ديوان الشاعرة ( عابرة سبيل ) _ رحمها الله

هــــذاك

هذاك لو قال الشتا صيف عرقت

ولو قال صيفي برد شبيت ناري

هذاك لو قال الجمل طير صدقت

واقول ريشه بعثرته الصحاري

هذاك لو قال المطر جذب وافقت

وادور الاعذار حق الخباري

هذاك لو قال القمر طاح صفقت

واقول مللته كثير المساري

هذاك لو قال النظر عيب دنقت

يصير لي كف على اللمس ضاري

هذاك لو ينفي وجودي توهقت

ما عاد ليه حل ...غير انتحاري

ترى الذبايح

ترى الذبايح وأهلها ما تسليني
أنا أدري إن المرض لا يمكن علاجه

أدري تبي راحتي لا يا بعد عيني
حرام ما قصرت يديك في حاجه

أخذ وصاتي وأمانه لا تبكيني
لو كان لك خاطر ما ودي أزعاجه

أبيك في يديك تشهدني وتسقيني
أمانتك لا يجي جسمي بثلاجه

لف الكفن في يديك وضف رجليني
ما غيرك أحد كشف حسناه واحراجه

أبيك بالخير تذكرني وتطريني
يجيرني خالقي من نار وهاجه

سامح على اللي جرى ما بينك وبيني
أيام نمشي عدل وأيام منعاجه

همي عيالي وأنا اللي في كافيني
علمهم الدين تفسيره ومنهاجه

يسوى له ثمانين رجال

بريال عارضته على السوق بريال
من باعني برخيص والله لا بيعه

من يشتري رجال قصر بالأفعال
باع العهود الماضيه للخديعه

رجال يسوى له ثمانين رجال
كل الصفات اللي ملكها فضيعه

له ضحكة تشبه لضحكات الأطفال
ذيب..ونظراته حنونه وديعه

وله فزعة منها المجانين عقال
وفجوج لا ضاقت علي الوسيعه

ياما عدل عوجي ثقيلات وطوال
وأنا معاقبته غيور صريعه

والله يسوى له ثمانين رجال
الخبل مثلي لا زعل يب يبيعه

زهرة شبابي

كل ما اتصل فيك صبح وليل تشكي لي
من عوج الاوجاع والدنيا ومتاعبها

مليت ياصاحبي مابيك.تحكي لي
ها الاسطوانه..انا مليت مطربها

حتى خيالك بتالي الليل ياتي لي
جروح..وعيون معقودة حواجبها

عيشتي بعالم ماهو على جيلي
زهرة شبابي حرام انك تخربها

حبيبتك ما تحمل ها لبهاذيلي
اضحك معاها..ولاطفها..ولاعبها

هيا تغزل غن وزيد تذليلي
البنت يا حبها للي.......

قلي اشرايك بفستاني ومنديلي
شفت قذلتي يوم قصينا ذوايبها

قلي اشرايك باطباعي واقاويلي
لاحظ عليها..وغيرها..وشطبها

يامدمن الهم كافي دمع بالليلي
بكره بتشبع من الدنيا ومصايبها

دنياك والله ماتسوى التزاعيلي
حتى ولاهي بكفو اللي يعاتبها

انت ابوه....وقده !

للمشاعر زمام, والزمام بيده!
إمسك زمام قلب بالغلا طيروه

عقلي البارحه طفل..ابوه طرده!
منتهي..مالقى والي,وهم جننوه!

والمشاعر مثل جيش..يهول عدده
فيه ضيقة..يبي الفزعه,وهم وقفوه!

وقايد الجيش صنديد عرف مقصده
لو نهمهم تطيح غترهم,بايعوه

صاح عمه قبل خاله..وصاح ولده!
المراداتهم اللي يبونه..خذوه!

جرها سلم قلبي,يوم جاب جهده
كل ما صاحوا بصيحة وقف وحشروه!

قايد الجيش قلبي,وأنت ابوه وقده
لايحدون قايدهم على اللي بغوه

يوم قلبي بلاه الله فيك.."قرده"!
لا جفا فيه مخلاص,ولا واصلوه!

المهزلة

أنا اللي ذبحني واحد مرني عجلان
عقد حاجبه كنه وطا باللظى والشوك

أسلم عليه وكني أخاطب الجدران
سقى يوم يتبعني وأصد واقول:ارجوك

زعل واثره الحر الذي لا زعل ملان
بغيت الحقه واشوف صرح الرجا مدكوك

وقلت اتدلل وادخل بحيلة النسوان
نعم جارحه والمشكلة غيرتي وشكوك

سألته عن الواني سألته عن الفستان
سألته عن الشيله إذا طرفها مشكوك

سألته عن سوار عليه الفصوص الوان
يقول:استشير اللي على ذوقهم مشوك

وطوفتها في ضحكة الخاطر الندمان
وقلت:اخطبوني وللأسف قالها: مبروك!

ضرب بالكرامة عرض وعرضني الحقران
واعزاه ياقلب على المهزلة حدوك

وبعثت الرسايل ول ماكن لي عنوان
شكيت الظما يا قلب واهل النهر ماسقوك!!

أدخل على الله

مدري رجا مدري وفا مدري احساس
أنطرك وادري قلت لي ما انت راجع

يامن سوت عينه مخاليق وأجناس
ادخل على الله لا تزيد المواجع

جفني خذاه بتالي الليل هوجاس
وادري بجفنك تالي الليل هاجع

أبا اتحرى جيتك واقطع الياس
واقول نور الحب لا بد ساطع

ماهمني مكسب ولاهزني افلاس
بأمشي على عمياي وأقول راجع

تَــمَّ بحـمد الله ..
أتمنَّـى أن ينال اعجاب الجَـميع ..
و رَحمَ الله شاعرتنا و جعلَ مثواها الجنَّـة ..