالع بسوم وروضه عشان وحده منهن تنزل وياها)
بسوم: لا تحلمين حتى ... امي تحت نزلي
عوشه: اخاف امي تدخل الحجرة
فطوم: شعندكن
عوشه: ما اريد انزل بروحي .. تعالي نزلي وياي
فطوم: اوكي بنزل وياج بس ليش ما ينزلن هن وياج
روضه: مبارك قالنا لا نقعد وياه
حمده: اوه اوه ومن متى انتي تسمعين كلام حد
روضه: يوم ايي كلامهم على هواي اسمعه
حمده: انا بعد بنزل وياج ... وبروح بعدين البيت
روضه: برايكن .. اقول عوشه اتصلي في مبارك وسعيد خليهم اييون
عوشه: تحلمين فيني انا بعد على الحشرة
فطوم: ليش
بسوم: (تبتسم) خطيبها السابق وخطيبها الحالي وهي... شو تتوقعين
روضه: اقول يوم ضايج خاطرج منه هالكثر وعايفتنه ... قولي حق عمي ما تبينه
عوشه: عشان امي تنجلط صدق هالمرة .. اول خالد وبعدين سعيد وفي الاخير انا
روضه: صدقيني الحين هيه متهيأة للصدمه وانتي شكلج ما بتكملين وياه
عوشه: لا يا حبيبتي خلينا جيه احسن
روضه: محد قالج مبارك شو كان فيه
عوشه: ردينا على هالسالفة .. خلاص خلصنا من هالموضوع
روضه: بس انا اقولج ان عمتي مهيأة للموضوع الحين ... وبتزعل شوي وفي الاخير بترضى في الامر الواقع ... واما سالفة مبارك فهاي سالفة ثانيه مب مهم الحين .. ولا ترديله احسن
فطوم: روضه يوزي عن البنت خليها في حالها لا تجلبين لها رايها
حمده: شو انتي ناويه تخلينها تعنس حذالج
روضه: عادي بنعنس في هالحالة بكيفنا ... ومب قاصر علينا شي هنيه
عوشه: ارتاحي ما اريد اعنس
روضه: عيل اتحملي غلاسة اللي قاعد تحت وثقالة دمه
عوشه: بتحمل
روضه: ما رمتي اتحملين مبارك اللي من نفس الطينه وفاهم علينا .. بتحملين حمد اللي شكله ياي من المريخ
عوشه: هيه
روضه: بنشوف .. ياللا نزلي لا يقولج كنتي اتكلمين مبارك
عوشه: سخيفه
روضه: وخلي تيلفونج هنيه لا يفتشه بعد مرة
حمده: لا والله فتش تيلفونج
عوشه: هيه
فطوم: وسكتيله ..
عوشه: شو تبيني اسوي
حمده: صدق كل قوي فيه اللي اقوى منه
فطوم: انتي اللي دومج اتفتشين تيلفون مبارك وسعيد ... حد يفتش تيلفونج
عوشه: على الاقل كنت احترم شعورهم ما افتش جدامهم
حمده: هاهاهاها اللعن وادهى
عوشه: بتنزلن ولا ... وانتي روضه بتشوفين بعدين الحين مب متفيجه
روضه: نزلي نزلي لا يكنسل ويزتج
حمده: ياللا ننزل
روضه: وانتي روحي استسمحي من ريلج لانج قعدتي عندي يومين لا يزعل عليج ويردج بيت عمج
حمده: بلاج اليوم لسانج يقطر سم
روضه: بلاكن انتن حريم اليوم باردات وما فيكن دم
حمده: هاهاهاها بنشوفج يا رويض يوم بتعرسين
روضه: بمشيه على العجين ما يلخبطوش طال عمرج
فطوم: زين زين

نزلن حمده وفطوم وعوشه وتمت روضه ويا بسوم يسولفن عن الدراسة والجامعه ... بعد ما سلمن راحت حمده بيت ريلها ... وفطوم قعدت ويا امها يسولفن عن اهلها في دبي عمتها ام عبدالله وحرمة عبدالله وخوات حميد ... وكانت فطوم اطمنها وانهم يعاملونها احسن معاملة وخلاص اتأقلمت وياهم ومرتاحه ويا حميد ... وشوي دخلت فطوم ويا امها .. وتم حمد وعوشه في الصالة كانوا يسولفون هم سوالف عادية .. بس يوم دخلت فطوم ويا امها الحجرة ... سئلها حمد

حمد: صدق خالد يريد يعرس على حمده
عوشه: مسرع ما تنتشر الاخبار .. انت شدراك
حمد: بعد عرفت
عوشه: هيه
حمد: ليش لانها مافيهاعيال
عوشه: شو ما فيها عيال .. توهم معرسين سنة ونص
حمد: ليش عيل بيعرس عليها .. حمده حلوة ومزيونه وما فيها شي
عوشه: والله اذا العرس بس على تقصير الحرمة على ريلها ... في هالحالة جان ما عرس عليها ... بس ربك رياييل عيونهم ما يترسها غير التراب ...
حمد: لا والله
عوشه: هيه ...
حمد: اذا خالد عرس الحين .. في امل اني باجر اعرس عليج .. لان اخوج بيكون مبتدع هالبدعة في العايلة
عوشه: لا .. جان تبا من الحين .. شرايك .. بس يكون في معلومك جان حمده بتقعد له .. فأنا غير حمده دقيقه وحده مب مجابلة ويهك
حمد: هاهاهاها ليش تغارين
عوشه: لاه ... كرامتي ما تسمح ولا كبريائي ... برد بيت ابوي ابرك
حمد: اهاااااا
عوشه: ليش لا
***

بعد ما ردت حمده بيتها لقت خالد نازل من فوق متلبس بيطلع بس يوم شافها وقف مكانه وهي ما كلمته ولا حتى اتطالعت في ويهه .. كانت بتروح فوق حجرتها تسبح وتغير ثيابها ...

خالد: حمده
حمده: (بكل برود) نعم فيه شي
خالد: لين متى يعني
حمده: مب سويت لك اللي تبغيه .. في شي ثاني بعد
خالد: لا انا مب هذا اللي اريده
حمده: شو تريد
خالد: اريدج تردين حمده ... شو هالطريقة اللي تعامليني فيها
حمده: لا والله ... للاسف يا خالد حمده اللي كانت ما قدرت تخليك تحبها .. وحبيت وحده ثانيه في وجودها .. وانا قلت لك يا خالد الا انك تستغفلني .. اسمح لي هذا شي ما اقدر اغفره
خالد: انا ما استغفلتج ... انا قلت لج اياها
حمده: متى قلت .. يوم كنت محتاج لي عشان اساعدك توصل للي تباه .. وانا وصلتك لها .. خلاص انسى حمده اللي كانت
خالد: حمده .. مب معناة اني اريد اعرس اني ما اريدج ... انتي حرمتي ... وانا اريدج ما تتخيلين هالبيت شكثر كئيب بدونج
حمده: لا تخاف انا رديت بيتي ... بس مب عشانك .. عشان عمي وعمتي ما يلاحظون شي .. ويعلقون موضوعك
خالد: يعني
حمده: ولا شي .... انا حرمتك ... كلامك على عيني وراسي .. مستحيل اعصيك ... بس شي واحد ما تقدر تتحكم فيه مشاعري واحاسيسي انا مب لعبة في يدك خالد ... متى ما مليت منها غيرتها ... انا انسانه ومشاعري هاي ما تقدر تتحكم فيها ... واظن ان البرود اللي اصابها كان نتيجة لفعايلك

ما رد عليها خالد وطلع من البيت .. اما حمده فكانت ترتجف من فوق لتحت ... دخلت حجرتها لقت خالد عافسنها فوق تحت ... طلعت ثياب عشان تدخل تسبح ... ودخلت روز وراها عشان اترتب العفسة وهي اتحرطم على خالد في الثلاث ايام اللي فاتت
***

في الليل كانت روضه تزن على راس عوشه عشان تفج خطبتها من حمد ... كانت تدري ان عوشه ما تريد حمد بس كان خوفها من امها .. لانها قبل وافقت على مبارك وبعدين قالت ما تباه والحين حمد ... او بالاصح كانت خايفة على امها ... بس روضه ما خلتها

روضه: عوشه ... هذا عرس انتي ساعة على بعضها ما تقدرين تتحملينه ... وين عمرج كله اربع وعشرين ساعة في اليوم
عوشه: روضه .. ما اقدر ياويلي من امي
روضه: عمتي بتعصب في الاول .. وبعدين بتتقبل الامر الواقع
عوشه: تدرين شو يعني افج خطبتين ورا بعض .. والاول ولد عمي والثاني ولد عمتي
روضه: شو يعني .. الناس من متى همنا كلامهم .. ما عليج منهم اهم ما عليج راحتج
عوشه: شو اقول حق ابوي
روضه: قوليله .. ابوي انا ما اريد اتزوج حمد
عوشه: لا والله تبينه انتي يمرخني بالعصا اللي عنده
روضه: لا عمي ما يستخدم هالاسلوب .. ولا هذا طبعه
عوشه: روضه ما اقدر
روضه: تقدرين .. قوليله ابوي انا ما حبيت حمد ولا استلطفه .. ولا بقدر اعيش وياه
عوشه: لا والله .. شو هالكلام الماصخ
روضه: قولي حق عبود انج ما تبين حمد .. بيسوي حفله وبيقنع عمي وعمتي .. هو بحاله ما يبلعه
عوشه: عشان هو اللي يتهزأ
روضه: زين انتي فجي السالفة ... وخلينا نشوف شو بيصير
عوشه: اممم ما ادري
روضه: شو ما تدرين .. باجر قولي حق عمي ... لا تكونين جبانه
عوشه: زين زين خلاص فكيني من الحشرة
روضه: يا ويلج ان ما قلتي حق عمي .. والله انا اقوله
عوشه: زين بقوله ... بس امي
روضه: عمي بيتفاهم وياها
عوشه: ياللا شورج وهداية الله
روضه: ايوه جيه اباج

وباتن ذيج الليلة على اساس ان عوشه بالباجر تقول حق عمها انها ما تريد حمد ولد عمتها ...
***

رد خالد ذيج الليلة متاخر بس ما حصل حمده في الصالة .. فخاف انها تكون ردت بيت ابوه لانه كان متعود يحصلها اترياه ... بس يوم دخل الحجرة حصلها تبدل ثيابها بترقد ...

خالد: اقدر ادخل ارقد هنيه ولا ؟؟؟
حمده: لا تقدر .. هاي حجرتك مثل ما هي حجرتي ... قلتلك بتم حرمتك ..
خالد: زين بعد مشكورة
حمده: اذا بتدخل تسبح .. فأنا مجهزة لك اللي تريده في الحمام .. وبرقد الحين تصبح على خير
خالد: مشكورة وانتي من اهل الخير

بينه وبين نفسه ارتاح خالد لوجودها في الحجرة ... ما كان يريد يرقد بروحه .. خاصة انه تعود وجودها في حياته ... الغريبه ان بوجودها هو اللي يحس بالامان ... وكان يدري ان اسلوبها هذا ما بيطول ... حمده مهما صار من داخل اطيب وانقى من انها تزعل عليه وهو يدري هالشي ... لازم بترضى عليه .. ولازم هو يراضيها بس كيف ممكن يراضيها عمره ما فكر في هالشي .. اذا زعلت عليه حمده كيف يراضيها ... لانها عمرها ما زعلت عليه من عرفها لين اليوم

بعد ما خلصت روضه من عوشه واقنعتها انها تقول حق ابوها انها ما تريد حمد .. طلعت من حجرة عوشه عشان اتروح حجرتها .. بس كان في خاطرها عصير برتقال .. فنزلت المطبخ تسويلها عصير قبل لا ترقد ... وهي في المطبخ دخل البيت من الباب اللي صوب المطبخ سعيد ... دخل المطبخ بدون ما يسلم عليها او حتى يطالع في ويها ... وكانت تدري انه زعلان عليها عشان سالفة نورة ... وهي ما كان هاين عليها انهم يزاعلون مرة ثانيه ... وفي الحقيقة سعيد ما كان له ويه يكلمها بعد الموقف اللي صار ذاك اليوم والكلام اللي عقه عليها ... كان مستحي منها مب زعلان ... بس هي اللي فسرتها على اساس انه زعلان .. فبدت الكلام وياه

روضه: الناس تسلم يوم تدخل .. ولا مب ادميه جدامك
سعيد: السلام عليكم
روضه: (وهي مغيضه) وعليكم السلام ... زين وبعدين اريد افهم يعني عاجبنك الوضع جيه .. منو اللي لازم يزعل
سعيد: من قال اني زعلان ..
روضه: شوف نفسك ... كيف تعاملني وتكلمني من طرف خشمك ... ياخي اسفة جان الا عشان سالفة نورة.. انا ما قلتلها من اول اشكال روحي فصخي الخطوبه ... وجان تباني اعتذر لها واقولها ترجع لك اوكي ولا يهمك ((ومسكت روضه تيلفونه اللي كان حاطنه على الطاولة عشان تتصل فيها)) بتصل بها الحين وبعتذر وادري ان رقمها مخزن في تيلفونك
سعيد: (مسك ايدها وشل تيلفونه وهو يبتسم) روضه بنت محمد تتصل تعتذر من حد ... ومن منوه من نورة
روضه: اذا هذا يرضيك
سعيد: ومن قال انه يرضيني انج تتنازلين عن كبريائج ولو لحظه وحده عشان ترضيني ... انا يعجبني فيج غرورج .. وكبريائج .. وما ارضى انج تكسرين هالكبرياء اليوم عشان نورة او غيرها ... خليها تزول .. ولا يهمج بنت عمي ... كم روضه نحن عندنا
روضه: (وهي تبتسم) وحده بس .. انا
سعيد: خلاص .. وما عاش من هو يكسرج او يذلج دامني حي ... حتى لو كان انا
روضه: (وهي مستحيه ومستانسه) مشكور يا ولد عمي ... خلاص يعني مب زعلان
سعيد: انتي مب زعلانه ؟
روضه: لا
سعيد: ولا انا ... ياللا روحي رقدي
روضه: لا والله وعصيري عشان تشربه انت
سعيد: هاهاهاها خلاص نصه انا ونصه انتي .. دومنا ما نرضى الا على عصير البرتقال
روضه: امممم في موقف غير هذا ما كنت تنازلت عنه بسهوله .. بس بما انه عربون الصلح ... خلاص وافقت

وصبت روضه العصير في كوبين ... وعطته كوب وراحت فوق ترقد .... اما سعيد فكانت الارض مب شالتنه من الوناسة ... روضه كانت مستعده تتنازل عن كرامتها وتتصل في نورة عشان ترضيه ... يعني اكيد هي تهتم له وايد ولا ما كانت سوت هالشي ...
***

في اليوم اللي بعده الصبح راح بو خالد عند بو منصور المكتب عشان ايخبره بخبر خالد وانه ناوي يخطب له بالخميس .. كان يدري ان بو منصور بيعصب بس متأكد ان اخوه بيروح وياه لو انه كان يتمنى انه ما يطيع ايروح وياه يكفي انه هو خذل بنت اخوه وما قدر يناصرها عشان خاطر خالد ... كان يريد بو منصور يحتشر يروح يشل حمده من بيت خالد .. يسوي أي شي يخلي خالد يغير رايه لو انه يعرف ولده زين

بومنصور: وكيف انت يا بو خالد ترضى تسوي جيه في بنت اخوك اليتيمه .. ليش ان مالها حد في الدنيا غيرنا واختارت قربنا نسويبها جيه
بو خالد: يا سلطان انا ما بغيت هالشي .. بس حتى هيه واقفه وياه ... ومب مانعتنه ..شو بيدي اسوي هو ولدي وهي بنتي
بومنصور: لو بنتك ما رضيت تنذل جيه ...
بوخالد: الله يسامحك يا سلطان ... والله انها في غلاوة بناتي .. وما قصرت وياها والله الشاهد .. بس اذا هي راضيه
بومنصور: مب مخاونك يا بو خالد اسمح لي .. يا خوي محمد اخونا مب راضي علينا في قبره .. ونحن نعذب بنته جيه
بوخالد: لا يا بو منصور ... لا تظلمني ما بيدي شي .. هي موافقة وهو يريد ... تعال وتخبرها .. وانت تدري ان روضه نظر عيوني ما اروم اصبر عنها حتى ام خالد ما قصرت وياهن وتعاملهن شرات بناتها
بومنصور: واللي بيسويه خالد
بوخالد: هذا شي مب بيدي .. هو ريال تعال انت امنعه .. وهي واقفه وياه .. بيقول حرمتي موافقة انتوا شعليكم
بومنصور: ولو مب مخاونك .. روح بروحك
بوخالد: على راحتك يا سلطان ... ما اقدر اجبرك
بومنصور: بس اليوم تعال اتغدى عندي
بوخالد: تدري يا سلطان عبدالله وسعيد طول الاسبوع محد في دواماتهم ما يكونون موجودين الا الخميس والجمعه ... وانا اتغدى وياهم .. تعال انت تغدى عندنا
بو منصور: لا يا بو خالد .. ما اقدر اخلي ام منصور بروحها
بوخالد: (يبتسم) هاتها وياك
بو منصور: ومحمد وين بيتغدا .. جان بروك عندكم دومه هذا في البيت ما يطلع
بوخالد: بمر عليه مكتبه الحين وبقوله ايي يتغدا في البيت عندنا
بو منصور: خلاص عيل ... تم
بوخالد: خلاص بشوفك اليوم ان شاء الله
بو منصور: ان شاء الله .. تعال ليش ما تقول حق مريوم وبو حمد وعيالهم اييون يتغدون عندك
بوخالد: لا يا سلطان .. تدريبني ما اتحمل اقعد ويا بو حمد
بومنصور: ليش يا مبارك ... خلاص السالفة جدمت
بوخالد: صدقني يا سلطان هب البيزات اللي هاماتني ... حشا والحشا عن مية يمين ... لكن بعده طعم الخيانه وانا اخوك
بومنصور: خلك كريم وسامح
بوخالد: انا مسامح يا سلطان .. وبيوز ولده بنتي ... لكن ما اقدر انسى انه خان ثقتي فيه وخذ مشروع السيارات وسواه بروحه
بومنصور: انت رخصته يا مبارك
بو خالد: انا ما رخصته عشان ايروح ايسويه من وراي .. انا قلت له خلص الاوراق لين ما اتفيج انا واشتغل وياه ... بس هو اللي همته البيزات اكثر من النسب والدم اللي بينا
بومنصور: والحين بتقعد وياه وايد في عرس بنتك ... ويوم بييون عيالهم
بوخالد: لو مب خاطر مريم يا بومنصور ما يوزت ولده بنتي ... بس تدري ما هانت علي اردها .. بعد ما رديتها في سالفة فطوم
بومنصور: ما بتعزمهم
بوخالد: خلنا جيه اسلم يا سلطان .. ولا تعيد في سالفة جديمة .. انا سامحته عشان خاطر مريم ... ولا شال في خاطري عليه .. بس ما ابغي التدغ مرتين
بومنصور: لا يو خالد ... بوحمد مستحيل ايعدها في حقك ... ولو كان يدري ان هالمشروع بيزعلك ما كان اشتغل فيه
بوخالد: انا ادري ... بس جيه اسلم ... ما اريد اعذب مريم ... وما اريد اشتغل وياه
بومنصور: لا تشتغل وياه .. بس بعد عشان مريوم اقعد وروح ورد ميلس بو حمد
بو خالد: ما عليه خلك من هالسالفة الحين ...
بومنصور: شرايك انعزمهم المزرعة كلهم ... عشان خاطر عوشه يا بوخالد ... حمد خطيبها .. وما تهون علي تعرف انك وابو ريلها بينكم جفوة
بوخالد: ما تيوز يا سلطان اللي في راسك اتسويه من يوم يومك
بو منصور: (يبتسم) وين هذا اول .. بناتك لينن هالراس وخلنه يطيع شورهن
بوخالد: بناتي وام منصور بعد .. ما يلين راسك الا الحريم
بو منصور: هاهاهاهاها وانت
بوخالد: من قال .. متى تبعت شورهن
بومنصور: جان انهن بيستانسن بنتبع شورهن ... هذا اليوم اللي نعيش له .. فرحة عيالنا ووناستهم يا مبارك
***

رد بو خالد البيت وقال لام خالد ان سلطان وعياله بيتغدون عندهم وامر على عوشه اتكلم سعيد عشان ايرد ويا ولد عمه يتغدون هنيه لا يروحون بيت عمه وما يحصلون حد .. وجيه اجلت عوشه كلامها ويا ابوها عن السالفة اللي اتفقت هيه وروضه عليها لين في الليل ... كان بالها مشغول بهالسالفة .. وما كانت ترد على مبارك يوم كان يتحرش فيها ... ويوم شاف انها ما ترد وما لها مزاج سكت عنها ... اما محمد فكان يسولف ويا عبود وبسوم ... وهالمرة روضه تاخذ و تعطي ويا سعيد ومبارك

عبود: اقول محمد شرايك نروح لنا يومين البحرين ... صراحه لي مزاج سفر
بو منصور: لا بحرين ولا غيره ... كم شهر وبنسافر كلنا ان شاء الله .. اقعد واركد انت وولد عمك
محمد: انت لا تطري البحرين عند امي وابوي حساسيه من المكان
ام منصور: لا حساسية ولا غيره انت بعدك على الطير ياللي
محمد: لا من قال .. انا ساكت وما قلت شي هذا عبود اللي يبا يروح
مبارك: اقول لا تفتحون هالسالفة الحين الله يخليكم .. يوم بتروحون بيتكم سوا اللي تبونه
بو خالد: وليش هذا مب بيتهم مسود الويه انت
مبارك: هاهاها لا عمي بس ما فينا على حرب هنيه
حمده: ماعليه عبود ما يقصد البحرين بس .. يقصد السعودية .. قطر مصر لبنان أي مكان
عبود: هيه والله يا بنت عمي انتي اللي فاهمتني فيهم
سعيد: اقول شرايك من الاربعاء الياي نروح كلنا دبي ... عندنا شقة القبيسي هناك .. نقعد لين يوم الجمعه ونرد
خالد: شو تروح الاربعاء وترد بالجمعه .. يوم الخميس بنروح بيت العرب
بو منصور: وانت بعدك على هالسالفة
حمده: عمي السالفة منتهيه خلاص .. لا تفتحها مرة ثانيه
بومنصور: وانتي ما عندج مانع ...
حمده: لا برايه ...
بومنصور: تراني مب رايح وياهم ... اللي يريد يروح يروح
خالد: اهون عليك عمي .. لا خطبت لي المرة الاولى ولا المرة الثانيه (كان خالد يتكلم عادي بس كان كلامه سجاجين تقطع في قلب حمده ويقهر روضه اللي نشت من على الطاولة وكرسيها يسوي صوت على رخام الارضيه)
بوخالد: وين ما كملتي غداج
روضه: (وهي عافسه ويها) شبعت انسدت نفسي .. عن اذنكم

طلعت روضه من غرفة الطعام ولحقتها عوشه وبسوم وفطوم اللي ريلها مخلنها هاليومين في العين .. وفي الاخير لحقتهم حمده عشان يرمسون على راحتهم

حمده: بلاج انتي جيه .. مب قلنا خلاص
روضه: ياربي منكن خلاص شبعت ما اريد اكل مب بالغصب
عوشه: زين جيه بيعرف عمي انج ما تبين خالد يعرس
روضه: والله رايي مب مهم مب انا اللي حرمته .. هكيه حرمته عادي عندها يرمس جيه ولا كأنها موجوده .. حتى ما احترم وجودها
حمده: شوتبيني اسوي يعني .. اصيح ولا اتشكى
فطوم: خلاص زين الحين بيطلعون من المطعم بييون هنيه .. الله يخليكم ما فينا على الفضايح عمي وعمتي هنيه
روضه: زين زين خلاص ... مالي خص اصلا بالسالفة

بعد ما خلصوا الرياييل غدا طلعوا الصالة يشربون جاهي ... وهم يسولفون ويضحكون وياهم ام خالد وام منصور ... وبعد ما قعدوا نشت عوشه تصب لهم الجاهي

مبارك: أي عوشه فيج شي مريضه
عوشه: بسم الله علي ليش ان شاء الله
مبارك: اليوم ساكته على غير عوايدج
عوشه: كبرت وعقلت .. وباجر بعرس لين متى بنتم انتناقر
مبارك: لا والله ... افاااااااا
عبود: عوشه اختي انتي صاحيه شو ياج
سعيد: هب خطوبه هاي اللي غيرتج مرة وحده
ام منصور: والله هالبنت احتارت فيكم ... وما عرفت شو تبون .. اذا ردت عليكم نقدتوها واذا سكتت ما عيبكم شتبون انتوا
مبارك: نباها عوشه الطبيعيه ... ما يصير اتغير مرة وحده .. صحتها تتعب بعدين
بو منصور: بسم الله عليها ... انت اسكت عنها ومالك خص فيها
روضه: مبارك ممكن تخلي البنت في حالها ... مالها مزاج ولا بارض حق حد فيكم اوكي
عبود: اشتغل المحامي الاول عن عوشه
ام خالد: فطوم متى بتروحين دبي متى بييج ريلج
فطوم: ليش امايا مليتي مني
ام خالد: حشا يا بنتي حد يمل من ظناه
فطوم: عيل
ام خالد: اتخبر ريلج متى بيي
فطوم: ريلي بيي باجر
خالد: وليش ما قعد وياج هنيه عنده ويك اند
فطوم: ما يريد يغث على خواتي او على حد .. رد احسله تبغي الصدق عشان اخذ راحتي
بو منصور: وانتي هناك مب ماخذه راحتج
فطوم: لا عمي ... بس اقعد واسهر ويا خواتي ... وهالسوالف
بومنصور: الله يوفقج يا بنتي
فطوم: عقبال مبارك ومحمد ان شاء الله
مبارك: بعد مية سنة ان شاء الله
ام منصور: شعنه مية سنه .. منو هاي اللي تباك بعد مية سنه
مبارك: اسولف اسولف امايا خذيها بروح رياضيه
ام منصور: انت ما بتيوز عن هالطبع ... الله يعين بنت الناس اللي بتاخذك أنا ما بروح اخطب لك من الحين اقولك دور غيري
مبارك: شو يعني اروح ااجر ام اتخطب لي اذا انتي ما بتروحين
ام منصور: اتفشل في الناس من جداك
مبارك: لا شدراج يمكن اتغير مثل عوشه بعد ما اخطب
ام خالد: لا يا ام منصور... مبارك ريال ما بيفشلج .. الا جان فشيلتي انا بعيالي ماشي مثلها
سعيد: منو المقصود انا الله يسامحج
خالد: وانا الله يسامحج
ام خالد: الله يسامح الجميع ...
محمد: بلاكم انتوا تشحتون
سعيد: شعليك ما فشلت حد للحين
مبارك: ولا انا ما فشلت .... ناس اللي قالوا ما يبوني حليلني شاب مزيون جامعي عريض المنكبين اعمل بوظيفة مرموقه .. حنطي البشرة ... عيوني قتاله .. وخشمي سيف مسلول
فطوم: حووه بلاك مقدم اعلان زواج (كلهم ضحكوا على مبارك حتى عوشه لو انها اول عصبت عليه)
***

قعدوا وبعد صلاة المغرب راح بو منصور وحرمته ويا محمد البيت وطلع مبارك ويا سعيد ميلس هزاع ولد خالة مبارك ... عشان بعدين يطلعون عند الشباب ... الساعه تسع اتصل حمد في سعيد يقوله بييهم المقهى .. وتم مبارك يتحرطم وكان بيرد ميلس هزاع بس سعيد حلف عليه ايتم وياه ... ويوم نزلوا سلموا على الشباب وقعدوا

سعيد: ترى حمد بيي بعد شوي
سلطان: اوهوووووو انا قايم السموحه منكم ... (مبارك كان يتبسم ابتسامه صفرا)
سعيد: وين يا ريال
سلطان: ياخي اسمح لي انا ما احب اقعد وياه
علي: انا بعد بروح وياك صبر شوي
محمد: بلاكم انتوا .. قعدوا عيب الريال نسيب سعيد
مبارك: بعده ما صار
سعيد: (وهو يقول لمبارك) فال الله ولا فالك
سلطان: ياخي نسيبك ما ينطاق كل كلامه انا وانا .. وبعدين يرمس في بنات الناس ... هكوه علوه يرمس بنات ما طرى وحده فيهن ... نحن بعد عندنا خوات والستر زين
علي : انا ما اريد اقعد بروح بتي سلطان
سلطان: هيه بيي وياك .. اسمحلي سعيد .. جان تبى بنيك لين بوظبي.. لكن مب قاعدين ويا حمد

وراح علي ويا سلطان وتم محمد ويا مبارك وسعيد .. كان منحرج من سعيد وايد .. وسعيد ومبارك كانوا مفتشلين صدق من تصرفات ولد عمتهم .. يعني شو كانوا يقدرون يقولوله او يسولوه ... هو ريال كبير واكبر من سعيد بعد .. من عمر مبارك ... حاول محمد يفتح موضوع حديث عشان يلطف الجو

محمد: انت تعرفهم سلطان وعلي صح يغازلون ويتحرشون .. بس بعد ما يفظحون بنات الناس
سعيد: انا اعرفهم ما يحتاي تخبرني عنهم
مبارك: اقدر انا بعد اروح
سعيد: اقعد واستريح مثل ما يصير لك يصير لي
مبارك: لا انت نسيبك بعد ملزوم به
محمد: مبارك اقعد يا ريال ... برايه الريال خلوه على هواه
مبارك: مب جيه السالفة صدقه سلطان ما ينطاق
محمد: صدق هو من اهلكم بس ليش جيه غير عنكم
مبارك: هم كبروا بروحهم ونحن كبرنا بروحنا ... ما نعرف طباع بعض
سعيد: نحن كنا اغلب وقتنا بيت عمي سلطان لانه كله شباب ... هم يوم كنا يهال كانوا ايوون ويانا بس من كبروا شوي قطعوا

وهنيه رن تيلفون سعيد كان حمد متصل يتعذر منهم انه ما يقدر ايي لانه ارتبط بموعد مع ريال ويوم خبر محمد ومبارك احتشر لان الشباب راحوا

مبارك: بعد رضينا بالهم والهم ما رضى فينا ... شو هالمواعيد اللي عنده
سعيد: احسن يت منه ... مب هذا اللي تباه
مبارك: اقولك قم قم خلنا نطلع من هنيه حتى هالمقهى عفته ... دوروا غيره
محمد: بلاك جيه عصبت .. جنك الا كنت اترياه
مبارك: شو يتحرانا ... نشتغل عنده وللا ميتين على القعده وياه .. يواعد ولا ايي
محمد: لا حول محد عرفلك انت شو تبى
مبارك: ابغي التعن البيت الحين
سعيد: اقول تم يني ما سكنك هاللحظة
مبارك: لا
محمد: خلاص روح وياه سعيد ... انا بروح ميلس هزاع شوي .. اكيد بحصل سلطان وعلي هناك ... من زمان ما سلمت على هزاع وربعه
سعيد: خلاص برايك ... نحن بنرد لكم في الليل اذا حصلنا وقت
محمد: برايكم ..مع السلامه

وطلع محمد من المقهى .. وبعده طلع سعيد ومبارك ... اللي كان بعده شايط ومعصب ويتحرطم طول الوقت

سعيد: بلاك الحين ابغي اعرف
مبارك: ما ادري كيف ابوي يبانا نقعد وياه في الويك اند في المزرعة
سعيد: عيال عمتنا وعمتنا ليش ما نقعد وياهم
مبارك: اقولك شي ... عوشه ما تباه خلاص قولها تفج هالخطبة قول حق عمي .. ما تبغيه
سعيد: (وهو بعد بدا يعصب) لا والله كيفك انت تباه ما تباه
مبارك: هذا ريال يتعاشر انت الثاني .. عوشه ما بتتحمل هالذل كله
سعيد: أي ذل
مبارك: شو اتحراه ما بيغازل عليها
سعيد: وليش انت محتشر .. يغازل برايه انت بتدخل النار ولا هوه
مبارك: شو برايه .. واختك اتلعوز وياه
سعيد: يوم قبضنا خالد يغازل ما احتشرت ولا حمده ما كانت بنت عمك
مبارك: لا خالد غير .. على الاقل خالد يحترم حمده صدق
سعيد: وحمد ما بيحترم عوشه
مبارك: لا هذا شكله ما يحترم الا عمره ... لو احترم بنات الناس اللي عرفهن اول
سعيد: لو كانن محترمات ما كلمنه في التيلفون هن اللي يابنه حق عمارهن
مبارك: اقولك شي .. قول حق عمي لا ايوزها اياه ولا انا بقوله
سعيد: اوكي انت قوله هكوه الدرب جدامك
مبارك: شو اتحراني ما بقوله .. بنت عمي كيفي انا اولى فيها ... وبعدين لا تنسى هي اللي قالت ما تباني .. يعني ما يوزونها لين ما اعرس انا
سعيد: لا والله
مبارك: هيه .. اتم محيره حقي ولا تاخذ هالهرم
سعيد: انت صاحي انت تعرف شو تقول ولا شو سالفتك
مبارك: شوف سعيد... هذا الحمد يوم اموت انا خلوها تاخذه .. لكن والله دامني حي ما خذته
سعيد: انت بديت تهذي
مبارك: اوكي .. خلنا نوصل صوب عمي وبتشوف
سعيد: انت تريد تذبح امي
مبارك: انتوا اللي تريدون اتبهدلون عوشه ... عشان اتغطون على اللي سويتوه ... انت ودرت خطيبتك والثاني بياخذ على حرمته ... وانتي عوشه اتحملي عشان اللي سويناه نحن
سعيد: مبارك تراك قمت تغلط
مبارك: خلاص انت مالك خص .. انا بتفاهم ويا عمي
سعيد: عمتي مريم شو اللي بيفهمها وبيراضيها
مبارك: عمتي تدري ان انا احق واحد في هالدنيا كلها ببنت عمي وبعدين ولدها
سعيد: على شو ناوي
مبارك: مثل ما طلعتني عوشه من قبل من خطوبه ما ابغيها .. بطلعها الحين من خطوبه انا احس انها ما تبغيها
سعيد: مبارك لا تخرب على البنت
مبارك: والله يا سعيد ان عوشه ما تبى حمد ... وباجر هي بتي تشكرني على اللي سويته عشانها
سعيد: تدري لو حيرتها محد بياخذها ... ولا بتنخطب مرة ثانية

سكت مبارك ما رد على سعيد ... ونزلوا الاثنين البيت وقبل لا يدخلون قال سعيد لمبارك يصبر يخليه اول يكلم عوشه بعد ما دقوا الجرس دخلوا داخل الصالة حصلوا روضه قاعده بروحها في الصالة ... بعد ما سلموا عليها

سعيد: وين عوشه
روضه: عند عمي داخل حجرته
سعيد: امي وين
روضه: راحت عرس ويا عمتي ام منصور
مبارك: ليش عوشه عند عمي داخل
روضه: هاه
سعيد: شو هاه .. ليش هيه عند ابوي
روضه: (بعد تردد) اممم الصراحه
مبارك: الصراحه شو قولي خلصينا
روضه: بلاك جيه محمق .. شوي شوي علي
سعيد: مبارك .. اذا معصب من شي لا تطلع حرتك في روضه عندك عمك داخل ادخل كلمه (خزه مبارك وسكت عنه)
روضه: (وهي تبتسم) لا سعيد عادي افاا عليك
مبارك: زين ممكن تقولين شو السالفة وعن هالبرود الزايد
روضه: اووف منك ... تبغيه في سالفة خاصه
مبارك: اوووووف
سعيد: روضه صدق شو عندها عوشه
روضه: الصراحه بتقول حق عمي انها ما تريد تاخذ حمد

تفاجأوا اثنيناتهم وتموا يطالعون بعض ... وهنيه ضحك مبارك بصوت عالي .. وسعيد تم يتسم .. وهنيه روضه اللي اتفاجئت من تصرفهم ... وفي خاطرها تقول بلاهم هذيلا ينوا اقولهم عوشه ما تبى خطيبها الظاهر ما استوعبوا السالفة زين او يتحروني امزح

روضه: بلاكم
سعيد: لا ماشي سلامتج .. بس ليش عوشه ما تبى حمد
مبارك: لانه غلس ودمه ثقيل ومب من طينتها
روضه: صح ... وغيار .. وشكاك وما عنده سالفة
مبارك (يقول حق سعيد) شفت .. قلت لك عوشه ما بتتحمله
سعيد: ومن متى عوشه عند ابوي ...
روضه: من ربع ساعه
مبارك: ول ... ما يحتاي الموضوع وقت هالكثر
روضه: منو قال ... يوم فصخنا خطوبتها منك احتاج ساعتين زين
مبارك: انا غير
روضه: ليش ما اشوف فيك ايد ولا ريل زياده
مبارك: ويوم فصختي خطوبتج احتجتي عشر دقايق
روضه: انا غير
مبارك: (يقلدها) ليش ما فيج ايد ولا ريل زياده
روضه: اول شي ما كان ولد عمتي .. ثاني شي كان عمي يباها من الله .. ثالث شي ناس من دبي انقطعنا عنهم بعد هالسالفة ... اما عمتي ما نروم نقطعها ... ولا تنسى عمتي نورة شو بتسوي يوم بتدري ان عوشه ما تبى حمد
سعيد: خلاص بس انت وياها .. بلاكم اتيبون سوالف جديمة (اضيج يوم طروا سالفة خطوبة روضه)
روضه: قوله هوه
مبارك: وليش ما دخلتي وياها .. ترى انتي اللي يمشي كلامج ... واذا ادلعتي شوي على عمي خلاص بيسوي اللي تبينه
روضه: لان هاي السوالف ما فيها دلع هذا اولا .. وثانيا لان الموضوع يخص عوشه ما اقدر ادخل فيه عشان ما يقولون اني انا اللي اثرت عليها
مبارك: ول عليج دومه ردج زاهب ... تعالي تعالي شو مأثرة عليها هاي ... بروحج اعترفتي .. اكيد لج يد في السالفة
روضه: هاه
سعيد: مبارك .. يوز عن روضه مالك خص فيها
مبارك: اقول عينتك محامي عنها .. احيدها زعلانه عليك من اسبوع .. بعدها مامرت سنة وشي عشان اتراضون
روضه: ودك انت .. اصلا مب زعلانين اوكي .. ولا بنزعل على شي تافه
مبارك: الحين انه يودر خطيبته من تحت راسج يا ام الدواهي شي هين
روضه: اوووف سعيد قول حق مبارك.. لان عوشه عند عمي مستلمني انا
سعيد: مبارك وبعدين وياك ... اذا ما سكت عنها روح بيتكم
مبارك: طالع يروغني من بيت عمي عشان هالمفعوصه (كانت روضه تبتسم بتشفي )
روضه: هه .. لا تحاول تنافس روضه بنت محمد في شي .. مفهوم
مبارك: مفهوم طال عمرج .. اوامر ثانيه
روضه: ايوه اقعد وانت ساكت (هنيه ضحك مبارك)
سعيد: اقول روضه يعني صح وقفنا وياج .. بس عاد عيب الريال ضيف في بيتج .. هاتي دلة قهوه عصير شي
روضه: (وهي تنش بتقرب صوبهم دلة القهوة والسح) بس عشان خاطر سعيد زين
مبارك: زين

ودخلت روضه عنهم المطبخ عشان اتسويلهم عصير بس غيرت رايها وقررت تحط لهم ايسكريم ... على الاقل بتاخذ وقت اكثر لين ما تطلع عوشه من عند عمها .. صح كانت تتغايض ويا مبارك .. بس لان دمها يحترق وتريد تعرف شو يقول عمها حق عوشه .. كان كل خوفها عمها يقنع عوشه انها تغير رايها .. ما صدقت روضه بعد زن يومين ان عوشه تقتنع وتوافق تكلم ابوها ... ونفس الوقت كانوا مبارك وسعيد يتريون عوشه تطلع من حجرة ابوها عشان اتخبرهم شو قالها وشو صار ... وكان كل خوفهم ان بو خالد يقدر يقنع عوشه انها اتم مخطوبه لحمد .. كان مبارك بيروح يقول لعمه أي شي بس ما يباه ايوز عوشه لحمد ... مبارك يدري ان عوشه ما بتحمل حمد ... عوشه بالرغم من طولة لسانها الا انها حشيم ومؤدبة ... وما راح تغلط على حمد او تقدر ترد عن عمرها اذا قالها شي ...

يوم طلعت عوشه من حجرة ابوها كانوا مبارك وروضه وسعيد قاعدين ايتريونها وهم ياكلون الايسكريم ... وتموا ايطالعونها عشان اتكلم تقولهم شو سوت داخل ... بس هي تفاجأت بوجود مبارك وسعيد ... وتمت تطالع روضه

روضه: قولي شو صار (هنيه تمت عوشه اتطالع مبارك وسعيد فقالت لها روضه) يعرفون خبرتهم
سعيد: عوشه ... اذا ابوي ما طاع بدخل انا اكلمه وبقنعه وانتي تدرين ابوي ياخذ ويعطي يا يقتنع يا يقنع
عوشه: لا ابوي ما قال شي .. قالي على راحتي بس بيقول لامي وهذا اللي خايفة منه
روضه: ليش
عوشه: اخاف امي تتعب من تحت راسي
سعيد: ماعليج يا عوشه الله بيعوضج اللي احسن منه وانتي تستاهلين الاحسن والله
عوشه: (بدت عينها تدمع دون ما تحس) الله يستر
روضه: عوشه ليش تصيحين انتي كنتي تبينه ؟؟
عوشه: لا والله ما كنت ابغيه
سعيد: ليش عيل
عوشه: ما ادري سعيد ... احس من داخل بالفراغ واني ضايعه ما ادري شو اسوي او شو اريد .. بس الشي اللي متأكده منه ان اللي سويته اليوم هو الصح .. ما اريد حمد .. بس خايفه من المشاكل
سعيد: ما عليج .. انتي ختنا والزم ما علينا راحتج
مبارك: ( اللي كان ساكت طول الوقت من طلعت عوشه من حجرة ابوها لين ما دمعت عيونها) :عوشه لو رديت اخطبج بتزوجيني
كانت مشاعر مبارك في داخله غريبه بين احساس بالحمايه لعوشه بنت عمه في وقت ضعفها وانه يوقف وياها في وقت حاجتها له ... وبين انه عوشه بالنسبة له اخت مب اكثر ... كان في داخله يدري انه هالشي بيفرح الكل من عمه لابوه لامه ... وفي نفس الوقت هذا الحل الوحيد اللي بيطلع العايلة من أي اشكال ممكن تطيح فيه ... الكل يدري ان اذا مبارك يريد عوشه .. محد يقدر ياخذها ... وانه هو اولى من غيره فيها .. اوذا عرفت عمته انه كان يبغيها .. بتنسحب دون ما تزعل او يأثر هالموضوع على علاقة عمه بعمته ... بالنسبة له كان يحاول يحل الاشكال اللي راح يصير.. او يمكن اثر فيه الضعف اللي عوشه كانت فيه ... اول مرة يشوف عوشه ضعيفه او خايفه او ما تعرف شو تريد ...

الجملة اللي قالها والطلب الغريب اللي طلبه فاجأ الموجودين الكل كان يطالعه وهو فاج عيونه ومتفاجئ منه ومن اللي قاله حتى مبارك نفسه تفاجأ من اللي قاله .. وندم اشد الندم .. كان يحاول يتكلم يرقع يقول شي بس مب عارف ... اللي مصدوم صدق كان سعيد .. كيف مبارك يسمح لنفسه يكلم اخته بهالطريقة وفي وجوده ... اما عوشه فبينها وبين نفسها تقول هذا شو يقول وقته الحين يمزح هالمزح الثقيل ... لين متى بتحمل ياربي.. لين متى.. ومالقت نفسها الا قاعده على الكرسي وهي تصيح هالمرة من الخاطر وبصوت عالي .. نفس المرة اللي طافت يوم قالت لابوها انها ما تريد تاخذه .. ما كانت تدري ليش تصيح كان خاطرها ضايج ... مبارك ما عرف شو يسوي وهو يشوف عوشه تصيح جيه ... روضه نستهم وقعدت تهدي في عوشه ... وتحاول تسكتها لا يطلع عمها من الحجرة ويشوفها تصيح ... وسعيد لبس مبارك وهو يقول في خاطره هذا ين وبعدين بتفاهم وياه ... وقعد عدال عوشه من الجهه الثانيه .. كان قلبه يتقطع على اخته اللي دومها سوالف وضحك وهي تصيح صياح يكسر الخاطر ... اللي كان واقف وهو ساكت مبارك ... كان يطالعهم كلهم .. وفي خاطره يقول انا شو سويت .. انا شو قلت ... شو هالخبال .. ريال شكبري اتصرف تصرفات مراهقين ..

مبارك: عوشه .. بس خلاص سكتي ... لا تفضحينا الحين
روضه: ياخي انت دفش .. ودمك ثقيل وما تعرف تفرق بين وقت الجد والمزاح
مبارك: أي مزاح الله يهديج انا اتكلم صدق
سعيد: اشهد انك ينيت وتخبلت .. بس بعدين بنتفاهم (كانت عوشه تصيح ولابستنهم)
مبارك: بلاكم انتوا بنت عمي شو كفرت انا الحين يوم قلت ابغي اخذها
سعيد: وبنت عمك تكلمها جيه ولا تحشم ولا ما عندها اهل تكلمهم
مبارك: ونرد نسوي حساسيات بين الكبار ... انا اسألها هيه الحين ...
سعيد: مب جنه هذا موضوع انتهينا منه من زمان ليش اترد تفتحه .. ولا الحين حلت في عينك
مبارك: انت مب فاهم السالفة
روضه: أي سالفه مبارك ... انتوا كلكم نفس الشي .. شو تحرون عوشه ما تحس .. ولا مب ادمية جدامكم بكيفك هوه مرة تباها ومرة لا
مبارك: بلاج انتي خذتيني بشراع وميداف
عوشه: (وهي تصيح) بس كلكم .. بس ذبحتوني شو تريدون وبعدين وياكم كلكم
مبارك: تعالي عوشه بكلمج في الميلس او في المطعم شوي
سعيد: (وهو معصب) احلف بس انت
مبارك: شو عندك .. ولا نسيت اني ولد عمها ولا تخاف ما بسويبها شي ... بنت عمي اللي اييها جنه فيني
سعيد: ( وهو يوقف)مبارك اتعوذ من بليس وخلنا نطلع من البيت
مبارك: عوشه تعالي ورفجة عمي اتيين الميلس كلمتين .. وبعدين سوي اللي تبينه
عوشه: (وهي واقفه) اوكي
روضه: اييب لج كوب ماي
عوشه: لا ما يحتاي بيي الحين
سعيد: لا والله وشو انا جدامج انتي وياه لوح ما حس
عوشه: لا سعيد .. مبارك ولد عمي .. واريد اعرف شو يريد
مبارك: دقايق وبعدها بنطلع

راح مبارك ويا عوشه الميلس ... كانت تريد تعرف ليش مبارك قال جيه .. تدري انها هيه وياه مثل الجبريت والغاز ما يتقاربون .. ليش الحين قالها يبغي ياخذها واول مرة احتشر وما كان يريد .. بعد ما دخلوا المطعم

مبارك: عوشه انا كنت اتكلم جد
عوشه: شو تقول انت مبارك ... نحن نلعب ولا يهال ...
مبارك: انتي تدرين ان امج يمكن تتعب ... وعمتي بتحتشر عليكم
عوشه: بس العرس مب بالغصب
مبارك: عوشه خلينا نجرب هالمرة صدق
عوشه: شو تقول انت
مبارك: شو اقول يعني .. ولا هالكثر ما اتعاشر وما ادانيني
عوشه: عن الخبال .. كيف ما ادانيك انت ولد عمي
مبارك: وانا احق واحد فيج لاني ولد عمج
عوشه: ردينا على سوالف التخلف هاي
مبارك: انتي تدرين انه مب تخلف ... والسالفه ماشيه لين باجر
عوشه: مبارك انت ما تريدني ليش غيرت رايك
مبارك: شوفي يا عوشه ... انتي لين ما تخلصين جامعه سنة ونص وبعدها يحلها الف حلال
عوشه: ويعني
مبارك: هالسنة والنص بتغير فيها اشياء وايد .. على الاقل حاولي تتقبليني كزوج وانا بحاول اتقبلج كزوجه ... انتي تدرين ان ابوي وابوج يبوون هالشي .. ليش نفكر بأنانيه ... فكري بواقعية عوشه انا اكثر واحد يعرفج
عوشه: (وهي تبتسم) وتقدر تتحملني
مبارك: بقدر ليش لا .. انا بحاول وانتي حاولي واذا فشلنا في هالسنة والنص .. بعدها يحلها الف حلال
عوشه: تدري شو يعني نرد ننخطب وبعدين نفج الخطبة مرة ثانيه
مبارك: انا متفائل خير
عوشه: ليش
مبارك: ما ادري .. بس احساسي يقولي انه هذا التصرف الصح في مثل هالوقت
عوشه: عشان اهلي ما يتزاعلون
مبارك: سبب من الاسباب

كانت عوشه تكلم مبارك وكأنها تكلم سعيد او عبود .. والحين فهمت انه يحاول ينقذ الموقف ... يساعد في تجنب أي ازمه ممكن تبدا ... تدري ان مبارك يعتمد عليه ... كانت حايرة بين انها تطاوعه وهالمرة على امل انهم يتفاهمون وتاخذه في النهاية .. واذا ما صار هالشي ... بيكونون على الاقل حاولوا عشان ابوها وعمها ... كان مبارك يترياها ترد تتكلم تقول أي شي ... وهي ساكته تتأمل في ويه مبارك ... اول مرة تشوف فيه شي غير عن كل مرة ... مهما يكون هو ولد عمها وما يهون عليه اتلعوز او اتييها نص كلمة .. وهي تدري ان اذا فصخت الخطوبة الثانية .. الناس بتاكلها برمستهم .. اما اذا قالوا ان ولد عمها رد يباها الحين .. هو اللي بتيه كل الرمسة... كان ودها تقوله لا يا مبارك انا بتحمل نتيجة قراري هذا ... بس شي من الانانية اللي في الطبيعة البشرية .. رفضت هالرد .. واجبرتها تطيعه اذا هو يريد يساعدها ليش ترفض .. هو ولد عمها وقال من شوي ان أي شي اييها اييه هو بعد

مبارك: ها عوشه ... سكتي
عوشه: (تبتسم) ما بقولك لا
مبارك: يعني هيه (غصبن عنها اتحول لون خدودها احمر ) اوووه بنت عمي تحمر
عوشه: عن السخافه ... اوكي
مبارك: وردينا طبيعي
عوشه: اقولك شي اطلع برع ...
مبارك: (وهو يبتسم) مب مشكله بس بدخل قبل عند عمي

طلع مبارك قبلها من الميلس وهي لحقته ... كان سعيد يخزه بنص عين ... بس ما سواله سالفة وراح حجرة عمه يدق عليه الباب ... ودخل .. حصل عمه يقرا في واحد من ملفاته على المكتب ماله ... يوم شافه تفاجأ بس ابتسم له وقاله يدخل يقعد وبند الملف اللي قدامه

ما سعيدد وروضه يوم طلعت عوشه من الميلس تموا ايطالعونها ايتريونها تتكلم بس ما قالت شي تمت ساكته وقعدت مجابلنهم

روضه: هاه شو قالج داخل
عوشه: ماشي عاد الكلام اللي قاله هنيه
سعيد: وبعدين
عوشه: خلاص انا اريد مبارك
سعيد: (وهو يحاول يمسك نفسه لا يعلى صوته) عوشه .. هذا عرس مب لعبه .. مرة قلتوا نريد ومرة لا
عوشه: وليش لعبه
سعيد: عوشه ... ما تبين حمد اوكي محد بيغصبج .. اصلا كنا يايين نقول لابوي ما ايوزج اياه .. بس اتردون تنخطبون لا
عوشه: ليش ماسك على مبارك شي
سعيد: شو هالكلام ... انتي تدرين انكم ما تنفعون لبعض
عوشه: ليش ما ننفع
سعيد: جربتوا مرة وما نفع
عوشه: المرة اللي طافت كانت لعبة وانت تدري
سعيد: وهالمرة
روضه: سعيد ... اذا عوشه قدرت تتحمل حمد كل المدة اللي فاتت .. صدقني انها تقدر تتحمل مبارك ... مبارك ما فيه شي وتعرفه زين
سعيد: بس
روضه: بس شو ... ولد عمها ابدى من غيره
سعيد: كيف تفكرن انتن
روضه: بمنطقية ... صدقني
سعيد: انتي كلمة توديج وكلمة اتييبج عوشه
روضه: سعيد حرام عليك
عوشه: الله يسامحك
سعيد: الله يستر .. الا ليش دخل عند ابوي
عوشه: ما ادري يوم يطلع اسئله
سعيد: وليش اترياه يطلع انا اللي بدخل عندهم اشوف شو السالفة

نش سعيد ودق باب حجرة ابوه ودخل على مبارك وابوه ... مبارك كان قاعد في الكرسي اللي مجابل مكتب عمه بعد ما سلم سعيد راح وقعد مجابل مبارك .. اللي ابتسم لسعيد لانه كان يدري انه من يطلعون بيستلمه ...

بوخالد: تدري يا سعيد مبارك شو يريد
سعيد: هيه ابوي قالي ونحن يايين هنيه
بوخالد: وانت شرايك
سعيد: والله يا بوي .. مبارك ولد عمنا .. ومحد بينقد علينا اذا جدمناه على أي حد غيره وهو اولى ببنت عمه هذا اللي اعرفه ... بس عاد في الاول والاخير الراي راي عوشه طويل العمر
بوخالد: كنتوا تدرون ان عوشه بتقولي اليوم انها ما تريد حمد
مبارك: لا عمي ما ندري
بوخالد: بس يا مبارك .. عوشه من قبل يوم بغيتها ما بغتك وقالت هالرمسة حق ابوك
مبارك: عمي الحين الوضع غير .. وانا ابغيك اتخبرها ... انا بنت عمي ابغيها .. ما بتبدي علي حد غير
بوخالد: يا مبارك .. عوشه لاهي سيارة ولا بكرة عشان ابدي حد عليك .. انت تدري ان هالشي اللي انا ابغيه .. بس لا تنسى انه هذا زواج وعشرة عمر ولازم اسألها
مبارك:: زين عمي انا ما قلت شي اسألها الحين وانا بترياك
بوخالد: (وهو يبتسم) لا مب الحين ... خلني اقول لامها اول وبعدين يا ولدي برد خبر على ابوك
مبارك: ابوي ما يدري اني ياي اقولك اني ابغي عوشه .. وبعدين انت بعد ابوي مب الا عمي
بوخالد: ماعليه .. انا بتخبرها وبرد عليك انت او ابوك خبر
مبارك: خلاص عمي .. بس ما تيوزها غيري
بوخالد: ان شاء الله يا مبارك
سعيد: ياللا قم خلنا نطلع ابوي مشغول الحين
مبارك (وهو يريد يأخر طلعته ويا سعيد) لا والله .. عمي الحين في البيت مب في المكتب .. ياللا عمي اطلع اقعد ويانا في الصالة ولا اقولك .. تعال نروح بيتنا
بوخالد: لا برايكم انتوا طلعوا بس لا تأخرون في الليل
سعيد: سمعت ياللا نطلع

بعد ما طلعوا من حجرة بوخالد .. لقوا روضه وعوشه قاعدات في الصالة يترين الاخبار من داخل ... اول ما شافتهم روضه سئلت

روضه: هاه شو صار داخل
مبارك: ماشي .. قعدنا نسولف
روضه: مبارك صدق عن هالحركات الحين شو قالكم عمي
سعيد: (وهو عاقد حياته) مبروك ... ياللا بنشوف اخرتها وياكم ... ممكن نطلع الحين مبارك
مبارك: ان شاء الله .. ياللا مع السلامه العروس (وغمز بعينه لعوشه اللي ابتسمت وانحرجت)
سعيد: مبارك ياللا
مبارك: حشا بسم الله بلاك ماكل يراوه اسلم على بنت عمي
سعيد: اووووف
روضه: ياللا زين بعد تتناسبون

نشت عوشه وراحت فوق .. وتمت روضه ويا مبارك وسعيد وقالت: زين جيه احرجتوا البنت
سعيد: انت أي يا اللوح ممكن نطلع من بيتنا اذا ما عندك مانع
مبارك: هاهاهاها اوكي اوكي .. اقول روضه سلمي على عوشه ياللا باي
روضه: هاهاهاهاهاها ان شاء الله يوصل من الحين بدينا

طلع سعيد ويا مبارك وراحت روضه فوق عند عوشه عشان يروحن بيت حمده يخبرنها هيه وفطوم وبسوم اللي كانن عندها اخر التطورات اللي صارت ... اما في سيارة سعيد اللي كان صدق معصب ويحترق من داخل على الحركة البايخة اللي سواها مبارك في البيت

مبارك: الحين اريد افهم انت بلاك جيه .. شو سالفتك بالضبط ما تريدني اخذ عوشه
سعيد: لا تدري اني ابغيك تاخذها بس مب جيه ... انت وياها بتخلونا مضحكة للعرب واللي يسوى واللي ما يسوى
مبارك: الحين شو سويت ... ليش اني ما اريدها تاخذ الهرم حمد
سعيد: ما كانت بتاخذه عوشه ما ينخاف عليها
مبارك: حليلك انت ... شدراك شو كان صار لو ما قلت حق عمي اني انا اباها
سعيد: وانا ادري انك ما تباها
مبارك: ليش عوشه فيها شي عشان ما اباها
سعيد: لا .. بس ليش الحين
مبارك: ما اريد عوشه اتلعوز .. او هذا يغازل عليها ويشوف غيرها
سعيد: جان جلعت عيونه لو سوابها شي
مبارك: كنت رديت اخوك عن اللي يبغي ايسويه في حمده ... ولا ما تعدها شرات اختك

هنيه سكت سعيد ما عرف شو يقول .. معقوله مبارك يخاف على عوشه هالكثر وما يريد حمد ياخذها عشان ما ايي يوم وتنظلم مثل حمده ولا حد يروم يرد عنها .. ليش ما ردوا عن حمده لانها راضيه ولا لأن خالد اخوهم
***

طبعا في بيت حمده صارت حفلة بعد ما عرفوا الخبر وان عوشه خلاص تريد مبارك وان مبارك يباها ... الكل استانس من الخاطر خاصة فطوم اللي كانت شاله هم عمها وعمتها اذا عوشه ما خذت واحد من عيال عمها خلاص ماشي امل في انهم يتناسبون لان بسوم ما تفكر بالعرس بالمرة واللي شاغلنها من الخاطر الجامعه والطب ... فطوم اللي في داخلها قلب بعده ينبض باسم منصور بالرغم من انها حاولت قد ما تقدر توؤد هالنبض .. وتدفنه داخلها ... بس لازال منصور يزورها في احلامها بالرغم من انها ما تقول لحد هالشي حتى حق حمده ... واحتراما لحميد اللي ما تقدر الا انها تحترمه وتحترم عواطفه ومشاعره وما تبين شوقها ولو لمرة وحده للماضي ... يكفي انها اكثر من مرة لخبطت وزقرته منصور مب حميد ... كانت ملامح ويهه تتجمد بس يرد طبيعي ويكلمها ... لو قدرت تحب حد بعد منصور فحميد يستحق هالحب ... الاكيد انه يستحقه بطريقة تعامله وياها وتحمله لها ...
اما بو خالد فكان يتريا ام خالد ترجع من العرس عشان يخبرها وهو مب عارف شو يقولها .. خايف عليها تتعب بس لازم يخبرها.. ولد عمها يباها وهي قبل الكل تدري انه ولد عمها مجدم عن الكل .. وهي ما تريد حمد خلاص ترد لمبارك احسن من غيره .. بعد ما ردت ام خالد من العرس ... كعادتها كانت تخبره العرب شو مسويه ومنو ياي ومنو ما حضر العرس .. وهو يتزهب عشان يخبرها بخبر عوشه

بوخالد: زين يا ام خالد ...
ام خالد: ياللا ان شاء الله عرس عوشه بيكون احسن عن اعراسهم
بوخالد: جيه خالد بيعرس قبل عوشه .. عوشه ما بتعرس الا يوم تخلص جامعه
ام خالد: عرس خالد مالي خص فيه .. جان يبونه يشلون عرس بنتهم بروحهم
بوخالد: افااا يا ام خالد ويهون عليج ولدج
ام خالد: انا مب هاينه علي هاليتيمة اللي بليتها بهالولد ... ليتني ما خطبتها له
بوخالد: اللي صار صار خلاص وهذا نصيبها
ام خالد: وين بيحصل شراتها .. لكن خله ينقرص من غيرها مصيره يرد لها
بوخالد: ام خالد
ام خالد: لبيه
بوخالد: (يبتسم) لبيتي حايه في بيت الله
ام خالد: امين ... شو بغيت
بوخالد: ترى يا ام خالد اليوم عوشه يتني تقول انها ما تبغي تاخذ حمد
ام خالد: شووو .. لا لا يا بو خالد لا تبطر البنت كل يوم والثاني قالت ما بغي هذا وابغي هذا ... عيب يا بو خالد شو بتقول الناس عنا
بوخالد: ام خالد هدي اعصابج الله يهديج وخليني اكمل كلامي
ام خالد: شو بعد يا بو خالد .. ترى عيالك ما ينفعون بنفع جان هذا مسيارهم كلهم .. والله يانهم ناوين يذبحوني قاصرة عمر
بوخالد: بسم الله عليج يا ام خالد
ام خالد: شو سويت في حياتي انا عشان جيه يستوي ببناتي .. روضه من بعد ولد عمتها ما طايعه تاخذ حد .. وهاي كل يومين انخطبت وقالت ما اريد
بوخالد: يا ام خالد روضه ما نقدر نغصبها خليها على راحتها
ام خالد: وعوشه بتاخذ حمد يعني بتاخذه مب كيفها
بو خالد: يا ام خالد ترى مبارك رد اليوم وقال يريد عوشه وانها بنت عمه وما يريد حد ياخذها غيره يا تاخذه يا تترياه يعرس بغيرها
ام خالد: لا ما اظن مبارك يقول هالرمسه
بوخالد: قالها
ام خالد: وسلطان يدريبه
بوخالد: لا ياني انا اول
ام خالد: واختك مريم
بوخالد: مبارك ابدى عن غيره
ام خالد: هيه مب قايله من قبل ما تباه
بوخالد: انا بخيرها يام خالد .. يا تكمل ويا حمد وبرد مبارك وبفهمه انها ما تباه .. او تاخذ مبارك وتفاهمي ويا مريم وقوليلها مبارك معزر يا ياخذها يا تترياه يعرس قبلها ... ومبارك اذا عاند بيخليها لين ما تكبر وتيبس وبيعرس بعدين هوه ريال ما يعيبه شي
ام خالد: انت تدري اني من قبل كنت ابغي مبارك
بوخالد: خلاص باجر بنشاور بنتج
***

من اول الصبح بعد ما نزلت عوشه خبرها ابوها عن مبارك ... وقالتله انها تبى مبارك مب لانه مخيرنها بينه وبين حمد .. لانها تباه من خاطرها ولو ما كانت تبى الاثنين تدريبه ما بيغصبها ... استانس ابوها من كلامها.. واخيرا بيستوي اللي ما قدر هوه واخوه يسوونه والعيال من خيارهم بياخذون بعض ... اما عبود فبالرغم من المآسي اللي عرفها في هالويك اند لكنه استانس بشكل فضيع يوم عرف ان عوشه ما تبى حمد ... كانت فرحته لانها ما تبى حمد اكبر من فرحته من انها بتاخذ مبارك... تاخذ أي حد عنده الا حمد امبونه ما يواطنه ... خالد ما علق كان في عالم بروحه يتريا هالاسبوع يخلص عشان ايخطبون له ...
بعد ما ردوا من صلاة الجمعه اتريوا حميد يوصل من دبي لانه بيتغدا عندهم اليوم ... وكانوا كلهم قاعدين كالعاده بس سعيد راح حجرته يكلم مبارك يقوله انه ابوه شاور عوشه وتم اللي في راسه .. بس اللي ناقص يخبرون عمته وحمد انهم خلاص ما يبونهم ... وفي بيت بو منصور .. بعد ما بند مبارك عن سعيد

بومنصور: شعنده ولد عمك
مبارك: ماشي يتريون حميد ايي من دبي بيتغدا عندهم
بومنصور: كلمه بعد الغدا اعزم حميد الاسبوع الياي يتغدا عندنا .. من خذ بنتنا ما عزمناه
مبارك: ابويه بقولك شي ...
بومنصور: خير شعندك
مبارك: اول ابتسم عشان اخبرك
بومنصور: مبارك اتكلم مثل الرياييل شو هالرمسه
محمد: هزبووه
مبارك: عادي بتحمل ... عشان اللي ابغيه
محمد: شو سيارة
مبارك: لا ما اريد سيارة عندي ثنتين
ام منصور: خله يقول شو يبى اسكت عنه
مبارك: انا قلت ابويا مب امايا
ام منصور: ماعليك يا الحمار شو مب مازرة عينك
مبارك: هاهاها لا امايا ترى انتي الاساس وانا محتاجج في هالسالفه بس امزح وياج
بومنصور: شعندك
مبارك: اباكم اتخطبولي
ام منصور: ومن هاي اللي بترضا فيك
مبارك: بنت عمي ...
محمد: احيد بسوم تبا تدرس طب وبعدين مب جنها صغيره عليك
مبارك: لا مب بسوم
محمد: منوه لا تقول روضه
مبارك: لا ما اروم لها قويه
بومنصور: سمعي رياييل هالايام ما يرومون على البنات
مبارك: لا روضه غير خلوها على صوب
بومنصور: منو عيل ما عندك بنات عم بعد
مبارك: اريد عوشه
ام منصور: انت ينيت ولا شو سالفتك اليوم .. البنت مخطوبه لولد عمتها
بومنصور: هيه ما تباك اصلا
مبارك: منو قال تباني .. وولد عمتها قالت ما تباه
ام منصور: كنت امس ويا نورة ما خبرتني شي
مبارك: لان السالفه امس في الليل استوت
بومنصور: شو من سنة ومذهب عندك تخطب على خطبة ولد عمتك .. ما تدري انه مب زين ومكروه
مبارك: شو شو انا ما خطبت على خطبة حد ... هي قالت ما تبى حمد .. قبل لا اروح واقول اني ابغيها
بومنصور: لمنوه قلت
مبارك: قلت حق عمي اني اريد عوشه
بومنصور: وشو قال مبارك
مبارك: قالي زين اذا هيه طاعت
بومنصور: هيه ما تباك
مبارك: لا انا اتخبرتها امس وقالت بتاخذني
ام منصور: وانت وياها مالكم كبير تتصرفون من شوركم وعلى هواكم ... ولا خلاص لا مذهب ولا سنة عندكم ويوم انك شاورت العروس وابوها شتبابنا تشاورنا .. ما يحتاي نروح نخطب لك خطبتها لنفسك من عندها
محمد: امايا شو هالكلام .. هوه اتخبرها بس جانها تباه .. ويزاته بعد انه ما يريد يسوي مشكله ثانيه لي ما بغته
ابومنصور: انا بكلم بوخالد بسمع السالفه منه احسن
***

على الغدا في بيت بو خالد بعد ما وصل حميد من دبي قاعدين يسولفون ويضحكون حتى عوشه اللي ردت طبيعي تاخذ وتعطي ويا حميد

عبود: هاه بوعبود شو دبي في الويك اند دون مراقبه
فطوم: ودك مراقبة .. اصلا ريلي ما يسوي شي عشان اراقبه
سعيد: أي ما تراقبينه .. الحين الحريم ما يثقون في رياييلهم وانتي مخلتنه يومين في دبي
فطوم: طالع نفسك قبل لا ترمس على ريلي طول الاسبوع في بوظبي وعندك شقة بروحك الله اعلم شو يصير فيها
سعيد: هاهاهاها مري علي كل يوم وبتشوفين
روضه: لا اصلا سعيد ريال ما تعجبه هالخرابيط .. شو اتحرين كل الرياييل واحد (كانت تنغز خالد)
خالد: هاهاهاها مشكورة بنت عمي وصلت
روضه: لا شكر على واجب... بس شو اللي وصل... ولا اللي على راسه يحسس عليها
حمده: روضه بس
روضه : هذا اللي فالحه فيه بس
عبود: (عشان يغير الموضوع يكلم حميد) احلى ما في الموضوع انك اذا يبت ولد بتسميه عبود
حميد: هاهاها لا مب مسمنه عبود ارتاح
عبود: افاااا ليش عاد
حميد: انا ابغيها بنوته حلوة تشبه امها
عوشه: يا ويل حالي انا على الرومانسية .. ونه تشبه فطوم حرام عليك ظلمتها
بسوم: قول خالتها بسمه بعد زين
روضه: ارجوك لا ... بتنجلط منها
حميد: هاهاهاها ليش
عبود: بتكون ثلاجه متنقله في البيت
بسوم: ودك انت وياها ... لو سماها علي بتطلع شاطره مثلي وذكية
عوشه: اقول يكفي دكتورة وحده في العايلة ... خليها تكون مثلي حبوبه وربشه وطيبوبه
عبود: يكفي ام لسان وحده في العايلة
روضه: عيل خلاص مثلي انا ... جمال ودلع واحلى بنت في العالم والكون بتنازل لها عن اللقب
خالد: لا الله يخليج يكفي مغروره وحده في العايلة
فطوم: انا اريدها مثل حمده .. عقل وجمال وشهاده واخلاق (الكل اطالع حمده اللي كانت ساكته طول الوقت
حمده: لا الله يخليج يكفي وحده حظها عاثر في العايله
ام خالد: بسم الله عليج يا بنتي عن العثرة ... مافيج شي يا غناتي شيخة الحريم
حمده: امزح عموه
بوخالد: بسكم انتوا .. الحرمة ما صار لها شهرين حامل لا توحونها
حميد: خلاص اذا ابنيه بنسميها حمده بنت حميد
حمده: مشكور يا حميد
حميد: بس نبغي السموه سيارة مرسيدس بودمعه
خالد: فالك طيب .. بس انت سمها حمده واللي تباه بيوصلك
عبود: ويلي انا على الاهتمام .. اذا كان ولد شو بتسميه (الكل كان قاعد يطالع حميد يرد على سؤال عبود )
حميد: منصور ... بنسميه منصور

من قال حميد الاسم بهت كل من كان قاعد على الطاوله ... وفطوم حست ان شعر جسمها كله وقف وبرعشه تسري في جسمها ... لا يا حميد لا تكون بهالقسوه على نفسك ولا علي ... ما بتحمل ادري انك تريد تفرحني بهالاسم بس انا ما اريد ما اريد يا حميد ... خل منصور واحد في حياتي وذكرى وحده لمنصور ...

