 |
|
|
|
|
|
#1
08-10-2011
|
||||||||||||||||||||||||||||||||
|
||||||||||||||||||||||||||||||||
. . . ببيت أبو عبدالله .. العنود : لا يمه تونا تسع الصبح .. بروح وابرجع.. امها: بحفظ الله .. طلعت لاجل تروح لبيتها لان قلبها مع زياد مغلق جواله .. أم عبدالله تناظر أبو عبدالله وحاله يكسر الخاطر ماغير يهوجس ولامن فتح الباب يناظر ويتخيل عبدالله يدخل عليهم .. أم عبدالله : وكل امرك لله .. والمكتوب صار والحمدلله عليه.. ياعبدالعزيز ماينفع حالك تسذا .. أنت انسان مؤمن ودراي ان اللي صار لعبدالله مكتوب له وهو باقي ببطني .. لاتجزع وادعي له لان دعوة الوالد مستجابة .. كان يناظرها ودموعه تخترق لحيته الطويلة والحمرا من الحنا .. أم عبدالله حزنت ودمعت لاجل حال أبوعبدالله .. والتزمت الصمت وهي تناظر حاله المزري كثثير ..! . . . ببيت زياد .. دخلت العنود ونزلت العباية وحطتها بالصالة على الكنب.. وتالي فتحت شطنتها ورشت عطر .. طلعت للدور الثاني ودخلت لجناحهم .. شافت زياد باقي نايم ومنعرض بالسرير والجوال مرمي بآخر السرير.. عدلت بلوزتها وجلست على السرير .. :زياد .. زياد .. يالله ياثقل نومك قوم بيبي .. انحنت عند راسه واشرقته بعطرها ..تحرك شوي .. العنود بعدها قريبه منه حيل: قوم .. فرك عيونه وتالي سكرها وفتحتها ثاني : عننننود .. العنود :آييه عنود .. قوم .. زياد جلس وباسها : ناوية تجنيني من الصبح.. يالبى هالجمال.. ضحكت : يالله صباح خير قوم توك صاحي وتتغزل.. زياد ابتسم: وش صحاني غير ريحة عطرك .. العنود قامت من السرير :قوم خذ لك شاور لاجل تصحصح وتالي نطلع نفطر .. زياد مد يده لها وقومته.. زياد :غريبه جاية.. العنود ابتسمت :لاجل اللي زعل البارح .. ضحك ومشى يحضر له ملابس : بجد زعلت .. العنود تفهمي احتياجي لتس .. العنود جلست على الصوفا : وأنت تفهم ظروفي .. زياد يصك الدولاب: على عيني وراسي.. بس أنتي لي مقدر على بعدك.. قدري بس هالشي.. ترى بجد بجد أحببببك .. العنود : زياد تتكلم من جدك ؟ زياد يناظرها بجدية : آييه بجدية.. أنتي زوجتي ومن ابسط حقوقي عليك ماتباتين برى البيت .. أنا اولى الناس فيييك اولى فيك من امك وابوك واخوانك .. العنود رفعت حاجب وهي تناظره ومستغربة من جديته .. زياد : اعترف عندي حب تملك (قالها وهو مبتسم وتالي دخل يأخذ شاور) .. العنود رجعت راسها على الصوفا : موال جديد ذا ..! . . . سيارة متعب .. ريان : مها قولي كل اللي صار .. مها كانت ساكتة وماينسمع يكود صوت بكاها .. ريان : والله مايضيع حقك وأنا عمك .. وقف متعب قدام قسم الشرطة .. ونزلوا .. دخلت وهي تمشي ورى عمها ومتعب .. اللي وقف برى المكتب ينتظرهم.. دخلوا للمكتب .. الملازم سعود : تفضلوا .. ريان جلس وجلست بنت اخوه جنبه .. الملازم سعود: طبعا عندي السالفة بشكل عام بس لازم اعرف السالفة بأدق تفاصيلها .. لان فيها سجن وغرامات وممكن ارواح تتلف.. ريان فرك يدينه .. الملازم سعود: الحين ممكن تكون الاخت وحدها .. ريان: نعم ؟!! الملازم سعود: يأخ ريان هذي الاجراءت .. ريان : العرف يقول