لاتعتذر!!!!!!!

لاتعتذر ماعاد فيها معاذير
أنا على خبرك وصدري شمالي

منك الخطاء مدموح من غير تبرير
ومن دمحة الزله يدوم الوصالي

وإن صار في جو المحبه معاصير
الله يبدّلها .. بجوٍ خيالي

لوكان تدري في غيابك وش يصير
إن غاب زولك مايغيب إتصالي

بيني وبين الهم والحزن تصوير
وعند البشر كنّي عليك متعالي

وأصد لا شافوا بوجهي تعابير
من شافني كنّي من الهم سالي

ياللي وصالك غير وموادعك غير
ارفق بحالك زين .. وارفق بحالي

لاسقت لي عمرك بحب وتباشير
أسوق لك روحي وحالي ومالي

لاشانت بوجه المحب المقادير
يسري مع الهاجس وبرق الخيالي

يسرح بهالدنيا بحلو التفاكير
ولولا الأمل ماتت طنون الرجالي

لعيونك الحلوه تهون المخاسير
وعسى السعد والخير فالك وفالي

إن جيت لك عندي معزة وتقدير
وإن غبت غالي وإن تغليت غالي

تدري فمان الله تصبح على خير
بيني وبينك .. مقبلات الليالي
لفيصل بن راجس

راقت لي جداا

مجنون قصايد معجب بهذا