رواايــه حقكـ علي ان كنـت زعلان-قمـه الرووووعهـ-

*****
(في بيت أبوصالح..)
,,في غرفة أثير..
,,,بعد يوم مليئ بالأحداث..
كانت قاعده على طرف السرير وهي قمه بالجمال والنعومه ومصدومه وترتجف وخايفه وتفرك إيدينها ببعض.. وبحالة بكاء شديدة..
فتح صالح الباب بهدوء ,, وقرب منها وجلس جنبها وحط يده على كتفها..
صالح: أثيــــر..خلاص..من يوم ماطلعنا من القاعه وركبتي السياره وانتي تبكين ومنهاره..كل هذا حب بأبرار؟؟
,,أثير ماترد ومستمره تبكي..
صالح:خلاص يا أثير..
إنتي المفروض تدعينلها بالتوفيق وإن الله يسعدها ويرزقها الذريه الصالحه..
وبعدين لاتخافين..فراس إبن حلال وإنسان مستقيم وملتزم وبيحطها بعيونه..
بالعكس هو اللي الله يعينه عليها..
,,حطت أثير إيدينها على وجهها وانهارت تبكي وهي تقول بنفسها:
يااللـــــــه ياصالح..موحاسس بالمصيبه اللي بتطيح على روسنا..
,,قرب صالح من أثير وشال إيدينها من على وجهها وقال:
خلاص..قومي شيلي هالمكياج وغيري فستانك.. وارتاحي شوي..
***
****
*****
(في بيت أم عبدالرحمن..)
,,بغرفة منى..
كان عبدالرحمن نايم على السرير ومعطي زوجته ظهره..
ويتنهد بكل ألم.. وشايل هموم الدنيا كلها على راسه..
حست منى إن عبدالرحمن مانام ولسه صاحي.. قربت منه بهدوء وحطت يدها عليه..
منى: عبدالرحمن..مانمت؟؟
عبدالرحمن وهويتنهد: من وين يجيني النوم..وبنتي أسيل هذي حالتها؟؟
منى:عبدالرحمن.. وبعدين إحنا بنقعد كذا ساكتين والبنت كل مال حالتها تتدهور..
لادراسه ولازواج ولانفسيه زينه.. يكفي هالترم والترم اللي فات ضاعوا عليها عشان هالزواج..على أمل إنها تكمل دراستها بأسبانيا..
عبدالرحمن: وش أسوي..
هذا أنا قاعد أوديها عند الشيخ اللي يقرأ عليها بانتظام..
ووديتها عند دكتور نفسي.. وكلامهم واحد مايتغير..هاللي في البنت عين قويه مواضطراب نفسي..
قسمآ بالله إن تفكيري إنشل موقادر أفكر إلا فيها..سرت لا أشتغل زي الناس ولا أقعد مع خلق الله..طول الوقت بالي مشغول..
لكن الظاهر مافي إلا حل واحد.. نخلي معاذ يطلقها..
منى:لا ياعبدالرحمن لاتستعجل حرام نخرب حياتهم وهي لسه ما ابتدت..
الولد ماصدر منه إلا كل خير..يحبها وبينجن عليها وكلنا ملاحظين..
حتى أسيل ياعبدالرحمن اعترفت إنها تحبه زي ماهويحبها.. ولاعمره ضايقها أو كدر خاطرها.. بس تقول لاشافته تحس نفسها بتموت وينقلب هالحب اللي بقلبها لكره..
عبدالرحمن: يعني شالسواه..
منى:سواة الله أبرك إحنا نصبر.. وانشالله تتحسن حالتها..
***
****
*****
((في شقـة فراس...))
,,كانت جالسه على طرف الكنبه وعيونها مليانه دموع ومي مصدقه الوضع اللي هي فيه..
,,مشى بهدوء وفصخ بشته وفرش سجادته وصلى ركعتين..
وبعدين قرب منها وحط يده على راسها وقال:
اللهم إني أسألك خير مافيها... وخير ماجبلت عليه..
وأعوذ بك من شرمافيها... وشر ماجبلت عليه..
,,,وباس جبينها ومسك يدها وجلس جنبها..
فراس:مبروك يا أبرار..
,,أبرار ساكته وترتجف وماسكه بين إيدينها مسكة الورد بأقوى ماعندها..
فراس: مصممه ماتسمعيني صوتك... يللاه مومشكله..
إشرايك تقومين تغيرين ملابسك.. وتجين عشان نتعشى...
,,أبرار على نفس الوضع..
حس فراس بتوتر أبرار الزايد وخوفها..وحب إنه يهديها..
مد يده بكل براءه ومسك كتفها بكل حنيه.. لكن أبرار ارتجفت ونفضت يده وبعدتها عن كتفها..
,,استغرب فراس وبلع ريقه وقال:
أبرار.. حبيبتي إهدي... خلاص قومي غيري فستانك وتعالي نتعشى..
أبرار بصوت مرتجف: مابي أتعشى..
