ديـــــوان الامـــير عبدالعزيز بن سعود(السامر)

(عادات وســـلوم)




من يطلب العليا فلا يرخص السـوم
المجد ما هـو قسـمٍ نفـسٍ بخيلـه
للناس عاداتٍ مـع النـاس وسلـوم
يرقي بهـا الرجـال رأس الطويلـه
من قدم الحسنى والإحسـان معلـوم
ينـال مـن مـولاه كسـب النفيلـه
ومن قدم الحسنى على اللوم والشوم
عدله سبق عن ضيعة الـرأي ميلـه
ومن مات مسلم قالوا الناس مرحوم
شفيعـه محمـد وربــي كفيـلـه
ولو يرحم الظالم من الخلق مظلـوم
الوادي الممحل جـرى فيـه سيلـه
ما نال من شاور على حقه رخـوم
إلا مثل مـا نـال مـن هـد فيلـه
المجد يبغـي لـه شغاميـم وقـروم
يوفـون بحقـوق الزمـان الثقيلـه
بادت حضارة قيصر الفرس والروم
ولا بكتهـا عيـن خلـقٍ كحيـلـه
بالمنتحي ما ينفـع العـذل واللـوم
أطلب له الله واتركـه فـي سبيلـه
لابد مـا يذكـرك يـومٍ بعـد يـوم
ويحياج لك حاجة مصر فيض نيلـه
العز مـن بيـن المخاليـق مقسـوم
ويفوز به من طيـب رأسـه دليلـه
كم واحـدٍ وده بمجـدٍ مـع القـوم
وعيت صواديـف الدهـر تستويلـه
كم واحدٍ يحيا من الوقـت ملطـوم
لطـمٍ يشـاف ولطـم كبـدٍ غليلـه
وكم واحدٍ من نعمة العقل محـروم
ومالـه علـى ماقـدر الله حيـلـه
وكم واحدٍ يلقى به الكبـر والـزوم
مجدٍ علـى رأسـه يعـود فشيلـه
وكم واحدٍ يمشي مع الناس منجـوم
وهو من رجال الحسـب والفضيلـه
مادامت الدنيـا لحـد دايـم الـدوم
تجدي عن الغايـات خيـل الوسيلـه
أطـلال دارٍ فوقهـا يلعـي البـوم
الله مـن يـومٍ زهـت بـه وليلـه
ظرفٍ على ما فيه بالختـم مختـوم
الله مـن عيـنٍ وعـيـنٍ تخيـلـه
متعلـقٍ بيـن السمـاوات ونجـوم
سبع الأراضـي كلهـا مـا تشيلـه
ما يشرب إلا من جبابيـر مسمـوم
تشـوف نـاره فـوق رأس الفتيلـه
يدري بها اللي عن سما الديد مفطوم
ويجهل به اللي عًن للعـرف خيلـه
ما هوب ضربٍ من ضلالات ووهوم
وافٍ علـى مـا قـدر الله كيـلـه
والهقوه اللي مالها جنـب وعـزوم
تطيـح دونـه حيـلـةٍ مستحيـلـه
وحرصٍ تحرص به يفكك من الحوم
حولك من اللي يحسب البعـد عيلـه
لا والذي تسجد له الخلـق وتصـوم
ولرضاه بيتـه والمقـام تعنـي لـه
أن الوفا له بالعـرب حـد ورسـوم
عند الذي يظفـر بكسـب الجميلـه
وروضٍ ينوج بريح شيحٍ وقيصـوم
له نظـرةٍ تشـف النفـوس العليلـه
أكثر عيون الخلق مـا تقبـل النـوم
يشكـون هـم دقاقهـا والجليـلـه