 |
|
|
|
|
|
#1
06-11-2011
|
||||||||||||||||||||||||||||||||
|
||||||||||||||||||||||||||||||||
>>><< عندما تتمرد ملامح الشــر >><< في تلك الصالة حيث مساحات الحزن اضافت شيئا من البرودة بسبب سفر بندر و نايف نجد في الصالون الراقي ... تجلس سيدة في الاربعينات من عمرها بيضاء البشرة شعرها احمر " عنابي " لابسه جلابيه " كحلي " جالسه تنتظر ام تركي ام تركي : حيا الله اختي القاطعه ام رائد : هلا بك الله يحيييك عاد انا قلت يوم سافروا عيالها لازم اواسيها ام تركي تنهدت : بسم الله عليهم سافروا و بيرجعون ام رائد : الله يرجعهم لك بالسلامة يارب ... تشعبت السوالف ام رائد " خالة بندر اخت ام تركي " تحكي مع ام تركي ... ام رائد : اقولك ياوخيتي صدق اللي سمعنا ام تركي : وش سمعتِ خير إن شاءالله ...؟ ام رائد : أي خير ياوخيتي والله عز الله اذا ذالخبر صدق فهو بعيدٍ عن الخير ام تركي نزلت الفجال : هاااو وش فيه ياحافظ ..؟ ام رائد : صدق انو بندر بيرجع زوجته زينة ؟ ام تركي بدهشة : مين قاله ...؟ ام رائد : والله سمعت حماتي ام عبدالملك تهرجه وسط مجلس وش كبره تقول ان بندر الــ بيرجع طليقته ماغيرها الاولى اللي مافيها عيال ام تركي بعصبية نوعا ما : والله ياوخيتي السالفه مالها اساس و بندر ان رجعها فتأكدي ماراح يرجعها إلا براحته وبرضاه يعني وانا مستغربه من ذالحكي مدري الناس ذي تأول على كيفها ليش ام رائد بحماس نزلت الفنجان : عاااد انا ماسكت ابد والله قمت لك عليها ذيك القومة و قلت لا والله كذب و بندر ولد اختي فوزية ما فكر ولا 1% يرجع اللي ذلت امه واللي مافيها ضنى ام تركي بعصبية : وش تقولين انتِ وشذالحكي بس اللي فات مات والبنت ماعليها ملح وقبله والله لو على كيفي اتمنى يرجعها اليوم قبل باكر ام رائد شهقت < تبي بندر لبنتها الجازي : وش تخربطين انتِ بس بندر من حقه يشوف ضناه تقومين تتمنى له ذالعاقر اللي مافيها ضنى ام تركي تنرفزت : ام رائد كلمة زيادة منيب ناقصة ...... ام رائد : تشخطين علي بسبب طليقة ولدك ام تركي : والله البنت بمثابة بنتي اذا ما تدرين واحنا ناس نتسامح و ننسى ولا لنا بالهرج الفاضي ام رائد : والله ماش كان ابوي يقول عنك حكيمة و تعرفين تحسبينها عدل اثاريك خرطي طلعتِ على امك الله يرحمها الطيبة و السذاجة قاطعتك ام تركي : قهوتك عندك اذا شربيتها تدلين الباب بالاذن طلعت و هي معصبه و راحت غرفتها نسرين توهـ داخله من بيتها و مستغربه من شوفة ام رائد بعد كل ذالسنين نسرين : حيا الله حيا الله ام رائد : ام رامي اهلييييين يقولون انك رجعتِ متى ؟ نسرين بنرفزة : مالي اسبوع او اقل ام رائد : اهااا و صدق رجلك اللي انتِ ماخذه فلوسه ولا فلوس قارون نسرين بتقزز : عفوا نسرين تنهدت " ملعون ابو الفلوس اللي تعيشك بإهانات و تمسيك بضرب " نسرين : خذي راحتك البيت بيتك بروح اشوف امي دخلت نسرين بهيبتها و شموخها اللي على كثر ما صار لها إلا انها ما تغيرت ابد لا زالت على إهتمامها بنفسها و بأناقتها نسرين : وش عندها ذي ؟ داليا : اهلين نس نس ههههههههه مدري والله انا مدري وشذالصباح اللي صبحنا فيه بخشتها نسرين : يالله من جد غثيثة عسى ما غثت امي راما : والله امي فوزية دخلت اكيد ماراح تتركها هيكـ نسرين : ههه فديت الحلوة انا ... راما حياتي حطي شعرك قدام احلى راما : هيك نسرين : وش عندكم ملاحظة كلكم على هيك ما هيك داليا : أي بنقلب شوام نسرين تضحك بصمت : وين رامي اجل .....؟ داليا : هونيك نسرين : هههههه ياملحك بس عشتِ الدور وينه اخوك يا راما ؟ راما : نايم اكيد رامي : صباح العسل و الشوق و الكادي < مروق نسرين بوسته : هلا عيوني صباحك ورد هاه صباحووو طيب إن شاءالله رامي : أي طيب إلا طيب و نص و ثلاثة ارباع انا من شوفتك وانا خلاص طاير داليا : ترفق بس تمسك بس رامي : اقول اها بس ...زانت علومك مشكلة والله اللي الغيره مقطعة قلوبهم داليا : وش بغار عليه ياحسرة قلي بس وش فيك شيء يسوى رامي : اني ولد خالد بن محمد ( قالها بصوت حمش ) داليا : يذالهياااااااااااااااااا ط رامي : والله انا ادري انك متعقدة من وزنك صايرة كنك فيل بس ولا يهمك انصحك بالرابح الاكبر راما : هههههههههههههههه نسرين : رامي خلاص بس رامي : لا و على كيفك ان بغيتِ الفريق الأحمر او الفريق الازرق I think that it is indifferent with you داليا : ما رحمك إلا انو امك هنا رامي : خوفتيني يااااااااااااااااي دخلك شو عم تئدري تساوي << قلب شامي بجد داليا : ياشين السرج على البقر بس هههههههه رامي : شايفة يمه اختك القعدة مدري العقدة على قولة ريم وش تقول لي بس مالومها من الغيره انا ذاك المرة في الفيصلية نشبوا لي ناس يقولون اكيد اسمك مايكل نسرين : ههههههههه الله يقطع سوالفك بس رامي : لا الجد الجد اللي مابعده جد انو والله صدق كذا واحد يسألني يقول نحسبك لبناني قلت لهم أي اانا لبناني اشتغل في باريس غاليري داليا : حتى وانت تنصب ما تترك الهياط يعني سيفورا وش فيهم ههههه رامي : حدك سيفورا انا معليش يعني معروض علي دعاية عشان بشرتي ( صدق بشرة رامي مرة صافية و بيضاء ) من ما كاو فورايفر يعني بحكم انهم متواجدت هنا فأنا وش قلت لهم قلت اصبروا بشوف جدول اعمالي مواعدني جورجيو ارماني بيمرني يتغدى معي راما : مره رجال ارماني ينذكر بكل مجالس للرجال و المشيخه رامي : ولا يعرف الكذب ابد شهادة حق داليا : هههههههههههه والله الفاضيين قسم بالله رامي : وش ورانا ...