فراس:بس أنا جوعان أهون عليك آكل لحالي؟؟
أبرار: فراس مابي آكل شي..
فراس: خلاص مومشكله إنتي روحي غيري وإذا جيتي يسير خير..
,,مشت أبرار ودخلت لداخل وهي ترتجف ومومصدقه إنها خلاص تزوجت فراس..
وميته خوف من اللي بيسير...
,,,,
,,,,
بعد مرور قرابة النص ساعه..
كان فراس قاعد بغرفة التلفزيون.. وحاط على طاولة التقديم صحون العشاء وحاط إيده على خده..
فراس:إنا لله هذي وينهي..
,,قام فراس وتوجه لغرفة النوم..
أول مادخل الغرفه إنصدم فراس..كانت أبرار نايمه عالسرير ومتلحفه..
ومعطيه ظهرها الباب ومغمضه عيونها بشده..
فراس: أبرااار.. الله يهديك نمتي..
الحين أنا قاعد يدي على خدي أستناك.. تروحين تغيرين فستانك..
وتنــــامين..
,,أبرار ماترد وترتجف ومغمضه عيونها بقوه..
فراس برجاء:يابنت الناس وشفيك خايفه مني...
والله ما أسوي فيك شي.. بس قومي تعشي وسولفي معي شوي..
,,,أبرار على حالها..
فراس: خلاص مومشكله..
اليوم براعيك وأخليك تنامين..
لكن بكره إنشالله إنك تسيرين أحسن وتجلسين معي وتسولفين..
طيب ياأبرار..خلاص اتفقنا..
,,,ويطلع فراس ويترك أبرار خايفه ومنهاره.. وتدعي على نفسها..
ومنتظره اللحظه الحاسمه للمصيبه اللي هي فيها....
***
****
*****
(في بيت أم عبدالرحمن..)
,,بغرفة أسيل...
أسماء: تكفين أسيـــل..
أسيل وعيونها مقفله:أسماء الله يخليك إطلعي وصكي اللمبه..والله مالي خلق..
أسماء:أسيل.. خلنا نروح نسهر مع عمتي رهف..
هي بعد ماعشت مشاري وقعدت شوي معاه إلين نام..طلعت فوق غرفتها وقالتلي تعالي عندي إنتي وأسيل إسهروا وسولفوا معي شوي..
أسيل: إسهري لحالك...ماأبي أشوف أحد..ابي أنام وبس..
,,تنهدت أسماء وطالعت بأسيل وقالت بنفسها:
مومعقول هذي أسيل..
تغيرت سايره إنسانه ثانيه...
,,وتقوم أسماء وتطفي اللمبات وتسكر الباب وتتوجه لغرفة رهف..
,,
,,دقت أسماء الباب..لكنها مالقت أي رد..
أسماء:معقوله رهف نامت؟؟
بس هي قالت ما رح أنام وبستناكم نسهر سوا..
,,رجعت دقت أسماء الباب وبهاللحظه فتحت رهف الباب..
أسماء بخوف:رهـــــف..
,,كانت رهف وجهها أحمر ودموعها مليه وجهها..
وأول مافتحت الباب طاحت عند عتبة الباب..
أسماء وهي تحاول تسند رهف وتقومها:
رهف وشفيــــــك؟؟
رهف وهي تتنفس بصعوبه وتبكي:
أسمـــــاء..الحقيني..نادي عمتي لطيفه..بمووووووت...
,,وتترك أسماء رهف مكان ماهي وتروح تنادي أمها وجدتها..
,,فزت لطيفة من نومها على صراخ أسماء,,وراحت بسرعه عند رهف ولحقتها منى..
لطيفه وهي تحط راس رهف على صدرها:
رهف.. وشفيك يمه..وشتحسين فيه..
رهف:الحقيني ياعمه بمووت..بمووت..تقلصات ذبحتني..موقادره استحملها..
منى:بسم الله عليك يارهف...عمه الظاهر إنها تبي تولـــد..
لطيفه:تولد وهي لسه بالثــــــــامن..
بسرعه يامنى..سنديها معي ونادي عبدالرحمن عشان نوديها المستشفى..
منى: طيب..
لطيفه: وانتي يا أسماء... انتبهوا لاحد منكم يصحي مشاري ويقوله..
خلوه إلين يصحى الظهر وأنا بكون فيه وأقوله..
أسماء: انشالله ياجده..
,,,ويجهز عبدالرحمن السياره وينطلقون للمستشفى..
***
****
*****
,,بالمستشفى..
,,,,الساعه 1 الفجر..
لطيفه: ها يا دكتوره بشري..
الدكتوره:هي من متى تحس بهالآلام هذي؟؟
لطيفه: والله يادكتوره إني مادري..ليه حالتها خطيره؟؟
الدكتوره: لاانشالله موخطيره..
بس الرحم عندها مفتوح ثلاثه سانتي..
بنعطيها فرصه ووقت يمكن تولد طبيعي.. إذا ماولدت طبيعي بنولدها قيصري..
