ديوان الشاعر عبد الله الظفيري

ايييييه اشعليك ..~


(يابدر) حالي مثل ماتشوفها
خلني لحظات يرحم والديك
اترك لنفسي تبدّي حسوفها
ودّي آفضفض.. وأجّـل مالديك
شفت لي بنت ٍخذتني وصوفها !
من هنا مرت وانا كنت أحتريك
بنت لو جبنا اللغه وحروفها
مايوفّيها الكلام اللي يجيك!!
خارج المألوف في مألوفها
مارأت عيني لها ندّ وشريك
كن هذي الشمس فوق كتوفها
يوم طلّت.. نورها خطْر يعميك
به حدايق ورد في نفنوفها
وفي خطاويها عطور ٍتنتشيك
توقف الأنفاس حين وقوفها
وفي تثنّيها يثور الدم فيك !
كل بنت ٍما تقرّب.. خوفها
لاتضيع بلفتة ٍمن عين ذيك
وكلّ من قرّب قبل لايطوفها
ماسمعت إلا يقول: "ايييييه اشعليك"
لو تلد للناس .. من معروفها
ولو تهمّشهم.. طبيعي.. ماْيْخفيك
والرجل حتى مرتْه يعوفها
كني ادري فيه باللحظه هذيك
قال في نفسه وهمّ يلوفها:
"ماتقول اشـ معجلك الله يهديك"!!
يابدر لو شفت نقش كفوفها ؟
حاجتك ضيّعتها لو هي بيديك!
ودك إنك شي بين رفوفها
واحتمال تْطل في يوم وتبيك ؟
صدق لو يحصل كذا وتشوفها ؟
(مش حتـئـدر إنّك تغمّض عينيك)!!

الـغـــربــــــه ..~


أبد لاتسأليـن بغربتـي عـن آخـر الأخبـار
عمت عين السفر دامي أذوق المر من كاسـه!
أنا اللي بسألك قولي.. جواب بكلمتيـن صغـار
بلد من دونك (اش) يسوى بعيني؟ يابعد ناسـه
بدونك.. ما أطيق البعد لو هو بيننـا أمتـار!!
ولكن هالفراق أقـوى ولاينفـع بـه سياسـه
ترى لولا اتصالاتك.. برغم اللي يدق.. كثااااار
حشى مافيه أحد غيرك يرد لصـدري أنفاسـه
ألا ياشـوق خفـاق ٍضويتـي ظلمتـه أنـوار
وصار اليوم ينبض لك مشاعر حييييل حساسـه
تبي تدرين بفراقك معي يا الغاليه وش صـار؟؟
تبي تعرفين مجنونك وش اللي قالب ٍراسـه؟؟
لك الله عايش بحالي/ لحالي.. شاعـر ٍمنهـار
وأنا كل ما طريتي لي صرخ شعري بقرطاسـه!
يمر يومي.. ولابه غير همـي والحـزن زوار
عسى الله يرحمه حال ٍغدا هالثنيـن جلاسـه
شحن جوالي أنهيته!! أقفّل .. وافتحه أمـرار!!
قسم لولا رسايلنـا .. حبيبـك قاتلـه ياسـه!
فقدتك والدمع لامن ذكرتـك يفضـح الأسـرار
ولا أشره علـى وقـت ٍبـه الأيـام دساسـه
أسلي نفسي بكثر الأمانـي.. واليديـن قصـار
وأنام وربي العالم وش اللي خاطري حاسـه!!!
كأني من ملك أسهم يبي تضحـك لـه الأقـدار
وقدّم كل ماعنـده.. وفجـأه أعلـن إفلاسـه!!
كأني طالـب بغربـه.. تذكّـر عيلتـه والـدار
وهو كل ماذكـر أمـه! مـلا هالدمـع كراسـه
أعاني كثر ماتملـك ومالـك بالحشـى تذكـار
و(أحبك) والبلا حبـك أبـد مـا أملـك قياسـه
جعل في داخلي عرق ٍسمع بك يا الغلا ماثـار!
يموت.. و وش لي بعرق فوصالك ميت إحساسه
حياتي تسأليني عن جديدي بالشعـر وأحتـار؟
وش أكتب لك شعر وانتي غديتي اليوم نبراسه!
ولكن أوعدك شعـر ٍلاقولـه يتعـب الشعـار
متى ماشفتك وموعـد لقانـا دقـت أجراسـه
لأن مافيني أتحمّل بعـادك فـي سفـر وانهـار
عسى لايعيدها سفره.. ولو هي كانت دراسه!!!

