 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
|
|
#1
09-03-2010
|
||||||||||||||||||||||||||||||||
|
||||||||||||||||||||||||||||||||
"غريــــــــــب غريب شايل جروحي والحكي ويا..غريب داير وروحي هدها ممشاي..غريب غريب غريب غريب...امشي وفي قلبي حزن ..عشقي وطرب في الروح..دايم في بكاي..بدت غربتي خطوه مع اللي انقال"
دشيت حجرة خوله و انا فيني غصه..حميد رفضني بس عشان ما يدمر مستقبل نهله ..الحق علي كنت اتوقعه بسوي أي شي بس عشان اكون من نصيبه ...يلست ع الكرسي الهزاز و حضنت الارنب الموجود عليه..كل شي اباه ينجلب ضدي..كل شي اتمناه ما يستوي..ليش يا ربي ؟؟؟؟فشلت و انجرح قلبي نزلت مني دمعه غيض..حاولت اداريها رفعت راسي فوق و غمضت عيوني و انا ميته قهر.. سمعت خوله تزقرني: نوره نوره .. رديت عليها و انا بنفس وضعي: هااااااااااه خوله: شفيج ...؟؟ نوره: ماشي "طالعتها و ابتسمت" ما في شي مهم ..يالله قومي تغسلي و صلي الظهر عشان نتغدا و انروح الصالون .. يلست خوله: مب توه الناس ليش مستعيله.. هزيت جتفي: عادي .. نشت خوله و شلت فودتها و قبل ما ادش الحمام سمعتها اتقولي:انتي اليوم مب طبيعية.. اكيد مب طبيعيه..لانج ما اتعرفين يا خوله شو الي صار..شي يقهر و غيضنـي ... ابرايج نهلوه تزوجي بـ عمور بس عساج ما اتجوفين الفرح و السعد فـ حياتج قولي آميـن ..صلينا الظهر انا و خوله.. و عقبها بشويه ياه المطعم جدر العيش و كان حجمه وايد عود...سرنا المطبخ انا و خوله عشان نساعد خالوه مريم ...كانت تغرف العيش فـ الصحون الي كانت تغسلها خوله و انا اغلفهاا . و شويه يت خلود اتساعدنا ...حمدت ربي يوم جفت خلود ابروحها يايه من غير نهله عقب عرفنا انها ما يت بحجة عندها جسوم خالوه مريم: خوله اتصلي باخوج خليه ايي يجسم العيش .. اتصلت خوله بـ خليفه قالها بتاخر لانه مشغول في بيت عمها يدلي المطعم مكان البيت بالضبط.. خالوه مريم: خلود عيل اتصلي بريلج خلييه ايي لـ ما يوصل خليفه..فضيحه انا مخبره حريم الفريج ما يطبخون و الحينه بتاخر عليهن .. خلود: محمد راقد بجوف حميد.. شويه و يااه حميد..ع الرغم من ان حميد لوتي و اكبر مغازلجي الا انه الوحيد صج وقت ما تحتاجين يكون موجود..صج من هاي الناحيه محد يسواه لا خليفه ولا عمور ولا محمد ... حميد: السلام عليكم.. الكل:عليكم السلام.. ما حطيت عيني بعيونه بالعكس من سمعت حسه و هو يسلم عطيته ظهري ..كانت خلود كاتبه اسامي البيوت الي بياخذون لهم غدا فوق القصدير ...حطت خالوه مريم الصحون فـ صينيه و عطتهم لـ حميد. سمعتها اتقوله: علني فداك محد ينفعنا غيرك..يعل الله يرزقك بالزوجه الي تسعدك بغيت اصد صوبه و اجوف ملامح ويهه بهذيج اللحظه بس شي بداخلي منعني ...سويت روحي مشغوله ..بغسيل الفواكه خالوه مريم: يمه خلود خذي باجي الصحون انتي و نوره.. اووووووهوووو ها الي انا ما اباه يخي شو يابنـي انا اليوم هني ..لو تميت مرتزه في شقتي و بين اربع جدران اخير ليي ..المهم و الاهم امرنا لله شليت صحنين و شلت خلود صحنين..مع ان الصحون كانت وايد عوده الا إنـــا قدرنا انشيلها...فتح حميد باب سيارته من ورا ..حطت خلوود الصحنين الي كانت شايلتنهم ..سرت انا صوب الباب الثاني و فتحت نزلت راسي داخل عشان احط الصحنين بس جني دعمت صخر ..حسيت راسي تكسر..دعمت راس حميد..شو يسوي هاه مدخل راسه كان يعدل صينية الصحون و انا الحماره ما انتبهت .. رفع راسه: سوري .. حسيت ان راسي ورم بس اوني شجاعه ما صابني شي ابتسمت: انا الغلطانه... و سرت عنه داخل قبل لا يتكلم باي كلمه..من دخلت المطبخ..اتذكرت الموقف ابسرعه فيلست اضحك ..بصوت عالي...خلود و خوله و خالوه مريم يطالعنني مستغربات و انا ميته ضحك..يلست ع الارض و حطيت ايدي ع بطني.. و انا اضحك: أي يا راسي .. خالوه مريم: تخبلت بنت اختي ..يمه صبري خل اتخلص ملجتنا بعدين طلعي خبالج.. و انا ماشي ميته ضحك..صدق ع قد الدنيا ما تكدرج ع قد ما اتضحكج و لو باسباب تافهه خوله: و الله العظيم من ساعه قلتها انتي اليوم مب طبيعيه صج ما جذبت... خلود: لا يكون حميد دغدغج و انا ما جفتكم رديت و انا اضحك: جب يا البايخه خالوه مريم و خوله = ههههههههههههههههههههه سرت صوب خالوه مريم: خالوه حطي ايدج ع راسي ما اتجوفينه وارم..؟؟ خالوه مريم تتحسس ع راسي: لا يمه ماشي !! نوره: ههههههههههههههههههههههه حميد نطحني براسي الكـــــل و انا معاهم = هههههههههههههههههههههههه دش علينا خليفه: داش مستشفى الميانين انا .. خالوه مريم: الحمدلله ع السلامه و شحالهم قوم عمك.. خليفه: ابخير يسلمون عليج ...هاه شي بقت صحون اوزعها.. خالوه مريم: لا خلاص ماشي .. خليفه: عيل بروح حجرتي انا .. خوله: لا اتغازل اصبري لـ فليل بعد ما تلبسها الدبله .... خليفه: هههههههههه جب... خلود ادق ع الجدر:استحى الريال استحى.. قامت خوله تلحنها: استحى الريال استحى.. قمت انا ارقص ع اغنيه خوله.. و خالوه مريم اتصفق خلود: عاشو عاشو يابس يابس ... قامت خوله معاي ترقص حسينا ان خبااااااااال...صخينا يوم جفنا خالي احمد داش علينا مستغرب ..حسيت ان خالوه اتلومت لان اول مره يجوفه قاعده تترقص و اتصفق ...ضحكنا عليها ...ييرتني خوله..و خذتني حجرة فاضيه..هذي الحجرة كانت حجرة فارس و عمور و خليفه زمااااااان ..بس الحينه خلوها غرفة جلوس ..دشينا اتراويني طقم الالماس ابصراحه كان شي و دش خاطري بس الخاتم شويه كان دفش و يوم قلتها رايي قالت : عادي ها ذوق خليفه... و فتحت شنطه صغيره و كانت فيها هداايا حق العروس و عقد ذهب حق ام العروس ...المهم تغدينـا ...و خلود روحت بيت ريلهااا .. و في طريجنا لـ صالون ..رن موبايلي طلبت من خوله اتجوف من المتصل.. خوله: هذا حميدااااااااان مديت يدي: عطيني الموبايل.. خذته عنها و صكرت ابويهه خوله: مستغربه ليش ..؟؟؟ نوره: انتي تدرين انه البارحه امرمس امه انه يبا يخطبني... خوله: خلود قالت لي.. نوره: و ليش ما خبرتيني...؟؟ خوله: كنت بقولج بس نسيت ليش شو استوا ....؟؟ نوره: الصبح بعد ما رديت من بيت خالوه عايشه لحقني.. و قالي اني اباج حليله قلتله بشرط عمور ما يتزوج نهله.. شهقت خوله: قلتيله انتي صج جريئه نوره: اسكتي رفض صدمني.. خوله: قولي و الله ما توقعته يرفض.. نوره: حتى انا...علشان جي صكرت التلفون بويهه شو يبا مني.. خوله: يمكن غير رايه.. نوره: ما اعتقد بس هاه لوتي يبا علاقتي معاه فـ التلفون ..ما اتجوفين يوم خالوه قالت له في المطبخ الله يرزقك الزوجه الي تسعدك..عطيته ظهري ..بغيته يفهم ان خلاص كل شي انتهى .. خوله: هي جفته يطالعج.. زين نوره يعني نهله بتزوج عمور.. نوره: يولون عساهم الحرق خوله: حرام عليج..بس غريبه انج استسلمتي نوره: من قالج استسلمت بس بعدني بفكر كيف اطيح من بينهم.. خوله: حشى مب اخوج عمور عدوج.. نوره: الا انا يعتبرني عدوتنه جافني ما اطيج نهله قال بخطبها..علهم الدحق خوله: بسج دعاوي .. نوره: وصلنا الصالون نزلي و فكيني من حشرتج.. خوله: عفانا الله .. نزلنا كانت الساعه 3 الظهر حسينا شي زحمه اتريينا دورنا لـ ما خلصنا ع الساعه 7 ..بطلت شعري لانه قصير و مدرج...عيبني مكيابي وايد..و حسيته مغير من شكلي..حتى خوله كانت مسويه تسريحه بس مفتوحه و كانت وايد حليـوه و فستانها عطاها جمال و زادها روعه.. نوره: انروح بيت عمج ع طول ولا انمر بيتكم ..؟؟ خوله: كلمت امايه اتقولي روحوا بيت عمج..بس تو الناس الساعه 7..؟؟ نوره: خلاص عيل انروح بيتكم.. سرنا بيت خالوه مريم...استغربت خالوه مريم من اشكالنا ما عرفتنا ضحكنا عليها...