,,الدكتوره تلتفت لعبدالرحمن وتقول: حضرتك زوجها؟؟
عبدالرحمن:لأ..أنا أخو زوجها وهذي أمي..
الدكتوره باستغراب:أجل وين زوجها؟؟ في إجراءات وأوراق لازم يوقع عليها..
لطيفه:زوجها سايرله حادث وماقدر يجيبها ...لكن بكره انشالله إذا قدر بيجي..
الدكتوره: الله يعطيكم العافيه وجوده ضروري..لازم على ولادتها يكون موجود..
وبالنسبه لكم تقدرون ترجعون البيت وترتاحون لأنه الوقت تأخر والظاهر بتطول إلين تولد وحرام نسهركم..وانشالله إذا ولدت بندق عليكم ونبشركم..
لطيفه: لا مانيبراجعه أبقعد عندها إلين تولد..
عبدالرحمن:يمه الله يهديك جلستك بالمستشفى مالها فايده وتعرفين جلسة المستشفيات إشلون متعبه.. وضروري ترجعين البيت عشان إذا صحى مشاري تكونين قدامه وتقولين له الخبر بنفسك..
لطيفه بعد ما اقتنعت بكلام عبدالرحمن: طيب دكتوره أبي أشوفها قبل ما أروح عشان أتطمن عليها وأطمنها..
الدكتوره: أكيد..تفضلي مع الممرضه وبتوديك الغرفه عندها..
,,,
,,,
,,كانت رهف متمدده عالسرير وميته خوف وتتنفس بصعوبه شديده ووجهها يتلوى من الألم وكل شوي تعض شفتها وتتأوه..
ويدها فيها مغذي ..حطوا لها الممرضات في محلول المغذي طلق صناعي عشان يساعدها ويعجل بالولاده..
,,دخلت لطيفه على رهف اللي كانت مغمضه عيونها وتتأوه..وناظرتلها بكل رحمه..
لطيفه وهي تقرب لرهف وتمسح على راسها بحنان:
رهف..
,,شهقت رهف وفتحت عيونها وأول ماشافت لطيفه إنهارت وبكت..
لطيفه:بسم الله عليك..لاتبكين يارهف..
يللاه شدي حيلك وتشجعي وأولدي وقوميلنا بالسلامه..
رهف وهي تبكي:عمــــه..بموت..
لطيفه:بسم الله عليك..رهف لاتجيبين سيرة الموت..
لاانتي أول وحده ولا آخر وحده تولد.. وكل الحريم هذي حالتهم..
رهف: تكفين ياعمه إدعيلي..
لطيفه:الله يقومك بالسلامه يارهف..لاتخافين..لاتخافين..
شوفي وانا أمك.. عبدالرحمن يقول نرجع البيت..لكني خلاص أبقعد معك إلين تولدين..
رهف:لا والله ياعمه.. والله لترجعين البيت وترتاحين..
[وتغمض عيونها] أنا شكلي مطوله..
لطيفه: لاخليني أجلس معك..
رهف:عمه تكفين..ما أبي أتعبك معي إرجعي البيت وارتاحي..
لطيفه: خلاص...أنا برجع البيت لأني أبي أكون جنب مشاري لاقام من نومه..
بس يا بنيتي ماتبين ندق على منيره ولا أبوك..
رهف وهي تمسح دموعها بألم: لايا عمه..حتى لوتدقين ما حد رح يهتم.. بس إذا ولدت خلي مشاري يدق على صالح ويقوله..
لطيفه:انشالله..
خلاص يمه أنابروح ..الله يهون عليك..ولاتخافين كل هالألم والخوف بيروح وتنسينه لاسار ولدك ولا بنتك بين إيدينك..
رهف بتردد: عمه..
لطيفه:لبيه يارهف..
رهف وهي تبكي: عمه...
إذا صارلي شي.. إنتبهي لولدي ياعمه.. أبيك تربينه نفس تربية أبوه وأعمامه..
لطيفه وعيونها مليانه دموع: إذكري الله يارهف لاتقولين هالحكي..
رهف: تكفين ياعمه إسمعيني..
أنا تشردت وذقت الويل بعد وفاة أمي ..مابي ولدي يعيش نفس مأساتي..
أبيه يعيش بحب أبوه وحبك وحب كل اللي حولينه..
ما أبيه يفقدني ويحس بالنقص..
لطيفه ودموعها تنزل غصبن عنها:يارهف وشهالكلام ..
ماحد مربي ولدك ولاحد منتبه له غيرك..
رهف:عمه..بطلبك طلب أخير..
لاصارلي شي.. لاتزوجين مشاري إلا برضاه..[وتشاهق رهف من البكي]
تكفين ياعمه تكفين.. لاتزوجين مشاري إلا البنت اللي يختارها ويطلبك تخطبينها..
,,وتقوم لطيفه من مكانها وتحضن رهف وتهديها وتودعها وتطلع لعبدالرحمن ويتوجهون للبيت..