أحـلـــى غـــــــاده ..~


يا اللي لمحتوا دمعتـي بجفونـي
مستغربين اللي حصـل ياسـاده!!
تكفون لفـراق الغضـي خلونـي
أشكي همومي محتضن لي وساده
ماعاد أبيكـم تنشـدون شلونـي
جرحي وعارف علتـه وضمـاده
إن كان بيديكـم سنـع شوفونـي
وإلا اتركونـي للحـزن واجهـاده
من يوم غابت عن سماي وكونـي
مولاة قلبـي.. غايتـه.. ومـراده
أم العيون السود / كـل جنونـي
ست السمر والبيض.. وأحلى غاده
كني عن أبواب الفـرح صدّونـي
وإلا الصبر.. كثر الرجا مافـاده!
لابو قصيد ٍيرتضي لـي هونـي
يشكي من الحظ الردي وعنـاده!
قولوا لها شاللي حصـل؟ دلّونـي
(أبطت) .. وخابر مالهـا بالعـاده
بعض البشـر غابـوا ولاهمونـي
والبعض يمكـن خيرتـي فابعـاده
بس المصيبه لو تصيـب ظنونـي
بغيـاب نـور وطلّـة المـيّـاده
قولوا لها والشـوق زاد شجونـي
وينك؟؟ تراني مـا أطيـق زيـاده
يا ام الغلا كلـه ونـور عيونـي
ياروووح عبدالله ونبـض فـؤاده
شوفي غيابـك يستثيـر سكونـي
والليل عينـي ماهتنـت برقـاده
ضاقت نواحي خافقـي وركونـي
من روحتك فجـأه بـدون افـاده
دفتر قصيديْ اشتاقلك من دونـي
صفحاتـه لرقـة يـدك معـتـاده
وجدي عليـك اليـوم يامظنونـي
وجـد العراقـي لا بكـى بغـداده
أقسم بـرب البيـت واتعرفونـي
وأبيـات شعـري تنتظـر هـدّاده
إن كـان عـادت والله لْتلقونـي
أقصد وألبّسهـاْ القصيـد قـلاده
والحين أبي علم ٍيكـفّ ظنونـي
منهو يجيب أخبارهـا ياسـاده؟؟
أما كـذا .. وإلا ابعـدوا خلونـي
أرجع لحضن وسادتـي كالعـاده!!

|| • مقتطفـآت من قـصـائـده فـي الـحـزن ●• ||



خــذلـنــــــي ..~


دخيـل الله ياقلبـي أنـا طالـبـك تعفيـنـي
أنا طالبـك تنسااااانـي ولـو مـره تخلينـي
أعيش بدنيتي وأهنا مثل باقي البشـر سالـي
بدون الحب ياقلبـي وبـدون همـوم تكوينـي
أنا ماعـاد فينـي روح تبيهـا تتبعـك ثانـي
انا فيني جسد باقي بـدون شعـور يحوينـي
على كثر القلوب اللي هوينا ماصدق واحـد!!
ياقلبي ابتعد عنهم ترى اللـي فينـي كافينـي
زرعْت الحب فأعماقي وحصدْت جروح تاليها؟؟
وردى هالحظ خاواني ولقى كل مايبـي فينـي
كثير أحباب حبينا وعطيناهـم بـدون حسـاب
ولاخذنا سوى غدر ٍمـلا راحـات كفينـي؟؟
وكثير أسباب تجبرنـا بـلا حسوفـه نخليهـم
لأن والله مافيهـم ولا واحـد مـلا عيـنـي
ولكن أكبر الصدمات جتني مـن يديـن اللـي
حسبته غير كـل النـاس ومايعنيـه يعنينـي
هذاك اللي تصورتـه طمـوح العمـر ياقلبـي
هذاك اللي تخيلتـه هنـاي وضحكـة سنينـي
عطيته من دفا روحي قصايـد أشعلـت ليلـه
وأنا ما أكتب لغيره ولا أي شخـص يغرينـي
كتبت أحلى كلام الحب فـي عينـه ولافكـرت
يجي اليوم اللي أستخسر قصيدي في محبينـي
على مبدا (الخصوصيه) يحاول يبعد اشكوكـي
وعلى مبدا (الصراحه) كنت وكانت لعبته فيني
خذلني للأسف والله وهدم كـل مابنـا بلحظـه
وطلع هالحب مايسوى مواطي تراب رجلينـي
أنا كنت أحسبـه أعظـم علاقاتـي ولاظنيـت
بأن أعظم علاقاتي بخيانـة حـب تنهينـي!!
ويمّي صاحبـي دايـم يذكّرنـي بوهـم حبـي
وأقول: ارتاح ياعمي ترى الله عنْك مغنينـي!
خسرت أصحاب من حولي خسرت الكل بأسبابه
ألا حسبـي عليـه الله كثـر ماهـو معنّينـي
أفااااا ياقلبي الطيب...أفـا وشلـون ترضاهـا
وأنا من صدمة ٍبالحب إلى صدمـه تودينـي
بدون عناد اسمعني ولا تفتح لـي الموضـوع
حشا لو تفتحه ثاني لأشيلـك مـن شرايينـي
خلاص الحين انساهم وأنا ماعاد فينـي حيـل
لهم رب ٍيجازيهـم .. ولـي رب ٍيجازينـي

