ديوان الشاعر : مستور بن عوض

هلا بك

هلا باللي سرق نومي وخلا ني سهير الليل
هلا بك كثر ماخيم علينا الليل بسكونه
هلا بك وان بغيت الصدق مشتاق اللقا بك حيل
عليك من الوله قلبي حزين ويعزف اشجونه
احبك كبر هالعالم ومن فرقاك ذقت الويل
ياليتك ترجع لخلك تشوف الشوق بعيونه
احسك في سما عمري تنور مثل نجم اسهيل
بدونك ينطفي ضوي واعيش الليل بجنونه
سقا الله يوم انا وياك نبكي والدموع تسيل
سقا الله قلبك الوافي وكيف اعيش من دونه
حبيبي والله ان قلبي يشيل الشوق يمك شيل
دخيلك ارجع وخيب هقاوي الليل وضنونه

عذبني بحبه

بالله يا نجم السما قلي اش صـار
عسى حبيبي ما حصلـه مصيبـه
قالوا لي أنه سافر وقلبي احتـار
وشلون يرحل ما يـودّع حبيبـه
قولوا له أني حالفن لأخـذ الثـار
وأدوره بيـن الخلايـق وأجيبـه
من عقب ما قفى وجسمي به الزار
عذبني بحبه عسـى الله يصيبـه
أنا أدري أنه لا رجع قال الأقـدار
هي سفرتنـي لكـن الله حسيبـه

ياقسا قلبك

الحين راجع وتتوسـط و ترجانـي
ما كنك اللي نهيت القلب عن حبـك
والله ما أظن بعـد اليـوم تلقانـي
روّح عسى الله يسهل دربي ودربـك
غيرت يا صاحبي رقمي وعنوانـي
وان قلت لي ليه قلت الذنب هو ذنبك
ما كنت أحسّبك في لحظه بتجفانـي
لين اكتشفت الخيانة يا قسـا قلبـك
واليـوم روح ودور واحـدن ثانـي
عساه مع دورة الأيـام يغـدر بـك
وإلا أنا من هل الطـالات شمرانـي
صادق وفي وانت يا غدار يا كذبـك

الحــــــــــب

لاتجرحين اللي من العام مجروح
يابنت يكفي ماحصل في حياتي
حبيت مثل الناس والحب مسموح
والحب عندي صدق واحلى صفاتي
الحب يا كل الغلا منبع الروح
واحلى الكلام اللي تقوله شفاتي
الحب ماهو كلمه تقال وتروح
الحب صدق احساس لين المماتي
حبيت ابين لك عن الحب مشروح
لومت انا يابنت هذي وصاتي