فطوم: لا (هنيه الكل لف على فطوم يطالعها .. معقوله فطوم ما تبغي اتسمي ولدها منصوروبالاخص حميد اللي كان يريد يفرحها بهالشي)
سعيد: ليش لا
فطوم: بسمي اول ولد لي على عمي سعيد ...
بوخالد: اصيله يا بنتي وبو عبدالله يستاهل
حميد: خلاص اللي تبينه ... سعيد سعيد نقدر نقول لا
سعيد: افااا لو كان علي كنت يبت لكم السيارة سموه
حميد: خلاص نص الاسم عليك ونصه على ابوي
فطوم: اصلا عمي ما بيقصر ... لو يريد نجمه من نجوم السما بييبها له
عبود: يا واثق انت ....

كملوا سوالفهم عن حمال فطوم وعن عوشه ومبارك .... وسعيد وشغله في بوظبي كانوا مستانسين في هاللمه العائلية الحلوة ... وحده بس كانت وياهم تحاول تكون طبيعية ومن داخل الف سجين تنغرس في قلبها وتذبح في كبرياءها ... كانت تقاوم عشان تكون طبيعية ومن داخل براكين ثايرة ما تدري كيف تطفيها ... تشوف الكل مستانس ومرتاح في عالم غير العالم اللي هيه فيه ... كانت هاي حمده اللي تتمنى الزمن يوقف ولا يمر الاسبوع وايي اليوم اللي ريلها فيه بيخطب غيرها ...
***

بعد المغرب ... طلعت فطوم راحت دبي ويا ريلها ... وعبود كان طالع من العصر رايح الكلية ... وسعيد بعد ما طلعت فطوم ويا ريلها راح هوه بوظبي .. شلت ام خالد عباتها وراحت بيت مريم اتخبرها ان عوشه ما تريد حمد واتعذر لها ... وتقولها ان مبارك رد يبغي عوشه .. اول شي احتشرت مريم على ام خالد بس بعدين تقبلت الامر الواقع يوم درت بمبارك ... صح نقدت على اخوها سلطان وحرمته انهم ردوا يبون عوشه بعد ما خطبتها هيه بس قالت لها ان سلطان ما يدري ولا ام منصور ... ام حمد كانت طيبه وتحب خوانها .. بالرغم من الحشرة اللي سوتها الا انها رضت بالامر الواقع وفي النهاية مبارك هو اللي اولى وكان لازم قبل لا يخطبون عوشه يستأذنون منه .. بعد ما طلعت ام خالد من عندها خبرت حمد اللي احتشر صدق وسب فيهم واحد واحد من خواله لين عيال خواله وطلع من البيت راح دبي

حمد في الاساس ما كانت تهمه عوشه بقد ما كان يحس ان رجولته انجرحت يوم فضلت عليه عوشه مبارك... كيف كانت مستغفلتنه وتقوله انه مثل اخوها واتحبه مثل اخوانها والحين تبغي تاخذه .. حقد عليها وكرها من خاطره .. هوه تبدي عليه مبارك شو فيه زياده عنه ... من دبي قرر انه يسافر يغير جو لا يرتكب جريمة في مبارك ولا يسوي شي يندم عليه بعدين ...
***

كانت حمده ما تكلم خالد الا اذا هو بدا الكلام وما ترد علبه الا بكلمه او كلمتين وتعامله بكل برود ... وكان هو متحمل على اساس انها بترد طبيعي بعد ما تتعود على الوضع ...
يوم الخميس اليوم اللي قرروا يروحون ايخطبون له بنت حميد بن بطي ... حتى بو منصور اتلاقى وياهم بعد صلاة المغرب وراح وياهم ... واتفقوا على كل شي حتى على موعد العرس اللي يبونه اخر ثمانيه ... سعيد ومحمد ومبارك ويا خالد وبو خالد وبو منصور كانوا رايحين ... اما عبود فما طلعوه من الكلية كان محجوز ذاك الاسبوع .. في نص الاسبوع اللي بعده راحت ام خالد ويا ام منصور وام حمد يشوفون العروس ويشوفون طلبات اهلها ... كان شرط ام خالد الوحيد انها ما توديلها شبكه او تلبسها .. يعطونها بيزات وتاخذ اللي تباه ... حتى البنات ما راحن وياها والكل استسلم للامر الواقع وحاول يتقبل حقيقة انه خلاص خالد بيزوج على حمده ...
**
هدت الاوضاع بيت بو خالد ... وبعد ما خطبوا لخالد باسبوعين رد بو منصور يكلم بو خالد عشان عوشه ومبارك ... وطبعا لين ما تخلص عوشه من الجامعه ماشي كلام عن موضوع العرس ... وهالشي ريح الاثنين عوشه ومبارك ... ومع ذلك ام منصور ما قصرت وعشان ما يلعبون عليهم هالاثنين مرة ثانيه راحت وخذت الشبكه لعوشه .... وعزمت ياراتها ويارات ام خالد واهلهم عشان يسوون حفله لعوشه ... والكل يعرف ان مبارك ولد عمها يباها ...

يوم الاثنين في الجامعه ... اليوم اللي كانن يتلاقن فيه مع نورة في مبنى السته والستين لان محاظراتهن هناك ... وخلال الاسابيع الثلاثة اللي مرت كانن يجنبن يروحن كلهن المبنى قبل محاظراتهن عشان ما يشوفن بعض .. بس هاليوم وبالصدفه وصلن في نفس الوقت .. ويت عيون روضه في عيون نورة .. ولان عوشه انسانه ما تشل في خاطرها ولا عمرها زعلت من حد او حبت تزعل من حد راحت صوبها تسلم عليها ... مما اجبر روضه انها تلحقها

عوشه: هلا والله .. شحالج وينج ما تنشافين
نورة: (وعيونها على روضه) ليش وانا ادري ان شوفتي مب مرحب بها
عوشه: حشا من قال يا نورة .. شو ما صار نحن بنات خاله واهل ... ما توصل بينا للقطيعة
نورة: وبنت عمج
عوشه: بنت عمي طيبه وما تشل في خاطرها .. واللي صار الا كلام بنات
روضه: شحالج نورة
نورة: لا تخافين بعدني حيه ... بعد اللي سويتيه فيني
روضه: (روضه تحاول تكون طبيعية) انا شو سويت
نورة: اللي تبينه .. وخليتي سعيد يبعد
روضه: انتي اللي قلتي ما تبينه .. ولو كان صدق غالي عندج ما تخليتي عنه بهالسهوله
نورة: (بعد ما انتبهت على غلطتها) هيه صح انا اللي قلت ما باه .. عشان تشبعن به ... وعلى فكرة جانج وراه ما بيعرس بالمرة
عوشه: نورة تعوذي من بليس نحن يايين نسلم عليج
نورة: سوري تقبليها بروح رياضية كلام بنات
عوشه: بتين خطوبتي يوم الخميس
نورة: ما اظن امي ما بترخصني عشان ايي
عوشه: على كل اتمنى انج اتيين ....
روضه: ياللا عوشه تأخرنا على المحاظرة

دخلن عوشه وروضه محاظرتن وراحت نورة محاظرتها ... كانن يدرن ان نورة بعدها منقهرة من اللي صار عشان جيه خلنها لين ما تبرد السالفة او يمر عليها وقت وبعدين بترد عوشه تكلمها.. عشان تصفا النفوس لانها ما تتحمل تزعل لا بنت خالتها ولا أي انسانه منها...
***

يوم الخميس .. بعد المغرب بدن الحريم اين بيت بو خالد ... عشان حفلة خطوبة عوشه اللي راحت بالاربعاء ويا حمده بوظبي محل الطائر الاخضر عشان تاخذ فستان حق الحفلة لان الموضوع صار سرعة وما لحقت تسوي شي زين خصوصا انها تداوم في الجامعه ... والبنات لبسن بدل خفيفة .. وحمده لبست هيه وفطوم كنادير مغربية .. طول اليوم وخوانها يغايضونها كانت ترد عليهم عادي ... ولا كأنها مهتمه او حتى حاسة بالموضوع .. بس يوم شافت الحريم بدت تحس انها صدق اليوم خطوبتها ...
اما الشباب فكانوا كلهم يايين ميلس بيت بو خالد ... حميد وخالد وربع سعيد ومبارك اللي ما كانوا يدرون ان مبارك اليوم بيخطب خطيبة حمد ولد عمته ... وكل اللي يعرفونه انه بياخذ وحده من بنات عمه خوات سعيد وان عشاهم الليلة في ميلس بو خالد

علي: خلاص بعد العشا نطلع شوي الرمله صوب عزبة بو سلطان اللي في البدع
سلطان: تم من عيوني ... بس مب جنه حر
مبارك: افاااا ونك ابدوي وتقولي حر .. لا يكون بس مغشوش وتقص علينا
سلطان: انا مغشوش ويا هالويه
خالد: وليش العزبة .. كملوا السهرة هنيه
مبارك: الليلة انا مب طالع من بيت عمي الا اذا بتروغوني
سعيد: انت اصلا ويهك لوح حتى لو رغناك ما بتطلع من بيتنا
مبارك: والله يوم عمي بيروغني بظهر لكن انت تروغني ليش ان شاء الله ... افتح بيت وبعدين روغ خلق الله منه
سلطان : شعليه الريال الليله معرس
مبارك: لا وين تو الناس على معرس هاي
حميد: من تخطب بتبدا تحن على هلك ابغي اعرس يوزوني
مبارك: هاهاها عشان صدق عمي يروغني ... الا تعال وين عمي
خالد: ما تدري ابوي وين
مبارك: لا وين
خالد: في بيتكم عند ابوك
مبارك: اقول انا ابوي ليش ما قال بيي وياك
محمد: اقول محمد اخوك وين ... ما شفناه من زمان
مبارك: بيي بعدين قلتله العشا الليلة هنيه

دخل عبود وياه ربعه اللي في الكلية وشباب حارتهم اللي يعرفهم وبعد ما قعدوا بدوا يسولفون عن كل شي وبالاخص عن اللي يصير في الكلية وخاصه يوم ينحجزون شو يسوون ..خاصة اذا انحجز البركس كامل اللي هم فيه ... وبعد ما تعشوا بدوا يلعبون كل في جهه وبما ان حميد كان وياهم لعب ويا خالد دور شطرنج يستعيدون ذكريات لندن والايام الحلوة اللي كانت
***
في ميلس الحريم بعد العشا دخلت عوشه اللي كانت فاله شعرها وحاطه مكياج خفيف في البيت بروحها وراحت وسلمت على عمتها مريم وتعذرت منها وبعد مالبستها ام منصور الشبكة .. قعدت شوي وين الحريم سلمن عليها..
على الاساعة 11 ونص ما تم في البيت غير خواتها وامها وعمتها ام منصور ... ورد بو خالد وياه بو منصور من بيت بو منصور ... وقعدوا كلهم في الصالة يسولفون
برع في ميلس الرياييل مبارك محتشر على سعيد يبغي يدخل يسلم على خطيبته واهله داخل ... بعد ما طلعوا ربعهم وما تم غيرهم في الميلس

سعيد: شو تسلم عليها .. اللي يسمعك ايقول مب جنك كل يوم تشوفها ...
مبارك: بروح اسلم على عمتي وامي داخل
سعيد: مبارك حل عن سماي الحين مب متبرض لك
مبارك: هب منك مني انا اللي مسولك سالفة ... اقولك ادل الباب
عبود: أي وين وين رايح
مبارك: (وهو يخزه) شووو .. شو تقول انت
عبود: قالك اخوها العود ماشي يعني ماشي
حميد: تدري اني ما شفت حرمتي الا يوم العرس
مبارك: مشكلتك محد قالك تخليهم يقصون عليك
عبود: اقولك انت تتكلم صدق بتروح داخل عشان تشوف عوشه .. اللي يشوفك يقول مب شايفنها من سنة .. امس كانت مجابلتنك على العشا
مبارك: اليوم غير
خالد: كيف يعني غير فهمنا
مبارك: انا اريد اعرف شو اللي مخلني اشاوركم انتوا
محمد: هاهاها مبارك اللي يشوفك يقول عاشق ولهان
مبارك: انت متفيج ... انا رايح داخل
سعيد: حووه صبر بروح وياك (ولف يكلم الباقين) ما بتدخلون شوي
مبارك: وليش اتعزم عليهم خلهم عايبنهم الميلس
خالد: داخلين وراكم

راحوا سعيد ومبارك صوب الفيلا .. وسعيد يغيض بمبارك اللي محتشر عليهم ...

سعيد: شكلك تريد تسوي علينا معرس صدق
مبارك: لا والله ما انفع ..ولا ما انفع
سعيد: لا الدور مب ضابط عليك
مبارك: تدري انت ما عندك سالفة وانا اكثر منك لاني اكلمك .. ما تدري انت الحقيقة والواقع .. انا بليت نفسي واحاول اقنع نفسي اني سويت الصح
سعيد: يعني عوشه بليه ... ماعليه ان ما خبرتها عليك
مبارك: خوفتني

وتموا يضحكون لين ما وصلوا باب الفيلا .. وسمعوهم داخل يسولفون ويضحكون ... وبعد ما دق سعيد الجرس هود عشان يدخلون

عوشه: اهدي .. اقرب اقرب حبيبي محد هنيه
سعيد: وياي مبارك تغطن
روضه: لا لا صبر لا تدخل .. نحن مب متشيلات
عوشه: لا لا لا تدخلون صبر بروح فوق

هنيه بو خالد واللي قاعدين تموا يضحكون عليها ... اما روضه راحت يابت لهن شيل ويابت بالمرة حق عوشه عباه عشان اتغطى لان فستانها كان عاري شوي من فوق وشعرها بعده مفلول وكلهن كانن قاعدات بليا شيل ويا عمومتهن .. بعد ما ردت روضه واتشيلن ... دخل مبارك ويا سعيد وبعد ما سلم كل واحد فيهم على عمه وحرمة عمه ... بومنصور زقر مبارك يقعد عداله وعدال عوشه اللي ويها صار اشارة مرور ونها مستحية ...

سعيد: هذا حشرنا من ساعه يريد يدخل يسلم على خطيبته .. ما ادري منو خاطب كلمانس اشقر
روضه: هه ضحكتني احلى من كلمانس اشقربلميون مرة
مبارك: (وهو يخز عوشه ويريد يرفع لها الضغط) الا صدق وين خطيبتي ... ومنو هالغريبه الغاويه اللي قاعده وياكم بعباتها (وهنيه خزته عوشه بنظره ابتسم يوم عرف انه قهرها وكمل) سعيد روح ازقر على عوشه من فوق بسلم عليها (كانوا كلهم يضحكون على عوشه اللي شكلها بترد عليه رد من ردودها المعتاده )
عوشه: وليش ان شاء الله اخ مبارك ولا مب عاجبتنك ولا مب مازرة عينك عوشه ... امبوني احلى منك مب من امس واليوم
مبارك: هاهاهاها ثرها الاصباغ ما تغير شي الا في الويه
عوشه: باصباغ وبليا اصباغ حلوة وغصبن عنك زين (ضحكوا كلهم على عوشه ومبارك)
ام منصور: انت ما بتيوز عن هالبنية .. ما بتعقل بعدك انت
بومنصور: مبارك جان ياي تغايض البنيه رد الميلس
مبارك: بلاكم انتوا... انا شو قلت الحين... اول مرة اشوفها جيه
عوشه: سعيد هذا ليش يبته وياك .. نحن مب متفيجين لطولة لسانه الحين
سعيد: هاهاهاها ما كنت بييبه هو اللي متوله عليج
مبارك: الحين انا اللي طويل لسان ... والله عشنا وشفنا في هالدنيا
عوشه: عمي ... شوف مبارك.. قوله يسكت عني
بومنصور: لا خلاص .. الحين انتي اللي لازم تسكتينه عنج ...
عوشه: افااا يا عمي .. وانا اللي قلت اذا خذت هذا المخلوق بيكون عندي سند وظهر في البيت اللي بروحله جيه تسوي فيني اتخلى عني .. وابوي اللي ساعه يقولي ... يوم باخذ مبارك ما بعاشره بروحه وبيكون مطمن اني ما بنظلم عنده عشانك انت موجود لي عم وابو ثاني .. الحين اتخلى عني
مبارك: ول بالعه راديو ثرها
بومنصور: مبارك تشوف هذي عوشه
مبارك: (وهو يطالعها بنص عين) متاكد انها عوشه
بومنصور: مبارك
مبارك: لبيه
بومنصور: تشوفها ولا
مبارك: هيه اشوفها قاعده عدالي
بومنصور: مب في عيونك بتحطها بس الا في عيونك وفوق راسك بعد .. وان يت تتشكى منك يا تشوف شي ما شفته من سلطان بن منصور يا بروك
مبارك: ول ثرني منو بخذ .. لا يكون الليدي دي
عوشه: (وهي تدلع) لا طبعا ... عوشه بنت مبارك .. اللي احلى منها والطف منها وارق منها
مبارك: ماعليه بس في الاخيره ما اظن
عوشه: ما ادري منو اللي قالي اتزوجيني هاه تذكر ولا نسيت .. لو ما كنت جيه ما قلت
مبارك: هاهاها بتذليني عليها يعني
عوشه: يبالك صراحه

كان الكل ساكت يسمع عوشه ومبارك وغارق في افكاره ... كان سعيد وهو يبتسم يطالع روضه من تحت لتحت ... كانت قاعده عدال ابوه كالعادة ... أمه ما تقعد عدال ابوه كثر روضه .. وهي تبتسم او تضحك على عوشه ومبارك... كانت مستانسه عشان عوشه وايد ... هالمرة في تناسب بينهم في كل شي حتى في المزاح وخفة الدم ... اما حمده فكانت متمسكة بهاللحظة اللي اهلها كلهم قاعدين فيها وما تريد هالوقت يخلص لانها بترد بيتها ويا خالد اللي علاقتهم صايره هالفترة فاتره وبارده جدا ... اما فطوم كانت قاعده عدال عمتها ام منصور ... وغصبن عنها افكارها كانت تردها لمنصور... الله ما كتب لها تاخذه .. وتروح بيت عمها بس اليوم عوشه تنخطب رسمي لمبارك .. الشي اللي ما صار لها ويا منصور ... ومع ذلك كانت تحس انها اشتاقت لريلها اللي ما شافته طول اليوم لانهن انشغلن في الترتيب والتجهيز للحفلة..

فطوم: الا صدق حميد وينه
مبارك: اه متى بيي اليوم اللي تقول فيه هالمخلوقه وين مبارك
عوشه: احلم بهاليوم ... فرقاك عيد
سعيد: اقول انت ياي اتغايضها هنيه ... الحشرة اللي كنت مسونها برا كانت عشان هالكلمتين اللي في خاطرك
عوشه: لو يسوي جيه ما يروم يصبر عني
مبارك: اسمع هاي شو تقول .. مصدقه عمرها
فطوم: ا قول انا سئلتكم ر يلي وين
سعيد: في الميلس
مبارك: ولهتي عليه
فطوم: ليش حرام اشتاق له ريلي
مبارك: لا افاااا عليج .. بس ريلج من يلعب شطرنج ينسى الدنيا واللي فيها ... وقاعد يلعب ويا اخوج
سعيد: بيوون بعد شوي

وبعد شوي دخلوا خالد وحميد وعبود ومحمد وبعد ما سلموا قعد حميد عدال فطوم .. وخالد قعد مجابل ابوه وحرمته واختها ... وعبود ومحمد قعدوا على صوب

محمد: مبروك عوشه عقبال العرس
عوشه: الله لا قال ..
مبارك: شووو ... سمعتها عمي شو قالت ... سمعتها (خزها ابوها خزة حاست من بعدها بوزها )
عوشه: الله يبارك فيك محمد عقبالك

ابتسم محمد ابتسامة مجاملة .. يوم شافته روضه حست ان هموم الدنيا كلها في ابتسامته هاي .. كل هذا عشانه يحب ومب قادر يوصل للي يحبها ... ليش اهلنا يحكمون على حبنا اذا كان خارج عن نظرتهم للحياة بالفشل ... ليش أي شي برع حدودهم ممنوع .. ليش ما يعطونه فرصه يجرب ... كيف بيتعلم اذا ما جرب ... معقوله عمها هذا الانسان اللي حنان الدنيا كله في حسه بس ... يقسى على ولده وهو ما عنده غير هالولدين .. ليش يتجاهلون الامه والحال اللي وصل لها بسبة هالحب ... محمد صغير واللي يشوفه يحس انه اكبر من خالد اللعاب في رايها ومبارك المرح ...
الساعة وحده ونص نش بو منصور وشل وياه ام منصور وردوا بيتهم ودخلوا بو خالد وام خالد يرقدون .. اما الشباب الساعة ثنتين خلاص بدوا يتفرقون ... قبل لا يدخلون قوم مبارك بسوم كانت رايحه ترقد ... فطوم وريلها راحوا فوق حجرتها عشان يباتون فيها ... وخالد راح بيته ولحقته حمده ... طلع محمد ويا مبارك وراح سعيد فوق هوه وعبود .. بس سمعوا عوشه وروضه يسولفن

عبود: تعال ندخل نشوف شو عندهن
سعيد: الحين
عبود: هيه شو نكفر اذا دخلنا حجرة ختنا السعة ثنتين
سعيد: روضه عندها
عبود: اللي يسمعك الليدي دي برايها بنت عمنا (دق الباب عليهن)
عوشه: منووه
عبود: انا
عوشه: حد ايي عند حد الساعة ثنتين
عبود: فجي ويا هالويه
روضه: (بعد ما عدلت شيلتها) ادخل ادخل الباب مفتوح

فج عبود الباب ودخل وعلى طول دخل وراه سعيد اللي من شافته روضه عدلت يلستها احتراما لوجوده
عبود: هاه العروس .. قلنالج من الاول مبارك احسن ما طعتي
عوشه: على شو احسن يا حظي .. على غلاسته وثقل دمه
سعيد: الحين مبارك ولا حمد
روضه: لا مبارك .. وين شو الفرق امبينهم
سعيد: اقول نورة بنت خالتي يت اليوم

روضه من سمعت سعيد يتخبر عن نورة حست بضيج في خاطرها .. معقوله انه يحبها وكانت السبب في انها ودرته ... بس هيه ما تناسبه ابدا ما تناسبة من وجة نظرها .. سعيد يستاهل احسن وحده في العالم .. اذا في انسانه كامله فهي اللي يستاهلها سعيد

عوشه: ليش تسأل .. حنيت ولا اشتقت
سعيد: هاهاهاها لا ويا ويهج .. بس اسأل بعدهم زعلانين
عوشه: لا خالتي يت ... بس البنات ماين
روضه: انت بعدك تباها
سعيد: لا ما ابغيها خلاص
عبود: ويأجوج ومأجوج ما ين
روضه: منوه ؟؟
عوشه: هاهاهاها لا ما ين
روضه: منوه يأجوج ومأجوج
عبود: ما تعرفينهن منوه
روضه: لا
عوشه: خطيبته واختها
عبود: يخسن والله يخسن لو كانن اخر ثنتين في العالم
روضه: منوووه
عوشه: علايا ولطوف بنات عمتي
روضه: هاهاهاهاه ونه يأجوج ومأجوج
عوشه: هيه وامي اترياه يخلص كلية بتخطب له لطوف
روضه: وع
عبود: عاد ودج اخذها زين
روضه: تدري منو تاخذ
عبود: منوه
روضه: ساره اخت حميد .. فنانه هالبنت
سعيد: دورن اول حق اخوه اللي اكبر منه
عوشه: لا انت مخلينك حق امي تدور لك
سعيد: لا الله يخليج يكفي مرة وحده
روضه: تريدنا ندور لك صدق
سعيد: (وهو يطالع في عيونها ويقول في خاطره ياربي متى بتحسين ) لا مشكورة ما اريد الحين .. اسولف وياكن
عبود: اسكت زين خلني اتخبر عن خطيبتي
عوشه: منو خطيبتك
عبود: سارة
عوشه: أي سارة
عبود: يا الغبية اخت حميد
عوشه: طالع من الحين استوت خطيبته وهو ما يعرف غير اسمها
عبود: انتي مالج خص .. تعالي روضه خبريني
روضه: هاهاهاها لا بخبرك بعد ما تخلص الكلية
عبود: واذا حد خطبها قبلي
روضه: بلقالك غيرها لا تزعل
عبود: حلوه هيه
روضه: افااااا ذوقي تشك فيه
عبود: والله انه هاه ينشك فيه .. بس ماعليه المهم شعرها طويل
سعيد: استح على ويهك .. صدق ما فيك مذهب
عبود: عوذ بالله هادم اللذات انت ( وضحكوا هنيه كلهم)
روضه: الا عبود اخبار الرسم وياك من زمان ما راويتني شي
عبود: في الكلية شو تبيني ارسم ماشي الهام ... كلها ويوه تنعاف
سعيد: تعال انت مب قايل بترسمني ما شفت شي
عبود: وين انت قبل لا اخلص ثانوية رسمتك ... الرسمة عند روضه مب قلت اعطيها اياها
روضه: هيه صح عندي
سعيد: وليش ما راويتوني
عبود: روضه روحي يبيها
روضه: لاااااا داستنها في ملف في المكتب مالي
سعيد: ورسمت روضه ولا بعدك
عبود: لا .. وين ارسمها في الكلية
روضه: يا سلام وليش ما ترسمني في البيت يوم اتيي في الويك اند
عبود: متفيج ارسم يوم ايي البيت
عوشه: متفيج حق الحوامه هذا اللي فالح فيه
سعيد: ياللا عاد ارسمها وبنشوف كيف بتطلع .. أي رسمه احلى اللي رسمتها لي ولا رسمتها
عبود: ماعليه يوم بتفيج
عوشه: زين انا اللي مب متفيجة الحين .. طلعوا ابغي ارقد
روضه: افاااا تروغينا
عوشه: هيه اذا قعدتوا ما بتطلعون لين الصبح .. روحوا حجرة عبود كملوا سوالف
سعيد: لا انا بروح ارقد تعبان باجر ورانا نشة لصلاة الجمعه .. ياللا عبود
عبود: اوكي ياللا باي ... اقول روضه تعالي بعدين خبريني عن سارونه
روضه: هاهاهاهاها بعد يدلعها
عبود: كيفي خطيبتي
***

مرت الاسابيع ... ووضع الجميع على ما هو عليه ... عوشه خطيبة لمبارك اللي كان ايي كل ويك اند بيت عمه يوم بيخطف او بيطلع ويا سعيد ... وقبل لا يطلع لازم يغايضها ويرفع لها الضغط ... وما يطلع لين ما تقوله اطلع من بيتنا .. ولا تيي مرة ثانيه ... اما سعيد فتم على حاله يداوم في بوظبي ويرجع في الويك اند العين ... حياته بالنسبة له بدت تحلى وتستقر .. كان حاس بالرضى عن نفسه وعن علاقته في بنت عمه ... هالمرة ما بينسحب بكل بساطه اللي يحب ما يتخلى بهالسهوله .. وحبه لبنت عمه من وجهة نظره مشروع ... بس اللي كان مخوفنه موقف روضه منه خاصة بعد الحركة اللي سواها خالد في حمده يا ترى تقدر تثق فيه ... عبود اسبوع محجوز واسبوع عندهم ... وفطوم خفت يياتها العين عشان وحامها متعبنها .. وحميد يخاف عليها من الطريج ... روضه مثل ما هي عيون بو خالد اللي تبغيه يتنفذ على طول ... كانت تروح دبي عند خالها كل اسبوعين وتودي وياها عوشه وبسوم واذا فطوم ما كانت في العين مرن يسولفن عندها ... كانت من احلى الفترات في حياة كل منهم الايام اللي طافت .. الا حمده اللي كانت تتعذب وهي ساكته ... تحس بقهر فضيع والايام تمر ويقرب موعد عرس ريلها ..
اما خالد فكان يحس انه توله على حمده مرته الاولية ... وان شهور طافت على السالفة بعدها على حالها ... ما كان يريد يخسر حمده ... كان يشوفها دون ما تكلمه او تعطيه مجال انه يتكلم يوم يكونون بروحهم .. وتصرفاتها قدام الكل ... ليش ما تعترض ليش ما ترفض ليش هالازدواجيه في معاملته .. كيف تقدر تكون ثنتين ... جدام اهله وحده غير ووياه وحده جافه ... كان يحاول يدور طريقه عشان يراضيها بس ما كانت تعطيه مجال ... صح كان يكلم خطيبته في التيلفون ... وينسى حمده وهي وياه على الخط .. بس ترد حمده تشغله بمجرد ما تبند الثانيه التيلفون ... واللي ما كان يعرفه ان حمده تعبت اكثر مما يتصور من هالازدواجيه اللي تعامله فيها ... وانها مهما سوت غصب عنها تحبه ... بانانيته وعجرفته ... تحس انه في داخله انسان طيب ... بس الغربة خلته بهالقسوة على الناس اللي يحبهم ... كانت تفكر خالد حبها .. او عمره ما فكر فيها كحبيبه وكانت بالنسبة له زوجة فرضتها عليه الظروف .. ظروفها ورغبة امه وابوه ... ليش ما رفض ..

اول شهر سته ... بعد ما اجزن البنات من الجامعه وقعدن في البيت عشان يدرسن حق امتحاناتهن ... وفي ليلة خميس من اول الشهر ... بعد ما بند خالد عن اليازية عشان يدخل البيت .. قالها بيكلمها قبل لا يدخل يرقد .. على اساس انه بيحصل حمده كعادتها في هالايام راقده عنه .. بس اتفاجأ بها قاعده في الصالة لابسه بجامتها القطن البيضا ... ورافعه شعرها كله ... ولابسه نظارتها وتقرا في روايه .. ما حست فيه وهو يدخل ... فتم واقف يطالعها وهي تقرا .. كان يتمنى اذا رفعت راسها تبتسم له بس يدري ان هالشي صار في حكم المستحيل وهم بروحهم ... وبالفعل يوم رفعت راسها وشافته عقدت حياتها وجلبت الصفحه بتكمل قرايه ... بس خالد دخل عليها ... وقعد عدالها على الكنبه ... وشل الكتاب من ايدها

خالد: (وهو يتنهد) وبعدين
حمده: فيه شي
خالد: فيه اشياء مب شي
حمده: ما بنرد نتكلم في موضوع انتهى (ونزلت راسها تلعب بظفورها)
خالد: اوكي على راحتج .. بس طلب واحد ارجوج
حمده: (بعد ما رفعت عيونها تطالعه) خير
خالد: لا ترديني
حمده: قول
خالد: هدنه ليوم واحد بس .. لا ليلة وحده لين باجر الصبح
حمده: (تبتسم باستهزاء) هدنه .. ليش نحن في حرب
خالد: اللي تسوينه افضع من الحرب
حمده: واللي سويته
خالد: ارجوج

سكتت حمده اذا كان هو بحاجة لهدنة لمجرد ليلة وحده فهي بحاجة لهدنه طول عمرها لانها تعبت ... بس ما حبت اتبين له ضعفها ... وقررت تستغل هالشي لطلب مب كانت عارفه كيف اتكلمه فيه

حمده: اوكي بشرط
خالد: اللي تبينه انا موافق
حمده: اسمع الشرط اول
خالد: قولي
حمده: خالد اريد ارد اشتغل ... بموت من الملل الله يخليك انت الحين بتعرس وبتم بروحي

ما حست حمده بنبرة صوتها وهي تتحول من موضع القوه للخنوع والترجي .. ندمت انها ترجته بس هاي هيه وبغت ولا ما بغت خالد بعده زوجها وما تقدر تعصيه في شي ... اما خالد اول شي حس بضيج من طلبها .. بس وهو يفكر شاف انه ممكن الشغل يردلها ثقتها بنفسها وترد له مثل ما كانت

حمده: هاه شو قلت
خالد: (يبتسم ) اوكي اللي يريحج .. ما عندي مانع

سكتت حمده وردت نزلت راسها وهي تفكر اوكي بس كيف الهدنة اللي يباها .. بس خالد ما خلاها رفع راسها واطالع في عيونها

خالد: قلنا هدنه .. يعني اريد اشوف ابتسامه حلوة ... وعيون تلمع .. وامممم
حمده: (وهي تبتسم) وشو بعد
خالد: تصدقين اني يوعان .. وفي خاطري الحين سباجتي من يدج .. انتي تسويلي اياه
حمده: (وهي فاجه عيونها وتضحك) خالد سباجتي الحين الساعة وحده متى بتاكله ومتى بترقد
خالد: منو قالج اني برقد الليلة .. ولا ما تبين تطبخين لي
حمده: لا افااا عليك من عيوني بس ما عندنا شي هنيه عشان نطبخ به .. الاكل في المطبخ اللي برع
خالد: اتصلي في عوشه خليها اتييب لج اللي تبينه من المطبخ واتيي .. على فكرة بساعدج
حمده: هاهاهاها خلاص اوكي
خالد: تذكرين في لندن قبل لا نعرس .. يوم سويتيلنا السباجتي
حمده: انت بعدك تذكر
خالد: طبعا ... وللحين احلم به
حمده: خلاص عيل ما بخليه في خاطرك

ونشت حمده تتصل في عوشه وبسوم وروضه عشان اين عندها واييبن لها من المطبخ اللي تباه عشان تطبخ .. وهنيه رن تيلفون خالد ... كانت حمده تدري انها اللي يريد ياخذها متصله في هالحزة وعورها قلبها بس قررت تتجاهل الموضوع وما تخرب هدنتها ويا خالد ... اما خالد فشاف التيلفون ايرن وشاف رقم اليازية .. بس بند تيلفونه وفره هو بعد ما كان يريد يخرب هالهدنة اللي بينه وبين حمده ... بعد ما ردت عوشه على تيلفونها

عوشه: انتي بعدج ما رقدتي ... عيل ليش رحتي
حمده: اقولج روحي المطبخ انتي واللي عندج .. وهاتن سباجتي وصلصل وطماط وبصل و..
عوشه: شو ناويه اتسوين نص الليل ... شو اتحلمين بالسباجتي انتي
حمده: لا وانتي الصادقة اخوج ايتحلم بها
عوشه: الحين الساعة وحده
حمده: هيه ياللا (وهنيه شل خالد السماعة من عند حمده وكلم عوشه)
خالد: سمعتيها شو قالت ياللا سرعة استوت وحده وربع متى بنتعشى
عوشه: (وهي مستغربه) ان شاء الله

بعد ما بندت عوشه عن خالد قالت حق روضه وبسوم اللي يبونه خالد وحمده

روضه: لا والله وبعد تطبخ له نص الليل
بسوم: شو نسيتي انه ريلها
روضه: ليش ما يروح يتعشا عند حبيبة قلبه هاذيج ولا ما تعرف تطبخ مثل اختي
عوشه: على فكرة حمده كانت مستانسة واتريانا .. قومن نروح
روضه: انا مب رايحه
عوشه: ياللا عاد بلا مصاخه عشان خاطر حمده

ونشن ثلاثهن راحن بيت حمده ... بس ما ردن بعد ما وصلن لها اللي تباه .. وهن يسمعنها تضحك ويا خالد .. دخلن وياها المطبخ وحتى خالد دخل وياهم ... كانوا كلهم يضحكون ويسولفون ... وخالد يتدخل في كل شي وكل شوي حمده تقوله يطلع

حمده: خالد الله يخليك اتريا في الصالة
خالد: لا والله بساعدكم بسمع الكلام
حمده: ما نريد مساعده .. نحن اربع مب قاعدين نطبخ ذبيحه
روضه: ( وهي قاعده تطالع البصل بقرف ) خالد تريد تساعد
خالد: هيه
روضه: أي شي
خالد: هيه
روضه: تعال قطع البصل (ضحكن كلهن يوم قالت له جيه)
خالد: لا الا البصل اسمحيلي دوري غيره
روضه: لا والله اللي يسمعك بنيه تخاف ريحة ايديك تخيس يعني ... قطع البصل ياللا
خالد: هاهاهاها لا حول
روضه: ياللا
خالد: امرنا لله اذا ما بتروغوني برع
كان خالد يقطع البصل وعيونه تدمع وروضه اتطالع بتشفي وخواته يضحكن عليه وهو يتحلف لهن .. بس كسر خاطر حمده فقالت له انها بتكمل عنه بس ما خلاها ...

خالد: اللي بتكمل تقطيع البصل لها خمسمية
عوشه: بس
خالد: يا الطماعه الا بصل
حمده: قلت لك بقطعه عنك
روضه: ومنو قالك ما نعرف نقطع
حمده: (وهي رافعه حياتها) روضه انتي تعرفين متاكده
روضه: لا يعني عوشه تعرف عني وعنها
خالد: لا انتي برايج .. هن خليهن يتعلمن
عوشه: سبعميه وبقطعه عنك
خالد: تم تعالي كملي

كانت بسوم تحاول تفتح قوطي الصلصل ويوم فتحته نطش من داخل القوطي ووصخ عوشه وروضه .. وخالد وحمده كانوا بعيد عنهم ... وتموا يضحكون عليهن

روضه: صدق انج هبله .. شوها ... شو سويتي
بسوم: سوري سوري والله نسيت
عوشه: ومنو قالج فجيه انتي اصلا ... مالت عليج .. وانتوا ضحكوا ضحكوا ماعليه بييكم يوم

وفي نهاية العفسة اللي سووها كانت حمده واقفه عدال الفرن بتطعم الصلصه اللي سووها حق السباجتي .. ويا خالد وقف وراها

خالد: خليني انا اذوق
حمده: خالد صبر شوي خلصنا خلاص
خالد: زين بطعم بس
روضه: عطي ريلج الملقوف عشان يطلع ويفكنا من الحشرة
حمده: دوك ...
خالد: (بعد ما طعم) الله .. تسلم ايدي على هالطبخه
عوشه: احلف انت
خالد: شو طبخت وياكن ولا
روضه: شو سويت
خالد: قطعت البصل
عوشه: قشرته انا اللي قصيته زين
خالد: بفلوسي زين
حمده: اقولك خالد حبيبي روح اتسبح ريحتك كلها طبيخ
خالد: يعني انتن اللي ريحتكن مسك وعنبر
حمده: لا انت عشر دقايق وبتنزل .. ونحن يبالنا نص ساعه بعد ما نتعشى بنروح نسبح
خالد: اوكي .. حطن العشا واتريني لين ما انزل لا تاكلن
حمده: ان شاء الله

راح خالد يسبح وهو مستانس حتى تيلفونه ما شله وياه عشان يتصل في اليازية يعتذر منها واللي كانت تتصل فيه وتحصل تيلفونه مغلق ... ما كان يريد يضيع لحظه وحده من هالليلة دون ما يفكر في حمده او يكون عدالها ... معقوله بعد ما ردت تعامله طبيعي بترد تجافيه بالباجر ... بعد هالليله كيف بيتحمل انها تجافيه ... معقوله حمده تهمه اكثر من أي حد ثاني .. ورضاها يخليه يستانس ويحس نفسه بعده صغير او ياهل ...
بعد ما نزل لقاهن يترينه في المطبخ وهن ماسكات شوكهن

خالد: تأخرت
روضه: هيه ياللا يعنا من كثر ما نترياك
عوشه: هذا ونحن متعشيات
بسوم: ماعليه بس هذا طباخ جماعي .. خلنا نذوق ... حشا حرمتك ما خلتنا نصكه لين ما تنزل
خالد: فديتها والله وينها
حمده: (وهي يايه من الصاله) انا هنيه منو يدورني
خالد: تعالي بناكل

قعدت حمده عدال خالد ومن الجهه الثانيه عوشه عداله وعدالها روضه وبسوم ... وبدوا ياكلون وهم يسولفون وبعد ما خلصوا ... كانت حمده تضحك على شي بسوم تقوله وخالد يطالعها ويوم يت عينها في عينه ابتسم لها .. ونزلت خصله من شعرها على ويها ... وبدون ما يحس رفعها وحطها ورا اذنها

عوشه: أي احم احم نحن هنيه (لف خالد ويهه عليها وهو يضحك وحمده احمر ويها)
خالد: هاهاها لا والله وشو نسويلج انتي هنيه
عوشه: صبر لين ما نروح
خالد: شو سويت
عوشه: لا والله
خالد: شعرها في عيونها ورفعته عن ويها غلطت الحين اخت عوشه (وهو يتكلم كان ينفش شعر عوشه واييبه على ويها وهي تلز عنه بعيد والباقين يضحكون)
عوشه: بس خلاص خلاص توبه
خالد: اقول الساعة ثلاث الحين روحن البيت خلاص هوونا بنرقد
حمده: لا لحظه من بيغسل
عوشه: ريلج راغنا بنروح مالنا خص
روضه: هيه والله
خالد: ( قبض عوشه من جلابيتها لانها نشت بتروح) لا وين كلتي وخلاص مع السلامه .. غسلي انتي وبنت عمج كل الجدور والصحن ولا ماشي السبعميه
عوشه: لا لا لا السبعميه عشان البصل مب عشان اغسل
خالد: تبين السبعميه غسلي ياللا
عوشه : (وهي مبوزة) شو هالظلم ... وليش انت وحرمتك ما تغسل
خالد: اكلناكن بعد شو
روضه: زين روز باجر بتغسل
حمده: لا شو يتم المطبخ وصخ لين باجر
خالد: هيه صح غسلن وروحن

راحن روضه وعوشه وبسوم صوب الحوض ثنتين يغسلن ووحده تنشف الصحون ... وخالد وحمده يطالعونهن ويضحكون عليهن .. وبعد ما خلصن راحن البيت ... وطلعت حمده ويا خالد ... ودخلت تتسبح عن ريحة الطبيخ والاكل اللي علقت فيها ... اما خالد فكان مستانس على هالليلة اللي بالنسبة له كانت من احلى الليالي اللي عاشن من يوم خذ حمده ... كانوا يضحكون ويسولفون .. بعد جفوة دامت شهور ... معقوله كانت كلمة ممكن تراضيها ولا هي بعد تعبت من هالصد والهجران ....

النسبة لخالد كان وده هالليلة ما تنتهي .... كان خايف من باجر ايردون يتعاملونن بنفس البرود ... هذي هيه حمده اللي تزوجها صدق ولا لان البعد خلاه اليوم يشوفها بعين غير... عمره ما قعد وياها قعده جيه ... كان دومه يشوفها اكبر من انه يسولف معاها بهالطريقة مثل اليهال ... احترامها وجديتها في التعامل .. حتى رقتها .. كان يشوفها مثل حرمة كبيرة ... ما ينكر انه يحترم حمده بطريقة ما احترم فيها وحده الا امه .. بس اليوم بينتله حمده انها ممكن تتغير وتتلون على حسب الجو اللي هو يخلقه ويبدا فيه ...
اما حمده كانت فرحانه صدق .. حست عمرها ردت صغرت .. كانت تتصرف بعفوية وبساطه مثل ما كانت قبل لا تزوج خالد .. ايام ما كانت هي وروضه في بيت امها الله يرحمها .. وحتى يوم يت بيت عمها .. هي وبنات عمها .. قبل لا تحل هالمصايب كلها عليهم ... حتى روضه اللي تغيرت من فترة .. كانت تضحك وتتصرف طبيعي ويا خالد ... ما كانت تريد تتعامل معاه بجفوة او برود .. حست ان هالليلة بتغير كل شي في حياتها ...
هي وخالد ما رقدوا لين الساعه ست الفجر .. كانوا يسولفون ويضحكون...

الساعة 11 نش خالد قبل حمده ودخل يتسبح عشان يروح بيت ابوه ويطلع يصلي الجمعه وياه.. بعد ما طلع من الحمام حصل حمده بعدها راقده ... راح صوبها وكان متردد يوعيها ولا يخليها راقده ويطلع ... خلاص خلصت الهدنة كيف بتعامله الحين مثل امس في الليل اوبترد تعامله بجفوة مثل قبل ... نزل على ركبه جدامها وين ما راقده وقعد يتأمل في ملامحها ورفع ايده يمسح على شعرها ... وهنيه فتحت حمده عيونها وابتسمت له ... وهو ابتسم لها وعرف ان ابتسامتها تعني اني خلاص مابتجافيه بعد اليوم .. وانها بترد له مثل ما كانت .. او بالاصح بتكون وياه حمده يديده .. وشخصيه غير عن الثنتين اللي كانتهن .. شخصيتها الاصلية اللي غيرها العرس.. ورد غيرها بقراره انه يتزوج ...
اللي ما كان يعرفه ان حمده كانت واعية قبل لا ينش هو من الرقاد .. وانها كانت متردده بين انها ترد له مثل ما كانت او تتغير في معاملته له ... واقع انه بيزوج شي مب بيدها انه تغيره .. وخلاص اتقرر كل شي .. ليش تحكم على عمرها تعيش تعيسه وهي بعدها صغيرة ... ليش تخليه كله للي بياخذها... ليش ما تعيش الايام اللي باقية وياه بكل لحظاتها ... ابتسمت له وشافته ايرد لها الابتسامه

حمده: اتلبس لين ما اكلم روز اتييب المدخن عشان ادخنك قبل لا تطلع
خالد: (وابتسامته على ويهه) اوكي ما بتروحين وياي بيت ابوي
حمده: لا بتسبح وبتلبس وبعد الصلاة بروح
خالد: اوكي

بعد ما دخنت ريلها ... نزل بيروح بيت ابوه ... وقبل لا يطلع تذكر تيلفونه اللي مغلقنه وفارنه في الصالة من امس ... وتذكر خطيبته اكيد الحين محتشره عليه لانه ما كلمها من امس ... مر الصالة وشل تيلفونه وشغله .. واول ما شغله وصلته خمس مسجات من تيلفون اليازية .. ابتسم وقرر يكلمها لين ما يدخل بيت ابوه
***

بعد الصلاة التموا كلهم بيت بو خالد مثل كل جمعه ... الا عبود اللي كان محجوز لين ما يخلصون امتحانات الكلية .. وبعد ما نزلن البنات كلهن راحوا ايتغدون... كان خالد يسولف ويا خوانه وخواته .. ومحتشرين كلهم حتى ام خالد وابو خالد

عوشه: اووووف ما اصدق بعد عشرة ايام بيكون اخر امتحاناتي
بسوم: الحمدلله انا بخلص بعد ثلاث ايام
سعيد: وانتي روضه متى بتخلصين
روضه:انا بخلص بعد اسبوع قبل عوشه
عوشه: انا اول ما اخلص امتحانات مب قاعده في العين
روضه: وين بتروحين يا حسرة
عوشه: مالي خص بطلع من العين بطلع .. تعالوا نروح بوظبي
روضه: لا بوظبي لا ... (سعيد عقد حياته .. روضه للحين مب ناسية والاكيد انها ما بتنسى حتى وان كانت تكلمه)
بوخالد: ليش .. خلينا كلنا نروح اسبوع
روضه: عمي شو فيها بوظبي نروحها .. لوعة جبد ورطوبه
ام خالد: نروح مزرعة الذيد ويا سلطان وعياله
عوشه: عشان نفطس حر ... لا مشكورين
روضه: نروح دبي ... فيها كل شي ... وأماكن وايد عشان نطلع
خالد: قصدج اسواق وايد... مابيتم سوق ما بتروحنه
روضه: صح اسواق
عوشه: اسمعوا من الحين اقولكم السنة بسافر بسافر ... يكفي العام ما سافرنا
سعيد: وين تبين انتي
عوشه: والله بلاد الله الواسعه .. لا تفكرون مجرد تفكير اني بقعد في هالحر .. وانت السنة يعطونك اجازة
روضه: هيه صدقها .. ولا انا بقعد في هالحر ...
بوخالد: وين تبن
ام خالد: شو تبون في السفر ما مليتوا منه ..
روضه: اوكي اوكي لا تسافرون .. انا بروح ويا خالي حمد وحرمته وعياله
حمده: هاهاها يا الخاينه ما تعرفين خالج الا حق السفر
روضه: لا اعرفه دوم ... بس هو قالي اذا اريد اروح معاهم
بوخالد: لا لا انا ما ارخصج تروحين وياه وتخليني بروحي
روضه: عيل ودنا انت
حمده: خالي وين بيروح
روضه: وين يعني يا حسرة .. هو يغير عن لندن .. انا حفظتها
بوخالد: ماعليه بنشاور عمكن وبنروح
عوشه: لا لا لا ما نروح وياهم ... انا اريد اسافر افتك مب يروح ويانا مبارك .. ويتم لنا مثل العظم في البلعوم .. ما يخلينا نطلع مكان
سعيد: هاهاهاهاها ماعليه ان ما خبرته عليج
عوشه: ياماما خوفتني .. خبر شو يعني
خالد: وين تبون انتوا ... ناسين ان وراكم عرس (بعد ما قال خالد جملته تغير شكل حمده وحتى روضه)
عوشه: اوهووو نحن ما بنخلص يعني
بسوم: العرس شهر ثمانيه
ام خالد: بعد امتحانات العيال ويوم بيطلع عبود من الكلية بنروح ... حتى لو اسبوعين في شهر سبعه بنروح ... والعرس لاحقين عليه ما بيطير ولا بيتغير تاريخه
عوشه: وانرد حق العرس ونرد نسافر بعد عرسه .... تعويض عن السنة اللي طافت
بوخالد: يا الطماعه وين تبين هالكثر
روضه: صدقها
سعيد: زين ماعليه بس وين تبون
عوشه: جنيف لا
روضه: ولندن لا
سعيد: هاهاهاها شو تم
عوشه: (وهي تخز خالد وسعيد) نروح لبنان شهر سبعه
سعيد: زين والله عيل بنروح انا ومبارك وياكم
عوشه: لا لبنان ما اتيون ويانا بس نحن انتوا قعدوا هنيه
سعيد: ليش ان شاء الله
عوشه: بس
خالد: وفي شهر ثمانيه
عوشه: امممممم
روضه: بلجيكا يمدحونها
عوشه: وبنودي سعيد ومبارك ويانا
سعيد: عاد بنشاورج نحن قبل لا نروح
عوشه: لا والله
سعيد: قبل لا تروحن نحن بنكون هناك .. حتى بني المطار نستقبلكم
عوشه: ابويه قوله ماشي روحه
بوخالد: ليش خليهم الشباب يستانسون
خالد: هيه وودوا بوخالد وياكم دوروله حرمه لبنانيه ترده شباب ...
ام خالد: ليش ان شاء الله اذنه مخبقة يروح اييب له عله على جبده
خالد: ايييه يا ام خالد ما شفتيهن ...
حمده: مب كل الرياييل يطالعون الحريم .. عنده شيخة الحريم يطالع غيرها ليش
روضه: يمكن طالع على ولده
خالد: هاهاهاها حلوة هاي طالع على ولده ... ليش مب انا اللي طالع عليه
روضه: الله يخليك ... ودك انت طالع على عمي .. ما ادري على امنوه طالع
خالد: ليش ابوي اذا ما طلعت عليه بطلع على منوه
روضه: شدراني فيك
***
بعد ما خلصوا امتحانات كلهم ... وبدا الصيف عندهم .. كل ليله يسهرن لين الفجر .. سوالف وتلفزيون وفيديو ... او سهر في بيت حمده ... الساعة وحده في الليل كانن يطالعن فلم في التلفزيون في صالة بيتهم يوم سمعن الجرس يدق ودخل سعيد وعبود ومبارك ... كان سعيد ماخذ اجازة اسبوع وقاعد في العين بعد ماسلموا وردن البنات السلام

عبود: ليش مب راقدات
بسوم: يوم بترقد انت نحن بنرقد
عبود: لا والله انا ريال غير
روضه: حتى في الرقاد ريال وبنت .. حشا ما يسوى علينا
عوشه: روح روح متفيج انت .. ونه انا ريال
عبود: ليش مب مازر عينج اخت عوشه
روضه: (تكلم سعيد) شو بعدها اجازتك ما خلصت
سعيد: ليش مليتوا مني حشا ما كملت اسبوع
بسوم: لا وانت الصادق نخاف نتعود عليك .. ويوم تروح نفتقدك وايد
مبارك: ويل حالي على هالرقة ... ليت بعض الناس مثلج
عوشه: اعرف من تقصد .. بس بسويلك اكبر طاف ... هذا احسن حل
روضه: لا مب ملينا منك ... اخاف يوم حزت السفر تقول ما عندي اجازة وما تسافر و يانا
سعيد: لا بسافر وياكم افااا عليج بنت عمي .. بنطلع الاجازة من تحت الارض
مبارك: يا ويل حالي على الناس المهتمه .. زين ما سئلتيني روضه يمكن انا ما يكون عندي اجازة
عوشه: احسن ... المطلوب عشان تقعد في البلاد وتخيس حر
مبارك: حشا عوذ بالله ... غيرج تتمنى خطيبها يسافر وياها .. وانتي تبين الفكة عوذ بالله ... ماشي انوثه ما تشبهين بنات الناس في شي
عوشه: لا توك تدري إني غير عن بنات الناس كلهن
مبارك: في هاي صدقتي
عبود: وانا اشهد (ضحكوا كلهم هنيه)
روضه: لا مبارك انا متأكده من انك بتروح .. ما تروم تصبر عن عوشه ما تشوفها ... فوين ما نروح بتلحقنا .. لكن سعيد عادي يصبر عنا
سعيد: حرام عليج .. والله انا ما اصبر عنكم بعد ...
مبارك: حرام عليج في هاي انا اشهد
عبود: والاولى شو رايك فيها
مبارك: انا تجاهلتها ... لا تحرجني ... وتخليني اجرح بنت العم
عوشه: يا ويلي اللي يسمعك عاد .. انا اللي ميته فيك الحين وما اصبر بدونك
عبود: اقول روضه رسمتج
روضه: قول والله
عبود: هيه والله
روضه: وين الرسمه
عبود: فوق في الحجرة .. روحي يبيها
روضه: (وهي واقفه) وين الرسمه
عبود: في الملف في المكان المعتاد وين احطي اقلامي ودفتري
روضه: اوكي

راحت روضه اتييب دفتر عبود .. وتموا الباقي يسولفون عن الرسومات اللي راسمنهن عبود

مبارك: وليش راسم روضه
عبود: بس هيه تباني ارسمها
مبارك: ا نت رسمتني انا
عبود: من زمان راسمنك .. بس الحين شكلك اتغير اذا ما سافرت وياكم برد ارسمك مرة ثانية بس خل صورتك
مبارك: وليش راسم روضه من صورة
عبود: روضه مجابلتني اربع وعشرين ساعه ما يحتاي صوره .. من الذاكرة ارسمها
عوشه: وانا لازم اترد ترسمني مرة ثانيه
عبود: اوهوووو شو بشتغل الا ارسمكم انا ....
سعيد: ارسمهم شو وراك
عبود: يصير خير
بسوم: وانا
عبود: اووه انتي قاعده هنيه
بسوم: ياللا عاد
عبود: ماعليه يصير خير

بعد ما نزلت روضه من فوق ودفتر عبود في ايدها .. طلع عبود لهم الرسمة .. اللي استانست عليها روضه ... صح كان راسمنها بشيله .. بس كانت اللوحه تجنن ... وراوتهم اياها ويوم عطتها سعيد يشوفها

سعيد: يا سلام الحين هالحلوة بنت عمي
روضه: من زمان انا حلوة ولا توك تعرف
سعيد: اكيد اني اعرف
روضه: زين ياللا عطني اياها
سعيد: (وهو يطالعها ويبتسم) لا اسف
روضه: شو اسف
سعيد: منو اللي قاله يرسم
روضه: لا هو راسمنها لي
عبود: لا حقك ولا حقها ... هاتوها ياللا هذي قمة الابداع
سعيد: ابدع غيرها
روضه: صدق الحين بتاخذها
سعيد: هيه انتي مب ماخذه صورتي
عوشه: متفيج تراك مجابلنها اربع وعشرين ساعه شتبغي بالرسمة
مبارك: لا مب اربع وعشرين ساعه ... بيوديها بوظبي وياه
عوشه: جنه في بوظبي يفكر فينا عشان ايطالع صورنا
سعيد: حرام عليج يعني يوم اروح ما اتصل فيج
عوشه: يوم بغيت شي اتصلت
روضه: الحين عطني اللوحه
سعيد: لا اسف ماشي
مبارك: عبود ارسم لي عوشه .... عشان انا بعد اتم مجابل الرسمة اربع وعشرين ساعه .. وما انسى طولة لسانها
عوشه: لا والله .. منو قالك اني بعطيك الرسمة اذا رسمني
عبود: احلف انت وياها تراني اشتغل عندكم
مبارك: هكوه اخوج بياخذ رسمة بنت عمه وانتي بنت عمي
عوشه: والله هم غير ونحن غير
مبارك: اكيد نحن خاطبين .. هم لا
عوشه: لا ما اقصد

احمر ويه روضه وراحت تقعد عدال عوشه بعد ما خلت اللوحه عند سعيد لانها تعرف ان سعيد اذا قال شي خلاص بيسويه ... اما سعيد فعطى مبارك نظرة فابتسم له مبارك وهو يطالع في الصقف .. اما بسوم ابتسمت بخبث وسكتت ... على منوه يا سعيد .. لو دسيت عليهم كلهم وهذا الشي اللي ما تتوقعه بسوم .. فما راح تقدر ادس على بسوم ..
***

في اول شهر سبعه .. كانت حمده في حجرتها في بيتها تطلع ثيابها وثياب ريلها اللي بيشلونهن وياهم في السفر .. كانت مستانسة ان خالد قالهم انه بيروح وياهم ... الغريب ان علاقتها بريلها بعد الليلة اللي طبخوا فيها كانت غير في كل شي ... دوم في البيت ويسولف وياها .. وهو اللي ودالها اوراقها الكهرباء والبلدية عشان اترد اتوظف مرة ثانيه ... واليوم الصبح بالذات اكتشفت شي كان مخلنها في قمة سعادتها ... خلاص زواج خالد ما عاد يهمها ويوم يتكلمون في العرس كأنهم يتكلمون عن عرس واحد غريب عليها ... كانت في حالة رضى عن حياتها وكل اللي انكتب لها .... كانت دايما تثق ان الله ما يتخلى عن عباده وان سكرت من باب تفتح من بيبان ثانية ... بس الاهم القناعه والرضا ... رن موبايلها وهي مشغوله في افكارها وفي قمة سعادتها .... كان الرقم غريب اول مرة تشوفه ... ردت على التيلفون .. سمعت صوت وحده .. وكل اللي قدرت اتفكر فيه انها وحده من ربيعاتها اللي في الشغل عرفت انها بترد تشتغل واتصلت بها

حمده: منو .. صدق ما عرفتج
المتصلة: ومن وين بتعرفيني .. او حتى بتذكريني
حمده: (تبتسم) اوكي يوم تدرين اني ما اعرفج او اذكرج قولي انتي منوه
المتصلة: انا اليازية بنت حميد (انصدمت حمده ليش خطيبة ريلها تتصل فيها الحين وما باقي على عرسهم غير شهر ونص ... وهي قايلة لخالد انه ما تريد تكون لها علاقة فيها بالمرة)
حمده: (بدهشه واستغراب بعد ما اختفت ابتسامتها ) مرحبا .. فيه شي
اليازية: ماشي بس اقولج مبروك .. سويتي اللي تبينه
حمده: وشو اللي سويته .. وعلى شو مبروك
اليازية: اتحريني بخليج اتهنين في خالد ... اول شي قدرتي تخلينه يبعد عني .. ما ادري شو من سوى مسوتله عشان يعاملني جيه ... وانا متحملة كل الايام اللي طافت بس انج تخلينه يودرني وما باقي عن العرس الا شهر ونص .. انتي وايد تحلمين .. جانج مصدقه اني بخليج اتهنين فيه بعد ما فضحتوني بين الناس والعرب انتي مينونه
حمده: انتي شو تقولين ... انا مالي خص فيج وفيه
اليازيه: لا تسويلي نفسج بريئه .. ما ينفع عليج هالدور واذا الكل صدقه انا ما بصدقه ... وما كون اليازية بنت بطي ان ما خليت هالخلود يندم على اللي سواه فيني
حمده: شووو ؟
اليازيه: مب انا اللي ايي عند هلي ويقولهم ما يريد ياخذني عشان حرمته وبنت عمه ... ويفشلني جدامهم ... بس لاخليج تندمين انتي وياه وبتشوفين وبتقولين اليازية قالت

كانت اليازية تتكلم وتتحلف حق حمده وتصارخ عليها ... وهي متفاجأة من الكلام اللي تقوله معقوله خالد غير رايه وما بيزوج .. ومن خاطره ما يريد يزوج عليها ... والكلام اللي قالها اياه وحبه للي اسمها اليازية هاي ... وبينها وبين نفسها استغربت شو اللي عق ريلها على هالاشكال ... بعد ما خلصت هاذيج كلامها وسكتت

حمده: خلصتي كلامج خلاص ما عندج شي تقولينه
اليازية: ليش عندج انتي شي بتقولينه
حمده: لا خلاص مع السلامه ...