ماتقعد البنت بدون محرم.. الملازم سعود :القضية حساسه جداً .. رجاء خلنا.. ريان همس لبنت أخوه وتركها .. الملازم سعود: ممكن تعرفينا بأسمك وعمرك وكل شي عنك .. مها قعدت تتكلم وتقوله .. الملازم سعود: الحين راح ندخل الاشخاص المتهمين وراح تتعرفين على المتعدي عليك(قالها بألم) مها بخوف وانمكشت على نفسها:لاآآ الملازم سعود : لاتخافين أنتي بحما الله ثم حمانا .. بس لازم يدخلون.. مها رجعت تبكي ..قام الملازم سعود ونادى عمها بسرعة .. جلس ريان يهديها وشوي الا بدخلتهم.. مسك العسكري ريان .. الملازم سعود : ريييان جزاهم عندنا ..(كان واقف وبيده قلم ويأشر عليهم باحتقار) يامها مين منهم .. انتظر وهو يناظرها وتنرحم اشرت على واحد منهم ويدها وكلها ترجف.. الملازم سعود بأسى: ووين أبوك منهم ؟ ريان : ذا .. ماقدر يمسك نفسه قام ومسك أخوه من ياقه ثوبه ويهزه بقوة ودموعه تنزل :شفت وش جنيت من ورى الخمور والسكرة ..شفت ضعيت عرضك شرفك سمعتك..ضيععععت بنتتتك .. كان أخوه بعده دايخ .. الملازم سعود بعده : العتب والتأنيب ماينفع معه الحين لان مابعد صحى.. نادى العساكر لاجل يشيلونهم الا المتعدي على مها.. وسحبوا العساكر ريان وطلعوه برى لاجل ماقدر يمسك نفسه وضربه.. الملازم سعود : محمد ودوه واغلسوه الين يفوق ..الله لايبلانا.. سحبه محمد بقرف واضح .. وكانت مها منهاراة تماما .. الملازم سعود:مها حقك ماراح يضيع .. مها بدت تغيب عن الوعي تدرجيا من شافت المعتدي عليها.. الملازم سعود ركض ومسكها ونادى عمها ..اللي شالها ونقلها للمستشفى.. . . . ببيت زياد .. العنود : اوك طيب وصلني لاهلي.. زياد: خلاص خليك بالبيت.. العنود: متفقين على يومين.. زياد: وكلامي قبل شوي.. العنود تلبس شيلتها : رأيك .. بس ذولاي اهلي.. زياد: وأنا زوجك.. العنود: كلكم عينين براس.. بس أنت قدر.. زياد: مافيه شي لاجل اقدر.. العنود وقفت يدها : كل ذا يازياد ومافيه شي ..! زياد مسك يدها: لا مااقصد كذا.. العنود: اجل ؟! زياد: اقصد مايستدعي تجلسين .. العنود: دامي حطيت اني راح اجلس فراح اجلس.. زياد ناظرها شوي : خلي شغل العناد.. العنود: زياد براسك حرش اليوم؟ زياد حس راح يتهاوشون وخمدها من بدايتها وهو يلمها :لاتلوميني يابنت .. العنود تحاول تبعده: زياد خلالالاص .. زياد ماتززح: وأن قلت لا.. . . . بريطانيا.. سارة : خير .. فارس: لبسك ماتطلعين فيه.. سارة: اقول لبسي محتشم وراح اطلع للجامعة وراح اطلع مع لطيفه.. فارس: وأنا اقول مافيه طلعه الين تبدلين.. سارة تخصرت : آييو .. فارس: اللي سمعيته .. سارة رمت الشنطة بالصالة :تدري منيب رايحة جامعة وبالطقاق.. دخلت وصكت الباب..مشى فارس وفتح الباب :بدلي وامشي اشوف.. سارة تفك الحجاب وترميه :لا.. جلست على طرف السرير وتفك الشوز .. فارس تكتف وهو يناظرها وهي تفك الشوز ..