اتصلنا بـ خلود و عرفنا انهن مخلصات من زمااااان ...المهم بعد صلاة العشىى..صلينا ..طبعا انا تامه ع وضوئي...المهم بعد الصلاة...طلعنا انا و خوله بسيارتي . ..و خالوه مريم و عايشه بسيارة خليفه.. و نهله و خلود ابسياره محمد..حميد ما بين بها الفتره ..احسن يولي خلاص ما منه فايده.. وصلنا دشينا جفنا البيت ممزور حريم.. نوره: انتي ما قلتي عائليه لا يكون هذيلا كلهم اهلج من وين طلعوا ...؟ خوله: ههههههههه اسكتي انا ابروحي متفاجاه مثلج.. نزلنا من السياره..سلمنا ع الحريم... و دشينا نحن البنات ابحجرة ارواحنا..استقبلونا خوات شيما و شالونا ع راسهم..جفت كشخه خلود و نهله..ما شاء الله عليها خلود يمكن هي احلى وحده من الموجودات و نهله لا باس...ما بقص عليكم كانت حلوه ... المهم و الاهم طلعنا احلى عن اهل العروس....حطوا خوات العروس الشريط فـ المسجل.. و قاموا البنات يرقصون ...ابصراحه تمنيت ارقص يوم جفت رقصهن بس للاسف ما اعرف ...كانت خوله ترقص بس فجاه يت صوبي و يلست .. نوره: ليش وقفتي ...؟؟ خوله: جوفي نوره هالحرمه الي دشت اتسلم ع بنات عمي .. نوره:شو بلاها خوله: هذي ام جاااااااابر.. نوره: قولي و الله..انا من زمان كان ودي اجوفها..صبري الحينه بادبها لج.. يرتني و قعدتني بمكاني: وين رايحه لا تستهبلين خليها اتولي.. نوره: خلييني اطلع حرتي فيها و ولدها خوله: الله يخليج نوره لا تحرجني .. نوره:بس عشانج.. حطوا العشى و تعشينا احلى مافي الملجه ان الحريم كانوا ابصوب و البنات ابصوب كنا ماخذين راحتنا ...بعد العشـى ..قالوا بدش العروس..حطوا لها الزفه..دشت بس هالمره كان الكعب رافعنها..كانت مبتسمه بس امبين عليها ميته من المستحى..فعلا هاي البنيه جميله...و يا حظ خليفه فيهاا ..اتيمعوا الحريم و البنات داخل الصاله مكان ما وقفت العرووس.. رمستني خلود: نوره شنطة العروس بسيارتج.. رديت عليهاا: هيه.. خلود: زين روحي يبيها فضيحه عن يقولون ما يبنا لها شي سحبت خوله معاي و طلعنا برع صوب سيارتي تفاجا ان الشباب كانوا متيمعين برع ...تغشينا..و سرنا صوب سيارتي ..سمعت عمور يضحك ابصوت عالي عرفت انه موجود و ان عيال خالات كلهم موجودين.. فتحت دبة السياره علشان انطلع شنطة العروس... نوره: خوله ساعديني مب رايمه اظهره الشنطه ثجيله شو محطين فيها سميت خوله:هههههههه يا الديايه.. حاولنا نسحب الشنطه و قدرنا نظهرها من الدبه بصعوبه.. يلست خوله تفرك ايدها: اوووووف يا ثجلها .. صكرت باب سيارتي : يالله خوله اتخيلي عمرج واحد من الشباب و شيلي الشنطه.. خوله: مستحيل اشيلها ابروحي تعالي نسحبها.. نوره: نسحبها !! بتتوسخ بالتراب تفضحينا اندخلها بين الناس و هي مغبره .. خوله: ههههههههه تعالي نشيلها شكلنا بيضحك.. سمع صوت رجولي: خل عنكن انا بشيلها.. رديت لـورا و ردت خوله بعد و حطت ايدها ع الغشوه عشان ما تطيح..انا كنت مغطيه نص ويهي و مظهره عيوني بس يوم جفت ها واقف جريب منا تغشيت ..طبعا ما عطانا فرصه نرفض او انواافق لانه خلاص شل الشنطه ...و سار جدامنا و نحن و راه..زخت خوله ايدي بالقو..فعرفت ان ها جاااااابر فتعمدت اسمعه نوره: شفيج خوله ...؟؟؟ خوله تقرصني من ذراعي.. نوره: لاااااااااااا تقولين هــــــا ولـــــد امـــــه ...؟؟؟ حسيت انه صلب جسمه فعرفت انه سمع رمستي ....حط الشنطه حذال الباب من داخل ما قدر يدش البيت لان شي حريم واقفات في الحوي ...ما علق يوم خطفناه و دشينا داخل ...زقرنا وحده من الشغالات الي شلت الشنطه وودتها داخل حجرة العروس... نوره:ههههههههههه اكيد ندم لانه قدم لنا خدمه خوله ابتسمت و كانت ابتسامتها باهته: انتي خبله بس يستاهل نوره: سمعني صح...؟؟ خوله: هييييييه نوره ليش يسوي جي.. نوره: اقولج عمري خليه يولي ولا تشغلين بالج فيه..استانسي فـ حفلة ملجة اخوج احسن لج.. خوله: أأأأأأأأأأحـاول شويه و دش خليفه و كان معاه سيـف ولد عمه الا هو اخـو شيما..تغطينـا كلنا الا طبعا شيمـا ...وقف حذالها خليفه و اول مره اجوفه مستحي و شكله منحرج...ضحكت عليه ..شويه و نجلب شريط فرقه الحربية.. و قام سيف يرزف بالخيزرانه الي كان شايلنها معاه ..ابصراحه سكت.. كلنا وقفنا انطالعه بس خليفه مدري شو علق عليه فضحك سيف ووقف يسلم عليه و ع شيما...و ظهر من الصاله ...بعد ما طلع سيف تجدمت صوب شيما و خليفه..بغيت خليفه يجوفني...يوم حس بوجودي ابتسمت لي اشرت له . قعدت اسوي له حركات اذكره بالكلام البارحه الي قاله عن شيما..ضحك حسيته تلوم ..شويه اتجدمت خالوه مريم اتسلم عليهم...و معاها خوله و ساعدت خليفه انه يلبس العروس الدبله....ع الساعه عشر دشوا المعاريس فـ الميلس عشان يسولفون و يتعرفون ع بعض اكثر.. عاااااااااد تدرون بي الساعه عشر..خلاص يعني انا سهراااااااانه ...حسيت عمري امصطله خلاص ..الله يعين كيف بوصل البيت....مع ان الجـو كان ربشه ..اغاني و رقص...الا اني فكرت اني اروح البيت خلاص المهم سويت الي علي..و قمت بالواجب.... نوره: خوله خلاص انا بروح البيت..؟؟ خوله: ليش تمي ارقدي معاي اليوم.. نوره: لا ما فيني شو هي حلاوه كل يوم ارقد عندج.. خوله: تمي لااه ما اتجوفينا مستانسات نوره: خلاص مب رايمه ابااااااااا ارقـد تعبت... خوله: زين اتصلي فـ حميد يوصلج احيدج تخافين اتسوقين ف، ليل..و بيتكم بعيد نوره: ماا يحتاي ما طلبتي غير حميد يولي المهم سلمي ع خالوه و باركي لهم .. باستني ع خدي: يوصل تحملي بتصلبج عشان اتطمن عليج.. نوره: شو ها الحنيه الي نازله عليج...اقولج لا تتصلين انا يوم بوصل بدق لج رنه.. خوله: صار مع السلامه حبيبتي .. نوره: ف أمان الله .. لبست عبايتي..و شيلتي طبعا محد لاحظ اني بظهر لان الكل مرتبش بالحفله الظاهر ما بيخلصون للفير ..عيل بالعرس شوبيسون ...المهم الله يهنيهم..ركبت سيارتـي ..حسيت فـ البدايه بالخـوف بس بعدين..عادي جفت الشوارع زحمه هيه صح اليوم الخميس...الكل ياي من بوظبي عشان جي زحمه ...بعد نص ساعه وصلت الشقه...خذت نفس طويل احس من زمااااااااان مودرتنهااا ..فديت شقتي تعودت عليها..صارت موطني و كل شي بالنسبه لي... فتحت عيوني ع الساعه7 الصبح..رحت صوب دريشتي..خذت نفس طويل..اليوم اول ايااام السنة الميلادية..اليوم تبدا صفحه يديده من حياتنا ...اتنهدت تنهيده طويله..طوينا صفحه من حياتنا بسيئاتها و حسناتها .....اتمنى بهاي السنه تتحسن حياتنا للاحسن و الافضل...تمنيت الفرح و السعد يتم مرسوم على محيانا طوال السنين و الاعوام اليايه مب بس هاي السنة....اتمنى لـ خوله انها تبدا حياة يديده و تستقر بحياتها مع عمور اخوي.. .و تمنيت لـ خلود ومحمد ايبون اخ لـ جسوم بهذي السنه..و تمنيت لـ نهله انها تخسف كل سنة..عشان كل المعاريس يشردون عنـهاا ... اما عمور تمنيت ان يرتبط بـ خوله لاني احس هي الانسانه الي تناسبه..و ممكن تقدر تفهمه و تتحمله .و لـ خليفه انه يسعد مع شيما و يرزقهم الله بالذريه الصالحه...و تمنيت لـ حميد انه يوافق على شرطي عشان تحقق امنيتي بالنسبه لـ عمور و خوله... اما خالوه عايشه تمنيت لها دوام الصحه و العافية هي و خالوه مريم..بس خالي احمد تمنيت له ان الله يوفقه بكل سباقات التجديف ..بالنسبه لي ما عرفت شو ابا ...او بشو ابني طموحي هالسنة ....ما عندي شي ارسمه غير اني أأمن مستقبل خوله و ازوجها لـ عمور .. قبل لا اروح المطبخ اسوي لي حليب خطر ع بالي فارس تمنيت له من كل خاطري انه يغيب عن حياتنا و خاصه عن حياة عمور ..اباه يكون بعيد عنا لانا ابخير من دونه ... رحت المطبخ ..سويت لي حليب ..