وبندت تيلفونها واغلقت تيلفونها بالمرة وهي مستغربة بالرغم من انها كانت في قمة فرحتها الا انها حست بالشفقة تجاه اليازية .. ما قدرت الا تحس بالشفقة تجاه هالانسانه اللي حبت خالد ... بس يوم شبع منها خالد خلاها حتى دون ما يراعي شعورها ... دومه خالد قاسي وجاف في تعاملاته ... يسوي اللي يباه واللي يريحه دون ما يفكر في الطرف الثاني .. اللي غالبا ما يروح ضحية انانيته وغروره ... كانت فرحانه لان ريلها ردلها من نفسه في هالوقت بالذات .. اللي كانت محتاجة له فيه اكثر مما يتصور
بعد ما بندت موبايلها نشت اتصلت من تيلفون حجرتها في روضه

حمده: روضه تعالي بسرعه انتي وعوشه
روضه: ليش
حمده: تعالي وبتعرفين
روضه: شو قاعدين نشوف شو بنشل ويانا للسفر
حمده: عندي لكن خبرين كل واحد احلى من الثاني تعالي
روضه: شو قولي
حمده: لا تعالي
روضه: زين زين الحين بيي انا وعوشه ...
حمده: اترياكن

بندت عن روضه اللي قالت حق عوشه ان حمده تباهن .. ومرن على بسوم وراحن كلهن بيت حمده يشوفنها شو تبا ... وهن يركبن نزلت لهن حمده ووقفن كلهن في نص الدري

روضه: هاه يينا شو بتقولين
حمده: خبرين .. شو تريدن اول ... الخبر الحلو ولا الاحلى
عوشه: اللي مسوبج جيه .. ومخلي لونج اصفر أي واحد فيهن
حمده: الحلو
روضه: لا اول قولي الاحلى .. اذا الحلو جيه سوابج عيل الاحلى شوه
حمده: انا حامل
كلهن: شووووووو
بسوم: كيف
عوشه: شو بعد كيف
بسوم: لا اقصد متى .. اوهووو شدراج مب متى
حمده: طرشت روز الصبح الصيدليه يابتلي فحص .. بس باجر بروح اتأكد عند الدكتوره
روضه: والله قولي والله ... الحمدلله يا ربي مبروووك .. اشكرك يا ربي .. (وهي تمسك تيلفونها ) بكلم سعيد بخبره انه بيستوي عم
حمده: لا صبري صبري مب متأكده .. باجر بروح العيادة وبعدين بخبر خالد قبل لين الحين ما يدري
عوشه: زين مبروك ... الخبر الثاني
حمده: خالد ما بيعرس (بعد هالجملة... الكل بهت في ويه حمده ... معقوله كيف وليش)
عوشه: كيف عرفتي
حمده: اليازية كلمتني وقالت لي
روضه: شو قالت لج .. وشدراها برقمج
حمده: ما ادري شدراها برقمي ... وتكلمت وايد بس هذا اللي جمعته من اللي قالته
***

في سيارة مبارك هو وسعيد .. كانوا رادين من دبي بعد ما خلصوا متسوقين عشان سفرهم ويا هلهم وكانوا يسولفون وسأل مبارك سعيد

مبارك: زين سعيد ... ليش ما تخطب روضه شو اتريا
سعيد: (وهو متفاجئ ) وليش اخطبها
مبارك: وليش ما تخطبها وانت خاطرك فيها ... تريد حد يخطبها قبلك وتعرس .. انت تدري ان روضه قمر ما اتفوت
سعيد: انت ما تعرف شي
مبارك: لا اعرف .. واي شي صار الحين جديم .. وانت تشوف انها تاخذ وتعطي وياك الحين
سعيد: انا ما اقدر اخطبها الحين
مبارك: ليش
سعيد: غير سالفة بوظبي ... كان لي يد فقي انها ترد سيف المحيربي ... وكان لها يد في سالفة نورة
مبارك: ويعني وشو لك خص في سالفة سيف
سعيد: سالفة طويله
مبارك: اوكي بعد ماضي
سعيد: وخالد
مبارك: شو فيه بعد
سعيد: واللي سواه في حمده
مبارك: انت مالك خص في خالد .. وهي تدري انك غير عن اخوك
سعيد: روضه مب من النوع اللي يغفر او ينسى الاساءة بسهوله
مبارك: انت جرب .. قول حق عمي
سعيد: واذا قالت لا .. شو بيستوي في البيت .. الجو بيتكهرب وكل شي بيخترب
مبارك: لا ان شاء الله ما تقول لا
سعيد: ونورة
مبارك: بلاها بعد ... الا تبغي شي اتعلث به
سعيد: حرام اجرح شعورها واخطب روضه بعد ما ودرتها ... خلها اول تلقى نصيبها وبعدين يصير خير
مبارك: يا رقيق انت

ما رد عليه سعيد ورد لافكاره ... لو خطب روضه هل ممكن تتجاهل كل شي مضى وتوافق عليه ... بعده يذكر انها قالت حق عوشه انها ما تريده لانه مثل اخوها ... يا ترى للحين هو مثل اخوها ولا في امل ان شعورها يتغير يوم من صوبه

مده ذيج الليلة ما قدرت تكمل ترتيب شنطتها او شنطة ريلها ... نزلت تحت تترياا خالد... كانت تريد تعرف شو السالفة شو صار ... صدق خالد غير رايه او انها حركة من اللي خاطبينها له ... مب قادرة تنسى ان خالد قالها انه يحب البنت اللي يريد يزوجها شو الشي اللي خلاه يغير رايه ... هل واحد من عمومتها ضغط عليه .. او هذا قراره بروحه دون أي ضغوطات
***

بعد ما وصلوا سعيد ومبارك العين ونزل سعيد بيتهم لانه كان تعبان ... كان تفكيره في النقاش اللي كان بينه وبين مبارك في السيارة .. هل فعلا هذا هوه الوقت المناسب عشان يكلم ابوه في موضوع روضه ... ولا يتريا شوي.. يدري ان ابوه ما بيوزه روضه قبل لا تخلص جامعه وهي باقلها سنتين تقريبا ... فليش يستعيل على الاقل عنده هالمده كلها عشان يقدر يغير مشاعر روضه تجاهه... ما يدري مبارك عن الاحساس اللي حسه يوم سمع روضه تقول انه مثل اخوها ... كانت طعنه حقيقية لحبه وقلبه وحتى لرجولته .. وهو يطالع كياسه وثياب السفر المفرورة في كل مكان في الحجرة تذكر فطوم وابتسم ... لو فطوم كانت موجوده ما كانت خلت حجرته جيه ... وكانت مجهزة له الشنطه ومرتبه اغراضه ... تذكرها مع ابتسامتها الحلوة وجملتها المعتاده اجهز لك الشنطه ... قالوا لريلها اذا بيسافر وياهم .. بس قالهم انهم بيسافرون ويا اهله فرنسا ... فر اكياسه على السرير ودخل يتسبح عشان يرقد
***

في حجرة عوشه .. كانن البنات الثلاث قاعدات يسولفن ويناقشن موضوع خالد ... كان هالخبر احلى خبر سمعنه من بدا الصيف .. والاحلى ان حمده اخيرا حملت .. يعني محد يقدر يقول انه فيها عيب او عاقر ... وطلعت بسوم راحت حجرتها بس قبل لا تدخل حجرتها شافت باب حجرة سعيد ملايم ... وليتاته شغاله ... بعد ما دقت الباب دخلت الحجرة بس سمعت صوت الماي في الحمام .. فراحت حجرتها تغير عشان ترد له بعدين ... اما روضه وعوشه بعد ما تمن بروحهن .. كانت عوشه تخز روضه وهي اتبسم .. وروضه اطالعها وتسألها شوفيج... بس تقولها ماشي ... بس اخر شي سئلتها

عوشه: (وهي تبتسم بخبث) وليش كنتي بتتصلين في سعيد تخبرينه ان حمده حامل
روضه: مالت عليج صدق .. هذا اللي في خاطرج وراسم على ويهج هالابتسامه الخايسه
عوشه: (وهي رافع حياتها) ابتسامتي السحريه خايسه .. بس ما عليه بطوف لج الحين ... بس ما قلتي ليش تتصلين فيه عشان تقوليله
روضه: يعني خبر حلو مثل هذا ادري انه بيستانس عليه ليش ما اخبره
عوشه: اهاااااااا وبس
روضه: وبس .. شو بيكون غير
عوشه: عيل ما قلتي بتصل في عبود
روضه: كنت بتصل فيه بعد ما اتصل في سعيد
عوشه: وليش سعيد اول مب عيود
روضه: سعيد اكبر
عوشه: بس
روضه: بس ... ولا تخلين تفكيرج المنحرف يوديج بعيد اوكي
عوشه: حليلني الحين انا تفكيري منحرف
روضه: اقول شي انا بروح ارقد احسن ... لا تسويلنا افلام هنديه وتشطحين وايد بخيالج

طلعت روضه من حجرة عوشه وسمعتها تضحك فابتسمت وهي تهز راسها وتروح صوب حجرتها ... وهي تسأل نفسها السؤال اللي سئلتها اياه عوشه ليش سعيد اول ... وبعدين ليش لا مب ولد عمها وحتى لو ما بغت سعيد يجبر اللي يعرفه انه يحترمه ويحبه...
***

خالد وهو راجع البيت كان يفكر في اللي سواه اليوم ... من نفسه ومن خاطره راح قال حق حميد بن بطي انه ما يريد ياخذ بنته مب لعيب فيها ولكن لانه بنت عمه يتيمه وما يقدر يكسر بخاطرها ... ومن الاساس حميد بن بطي كان متردد في موافقته .. ولو مب اصرار بنته ما كان وافق ... كان يعرف محمد بن منصور الرميثي ابو حمده.. ريال والنعم فيه ما قصر ويا أي انسان احتاج له ايام حياته وله افضال على الكل .. كيف يجازيه بإنه يوز ريل بنته وهي يتيمه مالها مكان غير بيت ريلها ... حميد بن بطي قاله الله يهنيك يا ولدي والزواج قسمة ونصيب .. اما بنته هي اللي احتشرت وعصبت ... خالد اكتشف انه حبه لليازية مجرد نزوه ... شي حب يوصله ويأكد لنفسه انه يقدر يتخذ قراراته بنفسه وصارله اللي يباه ... بعد ما خلص هالتحدي بانتصاره ... وفي لحظه صراحه ويا نفسه .. اكتشف ان حمده بالنسبة له سعاده .. اكثر من السعاده اللي يحصلها بالدس والحرام ... حمده سعاده مشروعه بالنسبة له ... كان يحس انها انفرضت عليه فرض .. بس اكتشف انه يحبها هي من خاطره .. يمكن انفرضت عليه في الاول بس الحين لا .. الحين هو اللي يريدها... بعد ما فكر في كل اللي صار وتحملها اياه بالرغم من معاملته اللي كانت جافه لها .. ووقفتها وياه جدام اهله في انه يجرحها ويظلمها .. اكتشف انها انسانه صعب انها تنوجد في هالزمن ... وانه محظوظ انه هو اللي خذها مب حد غيره ... بعد ما وصل ابيت دخل .. حصل حمده اترياه في الصالة .... ابتسم لها ودخل قعد عدالها

خالد: شو اتسوين
حمده: اترياك
خالد: اوه ... وتأخرت
حمده: اليوم وايد
خالد: هاهاهاها بس الساعه توها ثنتين.. وانا كنت اتأخر أكثر... هالكثر ولهتي علي
حمده: (تبتسم) ليش حرام اتوله عليك .. ريلي اصلا من تطلع لين ما ترجع وانا اتوله عليك
خالد: (رافع حياته) وليش ما اتصلتي فيني وقلتيلي انا اتولهت عليك ارجع البيت .. كنت رجعت على طول
حمده: تدري اني ما اريد اغثك ... لو كل ما تولهت عليك اتصلت جان ما لحقت تطلع من البيت
خالد: لا اتصلي انتي ما تغثيني ... انتي حرمتي
حمده: خلاص يعني هذا تصريح اني اتصل فيك أي وقت
خالد: ما يحتاي تاخذين تصريح حمده .. اتصلي أي وقت
حمده: (تبتسم) اوكي ماعليه
خالد: حمده ... اريد اقولج شي
حمده: آمر
خالد: حمده .. انا احبج (حمده اتفاجئت وبدت تحمر) حمده انا احبج انتي .. انتي وبس
حمده: واليازية
خالد: نزوة .. غلطه ... اللي تبينه ... بس مهما اغليتها فأنا ما اغليها مثل ما اغليج .. حتى وان حبيتها فأنا ما حبيتها مثل ما حبيتج انتي

هنيه حاولت تذكر حمده متى قالها خالد انه يحبها من يوم خذها لهليله ... ولا مرة هذي هيه المرة الاولى اللي يعترف لها بحبه ... بعد سنتين من يوم زواجهم اكتشف انه يحبها هيه ... كانت هالليله بالنسبة لحمده ليلة المفاجآت ... ريلها يحبها ... وهي حامل .. والاهم انه عشانها هيه ما بيزوج ... هنيه قررت تسأله

حمده: خالد انت بتعرس الشهر الياي
خالد: (اعتفس ويهه) لا حمده ... خلاص ما اريد اعرس ... ولا راح افكر بهالشي مرة ثانيه
حمده: (ابتسمت وقررت تخبره عن حملها ) خالد انا حامل
خالد: (بعد ما اختفت ابتسامته وحل مكانها دهشه ) قولي والله
حمده: اممم لين الحين ما رحت عند الدكتورة عشان اتأكد ... بس باجر بروح
خالد: كيف عرفتي
حمده: خذت فحص من الصيدلية
خالد: (وردت ابتسامته) اخيرا يا حمده ....مبرووووك
حمده: (وهي تبتسم) أي خالد صبر ما تأكدنا
خالد: باجر انا بوديج ... بس احساسي يقول انه فيه بيبي يجنن في الطريج

وقف خالد وشل حمده وراح فوق وهي تضحك وتقوله اينزلها

خالد: لا تخافين مب عشانج ... عشان ولدي اللي داخل بطنج
حمده: يا سلام ولو كانت بنت
خالد: بعد بنتي.. بس احساسي يقول انه ولد

شهدت هالليلة نهاية المعاناه بالنسبة لحمده وبداية حياة يديده ويا خالد ... حياة ودر فيها خالد اللعب والبنات وحركات المراهقين ... وخصوصا بعد ما راحت حمده العيادة وتأكد حملها ... عمتها ارتاحت يوم عرفت ان خالد ما يريد ياخذ بنت حميد... اتصلت واتعذرت من ام البنت .. صح كانت تكلمها من طرف خشمها بس ما همها يوم انها افتكت من هالهم ... الشباب استانسوا عشان بييهم الياهل الاول في البيت ... صح فطوم كانت حامل قبلها بس بعد ولد حمده غير...
***

كانت هالسفرة بالنسبة لهم كلهم غير ... اول مرة يسافرون كلهم بدون منصور الله يرحمه وبدون فطوم اللي سافرت ويا اهلها ... واول مرة يسافرون مع روضه وحمده ... في الاول محمد ولد سلطان كان يريد يروح عنهم جنيف... بس ابوه ما خلاه لانه كان يدري ليش يريد يروح جنيف في الاخير استسلم للامر الواقع وسافر ويا اهله كلهم ... عبود ما كان له مزاج سفر في الاول بس في الاخير اتشجع يوم شاف ربشة خواته ولانه مبارك ومحمد بيروحون

كانت سفرة مميزة وحلوة للكل ... كانن البنات اول مرة يروحن لبنان وهالمرة مب فندق حجزوا شقق مفروشه ... وحده لخالد وحرمته وياه روضه وعوشه والثانيه حق بسوم وامها وابوها ... وشقه حق بو منصور وحرمته وياهم محمد ... ومبارك خذ شقة له ولسعيد وعبود ... وروز وجينا في شقة بو خالد وام خالد
في هالسفرة عرفوا بعض زين كلهم ... وكانوا قراب من بعض .. حتى مبارك هالمرة كان غير عن كل مرة يسافرون فيها .. ما صارخ على عوشه او واجعها مثل كل سنة... كان يحاول يعاملها كانسانه باجر بيزوجها ... او يمكن عقده كلها انحلت واللي كانت تخليه يصارخ عليها... ولا كان يحبسها في الشقه ويفتن عليها اذا شافها بس في الممر ... في كل مرة كان مبارك يسوي رعب لعوشه ومن حظها ما كان يشوف غيرها في الكلدور في الفندق فتهزأ .. اما هالمرة حتى يوم يشوفها برع يبتسم لها ويروح وياها وين تريد تروح عشان ما تكون بروحها ... وهالمرة ما فكر انه يتعرف او يغازل أي وحده بالرغم من انهم كانوا يطلعون يسهرون بروحهم في الليل بعد ما يردون البنات البيت ... كان صح يتغايض ويسولف ويا عوشه بس بدون زعيج ولا تهزيء .. يمكن لانه في الرسدنتس اللي نازلين فيه ماشي لوبي عشان تنزل وتطالع حد .. او ما فيه شباب خليجين مثل سويسرا مع ان بيروت كلها خليجين ... حتى روضه وسعيد كان الوضع بينهم حلو ... اذا ما بغت روضه تطلع سعيد ما يطلع الا اذا اقنعها تروح وياهم او يقعد عندها ويخلي مبارك وعبود ومحمد يطلعون ويا بسوم وعوشه ... وهي عشان خاطره كانت تروح وياهم كل مكان
في شقة الشباب عبود ومحمد ومبارك كانوا قاعدين يتريون سعيد عشان يطلعون لان البنات قررن ما يطلعن لان روضه مالها خاطر تطلع ... دش سعيد عليهم وشافهم قاعدين يتريونه وجنهم شحاتين
عبود: وينك انت من ساعه نترياك
سعيد: ليش مضيع شي عندي
عبود: لا ياخي بنطلع وياك بنروح صوب افتر نايت البنات ما بيطلعن
سعيد: ليش
عبود: روضه اتدلع ... وهن تبع الشيخه روضه
سعيد: هاهاهاها
عبود: وممنوع تدخل تقولها تطلع ما صدقنا نفتك
مبارك: هيه صح... ذليتنا ماخذنا راحتنا من يينا هنيه
سعيد: زين بسبح وبييكم
محمد: خلاص انا بنزل قبلكم يوم بتخلصون عطوني كول
مبارك: اوكي
عبود: انا وياك اذا ما عندك شي سري بتسويه
محمد: لا تعال ما عندي شي ... بس ما بنخطف صوب نيكول مالتك هاي
عبود: طالع ها ... شو مالتك هاي بعد
محمد: لا تسويلي جدامهم شريف مكه
عبود: اطلع اطلع الله يخليك

طلع عبود ويا سعيد وهم يضحكون ... نيكول هاي كانت وحده دوم يشوفونها يوم يطلعون الصبح تسكن قريب من الفندق اللي نازلين فيه ... سوالف وضحك وياها ... حتى يوم يكونن البنات وياهم اتيي تسلم عليهم وتسولف شوي وتطلع معاهم مرات... وكلهم ذالين عبود عليها ومسمينه بو نيكول
**

اللي صدق كانوا مستانسين وكأنهم في شهر عسل .. خالد وحمده اللي كانوا يطلعون بروحهم سواء في النهار او يسهرون برع دون حد ما يقولهم شي ... تذكروا ان شهر عسلهم انقطع بوفاة منصور .. فقرروا يعيدونه في لبنان
في هالسفرة عرفت حمده خالد زين واتقربت منه مب بس كزوجه ولكن كصديقه وحبيبه... ما كان يخلي مكان ما يوديها وما يحب يطلع الا اذا كانت وياه... وهو بعد عرف عير حمده اللي تزوجها وعرفها في لندن... غير بنت العم اللي تمت في خياله حتى بعد ما عرس بها ... هالمرة حس ان حمده زوجته وحبيبته والانسانه اللي يريد يكمل عمره وياها... مب بنت عمه اللي رد من دراسته وتزوجها تحصيل حاصل

***
محمد كان وياهم صح ... بس قلبه كان في جنيف ... يسولف ويضحك بس بعده يتذكر المشادة اللي صارت بينه وبين ابوه قبل لا اييون لبنان عشان موضوع جنيف

محمد: ابوي مبارك بيروح وياكم انا ما اريد اروح لبنان
بومنصور: ليش .. وين بتروح
محمد: (نزل راسه وما رد وبعد نص دقيقه ) بروح جنيف
بومنصور: وليش منزل راسك وانت تقولها .. انا اقولك ليش لأنك تدري انك تسوي شي غلط ... وانت مصر على هالغلط بس عشان اتعاندني انا وامك وتحرق قلب امك
محمد: ابوي انا ما اريد اعاندك ولا احرق قلبها ... انت وياها اللي حارقين لي قلبي وانا ساكت .. قلتولي لا تدرس وارجع قلت ان شاء الله .. قلتلي اشتغل في المؤسسة قلت ان شاء الله .. كل شي تبونه قلت ان شاء الله ... بس عاد حتى السفرة اللي ارتاح فيها تبغون تحرموني منها
بومنصور: (وهو معصب) قلتلك ماشي جنيف لا السنة ولا أي سنة غيرها .... وجانك بتروح دون رضاي هكوه الدرب وقدامك الرحمن

نش ابوه وطلع من المكتب .... بس محمد في النهاية قرر يروح وين يريد ابوه واهله ... مب ضعف في شخصيته ولكن كان رضا ابوه وامه عنده بالدنيا كلها ... بيصبر يمكن في يوم يصير اللي يباه .. بيصبر يقولون الصبر مفتاح الفرج .... كان في البداية مضيج بس بعدين اتأقلم ويا الشباب والجو ...
ردوا من السفرة في نص ثمانيه نفس التوقيت اللي رجعوا فيه فطوم واهل ريلها .. عشان موعد ولادة فطوم في شهر تسعه ... وكانت مقررة تقعد عندهم في العين شهر تسعه عشان اتربي في العين عند امها ... .وريلها خلاها على راحتها
***

بعد سبع شهور في مستشفى الواحه في العين كانت حمده تولد ... كان وياها ام خالد وام منصور ... ويتريون برع فطوم اللي كان عمر ولدها سعيد اربع شهور وكانت مخلتنه في البيت عند بسوم .... وياها خالد اللي كان صدق خايف على حمده ... وكل شوي يدخل عندها الحجرة بس امه تروغه برع ... وروضه اللي قاعده ويا عمها ... اللي كان يحاول يخلي نفسه طبيعي بس من داخل كان يحترق اكثر من خالد ... عبود كان في الكلية وسعيد في بوظبي ...

بوخالد: خالد اقعد يا بوي .. خيلتنا وانت رايح راد ..ماعليها شر كل الحريم ربن قبلها
خالد: ( بعد ما قعد عدال ابوه) الله يساعدها يا ربي .. عوشه روحي شوفيها شحالها الحين
عوشه: ما بيخلوني ادخل .. بس ثنتين لازم يكونن عندها وداخل ثلاث مب ثنتين ... امي وعمتي وفطوم
خالد: (وهو معصب) لا تدخلين بس طلي وسئلي
عوشه: بسم الله شوي شوي علي ... وليش ما تروح انت .. انت ريلها مب انا
خالد: امي عصبت علي ... مافيني اخافها تفرني بشي
روضه: انا بروح اشوفها وبرد لحظه
خالد: مشكورة روضه
عوشه: زين عشان ما تقولون تبون عيال وايد ... انتوا ما تتعبون الحريم حليلهن اللي يشوفن الموت بعيونهن
بوخالد: شو هالكلام انتي الثانيه .. بسم الله عليها
عوشه: انا ما اقول عن حمده .. انا اتكلم بشكل عام
خالد: خليها تربي الحين .. وبعدين يصير خير
عوشه: تعال حجزت لها حجرة ولا قاعد هنيه من الصبح دون ما تسوي شي
خالد: خليها تربي اول بعدين بحجز لها
عوشه: طالع مبردك ومنو قالك بتلقى الحجر فاضية اترياك ... روح احجز لنا من الحجر الكبار ... اخافها تربي وبعدين ما نلقى غير من الحجر الصغار الجدام
خالد : اوووف .. الحين انا متفيج اروح احجز حجر
عوشه: قوم قوم .. بروح وياك نحجز لنا حجرة
خالد: روحي بروحج انا بتريا روضة ليش اتأخرت
عوشه: والله ولدك اللي بينولد هب ولدي انا احجز له
خالد: عوشه لا تحنين الحين على راسي .. تدرين اني مب متفيج

يتهم روضه ... وطمنت خالد على حمده وقالت له انها بخير بعدها شوي ...

عوشه: اقولج تعالي نحجز حجرة اخوي الشيخ من ساعتين قاعد ما قال انه ما حجز لها حجرة
روضه: (شهقت) ليش خالد ما حجزت اوووف لو حصلنا شي ... ما شفتهن الحريم كم كثر مربيات اليوم .. ياللا نروح عوشه
عوشه: (بعد ما نشت) اوكي ياللا
روضه: فطوم اتقولج اتصلي في بسوم شوفي اذا سعود يصيح ولعوزها
عوشه: لو لعوزها بتتصل اتخبرنا ... خليها تتحمل ولد اختها شوي ... دومه عندي انا
روضه: فديته والله
عوشه: اوووه الحين بيطيح كرت سعود بيي حمود
روضه: لا فديتهم هم الاثنين بس خلي انتي حمود ايي اول

بعد ما خلصن روضه وعوشه ولحسن حظهن حصلن حجرة كبيرة ... ردن وشافن الممرضة مطلعه البيبي من عند حمده وهي لافتنه بفوطه ... قبل لا تنظفه تراويه خالد وابوه اللي كانوا واقفين عند باب الحجرة ...

الممرضة: ما تريد تشيل بيبي مالك
خالد: لا اخافه يتعور
الممرضه: لا مافي عور .. انت شيل هو عشان يعرف انت باباه
بوخالد: شل ولدك ياللا
خالد: ما اعرف كيف
الممرضه: (وهي تعطيه البيبي) حط ايد مال انت تحت راسه منيه وثاني امسك فيها بيبي (كانت تتكلم وتراويه كيف يمسك ولده)
بوخالد: سم بسم الله عليه قبل لا تشله
خالد: بسم الله

كانت مشاعر خالد داخله غريبة .. احساسيس اول مرة يحسها ... معقوله في احاس بالحب مثل هالاحساس اللي يحسه تجاه هالبيبي الصغير.. كان وده يلوي عليه بالقو لو انه مب كان خايف انه يتعور ... احساس بانه لازم يكون مثل ابوه في معاملته لعياله .. هالانسان اللي في هاللحظه حس باحترام وحب له اكبر من أي مرة قبل واي حب كان ... كان يفكر في احاسيس ابوه هوه اكيد كانت مثله في هاللحظه يوم انولد خالد ... لانه اكبر عياله ... بعد ما حب البيبي على راسه ... كانن روضه وعوشه واقفات عدالهم يبن يطالعن البيبي ... بس خالد لف على ابوه وعطاه الياهل

خالد: هاه يا بو خالد .. هذا اول حفيد لك ... ياللا شو تبغي تسميه
بوخالد: ( وهو ياخذ البيبي من عند اولده) بسم الله عليك .. وهو يبتسم هذا مسماي قبل لا يطيح يا بومحمد .. هذا محمد بن خالد على يده محمد بن منصور الله يرحمه ...

حب بو خالد الياهل ... وقربه صوب روضه وعوشه عشان يطالعنه ... ورده صوبه عشان يأذن في إذنه قبل لا يشلونه ينظفونه كان مغمض عيونه بس فجهن يوم بدا بو خالد يأذن في اذنه ... كان خالد وعوشه وروضه و حتي النيرس يطالعون بوخالد ويبتسمون ... كان خالد يذكر يوم انولد ولد فطوم واذن في اذنه اول شي البنات احتشرن وقالن له انه اذنه رقيقه بس هزأهن وقالهن هاي سنه ولازم يسوونها وكلهم مأذنين في اذنيهم محد فيهم ياه صمخ

عوشه: بطل عيونه .. وايه فديت عيونه الحلوة (قرب خالد صوبها عشان يشوف عيون ولده وطلعت فطوم من غرفة الولاده وشافتهم واقفين والنيرس تطالعهم وتبتسم)
فطوم: انتوا بعدكم ما عطتوهم ينظفون الولد ويفحصونه ... خلوا الحرمه تشله
روضه: شو انا ما شبعت من شوفه
عوشه: ابوي يأذن في اذنه وبيعطيهم اياه
بوخالد: خلاص خلصنا ... (ورد بو خالد حبه على راسه)
فطوم: ماعليه بتشبعين منه بعدين ... (وشلت النيرس البيبي من عند بو خالد وحطته تنظفه وين الممرضات وياها ... ووصل الدكتور اللي بيفحص البيبي بالمرة )
خالد: فطوم ... اريد ادخل اشوف حمده
فطوم: لا صبر شوي مب الحين
خالد: شو مب الحين ... ابغي اطمن عليها
فطوم: ياربي منك .. الحين هيه تعبانه مب فايجه ولا بتدريبك
خالد: برايها ... المهم انا اشوفها بعيني واتطمن
فطوم: يعني امي وعمتي ما يسدن
عوشه: وانتي ليش غادية جيه خليه يشوفها حرمته
روضه: صدقها عوشه خلوه يشوفها
فطوم: اوكي ادخل وحصلك هزبه من عند امايا ... اقول حد من الدريوليه برع
روضه: هيه محي الدين برع .. اتصلت فيه وخليته ايي
فطوم: انا بروح البيت ... مخليه ولدي بروحه من الصبح
روضه: زين وطرشي روز يوم بتوصلين البيت ذلتنا من الصبح تتصل .. وهي مجهزه شنطة حمده والبيبي والاغراض كلها حق الحجرة
فطوم: حجزتوا حجرة ..
روضه: هيه
عوشه: اووه ما كلمنا سعيد .. قال اتصلوا فيني يوم بيشرف ولي العهد الاول
فطوم: لا والله وولدي شو
عوشه: ولدج انتي ولي العهد الاول حق يده سعيد
روضه: انا بتصل فيه

راحت عوشه توصل فطوم السيارة واتصلت روضه في سعيد تقوله ان حمده ربت ... اما سعيد فكان طالع بيي العين عشان يشوف الياهل ..بعد ما كلم محمد عشان ياخذ له اجازة يومين .. ويوم شاف رقم روضه ابتسم واستانس لانها هيه اللي متصله فيه

سعيد: الو
روضه: الو .. السلام عليكم
سعيد: اهلين وعليج السلام .. هاه بشري
روضه: مبروك عليكم ما ياكم ...
سعيد: الله يبارك فيج ... هاه بشري اخبار الياهل وامه
روضه: يسرك حالهم ... بخير ... والبيبي يجنن ماشاء الله عليه يشبهني
سعيد: لاه عيل اكيد حلو
روضه: اكيد ... فديته لو تشوفه يخبل
سعيد: انا ياي العين .. يوم بوصل المستشفى بكلمج عشان اتخبريني وين انتوا
روضه: اوكي
سعيد: سموه ولا بعده
روضه: اكيد سموه محمد
سعيد: زين زين
روضه: ياللا بخليك الحين بروح اشوف حمده ...
سعيد: زين سلمي عليها

بندت روضه عن سعيد وراحت صوب غرفة الولاده وشافت عمتها ام خالد برع قاعده عدال بو خالد تسولف عليه وفجت الباب ودخلت .. حصلت عمتها ام منصور قاعده عند راس حمده تقرا عليها وحمده راقده ... راحت حبة اختها على راسها وردت طلعت عند الباقين
**

اما سعيد فبعد ما بند عن روضه ... اتصل في مبارك يتخبر وينه لانه خلاص قريب العين بعد ما رد عليه مبارك

مبارك: هلا والله شحالك ولد العم
سعيد: بخير وسهاله .. يسرك الحال .. انت وين دارك
مبارك: انا بطلع من البيت ... ما حصلت فيه حد .. ما ادري امي وين
سعيد: لا والله مضيع امك انت
مبارك: هيه والله .. كنت راد بسولف وياها شوي .. بس ما حصلتها
سعيد: ليش انت ما تدري ان امك في المستشفى
مبارك: لا والله ... خير شوفيه .. لا تكون تعبانه
سعيد: لا فال الله ولا فالك ... خالد ياه ولد اليوم
مبارك: قول والله ... مبروووك تستاهلون ما ياكم
سعيد: الله يبارك فيك ..
مبارك: انت وين
سعيد: انا ياي العين .. بروح البيت وبمر المستشفى اشوف ولد خالد
مبارك: شو سموه .. اكيد مبارك .. فديته بروك الصغير بيطلع يجنن يشبهني
سعيد: هاهاها خسارة ما سموه بروك عشان يطلع يجنن ويشبهك
مبارك: افاااا ... ليش عاد ما هقيتها يسمي على غير ابوه
سعيد: ابوي مسمنه محمد قبل لا يطيح على عمك
مبارك: اخ .. الحين بيخق علي هالمحمد اللي عندنا .. بس ياللا ماعليه ... مر علي قبل لا تروح المستشفى بشوف الياهل
سعيد: ماعليه يصير خير

الولد انولد الساعة سبع المغرب ... خالد طلع يشتري الفروت والحلاوة بعد ما شاف حمده ... وام خالد وبوخالد ويا عوشه وروضه وام منصور وابو منصور بعد ما ياهم راحوا الحجرة اللي خذوها واللي كانت روز مرتبتنها ومغيره فرش السرير حق حمده يوم بييبونها ... ومعطرة المكان ومدخنتنه .. اما حمده فخلوها في غرفة الولادة عشان ترتاح وترقد ويوم بتنش بيودونها حجرتها وبييبون لهم البيبي اللي مخلينه في الحضانه ... الساعة عشر ونص دخلوا مبارك وسعيد بعد ما دقوا الباب وسلموا على الموجودين ... ووايهوا الشواب والعيايز

مبارك: عمي مبروك وصول ولي العهد الاول محمد الثالث (ضحكوا كلهم على مبارك)
بوخالد: الله يبارك فيك .. عقبال ما نشوف عيالك
بومنصور: قريب ان شاء الله
سعيد: هاه وين الياهل وامه وابوه
عوشه: ابوه ما وصل من طلع الظاهر مسكوه في الجبرة يبيع وياهم
سعيد: (يبتسم) لا والله .. زين وين محمد الثالث على قولة مبارك
ام خالد: شو محمد الثالث هاي بعد .. اسم الولد محمد بن خالد
مبارك: شو بعد مب هو ثالث واحد اسمه محمد في هالعايله .. محمد الاول عمي الله يرحمه .. محمد الثاني ولد سلطان بن منصور اللي هوه اخوي ... وهذا الثالث
روضه: اهااا يعني انت مبارك الثاني
مبارك: نعم نعم
سعيد: وين ام محمد وولدها
عوشه: ام محمد نايمه عندهم عن الحشرة هنيه ومحمد في الحضانه
سعيد : زين ما نروم نروح نشوف البيبي
عوشه: روح الحضانه وقولهم اريد اشوف حمده الرميثي بيبي
سعيد: زين حد ايي يودينا
مبارك: قومي روحي ويانا ... شدرانا نحن وين
عوشه: وين رحتوا تشوفون ولد فطوم
مبارك: زين قومي روحي ويانا
عوشه : مافيني .. روحوا بروحكم يهال بضيعون
سعيد: روضه قومي ودينا .. خلها برايها مبارك
روضه: (تبتسم) اوكي ... ياللا نروح

طلعوا مبارك وسعيد وروضه وياهم عشان اتراويهم وين الياهل ... ويوم وصلوا خلت النيرس اتييبه لهم ... كان راقد وشكله يجنن ... قعدوا عنده دقايق وردوا الحجرة لقوا خالد قاعد يتحرطم على الاماكن اللي راحهن ...

مبارك: محلاته يجنن ... فديت روحه محلاه ... لو اسمه محمد لكنه يشبهني انا
خالد: انت أي وين تبى ولدي يشبهك ليش ... لو بيشبه حد بيشبه ابوه .. طالع مزيون علي
مبارك: (بعد ما سلم على خالد) مبروك الطارش يا بو محمد تستاهل
خالد: مشكور والله يبارك فيك وعقبال ما نشوف عيالك
مبارك: فديتهم يوم بييون ... اقول عمي انا ابغي اعرس ... ابوي يوزني ياللا
عوشه: احلف بس انت
مبارك: ياللا ياللا اتزهبي بنعرس الشهر الياي
عوشه: لا تحلم وايد ... اول شي باقلي كورس وبتخرج ... ثاني شي باخذ سنة نقاهه من الجامعه .. وبعدين سنة اتجهز ... يعني تصبر سنتين ونص ... وبعدين بفكر اخذك ولا لا
بو منصور: ول يا بنت مبارك ... بتعيزين لين ما تعرسين
مبارك: اقول خلاص بعد سنتين ونص بخذج انتي .. ام منصور دويلي عروس اتجهز في شهر
عوشه: روح عسى الرب حافظنك
مبارك: اوكي بروح وبييب سلطان بن مبارك ومنصور بن مبارك ومحمد بن مبارك ...
روضه: ماشاء الله كلهم اولاد
مبارك: لازم ابوي ما عنده الا اولاد
ام خالد: ولو الله ما عطاك الا بنات
روضه: اذا ما ياه الا بنات بيسمي الاولى روضه
مبارك: مشكله تطلع مثلج ماحد بيروم لها
بوخالد: ودها الا تطلع مثل روضه
مبارك: زين خلاص بنسميها روضه وبنيوزها سعود ولد فطوم (وهنيه دخلت فطوم وهي شالة ولدها ووراها بسوم يايه وياها وسمعت مبارك يطري ولدها(
فطوم: (قبل لا تسلم) شوفيه سعود ولد فطوم ليش تطرونه) وراحن هيه وبسوم يسلمن على عمهن وعمتهن وراحت بسوم صوب ابوها وحبته وقعدت حذاله(
مبارك: ماشي اقولهم اذا يبت بنت ان شاء الله بسميها روضه وبيوزها ولدج سعود
فطوم: عرس انت اول
ام منصور: يزهبون القماط قبل لا ايي الياهل هذيلا عيال اليوم
بوخالد: خلنا نيوز الكبار اول بعدين يوزوا عيالكم انتوا
عوشه : ماعليه ماعليه خلوه يتكلم على كيفه ... يتحلم على راحته .. ترى الحلم مب حرام
مبارك: عمي انا اكلمك صدق .. بنتك باقلها هالكورس بس في الجامعه في الصيف انا بعرس
روضه: زين والله يوم شرفتينا بسوم
بسوم: تدرين اني ادرس ...
عوشه : حشا قلنا طب بس مب جيه
مبارك: برايها البنيه شاطره
روضه: حشا هب شطارة مرض ... يا ريال في الاجازة نص السنة تدرس ونه نحن نظام سنوات هب شراتكم كورسات ... من راحت توام محد يشوفها
سعيد: شو بعد البنيه طموحه ... بعد ست سنوات بتكون دكتورة بسمة
روضه: ونه ... ماعليه اتحداك ان ما عرست .. بتدرس واخر شي بتقعد في البيت
بسوم: تحلمين انتي ودج وبتشوفين
مبارك: اخوي محمد حد خبره انكم في المستشفى لا يرد البيت يدوركم
ام منصور: اوووه نسيت ولدي .. محد كلمه .. كلمه مبارك قوله نحن في المستشفى
بومنصور: انت ما رحت البيت
مبارك: رحت .. بس ما شفته
بومنصور: كلم اخوك
مبارك: ان شاء الله

اتصل مبارك في اخوه ... ويوم رد عليه

مبارك: مرحبا مليوون بو جسوم ... وينك انت
محمد: هلا والله مرحبتين ... هنيه في الدرب رايح البيت
مبارك: محد في البيت الحين .. لا ترد تقعد بروحك
محمد: (يبتسم ويقول في خاطره متى ما كنت بروحي بس ياللا شكله اخوي مبسوط) ليش وينكم وين امي وابوي
مبارك: نحن في المستشفى ...
محمد: خير ان شاء الله شعندكم
مبارك: حمده بنت عمي ربت .. يابوا ولد سموه محمد عليك تعال وقبل لا توصل مر البنك هات وياك السموه ... مب اقل عن عشره لو سمحت
محمد: هاهاهاها شو تصير لك عوشه بنت مبارك
مبارك: (يبتسم) بنت عمي وزوجة المستقبل ... ليش تسأل
محمد: لا سلامة راسك ... انا في الطريج ياي .. بس انتوا أي مستشفى
مبارك: الواحه .. تعال من ورا ... من باب الحجرة اللي على الشارع ... حجرة رقم **
محمد: اوكي ياللا مع السلامه
بعد ما بند مبارك عن اخوه سئلته عوشه على طول
عوشه: شو كان يقولك يوم قلتله زوجة المستقبل
مبارك: ماشي عن اللقافه
عوشه: لا قول
مبارك: اسرار بين الخوان
عوشه: قول عاد عن المصاخه
مبارك: ياللا عاد بس قلت ما بقول يعني ما بقول
عوشه: مبارك بتقول ولا
مبارك: مب قايل ... قلتلج سر بيني وبين اخوي ... شو هاللقافه (وصد على عمته ام خالد) اقول عموه كنتي تدخلين بين عمي وابوي ... وتسئلين شو يقولون يوم يسولفون ويا بعض
ام خالد: اسأل عمك
بوخالد: هاهاهاها ما ادريبها
ام خالد: ومتى كنت انا ملقوفه هاه
مبارك: عيل عوشه من وين يايبه هاللقافه

هنيه ضحكوا كلهم ... وكملوا سوالف عن كل شي لين ما وصل محمد وبعد ما سلم على عمه وعمته وعيال عمه بارك لخالد على الولد

خالد: ما قالك اخوك مرالبنك هات السموه
محمد : فالك طيب .. بس الحين البنك مبند
عوشه: البنك بند بس فيه مكاين
مبارك: هاه ياللا رد عليها
محمد: ما تسحب الا عشره في اليوم وانا اليوم ساحب بالمكينه عشره
روضه: يعني عندك عشره وينهن
محمد: هاهاهاهاها سحبتهن عشان اعطيهن سمير يعطي عمال مزرعة العين رواتبهم
خالد: نتريا السموه باجر
سعيد: لا يا ريال .. نحن بنأجل سموة محمد لين ما يكمل 18 سنة وعليك تيرله اول سيارة ياخذها ... تكون يديده وفورويل
خالد: هيه صح صدقه
محمد: فالك طيب يا ولد العم ... انير له سياره بعد ال18 ان الله احيانا ... وباجر بعد بنيب له السموه
روضه: لا تنسى لو سمحت اختي تراها هي اللي تعبت فيه .. لازم اتييب لها هديه بعد .. مر مجوهرات المسعود ولا منصور قبل لا اتيي
محمد: هاهاهاهاها ان شاء الله
عوشه: هيه صح وانت خالد بعد ... ما بتشل ولدك لين ما نشوف هدية ربى حمده تفهم ولا
خالد: انا وحرمتي بنتفاهم ... يمكن ما تريد شي من المجوهرات
عوشه: لا اسمحلنا .. تمر المجوهرات يعني تمر
مبارك: (يكلم سعيد) الحمدلله ... نحن طلعنا من السبة
روضه: منو قال ... انتوا بعد وانت بالذات من خطبت بنتنا ما شفنا يبتلها شي .. اتييب لحمده ولعوشه
مبارك: لا والله ... زين نحن حليلنا موظفين حكومه .. هم رجال اعمال يرومون على المسعود ومنصور .نحن يا دوب نقدر على النوخذه يمشي
روضه: ياللا عاد انت تروح مجوهرات منصور واتييب هدية حق حمده وعوشه
عوشه: اقول خذ من عند ابوك ما بيقول لا ... (كانوا بو منصور وبوخالد يسولفون ويا حريمهم والعيال يسولفون بروحهم بس عوشه زقرت على عمها) عمي لو سمحت عط مبارك بيزات عشان ياخذ هدية حق حمده
مبارك: هاهاهاهاها تقصد حقها مب حق حمده
بومنصور: (يبتسم) ان شاء الله جان اللي عنده ما يسده بنعطيه
ام خالد: خلوا عنكم هالسوالف ... وحد فيكم يروح اييب لنا عشا .... دام انه كلكم هنيه
مبارك: حتى في المستشفى ..
خالد: انا من شوي ياي وهلكان ... ما بروح
سعيد: ان شاء الله امايا ... بس شو تبون
فطوم: روح الخروف ييب لنا مشاوري .. يعني شو بتيب يا حظي
روضه: ولا تنسى العصاير ... اريد كوكتيل
عوشه: وانا بعد
سعيد: صبرن صبرن ... انا بطلع الحين ويوم بوصل بتصل فيكن
محمد: لا انت روح ... وانا بتصل فيهم وبنطلب بنخليهم يجهزون الطلبية ويوم توصل يبها
مبارك: اذا هم يوصلون خلوهم اييبونه لين المستشفى ما في داعي حد يروح
سعيد: خلاص عيل ... اتصل محمد شوفهم

اتصل محمد في المطعم وطلب اللي يبونه وقعدوا يسولفون لين ما وصل العشا وبعد ما تعشوا ... طلع بو منصور وام منصور ... وقعدوا العيال شوي ... وبعدين طلعوا الشباب وبوخالد .. لان ام خالد بتبات في المستشفى .. وفي الاخير تقرر ان عوشه اللي تبات وياها لان محاظراتها بالباجر تبدا الساعة عشر ... وردن الباقيات البيت ويا محي الدين وروز اللي وصتها ام خالد يسوون دلال القهوة والشاهي وتيي باجر من الصبح يوم بيطلع الدريول يوصل بسوم وروضه الجامعه.. الساعة وحدة ونص في الليل يابوا حمده حجرتها بعد ما نشت ... بس خلوا ولدها في الحضانة .. وبالباجر الصبح يابوه لها عشان ترضعه

بالباجرالصبح خالها حمد وحرمته يوها يشوفونها ويتحمدون لها بالسلامة ويشوفون ولدها اللي الكل كان يترياه .. اول ما شافه حمد سم عليه وشله

حمد: ماشاء الله عليه يا حمده .. يجنن يشبه رويض يوم مولوده
حمده: وينها تسمعك ... بتستانس وايد
حمد: وينها هيه الحين
حمده: في الجامعه .. بتي الظهر يوم تخلص جامعه
ام سعيد: عطني الياهل بو سعيد اشوفه
حمد: سمي بالله (شلت حرمته البيبي وحبته)
ام سعيد: هاه حمده بتين عندنا لين ما تطلعين من الاربعين ولا بتمين في العين بعد
حمده: لا وين اخلي ريلي وروضه واروح دبي .. بقعد بيت عمي وبعدين برد بيتي
ام سعيد: كان خاطري اتيين عندنا .. من زمان ما شفنا ياهل
حمده: انتي بعدج صغيرة وخالي صغير ياللا هاتوا خطيبه حق حمود
ام سعيد: هاهاها خلينا نربي هالعفاريت اول ... اربعه ومب رايمين لهم يشوبون بلد من شطانتهم
حمد: (وهو يبتسم) كبروا العيال ... وشطانتهم خفت الا انتي تدلعين
ام سعيد: حمده سكتي عن خالج لا يحشرنا بعدين يبى ياهل
حمده: ان شاء الله
حمد: ياللا يا حرمه خلينا نرد دبي عيالج بيطلعون من مدارسهم بيردون البيت ما بيحصلون فيه حد
حمده: خالي ما قعدتوا
حمد: ماعليه يا حمده اليهال بيطلعون من المدارس .. ان شاء الله مرة ثانيه
ام سعيد: ماعليه بنمر عليج ويا العيال عشان يشوفون الياهل
حمده: حياكم في أي وقت

وطلع خالها وحرمته بعد ما قهوتهم ام خالد وضيفتهم .. وحلفت عليهم يقعدون بيتغدون بس ما طاعوا عشان عيالهم اللي في المدارس ووعدوها ايوون مرة ثانيه

من عرفن اهل ام خالد واهل ام حمده وابوها ان حمده ربت .. وهن ماشاء الله يزورنها ... حتى اللي في دبي ين يشوفنها ويتحمدن لها بالسلامة .. كان المستشفى زحمة كله حريم .. وخالد ما يقدر ايي يشوف حمده وولده الا في الليل ... وكل ليله ابوه وعمه والعيال ايون المستشفى عشان حمود الصغير وامه ...

في الويك اند يوم الاربعاء يوم رجع عبود وعرف ان حمده ربت استانس وايد .. مع انه كان يقولها كل جمعه قبل لا يروح تترياه لا تربي قبل الويك اند ... وفي الليل يوم خلاص الحريم يروحن .. راح المستشفى عشان يشوف البيبي ... اول ما دخل وبعد ما سلم تم يتحرطم على حمده

عبود: ماعليه ماعليه .. يعني ما رمتي تصبرين يومين .. عشان اشهد ولادة ولي العهد
ام خالد: وابوي عليك .. اتريا يوم بتاخذ حرمه خلها اترياك
عبود: عيل اتروم اتربي وانا محد .. بخليها ترده داخل بطنها ما اباه
حمده: هاهاهاهاها هيه ما عليه .. حزتها بتقولك متفيج انت .. واجلب ويهك احسلك
عبود: لا فديتها يا ربي بنت مؤدبه ما بتقول جيه
ام خالد: من هاي
عبود: اللي بخذها بعد منوه
ام خالد: هيه ومن الحين اتفدى
عبود: ولدج رومنسي شو تقولين انتي .. وين الياهل بشوفه ( وراح صوب منز الياهل)
ام خالد: نايم .. خل الصبي لا توعيه
عبود: الا بشوفه لا تخافين عليه .. ما اكل اليهال

شل عبود البيببي وتم يحببه ويتفداه لين ما اذاه ونش يصيح .. فواجعته امه وهو يضحك وعطاه حمده وطلع الحجرة الثانية اللي كانن البنات قاعدات فيها ... ويوم سمعن ام خالد تواجع عرفن انه مسوي شي خاصة وانه طالع يضحك من عندها

روضه: شو سويت
عبود: ماشي .. هالبزيه صاح وامي واجعتني
عوشه: الحين الولد عمره ثلاث ايام استوى بزيه ... مالحق
عبود: عيل مسود الويه يباغم وانا شالنه
روضه: لعوزته اكيد
عبود: فديت انا سعود... اللي اسويبه اللي اباه وما يباغم .. الا وينهم ما يوا من دبي
روضه: لا امس رايحه ويا اهل ريلها .. من اسبوع هنيه... راحت وبترد باجر ...
عبود: وين خالد ما بيي
عوشه: بعدهم شوي ... اقول انت ياي من البيت
عبود: هيه ليش
عوشه: ما شفت بسوم
عبود: لا منزرعة في حجرتها ... بتخترع دوا حق الايدز
روضه : هاهاهاها ماعليه ان ما خبرتها عليك
عبود: والله قاصه على عمرها .. نحن اربع سنين ولاعت جبودنا .. خلاص باقيه لنا سنه وبنفتك
روضه: هيه والله
عوشه: انا بخلص قبلكم باقلي كورس
عبود: هيه مبارك يتريا
عوشه: زين شو اسويبه الله يعطيه
روضه: انا بروح اشوف حمود تولهت عليه
عبود: روحي عشان اتروغج امي ... حشا جنه زجاج بينكسر لاحد يصكه
عوشه: يا حمار هذا بيبي ما يتحمل
عبود: روحي روحي انتي الثانيه ... اقول روضه
روضه: نعم .. قول
عبود: امس اهل حميد يو عند حمده
روضه: هيه ليش تسأل
عبود: منو ياي منهم (رفعت عوشه حياتها وهي تطالعه وتبتسم(
روضه: منو ياي بعد امه وحرمة اخوه وخواته
عبود: منو خواته
عوشه: سارونه مالتك يت .. خلاص ارتحت
عبود: اخ ... يعني ما راموا يأخرون يوم واحد
عوشه: لا والله .. وشو كنت سويت
روضه: كان بيرابط عند باب المستشفى يترياها

ضحكن عليه وهو تم يضحك وياهم ... بس اللي ما يعرفونه انه ما يحتاي انه يرابط عند باب المستشفى خلاص لانه شافها يوم اخته مربي... كانت اتيي كل يوم ويا امها وحرمة اخوها ... ودخل من باب حجرة فطوم وما كانت متغشيه وطلعت الحجرة الثانية ويوم سئل فطوم قالت له انها سارة اخت حميد

عبود: لا صدق ما انخطبت بعدها
روضه: لا بعدها...
عبود: ياللا عاد قولن حق امي ...
عوشه: وليش ما تقولها بروحك
روضه: اتخرج اول من الكلية ويصير خير
عبود: ولو نخطبت ما بسامحكن
عوشه: هاهاهاها عبود شياك اخوي من متى تهتم هالكثر والله في غيرها وايد
عبود: عاد انا اريد هاي
روضه: لا والله اشمعنى
عبود: اسمها عايبني
روضه: (تبتسم) خلاص اذا انخطبت بدور لك وحده اسمها سارة وحلوة بعد
عبود: ياللا عاد
عوشه: شوف امي ما بنكلمها .. البنت بنخلي بسوم تكلمها لانها تموت في بسوم شو قلت .. بس بعد ما اتخرج ما تفشلنا ... وتلبسها
عبود: فديت خواتي انا علني ما خلى منهن يا ربي
روضه: بس خواتك
عبود: وانتي شيختهن واختي بعد
روضه: زين عاد لا تفشلنا
عبود: والله ما افشلكن .. على الاقل احسن من يأجوج ومأجوج اللي امي مصرة على وحده منهن
روضه: هاهاهاها في هاي صدقك

بعد ما كملت حمده في المستشفى خمسة ايام ظهرت من المستشفى ... وراحت بيت عمها عشان عمتها تساعدها والبنات بعد ... يلست تحت في حجرة الضيوف اللي سكنها خالد قبل لا يزوجها ... وهم يالسين في الليل في الصالة ... وحمده وياهم هي وولدها اللي كان يده ماسكنه يلاعبه .. وام خالد اتحرطم على ابو خالد عشان ايرد الولد لا يعوره

بوخالد : شو يا نورة تغارين ليش ان الولد عندي انتي مب شالتنه
ام خالد: ليش اغار .. الحمدلله شليت عيالي وعندي ولد فطوم بعد
روضه: لا عمي تغار عليك لا تحب حمود اكثر منها (وضحكوا على ام خالد كلهم(
ام خالد: ماعليه يا بنت موزة الحين انا اغار من الياهل هاه
عوشه: اعتراف ان امي تغار .. امايا من منوه تغارين
خالد: تغار من السكرتيرة الحلوة اللي حاطنها ابوي له في المكتب
ام خالد: أي سكرتيره جيه وعبدو وين راح (وهي تخز بو خالد(
بوخالد: هاهاهاها سلط الله على بليسك من ولد .. أي سكرتيره هاي
خالد: (وهو يبتسم) عبدو حاطنه عند البداله عشان اذا اتصلتي يرد عليج
روضه: عمي حاط سكرتيره من ورانا
بوخالد: انتن تصدقن هذا لا سكرتيره ولا غيره ...
خالد: هاهاهاها
روضه: لا تصدقينه عموه تلقينه هوه اللي عنده سكرتيره
خالد: يا حسرة وابو خالد موجود ماشي جنس لطيف في مكاتبنا كلها
عوشه: ابوي بيرفعون عليك قضية .. وين المساواه
بوخالد: هاهاهاها ماعليج منه

دخل هنيه سعيد ياي من برع وسلم عليهم وقعد عدال ابوه عشان يلاعب الياهل

سعيد: تصدقين حمده .. الحين حمود يشبهج
خالد: افاااا ... اشوف ابوي لا لا يشبهني انا وين تبى انت
سعيد: شو وين ابى ... يا بوي الولد دومه يرد على خواله
روضه: يا سلام يعني اخر شي بيرد علي .. فديته ولد اختي يا ربي
سعيد: انتي وين تبين قلت خواله هب خالته ...
روضه: انا خواله وخالاته ويدته ويده وكل شي
سعيد: زين خلاص بعدين بيرد على روضه وبيحبها اكثر من عمومته وعماته .. ولا تزعلين
روضه: غصبن عنه يحبني انا خالته الوحيده .. اما عماته ثلاث وعمومته اثنين
بوخالد: اقول سعيد الولد بيكمل اسبوع باجر .. روح العزبة وخل شفيق يتنقى احسن قعودين ويعقرهن عجيجه عن الولد .. ويوزعهن هوه بمعرفته .. بيعرف منوه يعطيه .. قوله ابوي يقولك هذي عجيجة ولد خالد ... وبعد باجر بنغدي جيرانا واهلك ... خله يعقر احسن حوار عنده ... ويذبحون ذبايح ثلاث حق الميلس وداخل البيت حق الحريم .. لا تنسى يا ولدي
سعيد: ان شاء الله ابوي .... القعدان باجر ... والحوار بعد باجر
بوخالد: هيه

مرت الايام وبيت بو خالد في هدوءء واستقرار .. الايام تمر عليهم حلوة خاصة بوجود حمود الصغير ... ويوم ايي سعود ولد فطوم من دبي صح يدمر الدنيا بس كان عسل على قلوبهم ... خلص الكورس .. ونجحت عوشه وتخرجت من الجامعه .. وحتى بسوم وروضه نجحن في مساقاتهن في شهر سته كمل ولد فطوم تسع شهور ... وولد حمده خمس شهور وتوه بادي يحبي ...اما ولد فطوم يعلمونه يمشي ... بس كان كسول وخواف ما يطيع يمشي ... والبنات من خاطرهن وافقن انهن ما يبن يسافرن السنة عشان حمود ما يتلعوز في السفر ولانهن ما يقدرن يخلن حمده وحمود ويروحن عنهم ...
كانت فطوم عندهم في نص شهر سته ... بعد ما خلصن كلهن امتحانات وطلعن نتايجهن ... كانن قي بيت حمده يسولفن

فطوم: هاه عوشه متى بتسوين حفلة التخرج مالتج
عوشه: ما ادري يمكن اتريا شوي ... لين الشتا يوم بيخرجونا هم ... بعدين بسوي حفلة في الحديقة مالت بيتنا
بسوم: من كبرها حديقة بيتنا
عوشه: ماعليه بتكفي ... الحريم بيدخلن البيت والبنات بيتمن برع
روضه: لا والله والطبابيخ والبيادير وين بتفرينهم
عوشه: بنغطي البقعه اللي بنسوي فيها الحفلة وبنقولهم لا يون جهتنا
بسوم: صراحه ولهت على عبود بعده ما طلع .. من شهر حاجزينهم في الكلية
روضه: هيه والله ... ياللا ماعليه هانت باقي سنة وبيفتك
فطوم: والله وبيستوي ضابط .. اخافه الا يخق علينا صدق
روضه: لا فديته عبود سوالف الا
عوشه: اقول فطوم ... سارة اخت حميد محيرينها لحد
فطوم: لا لطوف اللي محيره لولد عمها
روضه: مع انها حلوة وفنانه
فطوم: الله يرزقها
عوشه: بطيع اذا خطبناها لعبود
فطوم: ما ادريبها ... بعدين تدرن ان عبود امي تبغيله وحده من بنات عموة مريم
روضه: وع الله يخليج .. سارة احسن

نزلت حمده من فوق وهي شالة ولدها وقعدت وياهم .. بس غيرن الموضوع وتمن يسولفن عن العيال ... كان ولد فطوم راقد ومخلتنه في بيت ابوها ... وقايلة حق الخدامة اذا نش قبل لا ترد اتييبه لها
**

في بيت بو منصور ... كان يالس بو منصور ويا ام منصور بروحهم لان العيال بعدهم برع ما ردوا ... كانوا يسولفون عن ولد حمده وولد فطوم والعيال

ام منصور: ترى عوشه خلاص خلصت جامعه يا بو منصور .... لو نيوز مبارك الحين يكون احسن .. شله نأجل بعد
بو منصور: زين
ام منصور: كلم بوخالد يا سلطان خلنا نيوز العيال
بومنصور: يصير خير
ام منصر: سلطان انا اكلمك الحين عشان اتيوز ولدك وانت ترد علي بكلمه وحده ... شو الحين بتكلم اخوك ولا
بومنصور: ان شاء الله .. يوم بشوفه بقوله ... بعد تامرين على شي
ام منصور: هيه ... لا تأجل العرس لين الشتا او شهر واحد ... البنيه خلصت خلاص ما وراها شي بتزهب في شهرين ثلاثه وبتخلص
بومنصور: ان شاء الله .. فيه شي بعد
ام منصور: عطهم قد ما يبون عشان يجهزون عوشه ...
بومنصور: ان شاء الله
ام منصور: وكلم ولدك محمد اذا ما سافرنا كلنا ماشي سفر بروحه
بومنصور: يا ام منصور محمد هب ياهل ويشتغل طول السنة شغل اليهد ... خليه يروح يفرج عن نفسه شوي
ام منصور: يعني ما تدريبه وين بيروح
بومنصور: خليه برايه ... يروح وين ما يريد .. ولدج ريال هب صغير
ام منصور: انا بخطب له
بومنصور: لا.. لا تخطبيله الحين ... اتريي شوي لين ما يعرس مبارك وسعيد ولد عمه
ام منصور: ليش ... مبارك بيعرس الحين ... لكن سعيد ما يندرابه بعد ما فجوا خطوبتهم
بومنصور: انتي صبري لا تستعيلين
ام منصور: واذا راح وخذها من ورانا
بومنصور: ما بيوزونه بروحه ... ليش البنت ما عندها اهل
ام منصور: ما يندرى يا بو منصور .. والله خايفه من سفره بروحه ... وروحاته ورداته صوبهم
بومنصور: ماعليج هوه ما بيعرس الا برضاج .. صبري على الولد ولا تستعيلين

وسكتوا لان مبارك واخوه دخلوا وهم يسولفون عن السيارات ... مبارك يريد ياخذ سيارة يديده ... وقاعد هوه واخوه يتشاورون في شو من السياير ياخذ ... بعد ما سلموا على ابوهم وامهم قعدوا وكلموا كلامهم

مبارك: بعدني بشاور نفسي وبقولك شو اريد
محمد: مبارك انا بسافر بعد اسبوع ... خلص الحين او خل ابوي يوقع لك الشيك ويعطيك البيزات اللي تباهن
بومنصور: شو عندكم
محمد: السيارة اللي يريد ياخذها مبارك من اسبوعين قاعد يشاور نفسه ولين الحين ما اختار
ام منصور: مب عندك ثنتين شعنه هالبطره كلها
مبارك: امايا انا من سنتين ما غيرت ولا وحده من سياراتي
بومنصور: وشو تبغي الحين
مبارك: لين الحين اكس فايف
بومنصور: لا ما تريد فورويل .. بتعرس الحين خذلك صالون
مبارك: زين شو دخل السيارة بالعرس ... انا خاطري فيها
ام منصور: صدقه ابوك عندك نيسان واستيشن بسك خذلك سيارة صغيرة
ابومنصور: محمد خذله بي ام اليديده اذا يريد ... او حتى مرسيدس
مبارك: اوهووو السيارة حقي ولا حقكم انا اريد اكس فايف
محمد: (وهو يغمز لمبارك عشان يسكت) ان شاء الله ابوي
مبارك: اوكي مب مشكله .. انا بروح ارقد
ام منصور: من متى انت ترقد من وقت .. ولا مب عايبتنك رمستنا
مبارك) :وهو يبتسم) افااا يا ام منصور منو ما يعجبه هالصوت الحنون ... كروان كروان (ضحكوا بو منصور ومحمد على ام منصور اللي كانت تبغي تواجع مبارك وحتى هيه ابتسمت غصب عنها(
ام منصور: روح ارقد ابرك عن رمستك الخايسه هاي
مبارك: افااااا يا ام منصور ... رمستي خايسه .. غيرج تترجاني اعطيها نظرة او كلمه وانتي تقولين رمستي خايسه
ام منصور: الله يعين بنت عمك عليك روح
مبارك: لا في هاي عاد ظلمتيني الله يعيني انا عليها

وطلع مبارك بسرعه قبل لا ترد عليه امه او يهزبه ابوه وراح حجرته يتريا محمد كيف بيحل ازمة انه يريد الاكس فايف وابوه يبغيه ياخذ الصالون ... شوي ودخل محمد جناح مبارك وقعد في صالته يترياه .. وطلع له مبارك من داخل

مبارك: هاه كيف بتحل السالفة
محمد: يعني بي ام صغيرة او كبيرة شو الفرق كلهن بي ام
مبارك: عاد انا في خاطري الاكس فايف
محمد: يوم قالك ابوي لا... صارت في خاطرك لو قايل امس كنا خلصنا السالفة وخذتها
مبارك: عاد اللي صار
محمد: خلاص خذ مرسيدس .. وانا بقوله اني ابغي الاكس فايف وخذها
مبارك: اهااااا ... وانت بتاخذ المرسيدس بعدين
محمد: لا انت بتعرس بتحتاج لها
مبارك: بلاكم بتعرس بتعرس اللي يسمعكم يقول باجر بعرس .. يصير خير لين العرس
محمد: المهم الحين شو لون السيارة اللي تباها
مبارك: خلاص انا بمر عليك المكتب باجر وبنتفاهم على كل شي
محمد: اوكي ... ياللا تصبح على خير بروح ارقد
مبارك: لا صبر وين تروح ترقد ... ما قلت لي وين بتسافر
محمد: ليش بتخاويني
مبارك: ونخلي ابوي بروحه لا ... بس قول وين
محمد: بروح جنيف .. من كم سنة ما رحنا
مبارك: اهااااا ... زين ماعليه
محمد: صدق ما بتي وياي
مبارك: لا واخلي ابوي بروحه .. ما يهون علي الشيبه
محمد: ان ما خبرت عليك امي .. ما تروم تخلي ابوي وامي برايها
مبارك: هاهاهاها لا بس يعني انا اقصدهم اثنيناتهم
محمد: ولا مب قادر على بعد الخطيبه
مبارك: ليش انا عندي خطيبه مثل الناس .. من شافتني استلمتني ... غيرها تقول لخطيبها حبيبي وبعد عمري وحياتي ... وانا تقولي ما عندك سالفة وشو يايبنك بيتنا ... وانت شعندك ... وفكنا من الحشرة والصدعة
محمد: هاهاهاها بس بعد بنت عمك وهالمرة انت اللي قلت تبغيها... بعدين التميز حلو.. بنت عمك غير عن كل البنات
مبارك: ماعليك صح لسانها طويل .. بس طيبه ... من تتعود على طولة لسانها خلاص
محمد: اهااا وانت تعودت على طولة لسانها
مبارك: تعودنا غصبن عنا مب بكيفنا
محمد: تذكر يوم تقول لو اخر وحده ما خذتها
مبارك: هذاك اول ... ما كنت اعرفها زين ..
محمد : والحين
مبارك: الحين اعرفهم زين من اكبر واحد لين اصغر واحد فيهم
محمد : الله يرحمك يا منصور .. تعال شوف مبارك .. اول يحن عليك عشان تروح وياه بس يوم الجمعه بيت عمي ... والحين انت اللي مطيح هناك اربع وعشرين ساعة
مبارك: يا ريال العمر كم فيه ... منصور راح ... واخر شي قاله لسعيد اتصل في مبارك
محمد: الله يرحمه
مبارك: لو شفت سعيد ذيج الليلة ... اول ما شفته انا واللي خبروني اياه الشباب .. ساعتها عرفت انه كان مب بس ولد عم ورربيع منصور كانوا اكثر من خوان ... كان سعيد وحيد وايد بعد منصور وانا كنت مثله
محمد: اذكر يوم اتواجعون لانه يودرك ويروح ويا سعيد
مبارك: (يبتسم) كنت انقهر صدق ... واطلع غيضي ايام السفر في عوشه اللي كانت تلاسني
محمد: ما كانت تدانيك يا ريال ...
مبارك: هاهاهاهاها وناسة من يوم كنا صغار وهي ما تدانيني ... بس اخر شي انا اللي باخذها وبدانيني غصب عنها
محمد: الله يوفجكم ... ياللا عاد خلني بروح ارقد عندنا دوامات باجر ان شاء الله

وطلع محمد عن مبارك بيروح يرقد .. وابتسم مبارك وهو يذكر اخوه الله يرحمه ... وفي خاطره يقول شفت يا منصور اني انا اللي مثلك في كل شي .. وانا اللي بخذ وحده من بنات عمي ... اه بس لو كنت موجود كنت بسوي اللي تباه واكثر وبروح وياك وين ما تريد ... مب بس وياك انت وسعيد... بس لو خلاص ما تفيد ... الله يرحمك يا اخوي
رجعت الذكريات لمبارك غصب عنه بالرغم من انه كان يحاول يتجاهلها ... يتذكر طفولتهم خوانه وعيال عمه ... كانوا قبل لا يتحولون الفلل يسكنون بيت واحد كبير كلهم ... حتى عمه محمد ... كانوا الخمسه دوم مع بعض خالد ومنصور وهوه وسعيد ومحمد ... وبعد ما تحول كل واحد من الاخوان بيت ... بعد خالد وتم هوه ومنصور وسعيد ومحمد ... سعيد ما كان يقدر يستغنى عن منصور من ايام ما كانوا صغار ... كان واحد من خوانهم ... وكل ما زادت علاقة سعيد بمنصور كان مبارك يبعد ... في مرحلة المراهقة بدا مبارك يتذمر من علاقة اخوه بولد عمه .. وبينه وبين نفسه اعترف انه كان يغار على اخوه من سعيد ... ورد لخواله وعيال خواله واتمسك منصور ببيت عمه بعد ما اتمسك بفطوم ...
تذكر سوالف منصور عن فطوم وعرسه اللي يريده يستوي ... والفرحة اللي فرحها يوم حددوا العرس ... تذكر المرات اللي كان يترجاه منصور عشان يروح وياه بيت عمه ... والمرات اللي كان يخليه يتصل في سعيد يعتذر له لانه يخليه يطلع وياه ...
الشي اللي رده لسعيد يوم الحادث اللي سواه اخوه ... عمره ما تمنى يكون في موقف سعيد ويموت اخوه او واحد من عيال عمه في ثبانه وجدام عيونه ... حس بعجز وضعف سعيد ... والوحده الفضيعه اللي حسوا بها هم الاثنين قربتهم من بعض ...
حتى في السفرات كان يطبع ويا ربعه ويخلي اخوه ويا ولد عمه ... كان يغيض على منصور لانه يروح ويا سعيد ويخليه .. ما كان يحب يروح وياهم حاول يتذكر اعذاره بس اكتشف انها كلها سخيفه وابتسم يوم مرت عوشه في خياله .... عوشه اللي كانت تتحمل غلاسته .. حتى جدام خوانها وابوها كان يهزئها ويصارخ عليها ... وفي كل مرة كان يتوقع انه يوم بيرد ما بتكلمه بس كانت ترد تكلمه ويعصب عليها زياده ... ما كان يكرها ... عمره ما كره عوشه ... بس كان يطلع كل الكبت فيها هيه... يتذكر ابتسامتها يوم يشوفها في الكلدور او راده الفندق من السوق ... وكيف كان يشرشحها ... ويصارخ عليها .. وهي كانت ترد عليه ...
في هاللحظه حس انه اشتاق لها ... عوشه ام لسان من زمان ما تلاسن وياها ... وتذكر انه رقمها مخزن في تيلفونه ... فدور رقمها واتصل فيها
**
في الليل في حجرة عوشه ... روضه قاعده وياها يسولفن وعوشه اتطلع في ثيابها مال الجامعه اللي خلاص ما تباهن عشان تنزلهن عند امها بالباجر تعطيهن اللي مجسومات له ... ويضحكن رن تيلفون عوشه وكان عدالها وهي بعد كانت مخزنه اسم مبارك ... اتفاجئت يوم شافت رقمه

روضه: منو متصل الحين .. وبلاج
عوشه: ما بتوقعين منو متصل
روضه: منو
عوشه : مبارك
روضه: ردي عليه .. يمكن يبى شي
عوشه: لاااااه عشان يسوي حركة ذاك اليوم
روضه: (ما كانت تعرف) أي يوم
عوشه: هاه ... لا ماشي
روضه: ردي سرعه لايكون شي مستوي
عوشه: هيه والله صدقج ... ( وردت على التيلفون ( الو
مبارك: الو... السلام عليج
عوشه: هلا وعليك السلام ...
مبارك) :يبتسم) شحالج
عوشه: الحمدلله بخير ... خير شو فيه
مبارك: لا ماشي ... بس اسلم (كانت روضه تقرب اذنها من السماعه تريد تسمع وتقول لعوشه بصوت واطي ما اسمع وسمعها مبارك)
عوشه: لا والله ... الله يسلمك ومشكور .
مبارك: هاهاهاها قولي حق روضه اللقافه هب زينه شو ينتقل بالعدوى هوه
عوشه: لا والله وانا شلي خص .. على كل سمعتك
روضه: (محتشره) لا والله اصلا انت ليش تتصل هالحزة هاه .. اخبر عليك سعيد
مبارك: هاهاها عطيها التيلفون بكلمها (عطت روضه التيلفون)
روضه : الو هاه شو تريد نعم أي خدمه
مبارك: انتي شو هاللقافه اللي عندج .. ممكن تخلينا على راحتنا شوي
روضه: عدال صاير الاخ رومانسي .... اوكي بتشوف يا بروك باجر بتصل في سعيد بخبره
مبارك: وليش باجر اتصلي الحين ... والتهي عنا ممكن
روضه: اوكي بتشوف ( وردت التبلفون لعوشه(
عوشه: هاه شو تريد ياللا قول
مبارك: ماشي ... تبين الصدق اشتقت لج ...
سمعت عوشه هالكلمه وحست بخدودها تحترق ... ولونها تحول احمر والابتسامه شقت الويه ... وروضه اتطالعها وهي مستغربه اما مبارك ... فيقول الو الو ... عوشه ... وهي كانت ساكته ما ترد لدرجة انه مبارك على باله انها بندت او الخط قطع او ما تسمعه فبند التيلفون

روضه: أي بلاج
عوشه: هاه ماشي
روضه: شو ماشي
عوشه: طالع السخيف .. بند في ويهي
روضه: كل هذا اللي صار فيج لانه بند في ويهج لو قال احبج شو بيستوي بتموتين علينا
عوشه: يقدر يقول عشان اخبر عليه خالد يغسل شراعه ( وهنيه رن تيلفونها لان مبارك رد يتصل وبعد ما ردت)
مبارك: الو ... شياج
عوشه: كيف تسمح لنفسك تبند في ويهي هاه
مبارك: انتي اللي ما ادري شو ياه تيلفونج ما تردين
عوشه: لا بندت في ويهي ... ويا هالويه بس هب منك من اللي يرد عليك
مبارك: طالع هاي .. انتي ما تفهمين اقولج ما بندت انتي اللي سكتي
عوشه: والله .... زين ... اممممم
مبارك: شو
عوشه: اقول
ومبارك يتكلم بندت التيلفون في ويهه وهي تضحك ... رد مبارك يتصل فيها وهو معصب
مبارك: انتي أي .. ليش بندتي التيلفون وانا ارمس
عوشه: انا عوشه هب أي .... انت اللي بديت
مبارك: اصلا انتي اللي ما تنعطين ويه ... ومب منج مني انا السبال اللي متصل فيج ياللا باي (وبند قبل لا ترد عليه عوشه وهو معصب عليها)
عوشه: طالع بند في ويهي وهو معصب
روضه: شي طبيعي .. الله يعين يوم بتعرسون

ابتسمت عوشه وكملن اللي يسونه .. بس هالمرة كانت عوشه ساكته وكل شوي تبتسم وهي تذكر اللي قالها اياه وروضه مستغربه منها ... بس سكتت عنها ... ويوم خلصن راحت روضه حجرتها لان عوشه قالتلها بترقد بس بعد ساعه ردت عوشه تدق الباب على روضه ودخلت عندها وانسدحت عدالها على الشبريه

روضه: شو ما رقدتي
عوشه: لا ما ياني رقاد
روضه: ليش
عوشه: بس
روضه: بلاج انتي اليوم ... شو سالفتج
عوشه: ماشي
روضه: شفتي انه فيج شي ... اقول الساعه كم ؟؟
عوشه: خمس الا شوي
روضه: قومي عيل نصلي بما انج غثه وبعدين بنتفاهم

بعد ما صلن ردن انسدحن على الشبريه بس هالمرة مشغلات الليتات ... وتمت عوشه ساكته وروضه اتطالعها اترياها ترمس ... عوشه ما ييها الرقاد الا اذا كان في خاطرها رمسه وما قالتها

عوشه: انتي ليش ما رقدتي لين الحين

اتفاجئت روضه بالسؤال وما عرفت شو تقول صح ليش ما رقدت للحين ... شو تقول لعوشه كنت افكر في اخوج اللي المفروض اخوي دون ما اعرف سبب لهتفكير الغبي اللي شاغلني من بدت الاجازة ....