ويبي يشوف اخرتها مع هالبنت.. فارس : بببنت .. سارة خزته: اطلع برى.. فارس بعصيبه:سسسسسسسسسسارة وبعدين .. سارة وقفت :أنت وبعدين معاك .. فارس قرب لها وهو يمسك يدينها وبقوة: غررروك ورفعه خشمك نزليها لا أذلك بطريقتي الخاصة واخليك ذليله بعين نفسك .. سارة : تخسسى ..... مامداها تكككمل كلامها الا ضربها بقوة في منطقة الرقبة على جنب : مايخسى ويعقب الا أنتي.. يكون بعلمك المره اللي ماتسمع حكي رجلها مالها قيمه ولاقدر بعينه..ولا أنتي متربية لو متربية ماكانت ذي حركاتك .. سارة كانت تناظره بصمت وبعيونها اسئلة ممزوجة بصدمة من كلامه..وبقلبها كل شي يهون الا انه يشك بتربيتها واخلاقها .. فارس بقسوة:كلامي ماينعاد ثاني مره والحين بدلي وخلي نطلع للجامعة.. سارة بعدت عنه بتوهان وجلست على السرير وهي حاطه يدنيها على أطراف وجهها.. فارس كان يناظرها رده فعل منها ماتوقعها ابد توقع تهاوش تصارخ تسوي أي شي بس ماتضل ساكتة .. طلع من الغرفة ورمى نفسه على الكنب بالصالة وهو يسترجع كلامه لها بهمس وهو يشد يده: جرحتها جرحتها الين متى ؟!! جلس وقت وقام لغرفته دق على فهاد .. فهاد:حي هالصوت.. فارس انسدح على السرير بهم : هلابك .. كيفك.. فهاد كانت بمكتبه سكر الملف : منيب بخير من عقب نبرة هالصوت..شفيك يالغالي؟ فارس: تهاوشنا.. فهاد قام يمشي بهدوء:مين السبب منكم؟ فارس:كلنا .. بس مشكلتي قلت لها مهيب متربية ..! فهاد بغرابة: لييه ؟ فارس: لانها ماتطيعني بأي شي .. أقولها الدرب يمين تقول يسار.. فهاد : يعني عناد السالفة ؟ فارس جلس: عليك نور.. تعبت معها وتعبت معي.. (بتردد) ضربتها.. فهاد انصدم: مهبول تضربها .. فارس :خلها تتأدب..... فهاد قاطعه: طيب صارت لي مشاكل مع صفا مايعلم فيها الا الله وهواش الييم بس ماعمري فكرت امد يدي عليها..مفروض تمسك أعصابك.. فارس:تكفى يافهاد أبي منك الحل.. اعترف أنا بديت بصدها ولاكنت أبيها.. بس البنت جابت راسي وأنا أخوك والحين صاده عني صده بنت يهود ولا حاطه كل أغراضها بغرفة ثانية اقسم بالله حالنا زفت.. فهاد زفر بضيقه من حال تؤامه: شوف ماعندك الا أنك تعتذر لها لانك أولا جرحتها وثانيا ضربتها .. فارس: الحين لما ضربتها ماتكلمت ماقالت شي .. ودي انها قالت شي لاكن سكوت تام.. فهاد: اصبر عليها.. فارس: اصبر وين الصبر .. ! فهاد: فارس ورى الصبر خيره.. وبعدين مثل ماقلت لك من قبل البنت ماتبغى غير الحنان عطها حنان ولمها لعندك كل ماضاقت منك وبعدين كأني سمعت أن كل منكم بغرفة .. فارس :آييه .. فهاد: ترى صارت معي لاكن اجبرتها تنام معي بالغرفة وكلن منا كلنا بحاله .. فارس: أقولك هالبنت عنيدة العناد مخلوق منها .. ماتتنازل عن شي لو كان اللي كان .. ماتعرفها يافهاد .. فهاد : ارجع واقولك خذ البنت بحنانك .. فارس :بحاول .. فهاد يبي يروقه : طحت وأنا أخوك في حبال بنت محمد .. فارس ابتسم : لاكن علقت اخوك بهواها وصدت.. فهاد :تجيبها وأنت فارس .. ابتسم وبقلبه ماتعرفها وأنا اخوك .. : اقول فهود يدق الجرس شكلها خويتها .. فهاد: خلاص طمني .. فارس: ان شاء الله .. سكر من اخوه وطلع لاجل يفتح الباب وشاف مع العين السحرية وصد بسرعة .. دخل للغرفة: شكلها زوجة عبدالرحمن .. قامت ومرت من جنبه .. وشاف اثار يده في رقبتها .. صك الباب لاجل دخلت لطيفه.. بالصالة .. لطيفه: ماجهزتي .. سارة : الا بس احس اني تعبانة شوي ومالي خلق.. لطيفه: اوك ..