ديوان لا وقت للأشواق - للشاعره نرجسيه

لو ضاعت الأخلاق تبقى المبادي
مهما حصل لي ما تنازلت عنهـا
وعضوية الحره ولو هي رمـادي
ماهـو بقاهرهـا ولاهـو غبنهـا
مدام هي عضوية أهـل الفسـادي
ماهي بمنهم صدق ولاهـم بمنهـا
تبقى بياض ٍ ما يخالـط سـوادي
ويسطر التاريـخ شامـخ زمنهـا
لا يا وسيع العرف بالحيل غـادي
ماهي من اللي كلمتـك تحتضنهـا
ولاهي رخيصه يا مريض الفوادي
لو كل بنت ٍ خاضعتلـه ضمنهـا
ولاهي رخيصه يا خبيث المرادي
دور على مثلك رخيـص ٍ ثمنهـا
متظاهر ٍ بالطيـب ودور القيـادي
وماهو مميز شامهـا مـن يمنهـا
هذا بـوادي والمراجـل بـوادي
حتى وهو فـي كلمتـه ماوزنهـا
وكر ٍ من الألماس والجو هـادي
ريب المباني والسخافـه وطنهـا
لب الفسـاد ومزبـن ٍ للجـرادي
كثرت علوم الناس باللـي سكنهـا
قبل أمس نادى بالخلايـق منـادي
وبانت نواياها عقـب مـا دفنهـا
ماهي بمخيفـه وعلـم ٍ وكـادي
لو هو بشي من الدسايس دهنهـا
لو المشاكل من ضعيفيـن عـادي
مير البلا من اللي دياره حصنهـا
وليت المشاكل من عنود وهنـادي
مير البـلا فيهـا وفيهـا ومنهـا
يالله وانا دايـم عليـك إعتمـادي
عِنها على الأنذال يـا رب عِنهـا
وأكتب لها في كل خطوه سـدادي
والنفس من كيد المعاديـن صنهـا

النرجسيه