إلا فوزية وين مااشوفها نسرين تبتسم : رامي وش فيك قل امي رامي : يايمه هم خلقه كارفني وانا منيب ولدهم وشلون لو تصدق ذالعجيز من جد و اقولها يمه كان هي و الشايب صدق يلفقوني ولد لهم بالبطاقة داليا بحماس : من زينك عاد رامي : على الاقل يكفيني اني رشيق( << قوية يا رامي هههه ) و بشرتي بيور اقول لا يفوتك ترى الام بي سي عارضة تو جداول التسجيل روحي سجلي بسرعة ومع ريم و الهنوف هدايا مجانية هههههههههههه نسرين : الله يصلحكم دايما على ذالحال دق جوال نسرين ابو فراس يتصل بك تنرفزت شوي " وش يبي داق متى صحى لعمره عشان يسأل عني " رامي : يمه جوالك يدق ترى نسرين : وش قالوا لك مااسمع ههههههههههه رامي : لا العفو وش دعوة بس يعني حبيتا ذ*** شفت ساهية داليا : يمممممممه يالممثل مسوي مانيب ميت و اعرف مين اللي داق تراها امك مايمديك تشخص رامي : اقول والله حتى كلي تبن مستخسرها عليك لان التبن يقولون انو على سعره نسرين ردت على رجلها و بين عليها الإمتعاض ..... اميرة اللي وصلت لها ربع ساعه اميرة : وش فيك نسرين عسى ماشر ..؟ نسرين بكبرياء : ولا شيء اميرة : نسرين احنا خوات وش دعوة ترا مالنا غير بعض وش فيك على بالك منيب ملاحظة ترا كل شيء مبين بعيونك نسرين تنهدت : وش اقولك بس خلنا ماحنا بناقصين هموم اميرة : كيف يعني للحين الزفت ذا يعاملك بنفس طريقته اللي قلتي لي عنها من زمان نسرين سحبت الباب عشان محد يسمع : و اسوأ بعد من جد مدري وش قلبه ؟ اميرة بعصبية : خير وينى فيه وش على باله وانتِ ليش ساكتة له ياختي تراك بنت شيوخ و وراك رجال قادرين يلعنون ابو شكله اذا اهو ماهو قادر يتعدل و يلم نفسه نسرين : هدي نفسك قصري صوتك اميرة : ابي اجابة مقنعه وش مصبرك معه وش مصبرك يختي اطلبي الطلاق وانا واثقه اخواني لو يشمون ريحة خبر ماراح يتركونه خصوصا بندر و تركي نسرين : انتِ تدرين وش اللي مصبرني يا اميرة انتِ اكثر انسانه تعرف شخصيتي وإلا اميرة تهز نسرين : بس خلاص بس كبرياء كفاية وش نفعك فيه ..؟ كل راح و تهنى بحياته كل استانس و أنتِ ساجنة نفسك مع ذالسكير الشايب خلاص انتِ الف مين يتمناك نسرين بإقناع : اميرة لا تنفعلين انا اوكي انا الحين قاعدة اجني اللي سويته قبل و انا مستعدة اتحمل جنايتي و اذوق ثمارها لو على ايش .... لو ايش منيب بخلي العالم يشمتون فيني بظل معه و بعيش معه اهم شيء انا عايشة و وسط اهلي و عيالي و الحمدلله مثلك شايفة صارت عندي مجموعة مشاغل وين بالرياض يعني اشغلت نفسي عن حياتي الشخصية خلاص انا كنسلت شيء اسمه عاطفة و إهتمام للذات من ساعة اللي عرفة فيها ابو فراس اميرة : موب على كيفك منيب بسك تلك نسرين تنهدت : صدقيني يا اميرة انا على كثر اللي صار .... عرفت كل شيء يمكن كنت فاهمته غير قبل و الحمدلله عدلت اللي كان مايل ..بس مسألة اني اتطلق من ابو فراس مستحيل بظل اعيش معه و بظل الزوجة المخلصة له ليشل انو ما قصر ترا اميرة : أي ماقصر ناظري شكلك بس حرام عليك نسرين : حرام غط النور يختي ناظري وش غير فيني اهم شيء ..