ديوان الشاعر المبدع / ثامر بن شبيب

مجرد صداقه


عادي معك أبقا وعادي اخليك
مثلك مثل غيرك مجرد صداقه

ماشوف عندي احساس متمسك فيك
اقل من عادي معاك العلاقه

غبتي حضرتي خافقي مايحاتيك
القلب مابين عليك اشتياقه

انتى تناديني وغيري يناديك
الحب منك ماسرقته سراقه

لاتحسبين اللي يزعلك يرضيك
ولاكل طاقه بتقارن بطاقه

انا وبس .. اللي اجيبك وديك
وانتى على قربي تجيك الشفاقه

انا بديتك برجع الحين وانهيك
انسان مثلك سهل جدا فراقه

من دنيتي هالحين ببعدك وانفيك
ابعيد يالله بعيد كافي طفاقه

ادري جرحتك يوم انا قلت‍‍‍ مابيك
والجرح يبطي لو تغير مذاقه

مستغربه من ايش حضرت معاليك
هذا سلوبي لا نعيت العلاقه

الزاجل


تعال اباخذك عصر احسه قريب من عصري
يضايقني العصر هذا وانا ماني وسيع البال

انا وشلون احبك والاحزام الناسف بخصري
بحبك في زمن كانت فعوله تثبت الاقوال

رسايل عشق ينقلها الحمام الزاجل المصري
رسايل مادخلت في عالم الانتر ولا الجوال

وقصر فاخر على ضفة نهر احلا قصر قصري
وحدايق لي على مد النظر متسوره بجبال

هنا .. لو تجتمع دنياي ماتقدر على حصري
لأني معك والدنيا اضحكة لي والزمن ما مال

انا شاعرك واتفاخر بحبك وافرح بنصري
ولكن اسمع لشاعرك بأخر بيت لك وش قال :

