 |
 |
 |
 |
|
 |
||||||||
 |
 |
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
 |
|
|
أدوات الموضوع | انواع عرض الموضوع |
|
|
|
|
|
|
|
|
|
||||||||
|
|
|
| …»●[الرويات والقصص المنقوله]●«… { .. حكاية تخطها أناملنا وتشويق مستمر .. } |
|
|
|
|
أدوات الموضوع | انواع عرض الموضوع |
|
|
|
#1
04-15-2017
|
||||||||||||||||||||||||||||||||
|
||||||||||||||||||||||||||||||||
الجزء الثلاثون ،،
بعد اسبوع كنت مع الجازي بالغرفه واحاول اطلعها من الجو اللي هي فيه .. بس كانت ساكته طول الوقت .. كسرت خاطري وانا اشوفها تصيح .. اعرف السبب بس ما ابي اقول او افتح الموضوع.. الجازي يا قلبي الزواج قسمه ونصيب وفيصل مو نصيبج .. كلمتها وانا اطالعها وانطر منها كلمه بس سكتت .. غيرت الموضوع وخصوصا اني ابيها بموضوع غير .. الجازي اسمعيني عدل انا ابيج بشي مهم جدا وانتي الوحيده اللي راح تساعديني .. رفعت راسها تشوفني .. كملت وانا احس ان الموضوع شدها : موضي ابي اعرف شنو بينها وبين محمد .. انصدمت وطالعتني وهي تكلمني : ندى .. موضي وقحه وقليله ادب لا تصدقينها اذا قالت لج شي ؟؟ مسكت يدها وانا اترجاها : انزين قولي أي شي عنها .. انا واثقه في محمد بس ما اثق في موضي .. ارتجفت الجازي بين يدي وانا اشد علي يدها قالت : موضي اصغر من محمد بـ 4 سنين ومن يوم كانت صغيره وهي تحسبه لها يعني هي قررت يكون محمد لموضوي .. بس محمد ما كان مهتم والا عمره فكر بهالشي لان اللي كانوا يبونه تكون موضي لراشد .. بس انتي تعرفين راشد وعصبيته .. عمي خاف عليها منه وقرر ان الزواج يصير بس يكون محمد المعرس .. سكتت شوي وانا قلبي يحترق ! تكلمت الجازي وقالت: بس محمد رفض وقال انتوا كتبتوا اسم موضي براشد وانتوا اللي تتحملون المساله اما عني ما راح اتزوج حتى لو شاب راسي .. امممم في ذاك الوقت عمر محمد 23 او 24 سنه كنت الجازي تتكلم وانا سرحانه وافكر بـ محمد .. ندى ندى صوت الجازي العالي رجعني لها وقالت : لا تخافين على محمد لو يبي موضي او غيرها كان من زمان تزوج .. بس القلب يا ندى القلب .. قالت هالكلام وهي تاشر على قلبها .. دمعت عيوني عليها وحضنتها البنت تتعذب والا احد درى عنها !! في مكان ثاني يعقوب يغير ملابسه عنده اليوم جلسه ذكر " محاضرة دنيه " .. البس ثوبي واحس اني مخنوق مادري ليه بس الضيقه فيني .. لا ادري بس مو قادر اعبر انفتح الباب ودخل سالم يركض وهو يضحك: بابا بابا ابي كوكو! استغربت شنو كوكو .. رفعته من الارض وانا اقوله : من وين يجبون كوكو! دزني علشان ينزل وهو يناديني .. طلعت وراءه وانا حاط الغترة على كتفي شفت العنود قاعده عند التلفزيون بالصاله وهي تكتم ضحكتها .. نط سالم عليها ورد يقول كوكو من جديد .. انفجرت العنود بضحك من قلب وضحكتها تعبتني بزياده وبدون قصد صرخت فيها: العنود اخلصي علي انا مو فاضي ! اسكتت وقفت وهي اطالعني ودموعها تجمعت بعيونها .. سالم اللي تكلم وهو يسحب يدي ويقول : بابا لا بابا عيب .. ركضت العنود من جنبي رايحه غرفتها اوووووف طلعت مني بقهر .. رحت من صوب غرفتها وطقيت الباب بس ما ردت علي فتحته وشفتها قاعده على السرير وحاطه راسها على رجلها وهي ضمتهم على صدرها بيدها الصغيرة .. كسرت خاطري! قربت منها وقفت عند السرير من جهتها وقلت : انا اسف العنود صدقيني مو مني انا تعبان شوي واعتقد ان الحرة اطلعت فيج .. صوت بكاءها زاد شوي ارتبكت وخفت قعدت على السرير وانا اكمل : اذا متضايقه مني فانا اسف والله .. لا تخليني اطلع وانتي زعلانه الله والعالم ايش يصير فيني ! شهقت بقوه وهي ترفع راسها صوبي وعقبها حضنتني باقوى ما عندها .. حضنتني وعطرها دخل اقصى الرئه وجهازي العصبي .. كنت تقول