ديوان الشاعر مدغم ابوشيبه

{دم رجال أهدرته مره}




غابت نجـوم السمـا كلهـا والله درا

عن وليفٍ دار عامه ويومـه وشهـره

ياوجودي كل ماطرّف الليـل وسـرا

ماحدٍ بشّر بشوفه و لاجـاب خبـره

اليدين أمست من مصافح أيديه فقـرا

والعيون اللي فضح دمعهـا مايستـره

أن تذكرتـه تذكـرت دمـعٍ ماجـرا

قبل مايجمع زهابه على وجه سفـره

راكب اللي صمموه لمشايـخ وومـرا

مابعد حرّك سويكـه ولا دار كفـره

لو دفع متوسط الدخل دخلـه ماشـرا

لـه مديليّـة مفاتيـح والا منـظـره

رنّة بلوفه اليا فاع من فـوق الثـرى

كنّها صفق الهبايب على فنـد شجـره

رنج روفر ماقرا لونه اللـي ماقـرا

افتح من المستكا .. واغمق من السكره

ان نطحته من قدم وأن قفيته مـن ورا

كن (سحمان بن ملحم) ملقيك ظهـره

الحزام اللي يحزم الظهـور الياطـرا

طاري الفزعات والكذب مافيه ثمـره

في المنافذ والمسارات مايمسك سرى

البلاط يحشمـه .. والرمـال تقـدره

جرته يمشي على راحته ياهل تـرى

شفتها في دقة البشـت والا البنجـره؟

ياصله ويعلمه وأن درا و ان مـادرا

أن قلبي فـي غيابـه معلّـق بشعـره

لايحسب أنّي نسيـت ورب أم القـرا

ماتنسـا طلـع تينـه ونفحـة عنبـره

ايتداركنـي قبـل ضيعتـي والا تـرا

ضعت ضيعة دم رجالٍ اهدرته مـره

لايفكر في بـرا الجـرح والا مابـرا

واضح اللي في النعش رايحٍ للمقبـره

ويحفظ قدر المحبه ويبقا فـي حـرا

جيّةٍ منّي وغصـن الغـلا لايكسـره

ويخبر اللي في التمادي تطاول و افترا

يكسب المعروف بالعفو عن المقـدره

لايجاور وردةٍ في ظـلال وفـي ذرا

ماسقاهـا دمـع عينـه ولا دم نحـره

ويش عذره كل ماطرف الليل وسـرا

وألتفت أدوّر عيـال وأدوّر مـره !!