عوشه: أي اكلمج انا
روضه: شوووو
عوشه: ليش ما رقدتي هاه ... تفكرين في سعيد
روضه: (منصدمه وتحاول تبين انها ما فهمت) أي سعيد
عوشه: عادي عادي قولي .. ما بخبر حد
روضه: لا والله وشو اقول
عوشه: انج تفكرين في سعيد
روضه: (وهي تحاول تكون معصبه) شو ياج انتي تخبلتي
عوشه: وليش ما تخبريني ... مب انا اختج وصديقتج وتدرين اني احبج ومستحيل اخونج او اخذلج يمكن اساعدج
روضه : وهو اخوي وانا احبه بعد
عوشه: (اتنهد ) على راحتج
روضه: انتي اللي شوفيج ياللا اعترفي ... اكيد مبارك
عوشه: اتصدقين
روضه: شو
عوشه: قالي
روضه: شووو لا يكون قالج احبج
عوشه: لا
روضه: عيل شو
عوشه: قالي اشتقت لج
روضه: لا والله ... وهذا اللي ما خلاج ترقدين ؟؟ ... صدق ما عندج سالفه
عوشه: شو ما عندي سالفه
روضه: ما عندج سالفه ... عشرين مليون مرة قالج ولهت عليج
عوشه: لا يا غبيه هالمرة ما كان يتمصخر ولا يطنز ...
روضه: لا والله .. صاير رومانسي
عوشه: هيه والله
روضه: زين وبعدين
عوشه: ما ادري ... حسيت بـ...
روضه: شو ؟؟؟
عوشه: ما ادري روضه ... جسمي قشعر... وقلبي عورني
روضه: ليش
عوشه: ما ادري .. تدرين اول مرة ادري ان صوت بروك حلو
روضه: يا ويل حالي انا ... بنت عمي تحب
عوشه: (مستحية) أي شو هالكلام عيب ...
روضه: اوووووه عيب مرة وحده ... لا وبعد تستحي ...
عوشه: روضه
روضه: هاهاهاها .. روضه بنت محمد تشهد لحظة تاريخية .. عوشه تستحي .. لا وتحب ولد عمي بعد
عوشه: هب منج مني انا اللي قاعدة عندج اوكي .. (ونشت عوشه بتروح حجرتها وروضه تضحك عليها)
روضه: هاهاها أي وين بتروحين
عوشه: (معصبة) بروح اخمد
روضه: هاهاها شو زعلتي
عوشه: لا ... (وهي تبتسم لانها بتغيض روضه بعد ما وصلت للباب) بس بخليج تفكرين بسعيد اخوي
وطلعت بسرعه من الحجرة وهي تضحك ... وروضه تزقرها بس ما ترد عليها ... شافت بسوم ناشه وواقفه عند باب حجرتها

عوشه: شو موعنج من الحين
بسوم: بروح الدوام ... شو موعني الحين يعني .. وشو هالحشرة اللي مسوياتنها (وطلعت روضه من حجرتها كانت بتلحق عوشه عشان تواجعها)
روضه: اوه انتي نشيتي
بسوم: هيه ... بس شوي شوي .. لا توعون ابوي وامي
عوشه: لا ما عليج ما بينشون الحين
روضه: (تكلم عوشه) انتي ماعليه ماعليه براويج شغلج بعدين
عوشه: (رافعه حياتها بنظرة تعجب) ليش انا قلت شي غلط
بسوم: برايكن بدخل اتغسل وابدل ثيابي ... قبل لا انزل
عوشه: اوكي .. برايج انا بروح ارقد .. ياللا الله يوفقج
روضه: وانا بعد

دخلت كل وحده حجرتها ... بسوم كانت تاخذ دورة الاسعافات الاولية في توام .. كل طلاب الطب لازم ياخذونها في الاجازة الصيفيه .. ولانها تريد تفتك منها عشان بعدين تتفيج حق الاشياء الثانية ولانهم السنة ما بيسافرون .. قررت تاخذها اول سنة لها ... وخاصة انهم ما سافروا هالصيف ... كانت بسوم تستمتع بكل لحظة من لحظاتها في المستشفى والتدريب ... وتتمنى الايام والسنين تمر بسرعة عشان تخلص وتكون دكتورة بسمة
**
في بوظبي .. سعيد في الدوام قاعد يشتغل .... ودخل عليه محمد وبعد ما سلموا على بعض قعد عنده في المكتب يسولف وياه

محمد: اقول ... قم خلنا نروح نتريق في أي بقعه
سعيد: الحين .. عندي شغل اريد اخلصه
محمد: ساعة وبنرد ... ياللا قوم انا مليت واحتاج اخذ فترة راحه
سعيد: اوكي ياللا

طلع سعيد ويا محمد ... وراحوا يتريقون في الكافيه اللي دومهم يقعدون فيه في بوظبي في المارينا مول كانوا يسولفون عن ربعهم اللي سافروا واللي ما خذوا اجازة السنة ...

محمد: علوه وسلطان بعد يمكن يسافرون اول شهر ثمانيه
سعيد: لا والله وين بيروحون
محمد: كالمعتاد ... اسبوع جنيف .. اسبوع باريس.. اسبوع لندن ... واسبوع مصر
سعيد: وليش هالعثرة كلها .. ليش ما يروحون مكان واحد
محمد: يملون ... شرايك نروح وياهم
سعيد: لا يا ريال ... مبارك ماله خاطر يسافر وما بيروح ويا اخوه عشاني
محمد: ليش محمد وين بيروح
سعيد: جنيف
محمد: كم بيقعد
سعيد: كل الصيف وبيرد
محمد: في جنيف بس ... بتلوع جبده
سعيد: هاهاها لا لا تخاف ما تلوع جبده من جنيف
محمد: يعني بيتلاقون وياه هناك ... ياللا يمكن يقنعونه يسافر وياهم
سعيد: (يبتسم) ما اظن
محمد: صدق تعال نروح وياهم ... على الاقل اسبوعين.. كلم مبارك وقوله
سعيد: ماعليه بنتشاور يوم بنرد العين
محمد: شو بياخذ مبارك من السيايير
سعيد: ما ادريبه ... كل شوي قال شي
محمد: تعال صدق .. مبارك بياخذ خطيبة حمد ... من كم يوم اسمع الاهل يتكلمون في هالسالفه
سعيد: هيه .. صدق .. انت بروحك شفت حمد كيف .. وانه ما يتعاشر ونحن هب بايعين بنتنا او طايحه في جبودنا
محمد: عشان جيه ما ايي وياكم المقهى ولا يرد على تيلفوناتكم
سعيد: خله هو الخسران ... حتى مبارك كان يريد يتعذر له بس هوه اللي مرة وحده قطع ولبسنا
محمد: بس الناس تنقد عليكم الحركة اللي سويتوها فيه
سعيد: يقولون اللي يبونه ... انت ريال وادرى بالحركات اللي يسويها حمد .. وتبغي الصدق اصلا البنيه كانت خطيبة مبارك من قبل
**

في مكتب بو خالد ... بو منصور قاعد ويا اخوه يسولفون وفي الاساس بو منصور ياي عشان يحدد موعد عرس العيال ويا بوخالد

بومنصور: هاه يا بو خالد ما تبغي نيوز العيال ... ما صار عندنا عرس من بعد عرس فطوم
بو خالد: (يبتسم) متى ما بغيت يا سلطان... الولد ولدك انت ... والبنت بنتك بعد
بومنصور: خلاص اخرهالصيف .. في اخر شهر تسعه
بوخالد: يا سلطان ... اخره لشهر واحد ... الجو حلو والناس ما بتضايج من الحر
بومنصور: ام منصور مستعيله على العرس ... انت تدري انها كانت بتيوز منصور في شهر واحد وما لحقت عليه ... وما بطيع تيوز لا مبارك ولا محمد في شهر واحد
بوخالد: اذا على شهر واحد ما عليه ... بنيوزهم شهر 12 او ثنين
بومنصور: ما عليه يا خوي في الاخير كلمتك انت اللي تصير
بوخالد: لا يا سلطان .. مب كلمة منوه اللي تمشي ... انت خل ام منصور تكلم نورة ويشوفن الوقت اللي يبنه .. وعوشه يبالها زهاب بعد
بومنصور: خلاص يا خوي
**

حمده من يابت ولدها واعتدل وضعها ويا ريلها وهي في عالم ثاني .. اكتشفت بالفعل شو هي السعادة والحب .. السعادة بالنسبة لها كانت في ابتسامة هالبيبي الصغير ومناغاته ورضى ريلها ... سعادتها كانت يوم يكون خالد قاعد وياها يلاعب ولدهم او يبتسم ويسولف وياها... وبالنسبة لخالد من ياه الولد تغير في معاملته لزوجته وحس بمسؤولياته كأب وزوج ... اذا كان يريد يربي ولده صح لازم يكون هوه اول صح مثل ابوه ... واذا يريد ولده يكبر ويطالع عليه... لازم يكون مثل وقدوة صالحه لولده .. عشان تكون صورته حلوة في عيون ولده ... صارت اغلب طلعاته ويا ابوه ويرد البيت ويا ابوه ... بطل سالفة السهر بروحه في الميلس او حتى عند واحد من ربعه ... واذا بيتأخر يتصل في حمده يقولها ... والاحلى من كل هذا كله انه كان يطلع ويا حمده بروحهم دون حمود يتمشون او يوديها السوق ... السوق هالمشوار اللي من تزوجته حمده ما جد وداها غير الدريول وروز مع وحده من البنات ... صبرها وطولة بالها عليه غيرته .. حست انه بالفعل استحق كل لحظة حب حبتها اياه وهو غافل عنها ... لانه عوضها كل الايام اللي عاشتها محرومه من عواطفه يوم اكتشف من نفسه ان حرمته الانسانه اللي تستحق مشاعره ... كان عمر ولدهم ست شهور... وكان متختخ وعيونه حلوة وواسعه ولونها عسلي مثل عيون أمه ...
بعد المغرب يوم الخميس خالد قاعد يلاعب ولده في الصالة ... وحمود يضحك بصوت عالي ومستانس ويا ابوه .. اما حمده فكانت تبدل ثيابها لانها بتطلع ويا خالد بيتعشون برع وتتريا عوشه وروضه اين عشان تخلي حمود عندهن ... وهي نازلة من فوق كانت تسمع ولدها يضحك وخالد يسولف وياه ... وتبتسم وفي خاطرها تتفدى الاثنين ... وصلت الصاله وشافها خالد

خالد: ياللا طلعنا عشان ما نتأخر برع
حمده: لا لحظه يوم بين البنات بنروح
خالد: (يبتسم) ليش بنستأذن منهن
حمده: لا عشان حمود ... شو بنخليه بروحه
خالد: (يشوف ولده وهو رافع حاجب ( شفت حمودي ماماه اتحراك ياهل ... تتريا عماتك اين عشان يقعدن وياك ... قولها انا ريال ما اقعد ويا حريم .. كلمي عمي عبود يشلني الميلس
حمده: هاهاهاها زين والله من الحين ميالس ... لا استريح ماشي ميالس
خالد: (وهو يقلد صوت اليهال) لا لا ما ليد انا ثعلت ... ما توديني ميلث ... ما ليد بنات ما ليد بنات
عوشه : (بعد ما دخلت هي وروضه) حد ما يريد بنات مسود العين ونك .. الله يستر يا حمود يوم بتكبر ما بتخلي وحده ما بتعرفها .. عاد زمنكم بيكون الجيل فلتان بالقو
حمده: بسم الله على ولدي
روضه: بعدين يا اخ حمود يسدك شرف ان احلى واجمل بنت في العالم والكون رضت تقعد وياك وتكون لك بيبي ستر ... خلني اعرس يا ولد حمده ان ما خليتك تشل عيالي واطلع اتحوط انا وريلي مثل امك وابوك
خالد: عرسي انتي اول ... ياللا حمده خلينا نطلع .. وصلا خدامات حمود ..
عوشه+ روضه: شوووو
خالد: اوووووه اقصد عمة وخالة حمود الغاليات الغاويات الطيبات .. النفاعات راعيات الواجب
عوشه: (وهي مادة ايدها) ايدك يا حبيبي على خمسمية
خالد: ليش
عوشه: كم ساعة قعدنا ويا ولدك وانت تطلع ويا حرمتك ونحن نحرم عمارنا من الطلعه والقعده في هدوء حجرنا
خالد: طالع هاي المادية حشا ... توني اقول نفاعه ... وطيبه ... طلعتي شجعه وطماعه
عوشه: برايني
خالد: خلاص قعدي ولا تشغلين التلفزيون ولا تطالعين في قنوات الشوتايم في بيتنا وروحي بيت ابوج اللي امج مب طايعه تركب لكن الشو تايم
روضه: اقول خالد ذليتنا على هالسالفه ... ياللا روحوا روحوا تأخرتوا
حمده: اقول انا مرضعتنه من شوي .. بس اذا صاح سوله شاي في المرضعه .. او عطنه سيرلاك
عوشه: واذا ما سكت
حمده: بيسكت .. واذا ما سكت اتصلن بنرجع
روضه: ان شاء الله اوامر ثانيه
عوشه: الله اذا ملينا منه بنقرصه وبنخليه يصيح وبنتصل بنقول ما طاع يسكت
حمده: حرام عليج .. يهون عليج حمود تسويبه جيه
خالد : قرصيه وبراويج والله اعضج
عوشه: عشان هالمفعوص بيعظني
خالد: شو لاقطينه من الشارع تعضينه ..
عوشه: لا يايبينه من المستشفى
حمده: اقول اذا تكرمتن وسمح لكن وقتكن عطنه تفاحه بالملعقه
روضه: هذا اذا طاع
خالد: ياللا حمده .. كل ما طلعنا سمعتيهن هالموال .. اكيد حفظنه
عوشه: ياللا روحوا استانسوا وخلوا الاعمال الشاقه علينا
حمده: فديت حمودي والله الولد مطيع وهادي عمره ما كان اعمال شاقه بس هالله هالله فيه
روضه: ياللا اللي يشوفج يقول بتروحين اسبوع هب هن ساعتين ... ياللا روحوا
حمده: اوكي ياللا مع السلامه ...
خالد: تبغن شي من برع
عوشه: سلامة راسك حبيبي ... استمتعوا بطلعتكم
خالد: ان شاء الله
روضه: بحفظ الله

طلع خالد ويا حرمته وتمن روضه وعوشه ويا حمود اللي كان ساكت ويلعب بروحه والبنات يطالعن فلم في التلفزيون .... ويوم صاح حمود غيرله بامبرز وعطنه شاي يهال ورقد ... وهن في بيت خالد اتصل سعيد في عوشه لانه رجع البيت وما حصل حد في الصالة ...

سعيد: وين انتن
عوشه: في بيت خالد
سعيد: ليش محد في البيت
عوشه: بسوم فوق في حجرتها .. وبعدين خالد وحمده طلعوا ونحن ويا حمود
سعيد: اهااا ... زين تعالن البيت ... انا ومبارك بروحنا هنيه
عوشه: هاه مبارك ... (تذكرت سالفة التيلفون وخافت انه يكون خبر سعيد قبلها)
سعيد: هيه
عوشه: لا ما نقدر نيكم الحين حمود رقد وما نقدر نخليه بروحه
سعيد: خلنه عند روز
عوشه: حمده ما تحب
روضه: قوليله ايون هنيه
عوشه: تقولكم روضه تعالوا انتوا بيت خالد
سعيد: (يكلم مبارك) تعال نروح بيت خالد ... هن هناك
مبارك: لا يا ريال .. الريال محد شو اروح بيته
سعيد: مبارك ما يريد
عوشه: يا الله وليش ان شاء الله .. بيت ولد عمه ومحد اصلا في البيت غيري وغير روضه وحمود وروز ... شو يستحي
سعيد: هاهاهاها لا خالد محد شو يدخل بيته داخل
عوشه: بلا سخافه انت وياه شو الريال محد ... هالريال اخوك وولد عمك (يرت روضه التيلفون من عند عوشه)
روضه: شو المشكله الحين تبغونا نطرش لكم بطاقة دعوة رسمية عشان اتشرفونا هنيه
سعيد: هاهاها لا ما يحتاي .. بس مبارك ما يريد شو اسويبه ايره غصب
روضه: عطني اياه وانا بخليه ايي
سعيد: اوكي صبري شوي (يكلم مبارك) دوك كلم روضه تبغيك
مبارك: الو
روضه: هلا والله بروميو ... شحالك قيس بن الملوح
مبارك: هاهاهاها شعندج انتي الحين
روضه: ما قلت لسعيد للحين سالفة نص الليل ... تعال لا اخبره الحين
مبارك: لا والله تهديد هوه
روضه: هيه جوليت اترياك هنيه (كفختها عوشه على ظهرها وهي تقول جوليت في عينج)
مبارك: (وهو يتكلم جد) ما يصير يا روضه عيب ... خالد محد
روضه: تدخل عيل بيت عمي يوم محد فيه
مبارك: هذا غير بيت عمي انا بعد ...
روضه: شوف لا تغديلي الحين شريف روما تعال هنيه خالد ما بيقول شي .. حميد دخل بيت خالد وهو ريل فطوم وانت خطيب عوشه وولد عمه ما بيقول شي
مبارك: حميد دخل بوجود راعي البيت
روضه: وسعيد اللي عدالك شو ... مب بيت اخوه .. تعال انت ونحن بنتحمل المسؤولية كامله
مبارك: اوكي خلاص بس ما بنطول انا بطلع قبل لا يرد خالد ما احب احط نفسي في هالموقف
روضه: والله اللي يسمعك ما ادري شو بيقول ... تعال الله يخليك
مبارك: اوكي (ورد التيلفون على سعيد)
سعيد: هاه خلاص
روضه: هيه ياللا تعالوا .. بس عن الحشرة حمود راقد
سعيد: هاهاها عيل خلاص ما بني اذا نحن حشرة
روضه: اوهوووو الحين نحن اقنعنا هذاك .. هذا بيسويلنا سالفه بعد
سعيد: مالي خص اقنعيني انا بعد
روضه: امممم بعدني ما مسكت عليك ذله عشان اقنعك
سعيد: وشو ماسكه على مبارك
روضه: (تبتسم) تعال وبخبرك
سعيد: اممم اقنعتيني خلاص .. الحين بنيكم
روضه: نترياكم

بندت روضه التيلفون عن سعيد وزقرت على روز عشان تسوي عصير حق عيال عمها ... وبالمرة اتييب دلة القهوة والشاي وحليب البوش ... وبعد دقيقتين دخلوا مبارك وسعيد من الباب اللي على طرف اللي مواجه باب بيت عمها الخلفي

مبارك+ سعيد: السلام عليكم
عوشه+ روضه: وعليكم
سعيد: شحالكن
عوشه: (اللي ويها احمر من دخل مبارك بعد اخرمكالمة بينكهم) الحمدلله بخير
روضه: ليش رادين البيت من وقت
مبارك: وين حمود بشوفه
عوشه: لا الله يخليك راقد ... خله في حاله
مبارك: الا بشوفه
عوشه: قصدك الا بوعيه
مبارك: هاهاهاها يعني اريد اسمعه يصيح
روضه: شرير
سعيد: صراحه نحن رادين نروايكن سيارة مبارك اليديده ...
روضه: مبرووووك
عوشه: مبرووك بس شو خذت
مبارك: خذت مرسيدس كوبي ...
عوشه: (رافعه حياتها ) والله ... ليش ما خذت فور ويل هالمرة
مبارك: (وهو يبتسم لانه ناوي يحرجها) على شرفج هالمرة وعشان خاطرج .. عشان يوم بنعرس ما تلعوزين بالفور ويل وتتخيرين السيارة اللي تبينها يوم تطلعين (عوشه ويها احمر وسكتت اما روضه وسعيد فتموا يضحكون)
عوشه: (وهي تحاول تكون طبيعية وتدور رد لاذع) لا والله ... عيل كان المفروض تتصل تسألني شو من السياير اريد ... يمكن كنت ابغي بي ام
مبارك: ليش انتي تعطين الواحد فرصة يتكلم (وهنيه تذكرت عوشه اتصال مبارك وخافت انه يخبر سعيد قبلها وهي اللي تنحط في موقف الاتهام فقررت تبدا هيه )
عوشه: وليش ما قلت يوم اتصلت ذيج الليلة هاه ...
سعيد: (عاقد حياته) أي ليله (روضه تبتسم ومبارك ويهه احمر وانحرج من ولد عمه اما عوشه فكان في عيونه نظرت اتهام)
مبارك: ليش انتي عطيتيني فرصة بندتي في ويهي
سعيد: وليش انت اتصلت
مبارك: الله خطيبتي وابوي قالي لا تاخذ فور ويل عشانك بتعرس وبما انه الشور طلع من ايدي قلت اشاورها بس لا تخاف اختك ذيبه بندت في ويهي
عوشه: يعني انت اللي ما بندت
مبارك: (يقول في خاطره براويج بس صبري يعني تردينها) انتي اللي بديتي
عوشه: لا انت اللي بديت
مبارك: تيلفونج خربان انا ما بديت
عوشه: لا والله تيلفونك اللي خربان ومعفن
مبارك: لا الشيخه انتي اللي تيلفونج من العصر الحجري
سعيد: أي خلاص خلاص بس عن الحشرة
روضه: بينش حمود وانت وياها اللي بتردون ترقدونه
مبارك: (يبتسم) اوكي خلاص
عوشه: خلاص خلاص بس مب انا اللي بديت
مبارك: (عشان يحرج عوشه) امي قالت لي انهم حددوا العرس شهر تسعه يعني بعد شهرين (بس الكل تفاجأ حتى سعيد وعوشه انصدمت مب معقول يحددون شي ما يقولولها شو تعرس بعد شهرين او شهر ونص وهي بالمرة ما سوت شي )
سعيد: لا لا
روضه: تحلم انت وايد
عوشه: (والصدمه على ويها) تجذب
مبارك: والله ما اجذب ابوي كلم عمي في المكتب من يومين
عوشه: شو قال ابوي (سكت مبارك وهو يبتسم ومستمتع بالصدمة على ويه عوشه اما الباقين فيتريونه يرد) قوول
مبارك: اللي يشوفج يقول ما تبيني .. لا يكون غيرتي رايج
عوشه: مبارك ياللا بلا سخافه تكلم
مبارك: اول ليش منصدمة
عوشه: (بعصبية) مبارك قول
سعيد: شو قال ابوي
مبارك: ما اتفقوا على شي وعمي يبغيه في الشتا (ارتاحت عوشه بعد هالجملة ولاحظ مبارك الراحة على ويها) وفي الاخير امي وعمتي بيتشاورن وبيشاورن عوشه وبيقررون .

وردوا يسولفون شوي ... اما مبارك فكان يفكر في صدمة عوشه يوم خبرها ان العرس تحدد كان يتوقع انها تنحرج بس الصدمة والخوف على ويها صدمته هوه .. معقول عوشه لين الحين ما تبغيه او في مجال انها ترفضه مرة ثانيه ... المرة الاولى كان رفضها فيه راحه للطرفين بس هالمرة .. مبارك تعود عليها وصار يشوفها كخطيبه وزوجة اكثر من بنت عم وبس ... حتى بعد هالنقاش كان يحاول يكون طبيعي بس كان شي يمنعه موجة حزن في انه لليوم ما قدر يكسب بنت عمه ... مبارك اللي عذب غيرها واللي للحين غيرها اتمنى انه يرد حر مب مرتبط عشان يكون لها امل وياه ... ما قدر يكسب بنت عمه ... الشي اللي ما كان مبارك يعرفه ان صدمة عوشه مب خوف من انها تاخذه لانها بدت هيه تميل له ... وتتخيل حياتها وياه وفي بيت عمها ... الناس اللي يحبونها وتحبهم ... صدمتها كانت ان شهر ونص او شهرين ما بيكفنها تسوي الشي اللي تباه لعرسها ... خاصة ان اول عيال عمها اللي بيعرسون واكيد لازم يكون عرسه مب لانه بياخذها هيه بس حتى لو خذ غيرها لازم يكون العرس عشان مبارك ليلة من الف ليلة وليلة ... عشان مبارك تريد العرس يكون ولا اروع .. قعدوا نص ساعه بعد

مبارك: سعيد ياللا خلنا نطلع تأخرنا على الشباب في المقهى
روضه: شو وين ما شفنا السيارة
سعيد: هيه والله تأخرنا ... اقول بنرد في الليل ... وبتشوفن السيارة
عوشه: وبنتمشى فيها وياكم (طالع سعيد مبارك عشان يرد)
سعيد: (يبتسم) ان شاء الله

طلع مبارك ويا سعيد رايحين المقهى وتمن عوشه وروضه في بيت خالد يكملن الفلم اللي كانن يشوفنه ... بس اتصلت حمده على تيلفون روضه اتخبر عن ولدها

روضه: الو
حمده: الو ... شحالكم
روضه: الحمدلله .. شحالكم انتوا
حمده: بخير ... اقول اخبار حمود صاح ولا ساكت
روضه: لا راقد
حمده: (شهقت) حرام عليكن ما بيرقد في الليل ... بتمين انتي وعوشه في الليل عنده وانا وريلي بنرقد
روضه: الله يخليج انتي ردي اول ... ومن متى ما تمينا وياه في الليل من بدت هالاجازة
حمده: هاهاهاها فديته والله
روضه: متى بتردون
حمده: بنروح السوبرماركت تبن شي ولا
روضه: لا انا ما اريد شي .. صبري بسأل عوشه (تكلم عوشه) خالد وحمده بيروحون السوبرماركت تبين شي
عوشه: كل انواع الحلاوة والجبسات
روضه: سمعتي
حمده: هيه ... بس ما تبن شي ثاني
روضه: هيه نريد أيس تي
حمده: اوكي ياللا مع السلامه
روضه: باي

بندت روضه عن اختها وقعدت تطالع التلفزيون هيه وبنت عمها ... اللي كان تفكيرها في مبارك ولد عمها وموضوع العرس

اما في المقهى بعد ما قعدوا سعيد ومبارك ويا ربعهم وبعد ما باركوا حق مبارك عشان السيارة اليديده ... وطلعوا فيها علي وسلطان يجربونها ... بقى وياهم محمد اللي فتح وياهم موضوع السفر مرة ثانيه

محمد: هاه ما عزمتوا نروح ويا علي وسلطان
سعيد: هاه مبارك شو قلت
مبارك: لا يا ريال ... انا مالي خاطر للسفر هالسنة
محمد: ماعليه خاطرك بيتغير لين شهر ثمانيه بس انت عزم
مبارك: ما عندي فيزا .. فيزتي لسويسرا بس
محمد: هات جوازك انت وبنخلص الفيز في اسبوعين
مبارك: ما اقدر اسافر وياكم والله
سعيد: ليش ما تقدر ...
محمد: اذا على البيزات انت عزم وما عليك سفرتك كلها علي
مبارك: لا يا ريال شو بيزات .. الحمدلله الخير وايد
محمد: ليش عيل ؟
مبارك: محمد اخوي بيسافر باجر ... ومحد بيتم ويا الشيبه والعيوز ما اقدر اروح واخليهم بروحهم
سعيد: خل عنك عمي هب شيبه هالكثر
مبارك: بعد ما يهون علي ابوي اخليه واروح .. لو بيسافرون كان في مجال .. بس تدري ابوي ما يسافر الا اذا عمي سافر وابوك السنة ماله مزاج
سعيد: زين هلي موجودين وعمي ماعليه شر بوجود ابوي واخواني
مبارك: بعد يا سعيد ما اقدر اخلي ابوي ... انتوا ماشاء الله كلكم عندكم خوات وبنات في بيوتكم لكن نحن ماشي غيري وغير محمد .. يعني لو كلكم تسافرون بيتم حد ويا شوابكم
محمد: غلبتنا يا مبارك .. الله يخلي شوابك لك
مبارك: امين ويخليك ان شاء الله
سعيد: سافر انت محمد وياهم اذا خاطرك في السفر
محمد: انا بعدني ما قلت لهم ... بس بعدني بتشاور وبقولهم
سعيد: لا تحير ... ترى الفيز تاخذ لها وقت ... وفيزة لندن بروحها
محمد: عندي فيز ماعليك

وكملوا محمد وسعيد سوالف وحتى يوم ردوا سلطان وعلي اللي كانوا مرتبشين على السيارة ويمدحون فيها ومبارك ما يعلق بس يبتسم لان افكاره كانت ويا عوشه ورد فعلها على موضوع العرس ... كان كل خوفه ان عوشه ترفض ... بعده يذكر انه قالها عطينا فرصه لين ما اتخرجين ... وبعدين اذا ما قدرنا انتفاهم بنفصخ الخطوبه وبنحل الموضوع ... عن نفسه تعلق فيها .. ورتب اوضاعه ومستقبله على اساس انه يكون وياها ... على الاقل وياها يقدر يكون على طبيعته تدريبه وتدري كل شي عنه وهو بالمقابل يعرفها بعد ... معقول يحس بخوف من الرفض ... عوشه اللي عمره ما بغاها وكان يقول لو كانت اخر بنت ما خذها .. الحين يخاف من رفضها هيه له .. في الاخير قرر انه يتصل فيها يوم يرد البيت عشان يعرف هيه شو تريد ... مستحيل يخلي الرفض اييه من امه او ابوه او حتى سعيد لازم يسمعها هيه ... لازم تقوله انها ما تبغيه وليش ... حتى لو خبرت سعيد او خالد او أي حد لازم يعرف والليلة بعد
**

في الليل بعد ما رجعوا مبارك وسعيد بيت بو خالد حصلوا عوشه وبسوم وروضه وعبود قاعدين على الدجة جدام الباب يسولفون .. كانوا يتريون مبارك وسعيد ... حتى عبود يوم رد خبروه انه مبارك طلع سيارة يديده فقعد يترياهم وياهن ... والكل اتخبل على السيارة ويضحكون ويسولفون ومبارك كان ساكت على غير عادته في هالمواقف ... حتى عوشه كانت تحس باحراج بس حاولت ما تبين لحد هالاحساس

عبود: ياللا هات المفاتيح خلني اجربها
روضه: وين اول نحن بنطلع نتمشى فيها
مبارك: دوك المفتاح وطلعهن وياك خذوا لفه في الحارة وردوا
بسوم: بنروح الدكان بنشتري بيبسي وايسكريم وبنرد
مبارك: اوكي
سعيد: ونحن شو نسوي
روضه: اتريونا هنيه ... شو كم كثر اتمشيتوا فيها
سعيد: هاهاهاها ان شاء الله

بعد ما طلعوا بالسيارة قعدوا مبارك وسعيد على الدجة يتريونهم ... سعيد كان ملاحظ ان مبارك فيه شي ومتضايج بس ما قدر يسئله وهم في المقهى او جدام خواته

سعيد: بلاك مبارك ... ليش مضيج
مبارك: مب مضيج ... شو اللي خلاك تحس اني مضيج
سعيد: مبارك انا ولد عمك واعرفك ... حتى ما طلعت انت تمشيهم بالسيارة
مبارك: عبود يبغي يسوق السيارة ... عطيته اياها
سعيد: لو كنت طبيعي ما خليته

ابتسم مبارك وما رد على سعيد .... اما سعيد فقرر يخليه على راحته واذا يريد يقول بيقول ..... أما في السيارة الكل مرتبش ويضحكون ومشغلين الاف ام

عبود: اووه شو هالسيارة ثرها فن
روضه: لازم سيارة مدام عوشه
عوشه : بس عاد بعدني ما صرت مدام لين الحين
عبود: لاو الله ... يا حيك يا مبارك بتعرس هب مثلنا
بسوم: توك صغير
عبود: سنة وبخلص الكلية .. ولين الحين ما سويتن اللي اتفقنا عليه ولا كلمتن سارة
عوشه: يهالسارة اللي ذليتنا بها
عبود: شفتن شفتن انكن بس كلام
روضه: شو اللي خلاني اطري هالبنت لك ... انا خبله
عبود: ليش ما كلمتنها للحين
روضه: ما انخطبت والله ما انخطبت
عبود: ولو انخطبت هاه.. .يعني تبني اتريا لين ما تنخطب
بسوم: عبود حبيبي تخيل كلمنا البنت ووافقت ... يعني انت اخوي حبيبي الف وحده تباك ... وتجنن وان شاء الله بتخرج ضابط ... بس عاد لا تنغر علينا
عبود: فديتني والله انحب
بسوم: مادح نفسه ... بس خلني اكمل كلامي ...
عبود: كلمي
بسوم: شوف يعني كلمناها ووافقت .. وبعدين امي اصرت على وحده من بنات عمتي مريم شو بيكون موقفنا جدام البنت
عبود: لا امي مب جيه ما بتيوزني وحده ما ابغيها
بسوم: شدراك
عبود: امي مب جيه ... وانتن تعرفنها
بسوم: انت تخرج اول
عبود: انتن ما تعرفن امي .. امي تكلم اهل البنت واتي تحطنا في الامر الواقع وعشان ما نكسر كلمتها او نفشلها ننجبر نوافق
بسوم : ولو نحن كلمنا سارة وامي كلمت عموة مريم شو بيكون موقفنا وموقفك جدام البنت
عبود: يعني
بسوم: نقنع امي ... قولها حن عليها ... على الاقل يكون عندها علم انك تبغي سارة ... وبعدها بتردد قبل لا تخطب لك بنت عموه مريم قبل لا تشاورك
عبود: امممم زين ولو حد خطب سارة ووافقت
بسوم: انا بقول لسارة انك تباها او بلمح لها انا نريد نخطبها لك
عبود: اوكي جيه زين
بسوم: ياللا وقف عند الدكان
عبود: ان شاء الله يا احلى اخت في الدنيا
روضه: أي انت ... شو احلى اخت في الدنيا هاي .. لا تتعدى على حقوق غيرك
عبود: اسف غرور ونرجسية هانم
روضه: فديتني من حقي اجنن
عبود: بسوم انا اسحبها .. انتي احلى دكتورة في العالم والكون والمجرة زين جيه اخت روضه
روضه: (وهي اتطالع بسوم من فوق لين تحت) اشوف ... امممم ماعليه فعلا ماشي دكتوره حلوة جيه

كانت عوشه ساكته وهم يسولفون في هالموضوع تفكيرها ردها لمبارك غصب عنها .. هي بعد لاحظت ان مبارك مب طبيعي وفيه شي ... عشان جيه كانت ساكته عنه وما تحرشت فيه ... كانت تفكر شو الشي اللي مضيج به هالكثر ... كان مستانس يوم كانوا بيت خالد ويسولفون .. شو صار له برع او في المقهى خلاه ينجلب جيه
**

بعد ما ردوا البيت قعدوا شوي ورد مبارك بيتهم ودخلت عوشه حجرتها وتمت بسوم وروضه وعبود وسعيد يسولفون برع جدام الباب

سعيد: هاه بسوم اخبار المستشفى
بسوم: اوووه لا تخبر ... بس بعدنا مب في المستشفى في المستشفى جريب منه ... بعد ما نخلص النظري بيودونا هناك
عبود: والله انتي متفيجه شو تبين في الطب
بسوم: ياخي كل واحد ميول
روضه: ياللا ماعليه عشان حد يتم عند عمي اذا عرسنا كلنا ... طب يعني عنوسه
بسوم: اوكي انا راضيه .. ما اريد اعرس
سعيد: لا ان شاء الله انتي بعدج صغيره بتخلصين وبتعرسين
بسوم: لا بروح اتخصص بعدين
عبود: منو بيخليج
بسوم: (وخي اطالع سعيد) اخوي حبيبي... لانه بيروح يحضر ماستر وانا بروح وياه
سعيد: انا ما قلت بروح احضر ماستر في شي
بسوم: لا مب كيفك بتروح وين الطموح والتفكير في المستقبل
سعيد: هاهاهاها يكفي انتي طموحه
بسوم: اذا ما رحت وياي منو بيروح وياي انا مب اختك
روضه: عرسي وشلي ريلج
بسوم: لا والله اعرس .. بس عشان اشله وياي اتخصص واحضر ماستر
روضه: ليش لا
بسوم: هيه تراه تيس ايره وراي وين ما اروح
روضه: هاهاهاهاها يمكن شدراج (ضحكوا عبود وسعيد على بسوم (

وتموا يسولفون شوي وبعدين راحوا حجرهم يرقدون .... روضه مرت حجرة عوشه بس لقت الباب مقفول دقت عليها بس عوشه ما فجت الباب ... لانها كانت تتسبح في الحمام وما سمعته ... فراحت روضه حجرتها ترقد ...
**

بعد ما طلعت عوشه من الحمام وهي اتلبس رن تيلفونها ويوم شافت الرقم انصدمت كان رقم مبارك ... ترددت ثانيه وحده وبعدين قررت ترد عليه .. كان مضيج اليوم وفضولها بيذبحها عشان اتعرف شو فيه وليش مضيج ... شو اللي خلاه ينجلب مرة وحده بعد ما رد من برع ... اما مبارك فكان مقرر انه يعرف موقف عوشه الليله عشان ما يتم في هالحيرة اللي هوه فيها ... بعد ما ردت عوشه على التيلفون

عوشه: الو
مبارك: الو السلام عليكم
عوشه: وعليك السلام والرحمه
مبارك: شحالج عوشه
عوشه: الحمدلله بخير
مبارك: شو روضه بعدها عندج
عوشه: لا بروحي الظاهر انهم رقدوا
مبارك: زين
عوشه: (بعد لحظة صمت) شحالك انت مبارك
مبارك: الحمدلله
عوشه: زين .. امممم شو فيك
مبارك: ماشي ليش تسألين
عوشه: لا فيك شي ... شو اتحراني ما عرفك
مبارك: لا ابدا
عوشه: شي في خاطرك تريد تقوله .. قول ياللا
مبارك: شدراج
عوشه: بعد ربك اعرف ... شو تريد تقول
مبارك: ماشي انا اللي اريد اعرف انتي شو في خاطرج
عوشه: ماشي في خاطري
مبارك: متأكده
عوشه: هيه .. شو يبكون في خاطري يعني
مبارك: عوشه .. خلاص ماشي وقت امي بتكلمج انتي وامج عشان تعرف متى تبن العرس اذا ما تبين قولي من الحين ... مايحتاي تحطين امي في موقف بايخ او تحطين اهلج فيه الموقف

انصدمت عوشه يوم سمعت كلام مبارك ... صح في بداية الخطبة ما كانت ماخذتنها على محمل الجد ... بس مع الوقت تأقلمت على الوضع بالعكس اتعودت على مبارك .. وحبت موضوع انها تكون في بيت عمها وعمتها .. كان كل خوفها انه هوه اللي مايريدها وانه ما قدر يتقبل الفكره في خاطرها كانت تقول لا مبارك ارجوك لا تقول جيه ... بس حاولت تكون طبيعيه

عوشه: ليش انت غيرت رايك ما تريد
مبارك: شو هالكلام عوشه ... خلاص نحن هب يهال عشان نلعب ولا العرس لعبه ... بس انتي اللي شكلج ما تبين ما شفتي عمرج كيف كان شكلج يوم قلت لج انهم حددوا متى العرس
عوشه: (ارتاحت يوم سمعت كلام مبارك وابتسمت وقررت تلعب باعصابه) امممم عادي المرة اللي طافت مشت عليهم
مبارك: عوشه ... انا اتكلم وياج صدق ... تكلمي مرة وحده في حياتج وياي جد بدون مزاح ومصخرة
عوشه: زين لا تعصب
مبارك: الحين شو
عوشه: شو اللي شو
مبارك : (وصدق بدا يعصب) عوشه
عوشه: شو انت تقول تدري شهر تسعه متى .. يعني بعد شهرين بالكثير ... شو من زهاب او عرس هذا اللي بزهب له في هالفترة القصيرة ... ابغي على الاقل اربع شهور اذا مب سته
مبارك: (بعد ما ارتاح ابتسم وقال في خاطره صدق الحريم قاصرات عقل) الحين هذا اللي معذبنج الزهاب وهالشغلات
عوشه: هيه شو يعني ولا حضرتاك تباني اعرس دون حفله وزهاب ... يكون في معلومك بسوي عرس متعوب عليه .. احلى من عرس فطوم وحمده وكل وحده عرست في هلنا ... عشان جيه جهز هلك للمخاسير
مبارك: هاهاهاها الله يعطيج العقل .. صدق ياهل
عوشه: والله اذا ياهل ومب عاجبنك دور وحده غيري
مبارك: خلاص ادبست ما اروم ادور امي بتروغني من البيت اذا ابوي ما سبقها وثور فيني
عوشه: اوووه ما عليه بصيحك ثلاث ايام
مبارك: طالع بس ثلاثه
عوشه: هيه العزا ثلاث ايام
مبارك: صدق ما عندج سالفه .. الحين اقولج ابوي بيثور فيني تقولين بتصيحيني
عوشه: شو تريديني يعني انتحر وراك مثلا
مبارك: هيه احساسج بالذنب لازم يخليج تنتحرين انتي سبب مشاكل حياتي كلها ... والسبب في موتي
عوشه: الحمدلله بخلص البشريه من شرك
مبارك: طالع انتي ما عندج سالفه .. اقول جلبي ويهج ابغي ارقد
عوشه: انت اللي عندك سالفه يعني ... احسن فكه منك نوم الظالم عباده
مبارك: اوكي ماعليه
عوشه: لا تهدد .. رقمك في الرسيفد عندي اوكي باجر من انش براويه سعيد شوف الساعه كم
مبارك: جلبه زين
عوشه: تذكر ذيج المرة
مبارك: ذليتينا عليها
عوشه: تستاهل
مبارك: صدق انج غبيه
عوشه: ما قلت بترقد
مبارك: هيه
عوشه: ياللا روح ارقد .. ولا الحين بودي التيلفون حق سعيد
مبارك: والله ما تقدرين
عوشه: اتحدى
مبارك: هيه
عوشه: اوكي كم بكم
مبارك: باللي تبينه
عوشه: باجر هات الفين وياك
مبارك: زين
عوشه: اوكي (كانت عوشه عند باب حجرتها وفجته راحت صوب حجرة سعيد اخوها وهي تدعي في خاطرها انه يكون راقد ... بس بطل الباب لانه كان يبغي ينزل تحت ناسي تيلفونه في السيارة )
سعيد: (بعد ما شفاها) شوفيج شعندج الساعه ثلاث
عوشه: هاه لا ماشي .. هذا مبارك متصل يبغيك يقول ان تيلفونك يعطي مغلق
سعيد: ليش متصل على تيلفونج
عوشه: اسئله شدراني
سعيد: انا ناسي تيلفوني في السيارة هاتي التيلفون وروحي بييبه لج يوم بيبند
عوشه: اوكي ( كان مبارك يضحك من خاطره ووده يشوف شكل عوشه وهي تعطي سعيد التيلفون ... بس من حسن حظها ان سعيد ناسي تيلفونه في السيارة وفعلا كا ن مغلق)
سعيد: الو
مبارك: الو
سعيد: شعندك متصل هالحزة على تيلفون البنت ...
مبارك: (وهو يدور شي يقوله لسعيد) ماشي كنت بتخبرك اذا بتروح وياي نوصل محمد المطار
سعيد: متى بيروح
مبارك: الساعه ثمان ونص الصبح بنطلع طيارته 11 ونص
سعيد: خلاص اوكي تم ..
مبارك: بنقعد طول اليوم في دبي
سعيد: اوكي
مبارك: بنجرب سيارته اليديده
سعيد: هاهاها زين ماعليه ادري خاطرك فيها
مبارك: هاهاها ياللا حبيبي تصبح على خير ... شي في خاطرك
سعيد: سلامة راسك ياللا وانت من اهله

بند سعيد التيلفون ورد البيت لانه وهو يكلم مبارك راح السيارة ياب تيلفونه ورد حجرة عوشه وعطاها التيلفون وراح يرقد .... اما مبارك طلع من حجرته وراح عند اخوه محمد يدريبه مب راقد ... كان سمير بيوصله المطار بس راح يقوله انه هو وسعيد بيوصلونه المطار ... وفي خاطره يضحك على عوشه بعد ما دق باب غرفة نوم اخوه في الجناح ماله دخل ...

محمد: شو ما رقدت
مبارك: لا ... انت شو تسوي باجر وراك سفر
محمد: ماعليك برقد في الطيارة
مبارك: انا وسعيد ولد عمي بنوصلك باجر المطار
محمد: وليش هالتعب بروح ويا سمير
مبارك: لا تعب ولا غيره بنروح نتمشى في دبي وبندرب لك سيارتك اليديده
محمد: هيه والله ... عطها عبود او سعيد لين ما ارد .. حرام اليوم ماخذينها ونوقفها ... ولا تنسى ترقم السياير وتخلص اوراقهن من المرور
مبارك: ماعليك لا تشيل هم

قعد شوي ويا اخوه وراح حجرته بيرقد عشان اينش من الصبح ويطلعون وياه المطار ...
**

يوم الجمعه الضحى ... البنات بعدهن راقدات ومحد تحت في الصاله غير ام خالد اوابوخالد وحمده وولدها لان ريلها بعده كان راقد في البيت ... يتهم ام منصور عشان اتكلم ام خالد في موضوع العرس وبعد ما قعدت وتريقت ويا ام خالد وحمده ... فتحت الموضوع وياهن

ام خالد: تدرين يا ام منصور ان الود ودي العرس يكون اليوم قبل باجر ... بس الزهاب ما بيخلص بهالسرعه .. وهذا مبارك مب أي حد .. حتى لو ماخذ بنتي ما ابغي عرسه يكون اقل عن عرس أي حد في هله
ام منصور: ما ادري يا ام خالد بس ابغي ايوزهم بسرعه ما تدرين كم كثر نبغي هالعرس والفرحه في بيتنا
حمده: يا عمتي ندريبج ما بتقصرين بس ما يهون عليج يعرسون أي كلام وانتي تدرين ان موسم اعراس ما بتلقين مصمم بيخلص لها فستان بهالسرعه ... حتى لو خلصت زهابها سرعه
ام منصور: كم يبالها لين ما اتزهب
حمده: اربع شهور او سته ...
ام منصور: وايد يا بنتي
ام خالد: لا وايد ولا الله قال... والايام تمر بسرعه
ام منصور: خوفي من شي يخرب علينا العرس يا نورة
ام خالد: (تبتسم) اتعوذي من ابليس ولا تفاولين بس انتي ... وبيكون عرس بتكلم عنه العرب كلها
ام منصور: ماعليه ... من وين تبينا ناخذ لها العقود للعرس
ام خالد: بنكلم الشعيبي والمسعود ومنصور يطرشون لنا اللي عندهم نشوفه
حمده: خالد حاجر لها واحد عند منصور ودافع لها عربونه عشان تخرجها من الجامعه لا تكلمونه انتوا .. بخلي خالد يروح يغير العقد وياخذ لها اكبر هدية تخرجها وعرسها
ام منصور: زين ماعليه ... نخلي العرس اخر شهر 11
ام خالد: ان شاء الله على بركة الله
ام منصور: واللي تبونه قولولنا ونحن حاظرين يا ام خالد ما بنقصر في ولدنا
ام خالد: مبارك ولدنا بعد يا ام منصور ... وبنشل عرسه جنه عرس سعيد او عبدالله
ام منصور: ما تقصرين يا ام خالد ...

تمت وياهن ام منصور شوي وراحت بيتها قبل الصلاة عشان تدخن ريلها بيروح يصلي ... وقالتلها ام خالد ايردون بعد الصلاة يتغدون عندهم بما ان عيالها في دبي ... لان محمد نزل يسلم على عمه وحرمة عمه قبل لا يروح المطار يوم مروا الصبح على سعيد ... وقالت لها ام منصور انها بترد هي وابو منصور
**

ارتبشن البنات يوم عرفن موعد العرس ... وتمت عوشه اتشرط وتقول شو بتسوي وشو تبغي في العرس واكثر من مرة امها تواجعها وتقولها تستحي على ويها كانت تسكت وترد تسولف عن عرسها .. كانوا يتريون عمها وحرمة عمها على الغدا وهم يالسين في الصالة بعد الصلاة يسولفون

عوشه: هيه بعد اريد شركة قرين لاين تسويلي ديكورات الخيمة
خالد: واااو
حمده: قرين لاين مرة وحده
عبود: بنت اوناسيس بتعرس وانا ما ادري
عوشه: ليش ان شاء الله منو قالكم اني اقل منها
بسوم: انتي ما عندج سالفة
عوشه: والله كم مرة بعرس .. مرة وحده ما يكفي اني بضحي بشبابي وبتزوج ولد عمكم هذا
بوخالد: محد ضربج على يديج بنت نورة
ام خالد: ماعليك منها خلها تخربط
عوشه: ماعليه ما اخربط وبتشوفون
روضه: سوي اربع فساتين كل ربع ساعه بدلي واحد
بسوم: واحد عند ايلي صعب واحد عند زهير مراد واحد عند روبير ابي نادر والرابع عند جورج حبيقه
روضه: والخامس عند اليزابث مال بوظبي ... بعد ليش لا
حمده: حليله وسركيس بعد واحد
عوشه: ماعليه اتطنزن اتطنزن بتشوفن وبتعذرن بعدين
عبود: هاي خبله والله انها خبله
عوشه: كيفي عروس زين
ام خالد: اسميج ما تخيلين من بنيه ولا تستحين ... نحن اول من يطرون لنا سالفة العرس سكتنا وقلنا ان شاء الله باللي يبونه هلنا .. لكن انتن اليوم قوايا ما ينرام لكن
عوشه: امي هذاك اول ... نحن الحين غير .. .انتوا اول عندكم فستان
ام خالد: هيه الحين الا حق المخاسير والسوالف اللي ما منها فايده .. شفيه الثوب والكندورة اول ... والله ذيج الايام تسوى كل هالخرابيط اللي تسوونها اليوم
بوخالد: صدقتي يا ام خالد
عوشه: زين خلاص خلاص بسكت ما اريد شي (ضحكوا على عوشه وام خالد وكملوا سوالف)
عبود: امايا متى بيي دوري
ام خالد: خل نيوز سعيد وروضه اول
روضه: لا انا ما اريد اعرس
بو خالد: لا بيوزج وبفرح بج
روضه: (وهي تدلع على عمها) هيه تريد الفكة مني قول قول .. خلاص عمي ما تحبني مليت مني
بوخالد: هاهاها لا غناتي بيوزج وبسكنج عندي انتي وريلج
روضه: هيه جيه ماعليه بفكر في الموضوع
عبود: طالع وانا ليش اتريا هالكثر انا اريد تخطبون لي بتخرج السنة اليايه وبعرس
ام خالد: ما عليه بنات عمتك موجودات
عبود: لا استريحي الغاليه الا هذيلا ما اريد
ام خالد: وشو فيهن بنات عمتك
عبود: ما اريدهن وخلاص مب داخلات مزاجي هب في خاطري
ام خالد: انت اللي ما ينصاع لك راس من عيالي كلهم
عبود: يا سلام يا اخذ وحده فيهن يا انا اللي ما ينصاع لي راس ما اريد مب معرس عيل لين ما اموت
بوخالد: هاهاهاها ماعليه اتخرج اول انت
عبود: انا اتكلم صدق ما اريد بنات عموه مريم .. ما اريد اعرس خلاص
ام خالد: اسكت اسكت عن هالرمسه الحين
خالد: ليش فطوم ما يت هالاسبوع
حمده: امس كان عرس حد من اهل حميد في دبي وراحت العرس ويا عمتها وحرمة عبدالله
ام خالد: ما قالت لج متى بتي
حمده: باجر ان شاء الله
عوشه: اووه ما اتصلت فيها عشان اقولها بعرس
ام خالد: طالع هالبنت ما تيوز .. شو اسويبها يا ربي ... الله يعين عمج وحرمة عمج عليج
عوشه: (تغايض امها) فديتهم يا ربي يحبوني واحبهم
**

أول شهر ثمانية ... كانت بسوم في المستشفى عشان الدورة اللي عندهم في الاسعافات الاولية ... كانت هيه وربيعتها هنا طالبة طب وياها سنة اولى ... من الامارات الشمالية يمشن في ممر الطواري ويسولفن بيروحن عند الدكتور اللي مسؤول عنهن في المستشفى اللي يشرح لهن تطبيقات الاسعافات الاولية ويراويهن عملي كيف يتصرفن في كل الحالات ... اثنين شباب دخلوا المستشفى الظاهر انهم مسوين حادث ووياهم شرطي... واحد فيهم كان يتألم ويهه كله دم ... وما يقدر يحرك يده وربيعه ماسكنه وفي ويهه ورقبته كدمات وشكله متعور في جدفه لان كندورته كلها دم بس ماسك ربيعه وما كان غيرهن ونيرس وحده في الممر ... فالريال اللي ماسك ربيعه زقر عليهن ويقولهن ربيعه متعور .. هن ما عرفن شو يسون ما يقدرن يعالجن الريال لانهن مب دكتورات وما يقدرن يخلنه جيه بعد ...

بسوم: لو سمحت دخله هنيه
الريال: شو ادخله هنيه تعالي شوفيه مب انتي الدكتوره هنيه
كانت بسوم بتقوله لا مب انا بروح ازقر لك الدكتور بس هوه ما عطاها فرصه ترمس
الريال: ياللا ياللا شوفي شفيه الريال كله خايس دم
هنا: وانت بعد
الريال: زين يوم لاحظتي

بسوم لا ارداي قالت حق هنا روحي زقري النيرسات وشوفي دكتور عاصم وطلعت ربيعتها تدور دكتور عاصم ومسكت بسوم قطنه وقعدت تمش الدم اللي في ويه الريال وشافت ان الجرح يحتاج له ثلاث او اربع غرزات ... اما ايده يوم شافت انها متورمة عرفت حتى قبل الاشعه انها منكسرة ويبالها تجبير ... الريال المتعور كان يطالع بسوم ومبهت وهيه مرتبكه ما تدري ليش تأخروا الباقين ... هاي بالفعل مشكلة مستشفياتنا يتريون الواحد لين ما يروح فيها او يوصل لحاله حرجة بعدين ايون .. الريال اللي واقف كانت اعصابه خلاص منتهيه

الريال: أي انتي هذا اللي رمتي عليه ... حوليه اشعه ايده اكيد مكسورة لا يكون عنده نزيف داخلي سويله اشعه كامله ...
بسوم: (بدت تعصب) اهدا شوي لو سمحت الحين بيشوفونه
الريال: وانتي شو تسوين تتصورين وياه قاعده
بسوم: اقول ممكن تطلع شوي لانك مزعج وتنرفزني هذا اولا ثانيا أي دكتور هذا اللي بيعالج ربيعك وانتوا شكلكم مسوين حادث منو قالك ان مستعدين نتحمل مسؤولية جنائية قبل لا تيون تصريح من الشرطه
الريال: يعني يموت لين ما توصل الشرطه
بسوم: محد قالكم تسوقون سواقة مخبل عشان تموتون ... والحين اطلع برع دور حد ينظف لك الجرح
الريال المتعور : (يكلم ربيعه) علي اطلع برع شوف الشرطه هات لها اللي تباه ...
علي: بس ما اقدر اخليك ...
سلطان: ( يحاول يبتسم) لا تخاف اذا ما متنا من الحادث ما بنموت الحين ...

