قصائد و أشعار عبدالمحسن بن سعيد

انشودة العــطر الاخــيــــر
\
\
\
جت مثل قطر الندى - لا غير - جت مثل الهبوب
جت وانا الله حق .. مدري جت مشي والا مطير

جت على عزف البيانو لأحمر الورد الطروب
جت مسا مخمل وراحت مثل فجرية حرير


سولفت بأقدامها عن سكـّر وملح الدروب
وأنشدت بأنفاسها أنشودة العطر الأخير


ما كشف سر الكرز في ثغرها غير الغروب
ولا عرف معنى العتيم بشعرها غير الضرير


سندرلا شهرزادية لها عرش القلوب
نرجسية زنبقتها رعشة اهداب الغدير


عينها لحن السراب وخدها ثلج ٍ يذوب
ايه واللي ما يصير بنظرة ٍ منها يصير


هي خذت كل المزايا واهدت الناس العيوب
واشهد اني من زمان بعشقها ياليل اسير


جت مثل حبي لها طفل ٍ يطيح وما يتوب
جت مثل شوقي لها زايد عن الوصف بكثير


جت مثل آخر سوالفنا مع انفاس الهبوب
جت وانا الله حق إلى من جت احس اني بأطير





أحبك طفل ٍ أعمى


أحبك طفل ٍ أعمى قاضب ٍ ثوبك يخاف يضيع
....................................... وأحبك شايب ٍ قرب يموت بغيبة عياله




وأحبك نظرة عيون ٍ غزتها حسّرة التوديع
....................................... وأحبك وردة ٍ ماتت ولا جا اللي بتهداله




وأحبك منظر الثلج إن بدا فوق السفوح يميع
....................................... كأنه دمعة الحر السنافي بين عذّاله




وأحبك.. غيم عيّا لأمر نفخات الهبوب يطيع
....................................... حلف مايعطي إلا نجد نزف الحب وظلاله




وأحبك ريح تنثرني قصايص مالها تجميع
....................................... وأحبك شي في نفس العطر ليديك ماقاله




وأحبك صرخة ٍ فيها سوالف رحلة التلويع
....................................... وأحبك عاشق ٍ ماتت حبيبة عمره قباله




وأحبك سر مايخفى ولايمكن بيوم يشيع
....................................... وأحبك شمع كله ذاب مايدري من أضواله




وأحبك مجلس أجواد ٍ مشرع بابهم تشريع
....................................... والى جا .. من هجدهم قبل يقعد جاه فنجاله




وأحبك غبنة ام ٍ عقدها ياللأسف مابيع
....................................... ولدها صابه اللي خذ قبل حول السنه خاله




وأحبك طفلة ٍ تحبي على صدري وأخاف تضيع
....................................... وأحبك شايب ٍ ضمّ وكسر ضلع أصغر عياله