يلست اشرب و انا افكر ..بالي صار البارحه الجمعه ...تدرون شو صار ما بتصدقون ...البارحه العصر رحت بيت خالوه مريم ..لان خوله اتصلبت بي و كانت ميته من الصيــــااح ..خوفتني عليها وايد..ما إني امفكره اخف روحاتي بيت خالاتي شراات قبل ..بس اتصال خوله روعني...لبست عبايتي و شيلتي حتى زلاغي الي كنت لابستنه نسيت افسخه مع اني فسخت كوت عمور الاخضر...المهم طلعت من البنايه مستعيله ووايد افكار كانت فـ بالي ليش خوله اتصيح ..؟؟ خالي ضربها..؟؟ ولا خالوه صار فيها شي لا سمح الله...؟؟ ولا خليفه !!..يمكن نهله ماتت ها عادي بالعكس فكه منها..لالالا حرام اهلها يبونها... وصلت سيارتي..بس كيف افتح السياره و مفتاح السياره فوق فـ الشقه ..اوووف و الحينه تعالي يا نوره و ردي اركضي فوق الله يخسج يا خوله روعتيني زين قولي شو فيج ...؟؟و ريحيني لازم تجوفيني شيفتي يعني عشان تعرفين ترمسين ...؟؟؟ زين كنت برجع البناايه بس الحمدلله عمور توه وقف ابسسيارته..ع فكره تراني ما ارمس عمور من هذاك اليوم الي تضاربنا فيه ولا قمنا تنجاف...المهم ربعت صوبه .. جفته يطالعني مستغرب ..و انا يايه صوبه..ولحقت عليه قبل ما يصكر باب سيارته ... دزيته: وخر ابا سيارتك لازم اروح بيت خالتي ..مستعيله خووووز.. عمور متروع: ليش شو مستوي ...؟؟ نوره: مدري اقولك اذا تبا سيارتي موجود السويج فـ الشقه نسيته هناك..يالله خوز..."وصكرت باب السياره" سمعت عمور يقولي: لحظه لحظه "و كان ميود ضحكته" من جفت ملامح ويهه جي حسيت ابسرعه ان حد يالس حذالي..يا رب لا لالا حرام مستحيل..امري لله صديت..ما اجوف الا فارس متفيرز حذالي...بطلت عيوني . . رفع ايديه و ع محياه مرسومه شبه ابتسامه: انا مالي شغل انتي الي يتي صوبي.. سمعت ضحكت عمور ... طالعت جدامي و رديت ابكل برود: انزل .. رد علي بنبره هاديه: فتحي الباب تراج قفلتيه زين طالعته بعصبيه ..يستهبل علي الحبيب... متفيجه لك انا و خوله حرقت موبايلي كل شويه تتصل .. مت من الغيض يوم جفته يبتسم..اكرهه و اكره نظراته الشيطانيه .. رديت عليه وصكيت ع اسناني : انا الغلطانه اني اركب سياره موصخنها حثاله شراتك.. اتولي خوله و يولون كلهم ..فتحت باب السياره و نزلت...جفت عمور رايح صوب باب فارس..من نزلت فتح فارس الباب و نزل ... عمور: ليش نزلتي نوره..؟؟ فارس يتطنز: سيارتك متوصخه طالعتهم بنظرات احتـــــقار و سرت عنهم بخطوات سريعه ..يوم جفتهم واقفين و يتمصخرون علي..اتذكرت ايام زمان يوم كانوا يسون لي مقالب و كنت آآآآآكل ضرب بسببهم..اشراااااااااار...سرعت بخطواتي يوم سمعت موبايلي يرن...طنشته ما ابا اجوف منوه متصل فيني عشان ما اتوتر ..اكثر..كافي الغيض الي فيني و القهر ...وصلت شقتي و شليت سويج سيارتي .. .وصلت تحت ركبت سيارتي من غير ما اطالع صوب سيارة عمور..ما يهمني موجودين ولا لاء...ما فيني اطالع نظراتهم الي اتغث ..اتخيلوا لو سقت سيارة عمور.. و عممور استخدم سيارتي..يعني ها الخايس بركب سيارتي يهبي الا هو.. و الله احرق سيارتي جان لمسها هالحثاله .. مدري كيف وصلت بيت خالوه مريم ..كنت ميته غيض الا امفوله..المهم حاولت اهدي نفسي..ما ابا اوتر اعصابي علشان ها الاشكال ...نزلت من السياره.. و دشيت بيت خالوه مريم..جفت خالي احمد يسقي الزرع ..غريبه انه مب بالبحر هي صح اليوم الجمعه عندهم راحه..كل الايام يجدفون فيها الا يوم الجمعه... سلمت عليه: السلام عليك خالي ..؟؟؟ رد علي: و عليج السلام هلا نوره جيف حالج..؟؟ نوره:ابخير ربي يسلمك..انت اعلومك و علوم الزرع ... ضحك لي:هههههه الحمدلله دام الزرع ابخير انا ابخير نوره: هههههههه منوه موجود دااخل .. رد علي: بس خوله..خالتج راحت بيت اختها...من ساعه كان عمور هني.. نوره: اخيرا جفته و سلم عليك.. خالي احمد: هيه رمسته من يومين و قال لي بلتزم بالتدريب و اليوم جفته كان ظاهر من بيت خالتج عايشه.. هاه لازم بيظهر من بيت خالوه عايشه تراا اليوم الموعد مع الحبيبه .. ردت عليه: هي ترا ما كان يجوفك يشرد منك عشان ما يتدرب ..بس من رمسته عادي قام يجوفك.. خال احمد:ههههههههههه لمحت حميد ياي صوبنا ..ما ابا ارمسه مالي خلق .. نوره: اسمحلي خالي بجوف خوله.. خال احمد: حياج بنتي البيت بيتج .. دشيت البيت سيده سرت صوب حجرة خوله...دقيت الباب .. خوله:منووووه ..؟؟ نوره: فتحي انا نوره .. شويه و بطلت الباب ...اتفاجات يوم عفدت علي و يلست تحضني ..و اتصيح ابصوت عالي .. نوره: بسم الله الرحمن الرحيم شو مستوي ...؟؟ شو بلاج ..؟؟ خوله"اتصيح" ..................... نوره :: خوله هدي شويه شو فيج..؟؟ خوله: تعبانه نوره.. يريتها و يلستها ع الشبريه : تعطيني خمس دقايق اسوي لج شاي ...؟؟ هزت راسها بمعنى نعم.. و قبل لا اظهر من حجرة خوله رن موبايلي ...فتحت شنطتي ابسرعه ..هذا عمور ...؟؟؟ رديت عليه: نعم ...؟؟ عمور: هاه شو مستوي بيت خالوه مريم... نوره: ماااااااااااااااااااااااااااا يخصك وصكرت التلفون ابويهه رجع و رن بس فريته صوب خوله و ظهرت من حجرتها رايحه المطبخ ..تروعت يوم سمعت صوت حميد من وراي .. حميد: السلام عليج.. رديت من غير ما اطالعه: عليكم السلام.. حميد: كثرت زياراتج بيت خالوه مريم.. طالعته من فوق لـ تحت: حتى انت قمت اجوفك في بيت خالتي مريم اكثر عن بيتكم.. تجرب مني: كنت طالع من بيتنا جفت سيارتج..صافطه هني قلت امر اسلم عليج. و بعد ناوي اظهر مع خليفه .شتسوين..؟؟ رديت: شااي...طول هالسنين كنت ايي بيت خالاتي ما قد جفتك الا هالفتره قمت تثبت وجودك.. حميد: بتصدقيني لو قلت عشانج.. طالعته بسرعه و قلت: لا ما اصدق حميد: نوره..انا.. قاطعته: حميد لو سمحت ما بينا شي خلاص..انت ولد خالتي وووووووووبس.. حميد: بس شرطج ما اروم انفذه... صبيت الشاي في الدله: خلاص انسى الموضوع.. حميد: بهاي الطريقه تثبتين لي انج كنتي تجربين مني عشان بس لاني الوحيد اروم امنع زواج عمور من نهله.. حطيت ايدي ع خصري: نعــــــم ...؟؟؟ يكون بعلمك انت الي كنت تجرب مني ... و بعدين انا عندي الف طريجه امنع زواج عمور من نهله ... حطيت الدله و الاستكانات ع الصينيه و شلتها.. طلعت من المطبخ و لحقني ... حميد: عطيني فرصه.. كملت طريجي: انت حالك حال خليفه و محمد ماشي فرص ولا غيره ..مع السلامه ودشيت الصاله جفت خليفه طالع من حجرته . خليفه: السلام عليج..؟؟ نوره: هلا بالمعرس شحالك.. خليفه : طيب طاب حالج ..شو امسويه لي شاي.. هزيت راسي:لا مب لك لـ خوله انت فارج .. خليفه: زطيه نوره: ههههههههههههه خليفه: ما جفتي حميد بدربج ...؟؟ نوره:برع يترياك انا الي اذكره خوله التوم مالتك مب حميد الشيبه.. خليفه: ههههههههههههه بينا مصالح ..يالله في أمان الله نوره: مع السلامه .. سرت صوب حجرة خوله ..دشيت جفتها سرحانه بس رفعت راسها من جافتني داشه حجرتها...صبيت لها شاي ... نوره: اندوج شربي يمكن مزاجج يتعدل .. همست: مشكوره.. طالعتها ادرس ملامح ويهاا شو بلاها باين عليها تعبانه...مدري خوله شو صابها مستويه حساسه ..تعالوا شو قلت حساسه يعني السالفه فيها جاابر ...!!! قلتها: جابر مره ثانيه .. هزت راسها بمعنى نعم و هي تشرب الشاي ... سالتها: شو مشكلته...؟؟ قلتلج محد بوقفه عن حد غيري..اخ لو اجوفه بس فاجاتني ابتسامه خوله: ترمسين جنج واحد من الشباب .. فرحت يوم جفتها ابتسمت .. خوله: تدرين انا ع هالحاله من الصبح يوم يئست اتصلت بج...؟؟ نوره: ......................"ما عرفت شو اقولها .." خوله: نوره الي يصير لي شي مستحيل .. و ابوي ها البنيه اتعرف كيف اتثير فضولي ما بغيت اسالها ولا سؤال اباها ترمس ابروحها بس شكلها ناويه اتخبل فيني قبل ...