ديوان الشاعر سعد علوش

::
.
الجرح ماهو خاطر شوي ويروق
الجرح حتى لو تشافى يعلّلْك
::
وإذاك متحمس متاهات وطروق
انا تعبت اشد حيلي واحاولك
::
سماي ماشي شمس ورعود وبروق
والريح ماهبّت ولايجري الفلك
::
والقلب ناشف بحر..وشقوقه شقوق
وشلون بيكّود سحاب ويبلّلْك
::
ياظامي انا اظما..ومتشبع حروق
وإذاك ضامي للمواصل انا هلْك
::
هلْك..ووقف في وجهي الاصل والذوق
والمجتمع,والعرف,والفقر,وآهلك!
::
متعومس..وحزن النبلاء مرموق
يعني لو احتاج إلك ماجيتك اسألك
::
اللي علي اشكي.. واعاتبك برفوق
واقول لك ودّي ماعاد آتأملك
::
من دوة الايام ياخوك مخنوق
الوقت مشاني من السلك للسلك
::
ازل خطوه بس ما ازل منطوق
ولو صارت ابا احب خشمك واجاملك
::
يبقى البني آدم مجرد ومخلوق
مَلِك..ولكن في الحقيقه بلا مُلْك
::
والناس عوق الناس..والدرب مسبوق
تتعب على اشيا فـ الآخر ماهي بإلك
::
كذاب قايل:كل مطرود ملحوق
سنين وانا اطردك وازريت لا اوصلك
::
كنك تطيش وكني ادور في طوق
كل ماوصلت آخرك يطلع لي اولك
::
ياليت مافي خاطري شوق وفروق
ماكان حسيت ان انا بس منك وإلك
::
الشوق ماهو رعشه وقبضة عروق
وماهو اللي من شينك فـ عينك
يجمّلك
::
وماهو شعور يخالج الروح برفوق
وتطير..ولا ودّك انها تنزلك
::
الشوق هذا..والا انا شوقي البوق
ماقد حصل في شوق هذي ولا تلك
::
تدري وش اسوي الى اضناني الشوق
اسوي بعيوني كذا..واتخيلك
::
واقربك واتوق..واتوق..واتوق
واكثر واحلف ماعاد اقللك
::
واصوّرك في الموق..وتكبر على الموق
وتطيح مع دمعي على ايدي واقبلك
::
هذا غلاي اللي مع الدم مدقوق
ولاعاد تسأل عن شعوري بزعلك
::
محبةٍ ماهيب من طارف السوق
لو انك توكّل..كان والله لا اكلك
::
جيتك حقوق ورحت ماعندي حقوق
وان قلت مااحبك ابجحد مواصلك
::
احبك!!!!؟
الا يابري حالي وعوق
من كثر ماحبك اخاف اني اقتلك