غرامك صار عنواني وانا قبلك بلا عنوان...

" بيت بو فواز "

منار: ليه معصبه انتي ليه
غزل: مو شي يقهر بالله عليك
منار: ماشوف فيه شي يقهر
غزل: بالله
منار: على ماظن الهواش بينك وبينها مو بينها وبين سهر .. سهر وش ذنبها تزعل على بسمه
غزل: اخوها ماتخاف عليه
منار: من جدك انتي... انتي تحكين عن بسمه مو نجود فرقي
غزل: والتبن منهم ثنتينهم
منار: غزل اكيد صاير فيك شي
غزل: المشكله الحين بتشبك مع سهر وبتحشي راسها علي وبصير انا الغلطانه
منار تقلب عيونها : بيني وبينك ايه انتي
غزل: منار انثبري
منار: وشو انثبر الحق حق
غزل: والله انتي ماشفتيها شلون تناظره كأنهم من جد يحبون بعض
منار: وش هالخرابيط بسمه توها صغيره وبتفكر بواحد متزوج وعنده ولد والحين الثاني بالطريق
غزل فتحت عيونها : وشوو
منار تهز راسها: نسيت اقولك نجوى طلعت حامل
غزل: من جدك
منار: اي وربي
غزل: ليه ماقلتوا لي
منار: ويييه كنتي نايمه وكلمناها وباركنا لها وكل شي
غزل: نصااابه انا اوريها
منار تضحك : حظا اوفر
غزل: وينها الحين
منار: طالعه مع زوجها
غزل: اوريها
منار: المهم ..كلمي بسمه واعتذري منها
غزل: نعم هذا اللي بقى بعد
منار: لاحول الحين انتي السبب ولا تبين تعتذرين
غزل: اوووه منار لاتحاولين معي سامعه
منار: استغفر الله براحتك زين بس انا مالي دخل باللي تسوينه ولاتلوميني اذا رحت بيتهم او وقفت بصفها زين " وقامت "

غزل : افففففففففففف

غزل " الحين الكل واقف بصفها.. لو ان مافي بينهم شي ليه عصبت المفروض ماتعطي ادنى اهتمام حتى .. بس ليه محد مصدقني والله نظراتهم يقولون غرقانين في الحب .. اااخ والله لاتشووف الحقيره .. الاولى اخذت اخوي والثانيه تبي تخرب مستقبل اختي .. هين هين .."

" قامت غزل غرفتها وقررت تنام ومن بكرا يصير خير "

.
.
.
" اليوم الثاني "

" جــزر المالديف "

"جزر الرومانسية .. اجواء استوائية.. هدوء نفسي...مزيج بين البحر والطبيعة... ووجهة سفر العائلات وعنوان المتزوجين لقضاء شهر العسل.. هذه هي باختصار جزر المالديف الدافية والساحرة..التي تستقبل أعداد كبيره من السواح من جميع انحاء العالم ليتمتعوا بشواطئها ومناخها ورونقها المحاط بالشعب المرجانية ...وتبقى المالديف مكان رائع لقضاء العطلات.. ومن المعروف انها من أجمل السواحل والبحيرات الصافية في العالم وناسها اللي يتميزون باللطف وحسن الضيافة هذا غير جوها المثالي وسحر الجزر الصغيرة المطرزة بأشجار النخيل ...وغير كذا جزر المالديف من اجمل الشواطئ في العالم...فلا تفوت عليك فرصة شوفة
الغروب والمنظر الثاني هو شروق الشمس وقت ما تندفع الموجات حتى خط الأشجار
وغير سطحها المرجاني بدل من الرمل .. المالديف احلى مكان بالمعالم لاسترخاء وراحة البال .. جميله بكل شي من ناحية الفنادق والمطاعم وبكل شي "

" هذا هو اليوم الاول لفيصل وعبير بعد رحلتهم الشاقه ويوم الشاق الاول الشاق بين المطارات والنوم والمكان .. طبعا فيصل وعبير سكنوا في الفور سيزون و اخذوا لهم بنجالو في المويه او تقدرون تقولون كوخ وسط البحر ..وغير كذا مزوده بمسبح خاص *_^ يعني حق متزوجين لووول"

عبير تصرخ : فيصل قوووووووووووووووووووم

" عبير اول مافتحت عيونها وبعد ام اخذت لها دش وطلت على الشباك انجنت على المنظر اللي شافته و صارت تقوم فيصل لاشعوري "