وطول الطريق ولطيفه دموعها ماوقفت وقلبها قارصها من وصية رهف وكلامها وطول الوقت تدعي إن الله يستر..
***
****
*****
(في بيت أم عبدالرحمن..)
,,الساعه 11 الصباح..
..كانت أم عبدالرحمن جالسه على الكرسي اللي جنب سرير مشاري ومتخدده وتطالع فيه وهونايم بكل براءه..
لطيفه: ياربي اشهالحاله وشهالمصايب اللي إحنا فيها..
الولد متكسر وفوق الشهرين وهومنسدح على سريره.. وزوجته ولادتها متعسره وتهوجس بالموت.. وأسيل لاتمتعت لابزواج ولابحياه مثل باقي بنات خلق الله..
لكن لا إعتراض..
يارب..يارب... سهل ولادة رهف وقومها بالسلامه..
يارب أنا عارفه مخاطر ولادة الثامن ..بس يارب إكرمنا برحمتك وفضلك وفرحنا بولادة رهف وقومتها.. يارب..
,,,
,,,
شوي ولا الشغاله تدق الباب دقه خفيفه..
,,وتقوم لطيفه وتفتح الباب..
لطيفه: هااه..إشفيه؟؟
جيسي: مدام..بابا عبدالرحمن يكلم تليفون..
,,وتطلع لطيفه برا الغرفه وتسكر الباب وراها بشويش وتنطلق للصاله وتمسك التليفون بلهفه..
لطيفه: ألــــو..
عبدالرحمن: هلايمه..السلام عليكم..
لطيفه:عليكم السلام..
عبدالرحمن: يمه المستشفى دقوا علي..
لطيفه بلهفه: هاه..بشـــر..
عبدالرحمن:رهف ولدت وجابت ولد..
لطيفه وهي تبكي: يــــــاربي لك الحمد..الحمد الله ياربي..الحمد اللــــه..
عبدالرحمن:الحمــدالله على كل حال..بس يقولون الولد تعبان شوي..
لطيفه بخوف: وشفيه؟؟
عبدالرحمن: والله إني مادري بس الولاده تعسرت إلين سار الوضع خطير وولدوها قيصري..
لطيفه: قيصري..طب ورهف كيفها الحين..
عبدالرحمن: يمه.. رهف..
لطيفه:عبدالرحمن تكلم..
ياعبدالرحمن تكلم رهف وشفيهــــا..
عبدالرحمن: رهف يمه بعد ماولدت دخلت في غيبوبه... والدكاتره يقولون الوضع خطير..
لطيفه وهي تضرب على فخذها: غيبــــوبه..
***
****
*****
انتهى الجزء الرابع عشر..
$بعد السعاده اللي عاشوها مشاري ورهف..
*كيف بيستقبل مشاري خبر غيبوبة رهف..
*كيف بتكون فرحته بالمولود الجديد, ووش بيسميه..
*هل بتسترد رهف وعيها بعد هالغيبوبه..
*كيف بتتضح حقيقة أبرار لفراس..
*هل بيطلق فراس أبرار إذا عرف الحقيقه..
*يبقى السؤال هل بيستمر زواج أسيل ومعاذ..
*وإذا حصل وتطلقت أسيل هل بيكون في مجال لبدء حياه بين صالح وأسيل؟؟؟

































(الجـــزء الخامس عشر..)
(في شقة فراس..)
فراس وهو يهز رجله:
إنـــا لله كل هذا حياء.. لاجت أفطرت.. ولاهي براضيه تجي تجلس معي والظاهر إن حتى الغداء ميبجايه تتغدى معي..
لكن أنا من جدي قاعد لحالي ومخليها ضعيفه..بروح أحاول فيها وأهديها إلين تجي
,,كانت جالسه على طرف السرير ومسنده ظهرها عالمخده وضامه رجولها لصدرها ومنظر ناصر وهوينتزع أغلى ماعندها يتكرر قدام عيونها..
كانت ترفع راسها بألم وتغمض عيونها ومستغربه ليه من يوم مادخلت شقة فراس وهالمشهد يتكرر ويتكرر وموقادره تبعده من بالها..
,,مادرت إلا بإيد فراس على كتفها وبس حست فيها شهقت..
فراس باهتمام:بسم الله عليك.. أبرار والله ماكان قصدي أخوفك..
,,أبرار بلعت ريقها وهي تناظر لفراس وهوجنبها عالسرير ومقرب منها بشكل كبير..تمت تناظر وتتفحص ملامح فراس وهي مذهوله وتتنفس بسرعه..
فراس وهو يبتسم بحب:أبرار..إشفيك؟؟
أبرار بنفسها: نـــــــاصر..
,,فجأه شهقت وكش جسمها وانهارت تبكي وحطت يدينها على وجهها..
فراس بخوف: أبرار..حبيبتي ماله داعي هالخوف كله..إهدي..
