|
|
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
#1
10-24-2011
|
||||||||||||||||||||||||||||||||
|
||||||||||||||||||||||||||||||||
|
نفســي عزيزة يا بندر ... الكاتبه ::: قلم نابض بجويتي
// نفســـــــي عزيزة يا بندر //
بقلم: قلم نابض بجويتي الشخصيات بو بندر و بو محمد أخوان . عايله بو بندر . . بو بندر _ رجل أعمال و له سمعه طيبه في السوق الإقتصادي . ام بندر _ ربه منزل بندر _ 30 سنة و يشتغل مع ابوه في الشركة . . عزوبي . بشرته حنطاويه و جذاب و عريض الصدر و طويل القامه .فيه غرور و عصبي يعني كبريت بس حنون جاسم _ 26 مدرس رياضيات و متزوج بنت عمه فاطمة و له بنت اسمها حور عمرها سنتين و حبوب و عكس مواصفات اخوه بندر . جاسم أبيض و نحيف و متوسط الطول . عبير _ 23 سنة طالبه في الجامعه و جميلة حيل و بيضه و شعرها أحمر ناري . طولها اعلى من المتوسط بشوي . . عايله بو محمد بومحمد _ رجل اعمال و شريك أخوه بو بندر في الشركه ام محمد _ ربه منزل محمد _ 31 يشتغل مع ابوه و رفيج بندر . طبعه هادي و جميل و ابيض و خاصه عيونه جنها مكحله .متزوج بنت خالته بدور و له ولدين عمر و عثمان توأم 3 سنوات و بنت عايشه سنة .. عذاري _ 27 سنة متزوجه واحد من جماعتهم . و لها بنت دانه ثلاث شهور و ولد طلال سنتين فاطمه _ 25 سنة خجولة حيل و متزوجه ولد عمها جاسم و عندها حور . جنان _ 23 سنة طالبه في الجامعه . ملكه جمال و ناااعمه و بيضه و شعرها اسود فحم و ناعم بس مدرجات و اطول درجه يوصل كتفها . متوسطه الطول و رفيجه عبير . سارا _17سنه طالبه في الثانوية حلوه بس دلووعه و آخر العنقود عايلة بو أحمد ( أخو ام بندر ) بو أحمد : 52 سنة مستشار قانوني و له هيبه ام أحمد : 49 معلمه أولى قسم لغه عربية أحمد : 34 محامي متزوج بنت عمه صفيه و له أربع أولاد نواف : 27 سنة ضابط و متزوج بنت عمته خزنة و له سنتين مارزقه الله بالذرية نوف : 25 سنة مو متزوجه جذابه و أنيقه و عيونها حاده شعرها كيرلي طبيعي لونه أشقر شخصيتها متكبره و أخلاقها صفر دايما تحتقر بنات عايلتها و تشوفهم أقل منها بالرغم انهم جميع من الطبقه الغنية بالديره لكن أبليس عمى بصيرتها و أخذتها العزه بالأثم .. بسم الله على بركه الله . . // الجزء الأول // في بيت بو محمد . جنان بقهر _ آسفه يمه شوفوله وحده غيري . الام بضعف _ يابنيتي يا حبيبتي الي قاعده تقولينه غلط جنان و اهي تمشي يمين و يسار و كاتمه البجيه _ حراااام عليكم شنو انا حياتي مو مهمه عندكم ماعندي راي قلت للمليون مره لا يعني لا إلا هالبندر المغرور شايف نفسه علي بشنو ؟ و تركت امها و نزلت للدور الأرضي . شافت سارا تابع توم و جيري . و طلعت حرتها على هالمسكينه . جنان _ الحمدلله و الشكر هالطول هاذا و آخرتها توم و جيري سارا ببروود و مدت الأحرف بدلع سارا _ محترراااااا عادي حبيبتي جنو اتصدق لج و أقص لج من طولي عشان ماتفشلين بندر لي قالوا زوجته قاااازاااماااا قامت جنان و امسكت شعر سارا البوي و قالتها و هي معصبه _ كرري كلامج و شوفي شيصير فيج يا سويروه سارا بألم _ آآآي عورتيني يما يما يما تعاااالي سمعوا صوت الباب الخارجي يفتح و لا ابوهم داش بو محمد _ يا هلا ببنياتي حبيبات قلبي . ركضت سارا يم ابوها و تحب راسه و بدلع _ هلا والله بو محمد مرحبا الساع .. بو محمد و بضحكه خفيفه _ يا هلا فيج يا قلب بابا سارا بغنج بتقهرر أختها _ يوبا متى عرس جوجو ؟ عشان افصل نفنوفي قبل الأختبارات بومحمد بإبتسامه_ إن شاء الله بعد شهرين جنان بحرقه _ بعد ! شلون يعني مالي راي !؟ لهدرجه انا رخيصه عندكم . . اول ماخلصت كلمتها ولا تبجي . جنان و الدموع مليانه عيونها_ يوبا مابي بندر ما بيه ما بيه و تركض بتروح لغرفتها . سارا بتكشيره _ يوبا والله مايصير . ارفضه حرام جذيه والله . بو محمد و يهز راسه _ الله يهديها بس . يايمه يا سارا بندر خاطبها و هو حاجزها فخلاص هو لها و هي له بعدين أختج بتعقل بعد الزواج . لاتخافين يابنيتي . ألتفت بو محمد للتلفزيون و ضحك . سارا حبيبتي لي متى بتكبرين بالثانوي و تطالعين رسوووم ؟ (طبعا يقلدها بمد رسوووم ) سارا و الحلج تبرطم _ يووووباااا و بصوت خفيف _ محترررر بومحمد عارفها عدل _ قلتي شي سارونه ؟ سارا بضحكه _ نووووووو بومحمد و هو يمشي بيروح لغرفته _ يالله مع السلامه سارا _ تشاااو بابا . . هز راسه و ابتسم و سكر باب غرفته . . &&&&&&&&&&&&&&&& نوف تكلم عهود رفيجتها _ ياربي يقهرني هالنواف أربع و عشرين ساعه يدق علي وينج و مع منو ؟ يوترني هالمتخلف عهود بحقارة و بذاءه _ قلتلج وافقي على سعد و هو متعلق فيج و شاريج بس انتي عنيده و تبين هالمعقد ولد خالتج نوف بقهر _ بااااااااااااااس ياعهود لا تزيدين الجيله الي بروحي يكفيني عهود و تعرف شنو الي يريح نوف _ انزين متى تبيني أمرج عشان نروح للسووق نوف وتهز رجلها و مزاجها تحسن _ أممم تعالي 7و نص عهود_ لا يكون بتاخذين موافقه السي سيد أضحكت نوف بتغنج و كريه جدا _ نوووف بنت جاسر تاخذ راي نوافوه خل يشيخ على مرته هالمعقده عهود بابتسامه خبيثه _ كفو و الله يلى سي يو نوف بمتعه وراها طلعه للسوق _ سي ياااا حبيبتي سكرررته من رفيجتها &&&&&&&&&&&&&& بندر بصوت مرتفع شوي _ يوبا ليش كلمته انا كذا مرة قايل مابي بنت عمي و اصلا مابي اتزوج من الاساس ؟ بوبندر بعصبيه _ بندر ترى انا ساكت عليك من خمس سنين و أقول يمكن يعقل بس طلعت مجنون ألحين اقولك بنت عمك محجوزه لك من زمان و ابوها يرد الخطابين عشانك و يبيك تتحرك و انت ولاهامك . و ألحين خلاص البنت ماهي صغيره و انا اتفقت مع عمك العرس بعد شهرين . . بندر و ايدينه ماسكه راسه _ ليش ليش يا يوبا ليش ؟ هاذي مثل عبير بالنسبة لي ؟ بو بندر بصوت عالي _ بندر هذي بنت عمك مو اختك و قضي الأمر خلاص لا تفشلني و جناحك روح أثثه أنت و أمك وأختك . . و طلع الأبو و هو يقول _ الله يصلحك يابندر ماتعرف هالجنان و الله جوهره وماتعوض ظل بندر سرحان بالمصيبه لين ادخلت عليه امه _ السلام عليكم و أمه تمشي لي وصلت عنده و قالت_ بندر بندر بندر طالع بأمه و تكلم بأسى_ هلا يمه تبين شي امه _ سلامتك عسى ماشر شفيك انت و ابوك اصواتكم عاليه في شي ياوليدي ؟ بندر بزفرة_ لا يا الغالية ما في شي . الام بفرحة و تصب لها فنجان قهوة _ زين يمه من وين تبينا نشتري اثاثك ؟ بندر بإبتسامه مصطنعه _ على راحتج انتي و الخبله عبيروه و لا الذيب عن طاريه عبير وايدها على خصرها _ منو الخبله ؟ يا بعل السنيورا جنان بندر بضحكه _ حلوه منج بس لايكثر .. عبير بتعمد وهي تجلس عندهم _ ماما باجر جوجو بتشرفنا اهنيه فبيتنا العزيز عازمتها على مباراة ويمبلدون تنس و تعطي أخوها نظره يعني منو قدك ! ماتدري شلي بقلب أخوها . بس بندر ماحب انه يبين شعوره عند امه و أخته بندر بضحكه عالي طويله _ ماما و جوجو و مباراة و عزيمه عز الله انج خبله و نكته بصراحه الي بياخذج راح يستانس عنده جحا فالبيت . عبير بدت تتفلسف _ اصلا الضحك ينشط المخ و يريح الأعصاب و و .. و بعدها صوتها انخفض و عيونها تشوف بندر قام و راح لغرفة ثانية _ صج مايستحي ولدج هذا بس يبي يتكلم و غيره لا . الله يعينج يا جوجو على هالمغرور . أم بندر بعصبية _ أستحي يابنت شلون تتكلمين جذيه عن أخوج الكبير عبير بقهر _ أيه دافعي عنه هذا الحبيب الدلوع . &&&&&&&&&&& ( مجمع تسوووق ) بمكان من أبغض الأماكن عند الله عزوجل مكان تجتمع فيه شياطين الأنس و الجن قلوب مريضه غرها زخرف الدنيا لهاها عن ذكر الله أصوات و مشيات تتغنج أقنعه صارخه بالألوان عباءات مزخرفه مزركشه روائح تغرد الأنفس و تحرك الشهوات . مجموعه شباب يمشون ورى نوف و عهود و يتحرشون بكلمات بذيئة تخجل الواحد شاب _ أنتي يا حلوووه يبا عطينا فيس كل هاذا يعني ثقل شاب ثاني _ أمحق ثقل و لابسه هالعباية يبا عادي بس نظره من هالعيون الذباحه آآه ياقلبي ألتفتت له نوف و عهود و عطوهم إشارة فأخذن الأرقام و بعدها أقعدن بالباسكن روبنز و هن معروفات عند المطاعم من كثره روحاتهن لهم بيت بو محمد و تحديدا بغرفة جنان قاعده قدام المنظره تتمكيج و تغني بصوت واطي . و ألبست جنز أسود برمودا و بدي أحمر غامج . . . . اسمعت أحد يدق بابها بيدخل . جنان _ تفضل أمها _ دام فضلج ها خلصتي ؟ جنان _ ايه بس ألبس عباتي و نقابي . امها _ خلاص ابوج يبيج بمكتبه قبل لا تطلعين جنان _ أوكي يما ألبست جنان عبايتها و أهي تنزل للدور الأرضي و لا صوت الهاتف الثابت يرررن شالته و قالت بصوت هادي جنان _ نعم ..... _ يا هاني أخذ الأوراق ودها لأبوي بمكتبه شنو .. جنان بصوت عالي _ نعاااام .... _ إيه شقول انا من اليوم بعدييين انتبه المتصل ان أحد معاه وقال _ آلو جنان بقهر سكرت السماعه بوجهه . . . و مشت بتروح لأبوها و لا التلفون يرن مره ثانية جنان مالها خلق . عارفه منو هالشخص الي عمرها ماراح تنساه .. أرفعت السماعة . و بصوت عالي وبقهر كبته من خمس سنين ولا فضفضت لأحد نعم شتبي تكلم ياولد العم . أوووف بندر بعصبية _ الظاهر ماتعرفين الاصول يابنت الأصول يعني داق عشان سواد عيونج شبي فيج يلى خلصيني وين محمد ؟ جنان هالكلمة حزت فخاطرها فردت عليه بصوت مبحوح _ محمد مو موجود دق على ... طوط طوط طوط طوط سكر بوجهها . . جنان حست بالإهانة من حركته . لهدرجه شايفها مو شي استوعبت جنان تأخيرها أووه نسيت أبوي . ومشت بخطوات ثقيلة و كلمته تردد على أذنها شبي فيج من سواد عيونج قويه يا بندر ليش تحب تجرحني للحين جرحك ينزف فقلبي . ما طاب يابندر ماطاب ماطاب !! بو محمد _ دخلي جنان جنان و عند الباب بإبتسامه حالمه _ هلا يبا بغيتني و بو محمد يوقف و رايح لبنته و حط أيديه فوق أكتوفها و بإبتسامه ترد الروح بنيتي بندر عطاني مهرج و استعدي ماباقي على العرس إلا شهرين . جنان جسدها بس ألي حاضر عند أبوها بس عقلها رجع ل 5 سنين فبيت عمها و خاصه وهي واقفه عند الدرج بتروح للمطبخ . و تسمع بندر مع عمها و مرته يتناقشون بخطبته لها و كان هذا أحلى خبر لجنان و الدنيا مو سايعتها و أخيرا تحقق حلمج ياجنان و بتاخذين الرجال إلي تتمنينه و تحلمين فيه وكانت بتركض لعبير و تزف لها هالبشاره . . بس يافرحه ماتمت بندر بصوت عالي _ يوبا مابيها شنو انا بنت انغصب و ينفرض رايكم علي ليش معقدين حاجزينها لي من زمان قلت لا و ألف لا ام بندر بخوف _ يا بندر قصر حسك البنت فوق عند أختك لا تسمعك بندر بلا مبالاة _ خل تسمع بالطقاق إلي يطقها . انا زواج من جنان مااااااابي انزين و تركهم و طلع برا البيت من قوة صكة الباب . بندر كان رافض فكرة الزواج بعد بنت جيرانه الي كان يحبها من كل قلبه بس أهي ماكانت تدري عن حبه فتزوجت ولد عمها و سافرت معاه خارج الكويت واستقروا برا بعدها رفض فكره الزواج إلين يلقى إلي تجذبه و يحبها . و جنان كلش مو طايقها كزوجه جذيه بدون سبب . . ويحس تجاها كأنها أخته لانه اكبر منها بسبع سنوات جنان تحس خنجر طعن قلبها بقوه و انزلت منها دمعه قاهره حارقه و جرت ذيول الإهانه و الحسره . . وراحت لبنت عمها بدون ما تحسسها بشي . . بو محمد يهز كتف بنته _ جنان ها يمه أي شي تبينه و ناقصج مايردج إلا لسانج . جنان بأسف _ و حلجها يرتجف تبي تبجي بس تحس أنها مو قادرة فنزلت منها دمعه . . و قالت بكل إنكسار لأبوها . تسلم يوبا جعلك ذخر لنا . و حضنت أبوها و تبي تنسى رفض بندر لها . و ابوها حب راسها . دخلت عليهم سارا _ جوجو عبير دقت ع البيت تبيج ضروري . بسررررعه جنان تركت أبوها و قالت بضحكه يوبا انا استأذن ألحين تلقى عبير ميته قهر تأخرت عليها . مع السلامة يوبا . بو محمد _ مع السلامة بحفظ الله . طلعت تركض فوق لغرفتها نست موبايلها . و لا قدامها بدور مرت أخوها محمد بدور _ شوي شوي هدي يا حلوه جنان ببشاشه _ بدور مالي خلقلج و خري عني بدور سادة الطريق على جنان إذا راحت يمين سوت مثلها وإذا راحت يسار هم سوت مثلها بعد . عصبت جنان من صج _ بدور قسم بالله لأعطيج بوكس يكسر خشمج هذا بدور و تضحك تبي ترفع ضغط بنت خالتها _ بل بل هذا و انتي بتصيرين عروس الله يعينك يا بندر . تعال تعال شوف بنت الحسن والدلال شقاعده تسوي جنان بقهر _ الله يعيني انا . كل الدعاوي له و انا بلي مايحفظني . وخرت بدور لجنان بس قالت لها _ انزين وين بتروحين ؟! و الله شهالزين ؟ وين ياجنان ؟ جنان بقهر تعرف بدور ماراح تطوفها _ بروح عند عبيررر عندج مانع حضرة بدور هانم بدور بإبتسامه خبيثه _ لعبير ولا لحبيب القلب . جنان طنشتها و راحت تاخذ موبايلها ولا عبير حارقة جهازها من كثرة اتصالها . . بيت بو بندر مافي في البيت غير ام بندر و عبير و فاطمة مرة جاسم و أخت جنان اما بوبندر و بندر في الشركة و جاسم عند ربعه . جنان بفرحه _ هيااااا عبير و شوي و تبجي ._ اووه خلاص ياجنان اسكتي . وبأنفعال _ هيا هيا هيا لاتفرحين واجد باقي شوط و ام بندر تشوفهن و تقول لمرة ولدها _ لاحول ولا قوة إلا بالله اكبروا و استخفوا الظاهر الزواج بعقلهن . . فاطمة ابتسمت ابتسامة هادية _ الظاهر خالتي الزواج بيسنعهن تقل شباب مو بنات . و صراخ و شد حيل و كل وحدة تتطنز على لاعبها المفضل . و أخييييرا صرخت عبير و قعدت تبجي ليش ليش جذيه فرحت العذال علي جنان بفرحه عارمه نست كل جروحها بهاللحظه و قعدت تنطنط و تقول _ عبير روحي غيري هالتي شيرت مالت عالوجه أنقهرت عبير و قعدت تركض وراها بتطقها .. و إلا صوت التلفون . . ويتراكضن من تشيله قبل الثانية و بعدها تركتها عبير واستسلمت بتروح تشرب ماي تعبت و راحت جنان يم التلفون . جنان بنشوة الفرح بالفوز_ مرررررررحبا بندر معصب _ عبير روحي لغرفتي طلعيلي دشداشة بسرعه و سكر الخط . جنان بإحراج _ عباله انا أخته .. شكله ما انتبه ع الصوت من العصبيه جنان صح أنجرحت من بندر و تقول لعبير انها تكره و شايف نفسه بس بالقلب غير لو تقول لنفسها انا اكره ..تدري انها تضحك على نفسها ماحست إلا بعبير تطقها على راسها _ هيييي وين رحتي ؟ جنان طقتها بعد ع راسها _ اي آي عورتيني عبير _ انزين منو الي دق جنان و رافعه حاجب واحد _ أخوج المغرور عبير بملل _ شيبي بعد هذا ؟ جنان _ يقول طلعيله دشداشه بسرعه عبير بخوف _ حسبي الله عليج وتوج تقوليلي جنان _ شفيج مخترعه عبير اتركتها و راحت لغرفة أخوها و جنان ترددت أروح ولا لا .. أخاف يدخل علينا لا مااعتقد أخر شي قررت تروح و صعدت لغرفته . بندر منقهر من أخته يدق ع البيت و على جهاز اخته بس ماحد يرد . يدري ان جنان عندهم عشان جذيه قاعد بالدوانية . فور الدم عنده . و يكلم نفسه _ هاذي بارده كل هذا اطلع دشداشه دخل البيت سمع اصوات من المطبخ عرف صوت امه . و يصعد الدرج بخطوات متسارعه و بدرجتين جنان أول مادخلت الغرفه غمضت عيونها و ريحه الغرفه تشرح الصدر ياحلو ريحة عطرك يا بندر . غايب وانت بالقلب موجـــــود ماغبت عني يا أعز غالـــــي أذكرك لاشميت ريحة العـــــود وأذكرك لاهبت هبوب الشمالي وأذكرك لابانت لي أزهار وورود وأذكرك لاشفت القمر فوق عالــي. فتجولت في الغرفه . . و شافت صوره له عند طاولة مكتبه و اخذت تأمل ملامحه ليش يا بندر كل هالقسوة من وين جايبها ملامحك ماتدل على قساك بعدها اتركت صورته و طالعت بعبير و عبير من الخرعه اطلع دشداشه و تطيح و تاخذها . جنان لاحظتها و عبير تقول _ ياويلي منه بيلعن خيري جنان بإرتباك _ شفيج عبير مو على بعضج . . شنو وحش هو . ؟ خل يحمد ربه بعد البيت متروس خدم و يشغلج خدامه عنده صج أخوج ماعنده سالفه و لا على دخلت بندر و عيونه حمر من تأخير اخته و وقاحة بنت عمه فبيته و فغرفته و تكلم فيه . . و فتح الباب على مشراعه . بندر بنبره سخرية _ دايما أسمع أن في ناس وقحين بس ما عاشرتهم يا بنت العم لكن شكلي بتعايش معهاااا ؟ وألتفت لأخته _صح يا عبير و لا كلامي غلط ؟ جنان الصدمه ألجمتها وأخرستها و فجاءة أخذ دشداشته و دخل الحمام" اكرمكم الله " عبير انحرجت من الموقف وابتسمت بإحراج لجنان شناطره زفه بعد ؟ خل نطلع جنان بصدمه أول مره تشوف بندر ع الطبيعه بعد 5 سنوات و يكون بالطريقة هذي طلعوا من الغرفه و دقت جنان على السواق يجيها ألحين و ام بندر تحاول فيها تعشى عندها بس جنان لفت الموضوع بان راسها يعورها . الساعة 1 بالليل بندر يتقلب بفراشه النوم جفاه . يفكر بموقفه مع جنان . بندر بداخله _ شفيك يا بندر انهديت ع البنت هاذي أول مرة تشوفها بعد ماتغطت عليك . و تكون شرس معاها . بس احسن تستاهل فغرفتي و لسانها طويل . تو الناس يا بنت عمي ماشفتي شي . ان ماخليتج تحترميني . و تندمين ع كلامج !! ابتسم بخبث_ بس حلووووه قعد حوالي 10 دقايق يخلل أصابعه فشعره لي ناااااام // الجزء الثاني // أتصل بو بندر على اخوه بو محمد عشان يخيمون و ينتهزون فرصه المتعه بهالجو الطلق .. بو بندر_ السلام عليكم ياخوي بو محمد_ وعليك السلام هلا و مرحبا ببو بندر بوبندر_ مرحبا فيك يابو محمد شخباركم و شعلومكم ؟ بو محمد_ الحمدلله مانشكي باس انتم شخباركم ؟ بو بندر _تمام ياخوي أقول ماودك بطلعه مع الأهل جميع ؟ بو محمد_ اي والله ودنا و زاده هالجو الزين بس متى ودك نمشي ؟ بو بندر _ بعد صلاة الفجر إن شاء الله نمشي جميع و نقعد ثلاثة أيام و يمكن بو أحمد يلحقنا بو محمد_ ابشر وانا أخوك و حياه الله بو أحمد و نبي شاعرنا يعطينا من قصايده الزينة مو يخشها عنا ترانا أهل مو عذااااااااال بو بندر و يضحك _ هاذا هو قاعدن جنبي خذه و ابشر باللي يسرك عطى بو بندر السماعه لبندر و بندر مايدري شسالفة بندر بإبتسامه _ هلا هلا هلا و مليون حبه عالراس لبو محمد بو محمد_ أقول أترك عنك هالهرج الزايد يا بوعذبي و لاتنسى تسمعنى من قصايدك الجديده وانا عمـــــك بندر و أصبعه على خشمه _ أبشر عالخشم يا عـــــم بو محمد بفخر_ بعدي و الله و سلملي عالأهل ياوليدي بس لاتنسى البندقية باجر تجيبها معاك بندر_ ان شاء الله و حنا نقدر ننساها يالله خذ الوالد يبي يكلمك أخذ السماعة بو بندر_ أقول يابو محمد أتصل على صاحب الناطور رقمه ألي عندي ضاع و يالله شي فخاطرك بو محمد _ سلامتك بو بندر _ اجل فمان الله بو محمد _ بحفظه يابو بندر سكر بو محمد السماعه و ألتفت لأهله ام محمد_ هذا بو بندر ؟ بو محمد_ ايه و اجهزوا بعد صلاة الفجر نمشي للمخيم و سنعوا اغراضكم عدل كلامي جنان وسارا يصفقون بأياديهم ببعض _ ييييييس مابغوا شيابنا ام محمد بنظره سكتتهم بدور _ عمي انزين كم بنقعد فالمخييييم ؟ سارا بفرحه_ صح بابا جم بنقعد يااااي وناسه بنركب بانشي و باقي بو محمد _ شنووو ! ! ! عيدي كلامج سارونه شقلتي يابابا ؟ أكررها ان ركبتن بقيات حشيت هالرجلين حش لا تعصن كلامي جنان _ ما عاش من يعصي كلامك يبا سارا _ يووووبا والله قهررر الشباب يركبون و احنا نووو وي عشان جنان ماتعرف تسوقه و بغت تروح فيها انزين أنا شدخلني شذنبي أتحمل اخطاء غيررري شذنبي شذنبي ؟ جنان و فاتحه عيونها عالآخر بقهررر _ شفت يبا شفت نذله نذله نذله راح اركبه و نشوف يام الخلاجين بو محمد كاتم ضحكته دايما بناته إذا اجتمعوا يسوون شوشره و يخربون على بعض _ عييب شهالكلام هذا و احنا موجودين شلون لو مو موجودين شبتسون ؟ ام محمد _ اصلا انا غاسله ايدي من صحه عقل هالثنتين اللهم ياكافي خصوصا هالنتفه هاذي تحب تحرش بالكبيرة بدور بضحكه ناعمه _ صاجه يا خاله سويره يبي لسانها قص سارا زعلت كلهم عليها و بتروح لغرفتها ولا ابوها ماسك يدها و يبتسم _وانا اصبر على زعل دلوعتي ؟! سارا _ ايه واضح ! ام محمد _ سارا اص ولا كلمه . و التفتت على زوجها _ هذا جزى دلعك ماقول إلا الله يعيني عليها قامت سارا و حبت خد ابوها بقوة _ آسفه بابا .. و حبت راس امها فقعدوا يضحكون على دلعها و نتيجته .. بعد ما تعشوا وكل واحد راح لغرفته بينام عشان يستعد لهالرحله تذكرت جنان كاميرتها الفيديو عند عبير _ أووف دايما انساها عندها خل ادق أذكرها عشان ماتنساه باجر دقت جنان على عبير عبير _ هلاااا جنان _ أهلين عبور شلونج ؟ و شلون الأهل إن شاء بخييير ؟ عبير _ تمام عال العال أنتو شخباركم ؟ يا حياتي أنتي( قالتها بطريقه جنان ماتحبها ) جنان بإستغراب _ صراحه قمت اشك فيج عبور عبير و تطق يدها بنحرها _ بل عليج و تقولينها جدامي جنان بإستفزاز _ شوفي كلامج و تعالي حاسبيني عبير بتقهرها _ الله يعينك ياخوي ياولد امي و ابوي بتاخذ مره بدون أنوووثه جنان بقهر _ أقول عاد يحمد ربه بعد زين ودلال و خفه و لطافه شيبي بعد ؟ عبير _ بس بس ابسألج ليش داقه هالحزه ؟ جنان وصلت معها _ عبييييييير شفيج جذي تكلميني ؟ و بعدين تو الناس الساعه تسع و نص شهالديك الي بينام ألحين !! أقول بس . أسمعيني عدل أعرفج غبية باجر لا تنسين الكاميرا الفيديو أوكي عبووور؟ عبير كانت بترد بس بابها يطق جنان تسمع طق باب لكنها سكتت لما سمعت عبير بصوت واطي تقول _ ياويلي بندر بيدش عبير_ أدخل بندر و يطالع تلفونها _ السلام عليكم .. ليش ما نمتي ؟ عبير بلعت ريقها _ وعليك السلام و رحمة الله و بركاته ( حشى بمدرسه ) كنت بنام بس جنان أزعجتني حارقه جهازي جنان ترد _ يا حقييييره دواج بالبر أما بندر كرهه يشوف أخته تكلم بالتلفون بعد الساعة تسع وكذا مره يهزئها و يكسر جهازها بس مافي فايده معاها بندر بصوت جهوري_ سكري التلفون و هاذي بنت عمج ماعندها أحد يردعها من مكالمات في تالي الليل !! جنان حاطه إيده بفمها و تسمعه و هي متوتره لهدرجه كارهني و كاره صداقتي لأخته ! عبير و تعض على شفتها السفلى و تغمز لبندر تبيه يسكت عبير _ بندر بندر _ عبييييييير سكري التلفون جنان ماتحملت فسكرته من ناحيتها عبير بصوت مقهور و متفشله بعد ماسمعت صوت القطار بالتلفون _ بندر شهالحركات حرام عليك؟ بندر عطاها نظره _ جم مرة قلتلج تلفونات بنصاص الليالي مافي .. عبير بحرقه_ بس انا قاعده اكلم بنت عمك و زوجتك مو وحدة غريبه ؟ بندر بصوت تعبان ومتهالك _ شتبي داقه هالحزه ؟ عبير بتقهره عالحركه السخيفه _ شي خاص بيني و بينها بندر بدون مبالاة ويدخل ايده في مخابي دشداشته _ الله يديم عليكم العقل .. ومشى طالع من الغرفه عبير و ماسكه شعرها _ آآآآخ بموت من القهر ماكأنه سوى شي ... فجأة دخلت فاطمة على عبير_ السلام عليكم عبير بطفش _ و عليكم السلام فاطمة _ شفيج مالج خلق تسلمييين ! عبير تصرف_ ضايق خلقي فاطمة_ ليش عاد باجر وراج طلعه صراااحه غريبه أنتي ؟ عبير_ جان زين بس أحنا و بيت عمي لاااا عندنا ظيوووف ثقاااال دم فاطمة_ لا يكون نوف بنت خالج عبير _ وفي غيرها أكرها أبغضها شايفه نفسها و نافخه بعمرها شنو السبب شنو الميزه ما في ...!! فاطمة _ خل تاكل هواااا لا تحرقين أعصابج على وحده ماتسوى ظفرج عبير _ أوكي أدري انها ماتسوى ظفري بس هي حاطه حرتها بأختج جنان وانا اعرف اختج نفسيتها تتعب إذا شافت ناس حاقدين عليها بدون سبب فاطمة _ ماعليج منها إلا أقول جهزتي اغراضج و الكاميرا دزت لي جنان توصيني اقولج عبير و تنفخ صدرها _ افا عليج أضحكت فاطمة و تذكرت شي _ ايه تذكرت شيبي بندر منج كنت طالعه من جناحي شفته طالع من عندج و متضايق شفيه أحس هالأيام متغير والأخلاق عنده صفررر ! عبير _ ها لا عادي شافني اتكلم بالتلفون و عصب علي فاطمة_ أها بس جذي عبير _ ليته بس جذي ما تذكرين يوم كسر جهازي القديم لما شافني اتكلم فيه عالساعه 12 بالليل فاطمة_ ما قصرتي 12 يالظالمه بس ألحين غير 9ونص عبير بنفخه _أيه الحبيب حط قوانين ماأتكلم بالتلفون بعد 9 بالضبط و توه دش علي و الساعه 9ونص ولا يسمعون صوت جاسم و ينادي فاطمة فاطمة عبير تغمز لها _ روحي ياروح جسوم مايصبر على فرقاج فاطمة و هي منحرجه و بتطلع_ استحي يابنت او تصنعي .. يلى انا رايحه تامرين على شي عبير بإبتسامه _ سلامتج و أحلام سعيييييده فاطمة _ وأيااااج حبيبتي طفيت النور و أخذت جهازي وانا متفشلة من جنان الله يصلحك ياخوي و دقيت عليها بس ماترد فأرسلت لها رساله ' آسفه ياحبي و امسحيها بوجهي ' و بعدها استسلمت للنوووم جنان .... وانا اوصي هالمرجوجه عبور سمعت صوت بابها يطق و عبير تقولي بصوت واطي ياويلي بندر بيدش صراحه خفت عليها اعرفه أخوها عصبي و نظامي و إذا عصب مايشوف شي و مايحب البنت اتكلم بعد التسع لكن عبور غبية كان سكرته قبل لا يدش لكن المصيبه عصبيته من لاشي و انقهرت من رده فعله لما عرف ان انا المتصله أرسلت مسج لفطووم تذكر عبور بالكاميرا و نمت 
   
|
|