بغيت ايير عنها استكانة الشاي بس علشان ترمس و تريحني ...بس الظاهر عايبنها الشاي..الحبيبه يالسه تشرب ع راحتها و سرحانه.. و الله مدري حق شو متصله بي ..يلست امشي بالحجره من الملل..رايحه راده ...ع بالي بتحس فيني.. و بتقول حرام روعت البنيه.و خليتها اتيي بسرعه ....بس الي يقهر انها صبت لها استكانة شاي غيرها..و يلست تشرب ...اتنهدت يلست ع الكرسي الهزاز.. و شلت الارنب و حضنته ...خولوه يا الدبه حسي بي ... نادتني: نوره .. نقزت من مكاني اخيرا: هـلا و اللــــــه .. وقفت خوله: تعالي انروح نتمشى برع .. طالعتها مستغربه: ويـن برع ! خوله: بالحوي ....بتييين.. نوره : يالله زين تعالي نظهر ... طلعنـا من حجرة خوله.... و رحنا برع فـ الحوي نتمشى...هاي الظاهر تستهبل علي ...طالعتها .. خوله: شو فيج.. نوره: ماشي بس خاطري اضربج.. خوله: هههههههه ليش.. نوره: ما اجوفين عمرج يالسه تستهبلين علي...متصله بي ميته من الصياح و يوم ييتج ركض..لبستيني.. خوله: بغيتج اتكونين جريبه مني علشان احس بالامان... نوره: من شو متروعه... طلعنا عند باب الحوي طالعت صوب الزراعه ادور خالي احمد بس ما كان موجود الظاهر طلع يلسنا ع الصبيه برع ... اشرت خوله صوب الزراعه الي كانت تفصل بين باب بيت خالي احمد و بين باب بيت خالوه عايشه.. خوله: كنت هناك نوره ...يوم جابر رمسني.. انصدمت:شووووووو رمسج ... خوله: و الله...تدرين مدري اليوم ليش نشيت من صباح الله خير..ما ياني رقااااااااد رحت المطبخ جفت امايه قاعده اتسوي خبز...اقترحت علي ان اخذ بيت خالوه عايشه صحن خبز حق خلود نوره: و رحتـــي.. ردت و ملامحها جامده: هي رحت ..ما لقيت حد فـ بيت خالوه عايشه غير حميد كان يتريق فـ الصاله..حطيت له الخبز .."طالعتني" ع فكره رمسني عن شرطج... نوره: مب مهم كملي سالفتج ... خوله: حميد يوم سالني عن سالفه الشرط..سويت روحي ما اعرف السالفه ..مع اني اشك انه صدقني لانه يدري انج ما تخبين علي شي ...المهم طلعت و رديت بيتنا..جفت سياره تجرب صوبي ابد ما خطر ع بالي يكون جابر ...اتغشيت ابسرعه..بس اتروعت يوم وقفت حذالي... من خوفي ما رمت اشيل ريولي من ع الارض تميت متيبسه ابمكاني...الي صدمني انه نزل من السياره...هذيج الساعه حسيت انه بغمي علي..بس تدارك عمري يوم سمعته يقولي: شحالج خوله ...؟؟؟ من غير ما ارفع راسي و اجوف منو هالشخص الي يزقرني باسمي عرفته من صوته ها جااابر ... نوره: زين شو قالج ...شو يبا منج ...امه ما كانت ويااه تدرين ما يودر امه ولد امممممممه خوله: ههههههه لا كانت محد ..عشان جي كان ماخذ راحته معاي و طلع كل الي في خاطره.. نوره: شو كان فـ خاطره ..؟؟ خوله: تصدقين لو قلتلج انه من جافني يوم سرنا انجوف شيما حرمة اخوي خليفه..ما غبت عن باله... نوره: اللوتي...شو قلتي له خوله: سكت ما عرفت شو ارد بوقتها كنت مصدومه ما كنت امصدقه انه جابر واقف جدامي و يسولف معاي.. تطنزت:من دون امه.. خوله: هي صدقج نوره...تدرين سكت موليه ما قلت ولا كلمه ..بس هو قالي .. جابر: جوفي خوله انا و الله للحين اباج..و الدليل اني للحين ما تزوجت غيرج..لاني اباج...كنت اظن اني نسيتج بس من جفتج فـ بيت عمتي"حرمه عمه عبدالله" اتخبلت...وايد تغيرتي.. صديت عنه بس ترجاني: دخيلج قولي أي كلمه ..بعدج تبيني... حسيت بهذيج الساعه اني بطيح فمسكت سياج الزراعه...الي قهرني انه انتبه لـ هاي الحركه سمعته يقولي: انا اوعدج اذا رجعنا لـ بعض بنطلع بيت ابروحنا بعيد عن امايه و المشاكل ... فهمت قصده انه عرف انه ظلمني و ان امه كانت سبب كل المشاكل..بس تميت ساكته...الظاهر تملل من كثر ما يسولف و انا صاخه... ففتح باب سيارته و قال لي: انا بطلبج من ابوج..و كل شروطج بنفذهاااا حرك سيارته و اختفى بلحظه..تدرين نوره حسيت اني قاعده احلم...؟؟جابر يظهر لي فجاه..!! و يبا يردني !! و يطلعني فـ بيت ابروحي ..!! و يتسامح مني..بذمتج ها مب حلم ..؟؟؟ نوره: و انتي شو رايج خوله ..؟؟ خوله شويه و بتصيح: محتاره نوره...اخاف ارفض و اخسر فرصتي و اخاف اوافق و اتبهدل مره ثانيه.. حرجت عليها: انتي من صجج فكرتي بكلامه انتي تبينه ...؟؟ خوله: ما ادري نوره ما ادري .. نوره: شو ما تدرين..انتي ما عندج كرامه المفروض ما تعطينه فرصه يرمس معاج...انتي ما صدقتي ظهرتي من الحاله الي كنتي عليها بعد ما طلقج بعد تبين تردين له ..خوله وين راح عقلج...؟؟؟ خوله ردت اتصيح: حرام عليج لا اترمسيني بهاي الطريقه انا ابروحي محتاره.. نوره: ارفضيه ولا تفكرين فيه خليه يزول.. خوله: ...............؟؟ نوره: اتعرفين رقمه .. خوله: لا ..شو بتسوين ..؟؟ نوره: بحط حد لهاي المصخره.. 
   
|
|
09-03-2010
|
#2 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
خوله: نــــــوره..
قاطعتها: خوله فكري شويه بعقل..و ابعدي قلبج انتي نسيتي كيف كانت حياتج...؟؟ خوله: بس وعدني انه بتغير كل شي.. وقفت مب متحمله غباء خوله: و صدقتيــــــــنه...انتي محد بياخذج غير عمور ..لكن جابر و غيره بدمرون حياتج.. خوله منفعله: اخوج ما يباني غصب اتزوجينه لي .. نوره: هي غصب لانج انتي وحده غبيه ما اتعرفين وين مصلحتج...ولا اقولج..تزوجي الي تبينه انا مايخصني لا فيـ حياتج ولا حياة عمور .. و دخلت بيت خاولوه مريم ..اييب شنطتي علشان اروح شقتي...خلاص تعبت كل شي ضدي..كل الي اباه و اخطط له ينجلب ضدي ... لحقتني خوله: لحظه نوره انا ما اقصد اني اضايج بس انا اباج تساعديني شليت شنطتي: تبيني رايي الباب الي يي منج الريح صكريه علشان ترتاحيـن ... وطلعت عنها بس هالمره ما لحقتني ادريبها خوله..بترجع اتصيح و بتتضايج..بس هي حماره اذا قبلت جاابر..انا ما ادري وين عقلها ... كل ها صار البارحه...بس اليوم حسيت ان تفكيري تغير.. يمكن صج جابر تغير ؟؟ و الدليل انه بيقبل كل شروطها..؟؟ و انا حرجت و عصبت لاني اباها لـ عمور...لاني اخاف تنظلم مره ثانيه...حطيت كوب الحليب ع الطاوله.. و طلعت من المطبخ..شلت الروايه و يلست اقراها بس ما قدرت اكمل...انا شو مصلحتي اني ازوجج عمور لـ خوله... انا مالي مصلحه بس عمور و خوله اغلى شخصين في حياتي....و خوله توأم روحي اباه تسعد و تتهنا بعد ما تطلقت من جابر .. و تعبت نفسيتها ... ما هانت علي..صح من هذاك اليوم و انا ارسم اني ازوج عمور لـ خوله...اتنهدت بالاول حميد وقف ضدي ..علشان يمنع زواج نهله من عمور.. و الحينه ظهر لنا جااابر .. .الظاهر الي افكر فيه مستحيل اسويه ... نقزت بمكاني يوم رن تلفون الشقه..منو متصل بها الوقت !!! جفت الساعه 7 ونـص ...شلت السماعه .. نوره: الو .. خوله: السلام عليج.. نوره: عليج السلامه خوله !! خوله: شحالج نوره ...؟؟؟ نوره: ابخير "ما توقعت نفسيت خوله جي ع بالي بتكون مضايجه و عادي مرقده فـ المستشفى" انتي شخبارج اليوم..؟؟ خوله: وايد زينه الحمدلله...امممممم يالله تزهبي ... بنمر عليج انا و خليفه عقدت حياتي: وين..؟؟ خوله:..شو انتي نسيتي رحلة البر.. نوره: هي و الله نسيت بس ما بروح مالي خلق.. خوله: حرام عليج ..يعني انتي للحين زعلانه مني ع سالفه البارحه.. نوره: و ليش ازعل هذي حياتج الشخصيه انا شو دخلني .. خوله: عيل خلاص تعالي علشان خاطري ...؟؟؟ نوره: منو بروح معنا ..نهله بتيي خوله: كلنا بنظهر...انتي شتبين نهله خليها بحالها هم ابروحهم و نحن ابروحنا ...يالله تزهبي انزين بعد ساعه جي بنمر عليج... نوره: اقولج ما بروح.. خوله: عشان خاطري تتعالي انغير جـو ..