,,رفعت راسها أبرار وشالت يدينها من على وجهها ورجعت لأرض الواقع واستوعبت إن اللي قدامها فراس..
فراس وهو يمسح دموعها:حرام عليك تتعبين هالعيون بهالدموع..
بللاه هذي حاله..حارمتني منك وتاركتني وقاعده.. [ويمسك كفها برفق]
يللاه قومي معي ..تعالي لاتخافين مني..
عالأقل كوليلك تفاحه وخوخ..عشان خاطري ..
,,بلعت أبرار ريقها وقامت من عالسرير وهي تناظر لفراس وهو مبتسم ويسحبها مع يدها بكل حنان ولما قامت حط إيده على خصرها وهويمشي معها خطوه بخطوه إلين جلسها عالكنبه بالصاله وجلس جنبها..
أخذ تفاحه وقطعها أرباع وأخذ ربع وقربها منها وقال:
يللاه حبيبتي خذي هالتفاحه من إيدي..يللاه لاتكسفيني..
,,مدت يدها أبرار وهي ترتجف وخذت التفاحه وهي في عالم ثاني..
أبرار بنفسها: اللـــــــه.. ياحلو هالشعور..
ياحلو الإحساس بالأمان والإستقرار..[وترفع عيونها وتناظر لفراس]
قد إيش إيدينك دافيه.. قد إيش إنت حنون..وقد إيش أنا حقيره وما أستاهل..
لوتدري يافراس بسواد وجهي..ماقربت.. ماقربت ولاقدرت حتى تطالع فيني..
الله يكون بعونك يافراس ويصبرك لاعرفت المصيبه اللي رميت نفسك فيها..
فراس: ها حبيبتي..تدللي وين تبين نروح نتغدى.. بأي مطعم..
,,أبرار ماترد وساكته وعيونها بالأرض..
فراس: ترااني ميييت جوووع.. طب شوفي في مطعم دايم وأنا عزابي أسمع الشباب يتكلمون عنه..هو قديم..بس ماجت فرصه ورحته..
ستيك هاوس.. وشرايك نروح نتغدى فيه؟؟
أبرار:...
فراس: خلاص..السكوت علامة الرضى..
إلبسي واجهزي بعد ساعه عشان نروح..طيب ياقلبي..
***
****
*****
(في بيت أم عبدالرحمن..)
,,بغرفة مشاري..
,,كان باستغراب يقرب عكازاته منه ويتسحب على آخر السرير عشان يقدر يقوم..
مشاري: معقول الساعه وحده الظهر ماحد صحاني..
لا أمي ولارهف؟؟ وش السالفه..
,,دخل مشاري الحمام وتوظى وجلس على طرف السرير وكبر وابتدا يصلي..
,,دخل فيصل بجانب عمه تركي وجلسوا عالكنب وهم يناظرون لمشاري ويدعون بقلوبهم إن الله يستر..
,,سلم مشاري والتفت على تركي وفيصل وابتسم..
فز فيصل عند عمه عشان يساعده يرجع على السرير..
مشاري وهو يعدل المخده: آآآه...غريبه جايين من دواماتكم بدري؟؟
تركي: كيفك اليوم؟؟
مشاري: الحمد الله تمام..[ويلاحظ ملامح القلق بوجه فيصل وتركي ويعقد حواجبه]
عسى ماشر وشفيكم..وين أمي وزوجتي؟؟
,,تركي ساكت ويطالع بفيصل..
مشاري بقلق:فيه شي..تكلمـــوا؟؟
تركي:زوجتك تعبت بالليل أمس وودينها المستشفى وأمي عندها الحين..مبروك يامشاري جاك ولد..
مشاري وعيونه مفتوحه عالآخر وطاير من الفرحه: صــــــــدق..
أنا جاني ولد... خـــــالد..خــــــالد..بسميه خالد..
يعني أنا سرت أب .. أنا سرت أب.. أنا أبو خالد..
فيصل وهو يبوس مشاري على خدوده: مبروك يا عمي مبرك..
مشاري وهو مبتسم: طب يللاه يللاه..تعال ساعدني يافيصل.. أبي أغير ملابسي عشان أروح أشوف رهف وخالد..
,,نزل فيصل راسه وناظر لتركي ولسانه معقود وموقادر يتكلم..
,,كان مشاري يدور بنظره بين فيصل وتركي وقلبه قارصه وحاس إن فيه شي...
تركي: مشاري..
رهف بعد ماولدت..
دخلت في غيبوبه.. والدكاتره مو عارفين متى تقوم منها..
مشاري بعد ماتلاشت ملامح الفرح من وجهه:
غيبـــــوبه... وليــــه؟؟ وش سبب هالغيبوبه؟؟
فيصل: قضاء وقدر ياعمي..
مشاري وصوته مبحوح وعيونه مليانه دموع وبقمة العصبيه:
لاااا.. موقضاء وقدر..
أكيد زودولها جرعة الأكسجين..أو المخدر..
