‏قهاوي الصبر

ياراعي الشور ماعندي للاحزان شور
اشواري المضمحله مات عرابها

ماباقي الا الصبر والا الليالي دبور
وقهاوي الصبر مبطي مل شرابها

لو الديار العزيزه تستثير القبور
تصيح حول القصيم وينطق ترابها

وتعود لاول زمن واخر محطة ظهور
قبل العرب لا تدرهم هيبة ركابها

انا ادري انه لحقك بتالي الوقت جور
واجبرك تصبر على الدنيا وتشقابها

وقامت زحول المصاعب تقلب الليل نور
وتمد لك كف للامجاد ترقابها

جتك المجاديف لكن عاتيات البحور
تلعثمت لين صاح الحلم باسبابها

الواقع المر يبني للمتاهات سور
ياحسبي الله على الضيقه وجلابها

ياعازف الناي والدنيا سراب وتدور
وللحين تعطي ظهرها وجه طلابها

لو تعترف بالحرار وتنحني للصقور
ماوقفت دون فرحه طول غيابها

يااشجع من الموت لاردت لفعل الطيور
مخلابك الحر لكن حظك غرابها

الليل كبل يدينك والهواجيس بور
واحلامك البيض طول الوقت قفابها

راحت وانا منتظر بكره تزين الامور
واقلب النار واونس حر مشعابها

اذكرك لا طاح دمعي واشربته السطور
وافديك لا خانت الاصحاب باصحابها

يااقرب من النفس ماترجم شعوري شعور
لو اني ارخي عليك العين واهدابها

لو منت بالبال ماعاف القصيد الصدور
ولا شق حدب الضلوع ولا فتح بابها


...