عطيني طيب اوراقك راح اروح أنا اوديها والدوام والمحاضرات ماراح تبدء الا الاسبوع الجاي.. سارة: يافديتك ماتقصرين .. بجد حيل كسلانة.. لطيفه وقفت: روحي عطيني .. سارة فتحت الشنطة لانها كانت مرمية بالصالة وطلعت الاورق وعطتها.. أخذتها لطيفه وطلعت .. طلعت سارة جوالها ودقت على أبوها .. سارة: آهلين بابا .. أبوها: هلا بحبيبه البابا .. شخبارك؟ سارة من سمعت ابوها بكت : زفتتت .. أبوها تكدر :عسى ماخلاف.. طلع فارس من الغرفة وهو يناظرها وهي تكلم وتمشي بالصالة وتبكي حتى كلامها موب مفهوم كثير من صوت شهقاتها .. سارة : الليلة تجي بابا .. آوك .. مع السلامة.. صكت الجوال وفارس يناظرها بصدمة :كلمتي أبوك ؟ ساره شالت شنطتها وجوالها ودخلت للغرفة .. فارس كان واقف بباب غرفتها صك الباب .. ساره لفت عليه : آييه كلمته.. ليه على بالك راح اسكت لك انا قلت لك من قبل لو مديت يدك تحمل اللي يجيك .. فارس :أنتي استفزيتني .. ساره : لا .. والمره اللي طافت بعد استفزيتك .. أنت مديت مرآ وسكتت لك بس تحمل اللي يجيك .. فارس : أنا اسسف.. سارة :آسسف .. لما يجي البابا اشوف قوتك اللي كل شوي مطلعها علي.. ترى اللي يطلع قوته على بنت مهوب رجال.. ! فارس تماسك لاجل مايضربها .. ساره: اطلع.. فارس تقدم لها :ممكن نتكلم مع بعض .. ساره : تبي تعتذر او تبرر لكلامك مايفيد ؟ ماراح يفيد أنت ضيقت صدري وانتهينا.. الكـلام احيـان مـا منـه ثمـره خلّني ساكـت وسـوّ اللـي تبـي ضيّق الخاطـر كلامـك وكسـره آه .. من كسر الخواطـر وتعبـي ساره تكمل وهي تشوف نظراته :يالله عمري ماشفت شخص مثلك ياحبك للجرح ..الى الان احاول ادور فيك عن خصلة حلوه تخليني اتحمل واكمل الاربع سنين الجاية بس مقدر مستحيل لما يجي البابا اجلس معاك .. فارس : راح ترجعين للرياض.. سارة: أكيييد وشاللي بالغربة .. فارس بحزن: وأنا .. ساره صدت : مابيننا شي .. فارس: لا بيننا .. اسمى شي بالوجود كله .. ساره ناظرته واكتفت فيها.. فارس: لاترجعين والحين تكفين كلمي ابوك وبلاش يجي.. ساره المتها رقبتها وحطت يدها .. فارس مشى وجلس مقابلها على السرير تردد وهو يبي يحط يده على مكان المها .. كيف هو سببه والحين يحاول يخفف عنها .. ماخاب ظنه لانها بعدت يده وهو يناظر بعيونها الممتلئة حزن على حالها .. استند انه يقوم ويخليها لان عنده يقين ان شوفته تزود جروحها جروح ..! . . . الرياض .. المستشفى.. الدكتورة : معاها انهيار عصبي وحاد للاسف.. ريان كان ساكت وباين الهم بوجهه .. متعب: طيب الحين راح تجلس هنا.. الدكتورة: أكييد .. متعب: يعطيك العافية .. راحت الدكتورة .. متعب: ريان هونها.. ريان ناظر رفيق دربه : يامتعب ذي مافيها هونها ولاغيرها.. متعب : بأذن الله ربك يحلها .. لازم تتماسك لاجل البنت.. ريان : أنا خايف عليها تسوي بنفسها شي.. متعب: الحين هي نايمة والدكتورة تقول مفعول المنوم يمتد لمده 12 ساعة لاتخاف.. ريان : يمكن تصحى.. متعب: ماراح تصحى قبل ماينتهى المنوم .. وحتى البنت تعبانة راح تطول أكثر.. مشينا .. ريان: بدخل اتطمن عليها .. دخل وجلس متعب ينتظر ريان .. دق جواله : هلا طلال.. وعليكم السلام.. بخير الله يسلمك..