خلااااص ضاقت بي الرياض ..~

لامن رمـى ليـل العنـا همّـه علـي لْحالـي
وغيري قضى هالليل نايم في حضـن محبوبـه
وآنا اسهره متوسـدٍ حزنـي وضيقـة بالـي
من وحدة ٍطالت وفرحـة خافـق ٍمسلوبـه!
والذكريات اللي مضـت لـي زوّدت غربالـي
والنفس طابت.. والصبر عوّد علـيّ عقوبـه
"ياخالـد حمـود" الحكايـه كلّـهـا ياغـالـي
ودّي أفضفض لك خوافـي نفسـي المغصوبـه
مانيب شاكي من سواليـف الهـوى واطلالـي
ولانيب شاكي لك جروحي من جفـا رعبوبـه
مشتاق لك والله وانا كـل مـا ذكرتـك خالـي
أتذكّـر أيـام (الخُبـر) والجامعـه كـل نوبـه
اشتقـت للشرقيـه وكـل مابـهـا يحـلالـي
واشتقت لسنين الدراسه.. والسكن.. وقروبـه
ماكنت أحسّـك ساكـن بجنبـي ودوم قبالـي؟
كنت انت ساكن وسط قلبي وعارف ٍمطلوبـه
ياهو كئيب الكـون وايامـي فـلا تهنـا لـي
ياخي بعد فرقاك .. عنـدي ماهـي بمحسوبـه
خلاااااص ضاقت بي الرياض بكبرها من تالـي
ماعاد لي فيهـا مكـان وحاجـة ٍمرغوبـه!!
هي عامره بوجود أهلهـا فـي أمـان الوالـي
والعاصمه من كـل شعـب المملكـه مخطوبـه
بس البـلا لا ضـاق قلبـي عارفـه مايبالـي
هو ياخذ الحاجه .. ويتركني غريـق ذنوبـه!
خالد!! تخيّل.. من كثر همي وسـوء أحوالـي
مابه مكان ولا صديق اسلى وأسيّـر صوبـه!!
من شقتي .. لين الدوام .. لشقتي .. منوالي!
لا الوضع هـذا يصلـح لخيّـك ولا لأسلوبـه
مافادني صدري الوسيـع اللـي ملتـه آمالـي
وحشة .. وخلّت دنيتي مـن عقبهـا مقلوبـه
كثـر الشكـاوي ماتفيـد المحبطيـن أمثالـي
أدري.. ولاتشره على مـن يهـذي بغيبوبـه
يارب أبي تيسيرك لأمـري.. وغيـرك مالـي
وان كان – نقلي- (للخُبر) حاجه مهي مكتوبه؟؟
طالبك أنا كنز القناعـه/ واقتنـع فـي بالـي:
ويصير لي حضن الرياض أدفى من المحبوبه!!