وهنيه دخل دكتور عاصم وياه هنا والنيرس احلام

دكتور عصام: فيه ايه ؟؟
بسوم: شكلهم مسوين حادث .. واللي على السرير في جبهته جرح يحتاج اربع او ثلاث غرز ... ويده شكلها مكسورة غير الكدمات والشموخ
دكتور عصام : (يكلم علي) : وانت يا ابني فيك ايه
علي: (معصب) مافيني شي عالجوا سلطان الحين (تأففت بسوم منه وصدت عنه)
دكتورعصام: حنعالجه يا ابني .. بس كمان انت عاوز حد يشوفك ... خديه يا احلام لدكتور براين يشوفه وروحي يا هنا معاهم
هنا: ان شاء الله
علي: مب طالع لين ما تشوفون سلطان بلاه
سلطان: علي روح عند الدكتور الثاني هب كل يوم بيدلعونا ويعالجونا اثنيناتنا
علي : والورقه اللي تباها الدكتوره
دكتورعصام: الشرطه برا يا ابني كلمهم خلص التحقيق وياهم ... انت اللي كنت بتسوق مش كده
علي: هيه ...
الدكتور: (يكلم بسمه) يا بنتي الشباب لما بيعملوا حوادس ويكون حد من صحابهم معاهم احساسهم بالزنب بيدفعهم لكل العصبية والخوف على صحابهم بيخليهم يستنوا لحد ما يطمنوا على صحابهم اول .. وانتي لازم تطويلي بالك عليهم
بسوم: اوكي
احلام: ياللا يا استاز خل الدكتور يشوف شغله

طلع علي ويا احلام بس الدكتور وقف هنا قبل لا تروح وسئلها شو تتوقع دكتور براين يسوي وياه
هنا: ما ادري بشكل تفصيلي ما خلى حد يصكه قبل لا توصل ... بس اظن انه بينظف الجرح وبيتأكد انه مافيه شظايا ... وبعدين بيخيطه وبيحوله اشعه عشان النزيف الداخلي
دكتور: طيب روحي شوفي الدكتور حيعمل ايه .. وازا حيعمل حاجة ما قولتيهاش (طلعت هنا ورد الدكتور لسلطان ويا بسوم) دلوأتي نشوف الجرح اللي في وشك يا بني ... اطبيله اياه يا بنتي
بسوم: لا دكتور ما اقدر اخافه يتعور
الدكتور: (رافع حياته) يتعور ايه انتي دكتوره دلوأتي ولازم تتصرفي
بسوم: دكتور
الدكتور: ياللا يا بنتي ... (يكلم سلطان) عندك مانع يا ابني تأطب لك الجرح اللي في وشك ... هي متدربه عندنا
بسوم: وبتكون اول مرة اخيط بها جرح في حياتي
سلطان: اوكي مب مشكله
الدكتور: ياللا يا بنتي عاوزين نحوله على الاشعه والتجبير

بدت بسوم تخيط الجرح حق سلطان وما لبست قفازات وهي تخيط الجرح ... كان سلطان يتعور بس ما بين على ويه من دخل وهو يطالع في ويها ... ما كان متوقع او متخيل او حتى لو حد قاله في دكتوره حلوة في مستشفى توام انه يصدق وجود وحده بكل هالجمال والرقه والبراءة تدكون دكتورة او منظمة للقصابين اللي في المستشفى مثل ما يسمون الشباب الاطباء اللي في مستشفى توام .. بعد ما خلصت وفحص الدكتور اللي سوته وتأكد من انه اوكي

الدكتور: اول غلطه مالبستش القلفز ليه ... مش صح ابدا تعملي حاجة بإديك دون ما تعقميها او تلبسي القلفز ...
بسوم: (ويها حمر) نسيت
الدكتور: ما تنسيش مرة تانيه ... دلوأتي خديه للاشعه والتجبير وشوفي حيعملوا معاه ايه ... انا حروح اشوف هنا عملت ايه مع دكتور براين
بسوم: اوكي

طلعت بسوم ويا سلطان ووحده من الممرضات .. ووردنه الاشعه والتجبير ... خلصوا من سالفة الشباب الاثنين اللي مسوين الحادث ... وكانت هاي اول تجربة عمليه لبسوم في المستشفى صح حست اول شي بالخوف بس في النهاية تعلمت شي .. وكيف تتصرف خاصة يوم مدحها لدكتور وقالها انها تصرفت صح مع المرضى وانها تريت اول الشرطه ... ويوم ردت بسوم البيت كانت مستانسه بهالتجربة اللي مرت فيها وقالت حق عوشه وحمده وروضه واتصلت في فطوم اتخبرها شو صار وياها في المستشفى والاحساس اللي حسته
**
في المقهى قبل سفر سلطان وعلي ومحمد بيومين قاعدين ويا محمد ومبارك يسولفون ويضحكون على على وسلطان اللي كانوا مسوين حادث في الاسبوع اللي قبله .. كانت يد سلطان مكسوره وجرح في يبهته يلوع الجبد ... اما علي في ويهه كدمة مشوهتنه... غير جرح اللي في كتفه

محمد: بالذمة شياك احوليت كيف دخلت في دوار توام
علي: هذا يبغي يبدل الشريط وانا ما اريده يغيره وكنا نتضارب على المسجل وما كنت منتبه ودخلت في الدوار
سلطان: والله احلى حادث في حياتي .. تعال كل يوم نسوي حادث (خزه علي بنظره وهو معصب)
محمد: هاهاهاها صدق متفيج
علي: روح نفد عمرك بروحك ... انا بعدهم هلي يبوني
سلطان: أي أي واحد فيكم يريد يسوي حادث يخبرني قبل بروح وياه .. كسرولي ايد ريل ضلع المهم شلوني وياكم
مبارك: هاهاهاها لا والله شو عيبتك السالفه
سلطان: اوف يا ريال ... فيه دكتوره حلوة في المستشفى .. ما صدقت انها تشتغل في هالمستشفى ... هاي بس يحطونها جدام أي حد متعور ويلعبون فيه ما بيحس ... بيطالعها وبيتخدر
علي: ماعليكم منه يخرط عليكم
سلطان: والله ما اخرط عليكم بس هو منقهر منها لانها واجعته
علي: تخسي الا هيه العيوز العانس
سلطان: أي عيوز عانس .. والله انه اللي يشوفها ما يعطيها اكثر من عشرين
محمد: لا نشوا تذابحوا
علي: ما تسوى
سلطان: روح لاه
مبارك: زين شو اسمها هالدكتورة
سلطان: تصدق ما اعرف
سعيد: عالجتك وامتحنت منك وراحت وياك الاشعه وما تخبرتها شو اسمها
سلطان: لا
محمد: ما شكرتها
سلطان: هيه قلتلها مشكوره وبس
علي: ماعليه كان مسطل في ويها
سلطان: والله والله انها حلوة ... وقسم بالله انها حلوة
سعيد: هاهاهاها زين لا تحلف صدقناك
علي: والمصري ما قال اسمها جدامك
سلطان: لا الله ياخذه هالشويبه المخرف يقولها يا بنتي يا بنتي يحلم عنده بنت مثلها (ضحكوا كلهم على سلطان اللي كان معصب وهو يتكلم عن الدكتور)
سعيد: يزاته بعد انه عالجك
سلطان: لو مب هيه جان قصبني هب عالجني
علي: اسكت اسكت الله يخليك .. ذليتنا بهالدكتورة .. ياخي روح رقمها وفكنا .. تلقاها عيوز تدور ريل
سلطان: تصدق ما يا على بالي ارقمها ... من شفتها انسطلت ... بعدين عيب شو بتقول ارقمها مكسر ومتعور واغازل .. كنت اخاف تعطيني زرنيخ هب دوا
علي: هاهاهاها انا اللي بييب لك زرنيخ لو تطريها مرة ثانيه (وردوا يضحكون(
محمد: (يكلم سلطان) زين انت كيف بتسافر ويدك مجبسه
سلطان: عادي يوم بنرد بنفج الجبس ... مب مشكله
سعيد: ودكتورتك الجميلة
سلطان: يالله ماعليه .. بشوفها يوم بنسوي حادث ثاني ان شاء الله
علي: (معصب) انت ثور في حد يفاول على عمره
سلطان: (مبتسم) زين ليش عصبت
علي: زول يا ريال ... كل يوم اعفد في دوار ورح لها خلها تلعب فيك .. لين ما تيب اجلك

ردوا يضحكون ويسولفون ونسوا موضوع دكتورة سلطان اللي من سوى الحادث وكل يوم يطريها ... وقاموا يوم يتخبرونه عن حاله يسئلونه اول عن دكتورته .. او يقولون دكتورة سلطان ... واللي ما كانوا يعرفونه ان دكتورة سلطان هي بسمة اخت سعيد وبنت عم مبارك
**

عوشه بدت تحط الخطط الاولية وتكتب لستة بكل شي تباه لعرسها ... وعمها شاور مبارك يعدلون له جناح منصور يعرس فيه ... ولا يتحول جناح اخوه عشان يعدلون جناحه هوه ... في الاول حزت في خاطره انه يسكن جناح اخوه بس بعدين اقتنع لانه كان اكبر جناح في بيتهم كله ... حتى اكبر من جناح امه وابوه ... كان مبارك قاعد ويا امه وابوه الصبح يتريقون قبل لا يطلعون هو وابوه دواماتهم

ام منصور: هاه بويه تبغينا نشاور عوشه في ديكور قسمكم ولا بتسويه بروحك
مبارك: لا امايا خلوها تسوي اللي تباه ...
بومنصو : بارك الله فيك يا ولدي ... خلها تسوي اللي يريحها هيه اللي بتسكنه
مبارك: ليش وانا وين بسكن في بيت الجيران ... تراني بسكن وياها .. ولا ناوي تخليني في جناحي بعد العرس (ضحكوا الشواب عليه(
ام منصور: خلاص جان بتصبر عن حرمتك بنسكنك في حجرتك الجديمة وبسوي لها القسم حقها بروحها
مبارك: لا والله عيل حق شو هالمخاسير كلها والبشت ... قولوا حق عمي يعطيكم اياها هدية وانا بدور حرمة ثانيه
بومنصور: هيه بدور حرمة ثانية دامني حي ...
مبارك: لازم بتحامي بنت اخوك ... وانا لاقطني من الكشرة
ام منصور: لا فديتك غالي دامك تسمع الرمسه وراضي والديك
مبارك: فديتني دومني ارضيكم .. من اغلى من ابو منصور عندي
ام منصور : وانا امك ... صدق عيال هالزمن ما فيكم خير .. انا اللي تعبت فيك وشليتك تسع شهور هب بو منصور ... ورضعتك سنتين وما اشتكيت من الويل اللي شفته منكم (ضحك بو منصور عليها(
مبارك: هاهاهاها الحين اشتكيتي ... انتي يا بعد عمري الغلا كله .. بس بعد تدرين الشيبه لازم الحين ندهن سيره العرس على حسابه بنت اخوه ناويه تفقره وتخليه يعلن افلاسه
بومنصور: بس خل عنك هالرمسه وقوم خلنا نطلع بتأخر على شغلك
مبارك: (بعد ما نش من على الطاولة ) ياللا طويل العمر ...

طلع مبارك مع ابوه ... وردت ام منصور ترقد شوي في حجرتها لين الضحى لانها كانت بتطلع ويا ام خالد وبيمرن على مريم بيسيرن على حرمة كانت يارتهن من ايام الشعبية
**

في الصيف حاولت عوشه تخلص كل مشاويرها في دبي وبوظبي عشان من تبدا دوامات الجامعه ما بتقدر تروح بوظبي ودبي الا في الويك اند عشان روضه .... كانن يروحن يقعدن في بوظبي بالايام ويا سعيد في الشقة ... وفي دبي يروحن بيت فطوم او بيت خال حمده وروضه ... في بوظبي كان سعيد يوديهن اغلب مشاويرهن يوم يرد من الدوام لان ربعه كلهم كانوا مسافرين .. اما الصبح يطلعن ويا الدريول وروز ... ومرات عبود يروح لهن بوظبي .. ويطلعهن وياه يتمشن البحر او حتى السنما ... في بوظبي عوشه وروضه وعبود وسعيد كانوا رادين في الليل من برع ويايبين وياهم عشاهم وقاعدين على الارض يتعشون

عبود: خلاص بس انا برد العين باجر مليت من بوظبي
عوشه: ونحن بعد امي اتصلت بي اليوم وقالت لي نرجع
سعيد: انتي ما خليتي سوق في بوظبي ما رحتيه ... بس عاد خلصتي السوق
روضه: عروس كيفها ... شو يعني ما تشتري
سعيد: حشا اللي اتشرته يكفي سنه .. شو بعد ما تعرس ما بتشتري ثياب خلاص
روضه: لا بتشتري لانها بتمل من اللي عندها
عبود: بعد .. الله يعينك يا مبارك
عوشه: طالع خواني يحاتون ولد عمهم ولا يدورون راحة اختهم
روضه: احسن خلها تفقره ... وبعدين هب من جيبه هاي فلوس عمي سلطان
سعيد: يوم تدرن انها فلوس عمي سلطان ليش ما تخفن الريس شوي
عوشه: اوهوووو .. مرة ثانيه ما بيي بوظبي وانت فيها ولا براويك شو اشتريت
عبود: بالذمة هالثلاث ايام بكم اشتريتي
عوشه: مالك خص اشتريت وايد اشياء
عبود : زين قولي بكم
عوشه: ما بقول
سعيد: روضه كم صرفتن هالثلاث ايام
روضه : حرام والله انا بعد خذت ثياب حقي وحق بسوم للجامعه ... دواماتنا بتبدا اول تسعه مب بس هيه بروحها

رن هنيه تيلفون سعيد كان مبارك متصل يتخبر عنهم وشو مسوين ويا البنات .. وفي خاطره ايي عندهم بس ما كان عنده اجازة

مبارك: هاه بو عسكور شو الجو عندكم
سعيد: هاهاها مشمس جاف غائم ممطر جزئيا
مبارك: ول شو هذا كله
سعيد: جيه يقولون في النشرة الجويه ... اخبارك النت وشو العين واهلها
مبارك: يا ريال ما تسوى ... الشباب مسافرين ومحد هنيه .. تعال ليش ما تاخذ اجازة اسبوعين وتقعد في العين
سعيد: لا برايها اجازتي بخذها في الشتا بنروح مقناص
مبارك: هيه والله من متى ما رحنا قنص ... بس وين معزم ومع منوه
سعيد : بنروح ويا هل دبي ...
مبارك: منو من هل دبي
سعيد: حميد واخوه عبدالله وعمر واحمد ربع خالد بيروحون ويا شيوخ دبي وعزموا علينا
مبارك: خلاص انا بعد بروح وياكم ... بس من وين بتاخذ لك طير
سعيد: والله يا ريال ما ادري بشوف سلطان يوم بيرد بخليه يدور لي ... وتبغي الصدق شيوخ دبي يشلون طيورهم كلهن .. ويعطون ربعهم يقنصون بهن
مبارك: تدري انا بتخبر هزاع ... بخذ من عنده طير .. هو يقيض طيوره بروحه ما يوديهن عند حد ومتبرض لهشغله
سعيد: ماعليه يوم برد العين بروح له وياك
روضه: (وهي متملله من سوالف سعيد ومبارك) اوهوووو الشتا بعده بعيد بسكم من التيلفون .. أي يا مبارك يا مزعج بند التيلفون قاعدين انتعشى
مبارك: (بعد ما سمعها) اوهووو هاي دومها داخله عرض ... الله يعينك عليها كيف متحملنها وانتوا قاعين في شقة ضيجة
سعيد: ما ادري يا ريال ...
روضه: ادري تحشون فيني بس ماعليه ماعليه خلني ارد العين...
سعيد: هاهاهاها لا لا افا عليج كم روضه عندنا
روضه: (رافعه حياتها) وبعد
سعيد: (يبتسم) احلى واجمل واروع بنت
روضه: في
سعيد: العالم والكون والمجرة
مبارك: هاهاهاهاهاها يا خواف تخاف منها هاه ونه احلى بنت .. افاااااا لاعبتبك بنت عمك
سعيد: هاهاهاها شو نسوي يا ريال ناخذها على قد عقلها
عبود: ويييييييييييييييييييييييو خبله ياخذونها على قد عقلها
روضه: (ونها تصيح) لا لا لا ما اريد ما اريد انا زعلت ودوني بيتنا ردوني عند عمي والله بخبر عليكم عمي مستفردين فيني وتعذبوني ... وتخلوني اطبخ واخم وتنيموني يوعانه (كانوا سعيد ومبارك وعوشه يضحكون وعبود يطالعها فاج عيونه(
عبود: ول عليج يا الجذابه هذا كله سويناه فيج ... ثرج سندريلا هب روضه
روضه: هيه اتريا الامير بعد
عوشه: ما عندنا هنيه امراء اتريي الشيخ
روضه: هيه ماعليه بتريا الشيخ

بند مبارك عن سعيد وكملوا عشا وقعدوا شوي وبعدين راحوا يرقدون وردوا العين بالباجر كلهم لان ام خالد تبغي البنات يردن البيت
**

رد محمد من جنيف اول شهر تسعه ... حتى سلطان وعلي ومحمد ردوا اول الشهر بعد يومين من رجعة محمد اخو مبارك .... سلطان فج الجبس يوم كانوا في القاهرة ... وحتى الجرح كل اللي بقى منه اثر بسيط ...
محمد اخو مبارك اللي كان رايح اجازة يرتاح من كل الشغل اللي عليه في المؤسسة رد ولقى الشغل مكوم عليه وكان يقعد في المكتب من الصبح لين في الليل ... ما يرد الا يتغدا ويقعد ساعة وحده ويرد المكتب ... كانت هاي طريقته عشان ينسى كل همومه ومشاكله طريقه للهروب من الواقع المؤلم اللي يعيشه ... ثلاث شهور يروح بس ما يرتاح بالعكس يروح يعذب نفسه في ارض كلها ذكريات صارت بالنسبة له محرمة ومؤلمة .. في داخله مقتنع انه كل اللي يسويه غلط ... بس ما كان يقدر يقاوم حبه لها ... كل شي فيها يرده لها .. سواء كانت في البحرين او في جنيف او أي مكان في العالم ... كل ما راح جنيف رد وكأنه اكبر عشر سنوات ... بالرغم من ان امه كانت تعرف بعذابه وابوه يلاحظ همومه بس كانوا يتجاهلون كل اللي يمر فيه .. هو اللي اختار هالشي لنفسه وقرر يعذب نفسه .. من الاول ما كان المفروض انه يسمح لنفسه انه يوصل لهدرجة ... بعد ما رد اخر الليل البيت كان مبارك يترياه بيقعد وياه .. فتح باب الجناح ماله وحصل مبارك قاعد في الصالة يشوف التلفزيون

محمد: (يبتسم) ماشاء الله قاعد هنيه
مبارك: هيه لازم نترياك ما ترد الا اخر الليل
محمد: شو اسوي الشغل وايد .. وانت تدري
مبارك: ياخي قلنا اشتغل بس مب هالكثر .. شوي شوي على عمرك بتموت بالجلطة وانت شباب
محمد: لا والله وناسي بعد الحين خيام عرسك وديكوراتها .. لازم حد يتابعهم ويشوف التصاميم اللي بيطرشونها ونختار الشركة الاحسن
مبارك: خيبه خيبه شو هيه مناقصة تشوف الاحسن .. اختار شركة وشوف الموجود عندها واتنقى منه
محمد: تريد عوشه تنتحر ولا ما تدخل الخيمة ...
مبارك: (يبتسم) تصدق بنت عمك تسويها لو ما عيبها شي
محمد: ادري ... واخبارهم اهل العروس
مبارك: ربشه يا ريال .... كل يوم مكان ما خلن سوق في العين وبوظبي ودبي ما راحنه
محمد: وليش ما راحت لندن او باريس اتسوق بعد
مبارك: الله يخليك لا تقول هالشي جدامها ترى عوشه خبله تصدق
محمد: هاهاهاها ليش لا .. روح انت وياهم ما سافرت السنة
مبارك: لا بخلي الاجازة حق بعد العرس ... بروح قنص ويا سعيد
محمد: هاهاهاها والله كنت متوقع تقول بسافر شهر العسل ويا العروس ... أي قنص شو تخبلت
مبارك: لا بسافر وياها ... بس بروح شهر واحد القنص عشان جيه اريد الاجازة
محمد: عاد ان خلتك تروح بعدين
مبارك: حد قالك اني بشاورها يوم بروح
محمد : بنشوف يا مبارك .. اخافها الا هيه تمشيك وتطلع كل اللي كنت اتسويه فيها من عينك بعدين
مبارك: هاهاهاها ما عليك عوشه طيبه ينقص عليها بكلمتين ...
محمد: اوووووه قمنا ندافع عنها بعد
مبارك: ياللا عقبالك
محمد: مب مبين ... خلها على الله يا ريال

عرف مبارك اخوه شو يقصد بس حب يغير الموضوع ولا يفتح هالموضوع اللي يجرحه وقعد يسولف وياه ويتخبره عن الشباب اللي شافهم واللي يعرفونهم من السعودية والكويت واذا شافهم او لا ... وردوا يسولفون عن عرس مبارك ...وبعدين راح مبارك يرقد
**

بدت دوامات الجامعه وانشغلت بسوم هالسنة صدق محد كان يشوفها ... حتى فستانها روضه اللي اختارت لونه وموديله ومنو يفصله ... كانت بسوم موكلتنهم بكل شي ... ولا حتى ابدت راي او ناقشتهم في شي قالولها اياه ... كانت مشغوله صدق بدراستها ومندمجه فيها .... روضه صح كانت اداوم الجامعه بس كانت بعد متفيجة ويا عوشه وحمده عشان ترتيبات العرس ... وديكورات جناحها في بيت عمها ... كانن كل يوم يختارن لون ويردن يغيرنه بالباجر ... او يختارن اثاث ويردن ايغيرنه بعدها باسبوع ... ديكورات خيام العرس تكفل بها محمد كامل .. بعد ما شاورها شو من الالوان تريد وخلاها تختار الكوشه اللي تباها ... وفي هالربشة كلها كانوا يفتقدون عبود اللي يروح الكلية طول ايام الاسبوع وما يرد الا في الويك اند ... كانوا على اتصال دايم بفطوم وكل ما اختارن شي شاورنها .. فستان العرس سوته في لبنان عند زهير مراد ... حمده والبنات سون فساتينهن عند اليزابث في بوظبي ..اخر اسبوع من شهر عشرة يوم الخميس الصبح كلهم قاعدين ويا بعض حتى فطوم هيه وولدها اللي كمل سنة قاعدين بعد ما تريقوا ويا ابوهم يسولفون .. كان ولد فطوم يلعب ببراويز الصور اللي محطوطات على الطاوله

فطوم: سعود لا... تعال هنيه لا ازقر لك نيلدا تشلك (ابتسم لها ولدها وفر البرواز وراح صوب التلفزيون ووقف جدامه)
عوشه: هذا ولدج شيطان حشا غادي زيبق ما ينمسك
فطوم: أي اتعوذي لا توحين ولدي ..
عوشه: لا تخافين ما بييه شي
فطوم: بنشوف عيالج بعدين
بسوم: ياللا انا بخليكم الحين بروح ادرس شوي
روضه: اموت واعرف شو تدرسين هالكثر .. بس خلاص انتي تحفظين كل اللي في الكتاب حتى ارقام الصفحات
عبود: والله قمت اشك في هالشي تصدقين
بسوم: تصدقون ما يضحك .. بايخ انت وياها
روضه: اقول عموه بسوم ما تبين تاخذين نعال حق العرس
بسوم: خذيه انتي ما اعرف لون الفستان
عبود: والله ما تعرفينه
بسوم: لا اظني وردي صح
روضه: لا فوشي مب وردي يا حظي
بسوم: زين نفس اللون بس درجه غير
روضه: روحي روحي درسي ابرك انا بشتري لج يوم بروح اخذ لنفسي
ام خالد: خلوا البنيه تدرس ... لا توحونها ... روحي امي الله يوفقج غناتي
بسوم: (ابتسمت لامها) اوكي ... ياللا باي (راحت بسوم والكل كان يطالعها(
خالد: لحقوا بنتكم عالجوها تراها بتين من مجابل الكتب
بوخالد: بسم الله عليها البنيه مافيها شي .. الا تغارون منها بتغدي دكتورة وبترفع روسنا
عبود: الحين نحن كلنا ما بنرفع راسك ... وبنتك هاي اللي بترفع الراس
بوخالد: لا كلكم ماشاء الله عليكم الله يخليكم ان شاء الله
سعيد: هاه شو الاستعدادات للعرس .. بعد ثلاث اسابيع
عوشه: يا ويلي كل خوفي الفستان ما يطلع حلو
حمده: لا ماعليج يوم ان مراد زهير مسونه بيطلع حلو
عبود: شو الخيام يا ريال... اللي يشوفهن يقولون عازمين هل الامارات كلهم
عوشه: برايهن انا اريدهن جيه
خالد: مسكين محمد اللي يشوفه ما يصدق انه هوه الاولي .. صدق تعبان من مجابل شغلكم .. ومبارك مرتاح
سعيد: هو اللي يريد ... بعدين الميزانيه كلها تحت ايده توقيعه المعتمد في البنك مع توقيع عمي
بوخالد: ماشاء الله عليه ريال ما ينخاف عليه
عبود: امايا فديتج تعالي بقولج شي
ام خالد: قول شو عندك
عبود: لا شي خاص تعالي ندخل الحجرة
ام خالد: لا اذا عندك شي قوله هنيه
عوشه: هيه قول هنيه شو تريد في الحجرة
عبود: لا حول .... انتي بعدج ملقوفه الله يعين ريلج عليج
عوشه: مالك خص في ريلي
سعيد: اوووووه ... من الحين الحبيبة مالك خص في ريلي
روضه: هاهاها باجر من تطرون اسم مبارك بتقول فديت روحه يا ربي
حمده: يمكن الحين من ينطرى قالت في خاطرها فديت روحه يا ربي
عوشه: ابوووووي شوفهم شو يقولون ... والله تراني ازعل
خالد: اهاااا ونزعل بعد ... لا والله تطورنا وايد
عبود: هاهاهاهاها باجر بتينا عوشه في قمة الرقة والانوثة متغيرة 180 درجة ... تتكلم بصوت واطي كله همس.. وبتنسى حركات الدفاشة والشباب
عوشه: قول والله بس انت .... وشو تشوني الحين واحد من الربع
عبود: هيه يوم يسئلوني كم خوانك اقولهم ثلاثه ... بعدين اتذكر انج بنت وأصلح اقول اثنين
بوخالد: عبدالله اسكت عن ختك ...
عبود: بسكت اذا نشت امايا وياي داخل الحجرة
ام خالد : (وهي تنش من مكانها) تعال بشوف شو تريد انت في الحجرة

ونش هو يمشي وراها ويسوي حركات بويهه وايدينه وامه اتحرطم واللي قاعدين يضحون عليه
**

في الحجرة قعدت امه على كرسيها وقعد هو على الشبريه مجابلنها .. وكانت اترياه يتكلم يقول شو اللي في خاطره.. عبود كان ساكت يدري انها بتعصب لانه بيكلمها في موضوع بنت عمته مريم ... بالنسبة له من سابع المستحيلات ياخذ وحده فيهن ... ما يداني حد في بيت عمته مريم غير عمته .. اما عيالها ما يدري على منوه طالعين ولا يبلعهم لا حمد ولا اختينه

ام خالد: شعندك مدخلني الحجرة
عبود: شوفي امايا انا بكلمج هالمرة صدق ... ودخلتج الحجرة عشان اقولج اللي في خاطري وانتي بكيفج
ام خالد: شو في خاطرك
عبود: امايا انا ادري ان باقي لي سنه في الكلية ... يعني خلاص قريب بتخرج ومب ياهل الحين انا ريال عمري 22 سنه
ام خالد: ادري انك هب ياهل ولا انت صغير
عبود: امايا ما اريد وحده من بنات عموه مريم ... والله مب في خاطري
ام خالد: وانت تشوف انه هذا وقته عشان تقول هالكلام
عبود: انا ادريبج امايا فرحتج بتخليج تخطبين وحده فيهن ... انا ما اريدهن والله ما اريدهن
ام خالد: وليش شو فيهن بنات عمتك ... مزينهن ومسنعات
عبود: (في خاطره امحق سنع) والله مسنعات حق عمارهن وعندهن عيال عمومه ... واذا هالكثر تبين وحده فيهن عندج سعيد خطبيله وحده فيهن
ام خالد: لو ابوك يطيع جان خطبت له منهن
عبود: يا سلام يعني سعيد ما يخطب له منهن وانا برايني ازول اخذ أي حد
ام خالد: يا ولدي القريب واللي انعرفه احسن من الغريب .. انت شايف على بنات عمتك شي مب زين ... غلطن في شي
عبود: لا ما شفت عليهن شي ولا رحت كسرت روسهن ... بس انا ما اواطنهن ولا اواطن اخوهن ... انا واحد حمد هذا ما ابلعه اروح اناسبه ولا يكون خال عيالي ... بموت من القهر
ام خالد: انت خاطرك في حد ... تبغي حد يا عبدالله
عبود: مب سالفة ابغي والله العظيم .. بس أي حد الا بنات عمتي مريم
ام خالد: أي حد مثل منوه
عبود: ( يبتسم) شو يعني تبين اتيريريني في الرمسه
ام خالد: يا ولدي انا امك وابغيلك الخير والزين ... وما بغصبك على شي ما تباه .. خلاص بنات عمتك الله يرزقهن ... بس انت بعد ريح لي قلبي وقول اذا حد في خاطرك ... ولا عاشق لك بنيه يكفينا ولد عمك
عبود: هاهاهاها لا والله امايا ماشي من هالسوالف ... بس تبغين الصدق انا اريد اخذ وحده من خوات حميد ريل فطوم ... ناس والنعم فيهم .. والواحد يتشرف بنسبهم .. وانتي تشوفين كيف حاطين فطوم في عيونهم ويحبونها
ام خالد: والله بنات ام عبدالله ما عليهن قصور لكن في وحده منهن محيرة لولد عمها وما ادري عن الثانية يا ولدي
عبود: لا مب محيرة حق حد ... بس انا ما اقولج روحي خطبيها لي باجر او كلميهم .. يوم اتخرج يصير خير .. بس بنات عموه مريم لا
ام خالد: خلاص يا ولدي يصير خير
عبود: فديت ام خالد انا .. اللي ما يهون عليها ولدها الدلوع الحلو
ام خالد: اسميك يا ولدي بياع كلام ...
عبود: (نش بيطلع) وايه فديت روحي انا ... الناس تحسدج لان عندج ولد مثلي
ام خالد: على شو بيحسدوني على العقل اللي فيك ...
عبود: على الجمال اللي فيني .. على ذوقي واخلاقي

طلع عبود من عند امه وهو مبتسم ومرتاح والكل يطالعه يتريونه يقولهم شو قال حق امه بس هو لبسهم وراح فوق وهو يدندن باغنيه ....

خالد: أي وين ... شو السالفه شو قلت حق امي
عبود: سر بيني وبينها
عوشه: وشو من الاسرار اللي عندك ويا امي
عبود: مثل الاسرار اللي عندج ويا روضه
سعيد: وين بتروح
عبود: بروح حجرتي (وطلع فوق وخلاهم قاعدين يتريون ام خالد تطلع يمكن تقولهم شو السالفه)

عبود ما راح حجرته .. دخل على بسوم ولقاها قاعده تدرس بس ما همه وقعد على المكتب مالها وسكر الكتاب اللي تقرا فيه

عبود: والعثرة هذا كله تدرسونه ... حشا مخج بيذوب
بسوم: عبود شو تريد الحين ... وراي دراسه
عبود: ياللا اتصلي في سارة
بسوم: (عاقده حياتها) منو سارة
عبود: بلا غباء ... سارة اخت حميد
بسوم: اوهووووو انت ما تمل من هالسالفة ... ذبحتني حشا وليش اتصل فيها
عبود: اقولج بتي العرس
بسوم: ما ادري ما سئلتها
عبود: زين سئليها
بسوم: عبود انت صدق متفيج ياي تقولي اتصل في البنت عشان اسألها بتي العرس او لا .... العرس بعده ثلاث اسابيع
عبود: لا بسوم عاد والله مصختوها لو انخطبت انا اروح اولي وانتحر
بسوم: يا عبود والله البنت ما انخطبت .. قلت لك اول كلم امي وخلص نفسك من بنات عمتي
عبود: كلمتها وخلصت نفسي منهن خلاص
بسوم: (رافعه حياتها ) والله
عبود: هيه والله .... ياللا الحين شو بتسوين
بسوم: خلاص والله بكلمها
عبود: قبل عرس عوشه
بسوم: ان شاء الله ... بس امي ما بتخطبها لك قبل لا تخلص كليه
عبود: المهم اترياني
بسوم: حاظر عمي ... اوامر ثانيه
عبود: لا فديت روحها اختي الحلوة انا ... ياللا درسي ... برد اسمع لج في الليل
بسوم: انت متفيج ... روح خلني ادرس
عبود: (نش بيطلع عنها عشان تدرس) ياللا باي

طلع عبود من عند بسوم بس ما دخل حجرته نزل تحت والكل كان يطالعه .. كان مبتسم ويغني ... وطالعهم ونه مستغرب من النظرات اللي يطالعونه بها ... ورد يلس عدال بو خالد ... ام خالد طلعت من حجرتها وراحت قعدت عدال بناتها ....

فطوم : سعود تعال هنيه .. ولا بقول حق عمي عبدالله ما يوديك في السيارة (رد سعود بكل ادب بعد ما كان يتعبث بالفنايين وقعد في ثبان امه(
عوشه: طالع مسود الويه من الحين من طرينا السيارة سكت
عبود: (عشان يغايض سعود) ياللا روضه قومي بنروح في السيارة بنروح العزية بنطالع البوش ... .هاتي حمود الصغير ياللا (كانت عيون سعود على عبود ونظراته كلها توسل(
عوشه: خيبه كيف يتعذب ولدها
روضه: اوكي وبعد بنروح الدكان بناخذ لنا حلاوه وعصير
عبود: بعد بنيب سيارة حق حمودي
سعود الصغير: (معصب وعاقد حياته) نو نو انا انا
عبود: ياللا ياللا روح عند عمك ما بوديك مكان (وهو يطالع حمده) ياللا حمده وين حمود الصغير
هنيه سعود برطم وكان خلاص بيصيح من القهر وخواله ضحكوا عليه
حمده: حرام عليك عبود بعدين بيكره ولدي وبيضربه
عبود: بكسر ايدينه خليه يصكه
فطوم: هيه لاقطنه من الزباله تكسر يدينه مب جني تعبت فيه

نش سعود وراح حذال عبود يتمسح فيه عشان يوديه الدكان... سعود عمره سنه وشهر وماكان يعرف يتكلم بعده الا كم كلمه .. وكل ما يابته امه العين مسكه عبود ولعوزه يذله ذل لين ما يوديه الدكان ...

عبود: ياللا ياللا روح عند امك ولد امك
فطوم: عبود لا تزقر لي ولدي
عبود: من حلاته الشين
فطوم: ودك ييب ولد مثله بعدين تكلم
ام خالد: عبود تعوذ من ابليش وخل الولد
عبود: طالع هو اللي ياي عندي هب انا اللي رحت له
سعيد: تعال سعود حبيبي ... (بس عاد من يقول بيتحرك من عدال عبود ... سمعه يقول بيروح بالسيارة الدكان والعزبة ... لو ايي ابوه ويقوله تعال ما بيروح ولو يذله عبود ذل ما تحرك من حذاله)
سعود: نو مي كا (يعني نو عمي سيارة(
سعيد: طالع مسود الويه
عبود: (وهو يشله من على الارض ) خلني بلعوزه اول والله لو اعضه الحين ما صاح ولا اشتكى ... (وهو يشل سعود من على الارض ويرفعه جدامه) أي انا مب عمي انا خالي قول خالي ياللا قول خالي
فطوم: حرام عليك عبود
عبود: اعلمه شو عمي هاي (ورد يكلم سعود ) قول خالي ياللا عشان نروح
سعود: (يضحك) لي
عبود: الحمدلله والشكر على هالرمسه المنقعه عمي ستوت مي وخالي لي ... الحمدلله
ام خالد: ولدك انت اللي بيطلع يرمس من بطن امه .. تباني اقولك لين متى وانت ما تعرف ترمس
خالد: قوم ود الولد الدكان منيته هالكثر ياللا
عبود: (نش وشل ولد اخته) ياللا سعود نروح الدكان نشتري كار حق سعود ما نريد حمود ما بنيب له شي صح

طلع عبود ويا ولد اخته وركب السيارة وراح الدكان اللي مجابل بيتهم .... وخذله سيارة لان سعود من شاف السيارات ما طاع ياخذ شي ثاني

عبود: صدق ولد فقر .. اقولك خذ اللي تباه تاخذ سيارة بس .. نحن يوم كنا يهال ما نصدق نشوف دكان
سعود ما كان فاهم شي من كلام خاله بس مستانس على السيارة اللي خذها ورده عبود البيت وطلع شوي راح ميلس يرانهم لان ربعه كانوا هناك

في المقهى قبل سفر سلطان وعلي ومحمد بيومين قاعدين ويا محمد ومبارك يسولفون ويضحكون على على وسلطان اللي كانوا مسوين حادث في الاسبوع اللي قبله .. كانت يد سلطان مكسوره وجرح في يبهته يلوع الجبد ... اما علي في ويهه كدمة مشوهتنه... غير جرح اللي في كتفه

محمد: بالذمة شياك احوليت كيف دخلت في دوار توام
علي: هذا يبغي يبدل الشريط وانا ما اريده يغيره وكنا نتضارب على المسجل وما كنت منتبه ودخلت في الدوار
سلطان: والله احلى حادث في حياتي .. تعال كل يوم نسوي حادث (خزه علي بنظره وهو معصب)
محمد: هاهاهاها صدق متفيج
علي: روح نفد عمرك بروحك ... انا بعدهم هلي يبوني
سلطان: أي أي واحد فيكم يريد يسوي حادث يخبرني قبل بروح وياه .. كسرولي ايد ريل ضلع المهم شلوني وياكم
مبارك: هاهاهاها لا والله شو عيبتك السالفه
سلطان: اوف يا ريال ... فيه دكتوره حلوة في المستشفى .. ما صدقت انها تشتغل في هالمستشفى ... هاي بس يحطونها جدام أي حد متعور ويلعبون فيه ما بيحس ... بيطالعها وبيتخدر
علي: ماعليكم منه يخرط عليكم
سلطان: والله ما اخرط عليكم بس هو منقهر منها لانها واجعته
علي: تخسي الا هيه العيوز العانس
سلطان: أي عيوز عانس .. والله انه اللي يشوفها ما يعطيها اكثر من عشرين
محمد: لا نشوا تذابحوا
علي: ما تسوى
سلطان: روح لاه
مبارك: زين شو اسمها هالدكتورة
سلطان: تصدق ما اعرف
سعيد: عالجتك وامتحنت منك وراحت وياك الاشعه وما تخبرتها شو اسمها
سلطان: لا
محمد: ما شكرتها
سلطان: هيه قلتلها مشكوره وبس
علي: ماعليه كان مسطل في ويها
سلطان: والله والله انها حلوة ... وقسم بالله انها حلوة
سعيد: هاهاهاها زين لا تحلف صدقناك
علي: والمصري ما قال اسمها جدامك
سلطان: لا الله ياخذه هالشويبه المخرف يقولها يا بنتي يا بنتي يحلم عنده بنت مثلها (ضحكوا كلهم على سلطان اللي كان معصب وهو يتكلم عن الدكتور)
سعيد: يزاته بعد انه عالجك
سلطان: لو مب هيه جان قصبني هب عالجني
علي: اسكت اسكت الله يخليك .. ذليتنا بهالدكتورة .. ياخي روح رقمها وفكنا .. تلقاها عيوز تدور ريل
سلطان: تصدق ما يا على بالي ارقمها ... من شفتها انسطلت ... بعدين عيب شو بتقول ارقمها مكسر ومتعور واغازل .. كنت اخاف تعطيني زرنيخ هب دوا
علي: هاهاهاها انا اللي بييب لك زرنيخ لو تطريها مرة ثانيه (وردوا يضحكون(
محمد: (يكلم سلطان) زين انت كيف بتسافر ويدك مجبسه
سلطان: عادي يوم بنرد بنفج الجبس ... مب مشكله
سعيد: ودكتورتك الجميلة
سلطان: يالله ماعليه .. بشوفها يوم بنسوي حادث ثاني ان شاء الله
علي: (معصب) انت ثور في حد يفاول على عمره
سلطان: (مبتسم) زين ليش عصبت
علي: زول يا ريال ... كل يوم اعفد في دوار ورح لها خلها تلعب فيك .. لين ما تيب اجلك

ردوا يضحكون ويسولفون ونسوا موضوع دكتورة سلطان اللي من سوى الحادث وكل يوم يطريها ... وقاموا يوم يتخبرونه عن حاله يسئلونه اول عن دكتورته .. او يقولون دكتورة سلطان ... واللي ما كانوا يعرفونه ان دكتورة سلطان هي بسمة اخت سعيد وبنت عم مبارك
**

عوشه بدت تحط الخطط الاولية وتكتب لستة بكل شي تباه لعرسها ... وعمها شاور مبارك يعدلون له جناح منصور يعرس فيه ... ولا يتحول جناح اخوه عشان يعدلون جناحه هوه ... في الاول حزت في خاطره انه يسكن جناح اخوه بس بعدين اقتنع لانه كان اكبر جناح في بيتهم كله ... حتى اكبر من جناح امه وابوه ... كان مبارك قاعد ويا امه وابوه الصبح يتريقون قبل لا يطلعون هو وابوه دواماتهم

ام منصور: هاه بويه تبغينا نشاور عوشه في ديكور قسمكم ولا بتسويه بروحك
مبارك: لا امايا خلوها تسوي اللي تباه ...
بومنصو : بارك الله فيك يا ولدي ... خلها تسوي اللي يريحها هيه اللي بتسكنه
مبارك: ليش وانا وين بسكن في بيت الجيران ... تراني بسكن وياها .. ولا ناوي تخليني في جناحي بعد العرس (ضحكوا الشواب عليه(
ام منصور: خلاص جان بتصبر عن حرمتك بنسكنك في حجرتك الجديمة وبسوي لها القسم حقها بروحها
مبارك: لا والله عيل حق شو هالمخاسير كلها والبشت ... قولوا حق عمي يعطيكم اياها هدية وانا بدور حرمة ثانيه
بومنصور: هيه بدور حرمة ثانية دامني حي ...
مبارك: لازم بتحامي بنت اخوك ... وانا لاقطني من الكشرة
ام منصور: لا فديتك غالي دامك تسمع الرمسه وراضي والديك
مبارك: فديتني دومني ارضيكم .. من اغلى من ابو منصور عندي
ام منصور : وانا امك ... صدق عيال هالزمن ما فيكم خير .. انا اللي تعبت فيك وشليتك تسع شهور هب بو منصور ... ورضعتك سنتين وما اشتكيت من الويل اللي شفته منكم (ضحك بو منصور عليها(
مبارك: هاهاهاها الحين اشتكيتي ... انتي يا بعد عمري الغلا كله .. بس بعد تدرين الشيبه لازم الحين ندهن سيره العرس على حسابه بنت اخوه ناويه تفقره وتخليه يعلن افلاسه
بومنصور: بس خل عنك هالرمسه وقوم خلنا نطلع بتأخر على شغلك
مبارك: (بعد ما نش من على الطاولة ) ياللا طويل العمر ...

طلع مبارك مع ابوه ... وردت ام منصور ترقد شوي في حجرتها لين الضحى لانها كانت بتطلع ويا ام خالد وبيمرن على مريم بيسيرن على حرمة كانت يارتهن من ايام الشعبية
**

في الصيف حاولت عوشه تخلص كل مشاويرها في دبي وبوظبي عشان من تبدا دوامات الجامعه ما بتقدر تروح بوظبي ودبي الا في الويك اند عشان روضه .... كانن يروحن يقعدن في بوظبي بالايام ويا سعيد في الشقة ... وفي دبي يروحن بيت فطوم او بيت خال حمده وروضه ... في بوظبي كان سعيد يوديهن اغلب مشاويرهن يوم يرد من الدوام لان ربعه كلهم كانوا مسافرين .. اما الصبح يطلعن ويا الدريول وروز ... ومرات عبود يروح لهن بوظبي .. ويطلعهن وياه يتمشن البحر او حتى السنما ... في بوظبي عوشه وروضه وعبود وسعيد كانوا رادين في الليل من برع ويايبين وياهم عشاهم وقاعدين على الارض يتعشون

عبود: خلاص بس انا برد العين باجر مليت من بوظبي
عوشه: ونحن بعد امي اتصلت بي اليوم وقالت لي نرجع
سعيد: انتي ما خليتي سوق في بوظبي ما رحتيه ... بس عاد خلصتي السوق
روضه: عروس كيفها ... شو يعني ما تشتري
سعيد: حشا اللي اتشرته يكفي سنه .. شو بعد ما تعرس ما بتشتري ثياب خلاص
روضه: لا بتشتري لانها بتمل من اللي عندها
عبود: بعد .. الله يعينك يا مبارك
عوشه: طالع خواني يحاتون ولد عمهم ولا يدورون راحة اختهم
روضه: احسن خلها تفقره ... وبعدين هب من جيبه هاي فلوس عمي سلطان
سعيد: يوم تدرن انها فلوس عمي سلطان ليش ما تخفن الريس شوي
عوشه: اوهوووو .. مرة ثانيه ما بيي بوظبي وانت فيها ولا براويك شو اشتريت
عبود: بالذمة هالثلاث ايام بكم اشتريتي
عوشه: مالك خص اشتريت وايد اشياء
عبود : زين قولي بكم
عوشه: ما بقول
سعيد: روضه كم صرفتن هالثلاث ايام
روضه : حرام والله انا بعد خذت ثياب حقي وحق بسوم للجامعه ... دواماتنا بتبدا اول تسعه مب بس هيه بروحها

رن هنيه تيلفون سعيد كان مبارك متصل يتخبر عنهم وشو مسوين ويا البنات .. وفي خاطره ايي عندهم بس ما كان عنده اجازة

مبارك: هاه بو عسكور شو الجو عندكم
سعيد: هاهاها مشمس جاف غائم ممطر جزئيا
مبارك: ول شو هذا كله
سعيد: جيه يقولون في النشرة الجويه ... اخبارك النت وشو العين واهلها
مبارك: يا ريال ما تسوى ... الشباب مسافرين ومحد هنيه .. تعال ليش ما تاخذ اجازة اسبوعين وتقعد في العين
سعيد: لا برايها اجازتي بخذها في الشتا بنروح مقناص
مبارك: هيه والله من متى ما رحنا قنص ... بس وين معزم ومع منوه
سعيد : بنروح ويا هل دبي ...
مبارك: منو من هل دبي
سعيد: حميد واخوه عبدالله وعمر واحمد ربع خالد بيروحون ويا شيوخ دبي وعزموا علينا
مبارك: خلاص انا بعد بروح وياكم ... بس من وين بتاخذ لك طير
سعيد: والله يا ريال ما ادري بشوف سلطان يوم بيرد بخليه يدور لي ... وتبغي الصدق شيوخ دبي يشلون طيورهم كلهن .. ويعطون ربعهم يقنصون بهن
مبارك: تدري انا بتخبر هزاع ... بخذ من عنده طير .. هو يقيض طيوره بروحه ما يوديهن عند حد ومتبرض لهشغله
سعيد: ماعليه يوم برد العين بروح له وياك
روضه: (وهي متملله من سوالف سعيد ومبارك) اوهوووو الشتا بعده بعيد بسكم من التيلفون .. أي يا مبارك يا مزعج بند التيلفون قاعدين انتعشى
مبارك: (بعد ما سمعها) اوهووو هاي دومها داخله عرض ... الله يعينك عليها كيف متحملنها وانتوا قاعين في شقة ضيجة
سعيد: ما ادري يا ريال ...
روضه: ادري تحشون فيني بس ماعليه ماعليه خلني ارد العين...
سعيد: هاهاهاها لا لا افا عليج كم روضه عندنا
روضه: (رافعه حياتها) وبعد
سعيد: (يبتسم) احلى واجمل واروع بنت
روضه: في
سعيد: العالم والكون والمجرة
مبارك: هاهاهاهاهاها يا خواف تخاف منها هاه ونه احلى بنت .. افاااااا لاعبتبك بنت عمك
سعيد: هاهاهاها شو نسوي يا ريال ناخذها على قد عقلها
عبود: ويييييييييييييييييييييييو خبله ياخذونها على قد عقلها
روضه: (ونها تصيح) لا لا لا ما اريد ما اريد انا زعلت ودوني بيتنا ردوني عند عمي والله بخبر عليكم عمي مستفردين فيني وتعذبوني ... وتخلوني اطبخ واخم وتنيموني يوعانه (كانوا سعيد ومبارك وعوشه يضحكون وعبود يطالعها فاج عيونه(
عبود: ول عليج يا الجذابه هذا كله سويناه فيج ... ثرج سندريلا هب روضه
روضه: هيه اتريا الامير بعد
عوشه: ما عندنا هنيه امراء اتريي الشيخ
روضه: هيه ماعليه بتريا الشيخ

بند مبارك عن سعيد وكملوا عشا وقعدوا شوي وبعدين راحوا يرقدون وردوا العين بالباجر كلهم لان ام خالد تبغي البنات يردن البيت
**

رد محمد من جنيف اول شهر تسعه ... حتى سلطان وعلي ومحمد ردوا اول الشهر بعد يومين من رجعة محمد اخو مبارك .... سلطان فج الجبس يوم كانوا في القاهرة ... وحتى الجرح كل اللي بقى منه اثر بسيط ...
محمد اخو مبارك اللي كان رايح اجازة يرتاح من كل الشغل اللي عليه في المؤسسة رد ولقى الشغل مكوم عليه وكان يقعد في المكتب من الصبح لين في الليل ... ما يرد الا يتغدا ويقعد ساعة وحده ويرد المكتب ... كانت هاي طريقته عشان ينسى كل همومه ومشاكله طريقه للهروب من الواقع المؤلم اللي يعيشه ... ثلاث شهور يروح بس ما يرتاح بالعكس يروح يعذب نفسه في ارض كلها ذكريات صارت بالنسبة له محرمة ومؤلمة .. في داخله مقتنع انه كل اللي يسويه غلط ... بس ما كان يقدر يقاوم حبه لها ... كل شي فيها يرده لها .. سواء كانت في البحرين او في جنيف او أي مكان في العالم ... كل ما راح جنيف رد وكأنه اكبر عشر سنوات ... بالرغم من ان امه كانت تعرف بعذابه وابوه يلاحظ همومه بس كانوا يتجاهلون كل اللي يمر فيه .. هو اللي اختار هالشي لنفسه وقرر يعذب نفسه .. من الاول ما كان المفروض انه يسمح لنفسه انه يوصل لهدرجة ... بعد ما رد اخر الليل البيت كان مبارك يترياه بيقعد وياه .. فتح باب الجناح ماله وحصل مبارك قاعد في الصالة يشوف التلفزيون

محمد: (يبتسم) ماشاء الله قاعد هنيه
مبارك: هيه لازم نترياك ما ترد الا اخر الليل
محمد: شو اسوي الشغل وايد .. وانت تدري
مبارك: ياخي قلنا اشتغل بس مب هالكثر .. شوي شوي على عمرك بتموت بالجلطة وانت شباب
محمد: لا والله وناسي بعد الحين خيام عرسك وديكوراتها .. لازم حد يتابعهم ويشوف التصاميم اللي بيطرشونها ونختار الشركة الاحسن
مبارك: خيبه خيبه شو هيه مناقصة تشوف الاحسن .. اختار شركة وشوف الموجود عندها واتنقى منه
محمد: تريد عوشه تنتحر ولا ما تدخل الخيمة ...
مبارك: (يبتسم) تصدق بنت عمك تسويها لو ما عيبها شي
محمد: ادري ... واخبارهم اهل العروس
مبارك: ربشه يا ريال .... كل يوم مكان ما خلن سوق في العين وبوظبي ودبي ما راحنه
محمد: وليش ما راحت لندن او باريس اتسوق بعد
مبارك: الله يخليك لا تقول هالشي جدامها ترى عوشه خبله تصدق
محمد: هاهاهاها ليش لا .. روح انت وياهم ما سافرت السنة
مبارك: لا بخلي الاجازة حق بعد العرس ... بروح قنص ويا سعيد
محمد: هاهاهاها والله كنت متوقع تقول بسافر شهر العسل ويا العروس ... أي قنص شو تخبلت
مبارك: لا بسافر وياها ... بس بروح شهر واحد القنص عشان جيه اريد الاجازة
محمد: عاد ان خلتك تروح بعدين
مبارك: حد قالك اني بشاورها يوم بروح
محمد : بنشوف يا مبارك .. اخافها الا هيه تمشيك وتطلع كل اللي كنت اتسويه فيها من عينك بعدين
مبارك: هاهاهاها ما عليك عوشه طيبه ينقص عليها بكلمتين ...
محمد: اوووووه قمنا ندافع عنها بعد
مبارك: ياللا عقبالك
محمد: مب مبين ... خلها على الله يا ريال

عرف مبارك اخوه شو يقصد بس حب يغير الموضوع ولا يفتح هالموضوع اللي يجرحه وقعد يسولف وياه ويتخبره عن الشباب اللي شافهم واللي يعرفونهم من السعودية والكويت واذا شافهم او لا ... وردوا يسولفون عن عرس مبارك ...وبعدين راح مبارك يرقد
**

بدت دوامات الجامعه وانشغلت بسوم هالسنة صدق محد كان يشوفها ... حتى فستانها روضه اللي اختارت لونه وموديله ومنو يفصله ... كانت بسوم موكلتنهم بكل شي ... ولا حتى ابدت راي او ناقشتهم في شي قالولها اياه ... كانت مشغوله صدق بدراستها ومندمجه فيها .... روضه صح كانت اداوم الجامعه بس كانت بعد متفيجة ويا عوشه وحمده عشان ترتيبات العرس ... وديكورات جناحها في بيت عمها ... كانن كل يوم يختارن لون ويردن يغيرنه بالباجر ... او يختارن اثاث ويردن ايغيرنه بعدها باسبوع ... ديكورات خيام العرس تكفل بها محمد كامل .. بعد ما شاورها شو من الالوان تريد وخلاها تختار الكوشه اللي تباها ... وفي هالربشة كلها كانوا يفتقدون عبود اللي يروح الكلية طول ايام الاسبوع وما يرد الا في الويك اند ... كانوا على اتصال دايم بفطوم وكل ما اختارن شي شاورنها .. فستان العرس سوته في لبنان عند زهير مراد ... حمده والبنات سون فساتينهن عند اليزابث في بوظبي ..اخر اسبوع من شهر عشرة يوم الخميس الصبح كلهم قاعدين ويا بعض حتى فطوم هيه وولدها اللي كمل سنة قاعدين بعد ما تريقوا ويا ابوهم يسولفون .. كان ولد فطوم يلعب ببراويز الصور اللي محطوطات على الطاوله

فطوم: سعود لا... تعال هنيه لا ازقر لك نيلدا تشلك (ابتسم لها ولدها وفر البرواز وراح صوب التلفزيون ووقف جدامه)
عوشه: هذا ولدج شيطان حشا غادي زيبق ما ينمسك
فطوم: أي اتعوذي لا توحين ولدي ..
عوشه: لا تخافين ما بييه شي
فطوم: بنشوف عيالج بعدين
بسوم: ياللا انا بخليكم الحين بروح ادرس شوي
روضه: اموت واعرف شو تدرسين هالكثر .. بس خلاص انتي تحفظين كل اللي في الكتاب حتى ارقام الصفحات
عبود: والله قمت اشك في هالشي تصدقين
بسوم: تصدقون ما يضحك .. بايخ انت وياها
روضه: اقول عموه بسوم ما تبين تاخذين نعال حق العرس
بسوم: خذيه انتي ما اعرف لون الفستان
عبود: والله ما تعرفينه
بسوم: لا اظني وردي صح
روضه: لا فوشي مب وردي يا حظي
بسوم: زين نفس اللون بس درجه غير
روضه: روحي روحي درسي ابرك انا بشتري لج يوم بروح اخذ لنفسي
ام خالد: خلوا البنيه تدرس ... لا توحونها ... روحي امي الله يوفقج غناتي
بسوم: (ابتسمت لامها) اوكي ... ياللا باي (راحت بسوم والكل كان يطالعها(
خالد: لحقوا بنتكم عالجوها تراها بتين من مجابل الكتب
بوخالد: بسم الله عليها البنيه مافيها شي .. الا تغارون منها بتغدي دكتورة وبترفع روسنا
عبود: الحين نحن كلنا ما بنرفع راسك ... وبنتك هاي اللي بترفع الراس
بوخالد: لا كلكم ماشاء الله عليكم الله يخليكم ان شاء الله
سعيد: هاه شو الاستعدادات للعرس .. بعد ثلاث اسابيع
عوشه: يا ويلي كل خوفي الفستان ما يطلع حلو
حمده: لا ماعليج يوم ان مراد زهير مسونه بيطلع حلو
عبود: شو الخيام يا ريال... اللي يشوفهن يقولون عازمين هل الامارات كلهم
عوشه: برايهن انا اريدهن جيه
خالد: مسكين محمد اللي يشوفه ما يصدق انه هوه الاولي .. صدق تعبان من مجابل شغلكم .. ومبارك مرتاح
سعيد: هو اللي يريد ... بعدين الميزانيه كلها تحت ايده توقيعه المعتمد في البنك مع توقيع عمي
بوخالد: ماشاء الله عليه ريال ما ينخاف عليه
عبود: امايا فديتج تعالي بقولج شي
ام خالد: قول شو عندك
عبود: لا شي خاص تعالي ندخل الحجرة
ام خالد: لا اذا عندك شي قوله هنيه
عوشه: هيه قول هنيه شو تريد في الحجرة
عبود: لا حول .... انتي بعدج ملقوفه الله يعين ريلج عليج
عوشه: مالك خص في ريلي
سعيد: اوووووه ... من الحين الحبيبة مالك خص في ريلي
روضه: هاهاها باجر من تطرون اسم مبارك بتقول فديت روحه يا ربي
حمده: يمكن الحين من ينطرى قالت في خاطرها فديت روحه يا ربي
عوشه: ابوووووي شوفهم شو يقولون ... والله تراني ازعل
خالد: اهاااا ونزعل بعد ... لا والله تطورنا وايد
عبود: هاهاهاهاها باجر بتينا عوشه في قمة الرقة والانوثة متغيرة 180 درجة ... تتكلم بصوت واطي كله همس.. وبتنسى حركات الدفاشة والشباب
عوشه: قول والله بس انت .... وشو تشوني الحين واحد من الربع
عبود: هيه يوم يسئلوني كم خوانك اقولهم ثلاثه ... بعدين اتذكر انج بنت وأصلح اقول اثنين
بوخالد: عبدالله اسكت عن ختك ...
عبود: بسكت اذا نشت امايا وياي داخل الحجرة
ام خالد : (وهي تنش من مكانها) تعال بشوف شو تريد انت في الحجرة

ونش هو يمشي وراها ويسوي حركات بويهه وايدينه وامه اتحرطم واللي قاعدين يضحون عليه
**

في الحجرة قعدت امه على كرسيها وقعد هو على الشبريه مجابلنها .. وكانت اترياه يتكلم يقول شو اللي في خاطره.. عبود كان ساكت يدري انها بتعصب لانه بيكلمها في موضوع بنت عمته مريم ... بالنسبة له من سابع المستحيلات ياخذ وحده فيهن ... ما يداني حد في بيت عمته مريم غير عمته .. اما عيالها ما يدري على منوه طالعين ولا يبلعهم لا حمد ولا اختينه

ام خالد: شعندك مدخلني الحجرة
عبود: شوفي امايا انا بكلمج هالمرة صدق ... ودخلتج الحجرة عشان اقولج اللي في خاطري وانتي بكيفج
ام خالد: شو في خاطرك
عبود: امايا انا ادري ان باقي لي سنه في الكلية ... يعني خلاص قريب بتخرج ومب ياهل الحين انا ريال عمري 22 سنه
ام خالد: ادري انك هب ياهل ولا انت صغير
عبود: امايا ما اريد وحده من بنات عموه مريم ... والله مب في خاطري
ام خالد: وانت تشوف انه هذا وقته عشان تقول هالكلام
عبود: انا ادريبج امايا فرحتج بتخليج تخطبين وحده فيهن ... انا ما اريدهن والله ما اريدهن
ام خالد: وليش شو فيهن بنات عمتك ... مزينهن ومسنعات
عبود: (في خاطره امحق سنع) والله مسنعات حق عمارهن وعندهن عيال عمومه ... واذا هالكثر تبين وحده فيهن عندج سعيد خطبيله وحده فيهن
ام خالد: لو ابوك يطيع جان خطبت له منهن
عبود: يا سلام يعني سعيد ما يخطب له منهن وانا برايني ازول اخذ أي حد
ام خالد: يا ولدي القريب واللي انعرفه احسن من الغريب .. انت شايف على بنات عمتك شي مب زين ... غلطن في شي
عبود: لا ما شفت عليهن شي ولا رحت كسرت روسهن ... بس انا ما اواطنهن ولا اواطن اخوهن ... انا واحد حمد هذا ما ابلعه اروح اناسبه ولا يكون خال عيالي ... بموت من القهر
ام خالد: انت خاطرك في حد ... تبغي حد يا عبدالله
عبود: مب سالفة ابغي والله العظيم .. بس أي حد الا بنات عمتي مريم
ام خالد: أي حد مثل منوه
عبود: ( يبتسم) شو يعني تبين اتيريريني في الرمسه
ام خالد: يا ولدي انا امك وابغيلك الخير والزين ... وما بغصبك على شي ما تباه .. خلاص بنات عمتك الله يرزقهن ... بس انت بعد ريح لي قلبي وقول اذا حد في خاطرك ... ولا عاشق لك بنيه يكفينا ولد عمك
عبود: هاهاهاها لا والله امايا ماشي من هالسوالف ... بس تبغين الصدق انا اريد اخذ وحده من خوات حميد ريل فطوم ... ناس والنعم فيهم .. والواحد يتشرف بنسبهم .. وانتي تشوفين كيف حاطين فطوم في عيونهم ويحبونها
ام خالد: والله بنات ام عبدالله ما عليهن قصور لكن في وحده منهن محيرة لولد عمها وما ادري عن الثانية يا ولدي
عبود: لا مب محيرة حق حد ... بس انا ما اقولج روحي خطبيها لي باجر او كلميهم .. يوم اتخرج يصير خير .. بس بنات عموه مريم لا
ام خالد: خلاص يا ولدي يصير خير
عبود: فديت ام خالد انا .. اللي ما يهون عليها ولدها الدلوع الحلو
ام خالد: اسميك يا ولدي بياع كلام ...
عبود: (نش بيطلع) وايه فديت روحي انا ... الناس تحسدج لان عندج ولد مثلي
ام خالد: على شو بيحسدوني على العقل اللي فيك ...
عبود: على الجمال اللي فيني .. على ذوقي واخلاقي

طلع عبود من عند امه وهو مبتسم ومرتاح والكل يطالعه يتريونه يقولهم شو قال حق امه بس هو لبسهم وراح فوق وهو يدندن باغنيه ....

خالد: أي وين ... شو السالفه شو قلت حق امي
عبود: سر بيني وبينها
عوشه: وشو من الاسرار اللي عندك ويا امي
عبود: مثل الاسرار اللي عندج ويا روضه
سعيد: وين بتروح
عبود: بروح حجرتي (وطلع فوق وخلاهم قاعدين يتريون ام خالد تطلع يمكن تقولهم شو السالفه)

عبود ما راح حجرته .. دخل على بسوم ولقاها قاعده تدرس بس ما همه وقعد على المكتب مالها وسكر الكتاب اللي تقرا فيه

عبود: والعثرة هذا كله تدرسونه ... حشا مخج بيذوب
بسوم: عبود شو تريد الحين ... وراي دراسه
عبود: ياللا اتصلي في سارة
بسوم: (عاقده حياتها) منو سارة
عبود: بلا غباء ... سارة اخت حميد
بسوم: اوهووووو انت ما تمل من هالسالفة ... ذبحتني حشا وليش اتصل فيها
عبود: اقولج بتي العرس
بسوم: ما ادري ما سئلتها
عبود: زين سئليها
بسوم: عبود انت صدق متفيج ياي تقولي اتصل في البنت عشان اسألها بتي العرس او لا .... العرس بعده ثلاث اسابيع
عبود: لا بسوم عاد والله مصختوها لو انخطبت انا اروح اولي وانتحر
بسوم: يا عبود والله البنت ما انخطبت .. قلت لك اول كلم امي وخلص نفسك من بنات عمتي
عبود: كلمتها وخلصت نفسي منهن خلاص
بسوم: (رافعه حياتها ) والله
عبود: هيه والله .... ياللا الحين شو بتسوين
بسوم: خلاص والله بكلمها
عبود: قبل عرس عوشه
بسوم: ان شاء الله ... بس امي ما بتخطبها لك قبل لا تخلص كليه
عبود: المهم اترياني
بسوم: حاظر عمي ... اوامر ثانيه
عبود: لا فديت روحها اختي الحلوة انا ... ياللا درسي ... برد اسمع لج في الليل
بسوم: انت متفيج ... روح خلني ادرس
عبود: (نش بيطلع عنها عشان تدرس) ياللا باي

طلع عبود من عند بسوم بس ما دخل حجرته نزل تحت والكل كان يطالعه .. كان مبتسم ويغني ... وطالعهم ونه مستغرب من النظرات اللي يطالعونه بها ... ورد يلس عدال بو خالد ... ام خالد طلعت من حجرتها وراحت قعدت عدال بناتها ....

فطوم : سعود تعال هنيه .. ولا بقول حق عمي عبدالله ما يوديك في السيارة (رد سعود بكل ادب بعد ما كان يتعبث بالفنايين وقعد في ثبان امه(
عوشه: طالع مسود الويه من الحين من طرينا السيارة سكت
عبود: (عشان يغايض سعود) ياللا روضه قومي بنروح في السيارة بنروح العزية بنطالع البوش ... .هاتي حمود الصغير ياللا (كانت عيون سعود على عبود ونظراته كلها توسل(
عوشه: خيبه كيف يتعذب ولدها
روضه: اوكي وبعد بنروح الدكان بناخذ لنا حلاوه وعصير
عبود: بعد بنيب سيارة حق حمودي
سعود الصغير: (معصب وعاقد حياته) نو نو انا انا
عبود: ياللا ياللا روح عند عمك ما بوديك مكان (وهو يطالع حمده) ياللا حمده وين حمود الصغير
هنيه سعود برطم وكان خلاص بيصيح من القهر وخواله ضحكوا عليه
حمده: حرام عليك عبود بعدين بيكره ولدي وبيضربه
عبود: بكسر ايدينه خليه يصكه
فطوم: هيه لاقطنه من الزباله تكسر يدينه مب جني تعبت فيه

نش سعود وراح حذال عبود يتمسح فيه عشان يوديه الدكان... سعود عمره سنه وشهر وماكان يعرف يتكلم بعده الا كم كلمه .. وكل ما يابته امه العين مسكه عبود ولعوزه يذله ذل لين ما يوديه الدكان ...