أكيــــد هذي حالة مستشفياتنا .. هذي حالتهم..
يذبحون بخلق الله ويقولون خطأ طبي غير مقصود..
واللـــــه..واللــــــه ... لويسير لها شي وماترجع تقوم لأدفعهم الثمن غالي..
فيصل: ياعمي تعوذ من ابليس وهدي عمرك..
إنت تعبان وصحتك ماتستحمل.. والمفروض تتماسك وتسير أقوى عشان ولدك هالضعيف.. وانشالله إن رهف بتقوم..
أنا قبل ما أجي وأقولك فتحت النت وقريت عن الغيبوبة اللي تجي الحريم اللي يولدون قيصري..
أغلب الدكاتره يقولون فتره بسيطه ويستردون وعيهم..
مشاري وهويحاول مايبكي: يعني إشلون..
أنا موفاهم.. إشمعنى رهف من بين كل الحريم تجيها هالغيبوبه..
كل حريم خلق الله يولدون ويقومون بالسلامه من غير أي مضاعفات ..
وشمعنى هالضعيفه.. بس لا... لآآآ ماظنيت رهف ترجع تقوم ...
رهف صحتها تعبانه وماتتحمل.. ياكثر مامرضت وتعرضت لضغوط وياكثرماطاحت وأنــــــا بكبري طحت عليها...
,,ويتذكر فيصل ضربته لرهف بالدرج والمشاكل اللي حصلت لها..
ويغمض عيونه بألم وهو يلوم نفسه وعمه...
تركي: مشـــاري..
خلاص.. إهدأ وأمسك نفسك إنت تعبان.. وإحنا بانتظار عبدالرحمن وأمي يجون من المستشفى ويطمنونا ونعرف كل شي..
***
****
*****
(في المستشفى...)
,,كانت لطيفه حاطه إيدينها عالقزازه وعيونها مليانه دموع وتناظر لخالد...
اللي كان ملفوف بمهاد أبيض وفاتح نص عيونه اللي كانت تتحرك بسرعه حتى وجفونه مقفله وصدره يطلع وينزل بسرعه وكأنه عارف بحالة أمه وقلقان عليها..
,,حط عبدالرحمن يده على يد أمه وقال:
يــاحليله هالصغير.. يشبه أبوه وهو صغير..
لطيفه بألم: صح.. بس فمه مثل فم أمه.. يارب لايحرمه منها..
عبدالرحمن:خلاص يمه نرجع البيت عشان ترتاحين؟؟
لطيفه: طيب تركي علم مشاري؟؟
عبدالرحمن: تو تركي كلمني ويقول قاله..
لطيفه: ومشاري إش سوا؟؟
عبدالرحمن: يقول تركي إنه إنصدم ويللاه يللاه هدا..
لطيفه:توكلنا على الله وأنا أمك.. مشينا البيت..
***
****
*****
((في بيت أبو متعب..))
أم متعب: وبعدين يامعاذ هذي حاله... الناس شبيقولون علينا؟؟
معاذ: أنا ماعلي من كلام الناس..
أم متعب: وبالله هذي حاله.. تارك دوامك وأشغالك ومعطل نفسك وقاعد هنا..
معاذ: يمه يرحم والديك حكينا بهالموضوع ألف مره وأنا قلتلك قراري ورايي..
متعب: بس يا معاذ مافيها شي إذا تراجعت عن قرارك..
إنت نفسك رحت للشيخ اللي أسيل تقرا عنده... وقالك قد إيش حالتها صعبه وهالعين اللي فيها قويه وعلاجها يطول..
وأبوها إنسان فاهم وعاقل وموضوعي وقالك إذا إنت تبي تطلقها مسموح ولاحد بيشيل عليك..
معاذ: بس أنا ما أبي أطلقها..
أستغني عن روحي ولا أستغني عن أسيل..
متعب: ياخوي الله يهديك..
ماحد يلومك والكل يعرف إنك تحبها وهالشي اللي هيه فيه هي مسكينه مالها ذنب ولا يد فيه..
بس كل مال حالتها تتدهور وحتى القراءه ماجابت معها نتيجه..
وإنت تظلم نفسك... وتظلمها مسكينه..
معاذ بصدمه: أنا أظلم أسيل؟؟
متعب: إي تظلمها بتمسكك فيها..
واللي يحب أحد يا معاذ لازم يظحي لحبيبه.. البنت ماطاحت ومرضت إلا بسبب زواجك منها.. ويمكن لا إنفصلتوا تتحسن حالتها..
,,بلع معاذ ريقه وهو يناظر تحت ومصدوم ومومصدق إن بعده عن أسيل هو حل..
أم متعب: وبعدين يامعاذ حتى لو البنت صارلها تحسن بسيط ورجعتلك.. وشدراك يمكن تنتكس وترجع أسوأ من أول..
,,تضايق معاذ بشده وأخذ مفتاحه وركب سيارته وجلس يدور بالشوارع وهو موعارف وين يروح..