شيء في الجوهر ماقدرت احس باللي كان مختزن إلا يوم عرفت مشاكلي القوية معه ولانه ند قوي اميرة : قوي على نفسه طقاق يطقه اطلبي الطلاق بس نسرين : لا منيب بتطلق لو ايش ماراح يضرني شيء انا مبسوطة و مرتاحة الحمدلله يوم جيت الرياض بما انو صار لي بيت ملك خلاص عيالي متى مابغيتهم جيتهم و رجلي تعرفين لاهي بحياته اميرة : والله مااشوف فيه شيء زين يمكن إلا الأسم اللي يهز السوق هز نسرين : تدرين ما اخلطت بعائلتهم ولادري عنهم وش يمسون و يصبحون عليه اميرة : اهم شيء راحتك يااختي " اللي اعجبني انا شخصيا في شخصية نسرين انها رغم كل اللي صار لها جروح إنكسارات إهانات و ذكريات هامسة تعذبها إلا انها لا تزال قوية شامخة طلتها تحفل بالعديد من ملامح العز و زادها بهاء رونق التسامح الذي حل بها مؤخراً و ألتزمت بحياتها مع رجل اقل من ان يحظَ بمكانة المكوث معه ... ليس لشيء سوا لكي لا تدع فرصه للناس ليحكوا عليها ظلت قوية شامخة ممشية حياتها و شغلها بكل خير " - 
|
|
06-11-2011
|
#2 | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 
|
وانا اللي ابي قربك .. وابي قلبك ... وابي بدنيتي تبقى معي تبقى نسيت اني اعشقك ....! ولا تنسى اني بفقدك ...! لحظة وداعك ياهي صعبه بالحيل صعبه ... من لي غيرك يا عمري لو بعدت و رحت عني لو تحس بس اللي فيني لحظة ما تتخلى عني ... نسيت اني اعشقكـ و لا تنسى اني بفقدكـ ..." زينة وهو تسمع هالاغنية بالـ تكست .. ماتدري وش صابها ! تذكرت اشياء كثيرة و بكت فراق مضاوي اللي ربتها و علمتها واللي جرحتها رحيل بندر و مجافاته لها ... و وداعه لها بطريقة قد تكاد مقدسة لدى العشاقـ " الحين انت بعيد صدقني هذا الجديد الهم و الضيقة و حزني زاروني وانتا بعيد " تذكرت عيونه ... رموشه الكثيرة وهي تسبل تناظرها ....! و رثت حالها على هالجرح اللي ماراح يبرأ ابد الدهر ! دمعتها تحس احرقت وجونها من حرارتها انتبهت على رنين جوالها .. سلطان يتصل بك زينة ابتسم بحنية : لبيه سلطان : لبى قلبك يالغلااا هاه كيفك الحين ..؟ تقول لي امي انك من الصبح مدري وش فيك ؟ زينة " في بيت امها طبعا " : لا ابشرك اوكي بس مصدعة سلطان : ادري موب وقته بس واحد مستجعل معليش قدري اني اكبر شاب عانس بالرياض هههه زينة تبتسم : ههههههههه لا ان شاءالله خير لاني سألت الهنوف و البنت من حسن حظك ميب مخطوبة و تقريبا مبدئيا شكلها موافقه سلطان ابتسم : بجد وش دراك زينة : كذا حسيت .. شكلهم يعرفونك من قبل لانها مباشرة قالت اخوك اللي يشبه ماجد المهندس قلت لها بسم الله على اخوي ابرك من المهندس سلطان : ههههههههههههه بالله من جدك زينة : استعجل بس كلم خالد قبل تطير البنت عليك ترا من جد بنات عمي محمد الله يرحمه مرغوبات مره و كثير الخطاب لهم سلطان : شورك وهداية الله بشوف بس متأكدة انها ميب مخطوبة زينة : هذا حكيها لي من لسانها يعني شخصيا هي صرحت لي بذالخبر هههه سلطان : الله يخليك اجل شكلي بفاتح خالد هاليومين زينة : أي يومين الحين اذا فاضي رح له سلطان : الحين بالإستراحة انا زينة : ياعيني