10-24-2011
|
#2 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
بندر قعد عالصلاة و توظأ و هو بيطلع شاف أبوه و جاسم بالحوش يسولفون
بندر_ السلام عليكم الكل _ وعليكم السلام بندر و يضبط شماغه _ ما أقام بو بندر_ ألحين وانا بوك و يحط ايده ورى ظهر بندر بوبندر_ يلى مشينا الله أكبر الله أكبر لا إله إلا الله حي على الصلاة حي على الفلاح قد قامت الصلاة قد قامت الصلاة الله أكبر الله أكبر لا إله إلا الله دخلوا المسجد بنفوس نقيه خاشعه ذليله لرب العباد أم بندر و فاطمه يرتبون أغراضهم و يحطونها بالحوش فاطمه _ خاله بنتج مارضت تقعد عالصلاة حاولت فيها بس مافي فايده ام بندر _ خليها و شوفي شلون يقعدها بندر مايعرفها عدل إلا هو فاطمه و تخيلت شكل عبير إذا شافت بندر معصب و ابتسمت ام بندر شافت فاطمه تبتسم ام بندر بإبتسامه_ شفيج يمي؟ فاطمه _ تخيلت منظر عبير و بندر يقعدها و هو معصب ام بندر بحزن _ ايه هو الله يهديه حار ما ينقرب بس ان شاء الله يتغير بعد الزواج و يرتاح فاطمه التزمت الصمت بعد ماشفت ملامح خالتها الحزينة بندر بصوت جهوري _ يا ولد تغطت فاطمه الكل _ حياااااااك دش بندر بروحه و حب راس امه _ صباح الخير يا احلى أم اضحكت ام بندر_ صباح النووور ألتفتت وراه _ وين ابوك وخوك؟ بندر _ وراي ألحين يوصلون وصل بوبندر وجاسم و طلبوا ريوق بالديوانيه ___ بالديوانية بو بندر_ وين عبير يام بندر ؟ ام بندر _ نايمه الله يصلحها جاسم بإبتسامه_ ياحبها للنوم قوم يابندر قعدها لاصلاة و لا نوم مثل الناس بندر _ ألحين بخليها تكره النوم جاسم بغمزه لاخوه_ اتحداااك بندر و حاجبه الايسر مرفوع_ لا تتحدى طيعني بو بندر بعصبية_ شف هذولي ياويلك ان سويت بأختك شي يابندر و انت يا جاسم قاعد بس توزه على اختك قام بندر و هو يأشر لجاسم بالتحدي و الضحية المسكينة الي نايمه ولاتدري شالطبخة و هو يصعد بالدرج سمع نغمة تلفون أخته و دش غرفتها و قعد يضحك على شكلها و هي نايمه أتجه لتلفونها على مكتبها و شاف أسم المتصل " جنووو " سته مسد كول منها وبعد خمس ثواني اتصلت من جديد تردد بندر يرد ولا لا بس بالأخير الفضول أذبحه بندر _ أحم أحم هلا جنان جنان مرتبكه _ أهلين بندر ممكن عبير بندر حب يحرجها _ عبير الله يسلمج نايمه من كثر ماتسهر عالمكالمات الي بتالي الليل شفتي شلون آخرتها صلاة الفجر حق الله ما أدته و السبب هالتلفونات الي تزعجها بالليل جنان حست انه زودها شوي _ مشكووور عالحرص الأخوي بندر بإبتسامه_ اوكي تبين منها شي ضروري جنان _ اي بعد عمري قولها لا تنسى الكاميرا تكفى بندر اسكتت بعد ما ولع وجهها من زله لسانها و حست بحرارة و سواد في عيونها . بندر تفاجئ بكلام جنان و سكت جنان حست انه متفاجئ عشان جذي سكت ثواني . جنان بتوتر _ آسفه بندر زله لسان مع السلامه ! بندر ابتسم بإنحراج _ لا عادي و يبلغ .. سكر السماعة و طالع اخته أخذ حبه كلينكس و قعد يدخله بشويش بإذن عبير عبير تضايقت و قعدت تحك أذونها و بعدها أخذ الكلينكس و دخله بخشمها لفت عبير لجهه الثانية و تغطت باللحاف بندر انقهر _ هاذي مافي فايده فيها و بعدها راح للحمام عزكم الله و صب الماي بإيده و وقف فوق راسها بندر بصوت عالي _ عبير اقعدي لاحس ولا حركه صب الماي على وجهها عبير بخرعه _ لاااااااااااااااااااااااااا بندر و مكتف يدينه و مسوي نفسه معصب و يقلدها _ لااااا اقول عبيروه صليتي فرض ربج يالعاصية ؟ عبير و عيونها حمر مخترعه وتضبط شعرها _ ياويلي عاصية مرة وحده حرام عليك يا خوووي بندر و يشيل اللحاف_ قومي صلي و بعدين ناقشيني وجهزي عمرج كلنا تحت ننطرج يلى انجزي بسرعه قامت عبير بكسل و تسبه بصوت واطي و هو رايح للباب بيطلع فجأة تذكر مكالمة جنان بندر و ماسك فتحة الباب _ اي تذكرت جنان اتصلت عليج و انتي نايمه تقول لا تنسين الكاميرا عبير بتقهره فرصتها هاذي _ ومن سمح لك ترد عليها هذا أولا و بعدين لاعت جبدي من زوجتك كل الي بالبيت قالت لهم عن الكاميرا طالعها بندر دقيقه و هو ساكت لي حس وجهه عبير احترق من الفشيله و طلع اما عبير اكرهت عمرها _ يا فشيلتي فشيلاااااه و حطت يديها على وجهها و تذكرت نظره بندر _ يمه يخررررع شالآدمي ؟ وقامت تتوضأ للصلاة نزل بندر من عبير و لا تلفون البيت يرررن و الخدامه رايحه بترد عليه مرامي _ الو ايوا لحزه دكيكه و طالعت ببندر _ بابا هازا سارا يبي أنتي استغرب شتبي سويروه اخذ السماعه بندر _ يالله صباح خير .. نعم سارا سارا بدلع _ ياهووو يا عالم يقولون انا مسلمين مش مشركين بندر بجدية مايحب دلع سارا _ السلام عليكم انجزي علي مش فاضيلج ؟ قفط وجه سارا_ وعليك السلام أممم أمي تقول أم أحمد بتجي المخيم ؟ بندر انقهر سؤالها يقهر و سخيف و يعرف ان بو أحمد بيجي بس تقهره هالبنت _ شايفتني ألبس حجاب شيعرفني بتجي علانة ولا فلنتانة سارا بعصبية_ هييي شفيك علي ذابحه امك و لا ذابحه زوجتك خلاص يا كلمه ردي مكانج و عطني عمتي اكلمهاااااا بندر بصرااخ _ مرامي نادي ماما بسرررعه سارا انتفضت من صرخته ياربي ماسويت شي شفيه علي جت ام بندر وأخذت السماعة من بندر _ هلا سارا _ هلا و مرحبا ومليون غلا لعمتي الحبيبه ام بندر_ ياجعلي فدوة لج بعد عمري سارا_ عمتي امي تسلم عليج و تقول ام احمد بتجي المخيم؟ ام بندر و هزت راسها _ اي يمي بتجي باجر ان شاء الله سارا _ اوووكي انشوفكم الييوم ان شاء الله مع السلامه عمتي ام بندر_ بإذنه سبحانه والله يسلمج حبيبيتي سارا بتكشيره _ أوووف جنان _ ها شقالتج عمتي بتجي أم أحمد سارا _ اي بتجي و بتجي المايعه بنتهااا جنان _ ماعليج منهااا محتره منا سارا بقهر _ والي قاهرني زوووووود زوجج ؟! بغى ياكلني معصب علي جني مو آآآآدمي جنان اسرحت و تذكرت أمس شلون زف أخته و ألحين بنت عمه أوف ليش جذي نفسيته قشره ؟! غريب هالإنسان طبعه سارا و تحط فمها بإذن جنان _ جناااااااااااااااااااااااااااااااااااااان جنان بخرعه_ يماااااااااااااه و ألحقت سارا و هي طالعه للحوش جنان بقهر_ وربي و ربج لأفتت عظامج يا سويروووه تجهزوا كلهم و أركبوا السيارة جاسم مع أهله و عبير ... بندر مع أمه و ابوه و هو سواقهم بسيارة بندر . بو بندر_ أقول شيكت عالموقع و التجهيزات وانا بووك بندر_ ارتاح يبا انا و محمد أمس شيكنا و أخترنا ذاك المكان الي يحبه قلبك بو بندر_الله يوفقكم و يحفظكم ام بندر _ و أشوف عيالك ياوليدي و الله مندري كم باقيلنا من أيام ... بندر تضايق _ يمه شهالكلام بعد عمرن طويل بو بندر_ أتتركك من أمك ألحييين . نسيت لاقولك عندي تذكرتين خذها ياوليدي و شوف انت وزوجتك اي ديره تعجبكم تقعدون فيها اسبوع اسبوعين على راحتكم بندر _ مايحتاج يبا ليش تعبت نفسك و سفر انا مانيب مسافر ام بندر_ بندر شهالكلام بتزعلني انت ؟ حط بنت الناس بعيونك و تذكر انها بنت عمك و بعد انها عروس ولازم تفرح بزواجها بندر بعصبية _ وانا قلت بخليها خدامه عندي بفرحها بس سفر مافي تحلم وانا مو ناقص عوار راس ام بندر بعصبية و قهر_ بنداااارر هذا جزى التربية ما هقيتك ياولد ضبية ؟ كان بيرد على امه بس أسبقه ابوه بو بندر _ اسكتي يام بندر رجال و مرته وكيفهم يسافرون يقعدون يسوون إلي يبونه شحارج ها شحارج ؟ أم بندر و صوتها يرتجف من الحره _ هذا ولدي يابو بندر ابيه يستانس بعرسه و ابي جنان بعد تستانس و ماتحس انها غير عن كل البنات من يعرسن يسافرن برا ديرتهن . . وولدك ولا هامه أصلا بموضوع عرسه لا بيته أهتم فيه ولا هم سفره .! و تبيني ما أحترررر ؟؟ بندر بيطيب خاطر امه _ أبشري يمه بسفرهااا و من هالعين قبل هالعين تامريني على شي ثاني ؟ ام بندر_ دير بالك عالطريييق عرف بندر انها زعلانة للحين محمد يتأفأف _ اوف يبا السيارة ما تكفي و سيارتي بالكرااااج بو محمد_ دق دق على بندر ولا جاسم ياخذ خوااتك محمد _ ابشرر يبه دق على بندر بندر_ هلا محمد محمد_ هلا بك . وينك ألحين ؟ بندر_ طلعت من شارعنا ألحين ليييش ؟ لا يكون وصلتوا للموقع محمد_ لا افرح ماصلنا تونا ماحركنا بعد بندر_ ليش عسى ماشر ؟ محمد_ الشر مايجيك . بس سيارتي اليوم الفجر عالساعة 4 تعطلت ووديتها للكراج و سيارة الوالد ماتشيل . انا و ابوي وامي و أهلي مع عيالي و خواتي . بندر _ خلاص ألحين جايكم بس خلهن يجهزن بسرعه مالي خلق انطرهن تعرفني ماحب التنقيعه ! محمد بضحكه _ الله يعينهن منك أقشرررر بندر حب يقهره_ اجل دور لك أحد يشيل خواتك تسبني و أسكت محمد_ ياشين المذله اقول بس انا بحرك و اتركهن في البيت طق الباب يطلعن لك بندر_ خلاص سده من محمد و سأله أبوه عن محمد وش يبي وقاله السالفه بحوووش بو محمد محمد_ يطق الباب تطلعن بسرعه خاصه انتي ياسويروه أعرفج عدل تحبين العناد و خاصه مع ولد عمج سارا_ أوب أوب أوب ألحين انا الي احب العناد و ولد عمك البريئ !!!! بو محمد بعصبية _ وبعدين ؟ محمد أمش قدامي و انتي والله لو اشتكى بندر منج لتشوفين شي مو طيب يا سويروه ؟ سارا بزعل_ ألحين انتوا ليه مجهزين الدوا قبل الفلعه ! كلهم طالعوا فيها و سكتوا محد يقدر على لسانهااا طلعوا لسيارتهم ... جنان ألتفتت على سارا و حطت يدها على قلبها _ سارونه تعالي حطي أيدج على قلبي سارا و بغمزه _ بعد أكيد حبيب القلب بياخذنا جنان بخوف_ والله أحس ارجولي ما تشيلني خايفه مووت سارا _ عادي شبيسوي الحبيب ؟ مغير نفسيته الزفت عليناااااااا جنان بتكلم ولا الباب يطق سارا_ يلى امشي و خليج ياجبل ما يهزك رييييييييح جنان و ادز سارا _ اقول امشي امشي بس : بندر : وصلت لباب بيتهم و اسمع أصوات همس فطقيت الباب عشان يطلعن بنات عمي وقفت على يمين الباب عشان يمشن عرفت الأولى ما غيرها أم لسانييييييييين سويره بصراحه جتني فكرة شيطانية أعرجبلهاااا بيكون منظرها يضحك ماقدرت امنع نفسي من الضحك فأطلعت مني ضحكة بالغصب سارا _ حمدالله و الشكررررر جنان طقتهاا على جنبهااا بندر _ سويره ؟! يلى يلى بسرعه للسيارة مشن الهوانم و سارا منقهره منه : سارا : هين يا بندر تضحك مني والطريج . أكيد شايف شي فينا ولا طقم الأسنان طالعه لييش ! ساسرت جنان و هو يمشي ورانا و اسمع تأففاته . سارا_ أمشي عالراحه تراه مايخوف جنان_ تراي مالي خلق للمشاكل و لاتنسين ابوي شقال ها ؟! مشت جنان بسرعه و أركبت السيارة أما سارا قعدت تتمخطر بمشيتهااا خلاص حطته ببالهااا بندر عصب من صج عرف انها تعانده بندر بصوت عالي _ سارا أمشي عدل لا أعرف شلون أخليج تمشين مضبووط سارا بدلع _ لا تصررخ علي لأعلم أبوي بندر_ آآآخ لسانج يبيله قص ركب السيارة و ركبت بعده سارا و على طول اقرصتهااا جنان على يدهااا سارا بصوت خفيف _ آآآي جنان _ تستاهلين حسبي الله عليج فشلتيناا ما تكبرين انتي عن هالسوالف حاطه دوبج بدوبه ؟ سارا_ ما دريت انه موكلج محامية له بو بندر_ يا حي الله ببنات اخوي سارا و جنان _ الله يحيك و يبقيك يا عم ام بندر_ شخباركن ؟ و شخبار الوالده ؟ جنان _ الحمدلله تمام .. أنتي شخباج يا عمه ؟ ام بندر_ الحمدلله يابنتي سارا_ عميييي نخيتك ولا نخيت الذيب بو بندر يبتسم _ يخسى الذيب اطلبي يابنتي سارا_ حاول بأبوي يسمحلنا نركب بقيات جنان تفشلت من أختهااا و ما قدرت تكلم بندر أبتسم من طلبهااا و قال بخبث _ لاااا يا سارا البقيات مو زينه للبنات بو بندر_ ها . لازم ياسارا يعني تركبينه سارا منقهره _ عميييي ولي يعافيك تكفى تكفى لا أحد يأثر عليك ( نغزه ) كلم ابوي عشان يوافق بو بندر_ ان شاء الله وانا بوج سكتوا بعدها وأوصلوا للمخيم نزلوا الكل و شافوا الباقيين وصلوا . // الجزء الثالث // رتبوا قشهم و ضبظوا كل شي راحوا الرياجيل لخيمتهم و راحوا الحريم لخيمتهم . جنان أمسكت يد سارا بعصبية_ حركاتج الغثيثه حاولي تتركينهااا تراج مو صغيره زين يا حلوه سارا و اسحبت يدهاا_ امبييه والله حيل انتي متضايقه عشانه وبعدين انا حره غثيثه مو غثيثه كيفي ! و تركت أختهاا و راحت لحور بنت أختها تلعب معاها عبير و هي جاية صوب جنان _ شفيج معصبه يادافع البلا ؟ هذا وانتي جاية مع الحبيب جنان بقهرر_ ولي يعافيج اسكتي مالي خلقلج و اطلعت برا الخيمه تحس بقهر و بحقارة نفسها و برخصهااا شعور مخزي و قوي بصراحه لاحست البنت انها مالها راي بالزواج و بمصيرهااا المستقبلي نفترض لو تزوجوا عيال العم و ما تأقلموا مع بعض وما صار توافق و بالأخير يتم الطلاق و بعدها ما تقصر مجتمعاتنا العربية تنظر للمطلقة نظرة محتقرة من ذنب هي ما جنته بس انها انصاعت لحكم أسمه /السمع و الطاعة للعادات والتقاليد/ . :: جنان :: ياربي أرحمني و أصلحني و يسر أمري . طلعت برا الخيمة و شفت اخوي محمد و بندر و جاسم يضبطون الحمام الكيربي ' أكرمكم الله ' و مشيت خلف خيمتنا بحيث ما يشوفوني و قعدت عالأرض . مادري كيف أحدد شعوري أحس انه مزيج من الألم و القهر . ابي دموعي تنزل عشان تخفف مدى الكبت الي كابته من سنين . قعدت ثواني و الرؤية ماعادت تتضح عندي . صرت ابجي بصوت مسموع من القهر الي أحس فيه حطيت ايدي على فمي أمنع الصوت . انا اعرف ان بندر طيب و حنووون بس أحيانا أشوف له وجه ثاني حقود عصبي مغرور الزواج هذا لازم ما يتم انا مو لهدرجه رخيصه . والعرس ماباقيله شي بعدها قعدت أشاهق : محمد : كنت انا و بندر و جاسم نضبط هالحمام " عزكم الله " و الوالد و عمي داخل الخيمه يريحون شوي . بعد ماخلصنا التضبيط قعدت أتفحص الخيييم مادري شسبب جذي طقت براسي و عند اتجاهي لخيمه الحريم شفت ظل بنت قاعده عالأرض فطليت عليها عرفتها من شعرها الأسوود المدرج مو البوي سوير لكن الي حز بخاطري لما قربت جمبها سمعت شهاقهااا جنان حبيبتي تبجي و انا راسي يشم الهواااا عقدت حواجبي بحسرة_ جنان حبيبتي عسى ماشر ليش هالدموع وانا اخوج ؟! شفتها تخرعت لما شافتني يااااه عيونهاا ذبلانه من كثر البجي و تشاهق شفتهاا وقفت و اركضت لي و انا فتحت ذراعي ابيها ترتمي بحظني فحضنتهااا بقوة و هي كانت متشبثه فيني جنان بصوت مسموع _ آهي هي هي هي محمد بصوت هامس _ شفيييج جنو ؟ قوليلي أحد سوالج شي ؟ جنان ارفعت راسها وبتعدت عني محمد مسح دموعهااا بأصابعه الثنتيين _ ما تبين تقولين لأخوج ؟ جنان بتردد_ محمد محمد مبتسم_ عيون محمد جنان بخوف_ مابي بندررررر ؟ رد محمد يعقد حواجبه و مستغرب _ ليش ؟ شنو الأسباب الي تخليج ترفضين ولد عمج !! جنان عطيني سبب واحد و ابشري مابتاخذين بندر ؟ جنان حست بفقدان الأمل _ محمد تكفى انا مابيه و مو مرتاحه تكفى يامحمد نخيتك محمد _ جذي بدون سبب يا جنان ما يصير نرده بدون اسباب !' جنان و بجت بحرارة _ محمد ارجووك ياخوي انا ما ابي اتزوج بندر حط محمد يده على وجهها و كان حار حيل من كثر البجي محمد _ ابشري يالغالية بكلم الوالد بعد ما نرد للبيت مو حلوة بحقنا نتكلم هني بوسطهم صح ولا انا غلطان ؟ ابتسمت جنان ببطء حاسه بصداع فضيع و حبت راس أخوها _ الله يحفظك يا عزوتي حب محمد جبهتها _و يحفظج يا شمعه الجلاس يلى غسلي وجهج قبل لا أحد يشوفج و تركهااا وراح لخيمة الرياجيل شاف الكل جالس و يسولف و طالع بندر و هو منسدح على رجل أخوه جاسم و شكله هلكان قال بنفسه _ لاحول ولا قوة إلا بالله و قعد جمبهم وطالع بجاسم و أشر براسه على بندر يعني شفيه جاسم بصوت خفيف _ تعبان محمد و يحط يده على جبهة بندر _ تحس بشي يابو عذبي ؟ بندر _ ايه أحس براسي مصدع و الظاهر بتجيني سخونه محمد _ يا ستيير لا إن شاء الله بتصحصح شوية عشان الصيد ( ملاحظه كلمة يا ساتر غلط والصحيح هو يا ستير ) بندر _ افا وانا انسى ولا جهاز جاسم يرن و شاله _ هلا . عبير _ السلام عليكم جاسم عرف ورى هالأدب شي _ وعليج السلام .. نعم عبير _ أممم شخبارك بو حوور ؟ جاسم _ مو جنج قبل ساعه كنتي معاي بالسيارة !! عبير قفط وجهها _ خخخخ الله يصلحك يا خوي بتطمن عليك فيها شي ؟ جاسم مبتسم _ ها انا بخير يا مال العافية شنو تبين بعد هالمقدمة يا عبييير عبير _ أعرفك أخوي طالع على حبيبتك عبير قاطعها جاسم _ اقول لا يكثر عبير ماصبرت _ الله يخليك يا جاسم كلم ابوي و عمي نبي نركب بقيات بس عمي الله يسامحه رافض ان بناته يركبن فما يصير انا أركب و بنات عمي ما يركبن انت ترضاها إذا ترضاها كيفك هذا شي راجعلك ( صارت هوشه مو نخوه ) اما انا ما رضاها ولي يعافيك و اذا تبي حبه خشم ابشرر هوااا و اكون عندك تكفى تكفى يا جسوم جاسم فاتح عيونه _ حسبي الله و نعم الوكيل كل هذا بنفس واااحد بل عليج بالعه راديو مو آدميه ... بعدين لحظه والله عليج ثقة يا عبير ومن قال انج بتركبين بقي ما في بنات يركبن بقي بعد طيحه جنان فااااهمة يلى انا راسي تعبان و بنام مع السلامه عبير بقهرر _ الله يسلمك صك التلفون . شاف الكل يطالعه . أبو بندر_ هذي عبير ياجاسم ؟ جاسم _ اي يبا عبير وفي غير هالمزعجه حشى بالعه رادو يبا ما تسكت ان تكملت ابو بندر _ زين شتبي ؟ جاسم _ بيركبن بقيات و عمي معارض و تبيني أكلم عمي بندر يكلم محمد _امحق يبنه عون طلع فرعوون بو بندر _ وليش منعتهااا جاسم _ يبا مو زين لهن الوحده ما تعرف تسوق فيتكسرن بو بندر عصب _ اقول اسمعني زين رح أحجز لهن هن جايات يتونسن مو جايات يحجزن أعمارهن بالخيام بو محمد _ بناتي لا تحجز لهن أعرفهن بيتكسرن محمد _ يبا طال عمرك بالطاعه انا بحجزلهن و أعلمهن بس خل يستانسن حرام يقعدن جذي بدون بقيات بو محمد _ و تكون معاااهن يا محمد محمد _ ابشرر عالخشم بو بندر_ خلاص اجل احجز لهن جميع بعد المغرب عشان بالظلام يلعبن جاسم _ ان شاء الله بندر بصوت تعبان _ اجل انا باخذلي غفوه و قعدوني بعد ربع ساعه بخيمه صغيره بعيده شوي عن خيمه الرياجيل و الحريم عبير بقهرر و تصك التلفوون _ آآخ قهرني جنان بهدوء _ شقالج بيكلم ابوي ؟ عبير _ لااااا يقول حتى انتي ماراح تركبين البقي ابيه يساعدني طلعلي فوجهي آخ قاهرني سارا بقهر_ مووو على كيفهم اناااااا ألحين بروح لابوي و عمي و هم عندهم خيمه خل يطقون راسهم بالعموووود جان عندهم أعترااااااض . عبير تشيشهااا _ أتحدااااج إذا كنتي بنت ابوج ؟ سارا و هي قايمه _ بنت أبوي غصبن عنج . و كاني رايحه جنان _ هي انتي و ياها عسى ما شر .. ؟ في أحد يعترض بشكل هذا . ! عبير عطيني جهازج ماعندي رصيد عبير بغباء_ شتبين فيه ؟ جنان _ بصور معاه بعد تلفون شبي فيه بكلم ابوي و انتي اقعدي ' تأشر على سارا ' لا تفضحيناااا سارا_ تكفيين جنان ترجيه انا نفسي بالبقي جنان_ شفيج جنج مو شايفه خير خلاص قلتلج بكلمه بكلمه عبير بسرعه _ ايه تذكرت جبتلج الكاميرا سارا_ يلى انا برقص و انتي صفقي و جنان تسجل جنان و عبير مع بعض _ خخخخ سخيييييفه ثواني ولا جاسم داق بجهاز أخته جنان _ هااج الجهاز أخوج داااق عبير ماده بوزها ثلاث امتار _ اي وااااحد فيهم ؟ جنان_ جسوووووم عبير اخذت تلفونها _ نعم جاسم _ اوله السلام عليك و شخبارك و ألحييين نعم . ألعن ابووو المصلحه عبير _ هاذي الدنيا يوم لك و يوم عليييك جاسم بضحكه رنانة _ شكو هالمثل بكلامي عليج امثله مو محلهاااا عبير _ اقول جسوم تر قاطعها جاسم _ بعيييينج جسوم رجال مالي ثوبي و ابو و آخرتها جسوووم عبير بقهر_ آسفه يا جاسم جاسم_ والله مهان علي أخليج زعلانه علي يلى الشياب وافقوا تركبون بقيات عبير بصراخ _ هيااااااااااااااااااااااااا جاسم _ قصررري حسج حسبي الله عليج بس ها تركبنه بالظلام فاهمه عبير _ ابشر مع السلامه جاسم جاسم بدون لا يرد عليهااا صكره بوجههااا قهرته اخته كل هذا صراخ . سارا و جنان بعلامات استفهام _شنو ؟ عبير و تنط _ بنركب بقي من الفرحه قعدن يرقصن و جنان تطبل بصينيه الجاي و تقول _ عااااااشوااااا تذكرت عبير الكاميرا و طلعت لخيمه الحريم ركض تجيبهااا خيمه الرياجيل بو محمد_ خلاص صفقه بو مشاري خلصت و انا اخذتلي اجازه اسبوع من امس بو بندر _ اي خلصت و انا قلت للسكرتير يأجل كل مواعيدي لأربعة ايام . تصدق تعبت من الشغل ياخوي بو محمد _ حتى انا تعبت بس شنسوي ياخوك نقعد فبيوتنا مثل الحريييم !! أقابل شغلي و أكرف ولا أقابل سوالف الحريم أعوذ بالله من هرجهن بو بندر_ انا اشهد يابو محمد جاسم يصحي بندر _ بندر بندر قوم يلى قوم تحرك بندر و تمدد و يحك ذقنه_ أممم جاسم _ يلى أخلص علي محمد_ خله ينام جاسم _ هو يبيني أقعده . و قعد يهزه بكتوفه _ قوووم قعد بندر و تلفت حولينه بو محمد بإبتسامه _ صباح الخير ابتسم له بندر و قااام بيطلع بيروح للحمام " أكرمكم الله " خيمة الحريم فاطمة تصب القهوة للحريم .. فاطمة _ قهوة يا بدور بدور _ تسلمين ياعمري مو مشتهية .. فاطمة_ الله يسلمج ياحياتي فاطمه وألتفتت لفنجان ام بندر _ عمه عطيني فنجانج ام بندر _ بس يا بنتي صبيلي جاي ولا عبير داشه عليهن _ السلام عليكم الكل _ وعليج السلام فاطمة _ تعالي تقهووي عبور عبير _ لا سوالف العجز ما تصلح لي فاطمة و بدور _ عبييييير ام بندر_ عيب يا عبير شسوالف العجز هاذي .. ؟ عبير و تاخذ جنطة الكاميرا و تقلد العجايز _ اقووول استروااا على ما واجهتووااا يا عرب ضحكوا عليهااا سبحان الله جنان و عبير رفيجات عمر بس شخصياتهن تختلف تماما .. راحت عبير لخيمتهن الصغيره عبير _ يلى شدوا الحيل يا بنات سارا قعدت ترقص و جنان تصفق بيدها و تغني _ يا سارا تهني في شبابج يا سارا تهني في شبابج جتكم غزالن من الكويت جتكم غزالن من الكويت و مزينه مبانيه ياجعل بيتك ما يهدم و يدخل على أمه ملتحي و يدخل على أمه ملتحي عاااااشوااااا سارا ما قصرت بالرقص و الردح و عبير شيشتهاااا و قعدت تشجعهاااا . :: بندر :: رايح ابي اغسل وجهي بس كأني اسمع طقطقه و أغاني بصراحه تلفت يمين يسار و بعد طالعت للسما تونا في عز الظهر من ويين هالطقطقه ياربي ؟ و قربت هالخيمه الصغيرة و كل مال الصوت يعلى و يقرررب و الأصوات أوضحت لي . بصراحه قعدت دقيقه اتسمع لجنان و هي تغني صوتهااا كان حلو و بغيت اطالع من الفتحات الي فالخيمه بس وعيت لنفسي و خفت احد يشوفني و فوق هذا سويروه مو من المحارم .. صرخت عليهن _ ياولد أقصرن الصوووت درينا ان أصواتكم حلوووه و ربي حلوه .. بعدها سمعت صوت بصراحه عندي نشااااز . سارا _ ياااا خي حل عناااا أحنا منحاشين عشان ناخذ راحتنا أوووف وأنت ورانا ورانا . قهرتني قلت لها _ لأني أحبكم و بقهرهاا بعد قلت _ درب درب نطرت دقيقه على ما يتغطن سمعت عبير تقول _ ادخل يا بندر بندر يبتسم _ عبير نخيتج ولا نخيت الذيب عبير _ يهبى و يخسى العاااااووو ) تقصد الذيب ) بندر _ روحي سوي قهوه للرياجيل عبير بضيقه _ عندكم قهوة بالخيمه سوتهااا بدور بندر و رافع حاجب واحد و يطالع بجنان _ زين منو مطربتكم الي منساع صوتهااا واصل لبيتنااااا ؟ سارا تسوي نفسهاا غبية _ ما أحد غنااا ؟ يمكن يتهيئ لك يا ولد عمي ! عبير و راحت لأخوهاا و حطت يدهااا على جبته _ ياويلي عليك ياخوي شكلك مسخن بندر و يطالع في جنان _ أشوف لسانج بح .. وين الي أوله منهد جنان بإرتباك _ انا بندر _ ايه انتي جنان _ انا رايحه للخيمه مع السلامة و طلعت من عندهن . و هي تغلي من الداخل _ شيبي مني يا يهاوش يا يتحرش . ؟! طلع بعدها بندر و هي تمشي بخطوات سريعه حاول يلحقهاا بندر بصوت خشن _ جنان جنان جنان أستدارت له _ نعم بندر _ زعلتي أبتسمت بقهر_ ليش أزعل سويت شي يزعل يا بندررر ؟ بندر طالعهااا ثواني و هي نزلت راسهااا من نظراته جنان _ تامر على شي بندر _ سلامتج يا بنت عمي مر الوقت بدون أحداث تذكر ماعدا بو أحمد بلغهم انه بيجي عالصبح باليوم الثاني . ركبوا البنات البقيات و البانشي بعيد شوي عن الرياجيل بعد ماعطاهم محمد درس بالقياده . خيمة الرياجيل . عند الدواا الرياجيل متجمعه حول بعضهاااا . و جاسم يصب القهوة لهم .. جاسم يمد الفنجان لبو محمد _ خذ يا عم بو محمد _ تسلم يا كحيلااااان بو محمد ألتفت لبندر _ بندر عطنا من القصيد الطيب وانا عمك عدل قعدته و تنحنح . بندر بصوته الخشن و الجهوري و قصد . طبعي هواوي و أعشق القنص و الصيد ** و أطرب ليا فاح النفل من عباتي ** وأجلس مع القمرى بليل التساهيد ** و أشب ناري ثم ألوح عصاتي ** و أقرب دلالي على النار من حيد ** دلال أبويه دايم من سواتي ** و أترجم سامر وألعب الشعر وأعيد ** ولا حان وقت الفرض أصلي صلاتي ** وأستغفر الله و طلبه كل ما أريد ** راحت ضميري و الصبر و الثباتي ** طبعي هواوي و أعشق القنص و الصيد ** من خلقتي و هذي مسيرة حياتي ** الكل _ صح لسانك بندر_ صح بدنكم
|
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض العادي
