ألف قصيدة وقصيدة

تسأليني عن دفا صوتك؟ - ولا عندي إجابة.
الجواب اللي بصمتي؛ دايم أبلغ من كلامـي

ودّي إنّي قلت لك في وقتها: صوتـك سحابة
كل ماتمطر على سمعي: نبـت منها عظامي

كان بُـعدك ريح؛ لكن كان صدر الليل غابة
كان وجهي نور؛ لكن جيت لك شايل ظلامي

انتظرتك انتظار المنهزم قبل انسحابه
كنت أشوفك مثل شوفي للسراب بقلب ظامي

عن سكوتي؛ دوّري موطن لصوتي واغترابه
الزحام اللي بتنهيدات صدري/ مو زحامي.




فارس فايح الشمري