ياعيني وانا على بالي مستلم استراحة طيب اجحدهم اليوم سلطان : تبين الجد من بعد بندر ماعاد لها أي معنى زينة حست بحرارة بعيونها " هي بس الإستراحة كل شيء من عقبه ماله أي معنى " >><< لحظة وداعك ياهي صعبة بالحيل صعبة >><<< قفل سلطان منها ... سلمان : وش فيك شاق الخشة ههههه اطعمنا مما اطعمك الله سلطان : وليش مااشق الخشه وانا بنضم لكم حجرف بإندفاع : لا تقول هههههههه خطبت ماشاءالله اخيراً و انضميت لقافلة المجانين سلطان : ههههه للحين والله مابعد خطبت بس بشهادة اهلي ان البنت كفو وانا اعرف اهلها رجال من ظهور رجال سلمان : ما شاءالله تبارك الله الله يوفقك مين عندهـ خطبت ؟ سلطان : احممممم من الــ ........ سلمان عقد النونة و ابتسم : حنا ههههه من جدك حجرف بكل معاني الدهشة و الإستغراب زاد فضوله سلطان : الله الله زادت دهشة حجرف قوة سلمان : منيب بذكر عندنا صبايا ههههههه مين عندهـ سلطان : انا للحين طبعا ما فاتحت اخوها بالموضوع << ياعمري ياليتك ساكت بس ^_^ سلمان بحنكة : دام اخوها اكيد من خوات خالد صح سلطان : هههه اموت على الفطين انا سلمان : افا عليك اجل شاعر كذا بالهوا هههههههههه بس ميين اجل باقي عندهم احد ؟؟ سلطان : والله انا ماعرفهم بس بحكي اهلي طبعا حجرف بدأ يحس بتوتر بس طمن نفسه انو السالفه بتنتهي بشكل طبيعي و بعيد عن المشاكل اللي ممكن تصير سلمان : مافيه إلا ثنتين اعتقد وحده خطبها نايف و الثـــانية ....( سكت ) سلمان بدهشة " معقولة تصير امنية حجرف تحققت " حجرف انبسط نوعا ما لان ازمته بدت تنحل بطريقة طبيعية سلطان قاطع سلمان : لا ميب مخطوبة حجرف بدهشة عصبية نوعا : أيـــــــــــش سلطان : ماهيب مخطوبة يعني يوم سألوها قالت ميب مخطوبة و تقريبا ابدت عن موافقتها بشكل مبدئي حجرف : مين ذي ؟؟ << منصدم وبقوة ( يعني على اساس ان الهنوف له و محييره من سنين ) سلمان : مين يا سلطان ..؟ سلطان يتذكر : اعتقد الهنوف اذا منيب غلطان حجرف " قايلة انها ميب مخطوبة و قايله انها موافقة يلعن شكلك والله غير تندمين انا تسوين فيني هالسواة" حجرف ابتسم بثقل : ماعليش يااخي شكلك مخبط او ملخبط لانو الهنوف محيرة لي انا سلطان " الله يلعن ابليسك يا زينة احرجتيني و فشلتيني مع الرجال " انحرج سلطان : مدري اجل اكيد اهلي مخبطين هههههه زين اللي قلت لي كنت هاه قاب قوسين او ادنى و احكي مع خالد هههههههههه حجرف ابتسم بخبث " وهو ناوي الهنوف بنية " : انا بعد كنت ناوي احكي معه عشان املك باسرع وقت سلمان فتح فمه : ايش سلطان : انت بتملك بذالسرعه ...؟ حجرف " منقهر بقوة انا انرفض و يفضل علي شخص غريب انا يالهنوف بس انا لك و تشوفين " حجرف : من زمان وانا افكر بس الحين قررت شجعني سلطان ههههه سلطان : شجعتك وقعدت بها انا يعني ههههههه حجرف يبتسم لم : ولا يهمك الله يعوضك باللي اخير منها و اتمنى اشوفك كاشخ بالبشت باسرع وقت قبل سلمان حتى هههه سلمان لا يزال مفهي بقوة على حالة حجرف " كيف بس يقول لنا انو مايبي البنت و حتى ابوي متمشكل معه عشان ذالسالفه والحين يقول بيملك خير إن شاءالله وينى فيه " دخل نواف : السلااام عليكم الجميع : و عليكم السلام و رحمة الله حجرف : هلاااا ابو نسب حياك هههه نواف يناظرهـ : قايل ل كانا شخصيا مابعد وافقت يوم انكم تتفقون و تخطبون وانا منيب هنا ليش سلطان : الملك عبدالله يحكي طال عمره هههه اقول تمسك بس نواف : ههههههههه و علومكم اخباركمـ ..؟ يسولفون و تشعبت سواليفهم لشتمل الرياضة و السفر و اخيرا الزواجـ حجرف طلب رقم خالد ... حجرف : بالاذن شباب حجرف : الو خالد : سم حجرف : يسعد لي مساك ابو رامي خالد : هلا و سهلا حياك كيفك حجرف : بخير يامال الخير وانت امورك تمام ؟ خالد : بخير ياربي لك الحمد و الشكر حجرف : اقول ابو رامي انا طالبك غالي واتمنى ما تردني خالد عقد النونة : آمر وش بغيت ابشر بعزكـ حجرف : انت في البيت ...؟ خالد : الله الله في بيتي حجرف : مسافة السكة وبجيك بإذن الله خالد بدهشة : حياك الله ضي : وش فيه عيوني ؟ خالد مستغرب : مدري حجرف دق علي يقول بيجي تتوقعين وش عندهـ ضي بدهشة : مدري بس يمكن عندهـ مشكلة او شيء يبيك تحله له الله يخليك ساعدهـ خالد برومانسية فتاكة : وهـ بس من ذالقلب و صاحبته إلا ماودك نجحده يخليه ينرزع تحت و ادق على رامي يستلمه ضي : هههههه ياحبني له رامي من جد تقدر تعتمد عليه بكل شيء خالد ابتسم بخبث : هاه يعني اعتبر هذا قرين ليت هههه ضي بحماس : ههههههههه لا والله بس يعني اقولك انو رامي كفو وسنايدي اووف منك بس انت و تفكيرك عموما ياالله بضبط لك ملابسك عشان تبدل و تنزل لحجرف تحت خالد : أه بس مادري متى بترحمني ذالمسلمة طول وقتها كذا ضي : خالد ضي : الولد ينتظرك خالد : تدرين وين المشكلة ياقلبي ان ربي رازقني بأخوان و عيال عم ما يتسلطون علي إلا بالوقت اللي اللي مالي خلق ابن امه غير حبيبتي ام محمد ضي بخجل : من جد انطلع ناظر بعد شكله وصل خالد : لا تخافين وساع وجه عيال عمي يدخل و يقلط عادي خابر الدروب ضي بخجل مره : خااااااااااااااالد خالد : اوكي يالله ببدل و بنزل له بشوف وش عنده جاي ذالوقت ..؟ - - في المجلس حجرف : احم كح خالد : ياخي ترا ذي رابعه نحنحة تغرد فيها و العاشر ألف كحة وش قصتك خلاص رسمنا و خلصنا هههه حجرف : هههه والله يا ابو رامي انا ادري المفروض ابوي وإلا احد اخواني الكبار يجون معي بس انا ماجيت إلا عشان ابين لك اني فعلا شاري اللي ابيه بكل دمي خالد : حجرف دايركت عن اللف و الدوران حجرف : انا ودي يعني و احظَََ بشرف القرب منكم و طلب يد الهنوف خالد بدهشة : ويش الجديد من زمان و البنت لك وخارشنا بتالي ذالليل و بالاخير جاي تخطب وحده مخطوبة لك من زمان هههههههههههه حجررف " بلاكم ماتدرون وش كنت ناوي عليه بس ربي ستر " : لا