فيصل من النوع اللي يفزع اذا سمع صوت : وش صاير وش صاير
عبير ضحكت على شكله : فيصل شفييك قووم لايفوتك المنظر
فيصل تعوذ من اشليطان ورحع يغط من جديد
راحت عبير لعنده وقعدت جنبه وشالت اللحاف : يعني شلون ماراح تقووم
فيصل يسمع صوتها العذب كنه صوت منبه ساعه : لااااع
عبير ضحكت : طب ليييه
فيصل: مابي وخري عني
عبير تضحك : افا ليييش
فيصل يقوم منفعل : حد يصحي زوجه بهالطريقه في الهوني موون
عبير تضحم وبخجل : اي انااا
فيصل يناظرها وانجن عليها قرص خدها وعبير استحت وقامت
عبير: قوم شوف الطبيعه تاخذ العقل
فيصل قام وهو يسحب رجوله ودخل الحمام وهو يتنهد من قومته: ااااااه
عبير ضحكت

" عبير طلعت على البلكون وقعدت على طرف الخشبه وتطل على البحر .. فردت شعرها وخلت الهوا يداعبه .. حست كنها مثل اللي بالداعيات .. ضحكت على نفسها .. بس الطبيعه والجو يخلونك كأنك بالخيال او مثل اللي نشوفهم في الافلام ... بعد فتره جاها فيصل وضمها من وراها "

عبير كرمشت نفسها
فيصل : ااااه وش هالمناظر
عبير: رهيبه صح
فيصل: رهيبه وبس تاخذ العقل كأنها جنه ماشاء الله
عبير: والله انهم عايشين حياه احلى من حياتنا بس ليش يعتبرونها فقيره مدري..!!
فيصل: والله هالمناظر تغني عن فلوس العالم
عبير: من جد " وتستنشق الهوا بقوه " والجو عندهم ياخذ العقل
فيصل : من جدد

" مسك فيصل عبير من كتوفها ولفها لعنده .. عبير استحت ونزلت عيونها وفيصل ابتسم على حركتها "

فيصل : يعني
عبير تضحك وهزت كتووفها
فيصل رفع وجهها لعنده بطرف اصبعه : افطرتي
عبير تناظر بعيونه : بس شربت كوفي انتظرك تصحى ونروح نفطر
فيصل ابتسم وبغمزه : طيب يلا قومي نتجهز ونطلع
عبير: يلاا

" وبعدها راحوا يتجهزون على اساس يروحون يفطرون "

.
.
.

" في لنــدن "

" بقى على تخرج سلطان يوم واحد .. سلطان كان مبسوط بوجود امه وابوه وفرحان فيهم فرحه ماتنوصف .. بس بنفس الوقت يحس بتأنيب الضمير من دعوات امه وامانيها اللي بانيتها عليه .. واكثر شي يذبحه نظرات الفخر اللي بعيون ابوه تقلته النظره الفيين مرره .. بس مجبور يسوي اللي سواه .."

سلطان : هاه يام سلطان وين تبين تفطريين
ام محمد تبتسم : انت اخبر انا ماعرف شي في نيوكاسل
سلطان : طاايب انا باخذك على مطعم ياخذ العقل وين ابوي
ام محمد : يلبس الحين جاي
سلطان : يلا قومي تجهزي "وغمز لها كالمعتاد "

" وقامت الام تجهز وهي رايحه طلع بو محمد .. بعد ماجهزت ام محمد انطلقوا على المكان اللي قالهم عليه سلطان .. "

ام محمد: شووف ريحه الكوفي وين وااصله
سلطان : بطلبك الحين شي ماتشبعين منه
بو محمد: واللي يعافيك ماهي بناقصه
ام محمد تضحك : اوهوو بدينا الحين
سلطان يضحك ويقرص خدود امه
سلطان: يمه تدرين كنك بنتي
ام محمد تضحك: مو عيب فيني العيب انكم تطولون بسرعه
سلطان يبوسها : فديييتك والله يازينك وزين طولك بس
بو محمد: بتقعدون برا ولا داخل
سلطان : برا القعدات احلى

" وراحوا يقعدون برا "

ام محمد بنشوه : مابغيت يابوسلمان واخيرا بتتخرج
سلطان يبتسم : اي واللله طلعت ريحتي هالدراسه
ام محمد تضحك : هانت يا يبه هانت
سلطان يبتسم

