ديوان الشاعر سعود الحافي

لا ياحبـيـبـي لا تـسـافــر وتــرحــل
ملكـتـنـي والـيــوم بتـغـيـب عــنــي


لا مـا هقيـت الهجـر منـك بيحصـل
ولا ضربـت حسـاب طبـع التجـنـي


ان كـــان قـلـبـك يـاحـيـاتـي تــبــدل
أنـا بـكـم يـازيـن مــا خــاب ضـنـي


وان كان قصـدك فـي جمالـك تدلـل
الله يـزيـدك مــن حــلا الـفـن فـنــي


وكــان التغـلـي فــي خيـالـك تمـثـل
متـى علـى خـلـك تــروف وتحـنـي


وان كـان غـرك هـرج عـاذل تبجـل
في صـورة الناصـح وجـاك متعنـي


طـبـع الـعـواذل يــا حبيـبـي تـسـلـل
بـيـن الحـبـايـب بالنـشـايـب تـزنــي


دايـم علـى عــذل الموالـيـف تعـمـل
عـنـدي يعذلـونـك وعـنـدك عـذلـنـي


لامـن ذكــرت ايامـنـا الـلـي مـنـول
حنـيـت مـشـتـاق وعـيـونـي بـكـنـي


ارجــوك يالـغـالـي علـيـنـا تـجـمـل
أنــا مــن اسبـابـك قصـيـدي يـغـنـي


من حبكم صـرت بهواجيسـي أغفـل
محسـوب بحسـاب المجانـيـن كـنـي


ولا اوحيـت طاريـكـم يديـنـي تبـلـل
مــن حــر نـيـرانٍ بجـوفـي كـونــي


اصـبـر واداري عـنـد نــاس تـعـلـل
أخفي هواكم غصب واضحك بسني


حبـك ملكنـي وأنـت بالكـون أجـمـل
الله عـطـاك الحـسـن حسـنـك فتـنـي


مـتـى عـلـي يـازيـن تلـفـي وتـقـبـل
هــذا رجــا قـلـبـي وهـــذا التـمـنـي