ديوان الشاعر/مسفرالدوسري

إِجْلسي فـ الكرسي هذا
أو هذا
ولاّ أقول لك..
يمكن أفضل ..
لو عَطيتي الشمس ظَهْرِك
إنتي دايم عادتك..
كل مابديْت ويَّاك حَديث
عَطيْتي للشمس ظَهْرِك
واخْتفى صوتي بْظَلامك
وشْتبين أَطلب لك: عصير..
ولاّ قهوة..
ولاّ يكفي دمعتي.. ومالح ملامك ؟
لا..قهوة..
قهوة أحسن
عندهم قهوه لذيذه
تشْبِه البُّن بْعيونك
وفيها من ريحَة كلامك
قهوه وَسَط
توقظ احساس الصباح بمهجتك
واتصَحّْي في صَدْرِك غَمَامِك
جَرِّبيْها.
لوسَمَحْت: إثنين قهوه !
وين كنّا؟
وين وصَلْنا بالسوالف ؟
إيه.. ذكرت..
كنت أقول لك ليش ذِبَلْنا ..
ليش صارت.. يابسة فينا العواطف؟
ليش قلبك منطفي..؟
وليش قلبي..
صار مدينه موحشة..
ليل.. وعواصف ؟
ليش ايْديْنك بارده
وصبْحي بين ايديني خايف ؟
ليش صِرْتي ..وانا يَمِّك..
ما تشوفيني بقربك
وانا في حضرة نهارك..ماني شايف ؟
ليش..
أنا أسف،اشربي القهوة قبل تَبْرِد..
ويطغى.. مُرَّها فوق الشفايف..
وين كنا؟
إيه..ذكرت ..
كنت أقول..
ولاّ .. خَلِّك من كلامي .
الكلام كرسي خشب
مايَحَضْنِك في حَنان
أو ينَسَّيْك التعب.
الكلام في أَوّلِه .. بسّْ أَوّلِه..
عِشْب
وف الآخر لَهَب.
الكلام في أَوّلِه..مَوَّال يَطْرِب
ومن قبل ماتْحِسّْ.. تَنْزِف..
وينْتشي جَرْحِك طَرَب
الكلام.. كرسي خَشَب
وش فايدة كثْر الكلام ..
قهوه أحسن
إشربي القهوة..بْرِدَت..
ولَهْفَة الحب بْرِدَت..
اللقا.. وباقي العَتَب
إشربي القهوة..
أظن
موعد الفرقا قَرَب