" شوي وجا الويتر وقعدوا يطلبوون .. وكذا كانت قعدتهم سوالف عاديه "

.
.
.
" في بيت بو محمد "

" اليوم الجمعه .. صحت سهر من بدري اخذت لها دش وصلت وبعدها نزلت وقعدت تحت مع جدتها "

الجده : سهر يمه قومي اخوك للصلاه
سهر: ماقام ...؟
الجده: لاوالله ماله ِبينه
سهر: بقوم اصحيه

" طلعت فوق لغرفته وقعدت تطق عليه وتطلق ماصحى ولا تكلم ولا رد عليها ... سهر اكسرت الباب عليه حتى رد "

سهر: منصوووووور قوووم صلااااه
منصور: زييييييييين زيييين

" سهر عارفه انه ماراح يقوم الا اذا فتح الباب .. ورجعت تطق عليه بس بسلوب ينرفز "
منصور يفتح الباب بكامل قهره وسهر من اسمعت صوت المفاتيح بعدت لايجيها شي بوجهه : تفهمين قمت
سهر من بعيد: تقول جدتي قوم صل صلاه الجمعه راحت عليك
منصور: زين زين "وسكر الباب بقوه "

" نزلت سهر بعد ماحست انه بيقووم ... وبعد نص ساعه نزل منصور وهو منرفز "

منصور يسلم على جده وجدته : صبااح الخير
الجده: صباح النور وش هالنوم يامنصور لاصلاه ولاديانه
منصور: بقووم انا بس راحت علي نوم
الجده : راحت عليك صلاه الجمعه كذا زين
منصور: لاحول ولاقوه بعد " ويلف على سهر" وانتي شغلك بعدين
سهر تضحك : أمي شووفيه يهددني
الجده : وشو له بعد
سهر: عشاني صحيته
الجده : منصووور
منصور: بالله عليك شفتي حد يصحي بهذي الطريقه بس انا اوريك فيها
سهر ضحكت : والله هي الي قالت لي
منصور: انتهينا الحين

" منصور قايم اليوم ومتنرفز وماله خلق "

الجده : كلمت امك ياسهر
سهر: أي امس دقت علي قبل لانام
الجده : ومتى بيتخرج اخوك
سهر: بكرا " وتبتسم "
الجده لمنصور: تبي فطور
منصور: لابشرب قهوه وتمر مالي نفس

" شوي ووصلت نجوى ومعها سلوومي .. سلمان راح لعمه منصور وقعد يلعبه "

منصور يبتسم لنجوى : مبروووك
نجوى بخجل: الله يبارك فييك
سهر: واخيرا بتجيبن لي بنت
نجوى تضحك : الله يسمع منك.. مو مثل غزل تقول يارب توينز
سهر تضحك : لاذي قوويه
منصور: لاميب قويه حنا عندنا ظاهره التوينز بالعايله مو بعيده عليها
سهر: يمكن بس ماحسها
منصور يبتسم : لاعاادي بس ان شاء الله مايطلعون مثلك ومثل سلطان
سهر: لييه ان شاء الله يابختهم والله
نجوى تضحك : المهم سهر الغدا اليوم بيتنا
سهر: من جدك
نجوى: ايه
سهر: طيب وجدي
الجده : انا بقعد معه
سهر: لاشلوون اتركك لحالك
الجده: لالا انا ماني برايحه روحوا ووسعي صدرك وانا هنا وبيوصلني غداي
نجوى: من جد ياسهر مو شي جديد

" سهر قامت وقعدت جنب جدها وصارت تسولف عليه لانه مايقدر يتكلم بس يطالع وقلبها يعورها عليه "

سهر: يبه اقرا علي

" الجد صار يهز راسه ويحرك فمه ويحركه وبس خلص نفخ عليها "

سهر تشققت وحضنته : فديييييييتك والله " وتناظرهم " يقرا علي يمه
منصور اول ماشاف جده حس قلبه عوره على جده : قومي قومي خل يقرا علي

الجد ابتسم وهو يناظرهم .. سهر قامت وقعد مكانها منصور وقرا عليه ومنصور على طول اول ماخلص باسه على راسه ويده وضمه

منصور: عسى الله لايحرمنا منك

"سهر دمعت عيونها "

منصور: يبه يبه ادعي اني اتزوج بدري

"الجد بس يهز راسه"