ما بتخسرين شي .. نوره: صدقج انا شو بخسر شو تبين اييب معاي .. خوله: اممممممممم لا اتييبين شي كل شي زهبناه ..ما في شي ناقص .. نوره: خلاص عيل مـرو علي.. خوله: فديتج نوره.. وصكرت التلفون...شي غريب ان خوله مستانسه..يمكن عشان الطلعه..داام هي مستانسه معناتها اتخذت قرار و اقتنعت فيه...بس يارب ما اتكون قبلت كلام جابر اتمنـى من كل خاطري .. (( الحـــــــــــلقـة التاســـــــــــــــــعة ..)) " ضماي انت ومن يعشق ضماه غيري..جروحي انت ومن يكرهه دواه غيري..اسقني لو ماارتويت داوني لو ماشكيت..ماهقيت اني اعطش في حياتي لغيرك انت..وما دريت ان ما به اغلى منك الا انت ياضماي ياضماي انت"طلعنا بـ 7 سيارات...انا و خوله مع خليفه.. و خالي احمد مع خالوه مريم...و حميد ابسيارته معاه خالوه عايشه و نهله و محمد مع خلود ابسيارتهم و المفاجاه ان عمور ياي معانا بسيارته مع انه ما طرا لي ولا ياب سيره انه بيروح الرحله..طبعا نهله هني لازم بيي ...المهم و كانت سياره العم عبدالله عم قوم خوله و خليفه و خلود.. و معاه زوجته و شيما.. و سياره اخيره كان سيف اخو شيما...و معاه وحده من خواته المعرسات و الثانيه ما كانت يايه ... اتفاجات ابصراحه ها الكم الهايل اول مره جي نتيمع و اول مره قوم عم خوله يظهرون معانا مكان..الظاهر زواج خليفه من شيما جرب العايلتين مع بعضهم البعض... صدقها خوله خلينا نستانس هاليوم ..و ننسى الهم و الحزن لو ساعات...سرنا صوب وادي سيجي..مع ان الجو فـ راس الخيمه كان ممطر..اتوقعنا يكون نفس الشي فـ الفجيره...فـ البدايه مرينا ع دبـا جفنا زحمة..وايد عائلات ظاهرات يرحلون..اخرتها سرنا صوب وادي سيجي...بعد شي ناس بس اخترنا مكان بعيد عنهم شويه...حسيت بشعور حـلو و بنفس اللحظه ممتع ...يمكن علشان الجـو كان مغيم و توقعنا تطيح امطار ...بس الحمدلله للحين ماشي ...اتيمعنا كلنا ووقفنا ابمكان..اشر عليه خالي احمد..يكون بعيد عن الوادي ... نزلنا كلنا من السيارات ...فرشنا الحصير .. و اجاسمنا...سوينا برزه حق الريايييييل و برزه الثانيه حق الحريم...قررت بها اليوم انسى كل شي..عداوتي مع نهله.. زعلي مع عمور..ضيجي من خوله..قههري من حميد... الشباب قاموا ..ينزلون الاغراض... و قبلها جافوا قعدتنا كاشفه ع عايله كانت موجوده ع يمينـا .و كانوا .وايد شراتنا...فقاموا عمور و حميد و سيف و خليفه..حركوا سياريهم..ووقفوها ع شكل حاجـز ..علشان ناخذ راحتنا ... سلمت ع خالوه عايشه و ع ام سيف ..ونهله و خلود...و شيما و اختها رضيه ..زقرتني خلود.. _ تعالي نوره شيلي هاي السله شويه .. اتجدمت منها صوب سياره ريلها.. و كان خليفه و خوله ينزلون الاغراض الي كانت معاهم .. خلود: اليوم بس قعدي راقبي شيما و خليفـه.. خليفه: اسمعج يا الدبه. نوره+ خوله + خلود= هههههههههههه محمد: خلود تعالي خذي جسوم رقد.. خلود: زين من حسك بنش .. شليت السله و كانت فيها مواعين..خذتها صوب خالوه عايشه و مريم ..و ام سيف لانهم كانوا يرتبون الاغراض... سالتني خالوه مريم: جم الساعه.. جفت ساعتي: عشر ونـص .. مريم: عيل متى بنسوي الغدا !! خالوه عايشه:صبري تو الناس ... مريم: زين انا بس سالت شو صار ام سيف: انحط لهم الريوق.. كنت اراقب مناقشات العيايز وناسه.. خالوه عايشه: انحط لـمنو الشباب ما صدقوا روحـوا جوفيهم وين وصلوا.. صديت مكان ما اشرت خالوه عايشه جفتهم راكبين فـوق قمة الجبل ... خالوه مريم: يمه عيالنا "وصرخت لهم"شويه شويه عن اطيحون.. خالوه عايشه + ام سيف: ههههههههههه يهال شو .. سمعت صوت خالي احمد من الصوب الثاني: مريم وين الريوق ... طالعت خالي احمد.. و الريال الي قاعد حذاله اول مره اجوفه ها عبدالله اخو خالي احمد..امبين اكبر عن خالي احمد...قاعد يشيش حتى هني..بـها الجو و الهوا النقي المفروض الواحد يستغل هالشي و يتنفس هوا نقي ..و ها الحبيب قاعد يترس صدره دخان... سرت صوب الحريم حطينا الريوق لـ خالي احمد واخوه عبدالله... وودتهم شيمـااا ... و حطينا صينيه ثانيه..حق الشباب لـ ما يردون ... و حطينا لنا... انا ما كنت مشتهيه لان متعوده بس اشرب حليب..بس الخبز الرقاق الي امسوته ام سيف ابصراحه كان يشهي.. و خاصه المهياوه لذيذه يم يم يم..كلت لـ ما شبعت ..قمت اغسل ايدي...وسرت صوب سياره خليفه اطلع موبايلي ...اتجدمت مني شيما.. ابتسمت لي و رديت الابتسامه: عادي لا تضايجين مب قاعده اتعبث بسيارة ريلج بس كنت ابا اييب موبايلي ..شيما: ليش هذي سياره خليفه هههههههه نوره: هي هذي سيارته ..ما تدرين.. شيما: جفته واقف حذالها بس ع بالي هذي سيارته "و اشرت لـ سياره محمد" نوره: لا هذي سياره محمد ولد خالتي الا هو ريل خلود...تعالي تعالي .. وسرت فتحت لها باب سياره خليفه قلتها: تعالي فتشي السياره ع كيف كيفج ...ترا يقولون الريال اسراره كلها في سيارته.. شيما: اخاف اجوف اشيا تصدمني و انا ما كملت يومين من ملجتي .. نوره: ههههههههههههه انا اضمنه لج..اتصدقين ما بتلاقين شرات خليفه..لا اتقولين بنات وما بنات..ها الانسان حياته كل كره قدم... شيما: الحمدلله... ييريتها تعالي يلسي هني و قعدتها مكان كرسي خليفه..فتشي اكتشفي ريلج ... ضحكت سرت عنها ...لفتني ان رضيه قاعده مع نهله و يسولفون غريبه !!..سرت صوب خوله...كانت تغسل ايدها .. خوله: وين سرتي..؟؟ نوره: رحت اييب موبايلي و خليت شيما اتفتش سياره خليفه.. خوله: هههههههه حسبي الله ع ابليسج ..بطلقينهم نوره: هههههههه قالت لي نفس الشي .."همست"جوفي نهله قاعده اتسولف مع بنت عمج رضيه... خوله:شو فيها.. نوره: ماشي بس تقهر اتسوي روحها طيبه ..تعالي نتمشى.. خوله:يالله .. سرنا نتمشى..جفت خلود كانت اتحاول اترقد ولدها... خالوه مريم: لا تروحن بعيد... خوله + نوره= ان شاء الله... تمشينـا ابتعدنا كنا ساكتات..طاح انفاف شويه ... خوله: ويه اخاف الدنيا تمطر ما شي غدا اليوم.. نوره: ما اعتقد جوفي الغيم وايد خفيف.. ركبنا فوق الجبل بس مب وايد ..فوق لان خوله اتخاف..شفنا حميض قطعنا منه و يلسنا ناكله كان طعمه لذيذ... خوله: وين روحـوا ها الخبال عفدوا فوق الجبل و اختفوا.. نوره: هذيلا ما يصدقون خبر ...يتيمعون ..يتخبلون و يزيد خبالهم .. خوله: ناقصنهم فارس.. نوره: يولي .. شو ذكرج فيه ... خوله: لا تنسين اخوي ... نوره: نسيت خلاص ...و بعدين انتي قلتي خلنا اليوم نستانس يعني ما في داعي تطرين لي اشخاص يغثوناا خوله: زييييييييين عنبوه مب قلب عليج ... نوره: شو سويتي بسالفه جابر ..اجوفج مرتاحه.. خوله ابتسمت: هي تدرين.رمست خليفه و خبرته كل شي .. نوره: و شو سوا خليفه ضربه.. خوله: هههههههههه نوره يا حبج للمشاكل.. نوره: عيل شو سوا !! خوله: اتصل به البارحه فـ ليل.. و جابر قال خليفه نفس الكلام الي قاله لي..حتى قال انه باني بيت..اذا رديت له بنعيش هناك ...البيت بعيد عن بيت امه.. حسيت بطعنه في قلبي خوله تخبلت : و انتي وافقتي !! خوله مستانسه: بيرمس ابوي هالاسبوع .. كنت بقولهااا انتي اغبى انسانه جفتها ع وجه الكره الارضية .. قمت عنها و سرت اركب الجبل و انا مليانه غيض.. خوله: ايه وين رايحه.. نوره:بعق عمري من فوق الجبل... ركبت لي ما وصلت القمه الله الدنيا حـلوه ..جفت خلود و شيما و رضيه و نهله..ياي صوبنا.. خوله: نزلي عن تطيحين.. نوره: ما بنزل ...تعالي ركبي جوفي العالم روعه ... خلود: صبري انا بيي اركب معاج.. نوره: لا خلي نهله اتيي عشان اعقها من فوق.. نهله: مينونه ايي صوبج.. الكل: ههههههههههههههه ركبت خلود و شيما ..و يوو صوبي اما خوله و رضيه و نهله خافن ..