شي بس انا كنت في مكان ثاني .. حطيت يدي على ظهرها وشديتها صوبي .. وانتبهت انها كانت تنادي طلال !! وهي بحضني ... دزيتها وسمعت ايش تقول عدل : الله يخليك لا تطري الموت انا ابيك وياي اخاف تموت وما احد عندي يعقوب انا احبك .. استغربت كانت تقول طلال .. بس شكلي كنت اهلوس وانا بحضنها ابتسمت لها خصوصا كلمه احبك اثرت فيني كلمتها : لا تخافيني انا هنا ..!! بس ما قلت لي شنو كوكو !! في فترة الاسبوع كنت اقرء الدفتر الوردي اللي عطاني اياه سعد كنت ناسيه فترة طويله او اتجاهله .. في البدايه كان عن حياة لينا من مولدها وحاطه فيه اجمل اللحظات.. بس اللي خلاني مصدوم لمدة اسبوع كامل الكلام اللي وراء مكتوب كنت مع سعد اخوها وكنت اقرء الكلام اللي انكتب بس باخر الصفحات .. في بدايه كلام لينا .. ... اليوم اقنعت الدلوعه العنود تكلم ابوها علشان يزوجني عزيز .. وكذبت عليها يوم قلت لها بخليج تسكنين ويانا بالكويت ,, ... اليوم خطوبتي من عبدالعزيز كان وما زال حب حياتي .. شفت ندى وهي رايحه صوب المطبخ لحقتها وانا اقول لها : شفتي ان عزيز ما اخذج لعبه .. ويوم شبع رجع لي انا .. والحين دوري لج على انسان يسعدج بعيد عنا ,, ... يوم زواجي من عبدالعزيز .. كنت اجمل واحلى من الكل حتى العله ندى اللي حضرت العرس .. في زفتي قهرني عزيز يوم سال عن ندى اذا موجوده وانه يبي يشوفها قبل لا يروح الفندق .. ... في شهر العسل كنا في بيروت .. كنت احس ان عزيز بعيد عني وانا ابيه يحس بـ حبي له .. بس للاسف هو مو معاي لانه دووم يتكلم عن ندى .. ويعتبرني اخت له وصديقه وبس ! ... اول مرة ينام معاي عبدالعزيز يوم كان تعبان .. وكان يناديني باسمها .. يشوفني ندى علشان جذي تهور وصار اني زوجته بالاوراق وبالواقع .. مو مهم من ينادي المهم هو لي .. ... يوم عرف بحملي واني بالشهر الاول .. تضايق بس بين ان الموضوع عادي قدام اخوي سعد بس يوم كنا بروحنا اطلق علي رصاصه الموت يوم قال : لو ادري ان مرضي راح يخليج تحملين كان فضلت الموت على اني اخون ندى .. ... كنت بالمستشفى اسوي فحص علشان سلامه البيبي وكان معاي عزيز .. هذي اول مرة يروح وياي من حملت وكنت بالسادس .. وقالت لنا الدكتوره ان الجنين بنت .. شفت فرحت عزيز اكبر من فرحتي ... ... بعد الولاده عزيز قرر يسمي البنت نور ما كنت عارفه السبب لين ما قالي ان ندى تحب هالاسم وان ودها يكون اسم بنتها نور كرهت اسم بنتي بس مستحيل اكره عزيز ... ... شفت ندى وانا في بيتهم البنت حلوة حتى وهي 28 سنه ما تغير منها شي بالعكس الزمن خلها تصير جذابه اكثر .. واللي قهرني ان عزيز كان يتنهد كل ما شافها ... ... اليوم خطوبه ندى وانا بالمستشفى كنت تعبانه بعد ما اكلت علبه حبوب كامله .. وغير اني مريضه قلب .. سمعت عزيز يقول : ندى لي انا وبس .. طلعت من الحمام " عزكم الله" بدون ابين له اني سمعت شي وانا من داخلي ميته قهر ... ... في عرس ندى عزيز كان حابس نفسه بالمكتب وانا ونور بالصالون .. كنت عارفه اني مستحيل اخذ مكان ندى بقلبه بس انا زوجته وام بنته ,, ... اليوم راح اسوى شي بسيط لعزيز بس انطره يجي لاني وبالكل امانه راح اطلب الطلاق وارجع مع اخوي سعد ... ... قلت لسعد اخوي عن اللي سويته واني ظلمت العنود ... وهني عصب سعد اخوي وطلع بس قالي راح اتناقش الموضوع معاج بعدين ... وعقبها كلمني بالتلفون وهو يقول : ان العنود انخطبت لغيره وهو كان يتمناها زوجه له .. صدمني اخوي سعد يحب العنود!! وانا اللي خربت حياته ... هذا اللي كان موجود بالدفتر كنت اكلم سعد اللي هز راسه وقال: عبدالعزيز .. لينا من كانت صغيره وهي دلوعه ابوي واي شي تبيه عندها يكون .. تكلم وهو وانا احسه مخنوق : هي طيبه وكانت تحبك صدقني .. لا تاخذ عليها ! تنهدت بقوه وانا اقوله : مستحيل اخذ على احد كنت اعتبرها اخت وصديقه وصارت زوجتي عن طريق الخطا صدقني كنت ومازالت اذكرها بالخير .. وقفت وانا اقول لسعد : انت الوحيد اللي تدري بانها كانت عذراء لين تعبت ذاك اليوم وصار اللي صار.. سكت شوي وعقبها قلت له: بس ليش ما قلت لي عن العنود ؟! سكت سعد شوي وعقبها قال: الزواج قسمه ونصيب .. طلع من عندي بعد ما تكلمنا لمده 3 ساعات ونص وانا سرحت بذكرياتي .... انا ما اقول اني ما احبها بس هالبنت راح تبعدك عني صدقني .. كانت ندى تتكلم وهي تروح وتجي والخوف واضح بعيونها.. وانا قاعد على الكرسي القريب من باب المجلس .. وقفت ورحت صوبها وانا امسك يدها : مستحيل ما نخلق اللي يفرقنا شالت يدها من يدي وهي تعدل الشيله على راسها: عزيز البنت دووم تقولي انها تحبك وانك لها .. صدقني لينا اللي تبيه يجيها وهي قاعده في البيت! مسكت يدها من جديد وانا اقربها لصدري : احبج يا ندى وانتي ا اغلى ما في هالدنيا .. انتي روحي واذا فقدتج عشت جسد بلا روح! شديت يدي عليها وانا اهمس بحبي لها.. اليوم الشفت عندي صباحي يعني زام ليل .. وبنفس الوقت كنت مشتاق لندى .. كنت اخطط اخذ اجازة واروح فيها العمره كـ شهر عسل متاخر لنا وخصوصا اني حرمتها من السفر والسبب دوامي .. البنت صابرة علي وراضيه فيني يا بعد قلبي والله احبج .. ابتسمت واناا اتذكرها .. وبدون مقدمات دخل الضابط عبدالله المكتب وهو يناديني .. وكيل عريف محمد وين التحيه!! وقفت وانا مخترع!! ضربت التحيه له وانا ما زالت متخرع ... ههههههههههه ضحك عبدالله علي وقال: شبلاك !! ابتسمت وانا اقول : كنت افكر وخربت علي ! قال وهو يقعد على الكرسي القريب مني : اكيد في ندى .. كمل وقال: من يوم خذتها وانت ما تنشاف كل لازق فيها ياخي اطلع شم هواء بس بدونها .. ههههههههههههه ضحكت من قلب وانا اقوله: مستحيل اختك هذي ذهب واللي يرخص بها خسر عمره .. وبعدين انا ناوي اخذ اجازة لاسبوعين واروح وياها العمرة شرايك ؟! ابتسم ورد : ابشر خذها من يوم الخميس الجاي وانا من الحين موافق على خروجك.. سكتنا شوي وعقبها كلمني عبدالله بس بشكل جدي: محمد .. انا ابيك بشي بس مش عارف شلون ابتدي! طالعته وقلت: تفضل وانا اخوك قول كل اللي بخاطرك! سكت عبدالله وهو يحرك يده بقوه وقال: ندى يوم دخلت المستشفى كان بسبب احد .. انصدمت وانا اسمعه بس عبدالله كمل وقال: انا سالت الدكتور اللي بالطوارئ وقال ان الضربه من فعل فاعل بس الزوج متستر والزوجه رافضه تعترف .. قولي يا اخوك انت تضرب ندى .. تنقص يدي من الكتف وتنشل اذا سويتها .. صرخت وانا اوقف واطالع عبدالله وكملت : انت مو فاهم شي .. الموضوع بسيط وان شاء الله راح اخلصه بنفسي واللي صار لندى حادث غير مقصود فيه صدقني .. ورب البيت يا اخوي ما عمري رفعت يدي عليها .. ابتسم عبدالله وقال: ما عمري ندمت على زواج ندى منك لاني اعرف من محمد بن علي الـ ............ !! من طلع لين الحين ما رد واتصل فيه وما يرد شبلاه .. اووووووووف بدر وينك .. كنت افكر وانا خايفه اخوي طلع من الساعه 7 ونص الصبح وما رجع لين الحين الوقت تاخر وحده ونص بالليل من اكلم .. فيصل صرخت بصوت عالي وانا اتذكر فيصل .. رفعت جوالي واتصلت بعد اكثر من 4 رنات جاني صوته .. فيصل : السلام عليكم ورحمه الله وبركاته .. هلا اسماء ! اسماء : وعليكم السلام ورحمه الله .. شلونك فيصل ! فيصل : بخير الله يسلمج .. شبلاج صوتج فيج شي ! عجبتني الملاحظه عنده رديت عليه وانا شبه اصيح : بدر يا فصيل .. طلع من الصبح لين الحين ما رد وانا خايفه جواله ما يشيله ! رد على فيصل وهو يحاول يطمئني : اذكري الله يا بنت الحلال الحين انتي بروحج بالبيت! جاوبته وانا