انا ادري انها لي وانا لها بس انا جيت ابي استعجل بالملكة و الزواج يعني خالد بدهشة : وش غير راسك يقولون انك مأجل فكرة الإرتباط لإشعار آخر حجرف : هي حتى إشعار آخر ذي حركات نواف مالي فيها ههههههههه بس من جد احكي انا اتمنى نملك و نتزوج باقرب وقت خالد : قلت لابوكـ حجرف : بكرة بقوله بس ابيك انت تشوف الموضوع خالد بثقل : موضوعك منتهي من زمان و كلنا ندري انكم لبعض ولو تبيها الليلة تملك عليها و تاخذها اذا كانت موافقة طبعا حجرف : ليش ما توافق اكيد بتوافق ؟ خالد بنظرة جامدة شوي : هي موافقه اكيد بس اقصد على وقت التوقيت اللي مدري وش غيرك فجاءه حجرف " قال ترفض بلا بشكلها مسوية بتكسر ظهري بترفضني قبل ارفضها نا والله اني ولد حلال و اجودي ربي يسر لي ذالطيب سلطان و ابصرني باللي ناوية تسويه هنيف بس اكيد معها خبر والله انها تدري عن اني ناوي اتركها مين قالها مافيه غير نايف و سلمان و مستحيل ...هاه لحظة ... الطعس رامي كان وسطنا يوم نحكي " خالد : الله يصلحك بس والله رجيتني حجرف : معليش السموحة بس انا من جد مستعجل عشان عندي بعثة ولا ابي اروح إلا وانا متزوج خالد بدهشة : اتق الله بعثتك الشهر الجاي حجرف : ايه انا ابي عرسي قبل البعثة يعني باقصى حد يالخميس الجاي او اللي وراه كااقصى وقت الماكسيموم يعني الخميس اللي ورا الجاي عرفت خالد : وش معجلك ياخي فهمني احس وراك شيء حجرف : لا والله بس على قولة ابوك يمكن يركدنا العرس شوي خصوصا واني بسافر يعني شهر عسل بشهر عمل خالد : لا والله عشان تجي حايس لي راس ابو المشروع اللي طالع عشانه منيب مكلو فانا بحاسبك ترى اخذت اختي مو معناتها خلاص بتساهل معك حجرف : ههههههههههه انت مسكني اياها و يصير خير خالد : اوكي انا بشوف الوالدة بحكي معها و بشوف دلوعتنا توها صغيره ترا ياخي منيب مرتاح لذالشيء حجرف : أي صغيرة يارجال دراستها تكملها وهي متزوجة عادي ماضر البنات اللي كملوا وهم متزوجات خالد : الله يستر يعني خواتي اعتقد خلقه تكانة كيف بعد العرس من جد مو تكانة إلا بتغرز خصوصا لهنوف داري انها بتجيب العيد وبصحونه بعد حجرف : ههههههههه ولا يهمك بذاكر لها انا .... نواف اللي وجهه انقلب علامة استفهام : السلام ...........؟ خير وش جايبك هنا حجرف : احمممممم بما انك رفضت تسمعني قبل شوي فقلت مالي غير خالد يسنعني نواف : من جدك ياخالد عطيت ذالطعس هنوف هههههههههه اكبر جاحد و اكبر نصاب هذا خالد : حلوة فكرة طيبة يالنصابين كلكم بنزوجكم بليلة وحدة نواف : لا يبطي عظم ههههههه انا عرسي باقي عليه شهر و نص حجرف بتحدي رفع حاجب << وهـ بس : وانا الخميس الجاي بإذن الله او اللي وراه خالد : حكمت طال عمرك هههههههههه وش دراك يمكن نغير كلامنا حجرف : لا افا الرجال مايغيرون كلامهم يعقب العدو والله - -
|
|
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
العرض المتطور