سمعنا خالوه مريم اتزاعج عليناا و اتاشر انزلوا ...ضحكنا عليها .. خلود: جوفي هناك وايد حماض... نوره: الله تعالي ناخذ حق خالاتي.. شيما: ابوي يحبه وايد... سرنا صوب الحمااض ..و قطعنا اشكثر ...لمحت مكان برزة الشباب ..جفتهم يالسين يتريقون ...الغريب انهم كلهم لابسين قمصان و بنطلون..زين المكان يناسب هاللبس ...و انا اشلي بها الافكـار ... خوله: يالله عاد نزلوا...من فوق.. شيما: لقينا حماض اشكثـر ؟؟ نهله: ييبو لي .. نوره بصوت واطي : انتي لو تبين بنعطيج جت .. خلود:هههههههه حرام عليج... شيما:هههههههه نزلنا.. و سرنا مكان يالسات..حصلنا هزبات من خالوه مريم..لان ركبنا فوق ..بالعالي..حسيت بالبروده..اتمنيت لو يبت زلاغي ...قعدنا انسولف البنات ارواحهن و الرياييل ارواحهم..لمحت نهله تتامل عمور..و عمور ما منتبه لها ...بغيت افقع عيونها .. نوره: نهله.. نقزت اطالعني.. نوره: حذالج جلاسات الماي ممكن اتفرين لي جلاس.. نهله شكله مرتبكه: ها اندوج.. خذته عنها بقوه و طالعتها بنظرات كانها فهمت قصدي فابتسمت منحرجه ... الفتنا كلنا للصوت الي ياه من صوب الشباب ...و كان تشجيع..جفنا محمد يظهر الكره من سيارته .. و شكلوا فريقين..خليفه و سيف و محمد فريق.. و عمور و حميد ..فريق ...خاطري العب معاهم حلو الركض بها الجو البارد..يلسوا يلعبون ...مليت من سوالف البنات..يلست اتامل الطبيعه..جفت شيما اطالع خليفه و خليفه كل شويه يتبسم لها.. .. حلوه علاقتهم طالعت نهله جفتها مندمجه بالسوالف مع رضيه ... صرخ محمد يوم ياب هدف ع قوم عمور وحميد..فصفقت له خلود...عاد محمد من قده نفخ صدره... و شويه كل وحده قامت اتشجع فريق..و الحريم قامن يشجعن فريق محمد و خليفه و سيف.. و الشواب يشجعون فريق عمور و حميد ..الظاهر غمضوهم لانهم مهزومين.. .نشيت من مكاني متملله..ما عندي حد اشجعه ...اوني يايه اغير جـو ..صحيح الجـو حلـو بس بعض النـاس خربـوا شويه..قامن الحريم ..يسون غدا و الشواب ساعدوهم ...كان شكلهم حـلو اتمنيت ييبت معاي كاميرت فيديو اصور..خالي احمد قاعد يحـاول يشب النار.. و خالوه مريم اتغسل العيش.. و ام سيف اتقطع الدياي و تنظفه...اخيرا ها الي كنت اتريا شيما و خليفه قاموا يسولفون مع بعض .. و ساروا بعيد ..الظاهر نسوا عمارهم ... خوله: شفيج نوره...؟؟ نوره:شوه..؟؟ خوله:يالسه ابروحج منعزله عن العالم و الدنيا تعالي شاركينا سوالفنا.. نوره: سوالفكم ممله... رضيه: افـااا .. نوره منحرجه: هههههههه اسولف .. نشيت ورحت يلست فوق سياره عمور...اغايضه...لاني جفته يبتسم لـ نهله..رصيت ع شيلتي يوم جفت حميد ياي صوبي .. حميد: شفيج يالسه ابروحج.. نوره: كيفي حميد: و ابوي يوم اتصيرين متوحشه.. نوره: شكرا ..هاردلك.. حميد: عـلى ..؟؟ نوره: ع الهزيمه المره .. حميد: ههههههههه تقصدين اللعبه من ساعه زين جفتي بروحج ماشي تكافؤ اثنين مقابل ثلاث .. نوره: ................."ماشي رد" حميد: جفتج من ساعه عافده فوق القمه .ما اتخافين.. نوره: لا بالعكس الجو فوق احلى...حتى حرمة خليفه و خلود كانوا معاي ... قدر حميد يخليني اسولف معاه عادي..بس للحظه سكت يوم جفت نظراته ...هذي النظرات ذكرتني....لها وايد معاني...بالنسبه له بس انا مب قادره افهمه ...فسكت ..لاحظ اني سكت .. حميد: نـوره انا قبلت شرطتج.. شو قال قبل شرطي..شو الي غير رايه ...؟؟ قبل شرطي بعد شوه..بعد ما قررت خوله ترجع لـ جابر.. المهم عمور ما بياخذ نهله لا اتضيعين الفرصه من ايدج نوره ... حميد: نوره سمعتيني شو قلت ...؟؟ رديت ابرود: شو الي غير رايك.. حميد: لاني ما ابا اخسرج .. نوره:بس .. فاجانا عمور الي ياي من بعيد.. عمور: ما حلت لج القعده الا فوق سيارتي ... صديت عنه: علها الحرق.. حميد: خيبه.. عمور: هههههههههه و تبا تزوجها شو تبا فيها .. طالعت حميد شو دراه عمور ..لا يكون مخططين...علي ترا راح فارس ياه حميد يسوووونها .. حميد: لا اطالعيني جي..انا مالي خص ها محمد مخبرنه.. عمور: هي محمد قال لي..و انت يوم تبا البنيه ليش ما اتخبرني ابروحك ...؟؟ خلاص انا مب موافق .. حميد: مب مهم رايك المهم رايي ..بنت الخاله .. عمور: نصيحه مني لك لا تخطبها هاي بتجلب حياتك نكد.. نوره: لا و الله مب جنك يالس ترمس عني و جدامي بعد.. حميد: ههههههههههههه وناسه ضرابتكم... عمور: دوم جي يا عمي ..علشان ابا مصلحتك انا برفض طلبك..ولا انت ريال و النعم فيك ما تنعاب .. نزلت من السياره: بس انا موافقه.. حسيت بالاحراج يوم جفت عمور يطالع حميد...المهم حميد وافق ع شرطي ..خلاص ابيع الدنيا.. علشان امنع زواجك عمور من هاي النحسه .. حميد: يالله انت بعد عمور شد حيلك و خلي ملجتنا بيوم واحد ... عمور"يطالعني" لا انا بعدني..قلت ما بعرس الا بعد ما اتعرس نوره...وين اخذها جان عرست .. نوره: شو هالتناقض ..مب من فتره قلت لي تبا اتخطب و اتعرس قبل ما اتروح الدوره علشان تاخذ ست الحسن و الدلال معاك.. حميد:هههههههههههههه عمور: هي قلت...زين شو بعد انتي انخطبتي من تملجين انا بخطب طالعني بنظرات فهمتها انه يبا يخطب نهله بعده الحيوان يباها ... حميد: متى دوامك.. عمور: و الله مدري شسالفه بالاول قالوا لي اجازه لي ما اسافر يعني خلال اسابيع..بس الاسبوع الي طاف اتصلوا بي و قالوا لي تعال داوم يمكن لان موعد الدوره تاخر .. نوره"وقفت انظف ايدي من غبرة السياره" زين بعد من صالحـي .. وسرت عنهم سمعت عمور يقول: الود ودي ازوجها اليوم قبل باجر... سمعت ضحكت حميد ابتسمت عمور عسل..و يا بختها الي بتاخذه لانه يقدر الوحده و قلبه عود ..و هذي نهله ما تستاهله علشان جي ابا ازوجه خوله ...بس داام حميد قدر يمد ايده و يساعدني..خلاص بسوي اي شي علشان امنع زواج جابر و خوله ..بس اضمن ان عمور يخطبها بعد حرام اقطع نصيبها... اتيددنا نحن الحريم و صلينا. و الرياييل صلوا جماعه.. و كان الامام سيف..ابصراحه صوته وايد روعه ... و كلنا سكتنا نسمعه يوم يقرا و يرتل ...كانت مفاجاه بالنسبه لنا...بس شيما و رضيه عادي الظاهر يدرون و متعودين يسمعونه يوم يقرا قران ... تغدينـا نحن الحريم فـ برزتنا الخاصه فينـا و الشباب فـ برزتهم.. و الطبااخ لذيذ ...بعد الغدا يلسنا كلنا ويا بعض..كانت سوالف حلوه..كنا نشرب الشاي... و خالي احمد و عبدالله كانوا ماخذين الجو و يضحكونا بسوالفهم و باياام قبل ...و مع الوقت..قام خالي احمد و خالوه مريم يتمشون.. و خالي عبدالله مع رضيه و زوجته...اما شيما و خليفه روحـوا صوب سياره خليفه زقرتني خوله: يالله نوره تعالي نتمشى. كيف اطوف ع روحي هاي الوناسه بس يوم جفت نهله واقفه جريب من خوله معناتها بتروح معانا و انا مالي خلقها...غيرت رايي و قلت: لا ما بتمشى بقعد مع خالوه عايشه ابروحها يالسه... نهله: انزين ماماتيه تعالي معانا تمشي حركي ريولج شويه... طلعت لساني اقلدها و يوم كانت ترمس جافتني خالوه عايشه و ضحكت علي اتلومت ..حسيتها حركه مب حلوه بس غريبه ان خالوه عايشه ضحكت و ما عصبت علي ... خالوه عايشه: ما اروم امشي عايبتني القعده"و صدت لي" روحي يمه تمشي معاهم.. خوله: يالله قـومي نـوره.. نوره: اووووووووووه بعدين بييكن روحن انتن .. خوله: زين بزقرج من بعيد لا اتاخرين تعالي.. جفت نهله اتزخ ايد خوله حسيت بقهر و غيض ..بس طنشت ما ابا اضايج ابعمري علشان وحده ما تستاهل ..هي تستانس و انا اموت من الغصه حق شو .. خالوه عايشه: ليش ما رحتي معاهم..\ رديت عليها: خالوه ما اروم بعدين بلحقهن خليني يالسه معاج شويه ولا ماا تبيني ... خالوه عايشه: لا و الله ما قصدي بس طالعني الكل سوا له مجموعه و تمشي .. طالعتهم ..