هههه خلاص بعد شوي بمركم.. سلام.. سكر جواله ودخل بجيبه على طلعه ريان .. بسيارة متعب.. ريان : صورة مها بغرفتها مهيب قادرة تنمسح من ذهني.. متعب : تدري ماابشع منه الا حادث أخوي عبدالله .. ريان مسند راسه واكد على كلام خويه بأييوه.. متعب: وش السواة الحين ؟ ريان : مدري احس اني مششوش تفكير.. متعب: ان شاء الله نلاقي حل.. ريان: حل السالفة يامتعب عرض انتهك وين الحل ؟ مافيييه لو نقلب الدنيا حل .. كل شي له حي الا هالاشياء مافيها حلول.. متعب : يحلها الله .. وقف قبال شقه الشباب .. ريان: راح تنزل..؟ متعب: لا بروح للشركة ..راح امرك العصر.. ريان: لا ارتاح .. ومششكور يامتعب تعبتك معي.. متعب: افا ياريان تقول هالكلام..الاخوان مابينهم مثل هالكلام.. وسع صدرك لاجل مايحسون الشباب ان فيه شي .. ريان : ان شاء الله..يلا سلام .. متعب: بحفظ الله .. نزل ريان ومشى متعب للشركة.. . . . اليوم الثاني.. المغرب .. كانت شهد تسمع الاذان وهي تردد معه ..وأكلت تمره على سنة المصطفى صلى الله عليه وسلم وهي تدعي لعبدالله بالشفا العاجل.. قال ابن عمر : « كان يقال إن لكل مؤمن دعوة مستجابة عند إفطاره ، إما أن يعجل له في دنياه ، أو يدخر له في آخرته » . فكان ابن عمر يقول عند إفطاره : « يا واسع المغفرة اغفر لي ». ريما: شهد خذي شوربة .. شهد :مالي نفس .. (حطت يدها على خدها) سنويا أنا وعبدالله نصوم سوى ..وكان دايم نصوم العشر الاولى من ذي هالحجه بس هالسنة ماصام معي.. ريما كانت تناظرها وهي تتكلم وقطعت قلبها..دخل عناد..ولاحسوا فيه.. عناد:سلالالالالالام.. ريما لفت وهي مبتسمه:هلالالا والله.. قامت لاجل تسلم عليه وقامت معها شهد .. ريما:صايم.. عناد ابتسم: أحد يتوفه يوم عرفة.. جاء عن النبي صلى الله عليه وسلم أنه قال" : صيام يوم عرفه أحتسب على الله أنه يكفر السنة التي قبله والسنة التي بعده " [ رواه مسلم ] ريما: متى وصلت؟ عناد: على صلاة العصر بس خبرك حوسة المطار وكم شغله.. (ناظر شهد ) شخبارك شهد؟ شهد ابتسمت ابتسامه ميته: الحمدلله.. عطت ريما عناد تمره وقهوة ..لاجل يفطر وتالي قدمت له شوربة.. عناد:شهد افطري.. شهد:بس عمي شربت موية وثقلت زود.. عناد:لازم تأكلين.. شهد وقفت:ان شاء الله.. بروح اصلي المغرب.. مشت .. عناد : ماتأكل.. ريما:لا.. تكفى عناد حاول فيها.. أخوها فهاد امس تعب معها .. عناد: شهد ماراح يتعدل حالها الا برجعه عبدالله.. ريما: راح يصير لها شي كذا.. ماتأكل ابد .. عناد: خليها تصلي وراح اتكلم معها.. . . . ببيت أبو بندر.. بعد المغرب.. أبوبندر: كلهم بكرة راح يتجمعون بالمزرعة وراح نتغدا هناك.. بندر: شورك وهداية الله.. نورة:بس يبه أنت شايف الظروف.. أبوها: لازم نعيد.. وحتى أخوي ودي يطلع من حالته .. بندر: خلاص راح اكلم العيال ونطلع كلنا بعد مانصلي العيد.. أبوه: كلهم يجون ..لاحدن يتخلف.. بندر: ان شاء الله .. . . . 