سهر تضحك : يبه وانا

منصور ضحك وطالعها: استحي يابنت
سهر تضحك : امززح
الجده : لييه كلكم عقبال ماتعرسون بيوم واحد
منصور يناظرها بقرف: مابقى الا هي
سهر ترد له النظره : انا اللي مابقى الا هي قلوا الاشكال
منصور يناظر الجده : شفتي يايمه يبغا لها تأديب

"الجده ضحكت"

نجوى: وانت يامنصور لاتخلي
منصور: ان شاء الله
سهر: مين بيكون فيه
نجوى: بس حنا وانتم
سهر: اهاا أي اوكي
منصور يناظر سهر: خلااص اجل اخليكم وتجهزي بمر عليك سامعه
نجوى: عاد لاتتأخرون
منصور: سلومي تقوم معي

"سلمان قام معه.. وطلعوا "

.
.
.
" في ايطـاليـا "

" صحت نجود .. وطلت على سرير فواز وشافته فاضي عرفت انه قام .. اللي ماتعرفونه ان لهذا اليوم نجود وفواز ماناموا مع بعض .. نجود رافضه هذي الفكره وفواز مسايرها دام انه معه اوكيه... واذا جات على النومه بيجي اليوم اللي بتنام معه غصب عنها .. دخلت واخذت لها دش وطلعت وهي لابسه وبعدها طلعت له"

نجود : صباح الخير
فواز: صباح النوور والسرور
نجود ابتسمت: افطرت عني
فواز ابتسم: هالمره ايه شسوي فيك ماصحيتي وماحبيت ازعجك
نجود ابتسمت: شفت متى نمنا امس وين اصحى بدري
فواز ضحك: نوم العوافي اهم شي ارتحتي
نجود ابتسمت: الله يعافيك اي الحمدالله
فواز: يلا عشان قومي عشان تفطرين ونطلع
نجود : اوكي

"طلعوا نجود وفواز.. افطرت نجود وشاركها فواز وبعدها طلعوا.. وكان عندهم يوم الاحد الاماكن اغلبها مسكره .. وقرروا يقضون يومهم بأنهم يمشون سير على اقدامهم يتجولون في روما .. وهم ماشيين وصلوا لعند فونتانا دي تريفي وهذي نافوره او مثل مايعتقدون انها نافوره الحظ.. الكل يجتمع هناك ويتمنى اللي يبي "

فواز : هنا ترمين قروش وتتمنين امنيه
نجود: وتتحقق
فواز يضحك : مدري عاد هذي تخريفات
نجود: يمكن صدق تتحقق خلني اسوي
فواز يضحك : من جدك مصدقه
نجود: نجرب وش خسرانين
فواز: الفلوس يجمعونها من هنا ويصرفونها على مشاريعهم
نجود تضحك : طيب طيب خلني ارمي
فواز: طيب وش بتتمنين
نجود نزلت راسها : مدري أي شي
فواز يرفع راسها : شلون أي شي.. عل حسب الامنيه بخليك ترمين
نجود تضحك : همممم " وبهباله " ان الهني موون يقضي على خير
فواز يضحك وقربها من عنده : ههههههههه عجبتني

" وبعّدها شوي عنه "

فواز : حبيبي حنا اللي نقرر شلون نقضي الهوني موون وبالطريقه اللي تعجبنا .. طبعا بعد الله

" نجود حست ان فواز يحبها او بالقليل يحن عليها ويبيها .."

نجود ابتسمت : ان شاء الله
فواز: للحين تبين تجربين
نجود ابتسمت : لااا خلااص من جد خرافات كلها مويه
فواز ابتسم لها: طاايب
نجود: فواز صورني هنا حلوه المناظر
فواز: اوكي

" اخذ الكام وصار يصورها وشوي هي تصوره "

فواز: مايصير نصور مع بعض
نجود تبتسم : الاا
فواز: مين يصورنا
نجود: حنا كذا ونمد الكاميرا ونصور
فواز يضحك : لاوع بتصير الصوره بخلي حد يصورنا هم عادي ماعندهم مانع
نجود ابتسمت : اي صح

فواز شاف عجوزتين يصورون بعض بش مو مرا كبار

فواز:
exuse me Can you picking up picture for us

العجوز بس شافته ابتسمت له بقوه وشهقت :
Of course

فواز:

Thanks

" اعطاها الكام وراح فواز جنب نجود ووقف جنبها .. نجود حست بشعور غريب وابتسموا للصوره"

