رواية وين برمي ها الجسد وانساه

الجزء الثالث عشر ..

ببيت أهل شهد ..

راح صوتها ودموعها جفت من البكا ..كل جزء بجسمها يتألم ..يبكي .. حست بنفسها وهي وين ..
وقفت وناظرت بالبيت طرت عليها ذكريات كثيرة .. ناظرت كل شي حولها بس ظلام ..مافيه غير نور الانور الامامية للسيارة خلاها سواقها شغاله ..
ماري: ماما شهد ظلام ..
شهد: الليلة راح نبات هنا وبكرة راح اسدد الفاتورة أو اشوف سالفتها..
ماري: هنا ..
شهد: لو في السيارة ..
نور الدين: ماما بات هنا وأنا برآ..
شهد: وين تجي عيني النوم .. وين بس..
.
.
.
ببيت أبو عبدالله ..
كان عبدالله يصارخ ..: أنت عم .. أنت ظلمت شهد .. ظلمتها .. الحياة وأنت موجود صعبه جدا.. مستحيل لي جلسة ببيتك .. تطرد بنت أخوك ومرة ولدك ويتيمه لاأخو ولاسند وعمي عناد مسافر..الحين وين راحت..جدتي مهيب عندها وبيت أهل أمها مهيب موجودة .. وين راحت ؟ وجن دقيتي على ريما ؟
وجن كانت تسكت ولدها اللي يبكي لانها تبكي وعبدالله صوته عالي..: مهيب عندها..
عبدالله كان راح ينجن: وين راحت أجل ..
امه: عبدالله اجلس واهدى..
عبدالله: يمه اجلس وين اجلس .. عارفه المصيبه زوجتي ميب بالبيت..
أبوه : أنت ماعرفت زوجتك وش سوت .. موتت ضناك ..
عبدالله: مهيب شهد اللي تسوي تسذا.. فهمتيني يبه مهيب شهد ..
ضاق تنفسه وطاح من طوله ..ركض متعب وشاله وحطه على أقرب كنبه ..
أم عبدالله : يمممه ولدي..
كان يناظرهم بغير وعي منهم .. فك متعب الازرار لثوب عبدالله ..:عبدالله وين بخاخ الربو ..
مادر طلع متعب بسرعة لشقه أخوه ولقى الباب مفتوح دخل وقعد يدور وتالي لقى ونزل بسرعة ..
قعد يعطي أخوه عشان تتوسع الشعب الهوائية ..
أبوه كان خايف عليه ..
قام عبدالله ..
أبوه: اجلس..
عبدالله : لو فيه أحترام لي شوي ماكان طردت زوجتي اللي قبل ماتصير زوجتي بنت أخوك .. أنا مصدوم شلون سويت لها كل هذا.. هي مرة قالت لي عمي عندي شي له وقلت لها أبوي يحبك ويغليك .. الحين أنا بسألك ..شفيك عليها ..
أبوه: يعني موتت ضناك وتسألني ..
عبدالله: واللي خلق سبع وطمن سبع ياشهد وأنا متأكد مالها يد بالسالفة..
مشى الين الباب وبنظرة: ولو لها يد فـ أنا أقولك يفداها الضنا وكل من يتمنى الضنا ..
طلع وطلع معه متعب..
امه: لو صار لولدي شي ماراح أسامحك ..
برآ..
عبدالله : وين راحت ..
متعب كان متأزم وماهو قادر يتكلم..
عبدالله: أبعرف أبوي وين عقله لما يطرد بنت أخوه عرضة شرفه برآ البيت وين بس..
سكت عبدالله شوي : حتى السواق مايرد..
متعب: عبدالله اذكر الله .. ان شاء الله مهوب صاير الاكل خير..
عبدالله يناظر أخوه: متعب زوجتي انطردت من البيت .. ومين طردها أبوي وعمها بنفس الوقت.. الحين مدري وينها.. مستوعب معي هالشي..
متعب: تراها بنت عمي وأختي ومحروق قلبي بس عبدالله وش في يدينا.. المشكلة حتى شقة عمي عناد مهيب فيها..
حط عبدالله يدينه على وجهه من الهم والكرب اللي هو فيه ..
.
.
.
ببيت أهل شهد ..
دق الجرس الخارجي.. خافت شهد ..
شهد: نور الدين تقدر تفتح ..
نور الدين: ايو ماما..
شهد: لاتفتح باب الخاص بدخول السيارات .. افتح الباب الثاني ..
عطت ماري المفتاح عشان تعطية ..
قام وفتح الباب الخارجي الصغير للفيلا ..
كان جاره ..