   
|
|
08-10-2011
|
#2 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
. . . بريطانيا.. شقه عبدالرحن.. لطيفه صرخت فيه ..:ترى صاييممة.. عبدالرحمن بعد عنها: طيب طيب .. شوي وتعطيني كف.. لطيفه بيدها ملعقه تحرك الاكل: زين عرفت.. عبدالرحمن جلس: طيب معليش لاتبطلين صومك .. لطيفه سمعت الجرس:قوم اكيد محمد اخوي.. قام عبدالرحمن وفتح .. محمد دخل للمطبخ وسلم على اخته :يازين أكلتسس وريحته.. لطيفه: مابوه مثله هع هع.. محمد :مشكلة الثقة.. لطيفه :محمد روح بسس الحين تأكل اصابعك ورى اكلي.. او اقول ساعدني..عبدالرحمن شيل الصحون .. محمد : اخسس تتخدم فينا.. لطيفه تضحك: خيي حبيبي وزوجي عادي تساعدوني.. . . . شقه فارس .. فارس كان توه داخل ومعه فطور .. وشافها تكلم ..سكرت وهو مشى يحط الاكياس على الطاولة .. فارس: ذا الفطور.. سارة :افطر وحدك .. فارس ناظرها بقهر ..:مين كنتي تكلمين .. سارة: بابا وراح يجي بكرآ .. فارس: غريبة ماجا امس او اليوم .. سارة : تو اليوم لقى حجز وراح يجي فجر بكرآ.. دخلت للغرفة وصكت الباب .. جلست تحوس بملابسها وترتبها.. دخل فارس بعد وقت ..واستغرب لما شافها ترتب ملابسها..:وش تسوين؟ سارة : ارتب ملابسي ماتشوف.. فارس : طيب عطينا اخلاق تراك صايمة .. دق الجرس ومشى وكان خوية عبدالرحمن مع صينيه فطور لهم .. حطها فارس بالصالة ولاحب يدخل لها ويتكلم معها .. جلس على هالحال الين اذن وقام لاجل يناديها ..:تعالي افطري.. سارة طلعت وأخذت تمر وشربت ماي .. فارس كان جالس ويناظرها وهي تشرب ماي ووقفت : ليه ماتفطرين.. سارة:الحمدلله .. فارس: ماعجبك الاكل .. طيب جايب كل اللي تحيبنه وحتى شوفي فطور بيت من عند خويي عبدالرحمن .. سارة : الحمدلله .. دخلت لغرفتها وجلس فارس يفطر وهو يفكر بضيقه .. نزل المعلقه وراح يصلي .. . . . الرياض.. ببيت أبو عبدالله .. متعب: آييه الاضحية جبتها .. امه: مارحت مع عمك أبو بندر.. متعب: لا يمه .. امه: كان رحت معه.. متعب: يمه تراي رجال منيب صغير لاجل اروح معه..المهم بطلع للشركة وتالي بروح لخويي لاتنتظروني للعشا.. امه: انتبه لنفسك ..ولاتسرع .. متعب: ان شاء الله .. مع السلامة.. طلع متعب على دخله العنود .. العنود: هلا والله .. متعب سلم عليها: هلابك زود ..ششخبارك؟ العنود: تماام.. يؤ متعب وراك مرهق كذا؟ متعب :خبرك مسؤليه هع .. ضحكت العنود: طيب على وين ؟ متعب: بطلع للشركة وتالي لخويي.. العنود: اوك اجل سي يا .. متعب: وين زياد؟ العنود : وصلني وراح للمستشفى .. متعب: آييه يلا سلام .. طلع متعب ودخلت العنود وشافت وعد توها تنزل لاجل متعب كان موجود .. جلست وعد وعمتها شوي وتالي راحو للمطبخ .. العنود جلست مقابل أبوها ومسكت يدينه : يانور عيون العنود شفيك؟ أبوها مسك يدينها ويناظرها .. العنود لمعت عيونها: يبه مهوب أنت اللي تجلس هالجلسة وساكت أفا يانور هالدار وين هيبتك ؟ تكفى يبه ارجع وعبدالله راح يرجع بأذن الله.. ها يبه تكلم معي أنا العنود .. أبوها تكلم: عبدالله .. العنود كانت متأكده وبقين أن أبوها يتكلم بس بداخله صدمة ابتسمت بفرحة انه تكلم معها : آييه عبدالله بيرجع .. أبوها: عبدالله سافروا فيه .. العنود: آييه يبه بس يبرجع بعون الله .. أبوها: من سافر فيه ؟ العنود :بدر وعمي محمد .. أبوها: يالعنود أنا سبب بحادث عبدالله .. العنود باستغراب: يبه كيف أنت السبب ؟ أبوها: أنا قلت له الله لايرده (تجهش صوته ) .. العنود فكت يدين أبوها وناظرته مو مصدقة .. أبوها: وصار له هالحادث.. العنود :ليه طيب؟ أبوها: لاجل هالفلوس .. خذوها كله بس انه يرجع لي اخوك سالم غانم.. العنود بهمس: لاجل فلوس يبه .. فلوس ..لييه ؟ ماخبرتك كذا.. ياااه يبه تدعي على البار الحنون فيك لاجل فلوس.. أبوها كان يناظرها وهي تتكلم .. العنود سكتت وناظرت أبوها بنظرات تأنيب ..! . . . ببيت ماجد .. ماجد : وتين مافيه احد جده وعمه معياد راحو يقضون العيد بسدير .. وتين: بروح معك .. ماجد :للمستشفى .. مازهقتني يابابا.. وتين جلست : خلاص بابا روح .. اصلن كلكم ماتحبوني .. ماما تركتني وراحت بعيد .. وأنت مثلها.. ماجد جلس مقابل بنته : ليه يابابا تقولين هالكلام.. أنا وماما نحبك كثثير.. وتين : بابا الكذب يودي النار.. ماما ماتحبني .. ماجد: لا الماما تحبك بس عندها شغل.. وتين : ماما ماتحبني .. وأنت مثلها .. بابا معانا بالروضة ولد راح الجنة ماجا ليه مااروح مثله .. أبوها بفزه ولمها له: لا وتين بابا لاتقولين كذا .. تبين ماجد يصير له شي ماتدرين أنك حياة البابا .. وتين كانت بحضن أبوها وساكته .. شالها ماجد : الحين شرأيك نروح سوى للمستشفى .. وتين ابتسمت ونست كل زعلها من أبوها .. بالمستشفى .. ماجد : ها وتين اجلسي هنا وبروح وبرجع .. وتين تناظر أبوها .. ماجد : وتين شويات وراجع لك.. خليك مع شروق وداليا.. شروق خذتها من الدكتور ماجد ابتسم .. مشى للاجتماع وكان بعد متأخر شوي .. شروق تطالع وتين : شو اسمك ياحلوه ؟ وتين تناظرهم يطالعون فيها كل الموظفات بالاستقبال وخافت منهم.. دخل زياد للمستشفى وشافهم ملتمين ..: سلام .. تحركوا كل البنات لشغلهم .. زياد ابتسم لما شاف البنوته : مشالله من بنته ؟ داليا طاح قلبها من زياد على بالها راح يهاوش: بنت الدكتور ماجد.. زياد : ياحليله ماجد .. هاتيها .. عطته شروق وشالها زياد وباسها وتالي رجعها : ليه جابها هنا.. شروق: مدري .. وتركها لاجل عنده اجتماع .. زياد ضرب على راسه : نسيت الاجتماع .. مشى للاجتماع.. شروق: صح بنات شفتم زوجته.. داليا: متزوج ؟ شروق: آييه مرآ اذكر دخلت له ملفات .. اقسم بالله يابنات ملكة جمال زوجته خقه خقه .. حتى ذاك اليوم دقيت الباب ودخلت وكان جالس على مكتبه وهي كل الكرسي حقه .. اسماء: طيب يمكن موب زوجته .. شروق: الا قالي جيبي ملف العنود .. وحتى الحين حامل .. داليا: لازم نشوفها لما تجي .. شروق: توها قبل كم يوم كانت مراجعته .. بس ترى حتى هو يجنن.. داليا :آييه بجد عليه جسم وطول وجمال ..أو صوته شي ثاني .. اسماء :بنات اتقوا الله ..لاتناظرون في الرجال كذا .. غضوا بصركم .. ( وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ) التوبة آية 31 داليا: استغفر الله بس .. اسماء: صدقوني بنات من ترك شيئا الله عوضه الله بخير منه .. عن أبي قتادة وأبي الدهماء وكانا يكثران السفر نحو البيت قالا أتينا على رجل من أهل البادية فقال لنا البدوي أخذ بيدي رسول الله صلى الله عليه وسلم فجعل يعلمني مما علمه الله عز وجل وقال: (إنك لا تدع شيئاً إتقاء الله تعالى إلا أعطاك الله عز وجل خيراً منه). رواه أحمد (5/363) وإسناده صحيح ورواه البيهقي (5/335) ووكيع في الزهد والقضاعي في مسنده. شروق: ايو الله صادقة الله يغفر لنا بسس.. وتين كانت تناظرهم الين خلصوا من كلامهم وقالت :أبي بابا.. شروق شالتها وهي تبوسها: بابا في اجتماع .. تعالي نروح الكفرتيا.. مشت فيها شروق.. نجد جات وهي تنزل ملفات :بنات خلاص تعبت .. داليا: اليوم مافيه ناس كثير.. نجد: كل البشر يجهزون للعيد بكرآ .. داليا بحسره: الا احنا.. ضحكت نجد : قسمتنا .. داليا: نجود اخوك متزوج ؟ نجد تربط نقابها زين: طلال وزياد كلهم متزوجين .. داليا: اها .. نجد : ليه؟ داليا: لان شفت ملف وحده وقالت لنا شروق انها زوجته.. نجد : آييه العنود زوجته والحين حامل .. دخلت نجد ترتب الملفات ومعها اسماء وداليا تستقبل الموظفين .. شوي وجات شروق ومعها وتين .. نجد جلست واسماء .. نجد :يالببببي تزنن .. شروق تفتح لها شكولاتة: بنت الدكتور ماجد .. نجد : اوما .. عنده بنت ؟ شروق: آييه .. وتين كانت جالسة على كرسي وتهز برجولها وتحركها وهي تأكل .. نجد جلست مقابلها وباستها : تزنن .. شروق : بقوووة .. بس ياحلوة وين ماما ؟ نجد قامت لاجل تكمل ترتيب الملفات .. وتساعدها اسماء.. وتين كانت تأكل شوكلاتة ووقفت عن أكلها.. داليا تناظرها : صح وين امها هذي ثاني مرة يجيبها الدكتور ماجد هنا.. وين ماما ؟ وتين طاحت الشوكلاتة من يدها وبدت تنزل دموعها لانها خافت منهم.. شروق قامت : بنات تبكي داليا: مالي شغل ماقلت لها شي.. نجد نزلت الملفات ومشت جلست على رجولها قبالها: ياقلببو شفيك؟ وتين بدت تبكي أكثر: أبي باااابا .. نجد: بنات وين الدكتور ماجد؟ اسماء :عنده اجتماع .. نجد تمسح دموعها: بس قلببو .. بنات وش قلتم لها ؟ شروق: سألناها عن امها.. اسماء: فضولكم ماله داعي بكى البنت .. وتستاهلون لو جاكم أي شي من الدكتور ماجد .. شالتها نجد :بنات بروح فيها لمكتبي لما يجي أبوها عطوني خبر وراح اجيبها .. شالتها ومشت فيها .. داليا: يمممه لو درى أبوها انها بكت بسببنا .. شروق: لا ان شاء الله راح تسكت الحين .. . . . بمكتب نجد .. صكت الباب وشالت نقابها .. شالتها نجد وغسلت وجهها ومسحته : بس قلببو .. تعالي الحين راح اجلسك على الكمبيوتر وراح افتح لتس العاب .. وتين :مابي ابي بابا .. نجد بحنان : الحين بابا راح يجي ..شوفي العاب .. عطتها الماوس وشوي سوت نفسها لهت وأخذت وتين وبدت تلعب.. لفت نجد عليها وابتسمت :يالبى براءة الاطفال .. . . . ببيت أهل شهد.. شهد : فهاد راح يمرني ..وراح ينام عندي .. عناد : ترى بمرك بكرة .. شهد :البيت بيتك .. ريما: انتبهي لنفسك .. شهد: اوك .. طلع عمها وزوجته .. وراحت لاجل تصلي العشا .. صلت وكانت جالسة على السجادة .. جات ماري وقالت فيه ضيوف .. قامت شهد على حيلها .. شافت عمتها حصة ومشت لاجل تسلم عليها ..:تفضلي عمتي .. جلست عمتها .. شهد: ماري جيبي القهوة .. حصة : لا خليها الين تجي عمتك هيله بس أنا جيتك قبل وبقولك سالفة تهمك .. ناظرتها شهد وبقلبها يارب سترك .. . . . المستشفى .. كان زياد يمشي مع الدكتور ماجد ووصلوا للاستقبال .. زياد: اشوفك اجل .. سلم عليه ومشى .. ماجد وقف: وين وتين؟ شروق: آممم مع نجد .. ماجد: مين نجد ؟ شروق: نجد .. داليا: نجد بنت الدكتور محمد .. ماجد: آييه نسيت .. طيب بمكتبها .. ؟ شروق: آييه .. لحظه بدق عليها وتجيبها .. ماجد يأشر بيده: لالا أنا بروح .. مشى عنهم .. دق الباب ولبست نجد نقابها وكانت تقلب بملف الحسابات : ادخل .. دخل :السلام عليكم .. نجد نزلت الملف: وعليكم السلام .. وتين :تعااااااال شوف بابا العاب هنا .. ابتسم ماجد بنته جالسة على كرسي نجد ومأخذها جهازها تلعب.. : راق لتس الجو .. شكرآ نجد تعبناك معنا.. نجد : لاشدعوة .. ماجد: هاتيك باابا .. نزلت من الكرسي الدوار وركضت لابوها .. ماجد ابتسم :ليه وتين كل التيشرت شوكلاته .. وتين : هذيك عطتني .. تقصد شروق.. ماجد مبتسم: ماقصرت .. يلا نجد عن اذنك .. طلع ماجد ورجعت نجد لشغلها .. . . . ببيت أهل شهد .. شهد دموعها تنزل : عبدالله متتتزوج ..! سبحانك اللهم وبحمدك لااله الا انت استغفرك واتوب اليك .. آنتهى ..
|
|
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض المتطور