***
****
*****
( في بيت أم عبدالرحمن..)
,,في الصاله..
,,كان الكل مكتئب وحزين وفرحان بخالد وبنفس الوقت زعلان على حالة رهف..
حتى الأطفال مكتئبين وجالسين مصدومين وحاسين بإحساس الكبار وصدمتهم..
,,كانت أسيل منسدحه عالكنبه وحاطه إيدها على عيونها وتبكي وتون ومنهاره..
وإيمان عند راسها وتمسح على شعرها وتحاول هي ومنى وأسماء فيها تسكت وتهدا..
أسيل: ياربي إشهالحظ إشهالحظ..
وشهالمصايب اللي إحنا فيها.. نطلع من حفره نطيح في حفره أكبر..
مسكينه رهف .. مسكينه..
لابحياتها مع أهلها سعدت ولابزواجها سعدت.. ولابولادتها لأول فرحه لها تهنت..
ويادوبك صفت حياتها مع مشاري راحت وخلت كل شي..
منى بحزم: أسيـــــل..
خلاص..قلنالك المره ما ماتت وشفيك تفاولين عليها..
وبعدين قصري حسك لايسمعك عمك مشاري مو بناقص..بروحه مسكين من يوم سمع الخبر وهو ماهدا ولا ارتاح..
أسماء وهي مهمومه وتحس بكتمه فظيعه:أسيل تعالي معي فوق ارتاحي قومي يللاه..
أسيل: مانيبرايحه مكان لين أشوف أبوي وجدتي وأتطمن على رهف..
,, عبدالرحمن: السلام عليكم..
الكل وهو ينظر بلهفه: عليكم السلااام..
,,وكانت لطيفه تمشي ورى وهي تعبانه وباين عليها الضيق والألم..
وتفز إيمان للمطبخ عشان تجيب للطيفه مويه..
عبدالرحمن: مشاري داخل؟؟
منى: إيه داخل ومعاه تركي وفيصل..
,,ويتوجه عبدالرحمن لغرفة مشاري..
منى: بشري ياعمه إنشالله رهف قامت؟؟
لطيفه وهي تشرب المويه بمراره: وين تقوم..
في غيبوبه والأكسجين عليهاوالأجهزه والأسلاك والأنابيب محاوطتها من كل مكان..
,,,نحيب أسيل المكتوم يزداد..
إيمان: طيب ياعمه والولد ..كيفه..
لطيفه وهي تبتسم بألم: بسم اللــه عليه... يــــا زينه..
يشابه أمه وأبوه.. صحيح إنه تعب بعد ولادته بس إستقرت حالته..
,,وتناظر لأسيل بكل رحمه وقلبها يعورها..
لطيفه: كان ماقلتولها..
منى: شنسوي ياعمه الكل درى ومن يوم مادرت ماسكتت..
لطيفه: وش نسوي قضاء الله وقدره..
,,وتقوم لطيفه وتقول:
أنا بروح عند مشاري أشوفه..
***
****
*****
( في شقة فراس..)
فراس: بالله وشضرك لو لبستي ورحنا المطعم تغدينا وغيرنا جو..
أبرار:.....
فراس: بس يللاه ماتنلامين..
أعرف مغص البطن وثقالة دمه.. ووشلون الواحد يتنكد وينقلب حاله لاحس بالمغص..
بس هاه بكره انشالله مافي مجال من أول اليوم بنطلع نتمشى ولابنرجع إلا آخر الليل..
هاه حبيبتي إشقلتي..
,,ويقرب فراس من أبرار ويحط إيدينه حاولينها وهومبتسم على أمل إنه يحظنها..
لكن أبرار فزت بسرعه ونفضت إيدينه وانطلقت لغرفتها..
,,هز فراس راسه وقال:
إنا للـــــه وبعدين معها هذي.. وشسالفتها؟؟
أحس خوفها مو طبيعي.. لايكون تعبانه وماقالوا لي..
آآآه يابنت خالتي.. بس ياليت الله يهديك وتهدين شوي وتخلينلي فرصه...
***
****
*****
(في بيت أم عبدالرحمن..)
,,في غرفة مشاري..
كان متسند وجالس عالسرير ويتنفس بصعوبه وماسك جوال عبدالرحمن بيده وكل شوي يرجع يعيد مقطع الفديو..
فيصل وهو ملزق راسه جنب مشاري: ماشالله يامشاري..
يهبل إسم الله عليه.. تصدق يشبهلك...
تركي: خلاص عاد..
عطوني الجوال بشوفه..
,,مشاري وهو يوقف المقطع ويرفع عيونه اللي كانت مليانه دموع ويبلع ريقه بألم وبصوت مبحوح:
يعطيك العافيه ياعبدالرحمن..
,,وينط تركي وياخذ الجوال من يد مشاري...
تركي: خلني أشوف خلودي..
عبدالرحمن: خلاص يامشاري قررت تسميه خالد..