|| • مقتطفـآت من قـصـائـده فـي الــمــدح ●• ||



يـــابـــــوي ..~


يـارب ياعالـم بكتمـان الصـدور ومايـجـول
صفّ النوايـا فـي نفـوس ٍللحيـاة مودّعـه
يا الله وانت أعلـم بغايـة نيتـي واللـي أقـول
القلب وإن دار الزمـن تبقـى الهدايـة مطمعـه
والشعر نظمه ماهو بكيفي وأنـا شاعـر ملـول
الشعر لامن حام مع سرب الفكـر جـاوب معـه
يابوي وانت الله عطاك مـن المهابـه والقبـول
حتى القصيد ان قيل في حضرة جنابك.. ترفعـه
لا لا تحاتي.. يابعد راسي عسى عمـرك يطـول
وانت اللي من خوفك علينا / زود حرصك تتبعه
من رحمتك فينا تَعَلَّمنـا عـن الرحمـه فصـول
من قلبـك الوافـي عرفنـا كـل خيـر ٍندفعـه
ياما على الدم والقرابه تصبر وشلـت الحمـول
ياما عملـت ومـادروا لجـل القرايـب تجمعـه
من كثر ماوصيتنا بوصل الرحم ظنـت عقـول:
إن الرَحَم أولى مـن الوالـد بطيـب ومنفعـه!!
يابو الفقير اللي تضايق مالقـى بعمـره حلـول
يابو اليتيم اللي انمسح بأطـراف كمـك مدمعـه
من يجهلك يا اللي جرى طيبك كما مجرى السيول
ما يجهلك غير الجحـود اللـي ظنونـه تخدعـه
يا الحاسم اللي نعرفك ماتقبل أنصـاف الحلـول
كل ما ذكرناْ إنك ورانـا.. ناخـذ الدنيـا سعـه
يامروّض صعاب الزمن مهما الصعايب بك تحول
ماهو مثل من قال: إن طاع الزمـن.. وإلا طعـه
إنت المواقف في حضورك ماهي أقـوال وفعـول
إنت الفعل يسبق كلامـك ليـن غيـرك يسمعـه
يابوي لو ماعادتك بالطيـب والفزعـه عجـول؟
ماضـاق ديوانـك وبيبـان البيـوت مشرّعـه
ماقد خذلت انسان جاك ولا رجـع منّـك جفـول
يوم إن أغلب هالبشـر حتـى الأخـو ماينفعـه
نلت المهابه من شيوخ ٍيـوم غيـرك ماينـول
إلا انهم..؟؟ وإلا بلاش.. أسكت وغيري يطلّعـه
أدري القصايد في رجا شرواك مـا والله تطـول
مـن رُبْـع ماتفعـل يمينـك يافخرنـا ومنبعـه
كم شاعر ٍقبلي تغنـى وجـاك فأبياتـه خجـول
با الله قلي: كـم قصيـده فالـدروج موزعـه؟؟
وأدري الشهاده فيـك مجروحـه ولكنـي بقـول
إن الشواهـد فـي كلامـي ياعـرب تستشفعـه
لكن وانا ابنك مانويت أكتب وأنا شاعـر ملـول
بس الشعر لا لاح لي.. مافيه شـي ٍيردعـه!!