حبيبي لا تصدقني وتشري الزاجل المصري
ترى امزح معك خلينا على الجوال راس المال

زهقت انا منك كرهتك ومليت


زهقت انا منك كرهتك ومليت
تعبت من شكك وكثرة ظنونك

من كثرة اسئلتك احس استجنيت
ياخي دخيل الله ذبحني جنونك

مليون مره انت في حقي اخطيت
لو غبت ساعه تفكر اني اخونك

وانا ولا مره خذلتك وزليت
تخيل اني بس عايش اصونك

عيني تصير ان ضقت من بيتك البيت
وقلبي يصير الكون لاضاق كونك

واللي صدمني لا بغيتك تخليت
وانا الذي لاضقت واحتجت عونك

تقول لو تطلب عيوني لك اعطيت
وش فايدة شوفي حبيبي بدونك .؟

وطلبت منك شي عادي وصديت
وشلون لو اني طلبتك عيونك ؟؟؟

غلطة الشاطر


الغيمه اللي تجيب الظل والماطر
ظلت علي الدروب وشح ماطرها

ضحيت واجد على شانك وانا ناطر
الفرصه اللي ثلاث سنين ناطرها

اليا متى ماتسيل حبك القاطر
مليت اسطر جروح شاب ساطرها

ياكثر من قال اني بالغلا شاطر
هو مادرى اني رجيتك سيل قاطرها

ياصاحبي لا طرالي ثوبك العاطر
يهون عندي غثى الدنيا وخواطرها

القلب فج الضلوع وجالك مخاطر
والكبد قو الصبر والبعد فاطرها

اما تسولف سوالف تشرح الخاطر
ولا تكب السوالف لجل خاطرها

كل شي عادي .. ولكن غلطة الشاطر
تبقا مع الناس وتبقا بقلب شاطرها

أدري مع غيري تخونيني الحين


ماودي اقلبها على راسك الحين
ولاودي اسكت عنك .. واجرح ضميري

جوني وقالوا عنك ناس كثيرين
كلام يكبر عنه .. حتي الصغيري

قالوا نستك : وقلت والله لتموتين
وللحين باقي لي بقلبك كثيري

ابسألك وشلون يعني بتنسين ؟
ولحمة كتافك .. كابره بفضل خيري

قالوا تبيها : وقلت يمكن من سنين
يومه مصيرك مرتبط مع مصيري

انتي .. مثل طير كسير الجناحين
جبرت كسره عقب ماهو كسيري

ياكل من يديني .. سوات المساكين
وصد وتنكر .. يومه اصبح يطيري

قالوا تخونك : قلت طبع الرديين
طبع الخيانه من الردايا يصيري

كل يوم وانتى ألف مره تخونين
ماهي غريبه خيانتك للعشيري

ادري مع غيري تخونيني الحين
وادري بعد ساعه تخونين غيري

حبيبة صاحبي


يا بنت هذا صاحبي واقرب الناس
تبين اخونه بكل بساطه عشانك

والله لو انك خلقتي من الماس
وصرتي بعين الكل شيخة زمانك

ان صاحبي يبقا مكانه على الراس
وانتي حبيبة صاحبي في مكانك

وشلون ابادلك المشاعر والاحساس
واسرق من ايدينه غلاك وحنانك

وانا ادري ان حبك بقلبه بلا قياس
وانتي تخونين الوفا يوم صانك

تخيلي انك مكانه على ساس
مع اقرب انسانه غدربك وخانك

يسهر معاها طاردن نوم ونعاس
في منظرن لو صار زعزع كيانك

شفتي شلون ان موقفك حيل حساس
شفتي شلون انه قليلن امانك

مثل الكبير اللي صغر حيل وانداس
انتي نزلتي من حترامك وهانك

لكن انا ببقا وفي لقرب الناس
ماني بخاين في رفيقي عشانك

قصيدة المكان


المكان اللي لنا عاده لنا
ماتغير للمكان ولا الزمان

بس غبت وجبت من غبت العنا
وصرت اسولف للمكان شلون كان ؟

اتنزح من هنا ليما هنا
لين انا ماضقت وضيقت المكان

صرت احس اني انا ماني انا
طبعي القاسي نسى نفسه ولان ‍‍‍‍

من عذر لو قلبي الصلب انثنا
فاقد(ن) لي شخص غالي من زمان

انت تدري عنك انا مالي غنا
بس مدري ليه تبخل بالحنان

وين اولي كل ماليلي دنا
وقمت اهوجس ليه خلاني وخان .؟

اتذكر كيف نجلس كلنا
في ركن واحد ولا ضاق الركان

كان موعدنا ثمان مع الهنا
وكنت انا دايم اجي قبل الثمان

صاحبي ماقول غير الله لنا
لاغدى مالك ولا الدنيا أمان

جمر المفارق


جمر المفارق بالحشا شهور واقد
القلب عقبك كن يحمس بمحماس

تدري وربي كني الكون فاقد
من غبت عني كن ماني مع الناس

طيفك يمر دايم علي وانت ماقد
مريت في دربي مع الدرب عساس

مليت وحجاج الزمن دوم عاقد
تعال فله مابقا داخلي باس

دنيا بدونك عافها القلب ناقد
من كثر ماشاف الكدر والتعوماس

بعض العرب كنه على الكبد راقد
والمشكله يدري ولا عنده حساس !!!!

شكله متعمد داخله قلب حاقد
وده يضايقني وانا ضايق الراس

ياصاحبي والله احس كون فاقد
فاقدك وكني فاقد جملت الناس

حبيبي روح


حبيبي روح لاتقعد عشاني لابغيت تروح
اذا ماعاد لك حاجه بوجودي لا تجاملني

عشاني .. لا عشان الملح والعشره ياروح الروح
اذا دمي ثقيل اصبح بعينك ماتحملني !!!

تخير بالدروب وكل درب يعجبك مفتوح
وانا لا رحت عن عيني ابلقا من يوصلني

تعذر لا بلاش انك تعذر ابتعد مسموح
تراضيني سنين البعد كان البعد يزعلني

علي لا ينشغل بالك ولو كلي غديت جروح
تهملني ربع واحباب والله مايهملني

ترى اصعب شي بالدنيا اذا صار الغلا مذبوح
بقلب اللي تحبه وعاملك باللي تعاملني

احبك شي .. وشي ثاني خطاك ان قلت لك مدموح
تجاهلني وتبي ادمح خطاك انك تجاهلني ؟

احبك لو على قلبي دلالك ترتكي وتفوح
هذاك اول زمانن فات قبل انك تبدلني

بحب اللي تحبه صرت تنطر شوفته مشفوح
انا ادري من عيونك تفضحك لوك تظللني

اشوفه في عيونك .. ياعيوني في سماك يلوح
اخذ نفس المكان اللي لجل يوصله نزلني

حبيبي روح لا تقعد عشاني لابغيت تروح
انا ادري منت في حاجة وجودي لاتجاملني !!!

قصيدة البلوتوث

يا صاحبي لجلك شريت البلوتوث
عشان اصير انسان مثلك معاصر

كنت احسب انه لخدمة الناس مبعوث
اثره خراب بيوت شر مقاصر

ياجعل ماهو لجيل الاسلام ماروث
اكبر خطر للجيل هذا يحاصر

شي يخلي راكد العقل ملهوث
واللي يناصر صاحبه مايناصر

افه تحرث بقاع ماهوب محروث
تشوف فيها رقص هز الخواصر

يفرحبها جاهل من الجهل محثوث
ويلقابها كمل المهابيل قاصر

والحين دام ان الحدث صار محدوث
يارب ثبتني من عصار عاصر

وياصاحبي مابيك ولابا البلوتوث
ولابا اصير انسان مثلك معاصر