نور الدين: ايس يبغى..
أبو فارس: أنا أبو فارس.. أصحاب هالبيت توفوا الله يرحمهم .. ولاخبرت أن الورثة باعوا البيت .. مين أنتم..
نور الدين: ماما شهد هنا..
أبو فارس :شهد بنت فهد ..
هز نور الدين راسه ..
أبو فارس: وينها ؟ والكهرباء طافية ورى..
نورالدين: مافي كهرباء..
أبو فارس طلع وجاب أم فارس ..
دخلت أم فارس وشافت شهد وبكت .. لان شهد كبرت وتغيرت والحين متزوجة عهدها فيها لما كانت صغيرة وهم وأهلها كانوا جيران وبينهم صلة جدا وثيقة ..
أم فارس: تعالي معي للبيت..
شهد: لاخالتي ..
أم فارس: أجل تجلسين هنا.. بكرة عمك أبو فارس يروح ويشوف سالفه الكهرباء وننظف البيت.. لاكن تجلسين هنا .. لا .. امشي ياشهد معي الله يرضى عليك.. ماتدرين أنك من غالية من غلا أمك الله يرحمها..
شهد: الله يرحمها..
أم فارس: أجل امشي معي.. وبعدين أنتي بنتي وبغلاتهم .. ولاتخافين مابه غير أخوانك فارس وفهاد .. و يزيد ماتتغطين منه بعده صغير بالابتدائي ..
استغربت شهد كلمة أخوانك ..
أم فارس: مشينا..
شهد: بس خالتي مقدر ..
أم فارس: وحده ماتقدر تبات عند أهلها .. شهد أنتي بنتي ..
اضطرت شهد تمشي معها ..:طيب ونور الدين وماري..
أم فارس: معنا .. نور الدين مع السواق بيجلس .. وماري مع الشغالة ..
ناظرت شهد ماري: يله ماري .. خلي الشنطة الكبيرة هنا بكرآ راح نرجع بأذن الله ..
طلعت مع أم فارس وكان نور الدين برآ مع أبو فارس..
دخلوا لبيت أم فارس ..
أم فارس ..:تعالي ياشهد ..
جلستها ودخلت ..شوي الابدخله بنات أم فارس..
قامت شهد سلمت عليهم ..
أم فارس: ذولاي بشرى و وهديل وهذي آخر العنقود رنيم توها بالروضة ..
جلست بحضن شهد .. ودخلت جو مع البنات وجلسوا يسولفون..
بشرى : ياحظك خلصتي دراسة ..
هديل : آآآآآآآآآآآآه يازين النومة الصبح ..
شهد ابتسمت: الحين أنا اشتغل ..
بشرى: مفروض تريحين ..
شهد: ماأحب .. لازم شي يشغل وقتي ..
بشرى : بصراحه أنك شي..
ابتسمت شهد ..
رنيم حطت يدها على خد شهد: آآآآوه مين ضربك ..ماما شوفي خدها احمر..
أم فارس انحرجت من بنتها .. وبشرى وهديل انحرجوا حيل ..
شهد: طحت ..
أم فارس: معليه يابنتي بس هالبنت عندي ملقوفة ..
شهد: لا عاااتي ياخالتي..
أم فارس : جاو المملايح ..
قامت أم فارس..
بشرى: هذولاي أخواني التوأم فارس وفهاد ..
شهد: اها..
دخل يزيد ..قرب لـ شهد وسلم عليها..
بالصاله ..
فارس: أوما أختنا من الرضاعة .. وينها ؟
فهاد: هذيك اللي تقولين لنا عنها من زمان ..
أمهم : ايه ..اعقلوا أختكم باين عليها تعبانة ومرهقة ..
فارس: ياوناااااسة بس.. غريبة جات .. ووين كانت..
أمه: ياعمري عليها بس.. يله تسبحوا ولاتبطون ..
دخلت أم فارس للصالة ..
وشهد كانت حيل مستغربة من الكلام اللي يقولونه لها البنات : خالتي أنا عندي اخوان من الرضاعة ..
أم فارس استغربت أكثر: ماتدرين ..
شهد: لاحشا ..توني هاللحظه ادري..
أم فارس: غريبة ماقالت لتس جدتك .. لانها تدري كلهم جداتك يدرون وعمك أبو عبدالله الظاهر هو الكبير..المشكلة أني ماشفتك من بعد ماتوفى أبوك وذاك الوقت كنتي صغيرة ولاتدرين أن كان عندك أخوان .. فقدتك لانك بنتي ودور أبو فارس أعمامك بس مالقينا حس ولاخبر..وعمك أبو عبدالله وأبو ناصر هم اللي يدرون عن السالفه وكذبونا لما قلنا لهم ومن حينها ماعاد شفناهم ..