مشاري وهو يتنهد: هااه... إيه...
على عمه الله يرحمه..
لطيفه: الله يحفظه إنشالله ويخليه لك..
,,كان مشاري يحس نفسه مخنوق ويتنقل بنظرات الحيره والخوف اللي تحمل مية سؤال وسؤال بين أمه وعبدالرحمن..
,,بعد ما لطف عبدالرحمن الجو وهدأ قلوب الكل بمقطع الفديو لخلودي الصغير.. أخيرآ قرر إنه يبدأ الكلام ويرحم قلب مشاري...
عبدالرحمن: مشاري..
أنا عارف إنك ميت وتعرف حالة رهف بالضبط.. وعارف إنك زعلان وثاير وتلوم المستشفى عاللي صار..
زوجتك يامشاري مثلها مثل أي وحده دخلت المستشفى وهي مستعده للولاده..
لكن لما شافوا الدكاتره إنه كل مال نبض الطفل يضعف وكل مال جهد رهف يضعف على طول قرروا يولدونها قيصري..
وولادتها القيصريه والمخدر ماله أي دخل بالغيبوبه اللي صابت رهف..
لاتخاف أنا ماسكت وحققت بالموضوع وأخذت كذا دكتور لها موبس الدكتور اللي سوالها العمليه..
الكل قال عن السبب الرئيسي بغيبوبة رهف فقر دم شديد وسوء تغذيه وضغوط نفسيه طول فترة حملها..
فيصل: طب يبه ماقالوا لك متى تقوم؟؟
عبدالرحمن: كلهم يقولون العلم عند الله..
تركي: طب وخالد؟؟
,,كان مشاري مدنق ومصدوم من كلام عبدالرحمن وبس سمع تركي يقول إسم خالد..
رفع راسه وصورة أخوه خالد قدام عيونه..
عبدالرحمن: لا الولد طيب ويقولون نقدر ناخذه البيت بعد بكره...
,,غمض عيونه مشاري وقال بنفسه:
سبحان الله كنت حاسس إن هالولد بيطلع من المستشفى ويجي عندي البيت لحاله من غير أمه..
يا الله ياكثر ماحلفت إني أطلقك يارهف وأنتزع ولدك منك وأخذه وإنتي أرجعك بيت أهلك.. ياكثر ماهددتك وخوفتك وعيشتك برعب إني أحرمك منه..
لكن الله إنتقم مني فيك.. وخذك بدون إرادتي أو إرادتك..
مشاري يلتفت لعبدالرحمن ويتكلم بصعوبه: مسموح لها الزياره؟؟
عبدالرحمن: إي مسموح..بس لوقت قصير..
مشاري: بروحلها..
عبدالرحمن: مشاري إنت تعبان ونفسيتك تعبانه ولو تروح عندها مابتلقى منها أي ردة فعل بيضيق صدرك وتتعب قلبك وتتعب زوجتك معاك وبس..
مشاري بضيق: وولدي.. أخليه مرمي هناك..
ورهف تقعد لحالها بالمستشفى.. وجود أحد جنبها ضروري مهما سار هذي مره موكفايه في ولادتها أنا مندفس نايم..
لطيفه: يامشاري لاتضايق عمرك ونفسك..
ترى أنا جايه بس أغير هدومي وأتحمم وارتاح وأرجع لرهف وخالد..
لاتخاف يا مشاري لاتخاف.. رهف ضعيفه ووحيده مالها إلا الله ثم إحنا.. موبعدله نخليها ..
ياعمري على رهف الله يستر لاتسير زي أمها..
أمها ولدت بها وقعدت يومين وتوفت.. وتشردت هالرهف بعد موتها.. لكن الله كريم انشالله إنها تقوم بالسلامه..
تفاجأ مشاري وقال: أم رهف ميته..
وأنا أقول ليش دايمآ تقول أمي منيره.. وليش تتكدر لاحد جاب سيرتها أثاريها مرة أبوها...آآآه يارهف..
,,سكتت لطيفه ثواني وتذكرت شكل رهف قبل ولادتها وتذكرت التوصيات وعورها قلبها وبعد تردد قالت:
مشاري ترى زوجتك قبل ماتولد وصتني أقولك تعلم صالح إذا ولدت..
إبتسم مشاري بألم وقال بنفسه:
كنها داريه إنها مارح تقدر تقوله بنفسها..
,,بعد هالكلام الكل طلع وترك مشاري معاه فيصل..
مشاري وهوماسك جواله: فيصل..خذ كلم صالح أخو رهف وقوله اللي صار..
مالي خلق أسمع صوت أحد ولاأكلم أحد..
,,مسك فيصل الجوال وهوحاس بصعوبة هالمهمه ويقول بنفسه:
لاحول الله.. عاد إلا صالح أحسه ضعيف وحساس ومن كلام مشاري إنه يموت بإخته..وتوه مسكين مزوج إخته الثانيه وفرحان فيها.. الله يعينه لاسمع الخبر..
***
****