|| • مقتطفـآت من قـصـائـده فـي الاسـلام ●• ||


الــعـقــل نـعـمـــــه ..~

الزمـن فـي آخـره.. واحنـا نيـام!
والفتـن فـي وقتـنـا مسترسـلـه
والله اللـي كافـل البيـت الـحـرام
دون هالعـالـم بـأمـره يكـفـلـه
و"العقل نعمه" .. ونـور ٍف الظـلام
[والعواطـف].. آخرتـهـا وَلْـوَلَـه
ديننـاراجـع مثـل بـدر التـمـام
الـبـلا بالجـيـل والـلـي مثّـلـه
يـا منـادي (للعروبـه والوئـام)!!!
منطـق .. الواقـع رفـض لايقبلـه!
العروبـه زيـف صدّقـهـا عَــوَام
ماقـروا تاريخـنـا وش بهـذلـه!!
العرب بالمصطلـح: حـرب وصـدام
ماضـي وتاريـخ اســود يحفـلـه
ليـن بالدّعـوه صـدح خيـر الأنـام
لمّهـم فـي ديـن .. ربـي كمّـلـه
ماعمـر [إسلامنـا] بــادر وقــام
مـن دعـاوي عــرق وإلا قَبْيَـلَـه
شوف (طارق) / بربري.. ذاك الهُمام
البحـر خلْـف.. وجيـوش ٍمقبـلـه
أحـرق السفْـن وخيـاره والـمـرام
ينتصـر.. وإلا الشـهـاده منـزلـه
شف (صلاح الدين) / كردي.. بالحسام
حـرر الـقـدس بعقـيـده تشعـلـه
قـادة الأمـه بقـوا رمـز ووســام
كردي وإلا بربـري؟؟ مـو مشكلـه!!
قـوة الإيمـان تـفـرض هالـكـلام
وديننـا مـاسـاد بــس بمرجـلـه
الله أكبـر يازمـن ماهـو حــرام؟!
بعـد ذاك العـز صرنـا مهـزلـه!!!
كـل مالـديـت وجـهـي بالـزحـام
أرض مسلوبـه.. ونـاس مقتّـلـه!!
أي مسلـم يرتجـي خيـر وسـلام؟؟
والخيـانـه بالـعـدو متغلـغـلـه!!
كيف هو يفـرض عليـه الإحتـرام؟؟
دام خـيّـه أول الـلـي يـخـذلـه!!
مانجـيـد إلاّ نـكـيـل الإتـهــام
والنتـايـج بالبشـايـر ممـحـلـه
مـن دعـا للجاهليـه كــل عــام
صام صام ولا لقـى قشـر بصلـه!!
القضيـه هــي عقـائـد بالتـمـام
عارفيـن أبعـاد هـذي المسألـه؟؟؟
ياعـزيـز وياحكـيـم ويـاســلام
مـن لنـا غيـرك إلهـي نسـألـه؟
ردّنـــا يـاربـنـا رد الـكــرام
لـك .. وتكفينـا زمــان ٍنجهـلـه
عجّـل بنصـر ٍلدينـك مـا يُضـام
والعبـاد اليـوم.. مـا منهـم دلـه!
من رضى بالـذل .. يبشـر بالعـدام
مامحـى التاريـخ شـئ ٍسجـلـه

|| • مقتطفـآت من قـصـائـده فـي الـحيـاه الاجـتماعيـه ●• ||



سـبب كـتابه القصـيده .,’
سافر أخو عبدالله الأكبر نواف للدراسة خارج المملكه
وكان كثير الإتصال على هاتفي لتخليص الأمور الخاصه فيه
وعند إحساسه بأنه أثقل علي قال: (الظاهر إني غثيتك ياخوي)!!!


نــواف ..~

نـواف ياخـوي اتصـل
فرقاك خلتني امغبـون!!
أفرح برقمـك لاوصـل
وان غاب خيّمني سكون!
يابو شهد .. آمر وقـل
قول وعلى خيّك تمـون
ماصابنـي منّـك ملـل
ولاطرت لي هالظنـون!!
ياكيف ابزعل منْك أجـل
وانا حياتي لك تهـون؟
ياخوي بـس لاتنشغـل
آمـر وتفـداك العيـون
إنت الذي كم ليـل حـل
تسهر وتفضحك الجفون!
كم شلت عنّا من حمـل
كمّ احملت ذيك المتـون؟
ياذخرنـا وقـت الثقـل
لاصار به من يبعدون!!
مثلك فلا عمـره زعـل
تدمح خطايانـا بهـون
كبير من صغـرك تقـل
مولـود للعليـا تكـون!
يفـداك كلـي ياجـعـل
ماذوق يومك يا الحنون
والحين بشّر وش حصل؟
دام اللي مثلك يرتقـون
كيف الدراسـه يابطـل
قلي عسى ماتتعبـون!!
وانا اطلب أعدل من عدل
بعد التعب ماتخسـرون
بس انت ياخوي اتصـل
وآمر وتفـداك العيـون
واللي على اخوانه بخـل
يا الله أبد لا يكثـرون!!