توني اركز على هالنقطه: أي بروحي .. فيصل لا تسال اكثر وتزيد خوفي .. فيصل: خلاص لا تخافيني الحين اجيج انا ويعقوب ويمكن ناخذ العنود ويانا .. انا عندهم بالدفنه وبيتكم قريب من هنا عطيني 5 دقايق .. يالله مع السلامه .. صكرت التلفون وانا قلبي مقبوض بدر امانه ولازم احافظ عليه امي وصتني عليه .. يارب رجعه لي سالم غانم وبصحه وسلامه .. يارب .. اليوم راح اعلمج الادب واخليج تندمين على انج خذتي محمد مني .. كنت افكر وانا بالغرفه انطر راشد ينام بس الاخ شكله ناوي يسهر على التلفزيون .. فكرت بشي وعقبها ابتسمت خطه حلوة علشان اخليه يطلع .. راشد حبيبي ابي اروح اقعد مع الجازي وندى وضحى .. كلمته بس ما رد علي .. نزلت من السرير وقربت منه وهو قاعد على الجلسه ويتابع مباراة بين الريان والعربي " فرق الدوري القطري" امممممم حياتي ما رديت علي .. لف صوبي وهو يطالعني ونظراته بالعين كانه يحاول يقرء ايش براسي .. وقال: ماله داعي خلي البنت تستانس واذا تحسبين اني مادري عن حركاتج فـ انتي غلطانه .. انصدمت من كلامه وحبيت ابين له اني مظلومه : أي حركات وانت ايش تقصد .. بكيت او حاولت امثل الدور بشكل صح .. بس راشد مسك يدي بقوه وسحبها عن عيني وقال: دموع التماسيح هذي مو علي .. والله يا موضي ما يردج بيت ابوج الا تصرفاتج واذا زدات عن حدها تعرفين ايش راح يصير .. خفت وانا اشوف تهديده حاولت ابعده عني بس كان ماسك يدي بقوه انطق الباب وانا حمدت ربي على الانقاذ اللي جاء .. مين عند الباب صوت راشد اللي خرعني .. ههههههههههههههههههه ضحكه ناعمه وهاديه عند الباب وعقبها صوت هادي : ندى ممكن تفتح الباب اخ راشد والا زوجتك موضي حصريه لك .. ابتسم راشد وانا استغربت هي جايه لي برجولها ايش تبي اوووف صج عله .. لف علي راشد وهو يقول: اذا تبينها اخذيها ... فتحت الباب وانا اشوف ندى لابسه جلابيه مستره ومغطيه شعرها زين .. مدت يدها ندى ومسكت يدي وهو تقول: يالله يا حلوة عندي لج الليله سالفه طويله .. ماردي ليش حسيت بشي حلو وهي تمسك يدي .. مسكت يدها بالمقابل وانا بداخلي فرحه غير طبيعيه وقلت : صج يعني راح اسهر وياكم .. غمزت بعينها وهي تقول: غصبن عن راشد بعد .. طلعنا واحنا نسمع صوت ضحكت راشد من داخل الغرفه !! الساعه 3 ونص الفجر وبدر ما ظهر وصرت خايف اكثر من اسماء والعنود ويعقوب .. كنا بالصاله واسماء لابسه العبايه والنقاب لان يعقوب ويانا .. كلمتها وانا اقول: لا تخافين عبدالله راح يتصرف .. وعلى العموم الخبر راح يوصل لنا قريب .. رن جوالي بهالوقت وكانت اشوف اسم عبدالله يزين الشاشه وقلبي انقبض .. رديت وانا احاول اكون هادي : السلام عليكم ورحمه الله وبركاته .. طمنئي لقيت بدر .. طيب طيب .. رفعت راسي اشوف اسماء اللي كانت تراقب حركاتي وتركز على نبرت صوتي .. خلاص انا جايك الحين .. مع السلامه .. صكرت من عبدالله في الوقت اللي نطت اسماء وجاءت صوبي وقالت: ايش صار بدر وين ! مسكت يدها وانا مش عارف من وين ابتدي : بدر في المستشفى صـ .. صوتها العالي وقف الكلام بين شفايفي : لالالالالالالالالالالالا اجوك لا .. بدر امانه .. بدت تصيح ويعقوب طلع والعنود جاءت عندها وهي تقول: يا بنت الحلال اذكري الله .. انتي ما خليتي فيصل يكمل ..! رفعت راسها اسماء وهي تقول: لا تقول انه مات الله يخليك .. ابتسمت وانا اقول: الحمدالله الولد بخير بس يوم صار الحادث ما كان عنده اثبات هويه .. مسكت يدها للمرة الثانيه وانا اوقفها وقلت: اللي بالمستشفى ما اعرفوا هذا من لين صحى بدر وقال لهم من يكون .. في هذي الوقت كان الخبر عند عبدالله وقالي .. مسحت دمعه طاحت من عيونها وانا اكلم العنود : روحي جيبي ماي وعقبها كلمي يعقوب علشان نروح للولد .. 