العجوز :

1 2 3

" فواز ونجود انتظرها تصور.. بس العجوز وقفت "

العجوز تقلب بوجهها:

Why you are so rigid like this
" لمااذا انتم جامدين هكذا "

فواز ونجود ابتسموا ونجود هزت كتوفها بخجل

العجوز قربت منهم :
Are you new Couple

فواز ونجود هزوا راسهم

فواز :
Yup

العجوز:
Haaah Beautiful.. but you so Suitable for each other

" هااااه جمييل .. ولكنكم مناسبين لبعض "

فواز ابتسم لنجود :

Thank u

العجوز:

Again again

" وغمزت لهم "

" فواز حط يده على كتف نجود وقربها من عنده ونجود قلبها يتاسرع بدقاته حتى فواز .. والعجوز غمزت لهم واشرت انه تمام .. واخذت صوره وطلبت منهم صوره ثانيه كمان وبحركه غير .. لكن فواز هالمره قرب نجود بيده الثنيتن كأنه ضاغط عليها والعجوز عجبتها الحركه والتقطتها بسرعه ونجود وجهها منصدم وبس خلصت الصوره صار يضحك وهي تضحك بخجل .. وكمان طلبت منهم صوره نجود رفضت بس فواز قال عشان خاطرها ووقفوا جنب بعض بس ملصقين وجههم ببعض .. وبس عدت العجوز للثلاثه على طول باس فواز نجود بخدها ونجود شهقت والعجوز ضحكت وانجنت عليهم ونجود بس خلصت صارت تضربه بخفه وفواز يضحك .. اثاريه طلع ماهو بهين "

نجود تضحك لخجل : كذا زين فشلتنا
فواز ضحك وجاتهم العجوزه :
You Really wonderful

فواز ونجود:

Thank u

فواز :

Thanks honey alot

العجوز ابتسامه :

No problem

" وراحت العجوز "

فواز يضحك : نجود شوفي الصوره
نجود ابتسمت واول ماشافتها شهقت: هههههه فواز احذفها
فواز يبعد الكام عنها : لاوالله تجنن بالعكس
نجود تضحك: حق الترقه هاه
فواز يضحك : والله انها عجيبه
نجود تبتسم : طايب انا اوريك
فواز ضحك : طيب يلا نجود
نجود: وين
فواز: بنروح البحيره
نجود: اوكي

" وبعدها راحوا وكلموا على السايق الخاص فيهم عشان يوصلهم عند البحيره "

.
.
.
.
" مشـــــــــاري "

" بهذي اللحظات مشاري كان يسولف مع مشعل صديقه "

مشاري: اخاف يشك يامشعل
مشعل بعصبيه : ويشك مشاري حس على نفسك شوف حالك وين وصل .. وانت واقف لي مو قادر تسوي اي شي تبغاني اسأله
مشاري: لاا لاا لاتسأله
مشعل يأمره : اجل الحين تكلم وتتصل عليه وتخليه يشوف وش صار عليها
مشاري: وش دراه هو
مشعل: حبيبي ملفها بما انه موجود راح يعرفون وين هي تتعالج وحالها الحين يمكن هي للحين تراجع مع هذا المستشفى
مشاري: اي بس انت ماتدري لو كان ماعندهم اي خبر بنجلط ساعتها
مشعل: جرب مانت بخسران
مشاري ياخذ نفس : وش اقول له طيب
مشعل: روح وكلمه عادي بعدين قوله شخبار البنت اللي واللي وشوف وش يقولك واذا شافك مهتم بزياده قول له واللي فيها فيها. لعنبوها عيشه
مشاري متضايق حده : استغفر الله العظيم شكلك نسيت قوانين عايلتنا
مشعل: لا مانسيت بس هذا الشي مو بكيفهم .. واذا انك حبيت وحده وتبيها
مشاري: والمشكله ابوي اكثر واحد متشدد على هذي السالفه هذا اللي بيموتني
مشعل: شوف نايف رجال متفتح ومتفهم صدقني واذا قلت له ماراخ تخسر شي.. بالعكس هو رجال وفاهم وحنا شباب نفهم بعضنا
مشاري: على قولتك
مشعل: يلا
مشاري: لاموالحين بكلمه بالمسا
مشعل: اجل دق عليه واعطيه خبر عشا لاينشغل
مشاري: خلاااص
مشعل يأمره : قدامي