|| • مقتطفـآت من قـصـائـده فـي الـهـجـاء ●• ||



روحـي الله لايـردك ..~


لا وربّي لا حشى ماقـول روحـي بالسلامـه
إبعدي يابنـت عنـي.. روحـي الله لايـردّك
من متى مثلي تنـازل يبـدي لمثلـك ملامـه؟
والله إن قلبي وأعرفه مادرى عن جـد جـدّك
عادتـي والله خطـا غيـري أردّه بابتسامـه
لكن انتي ماسكتّـي ولاوقفتـي عنـد حـدّك!!
اسمعي من صدري المكبوت واستلمي كلامـه
صدري اللي كم شكيتي لـه غرابيـل ٍتهـدّك
صدقيني يوم صديتي عـن القلـب وغرامـه
ضعتي وضيّعتي فرصه غاليـه كانـت بيـدّك!
الغرور أكره طريقه وأرفض إسمـه واتهامـه
لكن انتي مو كفو اللـي يحتـرم رايـك وردّك
تذكرين شلون كنتـي غايـة العمـر ومرامـه
ومنهو بس اللي يفكّر أو يصيـر بيـوم نـدّك
والقصايد في لقانـا ترسـم الحـب وهيامـه
ومنيتك لو تسمعي بيتين من شعري.. تسـدّك
كان طبعك في حضورك يفرض بقلبي احترامه
وكان اسلوبي وطبعي وكـل تفكيـري يشـدّك
يوم كنتي عايشه ويّـاي فـي عـز وكرامـه
خلي صدك ينفعـك يـوم ٍتماديتـي بصـدّك
انتي الظاهـر تبيـن اللـي يبادلْـك اللئامـه
واحد ٍيضحك عليـك ومـن بَعَدْهـا يستبـدّك
واحـد ٍمايملـك بقلبـه رجولـه أو شهامـه
كل همه حاجـة ٍلامـن قضـى منهـا يهـدّك
اذكري عبـدالله لاعضيتـي ابهامـك ندامـه
واذكريني زين لاسالت دموعـك فـوق خـدّك
واخذي وقتك وابحثي في وسط هالكون وزحامه
والله ماعمرك تلاقي شخص باخلاصي يـودّك
والله إني في المحبـه ناجـح بميـة علامـه
وانتي أصلا فاشله ودرب الفشل دايـم مـردّك
فكّني الله من هواك وأحمـده جتنـي سلامـه
وانتهيتي من حياتي وانكشفتي وبـاح سـدّك
ثقـل دمـك مايعالجهـا طبيـب ولاحجامـه!!
ومخك مقفّل ويجهل من معاك ومنهو ضدّك!!!
اسمعي الزبده: ولاواحـد نبـي يكثـر كلامـه
وانتي روحي جربي غيري وشوفي اللي بودّك
بس قولـي لابكيتـي وانحرمتـي الإبتسامـه
قالها عبـدالله أول: فرصـه وكانـت بيـدّك !

|| • مقتطفـآت مـع اجـمل قـصـائـده فـي اغـراض الشـعـر الاخـرى ●• ||


( هالشّـكل ) = ( كذا ) ..~

تضحك تقول أموت بك لاقلت كلمة (هالشّكـل)
ياحلْوَها لاقلتها.. وإلا احنـا / كلمتنـا (كـذا)
يابنت.. جوزي عن سواليف اللكاعه والهبـل
وإلا انتي مـا والله وراك إلا المشاكـل والأذا
ما كل شـي ٍتشتهينـه.. تحسبينـه ينوكـل
قولي هو اللي سابقك بالدرب هذا..وش خـذا؟
بس اتركي عنّك علاقـات الصياعـه والغـزل
وإن أشَْكلَتْ لك هالشّكل! روحي اقلبيهـا هكـذا
مانيب أنا اللي يجذبه مدحك وترتيـب الجمـل
اخذي الحكي من قاصره: لو تبعدي... ياحبـذا
مدري؟؟ و لك فتره تبين تكلمين بـأي شكـل!
نوعيتك (متعوده .. دايما ً) تحب هـذا.. و ذا
يالعنبوا اسلوبك صراحه مـا يجاريـه الخبـل
ولا يدوس الشوك غير اللي على دربـه حـذا
يمكن أفكّر أعشقـك.. إذا بقيـت بـلا عقـل
بس احتريني/ واحتري متـى تجـي كلمـة إذا
والله يا إن البنت روعتهـا بحياهـا والخجـل
والموت لا بيّن خجلهـا.. شفتهـا ورد وشـذا
هذي قصيده قلتها من زود قهري فـي عجـل
ولا بعد ودّي تطول السالفـه أكثـر ... لـذا :
والله تراني ماهضمتك .. بس / كيفي / هالشكل
وإن مافهمتي هالشكل .. ترى بلهجتكم كـذا !!