ديوان الشاعر أبو العلاء حرز

قامت مصر


قامت مصر

وكانت أومة تهز جبال
خلخل وتد الكرسى العالى
وحطوا الرقبة على السندال
!
قامت مصر

ونطوا فيران ... وطلعوا فيران
ركبوا دماء الشهدا بصوتهم
وغنوا معاهم ميت موال
!
يسقط يسقط حسنى مبارك
حناجر صرخت نسا ورجال
مشهد يفرح كأنة فى سيما
كلة بيلعن فى البطال
!
دة مستوظف ودا سريح
وشاب عفيف من العمال
نطقوا بصوت الحق العالى
انت بقيت زى الغربال
!
جمعت الصفوة فى كفة ايدك
واحنا تعبنا من الاذلال
ارحل ارحل ياسيدنا الباشا
وخد فى أيديك علاء وجمال
!
قال الشعب كلام موزون
وحرسة يقول دا كلام يتقال
أنتـوا كبـرتوا علينـا والا ؟
إحنا نسيـنـا أزاى نحتال
!
وقفتوا فى وسط ميدان تتظاهروا
قلنا ومالوا دة اسمة دلال
رفعتوا أيديكم وفضلتوا تسبوا
وطلبتوا زعيمنا بالترحال
وكتبتوا كلام يجرح وينرفز
قلنا نفوت مع انه محال
!

أية بس اتغير فيكم ؟
وانتوا كنتم زى غزال
أول مرة نشوفكوا وحوش
مش خايفين والدم أهو سال
نفسى اعرف أية غيركم ؟
وكسرتوا نفوسنا والاغلال
!
كنا الصوت اللى بيهديكم
وكنتوا اساس وقف الحال !؟
كنا بنخطب فى منابركم
وناخد منكم اى غلال
!
اية يعنى نصبنا عليكم
فى كام فدان وشوية مال
زكوا شوية عن صحتكم
ربك يفرج إن ضاق الحال
!
زرعنا الصحرا وخضرناها
هى جواهر والا رمال
وبنينا قصور من حواليكم
ولينا عليكوا كتير افضال
!
أيوة جمعنا فلوسنا بحيلة
وشوفنا فيها كتير اهوال
طيب لية دلوقت بتشكوا
ما أحنا تعبنا وكلة حلال
!
ردوا علينا يمكن نفهم
ويصبح بنا أى وصال
قام الشاب الهيــسى يجاوب ؟
وعينة تطق شـرار ونبال
!
انتوا خنتوا العهـد وصاحبة
وبعتوا بلـدنا للدجـال
ثلاثين عام واقفين طوابير
فى الاتوبيس والجمعية والبقال
!
قفلتوا علينا كل الدنيا
دى المراحيض عليها اقفال !!!
حسنى مبارك وزبانيتة
طرحوا الدم وماعدش فصال
!

حزب حرامى ! رئيسة مزور
واوعا تقولى علية اقبال
عايزين نخلص من بلاويكم
عايزين نردم على الاطـلال
غوروا فى داهية جتكم نيلة
هـو ده ريــــــس !!
دة اصــــــــلة شـــــــوال

أبوالعلاء حرز
س / ف 27/4/2011
كويت