"مشاري ضحك وهو ماه خلق على صديقه اللي مافي احر منه.. كل شي يبيه بسرعه "

مشاري: الوو هلا نايف
نايف: هلا والله
مشاري: هلا شخبارك
نايف: الحمدالله وانت شخبارك وينك يارجال ماشفناك
مشاري ينصب: والله مشعل خويي عازمني على الغدا
نايف: اها على خير
مشاري: نايف وينك فيه
نايف تلعثم : انا الحين طالع مشوار
مشاري حس بشي : يعني اقدر اقابلك اليوم بالمسا
نايف: خير عسى ماشر
مشاري: مافيه الا الخير بس حاب نتعشا سوا اليوم او بالقليل نتقهوى مع بعض
نايف حس ان مشاري يبي يتكلم معه : خلاص ولا يهمك الساعه 8 ونص راح اكوون فاضي ان شاء الله
مشاري: خلاص سو راح الساعه 8 ونص دق علي ونتشاوف بمكان
نايف: على خير

" وسكروا من بعض "

.
.
.
" نــايف "

" نايف وقتها كان رايح مشوار ومشوار بعييد "

نايف" وين بيتهم هذا .. معقوله بأقصى الدمام وتجي يوميا للخبر ... بس وينه الحين بالضبط .. شلون انا اعرف بالقليل الاسم على الابواب .. لاحوول "

" نايف ... رسى على قرار.. انه بيروح لريم لبيتهم .. وبعد ماعرف كل شي عنها ووين ساكنه .. اتضح له انه ساكنه بالدمام وبضواحي الدمام بعد .. انلحس مخه على ماعرف شلون يوصل للطريق هذا غير التحويلات .. اول ماعرف وين بيتهم .. ارتعش قلبه ... معقوله هي عايشه هنا .. شلون تجي للمستشفى كل يوم وكم تستغرق على ماتجي .. انصدم نايف بعد ماشاف بيتهم .. مع انه كان ناوي يكلم اخوها بموضوعها بس شكله الحين تراجع .. "

نايف " مو معقوله بنت مثل ريم وعايشه حياه مثل هذي الحياه وبتخرب عليها فرصه شغلها في "....." بس مين ورا هالموضوع معقوله صديقتها الخبيثه ... ريم احوج منها بهذي الشغله .. شلون تسوي في صديقتها كذا .. يالله من جد لاتغرك المظاهر .. "

" شوي ويطلع رجال عجوز من بيتهم وقعد على العتبه اللي عند باب البيت .. ويطلع وراه ثلاث عيال في المدرسه يتراكظون وراه على الكوره .. نايف يوم شاف هذا المنظر حس كأنه بأيام اول .. قعد يناظر في الحياه هنا ,, وشلون ان المناظر تغر الواحد .. مع انه ريم من شخصيتها انعكس له حال وحده غير ... ماكأنها عايشه في هذي الضاحيه وهذي الخرابه .. نايف مع انه قرر ينسى موضوع طردها من وظيفتها .. الا انه ماهو قادر ينساها .. وكمان من بعد ماشاف حالها قرر يرجعها لوظيفتها لو ايش يكلفه .."

.
.
.
" في بيت بو فواز "

نجوى تشهق : نعـــــــــــــــم ......!!

" سهر اخترعت وانصدمت بنفس الوقت معقوله حتى نجوى بتفكر هذا التفكير ومنار بنفس الوقت "

غزل على طول قررت تهدي الوضع: شفيك ماصار شي

" نجوى صارت ترجف وقاعده تسب في بسمه .. بس قررت قدام سهر ماتبين شي .."

نجوى تغطي: لابس انا خفت صار على البنت شي كويس محمد انتبه لها

" منار وسهر ارتاحوا"

سهر: وانا قلت كذا ماتسوى عليها البنت تروح فيها بيوم زواج اختها
نجوى بقهر: اي صخ

" نجوى انقهرت اكثر ليه محمد ماقال لها "

" شوي ويدق جوال سهروكان منصور .. وبعد ماخلصت مكالمه"

سهر: يلا بنات عن اذنكم وماقصرتوا والله
منار وغزل: ويييييين
نجوى: وين ياسهر
سهر: برجع البيت منصور يقول لي اقعد جنب جدتي وغير كذا ابي اخلص بحث التخرج
نجوى: اووكي
غزل ومنار: سخيفه والله اقعدي وسويه باليل
سهر: منصور بيذبحني خلوني اروح واجيكم وقت ثاني

" بعد كذا طلعت سهر وراحت مع اخوها .. ومنار طلعت فوق بعد .."