   
|
|
04-15-2017
|
#2 | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
الجزء 31،،
في الكافتيريا جامعه قطر البنات متوزعين بالنشاط والكل في حاله اللي يدرس واللي يلعب ورق واللي شغل الحش وبدء يتكلم عن فلانه وعلانه .. باخر الزاويه كانت شله كبيرة قاعده وضحك وسوالف وصوتهم موصل اخر الدوحه .. تكلمت وحده منهم بكل نعومه وهي تميل بجسمه: الا وين بندر اليوم ما شفته بالمحاضرة !! ردت عليها دلال اللي كانت اطق على الطاوله : رح يشوف وضحى اذا خلصت محاضرتها والا لا .. اووووف هذي متى تتخرج مليت من طاريها .. تكلمت حصه وهي ترفع خصله نازله على وجهها .. ردت دلال عليها وهي تقول: حصوص انتي كنتي حبيبته وانتي اللي ضيعتي بندر منج .. ردت حصه وهي توقف : بس انا اعتذرت وذليت نفسي .. ليمتى راح يكون جذي والله احبه .. رفعت دلال راسها تشوف صديقتها وهي تقول بقلبها " الحمدالله والشكر متى راح يعقلون" هاااااااااااااي صوت رجولي خلى كل اللي قاعدين يوقفون علشان اللي جاء .. بندر و وضحى كانوا وقفين يا طالعون البنات اللي قاعدين .. تكلمت البندري او " بندر " كما يطلق عليها : شسالفه ليش ساكتين متعود صوتكم يوصل القمر .. ضحكوا البنات وردت سلمى وهي تقول : لا بس كنا نشوف فلم هندي نسخه قديمه .. قالت كلامها وهي اطالع حصه اللي انحرجت من كلام البنات ودمعت عينها وهي تركض صوب الحمامات "عزكم الله " طالعها بندر بدون اهتمام وهو يجلس على الكنب وتجلس وضحى جنبه وما كان يفصل بينهم شي حتى الهواء ما كان يمر .. رجعوا البنات يسالفون وبندر كان هيمان بشكل وضحى ونعومتها .. وضحى ذايبه بحركات بندر لها .. في المستشفى في الطابق الخامس 574 كان بدر نايم على السرير الابيض وبجنبه اخته اسماء .. كانت ماسكه يده وهي تقرء القران على راسه .. دخل فيصل بكل هدوء علشان ما يحسس اللي موجودين فيه .. بعد الستارة اللي تفصل السرير عن الباب وشاف الوضع السايد .. سكت وهو يراقبهم .. حسيت باحد موجود بالغرفه رفعت راسي اشوف من وانصدمت بعيون عسليه مركزه على وجهي .. انحرجت ونزلت راسي وانا اقول : حياك الله ليش واقف .. رد فيصل وهو يقرب من السرير وقال: اخباره اليوم ؟! رديت عليه واانا اوقف اجيب له شاي: طيب بس ما زال نايم .. سكت وانا ابي اقول شي بس بعدين الوقت مو مناسب كنت افكر والا سمعت ايش قال فيصل .. اسماء اسماء .. صوته رجعني له وانا اقول: لبيه .. ابتسم وقال: لبيتي حاجه يارب .. اقولج بدر ماله اصدقاء ما اشوف احد يزوره .. سؤاله حزني وخصوصا انه عن الغالي قلت له وانا اطالع بدر: لا والله .. اخوي من النوع الانعزالي ما يعاشر العالم .. سكت وانا اقول : قبل وفاه اهلي كان ما شاء الله عليه شعبيه بالفريج .. وعقب ما توفوا بحادث صار مكانه البيت .. تنهدت وانا اكمل : تصدق يا فيصل لما اقوله اطلع تمشي غير جو ,, يرد على ويقول .. الغاليه من يقعد معاها .. كان يحاتيني ويخاف علي .. خنقتني العبره وما قدرت اكمل كلامي .. جاءني فيصل وهو يحضني ويشد من حضنه : لا تبكين والله دموعج غاليه .. وصدقني انتي وبدر بعيوني وما راح اخليه بروحه .. ومن اليوم ورايح .. سكت شوي وانا ارتحت وهديت .. حاولت ابعد نفسي منه بس فيصل كان عنده راي ثاني .. حضني مرة ثانيه وهو يقول: اول ما يقوم بدر بالسلامه راح اسوي عشاء لسلامته ومنها يكون يوم زواجنا .. مادري ليش حسيت اني اطير من الفرح واخيرا راح استقر ويكون في مسوؤل غير بدر بالبيت .. بدون شعور مني حضنت فيصل بقوه وانا اقول : ربي لا يحرمنا منك يالغالي ..!! ...؟ صج لا حول الله والا قوة الا بالله العلي العظيم ,, ربي يقومه بالسلامه .. طيب من متى صار هالشي .. ...؟ من يومين تصدقني البنت خايفه على اخوها وكل عنده حتى فيصل 24 ساعه عندهم .. ...؟ ربي يجزاه خير ان شاء الله والله اسوم تستاهل فيصل وهو يستاهلها بعد .. بس ليش ما قالت لي المفروض انا اقرب وحده لها؟! ...؟ ادري بس هي طلبت مني ما اخبرج لانها خايفه عليج .. والا تنسين انج بالتاسع .. بس انا ابيج في موضوع ثاني ؟! ندى:حتى لو المفروض خبرتني .. المهم قولي اللي تبين تقولي يالغلا كم العنود عندي ! ابتسمت على كلامتها وقلت: في شي بيني وبين يعقوب .. يعني .. اممممم ما اعرف شلون اقوله !! ردت على ندى : لا تستحين قولي انتي مزعله الرجل والا العكس صحيح ! رديت بسرعه علشان الموضوع ما يكون غلط : لالالالالالا .. مو جذي ندوووش الموضوع شوي غير يعني يتعلق بالامور الزوجيه!! ندى : اهاااا فهمت عليج .. انزين كملي ! احس الجو عندي صار حار كنت بالصاله وسالم نايم بحضني .. ويعقوب طلع من فيصل .. رديت على ندى وانا مش عارفه شلون اقولها اني ما زالت عذراء.. العنود: ندى بقول بس لا تعصبين ادري اللي اسويه غلط بس والله مو بيدي .. حسيت بالخوف بصوت ندى وهي تكلميني وتقول: يعني شنو انتي مسويه شي غلط .. العنود قولي تراني اختج الكبيرة ! رديت وانا العب بشعر سالم اللي مازال نايم وقلت: انا ... ندى انا .. امممممم .. انا ما زالت بنت ! ندى ترد علي وهي تصارخ : ااااااايش ,, انتي شتقولين حرام عليج الملائكه تلعنج وتحاسبين من ربج .. ليش تحرمين يعقوب حقه الشرعي .. كملت قبل لا اتكلم وقالت : هو سوى لج .. قال لج شي .. العنود قولي .. رديت عليها وانا احس اني بصيح: لا بالعكس طيب يا ندى .. شهقت بصوت مخنوق وقلت : كل ما حاول يضمني او يقرب مني اتذكر طلال يوم يوم .. هنا عاد ما قدرت وبكيت بقوة لدرجه اني قيمت سالم من نومه .. واسمع ندى تهدين وتسمعني كلام يهدي من وضعي .. بنفس الوقت كان سالم يحضني ويصيح معاي وهو ما يعرف ليش ابكي .. كلمتني ندى وقالت: اسمعي الحين الساعه 5 ونص المغرب .. عقب صلاة العشاء بقول لمحمد يخليني عندج حلو الكلام .. هزيت راسي لها كانه تشوفني .. كملت وهي تقول يالله بروح اصلي الحين واكلم محمد .. لا تصحين اذكري الله .. ومع السلامه .. صكرت التلفون وانا احس براحه على الاقل في احد يعرف معاناتي .. اااااااااااه يا قلبي !! نزلت راسي تحت وطالعت سلوم اللي ما زال يصيح ضميته بصدري وانا اقوله : يا قلبي ليش تصيح !! اروح لندى .. لالالا بس البنت طيبه ... امممممم بس يا موضي ندى هي اللي خذت محمد منج .. لالالالا البنت طيبه والله وتحب الخير لكل! ليش انا عكسها ليش .. صحاني من تفكيري يد ناعمه غطت على عيوني .. هههههههههههه ضحكت وانا اقول: من الجازي .. بس ما في رد اممممم اكيد وضحى !. هم ما في رد عيل اكيد صافيه .. اووووه ليش مو ندى .. صوتها وهي تضحك على تخميناتي الغلط .. شالت يدها وانا لفيت جهتها .. وقالت لي : ليش موضي بنت فهد حرم السيد راشد بن علي قاعده بروحها .. حبيت كلامها طلع من قلبها بدون لف والا دوران مثلي .. مادري ليش اختنقت وابي اصيح .. بسم الله الرحمن الرحيم .. موضي شبلاج ليش تصحين عسى ما شر .. كلمتني وهي صج خايفه علي .. رديت وانا اصيح : ندى انا اسفه والله اسفه .. رفعت ندى راسي بيدها وهي تبتسم : يا قلبي احنا خوات .. وعادي اذا صار ما بينا مشاكل .. وليش الاسف مهما صار انتي زوجه راشد وبنت عم محمد .. حضنتها بقوه وانا احس بـطنها اللي بارز ومعطيها شكل حلو .. تكلمت ندى وهي تقول: نفتح صفحه جديده .. وانسي الماضي اتفقنا .. هزيت راسي لها واانا اقول: صج انج ذهب غالي .. ربي يوفقج مع محمد .. بس ممكن طلب ! عيوووووووووني لج يالغلا .. رد ندى احرجني لدرجه ان وجهي صار احمر .. قلت لها : علميني اكون مثلج ..! ابتسمت وقالت: طلعي موضي اللي داخل هني .. اشرت على قلبي وكملت : وانتي تكونين احس مني !! على الساعه 6 المغرب دخلت البيت وانا اسمع صوت الضحك .. ابتسمت وانا اسمع ضحكات ندى واللي ميزتها من بين الكل .. يا جماعه الخير تغطوا .. ما اخذت دقايق الا ندى تفتح لي باب الصاله وتقول : حياك الله .. ادخل ما احد غريب .. اعجبتني وهي لابسه جلابيه اورنج ممسوكه من عند الصدر وبارزة بطنها وعلى اطراف الجلابيه دانتيل .. وحاطه مكياج ناعم اورنج ولبسه الشيله بنفس الالوان .. ابتسمت وقلت لها : حي الله ام غايب.. شلونج عساج بخير .. كنت اتكلم معاها وانا داخل الصاله .. ردت علي وخدودها حمرت بزياده : بخير اذا انت بخير .. في هاللحظه تكلمت وضحى : الله على الغزل الصريح .. شرايك يا الشيخ محمد تقول لنا شعر بـ ندى بعد وتخلص .. ههههههههههههههه ضحكوا البنات عليها وعلشان احرجهم قلت : والله اني مفارق شعر الغزل بس من شفتك وأنا ببحره غريق كامل الأوصاف والحسن اكتمل كملك ربي وخصك بالخليق من كحل عينك عيوني تكتحل وان تناظر بي يجي بعيني بريق القمر وان شاهدك غاب وأفل يـستحي في محجر عيونك يويق صورك ربي سبحانه وجل تاج زين