صدق حـلوه الصحبه.. ابتسمت لها: انتي طالعي صوب سياره خليفه هناك السوالف الحلوه.. خالوه عايشه: هههههههههههههه قاعد ويا حرمته.. نوره: عشون عيل ..تتحرينه هين ها خليفه ..من تحت لـ تحت .. خالوه عايشه: ههههههههه خليهم ما كملوا اسبوع من ملجـوا عقبالج .. نوره: تو الناس خالوه .."حسيت بالاحراج يا ويلي اخاف تطري لي سالفه حميد ناقصه انا" خالوه عايشه: الحمدلله مب قاصرنج شي شغل و تشتغلين.. و سياره عندج مب ناقصنج الا الريل.. رديت ابسرعه : الله كريم"يا رب اتغير الموضوع " خالوه عايشه: حميد يباج حليلته .. بلعت ريجي و صديت الصوب الثاني حسيت بداخلي رجفه..لان الموضوع صار جد.. و الحينه بديت احس اني قاعد العب لعبه عوده..و عادي اتصير مشاكل يوم ما اقول لـ حميد خلاص انا ما اباك...الله يستر.. خالوه عايشه: هههههههه شفيج تلومتي .. ابتسمت: مدري شو اقولج خالوه .. خالوه عايشه: الريال حاشرني من اسبوع يبا يخطبج و انا اقوله اتريا لي ما انخلص بالاول ملجة خليفه... الا ما خبروج البنات هاي شو ارد عليها الحينه : هاه امبلى بس انا خذتها ع شكل سوالف .. خالوه عايشه: بس مثل هالمواضيع ما تتخذ سوالف يمه.. نوره: .............................." قافطه مدري شو ارد " خالوه عايشه: انا اعتبرج شرات بنتي نهله .. بسم الله علي من بنتج وع كملت خالوه: و الله يا نوره لو كنت اجوف حميد مب مناسب لج..كنت عارضته من اولها ..بس حميد ما ينعاب و هو ولد خالتج..و انتي بعد اتعرفينه زين ما زين.. طبعا اعرفه ولدج اكبر لوتي بس من تحت لـ تحت محد يعرفه كثري .. سمعتها اتقولي: و امج الله يرحمها لو كانت عايشه كانت بتقولج نفس رمستي ... نوره: الله يرحمها ... خالوه عايشه: تدرين ان شاء الله هاليومين بنرمس خالج احمد علشان يرمس عمور .. يتني الضحكه ما تدري ان عمور من ساعه واقف معاي و مع حميد و يبا الفكه مني ...يا ربي كل شي صار جد..الله يعيني و يستر كل من عمور جان راضي يتزوج خوله جان وفر علي شوط و ريحني من سالفه خطبة حميد ..اتنهدت ..لاحظت خالوه عايشه يوم تنهدت مدري الحينه وين بروح فكرها..\ خالوه عايشه: لا تضايجين يمه انا ادري رالمفروض يكون ابوج موجود بهاي السوالف بس انتي تدرين .. قاطعتها: انا ما عندي ابوه و انتي تدرين بها الشي خالوه .. خالوه عايشه: مهما سوا ابوج فيج و في اخوج يبقى ابوج وواجب و حق عليج و ع عمور.. يتني الغبنه: خالوه شو اتقولين انا شكله ما اعرفه ... خالوه عايشه: ابوج ماله ذنب...اهله هم الي كانوا ضاغطين عليه .. طالعتها مستغربه شكل الموضوع انجلب من سالفه خطوبتي لـ سالفه ابوي ... التفت لـ خوله الي كانت تزقرني من بعيد بس طنشتها و رديت اطالع خالتي بنظرات اترجاها انها تقولي كل الي انا ما اعرفه..شي غريب عمري 21 و كل هاي السنوات ما خطر ع بالي اسال ليش ابوي هدني و هد عمور !!!؟؟ يمكن عمور يعرف لانه اكبر عني..بس انا معقوله لها الدرجه كنت امسوته صفر ع الشمال..او سوالف الدنيا لهتني عنه سالتها: خالوه رمسيني عن ابوي ..؟؟ خالوه عايشه: غناتي انت يايه تستانسين ف الرحله و اكيد لو كلمتج عن ابوج بتضاييجين .. نوره: ما بضايج بس ابا اعرف ..و ما ابا حد يخبرني غيرج .. ابتسمت لي و قالت ..:- اياام الاول كنا انرحـل وقت القيض صوب مسندم هناك يكون الجو احسن و ابرد ... و كانوا وايد ناس يتيمعون في مسندم من كل مكان..ابوي الله يرحمه ما كان يرضي ياخذنا مسندم.. و يقول تموا براس الخيمه احسن لكم.. و هناك وايد ناس .. بس انا من عرست و خذت ولد عمي الا هو ابو حميد.. وولد عمي متعود كل صيف يقيض في مسندم..بها المره خذني معاه... و الصيف الي بعده ما سرنا..لان كان زواج خالتج مريم وخالج احمد.. و زواج امج من سعيد قاطعتها: خالوه اسم ابوي محمد ابتسمت لي: هي ادري يمه بعدني ما فقدت الذاكره بس انا اقصد زواج امج الاولي من سعيد اخو خالج احمد.. هااااااااه شـووووه امي كانت معرسه ..قبل لا تاخذ ابوي..صدمه خلتني امبطله حلجي .. خالوه عايشه: ليش ما تدرين اذكر مره طرينا هاي السالفه جدامج.. نوره: لا اول مره اسمع بهاي السالفه ...؟؟؟ انتي متاكده .. خالوه عايشه: هههههههههه يا بنتي ..عليج سوالف ..بعدني ما وصلت للعمر الي يخليني انسى ...الحينه خوله تزقرج من ساعه بتروحين لها ولا بتسمعين.. نوره: ابرايها خوله..كملي دخيلج..كملي..موليه ما بقاطعج ..ما ظني شي صدمه اقوى هاي .. خالوه عايشه: هذي السالفه صارت من سنييييييين يعني ماله حايه تنفعلين و تنصدمين.. هزيت راسي بمعنى نعم و انا كلي شوق ابا اعرف عن امايه اكثر عن ابوي بس الظاهر السوالف اتلخبطت في راسي ... سمعت خالوه عايشه اتكمل: تزوجت خالتج مريم و امج في نفس اليوم من احمد و سعيد...مريم اختي تاخرت في الحمل بس ما شاء الله امج جم شهر و حملت.. يا ويلي حالي عندي اخوان و انا ما ادريبهم ...يالله ماشي اكبر عن هاي الصدمه ...بس اخاف يطلعون شرات عمور و يخبلون فيني ناقصه انا يكفيني خبال عمور ... كملت خالوه :- و ربت امج و يابت علي و انا من عرسوا خواتي ما قمت اروح اقيض مع بو حميد فـ مسندم...بس امايه الله يرحمها بعد ما كمل علي سنة .مرضت خالتج مريم و تمت ع الفراش يمكن ثلاث شهور مب داريه بعمرها ...كلنا ظنينا انها تبا عيال و ان طافت سنتين ع زوجها و ما حملت ...و يمكن عشان نفسيتها مرضت..."و انا خوله طالعه ع منو حساسه" ... اقترحت امايه الله يرحمها..ان انقيض في مسندم .. ها الصيف علشان يمكن حالة خالتج مريم تتحسن ...تسترد صحتها و عافيتها ...فطلعنا بالمركب انا و امج و خالتج مريم.. و اذكر علي كان عمره سنه ونص.. و معانا..خالج سعيد و ريلي بو حميد ... كانوا وايد ناس من كل صوب ياييين ...رياييلنا كانوا يظهرون البحر.. من الصبح و يردون وقت ما اتغيب الشمس ...الحمدلله نفسية خالتج مريم صارت احسن...باخر الصيف جهزنا اغراضنا علشان انرد البلاد..ووقت المغرب..يتنا عاصفه شلت كل الخيم و العريش عاصفه و الله يا نوره لليوم يوم اتذكرها يقشعر جسمي ..الله اكبر حسبنا للحظه انه غضب من رب العالمين.. وايد ناس راحـوا بهاي العاصفه..و منهم اخوج علي و خالج سعيد...و بو حميد كان بيرحوا فيها بس الله ستر و كتب له عمر يديد ... ردينا البلاد..و ردت امج ارمله فاقده زوجها وولدها ...و خالج احمد من جاف حالة خالتج مريم تحسنت..ياب لها فارس الي كان بهذاك الوقت بحضن خالته بعد ما توفت امه الله يرحمها.. و كان بعمر حميد..استانست به خالتج.. و ربته شرات ضناها.. قاطعتها و احس ابعمري بصيح: امايه شو صـار لها .. ردت علي: امج الله يرحمها لو كانت توم خالتج مريم..بس شخصيتهن متناقضات ..امج كان قلبها قوي و حرمه صابره عكس خالتج مريم قلبها رهيف ..بعد سنه اتفجوا خالج احمد وبو حميد يروحون هالسنه القيض...بس ابوي الله يرحمه ما رضى انروح ورا ازواجنا ..لانه خاف لا يصير شرات ما صار العام....و شرات ما صار لـ ريل امج سعيد وولدها علي..بس بو حميد و خالي احمد كانوا مصرين الا ياخذونا... و امج الله يرحمها من جافتنا رايحين..يلست اتصيح و حالتها حاله لـين ما رضى ابوي و سارت معنا ... و هناك ابوج جاف امج..كان ابوج من اهل حتا ناس كباريه عايله عوده و معروفه...بس نحن ما كنا نعرف اوهمنا انه وحيد و ماله اهل ...عشان جي بعد ما ردينا من مسندم..طلب ايد امج..ابوي وافق عليه..و خالج احمد و بو حميد ما قصروا مدحوه و جافوه ريال ما ينعاب ... و خذت امج ابوج.. و حملت امج و يابت عمور ...