عبود: ياللا ياللا روح عند امك ولد امك
فطوم: عبود لا تزقر لي ولدي
عبود: من حلاته الشين
فطوم: ودك ييب ولد مثله بعدين تكلم
ام خالد: عبود تعوذ من ابليش وخل الولد
عبود: طالع هو اللي ياي عندي هب انا اللي رحت له
سعيد: تعال سعود حبيبي ... (بس عاد من يقول بيتحرك من عدال عبود ... سمعه يقول بيروح بالسيارة الدكان والعزبة ... لو ايي ابوه ويقوله تعال ما بيروح ولو يذله عبود ذل ما تحرك من حذاله)
سعود: نو مي كا (يعني نو عمي سيارة(
سعيد: طالع مسود الويه
عبود: (وهو يشله من على الارض ) خلني بلعوزه اول والله لو اعضه الحين ما صاح ولا اشتكى ... (وهو يشل سعود من على الارض ويرفعه جدامه) أي انا مب عمي انا خالي قول خالي ياللا قول خالي
فطوم: حرام عليك عبود
عبود: اعلمه شو عمي هاي (ورد يكلم سعود ) قول خالي ياللا عشان نروح
سعود: (يضحك) لي
عبود: الحمدلله والشكر على هالرمسه المنقعه عمي ستوت مي وخالي لي ... الحمدلله
ام خالد: ولدك انت اللي بيطلع يرمس من بطن امه .. تباني اقولك لين متى وانت ما تعرف ترمس
خالد: قوم ود الولد الدكان منيته هالكثر ياللا
عبود: (نش وشل ولد اخته) ياللا سعود نروح الدكان نشتري كار حق سعود ما نريد حمود ما بنيب له شي صح

طلع عبود ويا ولد اخته وركب السيارة وراح الدكان اللي مجابل بيتهم .... وخذله سيارة لان سعود من شاف السيارات ما طاع ياخذ شي ثاني

عبود: صدق ولد فقر .. اقولك خذ اللي تباه تاخذ سيارة بس .. نحن يوم كنا يهال ما نصدق نشوف دكان
سعود ما كان فاهم شي من كلام خاله بس مستانس على السيارة اللي خذها ورده عبود البيت وطلع شوي راح ميلس يرانهم لان ربعه كانوا هناك
**

قبل العرس باسبوع كان الكل مرتبش ... ديكورات الخيام خلاص تقريبا خلصت .... محمد مسولهم اغنية الزفه على حسابه ومسجلينها في شرايط عشان يوزعونها على الناس ... التوزيعات اللي على الطاوله بتوصل خلال يومين .... وكل هالاشياء والتفاصيل الصغيرة محمد مهتم فيها .. مبارك ما كان عنده فكرة عن شي بالمرة ... حتى يوم كان يكلم محمد يقوله اذا يريده يساعده كان يقوله لا تشيل هم .. وقول وين تبون تسافرون عشان نخلص لكم الحجز .. ومتى يبون يسافرون ... وفي مرة من المرات النادرة اللي يقدر مبارك يقنع فيها محمد عشان يروحون المقهى ... كانوا كلهم قاعدين وربعهم مستانسين ان محمد اخو مبارك وياهم .. بالرغم من انه متباعد ودومه بروحه .. كان محبوب من الكل لاخلاقه واحترامه ... وتعامله معاهم في غاية الرقي

علي : يا مرحبا الساع ... والله ايام يا ريال من متى ما شفناك ..
سلطان: اخر مرة في جنيف .. من ردينا الامارات ما تلاقينا وياك
محمد بن سلطان: يا ريال ... دومكم في البال وانا اتخبر عنكم مبارك بس تدرون مشاغل وزياده عرس الحبيب هالاسبوع ... نبغي نخلص كل شي
سعيد: انت اللي متعبل منه .. هو اللي بيعرس انت تعور راسك ليش
مبارك: اقول ولد عمي اطلع منها خلني ويا اخوي متفاهمين هو اشتكالكم
محمد: هاهاها ما عليه بس لازم تردها في عرسه
مبارك: اكيد ما يبالها كلام
عبود: ياللا مبارك انا قررت اييب لك ام علايا هدية مني لك في عرسك
سلطان: عااااش والله قدها يا بو حميد
سعيد: هاهاهاها عشان بو خالد يروغك من البيت انت وياهم ويرشك بالعصا رش
عبود: عادي مب مشكله في بيت عمي سلطان
محمد بن سلطان: زين ماعليه ... بس عاد بتكون اخر ليله ندخل فيها بيت عمك .. بيروغنا نحن وياهم بالشوزن اللي تحت شبريته
عبود: شو هالشواب والله مشكله .... يعني نحن نريد نحتفل وين نحتفل
سلطان: قول عياله ... رزيفه ... ام علايا يعني صدق قويه
سعيد: بتنا فيه حريم بنقول لا ... بيت عمي سلطان ما فيه غير عيوزهم والله بتكون في بيتنا
علي: هاهاهاها تبغي شوري
عبود: قول
علي: عليك بالعزبة ... تشوف ورا عزبتكم بعد العرقوب العود مكان ينفع ... ولم كل المفلع ربعك واحتفل وياهم
عبود: اتمصخر حضرتك ... والله اللي كان عرس صدق عرس حميد بن سعيد ... صدق حسينا فيه.. هب عرسك بروك حد يعرس والناس تداوم .. ما بطلع الا بالاربعاء
مبارك: هاهاهاها ياللا ماعليه بنعوض في عرس سعيد
عبود: وعرسي ان شاء الله
محمد بن سلطان: مستعيل وانت اصغر واحد قاعد هنيه
عبود: والله الشباب مستدين كل واحد يغازل بالاربع والثلاث .. لكن نحن اللي ماشي مجال شو نسوي
علي: هب هباك الله .. الليلة ما بتم وحده فيهن
عبود: اموت واعرف شقايل ما يكشفنك
علي: بعد خبره
محمد: ماعليك منه ... كل يوم متضارب ويا وحده لانه يزقرها باسم غيرها
علي : ياللا ياللا هاي ما صارت الا مرة وحده ... اصلا الحين خلاص ما ازقر ولا وحده باسمها ... ماشي غير عمري وحياتي
سلطان: ماعليه بنشوف اخرتها وياك ...
علي: شو تغار
سلطان: حشا علي بعيد عن درب المدانيس طال عمرك ...
علي: هيه ناسي الدكتورة ولا اذكرك
مبارك: اوهوووو يا هالدكتورة اللي ذليتونا فيها
سلطان: اااااااه يا ربي لا تذكرني ... والله ما شفت احلى منها للحين
محمد بن سلطان: اي دكتورة
سعيد: قبل لا يسافرون يوم مسوين الحادث عالجته دكتورة في مستشفى توام
علي: عادية ما فيها
سلطان: جذاب حلوة ... عذاب يا ريال ... خيل خيل طول وجسم ورقبه
علي: كيف شفت الرقبه اذا البنيه متحجبة انا ابا افهم
سلطان: انت رحت عند الدكتور الثاني وعدلت شيلتها جدامي زين
محمد: يا سلام وين غض البصر
سلطان: هالدكتورة حاله استثنائية
عبود: كمل كمل
سلطان: والله يا عبدالله انها ملاك ... من تشوفها بس ما تحس بالم كل ما فيك يصح من نفسه
محمد: لا والله
سلطان: وصوتها اه يا صوتها لا ام كلثوم ولا نجاة الصغيرة تغرد تغرد يوم اتكلم
علي: قصده حمار يناهق (ضحكوا الشباب عليهم خاصه يوم خزه سلطان عشان يسكت(
محمد بن سلطان: هذي اعراض مرض خطير
سلطان: أي مرض
محمد: بديت تحب
سلطان: انتوا ما عندكم سالفه والله اني ما ابالغ ولا سالفة احب ما احب ... اني كل اللي شفته قلته
علي: بس في الصوت هاي جذبت
سلطان: علوه ... في ذمتك لين يوم القيامة صوتها هب حلو
علي: حسبي الله على بليسك تحطها في ذمتي
عبود: هاهاهاها ما رديت
سلطان: ياللا في ذمتك قول جان جذبت في كلمه
سعيد: ياللا قول
علي: هيه حلوة ارتحتوا الحين
سلطان: والصوت
علي: ما سمعتها ترمس ... كانت تزاعج
سلطان: علوه في ذمتك
علي: هيه حلو وفكونا من هالسالفة
عبود: ماشفتها مرة ثانيه
سلطان: لا ما شفتها ... تذكر يوم خلفان الشامسي مسوي الحادث ورحنا نشوفه .. مريت من الطواري بس ما شفتها
علي: احسن فكه .. انسوا هالسالفة والله ذليتونا بها
عبود: انت اللي طريتها
علي: زين غيروا الموضوع ... قطعنا البنت بالرمسه
مبارك: هيه صدقه ... بس عيب عليكم

وغيروا الموضوع وردوا يسولفون عن اشياء ثانيه ....
**
بالنسبة لمبارك كان خلاص ما يدخل بيت عمه على اساس انه ما يشوف عوشه ... اول شي ضحك على السالفة هاي ... بس بعد مرور الاسبوع الاول حس عمره انه توله على حشرة بيت عمه ... في البداية قالهم عادي شو يعني مب الا شهر لو قالوله قبل العرس بشهرين ما يدخل البيت عشان ما يشوفها ما بيدخل ... بس كان شوقه يزيد للكل في بيت عمه كان متعود على الربشه والسوالف وياهن .... فطوم من بدا الاسبوع وهي في بيت ابوها.. عشان العرس ...

عوشه: روضه خذتي نعال حق بسوم
روضه: هيه خذتلها
عوشه: متى بييبون فساتينكم ؟؟
روضه: يوم الاربعاء خلاص بيخلصن .... بيطرشونهن بالدي اتش ال
عوشه: ما يندرى شو صار في فستاني
روضه: لا ان شاء الله كل شي بيكون اوكي

دخلن فطوم وحمده عليهن في حجرة عوشه اللي كانت معفوسه فوق حدر من الاغراض اللي ماخذتنهن اخر شي وما رتبتهن في الشنط

فطوم: شو هذا عوشه ليش لين الحين ما رتبتي هذا كله متى ناويه تخلصينه يوم الخميس الصبح
عوشه: لا الحين قاعده ادخن واعطر الثياب واحطهن في الشنطه ... انتن وين رحتن
حمده: رقدنا العيال وخلينا روز تطالعهم
عوشه: اوهووو صراحه انا مليت من كل هالعفسه .. متى بيي يوم الخميس وبيخلص كل هاه
فطوم: هاهاهاها .... ويوم الخميس بتقولين ليت اللي كان ما كان
عوشه: ليش حد قالج بهاجر ... الا بروح بيت عمي
حمده: خلاص القسم خلص كامل هناك ... طلع روعه يجنن بمعني الكلمه يا عوشه
روضه: لازم ذوقي كيف تبنه يطلع
حمده: بدينا الحين
فطوم: بسوم وين
روضه: تاكل في الحجرة
فطوم: شو تاكل ... ماحيدها تاكل في حجرتها شي
عوشه: هاهاهاها لا قصدها تدرس تاكل الكتب
حمده: الله يوفقها ويهدي سرها يا رب
روضه: محد قالها تييب ويع الراس حق عمرها ... هاه خلاص باقي لي الكورس الياي وبخلص
حمده: هيه هذا اللي كان يبى هندسه
روضه: حق شو عشان اعرس واقعد في البيت
فطوم: ولو ما عرستي
روضه: هه روضه بنت محمد ما تعرس .... بس خليني ااشر وبتشوفين
حمده: بدينا بالغرور
روضه: لا يا عمري مب غرور ثقة بالنفس ... من تبين قولي وانا اييب لج راسه
حمده: بس بس عن هالرمسه الخايسة ... خلصن شغلكن الحين

ردن يكملن اللي يسونه .... ودخل عليهن سعيد بعد ما دق الباب يشوفهن شو يسون ... كان يوم الاثنين واللي باقي عن العرس ثلاث ايام ...

سعيد: السلام عليكن ... انا اقول وين البنات والحريم ثركن كلكن هنيه
عوشه: هلا والله بحبيبي اخوي
سعيد: هاه العروس ...شو شعورج خلاص اخر الايام لج في بيتنا
عوشه: ماشي عادي والله بس تعبانه من هالعوزة والقشار ... نحطه في شنط هنيه وبعدين برد افضيه في البيت هناك
سعيد: شو يعني عادي بتعرسين بتروحين من بيت ابوج خلاص
عوشه: وين بروح بيت عمي .... مب وايد بعيد يوم اريد بيي عندكم انا وعمتي
فطوم: اوووه منو كان يتصور ان عوشه تتزوج مبارك ولد عمي
سعيد: هاهاهاهاها صراحه ما كنت اتوقع بعد السالفة الاولية
روضه: والله فديته مبارك مافيه شي الا هيه كانت خبلة
عوشه: بس بس عاد لا تيبون سوالف اول ... بعدين اللي اعرفه احسن من اللي ما اعرفه ...
روضه : تعال سعيد اخبار حمد ولد عمتي
سعيد: اخر مرة شفته يوم العيد يوم رحت اسلم على عمتي وكلمني من طرف خشمه وطلع
عوشه: برايه ... انا ما سويت شي .. هو اللي شايف عمره
حمده: احيده مبارك اللي شايف عمره
عوشه: حتى مبارك كان شايف عمره بس تغير ....
روضه: ويحق له يشوف نفسه والله
سعيد: هاهاهاها ولد عمكن لازم تدافعن عنه
روضه: لا والله مب لانه ولد عمي
سعيد: زين يا عوشه ما تبين شي مب قاصر عليج شي ...
عوشه: لا سلامة راسك حبيبي
سعيد: ياللا عقبال البنات اللي هنيه ان شاء الله
فطوم: هاهاهاها ماشي غير بنيه وحده بعدها روضه قولها عقبالج روضه
سعيد: هاهاهاها زين عقبالج بنت عمي
روضه: (انحرجت) من بعدك ولد عمي
سعيد: (يبتسم) وعقبال عيالكن يا الحريم
حمده+فطوم: امين

طلع سعيد عنهن وردن يكملن ترتيب وهن يسولفن ويا عوشه .... وروضه
**

بعد ما خلصن ترتيب القشار راحت فطوم حجرتها بترقد تعبانه .. اما عوشه اللي من بدا الاسبوع وهي ما ترقد في الليل ومطفرة بروضه وياها .... كانن قاعدات برع على الدجة جدام الباب ... ويتهن بسوم بعد ما خلصت دراسه قعدت وياهن ...

روضه: زين يوم شرفتينا بسوم هانم
بسوم: ما برد عليج .... ليش ما تهنون علي قعده وياكن ... يعني شو تبوني اسوي لازم ادرس
عوشه: يعني نحن مالنا حق عليج ما نتوله عليج .... انا بعرس خلاص ما بتشوفيني كل يوم
بسوم: (تبتسم) لا منو قال ادري اني بشوفج بتين كل يوم عندنا
روضه: يا بسوم حرام عليج عمرج 20 سنه ودافنه نفسج بين الكتب ... حرام عليج طالعي نفسج في المنظرة لو وحده غيرج بهالجمال جان اهتمت فيه
بسوم: لاحقة على هالاشياء بعدين
روضه: بسوم اخرتها بتعرسين ويمكن تقعدين في البيت ليش هالتعب كله
بسوم: صدقيني ما بعرس وبودر الطب ... انتي اكثر وحده تعرفين ان هالموضوع وهالشي ما يشغلني
روضه: يعني انتي مب بنت ما تفكرين في يوم يكون عندج ولد او بنت
بسوم: عيل انتي لين الحين ما عرستي ولا انخطبتي ليش مع انه وايد بغوج
روضه: انا خلاص بخلص هالسنة وبعدين اذا لقيت حد يدخل مزاجي بزوجه .. بس انتي توج سنة ثانيه يعني باقي خمس سنوات
بسوم: ماعليه الايام تخطف بسرعه
عوشه: اوووه مب قايل محمد ولد عمي بييب لنا الدي في دي اللي يايبنهن من سويسرا
روضه: هيه
عوشه: وليش ما يابهن للحين
روضه: اتصلي شوفيه
بسوم: الحين .. حرام عليكن يمكن الولد نايم ارحمنه خطيبج مشغلنه في النهار والحين انتي بتأذينه
عوشه: محمد ما يرقد الحين
روضه: بعدين هوه اللي كان مطفرنا ... عشان الخيام والحلاوة .. اقول ونج بتخبيرنه شو سووا عشان الحلاوة اللي من بلجيكا
عوشه: اوكي

اتصلت عوشه في محمد مع ان الساعة كانت 11 الا ربع ..... بس محمد ما كان في البيت كان في الخيام مع العمال اللي يشتغلون عشان يخلصون قبل يوم الاربعاء اللي بيكون عرس الرياييل ... يوم شاف رقمها ابتسم ... فرحة محمد بهالعرس كانت مثل فرحة مبارك ويمكن اكثر ... اخيرا بيكون عنده اخت صدق ... بيكون في بيتهم من عمرهم .... الشي اللي كان صدق مفتقدنه في حياته .. محمد طول عمره يحب عوشه ويحترمها كإخت ... يدري بطيبتها وان أي انسان يزوجها بيكون محظوظ وحمد ربه ان اخوه اللي تزوجها ...

محمد: الو هلا والله العروس
عوشه: اهلين ولد عمي ومدير اعمالي
محمد: هاهاهاها يا سلام بعد مدير الاعمال
عوشه: طبعا ... اكيد عرسي بيكون يجنن دامك القائم على الاعمال
محمد: ماعليه ان شاء الله كل شي يكون اوكي
عوشه: والحلاوة
محمد: بتوصل يوم الاربعاء لا تشلين هم
عوشه: زين مب قايل انك بتيب لنا افلام دي في دي انا بعرس ولا شفت شي
محمد: هاهاهاها والله يبتهن حطيتهن في الميلس وقلت لسعيد يعطيكن اياهن
عوشه: ما عطانا شي ... ماعليه بروح اشوفهن
محمد: زين بس عن السهر وايد .. العرايس يرقدن من وقت
عوشه: هاهاهاها ماعليه ان شاء الله
محمد: ياللا تصبحين على خير
عوشه: وانتي من اهله

بندت عوشه التيلفون عن محمد ... وقالت لهن انه حاط الافلام في الميلس ....

عوشه: ياللا وحده فيكن تروح اتييبهن
روضه: ياللا بسوم روحي
بسوم: يا سلام وليش انا اللي اروح
روضه: لانج ما سويتي شي في هالعرس كل شي انا اسويه
بسوم: ماعليه بروح اشوفهن وين ... بس في أي مكان
روضه: شوفيهن في ميلس الرياييل اللي يقعدون فيه الشباب مب العود
بسوم: اوكي

نشت بسوم راحت الميلس بتيب الافلام حق عوشه وروضه ... بس الشي اللي ما كانن يدربه انه في هالحزة ربيع اخوهن كان في الميلس يتريا سعيد قايله بييه الحين ... عشان يطلعون مع بعض ... الريال كان قاعد في الميلس يتقهوى ... وفجت بسوم الباب دون ما تنتبه انه حد في الميلس ... كانت لابسه تي شيرت وشلحه ومتلحفه بشيلة الصلاة ... وما انتبهت انه في حد في الميلس كل اللي سوته انه لفت صوب التلفزيون وراحت تشوف الافلام ... الريال وقف يوم شافها ... وما عرف شو يقول او يسكت ... وهي كانت تدور ويوم لفت شافت كندورة بيضا ويوم رفعت راسها يت عيونها في عيون الريال ووقفت من الصدمة اما هو كانت صدمته اكبر من صدمتها مليون مرة

سلطان: انتي ...
بسوم: (وهي تحس انها شايفه هالويه مكان بس ما تذكر وين) انت منوه؟؟
سلطان: لا يكون حد من اهل سعيد متعور او فيهم شي (هنيه تذكرت انها شافته في المستشفى ايام دورة الاسعافات الاولية ... هيه ويمت ما عرفت شو تقوله .. كل تفكيرها لو يدخل سعيد الحين بيدوس في بطنها)
بسوم: لا هذا بيتنا
سلطان: (وهو فاج عيونه على الاخر ومنصدم بالقو) بيتكم انتي .. بيت سعيد

بسوم ما ردت عليه وطلعت من الميلس بعد ما احترق ويها ... وفي خاطرها تدعي على عوشه وروضه هن السبب .. بعدها تذكر شو سوابهن يوم كانن في بوظبي لان عوشه وروضه عقن غشواتهن ... شو بيسوي بها وهي طالعه حق ربيعه بتي شيرت وشحله ... ردت حقهن وهي ساكته

عوشه: وين الافلام
روضه: شو رحتي تسوين ما يبتي شي
بسوم: (وهي اول مرة تعصب) جب انتي وياها .. ربيع سعيد كان في الميلس وشافني جيه شو بيسوي بي سعيد الحين

وبدت بسوم تصيح من القهر والضيج اللي فيها ... اول مرة تنحط في موقف جيه وتسوي شي غلط شو بيقول عنها سعيد .. لو خبر عليها او قال لربعه انه شافها في الميلس شو موقف اخوها جدام ربعه وشو بيسويبها .. روضه وعوشه قعدن يهدنها بعد ما انصدمن منها ... معقوله بسوم حساسه هالكثر .. بسوم الهادية اللي ما تقول شي تنفجرمرة وحده
**

سلطان قعد مكانه من الصدمة ... كان متندم على كل كلمة كان يقولها الدكتورة اخت ربيعهم .. بأي ويه بيجابل ربيعه وولد عمها ... لو درابه سعيد شو بيسويبه اكيد بيذبحه ... ماكان قادر يقعد يتريا سعيد اكثر من جيه ... مب عارف كيف يجابل الريال .... اتصل في علي عشان يطلع من الميلس قبل لا ايرد سعيد البيت

سلطان: الو علي انت وين
علي: انا طالع رايح المقهى
سلطان: تعال انا في ميلس بيت بو خالد بطلع وياك
علي: مب قايل بتي ويا سعيد
سلطان: تعال انت اول وبعدين بقولك
علي: اطلع انا جدام باب الميلس

طلع سلطان من الميلس قبل لا يوصل سعيد وهو بعده من صدم ... استغرب علي من شكله واول شي خطر على باله انه متضارب ويا سعيد

علي: شو السالفه لا يكون مضارب ويا سعيد
سلطان: ان شاء الله بنذبح على ايديه ... تراه مسامح لو سواها
علي: شو السالفه شو فيك
سلطان: (لف وطالع في ويه علي وهو يفكر يقوله ولا لا) ماشي ماشي
علي: شو ماشي ... شو السالفه
سلطان: ياللا انت وياي فيها بعد يمكن يكسروك ضلع يسولك عاهه
علي: اوهووو شو
سلطان: الدكتورة
علي: اوهوووو على هالدكتوره اللي ما بنخلص منها
سلطان: اخت سعيد
علي: منووو
سلطان: الدكتورة اخت سعيد ... شفتها في الميلس اليوم

عطا علي بريك قوي ... وهو متفاجئ ويطالع في ويه سلطان .... اما سلطان اللي دق راسه في الجامه عصب عليه

سلطان: شو ناوي تنفدنا قبل اخوها وولد عمها يعني
علي: احلف والله انها اخته ... يمكن بنت يرانهم داخله بيتهم وهم ما يدرون أي شي بس مب اخته
سلطان: لا اخته قالت لي هذا بيتنا
علي: شو سوينا ... يا سواد الويه )....وهو معصب ويكمل سلطان) هذا اللي يتكلم عن بنات الناس محد قالك كل سوم والثاني قلت الدكتورة الدكتورة ...
سلطان: انا شدراني ان اختهم دكتورة ... محد قالي
علي: اخته الكبيرة معرسه والثانيه بتعرس الحين ... والباقيات اكيد اصغر من اللي بتعرس كيف تكون دكتورة
سلطان: المصري قال متدربة عندنا
علي: شو بتقول حق الريال الحين ... كيف بتجابله ... شو من نذاله سوينا بربعنا ...
سلطان: انا شدراني انها اخته
علي: عشان ما ترمس في أي حرمة او بنت تشوفها في حياتك كلها
سلطان: توبه
علي: بعد شوه (رن تيلفون سلطان سعيد متصل فيه)
سلطان: سعيد متصل
علي: رد عليه
سلطان: شو اقوله
علي: ما ادريبك لا تخلي التيلفون يرن انت مواعد الريال في بيتهم
سلطان: ليتني ما رحت (رد على التيلفون) الو
سعيد: هلا وين رحت يا ريال
سلطان: علي مر علي ... طلعت وياه
سعيد: شو ما بتروح المقهى
سلطان: ما ادري .. بروح البيت اشوف الشيبه متصل يباني
سعيد: اوكي بنترياكم ... مبارك عازمنكم الليلة بيودع العزوبيه
سلطان: ماعليه ياللا برايك
سعيد: الله يحفظك (وبند التيلفون)
علي: ليش تجذب عليه
سلطان: علي ويهي منقص والله ما اقدر اجابل الريال
علي: ولا انا بعد
سلطان: تذكر انا شو كنت اقول ... لو كانت وحده من خواتي وحد يرمس عليها جيه والله بذبحه
علي: محد قالهم يخلون بنتهم تدرس طب
سلطان: شو اسوي الحين
علي: ما ادري

واتحرك علي بالسيارة عشان يروحون يتمشون ... كان علي يحاول يهدي سلطان ويهدي نفسه الحركة قويه صدق ... ومحد يقبلها على اهله ... بس هذا اللي صار ولو كانوا يدرون انها اخت ربيعهم والله ما راحوا صوبها ...بس هذا كان نصيبهم وقدرهم
**
الاربعاء الصبح محمد مشغول في خيام العرس يشرف على الترتيبات النهائية على الخيمة اللي بيتعشون فيها الرياييل والميلس اللي بيقعدون فيه قبل العشا .... وموصي على الكراسي اللي بيحطونهن برع وين ما بيبون العياله والنعاشات ... اما خيمة الحريم واللي فيها الكوشه .. كانوا يركبون في الكوشه وبيشتغلون طول اليوم عشان تكون جاهزة في الليل ... ولانه طالب يعدلون فيها ويغطون الستيج اللي بيغنون عليه اللي يايبينهم يغنون في العرس ... الساعة ثلاث الظهر رد البيت .. طبعا ما حصل امه لانها كانت بيت عمه .. اما ابوه كان راقد ومبارك كان نازل وهو يغني ومستانس ... يوم شافه ابتسم له

محمد: هاه المعرس شحالك اليوم
مبارك: اوووه لا تخبر ... معرس بلبس بشت
محمد: هاهاها بتخبرك البشت اللي مخلنك مستانس
مبارك: شفت معرس دون بشت
محمد: وين بتروح انت الحين
مبارك: بروح الحلاق ... اقول انت تغديت
محمد: لا الحين بدخل اتغدى .. مخلين لي غدا ولا وزعتوه كله
مبارك: لا افااا عليك اصلا انا اترياك عشان اتغدى وياك (وراحوا غرفة الطعام يتغدون وهم يسولفون)
محمد: ماعليه بصدقك اليوم معرس
مبارك: هاهاها ياللا عشان تروح تتسبح وترد العرس ...
محمد: وانت متى بتي
مبارك: يوم بخلص من الحلاق بتسبح وبيكم
محمد: اقول علي وسلطان ما شفتهم من يومين في الميلس ليش
مبارك: ما ادريبهم يا ريال كل ما اتصلت فيهم او اتصل سعيد قالوا مشغولين
محمد: حد مزعلنهم قايلهم شي
مبارك: لا يا ريال .. بعدين علي وسلطان رياييل ما يزعلون دون سبب واذا زعلوا يقولونها كاش ما ينخشون شرى الحريم
محمد: ماعليه اكيد بيون اليوم
مبارك: هم يقدرون مايون بروح ايريرهم من حلوجهم
محمد: روح انت الحين الحلاق لا اتأخر
مبارك: اوكي .. تامرني على شي
محمد: سلامة راسك

طلع مبارك رايح الحلاق .... وبعد ما اتغدى محمد راح فوق حجرته يتسبح عشان يرد قبل لا ايون الرياييل ولانه العياله بيون الساعة خمس العصر
**

الساعة ثلاث بعد ما رد عبود من الكلية على طول راح غير ثيابه وراح الحلاق ... ورد من الحلاق راح يتسبح وطلع قعد ويا ابوه واخوانه اللي كانوا يسولفون والكل في البيت مستانس ومرتبش وعايش فرحة حقيقية بالعرس ... ام خالد كانت ويا ام منصور في حجرتها ... يسولفن ويرتبن للمكسار اللي بيكون يوم الخميس الصبح ... وبيسونه في الخمية اللي بيقعدون فيها الرياييل الليله ...

ام خالد: وين بتمشي عوشه يا ام منصور .. يبالها دجه مرتفعه شوي شرات الكوشه ويحطون عليها كرسي
ام منصور: قلت له محمد .. وقال بعد ما يتعشون الرياييل ويروحون بيخلي العمال يسوونها لها
ام خالد: وصندوق الذهب ما بنحطه في شنطه
ام منصور: ماعليه قلت لسمير بروحي اييب لي باجر واليلة بيطرشونه عندج ... بس ذهب اول خليها تلبسه كله
ام خالد: ان شاء الله
أم منصور: شو بتلبسينها باجر الثوب اللي سويتلها اياه ... ولا مغربية اسمعها تبغي تلبس مغربية
ام خالد: لا ماعليج منها مافيه شي الثوب غاوي مب كيفها ...
ام منصور: لا تغصبينها يا وخيتي خليها على راحتها واللي تباه تلبسه
ام خالد: انتي اللي لا تدلعينها وايد ... يا ام منصور البنت بنتج شرات ماهي بنتي والحين لج حق فيها اكثر مني ... وانا مطمنه عليها يوم انتي عمتها ... وادري انج ما بتظلمينها .. بس بعد لا تدلعينها زيادة
ام منصور: يا نورة انا ادري ان بناتج بناتي من اكبر وحده فيهن لين اصغرهن والله الشاهد علي انه لو عندي بنات ما حبيتهن اكثر عن هالبنيات ...
ام خالد: مصدقة يا وخيتي مصدقة يا ام منصور
ام منصور: (ودموعها في عيونها) يالله يا نورة كم منيت نفسي بعرس منصور ... واتريت اليوم اللي افرح به فيه لكن ربي ما كتب .. لو اني فرحانه عشان مبارك لكن بعده في يوفي ضو ما بردت على ولدي اللي كم حن علينا انيوزه بنت عمه وكنا انأخر عرسه
ام خالد: الله يرحمه يا ام منصور ... اترحمي عليه يا وخيتيه ... هذا كله مكتوب ومقدر واختبار من رب العالمين
ام منصور: (وهي تمش دموعها) الله يرحمك يا ولدي برحمتك .. رحت والكل راضي عنك
**

نزلت روضه وهي تناقز من على الدري وراحت حبت عمها على راسه وسلمت على الشباب

خالد: الحمدلله والشكر العقل زينه
روضه: طااااااف اليوم انا مستانسة ما بخليك تخرب وناستي
خالد: زين ان شاء الله دوم
بوخالد: خالد بتسكت عن البنيه ولا شو
خالد: ان شاء الله .. حد يروم يكلمها اصلا هيه منو غيرك مكبر راسها (هنيه روضه عشان تغايض خالد اللي خوانه كانوا يضحكون قعدت عدال عمها ولوت عليه)
روضه: بعد عمي شو بتقول عن الناس اللي تغار ... خلنا نسكت احسن
خالد: طال عمرج ما اغار من وحده مفعوصه ... انا البجر انا غير
روضه: اوكي خلاص بما انك واثق من نفسك ليش تغار
خالد: ومنو قالج اني اغار منج (كانت روضه بترد عليه بس عبود سألها)
عبود: اقول روضه عرس الحريم باجر حق شو كل هالكشخه
روضه: والله كيفي عندنا عرس .. شو تريدني اقعد مبهدلة
عبود: ماحيدج العروس
روضه: زين لا تزعل عندي ثياب وايد
عبود: والحفلة اللي على ويهج
روضه: شدراك انت اللي على ويهي هذا فن هب حفله اوووه سوفاج
عبود: عدال طاح حلجج وانتي تقولينها
روضه: عمي شوف عيالك كله يغايضوني
بوخالد: هاهاها عبود اسكت عن البنيه
عبود: خالد اسكت عن البنيه .. عبود اسكت عن البنيه .. اقول سعيد انت لو تقولها شحالج بتخبر ابوي عليك عشان يقولك اسكت عن البنيه (كان سعيد يضحك عليهم)
روضه: لا ما بقوله زين ... اصلا سعيد الوحيد فيكم اللي جنتل ويفهم في الاتكيت
عبود: اووووه انمدحت ... روح انتحر احسلك هاي طلع من حلجها شي زين في حق حد
روضه: (ونها تضحك) هاهاهاها ما يضحك
سعيد: ياللا عاد اسكت عن بنت عمي
روضه: هاهاهاهاها تستاهل ويييييو
عبود: انا اقول هالحب اكيد وراه شي
روضه: لا ما وراه شي ولد عمي فديت روحه يا ربي انسان حساس وشاعر ويفهم شو تريد منه يكون
خالد: اهاااااا .. اقول روضه فيه نعاشه ناقصه اليوم ما بتي شرايج اتين تنعشين بدالها اليوم
روضه: لا والله اوكي مب مشكلة
سعيد: هيه عشان باجر ايون يعزون فيج ان شاء الله
روضه: ليش
سعيد: بقبرج حذال الخيمه
عبود: ويييييييييييييييييييييييييييييييييييييييييو ونه شاعر وحساس ومن الصبح يدافع هاي قويه تستاهلين
روضه: عمي شوفهم شو يقولون
بوخالد: تهبي بنتي انا تروح تنعش مسود العين ... وانت تروم تسويبها شي وانا حي عشان اذبحك وراها
عبود: عادي ابوي ولدك ما بيتحمل الحياة وروضه مب فيها ... (هنيه انحرج سعيد وروضه احمرت)
بوخالد: وانت بعد لسانك طول على بنت عمك
عبود: خلاص يا بوي لا تكلمها الملكة اليزبث هاي
خالد: لا ماري انطوانيت راعية البسكويت
عبود: ليش ماري انطوانيت
خالد: يمكن ايي يوم واتلذذ وانا اشوفهم يقصون رقبتها بالمقصلة مثلها
عبود: يا شريييييييير
روضه: سمعته عمي سمعته (بوخالد معصب عليهم هالمرة صدق)
خالد: (يحاول يهدي الوضع قبل لا يفتن عليهم) لا لا مب عشان المقصلة بس والله كانت جميلة وحلوة وايد مثلها
روضه: اهانه هاي محد حلو مثلي ولا في اجمل مني في العالم والكون والمجرة
خالد: ما بتكبرين طول عمرج
روضه: (تغايضه وتلصق في عمها زياده) برايني كيفي دلوعة يحق لي (ضحكوا الشباب وضحك بو خالد وياهم وهو يحب روضه على راسها)
بوخالد: يحق لج بنتي ... كم روضه عندنا
روضه: انا وبس
بوخالد: صح انتي وبس ... انتي الغاليه (وسمعته عوشه وهيه نازلة من فوق (
عوشه: يا سلام انا بعدني ما عرست ولا طلعت من البيت وهي الغالية عيل انا شو بنت البشكارة
بوخالد: هاهاها انتي غاليه بعد
عوشه: لا يا بوي الحين محد اغلى منها ... اقول انا ليش بتيوزني ولد اخوك عشان يفضالك الجو انت وياها
بوخالد: هاهاهاها حسبي الله على بليسج
عوشه: (تكلم روضه) ممكن تقومين من عدال ابوي لو سمحتي اليوم بس انا بقعد عداله ... انا اللي بعرس هب انتي
روضه : اسفه قعدي من الجهه الثانيه .. واذا عرستي شو اسويبج حد قالج وافقي
عوشه: منو اللي كان يقول مبارك احسن .. مبارك ينحب ومحد مثله
روضه: محد قالج اتصدقيني كنت ابغي اتخلص منج .. بس ثرج لصقه ماشي فكة (سمعوا ام خالد تزقر عوشه من الحجرة بعد ما سمعت صوتها ) ياللا روحي روحي امج وعمتج يبنج
عوشه: ان شاء الله امايا ... برد لج يا عيوني صبري شوي
بوخالد: (يكلم خالد) ابوي يبت السيف اللي موصين عليه
خالد: هيه ابوي عندي في البيت
بوخالد: هاته بشوفه قبل لا انوديه
روضه : سيف شو
بوخالد: الشارة حق اليوم
روضه: شارة شو ؟
عبود: حق اليويله اللي ايول احسن بياخذه وبياخذ خمس وعشرين الف حاطينهن عمي وابوي
سعيد: بس السيف اهم .. الشباب ما يولون عشان البيزات ايولون عشان هالشغلات
خالد: روحي البيت هناك عند حمده وخليها تعطيج اياه هاتيه ابوي بيشوفه
بوخالد: عاد لا تخلونه يطلع من البيت
عبود: فالك طيب
سعيد: وين اتروم انت شباب الغربية وسويحان والسمحه كلهم الليلة في العين
خالد: ولا تنسى اللي في العين ... وربعنا من دبي
عبود: ويعني .. لكل مجتهد نصيب
خالد: بنشوف

راحت روضه بيت حمده عشان اتييب السيف ... ويوم شافته بهتت فيه كان يجنن صدق اللي مسونه متفنن فيه .. الزخارف على الغمد والمقبض كانت روعه .. ويوم طلعته لقت مكتوب عليه بخط صغير أفراح الرميثي واسم عمها تحت وتاريخ العرس ... شلته وردت تراويه عمها
**

كان سلطان ويا علي في السيارة يتمشون في العين وبعدهم الاثنين مفتشلين من سالفة الدكتورة ... عشان جيه في اليومين اللي قبل ما كانوا يروحون وين يكون مبارك وسعيد قاعدين

علي: شو يعني وبعدين وياك ما نروح عرس الريال
سلطان: لا بنروح
علي: عيل خلني اوصلك البيت تسبح عشان اتي بسيارتك
سلطان: تدري انا اتخبرت الوالده عن اهل سعيد
علي: زين
سلطان: اللي تدرس طب اصغر وحده من خواته .. واصغر من عبدالله
علي: كان باين عليها انها صغيره
سلطان: شوف بما ان سعيد ما اتصل فينا يعني هيه ماقالت لاخوها انها دخلت الميلس وانا فيه
علي: زين
سلطان : الحين خلاص نحن لازم نتفق محد يطريها مرة ثانيه
علي: ولو سئلوك عن دكتورتك
سلطان: بقولهم خلاص بس السالفه جديمة لا يعيدون فيها وانا نسيتها
علي: احسن بعد
سلطان: بس انت بعد لاازم تحلف انك ما تخبر حد ان الدكتورة كانت اخت سعيد
علي: شو هالكلام ... الحين انا اللي بطلع نذل في الاخير
سلطان: لا ادريبك بس انت احلف
علي: والله العظيم ما اطريها مرة ثانيه ولا اتخبر عنها لا عندك ولا عند حد غيرك
سلطان: وبعد اني شفتها في ميلس بيتهم
علي: شياك انت اليوم
سلطان: علوه انا واثق فيك بس انت احلف عشان انا ارتاح
علي: والله العظيم اني ما اطري هالبنت ولا اطري اهل سعيد ولا اسأل حتى عنهم خلاص الحين ارتحت
سلطان: هيه .. بس بعد مستحي من الشباب
علي: خلاص اللي صار صار نحن ما نقدر نرده
سلطان: حسبي الله ونعم الوكيل فيك يا ابليس
علي: ياللا عشان ما نتأخر على العرس .. تبغي الصدق انا عيني على الشارة
سلطان: (وهو يبتسم) ان خليتها لك
**

محمد بعد ما تلبس شاف ابوه قاعد ايتقهوى بروحه في الصالة ... فراح سلم عليه وحبه على راسه وقعد عداله يقهويه

بو منصور: هاه يا محمد كل شي جاهز
محمد: تطمن يا بو منصور ... ان شاء الله العرس الليلة بيبيض الويه
بومنصور: زين عيل قم خلنا نروح
محمد: صبر وين المدخن بتدخن قبل لا نطلع
بومنصور: ما ادريبه امك محد ما اظن سوولنا شي ... بنروح بيت عمك وهناك بنطلع وياهم وبندخن عندهم
محمد: ان شاء الله ... اسوقبك انا ؟؟
بومنصور: هيه .. بس عاد طلع سيارتي المرسيدس
محمد: ان شاء الله

طلع محمد مع ابوه صوب بيت عمه ... عشان ابوه بيطلع ويا عمه ويوم اتصل فيهم مبارك قاله محمد بعد ما يتسبح يلحقهم بيت عمه... في السيارة وهو ويا ابوه رن تيلفونه اكثر من مرة بس ما كان يقدر يرد لانه المكالمة من البحرين ... بس بعد ما نزل ابوه بيت عمه رد اتصل مرة ثانيه

محمد: الو السلام عليكم
لولوة : هلا محمد وعليك السلام ... شلونك ؟
محمد: بخير ونعمة شحالج انتي
لولوة: زينه الحمدلله
محمد: (مقطب حياته بعد ما سكتت ) شوفيج ... مب من عادتج تتصلين هالوقت
لولوة: يمكن مو وقته هالحجي ... بس انا اجلته اكثر من مرة وصار لازم تعرف ... يا محمد خلاص انا صبر اكثر من اللي صبرته ما راح اصبر ... مو معناته اني ما حبيتك ... انت تدري شكثر انا كنت احبك ...
محمد: وليش هالكلام الحين .. انا عمري ما شكيت في مشاعرج وعواطفج
لولوة: بس انا قمت اشك
محمد: لا والله .. ليش شو اللي في يدي وما سويته
لولوة: ولا عمره راح يكون في يدك او يدي شي نسويه
محمد: وبعدين
لولوة: محمد انا انخطبت ووافقت واليوم حفلة الخطوبة رسمي ... انا حبيت اخبرك لا تسمع من حد غيري لو كان عندي امل بس واحد او نحتى نص في الميه كنت صبرت .. بس انا وانت ندري انه مستحيل وان العمر يمضي وما ينطر حد

محمد من سمع كلامها انصدم وسكت ... معقوله اللي تكلمة لولوة اللي اتعذب عشانها هالعذاب كله ... انشغل فترة شهرين في التجهيزات لعرس اخوه واتغيرت عليه هالكثر .... كانت العبرة خانقتنه مستحيل اللي تقوله اكيد قاعد يحلم ... لولوة تتخلى عنه بعد كل الاحلام والخطط اللي خططوها ليش ما تقدر تصبر اكثر ... والله العظيم كان يريد ياخذها ... والله انه حبها من خاطره وانها اول حب حقيقي في حياته .. وليش اليوم تقوله انها بتعرس ... كيف بيقدر يجابل الرياييل في العرس ... كيف يقدر يبتسم وقلبه مقهور ... كان وده يصارخ يحتج يعترض ... يرفض اللي يصير يسافر يهج .. كان وده انه يصيح بس مسك دموعه بالغصب ... كانت اتكلم وتبرر التصرف ... بس كيف يقتنع باي شي تقوله وهو واثق من مشاعره ... معاها حق البنت تكبر واهلها ما بيصبرون عليها اكثر ... ليش ما تزوج اذا هو ما يقدر ياخذها ... لا مالها حق تخون كل اللي بينا وكل لحظة الم وكل لحظة حب وكل لحظة حلوة ومرة عاشوها ...

لولوة: الو محمد ... انت موجود تسمعني ... محمد رد علي
محمد: اسمعج
لولوة: سامحني يا محمد
محمد: (وهو يحاول يمسك نفسه لا يضعف جدامها) مسموحه .. الله يوفقج يا بنت الناس... مع السلامه

بند التيلفون قبل لا يسمع ردها عليه ... وقعد في السيارة مب قادر ينزل ولا قادر يسوي شي ... عايش كبت فضيع وصراع نفسي مؤلم ... لازم يفرح اليوم لاخوه ... لازم يضحك ويرزف ويسولف ... بس في داخله حس بانه مكسور ... حس بضعف وحزن والم .... حس بجرح كبير في قلبه وكرامته وطعنه قويه لرجولته وحبه ... وهو في دوامة هالمشاعر ... ما حس بسعيد يركب عداله في السيارة بعد ما اتأخر وما دخل ورا ابوه البيت ... بس يوم شاف شكله وانه عيونه حمر خاف عليه

سعيد: بلاك محمد (محمد لف يطالع في ويهه وهو ساكت ) شوفيك .. شو صار

بس محمد ما رد عليه وتم ساكت ... نزل سعيد من السيارة ولف فتح عليه الباب وقاله انزل اركب انا بسوق بنطلع لا تخلي حد يشوفك جيه ... نزل محمد وركب عداله وساق سعيد السيارة وطلعوا من البيت .... تم سعيد ساكت يتريا محمد يقوله شو فيه ... بس محمد كان ساكت ... عمره ما اشتكى ولا قال شي ...حق منوه يقول ومنو اللي بيفهمه اذا قال ... شو يقوله الحين ... كان سعيد يسوق سيارة عمه وهو ساكت يتريا محمد يقول شي ... ومحمد ساكت ما يعرف شو يقول وكيف يتصرف في هاللحظة واللي باقي من اليوم ... بعد ما طال سكوت محمد قرر سعيد يرد يسئله مرة ثانيه

سعيد: محمد شوفيك .... عسى ماشر (لف محمد يطالع ولد عمه وهو ساكت ورد يطالع جدام دون ما يرد عليه وبعد دقيقتين رد محمد يتكلم) زين الحين سؤال واحد بتحضر العرس ولا ؟؟؟ (بعد ما رد محمد) محمد انا اكلمك على ما اظن
محمد: (وهو على وشك الانفجار) ليش انا اقدر اسوي شي على كيفي ولو كنت ما اريد اروح اقدر ما اروح ... قولولي شو تبون وانا بسوي .. تباني الحين ايول الحين .. وقف السيارة وبراويك ... انتوا تامرون امروانا اللي طول عمري انفذ
سعيد: محمد بلاك انت ... شياك الصبح ما كان فيك شي
محمد: ( وهو يلبس النظارة الشمسية لان عيونه دمعت غصبن عليه) ااااااه يا سعيد ... ليش انا اللي حظي فيكم جيه ... شو اللي وداني سيويسرا ... من بين البلاد كلها اروح ادرس في سيوسرا ... ليش نحن اللي اهلنا جيه

سعيد بعد ما فهم السالفه كلها وانه شي صاير بينه وبين البحرينيه اللي يحبها ... عوره قلبه على ولد عمه .. اكيد بيفهم لحظة الاحباط اللي يعيشها محمد ... اكثر من مرة عاش هالاساس مع بنت عمه ... والف مرة حاول يتجاهل مشاعره بس اللي يحب حد بصدق ما يقدر يتجاوز او يذبح احاسيسه ... ومحمد اليوم عايش لحظة من اللحظات اللي عاشها سعيد

سعيد: محمد لا تخلي اليوم الزعل يسيطر على مشاعرك .. انت ريال ... وتدري ان هاليوم مهم لمبارك وابوك... واي زعل او خلاف بينحل ... وباجر بترد احس من اليوم
محمد: (وهو يطالع ولد عمه وفي خاطره غصه كبيرة وهو يحاول يتماسك) خلاص يا سعيد لا اليوم ولا باجر ولا أي يوم ... البنية اليوم يخطبونها .. خلاص انتهينا وللابد .. اللي يباه عمك صار... خلنا نرد نبشرهم... اللي يبغونه صار وظلموني وبتم اتعذب طول عمري
سعيد: (يحاول يهدي ولد عمه) شو هالكلام اللي تقوله تعوذ من ابليس لو الناس كلها ظلمتك ابوك ما بيظلمك ... انت الغلا كله يا محمد انت اصغر عياله وانت اللي شاد بك الظهر ومن يومه يعتمد ويثق فيك اكثر من اخوانك
محمد: (وهو يقول في خاطره ادري انك ما بتفهمني يا ولد عمي) شو تريدني اقول وانا اليوم ياني خبر موتي لا يغرك اني وياك ... كل معنى للحياة في داخلي مات ... احس بقلبي يموت يا سعيد
سعيد: شوف يا محمد محد يموت قاصر عمر ... والضربة اللي ما تجتلك تقويك ... لا تحرى انه محد غيرك حب او تعذب .... وايد يحبون وما يوصلون محد فيهم مات .. يعيشون حايتهم مثلي ومثلك ... لا تخلي شي يكسرك يا ولد عمي ... وخاصة اليوم اذا كنت تحبها وايد بيي يوم وبتحب غيرها ... بس اخوك مالك غيره واليوم فرحته لا تخرب هاليوم عليك وعلى اهلك
محمد: ما ياك اللي ياني يا سعيد ولا ما قلت هالرمسة
سعيد: (وهو يبتسم بمرارة) شدراك ... انت كنت دوم بروحك ... بعد هالسالفة قررت تنسى اهلك وناسك.. وما فكرت في غير نفسك وفيها
محمد: (وهو يطالع سعيد من تحت النظارة) يعني تحب (سعيد ما رد عليه فكمل كلامه) روضه بنت عمي اهتمامك فيها مب مثل اهتمامك بعوشه وبسوم ولا حتى نظراتك لها
سعيد: نحن مب في روضه ولا في غيرها نحن في سالفتك الحين ... لا تخلي هالمشكلة تهزك صدقني اليوم صدمتك كبيرة بس مع الايام بتلقى الضو اللي شابه في صدرك تبرد وتموت

سكت محمد ما وما رد على ولد عمه ... كان يفكر في كلام سعيد هل ابتعاده كان انانية من صوبه ... انعزاله وقراره انه يعيش في عالم بروحه عشان يعذب امه وابوه ويرضخون لطلبه في الاخير ... يدري انها لو صبرت كان في امل من ابوه ... يقدر في النهاية يقنعه ... بس هي اللي قررت تنهي العذاب ... قرارها صح والغلط عمره ما يستمر ... رن تيلفون سعيد كان مبارك متصل بعد ما وصل بيت عمه

مبارك: وينكم وين رحتوا .. ابوي محتشر عليكم ... وين انتوا وليش محمد مغلق تيلفونه
سعيد: هلا المعرس .. وعليك السلام والرحمه ... نحن بنيكم العرس سوق بعمي انت وانا ومحمد بنيكم هناك
مبارك : وليش طلعتوا من البيت قبل لا اوصل
سعيد : نتمشى ... الحين انت ما بتفيج لا حقي ولا حقه فنرتب اوضاعنا مع بعض
مبارك: هاهاهاها اذا جيه ماعليه ... ياللا برايك بروح اقول لابوي عشان اوصله انا (بند مبارك التيلفون(
محمد: هذا مبارك؟ .. شو يقول?
سعيد: يتخبر عنا وين ....
محمد: من قده مرتاح ... كل اللي يبغيه سواه ... الا انا فيكم اللي حظي طايح ...
سعيد: من قالك انت بس اللي حظك طايح
محمد: في الاخير روضه بنت عمك .. ومتى ما بغيت تقدر تاخذها
سعيد: لا يا محمد ... واذا هي قالت لا شو بيكون موقفي انا وهي جدامي اربع وعشرين ساعه ... واذا عرست بتكون قريبه مني وبشوف ريلها وعيالها جدامي ... بتم طول عمري اتذكر اني حبيتها كل ما اشوفها او اشوف ريلها او حتى عيالها ... لكن انت حبيت وحده بعيده عنك .. حتى خبر زواجها ياك في التيلفون ... البعد بينسيك جرحك .. وما بتذكره الا اذا انت قعدت بروحك وبغيت اتذكر

محمد كعادته دوم يسمع ويسكت ... يدري ان ولد عمه يحكي له واقع ... بس بعد الجرح في بداية يكون مؤلم ... ويشوه أي شي جميل فيك ... كان في داخله قناعة ان اللي يمر فيه هاللحظه مستحيل يفهمه او يحسه شخص الا اذا حب مثل ما هو حب ... حب باخلاص وبصدق ... كانت صح بعيده بس دوم في قلبه وياه ... عمره ما فكر في غيرها او حتى في يوم حاول انه يعرف غيرها مجرد معرفه مثل غيره من الشباب ... ومع ذلك غيره مرتاح وهو اللي متعذب ... اكبر مثال اخوه اليوم بياخذ بنت عمه وقبلها كان يلعب على عشر في وقت واحد ومحد يقوله شي او عاب عليه تصرفاته ... اما هو اللي حبها وحده بس وحده ... وكل العالم احتشر عليه ... وطلعوا في هالحب الف عيب وعيب ... عمره ما شوه علاقته فيها ... وعمره ما تجاوز حدوده في أي شي ... وكان بينه وبينها الف حاجز وحاجز ... كانت دموعه تنزل من تحت النظارة ولاحظها سعيد بس سكت عنه ... يدري بالنار اللي فيه وما حب يزيد جروحه .... وصل بالسيارة لين بيت عمه وبعد الصمت اللي كان طول الطريج

سعيد: انزل محمد وتعوذ من ابليس ورد اتسبح مرة ثانيه عشان نروح العرس
محمد: اسمحلي يا سعيد حملتك همومي
سعيد: افااا عليك يا ولد العم ... بس انت خلنا ننزل الحين يا تعطيني مفتاح سيارتك اروح العرس يا اترياك وبنروح رباعه
محمد: لا برايك روح انت انا بلحقك بعد شوي
سعيد: خلاص عيل وين مقتاح البي ام
محمد: تعال بعطيك اياه

دخل محمد ويا سعيد ... كان مفتاح السيارة في الصالة فعطاه المفتاح وراح فوق يتسبح وقبل لا يطلع سعيد وصى ايزبل خدامة بيت عمه توري مدخن حق محمد وادخنه قبل لا يطلع .... اما سعيد فرد بيتهم وقلبه يتقطع على حالة ولد عمه ... بس هذا اللي كان لازم يصير من زمان ... سعيد يدري باستحالة العلاقة اللي بين محمد والبحرينيه ... مهما يكون كانت عوايدهم اقوى من اي حب واي علاقة ... دخل سعيد البيت ... وراح فوق بيغير كندورته عشان يروح العرس ... وهو نازل حصل روضه قاعده ادور في المجلات والجرايد اللي في الصالة وهي اتحرطم ... ابتسم وهو يشوفها لو ياه مرة ثانية خبر خطوبتها شو بيكون رد فعله هوه ... كان وده يروح يقولها احبج .. روضه احبج ... بس بعد كان بينه وبينها حاجز اسمه رجولته اللي ما تسمح له انه ينزل لمستوى انه يغازل بنت عمه ... ما كانت تدريبه وهي تدور ... فراح صوبها بشوي شوي

سعيد: بوووو .. شو تسوين
روضه: بسم الله .. انت من وين طلعت شو ما رحت العرس
سعيد: (يبتسم) شو خوفتج
روضه: لا اصلا ريحة عطرك شالة البقعه ... كنت ادري انك موجود
سعيد: هيه صح باين
روضه: هاهاهاها ... والله انك متفيج كلهم في العرس وانت هنيه ليش
سعيد: كيفي اتدلع ... مرة عن خاطري ممنوع
روضه: لا ادلع ... مرنا كل يوم وتدلع علينا اوكي
سعيد: هاهاهاها شو اتسوين
روضه: ما ادري وين مجلة كل الاسرة راحت ... كنت اقراها وحطيتها هنيه ... اكيد هاي حمده شلتها بيتها
سعيد: بس تبين مجلة ومحتشرة بروح اخذ لج عشر مب الا وحده ... بس احلى بنت في العالم لا تزعل نفسها .. بعدين جمالج يذبل
روضه: (تشهق ونها خايفه) صبر صبر بروح اشوف في المنظرة ... ونك اتطنز اخ سعيد .. الحمدلله جمالي طبيعي دائم لا يزول ابد الدهر
سعيد: هاهاها تدرين شو اللي يعيبني فيج
روضه: هيه ادري كل شي فيني ... رقتي جمالي دلعي ... ياربي فديتني كم اسوى
سعيد: لا ... ثقتج الزايده في نفسج
روضه: (انحرجت) لو صبرت علي كنت قلتلك اياها
سعيد: ما بدلتي بعدج .. قالج عبدالله العرس باجر
روضه: هاهاها ليش مستخسرين فيني الوناسة ... يا ربي حلوة خلوني ادلع واستمتع بجمالي
سعيد: هاهاها زين محد قال شي ... بس يا حلوة ياللا روحي يبي لي المدخن والعود ودخنيني عشان اروح العرس
روضه: يا سلام وليش ان شاء الله انا اللي ادخنك
سعيد: لاني انا ولد عمج الجنتل
روضه: امممم هالمرة بس
سعيد: روحي يبي المدخن مبارك محتشر علينا ياللا
روضه: اول مرة واخر مرة ادخنك
سعيد: بنشوف .. بس روحي الحين
روضه: اوكي شوي شوي علي ... والله

راحت روضه تيب المدخن لولد عمها قبل لا يطلع يروح العرس ... وهو يطالعها وبعده يفكر في اللي صار لمحمد ولد عمه ... الموقف اللي صار لولد عمه بدل لا يمده بالشجاعه عشان يكلم ابوه في موضوع بنت عمه .. خله يحس بخوف من الرفض ... خوف من انه يعيش موقف محمد هوه بعد ... وهو غارق في افكاره اتصل فيه محمد يقوله انه خلاص بيطلع من البيت رايح العرس ... وقاله سعيد بعد انه خلاص بيطلع بعد ما يدخن ... وردت روضه يايبتله المدخن وبعد ما حطت العوده قعدت عشان تدخنه

روضه: ياللا ماعليه اليوم بس بدخنك عشان خاطر عوشه ومبارك
سعيد: صدق مالت عليج .. وانا مالي خاطر
روضه: اممممم لحظة بفكر
سعيد: في شو تفكرين حظرتج لا اكون جدامج جرورج قرداحي
روضه: (تبتسم) ماشي وسيلة مساعده
سعيد: لا .. ما يحتاي اتجاوبين خلاص هونا ...
روضه: (تبغي تغايضه وهي عاقده حياتها) ليش شو كان السؤال
سعيد: اقول قومي الله يستر عليج خليني اطلع بروح العرس
روضه: زين بس دخن الغترة قبل لا تروح
سعيد: هاتي المدخن

بعد ما طلع سعيد من البيت ... تمت روضه تفكر في ولد عمها ... وفي حياتها في بيت عمها ... بالرغم من المشاكل اللي صارت لها وياه مع ذلك عاشت في بيت عمها ايام تعتبرها من احلى ايام حياتها ... حست صدق باحساس الخوان والخوات في عوشه وعبود وخالد وفطوم وحتى بسوم ... الا سعيد من يت بيت عمها وعلاقتها فيه كانت دوم غير من قمة الاحترام لقمة الحقد والكره ... والشوق وشو يمنع انه يكون فيه حب ... كيف أي وحده في وجوده وتعرفه مثل ما عرفته هيه انها تمنع نفسها انها اتحبه ... حتى وان كان حب في نظر البعض محرم .. لكن بالنسبة لها كان لسعيد في خاطرها مكانة غير عن الكل ... كان ايي في المرتبة الثانية بعد عمها مبارك في كل شي
**
في عرس الرياييل الكل مرتبش والشباب مستانسين ... والناس من كل مكان يايه بتحظر العرس .. ربع مبارك من السعودية وقطر والكويت .. واهل العين وبوظبي ودبي .. والسمحه والغربية ... وفي حد يعرفونه الشباب وحد ما يعرفونه .... وصلوا محمد وسعيد في نفس الوقت وكان محمد يتريا ولد عمه عند السيارة عشان يروحون يسلمون على الرياييل مع بعض .... ودخلوا سلموا على بني عمومتهم كلهم ... وربعهم واللي يعرفونه وحتى اللي ما يعرفونه ... وردوا يقعدون عند بو منصور وبو خالد ... والرياييل اللي يايين من بعيد ... صح محمد كانت نفسيته تعبانه ووايد متأثر بعد المكالمة بس قدر يضبط اعصابه ويسيطر على كل انفعال في داخله ... مبارك كان فرحان صدق ومرتبش وعايش جو العرس ... وما قعد بقعه وحده ... كل شوي عند جماعة من الشباب ... او ويا الشواب .... محمد المهيري وعلي وسلطان وصلوا رباعة ... وراحوا صوب بو منصور وسلموا عليه هوه واخوه والرياييل الموجودين وراحوا صوب الشباب واليويله .. اما مبارك فتم قاعد ويا ابوه

بو حميد: ماشاء الله يا بو خالد عيالك كبروا وصاروا رياييل ينشد بهم الظهر
بو خالد: الحمدلله يا بو حميد ...
بوحميد: من متى ما ييت بهم صوب السمحه ... من اكثر من خمستعش سنه محد شافكم هناك
بوخالد: يا بوحميد مشاغل الدنيا ... والحمدلله ما قطعنا هلنا ونسير عليكم متى ما لقينا وقت
بوحميد: انتوا ما قطعتوا لكن عيالكم من متى ما شفناهم
بو منصور: هاهاها ماعليك العيال يتشاوفون ويا الشباب واذا مب في السمحه في بوظبي
بوحميد: لا تعلمونهم على القطيعه يا بو منصور ... الخوف ينسون اهلهم
بومنصور: لا الاصيل بيتم اصيل يا بو حميد ... والعيال ما عليهم خوف

كانوا الشواب يسولفون بروحهم وردوا يتذكرون ايام قبل ومنو من شوابهم بعده حي وما قدر يحضر عشان كبر السن .. ومن منهم الله ذكره ... والمزارع والبحر والبوش .. اما الشباب فكانوا مرتبشين على الشارة اللي حطينها في صندوق زجاج عشان الكل يشوفها ويتحمسون اكثر ..

مبارك: (يكلم سلطان وعلي) وينكم انتوا من يومين ... هذي المخوة في مثل هالوقت محد يشوقكم ... لا تخافون ما نبغي عينيه من جداكم.. الله يطول عمر بومنصور
سلطان: يا ريال الشيبه طفرنا ويا بوشه .. ما تعرفه انت بو عبيد
مبارك: ماعليه الحين الا اتعلث ... وانت علوه .. هو شيبتهم طفره بالبوش وانت كنت المساعد ماله
على: هاهاهاها لا ما هان علي اخليه يبات في العزبة بروحه .. رحت اخاويه
سعيد: ماعليه ... خلهم يا ولد عمي بس يوم بيعرسون ما بنحظر غير يوم العرس
علي: افاااااااا ما يطيع زينك يا بو عسكور
سلطان: هاهاهاها ما تقدر ... اصلا ما بنهون عليك
سعيد: شغلي في بوظبي اقدر
مبارك: وانا الحرمة بتقولي لا تروح كل يوم ويا ربعك
سلطان: ومن الحين بنسمع شور الحرمة
علي: الدرس الاول يقولك شاورها وخالفها
محمد: هاهاها ليش عيل يشاورها
سلطان: عشان يخالفها
علي: ويرفع لها الضغط واييب لها الجلطه ويفتك منها وياخذ الثانيه
سعيد: هب هباك الله ..

وهو يسولفون يوا صوبهم ربعهم من الغربية والسمحه ... وردوا يسولفون وياهم ويتكلمون عن الشارة ومتى بيبدون ومنو بيحكم بينهم

سعيد: اقول تعالوا بنسير صوب محمد بن سلطان ... هوه اللي مرتب كل شي اتخبروه
محمد: وينه هوه ما شفناه
سعيد: قاعد هناك صوب الشواب
عبيد: ماعليه ياللا نروح

راحوا الشباب صوب محمد وقعدوا يسولفون وياه ... وهو يرد عليهم بكلمه او كلمتين ... وحد منهم راح صوب العياله يرزف وحد صوب النعاشات ... وتموا مجموعة شباب ويا الشواب ... كانت كوبات العصير ودلال القهوة والحلاوة تخطف على الكل ...

بوعبدالله : حيا الله الشباب ...
بوحميد: بلاكم قاعدين هنيه شرات الشواب ... روحوا ويا الشباب بترزفون وبتيولون خلونا نشوفكم ... وين على ايامنا اذا عرس حد منا ما قعدنا
سلطان: ماعليه بس نشوف الشباب قبل شو بيسوون
بوخالد: خلهم يا بوحميد ... بنسمع سوالفهم
بوعبدالله : دام ان محمد بن يوعان قاعد هنيه ... خله يسمعنا قصيدة وبنشوف منو من الشباب بيرد عليه
محمد: ما بردك يا عمي لكن سعيد بن مبارك شاعر ويعد قصيد .. خله يبدا هوه وبنرد عليه ان شاء الله ..
بوعبدالله: (يكلم سعيد) صدق يا ولدي ماشاء الله عليك ريال ... خلنا نسمع شعرك
سعيد: وين يا عمي .. مب لين ذاك الزود
سلطان: عد لنا شي يا سعيد ... عشان نسمع محمد
سعيد: ان شاء الله ... (ابتسم سعيد وهو يتذكر روضه بنت عمه وابتسامتها وقال) "لا تلوم القلب المعنا ... في هوى سيد المزايينا.... لي بحبه صار مشقنا... ولا لقينا دونه معينا.... يا محمد حبه امحنا ... يا زميلي قد له سنينا ... حبه في وسط الحشا بنا .... جاري مجرى الشرايينا.... نور خذه بروق يعشنا... والميدل طاح رضفينا... عود موز ماس يتثنا... عود وان هب الصبا يلينا ... والشفايا جمر يورنا ... من لماهن ليت يسقينا... واللواحظ سود يرمينا... لي بهن ماتوا ملايينا... لو تسده الروح له منا... اشهد إنا له ملبينا.... عالرضا والذوق والفنا.... في شفوفه دوم ساعينا... يا حمام الدوح لي غنا... وصل المندوب في الحينا... وبالتحية صوبه اتعنا... كود يتعطف ويلفينا... لا تلوم القلب المعنا... في هوى سيد المزايينا... لي بحبه صار مشقنا.... ولا لقينا دونه معينا" وسلامتكم
بوحميد: صح لسان الشاعر
سعيد: صح بدنك
بومنصور: سلمت يا ولدي وصح لسانك
سعيد: صح بدنك عمي
بوحميد: هاه بن يوعان ما بترد على ولد عمك بقصيدة
محمد: حاظرين
بوخالد: قول بنسمع
**

في بيت بو خالد فساتين البنات وصلت وودنهن الخدامات بيت خالد ... فاتصلت حمده في روضه عشان اين يجربن فساتينهن ... وراحت روضه اتشوف بسوم اللي من يوم الاثنين محد شافها ولا طلعت من حجرتها حتى الكلية ما داومت من الضيج اللي فيها على موضوع الميلس

روضه: بسوم تعالي بنجرب الفساتين وصلن بيت خالد ... عوشه سبقتنا هناك
بسوم: روضه مالي مزاج انا ادريبه زين يوم انج انتي اللي مسوتنه
روضه: بسوم عوشه ما بتعرس كل يوم واللي صار صار لا تسوين بنفسج جيه والله ما يسوى عليج
بسوم: بما ان سعيد ما قال شي يعني الريال ما خبره
روضه: لا ما اظن انه وقح هالكثر او قليل تهذيب عشان يقول حق سعيد انه شافج في الميلس
بسوم: مسكين اخوي مثل الاطرش في الزفه
روضه: بلاج انتي ... احسله ما يدري لا يضيج وانتي تعرفين سعيد في هالسوالف صح بارد وهادي وعاقل.. بس الا هالشي انسي كل الصفات القبليه وحطي شديد ويغار على اهله موت
بسوم: بس احس اني سويت شي غلط
روضه: (بعد ما قعدت عدال بسوم) انتي قاصده تسوين هالشي
بسوم: لا
روضه: كنتي تعرفين ان الريال اللي اسعفتيه ربيع سعيد
بسوم: لا
روضه: ولو كنتي اتعرفين .. كنتي بتخلينه يولي وبتقولين لا ما بعالجه ربيع اخوي

سكتت بسوم ما عرفت شو تردد على روضه اذا كانت دكتورة مستحيل تخلي شي مثل هذا يوقف في ويه انها تعالج واحد متعور حتى وان كان ربيع اخوها .. ليش متحسسه من هالموضوع ... في داخلها مازالت متمسكة بكل القيم اللي ربت عليها ... صح هي متحجبة ومحترمة .. بس في داخلها صراع بين ان اللي سوته صح في حق دراستها وغلط في حق اخوها ...