الكون بك وحدك يليق القصايد كلها لك والجمل تستحق الشعر دامك تستذيق ياصلك شعري وأنا مابعد أصل كل ما أقدم دروبك لي تضيق ارتويت الشعر فيني للثمل وصرت أهوجس في قصيدي وأستريق ليتني يازين في عمر الجهل وليت ربي ماجعلني لك عشيق قبل أعرفك كنت مو هاوي غزل ومن عرفتك شب في قلبي حريق الكل كان ساكت ويطالعوني بنظرات اعجاب .. واللي عجبتني بالنظرة ندى .. مسكت يدها وقلت: يالله يا بنات انا طالع مع المدام الغرفه وعقبها عندنا طلعه عائليه .. كملت وانا ابتسم : لوسمحتوا صكروا المغارة اللي فتحتوها !! كنت اسمع تعليقات محمد واحنا بالطريق رايحين صوب بيت يعقوب .. بس كنت اتجاهل كلامه وابتسم عليه وهو يضحك علي وعلى الاغراض اللي معاي .. قال وهو يمسك يدي : حياتي لا يكون ناويه تهجريني وتعيشين عند حرم السيد يعقوب .. ابتسمت وانا اقوله: أي لازم علشان تشتاق لي .. من تزوجنا ما بعدت عندك الا يوم وفاة المرحومه .. مسك يدي بقوه وهو يقول: لا تعيدينها الله يخليج .. ما اقدر اعيش يا ندى صدقيني ما اقدر .. كلماته عذبتني واحساسه الصادق ومشاعره الغنيه بالحب .. ربي لا يحرمني منك احبك محمد رديت عليه وانا اشد على يده .. وصلنا بيت يعقوب في مدينه خليفه الجنوبيه " منطقه بالدوحه " نزلت وانا اقوله : لا تتاخر علي وانت عند الشباب .. رد وهو ينزل علشان الاغراض اللي وراء : ان شاء الله على الساعه 10 ونص اكون عندج .. حط الاغراض عند الباب وراح دخلت البيت وانا اشوف العنود عند الدرج تنطرني .. جيتني وهي تركض حضنتني بقوة .. ههههههههههههه يا بنت بطني عورتي البيبي كلمتها وانا احاول ابعدها عن بطني .. اووووه نسيت والله حياتي ندوووش والله وحشتني من زمان ما شفتج ردت علي العنود وهي تمسك يدي وكملت: ليش متعبه عمرج وجايبه بيتكم معاج! ضربتها على راسها وقلت لها : كافيه محمد بالسيارة تجيني انتي بعد .. هههههههههههههههه ضحكنا واحنا ندخل الاغراض للبيت .. بعد السلام والتكريمات الملكه اللي مسويتها العنود قعدنا نتكلم وبديت اشرح لها شنهي الحياة الزوجيه وشلون تتعامل مع يعقوب .. وعطيتها الاغراض اللي عندي وشفتها شلون كانت منحرجه منهم مع هذا لازم تتعلم وانا واثقه بالعنود .. في هاللحظه رن جوالي بنغمه محمد طلعت من الصاله وانا البس العبايه واوصى العنود بزوجها وبيتها .. كنا قعدين على البحر واشوف يعقوب مو طبيعي من رن جواله بنغمه مسج .. طالعته وانا اهز يده واقول: شبلاك يا رجل اللي يشوفك بالهوضع يقول قرصته حيه .. ههههههههه ضحك يعقوب وهو يرد علي : يا فيصل الوقت تاخر والعنود تسال ويني؟ ضحكت عليه وانا اقول:وين تاخر تو الناس يا رجل ؟ رفع يعقوب ساعته لي وهو يقول: وحده ونص اخر الليل تقول تو الناس .. انصدمت لاني وعدت اسماء اجيها المستشفى .. قوم الله ياخذ عدوك نسيت البنت .. كلمت يعقوب وانا استعجله وقف وقال : من اللي قارصته حيه الحين .. ضحكنا على بعض وكل واحد راح صوب سيارته .. توكلت على الله صوب المستشفى والطريق كان شبه فاضي وصلت الغرفه على الساعه 2 الاربع الفجر دخلت بشويش علشان ما ازعجهم اذا كانوا نايمين .. لفيت صوب السرير وانا اشوف بدر نايم قربت منه وحبيت راسه والله هالولد يدخل القلب على طول .. كنت امسح على راسه سمعت صوت اسماء من وراي : حمدالله على السلامه متى جيت ! كانت تهمس علشان ما يقوم بدر .. لفيت صوبه وانا ابتسم لها وقلت : توني من دقايق .. انتي اللي وين كنتي ! رفعت اللي بيدها وكان اكل طالبته من برع وقالت: قلت للسايق يجيبه فوق بس رفض وما عندي احد نزلت تحت وجبته .. مادري ليش حسيت باحراج منها : اسف اسماء والله نسيت الوقت كنت مع يعقوب و... ههههههه ضحكت وهي تهمس وتقرب صوبي : عادي يا ابن الحلال ما صار شي وبعدين انت طلعت من عندي 10 بالليل عادي اذا جيت متاخر .. مسكت يدي وهو تقعدني على الكرسي القريب من الدريشه وقالت : تعشيت والا تنطرني .. ابتسمت وانا اقول : شلون اتعشى وانتي ما تعشيتي ما يصير .. هههههههه صوت ضحكتها تجنن هذا اللي اكتشفته اليوم .. وقفت وهي تنزل الشيله وتعدل شعرها وعقبها حطت الطاوله وفرشت الاكل وقالت : بسم الله ومدت لي الخبز ... يارب اني اسعدها يارب قدرني على اسعادها كنت اقول هالكلام بقلبي وانا اضحك واسولف مع اسماء .. دخلت البيت على الساعه 2 ونص الفجر كان