حلآة الرجـل لا منه جرح روحن يداويهاا

نا يعجبني الرجل الأصيل الشهم عالي الشان
عزيز النفس كسب الطيب عاده ما يخليها



وأحب اللي بوقت اللازمه يصهل صهيل حصان
وتعجبنــي ريـاجيلٍ بعيــداتٍ هـقــاويهــــــــا



وأحب اللي ليا منه علا في جوه الدخان
يوردها حياض الموت روحه ما يداريها


إلى منه قعد سلطان وإلى منه ركب شيطان
قوي الباس عرب الساس خيله ما يعفَيها



وأحب اللي ستر وجهه شراه بغالي الأثمان
إلى من باعو الشيمه بغالي الروح يشريها



وأحب اللي يخاف الله يجيك من العقل رويان
يشيـر بخير وأهـل الخير للخيـره يدلـيهـــــا



وأحب الشهم ممدوح السجايا صافي الوجدان
إلى من جــوه ضيـفـانه على نفسـه يبديهـــا



وأعز اللي يهلي بالضيوف ويشعل النيران
وأبي قولة هلا من قلب والعشيات ما ابيها



أبــي الـدله وأبـي الفـنجال أبـي الترحيب بالضيفان
أبي جلسة نشـامى راعــي المــجـلس يـقـهــويـهـا



أبي لـــي سالـفة عــدله مـعـاهــا من الشعر قيفان
تشدك حكــمة الأجـــداد يشـــدك صـــوت راويـــها



أبي النخوه وأبي الفزعه وأحب مجالس الشجعان
هـل الــــعــادات والفزعــات نِـعم لا حــل طاريـهـا



هل الشيمه هل القيمه هل المعروف والإحسان
هل الـتـقـدير والتـأثير واللـي بيض أياديـهــا



وأحب اللي ليا جوه النشامى يفتح البيبان
كريــمٍ من قــديم الوقت ليا صكت لياليـهـا



أحب المرجله وأصحابها وأأأقدر الفرسان
بخيصٍ في معانيهـا قبل لبحث خوافيهـا



وأعرف اللي يخوض المعركه لا صار بالميدان
يـمـشـيـهـا علـى رايـه ويـاخذهـا ويـعـطيهــا



وأحب اللي سوالفهم ذهب موزون بالميزان
مـهـو خبلٍ يخم السالفـة بعـديـن يخـطيـهــا



وأحب اللي رفع نفسه وجنبه مجلس الحقران
حشيـمٍ ما لقـى حشـمـه تـركهـا مــا يدانيهــا



عرف نفسه لزم حده ولا هاين ولا ينهان
إلى من زادت اللجه يجنب عن بلاويـها



وأحب من الرجال اللي يسمى شمعة الديوان
إلا مـنـه تـحـدث كــل كـلـماتــه ينـقـيهــا



ولا أحب اللئيم اللي تصيَد زلةٍ بلســان
إلى منه سمع زلـة رفيقه مـا يغطـيهــا



وأحب اللي ليا سوى غلط قال العفو غلطان
[حلاة الرجل لا منه جـرح روحن يـداويهــا]



ترى اللي يشد في رايه على طول المدى خسران
يـضـيـع ولا يـطيـع ولا بغـاهـا مــا يـلاقـيـهــا ..

م/ن