روضه: ما رديتي علي
بسوم: شو اقول
روضه: لا تقولين شي الحين .. انسي اللي صار وخلينا نستانس عشان خاطر عوشه آخر خواتج اللي بتعرس
بسوم: لا باقي عرسج
روضه: فديت روحج يا بسوم .. والله انج روعه تحفه نادرة
بسوم: (تبتسم) انا تحفه يا تحفه انتي
روضه: هاهاها لا يعني انتي تحفه غالية فن عجيب لا يرقى اليه
بسوم: هيه على بالي شي ثاني
روضه: زين ياللا قومي
بسوم: (رد الضيج على ويها) زين واذا هذا اللي شافني قعد يقول حق ربعه انه شافني واني دكتورة وقاموا يضحكون على سعيد اخوي
روضه: يا بسوم ليش انتي تفكيرج يوديج لاشياء بايخه هاه ...
بسوم: بعد احتمال
روضه: بسوم سعيد ريال ويعرف الرياييل ما بيروح يرابع واحد نذل بيروح يرمس عليه ولا انتي ما تثقين في اخوج
بسوم: لا اثق فيه
روضه: عيل قومي وبنرد لهلموضوع بعد العرس اوكي
بسوم: اوكي

طلعن بسوم وروضه راحن بيت حمده وكل وحده فيهن شاله في يدها كيس فيه النعال اللي بتلبسه على الفستان ... كانت عوشه سابقتنهن في بيت حمده تشوف حمده وفطوم وهن يجربن فساتينهن

عوشه: فستان حمده احلى ... وجسمها احلى من جسمج فطوم ... هذا وهي مربي بعدج
فطوم: تصدقين بعدني ارضع ولدي
حمده: يعني انا اللي ما ارضعه ... بس انتي اللي خذتي راحتج في الاكل وايد وما قمتي تحاتين عمرج
فطوم: برايه ريلي وعايبنه شعليكن انتن
عوشه: هيه صح عايبنه .. الا تلقينه ساكت ويتحسر على ايام اول .. وما يقول عشان ما يجرحج
فطوم: ماعليه اخت عوشه بنشوف غصن البان كيف بتستوين بعد العرس
عوشه: بسم الله عليه .. انا اول شي واهم شي رشاقتي
فطوم: اوكي اوكي (دخلن روضه وبسوم الحجرة عليهن(
روضه: وين فساتني... كيف طلع
عوشه: يجنن ... والله حلو
روضه: ومال بسوم
فطوم: حلو ... واستايلها بعد
حمده: لونه بيطلع عذاب عليها ...
روضه: لازم لازم مب انا اللي مختارتنه
بسوم: زين وينه ابغي اشوفه ...
حمده: هنيه في اكياسهن واحد لج وواحد مال روضه

راحن بسوم وروضه صوب الفساتين اللي كانت حمده معلقتنهن على الكبت من برع عشان يجربنهن ... وفجن اكياس الفساتين ... وعجبهن الشغل حتى بسوم فجت عيونها من الفن اللي مسويلها اياه ... كان الشغل فعلا يستاهل كل اللي ندفع فيه .. ما جد قالت حق روضه توصف لها الفستان ... او كيف مسويلها اياه ... صح كانت متوقعه ان ذوق روضه حلو وراقي .. بس ما توقعت انه بيكون بكل هالروعه ...

عوشه: ياللا بسوم جربي فستانج .. شو بيطلع عليج
روضه: طبعا ذوقي
حمده: مع احترامي لكن كلكن .. بس باجر بسوم بتكون نجمة الحفله .. انتي اللي خربتي على عمرج روضه
روضه: هاهاهاها ماعليه متنازلة عن باجر حق بسوم ... بنت عمي تستاهل
فطوم: الله يعينا كيف بنروغ الخطاطيب بعد باجر ... بنتعب من كثر ما نقول بنتنا تدرس طب .. بنتنا تدرس طب

تغير شكل بسوم بعد ما طرتلها هالسالفه .... مع ان روضه ما صدقت تطلع من المود الخايس اللي كانت فيه وكان ودها تصفع فطوم ... بس حاولت تغير السالفه

روضه: ياللا بسوم جربي الفستان وادعيلي .. بريل يسويلي عرس احلى من عرس عوشه
عوشه: هاهاهاها ودج الا اذا خذتي محمد ولد عمي .. هاه شو قلتي
روضه: اسفه ما اخذ مستعمل (حمده وفطوم قامن يضحكن صدق من الخاطر عليها)
فطوم: في شو مستعمل الولد فرش طازه ما عرس من قبل
روضه: يحب وحده غيري ... وانا ما اريد اللي اخذه يحب غيري ولا أي حد بس انا
حمده: زين الريال ما يتغنالج بالاشواق قال يباج
روضه: ولا انا اتغنيت له بالاشواق قلت اباه
عوشه: جربن الفساتين

بعد ما لبست بسوم الفستان اللي طلع يجنن عليها ... فلت شعرها اللي كالعادة كان لين جتوفها بس ... مع لونه الكستنائي وخلصلاته العسلية .... كان شكلها روعه ... وتمن يطالعنها كلهن وهن مبلقات عيونهن مع انهن متعودات عليها ... بس بسوم بالفعل كل معنى للجمال كان في ويها .... ومحلتنها البراءة اللي فيه

حمده: قل اعوذ برب الفلق
روضه: هذا قبل لا تحطين المكياج عيل بعده صدق انج بتاكلين الجو
فطوم: بنخلي امي ادخنج بلبان وشبه قبل العرس
عوشه: هاهاهاها بتحضر العرس وريحتها لبان وشبه
روضه: يا ويل حالي على ذوقي الفن ... كنت ادري ان اللون بيطلع عليج ذباح
عوشه: ياللا لبسي الفستان خلينا نشوف كيف بيطلع عليج

بدلت روضه وطلعت تراويهن كان فستان روضه روعه والشغل اللي فيه اروع ... ما كانت مثل بسوم بس في روضه جمال ما تمله العين ... وكان اللي محلنها ثقتها في نفسها ... بالرغم من انها تحب تكون احلى وحده في العالم والكون والمجرة الا انها مستعده تتنازل عن هاللقب واي شي ثاني عشان ما تشوف وحده من بنات عمها مضايجه او فيها شي ... وضيجة بسوم كانت مضيجتبها بالاخص هالفترة اللي المفروض انهم مستانسين عشان عرس عوشه

عوشه: أي روضه ليش مسويه فستانج هاي نك ... كيف بتلبسين العقد اللي ماخذنه عمي لج
روضه: هاهاها فديت عمي انا .. بس عاد ما شاورني قبل لا ياخذ العقد ... ولا كنت قلت له يدفع فلوس الحلق اللي قلت حق عمتي تسويلي اياه
عوشه: وبتكسرين بخاطر عمي ما بتلبسين الهدية
روضه: ماعليه بلبسها في عرس محمد ان شاء الله
عوشه: اقول انتي مب ويه نعمه فقرتن عمي على الفاضي انا العروس وقام يشتريلكن انتن .. هاتي العقد رديه علي
روضه: روحي لاه .. جنه عمي بعد ...
عوشه: انا حرمة ولده هب انتي
روضه: طماعه هالكثر عندج شو تبين بمالي
عوشه: (وهي تكلم بسوم) أي انتي يا غبيه لا تخلين روضه تستفرد بابوي تراه ما بيتم لج شي من الغلا ... انا اكتشفت خطتها اليوم.. خلتني اعرس عشان تستفرد بابوي (كانن فطوم وحمده يضحكن على روضه وعوشه وبسوم اللي ما مسوتلهن سالفه)
روضه: لو كانت عمتي تخليني افل شعري ... كنت سويت فستان عريان من الظهر ... بس شو اسويبها بتحبسني في البيت لو افله
فطوم: صدقها روضه .. لا تبطرين على النعمه ما بيتم فيج شعر لو فليتيه
روضه: عيل حق شوه مطولتنه ومتحمله التعب واللعوزة كلها .. يوم ما اقدر ابطله يوم اروح عرس
حمده: حق ريلج بعدين
روضه: يا سلام اتحمل كل هذا عشان ريلي بعدين ... اموت واعرف شو سالفة الرياييل ويا الشعر الطويل
حمده: سئلي ريلج بعدين
روضه: اوف اوف اوف .. كل ما قلت شي قالن ريلج ريلج خلنه ايي اول
فطوم: بيي ان شاء الله لا تستعيلين
**

بعد المغرب في العرس ... قعدوا الشواب جدام الفرزة اللي مسوينها حق اليويله عشان يشوفون اليواله ويختارون اللي يستاهل الشارة .... بوخالد وبومنصور واهلهم وجيرانهم كلهم قعدوا ... وراحوا الشباب يستعرضون مهاراتهم ...اما محمد فيوم شاف ان الربشة بدت وان محد بينتبه اذا اختفى لين العشا ... قام شل بعمره وركب سيارته بعد ما خذ المفتاح من عند سعيد وراح يتمشى بروحه ... كان بحاجة انه يكون بروحه شوي ... يبغي يعيد حساباته ويرتب اوراقه .. ضيع من عمره سنين في حب فاشل ... كم مرة زعل ابوه وامه اللي ما يهونون عليه عشانها وفي الاخير قررت تنسحب ما قدرت تصبر ... واجه نفسه بالسؤال اللي كان يتهرب منه لو فعلا وصل لمرحلة يختار فيها بينها وبين امه او ابوه واحد فيهم مب اثنيناتهم ... لو خيروه بينها وبين رضا امه او رضا ابوه شو بيختار ... بالرغم من كل المشاعر والحب اللي في داخله لها كان بيختار امه او ابوه بلا ي تردد ... ابتسم بالرغم من كل جراحه وهو في سياره ... وهو يتذكر طفولته ويتذكر امه وابوه واخوه منصور واول طراق في حياته من منصور لانه جذب على امه وابوه ومنصور يدريبه ... كان يظن ان منصور بيستر عليه وبيخليه يجذب عليهم ... بس بعد ما طلعوا حصل طراق معتبر

منصور: انا قلت لك تصرف بس مب تجذب عليهم ... انا ما امشي ويا ناس جذابين يجذبون على اهلهم اللي يجذب على امه وابوه باجر بهون عليه يجذب في كل شي في حياته
محمد: انت تدري انهم ما بيخلونا نروح المباره ... لو نموت وانا قلت لك بتصرف
منصور: اهون علي اقعد في البيت ولا اجذب عليهم ... انت ونك تحبهم جيه
محمد: هيه انا احبهم اكثر منك
منصور: انت تحلم انا عمري ما جذبت على ابوي او واحد من عمومتي
محمد: زين يعني الحين ما بتروح وياي
منصور: لا ما بروح وياك.. قلتلك ما اماشي جذابين
محمد: زين زين يا منصور انا جذاب الحين لاني بغيت افرحك ... لكن ياللا انت روح قول حق ابوي ان نحن جذبنا عشان نروح المبارة لانه ما يطيع يخلينا نروح بروحنا
منصور: بروح اقوله
محمد: منصور خلنا نروح ... انا ما زعلت لانك ضربتني
منصور: ما بروح وياك انت جذاب ... وانا بروح اقول حق ابوي الصدق اذا ما رحت تقوله
محمد: ما تقدر
منصور: اقدر ... وبروح بعدين ويا بروك وسعود العب كورة
محمد: ما بيخليك ابوي تطلع
منصور: برايه بقعد في البيت
محمد: انت ليش عنيد
منصور: حمود ... روح قول حق ابوي الصدق
محمد: منصور الله يخليك .. ما اقدر شو بيقول ابوي يوم يعرف اني جذب عليه
منصور: شوف الغلط لازم ينكشف في يوم .. احسلك تقوله لا حد غيرك يخبره
محمد: محد بيخبره
منصور: حمود انا بدخل البيت خمس دقايق اذا ما دخلت وراي تقوله انا بروح اقوله

دخل منصور عنه وبعدها راح محمد وقال لابوه الصدق ... ابوه ما قاله شي بس كانت النظرة اللي اطالعه بها تساوي عشرة من طراقات منصور ... وابوه طلع منصور من الصالة وعطاه محاظرة طويله عريضه في الجذب والاخلاق والمريله ... بس تعلم الدرس من منصور ... ان ابوهم اهم عندهم من أي شي ثاني في الدنيا ومايستاهل يجذبون عليه او يعذبونه ... بالرغم من ان منصور كان اكبر منهم بكذا سنة بس كان له يد في تربيتهم ويا ابوه ... هوه اللي عطاهم يسوقون سيايير اول ما بدوا يتعلمون وهو اللي اتوسط لهم عشان دراجات المزرعة اول مرة ... وهو اللي خذالهم التيلفونات واتعنا في الارقام المرتبه ... خسر اخوه للابد يقدر يتحمل خسارة واحد ثاني من اهله طبعا لا لو بالف لولوة ... لو كان قلبه يتقطع عشانها... يمكن هي سوت الشي الصح لها وله ... ليش يلومها وليش يقول عنها خاينه .. من حقها تفكر في حياتها ومستقبلها الناس هنيه كلهم ما يبونها الا هوه... شو اللي يجبرها تصبر عليه وعليهم ... وهو في غمرة افكاره رد بالسيارة العرس وقرر انه يستانس من وناسة اخوه ... مب كل مرة بيعرس مبارك وبياخذ بنت عمه عوشه .. اول ما وصل صوب خيام العرس ... نزل من السيارة نزل سلاحه وياه بيروح ايول مع الشباب ... صح ماله امل في الشارة .. بس يكفيه انه حاول
**

في الليل بعد ما تعشوا الرياييل ... ردوا كلهم بيت بو خالد وهم يسولفون ويضحكون ومستانسين ... وسمعت روضه حشرتهم تحت ونزلت من حجرتها تشوفهم

حميد: (وهو شال ولده) افااا يا عمي ما تعطون الشارة سعود ...
بوخالد: هاهاها ما عليه يوم بيعرس خاله سعيد ان شاء الله
حميد: سعود قولهم زعلانين بنرد دبي
سعود: لاء ... نو
عبود: هاهاهاهاهاها فديته الولد عيناوي من يوم يومه
حميد: يا الهرم ليش دبي لا ... هاه شتبى بهم ما عطوك الشارة
عبود: انا بروح الدكان في السيارة بشتري سيارة حق حمود ... حمود وينك تعال (من سمع سعود خاله يقول دكان وسيارة قام يتحيس عشان ابوه ينزله وكلهم ضحكوا عليه)
روضه: (بعد ما نزلت ) هاه شو العرس ... شو صار شو استوى
عبود: شو قلتلكم في هاه .. مب قلتلكم روضه بتسويلكم تحقيق اول ما توصلون
روضه: انا ما اكلمك انت زين
عبود: عيل يوم بتأيسين منهم لا تيين تترجيني اخبرج
روضه: (وهي تطالعه من فوق لين تحت) هه تتمنى انت ... عمي فديتك بشر عن العرس
بوخالد: زين
روضه: عمي مب بس زين ... شو صار
بوخالد: هاهاها الناس تعشت وراحت بيوتها
روضه: وقبل العشا
بو منصور: قبل العشا قعدت في الميلس
روضه: ( بعد ما يئست منهم) محمد صورتوا فيديو
محمد: (يبغي يرفع لها الضغط) اووووه تصدقين نسيت سالفة تصوير الفيديو
روضه(شهقت من الخاطر) لا محمد لا تقول كيف تنسى هالشي
سعيد: (بعد ما رحمها وما هانت عليه يعذبونها وهو يبتسم) صورا كل شي فيديو وصور ماعليج منهم
روضه: (وهي مغيضه على محمد) نسيت هاه نسيت .. اقول سعيد ولد عمي اقعد بروح اييب لك عصير و ايسكريم واللي تباه عشان تسولف لي عن العرس (هنيه صدق كلهم ضحكوا من الخاطر من الشواب لين الشباب)
مبارك: اوهووو قلنا بناخذ الملقوفه عوشه بيتنا وبترتاحون ثره في غيرها هنيه
روضه: احلف بس انت .. ماعليك ان ما خبرتها عليك ... وبعدين مب انت محروم من دخول البيت لين يوم العرس
مبارك: واليوم شو يا حلوة
روضه: باجر العرس مب اليوم ..
خالد: الله يعين اللي بيبتلي فيج يا بنت عمي
روضه: خالد حمده تترياك في البيت .. وانت حميد فطوم فوق تقولك روح بسرعه عشان ترقد ولدك
حميد: ولدي لاصق في خاله ما بيطيع يحترج من عداله لين ما يروح الدكان
روضه: زين عبود ياللا شل سعود الدكان ... وانت سعيد اقعد شو تبغيني ايب لك
مبارك: الله لو انا مكانك يا سعيد بذلها ذل بطلع الاولي والتالي
روضه: هه ودك انت روضه بنت محمد ما تنذل طال عمرك .. دام راس بو خالد يشم الهوا
بوخالد: منو يقدر يذل بنتي وانا عايش
مبارك: ايوه ايوه الحين كبر راسها علينا
عبود: امبونه راسها كبير ما يحتاي حد يكبره
محمد: ابوي جانك بتقعد انا بترخص تعبان ومنهد حيلي من اسبوع ما نمت شرات الناس
عبود: وين يا ريال بنكمل السهرة في الميلس
محمد: لا والله عبود ما اقدر .. من الساعة سبع وانا في الخيام ... والحين بمر عليهم ينظفون الميلس حق المكسار باجر الصبح ... وبيرتبون الستيج
عبود: خلاص خلني بروح وياك وخبرني شو تباهم يسوون وبوقف على روسهم وانت روح ارتاح مسموح
مبارك: ما قصرت يا بو جاسم بنردها في عرسك ان شاء الله
روضه: غصبن عنك مب بكيفك
مبارك: انا كلمتج ...
روضه: اصلا لازم انت اللي تروح تشوف الخيام حق المكسار مب اخوك ولا عبود .. بس انت مرتاح حد لاقي اخو يسويله كل شي يوم عرسه
مبارك: عن اللقافه زين
عبود: (يكلم حميد) بشل سعود وياي ... ادري اذا رحت ما شليته بيباغم عليكم
حميد: برايك شله وياك

طلع عبود ويا ولد عمه... وراح خالد بيته عند حرمته اللي ما كان شايفنها من العصر ويحس انه متوله عليها وعلى ولده... وقعد مبارك وبومنصور شوي يسولفون عن العرس وكانت روضه قاعده وياهم ... صح ما كانت اتخبرهم عن العرس بس من سوالفهم تلقط الاحداث اللي صارت

بومنصور: مزين القصيده اللي عديتها يا سعيد .. لا يكون شايف لك شوفه انت بعد
سعيد: هاهاها عمي الله يهديك شو شوفته هاي اللي بشوفها
روضه: (اللي ما رامت تمسك عمرها) أي قصيدة
مبارك: (وهو يغمز لولد عمه) لا تلوم القلب المعنا ... في هوى سيد المزايينا.... لي بحبه صار مشقنا... ولا لقينا دونه معينا..... هاه ولد عمي منو هالمزيون اللي مشقنك بحبه (كانت روضه تطالع سعيد تترياه يجاوب على سؤال عمه وولد عمه
سعيد: لازم يكون في حد
مبارك: شكلك متعذب وانت تعد هالقصيده
بومنصور: (وهو يبتسم) نور خذه بروق يعشنا... والميدل طاح رضفينا... عود موز ماس يتثنا... عود وان هب الصبا يلين ... والشفايا ما دري بهن بلاهن يا بو خالد
بوخالد: هاهاهاها... بلاهن يا بو عسكور
سعيد: (يبتسم وهو يطالع بنت عمه) والشفايا جمر يورنا ... من لماهن ليت يسقينا... واللواحظ سود يرمينا... لي بهن ماتوا ملايينا... لو تسده الروح له منا... اشهد إنا له ملبينا
مبارك: هاه ولد عمي هذا كله في منوه
روضه: يعني ما تدري في منوه
بومنصور: في منوه يا بنت محمد
روضه: (وهي تبتسم) فيني انا .. احلى بنت في العالم والمجرة والكون ... أي شاعر يشوف جمالي الفتان لازم يعد فيني قصيد وهذا ولد عمي وانا مجابلتنه اربع وعشرين ساعه يقدر يعد في غيري قصيد .. ولا شووو؟؟

ضحكوا كلهم على روضه وهي كانت تبتسم وهي تطالع سعيد .. بس هو سكت ما رد عليها
روضه: هاه ياللا قول في حد غيري ولا فيني .. لا تفشلني عاد
مبارك : يا الغرور اللي فيج يا بنت عمي
روضه: ياللا سعيد قولهم
مبارك: فشلها الله يخليك
روضه: ما بيفشلني لا تدخل بيني وبين ولد عمي
سعيد: اذا ما كان في بنت محمد .. في منو غيرها بيكون
بومنصور: هاهاها زهب نفسك يا بوخالد... بنيوز ولدك قرييب ان شاء الله
بو خالد: من باجر يا سلطان ... وخيام عرسكم ما بنشلها

كانت اول روضه تحس روضه فيها بهالاحراج وبان عليها .. خدودها صدق حمرت وشلت بعمرها بتروح فوق

بومنصور: وين بنت اخوي
روضه: اممم بروح اشوف العروس يمكن تبى شي
مبارك: العروس ولا احلى بنت في الكون تستحي
روضه: تصدق ضحكتني من شو بستحي يعني

وراحت فوق قبل لا يوقفها حد فيهم ... ودخلت على عوشه اللي كانت تجهز اللي بتلبسه الصبح حق المكسار ... كانت عيونها تلمع وخدودها حمر ... تدري ان عمومتها يمزحون بس ما تدري ليش ما قدرت تمسك نفسها او تمنع قلبها انه يدق بهالطريقة .. حتى هيه استغربت من ردة فعلها .. خافت تقعد وتنفضح بس مبارك هذا اللي صدق لسانه طويل ... كانت عوشه اتحرطم في الاخير امها بتلبسها الثوب وهي كانت مسويه مغربية تأشيطه

عوشه: ما ادري ليش امي مصرة على الثوب ... بعدين مايابلي ذهب اول لين الحين (ولاحظت عوشه ان روضه مب على بعضها ) أي شو فيج
روضه: ماشي انتي شو فيج
عوشه: امي بعدها مصرة على الثوب والكندورة
روضه: زين حلو تراث .. تراج في الليل بتسكتين كل عروس عرست من خمس سنين ولين خمس سنين جدام بعد
عوشه: ما يابولي الذهب
روضه: عماتي باجر الصبح بيبنه .. تدرين انهن بييبن لج ذهب زهبتن
عوشه: وليش ما خذولي انا شي يديد يوم يبن يسون مكسار
روضه: يا طماعة ... عمي خسر صدق على هالعرس ... ومع ذلك قال بييب لج .. بس امج ما طاعت صدقها ما بتلبسينه دوم .. ومتى ما بغيتي عندج مالها ومال عمتج
عوشه: ( وهي حايسه بوزها (هم يوا من العرس
روضه: هيه .. وريلج تحت قاعد
عوشه: والله .. بروح اشوفه
روضه: ياللا ثجلي ... عن حركات الخبال هاي
عوشه: صدق صدق روضه حناي حلو
روضه: هيه والله حلو ... والله العظيم حلو كم مرة قلتلج انه حلو

وتمت روضه ويا عوشه يتكلمن عن باجر وعن العرس ... طبعا المكسار روضه وبسوم ما كانن بيروحنه لانه للحريم بس ... ومكياجها بتسويه بروحها ... عشان تطلع في الليل غير ومميزة اكثر من الصبح
**

في الخيمة كانوا عبود ومحمد يتابعون العمال ويعيدون ترتيب الكراسي بعد الستيج اللي سووه في الخمية وقسمها نصين ... وخلاهم اييبون طاولات على يمين الستيج عشان يحطون عليه زهاب عوشه ... وغطوهن بالمفارش وحتى الستيج فرشوه بالزوالي .. والورد اتفق وياهم انهم الصبح الساعة سبع ونص اييون ايركبونه ويعدلون لعوشه كوشه بسيطه ... وبعد مارتب محمد لكل الاشياء .. راح هوه البيت لانه تعبان وتم وياهم عبود يشرف على اخر الاشياء ...

من ركب محمد سيارته رده تفكيره للي صارله اليوم ... وموقف لولوة منه ... ورد يغرق في الكآبة اللي قدر يطلع نفسه منها طول اليوم ... حتى السفر ما يقدر يبعد بعد العرس ... مبارك بيسافر ويا العروس يعني هوه اللي لازم يقعد ويا امه وابوه ... كان يدري انه لو يريد يسافر ابوه ما بيقوله لا .. لكن هو من نفسه ما يقدر يخليهم بروحهم ... ابوه وامه الشخصين الوحيدين اللي بالرغم من كل الجراح والالام ما يقدر يفقد ثقته فيهم وفي حبهم له ... ولا يقدر يخذلهم ... اذا راحت لولوة في غيرها .. لكن ابوه وامه من وين بييب غيرهم ... طول عمره وحيد وكل الم وجرح يعيشه بروحه لين ما يبرى من نفسه ... محمد عمره ما اشتكى او قال .. عمره ما طلب شي حتى وان كان من حقه .. كان دوم يتنازل عن حقوقه للاشخاص اللي يحبهم ... حتى دراسته ما كملها يوم طلب منه ابوه انه يرد ... ويوم قاله امسك المؤسسه مسكها .. مع انه كان في خاطره يكمل دراسته حتى لو في الامارات .. حتى الاحلام بالنسبة له كانت ممنوعة ... بالرغم من طموحه واحلامه كلها في النهاية ولا حلم من هالاحلام حقق ... ولا واحد باستثناء رضى والديه عليه... يوم وصل بافكاره لهنقطه ... وقال لنفسه رضاهم من رضى الرب وعسى ان تكرهوا شيئا وهو خيرا لكم ...
**

الصبح في حفلة المكسار اثبت محمد انه لو قرر يفتح شركة لتعهدات الحفلات بينجح ... الريوق في خيمة المطعم ... والمكسار في خيمة الرياييل ... اما خيمة الحريم فكان حاط عدالها سكيورتي عشان محد يدخلها قبل حفلة العشا ... ومن الاساس كانوا قاعدين يعدلون في الكوشه حق المسا ...

بالرغم من ان خيمة الميلس ما كانت بنفس فخامة خيمة الحريم .. بس مع ذلك بهرت كل اللي دخلها من الترتيب والذوق ... أما عوشه بالرغم من فخامة المكان الا انها ذكرت الحريم بأعراس أول وهي لابسه الثوب والكندورة والشيلة والذهب وبساطة المكياج اللي حاطتنه... أثبتت في هاليوم ان الاصاله والماضي في داخلنا مستحيل يقضي عليها او يذبحها أي تطور .. وان أي وحده تقدر تكون عروس عصرية جميلة .. بس بعد الحلوة ممكن تكون عروس من التراث أجمل ... عجبها ترتيب محمد للخيمة مع انها نفسها اللي مسوين فيها عرس الرياييل الا نه قدر يتصرف في هالوقت البسيط ...
**

كانت حفلة العرس مثل ما كان محمد مرتب ... فعلا كانت ليلة من الف ليلة وليلة .. ديكورات الخمية شي ما ينوصف .. الرسم على يدران الخمية كامل .. الكوشه بالرغم من انها كبيرة الا انها كانت فعلا تحفه فنيه .. استاهلت كل التعب وكل يوم من الشهرين اللي قعدهن محمد يعابل فيها ... الخدمة في الخيمة في كل مكان والمقهويات ... واللي يغنون في العرس ... ام خالد وام منصور ومريم وحمده وفطوم كانن من بعد المغرب في الخيمة .. يشوفن الترتيب والمقهويات والسيرفيس .. اما روضه وبسوم فقالن انهن بين ويا عوشه .. وام خالد خلتهن على هواهن ...
الساعة تسع ونص بعد ما خلصت عوشه كل شي ... كانت بالفعل عروس الاحلام ... عوشه اللي عمرها ما اهتمت بهالاشياء كانت عروس ما تقل روعه عن حمده وفطوم يوم عرسن ... والفستان مع الميك اب في الليل كان متناقض بالقو مع اللي لبسته الصبح ... ما كانت تتمنى تكون احلى من هاليوم .. بسوم كان هذا اول عرس تحط فيه مكياج كامل وبعد اصرار روضه عشان يتغير المود اللي هيه فيه ... كانت كل وحده فيهن احلى من الثانية ... طبعا محمد مرتب غرفه ورا الكوشه عشان التصوير ... لان المصورات كلهن في الخمية ..

بسوم: منو بيودينا العرس
روضه: اتصلي في سعيد او عبود
بسوم: ما ادري تيلفوني وين اتصلي انتي
روضه: اوف منج متى بتصور ... وعمتي عشر مرات متصله
عوشه: وفطوم وحمده بعد متصلات على تيلفوني
روضه: شو نسن متى مودينهن هن الخيمة

هنيه رن تيلفون بسوم وتبعت الصوت لين ما حصلته طايح تحت الشبريه ... كان عبود متصل يبغي يتخبرها عن سارة اخت حميد

عبود: هلا والله بغناتي هلا
بسوم: وين انت
عبود: في الميلس الحين بيي اشوف عوشه
بسوم: تعال ودنا العرس
عبود: ما عندي غير سويج النيسان .. بتروحن بالنيسان بوديكن
بسوم: عند منوه مخلين مفتاح سيارة ابوي
عبود: اظني عند سعيد
بسوم: زين وينه
عبود: في الميلس
بسوم: خله ايي داخل الله يخليك
عبود: وين انا جدام باب البيت الحين بدخل ... خلي روضه او عوشه تتصل فيه
بسوم: (تكلم روضه) اقول اتصلي في سعيد هو اللي عنده مفتاح السيارة خليه يطلع من الميلس (وردت حق عبود بعد ما بدت روضه تتصل في ولد عمها) هاه عبدالله شو فيه
عبود: انتي ناسية موضوعنا
بسوم: أي موضوع
عبود: (وهو معصب) بسوم شو بعد أي موضوع تراكن ذليتني والله اني اروح اكلم حميد اخر شي ولا اريد منكن شي
بسوم: هيه سارة ... والله اليوم بكلمها خلاص لا تحتشر علينا
عبود: وان ما كلمتيها يا بسوم والله صدق بزعل
بسوم: بكلمها والله بكلمها
روضه: ياللا ننزل سعيد الحين بيي
بسوم: ياللا عبود برايك
عبود: انا جدام باب الحجرة ادخل ولا
بسوم: (وهي تطالع روضه اذا متشيله ولابسة عباتها) هيه ادخل

بند عبود التيلفون وفج الباب دخل عليهن ... وتفاجأ بعوشه كانت اول مرة يشوفها عبود وهي جيه ...
عبود: اوف اوف منو هاي اختي انا عوشه ام اللسان الطويل .. والله وعرفوا يطلعونج حلوة
عوشه: ههه والله انك متفيج
عبود: (وهو يطالع بسوم) ياربي كم بعيش كل هالحلاة اختي انا ... اخاف الناس يحسدونج
عوشه: ماشاء الله اللسان اليوم ينقط عسل ولا المصلحة تحكم
عبود: شفتن انكن ما تنعطن ويه
روضه: اقول بلا هذرة زايده وبما انك هنيه ياللا ساعدنا عشان انزل عوشه بفستانها لا تندبغ من على الدري واتعرس في المستشفى
عوشه: بسم الله شو هالفال
عبود: زين ياللا طلعن ... وين سعيد
روضه: قالي بيتريا في السيارة

نزلن بسوم وروضه وهن يساعدن عوشه عشان تنزل وعبود وياهن ماسك عوشه لا تطيح من على الدري ... اما سعيد فكان مجدم لهن السيارة عشان يركبن على طول

عبود: أي وين عباتها شو بتروح جيه
روضه: هيه بنروح جيه .. بندخل السيارة داخل محد بيشوفها .. وبعدين متلحفه بالطرحه
عبود: ونه متلحفه بالطرحه .. شو مغطية الطرحه الله يخليج
روضه: عبود بيودينا سعيد وبننزل داخل الخيمة ... خلنا نروح الحين لا تسويلنا قضية الشرق الاوسط
عبود: روحن مع السلامه عسى الرب حافظنكن
بسوم: تعال بعد في دري برع جدام الباب
عبود: مالي خص
بسوم: اوكي مب قايله شي اليوم
عبود: شو يعني بذليني الحين
بسوم: لا ما اذلك بس تعال
عوشه: عبود ياللا بلا رزاله على اخر يوم لي في البيت
عبود: اوف منكن ياللا

بعد ما طلعن من البيت نزل سعيد وفتح لهن باب السيارة وجدم الكرسي عشان تركب عوشه بفستانها ... وراح صوبهم يشوف جان يبن حد يساعدهن زياده

سعيد: ياللا تأخرتن ... شو تسون هالكثر
عبود: انزل العروس لا تطيح وتتكسر وما تحظر العرس
عوشه: بسم الله علي ... اسميك ما فاولت علي اليوم
عبود: كان صار العرس مصخره

اما سعيد فكان يطالع روضه وهو يبتسم ... كانت مشغوله ويا عوشه ومب منتبهه عليه .. ماسكه ذيل الفستان والطرحه من ورا عشان ما يتوصخن لين ما تركب السيارة ... شو اللي يخليه يصبر اكثر اذا هو يحبها .. امس ما اعترضت وما ردت ... اثبتت له امس انه ورى الغرور والقسوة اللي فيها اذا زعلت قلب بنت .. تستحي وتحمر ... يا حلاة الخجل اللي فيها ... عيون وطول ورقة وحلاة يوم تكون راضية ... وقسوة وحقد وشر الدنيا كله اذا كانت زعلانه ... روضه اكثر وحده واثقة في نفسها شافها في حياته ... حتى الغرور ما ترده عن نفسها ... واذا كانت مغرورة تدري انها مرغوبة .. طلعه من افكاره صوتها وهي تزقر عليه بعد ما لاحظت انه يطالعها

روضه: حوه ولد عمي وين وصلت
سعيد: موجود الا صوبكم
روضه: اقولك امسك ذيل الفستان نسيت تيلفوني فوق .. وركبها السيارة لين ما ارد
سعيد: ان شاء الله بس لا تتأخرين

راحت روضه فوق وتم هوه ويا اخوه وخواته بعد ما قعدوا عوشه في السيارة وبسوم عدالها والكل يتبسم بخبث

عبود: هاه بو عسكور وين وصلت بافكارك
عوشه: لين الكوشه
سعيد: هاهاها أي كوشه انت وياها ...
عوشه: والعروس بعد
سعيد: عوشه اقصري الشر يا اختي يوم عرسج
عبود: ما تصير عوشه اذا قصرت شرها عن حد لاخر يوم
عوشه: انت بالذات اخر من يتكلم ... بدل لا تقول اختي غناتي بتعرس بتروح جنك الا مسوي حفله خاصة بمناسبة الخلاص مني
عبود: اخ كشفتني
عوشه: مالت عليك
عبود: مقبوله منج

نزلت روضه وراحن الخيمة ودخلهن سعيد من الباب اللي ورا ودخلت عوشه الحجرة اللي كانوا مرتبينها للتصوير وفي كل كورنر منها حاطين منظر عشان يكون وراها يوم اتصور ... وقعدت ساعة اتصور واتصورت ويا خواتها وبنات عمها وحتى بنات عمتها مريم اللي ين ورا الخيمة يسلمن عليها ... بعد ما ردن الحريم من العشا دخلوها ... على اغنية الزفة اللي مسونها محمد لها واللي كانوا يايبين المغنية تغنيها لهم وتغني في العرس

كانت زفتها من اروع ما يكون الغنية واللحن الروعه والليزر اللي كان طالبنه محمد على الكوشه والاضاءة على العروس ... كانت فعلا من اروع الزفات اللي عمرها ما كانت ولا صارت لعروس قبلها ... عجبتها الكوشه وعجبها ترتيب العرس كله ... تمشي وعيون الكل عليها ... عرسها كان الاروع بالرغم من حلاة عرس فطوم وحمده .. بس عوشه ومبارك كان عرسهم غير ... من الفرحه اللي كانت في قلب بو منصور كان وده يسويلها اكثر من جيه ... وحتى بو خالد ما قصر فيه العرس ... طول عمره يعد مبارك ولده وحتى لو ماخذ بنته كان بيسويله عرس يرفعون به الراس ...

فطوم وحمده وروضه وبسوم كانن واقفات على طرف يشوفن العروس ... وكل وحده سرحانه بافكارها .. حمده تتذكر يوم عرسها وخالد والجملة اللي ما تقدر تنساها بإنها احلى مما كان يتوقع او يتصور ... روضه غصب عنها تفكيرها يردها لسعيد والنظرات اللي شافتها في عيونه وهم يايين العرس ... حست انها ودها تشوفه مرة ثانيه ... فطوم غصب عنها عيونها دمعت وهي تذكر منصور ... كان ممكن هالعرس يكون عرسها هي وهوه قبل اكثر من سنتين ... ويت صورته في بالها .. ابتسامته وعيونه ... حنانه في صوته ... منصور احلى ايام عمرها.. واحلى حب عاشته في حياتها ... وحمدت ربها على ريلها .. حميد بالرغم من كل مشاعرها صوب منصور الا انها ما قدرت تنكر انها حبته ... انسان بمثل احترامه وحنانه وتفهمه ينحب ... تذكرت شهر العسل وليلة العرس .. وحلمها بمنصور في ليلة عرسها ... لين الحين تحلم بمنصور ... وانهم يسولفون مع بعض او يضحكون كلهم ... حست بغصة في قلبها ودموعها نزلت هالمرة غصب عنها ولاحظتها بسوم

بسوم: بلاج فطوم
فطوم: ماشي مستانسه عشان عمي وعمتي
بسوم: الله يهني عوشه ومبارك يا رب
فطوم: امين

بعد ما قعدت عوشه بعشرين دقيقه ... مبارك كان محتشر عند باب الخيمة على عيال عمه وابوه وعمه عشان يدخلونه الخيمة ... بيشل عروسه وابوه وعمه يضحكون عليه

سعيد: يا ريال استهد بالله بلاك مستقطع جيه .. بتدخل بعد شوي
عبود: ما اصدق ان هذا مبارك اللي كان قبل سنتين ... يشوف الموت ولا ياخذ عوشه
مبارك: انتوا متفيجين ... اصلا انا الفضول بيذبحني ابغي اشوف كيف شكل عوشه وهيه عروس ... شو هالشي اللي داسينه عني شهر
محمد: ماعليه خلوه يدخل عشان يلحقون على الطيارة ... لا يتأخرون وما يسافرون
مبارك: سمعت عمي شو يقول محمد بنتأخر على الطيارة
بوخالد: يا ولدي صبر بيتغطن الحريم ... بلاك مستعيل جيه
مبارك: اوهوووو زين انا شو ابابهن الحريم بشوف حرمتي
عبود: هيه خلونا ندخل فجأة ... عشان ندور عرايس
بومنصور: تبغي تشوف الحريم مسود الويه
عبود: فديت ويهي محلاه ... (وهو يغمز) انا اقصد ادورون انتوا حريم بعدكم شباب
بوخالد: خل امك تسمعك شو تقول
عبود: لا الله يخليك مافينا على غضب السلطات العليا
مبارك: الحين شو ... بندخل ولا بنبات جدام باب الخيمة
بوخالد: دخل ولدك يا سلطان .. فكنا من حشرته
بومنصور: صبر يوم بتتصل وحده من البنات (وهنيه رن تيلفون سعيد ... روضه متصله عشان يدخلون مبارك)
سعيد: ادخل يا بوي ... فكنا من الصدعة
مبارك: انتوا ما بتدخلون
سعيد: لا مب الحين بعدين بندخل
محمد: لا دخلوا الحين ... مرة وحده ما عندنا خوات يسلمن على اخوهن
سعيد: يا ريال
محمد: دخلوا يا ريال ... خمس دقايق يصور وياها على الكوشه وينزلون الحجرة اللي ورا يصورون ويطلعون المطار
عبود: شو المطار بالفستان
محمد: تمر البيت تغير وبعدين يتكلون

في الاخير وبعد اصرار من محمد دخلوا سعيد وعبود وخالد وبوخالد وبومنصور يزفون مبارك ... وردت المغنيه تغني الغنية اللي مسوينها للزفه ... كان شكلهم كلهم على الكوشه يجنن ... مبارك يطالع عوشه وهو مبتسم في خاطره يضحك ... من كان يتوقع انه في الاخير يرد على بنت عمه ومنوه عوشه ام لسان ... بالرغم من هذا كان مستانس ... وصل عدالها ورفع الطرحه عن ويها وهو مبتسم وباسها على يبهتها ... وابوها وعمها لووا عليها وخوانها وايهوها ... ووقفوا كلهم يتصورون وياها ... وين البنات فوق كلهن سلمن على الشواب وصوروا وياهم وويا عوشه ومبارك

مبارك: (يكلم سعيد وعبود) ياللا بس هوونا .. جنه القعده عيبتكم
عبود: عن نفسي عجبتني موت ... ممكن اقعد لين ما يخلص العرس
مبارك: اتشوف امك وين قاعده روح اقعد عدالها ياللا فارج انا المعرس هب انت
سعيد: هاهاها قلنا معرس بس عاد هب جيه
مبارك: اقول نزل خواتك وبنات عمك بالمرة بتصور ويا حرمتي بروحنا
عوشه: انتوا شو تقولون
مبارك: يا عوذ بالله حتى ليلة العرس ما تيوز عن هالطبع اللي فيها ... ملقوفه
عوشه: ماعليه ماعليه (وردت صوب خواتها وبنات عمها)
سعيد: هاهاهاها ياللا عبود خلنا ننزل عنهم ... شوابنا تجدموا
عبود: انا ما طالعت شي .. كلهن البنات متغشيات
سعيد: حبس لهن عند باب الخيمة خلنا نطلع

كان خالد يمشي ويا حمده بتنزله من على الكوشه بتوصله لين باب الخيمة وهو يضحك ويسولف وياها

خالد: حمده وين خليتي حمودي
حمده: فديته اليوم كله عند روز ... والله ولهت عليه
خالد: يهون عليج تخلينه عند روز
حمده: شو اسوي كنت تبغيني ايبه هنيه
خالد: هيه عشان يصور ويا عمته
حمده: ماعليه يا خالد خله راقد ما فيني اتعبه
خالد: زين ياللا متى بنرد البيت
حمده: خلنا نزف العروس اول
خالد: ملاحظة اني هاليومين ما شفتج ولا قعدت وياج مثل الناس
حمده: خلاص خالد من باجر بتفرغ لك ... تدري انت هذا عرس عوشه ومبارك
خالد: الله يعيني يوم بيعرس سعيد وروضه وعبود وبسوم
حمده: خالد بسك دلع
خالد: مالي خص اذا تأخروا تطلعين .. والله ولهت عليج
حمده: (بعد ما احمرت من المستحى) ماعليه بتصل فيك انا يوم بيطلعون
خالد: بترياج برع ... واذا هنت عليج خليني اتريا وايد
حمده: اكيد ما بتهون علي

وصل خالد لين برع هوه وحرمته وردت حمده عنه داخل ... اما عبود وسعيد فنزلوا من على الكوشه ويا بسوم وروضه ... عبود اخر بسوم شوي عشان يكلمها ... وسعيد وروضه اتجدموا اشوي

روضه: ملاحظ اني في كل عرس انا اللي اطلعك لين باب الخيمة
سعيد: شو اسوي ... استحي اطلع بروحي
روضه: اخاف يوم عرسك تخلي عروسك ورا وانا اللي اطلعك برع الخيمة
سعيد: (يبتسم) اكيد انتي اللي بطلعيني ... مب كيفج غصب عنج
روضه: لا والله بأي صفه ان شاء الله .. اكيد الناس الحين ماكله ويهي هالكثر امشي وياك
سعيد: ماعليج منهم يوم انا وياج وعمومتج راضين
روضه: ياللا اطلع ... ولا تنسى الديوان الليلة
سعيد: هاهاها انتي ما نسيتي لليوم
روضه: لا اتريا فيه .. قلت يمكن قاعد تكتب فيني معلقات هب قصايد
سعيد: فالج طيب يا بنت العم تبغين معلقه بنكتب فيج
روضه: روح الله يخليك خلني ارد داخل بيقصون الكيكة
سعيد: اوكي ... بس انا بردكن البيت اوكي .. لا تركبين مع دريول او حتى عبود
روضه: شو امر
سعيد: ليش مالي امر عليج
روضه: بقبل هالامر اليوم بمزاجي زين
سعيد: (يبتسم) ادري انه بمزاجج ... روحي داخل لا يفوتج كيك العرس

طلع سعيد وردت روضه داخل ... بس بسوم وقفت ويا عبود اللي كان معصب عليها لانها للحين ما كلمت سارة وهي وعدته انه تكلمها يوم العرس

عبود: بسوم ما تشوفين انج مصختيها ... لا يكون لعبه انا جدامج
بسوم: والله اكلمها اليوم ... بس انت اثقل شوي
عبود: اوكي يا بسوم بشوف تاليتها وياج

وطلع عبود من الخيمة وتمت بسوم واقفه وهي تأفف منه ... وردت داخل الخيمة بس راحت ادور وين اهل حميد قاعدين عشان اتكلم سارة ... ما تدري شياه اخوها تخبل هب مرة اللي طرتها جدامه روضه وهو علق عليها جنه ماشي بنات غيرها .. وصلت وسلمت على اهل حميد لانها ماكانت مسلمة عليهم

ام عبدالله : ماشاء الله يا بنتي شو هالعرس شو هالترتيب
لطيفه: صدق منوه مرتب لكم العرس .. صراحه فن
بسوم: ولد عمي محمد هو اللي مسؤول عن كل شي ومرتب كل شي
ظبيه: ماشاء الله عليه .. ذويق وفنان على بالي ترتيب حريم
بسوم: لا ماعليج محمد فنان يوم يبغي
سارة: وين كنتي عوشه قصت الكيكه .. صراحه حتى الكيكة تجنن ...
بسوم: كنت اوصل اخوي عبدالله لين باب الخمية
ام عبدالله: هذا اخوج عبدالله اللي كان يمشي وياج .. ماشاء الله عليه ريال
بسوم: هيه عمتي هذا اخوي
ظبيه: هوه اللي يدرس في كلية الشرطه
بسوم: هيه
ظبيه: الله يخليه لكم
بسوم: امين ان شاء الله

وردن الحريم يطالعن الكوشه والمصورات يصورن عوشه ومبارك ... كانت عوشه مستحية ومبارك يضحك عليها في خاطره ومبتسم

مبارك: هاه عوشه اشوف الحيا طلع اليوم ... لا يكون هذا اللي ميودتنه من سنين
عوشه: (وهي صدق مستحيه بس تحاول ما تبين) ما برد عليك زين ... ما بخليك تخرب علي عرسي
مبارك: هاهاها تصدقين جنه عرسي انا بعد
عوشه: عيل احسن شي تسكت لا يخترب العرس
مبارك: في عروس تقول حق ريلها اسكت
عوشه: من زين الكلام اللي تقوله
مبارك: معرس بكيفي ... كم كثر دافع في هالليله
عوشه: هيه انت اللي دافع مب جنه عمي
مبارك: عوشه شكلج يجنن وانتي معصبه
عوشه: (ابتسمت) مبارك شرايك نسكت لين ما يزفونا بلا فضايح جدام خلق الله
مبارك: بفكر في الموضوع

وتم مبارك يناقر في عوشه اللي ما كانت تقدر ترد عليه ... اما بسوم بعد ما شافت ان اهل سارة انشغلوا عنها ... قالت فرصة اكلمها في موضوع عبود اللي طفرني

بسوم: هاه سارة ماشي معرس في الطريج
سارة: من وين يا حسرة
بسوم: ليش ان شاء الله حلوة وفنانه ... اكيد فيه بس داسه لا نحسدج
سارة: لا والله وغلاتج لو شي ما بدس عنج انتي
بسوم: ولا محيرة لحد
سارة: لا بس لطوف ولد عمي يباها
بسوم: اقول سارة لو اييج واحد من العين بتوافقين
سارة: والله على حسب مب أي حد
بسوم: شفتي اخوي عبدالله شرايج فيه
ساره: لا والله وليش تسئلين
بسوم: شرايج ايوزج اياه
سارة: ماعليه يوم بيكون الموضوع في يدج تعالي شاوريني
بسوم: انا اسألج الحين ... وصدقيني في يدي بس انتي ردي
سارة: بسمه هالسوالف مافيها مزاح ولعب
بسوم: والله ما امزح وياج ... انا اسألج صدق
سارة: (اللي خدودها بدت تحمر) لا والله
بسوم: ياللا عاد سارة بلا حركات شفتي اخوي وعمره 21 سنه وبيتخرج هالسنة .. اذا تبينه بعد التخرج بنرمس اهلج
سارة: بسمه انتي تتكلمين صدق
بسوم: هيه (سكتت سارة وهي تبتسم وما ردت على بسوم) هاه سارة شو قلتي ترى هو اللي يبغيج مب من نفسي ييتج
سارة: وهو شدراه فيني
بسوم: سمعنا نطريج
سارة: اذا ابوي ما قال لا .. اكيد اني ما بقول لا
بسوم: (وهي تبتسم) هاه لا تنقعين في اخوي خيانه وتعرسين عنه قبل لا يتخرج .. تراني بكرهج
سارة: الا الله يخليج لا تكرهيني

وردن البنات يطالعن الكوشه لان مبارك وعوشه نشوا بينزلون من على الكوشه عشان يدخلون يصورون .. ولان محمد اتصل في مبارك لا يتأخرون على المطار ... كان مبارك مستأجر لهم ليموزين عشان يوديهم المطار ... ومخلنه يوقف في داخل الخيمة من ورا جدام باب غرفة التصوير .. بعد ما خلصوا تصوير ركبت عوشه ويا ريلها اليموزين .. .وراحت اول بيتهم عشان تبدل ثيابها ... كان محمد محتشر عليهم لا يتأخرون فبدلت بسرعه وطلعت تسلم على اهلها اللي كانوا كلهم قاعدين في الصالة يتريونها تبدل وياهم مبارك اللي الشباب طايحين فيه وهو يضحك شرات الاهبل

محمد: روضه حطيتوا شنطتها في السيارة
روضه: محمد هاي عاشر مرة تسألني هالسؤال والله حطيناها
محمد: وينها روحي استعيليها الله يرضى عليج
روضه: ان شاء الله (بس روضه ما لحقت تنش من مكانها لان عوشه كانت نازلة من فوق وهي لابسة تأشيطة مغربية وعباتها وشيلتها ... بس مكياجها خلته .. اما التسريحه فبطلتها وخلت شعرها مفتوح وحطت في شنطتها شبابيص عشان تشبص شعرها بعدين

محمد: ياللا يا اختي الله يرضى عليج تأخرتي
أم خالد: (وهي تلوي على عوشه وتحاول تقبض دموعها) ما وصيج يا العاش الحين انتي حرمة ... بيضي ويهنا جدام ريلج
عوشه: ان شاء الله
ام منصور: وش له الدموع الحين يا ام خالد عوشه بنتنا ومتى ما بغيتيها تيلفون وبتكون عندج
ام خالد: ادري يا ام منصور انها عند امها وابوها ... بس ياوخيتي ما اقدر
عبود: (يعايب على امه ونه يصيح) ياللا يا عوشه فكينا من ويهج وروحي ويا ريلج
بوخالد: يا الهرم جيه تقول حق اختك وهي عروس
عبود: اللي يسمعكم الحين بتروح كولالمبور وبتهاجر .. الا شهر وبترد .. هذا ان تذكرتكم في هالشهر
عوشه: هيه قالولك عبود عشان انسى هلي اليوم
خالد: هالله هالله في ريلج يا عوشه ..
مبارك: ماعليك ما بتفشلون فيني .. انا ادري ببنتكم قبل لا اخذها
عوشه: عمي شوفه
بومنصور: مبارك والله اني ما اخليها تسافر وياك بروحها اذا من الحين جيه بتسويبها
مبارك: (يعايب على عوشه) عمي شوف مبارك ... (وهو يقرب منها) براويج بعدين بتشوفين يا عوشه
عوشه: عمي يهددني
مبارك: جذابه قاعد اغازلها (كلهم ضحكوا)
عوشه: جذاب والله جذاب
محمد: اوهووو انتوا سلامكم ساعه ياللا روحوا لا تطير طيارتكم
مبارك: سمعتي ياللا خلينا نروح
عوشه: مشكور يا محمد ما قصرت لو مب انت ما ادري كيف بيكون عرسي
محمد: افااا عليج يا اختي اذا ما تعبت في عرسج في عرس منو اتعب
مبارك: عرس اخوك
حمده: عرسنا قبل ما تعبت في اعراسنا كثر عرسها

لوت عوشه على حمده وبسوم وفطوم وام منصور وابوها وعمها وخوانها... بس يوم وصل الدور عند روضه غصبن عنها دمعت عيونها لان عيون روضه كانت غرقانه دموع

روضه: ياللا يا عوشه ... الله يهنيج صراحه بفتقدج ما ادري كيف بعيش في البيت من دونج
عوشه: وانا اكثر وبعدين عندج بسوم وابوي حقج كله
روضه: فديت روحه يا ربي
عوشه: أي لا تصيحيني بيخترب مكياجي
روضه: ياللا روحي لا يحتشر علينا محمد
مبارك: ياللا ما خلصتن الفلم الهندي .. عبود هات قوطي كلينكس
روضه: حتى وانت معرس دمك ثقيل
مبارك: ياللا لا تطير طيارتنا
محمد: نشف ريجي وانا اقولكم ياللا

طلعوا مبارك وعوشه في الليموزين اللي يايتنهم من المطار ... وبعد ما طلعوا صارت مناحه ام خالد من صوب وام منصور من صوب وفطوم وروضه ... وحمده وبسوم والشباب يسكتون في منوه ولا في منوه

محمد: بس اريد افهم انتن ليش تصيحن ... لازم كل شي ادخلن فيه الصياح ولا ما تصيرن حريم
سعيد: هاهاهاها ما يحبن يستانسن وبس لازم شوية دموع
عبود: تعالوا انافسهن منو يصيح اكثر
محمد: اقول امايا اذا بتمين اتصيحين خليني اوديج بيتنا احسن
ام منصور: اصيح حرقة فوادي على ولدي منصور .. اللي ما لحقت اشوفه معرس ولا اتهنى بشبابه

من طرت ام منصور منصور فطوم زادت الريس وراحت فوق .. بو منصور غصب عنه دمعت عيونه مع انه حاول يتماسك ... سعيد راح عدال روضه يسكتها

سعيد: رواضي ليش تصيحين الحين
روضه: راحت عني منو بيتم عندي
سعيد: افااا يعني كلنا ما نسد الحين
روضه: لا بس عوشه غير
سعيد: ( يبتسم) ذكرتيني بليلة عرس حمده والمناحة اللي صارت
روضه: (ابتسمت غصبن عنها) اقولك
سعيد: خير
روضه: انا يوعانه
سعيد: بس
روضه: هيه
سعيد: من وين تبين اييب لج العشا
روضه: (وهي تمش دموعها) اريد مناقيش من النور
سعيد: زين انتي روحي بدلي ثيابج ومشي دموعج وانا بييب لج اللي تبينه
روضه: (وهي مبتسمه) ان شاء الله

راحن روضه وبسوم فوق عشان ايغيرن ثيابهن ويمشن المكياج ويشوفن فطوم اللي من راحت فوق وهي تصيح ما نزلت .. اما بو منصور وام منصور راحوا البيت ويا محمد ... وعبود طلع ويا اخوه اييبون مناقيش حق البنات.. خالد وحمده ما قعدوا يتريون عبود وسعيد وراحوا بيتهم عشان ولدهم اللي مخلينه من الصبح .. اما حميد ريل فطوم فوصل اهله دبي بعد العرس ورد العين عشان فطوم كانت بيت اهلها وهو ما قدر يبات بعيد عنها وعن ولده .. دخل من الباب الوراني بعد ما اتصل في فطوم وقالها انه وصل بيتهم ... وهم كانوا في غرفة الطعام يتعشون ويسولفون

حميد: السلام عليكم
سعيد: وعليك السلام والرحمه هلا والله بو سعيد
عبود: تعال حماتك تحبك على قولة المصاروة ... تعال تعشا ويانا
حميد: الله يهديكم منو يتعشا الحين هذا سحور هب عشا
روضه: والله نحن يواعا ما تعشينا في العرس
حميد: هاه ام سعيد شو العرس
فطوم: يجنن يا حميد ...
حميد: (بعد ما لاحظ عيون حمده المتنفخات من الصياح وخشمها المحمر) بلاج فاطمه ليش صايحه
عبود: هاهاها فاتك مناحه جماعية صارت هنيه .. مب بس حرمتك
روضه: هيه لازم ما بيلاحظ الا حرمته يا حسرة علينا اللي محد يلاحظنا
سعيد: روضه الحين انتي محد لاحظج وانا ما انفع
روضه: لا انت غير حالة استثنائية
عبود: وانا
روضه: انت روح لاه متفيج
حميد: زين ام سعيد انا بروح عنج فوق ... بسبح لين ما اتيين
فطوم: لا بروح وياك
عبود: يا ويل حالي على الحب والشوق ... ياربي متى تعطيني وحده توله علي
روضه: قريب ان شاء الله ونفتك من صدعتك
عبود: (يكلم بسوم) سويتي اللي قلت لج عليه
بسوم: هيه
عبود: وليش ساكته للحين
روضه: شو
عبود: اسرار
حميد: ياللا ام سعيد جان بتنشين

وقامت فطوم ويا ريلها وتموا الاربعه الباقين
عبود: شو صار
روضه: شو السالفه
بسوم: سالفة سارة اخت حميد يعني شو من سوالف عنده هذا
سعيد: بلاها اخت حميد
بسوم: حشرنا يبانا نرمسها عشان انخطبها له
سعيد: ليش وبنات عمتي مريم
عبود: لا خلاص انا كلمت امي وقالت لي على هواك واللي تباه
سعيد: اووه تطور تطور
عبود: هيه عيل شو انا اللي ابتلي بهن ليش
روضه: زين يوم فججت عمرك منهن
سعيد: زين شو صار
بسوم: ماشي البنت ما عندها مانع اذا ابوها وافق
عبود: ضابط من قدي ليش ما يوافقون علي
روضه: خلص انت اول
عبود: خلاص وحياتج هالسنة وبكون ضابط
روضه: مبروك مقدما
قعدوا يسولفون شوي أما عن عبود فما كانت الدنيا شالتنه من الفرح والوناسه وما طاع يخليهم يروحون يرقدون ... بالنسبة له احلى حلم في حياته تحقق ... بيزوج اللي يباها محد بيفرض عليه حد .. اخير نفذ قرار اتخذه بروحه دون ما يشاركه حد في اتخاذه
**
بعد ما راح حميد ويا فطوم فوق .. وبعد ما خلص سابح ... كانت فطوم اترياه وهي قاعده على الكنبه تشوف صورة عرسهم اللي محطوطه على الطاولة اللي جدامها .. طلع حميد وقعد عدالها

حميد: بلاج ام سعيد ... شي فيج
فطوم: (وهي تطالع حميد) تدري يا حميد اليوم كنت افكر في منصور ولد عمي
حميد: (حس بقشعريرة في جسمه ولد عمها اللي ما قدر يخليها تحبه مثل ما حبيته) زين
فطوم: (وهي مب منتبهه على اللي صار في ريلها) كان محور حياتي حبي لمنصور وحلمي في الزواج منه .. بس ما حصل نصيب وصار شي غير اللي بغيته او توقعته حتى قراري اني ما اتزوج بعده ما نفذته
حميد: زين
فطوم: كنت احس اني اتزوجك غصب .. ما كنت اريدك
حميد: شو اللي اجبرج
فطوم: امي واهلي اللي كانوا يخافون علي
حميد: وبعدين
فطوم: (وهي تبتسم) اكتشفت ان الله صح خذ مني منصور بس عوضني بك انت .. انت انسان يصعب وجود مثلك يا حميد .. تحملت وايد عشاني
حميد: يكفيني يا فاطمه هالشعور منج
فطوم: لا يا حميد .. انا اعترف اني حبيت منصور بطريقه غير ما اقدر احب حد فيها ... بس بعد اكتشفت اليوم اني احبك انت .. شوقي لك خوفي عليك والفخر اللي احسه لانك ريلي انا وابو ولدي انا ... كل ما فيك يا حميد يخليني احبك ... منصور كان ولد عمي .. بس انت الحين حبيبي وريلي وابو عيالي

ابتسم حميد من الخاطر وهو يسمع كلام فطوم ... اخيرا سمعها تقول انها تحبه ... كان حبه لها يزيد يوم عن يوم ... حتى وهي تلخبط وتقوله منصور كان يحس بطعنه في قلبه بس يسكت ويبلع الموقف .. يدري انها تحب ولد عمها قبل لا ياخذها ... ووافق على الوضع وما كان يقدر يعترض .. بس هالليلة اعترفت له انها تحبه ... تحبه كزوج وحبيب
**
انتهى العرس وراحت عوشه ويا ريلها ... وردت دوامات الجامعه وداومت روضه اما بسوم فرفضت انها تداوم .. ما كانت تطلع من حجرتها كان قرارها بترك الطب والدراسه اصعب قرار اتخذته في حياتها ... بس بعد تفكير عميق وبعد ما قارنت بأهمية خوانها لها وسمعتهم قررت انها تقعد في البيت بعد الطب مالها طموح في أي كليه .. اتخاذ هالقرار صاحبه حالة اكتئاب حادة .. ما كانت تطلع من حجرتها .. وحالها نحل وويها شحب ... امها وابوها حاولوا وياها ترد تدرس بس ما طاعت .. حتى روضه عيزت وياها ... بسوم كان راسها يابس تعرضها للموقف البايخ مع ربيع اخوها خلاها تقرر تقعد في البيت

ام خالد: يا مبارك الا جنها عين صابت هالبنيه ... لا تطلع من الحجرة ولا تداوم
بوخالد: استهدي بالله يا ام خالد ... واذا ما تريد تدرس برايها
ام خالد: من يقول بسمة اللي تبغي تكون دكتورة ما تبغي تدرس
بوخالد: خليها على راحتها ولا تغصبين عليها
ام خالد: البنيه تذوي .. انا لازم اوديها عند حد يقرى عليها
بوخالد: لا تخلين الناس ترمس على البنت وصبري شوي
ام خالد: لا ما بصبر العين حق يا بو خالد ... وبنتي غاويه
بوخالد: ان شاء الله خير يا ام خالد .. ان شاء الله خير

حاول سعيد وحتى عبود ويا بسوم بس ما طاعت تقول لحد شو فيها ولا طاعت ترد تدرس ... وقامت الناس تهذي بالعين اللي صابت بنت ام خالد ...
**

في السيارة علي كان ويا سلطان رايحين صوب العزب ... سلطان سمع اهله يرمسون عن بنت بو خالد الدكتورة وان عين صابتها وما طاعت تروح الجامعه ولا تطلع من حجرتها

سلطان: تدري مبارك شو سمعت اليوم
علي: شو .. صاير حرمة تنقل الخبيرات
سلطان: اسمع وانت ساكت
علي: شو
سلطان: الدكتورة اخت سعيد
علي: مب قلنا ما نطريها خلاص
سلطان: لا سالفه غير
علي: شو فيها
سلطان: مب طايعه تدرس خلاص بتقعد في البيت ... يقولون عين صابتها
علي: منوسمعت
سلطان: اختي ام ناصر
علي: منو ام ناصر
سلطان: يا الثور حرمة اخوك
علي: هيه هيه .. وانت مرة صدقت
سلطان: ياخوفي انكون السبب ... من بعد سالفة الميلس
علي: انت لين الحين تذكر
سلطان: تبغي الصدق .. انا البنيه ما تهون عي تذبل على قولتهم .. انا بروح اقول لابوي ايخطبلي اياها
علي: في ذمتي ذمة انك تخبلت ... انت صاحي
سلطان : ليش لا
علي: سلطان لا تروح بعيد وتحلم بزياده .. تدري ان بنت عمك محيرة لك
سلطان: مب مشكله بنفك الخطوبه
علي: سلطان ... ابوك لو شو ماصار ما بيروح يخطب لك وحده من برا العايلة ... هذا واحد وثاني شي البنيه عندها ولد عم كيف بيخليها لك
سلطان: ما سمعنا انها محيرة له
علي: لو ما سمعت بس بعد ولد عمها قبلك انت وقبل أي حد ثاني ... وبعدين انت ابوك ما بيطيع يخطبها لك
سلطان: والله قوم بوخالد ناس والنعم فيهم
علي: ما قلنا شي ... بس عاد ابوك وابوي واهلنا كلهم تفكيرهم بهالطريقة ما بيوزونك اياها لو شو ماكان ... خاصه انهم محيرين لك بنت عمك والعرب كلها تعرف
سلطان: اه يا علي دوم اللي نحن نباه ما نحصله
علي: انت حط الرحمن في صدرك واستهد بالله وانسى السالفة ... مالك خص في البنيه ويوم حد بيطريها غير السالفة او اطلع برع الميلس

سكت سلطان عن علي وكمل سواقة السيارة وهو ساكت ... كان عنده امل في ان ابوه يخطب له بنت بو خالد بس علي قتل هالامل اللي داخله ... شو ما صار هو من قبيله متشدده من ناحية الزواج من برع العايلة لو منو ما كانت ما يوزه ابوه اياها وبداها على بنت عمه .. هذا واقع بالرغم من التطور كله مازلنا نعيشه
**

بعد العرس بثلاث اسابيع وبسوم على حالها رافضه مجرد النقاش في انها ترد الجامعه او الكلية .. وامها الصبح تصيحها والمسا تصيحها ... وماشاء الله ام منصور مشاركتنها المناحه .. وكل اللي في بالهن انها عين صابتها بعد عرس عوشه ... خلت حالها ينحل وما تريد تدرس ... بعد ما كانت ام منصور تكلم ام خالد تتخبرها عن حال بسوم بندت التيلفون وهي تصيح ... وشافها محمد اللي كان نازل من فوق بيروح المكتب

محمد: اما يا بلاج ... شو السالفة ليش تصيحين
ام منصور: يا ولدي حال هالبنت ما يسر لا عدو ولا صديج
محمد: أي بنت
ام منصور: بنت عمك بسمه .. من خلص العرس وهي مب راضية لا تداوم في جامعه ولا تطلع من حجرتها
محمد : ليش شياها بعد
ام منصور: عين يا ولدي ... وبعد مب طايعه تروح لحد يقرى عليها.. عنيده وراسها يابس
محمد: الله يعينها يا امي ... ويعين عمي ما صدقوا يفرحون بعوشه تمرض بسوم

طلع محمد من البيت وهو يحاتي بنت عمه ... معقوله بسوم الدكتورة مب طايعه تروح الكلية .. قرر بعد ما يخلص دوام المكتب ... يمر بيت عمه يشوف سالفة بسوم
**

اما في بيت بوخالد في حجرة بسوم في محاولة للمرة الاخيرة من روضه عشان بسوم ترد تكمل جامعه

روضه: زين مب طب الله يخليج حولي الكورس الياي حولي أي كلية ثانيه روحي اداب .. تربيه ... هندسة علوم المهم درسي
بسوم: روضه ما اريد ادرس شي خلاص
روضه: بسوم اللي صار صار لا تخلين موقف بايخ يأثر على دراستج ومستقبلج
بسوم: يا روضه والله انا ما اريد ادرس خلاص .. انا ما اريد هالشي ينعاد لي مرة ثانيه ... ما اتحمل هالموقف
روضه: اوكي .. خلاص ما تبين تدرسين لا تدرسين ... بس ليش الحبسة في الحجرة عمتي كل يوم تصيح بسبتج
بسوم: روضه انا مب حابسة نفسي في الحجرة .. بس امي كل ما نزلت فتحت لي موضوع المطوع والعين ... وما اعرف شو ... خليها تنسى سالفة الجامعه وتسكت اول وبعدين خلاص كل شي عادي
روضه: بسوم ماشي ولا وحده فينا ما كملت جامعه .. وانتي اشطر وحده تقعدين في البيت
بسوم: بعد ربج شو نسوي
روضه: الله يهديج بس
بسوم: الله يهدي الجميع

نزلت بسوم ويا روضه راحن بيت حمده يلاعبن حمود ويسولفن ويا حمده لان خالد محد .. وطبعا فتحت حمده موضوع الجامعه ويا بسوم بس ماشي فايده كانت خلاص مصممه على رايها ما بتدرس طب او غيره تريد تقعد في البيت قعده نهائية
**

قبل صلاة العشا وصل محمد ويا عمه البيت ... وبعد ما دخل سلم على ام خالد وتخبر عن عوشه ومبارك اذا كلموهم اليوم او لا ... وسئل عن سعيد وخالد ... وعن بسوم وشو ياها

ام خالد: يا ولدي ما ادريبها من بعد عرس عوشه وهي تقول ما تريد تدرس بتقعد في البيت .. حتى ويها ذوى .. والله لو كنت ادري انه هذا اللي بيصير لها ما خليتها تحظر العرس
محمد: يا عمتي استهدي بالله .. يمكن هي بعدها متأثرة بعرس عوشه وبابتعادها .. الحين محد تم وياها في البيت غير روضه
بوخالد: عاد تودر دراستها يا محمد ... انت ما تحيدها بسوم شاطرة ماشاء الله عليها واكثر وحده من اخوانها تحب الدراسه
محمد: هيه وينها بطمن عليها
بوخالد: ما ادريبها ... جنها الا فوق في حجرتها او بيت اخوها .... جينا جينا
جينا: (وهي يايه من صوب المطبخ) يس بابا
بوخالد: وين البنات
جينا: Khaled house
بوخالد: روحي خليهن اين هنيه ... بيسلمن على ولد عمهن
جيناOk :

طلعت جينا راحت بيت خالد وقالت لبسوم وروضه ان بوخالد يباهن وانه محمد ولد عمهن هناك في البيت ... بعد ما طلعت جينا ... وردت حمده من فوق عطنها ولدها وراحن البيت ... بس ما حصلن الا محمد يقرا الملحق الرياضي مال الجريده وهو يشرب العصير اللي يابته له البشكاره

روضه: السلام عليكم هلا محمد شحالك
محمد: وعليج السلام ... يسرج الحال .. شحالج انتي واخبار الجامعه
روضه: ياللا بعد العرس تفرغنا للجامعه صدق .. وندرس نبغي ننجح مافينا بعد باقي الكورس الياي وخلاص
محمد: الله يوفقج ان شاء الله .... (ولف صوب بسوم) هاه بسوم سلامات شو فيج ... اكيد شي جايد ولا ما خليتي الجامعه
بسوم: لا محمد ... بس خلاص ما اريد ادرس
محمد: افااا وين اللي تقول انا الدكتورة وانا الدكتوره
بسوم: (تبتسم) جيه احسن بلا دكتورة بلا فضايح
محمد: واللي يصير دكتور يفضح نفسه
بسوم: بعد فيه فرق بين دكتور ودكتورة .. خاصه في بلادنا
محمد: شو هالكلام يا بسوم .. وانا اقول بسوم بنت عمي العاقله الحين تقولين هالرمسه
روضه: والله عيزت من كثر ما اكلمها يا محمد ... بس ماشي فايده فيها حشا كلهم في هالبيت عنيدين وروسهم يابسه حتى بسوم
بسوم: وانتي اول وحده
روضه: تعلمت منكم ... الا وين عمي وعمتي
محمد: عمي تيدد وراح صوب المسيد ...
روضه: بعده ما اذن
محمد: عاد ما تدريبه عمي يسابق الامام
بسوم: وامي
محمد: بعد دخلت اتمسح
روضه: ما تريد اييب لك شي محمد
محمد: لا يابت لي جينا عصير
روضه: لا شو بس عصير انا مسويه كيكه اليوم بروح اييب لك منها

راحت روضه المطبخ وقعد محمد ويا بسوم بس ... صح شكلها تعبانه بس مب بالطريقة المبالغه اللي تكلمت بها امه ... بسوم بالرغم من تعبها والهالات السود اللي تحت عيونها .. مازالت قمة في الجمال والرقة والبراءة .. كان محمد يطالع في ويها وهو يفكر شو الشي اللي ممكن يخلي بسوم تتخلى عن هالحلم اللي كانت تحلمه طول عمرها ... مب بسهوله ممكن شخص يتخلى عن احلامه .. وهو جرب هالشي

محمد: ليش بسوم ... صدق ليش ما تبين الكلية
بسوم: الدراسة صعبة
محمد: هذا شي ما يغلبج انتي ... وبعدين اذا الطب صعب اكيد باقي التخصصات اسهل

سكتت بسوم ما ردت على محمد ... بالفعل قرارها انها تتخلى عن دراستها كان في قمة الصعوبه شو ممكن تدرس غير الطب ... هدفها في الحياه واللي كبرت عليه ... محد كان يحس بالضياع اللي تعيشه بعد هالقرار اللي اتخذته في خاطرها كانت تقول .يا محمد بعدين انت من خاطرك بتقول احسن اني ودرت الطب ...