كان ابوج يروح عنها دبي بحجة شغله وما كاان اييها الا بالصيف..و يقيضون في مسندم ...و كنا انروح معاهم ... بعد ثلاث سنين..كانت سنه سعيده لنا..لان خالتج مريم حملت.. وزادت وناستنا..يوم عرفت اني حامل و امج حامل فيج..بهذيج السنه..كلنا ربينا ..بالاول خالتج و كانت مفاجاه لنا يوم ربت بتوم..خوله و خليفه..و بعد شهرين ربيت انا بـ محمد ..و بعد عشرين يوم ربت امج و يابتج..و ابوج سماج ع اسم امه نوره "معلومه يديده" ..بعد سنه و كان ابوج موجود ويانا ..يتنا سياره عوده..و فيها ثلاث رياييل ..عرفنا من يومها ان ابوج من ناس كباريه و راهم ظهر ...و بهذاك اليوم كان اخر مره يجوفج فيه و يجوف اخوج و امكم الله يرحمها...غااب ..ولا سمع انه عن شي ...و امج مرضت بسبب غياب ابوج ..و توفت.. قاطعتها: ليش ما سالتوا عنه يمكن صار له شي .. خالوه عايشه: خالج احمد و بو حميد ما قصروا راحوا له حتا..يوم توفت امج الله يرحمها ..عشان يخبرونه... نوره: خبروه ..؟؟ خالوه عايشه: هي خبروه بس قالهم ما اقدر اييكم.. و صاهم عليج و ع عمور ... نوره: ليش ما خذنا معاه ..؟؟ خالوه عايشه: يمكن ابوه ما رضى..لانه تزوج امج من وراهم ..و يوم عرفوا خذوه و جبروهم يتم .. نوره: بس بامكانه ينشد علينا الحينه ...؟؟ اكيد ابوه ماات .. خالوه عايشه: معاج حق بس محد يعلم بالظروف ...كلنا مستغربين مع ان ابوج يحب امج وايد...مدري قطعها.. نوره: يمكن عندي اخوان من الاب.. خالوه عايشه: الله اعلم...اكيد لانه تزوج و امج يوم سمعت انه تزوج مرضت و توفت الله يرحمها .. نوره: الله يرحمها فديتج امايه ...عانت في حياتها ..ازين خالوه لو سرنا له انا و عمور حتا بقابلنااا خالوه عايشه: مدري يمه بس وين بجوفونه ..و ين مكانه بالضبط الله اعلم...الي اعرفه اهل ابوج كل سنه بدوله بالخارج نوره: الدنيا تطورت خالوه و لو نبا انعرفه بايام بس دام انه ما يسال عنا و تبرا منا ..حتى نحن ما نبااه .. خالوه عايشه تنهدت: و الله مدري شو اقولج.. نشيت من عنها و سرت ابعيد اتمشى ابروحي..اليوم عرفت اشياء وايده تتعلق بحياة امي و ابوي ...اكيد عمور يعرف كل شي بس ما قالي...اتنهدت..الواحد ينولد فـ الدنيا ما يعرف شو مكتوب له و كيف قسمة حياته ... ما توقعت ابوي شخصيه ضعيفه ..يهد عياله و حرمته و يتزوج .. حتى ما سال عنا ولا يدري نحن عايشين ولا لاء ...اها..يا ليت الواحد يطلع من الدنيا و يختار امه و ابوه..جان وايد اشياء اختلفت..بس الي افكر به من سابع المستحيلات ... بهذاك اليوم ..اشياء وايد فرحتني و اشياء زعلتني منها سالفه ابوي..شي يقهر ان الواحد يبيع عياله و اسرته عشان البيزات..ليش نحن باي عصر عايشين ...؟؟ هالزمن ولى من زمان ...؟؟ انسدحت ع الشبريه..و انا ناويه اطوي صفحة ابوي من حياتي .. و السالفه الي قالتها خالوه عايشه ..شي صار و انتهى.. و نحن عيال اليوم ...رقدت .. و نشيت ع اذان الفير..صليت و قريت قران ...بعد ما خلصت سمع صوت..نقزت..فـ البدايه تروعت بس بعدين اتذكرت ان شي شخص عايش معاي في الشقه الا هو عمور..طلعت من حجرتي ..سرت صوب حجرته جفته لابس ثياب الدوام.. عمور: صباح الخير نوره ...جوفيني اليوم نشيط.. نوره: كل عام و انت ابخير .. عقد حياته: و انت ابخير ..ليش لا يكون يوم ميلادي و انا ما ادري.. رديت عليه: لا و انت الصاج يوم دوامك .. عمور: ههههههههههههههه هي الحينه فهمت السالفه..نوره حبيبتي اختي سوي لي حليب .. نوره: اســــــــــفه تندل المطبخ.. كنت بصكر باب حجرته بس سمعته يقول لي .. عمور: لا يكون بعدج زعلانه..عيل البارحه سولفتي معاي في الرحله .. نوره: هذاك البارحه ...لكن اليوم غير..ما بغيت افشلك جدام حميد و اطنشك مب حلوه بحقك بعد كنت ارمسه من طرف خشمي..لاني بعدني متضايجه منه ع باله ارضى ابسرعه.. حميد: انتي لـ منوه طالعه جي جاسيه و قلبج حجر .. نوره: لا ابويه .. و طلعت من عنده و سرت المطبخ اسوي لي حليب ...لحقني ما حسيت فيه عشان جي نقزت يوم سمعته يقولي .. :ليش طريتي ابوي ...؟؟ هزيت جتفي: مدري ..بس اذا كان فيني طبع يا باخذه من امي او ابوي .. يلس ع الكرسي: يعني غريبه اول مره اسمعج ترمسين عن ابوي .. نوره: يمكن لان البارحه خالوه عايشه رمستني عنه .. عمور:..........................."ماشي رد" نوره: ما فكرت اتروح له حتاا طنش سؤالي : شو قالت لج خالوه عايشه .. صبيت لي حليب في الكوب و تميت واقفه اشرب : عن ريل امي و اخوي علي .. و كيف ابوي جاف و امي و ليش هدنا ..انت اتعرف هاي السالفه.. هز راسه بمعني نعم و كانه كان سرحان .. نوره: ليش ما قلت لي .. عمور: لانج ما قد سالتيني .. نوره: تعال انروح له خاطري اجوفه و لو من بعيد.. طالعني عمور مستغرب: تبين اجوفين ابوي !!شو الي غير رايج.. نوره: فضول ابا اعرفه حتى لو شكله بس .. عمور: انسي ..ما بتصبين لي حليب !! شليت الغوري و جبيت الحليب الباجي في الحنفيه: خل نهله اتسوي لك حليب ..يا بو نهله و طلعت عنه ...حسيت بنفسي جاسيه و الي اسويه بـ عمور يخليه يعاند و يصر ع زواجه من نهله..ركبت سيارتي..رايحه الدوام بس عمور ليش يوم طلبت منه انروح انجوف ابوي قال انسي ليش ؟؟ معقوله راح له و رفض يجوفه بعد ولا شو الي يخليه واثق انا ما بنجوفه رن موبايلي ..يالله صباح الخير منوه داق بهاي الحزه..طلعت الموبايل من شنطتي كان المتصل خوله .. نوره: صباح الخير.. خوله: صباح النور ..وينج.. نوره: رايحه الدوام شو عندج ناشه من وقت احيد ماشي دوامات عطله نص السنه..انخمدي.. خوله: كيف تبيني ارقد ..و انا بطير من الوناسه ...؟؟ نوره: عسى دوم مستانسه بس ونسيني معاج ..؟؟ خوله: عشان جي اتصلت بج ..خليفه قالي البارحه فـ ليل ان جابر اتصل به ..وساله متى يرمس ابوي.. جنه حد صفعني الحينه هالخبر الي مونسنها و ياي اتبشرني فيه من الصبح .. نوره اتطنز: و متى بيرمسه عقب ساعه.. خوله:ههههههههههههههه لا تتمصخرين علي ..بيرمسه باجر الاثنين ..فـ ليل .. نوره: زين خوله..انتي موافقه.. خوله: هيه ..شو رايج نوره رصيت ع التلفون و قلتها بكل غيض: ابوي ابوي لو صد عني ما ترجيته ... خوله : نوره بس انا مرتاحه لها القرار تنهدت مستسلمه : زين عيل لا تعطين موافقتج ع طول ..قولي بفـكر ..و ردي خبر ل خالي احمد بعد اياام.. خوله: اتصدقين انا امفكره جي اسوي.. نوره زين حبوبه انا وصلت المستشفى .. خوله: اوكى برايج فيمان الله نوره: مع السلامه .. خوله ما عندها دم انا متضاربه مع عمور عشانها.. و هي تبا اترد لـ جاابر ها ولد امه..هاي خوله ما اتعرف مصلحتها موليه ..ما عرفت اشتغل اليوم فكري منشغل كيف اخلي خوله اتغير رايها ..و ترفض جابر..الحقير يبا يقص عليها مره ثانيه .. التفت فجاه لـ نوف: نوف ابا منج خدمه انسانيه.. نوف: عيوني لج.. قلتها: اذا وحده ما اتعرف مصلحتها و تبا اتعرس من واحد كان مطلقنها ..قص عليها بكلمتين ..و هاي الانسانه غاليه عليج شتسوين ...؟؟ نوف: احاول اقنعها انها ترفضه.. نوره: و اذا ما اقتنعت.. نوف: هذيج الساعه تتحمل القرار الي اتخذته.. نوره: بس هاي الانسانيه عزيزه علي ..و هي وايد حساسه و عادي اذا جرحها هالشخص مره ثانيه اتروح فيها.. نوف: ابيه ..و الحينه شو بتسوين.. نوره: ما اقدر اسوي اي شي الا اذا ساعدتيني .. نوف: قلتلج عيوني لج.. نوره: اباج تتصلين فـيها..و توهميها انج تعرفين طليقها..و انكم ع علاقه و انه يبا يقص عليها مره ثانيه ..و حتى البيت الي باننه عشانها كله جذب .. نوف: افا عليج ما طلبتي عطيني رقمها ..
|
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض المتطور