الوضع هادي .. اكيد بيكون هادي من اللي يصحى هالوقت .. دخلت الصاله وكانت مرتبه صكرت الليت ورحت صوب الممر الداخلي .. اول غرفه فتحتها كانت لسالم .. كانت ظلام والمكيف شغال وهدوء الغرفه قربت صوب سريره وانا اشوف سلوم نايم بعمق قربت منه وبست راسه .. طلعت من عنده وقفت عند الغرفه الثانيه بس ما قدرت افتح الباب مع اني اشوف الليت شغال يعني ما زالت قايمه بس ما حبيت ازعجها مسكت نفسي انا ابعد عن باب غرفتها لا تهور وادخل .. فتحت باب غرفتي وانا اخذ نفس قوي وطلعت جوالي وطرشت لها رساله اني بالغرفه .. رحت صوب السرير وانا افسخ الثوب وافتح باب الكبت اطلع لي بنطلون البيجامه .. انفتح الباب الغرفه بقوه خلاني لف صوبه بخوف وشفتها وهي واقفه وكانت تصيح : بس هذا اللي قدرت عليه اطرش رساله انك بالبيت .. يعني ما قدرت اتعب نفسك وتمر وتسال ايش صار والا فينا شي .. كلامها صدمني حسستني اني مقصر في حقهم على تاخر 3 ساعات ما عرفت ايش اسوي وقفت مكاني انا مصدوم من جهوم العنود .. كملت كلامها وهي تمسح دموعها : ما كان له داعي تقول انك جيت بعد كان نمت برع عادي ما يهم .. انا اصلا من زمان ما لي احد لا فيصل ولا عزيز والا طلال .. الوحيده بعد الله ندى هي اللي لي وبس .. طلعت تركض وانا منصدم اكثر طلال للمرة الثانيه طلال ايش سويت علشان كل هذا ايش يا يعقوب .. تعوذت من ابليس وصكرت باب الغرفه وانسدحت على السرير بس ما جاني نوم وانا اتذكر كلامها .. اااااااااااه ما اقدر والله اااااااااه كانت تتوجع وانا ما اعرف ايش اسوي .. ندى الله يخليج خليني انادي امي كنت اكلمها علشان تهدني بس ما في امل .. حمود لااااااا ارجوك لا تخليني بموت ااااه كانت تتكلم بسرعه وانا قلبي طاح بيدي لفيت صوب الجوال واتصلت على الجازي بعد الرنه المليون عندي ردت : هلا حمود .. ما عطيتها مجال صرخت عليها : الجازي قولي لامي تجي اعتقد ان ندى راح تولد الحين وانا ما اعرف ايش اسوي .. ما سمعت الا صوت القطار الجازي صكرت بوجهي حذفت الجوال ومسكت يدها وانا اسمعها تتالم : يا قلبي فيني والا فيج .. هههههههههه اااه كانت تضحك وقالت : شنو اللي فيك اااااه تبي تحمل خلني اتخيل ههه اااه لا ما اقدر خلاص .. صوت طق الباب انقذني تركت يدها ورحت فتحته لقيت امي والجازي : بسرعه روح شغل السيارة والجازي جيبي شنطتها الصغيرة اللي جهزناها.. صوت امي وهي تعطي الاوامر ريحني شوي طلعت علشان اشغل السيارة شفت بوجهي موضي : شلونها طمنئي عليها محمد هي طيبه ..استغربت من سؤالها واللي استغربته اكثر انها متغطيه مني ابتسمت وقلت : ان اشاء الله تكون بخير بس خليني اروح اشغل السيارة .. طلعت بسرعه وما اخذت اقل من 5 دقايق الا امي وندى والجازي جاين ركبت امي مع ندى وراء والجازي جنبي طلعت بسرعه وانا ادعي ربي يقومها بالسلامه ... كنت انطر رد بس الوضع السايد هو الهدوء .. فطوم تراج ما رديت علي كلمتها وانا اشوفه تشرب الحليب .. وقالت : عبدالله انت تتكلم جد والا بس تبي تعور قلوبنا .. ابتسمت وانا اقول لها : الا من جدي وعمي وخالي بعد خلاص عاد ابي اتزوج ويكون لي بيت وعيال واسرة مليت والله .. شفتها وهي تحط الكوب على الطاوله وفجاءه .. هيييييييييييييييييييييييييييييييه واخير يا شايب .. نطت علي تحضني بقوة وهي تصارخ لدرجه ان امي قامت من النوم بصراخها .. هههههههههههههههههه ضحكت عليها وانا قول : اذا انتي سويت جذي عيل ندى ايش راح تسوي .. شتسوي يعد غير اللي سوته اختك الخبله فطوم .. صوت امي اللي خلى فطوم تضحك هههههههههههههههههههههههه وقالت : صبج الله بالخير يا ام خماس. حسبي الله على عدوج قولي امين .. ههههههههههههه ضحكنا انا وفطوم وعقبها قالت امي : شبلاك اليوم على الساعه 7 صراخ وضرب ما في دوام اليوم .. لفت فطوم صوبي وهي تقول: والله يا ام عبدالله ولدج اليوم فرحني وقال انه يبي يتزوج .. هدوء جديد بس هالمرة امي اللي قطعت الهدوء بصيحها .. قمت من على الكرسي وانا رايح صوبه : شدعوه يالغاليه قلت بتزوج صار جذي خلاص غيرت رايي .. تخسي تغير رايك صوت امي اللي خل فطوم اختي تضحك وتقول : رحت فيها يا بو الشباب .. ضحكنا وانا اسمع امي تكلمني عن فلانه وعلانه وفطوم تاكل وتضحك شوي وتعلق شوي ...
|
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض المتطور