شهد رجعت اللمعه لعيونها: ليه ماقالوا لي ..ليه حرموني من شعور الاخوة طول هالسنين ..
أم فارس جلست جنبها: ياضناي أنتي.. لاتبكين .. أخوانك الحين بيجون وعمك أبو فارس بيجي ....
دخل أبو فارس وحطت شهد الشيلة على راسها وسلمت عليه..
أبو فارس: كيفك يابوك ..
ياااااها من زمان ماسمعت هالكلمه كيف يابوك ونطقها بحنان أبوه..:الحمدلله .. أنت كيفك ..
أبو فارس: الحمدلله .. لك الله يوم شفتك كأني شفت فهد الله يرحمه ..
قام :البيت بيتك .. أنتي بنتي وغلاتك تساوي غلا أخوانك وخواتك..
شهد: جعلك تسلم..
طلع..شوي الابدخله فارس وفهاد..
سلموا عليها وكانوا منحرجين وشهد أكثر..
فهاد جرئي قام جلس جنبها: حي الله أختي الغالية..مابغينا نشوفك..
حمر وجهها..
أمهم: شهد بخليك مع أخوانك والله يعينك على البثارة ..
طلعت امهم .. وتجمعوا حولها أخوان حست بفرحة برغم أنها بقمه حزنها وألمها وقهرها ..شعور حلو أن عندها أخوان عزوة سند حمية.. دخلت معهم جو خاصة أنهم منسمين وهسترة وسوالف ..
.
.
.
كان عبدالله مع أخوه متعب ..
عبدالله : وين راحت ..
متعب: أنا متأكد أنها بخير ان شاء الله ..
جا مسج على جوال عبدالله ..وكان من شهد( أنا بخير ولاتخاف علي)
عبدالله وقف وهو يقرأ المسج: هذي شهد تقول أنها بخير ولاأخاف عليها..
متعب: قلت لك .. طيب وينها؟
عبدالله: ماقالت ..
دق عليها بس جوالها مغلق..
عبدالله رمى الجوال وهو معصب: ليه ماتردين حرام عليك ..
شال متعب الجوال اللي تناثر ..:اذكر الله .. اهم شي أنها بخير..
عبدالله : بخير وأنا مدري وينها ..
متعب: صدقني بخير دامها ارسلت لك .. عطني رقمها وبدق عليها..
عطاه متعب جواله ودق عبدالله .. :شفت مغلق ..
.
.
.
ببيت أبو طلال..
غرفة سارة ..
سارة : العنود حرام عليك من جيتي وأنتي تبكين.. مستحيل تكونين أنتي العنود ..
العنود : سارة هذا أبوي وقاعد يظلم شهد .. والظلم مهوب زين ..وربي حذر ونهى عن ظلم اليتيم .. لوتشوفينها ..
رجعت دخلت بنوبة بكا .. ضمتها سارة وقعدت تهديها ..
دق الباب ودخل زياد..
زياد: أفا عنودتي .. يعني أنا جبتك لـ سارة عشان ترجعين تبكين ..
جلس جنبها وأخذها من سارة وقعد يمسح دموعها ويكلمها ..
العنود: محد حاس فيني ..
زياد: لا حاس فيك.. أنتي مقهورة على شهد .. وخايفة على عمي من الظلم.. فاهمك وترى شهد بنت عمي وأختي ولاارضى عليها .. وتوني كلمت عبدالله ويقول ارسلت له مسج وتقول أنها بخير ..
العنود: صدق .. طيب وينها ؟ وليه ماترد على الجوال..
زياد يبعد شعر العنود عند وجهها :مدري.. بس المهم أنها بخير..
سارة: يالله ..
قام زياد: بخليك الليلة تنامين مع سارة بس ها (قالها وهو مبتسم) ترى الليلة بس ..
العنود ابتسمت غصب ..
زياد :سوير غطي على عيونك بسرعة ..
سارة : يؤ يؤ لاتخربوني ..
زياد غطى على عيون أخته وباس العنود و طلع..
سارة: يالبييييييييييييييييييييية متى راح اتزوج بس..
العنود : لو جا لك واحد زي أخوك راح تكرهين عمرك خاصة أنك حلوه..
سارة: هع هع أدري.. وش مسوي أخوي؟
العنود: بقوم ابدل وتالي اقول لتس..
سارة: وه فديتس .. أحبتس..
العنود:خخخخخخ .. أموت فيتس ..
.
.
.
اليوم الثاني ..
بببيت أبو فارس..
