ديوان الشاعرة / ينابيع السبيعي

"صفحة حياتي"

زهمت من جن الشعر كل مجنون
ولامن زهمت الحرف اقبل وجاني

يوم حضروا غنيتها عدة الحون
بحروف شعر شكلت لون ثاني

قطفت من روض المعاني كذا لون
روض عبيره ريحته زعفراني

هيجنت بحروفي من احساس مطعون
ونظمتها من خاطر مرحباني

كتبت حرفي والمعاني على نون
من هاجس يصهل صهيل الحصاني

وناديت باعلى الصوت ياشمعة الكون
ياللي بصدق الذات مثلي تعاني

ياللي سكنت بداخل القلب وعيون
يفداك مع نبض القوافي حناني

انت الذي بالكون تأمر وممنون
لا يابعد من غبت عنه ونساني

هذا أنا كلي مضامين وفنون
والشعر باسمك لازهمته لفاني

ماهمني لو كلبوهم يقولون
ماهمني بالناس قاصي وداني

أشوم بحروفي عن الذل والهون
من فضل ربي مارضيت الهواني

يحلها اللي عالم كل مكنون
اللي بفضله عشت مرفوع شأني

أهيم بحروف الشعر لو يعذلون
اصدق حروف صغتها في زماني

هاجس خيالي يرسم الشكل واللون
وبصمة أبهامي حلمي الارجواني

الصدق طبعي والوفا درب مسنون
والعز ساسي والمهآبه مكاني

صفحة حياتي مابها شك وظنون
مثل الوضوح محمل بالتهاني

والشاعر اللي لاحت بعينه مزون
جته المعاني صادقه من معاني

ماكل حرف ينكتب فيه مضمون
ولاكل هاجس يستثير الاماني

ماكل مظلوم به الناس يدرون
ولاكل صرخه تحتجب بالمحاني

يوم القصايد بين عاقل ومجنون
أسمى المبادي راسخه في كياني

انا عزايه بين الاضلاع مرهون
عهد قطعته مانطق به لساني

واصدق حروفي ترجمت كل مضمون
لو تصدق اللحظات لحظة ثواني