منصور: انبسطتي
سهر: اي الحمدالله .. تصدق منصور.. يوم قلنا حق نجوى باللي صار مع بسمه ماسوت شي بس قالت انه كويس محمد كان جمبها ولا كان صار فيها شي
منصور: كل الناس فاهمه الا بنت عمك ذي
سهر تضحك : من جد

.

" نجوى قررت تسوي اللي في بالها "

غزل: وين
نجوى: بروح اريح شوي

" ومشت عنها .. طلعت فوق واخذت جوالها ودقت على نجلا.. قررت تقول لها كل شي ونجلا تتفاهم مع اختها .. بعد السلام وتبادل الاخبار نجوى بدت تقول لنجلا كل شي... ونجلا بعد ماسمعت الكلام انصدمت وبنفس الوقت عصبت على بسمه وتفشلت من نجوى "

نجلا: انا اوريك فيها
نجوى بخبث: انتي كلميها وفهميها بسمه لساتها صغيره خوذي اللي بخاطرها بلاول وفهميها مو تروحين وتهاوشينها على طوول
نجلا بنرفزه : خلاص خلاص انا اعرف شلون اتصرف معها اوكي يلا مع السلامه
نجوى: مع السلامه

نجوى" مافي غير اهلها يوقفونها عند حدها "

.
.
.

"بسمــه "


" بسمه وقتها كانت قاعد في المرسم .. قررت ترسم الللوحه وتكتب فيها ابياتها .. انتهت من رسم الخليف.. بس جا وقت انها تخط الكلام عليها .. واللي قطعها صوت تليفونها "

بسمه ابتسمت من شافت اختها تتصل عليها

بسمه : هلا والله وغلا
نجلا: هلا بسمه شخبارك
بسمه: الحمدالله انتي كيفك وكيف فصوولي
نجلا: والله كلهم بخير يسلمون عليك
بسمه: ورا ماجيتينا اليوم
نجلا: اهل زوجي مسوين غدا خبرك كل جمعه هنا ولازم اقعد
بسمه: اهاا
نجلا: وش اخبارك بدون نجود
بسمه: والله طفش وحشتني الدبا
نجلا تبتسم : شتسوين الحين
بسمه: قاعده ماعندي شي
نجلا: اهاا طيب بسمه
بسمه باهتمام : هلا
نجلا : بسألك سؤال
بسمه: تفضلي
نجلا: همم وش بينك وبين محمد زوج نجلا
بسمه شهقت ووقفت : نعـــــــــــــم ...!
نجلا: اللي سمعتيه
بسمه فهمت كل شي : اها يعني وصلك الخبر .. وصدقتي غزل وتخريفات اختها .. اوكي وجاي دوري .. مابيني وبينه شي .. بتصدقين
نجلا انصدمت من نبرتها : طبعا لا
بسمه انصدمت : نعــــــــــــم
نجلا: لان الكلام اللي وصلني يثبت يابسمه.. يابسمه انتي لسات
بسمه تصرخ: نجلا خلااااااااااااص لو سمحتي .. دامك مصدقه بكلامهم صدقي اخر همي زين .. واذا ناويه تقطعين مثلهم اقطعي وكمان اخر همي.. بس ذولا الاشكال انا اعرف كيف اتصرف معهم " وسكرت الخط وهي ترتجف ..."

" رمت كل شي بيدها وراحت تركض على غرفتها "

بسمه تعاتب نفسها " الكل الحين عرف .. الكل .. ماتوقعت بيوم بنكشف بهذي الطريقه .. معقوله العالم كلها حست الا هو ... يااربي وين اودي وجههي الحين .. بس لا المفروض انا ماسكت عنهم .. مو من حقهم يتهموني وهم مايعرفون بحقيقه مشاعري .. اي مالهم حق يحكموون علي .. مستحيل اشوه صورتي قدامهم مستحيييل ... "

" بسمه قعدت تبكي ومقهوره على هذا الاتهام .. صحيح انها تحبه وماتنكر بس الكل يقول انها تحبه وهي مانطقت ولاتكلمت فاعتبرته اتهام لها .. قررت توقف بوجههم كلهم واللي فيها فيها .. بس ماتخرب صورتها قدامهم .. "

.
.
.