كانت شهد جالسة وعينها ماجاتها النوم وراسها راح ينفجر ..
دخلت ام فارس :شهد مانمتي..
شهد: مافيني خالتي نومي..
جلست جنبها : قولي يمه .. أنا أمك ..
ماتحملت شهد ودمعت عيونها بسرعة : يااااه هالكلمة وحشتني كثير ..
أم فارس بحنان: ياضناي .. لاتناديني الا يمه .. لانك بنتي وغلاك والله أنها بـغلا أخوانك فارس وفهاد ..
جلست هديل: وأنا ماتحبيني يمه..
ضحكت شهد ..
أم فارس: بسم الله علينا.. مابعد خمدتي..
هديل جلست: نهيي ..
أم فارس: قومي ياشهد الحين أبوك بيجي من المسجد .. وبروح اصحي اخوانك فهاد وفارس يصلون الفجر عجزت يقومون يصلون الفجر..
شهد: عنك يمه أنا بصحيهم ..
ابتسمت امها بحب : خلاص .. ان شاء الله يستحون ويقومون ..
ابتسمت شهد ..
هديل: قومي خل نهبل فيهم شوي..
قامت معها شهد ..
بغرفتهم ..
شهد: لاحرام ..
هديل: عشانك بس والا الموية الباردة راح تسوي مصيبه فيهم .. شوفي الغبي فهاد شلون نايم ..
ضحكت شهد من قلبها على نومته ..
قربت وهي تصحيهم ..
جلس فارس وهو يحك شعره : شهوده ..
شهد :ايه .. قوم صلي الفجر..
قبل مايقوم شات برجله فهاد اللي جلس وهو يسب فارس..
شهد: هههههههه ..صباحك سكرر..
ابتسم ..: صباحي أنتتتتتتي.. يافديتك أنتي يانور عيون أخوك ..
شهد استحت ..
فهاد قام : افا .. افا .. لاتستحين .. تراي أخوك ..
طالع في هديل وضربها على اخر راسها: شوفي الحيا والذاربة مهوب أنتي..
هديل : انقلع بس روح صلي ..
فارس : انقلعي قبل..
هديل : آآآآآآآآآآه اسكت اسكت مع كدشك بس .. مالت بس..
سحبت شهد معها هديل وطلعت..
هديل حطت يدينها على اكتاف شهد: يازينك .. ونااااااااااسه أني عندي اخت غير هالجحلط..
شهد : يهبلون .. تدرين مرآ وناسه .. تخيلي تكونين وحيدة ويطلع عندك أخوان وخوات ..
هديل: ياعمري ..
دخلوا للمطبخ ..وساعدت شهد ام فارس يالقهوة (طبعا معروفة قهوة الصباح وتكون بعد الفجر عندنا بالسعودية وهي تقريبا في أغلب العائلات)
جلسوا يسولفون الين اشرقت الشمس .. وتالي راح ابو فارس لشركة الكهرباء..
فتحت شهد جوالها ولقت مكالمات كثيرة حيل..
دق عبدالله ..
قامت شهد :هلآ..
عبدالله بصوت مخنوق ولهفه: وينك ؟
شهد: أنا بخير..
عبدالله: شهد وينك ..
شهد: عبدالله ..
عبدالله : ياام وأبو وضنا وروح وكل شي لـ عبدالله .. ليه تركتيني؟
شهد: مهو أنا تركتك.. عبدالله أكيد وصلك اللي صار..
عبدالله: ايه ..
شهد: ليه سوى عمي تسذا؟
عبدالله : يقول كلام كثير.. وكله من تحت راسي المسماه عمتي وأنفال..
شهد: عمتي حصة..
عبدالله: هذي لاتقولين لها عمه.. لان ماتستاهل الاحترام .. أنتي وينك؟
شهد: أنا عند أمي وأبوي ..
انصدم عبدالله .. خاف يكون صار لها شي..
شهد ابتسمت: عبدالله (شهقت) عندي اخوان .. ماصرت وحيدة ..
عبدالله: شهد فيك شي..
شهد تبكي: اخواني اسمهم فارس وفهاد وعندي اخو صغير يزيد.. وعندي خوات.. يااااه عبدالله ..
عبدالله :شهد .. وينك ؟ قولي الحين وينك ؟
شهد: أنا .. عندهم..
عبدالله: وينهم ؟
طفى جوال شهد لان مافيه شحن ..
استحت شهد تقول تبي شاحن .. وسكتت..
عبدالله حس أنه راح يجن .. كلام شهد بالنسبة كلام كله الغاز وخاف يكون صار لها شي..
.
.
.