محمد: بسوم .. انا مالي سلطه عليج انا الا ولد عمج وما اريد اتدخل في حياتج .. بس بعد لاني ولد عمج من حقي احاتيج ... قوليلي وريحيني ليش ما تبين طب ... انا ادري انه الطب هدفج في حياتج
بسوم: (بعد تردد) يا محمد اذا كنت دكتورة ... فأنا بجابل ناس وبشوف ناس وبعالج ناس .. واكيد في هالناس بيكون فيه شباب .. باجر اذا تعالجوا عندنا بيقولون والله شفنا اخت فلان وبنت عم فلان في المستشفى وتشتغل وما اعرف شو ومن هالخرابيط ... انا ما اريد اييب لخواني الكلام الشين... ولا حتى لكم انتوا عيال عمي
محمد: (وهو يتذكر كلام سلطان وربعه في المقهى) زين حتى وان قالوا .. انتي ما سويتي شي غلط .. انتي تأدين عملج وواجبج
بسوم: انا بنت وعندي واجبات ثانيه اقدر اسويها
محمد: انج تعرسين مثلا
بسوم: ليش لا ... مب انا بنت ولا فيني شي ناقص

سكت محمد ما رد على بسوم ... في وجه شبه بينه وبين بسوم .. هو تخلى عن كل احلامه لولوة والدراسه والشهاده يوم قاله ابوه ارجع البلاد .. وللحين ما يقدر ينكر المه لفقده لولوة وخسارته حبه بالرغم من كل شي وبالرغم من انه ما يبين عليه ... وهيه مستعده تخسر الطب ودراستها عشان ما يسمعون هلها في يوم كلمه تجرحهم عن بنتهم الدكتورة ... في باله تخيل موقفه لو كانت الدكتورة اللي يرمسون عنها في ذاك اليوم هي بسوم ... او موقف سعيد .. اكيد كانوا بيذابحون ... يت روضه الصالة وقطعت عليه افكاره وهي يايبه لهم شاي مسوتنه بروحها مع الكيك اللي كانت مقطعتنه ومرتبتنه في الصحن

روضه: ياللا ذوق طباخي
محمد: دام انج اللي مسوتنه اكيد حلو
روضه: طبعا عندك شك في هالشي
محمد: لا ما عندي شك

وقعدت روضه على الارض جدام الطاوله ... وصبت الشاهي لهم هم الثلاثه وحطت الكيك وردوا يسولفون عن اشياء ثانيه .. وعن عوشه ومبارك وشو تقولهم اخر مرة مكلمتنهم ... اذن العشا فاستأذن محمد منهم عشان يطلع يلحق يصلي العشا ويا ابوه في المسيد اللي عدال بيتهم

محمد: تعالي بسوم وصليني للباب
روضه: اوه يعني هاي قعدي روضه بقول لبسوم شي
محمد: هاهاها لا افااا عليج تعالي اذا بتين
روضه: لا ماعليه انا بروح فوق ياللا مع السلامه

طلع محمد ويا بسوم ... كان في خاطره يقولها انهم متشابهين وانه مافي داعي تضيع مستقبلها عشان تفاهات اهلها ما اهتموا فيها ... عند باب السيارة

محمد: بسوم .. صدق بتعرسين اذا انخطبتي
بسوم: يا محمد .. اذا يا النصيب محد يرده .. هذا كله بيد الله
محمد: بس احيدج ما تبين العرس
بسوم: (تبتسم) كنت ابغي الطب
محمد: والحين ما تبين الطب
بسوم: ايوه
محمد: بسوم انا بكلم ابوي يكلم عمي ويخطبج لي

انصدمت بسوم من كلام محمد لها ... معقول محمد يتكلم جد .. محمد اللي الكل يعرف انه يحب البحرينيه وما انكر هالشي طول السنوات اللي طافت ... واللي كل سنه يرد جنيف عشانها يتزوجها هيه ... شو يتحراها بتزوجه وهي تدري انه يبغي غيرها ... كل غضبها كان باين في عيونها.. حتى ان محمد لاحظ هالشي

محمد: اذا على سالفة البحرينيه خلاص هذي سالفه انتهت من زمان ... لا تردين الحين فكري على راحتج وردي على عمي وابوي ... تدرين ما بيغصبونج على شي

وركب محمد السيارة وخلاها بروحها واقفه تشوف سيارته ... حتى محد استغرب من نفسه كيف عرض عليها هالعرش الغريب ... كيف سمح لنفسه انه يفكر في بسوم كحرمه وهي طول عمرها كانت اخت ... معقول احساسه بالظلم اللي قاعده تظلمه لنفسها عشان خاطر اهلها .. واحساسه انها تشبه في كل شي ... وحبه للولوه وعهده لنفسه انه ما يزوج غيرها ... وذكرياته وجنيف والبحرين ... وصل البيت بس ما دخل راح المسيد على طول عشان يصلي لانه كان متأكد ان ابوه في هالحزة كان في المسيد
**

بسمه بعد ما ردت داخل البيت ... راحت حجرتها على طول حتى ما شافت روضه ... ابتسمت من خاطرها ابتسامه سخريه على كل الوضع اللي يصير ... اول شي قرارها انها ما تريد تدرس ... قعدتها في البيت ... اما الحين فموضوع محمد بعد ... مش معقول محمد انهى موضوع البحرينيه من زمان ... ولا ما راح في لصيف جنيف وقعد ثلاث شهور بروحه وهي تدري ان جنيف ما ينقعد فيها هالكثر ... وحتى اذا اعلن استسلامه ... هل ممكن تحصل له نكسه في التفكير .. من قراره في انه يرتبط ببنت من برع العايلة والبلاد ويرجع لبنت عمه لانها بنت عمه ... نشت بسوم من على الكرسي اللي كانت قاعده عليه ووقفت جدام المنظره... تدري انها حلوة ما تحتاج أي حد يقولها هالكلمة ... بالرغم من التعب اللي باين عليها ... والهالات السود بعدها حلوة ... عقت شيلتها وبطلت شعرها ... لونه الشاذ والغريب كان عاطنها ميزة مب موجوده في أي بنت في العايلة ... صح ما تخليه يطول اكثر من طوله الحالي بس لين جدوفها .. بس كان غليظ وحلو وتعتني فيه دومها بالرغم من انشغالها ودراستها ... حتى اللي يحبها ولد عمها مب حلوة مثلها ... في النهاية اذا جذب محمد شي صوبها ما بيكون اكثر من جمالها .. لانها تدري انه يحب البحرينيه .. وعمره ما راح يحب وحده مثل ما حبها
***

أما محمد بعد ما رد من الصلاة ... كان يحاول يقاوم احساسه بالندم على الكلام اللي قاله لبنت عمه ... يحاول يلقى في داخله دافع حقيقي لهطلب .. غير رغبته في الانتقام من لولوة وانه يوصل لها انه يقدر يعيش من دونها ... وانها اذا تزوجت غيره .. فهو ايضا يقدر ياخذ وحده غيرها واحلى منها واطيب منها بعد .. كان في داخله يحاول يجتل حبه للولوة اللي ما قدرت تصبر عليه ... يحاول يقنع نفسه انه يريد بسوم لذاتها .. وانه في تشابه بينهم في كل شي .. ولانها في غاية الطيبه ولانها تناسب موده الهادي ... كان قاعد ويا امه وابوه ... وامه تخبر ابوه عن حال بسوم ... هوه شافها وعرف انه القرار قرارها ويدري ان الحريم يبالغن واي شي يصير لهن يحولنه للعين والحسد ... ما ينكر وجود الحسد ... بس سكت وهو يسمع امه تبالغ ويشوف التأثر على ويه ابوه

محمد: امايا .. عوشه ومبارك يدرون
ام منصور: لا يا ولدي .. ام خالد قالت برايهم العيال مسافرين وتوهم معرسين شله نخوفهم على اختهم
محمد: زين بعد ... شو ما كلمج مبارك اليوم
بومنصور: كلمني انا في المكتب .. ويسلم عليكم
ام منصور: وشله ما يتصل البيت ... ولا انا مب امه بعد
بومنصور: اتصل على البيت محد يرد عليه .. وتيلفونج دومج مسكرتنه .. ولا تشلينه وياج يوم تطلعين ... ما ادري ليش مسوتنه
ام منصور: انساه يا بو منصور .. وبروحه يبند .. ما ادريبه الا جانه خربان
محمد: (يبتسم) امايا كم مرة حطيتيه في الجرج من خذتيه
ام منصور: ما ادريبه كان مبارك يعابله .. ويركبه في الوايرات
محمد: هيه زين ماعليه ...
ام منصور: شحالهم العيال ما يبون يردون
محمد: امايا بعدهم ما كملوا شهر ... وبعدين بيروحون من المالديف استراليا
ام منصور: الله يهنيهم ان شاء الله
بومنصور: زين يا ام منصور .. ليش للحين نورة ما ودت بنتها عند حد يقرا عليها
ام منصور: يا بومنصور... البنت عنيده وما تسمع لحد ... ما تعرفها بسمه من يوم صغيره وهي اللي تباه تسويه لو انها ساكته وما تقول شي
محمد: امايا البنت خلاص ما تبغي تدرس انتوا اللي مكبرين السالفه
ام منصور: وشعنه ما تبى تدرس .. ومن متى بسوم ما تبى تدرس
محمد: خلاص بس تعبت
ام منصور: اللي ما تبغي تدرس ... تبغي العرس
محمد: واذا بغت تعرس هو حرام ... بسوم هب صغيره وحلوة ... واللي يبونها ما ينعدون في كل مكان
ام منصور: هذا اول قبل لا ينظلونها .. الحين كلهم يدرون بعين صايبتنها
محمد: ماشاء الله عليكن ما قصرتن انتن ... زين وبنتكم عين صابتها تروحون تخبرون العرب ليش ... طلعتوا على البنت رمسه وهي ما فيها شي
ام منصور: شو ما فيها شي .. انت لو شفتها ما قلت هالرمسه
محمد: امايا انا شفتها .. رحت اليوم بيت عمي وشفتها
بومنصور: شحالها يا ولدي...
محمد: والله العظيم ما فيها شي .. بس ما تريد تدرس
ام منصور: زين العين صابتها في دراستها .. زين ما كلت صحتها ولا شي ثاني فيها
محمد: ابوي انت روح اخطب لي اياها من عمي مبارك ... انا ابغيها بنت عمي

كان بو منصور يتوقع من محمد كل شي ... حتى انه توقع في يوم ايرد وهو ماخذ البحرينيه الا انه يريد بسوم بنت عمه ... بومنصور كان مجهز وسائل للضغط عليه في اليوم اللي يباه يعرس فيه وان كانت العروس اللي في باله مب بسوم .. بس بعد بسوم بنت اخوه ...

بومنصور: شووو؟
ام منصور: محمد يا ولدي بنت عمك مريضه الحين
محمد: امايا بنت عمي ما فيها شي ... ما تريد تدرس خلاص تعرس .. وانا ولد عمها منو بياخذها يعني
**

في الليل مثل كل يوم كان سعيد يتصل البيت يسأل عن بسوم ... او حتى يتصل على تيلفون روضه ... كانت صدمته عنيفه في رغبتها انها ما تدرس ... ما كان يتوقع انه بسوم في يوم تودر الدراسه .. حس انهم السبب وانهم فعلا عطوها بعين خلوها تعاف الدراسه ... وهو متصل ردت عليه روضه

سعيد: الو
روضه: الو ... هلا سعيد
سعيد: شحالج روضه .. وشحال ابوي وامايا
روضه: والله الحمدلله .. يسرك الحال
سعيد: هاه شو الجامعه
روضه: عادي مثل كل يوم انداوم ونرد ... نتريا الكورس يخلص
سعيد: ياللا شدي حيلج ... اخاف الا بسوم تعاديج
روضه: لا لا تخاف انا طبيعيه ما كنت اكيلة كتب
سعيد: شحالها هيه بعدها على نفس الراي
روضه: هيه خلاص ماشي فايده .. حتى محمد ولد عمي اليوم كان هنيه ورمسها بس ماشي فايده
سعيد: ردي كلميها روضه لا تخلينها جيه ماتبغي الطب فيه غيره
روضه: كلمتها يا سعيد والله كلمتها ... خلاص هيه مصره على رايها وقلتلها لا تحبسين عمرج في الحجرة
سعيد: شو قالت
روضه: قالت ان عمتي كل ما نزلت كلمتها عن المطاوعه وعن الدراسه .. تبغي عمتي تنسى
سعيد: زين روضه قولي حق امي انها خلاص لا تفتح هالموضوع ويا بسوم .. امي وايد خايفه عليها
روضه: ماعليه من تطلع من حجرتها بقولها ... دخلت تصلي ولين الحين ما طلعت
سعيد: دخلي شوفيها الله يخليج وكلميها بالمرة
روضه: زين .. انت متى بتي العين
سعيد: انا بيي في الويك اند ...
روضه: ليش ... خذ اجازة وتعال
سعيد: (يبتسم) ليش تولهتي علي
روضه: (منحرجه) لا بس البيت وايد فاضي ومحد فيه تعال اشتغل في العين ... وبعدين انت ما تدري بعمتي كل يوم تصيح وانا بروحي ... بعد ما تطلع بسوم من القائمة لان مالها خص في حد
سعيد: عندج خالد وحمده
روضه: في بيتهم دومهم .. اييون هنيه ويردون هناك .. بعدين حمده تقعد هنيه لين ما ارد من الجامعه وبعدين ترد بيتها
سعيد: ماعليه .. انا برد في الويك اند
روضه: خذ اجازة
سعيد: روضه ما اقدر اخذ اجازة والله ما اقدر
روضه: هيه بتاخذها بعد العيد عشان تروح المقناص صح
سعيد: هاهاها منو قالج
روضه: اذكر يوم كنت تقول حق مبارك
سعيد: ماعليه خليني ارجع
روضه: وتاخذ اجازة مالي خص
سعيد: لو خذت الاجازة ما بقعد في البيت بعد
روضه: لا تاخذ اجازة وتقعد في البيت
سعيد: ماعليه يصير خير
روضه: انا ادري يصير خير هذي يعني انسي
سعيد: هاهاهاها الله يسامحج
روضه: ماعليه برايك الحين ... بروح اشوف عمتي
سعيد: زين ياللا سلمي عليها وقوليلها اني اتصلت
روضه: ان شاء الله ... ياللا مع السلامه
سعيد: مع السلامه

بعد ما بندت روضه التيلفون دقت الباب على عمتها عشان تسولف وياها وتخبرها ان سعيد اتصل وبالمرة تكلمها في موضوع بسمه
**

أما سعيد في بوظبي فبعد ما بند التيلفون كان يبتسم ومستانس .. علاقته في بنت عمه كل يوم اتزيد عن اللي قبله .. يحس انها متعلقه فيه وقامت تتصرف وياه طبيعي ... بس كان كل خوفه انها تشوفه مثل ما تشوف عبود اخو لا اكثر .. كل يوم كان حاجز من الحواجز اللي بينهم يطيح ... من عرست عوشه وهو اللي تشكيله اللي يصير في البيت كل اخر اسبوع يوم يرجع البيت ... وتقوله اللي صار وياها صح ما كان يهتم بسوالفها عن الجامعه كثر ما كان يهتم انها تتكلم وياه وانه يسمع صوتها .. كان كل خوفه انها تقوله باجر انت مثل اخوي ... بس كان مقابل اللحظات الحلوة اللي يعيشها في بيتهم يسكت ويتحمل ... حتى يوم الجمعه يوم يرد بوظبي كان يتضايج وهي تفتح له موال اشتغل في العين ورد العين ... تنهد من خاطره وقال اه يا روضه متى تفهمين وتحسين فيني
**

في بيت بو منصور بعد الحشرة ورد الفعل اللي صار من بومنصور وام منصور ... سادت لحظات سكون وكان بو منصور يطالع ولده .. كان يخافه يلعب ويفشله في اخوه ... ام منصور كان في خاطرها تيبب بس مسكت نفسها يريد بسمه اوكي بسمه حتى لو يايتنها الف عين مب وحده بس المهم انها بنت عمه ... كانت اتريا بو منصور يقول الكلمة الاخيرة في الموضوع ...

ام منصور: هاه يا بومنصور .. البنت بنت عمه وهو اللي مجدم على غيره وصدقه اذا قعدت في البيت بين الحريم يخطبنها
بو منصور: احيد عين يايتنها ... منو يباها
ام منصور: لا يبونها بعدها غاويه
محمد: مسرع ما غيرتي رايج
ام منصور: شو ما تريد بنت عمك .. حشيم ومربايه ونعرف طباعها .. واخت حرمة اخوك
محمد: وعين صابتها
ام منصور: ان شاء الله ما عليها شر ... واذا عرست شتبها الجامعه
بومنصور: هيه
ام منصور: شو يا سلطان ... الولد يبغي بنت اخوك لا تحرمها عليه
بومنصور: بنت عمه ما اقدر اقول فيها شي ... بس عاد خلها هيه اللي توافق
ام منصور: لا ان شاء الله بتوافق .. محمد ولد عمها وريال والف من تباه

نشت ام منصور وشلت تيلفون البيت ودخلت حجرتها وقفلت الباب وبو منصور ومحمد يطالعونها وهم ساكتين ... كانت تتصرف بهدوء وثقه ... ونست موضوع العين اللي صايبه بسوم والمناحه اللي كانت مسوتنها ... اما هي فكانت تحس براحه فضيعه ما حستها من اكثر من خمس سنوات .. من عرفت ان ولدها عاشق له بنيه بحرينيه ... اليوم حست بهم ينزاح من على قلبها ... وان اخيرا بترتاح من هم محمد ... اول شي اتصلت في بيت بو خالد بتكلم ام خالد ... اول مرة رن التيلفون لين ما قطع بروحه لان محد شله .. بسوم في حجرتها وروضه داخل ويا عمتها تحاول تقنعها ان بسوم من خاطرها ما تبغي الجامعه والسالفه ما فيها عين ولا غيره ... وسمعت التيلفون يرن بس ما طلعت ترد عليه .. بس يوم رن مرة ثانيه طرشتها عمتها ترد عليه

روضه: الو
ام منصور: الو السلام عليكم
روضه: وعليكم السلام ... هلا عمتي شحالج
ام منصور: الحمدلله بخير وسهاله .. شحالج انتي وشحال عمج وعمتج عساهم الا بخير
روضه: الحمدلله يسرج حالهم
ام منصور: هييه .. زين عيل وين عمتج عطيني اكلمها
روضه: في حجرتها .. لحظه بزقرها لج
ام منصور: لا وديلها التيلفون الحجرة برايها هناك
روضه: ان شاء الله

دخلت روضه التيلفون عند عمتها وعطتها اياه وطلعت ... طبعا ام منصور ما قصرت خبرت ام خالد كل شي وانهم يبون بسوم حق محمد ... وانها اذا ما تريد تدرس برايها على هواها ... رمسة ام منصور تغيرت 180 درجه ... ولا طرت الحسد والمرض ولا أي شي ... كانت تريد تتمسك بهالفرصة باي ثمن وما تأجل الموضوع لا يغير ولدها رايه ... اما ام خالد اتفاجئت من طلب محمد ولد سلطان ... اليوم كان هنيه وشاف البنيه اللي كانت مقتنعه انها مريضة ومع ذلك قال يباها بنت عمه ... من خاطرها استانست ان ولد عمها يباها وبيكون ستر وغطا على البنت ... وكبر محمد في عينها اللي ماقال ان بنت عمه مريضه وما يباها وخذتن سوالف الحريم ... وردن يسولفن عن فلانه وعلانه
**

اليوم اللي بعده .. بعد المغرب يوم رد بو خالد البيت طرش على بسوم يباها ... كان بومنصور مكلمنه عشان بسوم ومحمد ... ولانه بوخالد يعرف مشكلة محمد ويدري انه بومنصور يريد يربطه بسرعه قرر انه يسأل في نفس اليوم اذا ما تريد تدرس خلاص تعرس .. وولد عمها ماشي اخير عنه .. ويناسبها في كل شي .. وما بيطمن عليها الا اذا كانت هيه بعد في بيت عمها ويا اختها ... في الحجرة بعد ما دخلت بسوم على ابوها

بوخالد: هاه يا بسمه بعدج ما تبينها الدراسه
بسوم: هيه يا بويه والله من خاطري عفتها ما فيني شي
بوخالد: ادري يا بنتي ما فيج شي .. واذا ما تبين تدرسين خلاص على هواج
بسوم: فديت روحك يا بويا .. بس قول حق امي انه ما فيني شي
بوخالد: ماعليه بكلمها .. بس بغيتج في سالفه
بسوم: (تبتسم لابوها) انت تامر امر .. منو عندي اغلى من ابويا حبيبي
بوخالد: يا بنتي عمج اليوم كلمني في المكتب يبغيج لمحمد ...

ما تفاجئت بسوم من كلام ابوها بس اللي فاجأها ان محمد كلم عمها بهالسرعه حتى ما عطاها فرصه تفكر او ترد عليه .. وتذكرت انه قالها بيسمع ردها عن طريق ابوه

بوخالد: هاه يا بنتي .. انتي ما بغيتي الدراسه ما قلنا شي على هواج .. لكن ان قعدتي في البيت اكيد بتقول الناس بسمه بنت مبارك تبغي العرس عشان جيه قعدت في البيت .. وولد عمج اولى من أي غريب

سكتت بسمه ما ردت على ابوها ... من الاساس ما كانت تدري شو تريد وليش ولد عمها الحين يريدها وهي اللي كانت طول عمرها جدامه ومع ذلك ودرها وحب البحرينيه ... شو اللي رده الحين

بوخالد: هاه يا بسمه عمج مستعيل على ردج
بسمه: ابوي فديت خشمك من متى انا ابغي شي انت ما تبغيه ...
بوخالد: لا يا بسمه هذا عرس وما اريدج باجر تقولين انت يوزتني
بسمه: (تبتسم) ما بقول .. لاني ادري انك ما بتيوزني واحد شين في أي شي
بوخالد: بارك الله فيج يا بنتي ... ومحمد ولدنا ومنا وفينا وانتي تدرين باطباعه وهو يدريبج زين ...
بسمه: هاهاهاها ماشاء الله يا بو خالد كل بناتك عطيتهن عيال اخوك
بوخالد: الغالي للغالي يا بنتي .. وانتوا وياهم نفس الغلا
بسمه: (وهي تمزح) ابوي
بوخالد: خير يا بنتي
بسوم: بتسوولي عرس مثل عوشه .. ولا مبارك غير لانه الكبير
بوخالد: هاهاهاها سلط الله على بليسج بعدج ما انخطبتي وتفكرين في العرس
بسوم: هاهاها اسولف وياك ... ولا حلال عليهم حرام علي
بوخالد: (ونظراته كلها حب وحنان لاصغر عياله اشر لها على الكرسي عداله) تعالي هنيه قعدي حذالي
بسوم: (وهي تقوم) لا لا ما اريد بما ان بنت اخوك الرزة محد بقعد في ثبانك مب انت ابوي
بوخالد: (وهي تقعد في ثبانه وتلوي عليه) هاهاهاها الحين بنت عمج رزه
بسوم: (تدلع) هيه الحين ماخذه الغلا كله
بوخالد: حليلها يا بسوم تدريبها بروحها في هالدنيا .. والكل مشغول عنها من لها غيرنا
بسوم: ادري يا بو خالد قلبك كبير ومب بس يكفي لروضه ولنا ولكل حد في هالدنيا بعد
بوخالد: بس ياللا قومي تعبتيني
بسوم: ياللا بخليك الحين (وهوت عى راس ابوها تحبه) تصبح على خير يا احلى ابو في الدنيا

طلعت بسوم عن ابوها ... بس في داخلها حيرة كبيرة ابوها اغلى انسان عندها في الدنيا وكانت تدري انه يريد هالخطوبه من يوم كانت صغيرة وقبل لا يسافر محمد يدرس .. بس محمد صدم الكل بحبه للبحرينيه ... هي صح كانت صغيره حزتها بس كانت تسمع كلام ابوها وامها .. وحتى عمها ... ضيعت الطب بكيفها ما بضيع على ابوها فرحته مستحيل هيه تسوي هالشي ... اما بوخالد فكان يفكر في بسوم اللي كبرت وصارت حرمه... بس بعدها اصغر عياله .. واحبهم لقلبه بهدوءها وحلاتها .. وصوتها اللي ما يطلع ... اخيرا بيوزها محمد ولد اخوه .. كم كثر كان يتمنى انه يشوف هاليوم
**

وصلت الموافقه لمحمد عن طريق ابوه والناس كلها عرفت ان بسمه اصغر بنات مبارك بن منصور خطبها ولد عمها بعد ما ودرت الطب ... وطلعت اشاعات ورمسات ان هوه اللي قالها ما يبغيها تدرس طب واللي يقول انها من بعد ما طاحت مريضه قالولهم علاجها انها تعرس فربطوها بولد عمها ورمسات من هالرمسات اللي تطلعها الناس الفاضية .. ووصل الخبر لسلطان اللي تفاجأ وحزن في داخله .. بس كان متوقع هالشي .. البنت حلوة ليش ولدعمها يخليها ... لو عنده بنت عم شراتها ما ودرها لغيره ...

ردت عوشه وريلها البلاد ... وارتبش بيت بو منصور اللي طول عمره هادي بوجود عوشه ومبارك ... صح عرسوا ... بس من يقول انهم ايوزون او حتى يحشمون حد .. بالرغم من هذا كانت عوشه تحب مبارك صدق .. حبها له زاد بعد رحلة شهر العسل ... بس بعد ما كانت تقدر تيود لسانها عنه .. وهو بعد كان دومه يتحرش فيها ... عشان ترد عليه

ام منصور: يا مبارك يوز عن هالبنيه .. ولا تراني بخبر ابوك يوم بيرد
مبارك: امايا حرمتي كيفي حتى لو اكفخها
ام منصور: زين والله ربيت يا سلطان ولدك بيضرب حرمه
مبارك: تستاهل لسانها طويل
عوشه: عمتي هوه اللي يبدا انتي شاهده
ام منصور: صدقها انت اللي اتيها ويوم ترد عن عمرها احتشرت
مبارك: كيفي انا ريلها لا ترد علي
عوشه: لا والله ... اقول روح روح يتريونك في المقهى ... وتأخر زين
مبارك: تسمعينها امايا في حرمه تقول حق ريلها روح وتأخر
ام منصور: انت تستاهل .. صدقها روح فكنا من الصدعه
مبارك: زين يا عوشه لا تتصلين في الليل وتقولين(وهو يعيب عليها) مبارك حبيبي تعال اخاف ارقد بروحي لا تتأخر
ام منصور: وابوي عليك انت بعد
عوشه: والله جذاب عمتي انا ما اقول جيه اصلا ما اخاف
ام منصور: انا الخبله اللي قاعده عندكم هنيه ... بسير على ختي اخير لي
عوشه: لا عمتي بتم بروحي
مبارك: قولي قولي تخافين
عوشه: ما اخاف .. امل زين
ام منصور: شل حرمتك ودها عند خواتها ويوم بترد اخطف عليها ... صدقها البنيه من رديتوا وهي بروحها
عوشه: فديتها عمتي اللي تحس فيني
مبارك: خلاص خليها توصلج هيه
عوشه: مبارك ياللا عاد عن النحاسه
مبارك: زين زين روحي غيري بس بسرعه ان تأخرتي اكثر عن ربع ساعه بروح عنج
عوشه: وحياتك عشر دقايق

وراحت بسرعه فوق صوب جناحها عشان تغير ثيابها وتعدل مكياجها وفعلا عشر دقايق نزلت وطلعت ويا ريلها عشان يوصلها بيت اهلها ... بس هالمرة كانوا يسولفون ويضحكون وهم في السيارة .. وصلوا بيت ابوها .. ودق مبارك الجرس ودخلوا على طول ... كانت روضه ويا بسوم وسعيد في الصالة يسولفون

سعيد: هلا والله بالمعاريس .. شحالكم
مبارك: لا خلاص جدمنا صار لنا شهر ونص معرسين .. (وهو يخز بسوم) في معاريس غيرنا
عوشه: تكلم عن عمرك بعدني عروس
مبارك: طالع هاي مصدقه عمرها
سعيد: وليش ما رحت المقهى
مبارك: انت ليش اللي ما طلعت للحين
سعيد: خلاص انا كنت طالع بس قعدت اسولف ويا بسوم وروضه شوي
مبارك: زين خلنا نروح في سيارة وحده ... اقول روضه حرمتي امانه عندكم .. لا تسووبها شي
روضه: يا ويل حالي على الحب ... كل هذا حب
مبارك: ليش تغارين
روضه: لازم بغار ... مب ادميه
سعيد: بسك ياللا الشباب يتريون

طلع مبارك ويا سعيد وقعدن البنات يسولفن .. وتخبرهن روضه عن ربياعتهن في الجامعه واللي ما تخرجن بعدهن ... بس عوشه ردت السوالف لبسوم ومحمد

عوشه: هاه بسوم اخبار محمد
بسوم: والله عايش عندكم هب عندنا شدراني فيه
عوشه: اوووه يعني ما اييكم هنيه
روضه: تصدقين من خطبوها ما يا بيتنا
عوشه: ولا ينشاف في البيت ... كله في المؤسسه اصلا
روضه: بس والبحرينيه اللي يحبها شياه عليها
عوشه: والله ما ادري .. هوه من خاطره قال يبغي بسوم
روضه: اتهقين ودرته ولا ودرها
بسوم: طالع هذيلا ما يحشمن .. أي مالكن خص في الريال
عوشه: والله ما ادري يا روضه .. وبعدين انتي أي نسولف عن ولد عمنا
بسوم: اذا تميتن تسولفن جيه بودركن وبروح حجرتي
عوشه: عوذ بالله ما تيوز هاي عن طبعها
روضه: (تبتسم) يوم بتيوزين انتي اول
عوشه: اقول امي وين
بسوم: بيت عمتي مريم
عوشه: قومن نروح بيت حمده ولهت على حمودي
**

رمضان هالسنة كان غير في بيت بوخالد وحتى بيت بو منصور ... عوشه اللي كانت رابشه الكل في بيت بو خالد راحت بيت عمها .. والربشه راحت وياها .. بس كانوا دوم يفطرون او يتسحرون مع بعض كلهم يا في بيت ام منصور يا في بيت ام خالد ... وكل في البيتين يسوي شي ... كانت لمتهم وسوالفهم حلوة ... ذكرت الشواب بايام اول يوم كانوا الاخوان الثلاثه ساكنين نفس البيت في حياة ابوهم اول ما عرسوا ... كل ليله واحد فيهم يسترجع ذكريات اول ويسولف لهم عن عمهم محمد وحرمته موزة والحشرة اللي صارت ذيج الايام يوم محمد قال يبغي موزة بنت سعيد ... في نص الشهر بعد الفطور في بيت بوخالد ... بعد ما طلعوا الشباب من غرفة الطعام .. وراحوا الصالة يطالعون التلفزيون ... قامن البنات يساعدن في لم الصحون وتنظيف الطاوله مع الخدامات

حمده: هاه عوشه... شو الحمل وياج
عوشه: لا عادي عادي ما عندي دلع حريم ووحام وغيره
حمده: قولي الحمدلله
روضه: لو بنت على تفهمين ولا بتكفخين
عوشه: اوكي ولا يهمج انتي بس كم روضه عندنا
بسوم: الله يعين بيصيرن ثنتين
حمده: فطوم الله يسامحها ما يت هالاسبوع والله ولهنا عليها
روضه: حليلها بعيد في دبي .. بعدين ما تقدر تقول حق ريلها كل يومين ودني عند هلي
عوشه: عيل اقول حق مبارك ودني كل يوم بيت ابوي
روضه: مبارك ولد عمنا ريلها ريال غريب
حمده: كان غريب الحين منا وفينا

هنيه رد محمد غرفة الطعام وزقر بسوم تطلع شوي يبغيها ... الكل قام يطالع بسوم اللي احمرت وطلعت دون ما تكلمهن

محمد: (وهو قاعد على الدري برع) شحالج بسمه
بسوم: الحمدلله بخير .. شحالك انت
محمد: الحمدلله ... اقول بسمه
بسوم: نعم
محمد: انتي وقفتي في الجامعه صح
بسوم: هيه روضه وقفت لي اوراقي .. بس بروح اسحب اول الكورس الياي
محمد: بعدج مصرة تسحبين اوراقج
بسوم: ما بدرس طب محمد
محمد: مب شرط طب ... درسي بزنس او علوم
بسوم: ليش
محمد: بسوم وحده شاطرة مثلج حرام ما تكمل دراستها .. حتى وان عرسنا انا ابغيج تدرسين
بسوم: غريبه
محمد: (يبتسم) ليش لاني انا ما عندي شهاده جامعية مثلا
بسوم: (منحرجه) لا ما قصدت بس
محمد: بسمه انت مب اقل من أي وحده عندها شهاده من الجامعه .. وانتي تدرين انج تقدرين تخلصين قبل دفعتج حتى وان ضاعت عليج سنه ونص
بسوم: محمد ما ادري بس احس اني ما ادريد ادرس
محمد: لا بتدرسين ... عشان خاطري ... وعشان تشجعيني
بسوم: على شو
محمد: عشان انا بعد ابغي ارد الجامعه وادرس .. فقلت قبل اشوف بسمه اذا ردت شو بتدرس عشان ادرس شي قريب من تخصصج .. واللي يفوتني تشريحنه انتي لي
بسوم : (وهي مستانسه من خاطرها) والله صدق
محمد: والله .. افكر اسجل الكورس الياي جامعة عجمان
بسوم: خلاص سجل شو اتريا
محمد: اتريا اعرف شو بتدرسين
بسوم: انت لازم تدرس ادارة اعمال
محمد: ادري ... وانتي شو رايج
بسوم: خلاص ماعليه اذا انت بتدرس انا برد ادرس وبحول ادراة اعمال
محمد: هاهاهاها يعني خلاص اعتمد عليج في المحاظرات والبحوث
بسوم: هاهاها اعتمد بس انت ادرس
محمد: (وهو يقوم بيروح) عيل ياللا بخليج الحين ... انا طالع بمر المكتب شوي .. شي في خاطرج
بسوم: لا سلامة راسك ... بس بعتبر كلامك وعد
محمد: خلاص وعد

طلع محمد وردت بسوم وهي مستانسه وخبرتهم باللي قاله لها محمد والكل استانس عشانه واكيد عشان هيه اخيرا غيرت رايها وبترد تدرس في الجامعه وان ما كان طب ... بس المهم بتدرس شي وما بتقعد في البيت بس
**

في العشر الاواخر قرروا يروحون العمرة ... ام خالد ووياها خالد وحمده وحمود الصغير ... ومبارك وعوشه وام منصور وابو منصور ... روضه ما قدرت تروح عشان الجامعه ... وبسوم ما هان عليها تخلي روضه ... وبوخالد ما يهون عليه يخلي البنات بروحهن لو ان عبود وسعيد عندهن ... كان محمد كل يوم ايي يفطر ويتسحر بيت عمه ... في هالفترة اللي طافت كان بو خالد معزم يرمس سعيد عشان يخطب له بنت عمه وقال لام خالد هالكلام .. بس هيه قالت له يصبر لين ما ترد هيه من العمره عشان ترمس روضه واذا بيرمس سعيد برايه .. بعد صلاة الفجر هو وسعيد كانوا رادين من المسيد فقرر يقوله عن بنت عمه

بوخالد: هاه يا ولدي انا في خاطري ايوزك ... سلطان الحين بيوز محمد وانت اكبر منه
سعيد: يا بوي الله يهديك .. يكفي مرة وشو صار فيها .. خلوني جيه مرتاح
بوخالد: يا سعيد .. هالمرة بخطب لك انا على هواي .. وانا اتريا منك تطيعني شرات ما سووا عيال عمك
سعيد: اول اعرف منو اللي تبغيها لي
بوخالد: وحده مزيونه ونعرفها زين .. محد ناعتنها لنا
سعيد: منوه
بوخالد: روضه بنت عمك ... انا ما اقدر اعطيها حد بعيد ما تهون علي .. وانت ولد عمها
سعيد: (يبتسم) وهي شو قالت
بوخالد: هيه عاد لين ما تيي ام خالد بترمسها .. وما اظن تقول لا
سعيد: اذا بنت عمي زين ماعليه ...

لو بو خالد يقدر يشوف ملامح سعيد وهم يمشون في الظلام رداين من المسيد .. جان عرف انه ولده شوي ويبوس ايده ويقوله مافي داعي تتريا امي ترد من السفر .. .كمل جميلك وكلمها اليوم ... سعيد تاريخ 27 من رمضان .. صار بالنسبة له يوم تاريخي ... احلى خبر في حياته سمعه اليوم ... في قلبه حفلة طيران ... كان يمشي ورا ابوه خطوتين عشان ما يلاحظ ... وصلوا البيت بس سعيد ما دخل ويا ابوه ... كان لازم يخبر حد هالخبر الحلو اللي اسمعه اليوم .. كان الجو بارد ولابس جاكيته الشمواه البيج ... الجاكيت اللي تموت فيه روضه ... وكم مرة طلبته انه يعطيها اياه .. بس ما يطيع .. اتصل في مبارك ...

مبارك: الو... شو تولهت علي متصل هالحزة
سعيد: شحالك يا ريال ... شو الجو عندكم
مبارك: برد شرات اللي عندكم
سعيد: اقول
مبارك: شو .. تبغيني ادعيلك وانا طالع الحرم اصلي الفير ... ترى والله كل يوم ادعيلك
سعيد: هاهاها زين ياب فايده ... ثرك ولي من اولياء الله الصالحين
مبارك: ليش شو صار .. لا يكون اعترفت لك بلواعج قلبها
سعيد: هاهاهاهاها حلوة منك هاي لواعج ... شو معناها
مبارك: شدراني اسمعهم يقولونها في التلفزيون
سعيد: زين لا تشوف تلفزيون وايد لاتتأثر
مبارك: صدق شو صار
سعيد: ابوي
مبارك: بلاه عمي
سعيد: قالي بيخطب لي روضه
مبارك: قول والله ... وليش ما خطبها للحين
سعيد: يتريا امي تكلمها
مبارك: تباني اردهم لك باجر
سعيد: هاهاهاها يا ريت ... بس ما بتقدر عليهم ...
مبارك: مبروك مبروك يا ريال
سعيد: الله يبارك فيك .. بس عاد ان شاء الله توافق
مبارك: ماعليك البنت مياله
سعيد: شدراك
مبارك: ناسي اني متزوج وكالة رويتر للاخبار المحلية
سعيد: هاهاهاها حرام عليك .. ماعليه ان ما خبرتها عليك
مبارك: لا الله يخليك .. انا ادعي كل يوم في الحرم يا رب عوشه يقصر لسانها
سعيد: هاهاهاها اقول بخليك الحين بروح ارقد .. اللهم اني صايم ..
مبارك: ماعليه تصبح على خير .. .وتستاهل يا بو عسكور
سعيد: ياللا ان شاء الله خير

بندد سعيد عن مبارك ودخل البيت بيروح حجرته .. يدري انه ما بيه الرقاد بس بيحاول ... اخيرا الشي اللي يبغيه بيصير له ...
**

بعد صلاة التراويح ... دخل سعيد البيت وحصل روضه في الصالة وحاطة على صلاة التراويح في السعوديةا ... ابتسم لها وقعد وياها ...

سعيد: ليش قاعده بروحج
روضه: من كثر اللي في البيت الله يخليك ...
سعيد: هاهاها زين وين بسوم عنج
روضه: داخل حجرة عمي .. تتكلم في التيلفون
سعيد: منوه
روضه: محمد متصل ما ادريبه شو يبغي
سعيد: لا والله
روضه: هيه .. ولا عندك كلام ثاني جنه ولد عمها
سعيد: (يبتسم) لا خلاص ما عندي كلام ثاني
روضه: حسبالي بعد
سعيد: اممم وين الحلو اليوم وين الكريم كراميل وين الشيز كيك
روضه: ما سويت شي تعايزت اليوم
سعيد: افااا وانا في خاطري الكريم كراميل اللي تسوينها .. تدرين اني ما اطلع لين ما اكل منها
روضه: اممم عاد اليوم ماشي تحمل
سعيد: ياللا عاد روضه .. اهون عليج
روضه: امممم لا ما تهون .. بس عاد حتى لو بسويها الحين ما بتجمد قبل السحور
سعيد: خلاص خليها لبعد السحور بس سويلي اياها
روضه: فالك طيب يا ولد عمي .. انت تامر امر
سعيد: مشكورة يا بنت عمي .. يا احلى بنت في الدنيا
روضه: وبعد
سعيد: والكون والمجرة ... ياللا انا طالع تبين شي
روضه: لا لا تروح اقعد شوي
سعيد: هاهاها لازم اروح العيد بعد ثلاثه ايام وابغي امر الخياط واخذ نعال وغتر واخلص الشغلات اللي وراي
روضه: زين اقعد شوي بعد
سعيد: اوعدج ايي في الليل من وقت
روضه: شو الفايده عاد
سعيد: بنلعب ورقه
روضه: العشر الاواخر الناس تقرا قران في الليل ما تلعب ورقه
سعيد: هاهاهاها ... ماعليه الحين خليني اروح
روضه: خلاص برايك روح
سعيد: زين عبود وينه
روضه: فوق ما نزل .. بعد هوه يوم بينزل بيروح يخلص اللي وراه مثلك
سعيد: ياللا برايج لا تنسين الكريم كرميل ... تبين شي من برع
روضه: لا سلامة راسك

طلع سعيد من البيت وهو يبتسم ... يا ترى شو بيكون موقفها يوم تقولها امه انهم يبون يخطبونها له ... بتوافق ولا بترفض .. واذا رفضت شو بيكون ردة فعله هوه .. وكيف بتعامله بعدين ... كان ياي يحط الاف ام بس تذكر انه توه كان يسمع لقراية السديس في الحرم .. فغير رايه وحط اذاعة القران ... أما روضه فنشت قالت بعد الكريم كرميل يبالها شغل ... بتنشغل في شي لين ما يرد بو خالد من ميلس يارهم ضاحي وتقعد وياه
**

بعد ما طلعت الكريم كرميل من الفرن وحطتها تبرد في الثلاجة .. طلعت بتروح فوق تاخذ دش قبل لا يرد عمها ... وشافت عبود نازل بسرعه من فوق وشكله متغير وحالته حاله

روضه: عبدالله بلاك
عبود: ماشي برايج مستعيل
روضه: (ماخلته ينزل من الدري) لا فيك شي .. ما بخليك تروح لين ما تقولي
عبود: روضه سعيد في المستشفى مسوي حادث عند التقاطع اللي جدام الاشاير
روضه: شو ... شو ياه
عبود: ما ادري بروح المستشفى الحين
روضه: بروح وياك
عبود: شو تقولين انتي المستشفى كله رياييل
روضه: عبدالله بروح وياك ... واذا ماخليتني اروح بطلع ويا محي الدين بروحي
عبود: (بعد ما شاف الاصرار في عيون روضه) اوكي بترياج ييبي عباتج
روضه: اوكي

دقيقتين بس اللي خذتن روضه يابت عباتها وياها ونزلت لقت عبود توه يشغل السيارة ركبت حذاله وراحوا المستشفى .. ما كان يريد يوديها وياه لانه ما يدري شو الحاله اللي سعيد فيها ... ولانه يدري انه بيلقى رياييل وايد في المستشفى ... بس يدريبها عنيده واللي تباه بتسويه وبتلحقه ويا الدريول ... شافت روضه مكان الحادث اللي نعته لها عبود .. وقلبها عورها من شكل السيارتين والزجاج اللي كل مكان ... والشرطه بعدهم يرشون السيارات ماي ... بعد ما وصلوا المستشفى .. ردت غشاتها على ويها ونزلت ورا عبود .. وصلوا قسم الطواري ... فعلا كانوا الشرطه والناس واقفه وحشره ... راح عبود يتخبر وين حاطين اخوه ... دخل اول شي بروحه... وانصدم من المنظر اللي شافه .. حاول يتماسك بس ما قدر .. اخوه ثيابه كلها دم ... وجرح في راسه ينزف ماشي في ويهه باين من الدم ... طلع وهو يصيح من خاطره ... في داخله شي يقوله مابيقدرون يلحقون على اخوه في هالحاله .. بس كان حاط امل انه مجرد جراح تنزف وانه ما فيه شي خطير ... يوم شافته روضه طالع من الحجرة وقفت جدامه عشان يطمنها او يقولها دخلي ... بس ما قالها شي .. وقف على صوب عشان تدخل بروحها ...

بالنسبة لروضه كان هالمنظر ابشع منظر شافته في حياتها ... ولا في عمرها تخيلت لحظه انها تشوف سعيد في هالحالة ... كانت بس دموعها اللي تنزل دون أي صوت ... وغشاتها على ويها ... قربت من السرير اللي حاطين عليه سعيد ... وهي مب مصدقه انه سعيد ... رفعت غشوتها وبدون ما تحس مدت ايدها تمسح الدم اللي على ويهه بطرف شيلتها ... بس سعيد بطل عيونه ولف ويهه صوبها .. هي ما صدقت انه يشوفها وانه بخير

روضه: سعيد .. الحمدلله على السلامه ما تشوف شر
سعيد: ليش هالدموع الحين
روضه: شي يعورك ازقر لك الدكتور
سعيد: لا مايحتاي ... خلج انتي وياي
روضه: لا خلني ازقر الدكتور .. عشان يخيط لك جروحك .. بعدك تنزف
سعيد: روضه ... اذا دخلوني عمليات ومت ابغيج تعرفين اني أحبج صدق
روضه: سعيد الله يرضى عليك خلني ازقر لك الدكتور
سعيد: بس اذا طلعت من المستشفى حي ... ترى ابوي بيخطبج لي بعد العيد
روضه: ان شاء الله يا سعيد
سعيد: (يبتسم بصعوبه) ان شاء الله ... يعني موافقه
روضه: (من بين دموعها وهي مستحيه) سعيد
سعيد: اتريا جوابج
روضه: اكيد بكون موافقه ... وين بحصل شرات ولد عمي
سعيد: مب بس كلام لاني بدخل عمليه وبموت
روضه: بسم الله عليك لا تقول هالكلام ... ما بتموت وبتطلع من المستشفى
سعيد: خايفه علي
روضه: سعيد لا تكلم وايد خلني ازقر الدكتور
سعيد: خلاص انا ارتحت الحين ... وباجر ان شاء الله بتلقيني في البيت وياكم ... مافيني شي

تمت تطالعه وهي ساكته وهو سكت عنها .. بس قام جسمه كله ينتفض ويشاهق ... وهي خافت وردت خطوتين بعيد عن السرير ... ودخل الدكتور والممرضات ... وطلعوه برع الحجرة عشان يشلونه غرفة العمليات بسرعة ... اما هي فقعدت على الكرسي بعد ما ردت غشوتها .. دخل محمد ولد عمها عليها وطلعها .. طرشها ويا عبود البيت عشان اييب ابوه بالمرة ... كانت دموع روضه تنزل من عيونها دون ما تحس .. المستشفى انمزر ربع سعيد ... كم كثر عنده ربع لازم الكل كان يحبه ... حتى هيه كانت تحبه ... بس للاسف يوا يشهدون اللحظه الاخيره ... احساسها يقولها انها خلاص ما بتشوف سعيد مرة ثانيه ... وصلت البيت وبعد ما طلع عمها ويا عبود صوب المستشفى راحت هيه فوق ... شافت باب حجرة سعيد مفتوح ما قدرت تقاوم انها تدخل الحجرة ... كل شي فيها كان ينبض بوجوده.... ريحة عطره ... والشامبو مع الماي اللي طالعه من جهة الحمام ... وحتى فوطته اللي على الارض رفعتها وحست انها بعدها دافيه وكأنه توه طالع من الحجرة... مررت ايديها على فراشه اللي كان بعده معفوس ... وراحت صوب تواليته وهي تمر بيديها على عطوره واوراقه اللي مفررنها بدون ترتيب في كل جهه من التواليت .... وعلى الشماعه جاكيته البيج ... تذكرت من يومين يوم كانت قاعده هيه وبسوم في الليل برع كان الجو بارد .... وهن يسولفن ... دخل وشافهن وقف حذالهن وابتسم وقعد يسولف ويخبرهم عن مبارك وعوشه اللي كان مكلمنهم قبل لا يرد البيت ... انتبه عليها ترتجف من البرد بعد ما هبت نسمة هوا
سعيد: بردانه
روضه: هيه هالدبة يابت لنفسها جاكيت ولبستني
بسوم: خلي عنج انتي ما بغيتي
سعيد: (بعد ما فصخ جاكيته) زين دوج لبسي ها لين ما نروح داخل
روضه: (تبتسم وهي تاخذ الجاكيت من ايده) لا طبعا اذا خذته ما برده حقي
سعيد: اسف جدا بنت عمي ...
روضه: مبخلك .. تستبخل بجاكيت على بنت عمك
سعيد: (اللي يضحك) هيه بخيل شو اسوي

للحين تحس بدفوة جاكيته بعد ما فصخه وعطاها اياه.. وريحته اللي في الجاكيت ... ريحة عطره على ريحة البر والضو ... في كل خلية من خلايا مخها كانت ابتسامة سعيد مرسومه ... ووعده لها انه يرد ويقعد وياها في الليل والكريم كراميل اللي في الثلاجه ومسوتنها له .... معقول يروح ويخليها بهالسهولة ... تدري ومتأكده انها ما تهون عليه ... وانها مهما اتدلعت او قالت يتحملها .... محد يتحملها كثره ومحد يحبها كثره ... وما تحس بنفسها عايشه الا وياه .... معقول تسمح لهم يحرمونها منه ... ليش احساس بداخلها بشع يقضي على كل امل في انه باجر بيرد وبيكون لها.... او حتى يرد ولا يكون لها يكون لنورة او غيرها ... المهم ما تنحرم منه للابد ...
ردت روضه صوب الاوراق اللي على التواليت تمسح عليها بحنان كأنها تمسح على راس سعيد مب كأنها اوراقه ... وهيه تجلب فيها حصلت اوراقه اللي فيها اجزاء من قصايده... القصايد السرية اللي ما يخلي حد يقراها... وتذكر ابتسامته اول مرة راحت وياه العزبة والقصيده اللي قالها في حمده وفيها... تذكره في المزرعة وفي البيت يوم يعد قصيد لابوه وعمه... تذكر سعيد يوم تهدده عوشه بانها بتدخل الحجرة وتقرا في دفاتره وردة فعله

سعيد: ترومين انتي ... بذبحج
عوشه: ليش هاه... لا يكون فيها اسرار الغرام الاولى
سعيد: هيه ما اقدر اسمح لج تقرين شي ... الحبيبة بعدين تزعل
عوشه: ومنو هالحبيبه هاه....
سعيد: وحده غاوية يا عوشه عليها عيوووون آآآآه يا ويلي ولا طول ما اقدر اوصف....
عوشه: لا والله
سعيد: لا وبعد قالت لي وحلفت لها غيرها ما يفج دفاتري
روضه: ماعليج منه اكبر نصاب
سعيد: عيب تقولين لولد عمج نصاب ... انا اكبر منج
روضه: عيل احلف انه هاي اللي تقول عنها موجوده
سعيد: هاهاهاهاها ليش
روضه: ياخي بنرابعها اللي سوت جيه في سعيد ولد عمي واخوها ... بنشكر فنها اللي يابت راسك
سعيد: انتن ما عندكن سالفه... صراحه القعده وياكن حلوة واااايد... بس انا اريد ارقد شو رايكن تطلعن
عوشه: شوف يا اخوي يا سعيد يا ولد امي وابوي
سعيد: خير يا عوشه يا بنت امي وابوي
عوشه: عطني الدفتر بالطيب لا ادخل يوم تروح بوظبي واشله واقراه وارده قبل لا ترد من بوظبي وانت ما تدري
سعيد: منو قالج اني يوم بروح بوظبي بتحصلين الدفتر في الحجرة
عوشه: اممممم خلاص ماعليه باجر يوم تطلع
سعيد: امممم باجر بحطه في السيارة يوم اطلع
روضه: انتي بعد غبية تقوليله خطتج ... جنج تقوليله شله حطه في السيارة يوم تطلع... لو سكتي كنا دخلنا الحجرة وقريناه
سعيد: هاهاهاها تعلمي من بنت عمج

نفسه الدفتر اللي ما طاع يعطيهن يقرنه في الحجرة وجدام عينها تقدر تفجه وتدور فيه وتقرا فيه على راحتها ... سعيد محد ويمكن ما يرد ... بس ما قدرت تفج ولا حتى الصفحه الاولى منه شي قوي منعها من انها تفتش في دفتره... رغبتها في انه يرد باجر مثل ما وعدها ... وخوفها من انه يكتشف انها فتشت في الدفتر وفي الاوراق وقرت اسراره اللي ما يرد حد يعرفها .... وفي خاطرها تقول اوعدك يا سعيد اني ابطل الفضول وهالسوالف كلها وما اسوي شي الا اللي تريده بس انت رد بخير... رد ما اتخيل هالبيت من دونك ولا هالحجرة دون راعيها... ما اريد اشوف عمي يصيحك... ما اريد اشوف الشفقة في عيون حد على حالنا لا تروح يا سعيد وتودرنا

بعد نص ساعة اتصل عبود البيت يقولها ان سعيد خلاص راح ... محد مثلها راح يحس باللي تحسه ... ابوها وامها والانسان اللي حبته في حياتها وهي بعدها ما كملت 22 سنه ... بعد عشر سنوات شو بيصير لها ... كانت تصيح نفسها اكثر مما تصيحه .. تصيح الفرحه اللي ما لحقت تفرحها وياه ... كان يباها وكان بيخطبها بس شو اللي خلاه يتريا هالكثر لين بعد العيد .. ليش يموت في الوقت اللي تحس عمرها ما تقدر تعيش بدونه ليش ... ليش هو بعد يقرر يروح ويخليها ... وحيده مثل ما كانت طول عمرها قبل لا تشوفه وتعرفه واتيي بيت عمها... ليش في نفس اليوم اللي يحسسها انها ملكت العالم والكون .. يوم ملكت حبه هوه وقلبه هوه يروح ويخليها...

للاسف ... كان كل شي عندها في حياتها كل اللي حواليها حبوها ودلعوها ... عندها الجمال اللي مب عند حد ... وعندها الدلع والحب اللي ما حد ادلعه .. الا الناس اللي حبتهم وكانت تريد تكون وياهم امها وابوها واخر شي ولد عمها ... اللي حبته وكانت تتريا اليوم اللي بيكون لها فيه ... وفي الاخير عرفت انه يحبها بس قالها وراح

هذي روضه بنت محمد احلى بنت في العالم والكون والمجرة ...


النهــــاية


















ما بعد النهاية


بعد 12 سنه في المزرعة ... كانت روضه واقفه مجابل البقعه اللي فيه الدراجات وتذكر ايام ما كانوا هنيه ويا سعيد ولد عمها ... يوم طاح وتعور .. كانت تحبه بالرغم من انها زعلانه.. حتى قبل ذيج الايام كانت تحبه ... كانت تحبه من اول يوم شافته فيه في بيت عمها ... ويوم عد القصيد فيها في العزبة ... ويوم راحت بوظبي ... ويوم ضربها ... ويوم خطب غيرها كانت تحس قلبها يحترق من الغيرة... واتعلثت بالزعل عشان ما تعترف بحبها له ... وبلهفتها عليه ... تتمنى لو انها ما زعلت عليه في أي يوم في حياتها لو كانت تدري انها بتفقده بهالطريقة البشعه ما زعلته ابدا ...
كانوا العيال يلعبون صوب المسبح .... وسعيد ولد فاطمه قاعد ويا يده وابوه ... وروضه بنت عوشه عدال المسبح تلعب بالقيم بوي ... والباقين منتشرين في كل مكان .... في حجرة بناها عبود في المزرعة وحولها له مرسم... منتشره في كل مكان داخله لوحات شي كامل وشي مب كامل ... كان قاعد وحاط على الستاندر لوحه يحاول يكملها.... ما كان يشتغل فيها الا يوم ايي المزرعه ... حدرت عليه وهو مندمج باللي يسوي سارة حرمته وفي يديها صينيه عليها كوب نسكافيه وبسكويت ... ابتسمت له وراحت عداله

سارة: للحين ما خلصت
عبدالله: لا ... باقي شوي
سارة: عبدالله بتكمل عشر سنين وانت ترسم في هاللوحه
عبدالله: ادري ... احس انها كلها اخطاء ... تدرين لازم اعيدها
سارة: لا ما فيها اخطاء حلوة وايد
عبدالله: (وهو يبتسم) لانج ما شفتي ملامح ويه سعيد عن قرب وما عرفتيه ... ما كانت جيه ملامحه ... كانت دوم غير فيها شي ما اقدر ارسمه
سارة: انت مب قادر ترسم مشاعر اخوك ... اللي تحاول تسويه في هاللوحه انك تجسد مشاعره فيها
عبدالله: يمكن
سارة: زين بسك من الصبح في المرسم ... تعال بنقعد عند عمي
عبدالله: (يبتسم لها) قولي اشتقتي لي وبنش
سارة: (ضربته على جتفه) يا بايخ
عبدالله: هاهاها يا حافظ على الخجل .. (وهو يحط ايده على بطنها) شحال سعودي الصغير لا يكون مأذتنه
سارة: الحين شحاله هوه ... وانا اللي بأذيه مب جنه هو اللي داخل بطني ومأذني
عبدالله: فديت روحه يا ربي
سارة: بعد من الحين ... انا ببدى اغار

ابتسم لها عبود ورد يطالع في اللوحه اللي جدامه واللي مب قادر يكملها للحين ... اما هيه فطلعت وخلته لانها تدريبه ... يوم يقعد يطالع اخوه في اللوحه بهالطريقة يعني يريد يكون بروحه وياه ... عبود تزوج سارة بعد سنتين من وفاة سعيد ... وبالرغم انها ما قدرت تحمل طول السنوات العشر اللي مرت الا انه تم يحبها بنفس القوة وكان دايم عنده امل ان عياله بيكونون منها ... وفعلا الحين هيه حامل في اول ولد لهم ... واللي قرر ان اسمه يكون سعيد على اخوه .. على امل انه يكون مثله في كل شي

روضه كانت على وقفتها نفسها جدام البقعة اللي يلعبون فيها دراجات ... وهي تتأمل في الرمله جدامها يتها عوشه ووقفت وياها ... كانت نظراتهم على العيال اللي يلعبون قريب الشواب


عوشه: شو تسوين
روضه: ماشي ... اتمشى
عوشه: بعدج مصرة على رايج
روضه: خلاص خلص العمر يا عوشه ... مب الحين بيي اعرس عمري 34
عوشه: يعني لا
روضه: اكيد لا
عوشه: تعتقدين ان سعيد مرتاح من قرارج هذا
روضه: (وهي معصبة) هذا قراري بروحي ليش تدخلين سعيد في الموضوع
عوشه لانه من مات وانتي تعتبرين ان خلاص العالم انتهى
روضه: لا مب صح
عوشه: شو اللي مب صح بالضبط ... انج تجتلين نفسج واللي حواليج بالبطيء ... تعاقبين نفسج على موت سعيد.. تتحرين مرتاحين للوضع اللي انتي وصلتي له ...
روضه: (بقمة العصبية) انا ما اعذب حد ولا اعاقب نفسي ... وسعيد ماله دخل بقراراتي هاي ... واذا وجودي مضايج حد اروم الم قشاري واروح افج بيت امي
عوشه: (اللي حست ان روضه تسويها) لا ما يحتاي ... خلاص اسفه

وردوا يشوفون العيال ... كانت روضه بنت مبارك وعوشه قاعده تلعب على طرف الحوض ... وياها محمد ولد خالد هوه ومنصور ولد فطوم وحميد يغايضونها ... وهي ساكته عنهم .. فمط محمد القيم بوي من يدها ودزها في الحوض ... وراح سعيد ولد فطوم طلعها من الحوض وهو معصب عليهم

سعيد: انتوا رياييل ونكم هاي حركاتكم
محمد: دومك دومك تدافع عنها ... ما ادري على شوه .. سخيفه وشايفه حالها ومالها مكان بينا .. اصلا ما ادري ليش اييبونها وياهم .. خلوها في البيت
سعيد: تصدق انها مزرعة ابوها ويدها ... انت ليش ياي
منصور: المزارع حق الاولاد مب البنات
سعيد: لا والله وخالاتك مب بنات وحريم هاه
محمد: برايهن عماتنا غير يايات ويا رياييلهن .. هي شو يايبنها ...
سعيد: انا اكلم منصور ما اكلمك
منصور: كلام محمد صح
محمد: ماعليك منه مال دبي يحب البنات
سعيد: ليش ومنصور مال وين ان شاء الله
منصور: أي نحن هل العين ما عندنا واحد اثنين
سعيد: انتوا الاثنين متخلفين ... هل العين ودبي حشام عن طباعكم

يتهم بسوم من بعد وهي تشوفهم يضاربون ... بلاكم انتوا شو عندكم ...

سلطان ولد بسوم: مثل كل مرة عقوا روضه بنت عمي مبارك في الحوض ... وسعيد طلعها
بسوم: وليش عقيتوها في الحوض بتمرض البنت جيه
محمد: محد قالها اتيي ماشي بنت غيرها
سعيد: بتي بكيفها زين ... انا اريدها اتيي .. واللي يقولها شي يا ويله

كانت روضه الصغيرة تصيح وهي بردانه فشلتها بسوم تغير لها ثيابها وتموا الاولاد مع بعض بس سعيد رد عند يده وابوه في الميلس ... وتموا الباقين يلعبون ويضحكون .. اللي يقهر ان محمد فر القيم بوي ولا كأنه تهجم على بنت عمته عشانها... ويا صوب روضه وعوشه عشان يلعب بالدراجات

تمت
بقلم أحبك إنت