الشاعره نبض الحياري

في قليله قنوع

شوفته في ثواني يعلم الله غنايم
حي زولن يهيض نايحات الضلوعي

فز قلبي كما حرٍ على الصيد حايم
صايمٍ له ليالي بين بردن وجوعي

إيتمايل كما غصنٍ يهبه نسايم
وانا من مال قلبي في هواهم بطوعي

ويل حالي لا صار القلب مولع وهايم
لو نصحته ماكنه للنصايح سموعي

اهلك القلب حبه ولا استمعنا للايم
طامعٍ في كثيره في قليلة قنوعي

بدفن احساسي

خلوني بوحدتي تكفون ونسوني
الصدر من ضيقته مايحمل انفاسي

اللي خفى ينقرا في نظرة عيوني
كفوا المجامل ولا احد يمثل يواسي

كان العشم بالكثير وخابت ضنوني
واليوم وحدي اجابه واقعٍ قاسي

علمني وقتي ماغير الله في عوني
اسر له شكوتي وله ينحني راسي

ولا البشر لو وفيت برخص باعوني
ماعاد فيكم عشم ياصحبتي وناسي

تكفون في وحدتي روحوا وخلوني
بغتال بعض الدقايق ودفن احساسي

قناع الزيف

بعض البشر لو سقت له الطيب يطعنك
تلقاه من عثرات الأيام مسرور

إليا تردت حالتك إبتعد عنك
في مسرح أحزانك مع الكل .. جمهور

تعيش في وحده مضيع مواطنك
مزحوم لكن .. تمتلي إحساس مهجور

كثر التغاضي ما صقل غير معدنك
اسقط قناع الزيف عن كل مطيور

إللي كذا همش وجوده لا يشحنك
ما تثمر ورود الأمل و ارضهم بور

اذخر شعورك والخطأ لا يجي منك
وعن ما تصادف من اذا الخلق مأجور

ضايق صدري

ضايقٍ صدري ماكنه في مدا عيني براح
وان بغيت اخفي ملامح ضيقتي بانت علي

كم تجاوزنا صعاب وقلت ماقد راح راح
البس ثياب التصنع و اتباها إني خلي

عشرة اسنينٍ ما عانق ليلنا المظلم صباح
والسنين تمر عجله والحزن ما ينجلي

ياتناهيت الضلوع اللي توهج بالجراح
ارفقي بحالي لا يقرا كسرتي ناسي وهلي

يامداهيل الفكر اروي من العذب القراح
انظمي حرفي بقافك والبسي حزني حلي

واسرجي همٍ طواني لا يقل ولا يزاح
واستري عارِ الجروح اللي لضاها يصطلي

تعبت دربك على النيه
انا الذي في حبكم هايم
وتبعت دربك على النيه

ماهمني لو حكى لايم
ولا همني وش حكو فيه

لك منزلن عامرن قايم
عرشك سماء في محانيه

تعال طير العشق حايم
ضمه لقلبك بحنيه

اهواك والشوق لك دايم
عنا القدم في مساريه

سنين والحرج ما تلايم
على الرجاء قلوبنا حيه

لو قيل لي ف الوهم عايم
قلت الفدا دون منيه

اهيم به صاحي ونايم
فيه اتركو الروح منسيه

التمس لك عذر





كنت اشوفك غايتي واغلا حبيب
لين حس القلب شيٍ يجرحه

وابتعدت ادعي عسى ظني يخيب
التمس لك عذر وافي تشرحه

في سماك الباهته شمسي تغيب
وين قدري ؟ .. وانت عامد تطرحه

اه يا قلبٍ من اسبابك عطيب
من غيابك ما بقى ما يفرحه

ذي دروبي لا تودي ولا تجيب
عاثرٍ حظي ملازم مطرحه

جيت لك في وقت الضايع

ادري اني جيت لك في وقت ضايع
يوم قلبك ضج بالي يشغلونه

وادري ان الحب خلف بي لوايع
يوم اداري لهفة احساسي وجنونه

جابني لك دافع الأشواق طايع
يا متاهات الخفوق وحد كونه

لعبة الأقدار سوت بي بدايع
عشت متفرج وحلمي يدفنونه

ذي بقايا الشمع بالكفين مايع
يوم ليلي ما عطاء للفجر لونه

انحر اهجوسي وغذي فكر جايع
ولارتخاء عزمي دعيت الله عونه

يكفي خلاص

يكفي خلاص
مليت من كثر السهر
يكفي خلاص
مليتني ضيق وقهر
مابين صمت الانتظار
مر العمر
وضاعت حياتي ..بختصار
وانا وحيد
ارسم حلم
ازرع امل
اعكس عقارب ساعتي
واغفى اتم تم لك واعيد
بكره لنا فجرٍ جديد
بس الأمل لا ينطفي
ياقلبي خلك له وفي
واغفى على حلم اللقاء
وافيق .. ما شيٍ بقى
غير اشتياقي والحنين
وغصة الم بين الضلوع
تعطي دوافع للدموع
تفضح بوجهي خيبتي
واتظاهر القوه وانا
كلي ونا
انسان متشبع عنا
حتى اكتفى
واقفى يردد لك خلاص
بلقى من اوهامي خلاص
يكفيك ياقلبي .. كفى
والله كفى
يكفي خلاص

يارب تيسيرك

يارب تيسيرك وتسهيل الاقدار
يارب عدلها على ماتمنى

تعبت من وقتي على كثر مادار
افقى العمر مدري متى بتهنى

اضحك واجامل لو بالاعماق منهار
كفي على كثر المواجع تحنا

احترت في دنياي واخطاي تحتار
حايلتها منا وتحتال منا

ماعاد لي مطمع ولا آمالٍ اكثار
غير السكينه لقلبي اللي تعنا

انسى بها من جاير الوقت ماصار
و طير السعاده بالمحاديب غنى

في ظل عرشك منزلٍ بين الابرار
جنات خلد قطوفها لي تثنى

موطني كانت عيونك


موطني كانت عيونك
قلتلي وتذكر متى ! ؟
يا جنوني ما اخونك
ولا لي بغيرك رجاء
وعشت انا كذبة جنونك
احترى موعد لِقَاء
ومرت سنيني بدونك
وراحت ووعودك سدا
•••
لا تعاتبني والومك
وكلن بدربه غدا
مايفرحني قدومك
ولا بقى لشوقي ندا
ادري ان اليوم يومك
ياعسى جرحي فدا
افرح وعانق نجومك
انا لليلي ما بدأ
•••
لو طفى بالعين نورك
ولا بقى لضيك مدا
وانتهى بالعمر دورك
وجرحك الغاير سطا
كل همي .. ارضي غرورك
ولا حتري منك عطا
غايب او معلن حضورك
انا لك ستر وغطا